(1)

Permezz ta’ ittra datata s-6 ta’ Marzu 2002, li waslet għand il-Kummissjoni (DĠ TREN) fit-12 ta’ Marzu 2002 (A(02)54606), u permezz ta’ ittra datata s-7 ta’ Marzu 2002, irreġistrata fis-7 ta’ Marzu 2002 (A(02)54445), il-Ministeru Federali tat-Trasport, Bini u Akkomodazzjoni tar-Repubblika Federali tal-Ġermanja għarraf lill-Kummissjoni li l-Gvern Federali kellu l-ħsieb jintroduċi sistema ta’ rimborż ta’ pedaġġ akkumpanjata bl-introduzzjoni ta’ ħlas abbażi tal-kilometraġġ għal min juża l-awtostrada. Permezz ta’ ittra datata 21 ta’ Marzu 2002 (D(02)1080), is-Segretarjat-Ġenerali tal-Kummissjoni kiteb li kien irċieva l-ittra tal-Ġermanja u rreġistra n-notifika ta’ l-abbozz tal-liġi bin-Nru N 194/02.

(2)

Permezz ta’ ittra datata t-23 ta’ Lulju 2003, irreġistrata bin-Nru C 54/03, il-Kummissjoni għarrfet lir-Repubblika Federali tal-Ġermanja li kienet iddeċidiet li tagħti bidu għall-proċedura stabbilita bl-Artikolu 88(2) tat-Trattat tal-KE fir-rigward ta’ l-għajnuna.

(3)

Id-deċiżjoni tal-Kummissjoni biex tagħti bidu għall-proċedura kienet ippubblikata f'Il-Ġurnal Uffiċjali ta’ l-Unjoni Ewropea (3). Il-Kummissjoni sejħet lil partijiet interessati biex jibagħtu l-kummenti tagħhom.

(4)

L-awtoritajiet Ġermaniżi wieġbu għall-mistoqsijiet magħmula mill-Kummissjoni billi bagħtu żewġ komunikazzjonijiet it-tnejn datati t-22 ta’ Awwissu 2003, irreġistrati fl-1 ta’ Settembru 2003 (A(03)/28354).

(5)

Il-Kummissjoni rċeviet ukoll 12-il kumment minn partijiet interessati. Hija għaddiethom lir-Repubblika Federali tal-Ġermanja, li ngħatat l-opportunità tirreaġixxi; il-kummenti tagħha waslu b’ittra datata s-7 ta’ Novembru 2003, u rreġistrata fit-13 ta’ Novembru 2003 (A(03)34681).

(6)

Il-Kummissjoni rċeviet informazzjoni addizzjonali mill-awtoritajiet Ġermaniżi mibgħuta fit-23 ta’ Ottubru 2003, irreġistrata fis-27 ta’ Ottubru 2003 (A(03)33102), fit-23 ta’ Diċembru 2003, irreġistrata fis-26 ta’ Diċembru 2003 (A(03)38579), fl-1 ta’ Lulju 2004, irreġistrata fis-6 ta’ Lulju 2004 (A(04)24123), fit-2 ta’ Diċembru 2004, irreġistrata fl-istess data, fil-25 ta’ Jannar 2005, irreġistrata fit-28 ta’ Jannar 2005, fl-14 ta’ Lulju 2005, irreġistrata fit-28 ta’ Lulju 2005 (A(05)19151) u fil-11 ta’ Novembru 2005, irreġistrata fl-14 ta’ Novembru 2005 (A(05)32154).

(7)

Mill-1 ta’ Jannar 2005 l-awtoritajiet Ġermaniżi introduċew pedaġġ fuq awtostradi abbażi tal-kilometraġġ għal vetturi kbar tal-merkanzija u ffissaw ir-rata medja tal-pedaġġ għal 12,4 ċenteżmi/km. Huma kkomunikaw lill-Kummissjoni l-intenzjoni tagħhom li fil-ġejjieni qarib iżidu r-rata għal 15-il ċenteżmu/km, filwaqt li, fl-istess ħin, jintroduċu sistema ta’ rimborż tal-pedaġġ (minn hawn ‘il quddiem “TRS”) biex jikkumpensaw (parzjalment) lil trasportaturi ta’ merkanzija stradali għaż-żieda fil-ħlasijiet totali. L-ammont tat-TRS jikkonsisti f’rimborż ta’ darba fis-sena tal-pedaġġ sa massimu ta’ 2,6 ċenteżmi/km. Iżda r-rimborż tal-pedaġġ jiddependi fuq il-ħlas ta’ ċertu ammont ta’ dazji tas-sisa għal fjuwil mixtri fil-Ġermanja, liema xiri għandu jkollu prova bil-preżentazzjoni tad-dokumenti meħtieġa. ma’ prova ta’ ħlas ta’ 8,6 ċenteżmi ta’ dazji tas-sisa għal fjuwil mixtri fil-Ġermanja jkunu rimborżati 2,6 ċenteżmi/km.

(8)

L-iskop tal-miżura hu li r-rata tal-pedaġġ għal kull kilomteru tkun iffissata billi jitqiesu sewwa ħlasijiet oħra relatati mat-traffiku magħmulin minn trasportaturi ta’ merkanzija stradali li jkollhom iħallsu pedaġġ fit-territorju tal-liġi Ġermaniża. Il-miżura tqis il-fatt li ħafna mill-utenti diġà jikkontribwixxu biex jagħmlu tajjeb għal spejjeż infrastrutturali billi jħallsu taxxi (taxxa annwali fuq il-vettura, taxxa fuq il-fjuwil), u timmira li tirrimborża parti minn dawn il-kontribuzzjonijiet lil dawk l-utenti li, minbarra dawk il-ħlasijiet eżistenti, issa jħallsu wkoll pedaġġ. Mill-1 ta’ Jannar 2005, il-pedaġġ kien ffissat f’rata ta’ 12,4 ċenteżmi/km. Iż-żieda maħsuba bħalissa ta’ 2,6 ċenteżmi/km biex jintlaħaq l-ammont medju ta’ 15-il ċenteżmu/km, fl-opinjoni ta’ awtoritajiet Ġermaniżi, ser tkopri kompletament l-ispejjeż għall-kostruzzjoni, l-iżvilupp u t-tħaddim ta’ l-infrastruttura rilevanti skond id-Direttiva 1999/62 (Eurovignette) (4), b’mod partikolari l-Artikolu 7, il-paragrafi 9 u 10 (5). Minħabba ż-żieda fil-ħlas totali infrastrutturali għal trasportaturi ta’ merkanzija stradali, l-awtoritajiet Ġermaniżi jipproponu fl-istess waqt li jintroduċu sistema ta’ rimborż bħala kumpens parzjali.

(9)

Ir-rimborż tal-pedaġġ ta’ 2,6 ċenteżmi/km hu r-riżultat tal-kalkolu li ġej li hu bbażat fuq deċiżjoni ta’ l-awtoritajiet Ġermaniżi biex jikkumpensaw EUR 600 miljun: meqjus kilometraġġ ta’ vetturi li jilħaq 22,7 biljun km fis-sena (vetturi ta’ mhux anqas minn 12-il tunnellata), pedaġġ ta’ 1 ċenteżmu/km iħalli dħul mill-pedaġġi ta’ EUR 227 miljun fis-sena. Jekk wieħed jasssumi konsum ta’ 30 litru/100 km u dazji tas-sisa ta’ EUR 0,01 għal kull litru ta’ fjuwil, 1 ċenteżmu ta’ dazji tas-sisa iħalli dħul mid-dazju tas-sisa ta’ madwar EUR68 miljun fis-sena (6). Pedaġġ ta’ 1 ċenteżmu/km huwa, għalhekk, ekwivalenti għal madwar 3,3 ċenteżmi ta’ dazji tas-sisa (7) għal kull litru biex ikun prodott l-istess dħul. Id-deċiżjoni li jkunu rimborżati EUR 600 miljun, għalhekk, tirriżulta fir-rimborż ta’ madwar 2,6 ċenteżmi mill-ħlas tal-pedaġġ għal kull km (8). Biex wieħed ikun eliġibbli għal dan ir-rimborż, ikun jeħtieġlu jġib prova ta’ ħlas ta’ dazji tas-sisa fl-ammont ta’ 8,6 ċenteżmi (9) għal kull litru.

(10)

Minħabba li l-ammont kollu ta’ tnaqqis maħsub mis-sistema ta’ rimborż tal-pedaġġ hu maħsub li jkun ta’ EUR 600 miljun fis-sena, dan il-kumpens jikkorrispondi għal tnaqqis ta’ bejn wieħed u ieħor 17,6 % tad-dħul mill-pedaġġ ta’ madwar EUR 3,4 biljun fis-sena.

(11)

It-TRS proposta m’għandhiex limiti ta’ żmien. Madankollu, l-awtoritajiet Ġermaniżi indikaw li jekk din issir kundizzjoni imposta mill-Kummissjoni, huma jkunu jistgħu jimmodifikaw l-Ordni Statutorja u jintroduċu sistema ta’ skadenza.

(12)

Il-benefiċjarji tat-TRS ser ikunu t-trasportaturi kollha ta’ merkanzija stradali jew sidien ta’ trakkijiet li jużaw awtostradi Ġermaniżi, tkun xi tkun iċ-ċittadinanza jew ir-residenza tagħhom, b’vetturi ta’ mhux anqas minn 12-il tunnellata. Iżda r-rimborż tal-pedaġġ ikun jiddependi mill-ħlas ta’ dazji tas-sisa fuq fjuwil mixtri fil-Ġermanja.

(13)

It-TRS hija bbażata fuq l-Artikolu 1 tal-Liġi dwar l-impożizzjoni ta’ ħlasijiet fuq bażi ta’ kilometraġġ għall-użu ta’ awtostradi minn vetturi kbar tal-merkanzija adottata mill-Gvern fit-22 ta’ Marzu 2002 (hawn iżjed ‘l isfel imsejħa “il-Liġi”). Il-Liġi kienet iffirmata fil-5 ta’ April 2002, u kienet ippubblikata fil-Gazzetta tal-Liġi Federali (Bundesgesetzblatt) tal-11 ta’ April 2002 (10).

