16.7.2008

MT

Il-Ġurnal Uffiċjali ta’ l-Unjoni Ewropea

L 188/1

---

REGOLAMENT TAL-KUNSILL (KE) Nru 666/2008

tal-15 ta' Lulju 2008

li jemenda r-Regolament (KE) Nru 889/2005 li jimponi ċerti miżuri restrittivi fir-rigward tar- Repubblika Demokratika tal-Kongo

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u partikolarment l-Artikoli 60 u 301 tiegħu,

Wara li kkunsidra l-Pożizzjoni Komuni tal-Kunsill 2008/369/PESK ta’ l-14 ta’ Mejju 2008 dwar miżuri restrittivi kontra r-Repubblika Demokratika tal-Kongo (1),

Wara li kkunsidra l-proposta tal-Kummissjoni,

Billi:

(1)

Ir-Regolament (KE) Nru 889/2005 (2) jimponi ċerti miżuri restrittivi fir-rigward tar-Repubblika Demokratika tal-Kongo (RDK), f’konformità mal-Pożizzjoni Komuni 2005/440/PESK tat-13 ta’ Ġunju 2005 rigward miżuri restrittivi kontra r-Repubblika Demokratika tal-Kongo (3) u skond ir-Riżoluzzjoni tal-Kunsill tas-Sigurtà tan-NU 1596 (2005) u r-riżoluzzjonijiet rilevanti sussegwenti.

(2)

Permezz tar-Riżoluzzjoni 1807 (2008) tal-31 ta’ Marzu 2008, il-Kunsill tas-Sigurtà tan-NU ddeċieda, inter alia, li jimmodifika l-ambitu tal-miżuri restrittivi fuq ċertu assistenza teknika sabiex jiġu limitati r-restrizzjonijiet lill-entitajiet kollha mhux governattivi u l-individwi li joperaw fit-territorju tar-RDK. Fl-14 ta’ Mejju 2008, il-Kunsill adotta l-Pożizzjoni Komuni 2008/369/PESK, li tagħti effett lir-Riżoluzzjoni 1807 (2008) u tħassar il-Pożizzjoni Komuni 2005/440/PESK.

(3)	Huwa xieraq li jiġi emendat ir-Regolament (KE) Nru 889/2005 f’dan is-sens,

ADOTTA DAN IR-REGOLAMENT:

Artikolu 1

Ir-Regolament (KE) Nru 889/2005 huwa issa emendat kif ġej:

(1)

L-Artikolu 2 għandu jinbidel b’dan li ġej: “Artikolu 2 1.   Għandu jiġi pprojbit: (a) li tingħata assistenza teknika relatata ma’ attivitajiet militari, direttament jew indirettament, lil kwalunkwe entità mhux governattiva jew persuna li topera fit-territorju tar- RDK; (b) li jiġi provdut finanzjament jew assistenza finanzjarja relatata ma’ attivitajiet militari inkluż, b’mod partikolari għotjiet, self u assigurazzjoni tal-kreditu fuq l-esportazzjoni, għal kwalunkwe bejgħ, forniment, trasferiment jew esportazzjoni ta’ armi jew materjal relatat, jew għal kwalunkwe għotja, bejgħ, forniment, jew trasferiment ta’ assistenza teknika relatata u servizzi oħra, direttament jew indirettament lil kwalunkwe entità mhux governattiva jew persuna li topera fit-territorju tar-RDK; (ċ) li jkun hemm parteċipazzjoni, b’għarfien u b’intenzjoni, f’attivitajiet li l-iskop jew effett tagħhom huwa, direttament jew indirettament, li ssir promozzjoni tat-transazzjonijiet msemmija fil-paragrafi (a) u (b). 2.   Il-forniment ta’ assistenza teknika, finanzjament jew assistenza finanzjarja lil kwalunkwe persuna, entità jew korp governattiv jew ieħor fir-RDK, jew għall-użu fir-RDK, minbarra l-forniment ta’ tali assistenza lill-Missjoni ta’ l-Organizzazzjoni tan-Nazzjonijiet Uniti fir-RDK (MONUC) skond l-Artikolu 3(1)(a), għandu jkun notifikat bil-quddiem lill-Kumitat tas-Sanzjonijiet. Tali notifiki għandu jkun fihom l-informazzjoni rilevanti kollha, inkluż, fejn xieraq, l-utent aħħari, id-data proposta għall-kunsinna u l-itinerarju tal-vjeġġ.”;

(2)

L-Artikolu 3 għandu jinbidel b’dan li ġej: “Artikolu 3 1.   B’deroga mill-Artikolu 2, l-awtoritajiet kompetenti, kif indikat fil-websajts elenkati fl-Anness 1, fl-Istat Membru fejn il-fornitur tas-servizz huwa stabbilit, jistgħu jawtorizzaw il-forniment ta’: (a) assistenza teknika, finanzjament u assistenza finanzjarja relatati ma’ l-armi u l-materjal relatat maħsuba biss għall-appoġġ tal-MONUC u għall-użu minnha; (b) assistenza teknika, finanzjament u assistenza finanzjarja relatati ma’ tagħmir militari mhux letali maħsub biss għal użu umanitarju jew protettiv, fejn l-għoti ta’ tali assistenza jew servizzi jkun ġie nnotifikat minn qabel lill-Kumitat tas-Sanzjonijiet skond l-Artikolu 2(2). 2.   L-ebda awtorizzazzjoni m’għandha tingħata għal attivitajiet li diġà seħħew.”.

Artikolu 2

Dan ir-Regolament għandu jidħol fis-seħħ fil-jum ta’ wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.

---

(1)  ĠU L 127, 15.5.2008, p. 84.

(2)  ĠU L 152, 15.6.2005, p. 1. Ir-Regolament kif emendat l-aħħar bir-Regolament (KE) Nru 1377/2007 (ĠU L 309, 27.11.2007, p. 1).

(3)  ĠU L 152, 15.6.2005, p. 22.

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/3

---

REGOLAMENT TAL-KUMMISSJONI (KE) Nru 667/2008

tal-15 ta’ Lulju 2008

li jistabbilixxi l-valuri fissi ta' l-importazzjoni għad-determinazzjoni tal-prezz ta' dħul ta' ċertu frott u ħaxix

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1234/2007 tat-22 ta' Ottubru 2007 li jistabbilixxi organizzazzjoni komuni ta' swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) (1),

Wara li kkunsidrat ir-Regolament tal-Kummissjoni (KE) Nru 1580/2007 tal-21 ta' Diċembru 2007 dwar regoli dettaljati għall-applikazzjoni tar-Regolamenti tal-Kunsill (KE) Nru 2200/96, (KE) Nru 2001/96 u (KE) Nru 1182/2007 fis-settur tal-frott u ħxejjex (2), u b'mod partikolari l-Artikolu 138(1) tiegħu,

Billi:

Fl-applikazzjoni tal-konklużjonijiet tan-negozjati kummerċjali multilaterali taċ-Ċiklu ta’ l-Urugwaj, il-Regolament (KE) Nru 1580/2007 jistipula l-kriterji għall-istabbiliment mill-Kummissjoni tal-valuri fissi ta' l-importazzjoni minn pajjiżi terzi, għall-prodotti u għall-perjodi msemmijin fl-Anness XV, it-Taqsima A tar-Regolament imsemmi,

ADOTTAT DAN IR-REGOLAMENT:

Artikolu 1

Il-valuri fissi ta' l-importazzjoni msemmija fl-Artikolu 138 tar-Regolament (KE) Nru 1580/2007 huma stipulati fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ fil-16 ta’ Lulju 2008.

---

(1)  ĠU L 299, 16.11.2007, p. 1. Ir-Regolament kif emendat l-aħħar bir-Regolament tal-Kummissjoni (KE) Nru 510/2008 (ĠU L 149, 7.6.2008, p. 61).

(2)  ĠU L 350, 31.12.2007, p. 1. Ir-Regolament kif emendat l-aħħar bir-Regolament (KE) Nru 590/2008 (ĠU L 163, 24.6.2008, p. 24).

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/5

---

REGOLAMENT TAL-KUMMISSJONI (KE) Nru 668/2008

tal-15 ta' Lulju 2008

li jemenda mit-II sal-V Anness tar-Regolament (KE) Nru 2096/2005 li jistipula rekwiżiti komuni għall-forniment ta’ servizzi ta’ navigazzjoni ta’ l-ajru, fir-rigward ta’ metodi ta’ ħidma u proċeduri ta’ l-operat

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament (KE) Nru 550/2004 tal-Parlament Ewropew u tal-Kunsill ta' l-10 ta' Marzu 2004 dwar il-forniment ta' servizzi ta' navigazzjoni ta' l-ajru fl-Ajru Uniku Ewropew (ir-Regolament dwar il-forniment tas-servizzi) (1), u b'mod partikolari l-Artikolu 4 tiegħu,

Billi:

(1)

L-Annessi II, III, IV u V tar-Regolament tal-Kummissjoni (KE) Nru 2096/2005 ta’ l-20 ta’ Diċembru 2005 li jistipula rekwiżiti komuni għall-forniment ta’ servizzi ta’ navigazzjoni ta’ l-ajru (2) jirreferi għal diversi annessi tal-Konvenzjoni dwar l-Avjazzjoni Ċivili Internazzjonali. Minn meta ġie adottat ir-Regolament (KE) Nru 2096/2005, dawk l-annessi ġew emendati mill-Organizzazzjoni Internazzjonali ta’ l-Avjazjoni Ċivili kif indikat fl-ittri ta’ l-Istat 2001/74 ta’ l-10 ta’ Awwissu 2001; 2003/29 tat-28 ta’ Marzu 2003; 2004/16 tas-26 ta’ Marzu 2004; 2005/35 u 2005/39 ta’ l-24 ta’ Marzu 2005; 2006/38 ta’ l-24 ta’ Marzu 2006; 2006/64 tat-18 ta’ Awwissu 2006; 2007/11, 2007/13, 2007/19, 2007/20, 2007/23 u 2007/24 tat-30 ta’ Marzu 2007. Ir-referenzi fir-Regolament (KE) Nru 2096/2005 għandhom jiġu aġġornati sabiex jilħqu l-obbligi ġuridiċi internazzjonali ta’ l-Istati Membri u jiżguraw koerenza mal-qafas regolatorju internazzjonali.

