(1)

Skont l-Artikolu 61(1)(d) tar-Regolament (KE) Nru 1234/2007, iz-zokkor jew l-isoglukożju li jiġi prodott lil hinn mill-kwota msemmija fl-Artikolu 56 ta’ dak ir-Regolament jista’ jiġi esportat biss skont il-limitu kwantitattiv li għandu jiġi ffissat mill-Kummissjoni li jirrispetta l-impenji li jirriżultaw mill-ftehimiet internazzjonali konklużi mill-Unjoni.

(2)

Regoli dettaljati tal-implimentazzjoni għall-esportazzjonijiet barra mill-kwota, b’mod partikolari li jikkonċernaw il-ħruġ ta’ liċenzji tal-esportazzjoni, huma stabbiliti bir-Regolament tal-Kummissjoni (KE) Nru 951/2006 (2). Madankollu, il-limitu kwantitattiv għandu jiġi ffissat għal kull sena tas-suq, fid-dawl tal-opportunitajiet possibbli fis-swieq tal-esportazzjoni.

(3)

Għas-sena tas-suq 2009/2010, ir-Regolament tal-Kummissjoni (KE) Nru 274/2009 (3) ffissa l-limitu kwantitattiv għall-esportazzjonijiet taz-zokkor barra mill-kwota għal 1 350 000 tunnellata. L-applikazzjonijiet għal-liċenzji tal-esportazzjoni malajr qabżu dak il-limitu. Għalhekk, ir-Regolament tal-Kummissjoni (KE) Nru 1106/2009 (4) stipula perċentwali ta' aċċettazzjoni għall-ħruġ ta' liċenzji tal-esportazzjoni, u ssospenda t-tressiq tal-applikazzjonijiet għal liċenzji tal-esportazzjoni għal zokkor ’il barra mill-kwota. Fi żmien li fih ġie ffissat il-limitu ta' 1 350 000 tunnellata, il-kundizzjonijiet ekonomiċi kienu tali li ma kienx possibbli li wieħed jeskludi li l-esportazzjonijiet taz-zokkor barra mill-kwota setgħu ġew ikkunsidrati li kienu qed jiġu ssussidjati għax l-ispiża medja tal-produzzjoni taz-zokkor fl-Unjoni setgħet qabżet il-prezz tal-bejgħ taz-zokkor barra mill-kwota fis-suq tal-esportazzjoni. Għalhekk, taħt dawn il-kundizzjonijiet ma kienx possibbli li jiżdiedu l-kwantitajiet taz-zokkor barra mill-kwota li jiġu esportati lil hinn mil-limiti li jirriżultaw mill-impenji internazzjonali tal-Unjoni msemmija hawn fuq.

(4)

Mill-bidu tal-2009, il-kundizzjonijiet ekonomiċi globali nbidlu b'mod sinifikanti fis-settur taz-zokkor. Kmieni f'Jannar 2010, il-prezzijiet tas-suq dinji għaz-zokkor abjad żdiedu b'iktar mid-doppju u laħqu madwar 500 euro t-tunnellata fis-suq tal-futures tal-prodotti bażiċi f'Londra. Fl-istess ħin, il-prezzijiet fis-suq taz-zokkor fl-Unjoni naqsu f'konformità mal-prezz istituzzjonali ta' referenza.

(5)

Taħt il-kundizzjonijiet ekonomiċi attwali, l-ispiża medja tal-produzzjoni tal-pitrava zokkrija fl-Unjoni hija taħt il-prezz tal-bejgħ tal-pitrava zokkrija barra mill-kwota. Barra minn hekk, il-prezz tal-bejgħ taz-zokkor barra mill-kwota fis-suq dinji huwa ogħla mill-ispiża medja tal-produzzjoni taz-zokkor fl-Unjoni. Għalhekk, sakemm dawn il-kundizzjonijiet ikunu validi, l-esportazzjoni taz-zokkor barra mill-kwota ma tistax tiġi kkunsidrata li qed tiġi ssussidjata. Konsegwentament, esportazzjonijiet lil hinn mill-impenji sussidjarji tal-esportazzjoni tal-Unjoni jistgħu jsiru mingħajr ma jinkisru l-obbligi li jirriżultaw mis-sħubija tal-Unjoni fl-Organizzazzjoni Dinjija tal-Kummerċ.