(14)

It-Taqsima 3, paragrafu 2 ta’ l-Artikolu 1 tal-Liġi tagħti s-setgħa lill-gvern li jiffissa r-rata ta’ pedaġġ għal kull kilometru permezz ta’ Ordni Statutorja bil-kunsens tal-Bundesrat wara li jitqies l-għadd ta’ fwies ta’ roti u t-tip ta’ emissjoni tal-vetturi. It-Taqsima 3, paragrafu 3, tagħti s-setgħa lill-Gvern Ġermaniż li jiffissa r-rata ta’ pedaġġ għal kull kilometru billi jqis b’mod xieraq ħlasijiet oħra speċifiċi għat-traffiku magħmula minn partijiet li jkunu obbligati jħallsu l-pedaġġ fit-territorju tal-Liġi, permezz ta’ Ordni Statutorja.

(15)

Fir-rigward tat-TRS, il-Gvern Federali tal-Ġermanja ppropona li tiddaħħal taqsima ġdida fl-“Ordni Statutorja dwar l-iffissar tar-rata ta’ pedaġġ għal vetturi kbar tal-merkanzija” eżistenti, datata 24 ta’ Ġunju 2003 (11). Il-proposta hija bbażata fuq l-Artikolu 1, taqsima 3, paragrafu 3 tal-Liġi. Il-gvern Ġermaniż ikkonferma li l-Ordni Statutorja għandha tkun modifikata biss jekk il-Kummissjoni tieħu deċiżjoni pożittiva dwar it-TRS.

(16)

L-element prinċipali għall-applikazzjoni tat-TRS huwa l-prova ta’ ħlas ta’ dazji tas-sisa fil-Ġermanja. Il-prova ta’ ħlas tkun tikkonsisti fil-preżentazzjoni ta’ rċevuti validi minn pompi tal-petrol jew kupuni tal-fjuwil ta’ kumpanija ta’ karti ta’ kreditu, mill-Ġermanja, u f’kull każ għandu jintwera n-numru ta’ reġistrazzjoni tal-vettura li tkun ingħatat il-fjuwil u li jkollha tħallas il-pedaġġ. Il-prova ta’ ħlas ta’ dazji tas-sisa fuq fjuwil fil-Ġermanja għandha wkoll tkun skond il-verżjoni kurrenti tal-Liġi tat-Taxxa għal Żejt Minerali tal-21 ta’ Diċembru 1992 (12).

(17)

Il-pedaġġ għandu jitnaqqas biss mal-prova li jkunu tħallsu l-pedaġġ u d-dazji tas-sisa matul l-istess sena kalendarja. Ir-rimborż totali ta’ l-ammont tal-pedaġġ akkumulat f’kull sena kalendarja partikulari (kreditu tal-pedaġġ) ikun ġeneralment paċut mad-debitu tal-pedaġġ tal-vettura li jkollha tħallas il-pedaġġ fis-sena kalendarja ta’ wara. Il-parti obbligata tħallas il-pedaġġ għandha tippreżenta - sa mhux iktar tard mill-31 ta’ Marzu tas-sena ta’ wara - it-talba għal rimborż tal-pedaġġ għal vettura partikolari lill-Uffiċċju Federali għal Trasport ta’ Merkanzija, li huwa l-korp inkarigat mill-applikazzjoni tal-Liġi u responsabbli għal monitoraġġ u biex jittratta ksur.

(18)

Iżda jekk il-kreditu tal-pedaġġ ma jkunx jista’ jiġi paċut ma’ debitu tal-pedaġġ fis-sena ta’ wara, dan ikollu jitħallas meta jintalab. It-talba għandha tkun ippreżentata sa mhux iktar tard mill-31 ta’ Marzu tas-sena ta’ wara lill-Uffiċċju Federali għal Trasport ta’ Merkanzija.

(19)

Fit-23 ta’ Lulju 2003 l-Kummissjoni fetħet il-proċedura formali ta’ investigazzjoni għar-raġunijiet li ġejjin:

(20)

Fil-qafas tal-ftuħ formali tal-proċedura, il-Kummissjoni rċeviet 12-il kontribut minn partijiet terzi, 10 minnhom mingħand assoċjazzjonijiet nazzjonali jew Ewropej (14) u 2 l-oħra mingħand Stati Membri (15). 10 kontributi jargumentaw kontra l-miżura u żewġ kontributi jiżviluppaw argumenti li jiddefendu l-iskema ta’ għajnuna (16).

(21)

Għadd kbir ta’ partijiet interessati jargumentaw li s-sistema ta’ rimborż fil-prattika ma kinitx ser tingħata fuq bażi ġusta, indipendentement miċ-ċittadinanza ta’ trasportaturi ta’ merkanzija stradali, minħabba d-differenzi fil-livell ta’ dazji tas-sisa fi Stati Membri. B’mod partikolari, is-sistema ta’ rimborż tidher li hija de facto diskriminatorja, minħabba li trasportaturi mhux Ġermaniżi ta’ merkanzija stradali ma jimlewx it-tank tagħhom fil-Ġermanja minħabba d-dazji tas-sisa għoljin fil-Ġermanja fuq il-fjuwil u, għalhekk, ma kinux ser jibbenefikaw mit-TRS.

(22)

Kien argumentat ukoll li l-miżura, meqjusa bħala tnaqqis tat-taxxa għall-użu ta’ infrastruttura, tiffavorixxi lil trasportaturi Ġermaniżi ta’ merkanzija stradali minħabba wkoll li trasportaturi barranin ta’ merkanzija stradali ma kinux ser jimlew it-tank tagħhom fil-Ġermanja minħabba d-dazji għoljin tas-sisa fuq il-fjuwil. B’konsegwenza ta’ dan, trasportaturi barranin ta’ merkanzija stradali ser jagħmlu ħlas impost ogħla għal infrastruttura (jiġifieri l-ammont sħiħ) minn trasportaturi Ġermaniżi ta’ merkanzija stradali li qed jibbenefikaw minn sistema bħal din ta’ rimborż u li de facto qed jagħmlu ħlas “imnaqqas” għal infrastruttura.

(23)

Xi partijiet interessati jispeċifikaw li, b’konsegwenza tal-miżura ta’ għajnuna, trasportaturi Ġermaniżi ta’ merkanzija stradali ser ikunu jistgħu inaqqsu l-livell tal-prezz għat-trasport ta’ merkanzija. Dan ser joħloq żvantaġġ għal kumpaniji li jittrasportaw merkanzija għal distanza twila. B’hekk, il-miżura ta’ għajnuna ser tkun diskriminatorja b’mod indirett kontra trasportaturi mhux Ġermaniżi ta’ merkanzija stradali.

(24)

Barra minn hekk, partijiet terzi jargumentaw li ż-żieda fil-pedaġġ minn 12,4 ċenteżmi/km sa 15-il ċenteżmu/km li tenħtieġ biex tkun iffinanzjata l-miżura ta’ kumpens ser titħallas mit-trasportaturi kollha ta’ merkanzija stradali, inklużi dawk li mhux ser jibbenefikaw mir-rimborż tal-pedaġġ. B’hekk trasportaturi mhux Ġermaniżi ta’ merkanzija stradali ser ikollhom jaċċettaw rati ogħla ta’ pedaġġ biex tkun iffinanzjata l-armonizzazzjoni ta’ taxxa fuq żejt minerali maħsuba minn awtoritajiet Ġermaniżi. Minħabba li partijiet interessati jqisu li dan mhux ġustifikat, huma jikkonkludu li l-miżura hija diskriminatorja.

(25)

Partijiet interessati jargumentaw li t-TRS mhix ta’ inċentiv biex tittejjeb l-infrastruttura tat-trasport, iżda hija ta’ inċentiv biex jimtela t-tank fil-Ġermanja. B’konsegwenza ta’ dan, is-sistema ta’ rimborż ser tiffavorixxi lil pompi tal-fjuwil Ġermaniżi għad-dannu ta’ pompi mhux Ġermaniżi. Għalhekk il-miżura ta’ rimborż għandha wkoll effett diskriminatorju fir-rigward ta’ pompi tal-fjuwil barranin.

(26)

B’konsegwenza ta’ dan, argument ieħor ippreżentat minn partijiet interessati hu li Stati Membri oħra, eż. f’reġjuni ġirien, ser jitilfu dħul mit-taxxa minħabba xiri anqas ta’ fjuwil fit-territorji tagħhom.

(27)

Meqjusa bħala tnaqqis indirett ta’ dazji fuq is-sisa, xi partijiet interessati jargumentaw li l-miżura titqies bħala diskriminatorja kontra dawk il-konsumaturi ta’ fjuwil li jużaw awtostradi Ġermaniżi b’vetturi ta’ anqas minn 12-il tunnellata.

(28)

Argument ieħor ippreżentat minn partijiet terzi għandu rabta ma’ deċiżjoni tal-Qorti dwar skema ta’ għajnuna Taljana li kienet tikkonsisti fi skema ta’ kreditu ta’ taxxa għal trasportaturi Taljani ta’ merkanzija stradali u pprovdiet biex isiru ħlasijiet ta’ kumpens lil impriżi tat-trasport stabbiliti fi Stati Membri oħra, abbażi ta’ stima ta’ konsum ta’ diżil meħtieġ biex ikopri distanzi fit-territorju Taljan. Il-Qorti kkonfermat id-deċiżjoni tal-Kummissjoni li permezz tagħha r-Repubblika Taljana kienet obbligata tirkupra l-għajnuna mogħtija. Għalhekk, partijiet interessati jargumentaw, b’analoġija mal-każ Taljan, li differenza fil-piż tat-taxxa għal żejt minerali ma tistax waħidha tiġġustifika l-għoti ta’ għajnuna mill-Istat (25).

(29)

L-ewwel, ir-rimborż, kif jidher, mhux marbut ma’ l-użu reali ta’ awtostradi fil-Ġermanja. U dan minħabba li l-mekkaniżmi ta’ rimborż, skond partijiet terzi, ser jaċċettaw l-irċevuti kollha tal-pompi tal-fjuwil irrispettivament mill-fatt jekk il-vettura tkunx użat awtostradi Ġermaniżi jew toroq oħra. Dan ser jiffavorixxi l-aktar lil traportaturi Ġermaniżi ta’ merkanzija stradali bi flotta mħallta ta’ vetturi ta’ anqas u aktar minn 12-il tunnellata.