(2)	Ir-Regolament (KE) Nru 2096/2005 għandu għalhekk jiġi emendat skond dan.

(3)	Il-miżuri pprovduti f'dan ir-Regolament huma konformi ma' l-opinjoni tal-Kumitat għall-Ajru (Sema) Uniku.

ADOTTAT DAN IR-REGOLAMENT:

Artikolu 1

Ir-Regolament (KE) Nru 2096/2005 jiġi emendat kif ġej:

(1)

Fl-Anness II, il-punt 4 jinbidel b'dan li ġej: “4.   METODI TA’ ĦIDMA U PROĊEDURI TA’ L-OPERAT Fornitur ta’ servizzi ta’ traffiku ta’ l-ajru għandu jkun kapaċi juri li l-metodi ta' ħidma u l-proċeduri ta' l-operat tiegħu huma konformi ma' l-istandards fl-annessi li ġejjin tal-Konvenzjoni dwar l-Avjazzjoni Ċivili Internazzjonali sa fejn ikunu rilevanti għall-forniment tas-servizzi tat-traffiku ta' l-ajru fl-ispazju ta' l-ajru kkonċernat: (a) l-Anness 2 dwar ir-regoli ta’ l-ajru fl-10 edizzjoni tiegħu ta’ Lulju 2005, inklużi l-emendi kollha san-Nru 40, (b) l-Anness 10 dwar it-telekomunikazzjonijiet ajronawtiċi, il-Volum II dwar il-Proċeduri ta’ komunikazzjoni inkluż dawk bi Status PANS fis-6 edizzjoni tiegħu ta’ Ottubru 2001, inklużi l-emendi kollha san-Nru 82, (ċ) l-Anness 11 dwar is-servizzi tat-traffiku ta’ l-ajru fit-13-il edizzjoni tiegħu ta’ Lulju 2001, inklużi l-emendi kollha san-Nru 45.”;

(2)

Fl-Anness III, il-punt 2 jinbidel b'dan li ġej: “2.   METODI TA’ ĦIDMA U PROĊEDURI TA’ L-OPERAT Fornitur ta’ servizzi metereoloġiċi għandu jkun kapaċi juri li l-metodi ta' ħidma u l-proċeduri ta' l-operat tiegħu huma konformi ma' l-istandards fl-annessi li ġejjin tal-Konvenzjoni dwar l-Avjazzjoni Ċivili Internazzjonali sa fejn ikunu rilevanti għall-forniment ta’ servizzi metereoloġiċi ta' l-ajru fl-ispazju ta' l-ajru kkonċernat: (a) L-Anness 3 dwar is-servizzi metereoloġiċi għan-navigazzjoni internazzjonali ta’ l-ajru fis-16-il edizzjoni tiegħu ta’ Lulju 2007, inklużi l-emendi kollha san-Nru 74, (b) l-Anness 11 dwar is-servizzi tat-traffiku ta’ l-ajru fit-13-il edizzjoni tiegħu ta’ Lulju 2001, inklużi l-emendi kollha san-Nru 45, (ċ) l-Anness 14 dwar l-ajrudromi fil-verżjonijiet li ġejjin: (i) il-Volum I dwar id-disinn u l-operazzjonijiet ta’ l-ajrudrom fir-4 edizzjoni tiegħu ta’ Lulju 2004, inklużi l-emendi kollha san-Nru 9, (ii) il-Volum 2 dwar il-ħeliports fit-2 edizzjoni tiegħu ta’ Lulju 1995, inklużi l-emendi kollha san-Nru 3.”;

(3)

Fl-Anness IV, il-punt 2 jinbidel b'dan li ġej: “2.   METODI TA’ ĦIDMA U PROĊEDURI TA’ L-OPERAT Fornitur ta’ servizzi ta’ informazzjoni ajronawtika għandu jkun kapaċi juri li l-metodi ta' ħidma u l-proċeduri ta' l-operat tiegħu huma konformi ma' l-istandards fl-annessi li ġejjin tal-Konvenzjoni dwar l-Avjazzjoni Ċivili Internazzjonali sa fejn ikunu rilevanti għall-forniment ta’ servizzi ta’ informazzjoni ajronawtika fl-ispazju ta' l-ajru kkonċernat: (a) L-Anness 3 dwar is-servizzi metereoloġiċi għan-navigazzjoni internazzjonali ta’ l-ajru fis-16-il edizzjoni tiegħu ta’ Lulju 2007, inklużi l-emendi kollha san-Nru 74, (b) l-Anness 4 dwar il-mapep ajronawtiċi fl-10 edizzjoni tiegħu ta’ Lulju 2001, inklużi l-emendi kollha san-Nru 54, (ċ) l-Anness 15 dwar is-servizzi ta’ informazzjoni ajronawtika fit-12-il edizzjoni tiegħu ta’ Lulju 2004, inklużi l-emendi kollha san-Nru 34.”;

(4)

Fl-Anness V, il-punt 3 huwa mibdul b'dan li ġej: “3.   METODI TA’ ĦIDMA U PROĊEDURI TA’ L-OPERAT Fornitur ta’ servizzi ta’ komunikazzjoni, navigazzjoni jew sorveljanza għandu jkun kapaċi juri li l-metodi ta' ħidma u l-proċeduri ta' l-operat tiegħu huma konformi ma' l-istandards ta' l-Anness 10 dwar it-telekomunikazzjonijiet ajronawtiċi tal-Konvenzjoni dwar l-Avjazzjoni Ċivili Internazzjonali fil-verżjonijiet li ġejjin sa fejn ikunu rilevanti għall-forniment ta’ servizzi ta’ komunikazzjoni, navigazzjoni jew sorveljanza fl-ispazju ta' l-ajru kkonċernat: (a) il-Volum I dwar l-għajnuniet għan-navigazzjoni bir-radju fis-6 edizzjoni tiegħu ta’ Lulju 2006, inklużi l-emendi kollha san-Nru 82, (b) il-Volum II dwar il-proċeduri ta’ komunikazzjoni inkluż dawk bi status PANS fis-6 edizzjoni tiegħu ta’ Ottubru 2001, inklużi l-emendi kollha san-Nru 82, (ċ) il-Volum III dwar is-sistemi ta’ komunikazzjoni fit-2 edizzjoni tiegħu ta’ Lulju 2007, inklużi l-emendi kollha san-Nru 82, (d) il-Volum IV dwar is-sistemi ta’ sorveljanza bir-radar u ta’ evitar ta’ kolliżjoni fir-4 edizzjoni tiegħu ta’ Lulju 2007, inklużi l-emendi kollha san-Nru 82, (e) il-Volum V dwar l-użu ta’ l-ispettru tal-frekwenzi tar-radju ajronawtiċi fit-2 edizzjoni tiegħu ta’ Lulju 12001, inklużi l-emendi kollha san-Nru 82.”;

Artikolu 2

Dan ir-Regolament għandu jidħol fis-seħħ fl-20 jum ta’ wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.

---

(1)  ĠU L 96, 31.3.2004, p. 10.

(2)  ĠU L 335, 21.12.2005, p. 13. Ir-Regolament kif emendat l-aħħar bir-Regolament (KE) Nru 482/2008 (ĠU L 141, 31.5.2008, p. 5).

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/7

---

REGOLAMENT TAL-KUMMISSJONI (KE) Nru 669/2008

tal-15 ta' Lulju 2008

dwar kif għandu jiġi kkompletat l-Anness IC tar-Regolament tal-Parlament Ewropew u tal-Kunsill (KE) Nru 1013/2006 dwar vjaġġi ta' skart

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Parlament Ewropew u tal-Kunsill (KE) Nru 1013/2006 ta' l-14 ta' Ġunju 2006 dwar vjaġġi ta' skart (1), u b'mod partikolari l-Artikolu 58(1)(a) tiegħu,

Billi:

(1)	L-Anness IC rigward struzzjonijiet speċifiċi dwar kif għandhom jimtlew id-dokumenti ta' notifika u ta' moviment għandhom jiġu mimlija sa mhux aktar tard mid-data ta' l-applikazzjoni tar-Regolament (KE) Nru 1013/2006 fir-rigward ta' l-istruzzjonijiet ta' l-OECD.

