20.12.2008

MT

Il-Ġurnal Uffiċjali ta’ l-Unjoni Ewropea

L 344/1

---

REGOLAMENT TAL-KUNSILL (KE) Nru 1299/2008

tad-9 ta’ Diċembru 2008

li jistabbilixxi, għas-sena tas-sajd 2009, il-prezzijiet ta’ gwida u l-prezzijiet Komunitarji tal-produtturi għal ċerti prodotti tas-sajd konformement mar-Regolament (KE) Nru 104/2000

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea,

Wara li kkunsidra r-Regolament tal-Kunsill (KE) Nru 104/2000 tas-17 ta’ Diċembru 1999 dwar l-organizzazzjoni komuni tas-swieq fil-prodotti tas-sajd u l-akkwakultura (1), b’mod partikolari l-Artikolu 18(3) u l-Artikolu 26(1) tiegħu,

Wara li kkunsidra l-proposta tal-Kummissjoni,

Billi:

(1)	L-Artikolu 18(1) u l-Artikolu 26(1) tar-Regolament (KE) Nru 104/2000 jipprevedu li għandu jiġi ffissat prezz ta’ gwida u prezz tal-produzzjoni tal-Komunità għal kull sena ta’ sajd biex ikunu stabbiliti l-livelli tal-prezzijiet għall-intervent sabiex jitqegħdu fis-suq ċerti prodotti tas-sajd.

(2)	L-Artikolu 18(1) tar-Regolament (KE) Nru 104/2000 jesiġi li l-prezz ta’ gwida jiġi ffissat għal kull wieħed mill-prodotti u gruppi ta’ prodotti elenkati fil-lista fl-Anness I u II ta’ dak ir-Regolament.

(3)	Fuq il-bażi tad-dejta kurrenti disponibbli fuq il-prezzijiet tal-prodotti kkonċernati u fuq il-kriterji msemmija fl-Artikolu 18(2) tar-Regolament (KE) Nru 104/2000, il-prezz ta’ gwida għandu jiżdied, jinżamm, jew jitnaqqas għas-sena tas-sajd 2009, skond l-ispeċijiet.

(4)

L-Artikolu 26(1) tar-Regolament (KE) Nru 104/2000 jeħtieġ jiġi kkalkolat l-prezz Komunitarju tal-produtturi għal kull wieħed mill-prodotti elenkati fil-lista fl-Anness III ma’ dak ir-Regolament. Huwa xieraq li jiġi stabbilit prezz Komunitarju tal-produtturi għal wieħed minn dawk il-prodotti u li jiġi kkalkolat il-prezz Komunitarju tal-produtturi għall-oħrajn permezz tal-fatturi ta’ konverżjoni stabbiliti mir-Regolament tal-Kummissjoni (KEE) Nru 802/2006 tat-30 ta’ Mejju 2006 li jiffissa l-fatturi ta’ konverżjoni applikabbli għall-ħut tal-ġenera Thunnus u Euthynnus (2).

(5)	Fuq il-bażi tal-kriterji stabbiliti fl-ewwel u fit-tieni inċiż tal-Artikolu 18(2) u fl-Artikolu 26(1) tar-Regolament (KE) Nru 104/2000, il-prezz Komunitarju tal-produtturi għas-sena tas-sajd 2009 għandu jiġi aġġustat.

(6)	Fid-dawl ta’ l-urġenza tal-każ, huwa importanti li tiġi permessa eċċezzjoni għall-perjodu ta’ sitt ġimgħat imsemmi fil-paragrafu 1(3) tal-Protokoll dwar ir-rwol tal-parlamenti nazzjonali fl-Unjoni Ewropea anness mat-Trattat dwar l-Unjoni Ewropea,

ADOTTA DAN IR-REGOLAMENT:

Artikolu 1

Għas-sena tas-sajd mill-1 ta’ Jannar sal-31 ta’ Diċembru 2009, il-prezz ta’ gwida kif previst fl-Artikolu 18(1) tar-Regolament (KE) Nru 104/2000 għandu jkun kif stabbilit fl-Anness I ta’ dan ir-Regolament.

Artikolu 2

Għas-sena tas-sajd mill-1 ta’ Jannar sal-31 ta’ Diċembru 2009, il-prezz Komunitarju tal-produtturi kif previst fl-Artikolu 26(1) tar-Regolament (KE) Nru 104/2000 għandu jkun kif stabbilit fl-Anness II ta’ dan ir-Regolament.

Artikolu 3

Dan ir-Regolament għandu jidħol fisseħħ fl-1 ta’ Jannar 2009.

---

(1)  ĠU L 17, 21.1.2000, p. 22.

(2)  ĠU L 144, 31.5.2006, p. 15.

---

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/6

---

REGOLAMENT TAL-KUNSILL (KE) Nru 1300/2008

tat-18 ta' Diċembru 2008

li jistabbilixxi pjan pluriennali għall-istokk ta’ aringi li jinsab fil-Punent tal-Iskozja u għas-sajd li jisfrutta dak l-istokk

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ekonomika Ewropea, u b’mod partikolari l-Artikolu 37 tiegħu,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew (1),

Billi:

(1)

Ir-Regolament (KE) Nru 2371/2002 tal-20 ta’ Diċembru 2002 dwar il-konservazzjoni u l-isfruttar sostenibbli ta’ riżorsi tas-sajd skond il-Politika Komuni dwar is-Sajd (2) jipprevedi li, sabiex jinkiseb l-għan stabbilit fih, il-Komunità għandha tapplika l-approċċ ta’ prekawzjoni meta tadotta miżuri għall-protezzjoni u konservazzjoni tar-riżorsi akkwatiċi ħajjin, sabiex tipprovdi għall-isfruttar sostenibbli tagħhom u sabiex tnaqqas għal minimu l-impatt tas-sajd fuq l-ekosistemi marini.

(2)

Parir xjentifiku reċenti mill-Kunsill Internazzjonali għall-Esplorazzjoni tal-Baħar (International Council for the Exploration of the Sea, ICES) u mill-Kumitat Xjentifiku, Tekniku u Ekonomiku għas-Sajd (Scientific, Technical and Economic Committee for Fisheries, STECF) jindika li l-istokk tal-aringi (Clupea harengus) li jinsab fl-ibħra lejn il-Punent tal-Iskozja huwa sfruttat kemmxejn aktar meta mqabbel mal-ogħla rendiment sostenibbli.

(3)	Jeħtieġ li jiġi stabbilit pjan pluriennali bl-iskop li jkun żgurat li l-istokk ikun sfruttat abbażi tal-ogħla rendiment sostenibbli u taħt kondizzjonijiet ekonomiċi, ambjentali u soċjali sostenibbli.

(4)

Għal dan il-għan, il-pjan għandu jiċċentra fuq l-implimentazzjoni progressiva ta’ approċċ għall-ġestjoni tas-sajd ibbażat fuq l-ekosistema, u għandu jikkontribwixxi għal attivitajiet effiċjenti ta’ sajd f’industrija tas-sajd ekonomikament vijabbli u kompetittiva, li jġib standard ġust ta’ għajxien għal dawk li jiddependu mis-sajd tal-aringi fil-Punent tal-Iskozja u li jqis l-interessi tal-konsumaturi.

(5)

Parir xjentifiku mis-STECF u mill-ICES jindika li l-istokk ta’ aringi fl-ibħra lejn il-Punent tal-Iskozja ikun sostenibbli u jħalli rendiment raġonevolment għoli jekk jiġi sfruttat abbażi ta’ mortalità mis-sajd ta’ 0,25 meta l-livell tal-bijomassa tal-istokk ikun ugwali għal, jew aktar minn, 75 000 tunnellata metrika u abbażi ta’ mortalità mis-sajd ta’ 0,2 meta l-livell tal-bijomassa tal-istokk ikun anqas minn 75 000 tunnellata metrika iżda ugwali għal jew aktar minn 50 000 tunnellata metrika,.

(6)

Dak il-parir għandu jkun implimentat billi jkun stabbilit metodu xieraq sabiex ikunu ffissati l-qabdiet totali permissibbli (TACs) għall-istokk ta’ aringi fl-ibħra lejn il-Punent tal-Iskozja f’livell konsistenti ma’ mortalità mis-sajd xierqa għall-perijodu fit-tul u b'kont meħud tal-livell tal-bijomassa ta' dan l-istokk ta' ħut.

(7)	Sabiex tkun żgurata stabbiltà fil-possibbiltajiet tas-sajd, jeħtieġ li l-varjazzjoni fit-TACs minn sena għall-oħra tiġi limitata meta l-livell tal-bijomassa tal-istokk ikun ugwali għal jew aktar minn 50 000 tunnellata metrika.

(8)

Sabiex tkun żgurata l-konformità mad-dispożizzjonijiet ta' dan ir-Regolament jeħtieġ li jittieħdu miżuri ta’ kontroll minbarra dawk stabbiliti mir-Regolament (KE) Nru 1627/94 tas-27 ta' Ġunju 1994 li jistabbilixxi ċerti dispożizzjonijiet rigward permessi speċjali tas-sajd (3), mir-Regolament tal-Kunsill (KEE) Nru 2847/93 tat-12 ta’ Ottubru 1993 li jistabbilixxi sistema ta' kontroll li tapplika għall-politika tas-sajd komuni (4) u mir-Regolament tal-Kummissjoni (KEE) Nru 2807/83 tat-22 ta’ Settembru 1983 li jistabbilixxi regoli dettaljati dwar ir-reġistrazzjoni ta' informazzjoni dwar il-qabdiet ta' ħut tal-Istati Membri (5).

(9)

Għandhom jiġu stabbiliti regoli sabiex jikkwalifikaw il-pjan pluriennali introdott b'dan ir-Regolament bħala pjan ta' rkupru fis-sens tal-Artikolu 5 tar-Regolament (KE) Nru 2371/2002 ta' l-20 ta' Diċembru 2002 dwar il-konservazzjoni u l-isfruttar sostenibbli ta' riżorsi tas-sajd taħt il-Politika Komuni dwar is-Sajd u għall-finijiet tal-Artikolu 21(a)(i) tar-Regolament (KE) Nru 1198/2006 tas-27 ta' Lulju 2006 dwar il-Fond Ewropew għas-Sajd (6) jew bħala pjan ta' ġestjoni fis-sens tal-Artikolu 6 tar-Regolament (KE) Nru 2371/2002 u għall-finijiet tal-Artikolu 21(a)(iv) tar-Regolament tal-Kunsill (KE) Nru 1198/2006, b'kont meħud tal-livell tal-bijomassa tal-istokk.

(10)

L-istabbiliment tal-qabdiet totali permissibbli, ir-reviżjoni tar-rati minimi ta' mortalità mis-sajd, kif ukoll ċerti adattamenti meħtieġa għall-pjanijiet ta' ġestjoni u ta' rkupru fid-dawl tal-effikaċja tagħhom u tal-funzjonament tagħhom, jikkostitwixxu miżuri ta' importanza fundamentali fil-Politika Komuni tas-Sajd. Huwa għaldaqstant kunsiljabbli li l-Kunsill jirriżerva d-dritt li jeżerċita direttament is-setgħat implimentazzjoni fir-rigward ta' dawn il-kwistjonijiet speċifiċi,

ADOTTA DAN IR-REGOLAMENT:

KAPITOLU I

SUĠĠETT U DEFINIZZJONIJIET

Artikolu 1

Suġġett

Dan ir-Regolament jistabbilixxi pjan pluriennali għall-attivitajiet tas-sajd li jisfruttaw l-istokk ta’ aringi (Clupea harengus) f’ibħra internazzjonali u f’dawk tal-Komunità taż-żoni Vb u VIb tal-ICES, u f’dik il-parti taż-żona VIa tal-ICES li tinsab fil-Punent tal-meridjan ta' lonġitudini 7oW u fit-Tramuntana tal-parallel ta' latitudini 55oN jew fil-Lvant tal-meridjan ta' lonġitudini 7oW u fit-Tramuntana tal-parallel ta' latitudini 56oN, bl-esklużjoni ta’ Clyde (minn hawn ’il quddiem imsejħa “iż-żona fil-Punent tal-Iskozja”).

Artikolu 2

Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet stabbiliti fl-Artikolu 3 tar-Regolament (KE) Nru 2371/2002. Addizzjonalment, għandhom japplikaw it-tifsiriet li ġejjin:

(a)	“iż-żoni ICES”: iż-żoni definiti fir-Regolament (KEE) Nru 3880/91 tas-17 ta’ Diċembru 1991 dwar is-sottomissjoni ta' statistika nominali dwar il-qabda mill-Istati Membri li jistadu fil-Grigal tal-Atlantiku (7);

(b)	“it-total permissibbli ta' qabdiet (TAC)”: il-kwantità li tista’ tinqabad u tinħatt l-art, mill-istokk kull sena;

(c)	“VMS”: is-Sistema ta’ Sorveljanza ta’ Vapuri bbażata fuq satellita (VMS) fis-sens tar-Regolament tal-Kummissjoni (KE) Nru 2244/2003 tat-18 ta' Diċembru 2003 li jistabbilixxi disposizzjonijiet dettaljati dwar is-sistemi ta' sorveljanza tal-vapuri bażata fuq satellita (8);

(d)	“grupp ta' età adatta”: l-età minn tliet sa seba′ snin inklużi, jew gruppi oħra ta' età indikati bħala adatti mill-Kumitat Xjentifiku, Tekniku u Ekonomiku għas-Sajd (CSTEP).