(30)

It-tieni, partijiet terzi jargumentaw li l-miżura toħloq effett diskriminatorju minħabba li r-rimborż totali tal-pedaġġ akkumulat f’sena kalendarja waħda jista’ jkun paċut mad-debitu tal-pedaġġ akkumulat fis-sena ta’ wara. Dan il-mekkaniżmu ta’ ħlas jagħti vantaġġ lil trasportaturi Ġermaniżi ta’ merkanzija stradali meta mqabbel ma’ trasportaturi mhux Ġermaniżi ta’ merkanzija stradali li jkunu jistgħu jużaw awtostradi Ġermaniżi kull tant żmien biss.

(31)

It-tielet, partijiet interessati jargumentaw li l-miżura mhix kompatibbli mad-Direttiva 1999/62/KE minħabba li s-sistema ta’ rimborż toħloq ostakoli lingwistiċi u amministrattivi u ser twassal għall-fatt li ħafna utenti barranin, b’mod partikolari utenti okkażjonali, mhumiex ser jitolbu rimborż.

(32)

Fl-aħħar, partijiet interessati jirreferu għal xi aspetti prattiċi tas-sistema ta’ pedaġġ (bħan-nuqqas ta’ Unitajiet Abbord (OBUs), eċċ.) li fil-fehma tagħhom għandhom ukoll impatt indirett fuq il-miżura ta’ għajnuna nfisha.

(33)

Diversi partijiet terzi jargumentaw li minħabba li s-sistema ta’ rimborż twassal għal tnaqqis indirett ta’ dazji tas-sisa, id-Direttiva 92/81/KEE tad-19 ta’ Diċembru 1992, dwar l-armonizzazzjoni ta’ l-istrutturi ta’ dazji tas-sisa fuq żjut minerali, tinkiser jekk regoli proċedurali speċifiċi, bħall-Artikolu 8(4) dwar il-proċedura ta’ notifika, ma jitħarsux (28).

(34)

Għandu wkoll jissemma’ li parti interessata waħda targumenta li l-miżura tiffavorixxi l-konsum ta’ fjuwil minħabba l-fatt li l-ammont ta’ rimborż jiddependi direttament mill-ammont ta’ konsum ta’ fjuwil. Minħabba f’hekk, il-miżura ser tmur kontra l-interess Komunitarju.

(35)

Barra minn hekk, il-partijiet kollha interessati li jargumentaw kontra l-miżura ta’ għajnuna jikkritikaw is-sistema ta’ pedaġġ infisha, mingħajr ma xi drabi jagħmlu distinzjoni ċara bejn il-pedaġġ u t-TRS. Dwar il-pedaġġ, tressqu l-argumenti prinċipali li ġejjin minn partijiet interessati:

(36)

Il-fatt li l-pedaġġ jintalab biss minn vetturi ta’ mill-anqas 12-il tunnellata huwa diskriminatorju minħabba li jsir ħlas prinċipalment fuq trasport internazzjonali ta’ merkanzija u jiffavorixxi indirettament l-aktar it-trasport nazzjonali ta’ merkanzija fuq vetturi ta’ anqas minn 12-il tunnellata (30). F’dan ir-rigward, partijiet interessati irreferew għal diversi kawżi tal-Qorti (31).

(37)

Skond partijiet interessati, is-sistema ta’ pedaġġ tikser id-Direttiva 1999/62/KE, b’mod partikolari l-Artikolu 7(4), minħabba li l-pedaġġ jitqies bħala diskriminatorju abbażi taċ-ċittadinanza tat-trasportatur jew l-oriġini jew id-destinazzjoni tal-vettura (32).

(38)

Id-diffikultajiet prattiċi (33) tas-sistema ta’ pedaġġ joħolqu żvantaġġ għal trasportaturi mhux Ġermaniżi ta’ merkanzija stradali. In-nuqqas ta’ alternattivi effiċjenti għall-installazzjoni ta’ OBUs jikser ukoll l-Artikolu 7(5) tad-Direttiva 1999/62/KE.

(39)

Partijiet interessati esprimew ukoll id-dubji tagħhom fir-rigward ta’ l-ammont ta’ pedaġġ u l-konformità tiegħu ma’ l-Artikolu 7(9) tad-Direttiva Eurovignette (34). Minħabba li l-ispejjeż għall-kostruzzjoni ta’ awtostradi Ġermaniżi jidher li fil-parti l-kbira tagħhom kienu naqsu, il-kalkolu ta’ l-ispejjeż għandu prinċipalment ikun relatat ma’ l-ispejjeż ta’ tħaddim u żvilupp tan-netwerk ta’ l-infrastruttura konċernat. Barra minn hekk, l-argument huwa li s-sistema ta’ pedaġġ hija diskriminatorja minħabba l-fatt li l-pedaġġ ikun impost 100 % fuq vetturi kbar tal-merkanzija ta’ mhux anqas minn 12-il tunnellata filwaqt li – skond informazzjoni mogħtija minn awtoritajiet Ġermaniżi – dawn jiffurmaw biss 45 % ta’ l-ispejjeż. L-eżenzjoni għal vetturi privati għal finijiet ta’ turiżmu tidher ukoll diskriminatorja. Barra minn hekk, jingħad li r-rata medja ta’ pedaġġ ta’ 12,4 ċenteżmi/km tidher għolja wisq. Jidher li l-Ġermanja tuża r-rata aktar għolja ta’ pedaġġ biex tapplika sussidji għal mezzi oħra ta’ trasport li jikser kemm il-prinċipju li “min juża jħallas” kif ukoll l-Artikolu 9(2) tad-Direttiva.

(40)

Huwa argumentat ukoll li s-sistema Ġermaniża ta’ pedaġġ, kif jidher, tikkontradixxi “l-premessa 17” tad-Direttiva 1999/62/KE, minħabba li din ser toħloq ostakoli artifiċjali, tiddistortja l-kompetizzjoni fl-Ewropa u tmur lil hinn minn mudell Ewropew armonizzat ta’ ħlas għal infrastruttura, biex b’hekk tkun garantita l-interoperabilità.

(41)

Il-liġi Ġermaniża li tintroduċi l-pedaġġ il-ġdid tidher ukoll diskriminatorja għad-dannu ta’ trasportaturi mhux Ġermaniżi ta’ merkanzija stradali fir-rigward tat-tipi ta’ emissjoni ta’ vetturi.

(42)

Fl-aħħarnett, huwa argumentat li s-sistema ta’ pedaġġ tikser dispożizzjonijiet oħra tat-Trattat bħall-Artikoli 28, 97, 90 u 92 (35).

(43)

Jingħad li l-għajnuna hija meħtieġa, fl-interess tal-Komunità u tirrispetta l-prinċipju tal-proporzjonalità billi jintużaw l-argumenti li ġejjin: Il-White Paper tal-Kummissjoni dwar il-politika tat-trasport (36), kif ukoll l-Artikolu 7 ter ta’ l-abbozz il-ġdid tad-Direttiva Eurovignette (37), it-tnejn jippermettu kumpens fiskali għal min juża t-traffiku bi ħlas għall-użu ta’ l-infrastruttura biex ma jitħalliex ikun hemm żieda globali f’taxxi. Il-miżura nfisha ma tnaqqasx it-taxxa fuq żejt minerali. Id-dazju tas-sisa qiegħed iservi biss bħala referenza biex ikun ikkalkolat ir-rimborż tat-pedaġġ. Barra minn hekk, jista’ jintwera li d-dħul mit-taxxa fuq iż-żejt minerali fil-Ġermanja qiegħed jonqos minħabba anqas fjuwil mixtri fil-Ġermanja. Is-sistema ta’ rimborż titqies, għalhekk, bħala miżura meħtieġa biex iż-żieda globali fi ħlasijiet tibqa’ proporzjonata, li hu wkoll fl-interess tal-Komunità.

(44)

Il-miżura ta’ għajnuna tirrispetta b’mod ċar il-prinċipju li ma jkunx hemm diskriminazzjoni, minħabba li trasportaturi Ġermaniżi u dawk mhux Ġermaniżi ta’ merkanzija stradali jistgħu it-tnejn jibbenefikaw mill-miżura ta’ għajnuna. Fil-fehma tal-parti interessata, kull diskriminazzjoni li teżisti tirriżulta mill-inattività tal-Kunsill, fejn l-armonizzazzjoni konċernata ilha wieqfa sa mill-1985. Minħabba dan in-nuqqas ta’ armonizzazzjoni fuq dazji tas-sisa, it-TRS tgħin biss biex tinnewtralizza l-iżvantaġġi li jiltaqgħu magħhom trasportaturi Ġermaniżi ta’ merkanzija stradali. F’dan ir-rigward, jista’ jintwera li s-sehem Ġermaniż tat-tunnellaġġ li jinġarr fi trasport stradali bejn il-fruntieri ilu jonqos sewwa minn 39,0 % fl-1985 għal 21,6 % fl-2002. Barra minn hekk, il-ġarr ta’ merkanzija stradali bejn il-fruntieri qiegħed ssir dejjem iktar dominanti: fl-2015, aktar min-nofs il-volum sħiħ ta’ traffiku fuq awtostradi Ġermaniżi ser ikun allokat għal kummerċ ta’ prodotti bejn il-fruntieri. Jingħad ukoll li jkun hemm diskriminazzjoni biss jekk trasportaturi ta’ merkanzija stradali li ma jkollhomx l-uffiċċju reġistrat tagħhom fil-Ġermanja jkollhom iħallsu spejjeż ogħla jew ikollhom joqogħdu għal piż amministrattiv ogħla għar-rimborż minn trasportaturi Ġermaniżi ta’ merkanzija stradali, li mhux il-każ.

(45)

Partijiet terzi qalu wkoll li l-miżura ta’ għajnuna ma twassalx għal distorzjoni tal-kompetizzjoni minħabba l-fatt li l-kumpens ta’ EUR600 miljun fis-sena jikkorrispondi biss għal 17,6 % ta’ l-ispejjeż addizzjonali tal-ħlas għal infrastruttura.

(46)

Fl-aħħarnett, huwa argumentat li l-miżura ma tistax titqies bħala għajnuna mill-Istat minħabba li skond il-paragrafu 13 ta’ l-avviż tal-Kummissjoni ta’ l-10 ta’ Diċembru 1998 98/C 384/03 (38), miżuri ta’ taxxa huma miżuri ġenerali li ma jikkostitwuwx għajnuna mill-Istat skond l-Artikolu 87 (1) tat-Trattat tal-KE.