(2)	Il-miżuri stipulati f'dan ir-Regolament huma skond l-opinjoni tal-Kumitat stabbilit permezz ta' l-Artikolu 18 tad-Direttiva tal-Parlament Ewropew u tal-Kunsill 2006/12/KE tal-5 ta' April 2006 dwar l-iskart (2),

ADOTTAT DAN IR-REGOLAMENT:

Artikolu 1

L-Anness IC għandu jimtela kif deskritt fl-Anness ta' dan ir-Regolament.

Artikolu 2

Dan ir-Regolament jidħol fis-seħħ fit-tielet jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.

---

(1)  ĠU L 190, 12.7.2006, p. 1. Ir-Regolament kif emendent bir-Regolament tal-Kummissjoni (KE) Nru 1379/2007 (ĠU L 309, 27.11.2007, p. 7).

(2)  ĠU L 114, 27.4.2006, p. 9.

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/16

---

REGOLAMENT TAL-KUMMISSJONI (KE) Nru 670/2008

tal-15 ta' Lulju 2008

li jintroduċi denominazzjoni fir-Reġistru tad-denominazzjonijiet protetti ta' l-oriġini u l-indikazzjonijiet ġeografiċi protetti (Arroz Carolino das Lezírias Ribatejanas (IĠP))

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 510/2006 ta' l-20 ta' Marzu 2006 dwar il-protezzjoni ta' l-indikazzjonijiet ġeografiċi u tad-denominazzjonijiet ta' l-oriġini tal-prodotti agrikoli u ta' l-oġġetti ta' l-ikel (1), u b'mod partikolari l-ewwel inċiż ta' l-Artikolu 7(4) tiegħu,

Billi:

(1)	F’konformità ma’ l-Artikolu 6(2), l-ewwel inċiż, tar-Regolament (KE) Nru 510/2006, l-applikazzjoni mressqa mill-Portugall għar-reġistrazzjoni tad-denominazzjoni “Arroz Carolino das Lezírias Ribatejanas” kienet ippublikata fil-Ġurnal Uffiċjali ta’ l-Unjoni Ewropea  (2).

(2)	Ġaladarba lill-Kummisjsoni ma ġiet innotifikata l-ebda dikjarazzjoni ta' oppożizzjoni skond l-Artikolu 7 tar-Regolament (KE) Nru 510/2006, din id-denominazzjoni għaldaqstant għandha tiġi rreġistrata.

ADOTTAT DAN IR-REGOLAMENT:

Artikolu 1

Id-denominazzjoni msemmija fl-Anness ta' dan ir-Regolament għandha tiġi rreġistrata.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

---

(1)  ĠU L 93, 31.3.2006, p. 12. Ir-Regolament kif emendat l-aħħar bir-Regolament tal-Kummissjoni (KE) Nru 417/2008 (ĠU L 125, 9.5.2008, p. 27).

(2)  ĠU C 258, 31.10.2007, p. 12.

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/18

---

REGOLAMENT TAL-KUMMISSJONI (KE) Nru 671/2008

tal-15 ta’ Lulju 2008

li jffissa d-dazji ta’ l-importazzjoni fis-settur taċ-ċereali applikabbli mis-16 ta’ Lulju 2008

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1234/2007 tat-22 ta' Ottubru 2007 li jistabbilixxi organizzazzjoni komuni ta' swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) (1),

Wara li kkunsidrat ir-Regolament tal-Kummissjoni (KE) Nru 1249/96 tat-28 ta' Ġunju 1996 dwar regoli ta' applikazzjoni (dazju ta' importazzjoni fis-settur taċ-ċereali) għar-Regolament tal-Kunsill (KEE) Nru 1766/92 (2), u b'mod partikolari l-Artikolu 2(1) tiegħu,

Billi:

(1)

L-Artikolu 136(1) tar-Regolament (KE) Nru 1234/2007 jipprovdi li, għall-prodotti li jaqgħu taħt il-kodiċijiet tan-NM 1001 10 00, 1001 90 91, ex 1001 90 99 [qamħ durum ta' kwalità għolja], 1002, ex 1005 minbarra ż-żrieragħ ibridi, u ex 1007 minbarra l-ibridu għaż-żrigħ, id-dazju ta' l-importazzjoni huwa daqs il-prezz ta' l-intervent li jgħodd għal dawn il-prodotti fil-waqt ta' l-importazzjoni, biż-żieda ta' 55 % u bit-tnaqqis tal-prezz ta' l-importazzjoni CIF applikabbli għall-kunsenja kkonċernata. Madankollu, dan id-dazju ma jistax jaqbeż ir-rata ta' dazji fit-Tariffa Doganali Komuni.

(2)	L-Artikolu 136(2) tar-Regolament (KE) Nru 1234/2007 jipprovdi li, għall-finijiet tal-kalkolu tad-dazju ta’ l-importazzjoni msemmija fil-paragrafu 1 ta' l-Artikolu msemmi, għall-prodotti kkonċernati kull tant żmien jiġu stabbiliti prezzijiet rappreżentattivi CIF għall-importazzjoni.

(3)

Skond l-Artikolu 2(2) tar-Regolament (KE) Nru 1249/96, il-prezz li għandu jintuża għall-kalkolu tad-dazju ta' l-importazzjoni tal-prodotti li jaqgħu taħt il-kodiċijiet NM 1001 10 00, 1001 90 91, ex 1001 90 99 (qamħ durum ta' kwalità għolja), 1002 00, 1005 10 90, 1005 90 00 u 1007 00 90, huwa l-prezz rappreżentattiv ta' l-importazzjoni CIF tal-ġurnata stabbilit skond il-metodu pprovdut fl-Artikolu 4 tar-Regolament imsemmi.

(4)	Jeħtieġ li jiġu stabbiliti d-dazji ta' l-importazzjoni għall-perjodu mis-16 ta’ Lulju 2008, applikabbli sakemm jidħlu fis-seħħ dazji ta' l-importazzjoni ġodda.

(5)

Madankollu, f’konformità mar-Regolament tal-Kummissjoni (KE) Nru 608/2008 tas-26 ta' Ġunju 2008 li jwassal għal sospensjoni temporanja tad-dazji tad-dwana fuq l-importazzjoni ta’ ċerti ċereali għas-sena finanzjarja ta’ bejgħ 2008/2009 (3), l-applikazzjoni ta’ ċerti dazji ffissati b’dan ir-Regolament hija sospiża,

ADOTTAT DAN IR-REGOLAMENT:

Artikolu 1

Mis-16 ta’ Lulju 2008, id-dazji ta’ l-importazzjoni fis-settur taċ-ċereali msemmija fl-Artikolu 136(1) tar-Regolament (KE) Nru 1234/2007 huma stipulati fl-Anness I ta' dan ir-Regolament abbażi tal-fatturi msemmija fl-Anness II.

Artikolu 2

Dan ir-Regolament għandu jidħol fis-seħħ fis-16 ta’ Lulju 2008.

---

(1)  ĠU L 299, 16.11.2007, p. 1. Ir-Regolament kif emendat l-aħħar bir-Regolament tal-Kummissjoni (KE) Nru 510/2008 (ĠU L 149, 7.6.2008, p. 61).

(2)  ĠU L 161, 29.6.1996, p. 125. Ir-Regolament kif emendat l-aħħar bir-Regolament (KE) Nru 1816/2005 (ĠU L 292, 8.11.2005, p. 5).

(3)  ĠU L 166, 27.6.2008, p. 19.

---

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/21

---

DEĊIŻJONI TAL-KUNSILL

tal-15 ta’ Lulju 2008

li timplimenta l-Artikolu 2(3) tar-Regolament (KE) Nru 2580/2001 dwar miżuri restrittivi speċifiċi diretti kontra ċerti persuni u entitajiet bil-għan li jiġi miġġieled it-terroriżmu u li tirrevoka d-Deċiżjoni 2007/868/KE

(2008/583/KE)

IL-KUNSILL TA’ L-UNJONI EWROPEA,

Wara li kkunsidra r-Regolament tal-Kunsill (KE) Nru 2580/2001 tas-27 ta’ Diċembru 2001 dwar miżuri restrittivi speċifiċi diretti kontra ċerti persuni u entitajiet bil-għan li jiġi miġġieled it-terroriżmu (1), u b’mod partikolari l-Artikolu 2(3) tiegħu,

Billi:

(1)

Fl-20 ta’ Diċembru 2007 il-Kunsill adotta d-Deċiżjoni 2007/868/KE li timplimenta l-Artikolu 2(3) tar-Regolament (KE) Nru 2580/2001 dwar miżuri restrittivi speċifiċi diretti kontra ċerti persuni u entitajiet bil-għan li jiġi miġġieled it-terroriżmu (2), u li tistabbilixxi l-lista aġġornata ta’ persuni u entitajiet li għalihom japplika dak ir-Regolament.

(2)

Il-Kunsill ipprovda lil kull persuna, kull grupp u kull entità li għalihom dan kien possibbli fil-prattika b'dikjarazzjonijiet ta’ raġunijiet fejn fisser għaliex huma kienu elenkati fil-lista li tinsab fid-Deċiżjoni 2007/868/KE. Fil-każ ta’ grupp u ta’ tliet persuni, sommarju tar-raġunijiet immodifikat ngħata lilhom safejn dan kien possibbli f'April ta’ l-2008.

