(1)

Skont l-Artikolu 6(2) u f’konformità mal-Artikolu 17(2) tar-Regolament (KE) Nru 510/2006, it-talba mressqa mir-Repubblika Ċeka għar-reġistrazzjoni tad-denominazzjoni “Jihočeská Niva”, ġiet ippubblikata f’Il-Ġurnal Uffiċjali tal-Unjoni Ewropea (2).

(2)

Is-Slovakkja ressqet oġġezzjoni kontra r-reġistrazzjoni skont l-Artikolu 7(1) tar-Regolament (KE) Nru 510/2006. Din l-oġġezzjoni kienet meqjusa ammissibbli fuq il-bażi tal-punti (b) u (c) tal-ewwel subparagrafu tal-Artikolu 7(3) ta’ dak ir-Regolament.

(3)

Fl-oġġezzjoni, is-Slovakkja indikat li r-reġistrazzjoni tad-denominazzjoni kkonċernata tmur kontra l-Artikolu 3(4) tar-Regolament (KE) Nru 510/2006 u se xxekkel l-eżistenza ta’ trejdmarks reġistrati fit-territorju tas-Slovakkja.

(4)

Il-Kummissjoni, permezz tal-ittra tal-24 ta’ Ġunju 2008, stiednet lill-Istati Membri kkonċernati biex jilħqu qbil bejniethom skont il-proċeduri interni tagħhom.

(5)

Minħabba li ma ntlaħaq l-ebda qbil bejn is-Slovakkja u r-Repubblika Ċeka fiż-żmien stipulat, il-Kummissjoni għandha tadotta deċiżjoni skont il-proċedura stipulata fl-Artikolu 15(2) tar-Regolament (KE) Nru 510/2006.

(6)

Fid-dawl tal-informazzjoni provduta mis-Slovakkja, il-Kummissjoni ma tistax tikkonkludi li r-reġistrazzjoni tad-denominazzjoni “Jihočeská Niva” tmur kontra l-Artikolu 3(4) tar-Regolament KE Nru 510/2006. Filwaqt li min oġġezzjona seta’ provda evidenza li d-denominazzjoni “Jihočeská Niva” tista’ tkun assoċjata mad-denominazzjoni “Niva”, ma kienet provduta l-ebda evidenza dwar il-grad ta’ distinzjoni li t-trejdmark akkwista minħabba r-reputazzjoni, il-fama u t-tul ta’ żmien li kien użat. Għalhekk, fuq il-bażi tal-informazzjoni disponibbli, ma kienx hemm evidenza li r-reġistrazzjoni ta’ “Jihočeská Niva” kienet se tiżgwida lill-konsumaturi rigward l-identità reali tal-prodott.

(7)

Ma kienet preżentata l-ebda evidenza li tippermetti lill-Kummissjoni biex tikkonkludi li wara li jkunu kkunsidrati l-użu ġust u tradizzjonali u l-probabbiltà reali ta’ konfużjoni, ir-reġistrazzjoni tal-isem “Jihočeská Niva” bħala indikazzjoni ġeografika protetta, kien imur kontra d-dispożizzjonijiet stipulati fl-Artikolu 7. Skont l-evidenza preżentata lill-Kummissjoni, it-terminu “Niva” kien użat b’mod ġeneriku għal tip ta’ ġobon, fir-Repubblika Ċeka u fis-Slovakkja għal għexieren ta’ snin. Barra minn hekk, ir-reġistrazzjoni tal-isem imsemmi bħala indikazzjoni ġeografika protetta ma kinetx se tirrikjedi la l-kanċellazzjoni jew l-invalidazzjoni tat-trejdmarks, minħabba li kien hemm applikazzjoni għalihom qabel id-data tat-tressiq tal-applikazzjoni tar-reġistrazzjoni lill-Kummissjoni u lanqas ma kienet se xxekkel l-użu tal-istess. Barra minn hekk, skont l-informazzjoni disponibbli għall-Kummissjoni, id-dritt esklussiv tal-proprjetarju tat-trejdmarks imsemmijin, ma jippermettilux li jipprojbixxi parti terza milli tuża matul il-kummerċjalizzazzjoni u skont prattiki onesti fi kwistjonijiet industrijali jew kummerċjali, indikazzjoni dwar l-oriġini ġeografika skont l-Artikolu 6 tad-Direttiva 2008/95/KE tal-Parlament Ewropew u tal-Kunsill tat-22 ta’ Ottubru 2008 biex jiġu approssimati l-liġijiet tal-Istati Membri dwar it-trade marks [trejdmarks] (3)

(8)

Fid-dawl ta’ dan kollu, id-denominazzjoni “Jihočeská Niva” għandha tiddaħħal fir-“Reġistru ta’ denominazzjonijiet ta’ oriġini protetti u indikazzjonijiet ġeografiċi protetti”.