(47)

Fl-opinjoni tal-gvern Ġermaniż, il-miżura ma twassalx għal diskriminazzjoni diretta minħabba li r-rimborż ikun disponibbli għat-trasportaturi kollha ta’ merkanzija stradali, tkun xi tkun iċ-ċittadinanza jew ir-residenza tagħhom. Il-miżura lanqas ma twassal għal diskriminazzjoni de facto. L-ewwel, huwa jsostni li hemm rabta diretta bejn il-ħlas ġdid għall-użu ta’ awtostradi Ġermaniżi u l-konsum tal-fjuwil li għal darb’oħra hu direttament marbut ma’ l-ammont ta’ dazji tas-sisa fuq il-fjuwil. Fil-fehma tiegħu, ir-rabta bejn tnaqqis fil-pedaġġ min-naħa l-waħda u l-ħlas ta’ dazji tas-sisa min-naħa l-oħra hija ġustifikata b’mod raġjonevoli minħabba li ż-żewġ ħlasijiet jistgħu jitqiesu bħala kontribuzzjoni għall-ispiża ta’ l-infrastruttura. Barra minn hekk, il-miżura ma tipprevedi ebda limiti, eż. ammont minimu ta’ ħlas ta’ pedaġġ jew volum minimu ta’ trasport. Barra minn hekk, id-deċiżjoni jekk it-tank għandux jimtela fil-Ġermanja jew le hija deċiżjoni purament ekonomika li jieħdu t-trasportaturi Ġermaniżi ta’ merkanzija stradali, kif ukoll trasportaturi mhux Ġermaniżi ta’ merkanzija stradali. It-trasportaturi kollha ta’ merkanzija stradali jimlew it-tankijiet tagħhom fejn jaħsbu li jiksbu benefiċċju ekonomiku. Fi kliem ieħor, id-deċiżjoni fejn għandu jimtela t-tank hija influwenzata l-aktar mill-prezz tal-fjuwil. L-awtoritajiest Ġermaniżi jargumentaw f’dan ir-rigward li fil-Ġermanja kemm il-parti tad-dazju tas-sisa fuq il-prezz tal-bejgħ tal-fjuwil, kif ukoll il-prezz tal-bejgħ innifsu huma fost l-ogħla fl-Istati Membri ta’ l-UE.

(48)

L-Awtoritajiet Ġermaniżi jinnutaw ukoll li l-miżura hija għal kollox konformi mal-prinċipju tat-territorjalità.

(49)

L-awtoritajiet Ġermaniżi jikkontradixxu l-argument li t-TRS tista’ tidher bħala tnaqqis tat-taxxa għall-użu ta’ infrastruttura u li, għalhekk, tiddiskrimina kontra trasportaturi barranin ta’ merkanzija stradali. Fil-fehma ta’ awtoritajiet Ġermaniżi, ir-rimborż ser jitħallas kemm lil trasportaturi Ġermaniżi ta’ merkanzija stradali, kif ukoll lil trasportaturi mhux Ġermaniżi ta’ merkanzija stradali. It-TRS ser twassal għal sitwazjoni fejn iż-żewġ kategoriji jikkontribwixxu għall-finanzjament ta’ awtostradi Ġermaniżi b’mod proporzjonat għall-użu tagħhom ta’ l-infrastruttura.

(50)

Fir-rigward ta’ l-argument ta’ kumpens parzjali għad-differenza fil-prezz tal-fjuwil bejn il-Ġermanja u pajjiżi oħra, l-awtoritajiet Ġermaniżi ma jistgħu jaraw ebda diskriminazzjoni kontra trasportaturi barranin ta’ merkanzija stradali. Jaqblu li l-mili ta’ tankijiet barra t-territorju Ġermaniż jista’ jkun irħas mill-mili tat-tankijiet fil-Ġermanja, anki wara li jitqies l-ammont ta’ rimborż. Madankollu, dan il-kalkolu ser isir minn trasportaturi ta’ merkanzija stradali kemm Ġermaniżi kif ukoll mhux Ġermaniżi. Skond l-awtoritajiet Ġermaniżi, iktar minn 80 % tat-trasportaturi Ġermaniżi ta’ merkanzija stradali jieħdu vantaġġ minn prezzijiet irħas ta’ fjuwil f’pajjiżi oħra. Iżda minħabba li trasportaturi Ġermaniżi ta’ merkanzija stradali ġeneralment diġà jbatu minn livell għoli ħafna ta’ dazji tas-sisa li joħloq żvantaġġ għall-pożizzjoni kompetittiva tagħhom, huma mhux ser ikunu jistgħu inaqqsu l-livell tal-prezz tagħhom għat-trasport ta’ merkanzija aktar minn kull trasportatur ieħor ta’ merkanzija stradali li jagħmel użu mill-miżura. L-effett tal-miżura ta’ għajnuna, għalhekk, ikun jikkonsisti biss f’distorzjoni mnaqqsa tal-kompetizzjoni ikkawżata mil-livell għoli ħafna ta’ dazji tas-sisa fil-Ġermanja, iżda dan mhux ser joħloq xi vantaġġ għal trasportaturi Ġermaniżi ta’ merkanzija stradali u dawn ikunu jistgħu jnaqqsu l-livell tal-prezz għall-ġarr ta’ merkanzija.

(51)

L-awtoritajiet Ġermaniżi jargumentaw li ż-żieda fil-pedaġġ hija ġustifikata minkejja t-TRS, minħabba li mhux biss trasportaturi Ġermaniżi ta’ merkanzija stradali ser jibbenefikaw mill-miżura ta’ kumpens, iżda wkoll trasportaturi mhux Ġermaniżi ta’ merkanzija stradali. Għalhekk, trasportaturi mhux Ġermaniżi ta’ merkanzija stradali ser ikollhom iħallsu rati ogħla ta’ pedaġġ iżda ser jibbenefikaw mit-TRS li mhux ser tħalli jkun hemm kontribuzzjoni eċċessiva mingħand trasportaturi mhux Ġermaniżi ta’ merkanzija stradali għall-armonizzazzjoni tat-taxxa fuq żejt minerali.

(52)

Partijiet interessati jargumentaw li s-sistema ta’ rimborż ser tiffavorixxi pompi tal-fjuwil Ġermaniżi għad-dannu ta’ pompi tal-fjuwil mhux Ġermaniżi. L-awtoritajiet Ġermaniżi, iżda, jargumentaw li d-differenzi eżistenti fit-taxxa fuq żejt minerali bejn Stati Membri diġà kellhom l-effett li joħolqu l-hekk imsejjaħ “turiżmu tal-fjuwil”, b’mod partikolari ma’ pajjiżi ġirien. Miżuri li jgħinu biex jitnaqqsu dawn id-differenzi – bħat-TRS – għandhom ukoll jgħinu biex jitnaqqas l-hekk imsejjaħ “turiżmu tal-fjuwil”. Skond l-awtoritajiet Ġermaniżi, b’hekk mhix il-miżura ta’ għajnuna li ser tiddiskrimina kontra pompi tal-fjuwil barranin. Għall-kuntrarju, il-miżura ta’ għajnuna ser twassal biss għall-fatt li pompi tal-fjuwil barranin ser ikunu anqas favoriti milli huma s’issa.

(53)

Partijiet terzi jargumentaw li bħala konsegwenza tal-miżura ta’ għajnuna Stati Membri oħra, eż. f’reġjuni ġirien, ser jitilfu dħul mit-taxxa minħabba anqas xiri ta’ fjuwil. Madankollu, l-awtoritajiet Ġermaniżi jargumentaw li miżuri li ser iwasslu għal tnaqqis ta’ “turiżmu tal-fjuwil” huma ġustifikati anki jekk dan iwassal għal dħul anqas mit-taxxa f’reġjuni qrib.

(54)

L-awtoritajiet Ġermaniżi jargumentaw ukoll li l-miżura mhix diskriminatorja kontra dawk il-konsumaturi ta’ fjuwil li jużaw awtostradi Ġermaniżi b’vetturi ta’ anqas minn 12-il tunnellata. Skond l-awtoritajiet Ġermaniżi, huwa ċar li r-rimborż jingħata biss bil-kundizzjoni li jitħallas il-pedaġġ fuq trakkijiet li jaqbżu t-12-il tunnellata. Għalhekk, ir-rimborż ma jistax jitqies mingħajr l-effett globali ta’ piż nett għal dawn it-trakkijiet. Minħabba li, abbażi ta’ bilanċ, dawn ser iħallsu aktar milli jirċievu, ikun diffiċli li wieħed jargumenta li r-rimborż innifsu jiffavorixxi lil dawn il-vetturi ta’ aktar minn 12-il tunnellata, jew, fi kliem ieħor, li jiddiskrimina kontra vetturi ta’ anqas minn 12-il tunnellata minħabba effett allegat de facto diskriminatorju ta’ tnaqqis ta’ taxxa fuq żejt minerali. Għalhekk, fil-fehma ta’ awtoritajiet Ġermaniżi, ir-rimborż ma jistax jiddiskrimina kontra vetturi ta’ anqas minn 12-il tunnellata minħabba li mhumiex is-suġġett ta’ sistema ġdida ta’ pedaġġ.

(55)

Fir-rigward ta’ l-argument li differenza fil-piż tat-taxxa ma tistax, waħidha, tiġġustifika l-għoti ta’ għajnuna, awtoritajiet Ġermaniżi jiddikjaraw li l-kawża Taljana kkwotata minn pajjiżi terzi f’dan ir-rigward mhix rilevanti għall-każ Ġermaniż minħabba li l-qafas u l-kundizzjonijiet ġenerali mhumiex l-istess. Jargumentaw li fl-imgħoddi proporzjon kbir ta’ l-ispejjeż ta’ l-infrastruttura fil-Ġermanja kellu fondi minn dazji tas-sisa fuq il-fjuwil. Vetturi kbar ta’ merkanzija li jużaw awtostradi federali issa qegħdin iħallsu kontribuzzjoni doppja għal spejjeż ta’ infrastruttura, f’għamla kemm ta’ dazji tas-sisa fuq il-fjuwil kif ukoll ta’ pedaġġ. It-TRS tagħti qies ta’ kontribuzzjonijiet ta’ ħlasijiet għal infrastruttura diġà mħallsa fil-Ġermanja u, għalhekk, tikkumpensa biss lil trasportaturi ta’ merkanzija għal ħlas doppju fl-interess ta’ ħlas ġust għall-ispejjeż ta’ infrastruttura.