(6)

Skont l-iktar tagħrif riċenti, huwa ċert li minħabba kundizzjonijiet tat-temp eċċezzjonalment tajbin fl-2009, fl-Unjoni se jiġu prodotti kwantitajiet kbar ta' zokkor barra mill-kwota. Attwalment, din il-kwantità hija stmata madwar 4 100 000 tunnellata. Meta wieħed jikkunsidra l-possibiltajiet kollha fejn jista' jinbiegħ dan iz-zokkor, b'mod partikolari d-domanda tal-industrija tal-kimika għaz-zokkor industrijali, huwa stmat li mill-inqas 500 000 tunnellata xorta se tkun disponibbli għall-esportazzjoni.

(7)

Fid-dawl tal-provvista żejda prevista fl-Unjoni matul is-sena tas-suq 2009/2010 u l-prezzijiet għoljin b'mod eċċezzjonali tas-suq dinji kkawżati minn sitwazzjoni ta' forniment diffiċli ħafna f'daż-żmien, ikun aħjar li jiġi esportat iz-zokkor żejjed li jibqa' fl-Unjoni minflok ma jiġi trasferit għas-sena tas-suq li jmiss. L-iffissar ta' limitu kwantitattiv addizzjonali fir-rigward tas-sena tas-suq 2009/2010 jippermetti lill-produtturi taz-zokkor u lil dawk li jkabbru l-pitrava zokkrija fl-Unjoni biex jibbenefikaw mill-possibiltajiet attwali ta' esportazzjoni favorevoli. Għalhekk, għandu jiġi ffissat limitu kwantitattiv addizzjonali.

(8)

Issa huwa stmat li l-prezzijiet taz-zokkor fis-suq dinji jistgħu jibdew jonqsu mit-tieni nofs tal-2010. Sabiex ikun żgurat li l-esportazzjonijiet addizzjonali taz-zokkor barra mill-kwota ma jinterferixxux mal-impenji ta' sussidju tal-Unjoni, huwa xieraq li l-applikazzjoni għal-liċenzji tal-esportazzjoni tiġi limitata sat-30 ta' Ġunju 2010 u li l-validità tal-liċenzji tal-esportazzjoni titnaqqas għal xahar.

(9)

L-esportazzjonijiet taz-zokkor mill-Unjoni lejn ċerti destinazzjonijiet fil-qrib u lejn pajjiżi terzi li jagħtu lill-prodotti tal-UE trattament preferenzjali tal-importazzjoni, attwalment jinsabu f'pożizzjoni kompetittiva partikolarment favorevoli. Fid-dawl tan-nuqqas ta’ strumenti xierqa ta’ assistenza reċiproka fil-ġlieda kontra l-irregolaritajiet u sabiex jitnaqqas ir-riskju tal-frodi u biex jiġi evitat kwalunkwe abbuż assoċjat mal-importazzjoni mill-ġdid jew mad-dħul mill-ġdid fl-Unjoni ta’ zokkor barra mill-kwota, ċerti destinazzjoniiet fil-qrib għandhom jiġu eskluzi mid-destinazzjonijiet eliġibbli.

(10)

Il-Kumitat ta’ Ġestjoni għall-Organizzazzjoni Komuni tas-Swieq Agrikoli ma ta l-ebda opinjoni fil-limitu taż-żmien stabbilit mill-President tiegħu,

(1)

Id-Deċiżjonijiet tal-Kummissjoni 2009/367/KE (2) approvat, għas-sena finanzjarja 2008, il-kontijiet tal-aġenziji tal-ħlas kollha ħlief l-aġenzija tal-ħlas tal-Belġjana “ALV”, l-aġenzija tal-ħlas Ġermaniża “Baden-Württemberg”, l-aġenzija tal-ħlas Griega “OPEKEPE”, l-aġenzija tal-ħlas Taljana “ARBEA”, l-aġenzija tal-ħlas Maltija “MRRA”, l-aġenzija tal-ħlas Portugiża “IFAP” u l-aċenzija tal-ħlas Rumena “PIAA”.