(9)

Il-miżuri pprovduti f’dan ir-Regolament huma skont l-opinjoni tal-Kumitat Permanenti għall-Indikazzjonijiet Ġeografiċi Protetti u d-Denominazzjonijiet tal-Oriġini Protetti,

(1)

Ir-Regolament tal-Kummissjoni (KE) Nru 796/2004 tal-21 ta’ April 2004 li jippreskrivi regoli dettaljati għall-implimentazzjoni ta’ konformità, modulazzjoni u amministrazzjoni integrata u sistema ta’ kontroll kif hemm provvediment dwarhom fir-Regolament tal-Kunsill (KE) Nru 1782/2003 u (KE) Nru 73/2009, kif ukoll għall-implimentazzjoni ta’ konformità kif hemm provvediment dwaru fir-Regolament tal-Kunsill (KE) Nru 479/2008 (2) fl-Artikolu 21 tiegħu jipprovdi għat-tnaqqis li jrid jiġi applikat fil-każ tat-tressiq tard ta’ applikazzjoni għall-għajnuna kif ukoll ta’ dokumenti, kuntratti jew dikjarazzjonijiet li huma obbligatorji għall-eliġibbiltà tal-għajnuna.

(2)

Skont l-Artikolu 6 tar-Regolament (KE) Nru 796/2004, l-Istati Membri jridu jiżguraw li l-pakketti agrikoli huma identifikati b’mod ċar u jridu jirrikjedu li l-applikazzjoni waħdanija tkun akkumpanjata minn dokumenti li jidentifikaw il-pakketti sabiex tkun tista’ ssir l-implimentazzjoni tas-sistema ta’ kontroll. Barra minn hekk, skont l-Artikolu 12(1) ta’ dak ir-Regolament, l-applikazzjoni waħdanija għandu jkollha t-tagħrif meħtieġ kollu biex tiġi stabbilita l-eliġibbiltà għall-għajnuna. Dan jinkludi dettalji li jidentifikaw il-pakketti agrikoli kollha fl-impriża u dettalji dwar fejn jinsabu.

(3)

Sabiex jiġu indirizzati n-nuqqasijiet marbuta mal-identifikazzjoni tal-pakketti agrikoli, li kienu jinstabu regolarment fil-passat, il-bdiewa Griegi, għall-ewwel darba fl-2009, intalbu jidentifikaw il-pakketti agrikoli marbuta mal-applikazzjoni tagħhom f’forma diġitali wkoll flimkien mal-identifikazzjoni fil-forma alfanumerika li kienet tkun meħtieġa waħidha fil-passat, biex l-applikazzjoni tagħhom tkun eliġibbli.

(4)

Madankollu, il-Greċja esperjenzat ċirkostanzi eċċezzjonali fl-amministrazzjoni tagħha tal-applikazzjoni waħdanija fl-2009. L-implimentazzjoni prattika ta’ din l-identifikazzjoni diġitali ddewmet b’mod sinifikanti minħabba problemi mhux mistennija, marbuta mad-diffikultajiet tekniċi severi li kien hemm.

(5)

Minbarra l-kumplessità intrinsika teknika, il-proċess tad-diġitalizzazzjoni xxekkel mis-sitwazzjoni globali tal-pakketti agrikoli Griegi, li huma mifruxa ma’ kullimkien u mħawdin ħafna. Sabiex tkun żgurata implimentazzjoni korretta u mingħajr xkiel tal-proċess tad-diġitalizzazzjoni, kienu meħtieġa kapaċitajiet speċifiċi u għarfien fil-fond min-naħa tal-bdiewa.

(6)

B’rabta ma’ dan, kienu meħtieġa tagħrif estensiv u pariri mill-korpi pubbliċi u privati kompetenti involuti. Kienu meħtieġa arranġamenti speċifiċi fuq skala kbira u li jieħdu ħafna ħin għal taħriġ xieraq tal-bdiewa Griegi.

(7)

Barra minn hekk, kien hemm serje ta’ nuqqasijiet severi u persistenti tan-netwerk u konnessjonijiet li ma jaħdmux sew, partikolarment fiż-żoni remoti.