(3)

B'avviż ippubblikat fil-Ġurnal Uffiċjali ta’ l-Unjoni Ewropea fit-22 ta’ Diċembru 2007 (3) il-Kunsill informa lill-persuni, il-gruppi u l-entitajiet elenkati fid-Deċiżjoni 2007/868/KE li hu ddeċida li jżommhom fuq il-lista. Il-Kunsill informa wkoll lill-persuni, il-gruppi u l-entitajiet ikkonċernati li kienet possibbli li tintalab id-dikjarazzjoni ta’ raġunijiet tal-Kunsill għall-inklużjoni tagħhom fuq il-lista (fejn din ma kinitx diġà ġiet ikkomunikata lilhom).

(4)	Il-Kunsill wettaq reviżjoni kompleta tal-lista ta’ persuni, gruppi u entitajiet li għalihom japplika r-Regolament (KE) Nru 2580/2001, kif meħtieġ mill-Artikolu 2(3) ta’ dak ir-Regolament. Meta għamel dan, huwa ħa kont ta’ osservazzjonijiet ippreżentati lill-Kunsill minn dawk ikkonċernati.

(5)

Fil-każ ta’ grupp, il-Kunsill ikkunsidra l-fatt li d-deċiżjoni minn awtorità kompetenti li serviet bħala ġustifikazzjoni għall-inklużjoni ta’ dan il-grupp fil-lista m'għadhiex fis-seħħ mill-24 ta’ Ġunju 2008. Madankollu, il-Kunsill ġie mgħarraf dwar elementi ġodda rigward dan il-grupp. Il-Kunsill kkunsidra li dawn l-elementi ġodda jiġġustifikaw l-inklużjoni ta’ dan il-grupp fil-lista.

(6)	Il-Kunsill iddetermina li persuna waħda għandha titneħħa mil-lista tal-persuni, il-gruppi u l-entitajiet li għalihom japplika r-Regolament (KE) Nru 2580/2001.

(7)

Għalhekk il-Kunsill ikkonkluda li, bl-eċċezzjoni tal-persuna msemmija fis-sitt premessa l-persuni, il-gruppi u l-entitajiet elenkati fl-Anness għall-Pożizzjoni Komuni 2007/871/PESK (4) kienu involuti f'atti terroristiċi fit-tifsira ta’ l-Artikoli 1(2) u (3) tal-Pożizzjoni Komuni tal-Kunsill 2001/931/PESK tas-27 ta’ Diċembru 2001 dwar l- applikazzjoni ta’ miżuri speċifiċi biex jiġi miġġieled it-terroriżmu (5), li ttieħdet deċiżjoni fir-rigward tagħhom minn awtorità kompetenti fit-tifsira ta’ l-Artikolu 1(4) ta’ dik il-Pożizzjoni Komuni, u li huma għandhom ikomplu jkunu soġġetti għall-miżuri restrittivi speċifiċi previsti fir-Regolament (KE) Nru 2580/2001.

(8)	Il-lista tal-persuni, il-gruppi u l-entitajiet li għalihom japplika r-Regolament (KE) Nru 2580/2001 għandha tiġi aġġornata kif meħtieġ,

IDDEĊIEDA KIF ĠEJ:

Artikolu 1

Il-lista prevista fl-Artikolu 2(3) tar-Regolament (KE) Nru 2580/2001 għandha tiġi sostitwita bil-lista li tinsab fl-Anness għal din id-Deċiżjoni.

Artikolu 2

Id-Deċiżjoni 2007/868/KE hija hawnhekk irrevokata.

Artikolu 3

Din id-Deċiżjoni għandha jkollha effett fil-jum tal-pubblikazzjoni tagħha.

---

(1)  ĠU L 344, 28.12.2001, p. 70. Ir-Regolament kif emendat l-aħħar bid-Deċiżjoni 2007/868/KE (ĠU L 340, 22.12.2007, p. 100).

(2)  ĠU L 340, 22.12.2007, p. 100. Id-Deċiżjoni kif emendata l-aħħar bid-Deċiżjoni 2008/343/KE (ĠU L 116, 30.4.2008, p. 25).

(3)  ĠU C 314, 22.12.2007, p. 42.

(4)  Kif emendata bil-Pożizzjoni Komuni tal-Kunsill 2008/346/PESK tad-29 ta’ April 2008 (ĠU L 116, 30.4.2008, p. 53).

(5)  ĠU L 344, 28.12.2001, p. 93.

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/26

---

DEĊIŻJONI TAL-KUNSILL

tal-15 ta’ Lulju 2008

li temenda d-Deċiżjoni 2006/493/KE li tiddeteremina l-ammont ta’ l-appoġġ Komunitarju favur l-iżvilupp rurali għall-perjodu mill-1 ta’ Jannar 2007 sal-31 ta’ Diċembru 2013, it-tqassim annwali tiegħu, kif ukoll l-ammont minimu li għandu jiġi allokat għar-reġjuni eliġibbli skond l-għan ta’ “Konverġenza”

(2008/584/KE)

IL-KUNSILL TA’ L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea,

Wara li kkunsidra r-Regolament tal-Kunsill (KE) Nru 1698/2005 ta’ l-20 ta’ Settembru 2005 dwar l-appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) (1), u b’mod partikolari l-Artikolu 69(1) tiegħu,

Wara li kkunsidra l-proposta tal-Kummissjoni,

Billi:

(1)

Id-Deċiżjoni tal-Kunsill 2006/493/KE (2) tiddeteremina l-ammont ta’ l-appoġġ Komunitarju favur l-iżvilupp rurali għall-perjodu mill-1 ta’ Jannar 2007 sal-31 ta’ Diċembru 2013, it-tqassim annwali tiegħu, kif ukoll l-ammont minimu li għandu jiġi allokat għar-reġjuni eliġibbli skond l-għan ta’ “Konverġenza”.

(2)

Ġaladarba l-Awtorità tal-baġit iddeċidiet li tittrasferixxi ċerti approprijazzjonijiet ta’ impenn mill-appoġġ Komunitarju favur l-iżvilupp rurali skond ir-Regolament (KE) Nru 1698/2005 li ma kinux utilizzati fis-sena 2007, skond id-dispożizzjonijiet tal-punt 48 tal-Ftehim interistituzzjonali bejn il-Parlament Ewropew, il-Kunsill u l-Kummissjoni Ewropea dwar id-dixxiplina baġitarja u l-amministrazzjoni finanzjarja tajba (3), jeħtieġ li d-Deċiżjoni 2006/493/KE tkun emendata biex l-approprijazzjonijiet tallokahom mill-ġdid għall-perjodu mill-1 ta’ Jannar 2008 sal-31 ta’ Diċembru 2013.

(3)	Għaldaqstant id-Deċiżjoni 2006/493/KE għandha tiġi emendata skond dan,

IDDEĊIEDA KIF ĠEJ:

Artikolu 1

L-Anness għad-Deċiżjoni 2006/493/KE għandu jinbidel bit-test fl-Anness għal din id-Deċiżjoni.

Artikolu 2

Din id-Deċiżjoni għandha tapplika mill-1 ta’ Jannar 2008.

---

(1)  ĠU L 277, 21.10.2005, p. 1. Ir-Regolament kif emendat l-aħħar bir-Regolament (KE) Nru 146/2008 (ĠU L 46, 21.2.2008, p. 1).

(2)  ĠU L 195, 15.7.2006, p. 22.

(3)  ĠU C 139, 14.6.2006, p. 1. Il-Ftehim kif emendat l-aħħar bid-deċiżjoni tal-Parlament Ewropew u tal-Kunsill 2008/371/KE (ĠU L 128, 16.5.2008, p. 8).

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/28

---

DEĊIŻJONI TAL-KUMMISSJONI

tas-7 ta’ Lulju 2008

li teżenta l-produzzjoni ta’ l-elettriku fl-Awstrija mill-applikazzjoni tad-Direttiva 2004/17/KE tal-Parlament Ewropew u tal-Kunsill li tikkoordina l-proċeduri ta’ l-akkwisti ta’ l-entitajiet li joperaw fis-setturi tas-servizzi ta’ l-ilma, l-enerġija, it-trasport u tal-posta

(notifikata taħt id-dokument numru C(2008) 3382)

(It-test bil-Ġermaniż biss huwa awtentiku)

(Test b’relevanza għaż-ŻEE)

(2008/585/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva 2004/17/KE tal-Parlament Ewropew u tal-Kunsill tal-31 ta’ Marzu 2004 li tikkoordina l-proċeduri ta’ l-akkwisti ta’ l-entitajiet li joperaw fis-setturi tas-servizzi ta’ l-ilma, l-enerġija, it-trasport u tal-posta (1), u b’mod partikolari l-Artikoli 30(4) u (6) tagħha,

Wara li kkunsidrat it-talba sottomessa mir-Repubblika ta’ l-Awstrija permezz tal-posta elettronika fil-10 ta’ Jannar 2008,

Wara li kkonsultat lill-Kumitat Konsultattiv għall-Kuntratti Pubbliċi,

Billi:

I.   IL-FATTI

(1)

Fl-10 ta’ Jannar 2008, l-Awstrija bagħtet talba skond l-Artikolu 30(4) tad-Direttiva 2004/17/KE lill-Kummissjoni bil-posta elettronika. Fl-4 ta’ Frar 2008, il-Kummissjoni talbet, permezz tal-posta elettronika, għal informazzjoni addizzjonali li, wara proroga ta’ l-iskadenza inizjali, intbagħtet bil-posta elettronika mill-awtoritajiet Awstrijaċi fid-29 ta’ Frar 2008.