KAPITOLU II

OBJETTIV U MIRI

Artikolu 3

Objettivi u miri

1.   Il-pjan pluriennali għandu jiżgura l-isfruttar tal-istokk ta’ aringi fiż-żona fil-Punent tal-Iskozja abbażi tal-ogħla rendiment sostenibbli.

2.   L-objettiv fil-paragrafu 1 għandu jintlaħaq billi:

(a)	ir-rata ta’ mortalità tas-sajd tinżamm f’0,25 fis-sena għal gruppi ta’ età adatta meta l-livell tal-bijomassa riproduttiva tal-istokk ikun aktar minn 75 000 tunnellata;

(b)	ir-rata ta’ mortalità tas-sajd tinżamm f’mhux aktar minn 0,2 fis-sena għal gruppi ta’ età adatta meta l-livell tal-bijomassa riproduttiva tal-istokk ikun anqas minn 75 000 tunnellata iżda ugwali għal jew aktar minn 50 000 tunnellata;

(c)	ikun previst l-għeluq tas-sajd fil-każ li l-livell tal-bijomassa riproduttiva tal-istokk jinżel taħt il-50 000 tunnellata.

3.   L-objettiv stabbilit fil-paragrafu 1 għandu jintlaħaq f'varjazzjoni annwali tat-TAC limitata għal 20 % jew 25 % abbażi tas-sitwazzjoni tal-istokk.

KAPITOLU III

QBID TOTALI AMMISSIBBLI

Artikolu 4

Iffissar tat-TACs

1.   Kull sena, il-Kunsill għandu jiddeċiedi, b’maġġoranza kwalifikata abbażi ta’ proposta mill-Kummissjoni, kemm għandu jkun it-TAC, għas-sena ta’ wara, applikabbli għall-istokk tal-aringi fiż-żona fil-punent tal-Iskozja, konformement mal-paragrafi 2 sa 6.

2.   Meta fl-opinjoni tas-STECF il-livell tal-bijomassa riproduttiva tal-istokk ikun ta' 75 000 tunnellata jew aktar fis-sena li għaliha jkollha tkun iffissata t-TAC, dan għandu jiġi stabbilit f’livell li, abbażi tal-parir tas-STECF, jirriżulta f’rata ta’ mortalità tas-sajd ta’ 0,25 fis-sena. Madankollu, il-varjazzjoni annwali tat-TAC għandha tkun limitata għal 20 %.

3.   Meta fl-opinjoni tas-STECF il-livell tal-bijomassa riproduttiva tal-istokk ikun anqas minn 75 000 tunnellata iżda ugwali għal jew aktar minn 50 000 tunnellata fis-sena li għaliha jkollu jiġi ffissat it-TAC, dan għandu jiġi stabbilit f’livell li, abbażi tal-parir tas-STECF, jirriżulta f’rata ta’ mortalità tas-sajd ta’ 0,2 fis-sena. Madankollu, il-varjazzjoni minn sena għall-oħra tat-TAC għandha tkun limitata għal:

(a)	20 % jekk il-livell tal-bijomassa riproduttiva tal-istokk ikun ta' 62 500 tunnellata jew aktar iżda anqas minn 75 000 tunnellata;

(b)	25 % jekk il-livell tal-bijomassa riproduttiva tal-istokk ikun ta' 50 000 tunnellata jew aktar iżda anqas minn 62 500 tunnellata.

4.   Meta fl-opinjoni tas-STECF il-livell tal-bijomassa riproduttiva tal-istokk ikun anqas minn 50 000 tunnellata fis-sena li għaliha jkollu jiġi ffissat it-TAC, dan għandu jiġi stabbilit għal 0 tunnellati.

5.   Għall-fini tal-kalkolu li għandu jsir konformement mal-paragrafi 2 u 3, is-STECF għandu jikkunsidra li l-istokk iġarrab rata ta’ mortalità fis-sajd ta’ 0,25 fis-sena qabel is-sena li għaliha għandha tkun iffissata t-TAC.

6.   B′deroga mill-paragrafi 2 jew 3, jekk, fl-opinjoni tas-STECF, l-istokk tal-aringi fiż-żona fuq in-naħa tal-punent tal-Iskozja ma jkunx qed jirkupra biżżejjed, it-TAC għandha tiġi ffissata f'livell aktar baxx minn dak previst f'dawk il-paragrafi.

Artikolu 5

Permess speċjali tas-sajd

1.   Sabiex jistadu għall-aringi fiż-żona fil-punent tal-Iskozja, il-bastimenti għandu jkollhom permess speċjali tas-sajd maħruġ taħt l-Artikolu 7 tar-Regolament (KE) Nru 1627/94.

2.   Għandu jkun ipprojbit għal kull bastiment tas-sajd li ma jkollux permess tas-sajd kif imsemmi fil-paragrafu 1 li jistad għal kull kwantità ta’ aringi jew li jżommha abbord waqt li l-bastiment ikun qiegħed fuq vjaġġ tas-sajd li kien jinkludi l-preżenza ta’ dak il-bastiment fiż-żona fil-punent tal-Iskozja.

3.   Bastimenti tas-sajd li jkun inħarġilhom il-permess speċjali tas-sajd imsemmi fil-paragrafu 1 m’għandhomx jitħallew jistadu barra miż-żona fil-punent tal-Iskozja matul l-istess vjaġġ tas-sajd.

4.   Il-paragrafu 3 m’għandux japplika għall-bastimenti li jibagħtu r-rapport dwar il-qabda tagħhom kuljum liċ-Ċentru ta’ Monitoraġġ tas-Sajd tal-Istat Membru tal-bandiera, kif previst fl-Artikolu 3(7) tar-Regolament (KEE) Nru 2847/93, sabiex jidħol fid-database kompjuterizzata tiegħu.

5.   Kull Stat Membru għandu jistabbilixxi u jżomm lista ta' bastimenti li jkollhom il-permess speċjali msemmi fil-paragrafu 1 u jagħmluha disponibbli għall-Kummissjoni u l-Istati Membri l-oħra fuq is-sit web uffiċjali tiegħu. Il-bastimenti li għalihom japplikaw id-dispożizzjonijiet tal-paragrafu 4 għandhom ikunu identifikati b’mod ċar fuq din il-lista.

Artikolu 6

Kontroverifiki

Minbarra l-obbligi stabbiliti fl-Artikolu 19 tar-Regolament (KEE) Nru 2847/93, l-Istati Membri għandhom jagħmlu kontroverifiki amministrattivi bejn id-dikarazzjonijiet tal-ħatt, iż-żoni tas-sajd u l-qbid irreġistrati fil-ġurnal ta’ abbord, rapporti ta’ qbid mibgħuta taħt l-Artikolu 5(4) ta' dan ir-Regolament u d-data VMS. Tali kontroverifiki għandhom ikunu rreġistrati u mqiegħda għad-dispożizzjoni tal-Kummissjoni fuq it-talba tagħha.

KAPITOLU IV

SEGWITU

Artikolu 7

Reviżjoni tar-rati minimi ta’ mortalità tas-sajd

Meta l-Kummissjoni, abbażi ta’ parir mis-STECF, issib li r-rati ta’ mortalità fis-sajd u l-livelli relatati ma’ bijomassa ta’ stokkijiet li jbidu speċifikati fl-Artikolu 3(2) ma jkunux adatti sabiex tintlaħaq il-mira speċifikata fl-Artikolu 3(1), il-Kunsill għandu fuq il-bażi ta’ proposta mill-Kummissjoni jiddeċiedi b’maġġoranza kwalifikata dwar reviżjoni ta’ dawk il-livelli tal-bijomassa u/jew koeffiċjenti.

Artikolu 8

Evalwazzjoni u reviżjoni tal-pjan

1.   Il-Kummissjoni għandha kull sena titlob parir mingħand is-STECF u mill-Kunsill Konsultattiv Reġjonali Pelaġiku dwar kif għandhom jintlaħqu l-miri tal-pjan multiannwali. Fejn il-parir jindika li l-miri ma jkunux qegħdin jintlaħqu, il-Kunsill tal-UE għandu jiddeċiedi b’maġġoranza kwalifikata fuq proposta mill-Kummissjoni dwar miżuri addizzjonali jew alternattivi, jew it-tnejn, sabiex jiżgura li l-miri jintlaħqu.

2.   F’intervalli ta’ mhux anqas minn erba’ snin mit-18 ta' Diċembru 2008, il-Kummissjoni għandha tirrivedi ż-żona ġeografika ta' applikazzjoni, il-livelli ta' referenza bijoloġika u l-adegwatezza u l-operat tal-pjan multiannwali. Fil-qafas ta' tali reviżjoni, il-Kummissjoni għandha titlob il-parir tas-STECF u tal-Kunsill Konsultattiv Reġjonali Pelaġiku. Jekk ikun il-każ, il-Kunsill tal-UE għandu jiddeċiedi b'maġġoranza kwalifika fuq proposta mill-Kummissjoni dwar adattamenti adatti għall-pjan multiannwali, fir-rigward taż-żona ġeografika ta' applikazzjoni msemmija fl-Artikolu 1, il-livelli ta' referenza bijoloġika msemmija fl-Artikolu 3 jew ir-regoli għall-iffissar tat-TACs msemmija fl-Artikolu 4.

KAPITOLU V

DISPOŻIZZJONIJIET FINALI

Artikolu 9

Fond Ewropew għas-Sajd

Fejn il-bijomassa riproduttiva tal-aringi tiġi valutata mis-STECF bħala ta' livell ta' 75 000 tunnellata jew aktar, il-pjan multiannwali għandu jitqies bħala pjan ta’ ġestjoni fis-sens tal-Artikolu 6 tar-Regolament (KE) Nru 2371/2002 u għall-finijiet tal-Artikolu 21(a)(iv) tar-Regolament (KE) Nru 1198/2006. F'każ kuntrarju, il-pjan multiannwali għandu jitqies li huwa pjan ta' rkupru fit-tifsira tal-Artikolu 5 tar-Regolament (KE) Nru 2371/2002, u għall-finijiet tal-Artikolu 21(a)(i) tar-Regolament (KE) Nru 1198/2006.

Artikolu 10

Dħul fis-seħħ

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  L-Opinjoni tal-4 ta' Diċembru 2008 (għadha mhijiex pubblikata fil-Ġurnal Uffiċjali).

(2)  ĠU L 358, 31.12.2002, p. 59.

(3)  ĠU L 171, 6.07.1994, p. 7.

(4)  ĠU L 261, 20.10.1993, p. 1.

(5)  ĠU L 276, 10.10.1983, p. 1.

(6)  ĠU L 223, 15.8.2006, p. 1.

(7)  ĠU L 365, 31.12.1991, p. 1.

(8)  ĠU L 333, 20.12.2003, p. 17.

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/10

---

REGOLAMENT TAL-KUMMISSJONI (KE) Nru 1301/2008

tad-19 ta’ Diċembru 2008

li jistabbilixxi l-valuri fissi ta' l-importazzjoni għad-determinazzjoni tal-prezz ta' dħul ta' ċertu frott u ħaxix

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1234/2007 tat-22 ta' Ottubru 2007 li jistabbilixxi organizzazzjoni komuni ta' swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) (1),

Wara li kkunsidrat ir-Regolament tal-Kummissjoni (KE) Nru 1580/2007 tal-21 ta' Diċembru 2007 dwar regoli dettaljati għall-applikazzjoni tar-Regolamenti tal-Kunsill (KE) Nru 2200/96, (KE) Nru 2001/96 u (KE) Nru 1182/2007 fis-settur tal-frott u ħxejjex (2), u b'mod partikolari l-Artikolu 138(1) tiegħu,

Billi:

Fl-applikazzjoni tal-konklużjonijiet tan-negozjati kummerċjali multilaterali taċ-Ċiklu ta’ l-Urugwaj, il-Regolament (KE) Nru 1580/2007 jistipula l-kriterji għall-istabbiliment mill-Kummissjoni tal-valuri fissi ta' l-importazzjoni minn pajjiżi terzi, għall-prodotti u għall-perjodi msemmijin fl-Anness XV, it-Taqsima A tar-Regolament imsemmi,

ADOTTAT DAN IR-REGOLAMENT:

Artikolu 1

Il-valuri fissi ta' l-importazzjoni msemmija fl-Artikolu 138 tar-Regolament (KE) Nru 1580/2007 huma stipulati fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ fl-20 ta’ Diċembru 2008.