(56)

L-awtoritajiet Ġermaniżi jargumentaw ukoll li s-sistema ta’ rimborż ma taħsibx għal mekkaniżmu li jippermetti l-aċċettazzjoni ta’ l-irċevuti kollha tajbin ta’ pompi tal-fjuwil irrispettivament mill-fatt jekk il-vettura wżatx awtostradi Ġermaniżi jew toroq oħra. Għall-kuntrarju, il-Ġermanja tikkonferma mill-ġdid li l-irċevuti huma aċċettabbli biss jekk il-kupun jindika n-numru ta’ reġistrazzjoni tal-vettura mogħtija l-fjuwil li jkollha tħallas il-pedaġġ. B’hekk, awtoritajiet Ġermaniżi jistgħu jeskludu li l-miżura tiffavorixxi lil trasportaturi Ġermaniżi ta’ merkanzija stradali bi flotta mħallta ta’ vetturi ta’ inqas u aktar minn 12-il tunnellata skond kif sostnew partijiet interessati.

(57)

Il-Ġermanja targumenta wkoll li minħabba li l-mekkaniżmu ta’ ħlas huwa l-istess għal kull min juża awtostradi Ġermaniżi, mhux ċar għaliex is-sistema tista’ tiddiskrimina kontra trasportaturi mhux Ġermaniżi ta’ merkanzija stradali li jistgħu jużaw l-awtostradi xi drabi biss. Ir-rimborż totali ta’ pedaġġ akkumulat f’sena kalendarja jista’ jkun paċut mad-debitu tal-pedaġġ fis-sena ta’ wara.

(58)

L-awtoritajiet Ġermaniżi jinnutaw li l-miżura ma tikkontradixxix id-Direttiva 1999/62/KE minħabba li l-ostakoli amministrattivi għal trasportaturi mhux Ġermaniżi ta’ merkanzija stradali ma jitqisux akbar minn dawk għal trasportaturi Ġermaniżi ta’ merkanzija stradali. Skond awtoritajiet Ġermaniżi ser ikunu disponibbli formoli standardizzati f’għadd xieraq ta’ lingwi ta’ l-UE u l-informazzjoni mitluba ser tkun prinċipalment f’figuri, biex trasportaturi barranin ta’ merkanzija jkollhom aċċess faċli għas-sistema ta’ rimborż. Il-piż amministrattiv li l-kupuni jinżammu sa madwar sena jaqbel ma’ proċeduri oħra bħar-rimborż tal-VAT. Jista’ jintwera wkoll li f’ħafna każijiet il-kupuni jkollhom jinżammu sa l-aħħar tas-sena wkoll għal raġunijiet oħra bħal verifiki ta’ kumpaniji ta’ awtoritajiet nazzjonali tat-taxxa. Għalhekk, il-Ġermanja tikkonkludi li s-sistema ta’ rimborż ma toħloqx ostakoli amministrattivi jew piżijiet prattiċi li jistgħu jwasslu għal diskriminazzjoni kontra trasportaturi mhux Ġermaniżi ta’ merkanzija stradali.

(59)

Fir-rigward tal-kritika tat-TRS, bħall-għadd mhux suffiċjenti ta’ OBUs li jista’ jkollu impatt indirett fuq il-miżura ta’ għajnuna nfisha, l-awtoritajiet Ġermaniżi jargumentaw li l-aspetti prattiċi tal-pedaġġ ma għandhom ebda influwenza fuq it-TRS.

(60)

L-awtoritajiet Ġermaniżi ma jqisux li l-Artikolu 8(4) tad-Direttiva 92/81/KEE inkiser minħabba li l-miżura tnaqqas biss il-livell tar-rata tal-pedaġġ u mhix maħsuba tnaqqas dazji tas-sisa fuq żejt minerali kif stipulat fid-Direttiva.

(61)

Fir-rigward ta’ l-effett tal-miżura fuq l-ambjent, il-Ġermanja tikkontradixxi l-argument li l-miżura ta’ għajnuna ser tiffavorixxi l-konsum ta’ fjuwil, u għalhekk, ikollha effetti negattivi fuq l-ambjent. Skond l-awtoritajiet Ġermaniżi, kalkolu sempliċi juri li żieda fil-konsum tal-fjuwil bl-iskop li jinkiseb rimborż ogħla huwa kontra kull loġika ekonomika. Konsum ogħla jkun ifisser li vetturi jinstaqu għal aktar milli neċessarjament previst u dan iżid iż-żmien u spejjeż tal-persunal.

(62)

Fir-rigward tal-miżura tal-pedaġġ, l-awtoritajiet Ġermaniżi l-ewwelnett jinnutaw li l-argumenti kollha relatati għaliha mhumiex soġġetti għall-proċedura kurrenti ta’ għajnuna mill-Istat u għandhom, għalhekk, jinżammu barra mill-ambitu ta’ din id-deċiżjoni. Barra minn hekk, il-Ġermanja tiddikjara li s-sistema tal-pedaġġ tiddaħħal meta l-problemi tekniċi kollha jkunu solvuti b’mod li diskriminazzjoni abbażi ta’ ċittadinanza jew tfixkil mhux xieraq fi flussi tat-traffiku jkun twarbu.

(63)

Fil-qosor, l-awtoritajiet Ġermaniżi jwieġbu għall-argumenti prinċipali ppreżentati minn partijiet terzi kif ġej:

(64)

L-Artikolu 87(1) tat-Trattat KE jgħid li “kull għajnuna mogħtija minn Stat Membru jew permezz ta’ riżorsi ta’ l-Istat tkun xi tkun il-għamla tagħha li tiddistortja jew thedded li tiddistortja l-kompetizzjoni billi tiffavorixxi lil ċerti impriżi jew il-produzzjoni ta’ ċerta merkanzija, għandha, sa fejn tolqot il-kummerċ bejn Stati Membri, tkun inkompatibbli mas-suq komuni”.

(65)

Il-Kummissjoni tqis li r-rimborż tal-pedaġġ, li jista’ jintalab mill-Uffiċċju Federali għal Trasport ta’ Merkanzija – parti mill-amministrazzjoni nazzjonali - jikkonċerna fondi ta’ l-Istat u jimplika telf ta’ riżorsi ta’ l-Istat. Il-miżura fi nfisha tagħti lil impriżi partikolari ta’ trasport stradali b’vantaġġ selettiv fuq kompetituri minħabba li dawn jieħdu kumpens għall-ħlasijiet għall-użu ta’ infrastruttura li suppost iħallsu għaliha huma stess. It-TRS ma tistax titqies bħala miżura ġenerali minħabba li hija applikabbli biss għal impriżi li jużaw vetturi ta’ mhux anqas minn 12-il tunnellata li jkollhom iħallsu l-pedaġġ u biss jekk u sa fejn jistgħu iġibu prova li jkunu ħallsu dazji tas-sisa fil-Ġermanja. Barra minn hekk, minħabba li l-aċċess għas-suq ta’ trasport stradali infetaħ kompletament għal operaturi tal-Komunità (39), wieħed jista’ jassumi li għajnuna pubblika finanzjarja, li tiffavorixxi lil ċerti impriżi li jagħmlu trasport stradali, u b’mod aktar ġenerali, trasport stradali b’mezzi oħra, tolqot il-kummerċ bejn Stati Membri. Kull għajnuna finanzjarja ta’ dan it-tip, għalhekk, tiddistortja jew thedded li tiddistortja l-kompetizzjoni u tolqot il-kummerċ bejn Stati Membri.

(66)

Abbażi ta’ dawn il-konsiderazzjonijiet il-Kummissjoni ssib li t-TRS notifikata tikkostitwixxi għajnuna skond l-Artikolu 87(1) tat-Trattat tal-KE.

(67)

Fil-waqt li fih il-Kummissjoni bdiet il-proċedura stabbilita bl-Artikolu 88 (2) tat-Trattat tal-KE, hija ma kinitx fil-pussess ta’ testi legali dwar l-introduzzjoni tat-TRS. Madankollu, fit-22 ta’ Awwissu 2003, l-awtoritajiet Ġermaniżi pprovdew il-bażi legali rilevanti. Għalhekk dan in-nuqqas ta’ informazzjoni m’għadux jeżisti.

(68)

L-introduzzjoni ta’ ħlas għall-utenti bbażat fuq id-distanza, biex tirkupra l-ispejjeż ta’ l-infrastruttura, hija waħda mill-elementi prinċipali tal-politika tal-KE dwar it-trasport komuni:

(69)

Il-Gvern Federali Ġermaniż jimmira li utenti jaqsmu b’mod aktar realistiku l-ispejjeż stradali. Il-mira dikjarata tas-sistema ta’ pedaġġ hija li utenti jħallsu l-prezz ta’ l-infrastruttura, u l-prezz ta’ 15-il ċenteżmu/km jitqies mill-Ġermanja bħala l-ammont li “jkopri kompletament l-ispejjeż għall-bini, l-iżvilupp u t-tħaddim ta’ l-infrastruttura rilevanti skond id-Direttiva 1999/62 (Eurovignette)”. Iżda dan imur id f’id mat-tqegħid ta’ piż akbar fuq l-industrija tat-trasport ta’ merkanzija stradali. Minflok l-EUR 460 miljun miġbura fil-Ġermanja bis-sistema Eurovignette (fl-2002), it-trasportaturi ta’ merkanzija jkollhom iħallsu spejjeż infrastrutturali ta’ madwar EUR 3,4 biljun. Għalkemm, skond il-proposta notifikata ta’ l-awtoritajiet Ġermaniżi, jista’ jingħata kumpens ta’ EUR 600 miljun, il-ħlas totali għal trasportaturi ta’ merkanzija stradali għadu qiegħed jiżdied minħabba li dan il-kumpens ikopri biss 17 % tal-ħlasijiet kollha tal-pedaġġ ta’ EUR 3,4 biljun.

(70)

Il-Kummissjoni tinnota li x-xiri ta’ fjuwil u l-ħlas ta’ dazji tas-sisa minn vetturi li jikkwalifikaw fil-Ġermanja joffri mekkaniżmu biex ikun ikkalkulat ir-rimborż tal-pedaġġ.