(2)

Wara t-trażmissjoni ta' informazzjoni ġdida u wara verifiki addizzjonali, il-Kummissjoni tista' issa tieħu deċiżjoni dwar l-intergrità, il-preċiżjoni u veraċità tal-kontijiet sottomessi mill-aġenzija tal-ħlas Belġjana “ALV”, l-aġenzija tal-ħlas Ġermaniża “Baden-Württemberg”, l-aġenzija tal-ħlas Maltija “MRRA”, l-aġenzija tal-ħlas Portugiża “IFAP” u l-aġenzija tal-ħlas Rumena “PIAA”.

(3)

L-ewwel sottoparagrafu tal-Artikolu 10(2) tar-Regolament tal-Kummissjoni (KE) Nru 885/95 tal-21 ta’ Ġunju 2006 li jistipula regoli dettaljati għall-applikazzjoni tar-Regolament tal-Kunsill (KE) Nru 1290/2005 fir-rigward tal-akkreditazzjoni tal-aġenziji ta’ ħlas u korpi oħra u l-approvazzjoni tal-kontijiet tal-FAEG u tal-EAFRD (3) li jistipula li l-ammonti li jistgħu jiġu rkuprati mingħand, jew imħallsa lil, kull Stat Membru, skont id-deċiżjoni tal-approvazzjoni tal-kontijiet imsemmija fl-ewwel subparagrafu tal-Artikolu 10(1) tar-Regolament imsemmi, għandhom jiġu stabbiliti billi jitnaqqas is-self imħallas matul is-sena finanzjarja konċernata, jiġifieri l-2008, mill-infiq rikonoxxut għal dik is-sena skont il-paragrafu 1. Dawn l-ammonti għandhom jitnaqqsu minn, jew jiżdiedu mas-self skont in-nefqa mit-tieni xahar wara dak li fih tkun ittieħdet id-deċiżjoni dwar l-approvazzjoni tal-kontijiet.

(4)

Skont l-Artikolu 32(5) tar-Regolament (KE) Nru 1290/2005, 50 % tal-konsegwenzi finanzjarji ta' nuqqas ta’ rkupru tal-irregolaritajiet għandu jagħmel tajjeb għalihom l-Istat Membru konċernat u 50 % jitħallsu mill-baġit Komunitarju, jekk l-irkupru ta' dawk l-irregolaritajiet ma jkunx sar fi żmien erba' snin mid-deċiżjoni primarja amministrattiva jew ġudizzjarja, jew fi żmien tmien snin jekk l-irkupru jitressaq quddiem il-qrati nazzjonali. L-Artikolu 32(3) tar-Regolament imsemmi jobbliga lill-Istati Membri biex iressqu quddiem il-Kummissjoni, rapport fil-qosor dwar il-proċeduri tal-irkupru li ġew segwiti b'reazzjoni għall-irregolaritajiet, flimkien mal-kontijiet annwali. Regoli dettaljati dwar l-applikazzjoni tal-obbligu tal-Istati Membri li jirrappurtaw l-ammonti li għandhom jiġu rkuprati huma stipulati fir-Regolament Nru 885/2006. L-Anness III tal-imsemmi Regolament jipprovdi t-tabella mudell li kellha tiġi pprovduta mill-Istati Membri fl-2009. Abbażi tat-tabelli mimlija mill-Istati Membri, il-Kummissjoni għandha tiddeċiedi dwar il-konsegwenzi finanzjarji ta' nuqqas ta' rkupru ta' irregolaritajiet li jmorru lura għal iktar minn erba' snin jew tmien snin, rispettivament. Din id-deċiżjoni hija bla ħsara għal deċizjonijiet ta’ konformità fil-ġejjieni skont l-Artikolu 32(8) tar-Regolament (KE) Nru 1290/2005.