---

(1)  ĠU L 299, 16.11.2007, p. 1.

(2)  ĠU L 350, 31.12.2007, p. 1.

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/12

---

REGOLAMENT TAL-KUMMISSJONI (KE, EURATOM) Nru 1302/2008

tas-17 ta’ Diċembru 2008

dwar id-dejtabejż ċentrali tal-esklużjoni

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunitajiet Ewropej,

Wara li kkunsidrat it-Trattat li jwaqqaf il-Komunità Ewropea għall-Enerġija Atomika,

Wara li kkunsidrat ir-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 dwar ir-Regolament Finanzjarju li japplika għall-baġit ġenerali tal-Komunitajiet Ewropej (1), u b’mod partikulari l-Artikolu 95 tiegħu,

Wara li kkunsidrat ir-Regolament tal-Kunsill (KE, Euratom) Nru 215/2008 tal-18 ta’ Frar 2008 dwar ir-Regolament Finanzjarju li japplika għall-10 Fond ta’ Żvilupp Ewropew (2), u b’mod partikulari l-Artikolu 98 tiegħu,

Billi:

(1)

Il-Kummissjoni li hija responsabbli għall-eżekuzzjoni tal-baġit ġenerali tal-Unjoni Ewropea u l-fondi l-oħra kollha ġestiti mill-Komunitajiet, hi obbligata li twaqqaf u topera dejtabejż ċentrali, b’konformità mar-regoli tal-Komunità dwar il-protezzjoni tad-dejta personali, bl-għanijiet li l-mekkaniżmu tal-esklużjoni jkun effiċjenti kif stabbilit fir-Regolament Finanzjarju u għall-protezzjoni tal-interessi finanzjarji tal-Komunitajiet. B’mod partikolari, id-dejtabejż għandha tkopri l-eżekuzzjoni tal-fondi kollha tal-Komunità indipendetement mill-mod ta’ ġestjoni applikabbli.

(2)

Ir-Regolament Finanzjarju ipoġġi obbligazzjonijiet fuq l-istituzzjonijiet rigward l-għoti ta’ kuntratti u għotjiet lil terzi persuni fil-kuntest ta’ ġestjoni ċentralizzata tal-fondi tal-Komunità. B’mod partikolari, l-Artikoli 93 u 114(3) jistabbilixxu obbligazzjoni sabiex terzi persuni jiġu esklużi milli jipparteċipaw fi proċeduri ta’ ksib jew għoti ta’ għotjiet fejn ikunu f’waħda mis-sitwazzjonijiet elenkati fl-Artikolu 93(1). L-Artikoli 94 u 114(3) jipprojbixxu l-għoti ta’ kuntratt jew għotja lil terzi persuni li, waqt proċedura ta’ ksib jew għotja speċifika, ikunu f’sitwazzjoni ta’ kunflitt ta’ interess jew ikunu taw dikjarazzjoni falza fl-għoti tal-informazzjoni mitluba mill-istituzzjoni bħala kondizzjoni ta’ parteċipazzjoni fil-proċedura ta’ ksib jew għoti ta’ kuntratti. Minbarra dan, l-Artikoli 96 u 114(4) jistabbilixxu l-possibilità li l-awtorità tal-kuntratti timponi penali amministrattivi u finanzjarji lil terzi persuni, b’mod partikolari fil-forma ta’ esklużjoni minn benefiċċji ta’ kwalunkwe fond tal-Komunità għal perjodu li jiġi determinat mill-istituzzjoni konċernata skont l-Artikolu 133a tar-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jistabbilixxi regoli dettaljati għall-implimentazzjoni tar-Regolament tal-Kunsill (KE, Euratom) Nru 1605/2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (3).

(3)

L-Artikli 74 u 75 tar-Regolament tal-Kummissjoni (KE, Euratom) Nru 2343/2002 tat-23 ta’ Diċembru 2002 dwar ir-Regolament Finanzjarju strutturali għall-entitajiet imsemmijin fl-Artikolu 185 tar-Regolament tal-Kunsill (KE, Euratom) Nru 1605/2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (4) jeħtieġu lil dawn il-korpi sabiex japplikaw id-dispożizzjonijiet imsemmija hawn fuq.

(4)

L-Artikolu 50 tar-Regolament tal-Kummissjoni (KE) Nru 1653/2004 tat-21 ta’ Settembru 2004 dwar regolament finanzjarju standard għall-aġenziji eżekuttivi skont ir-Regolament tal-Kunsill (KE) Nru 58/2003 li jistabbilixxi l-istatut għal aġenziji eżekuttivi li jkunu fdati b’ċerti ħidmiet fit-tmexxija ta’ programmi tal-Komunità (5) jobbliga lill-aġenziji eżekuttivi japplikaw id-dispożizzjonijiet tar-Regolament Finanzjarju imsemmija hawn fuq għall-implimentazzjoni tal-baġit operattiv tagħhom.

(5)

Billi l-aġenziji eżekuttivi għandhom l-istatus ta’ uffiċjali li jawtorizzaw permezz ta’ delega tal-Kummissjoni għall-implimentazzjoni ta’ approprjazzjonijiet operattivi li japplika għalihom ir-Regolament Finanzjarju, dawn għandhom ikollhom aċċess għad-dejtabejż tal-esklużjoni bl-istess mod bħala servizzi tal-Kummissjoni.

(6)	L-għanijiet u l-iskop tad-dejtabejż tal-esklużjoni għandhom ikunu definiti sabiex jiġi determinat l-użu tad-dejta.

(7)

L-Uffiċċju Ewropew Kontra l-Frodi (OLAF) għandu jkollu aċċess għad-dejtabejż tal-esklużjoni sabiex jagħmel ix-xogħlijiet ta’ investigazzjoni regolatorja tiegħu u fil-kisba ta’ informazzjoni riżervata u fl-attivitajiet tiegħu għall-prevenzjoni tal-frodi li jsiru skont l-Artikolu 1 (2) tar-Regolament (KE) Nru 1073/1999 tal-Parlament Ewropew u tal-Kunsill tat-25 ta’ Mejju 1999 rigward investigazzjonijiet immexxija mill-Uffiċċju ta’ Kontra l-Frodi Ewropew (OLAF) (6) u Regolament tal-Kunsill (Euratom) Nru 1074/1999 tat-25 ta’ Mejju 1999 rigward investigazzjonijiet immexxija mill-Uffiċċju ta’ Kontra l-Frodi Ewropew (OLAF) (7).

(8)

L-uffiċjal tal-kontabilità tal-Kummissjoni għandu jassigura l-amministrazzjoni tad-dejtabejż tal-esklużjoni u jkollu d-dritt li jimmodifika tagħrif li jinsab fid-dejtabejż. Is-servizz tal-Kummissjoni relevanti jew l-istituzzjonijiet l-oħra għandhom ikunu responsabbli sabiex jitolbu d-dħul ta’ twissijiet ta’ esklużjoni fid-dejtabejż tal-esklużjoni.

(9)

Ir-regoli tal-aċċess għad-dejtabejż tal-esklużjoni għandhom jiddistingwu bejn servizzi tal-Kummissjoni, aġenziji eżekuttivi u l-istituzzjonijiet u aġenziji kollha tal-Komunità li jużaw sistema ta’ kontabilità provduta mill-Kummissjoni (hawnhekk aktar ’il quddiem) li tippermetti aċċess dirett għal twissijiet, min-naħa, u l-istituzzjonijiet, awtoritajiet u aġenziji tal-implimentazzjoni li m’għandhomx aċċess, fuq in-naħa l-oħra. Għalhekk, dawn l-istituzzjonijiet għandhom ikollhom aċċess permezz ta’ punti tal-kuntatt speċifikati u l-awtoritajiet u l-aġenziji tal-implimentazzjoni għandhom ikollhom aċċess permezz ta’ punti tal-komunikazzjoni u kooperazzjoni.

(10)

Għandu jkun possibbli li l-aċċess għad-dejtabejż tal-esklużjoni jiġi limitat fejn l-awtoritajiet jew aġenziji tal-implimentazzjoni jiġġestixxu fondi b’livell ta’ deċentralizzazzjoni limitata ħafna, li jagħmel l-aċċess għad-dejtabejż tal-esklużjoni mhux adattat jew fejn dan l-aċċess kellu jiġi miċħud minħabba raġunijiet ta’ protezzjoni tad-dejta

(11)	Sabiex jiġu definiti b’mod ċar ir-responsabbiltajiet tagħhom, ix-xogħlijiet tal-punti tal-kuntatt u tal-punti tal-komunikazzjoni u kooperazzjoni għandhom jiġu determinati.

(12)	Sabiex jiġi rifless il-fatt li d-dejtabejż għandha tkun komuni għall-istituzzjonijiet, il-fluss tad-dejta għandu jiġi dirett direttament lill-uffiċjal tal-kontabilità tal-Kummissjoni.

(13)

Sabiex jiġu mħarsa l-interessi finanzjarji tal-Komunitajiet bejn esklużjoni deċiża skont l-Artikolu 93(1) tar-Regolament Finanzjarju għall-proċedura ta’ ksib jew għotja speċifika u d-determinazzjoni tat-tul tal-esklużjoni mill-istituzzjoni, din tal-aħħar għandha tkun tista’ titlob reġistrazzjoni proviżorja ta’ twissija ta’ esklużjoni.

(14)	Sabiex jiġu evitati twissijiet qodma, b’mod partikolari dawk relatati ma’ entitajiet li għalqu, it-twissijiet li jindikaw esklużjoni skont l-Artikolu 93(1) (a) u (d) tar-Regolament Finanzjarju għandhom jitneħħew awtomatikament wara ħames snin.

(15)	Billi l-esklużjonijiet skont l-Artikolu 94 tar-Regolament Finanzjarju jirrigwardaw proċeduri speċifiċi ta’ ksib jew għotjiet u mhux – kif jistipula l-Artikolu 93(1) – sitwazzjoni ta’ esklużjoni ġenerali, il-perjodu tar-reġistrazzjoni għandu jkun limitat u mneħħi awtomatikament.

(16)	Għandha tiġi spjegata fid-detall il-proċedura għal talbiet ibbażati fuq informazzjoni mill-awtoritajiet jew aġenziji tal-implimentazzjoni, li tapplika għall-modi kollha tal-ġestjoni bl-eċċezzjoni għall-ġestjoni ċentralizzata diretta.

(17)

Għandu jiġi spjegat b’mod ċar is-sehem tar-responsabbiltà tal-awtoritajiet jew aġenziji tal-implimentazzjoni marbut mad-dejta komunikata, minn punt tal-komunikazzjoni u kooperazzjoni minn naħa u mill-uffiċjal tal-kontabilità min-naħa l-oħra, lis-servizz responsabbli tal-Kummissjoni, inkluża r-rettifikazzjoni, aġġornament jew tneħħija ta’ tagħrif.

(18)

Sabiex jiġi stipulat b’mod ċar sett ta’ regoli fil-każi kollha fejn l-awtorità jew aġenzija tal-implimentazzjoni ma ddeterminatx it-tul ta’ esklużjoni skont l-Artikolu 133a(1) tar-Regoli tal-Implimentazzjoni, għandu jiġi ddikjarat li d-deċiżjoni dwar il-perjodu tal-esklużjoni għandha tiġi mħejjija mis-servizz tal-Kummissjoni responsabbli u adottata mill-Kummissjoni.

(19)

Il-fluss ta’ informazzjoni bejn utenti awtorizzati tad-dejtabejż tal-esklużjoni għandu jinkludi d-dettalji kollha; persuni li jiġu kkuntattjati għal kull każ ta’ twissija għandhom jiġu determinati, li għandhom jipprovdu informazzjoni dwar it-twissija konċernata lil utenti awtorizzati tad-dejtabejż tal-esklużjoni.

(20)	Dispożizzjoni speċifika għandha tkopri każi fejn prova provduta minn terzi persuni mhix konsistenti mad-dejta fid-dejtabejż tal-esklużjoni, sabiex jiġi żgurat li d-dejta fid-dejtabejż tal-esklużjoni tkun korretta u aġġornata.

(21)	Għandha tiġi definita struttura adattata sabiex jingħata lok għal skambju tal-aqwa prattiċi bejn l-istituzzjonijiet u biex jiġu indirizzati materji relatati mal-użu tad-dejtabejż tal-esklużjoni.

(22)

L-ipproċessar tad-dejta personali inerenti għat-tħaddim tad-dejtabejż tal-esklużjoni għandu jsir skont id-Direttiva 95/46/KE tal-Parlament Ewropew u tal-Kunsill tat-24 ta’ Ottubru 1995 dwar il-protezzjoni ta’ individwi rigward l-ipproċessar tad-dejta personali u dwar il-moviment liberu ta’ din id-dejta, applikabbli għall-Istati Membri (8) u r-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwi relatat mal-ipproċessar ta’ dejta personali mill-istituzzjonijiet u aġenziji tal-Komunità u dwar il-moviment liberu ta’ din id-dejta (9) li huma applikabbli kompletament.