(71)

Teżisti distinzjoni legali ċara bejn l-imposta ta’ dazji tas-sisa u l-imposta ta’ pedaġġ għal vetturi kbar tal-merkanzija għall-użu ta’ infrastruttura. Iż-żewġ sistemi huma bbażati fuq atti legali differenti bħad-Direttiva dwar dazji tas-sisa (92/12/KE (42) u 2003/96/KE) u d-Direttiva 1999/62/KE (Eurovignette).

(72)

Il-Qorti għarfet id-differenza bejn pedaġġ u imposti oħra għall-użu ta’ toroq min-naħa l-waħda, u taxxi min-naħa l-oħra. Skond il-każistika pedaġġ mhux ikkwalifikat bħala taxxa, iżda bħala ħlas għall-użu ta’ servizz. L-istess raġunament japplika għal imposti oħra għall-użu ta’ toroq minħabba r-rabta diretta bejn l-imposta u l-infrastruttura li tista’ tintuża (43). Abbażi ta’ din il-każistika u meta wieħed iqis li d-dazju tas-sisa jservi biss bħala referenza biex ikun ikkalkulat ir-rimborż u li hemm distinzjoni ċara bejn il-flussi finanzjarji ta’ dazji tas-sisa min-naħa l-waħda u l-ħlas ta’ pedaġġ u r-rimborż ta’ min-naħa l-oħra, il-Kummissjoni tqis li r-rimborż kurrenti tal-pedaġġ ma jistax ikun ikkwalifikat fl-istess waqt bħar-rimborż tad-dazji tas-sisa. Kwalifika bħal din twassal għas-sitwazzjoni li fiha r-rimborż jaqa’ taħt żewġ oqfsa legali differenti li jiksru l-prinċipju taċ-ċertezza legali.

(73)

Il-fatt li r-rimborż hu marbut mal-ħlasijiet ta’ dazji tas-sisa ma jistax ibiddel il-kwalifika legali tar-rimborż, l-aktar meta jitqies il-fatt li ż-żewġ flussi finanzjarji m’għandhomx rabta bejniethom. Li kieku dan kellu jkun il-każ, kull kundizzjoni ġdida li jkollha tiżdied, pereżempju l-limitazzjoni tar-rimborż għal ċertu tip ta’ trakk, iġġib ir-riskju ta’ bidla fil-kwalifika legali u, b’konsegwenza ta’ hekk, tal-qafas legali, u dan jikser il-prinċipju taċ-ċertezza legali.

(74)

Għandu jkun innutat ukoll li ma hemm ebda rabta fiskali bejn ir-rata tal-pedaġġ u d-dazju tas-sisa fuq in-nafta. It-tnejn għandhom l-għajn tagħhom stess (l-użu ta’ l-awtostrada min-naħa l-waħda, il-konsum taż-żejt minerali min-naħa l-oħra). Id-dħul mill-pedaġġ jintuża kollu biex ikopri l-ispejjeż ta’ bini, sfruttament u titjib ta’ l-infrastruttura, għall-kuntrarju tad-dħul mid-dazju tas-sisa fuq in-nafta. Ir-rimborż ġeneralment jitnaqqas mill-ammont ta’ ħlas dovut ta’ pedaġġ, jew, jingħata lura bl-użu tar-riżorsi miġbura abbażi tal-pedaġġi.

(75)

Meqjus dak li ntqal hawn fuq, il-Kummissjoni tasal għall-konklużjoni li l-Artikolu 19(1) tad-Direttiva 2003/96/KE dwar il-Qafas Komunitarju għat-tassazzjoni ta’ prodotti ta’ l-enerġija u l-elettriku li jissostitwixxi l-Artikolu 8(4) tad-Direttiva 92/81/KEE mhuwiex applikabbli (44). B’konsegwenza ta’ dan, l-awtoritajiet Ġermaniżi m’għandhomx għalfejn jinnotifikaw il-miżura ta’ għajnuna skond il-qafas tal-proċedura stabbilita bl-Artikolu 19(1) tad-Direttiva tal-Kunsill 2003/96/KE.

(76)

Skond l-Artikolu 73 tat-Trattat KE, għajnuniet li jissodisfaw il-ħtiġijiet ta’ koordinazzjoni ta’ trasport bl-art huma kompatibbli mat-Trattat.

(77)

Ir-Regolament tal-Kunsill (KEE) Nru 1107/70 (45) jimplimenta l-Artikolu 73 tat-Trattat u jipprovdi għal eżenzjonijiet speċifiċi għall-għajnuna, li huma meqjusa li jissodisfaw il-ħtiġiet ta’ koordinazzjoni ta’ trasport bl-art. B’mod partikolari, l-Artikolu 3 (1) (b) tar-Regolament (KEE) Nru 1107/70 jistipula li Stati Membri jistgħu, sad-dħul fis-seħħ ta’ regoli komuni dwar l-allokazzjoni ta’ spiża infrastrutturali, jagħtu għajnuna lil impriżi li jkollhom iħallsu n-nefqa ralatata ma’ l-infrastruttura li jużaw, waqt li impriżi oħra mhumiex soġġetti għall-istess piż.

(78)

Skond il-prattika tal-Kummissjoni li titratta każijiet ta’ għajnuna mill-Istat, għandhom ikunu sodisfatti tliet rekwiżiti, biex l-għajnuna tissodisfa l-ħtiġijiet ta’ koordinazzjoni ta’ trasport skond l-Art. 73 tat-Trattat tal-KE (46) u r-rekwiżiti stabbiliti bl-Artikolu 3 (1) (b) tar-Regolament (KEE) Nru 1107/70:

(79)

Dwar il-prinċipju ta’ nuqqas ta’ diskriminazzjoni, il-Kummissjoni tqis li l-għajnuna kollha hija fiha nfisha selettiva. Jekk miżura ma tkunx ikkwalifikata bħala selettiva ma tkunx miżura ta’ għajnuna skond it-tifsira ta’ l-Artikolu 87 tat-Trattat KE. Jekk il-miżura tkun ġiet ikkwalifikata bħala għajnuna, il-Kummissjoni għandha tevalwa l-kompatibilità mas-suq komuni. Il-każistika u l-prattika tal-Kummissjoni dejjem iddistingwew b’mod ċar bejn din is-selettività inerenti fl-għajnuna kollha, li tfisser żvantaġġ għal xi operaturi fir-fil-konfront ta’ oħrajn li joperaw fi Stat Membru, u diskriminazzjonijiet possibbli bbażati direttament jew indirettament fuq ċittadinanza jew fuq l-istabbiliment fl-Istat Membru involut (47). Dan ta’ l-aħħar mhux kompatibbli mad-dritt Komunitarju u ma jistax jiġi approvat skond regoli dwar għajnuna mill-Istat.

(80)

Hija każistika stabbilita li d-diskriminazzjoni tikkonsisti partikolarment fi trattament ta’ każijiet simili b’mod differenti, u tinvolvi żvantaġġ għal xi operaturi meta mqabbla ma’ oħrajn, mingħajr ma dik id-differenza fit-trattament tkun ġustifikata bl-eżistenza ta’ differenzi sostanzjali u oġġettivi. Madankollu, minħabba li impriżi li ma jkunux stabbiliti f’ċertu territorju jkunu f’pożizzjoni differenti vis-à-vis l-awtorità minn impriżi stabbiliti f’dak it-territorju, ma jistax jingħad li kull mekkaniżmu li jagħmel aċċess għal għajnuna iktar diffiċli għalihom jikser il-prinċipju ta’ nuqqas ta’ diskriminazzjoni (48).

(81)

F’dan il-każ, it-TRS tipprovdi għal tpaċija tal-pedaġġ biss meta jkunu ppreżentati rċevuti u kupuni Ġermaniżi ta’ mili biex tinġieb prova li dazji tas-sisa jkunu tħallsu fil-Ġermanja. F’din il-kundizzjoni il-Kummissjoni ma tara ebda ksur tal-prinċipju tat-territorjalità imsemmi fil-premessa 20 tad-Direttiva 1999/62/KE. It-TRS timponi l-istess kundizzjonijiet fuq it-trasportaturi kollha ta’ merkanzija u hija aċċessibbli għat-trasportaturi kollha ta’ merkanzija stradali, irrispettivament miċ-ċittadinanza jew residenza. Il-miżura ma taħseb għal ebda limiti, eż. ammont minimu ta’ ħlas ta’ pedaġġ jew volum minimu ta’ trasport. Barra minn hekk, ma hemm ebda obbligu li wieħed jixtri fjuwil fil-Ġermanja u anqas ma hemm xi restrizzjoni li wieħed jagħmel dan. Għalhekk, il-Kummissjoni tqis li ma hemm ebda diskriminazzjoni diretta abbażi ta’ ċittadinanza.

(82)

Għalkemm ma hemm ebda diskriminazzjoni diretta, tqum il-mistoqsija jekk din ir-rabta twassalx għal diskriminazzjoni indiretta de facto abbażi ta’ ċittadinanza. Teżisti differenza ta’ trattament bejn trasportaturi ta’ merkanzija stradali li jimlew it-tank tagħhom fil-Ġermanja u trasportaturi ta’ merkanzija stradali li jimlew it-tank tagħhom fi Stat Membru ieħor. Din id-differenza hija kkawżata mir-rabta bejn ir-rimborż tal-pedaġġ u l-ħlas ta’ dazji tas-sisa fil-Ġermanja.

(83)

Jekk din id-differenza ta’ trattament tipproduċi effetti differenti fuq trasportaturi Ġermaniżi tal-merkanzija, min-naħa l-waħda, u trasportaturi ta’ merkanzija minn Stati Membri oħra, min-naħa l-oħra, li tiffavorixxu lil dawn ta’ l-ewwel minn dawn ta’ l-aħħar, u ma tirriflettix differenza oġġettiva fis-sitwazzjonijiet rispettivi, dan jimplika ksur tal-prinċipju li m’għandux ikun diskriminazzjoni. Il-mistoqsija hija, għalhekk, jekk ir-rabta bejn ir-rifużżjoni tal-pedaġġ u l-ħlas ta’ dazji tas-sisa tistax tkun ġustifikata b’differenzi oġġettivi. Biex tingħata tweġiba għal din il-mistoqsija, il-Kummissjoni ser tibda biex teżamina kif din ir-rabta ser taħdem fil-prattika u liema trasportaturi ta’ merkanzija ser jibbenefikaw minnha.