(8)

Din is-sitwazzjoni effettwat b’mod sinifikanti l-abbiltà tal-bdiewa Griegi biex iressqu applikazzjoni waħdanija sad-data ta’ skadenza pprovduta fl-Artikolu 11(2) tar-Regolament (KE) Nru 796/2004, li jkun fiha wkoll, mill-2009 ‘l quddiem, identifikazzjoni diġitizzata tal-pakketti agrikoli. Fil-fatt, għadd żgħir biss ta’ bdiewa rnexxielhom ikunu konformi mar-rekwiżit tal-identifikazzjoni diġitizzata sad-data tal-iskadenza. Għadd kbir ta’ bdiewa oħrajn sussegwentement lestew l-applikazzjoni tagħhom billi żiedu din l-identifikazzjoni.

(9)

Minħabba din is-sitwazzjoni, jixraq li għas-sena ta’ applikazzjoni tal-2009, ma għandhomx japplikaw it-tnaqqis jew l-esklużjoni stipulati fl-Artikolu 21(1) tar-Regolament (KE) Nru 796/2004 minħabba li l-identifikazzjoni diġitali tal-pakketti agrikoli tkun waslet tard, sakemm din l-identifikazzjoni diġitali tkun inkluża fl-applikazzjoni waħdanija tal-bdiewa sa data li tqis kemm il-fatt li ħafna bdiewa Griegi sadanittant irnexxielhom jimlew id-dejta nieqsa u minħabba l-ħtieġa li jiġi żgurat trattament malajr kemm jista’ jkun tal-applikazzjonijiet li tressqu għall-2009, filwaqt li jiġi evitat id-dewmien mhux meħtieġ fiċ-ċiklu tal-infiq. Jidher xieraq li l-31 ta’ Jannar 2010 għandu jiġi stabbilit bħala l-aħħar data sa meta l-bdiewa għandhom jitħallew iressqu l-identifikazzjoni diġitizzata. Madankollu, sabiex jitqiesu l-problemi partikolari tal-konnessjoni u tat-trasport tagħhom, il-bdiewa fil-gżejjer minuri tal-Eġew fi ħdan it-tifsira tal-Artikolu 1(2) tar-Regolament tal-Kunsill (KE) Nru 1405/2006 tat-18 ta’ Settembru 2006 li jistabbilixxi miżuri speċifiċi għall-agrikoltura favur il-gżejjer minuri tal-Eġew u li jemenda ir-Regolament (KE) Nru 1782/2003 (3) għandhom jitħallew jissupplimentaw din l-identifikazzjoni sa mhux aktar tard mill-15 ta’ Frar 2010.

(10)

Minħabba li d-deroga proposta għandha tkopri l-applikazzjonijiet imressqin għas-sena tal-għajnuna tal-2009, jixraq li dan ir-Regolament japplika retroattivament.

(11)

Il-miżuri pprovduti f’dan ir-Regolament huma skont l-opinjoni tal-Kumitat ta’ Ġestjoni għall-Ħlasijiet Diretti,

(1)

L-Anness I għar-Regolament (KE) Nru 872/2004 jelenka l-persuni, korpi u entitajiet fiżiċi u ġuridiċi li huma koperti mill-iffriżar ta’ fondi u riżorsi ekonomiċi taħt dak ir-Regolament.

(2)

Fis-16 ta’ Diċembru 2009, il-Kumitat tas-Sanzjonijiet tal-Kunsill tas-Sigurtà tan-Nazzjonijiet Uniti ddeċieda li jemenda l-lista tal-persuni, gruppi u entitajiet li għalihom għandhom japplikaw l-iffriżar ta' fondi u riżorsi ekonomiċi. L-Anness I għandu għalhekk jiġi emendat kif jixraq,

(1)

Ir-Regolament tal-Kummissjoni (KE) Nru 955/2005 (3) stabbilixxa kwota tariffarja annwali għall-importazzjoni ta’ 5 605 tunnellati ross li joriġina mill-Eġittu li jaqa’ taħt il-kodiċi NM 1006 (numru tas-serje 09.4097).

(2)

Mill-komunikazzjoni magħmula skont l-Artikolu 5(a) tar-Regolament (KE) Nru 955/2005, jirriżulta li t-talbiet imressqa mill-1 ta’ Jannar 2010 fis-13:00 sat-8 ta’ Jannar 2010 fis-13:00, ħin ta’ Brussell, skont l-Artikolu 4(1) tar-Regolament imsemmi, jaqbżu l-kwantitajiet disponibbli. Għaldaqstant, jixraq li jiġi ddeterminat safejn jistgħu jinħarġu liċenzji, billi jiġi stabbilit il-koeffiċjent ta’ allokazzjoni li għandu jkun applikat għall-kwantitajiet mitluba.