(23)

Dan ir-Regolament ġie mfassal wara li ġiet debitament ikkunsidrata l-opinjoni tal-Kontrollur Tal-Protezzjoni tad-Dejta. Barraminnhekk ir-Regolament (KE) Nru 45/2001 jistipula li dan l-ipproċessar hu soġġett għal kontroll minn qabel mill-Kontrollur Ewropew tal-Protezzjoni tad-Dejta bħala konsegwenza tan-notifika tal-Uffiċjal tal-Protezzjoni tad-Dejta tal-Kummissjoni.

(24)

Għall-finijiet ta’ kjarezza, id-dispożizzjonijiet tal-protezzjoni tad-dejta għandhom jippreċiżaw id-drittijiet tal-persuni li d-dejta tagħhom hi inkluża jew tista’ tiġi introdotta fid-dejtabejż tal-esklużjoni. Il-persuni fiżiċi u ġuridiċi għandhom inkunu infurmati bl-introduzzjoni tad-dejta li tikkonċerna lilhom fid-dejtabejż tal-esklużjoni.

ADOTTA DAN IR-REGOLAMENT,

Artikolu 1

Is-suġġett

1.   Dan ir-Regolament jistabbilixxi dejtabejż ċentrali (hawnhekk aktar il-quddiem: “id-dejtabejż tal-esklużjoni”) imsemmija fl-Artikolu 95 tar-Regolament (KE, Euratom) Nru 1605/2002 (aktar il-quddiem f’dan id-dokument: “ir-Regolament Finanzjarju”).

2.   Id-dejta fid-dejtabejż tal-esklużjoni tista’ tintuża biss sabiex jiġu applikati l-Artikoli 93 sa 96 u 114 tar-Regolament Finanzjarju u l-Artikoli 133 sa 134b tar-Regolament (KE, Euratom) Nru 2342/2002 kif ukoll Artikoli 96 sa 99 u 110 tar- Regolament (KE) Nru 215/2008.

3.   L-OLAF jista’ juża d-dejta għall-investigazzjonijiet tiegħu bskont ir- Regolament (KE) Nru 1073/1999 u r-Regolament tal-Kunsill (Euratom) Nru 1074/1999 kif ukoll għall-kisba ta’ informazzjoni riżervata u l-attivitajiet tagħha għall-prevenzjoni tal-frodi, inkluż l-analiżi tar-riskji.

Artikolu 2

Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet li ġejjin:

(1)

“istituzzjonijiet” tfisser Parlament Ewropew, Kunsill, Kummissjoni, Qorti tal-Ġustizzja, Qorti tal-Awdituri, Kumitat Ekonomiku u Soċjali Ewropew, Kumitat tar-Reġjuni, Ombudsmen, Kontrollur Ewropew tal-Protezzjoni tad-Dejta, aġenziji u korpi eżekuttivi msemmija fl-Artikolu 185(1) tar-Regolament Finanzjarju;

(2)

“awtorità jew aġenzija tal-implimentazzjoni” tfisser awtoritajiet tal-Istati Membri u pajjiżi terzi, organizzazzjonijiet internazzjonali u korpi oħra li jipparteċipaw fl-implimentazzjoni tal-baġit skont l-Artikoli 53 u 54 tar-Regolament Finanzjarju, bl-eċċezzjoni ta’ aġenziji u korpi eżekuttivi msemmija fl-Artikolu 185(1) tar-Regolament. L-Istati Membri jistgħu jqassmu l-kompiti stipulati f’dan ir-Regolament lill-awtoritajiet pubbliċi nazzjonali oħra, li għandhom jiġu assimilati mal-awtoritajiet jew aġenziji tal-implimentazzjoni.

(3)

“terzi persuni” tfisser kandidati, offerenti, kuntratturi, fornituri, fornituri ta’ servizzi u s-sottokuntratturi rispettivi tagħhom, kif ukoll applikanti għal għotjiet, benefiċjarji ta’ għotjiet, inklużi benefiċjarji ta’ assistenza diretta, kuntratturi ta’ benefiċjarji ta’ għotjiet u entitajiet li jirċievu appoġġ finanzjarju minn benefiċjarju ta’ għotja tal-Komunità skont l-Artikolu 120 tar-Regolament Finanzjarju.

Artikolu 3

Twissija ta’ esklużjoni

It-twissijiet ta’ esklużjoni għandhom ikollhom id-dejta li ġejja:

(a)	informazzjoni li tidentifika terzi persuni, li huma f’waħda mis-sitwazzjonijiet imsemmija fl-Artikolu 93(1), 94, 96(1)(b) u 96(2)(a) tar-Regolament Finanzjarju;

(b)	informazzjoni rigward persuni b’setgħat ta’ rappreżentazzjoni, teħid ta’ deċiżjoni jew kontroll fuq entitajiet legali, meta dawn il-persuni jkunu sabu ruħhom f’waħda mis-sitwazzjonijiet imsemmija fl-Artikolu 93(1), 94, 96(1)(b) u 96(2)(a) tar- Regolament Finanzjarju;

(ċ)	ir-raġunijiet għall-esklużjoni ta’ terzi persuni imsemmija fil-punt (a) jew persuni imsemmija fil-punt (b) u, fejn hu adattat, it-tip ta’ kundanna ta’ ħtija u t-tul ta’ żmien tal-perjodu tal-esklużjoni.

Artikolu 4

Amministrazzjoni tad-dejtabejż tal-esklużjoni

1.   L-uffiċjal tal-kontabilità tal-Kummissjoni jew l-istaff subordinat tiegħu li jkunu ġew delegati lilhom ċerti kompiti fl-applikazzjoni tal-Artikolu 62 tar-Regolament Finanzjarju (hawnhekk aktar ’il quddiem “l-uffiċjal tal-kontabilità tal-Kummissjoni”) għandu jassigura l-amministrazzjoni tad-dejtabejż tal-esklużjoni u jagħmel l-arranaġamenti tekniċi meħtieġa.

L-uffiċjal tal-kontabilità tal-Kummissjoni għandu jdaħħal, jimmodifika jew ineħħi twissijiet ta’ esklużjoni skont talbiet mingħand istituzzjonijiet.

2.   L-uffiċjal tal-kontabilità tal-Kummissjoni għandu jadotta miżuri tal-implimentazzjoni rigward aspetti tekniċi u jiddefinixxi l-proċeduri ta’ appoġġ assoċjati, inkluż il-qasam tas-sigurtà.

Hu għandu jinnotifika dawk il-miżuri lis-servizzi tal-Kummissjoni u l-aġenziji eżekuttivi, u fejn jgħodd, il-punti tal-kuntatt tal-istituzzjonijiet l-oħra indikati skont l-Artikolu 6(1) jew il-punti ta’ komunikazzjoni u kooperazzjoni indikati skont l-Artikolu 7(2).

Artikolu 5

Aċċess għad-dejtabejż tal-esklużjoni

1.   L-Istituzzjonijiet, minbarra l-Kummissjoni u aġenziji eżekuttivi, għandhom ikollhom aċċess dirett għad-dejta fid-dejtabejż tal-esklużjoni permezz ta’ sistema tal-kontabilità provvduta mill-Kummissjoni (ABAC) jew permezz ta’ punti tal-kuntatt.

2.   L-awtoritajiet tal-implimentazzjoni jew il-korpi li jiġġestixxu fondi taħt ġestjoni bi sħab u korpi tas-settur pubbliku nazzjonali tal-Istati Membri li jiġġestixxu fondi taħt ġestjoni ċentralizzata indiretta għandhom ikollhom aċċess għad-dejta fid- dejtabejż tal-esklużjoni permezz ta’ punti tal-komunikazzjoni u kooperazzjoni.

3.   L-awtoritajiet jew aġenziji tal-implimentazzjoni li jiġġestixxu fondi taħt ġestjoni ċentralizzata indiretta, deċentralizzata, jew ġestjoni bi sħab għandhom ikollhom aċċess għad-dejta fid-dejtabejż tal-esklużjoni permezz ta’ punti tal-komunikazzjoni u kooperazzjoni meta dawn jiċċertifikaw lis-servizzi tal-Kummissjoni responsabbli li huma japplikaw il-miżuri tal-protezzjoni tad-dejta adegwati kif stabbilit fil-ftehim konkluż skont it-tieni subparagrafu tal-Artikolu 134a(4) tar-Regolament (KE, Euratom) Nru 2342/2002.

Iżda, l-awtoritajiet jew aġenziji tal-implimentazzjoni m’għandhomx jingħataw aċċess għad-dejtabejż tal-esklużjoni fi kwalunkwe każ li ġej:

(a)	is-servizz tal-Kummissjoni responsabbli ma rċeviex iċ-ċertifikat imsemmi fl-ewwel subparagrafu;

(b)	is-servizz tal-Kummissjoni responsabbli ikollu fil-pussess tiegħu evidenza li l-awtoritajiet jew aġenziji tal-implimentazzjoni ma japplikawx miżuri ta’ protezzjoni tad-dejta adegwati;

(ċ)	is-servizz tal-Kummissjoni responsabbli jikkonsidra li l-aċċess ma jkunx adattat f’każi ta’ livell limitat ta’ deċentralizzazzjoni li jinkludi kontroll ex ante mill-Kummissjoni.

F’każ li l-aċċess għad-dejta fid-dejtabejż tal-esklużjoni jiġi miċħud, is-servizz tal-Kummissjoni responsabbli għandu jieħu l-miżuri xierqa sabiex jiġi assigurat talanqas l-istess livell ta’ protezzjoni tal-interessi finanzjarji tal-Komunitajiet. Fl-istruttura ta’ dawn il-miżuri, qabel ma tingħata l-għotja jew kuntratt, is-servizz tal-Kummissjoni responsabbli għandu jivverifika li t-terza persuna kkonċernata mhix soġġetta għal twissija tal-esklużjoni.

4.   L-aċċess għal dejta fid-dejtabejż tal-esklużjoni mis-servizzi tal-Kummissjoni u aġenziji eżekuttivi huwa stabbilit fid-Deċiżjoni tal-Kummissjoni 2008/969/KE, Euratom (10).

Artikolu 6

Punti tal-kuntatt u utenti awtorizzati fi ħdan l-istituzzjonijiet

1.   Kull istituzzjoni, minbarra l-Kummissjoni u aġenziji eżekuttivi, għandhom jindikaw il-punt tal-kuntatt responsabbli rigward il-materji relatati mad-dejtabejż tal-esklużjoni u tikkomunika l-ismijiet tal-persuni inkarigati lill-uffiċjal tal-kontabilità tal-Kummissjoni.

2.   Il-punti tal-kuntatt jistgħu jipprovdu aċċess għal informazzjoni li qiegħda fid-dejtabejż tal-esklużjoni lill-utenti awtorizzati, li għandhom ikunu membri tal-istaff tal-istituzzjonijiet, li għalihom aċċess għad-dejtabejż hu indispensabbli għall-eżerċizzju xieraq tax-xogħlijiet tagħhom. Kull punt tal-kuntatt għandu jżomm reġistru tal-utenti awtorizzati u jagħti aċċess lill-Kummissjoni għalih meta jintalab.

L-utenti awtorizzati jistgħu jipproċedu għal konsultazzjoni attiva onlajn tad-dejtabejż tal-esklużjoni.

3.   L-istituzzjoni għandha tieħu miżuri ta’ sigurtà xierqa sabiex tipprevjenu li informazzjoni tinqara jew tiġi kkupjata minn persuni mhux awtorizzati.

Artikolu 7

Punti tal-komunikazzjoni u koordinazzjoni u utenti awtorizzati fi ħdan awtoritajiet u aġenziji tal-implimentazzjoni

1.   Il-punti tal-komunikazzjoni u koordinazzjoni għandhom ikunu responsabbli għar-relazzjonijiet mal-Kummissjoni rigward il-materji kollha relatati mad-dejtabejż tal-esklużjoni.

2.   Kull Stat Membru għandu jindika punt tal-komunikazzjoni u koordinazzjoni għall-fondi li jimplimenta b’ġestjoni bi sħab skont il-punt (b) tal-Artikolu 53 u l-fondi implimentati b’ġestjoni ċentralizzata indiretta permezz ta’ korpi nazzjonali mis-settur pubbliku skont il-punt (c) tal-Artikolu 54(2) tar- Regolament Finanzjarju. B’eċċezzjoni u għal raġunijiet ġustifikati b’mod korrett, il-Kummissjoni tista’ tapprova aktar minn punt ta’ komunikazzjoni u koordinazzjoni wieħed għal kull Stat Membru.

3.   Kull pajjiż terz li jimplimenta l-fondi permezz ta’ ġestjoni deċentralizzata skont il-punt (b) tal-Artikolu 53 tar-Regolament Finanzjarju għandu jindika punt tal-komunikazzjoni u koordinazzjoni meta jintalab mis-servizzi tal-Kummissjoni responsabbli.