(2)	It-talba sottomessa mir-Repubblika ta’ l-Awstrija tikkonċerna l-produzzjoni ta’ l-elettriku.

(3)

It-talba hija akkumpanjata b’ittra mingħand l-awtorità indipendenti nazzjonali, E-Control (Energie-Control GmbH, ir-regolatur tas-swieq Awstrijaċi ta’ l-elettriku u l-gass naturali, li tillimita lilha nnifisha għal dikjarazzjoni li “ma teżisti l-ebda oġġezzjoni kontra eżenzjoni mill-applikazzjoni tal-liġi dwar il-Kuntratti Pubbliċi fil-qasam tal-produzzjoni ta’ l-elettriku.”

II.   IL-QAFAS ĠURIDIKU

(4)

L-Artikolu 30 tad-Direttiva 2004/17/KE jistipula li l-kuntratti maħsuba biex jippermettu t-twettiq ta’ waħda mill-attivitajiet li għalihom tapplika d-Direttiva ma għandhomx ikunu suġġetti għad-Direttiva jekk, fl-Istat Membru li fih titwettaq, l-attività hija esposta direttament għal kompetizzjoni fuq swieq li għalihom l-aċċess m’huwiex ristrett. L-espożizzjoni diretta għall-kompetizzjoni għandha tiġi vvalutat fuq il-bażi ta’ kriterji oġġettivi, waqt li jitqiesu l-karatterisitiċi speċifiċi tas-settur ikkonċernat. L-aċċess jitqis mhux ristrett jekk l-Istat Membru jkun implimenta u applika l-leġiżlazzjoni Komunitarja rilevanti li tiftaħ settur partikolari jew parti minnu. Din il-leġiżlazzjoni hija elenkata fl-Anness XI għad-Direttiva 2004/17/KE, li, fil-qasam ta’ l-elettriku, tirreferi għad-Direttiva 96/92/KE tal-Parlament Ewropew u tal-Kunsill tad-19 ta’ Diċembru 1996 dwar ir-regoli komuni għas-suq intern ta’ l-elettriku (2). Id-Direttiva 96/92/KE ġiet sostitwita bid-Direttiva 2003/54/KE tal-Parlament Ewropew u tal-Kunsill tas-26 ta’ Ġunju 2003 dwar ir-regoli komuni għas-suq intern fil-qasam ta’ l-elettriku u li tħassar id-Direttiva 96/92/KE (3), li tirrikjedi grad saħansitra ogħla ta’ ftuħ tas-suq.

(5)

L-Awstrija implimentat u applikat mhux biss id-Direttiva 96/92/KE iżda wkoll id-Direttiva 2003/54/KE u għażlet is-separazzjoni ġuridika u funzjonali tat-trażmissjoni u tad-distribuzzjoni tan-netwerks għajr għall-iżgħar kumpaniji, li huma eżenti mir-rekwiżiti tas-separazzjoni funzjonali. Konsegwentement, u f’konformità ma’ l-ewwel subparagrafu ta’ l-Artikolu 30(3), l-aċċess għas-suq għandu jiġi kkunsidrat li mhux ristrett.

(6)

L-esponiment dirett għall-kompetizzjoni għandu jiġi evalwat fuq il-bażi ta’ indikaturi varji, li l-ebda wieħed minnhom ma hu deċiżiv fih innifsu. Fir-rigward tas-swieq ikkonċernati b’din id-deċiżjoni, is-sehem tas-suq tal-parteċipanti ewlenin f’suq partikolari jikkostitwixxi kriterju li għandu jitqies. Kriterju ieħor huwa l-livell tal-konċentrazzjoni f’dawk is-swieq. Fid-dawl tal-karatteristiċi tas-swieq ikkonċernati, għandhom jitqiesu kriterji ulterjuri bħalma huma l-funzjonament tas-suq ta’ bilanċ, il-kompetizzjoni fuq il-prezz u l-grad ta’ konsumaturi li jibdlu l-fornituri.

(7)	Din id-Deċiżjoni hija bla ħsara għall-applikazzjoni tar-regoli dwar il-kompetizzjoni.

III.   VALUTAZZJONI

(8)	It-talba sottomessa mill-Awstrija tikkonċerna l-produzzjoni ta’ l-elettriku fl-Awstrija.

(9)

L-Awstrija hija maqsuma fi tliet żoni ta’ bilanċ u waħda minnhom tesperjenza punti ta’ konġestjoni interna (iż-żona ta’ bilanċ APG fejn tista’ tinħoloq konġestjoni bejn iż-żoni ta’ Vjenna u Graz, interkonnessi bl-hekk imsejjaħ “Steirmarkleitung”). Għalhekk tista’ titqajjem il-mistoqsija jekk is-suq ġeografiku jkunx iżgħar minn dak nazzjonali (4). Madanakollu, skond l-informazzjoni disponibbli, fil-biċċa l-kbira tal-każi l-effett ta’ dawn il-punti ta’ konġestjoni interni jissolvew bl-applikazzjoni ta’ miżuri tekniċi bħall-applikazzjoni phase shifters biex jikkontrollaw il-kapaċità tat-trażmissjoni. Fi ftit każijiet jista’ jkun meħtieġ li jintużaw impjanti ta’ l-enerġija addizzjonali biex jistabbilizzaw in-netwerk. Meta dawn il-punti ta’ konġestjoni interni jkunu jeħtieġu li l-produtturi tat-Tramuntana ta’ l-Awstrija jnaqqsu l-ġenerazzjoni tal-kapaċità tagħhom, xi ħaġa li skond l-awtoritajiet Awstrijaċi isseħħ b’mod eċċezzjonali, dawn il-produtturi jitħallsu għall-ħsara mill-operatur tan-netwerk. Barra minn hekk, ma hemm l-ebda punti ta’ konġestjoni bejn din iż-żona ta’ bilanċ u ż-żewġ żoni ta’ bilanċ l-oħrajn Awstrijaċi, l-anqas bejn iż-żona ta’ bilanċ APG u l-Ġermanja. L-effett tal-punti ta’ konġestjoni interni huma għalhekk, skond l-informazzjoni disponibbli, mhux sinifikanti f’termini ta’ forniment ta’ l-enerġija u l-kompetizzjoni. In-nuqqas ta’ konġestjoni fil-konnessjonijiet mal-Ġermanja qajmet il-mistoqsija jekk jistax jeżisti suq ġeografiku li jkopri dawn iż-żewġ pajjiżi, li l-Kummissjoni kkonkludiet li mhux il-każ (5). Konsegwentament, it-territorju tar-Repubblika ta’ l-Awstrija għandu jitqies li jikkosistwixxi suq rilevanti għall-għanijiet ta’ l-evalwazzjoni tal-kundizzjonijiet stabbiliti fl-Artikolu 30(1) tad-Direttiva 2004/17/KE, għalkemm ma jistax jitqies li huwa iżolat mill-pajjiżi ta’ madwaru.

(10)

Fil-Komunikazzjoni mill-Kummissjoni lill-Kunsill u lill-Parlament Ewropew: Ir-rapport dwar il-progress fil-ħolqien tas-suq intern tal-gass u l-elettriku (6), minn issa ‘l quddiem imsejjaħ ir-“Rapport ta’ l-2005”, jistqarr li “ħafna swieq nazzjonali juru grad għoli ta’ konċentrazzjoni ta’ l-industrija, li jtellef l-iżvilupp ta’ kompetizzjoni effettiva” (7). Minħabba dan, huwa kkunsidrat li, fir-rigward tal-produzzjoni ta’ l-elettriku, “wieħed mill-indikaturi tal-grad tal-kompetizzjoni fis-swieq nazzjonali huwa s-sehem totali tas-suq ta’ l-ikbar tliet produtturi” (8). Għall-2006, is-sehem tat-tliet l-ikbar produtturi ġie indikat li huwa 52.2 fid-Dokument ta’ Ħidma għall-Istaff tal-Kummissjoni tal-15 ta’ April 2008, SEC(2008) 460 (9). Madanakollu, l-Awstrija għandha esportazzjoni u importazzjoni ta’ l-elettriku sostanzjali, fl-2005 fi kwantitajiet ta’ iktar minn 17 500 GWh f’esportazzjoni u minn 20 000 GWh f’importazzjoni. Għalhekk hija pajjiż importatur nett u l-elettriku importat jgħodd bejn wieħed u ieħor għal kwart (10) tal-bżonnijiet kollha tagħha (11), b’mod partikulari għall-enerġija ta’ tagħbija bażi. Hemm għalhekk ċertu grad ta’ restrizzjoni fiċ-ċaqliq tal-prezzijiet minn naħa tal-produtturi ewlenien Awstrijaċi minħabba l-importazzjoni ta’ l-elettriku minn barra t-territorju Awstrijak u b’riżultat l-investiment fis-settru ta’ l-elettriku fit-territorju Awstrijak iqies il-produtturi l-oħrajn fil-pajjiżi tal-madwar, b’mod partikulari fil-Ġermanja. Dawn il-fatturi għandhom għalhekk jittieħdu bħala indikazzjoni ta’ ċertu grad ta’ esponiment dirett għall-kompetizzjoni fejn tidħol il-produzzjoni ta’ l-elettriku.