(5)

Skont l-Artikolu 32(6) tar-Regolament (KE) Nru 1290/2005, l-Istati Membri jistgħu jiddeċiedu li ma jiħdux passi għall-irkupru. Deċiżjoni bħal din tista' tittieħed biss jekk l-ispejjeż li saru diġà u dawk li aktarx isiru flimkien jaqbżu l-ammont li għandu jiġi rkuprat jew jekk jirriżulta li l-irkupru mhux possibbli li jsir minħabba insolvenza, irreġistrata u rikonoxxuta taħt il-liġi nazzjonali, tad-debitur jew tal-persuni legalment responsabbli għall-irregolarità. Jekk dik id-deċiżjoni tittieħed fi żmien erba' snin mid-deċiżjoni amministrattiva jew ġudizzjarja primarja, jew fi żmien tmien snin jekk l-irkupru jitressaq quddiem il-qrati nazzjonali, il-baġit Komunitarju għandu jagħmel tajjeb għal 100 % tal-konsegwenzi finanzjarji tan-nuqqas tal-irkupru. Ir-rapport fil-qosor imsemmi fl-Artikolu 32(3) tar-Regolament (KE) Nru 1290/2005 juri l-ammonti li għalihom l-Istat Membru ddeċieda li ma jiħux passi għall-irkupru u fuq liema bażi ttieħdet id-deċiżjoni. Dawn l-ammonti ma għandhomx ikunu ddebitati lill-Istati Membri konċernati u konsegwentement għandhom jitħallsu mill-baġit Komunitarju. Din id-deċiżjoni hija bla ħsara għal deċizjonijiet ta’ konformità fil-ġejjieni skont l-Artikolu 32(8) tar-Regolament imsemmi.

(6)

Hija u tapprova l-kontijiet tal-aġenziji tal-ħlas ikkonċernati, il-Kummissjoni għandha tqis l-ammonti li diġà huma miżmuma mill-Istati Membri konċernati abbażi tad-Deċiżjoni 2009/367/KE.

(7)

Skont l-Artikolu 30(2) tar-Regolament (KE) Nru 1290/2005, din id-Deċiżjoni ma tippreġudikax deċiżjonijiet meħuda sussegwentement mill-Kummissjoni li jeskludu mill-finanzjament tal-Komunità nefqa li ma ġietx effettwata skont ir-regoli Komunitarji,

(1)

L-Artikolu 4 tad-Direttiva 91/496/KEE jipprovdi li l-Istati Membri għandhom jiżguraw li l-konsenji ta' annimali minn pajjiżi terzi huma suġġetti għal kontrolli dokumentati u ta' identità fil-postijiet ta' spezzjoni fuq il-fruntiera sabiex tiġi vverifikata d-destinazzjoni sussegwenti tagħhom, partikolarment fil-każ ta' annimali fit-tranżitu. Dawk il-postijiet ta' spezzjoni fuq il-fruntiera huma msemmija fl-Anness II tad-Direttiva 97/78/KE tat-18 Diċembru 1997 li tistabbilixxi l-prinċipji li jirregolaw l-organizzazzjoni tal-verifiki veterinarji fuq prodotti li jidħlu fil-Komunità minn pajjiżi terzi (2).

(2)

L-Artikolu 9(1) tad-Direttiva 91/496/KEE jipprovdi li l-Istati Membri għandhom jawtorizzaw it-tranżitu ta' annimali minn pajjiż terz għal pajjiż terz ieħor jew għall-istess pajjiż terz, u dan għandu jkun suġġett għal ċerti kondizzjonijiet. B'mod partikolari, il-punt (c) ta' dak l-Artikolu jipprovdi li l-verifiki msemmija fl-Artikolu 4 tiegħu juru li l-annimali għandhom jissodisfaw il-ħtiġijiet tad-Direttiva 91/496/KEE jew, fil-każ ta' annimali koperti mid-Direttivi msemmija fl-Anness A tad-Direttiva tal-Kunsill 90/425/KEE (3), għandhom joffru garanziji tas-saħħa li huma mill-inqas ekwivalenti għal dawk ir-rekwiżiti.

(3)

Id-Direttiva tal-Kunsill 90/426/KEE tas-26 ta' Ġunju 1990 dwar kundizzjonijiet tas-saħħa tal-annimali li jirregolaw il-moviment u l-importazzjoni minn pajjiżi terzi ta’ equidae (razza taż-żwiemel) (4) kif imsemmija fl-Anness A tad-Direttiva 90/425/KEE. Il-Kapitolu III tad-Direttiva 90/426/KEE jistabbilixxi l-garanziji ekwivalenti tas-saħħa għall-equidae.