Kull aġenzija tal-implimentazzjoni li timplimenta fondi permezz ta’ ġestjoni bi sħab skont il-punt (c) tal-Artikolu 53 jew permezz ta’ ġestjoni ċentralizzata indiretta skont il-punti (b), (c) jew (d) tal-Artikolu 54(2) ta’ dak ir-Regolament, bl-eċċezzjoni ta’ korpi nazzjonali mis-settur pubbliku, għandha tindika l-punt tal-komunikazzjoni u koordinazzjoni meta jintalab mis-servizz tal-Kummissjoni responsabbli.

Iżda, is-servizz tal-Kummissjoni responsabbli m’għandux jitlob in-nomina ta’ punt tal-komunikazzjoni u koordinazzjoni fejn dan il-punt tal-komunikazzjoni u koordinazzjoni diġà jeżisti.

Meta s-servizz tal-Kummissjoni responsabbli jirtira aċċess ta’ punt tal-komunikazzjoni u koordinazzjoni għad-dejtabejż tal-esklużjoni, dan għandu jinforma lill-uffiċjal tal-kontabilità tal-Kummissjoni dwarha.

4.   Kull Stat Membru u kull awtorità jew aġenzija imsemmija fil-paragrafu 3 għandhom jikkomunikaw l-ismijiet tal-persuni responsabbli mill-punt ta’ komunikazzjoni u koordinazzjoni rispettiv tagħhom lill-uffiċjal tal-kontabilità tal-Kummissjoni. L-uffiċjal tal-kontabilità tal-Kummissjoni għandu jippubblika l-lista ta’ pajjiżi terzi u aġenziji tal-implimentazzjoni li jqiegħdu f’ordni l-punti tal-komunikazzjoni u koordinazzjoni fuq is-sit tal-Internet intern tal-Kummissjoni.

5.   Il-punti tal-komunikazzjoni u koordinazzjoni għandhom jipprovdu lill-awtoritajiet jew aġenziji tal-implimentazzjoni aċċess għal informazzjoni li qiegħda fid-dejtabejż tal-esklużjoni.

L-awtoritajiet u aġenziji tal-implimentazzjoni jistgħu jinnominaw utenti awtorizzati fost il-membri tal-istaff tagħhom. In-numru ta’ dawn l-utenti awtorizzati għandu jkun limitat għal persuni li għalihom l-aċċess għal dik id-dejtabejż hu indispensabbli għall-eżerċizzju xieraq tal-ħidma tagħhom. Kull awtorità jew aġenzija tal-implimentazzjoni għandha żżomm reġistru tal-utenti awtorizzati u tagħti aċċess għalih lill-Kummissjoni meta jintalab.

Għall-finijiet tal-għoti ta’ kuntratti marbuta mal-implimentazzjoni tal-baġit jew mal-Fond tal-Iżvilupp Ewropew, l-utenti awtorizzati jistgħu jipproċedu għal konsultazzjoni attiva onlajn tad-dejtabejż tal-esklużjoni. Fejn ma’ tkunx possibbli l-konsultazzjoni onlajn, l-utent awtorizzat jista’ jirċievi dejta mniżżla. Fil-każ tal-aħħar, id-dejta għandha tkun aġġornata talanqas kull xahar.

6.   L-awtorità jew aġenzija li tkun indikat il-punt tal-komunikazzjoni u koordinazzjoni jew l-utenti awtorizzati għandha tagħmel arranġamenti għall-miżuri ta’ sigurtà adegwati sabiex tevita li informazzjoni tinqara jew tiġi kkupjata minn persuni mhux awtorizzati.

Artikolu 8

Talbiet mill-istituzzjonijiet

1.   It-talbiet kollha għar-reġistrazzjoni, rettifikazzjoni, aġġornament jew tneħħija ta’ twissijiet ta’ esklużjoni għandhom jiġu indirizzati lill-uffiċjal tal-kontabilità tal-Kummissjoni.

L-istituzzjonijiet biss jistgħu jissottomettu dawn it-talbiet. Għal dawn l-għanijiet, is-servizzi tal-Kummissjoni u l-aġenziji eżekuttivi responsabbli għandhom jużaw il-mudelli magħmula fl-Anness tad-Deċiżjoni 2008/969/KE, Euratom u l-punti ta’ kuntatt ta’ istituzzjonijiet oħra għandhom jużaw il-mudelli magħmula 2fl-Anness I ma’ dan ir-Regolament.

2.   F’kull talba għar-reġistrazzjoni ta’ twissija ta’ esklużjoni, is-servizzi tal- Kummissjoni jew l-aġenzija eżekuttiva responsabbli għandha tiċċertifika li l-informazzjoni kkomunikata ġiet stabbilita u trażmessa skont ir-Regolament (KE) Nru 45/2001 u tindika l-persuna li tiġi kuntattjata f’każ ta’ twissija li tassumi r-responsabbiltà kif stabbilit fl-Artikolu 12 ta’ dan ir-Regolament.

Meta tintalab ir-reġistrazzjoni ta’ twissija tal-esklużjoni, il-punti tal-kuntatt għandhom jiċċertifikaw li l-informazzjoni kkomunikata ġiet stabbilita u trażmessa skont ir-Regolament (KE) Nru 45/2001. Il-punti tal-kuntatt għandhom jassumu r-resposabbiltajiet ta’ persuna li tiġi kkuntattjata f’każ ta’ twissija.

3.   Kull istituzzjoni għandha titlob reġistrazzjoni proviżorja ta’ twissija tal-esklużjoni sakemm tittieħed deċiżjoni dwar it-tul taż-żmien tal-esklużjoni.

4.   Is-servizz tal-Kummissjoni responsabbli jew istituzzjoni oħra li talbet reġistrazzjoni ta’ twissija ta’ esklużjoni għandha tkun responsabbli għat-talba ta’ rettifikazzjoni, aġġornament jew tneħħija ta’ dik it-twissija.

Artikolu 9

Talbiet ibbażati fuq informazzjoni minn awtoritajiet u aġenziji tal-implimentazzjoni

1.   Il-punti tal-komunikazzjoni u koordinazzjoni għandhom jikkomunikaw l-informazzjoni rċevuta mill-awtoritajiet jew aġenziji tal-implimentazzjoni dwar is-sitwazzjonijiet ta’ esklużjoni msemmija fl-Artikolu 93(1) punt e tar- Regolament Finanzjarju lill-uffiċjal tal-kontabilità tal-Kummissjoni li għandu jgħaddi din l-informazzjoni lis-servizz tal-Kummissjoni responsabbli għall-programm, azzjoni jew leġislazzjoni u identifikata mill-awtoritajiet jew aġenziji. Dawn għandhom ukoll jittrażmettu ċ-ċertifikazzjoni tal-awtorità jew aġenzija tal-implimentazzjoni li l-informazzjoni kkomunikata lilhom ġiet stabbilita u trażmessa skont il-prinċipji stabbiliti fid-Direttiva 95/46/KE.

Għal dan il-għan, il-punti tal-komunikazzjoni u koordinazzjoni għandhom jużaw il-mudell fl-Anness II ta’ dan ir-Regolament.

2.   Hekk kif tiġi rċevuta l-informazzjoni msemmija fil-paragrafu 1, is-servizz tal-Kummissjoni responsabbli għandu jitlob lill-uffiċjal tal-kontabilità tal- Kummissjoni jdaħħal it-twissija ta’ esklużjoni fid-dejtabejż tal-esklużjoni għal tul ta’ żmien determinat mill-awtorità jew aġenzija tal-implimentazzjoni sal-massimu tat-tul ta’ żmien stipulat fl-Artikolu 93(3) tar-Regolament Finanzjarju.

Meta t-tul ta’ żmien ma jkunx determinat, is-servizz tal-Kummissjoni responsabbli għandu jitlob reġistrazzjoni provviżorja skont l-Artikolu 10(2), waqt li wieħed ikun qed jistenna d-deċiżjoni tal-Kummissjoni. Is-servizz tal-Kummissjoni responsabbli għandu jirreferi l-każ kemm jista’ jkun malajr lill-Kummissjoni għad-deċiżjoni.

3.   L-awtorità jew aġenzija tal-implimentazzjoni għandha tkun responsabbli għad-dejta komunikata. Din, għandha mingħajr dewmien, tinforma lis-servizz tal-Kummissjoni responsabbli, permezz ta’ punt tal-komunikazzjoni u kooperazzjoni, kull meta jkun hemm il-bżonn li l-informazzjoni trażmessa tiġi rettifikata, aġġornata jew imneħħija.

Għal dak il-għan, l-awtoritajiet jew aġenziji tal-implimentazzjoni u l-punti tal-komunikazzjoni u kooperazzjoni għandhom jużaw il-mudell fl-Anness II.

Hekk kif tiġi rċevuta l-informazzjoni aġġornata, is-servizz tal-Kummissjoni responsabbli għandu jitlob lill-uffiċjal tal-kontabilità tal-Kummissjoni sabiex jirrettifika, jaġġorna jew ineħħi t-twissija tal-esklużjoni konċernata.

Artikolu 10

Perjodu tar-reġistrazzjoni fid-dejtabejż tal-esklużjoni

1.   It-twissijiet dwar esklużjonijiet skont il-punti (b), (c), (e) u (f) fl-Artikolu 93(1) tar-Regolament Finanzjarju għandhom jiġu reġistrati għall-perjodu determinat mill-istituzzjoni li tagħmel it-talba u speċifikati f’din it-talba.

2.   Twissija ta’ esklużjoni bbażata fuq talba ippreżentata skont l-Artikolu 8(3) għandha tiġi rreġistrata provviżorjament għal perjodu ta’ tliet xhur. Ir-reġistrazzjoni provviżorja tista’ tiġġedded hekk kif issir it-talba.

Iżda, ir-reġistrazzjoni provviżorja ta’ twissija ta’ esklużjoni bbażata fuq it-talbiet imsemmija fit-tieni subparagrafu tal-Artikolu 9(2), tista’ tkun, f’każi eċċezzjonali, imġedda għal perjodu addizzjonali ta’ tliet xhur.

3.   It-twissijiet ta’ esklużjonijiet skont il-punti (a) jew (d) tal-Artikolu 93(1) tar-Regolament Finanzjarju għandhom jiġu rreġistrati għal perjodu ta’ ħames snin.

4.   It-twissijiet ta’ esklużjonijiet mill-għoti ta’ kuntratt jew għotja fi proċedura speċifika skont il-punti (a) u (b) tal-Artikolu 94 tar-Regolament Finanzjarju għandhom jiġu rreġistrati għal perjodu ta’ sitt xhur.

Artikolu 11

Tneħħija ta’ twissijiet ta’ esklużjoni

It-twissijiet ta’ esklużjoni għandhom jitneħħew b’mod awtomatiku wara li jgħaddi ż-żmien stipulat fl-Artikolu 10.

L-istituzzjoni li talbet ir-reġistrazzjoni għandha titlob it-tneħħija tat-twissija ta’ esklużjoni qabel ma jagħlaq iż-żmien tal-għeluq, fejn it-terza persuna ma tkunx f’sitwazzjoni ta’ esklużjoni, b’mod partikolari għal każi msemmija fil-paragrafu 3 tal-Artikolu 10 jew għal żbalji ċari skoperti wara r-reġistrazzjoni tal-esklużjoni.

Artikolu 12

Koperazzjoni

1.   Il-persuna li tiġi kuntattjata f’każ ta’ twissija msemmija fl-Artikolu 8(2) ta’ dan ir-Regolament għandha tipprovdi, bil-kitba jew permezz ta’ mezzi elettroniċi, l-informazzjoni kollha relevanti disponibbli sabiex tippermetti lill-istituzzjoni li tagħmel it-talba tiegħu deċiżjonijiet ta’ esklużjoni skont l-Artikolu 93(1) tar-Regolament Finanzjarju jew tippermetti lill-awtorità jew aġenzija tal-implimentazzjoni tikkunsidraha fl-għoti ta’ kuntratti marbuta mal-implimentazzjoni tal-baġit.

2.   F’każi, fejn ċertifikati jew evidenza miksuba minn istituzzjoni mhumiex konsistenti mat-twissijiet ta’ esklużjoni rreġistrati, l-istituzzjoni konċernata għandha tinforma immedjatament lill-persuna li tiġi kkuntattjata f’każ ta’ twissija. Il-persuna li tiġi kkuntattjata f’każ ta’ twissija u fejn xieraq il-punt tal-komunikazzjoni u kooperazzjoni konċernat għandhom jieħdu azzjoni xierqa.

3.   F’każi, fejn ċertifikati jew evidenza miksuba minn awtorità jew aġenzija tal-implimentazzjoni mhumiex konsistenti mat-twissijiet ta’ esklużjoni reġistrati, l-awtorità jew l-aġenzija għandha tittrasmetti l-informazzjoni, permezz tal-punt tal-komunikazzjoni u kooperazzjoni tagħha, lill-persuna li tiġi kkuntattjata f’każ ta’ twissija. Il-persuna li tiġi kkuntattjata f’każ ta’ twissija u fejn hu adattat il-punt tal-komunikazzjoni u kooperazzjoni konċernat għandhom jieħdu azzjoni xierqa.