(11)

Barra minn hekk, anke jekk tirrapreżenta parti żgħira mill-ammont totali ta’ l-elettriku prodott u/jew ikkunsmat fi Stat Membru, il-funzjoni tas-swieq ta’ bilanċ xorta għandha tkun meqjusa bħala indikatur ieħor. Fil-fatt, “kull parteċipant tas-suq li ma jsibhiex faċli li jqabbel il-portafoll tal-produzzjoni tiegħu mal-karatteristiċi tal-klijenti tiegħu jista’ jsib ruħu espost għad-differenza bejn il-prezz li bih l-operatur tas-sistemi ta’ trażmissjoni [TSO - transmission system operator] ibigħ l-enerġija minħabba żbilanċ, u l-prezz li bih jixtri lura l-produzzjoni żejda. Dawn il-prezzijiet jistgħu jkunu imposti direttament mir-regolatur tat-TSO; jew inkella jintuża mekkaniżmu abbażi tas-suq, li fih il-prezz huwa ddeterminat minn offerti li jkunu għamlu produtturi oħra biex jirregolaw il-produzzjoni tagħhom ‘il fuq jew ‘l isfel […]. Diffikultà ewlenija għall-parteċipanti żgħar titfaċċa meta jkun hemm riskju ta’ differenza kbira bejn il-prezz tax-xiri mit-TSO u l-prezz tal-bejgħ. Dan jiġri f’għadd ta’ Stati Membri u x’aktarx ikun ta’ xkiel għall-iżvilupp tal-kompetizzjoni. Differenza kbira tista’ tindika livell insuffiċjenti ta’ kompetizzjoni fis-suq ta’ bilanċ li jista’ jkun iddominat minn produttur wieħed jew tnejn biss.” (12) Is-suq ta’ bilanċ Awstrijak u l-karatteristiċi ewlenin tiegħu - b’mod partikulari l-ipprezzar abbażi tas-suq u d-differenza relattivament żgħira (13) bejn il-prezz tax-xiri mit-TSO u l-prezz tal-bejgħ – huma tali li għandhom jittieħdu bħala indikaturi oħrajn li l-produzzjoni ta’ l-elettriku hija esposta direttament għall-kompetizzjoni.

(12)

Minħabba l-karatteristiċi tal-prodott ikkonċernat (l-elettriku) u l-iskarsezza jew l-indisponibilità ta’ prodotti jew servizzi sostitwibbli adegwati, il-kompetizzjoni fil-prezzijiet u l-formazzjoni tal-prezzijiet jassumu importanza akbar fil-valutazzjoni tal-grad ta’ kompetizzjoni tas-swieq ta’ l-elettriku. Fir-rigward ta’ l-utenti industrijali kbar(finali), li huma l-aktar suġġetti li jixtru l-elettriku tagħhom direttament mingħand il-fornituri li huma wkoll produtturi, l-għadd ta’ konsumaturi li jibdlu l-fornitur jista’ sservi bħala indikatur għall-kompetizzjoni tal-prezz u b’hekk, indirettament, “indikatur naturali għall-effettività tal-kompetizzjoni. Jekk dan in-numru huwa baxx, x’aktarx li hemm problema ta’ funzjonament tas-suq, anki jekk il-benefiċċji mill-possibilità ta’ negozjar mill-ġdid mal-fornitur storiku ma għandhomx jiġu imwarrba” (14). Barra minn hekk, “l-eżistenza ta’ prezzijiet regolati għall-utenti finali hija bla dubju fattur determinanti ta’ l-imġiba ta’ l-klijenti[…]. Għalkemm iż-żamma tal-kontrolli tista’ tiġi ġġustifikata waqt perjodu ta’ tranżizzjoni, dawn ser jikkawżaw dejjem aktar tagħwiġ meta toqrob il-ħtieġa għall-investiment” (15).

(13)

Skond l-aħħar dejta disponibbli, r-rati ta’ bdil huma ta’ 41,5 % għall-klijenti industrijali kbar u kbar ħafna fl-Awstrija (16). Barra minn dan, fl-Awstrija ma jeżistix kontroll tal-prezzijiet għall-utenti finali (17), fi kliem ieħor, il-prezzijiet huma stabbiliti mill-operaturi ekonomiċi nfushom u ma huwa meħtieġ li jiġu approvati minn l-ebda awtorità qabel ma jiġu applikati. Is-sitwazzjoni fl-Awstrija hi għalhekk sodisfaċenti sa fejn jidħlu l-bdil tal-fornitur mill-utenti (finali) industrijali kbar u kbar ħafna u l-kontroll tal-prezz għall-utenti finali u għandha titqies bħala indikatur ta’ l-esponiment dirett għall-kompetizzjoni.

IV.   KONKLUŻJONIJIET

(14)	Fid-dawl tal-fatturi eżaminati fil-premessi (9) sa (13), il-kundizzjoni ta’ l-esponiment dirett għall-kompetizzjoni stabbilita fl-Artikolu 30(1) tad-Direttiva 2004/17/KE għandha titqies li ntlaħqet fir-rigward tal-produzzjoni ta’ l-elettriku fl-Awstrija.

(15)

Barra minn hekk, ġaladarba l-kundizzjoni ta’ aċċess għas-suq mingħajr restrizzjonijiet titqies li ntlaħqet, id-Direttiva 2004/17/KE ma għandhiex tapplika meta entitajiet kontraenti jagħtu kuntratti maħsuba biex jippermettu l-produzzjoni ta’ l-elettriku fl-Awstrija, u lanqas meta jorganizzaw kompetizzjonijiet ta’ disinn sabiex jintlaħaq l-għan ta’ attività bħal din fl-Awstrija.

(16)

Din id-Deċiżjoni hi bbażata fuq is-sitwazzjoni tad-dritt u tal-fatt minn Jannar sa Frar 2008 kif tidher mill-informazzjoni sottomessa mir-Repubblika ta’ l-Awstrija, mir-Rapport ta’ l-2005 u mill-Anness Tekniku tiegħu, mill-Komunikazzjoni ta’ l-2007 u mid-Dokument ta’ l-Istaff ta’ l-2007 kif ukoll mir-Rapport Finali. Din tista’ tiġi riveduta jekk, wara tibdiliet sinifikanti tas-sitwazzjoni tad-dritt jew tal-fatt, il-kundizzjonijiet ta’ l-applikabilità ta’ l-Artikolu 30(1) tad-Direttiva 2004/17/KE ma jibqgħux rispettati.

ADOTTAT DIN ID-DEĊIŻJONI:

Artikolu 1

Id-Direttiva 2004/17/KE ma għandhiex tapplika għall-kuntratti mogħtija minn entitajiet kontraenti u maħsuba biex jippermettulhom jipproduċu l-elettriku fl-Awstrija.

Artikolu 2

Din id-Deċiżjoni hija indirizzata lir-Repubblika ta’ l-Awstrija.

---

(1)  ĠU L 134, 30.4.2004, p. 1. Id-Direttiva kif emendata l-aħħar bir-Regolament tal-Kummissjoni (KE) Nru 213/2008 (ĠU L 74, 15.3.2008, p. 1).

(2)  ĠU L 27, 30.1.1997, p. 20.

(3)  ĠU L 176, 15.7.2003, p. 37. Id-Direttiva kif emendata l-aħħar bid-Direttiva 2008/3/KE (ĠU L 17, 22.1.2008, p. 6).

(4)  Ara COM(2006) 851 finali ta’ 10.1.2007: Komunikazzjoni mill-Kummissjoni: Inkjesta skond l-Artikolu 17 tar-Regolament (KE) Nru 1/2003 fis-setturi Ewropej tal-gass u ta’ l-elettriku, minn hawn ‘il quddiem imsejjaħ “Rapport Finali”, Anness B, punt A1, 2).

(5)  Ara r-Rapport Finali, Anness B, punt A2, 7

(6)  COM(2005) 568 finali, 15.11.2005.

(7)  Ir-Rapport ta’ l-2005, p. 2.

(8)  Ara r-Rapport ta’ l-2005, p. 7.

(9)  Tabella 6 “Pożizzjoni tas-Suq bl-Ingrossa 2006”, p 12 tad-“Dokument ta’ Ħidma għall-Istaff tal-Kummissjoni: Dokument li jakkompanja ir-Rapport dwar il-Progress fil-Ħolqien tas-Suq Intern tal-Gass u l-Elettriku”, COM(2008) 192 finali tal-15.4.2008.

(10)  23.5 % skond l-informazzjoni mogħtija mill-awtoritajiet Awstrijaċi.

(11)  jiġifieri l-kwantità ta’ l-elettriku meħtieġa għall-konsum intern u l-esportazzjoni.

(12)  Dokument ta’ Ħidma għall-Istaff tal-Kummissjoni, Anness Teknilu għar-Rapport ta’ l-2005, SEC(2005)1448, minn hawn il-quddiem “l-Anness Tekniku”, p. 67–68.