(3)

Jixraq ukoll li jkun sospiż it-tressiq ta’ talbiet ġodda għal liċenzji tal-importazzjoni skont ir-Regolament (KE) Nru 955/2005 sa tmiem il-perjodu attwali ta’ kwoti, skont l-Artikolu 4(2) tar-Regolament imsemmi.

(4)

Sabiex tiġi żgurata ġestjoni effikaċi tal-proċedura tal-ħruġ taċ-ċertifikati tal-importazzjoni, dan ir-Regolament għandu jidħol fis-seħħ eżatt wara li jiġi ppubblikat,

(1)

L-Artikolu 14 tar-Regolament tal-Kunsill (KEE) Nru 3821/85 tal-20 ta’ Diċembru 1985 dwar apparat ta’ reġistrazzjoni għat-trasport bit-triq (1), jitlob lill-awtorità kompetenti ta’ Stat Membru biex toħroġ biljetti tas-sewwieqa, fuq talba ta’ sewwieq li għandu r-residenza regolari tiegħu f’dak l-Istat Membru, kif stipulat fl-Anness IB ta’ dak ir-Regolament.

(2)

Ir-rekwiżit 268a tar-Regolament (KEE) Nru 3821/85 jitlob lill-Istati Membri biex jiskambjaw dejta b’mod elettroniku sabiex jiżguraw l-uniċità tal-biljetti tas-sewwieqa li joħorġu. Skont dan ir-rekwiżit, l-awtoritajiet kompetenti tal-Istati Membri jistgħu wkoll jiskambjaw id-dejta b’mod elettroniku meta jwettqu verifiki tal-biljetti tas-sewwieqa mal-ġenb tat-triq jew fil-bini tal-kumpanija sabiex jivverifikaw l-uniċità u l-istatus tal-biljetti.

(3)

L-awtorità kompetenti għandha tiżgura li l-applikanti ma jkollhomx diġà biljett tas-sewwieqa validu.

(4)

Il-biljetti tas-sewwieqa maħruġa mill-Istati Membri għandhom ikunu rikonoxxuti reċiprokament.

(5)

Is-sigurtà, l-integrità u l-affidabbiltà tas-sistema diġitali tat-takografu għandhom ikunu assigurati b’kontroll xieraq u permezz tal-użu ta’ biljetti tas-sewwieqa maħruġa fl-Unjoni Ewropea kollha.

(6)

Huwa għaqli li l-awtorità emittenti jkollha proċessi effikaċi u proċeduri stabbiliti biex tamministra b’mod xieraq id-dejta dwar il-ħruġ ta’ biljetti takografiċi b’mod ġenerali u ta’ biljetti tas-sewwieqa b’mod partikolari.

(7)

L-awtoritajiet emittenti ta’ Stat Membru għandu jkollhom il-possibilità li jivverifikaw malajr u jiskambjaw b’mod affidabbli informazzjoni dwar biljetti tas-sewwieqa maħruġa u b’hekk jevitaw milli jkun hemm sewwieqa li jkollhom iktar minn biljett tas-sewwieqa wieħed validu.

(8)

Għandu jkun possibbli għall-awtoritajiet nazzjonali responsabbli li, matul il-kontrolli mal-ġenb tat-triq, jivverifikaw mal-ġenb tat-triq jekk sewwieq għandux biljett tas-sewwieqa u biex jiċċekkjaw il-validità tal-istejtus ta’ biljett tas-sewwieqa partikolari.

(9)

Is-sistema ta’ messaġġi TACHOnet hija għodda stabbilita u affidabbli li tintuża għall-iskambju elettroniku ta’ dejta bejn l-Istati Membri dwar il-ħruġ u l-kontroll ta’ biljetti tas-sewwieqa u li 28 pajjiż Ewropew diġà għandhom konnessjoni magħha. Is-sistema ta’ messaġġi TACHOnet hija definita permezz ta’ sett ta’ dokumenti ta’ referenza, inkluża Gwida ta’ Referenza dwar messaġġi XML, li kollha huma ppubblikati fuq il-websajt tas-servizzi tal-Kummissjoni responsabbli għall-aspetti soċjali tal-politika tat-trasport bit-triq.

(10)

Il-prestazzjoni tas-sistema ta’ messaġġi TACHOnet tiddependi mill-prestazzjonijiet rispettivi tas-sistemi nazzjonali. Għalhekk, għandu jkun stipulat livell minimu tas-servizz li l-Istati Membri għandhom jippruvaw jilħqu rigward id-disponibbiltà tas-sistema,