4.   L-uffiċjal tal-kontabilità tal-Kummissjoni u l-punti tal-kuntatt tal- istituzzjonijiet għandhom jikkomunikaw lil xulxin l-aqwa prattiċi.

Materji relatati mad-dejtabejż tal-esklużjoni għandhom jiġu diskussi f’qafas ta’ laqgħat bejn l-awtorità jew aġenzija tal-implimentazzjoni u s-servizzi tal- Kummissjoni responsabbli.

Artikolu 13

Protezzjoni tad-dejta

1.   Fis-sejħiet għal offerti u sejħiet għal proposti u, fl-assenza ta’ sejħiet, qabel ma jingħataw il-kuntratti jew għotjiet, l-istituzzjonijiet u awtoritajiet jew aġenziji tal-implimentazzjoni għandhom jinfurmaw lil terzi persuni dwar id-dejta li tikkonċernahom li tista’ tiġi inkluża fid-dejtabejż tal-esklużjoni u tal-entitajiet li lilhom tista’ tiġi komunikata d-dejta. F’każi, fejn it-terzi persuni huma entitajiet legali, l-istituzzjonijiet u l-awtoritajiet u aġenziji tal-implimentazzjoni għandhom jinfurmaw lill-persuni li għandhom is-setgħat li jirrappreżentaw, jieħdu deċiżjonijiet jew jikkontrollaw dawn l-entitajiet legali.

2.   L-istituzzjoni li titlob reġistrazzjoni ta’ twissija ta’ esklużjoni għandha tkun responsabbli għar-relazzjonijiet mal-persuna fiżika jew ġuridika li dejta tiegħu/tagħha ġiet introdotta fid-dejtabejż tal-esklużjoni (aktar ’il quddiem f’dan id-dokument: “id-dejta tas-suġġett konċernat”).

L-istituzzjoni għandha tinforma lis-suġġett tad-dejta konċernat dwar it-talba għall-attivazzjoni, aġġornament u tneħħija ta’ twissija ta’ esklużjoni li tikkonċernah direttament u tiddikjara r-raġunijiet tagħha.

L-istituzzjoni għandha twieġeb ukoll għal talbiet mis-suġġetti tad-dejta konċernati sabiex tiġi rettifikata dejta personali mhux eżatta jew mhux kompluta u kwalunkwe talbiet jew mistoqsijiet oħra minn għand dawk is-suġġetti.

Talbiet jew mistoqsijiet minn għand suġġetti tad-dejta konċernati relatati ma’ informazzjoni provduta mill-awtoritajiet jew aġenziji tal-implimentazzjoni għandhom jiġu trattati minn dawk l-awtoritajiet jew aġenziji. Is-servizz tal-Kummissjoni responsabbli għandu jirreferi dawn it-talbiet u mistoqsijiet lill-punt tal-komunikazzjoni u kooperazzjoni konċernat u jinforma lis-suġġett tad-dejta konċernat dwarhom

3.   Bla ħsara għar-rekwiżiti ta’ informazzjoni stipulati fil-paragrafu 2, persuna fiżika identifikata kif suppost għandha tkun tista’ titlob informazzjoni dwar jekk dejta li tikkonċernaha hix reġistrata fid-dejtabejż tal-esklużjoni.

L-uffiċjal tal-kontabilità tal-Kummissjoni għandu jinformah bil-kitba jew permezz ta’ mezzi elettroniċi, jekk l-individwu hux reġistrat fid-dejtabejż tal-esklużjoni. Jekk l-individwu hu reġistrat, l-uffiċjal tal-kontabilità tal-Kummissjoni għandu jehmeż id-dejta maħżuna fid-dejtabejż tal-esklużjoni li tikkonċerna lil dak l-individwu. Hu għandu jinforma lill-istituzzjoni li talbet it-twissija dwaru.

4.   Bla ħsara għar-rekwiżiti ta’ informazzjoni stipulati fil-paragrafu 2, ir-rappreżentant awtorizzat kif suppost tal-persuna ġuridika jista’ jitlob informazzjoni dwar jekk dik il-persuna legali hix reġistrata fid-dejtabejż tal-esklużjoni.

L-uffiċjal tal-kontabilità tal-Kummissjoni għandu jinformah bil-kitba jew permezz ta’ mezzi elettroniċi, jekk l-individwu hux reġistrat fid-dejtabejż tal-esklużjoni. Jekk l-individwu hu reġistrat, l-uffiċjal tal-kontabilità tal-Kummissjoni għandu jehmeż id-dejta maħżuna fid-dejtabejż tal-esklużjoni li tikkonċerna lil dak l-individwu. Hu għandu jinforma lill-istituzzjoni li talbet it-twissija dwaru.

5.   Twissijiet imneħħija għandhom ikunu aċċessibbli għal skopijiet ta’ reviżjoni tal-kontijiet u investigazzjoni biss u m’għandhomx ikunu viżibbli għall-utenti tad-dejtabejż.

Iżda, dejta personali li qiegħda fit-twissijiet ta’ esklużjoni li jirreferu għal individwi għandha tibqa’ aċċessibbcli għal dawn l-iskopijiet biss għal ħames snin wara t-tneħħija tat-twissija.

Artikolu 14

Id-dispożizzjonijiet transizzjonali

1.   L-informazzjoni minn għand l-awtoritajiet jew aġenziji tal-implimentazzjoni għandha tirreferi esklussivament ma’ sentenzi mogħtija wara l-1 ta’ Jannar 2009.

2.   Twissijiet reġistrati skont l-Artikolu 95 tar-Regolament Finanzjarju qabel id-data tal-applikazzjoni ta’ dan ir-Regolament u li jkunu għadhom attivi f’dik id-data għandhom jikkostitwixxu twissijiet ta’ esklużjoni u għandhom jiġu mdaħħla minnufih fid-dejtabejż tal-esklużjoni.

3.   F’każ, fejn terza parti ma ġietx infurmata dwar ir-reġistrazzjoni tat-twissija ta’ esklużjoni msemmija fil-paragrafu 2, is-servizzi tal-Kummissjoni jew l-istituzzjoni li talbet ir-reġistrazzjoni għandha tinforma lit-terza persuna li d-dejta tagħha ġiet introdotta fid-dejtabejż tal-esklużjoni fi żmien xahar mid-data tal-applikazzjoni ta’ dan ir-Regolament.

4.   Is-servizz tal-Kummissjoni responsabbli jew istituzzjoni oħra li talbet reġistrazzjoni ta’ twissija ta’ esklużjoni msemmija fil-paragrafu 2 tibqa’ responsabbli għall-modifikazzjoni jew tneħħija ta’ talbiet ta’ dik it-twissija skont dan ir-Regolament.

5.   Għal esklużjonijiet deċiżi mis-servizz tal-Kummissjoni jew aġenzija eżekuttiva skont il-punti (b) u (e) tal-Artikolu 93(1) tar-Regolament Finanzjarju qabel l-1 ta’ Mejju 2007, fit-tul taż-żmien tal-perjodu ta’ esklużjoni għandu jiġi kkunsidrat il-perjodu ta’ rekord kriminali taħt il-liġi nazzjonali.

Għal din l-esklużjoni għandu japplika perjodu massimu ta’ erba’ snin mid-data tan-notifikazzjoni tad-deċiżjoni. Jekk dak il-perjodu jkun għadda, is-servizz tal- Kummissjoni jew aġenzija eżekuttiva responsabbli għandha titlob it-tneħħija tat-twissija.

Artikolu 15

Dħul fis-seħħ

Dan ir-Regolament għandu jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Japplika mill-1 ta’ Jannar 2009.

---

(1)  ĠU L 248, 16.9.2002, p. 1.

(2)  ĠU L 78, 19.3.2008, p. 1.

(3)  ĠU L 357, 31.12.2002, p. 1.

(4)  ĠU L 357, 31.12.2002, p. 72.

(5)  ĠU L 297,, 22.9.2004, p. 6.

(6)  ĠU L 136, 31.5.1999, p. 1.

(7)  ĠU L 136, 31.5.1999, p. 8.

(8)  ĠU L 281, 23.11.1995, p. 31.

(9)  ĠU L 8, 12.1.2001, p. 1.

(10)  Ara paġna 125 ta' dan il-Ġurnal Uffiċjali

---

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/27

---

REGOLAMENT TAL-KUMMISSJONI (KE) Nru 1303/2008

tat-18 ta’ Diċembru 2008

li jikkoreġi r-Regolament (KE) Nru 983/2008 li jadotta l-pjan għall-allokazzjoni lill-Istati Membri ta’ riżorsi li għandhom jitħallsu mill-baġit tas-sena 2009 għall-provvista tal-ikel mill-ħażniet tal-intervent għall-benefiċċju tal-persuni l-aktar fil-bżonn fil-Komunità

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) (1), u b’mod partikulari l-Artikolu 43(g) flimkien mal-Artikolu 4 tiegħu,

Billi:

(1)

Minħabba żvista amministrattiva, fl-Anness III għar-Regolament tal-Kummissjoni (KE) Nru 983/2008 (2), rigward it-trasferimenti intra-Komunitarji taz-zokkor, ġew elenkati aġenziji żbaljati fir-rigward tal-aġenziji awtorizzati biex jirċievu z-zokkor għal-Litwanja u l-Portugall rispettivament. Korrezzjoni ta’ dawn l-iżbalji hija meħtieġa biex tkun żgurata l-implimentazzjoni korretta tal-pjan.

(2)	Ir-Regolament (KE) Nru 983/2008 għandu għalhekk jiġi korrett skont dan. Il-korrezzjoni għandha tapplika mid-data tad-dħul fis-seħħ ta’ dak ir-Regolament.

(3)	Il-miżura pprovduta f’dan ir-Regolament hija skont l-opinjoni tal-Kumitat tal-Ġestjoni tal-Organizzazzjoni Komuni tas-Swieq Agrikoli,

ADOTTAT DAN IR-REGOLAMENT:

Artikolu 1

Fl-Anness III għar-Regolament (KE) Nru 983/2008, ir-raba’ kolonna, “Id-Destinatarju”, hija emendata kif ġej:

(1)	Fil-punt 2, “Ministério das Finanças, Direcção-Geral das Alfândegas e dos Impostos Especiais sobre o Consumo, Direcção de Serviços de Licenciamento, Portugal” għandha tinbidel b’“IFAP, Portugal”.

(2)	Fil-punt 4, “NMA, Lietuva” għandha tinbidel bi “Lietuvos žemės ūkio ir maisto produktų rinkos reguliavimo agentūra, Lietuva”.

Artikolu 2

Dan ir-Regolament għandu jidħol fis-seħħ dakinhar tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-10 ta’ Ottubru 2008.

---

(1)  ĠU L 299, 16.11.2007, p. 1.

(2)  ĠU L 268, 9.10.2008, p. 3

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/28

---

REGOLAMENT TAL-KUMMISSJONI (KE) Nru 1304/2008

tad-19 ta' Diċembru 2008

li jemenda r-Regolament (KE) Nru 1266/2007 fir-rigward tal-kondizzjonijiet għall-eżenzjoni ta’ ċerti annimali ta’ speċi suxxettibbli mill-projbizzjoni tal-ħruġ stipulata fid-Direttiva tal-Kunsill 2000/75/KE

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 2000/75/KE tal-20 ta’ Novembru 2000 li tistabbilixxi dispożizzjonijiet speċifiċi għall-kontroll u l-eradikazzjoni tal-bluetongue (1), u b’mod partikolari l-Artikolu 9(1)(c), l-Artikoli 11 u 12 u t-tielet paragrafu tal-Artikolu 19 tagħha,

Billi:

(1)	Ir-Regolament tal-Kummissjoni (KE) Nru 1266/2007 (2) jistipula regoli għall-kontroll, monitoraġġ, sorveljanza u restrizzjonijiet fuq il-movimenti ta’ ċerti annimali, fir-rigward tal-bluetongue, fi u minn żoni ristretti.

(2)

L-Artikolu 8(1) ta’ dak ir-Regolament jistipula li movimenti ta’ annimali, tas-semen, l-ova u l-embriji tagħhom, minn azjenda jew ċentru għall-ġbir jew għall-ħażna tas-semen li jinsabu f’żona ristretta lejn azjenda oħra jew ċentru għall-ġbir jew għall-ħażna tas-semen għandhom ikunu eżentati mill-projbizzjoni tal-ħruġ stipulata fid-Direttiva 2000/75/KE, suġġetta għall-ħtieġa li l-annimali, is-semen, l-ova u l-embriji tagħhom ikunu konformi ma’ ċerti kondizzjonaijiet stabbiliti f’dak l-Artikolu.