(13)  Skond ir-Rapport Finali, paragrafu 993, tabella 52, is-suq ta’ bilanċ Awstrijak jaħdem b’differenza ta’ 27, li tpoġġih fl-iżgħar nofs għax id-differenza fis-swieq ta’ bilanċ fl-UE tvarja bejn 0 u 79. Din l-analiżi tħares lejn l-effetti tal-funzjoni tas-suq ta’ bilanċ fuq il-produzzjoni ta’ l-elettriku u mhux lejn il-grad ta’ kompetizzjoni fis-suq ta’ bilanċ innifsu. Għalhekk, għal dan l-għan mhux importanti jekk differenza żgħira hija kkawżata mill-kompetizzjoni jew mit-trażżin tal-prezz impost mir-regolatur, l-istess kif il-konċentrazzjoni għolja fuq is-suq ta’ bilanċ mhix pertinenti għal din l-analiżi.

(14)  Ir-Rapport ta’ l-2005, p. 9.

(15)  L-Anness Tekniku, p. 17.

(16)  Ara d-dokument bl-isem “Awstrija – Skeda informattiva dwar is-Suq Intern”, ippubblikat f’ http://ec.europa.eu/energy/energy_policy/doc/factsheets/market/market_at_en.pdf, li juża informazzjoni mingħand l-Energie-Control GmbH, 2007.

(17)  L-Anness Tekniku, p. 107.

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/32

---

It-testi oriġinali UN/ECE biss għandhom effett legali skond id-dritt pubbliku internazzjonali. L-istat u d-data ta’ dħul fis-seħħ ta’ dan ir-Regolament għandhom jiġu ċċekkjati fl-aħħar verżjoni tad-dokument ta’ l-istat UN/ECE TRANS/WP.29/343, disponibbli fuq: http://www.unece.org/trans/main/wp29/wp29wgs/wp29gen/wp29fdocstts.html

Regolament Nru 21 tal-Kummissjoni Ekonomika għall-Ewropa tan-Nazzjonijiet Uniti (UN/ECE) – Dispożizzjonijiet uniformi dwar l-approvazzjoni ta’ vetturi fir-rigward tat-tagħmir intern tagħhom

Li jinkorpora fih it-test validu kollu sa:

Is-Suppliment 3 għas-sensiela ta’ emendi 01 – Data ta’ dħul fis-seħħ: 31 ta’ Jannar 2003

1.   AMBITU

Dan ir-regolament japplika għat-tagħmir intern ta’ karozzi tal-passiġġieri fir-rigward ta’:

1.1	il-partijiet interni tal-kumpartiment tal-passiġġieri minbarra l-mera jew mirja li turi/juru x’hemm wara:

1.2	l-arranġament tal-kontrolli;

1.3	is-saqaf jew is-saqaf li jinfetaħ, u

1.4	id-dahar tas-sit u l-partijiet ta’ wara tas-sits.

1.5	tħaddim motorizzat tat-twieqi, pannelli tas-saqaf u sistemi ta’ taqsim.

2.   DEFINIZZJONIJIET

Għall-għanijiet ta’ dan ir-Regolament

2.1.	“approvazzjoni ta’ vettura” tfisser l-approvazzjoni ta’ tip ta’ vettura fir-rigward tat-tagħmir intern tagħha;

2.2.

“tip ta’ vettura” fir-rigward tat-tagħmir intern tal-kumpartiment tal-passiġġieri tfisser vetturi ta’ kategorija M1 li ma jvarjawx f’aspetti essenzjali bħal: 2.2.1. il-linji tal-materjali kostitwenti tal-bini ta’ bòdi tal-kumpartiment tal-passiġġieri, 2.2.2. l-arranġament tal-kontrolli; 2.2.3. ir-rendiment tas-sistema ta’ protezzjoni, jekk iż-żona ta’ riferenza ġewwa ż-żona ta’ impatt tar-ras ikkalkulata skond Anness VIII (evalwazzjoni dinamika) hija magħżula mill-applikant. 2.2.3.1. Vetturi li jvarjaw biss fir-rigward tar-rendiment tas-sistema(i) ta’ protezzjoni jiffurmaw parti mill-istess tip ta’ vettura jekk joffru protezzjoni ndaqs jew aħjar għall-okkupanti meta mqabbla mas-sistema jew vettura sottomessa lis-servizz tekniku responsabbli mit-twettiq tat-testijiet ta’ approvazzjoni.

2.3.

“żona ta’ riferenza” hija ż-żona ta’ impatt tar-ras kif definita f’Anness I għal dan ir-Regolament jew, jekk il-manifattur hekk jixtieq, skond Anness VIII, minbarra l-erjas li ġejjin: (ara Anness X, noti ta’ spjegazzjoni, paragrafi 2.3. u 2.3.1.) 2.3.1. l-erja konfinata mill-projezzjoni orizzontali ’l quddiem ta’ ċirku li jdawwar il-limiti ta’ barra tal-kontroll ta’ l-istering, miżjud bi strixxa periferali wiesgħa 127 mm; din l-erja hija konfinata minn isfel bil-pjan tanġenzjali orizzontali mat-tarf t’isfel tal-kontroll ta’ l-istering meta dan huwa fil-pożizzjoni ta’ sewqan bi dritt ’il quddiem. (ara Anness X, noti ta’ spjegazzjoni, paragrafi 2.3. u 2.3.1.); 2.3.2. il-parti tal-wiċċ tal-pannell ta’ l-istrumenti li jinsab bejn it-tarf ta’ l-erja speċifikata f’paragrafu 2.3.1. ta’ hawn fuq u l-eqreb ġenb ta’ ġewwa tal-vettura; din il-parti tal-wiċċ hija konfinata minn isfel bil-pjan tanġenzjali orizzontali mat-tarf t’isfel tal-kontroll ta’ l-istering; u (ara Anness X, noti ta’ spjegazzjoni, paragrafi 2.3. u 2.3.1.) 2.3.3. il-pilastri tal-ġnub tal-windskrin; (ara Anness X, noti ta’ spjegazzjoni, paragrafi 2.3. u 2.3.1.)

2.4.	“livell tal-pannell ta’ l-istrumenti” tfisser il-linja definita mill-punti ta’ kuntatt ta’ tanġenti vertikali għall-pannell ta’ l-istrument; (ara Anness X, noti ta’ spjegazzjoni; paragrafu 2.4.)

2.5.	“saqaf” tfisser il-parti ta’ fuq tal-vettura li tibda mit-tarf ta’ fuq tal-windskrin sat-tarf ta’ fuq tat-tieqa ta’ wara u konfinanti fuq il-ġnub bil-qafas ta’ fuq tal-ġnub; (ara Anness X, noti ta’ spjegazzjoni, paragrafu 2.5)

2.6.	“linja ta’ ċinga” tfisser il-linja magħmula mill-kontorn trasparenti t’isfel tat-twieqi tal-ġenb tal-vettura;

2.7.

“karozza b’saqaf li jista’ jitneħħa” tfisser vettura li, f’xi qagħdiet, ma jkun hemm l-ebda parti riġida tal-bòdi tal-vettura ’l-fuq mil-linja ta’ ċinga minbarra l-partijiet ta’ quddiem li jsostnu s-saqaf u/jew l-istruttura ta’ sigurtà għal meta tinqaleb il-vettura u/jew punti ta’ ankraġġ taċ-ċinturini tas-sit; (ara Anness X, noti ta’ spjegazzjoni, paragrafi 2.5. u 2.7.)

2.8.	“vettura b’saqaf li jinfetaħ” tfisser vettura li s-saqaf tagħha biss jew parti minnu jista’ jintena lura jew jinfetaħ, jew jista’ jiżżerżaq u jħalli l-elementi strutturali tal-vettura li jeżistu ’l fuq mill-linja ta’ ċinga (ara Anness X, noti ta’ spjegazzjoni, paragrafi 2.5.);

2.9	“sit li jintena (tip-up)” tfisser sit awżiljarju maħsub għal użu mhux ta’ spiss u li normalment jintena biex ma jkunx fin-nofs.

2.10.

“Sistema protettiva” tfisser tagħmir intern u strumenti maħsuba biex irażżnu lill-okkupanti.

2.11.

“Tip ta’ sistema ta’ protezzjoni”, tfisser kategorija ta’ strumenti ta’ protezzjoni li ma jvarjawx f’aspetti essenzjali bħal: 2.11.1. it-teknoloġija tagħhom; 2.11.2. il-ġeometrija tagħhom; 2.11.3. il-materjali li jsawruhom.

2.12.

“Twieqi motorizzati” tfisser twieqi li jingħalqu permezz tal-provvista ta’ enerġija tal-vettura.

2.13.

“Sistemi ta’ pannelli tas-saqaf motorizzati” tfisser pannelli li jiċċaqalqu fis-saqaf tal-vettura li jingħalqu permezz ta’ provvista ta’ l-enerġija tal-vettura jew b’moviment ta’ żerżiq u/jew ta’ qlib, u li ma tinkludix sistemi ta’ saqaf li jinfetaħ.

2.14.

“Sistemi ta’ taqsim motorizzati” tfisser sistemi li jaqsmu lill-kumpartiment ta’ karozza privata f’almenu żewġ partijiet u li jingħalqu permezz tal-provvista ta’ l-enerġija tal-vettura.

2.15.