(84)

Minħabba li jinsabu fil-qalba ta’ l-Ewropa, l-awtostradi Ġermaniżi huma diġà ffrekwentati ħafna minn trasportaturi mhux Ġermaniżi ta’ merkanzija stradali. Waqt li fl-1998 22,1 % ta’ vetturi kbar tal-merkanzija fuq awtostradi Ġermaniżi ma kinux Ġermaniżi, dan is-sehem ogħla għal 25,5 % kif stmati fl-2004. Vetturi ta’ l-UE-25 jirrappreżentaw kważi 92 % tal-vetturi kbar ta’ merkanzija stradali mhux Ġermaniżi fuq l-awtostradi Ġermaniżi (49).

(85)

Minħabba li l-prezzijiet tal-fjuwil huma bħalissa ogħla fil-Ġermanja milli fil-parti kbira tal-pajjiżi ġirien, dan la jinkoraġġixxi lil trasportaturi ta’ merkanzija Ġermaniżi u anqas lil dawk mhux Ġermaniżi involuti fi trasporti internazzjonali biex jimlew it-tank tagħhom fil-Ġermanja.

(86)

Id-deċiżjoni jekk it-tank għandux jimtela fil-Ġermanja jew le hija deċiżjoni ekonomika li tittieħed bl-istess kundizzjonijiet kemm minn trasportaturi Ġermaniżi ta’ merkanzija stradali, kif ukoll minn trasportaturi mhux Ġermaniżi ta’ merkanzija stradali. Fil-limiti ta’ l-itinerarju tagħhom, it-trasportaturi kollha ta’ merkanzija stradali li ser jimlew it-tank tagħhom fejn jaħsbu li jiksbu benefiċċju ekonomiku. Wara l-introduzzjoni tat-TRS, it-trasportaturi ta’ merkanzija stradali li jimlew it-tank tagħhom barra mill-Ġermanja mhux ser jibbenefikaw mill-kumpens, iżda jista’ jkollhom vantaġġ ekonomiku li jagħmlu dan. Ser jużaw il-possibbiltà li jibbenefikaw mit-TRS jekk il-prezz għal kull km li jirriżulta minn fjuwil Ġermaniż flimkien ma’ rata mnaqqsa ta’ pedaġġ ikun aktar baxx mill-prezz għal kull km li jirriżulta minn fjuwil barra mill-Ġermanja flimkien mar-rata sħiħa ta’ pedaġġ.

(87)

Fil-prattika l-benefiċċji tat-TRS ser jikkonċernaw prinċipalment lil żewġ gruppi ta’ trasportaturi ta’ merkanzija (benefiċċji relattivi hekk kif il-pedaġġ jibda jiżdied għal medja ta’ 15-il ċenteżmu/km): (50)

(88)

L-awtoritajiet Ġermaniżi nfushom ammettew fl-osservazzjonijiet tagħhom li perċentwali qrib l-20 % ta’ trasportaturi Ġermaniżi ta’ merkanzija stradali, aktarx dawk li jwettqu l-attivitajiet tagħhom l-aktar fis-suq nazzjonali u partikolarment fir-reġjuni ċentrali tal-Ġermanja, ma japprofittawx rwieħhom minn prezzijiet irħas tal-fjuwil f’pajjiżi oħra. Għall-kuntrarju, trasportaturi tal-merkanzija stabbiliti fi Stati Membri oħra ġeneralment jixtru l-fjuwil mhux biss u mhux b’mod predominanti fil-Ġermanja, iżda fi Stati Membri oħra, notevolment f’dawk bi prezzijiet irħas tal-fjuwil, anki jekk iwettqu parti mill-attività tagħhom fil-Ġermanja jew ukoll fis-suq lokali Ġermaniż, u jieħdu vantaġġ mil-libertà li jagħmlu trasport ta’ kabotaġġ.

(89)

Minħabba dak li ntqal hawn, il-Kummissjoni tipprevedi li, meta jitqies il-livell kurrenti tal-prezzijiet tal-fjuwil fi Stati Membri, porzjon kbir ħafna ta’ kilometri ta’ vetturi mhux Ġermaniżi (51) fuq l-awtostradi Ġermaniżi mhuwiex ser jibbenefika mit-TRS b’riżultat tar-rabta bejn it-TRS u l-ħlas ta’ dazji tas-sisa fil-Ġermanja. Din il-perċentwali ser ikun ovvjament aktar baxxa fil-każ ta’ trasportaturi Ġermaniżi tal-merkanzija. Barra minn hekk, utenti minn żmien għal ieħor ta’ awtostradi Ġermaniżi, partikolarment minn Stati Membri oħra, jistgħu jżommu lura milli jitolbu t-TRS minħabba piżijiet amministrattivi u jkunu ppenalizzati aktar meta mqabbla ma’ utenti regolari, partikolarment utenti Ġermaniżi.

(90)

Minħabba li l-każ hu hekk, il-Kummissjoni tisħaq li trasportatur ta’ merkanzija stradali li juża awtostrada Ġermaniża u li jixtri l-fjuwil tiegħu barra mill-Ġermanja jkun qiegħed juża infrastruttura tat-toroq Ġermaniża eżattament bl-istess mod bħal trasportatur ta’ merkanzija stradali li jimla t-tank tiegħu kollu fil-Ġermanja. Għalhekk, bħala konklużjoni, jista’ jingħad li r-rabta bejn ir-rimborż tal-pedaġġ u l-ammont ta’ dazji tas-sisa mħallsa fil-Ġermanja li qed tirriżulta f’livelli differenti ta’ pedaġġ ma tistax tkun ġustifikata permezz ta’ differenzi fl-użu ta’ awtostradi Ġermaniżi. B’riżultat ta’ din ir-rabta, xi trasportaturi ta’ merkanzija, li mhumiex b’mod predominanti Ġermaniżi, kif jidher mill-paragrafi 86 u 87, ikollhom iħallsu aktar pedaġġ minn oħrajn waqt li jkunu qed jittrasportaw l-istess merkanzija kbira fl-istess distanza fuq l-istess awtostrada. Barra minn hekk, is-sistema msemmija ser tiffavorixxi t-trasport nazzjonali, l-aktar dak magħmul minn trasportaturi ta’ merkanzija li jixtru l-fjuwil fil-Ġermanja fi trasport bejn Stati Membri, magħmul minn trasportaturi ta’ merkanzija li aktar ta’ sikwit jixtru fjuwil fi Stati Membri oħra, u din hija għamla oħra ta’ diskriminazzjoni pprojbita mid-dritt Komunitarju (52).

(91)

Ir-rabta bejn ir-rimborż tal-pedaġġ u l-ammont ta’ dazji tas-sisa mħallas fil-Ġermanja tista’ tindika li s-sistema tnisslet bħala kumpens għal livell għoli ta’ dazji tas-sisa fuq il-fjuwil fil-Ġermanja. Madankollu, il-prattika tal-Kummissjoni u l-ġurisprudenza tal-Qorti huma ċari ħafna dwar dan il-punt: id-differenza fil-piż tat-taxxa ma tistax waħidha (53) tiġgustifika l-għoti ta’ għajnuna mill-Istat. L-għoti ta’ għajnuna ma jistax ikun ġustifikat meta l-għajnuna tkun maħsuba biex tikkumpensa lil xi operaturi nazzjonali minħabba l-iżvantaġġ komparattiv tagħhom li jirriżulta minn differenzi regolatorji jew fiskali meta mqabbla ma’ Stati Membri oħra. Għajnuna mill-Istat mhix strument adatt biex ikunu llivellati, favur ċerti operaturi, differenzi fil-gradi ta’ tassazzjoni bejn l-Istati Membri. B’konsegwenza ta’ dan, il-fatt li l-livell ta’ dazji tas-sisa huwa għoli fil-Ġermanja – u għal hekk il-prezzijiet tad-diżil – fil-Ġermanja u tinħass illi hemm il-ħtieġa li jittaffa l-allegat żvantaġġ kompetittiv għal trasportaturi Ġermaniżi ta’ merkanzija stradali, ma jiġġustifikax ir-rabta bejn it-TRS u l-ħlas ta’ dazji tas-sisa. Barra minn hekk, il-prezzijiet tal-petrol huma wkoll għoljin fi Stati Membri oħra u trasportaturi tal-merkanzija minn dawk l-Istati Membri, li għal raġunijiet ġeografiċi u operattivi huwa anqas probabbli li jixtru fjuwil fil-Ġermanja, mhumiex sejrin jibbenefikaw l-istess mill-kumpens daqs trasportaturi Ġermaniżi tal-merkanzija.

(92)

Il-fatt li l-awtoritajiet Ġermaniżi jargumentaw li fil-preżent madwar 50 % tad-dħul mid-dazji tas-sisa jitwarrab għall-infrastruttura u t-TRS hija meħtieġa biex ikun evitat li trasportaturi tal-merkanzija jħallsu darbtejn għall-infrastruttura ma jippreġudikax din il-konklużjoni. L-ewwel, id-destinazzjoni finali ta’ dħul mit-taxxa mhix rilevanti biex ikun evaljat jekk teżistix diskriminazzjoni bejn trasportaturi Ġermaniżi tal-merkanzija u trasportaturi minn Stati Membri oħra. Id-differenza fil-piż tat-taxxa ma tistax tiġġustifika l-għoti ta’ l-għajnuna, irrispettivament mid-destinazzjoni tad-dħul mit-taxxa. It-tieni, 50 % tad-dħul biss huwa mwarrab għall-infrastruttura u minn din il-perċentwali ta’ dan il-50 %, parti kbira sejjer tintuża biex jitħallsu l-ispejjeż infrastrutturali tal-bqija tan-netwerk tat-toroq Ġermaniż li għalih m’hemmx ħtieġa ta’ pedaġġ. Għalhekk, ma jistax jingħad – kif jargumentaw l-awtoritajiet Ġermaniżi – li trasportaturi tal-merkanzija li jħallsu l-pedaġġ, kif ukoll id-dazji tas-sisa, qegħdin iħallsu kontribuzzjoni doppja għal spejjeż ta’ infrastruttura, minħabba li d-dħul minn dazji tas-sisa huwa użat biss b’mod marġinali biex jiffinanzja infrastruttura li ma tenħtieġx pedaġġ. B’konsegwenza ta’ dan, il-fatt li d-dħul mid-dazji tas-sisa qieghed jintuża parzjalment biex jiffinanzja infrastruttura ma jistax jiġġustifika r-rabta bejn ir-rimborż tal-pedaġġ u lanqas il-ħlas ta’ dazji tas-sisa.