(3)

L-esperjenza wriet li f’għadd ta’ Stati Membri l-effettività tal-miżuri stipulati fir-Regolament (KE) Nru 1266/2007 biex ikun żgurat il-ħarsien tal-annimali kontra l-attakki minn vektors tista’ tiġi kompromessa minn kombinazzjoni ta’ fatturi Dawk il-fatturi jinkludu l-ispeċi tal-vektors, il-kondizzjonijiet tal-klima u t-tip ta’ trobbija ta’ annimali suxxettibbli li jixtarru.

(4)

Għalhekk, bħala miżura transitorja, l-Artiklu 9a tar-Regolament (KE) Nru 1266/2007 kif emendat mir-Regolament (KE) Nru 394/2008 (3) jistipula li, sal-31 ta’ Diċembru 2008, l-Istati Membri tad-destinazzjoni jistgħu jitolbu li l-moviment ta’ ċerti annimali, li huma koperti mill-eżenzjoni stipulata fl-Artikolu 8(1) tar-Regolament (KE) Nru 1266/2007 ikunu suġġetti għall-kondizzjonijiet addizzjonali, abbażi ta’ evalwazzjoni ta’ riskju li tqis il-kondizzjonijiet entomoloġiċi u epidemijoloġiċi li fihom qed jiddaħħlu l-annimali.

(5)

Fil-perjodu ta’ wara l-adozzjoni ta’ dik il-miżura transitorja, l-esperjenza wriet li f’għadd ta’ Stati Membri l-applikazzjoni tal-miżuri biex ikun żgurat il-ħarsien tal-annimali kontra l-attakki mill-vektors mhijiex effettiva. Barra minn hekk, l-Awtorità Ewropea tas-Sigurtà tal-Ikel tistqarr, fl-Opinjoni tagħha dwar il-bluetongue tad-19 ta’ Ġunju 2008 (4), li l-ebda protokolli ta’ trattament ma ġew formalment approvati fil-Komunità għall-ħarsien effettiv tal-annimali kontra l-attakki Culicoides.

(6)	Fid-dawl ta’ dawn iċ-ċirkostanzi u sakemm issir aktar evalwazzjoni xjentifika fil-ġejjieni, huwa xieraq li jiġi estiż il-perjodu ta’ applikazzjoni tal-miżura ta’ tranżizzjoni stipulat fl-Artiklu 9a tar-Regolament (KE) Nru 1266/2007.

(7)	Ir-Regolament (KE) Nru 1266/2007 għandu għalhekk jiġi emendat skont dan.

(8)	Il-miżuri stipulati f’dan ir-Regolament huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,

ADOTTAT DAN IR-REGOLAMENT:

Artikolu 1

Fil-frażi introduttorja tal-paragrafu 1 tal-Artikolu 9a tar-Regolament (KE) Nru 1266/2007, id-data “31 ta’ Diċembru 2008” għandha tkun mibdula bid-data “31 ta’ Diċembru 2009”.

Artikolu 2

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

---

(1)  ĠU L 327, 22.12.2000, p. 74.

(2)  ĠU L 283, 27.10.2007, p. 37.

(3)  ĠU L 117, 1.5.2008, p. 22.

(4)  Opinjoni tal-Bord Xjentifiku dwar is-Saħħa u s-Sigurtà tal-Annimali fuq talba mill-Kummisjoni Ewropea (DG SANCO) dwar il-Bluetongue. Il-Ġurnal tal-EFSA (2008) 735, 1-69.

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/30

---

REGOLAMENT TAL-KUMMISSJONI (KE) Nru 1305/2008

tad-19 ta' Diċembru 2008

li japprova emendi minuri fl-ispeċifikazzjoni ta' denominazzjoni elenkata fir-reġistru tad-denominazzjonijiet protetti tal-oriġini u tal-indikazzjonijiet ġeografiċi protetti [Maroilles jew Marolles (DPO)]

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 510/2006 tal-Kunsill tal-20 ta’ Marzu 2006 (1), u partikolarment it-tieni sentenza tal-Artikolu 9(2) tiegħu,

Billi:

(1)

Skont l-ewwel subparagrafu tal-Artikolu 9(1) tar-Regolament (KE) Nru 510/2006 u skont l-Artikolu 17(2) tal-istess Regolament, il-Kummissjoni eżaminat it-talba ta' Franza g]all-approvazzjoni ta’ emenda fl-ispeċifikazzjoni tad-denominazzjoni protetta tal-oriġini “Maroilles jew Marolles”, irreġistrata bir-Regolament tal-Kummissjoni tal-Kummissjoni (KE) Nru 1107/1996 (2).

(2)	It-talba għandha l-għan li temenda l-ispeċifikazzjoni billi tippreċiża l-kundizzjonijiet tal-użu ta’ trattamenti u addittivi għall-ħalib u fil-produzzjoni tal-“Maroilles ou Marolles”. Dawn il-prattiki jiżguraw iż-żamma tal-karatteristiċi essenzjali tad-denominazzjoni.

(3)	Il-Kummissjoni eżaminat l-emenda kkonċernata u kkonkludiet li hija ġustifikata. Billi din hija emenda minuri skont l-Artikolu 9 tar-Regolament (KE) Nru 510/2006, il-Kummissjoni tista' tapprovaha mingħajr rikors għall-proċedura stipulata fl-Artikoli 5, 6 u 7 tal-istess Regolament,

(4)	F’konformità mal-Artikolu 18(2) tar-Regolament tal-Kummissjoni (KE) Nru 1898/2006 (3), u skont l-Artikolu 17(2) tar-Regolament (KE) Nru 510/2006, jeħtieġ li jkun ippubblikat sinteżi sommarju tal-ispeċifikazzjoni.

ADOTTAT DAN IR-REGOLAMENT:

Artikolu 1

L-ispeċifikazzjoni tad-denominazzjoni protetta tal-oriġini “Maroilles jew Marolles” hija b'dan emendata skont l-Anness I għal dan ir-Regolament.

Artikolu 2

Is-sommarju konsolidat bl-elementi ewlenin tal-ispeċifikazzjoni jinsab fl-Anness II għal dan ir-Regolament.

Artikolu 3

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

---

(1)  ĠU L 93, 31.3.2006, p. 12.

(2)  ĠU L 148, 21.6.1996, p. 1.

(3)  ĠU L 369, 23.12.2006, p. 1.

---

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/35

---

REGOLAMENT TAL-KUMMISSJONI (KE) Nru 1306/2008

tas-17 ta’ Diċembru 2008

li jiffissa l-prezzijiet Komunitarji tal-bejgħ ta’ prodotti tas-sajd elenkati fl-Anness II tar-Regolament tal-Kunsill (KE) Nru 104/2000 għas-sena tas-sajd 2009

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 104/2000 tas-17 ta' Diċembru 1999 dwar l-organizzazzjoni komuni tas-swieq fil-prodotti tas-sajd u l-akkwakultura (1), u b'mod partikolari l-Artikolu 25(1) u (6) tiegħu,

Billi:

(1)	Il-prezz tal-bejgħ tal-Komunità għandu jiġi ffissat għal kull wieħed mill-prodotti elenkati fl-Anness II tar-Regolament (KE) Nru 104/2000 qabel il-bidu tas-sena tas-sajd, f'livell talanqas ugwali għas-70 % u li ma jaqbiżx id-90 % tal-prezz ta’ gwida.

(2)	Ir-Regolament tal-Kunsill (KE) Nru 1299/2008 (2) jiffissa prezzijiet ta' gwida għas-sena tas-sajd 2009 għall-prodotti kollha kkonċernati.

(3)	Il-prezzijiet tas-suq ivarjaw konsiderevolment skont l-ispeċi u kif ikunu ppreżentati l-prodotti, partikolarment fil-każ tal-klamar u tal-marlozz.

(4)	Il-fatturi tal-konverżjoni għandhom għalhekk ikunu ffissati għall-ispecijiet differenti u l-preżentazzjonijiet tal-prodotti ffriżati li jinsabu fil-Komunità sabiex ikun stabbilit il-livell tal-prezz li jibda l-miżura ta' intervent previst fl-Artikolu 25(2) tar-Regolament (KE) Nru 104/2000.

(5)	Il-miżuri li hemm provvediment dwarhom f'dan ir-Regolament huma konformi mal-opinjoni tal-Kumitat ta' Ġestjoni għall-Prodotti tas-Sajd,

ADOTTAT DAN IR-REGOLAMENT:

Artikolu 1

Il-prezzijiet tal-bejgħ tal-Komunità, kif imsemmi fl-Artikolu 25(1) tar-Regolament (KE) Nru 104/2000, applikabbli matul is-sena tas-sajd 2009 għall-prodotti elenkati fl-Anness II ta’ dan ir-Regolament u l-preżentazzjonijiet u l-fatturi ta’ konverżjoni li jirrelataw għalihom huma stipulati fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta' Jannar 2009.

---

(1)  ĠU L 17, 21.1.2000, p. 22.

(2)  Ara paġna 1 ta' dan il-Ġurnal Uffiċjali.

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/37

---

REGOLAMENT TAL-KUMMISSJONI (KE) Nru 1307/2008

tad-19 ta’ Diċembru 2008

li jiffissa l-prezzijiet ta’ referenza għal ċerti prodotti tas-sajd għas-sena tas-sajd 2009

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 104/2000 tas-17 ta' Diċembru 1999 dwar l-organizzazzjoni komuni tas-swieq fil-prodotti tas-sajd u l-akkwakultura (1), u b'mod partikolari l-Artikolu 29(1) u (5) tiegħu,

Billi:

(1)

Ir-Regolament (KE) Nru 104/2000 jistabbilixxi illi l-prezzijiet ta' referenza validi għall-Komunità jistgħu jiġu ffissati kull sena, skont il-kategorija ta' prodotti, għall-prodotti li huma s-suġġett ta' sospensjoni tat-tariffa skont l-Artikolu 28(1). L-istess jgħodd għal prodotti li, billi jkunu jew soġġetti għal tnaqqis tariffarju li jorbot taħt it-WTO jew xi arranġamenti preferenzjali oħra, għandhom jikkonformaw ma’ prezz ta' referenza.

(2)	Skont l-Artikolu 29(3)(a) tar-Regolament (KE) Nru 104/2000, il-prezz ta’ referenza għall-prodotti elenkati fl-Anness I, il-Partijiet (A) u (B) ta’ dak ir-Regolament, għandu jkun l-istess bħall-prezz ta’ rtirar, stabbilit skont l-Artikolu 20(1) ta' dak ir-Regolament.

(3)	Il-prezzijiet Komunitarji tal-irtirar għall-prodotti konċernati huma stabbiliti għas-sena tas-sajd 2009 bir-Regolament tal-Kummissjoni (KE) Nru 1309/2008 (2).

(4)

F’konformità mal-Artikolu 29(3)(d) tar-Regolament (KE) Nru 104/2000, il-prezz ta’ referenza għall-prodotti minbarra dawk elenkati fl-Annessi I u II għal dak ir-Regolament għandu jiġi stabbilit b’mod partikolari fuq il-bażi tal-medja aġġustata tal-valuri tad-dwana rreġistrati fis-swieq tal-importazzjoni jew fil-portijiet tal-importazzjoni fit-tliet snin immedjatament qabel id-data li fiha jiġi stabbilit il-prezz ta’ referenza.

(5)	Ma hemmx ħtieġa li jiġu stabbiliti l-prezzijiet ta' referenza għal dawk il-prodotti koperti mill-kriterji stabbiliti fl-Artikolu 29(1) tar-Regolament (KE) Nru 104/2000 li jiġu importati minn pajjiżi terzi fi kwantitajiet insinifikanti.

(6)	Il-miżuri li hemm provvediment dwarhom f'dan ir-Regolament huma konformi mal-opinjoni tal-Kumitat ta' Ġestjoni għall-Prodotti tas-Sajd,

ADOTTAT DAN IR-REGOLAMENT:

Artikolu 1

Il-prezzijiet ta' referenza għas-sena ta' sajd 2009 tal-prodotti tas-sajd, kif imsemmi fl-Artikolu 29 tar-Regolament (KE) Nru 104/2000, huma stipulati fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta' Jannar 2009.

---

(1)  ĠU L 17, 21.1.2000, p. 22.

(2)  Ara paġna 42 ta' dan il-Ġurnal Uffiċjali.

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/41

---

REGOLAMENT TAL-KUMMISSJONI (KE) Nru 1308/2008

tad-19 ta' Diċembru 2008

li jiffissa l-ammont ta' għajnuna għall-ħżin privat ta' ċerti prodotti tas-sajd għas-sena tas-sajd 2009

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 104/2000 tas-17 ta' Diċembru 1999 dwar l-organizzazzjoni komuni tas-swieq fil-prodotti tas-sajd u tal-akkwakultura (1),

Wara li kkunsidrat ir-Regolament tal-Kummissjoni (KE) Nru 2813/2000 tal-21 ta' Diċembru 2000 li jistabbilixxi regoli dettaljati sabiex jiġi applikat ir-Regolament tal-Kunsill (KE) Nru 104/2000 rigward l-għoti ta' għajnuna għall-ħażna privata ta' ċerti prodotti tas-sajd (2), u b'mod partikolari l-Artikolu 1 tiegħu,

Billi:

(1)	L-għajnuna ma għandhiex taqbeż is-somma tal-ispejjeż tekniċi u finanzjarji rreġistrati fil-Komunità matul is-sena tas-sajd ta'qabel is-sena inkwistjoni.