(4)

Id-Deċiżjoni tal-Kummissjoni 92/260/KEE tal-10 ta’ April 1992 dwar kondizzjonijiet tas-saħħa ta’ annimali u ċertifikazzjoni veterinarja għal dħul temporanju ta’ żwiemel (5) irreġistrati tistabbilixxi l-mudell taċ-ċertifikati tas-saħħa għad-dħul temporanju ta' żwiemel reġistrati fl-Unjoni li jieħu inkonsiderazzjoni s-sitwazzjonijiet differenti tas-saħħa fil-pajjiżi terzi. Dawk iċ-ċertifikati jipprovdu garanziji sanitarji meħtieġa għat-trasport ta' equidae minn pajjiż jew territorju terz jew parti minnu għal pajjiż jew territorju terz ieħor jew parti oħra tal-istess pajjiż jew territorju terz. Il-garanziji tas-saħħa f'dawk iċ-ċertifikati għandhom jitqiesu bħala l-kundizzjonijiet ta' referenza għat-tranżitu ta' equidae fl-Unjoni.

(5)

Id-Deċiżjoni tal-Kummissjoni 2004/211/KE tas-6 ta’ Jannar 2004 li tistabbilixxi l-lista ta' pajjiżi terzi u ta' partijiet mit-territorju tagħhom li minnhom l-Istati Membri jawtorizzaw l-importazzjoni ta' equidae ħajjin u ta' semen, ova u embrijoni tal-ispeċi ekwina (6) tipprovdi li l-Istati Membri għandhom jawtorizzaw l-ammissjoni temporanja u l-importazzjoni ta' żwiemel reġistrati mill-pajjiżi terzi ta' partijiet ta' dawk il-pajjiżi terzi elenkati fl-Anness I tagħha. Hija wkoll tassenja il-gruppi sanitarji ta' pajjiżi terzi skont is-sitwazzjoni tas-saħħa tal-annimali tagħhom. Dawk il-gruppi sanitarji għandhom jiġu kkunsidrati għat-tranżitu ta' equidae fl-Unjoni.

(6)

Id-Deċiżjoni tal-Kummissjoni 2008/907/KE tat-3 ta’ Novembru 2008 li tistabbilixxi garanziji ta’ saħħa għat-trasport ta’ ekwidi minn pajjiż terz għal ieħor skont l-Artikolu 9(1)(c) tad-Direttiva 91/496/KEE (7) tipprovdi li l-equidae fi triqithom minn pajjiż terz għal pajjiż terz ieħor iridu jkunu ġejjin minn xi wieħed mill-pajjiżi terzi elenkati fl-Anness I tad-Deċiżjoni 92/260/KEE. Hija tipprovdi wkoll li dawn l-equidae għandhom ikunu akkumpanjati b'ċertifikat intitolat “Ċertifikat ta' tranżitu għat-trasport ta' equidae minn pajjiż terz għal ieħor”. Dak iċ-ċertifikat jieħu inkonsiderazzjoni l-mudell taċ-ċertifikati tas-saħħa stipulat fid-Deċiżjoni 92/260/KEE.

(7)

Minħabba li l-garanziji tas-saħħa tal-annimali għall-importazzjoni ta' equidae huma għall-inqas stretti daqs dawk għal dħul temporanju ta' żwiemel reġistrati, huwa xieraq li jiġi awtorizzat it-tranżitu ta' equidae li jkunu qed jiġu trasportati mit-territorji elenkati fl-Anness I tad-Direttiva 97/78/KE mhux biss minn dawk il-pajjiżi jew territorji terzi jew partijiet minnhom li minnhom l-ammissjoni temporanja ta' żwiemel reġistrati hija awtorizzata skont id-Deċiżjoni 2004/211/KE, iżda wkoll minn dawk il-pajjiżi jew territorji terzi jew partijiet minnhom li minnhom l-importazzjonijiet permanenti huma awtorizzati skont dik id-Deċiżjoni.

(8)

Fl-interess taċ-ċarezza tal-leġiżlazzjoni tal-Unjoni, id-Deċiżjoni 2008/907/KE għandha tkun revokata.

(9)

Il-miżuri stipulati f’din id-Deċiżjoni huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,