(93)

Barra minn hekk, għandu jkun innutat li l-karattru ta’ pedaġġ u dak ta’ dazju tas-sisa huma differenti. Pedaġġ huwa ħlas għall-użu ta’ servizz u dazju tas-sisa huwa taxxa. Kif diġà ġie nnutat fil-kapitolu 5.2.3 ta’ din id-deċiżjoni, il-ġrajjiet li taw lok għal perċezzjoni huma differenti: l-użu ta’ awtostrada fil-każ ta’ pedaġġ, u l-konsum taż-żejt minerali fil-każ ta’ dazji tas-sisa.

(94)

Meqjus dak li ntqal hawn fuq, il-Kummissjoni ma tarax li hemm ġustifikazzjoni oġġettiva biex ikun hemm rabta bejn tnaqqis fil-ħlasijiet ta’ pedaġġ u l-ammont ta’ dazji tas-sisa mħallsa f’territorju Ġermaniż. B’konsegwenza ta’ dan, m’hemmx ġustifikazzjoni oġġettiva li tista’ ssostni d-differenza fit-trattament bejn trasportaturi ta’ merkanzija li jimlew it-tank tagħhom fil-Ġermanja u trasportaturi tal-merkanzija li jimlew it-tank tagħhom barra mill-Ġermanja minħabba li dawn huma oġġettivament fl-istess sitwazzjoni.

(95)

Fid-dawl ta’ dawn l-argumenti, il-Kummissjoni tasal għall-konklużjoni li l-miżura ta’ għajnuna ma tħarisx il-prinċipju li m’għandux ikun hemm diskriminazzjoni minħabba li l-miżura tirriżulta f’diskriminazzjoni de facto kontra trasportaturi barranin ta’ merkanzija stradali, u, għal din ir-raġuni biss, għandha titqies bħala inkompatibbli mas-suq komuni.

(96)

Barra minn hekk, il-miżura ta’ għajnuna lanqas ma tħares l-Artikolu 7(4) tad-Direttiva 1999/62/KE (Eurovignette), li jistipula li ħlasijiet ta’ pedaġġ u u minn utenti ma jistgħux jiddiskriminaw, direttament jew indirettament, minħabba ċ-ċittadinanza tat-trasportatur tal-merkanzija jew l-oriġini jew id-destinazzjoni tal-vettura.

(97)

Din id-dispożizzjoni hija biss espressjoni partikolari ta’ prinċipju ġenerali tad-dritt Komunitarju u, b’mod partikolari, ta’ liġi tat-trasport, jiġifieri l-projbizzjoni ta’ kull diskriminazzjoni bbażata fuq ċittadinanza, post ta’ stabbiliment jew il-punt ta’ tluq jew id-destinazzjoni tat-trasport. Dan il-prinċipju kien applikat b’mod konsistenti mill-imħallfin tal-Komunità (54), inkluż fil-każ speċifiku ta’ pedaġġi tat-toroq (55).

(98)

Skond każistika stabbilita tajjeb, huwa ċar mill-iskema ġenerali tat-Trattat li proċedura li tikkonċerna l-kompatibilità ta’ għajnuna mill-Istat mas-suq komuni ma għandha qatt tipproduċi riżultat li jkun kuntrarju għad-dispożizzjonjiet speċifiċi tat-Trattat (56). Il-Qorti sostniet ukoll li dawk l-aspetti ta’ għajnuna li jmorru kontra dispożizzjonijiet speċifiċi tat-Trattat, barra mill-Artikoli 87 u 88, jistgħu jkunu marbutin tant li ma jkunux jistgħu jinħallu ma’ l-iskop prinċipali ta’ l-għajnuna, li jkun impossibbli li jkunu evalwati għalihom waħidhom (57). Għal-motivi kif imfissra hawn fuq, il-miżura kkontemplata tikser il-prinċipju li m’għandux ikun hemm diskriminazzjoni, u, b’mod partikolari, l-Artikolu 7(4) tad-Direttiva 1999/62. Dan il-ksur huwa inerenti fil-mekkaniżmu tat-TRS u hu, għalhekk, marbut magħha b’mod indissolubbli. Dan jikkostitwixxi motiv ieħor li għandu jwassal lill-Kummissjoni tiddikjara l-għajnuna bħala inkompatibbli mas-suq komuni.

(99)

Il-Kummissjoni tfakkar lill-awtoritajiet Ġermaniżi li, f’każ li huma jqisu l-ħlasijiet globali għal trasportaturi ta’ merkanzija stradali fil-Ġermanja bħala għoljin wisq, huma jistgħu, fil-limiti ta’ miżuri eżistenti ta’ armonizzazzjoni f’livell Komunitarju, jimmodifikaw it-taxxa fuq il-vetturi jew il-livell ta’ dazji tas-sisa. Dawn huma miżuri orizzontali u ġenerali li fil-prinċipju la ma huma se jġibu diskriminazzjoni diretta u lanqas diskriminazzjoni de facto.

(100)

Il-Kummissjoni tqis li l-ħtieġa għall-għajnuna ma ntwerietx. L-awtoritajiet Ġermaniżi jargumentaw li l-miżura għandha titqies fid-dawl tat-tranżizzjoni li attwalment qegħdin iwettqu l-awtoritajiet Ġermaniżi minn ħlas għal awtostrada bbażat fuq taxxa għal ħlas minn utenti bbażat fuq kilometraġġ. Il-Kummissjoni tifhem ix-xewqa li jiddaħħlu miżuri transitorji minħabba ż-żieda fil-ħlasijiet totali għal trasportaturi tal-merkanzija stradali, iżda tinnota li l-livell tal-pedaġġ ġie ffissat f’livell iktar baxx minn dak inizjalment ippjanat, jiġifieri għal 12,6 ċenteżmi għal kull km, minflok għal 15-il ċenteżmu għal kull km. Li ż-żieda ppjanata fir-rata tal-pedaġġ ma ssirx kien ikun mezz iktar dirett bħala kumpens f’perjodu transitorju milli li r-rata tal-pedaġġ tiżdied sa 15-il ċenteżmu għal kull km u fl-istess ħin tiddaħħal it-TRS u jingħata rimborż ta’ 2,6 ċenteżmi għal kull km. Barra minn hekk, ir-rata iktar baxxa applikabbli bħal issa tapplika bl-istess mod għat-trasportaturi kollha ta’ merkanzija stradali li jużaw awtostradi Ġermaniżi u, għalhekk, mhix diskriminatorja. Ir-rimborż ippjanat kien ibiddel dan il-bilanċ, ħaġa li mhix meħrieġa biex tinkiseb il-mira maħsuba.

(101)

Barra minn hekk, l-awtoritajiet Ġermaniżi ma pprovdewx argumenti favur it-TRS li jistgħu ikunu ta’ kontro-bilanċ għall-ogħla piż amministrattiv, għal trasportaturi ta’ merkanzija stradali, ta’ l-introduzzjoni teknikament komplikata tat-TRS hekk kif imqabbla mas-sempliċi żamma tar-rata tal-pedaġġ aktar baxxa. Trasportaturi ta’ merkanzija stradali għandhom jippreżentaw riċevuti minn pompi tal-petrol jew kupuni ta’ kumpanija ta’ karti ta’ kreditu mill-Ġermanja, kull waħda turi n-numru ta’ reġistrazzjoni tal-vettura konċernata, u talba għal rimborż tal-pedaġġ fiż-żmien adattat kull sena. Dan il-piż x’aktarx ikun partikolarment tqil għal utenti ta’ kultant ta’ awtostradi fil-Ġermanja, partikolarment minn Stati Membri oħra. Il-Kummissjoni tfakkar lill-awtoritajiet Ġermaniżi li jistgħu jżidu l-livell tal-pedaġġ f’kull żmien, bil-kundizzjoni li d-dispożizzjonijiet tad-Direttiva 1999/62/KE ikunu tqiesu, meta jqisu li dan ikun meħtieġ.

(102)

Fid-dawl ta’ dawn l-argumenti, il-Kummissjoni tikkonkludi li l-miżura ta’ għajnuna lanqas ma tħaris il-prinċipju ta’ neċessità, u dan għal darb’oħra jikkostitwixxi motiv suffiċjenti biex tkun iddikjarata inkompatibbli mas-suq komuni.

(103)

Meqjus dak li ntqal qabel, il-Kummissjoni tqis li l-aħħar kundizzjoni ta’ l-Artikolu 3.1.b tar-Regolament 1107/70 li l-għajnuna m’għandhiex tikkawża distorsjoni tal-kompetizzjoni sal-punt li jkun kontra l-interess komuni lanqas mhi mħarsa. Kif imfisser hawn fuq, l-għajnuna ser tiffavorixxi mingħajr ħtieġa lil trasportaturi tal-merkanzija Ġermaniżi mill-kompetituri tagħhom minn Stati Membri oħra, u dan huwa kontra t-tħaddim sewwa tas-suq tat-trasport komuni u l-prinċipju ewlieni tal-libertà li jingħata trasport. Għal dan il-motiv, ukoll, l-għajnuna għandha tkun iddikjarata inkompatibbli mas-suq komuni.

(104)

Fl-aħħarnett, għandu jkun innutat li l-awtoritajiet Ġermaniżi ma invokaw ebda motiv ta’ kompatibilità ħlief l-Artikolu 73 tal-KE. F’kull każ, il-Kummissjoni tikkonferma l-evalwazzjoni preliminari tagħha fil-paragrafu 57 tad-deċiżjoni li tiftaħ proċedura formali ta’ investigazzjoni: l-għajnuna ma tistax tkun dikjarata kompatibbli skond l-Artikolu 87, paragrafu 3, a), b) u c), tabilħaqq lanqas bis-saħħa ta’ kull deroga oħra.

(105)

Il-Kummissjoni tikkonkludi li t-TRS hija miżura ta’ għajnuna li ma tħarisx il-kundizzjonijiet ta’ l-Artikolu 73 u l-Artikolu 3.1.b tar-Regolament (KEE) Nru 1107/70 u hija, għalhekk, inkompatibbli mas-suq komuni.