(2)	Sabiex jiġi skoraġġut il-ħżin fit-tul, biex jitqassru ż-żminijiet tal-ħlas u jitnaqqas il-piż tal-kontrolli, l-għajnuna għall-ħżin privat għandha titħallas f'pagament wieħed.

(3)	Il-miżuri pprovvduti f'dan ir-Regolament huma skont l-opinjoni tal-Kumitat tal-Ġestjoni tal-Prodotti tas-Sajd,

ADOTTAT DAN IR-REGOLAMENT:

Artikolu 1

Għas-sena tas-sajd 2009, l-ammont ta’ għajnuna għall-ħżin privat, imsemmi fl-Artikolu 25 tar-Regolament (KE) Nru 104/2000, għall-prodotti elenkati fl-Anness II ta' dak ir-Regolamemt għandu jkun kif ġej:

—	:	L-ewwel xahar	:	EUR 216 kull tunnellata
—	:	It-tieni xahar	:	EUR 0 kull tunnellata

Artikolu 2

Dan ir-Regolament għandu jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta' Jannar 2009.

---

(1)  ĠU L 17, 21.1.2000, p. 22.

(2)  ĠU L 326, 22.12.2000, p. 30.

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/42

---

REGOLAMENT TAL-KUMMISSJONI (KE) Nru 1309/2008

tad-19 ta’ Diċembru 2008

li jiffissa l-prezzijiet ta’ rtirar u bejgħ tal-Komunità għall-prodotti tas-sajd elenkati fl-Anness I tar-Regolament tal-Kunsill (KE) Nru 104/2000 għas-sena tas-sajd 2009

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 104/2000 tas-17 ta’ Diċembru 1999 dwar l-organizzazzjoni komuni tas-swieq fil-prodotti tas-sajd u l-akkwakultura (1), u b’mod partikolari l-Artikolu 20(3) u l-Artikolu (22) tiegħu,

Billi:

(1)

Ir-Regolament (KE) Nru 104/2000 jipprovdi li l-prezzijiet ta’ rtirar u bejgħ fil-Komunità ta’ kull prodott elenkat fl-Anness I tiegħu għandhom ikunu ffissati skont il-freskezza, id-daqs jew il-piż u l-preżentazzjoni tal-prodott bl-applikazzjoni tal-fattur ta’ konverżjoni għall-kategorija tal-prodott ikkonċernat sa ammont ta’ mhux aktar minn 90% tal-prezz ta’ gwida rilevanti.

(2)

Il-prezzijiet ta’ rtirar jistgħu jkunu mmultiplikati b’fatturi ta’ aġġustament f’postijiet tal-ħatt li huma mbiegħda ħafna miċ-ċentri ewlenin tal-konsum fil-Komunità. Il-prezzijiet ta' gwida għas-sena ta' sajd 2009 kienu ffissati għall-prodotti kollha kkonċernati bir-Regolament tal-Kunsill (KE) Nru 1299/2008 (2).

(3)	Il-miżuri li hemm provvediment dwarhom f'dan ir-Regolament huma konformi mal-opinjoni tal-Kumitat ta' Ġestjoni għall-Prodotti tas-Sajd.

ADOTTAT DAN IR-REGOLAMENT:

L-Artikolu 1

Il-fatturi ta’ konverżjoni użati biex ikunu kkalkulati l-prezzijiet ta’ rtirar u bejgħ tal-Komunità, kif imsemmi fl-Artikoli 20 u 22 tar-Regolament (KE) Nru 104/2000, għas-sena tas-sajd 2009 għall-prodotti tas-sajd elenkati fl-Anness I ta’ dak ir-Regolament, huma stipulati fl-Anness I ta’ dan ir-Regolament.

L-Artikolu 2

Il-prezzijiet Komunitarji ta’ rtirar u bejgħ applikabbli għas-sena tas-sajd 2009 u l-prodotti li huma relatati magħhom huma mniżżla fl-Anness II.

L-Artikolu 3

Il-prezzijiet ta’ rtirar applikabbli għas-sena ta’ sajd 2009 f’postijiet tal-ħatt li huma mbiegħda ħafna miċ-ċentri ewlenin ta’ konsum fil-Komunità u l-prodotti relatati magħhom huma mniżżla fl-Anness III.

L-Artikolu 4

Dan ir-Regolament għandu jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta' Jannar 2009.

---

(1)  ĠU L 17, 21.1.2000, p. 22.

(2)  Ara paġna 1 ta' dan il-Ġurnal Uffiċjali.

---

---

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/52

---

REGOLAMENT TAL-KUMMISSJONI (KE) Nru 1310/2008

tad-19 ta' Diċembru 2008

li jiffissa l-valuri standard li għandhom jintużaw għall-kalkolu tal-kumpens finanzjarju u l-ħlas bil-quddiem li għandu x'jaqsam miegħu fir-rigward tal-prodotti tas-sajd irtirati mis-suq tul is-sena tas-sajd 2009

IL-KUMMISSJONI TAL-KOMUNITAJIET EWROPEJ,

Wara li kkunsidrat t-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 104/2000 tas-17 ta' Diċembru 1999 dwar l-organizzazzjoni komuni tas-swieq fil-prodotti tas-sajd u l-akkwakultura (1), u b'mod partikolari l-Artikolu 21(5) u (8) tiegħu,

Billi:

(1)

Ir-Regolament (KE) Nru 104/2000 jipprovdi biex jitħallas kumpens finanzjarju lill-organizzazzjonijiet ta' produtturi li jirtiraw, minħabba ċerti kondizzjonijiet, il-prodotti elenkati fl-Anness I, (A) u (B) ta' dak ir-Regolament. L-ammont ta' kumpens finanzjarju bħal dan għandu jkun imnaqqas bil-valuri standard fil-każ tal-prodotti maħsuba għal skopijiet għajr dak tal-konsum mill-bniedem.

(2)

Ir-Regolament tal-Kummissjoni (KE) Nru 2493/2001 tad-19 ta' Diċembru 2001 dwar ir-rimi ta' ċerti prodotti tas-sajd li jkunu ġew irtirati mis-suq (2) jispeċifika l-modi ta' rimi tal-prodotti rtirati mis-suq. Il-valur ta’ dawn il-prodotti għandu jkun iffissat fuq livell standard għal kull wieħed minn dawn il-modi ta’ rimi, billi jitqies id-dħul medju li jista’ jinkiseb minn dan ir-rimi fl-Istati Membri varji.

(3)

Skont l-Artikolu 7 tar-Regolament tal-Kummissjoni (KE) Nru 2509/2000 tal-15 ta' Novembru 2000 li jistabilixxi regoli ddettaljati għall-applikazzjoni tar-Regolament tal-Kunsill (KE) Nru 104/2000 dwar l-għoti ta' kumpens finanzjarju għall-irtirar ta' ċerti prodotti tas-sajd (3), regoli speċjali jipprovdu li, meta organizzazzjoni ta' produtturi jew wieħed mill-membri tagħha tqiegħed il-prodotti tagħha għall-bejgħ fi Stat Membru li ma jkunx il-pajjiż li fih tkun rikonoxxuta, dak il-korp responsabbli għall-għoti tal-kumpens finanzjarju jrid ikun infurmat. Dan il-korp huwa dak fl-Istat Membru li fih l-organizzazzjoni ta' produtturi tkun rikonoxxuta. Il-valur standard li jista' jitnaqqas għandu għalhekk ikun il-valur applikat f'dak l-Istat Membru.

(4)	L-istess metodu ta' kalkolu għandu jkun applikat għall-ħlasijiet bil-quddiem fuq kumpens finanzjarju kif provdut fl-Artikolu 6 tar-Regolament (KE) Nru 2509/2000.

(5)	Il-miżuri provduti f'dan ir-Regolament huma konformi mal-opinjoni tal-Kumitat ta' Ġestjoni għall-Prodotti tas-Sajd,

ADOTTAT DAN IR-REGOLAMENT:

Artikolu 1

Għas-sena tas-sajd 2009, il-valuri standard li jridu jintużaw biex jiġi kkalkulat l-kumpens finanzjarju u l-ħlasijiet bil-quddiem marbuta miegħu fuq il-prodotti tas-sajd irtirati mis-suq minn organizzazzjonijiet ta' produtturi u maħsuba għal skopijiet għajr dak tal-konsum mill-bniedem, kif jirreferi għalihom l-Artikolu 21(5) tar-Regolament (KE) Nru 104/2000 huma stipulati fl-Anness ta' dan ir-Regolament.

Artikolu 2

Il-valur standard li jrid jitnaqqas mill-kumpens finanzjarju u l-ħlasijiet bil-quddiem marbuta miegħu għandu jkun dak applikat fl-Istat Membru li fih l-organizzazzjoni ta' produtturi tkun rikonoxxuta.

Artikolu 3

Dan ir-Regolament għandu jidħol fis-seħħ l-għada tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta' Jannar 2009.

---

(1)  ĠU L 17, 21.1.2000, p. 22.

(2)  ĠU L 337, 20.12.2001, p. 20.

(3)  ĠU L 289, 16.11.2000, p. 11.

---

---

20.12.2008

MT

Il-Ġurnal Uffiċjali ta’ l-Unjoni Ewropea

L 344/54

---

REGOLAMENT TAL-KUMMISSJONI (KE) Nru 1311/2008

tad-19 ta’ Diċembru 2008

li jiffissa l-ammont tal-għajnuna li tinġieb ′il quddiem u l-għajnuna b'rata uniformi għal ċerti prodotti tas-sajd għas-sena tas-sajd 2009

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 104/2000 tas-17 ta' Diċembru 1999 dwar l-organizzazzjoni komuni tas-swieq fil-prodotti tas-sajd u l-akkwakultura (1),

Wara li kkunsidrat ir-Regolament tal-Kummissjoni (KE) Nru 2814/2000 tal-21 ta' Diċembru 2000 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 104/2000 dwar l-għoti tal-għajnuna li tinġieb ′il quddiem fuq ċerti prodotti tas-sajd (2), u b'mod partikolari l-Artikolu 5 tiegħu,

Wara li kkunsidrat ir-Regolament tal-Kummissjoni (KE) Nru 939/2001 tal-14 ta' Mejju 2001 li jistabilixxi regoli dettaljati għall-applikazzjoni tar-Regolament tal-Kunsill (KE) Nru 104/2000 dwar l-għoti tal-għajnuna b'rata uniformi fuq ċerti prodotti tas-sajd (3), u b'mod partikolari l-Artikolu 5 tiegħu,

Billi:

(1)	Ir-Regolament (KE) Nru 104/2000 jipprovdi li tista' tingħata għajnuna fuq kwantitajiet ta' ċerti prodotti friski rtirati mis-suq u li jew ikunu ġew ipproċessati biex ikunu stabbilizzati u maħżuna jew li jkunu ġew ppreservati.

(2)	L-iskop ta' dik l-għajnuna huwa li jingħata inċentiv xieraq lill-organizzazzjonijiet ta' produtturi biex jipproċessaw jew jippreservaw il-prodotti rtirati mis-suq sabiex tkun evitata l-qerda tagħhom.

(3)	Il-livell ta' għajnuna m'għandux ikun tali li jfixkel il-bilanċ tas-suq għall-prodotti inkwistjoni jew li joħloq distorsjoni fil-kompetizzjoni.

(4)	Il-livell tal-għajnuna m'għandux jaqbeż l-ispejjeż tekniċi u finanzjarji marbuta mal-operazzjonijiet essenzali għall-istabbilizzazzjoni u ħżin irreġistrati fil-Komunità matul is-sena tas-sajd ta' qabel is-sena inkwistjoni.

(5)	Il-miżuri provduti f'dan ir-Regolament jikkonformaw mal-opinjoni tal-Kumitat ta' Ġestjoni għall-Prodotti tas-Sajd,

ADOTTAT DAN IR-REGOLAMENT:

Artikolu 1

Għas-sena tas-sajd 2009, l-ammonti tal-għajnuna li tinġieb ′il quddiem imsemmijin fl-Artikolu 23 tar-Regolament (KE) Nru 104/2000 u l-ammonti tal-għajnuna b’rata uniformi imsemmijin fl-Artikolu 24(4) ta' dak ir-Regolament huma stipulati fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ l-għada tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu japplika mill-1 ta' Jannar 2009.

---

(1)  ĠU L 17, 21.1.2000, p. 22.

(2)  ĠU L 326, 22.12.2000, p. 34.

(3)  ĠU L 132, 15.5.2001, p. 10.

---

---