“Ftuħ” huwa l-ftuħ massimu mingħajr tfixkil bejn it-tarf ta’ fuq u t-tarf ta’ quddiem, li jiddependi fuq id-direzzjoni ta’ għeluq, ta’ tieqa motorizzata jew taqsima jew pannell ta’ saqaf u l-istruttura tal-vettura li tifforma l-konfini tat-tieqa, partizzjoni jew pannell tas-saqaf, meta jidher minn ġol-vettura jew, fil-każ ta’ sistema ta’ taqsim, mill-parti ta’ wara tal-kumpartiment tal-passiġġieri. Sabiex tkejjel ftuħ, virga ċilindrika ta’ test għandha (mingħajr ma ssir forza) titqiegħed minn ġo fih, normalment b’mod perpendikulari mat-tarf tat-tieqa, pannell tas-saqaf jew taqsima u b’mod perpendikulari mad-direzzjoni ta’ għeluq kif muri f’Figura 1 ta’ Anness IX, minn ġew sa barra tal-vettura jew, kif applikabbli, mill-parti ta’ wara tal-kumpartiment tal-passiġġieri.

2.16.

“Ċavetta” 2.16.1. “Ċavetta ta’ startjar” tfisser l-istrument li jħaddem il-provvista ta’ l-enerġija elettrika meħtieġ sabiex iħaddem il-magna jew mutur tal-vettura. Din id-definizzjoni ma teskludix strument li mhux mekkaniku. 2.16.2. “Ċavetta ta’ l-elettriku” tfisser l-istrument li jħalli l-elettriku jiġi fornit lis-sistemi elettriċi tal-vettura. Din iċ-ċavetta tista’ tkun ukoll ċavetta li tistartja magna tal-karozza. Din id-definizzjoni ma teskludix strument li mhux mekkaniku.

2.17.

“Airbag” tfisser strument stallat sabiex jikkumplimenta ċinturini ta’ sigurtà u sistemi ta’ trażżin f’vettura motorizzati, jiġifieri sistemi li f’każ ta’ impatt qawwi li jaffettwa l-vettura awtomatikament jiftħu struttura flessibbli maħsuba biex tnaqqas, permezz tal-kompressjoni tal-gass ta’ ġo fiha, is-severità tal-kuntatti ta’ parti jew iktar ta’ l-okkupant tal-vettura man-naħa ta’ ġewwa tal-kumpartiment tal-passiġġieri.

2.18.

“Tarf li jaqta’” hu tarf ta’ materjal riġidu li għandu radius ta’ kurvatura ta’ anqas minn 2,5 mm minbarra fil-każ ta’ projezzjonijiet ta’ inqas minn 3,2 mm, imkejla mill-pannell skond il-proċedura deskritta f’paragrafu 1 ta’ Anness VI. F’dan il-każ, ir-radius minimu ta’ kurvatura ma għandux japplika sakemm l-għoli tal-projezzjoni mhux aktar minn nofs il-wisa’ tagħha u t-truf tagħha ma jaqtgħux (ara Anness X, noti ta’ spjegazzjoni, paragrafu 2.18.)

3.   APPLIKAZZJONI GĦAL APPROVAZZJONI

3.1.   L-applikazzjoni għal approvazzjoni ta’ tip ta’ vettura fir-rigward tat-tagħmir intern tagħha għandha tiġi sottomessa mill-manifattur tal-vettura jew mir-rappreżentant tiegħu debitament akkreditat.

3.2.   Għandha tkun akkumpanjata minn tliet kopji tad-dokumenti msemmija hawn taħt u mid-dettalji li ġejjin:

deskrizzjoni dettaljata tat-tip ta’ vettura fir-rigward ta’ l-oġġetti msemmija f’paragrafu 2.2 ta’ hawn fuq, akkumpanjata b’ritratt jew b’disinn ta’ l-elementi individwali tal-kumpartiment tal-passiġġieri. In-numri u/jew is-simboli li jidentifikaw it-tip ta’ vettura għandhom jiġu speċifikati.

3.3.   Dawn li ġejjin għandhom jiġu sottomessi lis-servizz tekniku responsabbli mit-twettiq tat-testijiet ta’ approvazzjoni:

3.3.1.

fid-diskrezzjoni tal-manifattur, jew vettura li tirrappreżenta t-tip ta’ vettura li għandha tiġi approvata jew il-parti jew il-partijiet tal-vettura meqjusa essenzjali għal kontrolli jew testijiet stabbiliti minn dan ir-Regolament;

3.3.2.

fuq talba tas-servizz tekniku msemmi hawn fuq, xi komponenti u xi kampjuni tal-materjali wżati.

4.   APPROVAZZJONI

4.1.   Jekk il-vettura sottomessa għal approvazzjoni skond dan ir-Regolament tissodisfa r-rekwiżiti ta’ paragrafu 5 ta’ hawn fuq, għandha tingħata approvazzjoni ta’ dak it-tip ta’ vettura.

4.2.   Numru ta’ approvazzjoni għandu jiġi assenjat għal kull tip approvat. L-ewwel żewġ ċifri tiegħu (fil-preżent 01 li jikkorispondi għas-serje ta’ emendi 01 li daħlet fis-seħħ nhar is-26 ta’ April 1986) għandhom jindikaw is-serje ta’ emendi li jinkorporaw l-iktar emendi tekniċi riċenti prinċipali magħmula lir-Regolament fil-waqt ta’ l-għoti ta’ l-approvazzjoni. L-istess Parti Kontraenti ma għandhiex tassenja l-istess numru lil tip ieħor ta’ vettura.

4.3.   Avviż ta’ approvazzjoni jew ta’ estensjoni jew ta’ ċaħda jew ta’ rtirar ta’ approvazzjoni jew produzzjoni definittivament imwaqqfa jew ta’ tip ta’ vettura skond dan ir-Regolament għandu jiġi mgħarraf lill-Partijiet ta’ dan il-Ftehim li japplikaw dan ir-Regolament permezz ta’ formula li taqbel mal-mudell f’Anness II ta’ dan ir-Regolament.

4.4.   Għandu jitwaħħal, b’mod li jidher u f’post li jintlaħaq malajr u li jiġi speċifikat fuq il-formula ta’ approvazzjoni, lil kull vettura li taqbel ma’ tip ta’ vettura approvata taħt dan ir-Regolament, marka ta’ approvazzjoni internazzjonali li tikkonsisti fi:

4.4.1.

ċirku madwar l-ittra “E” segwita bin-numru li jiddistingwi l-pajjiż li ta l-approvazzjoni (1);

4.4.2.

in-numru ta’ dan ir-Regolament, segwit bl-ittra “R”, sing u n-numru ta’ approvazzjoni fuq il-lemin taċ-ċirku stabbilit f’paragrafu 4.4.1. ta’ hawn fuq

4.5.   Jekk il-vettura tkun konformi ma’ tip ta’ vettura approvat, taħt Regolament ieħor jew Regolamenti oħrajn annessi ma’ dan il-Ftehim, fil-pajjiż li ta l-approvazzjoni taħt dan ir-Regolament, is-simbolu stabbilit f’paragrafu 4.4.1. ma għandux għalfejn jiġi ripetut; f’każ bħal dan ir-Regolament u numri ta’ approvazzjoni u s-simboli l-oħrajn tar-Regolamenti kollha li taħthom ingħatat approvazzjoni fil-pajjiż li ta l-approvazzjoni taħt dan ir-Regolament għandhom jitqiegħdu f’kolonni vertikali fuq il-lemin tas-simbolu stabbilit f’paragrafu 4.4.1. ta’ hawn fuq

4.6.   Il-marka ta’ approvazzjoni għandha tkun tista’ tinqara b’mod ċar u li ma titħassarx.

4.7.   Il-marka ta’ approvazzjoni għandha titqiegħed qrib jew fuq il-pjanċa ta’ data tal-vettura mwaħħla mill-manifattur.

4.8   Anness III ta’ dan ir-Regolament jagħti eżempji ta’ pożizzjoni tal-marki ta’ approvazzjoni.

5.   REKWIŻITI

5.1.   Il-partijiet interni ta’ quddiem tal-kumpartiment tal-passiġġieri ’l fuq mill-livell tal-pannell ta’ l-istrumenti quddiem il-punti “H” tas-sit ta’ quddiem, li jeskludu l-bibien tal-ġnub

5.1.1.   Iż-żona ta’ riferenza definita f’paragrafu 2.3 ta’ hawn fuq ma jistax ikun fiha xi partijiet ħarxa b’mod perikoluż jew truf li jaqtgħu li aktarx iżidu r-riskju ta’ korriment serju lill-okkupanti. Jekk l-erja ta’ l-impatt tar-ras tiġi determinata skond Anness I, il-partijiet li għalihom issir riferenza f’paragrafi 5.1.2. sa 5.1.6. ta’ hawn taħt għandhom jitqiesu sodisfaċenti jekk jaqblu mar-rekwiżiti ta’ dawn il-paragrafi. Jekk l-erja ta’ l-impatt tar-ras hija determinata skond Anness VIII, għandhom japplikaw ir-rekwiżiti ta’ paragrafu 5.1.7. (ara Anness X, noti ta’ spjegazzjoni, paragrafu 5.1.1.).

5.1.2.   Partijiet tal-vettura fiż-żona ta’ riferenza minbarra dawk li mhumiex parti mill-pannell ta’ l-istrumenti u li huma mqiegħda f’anqas minn 10 ċm mill-uċuħ miksija bil-ħġieġ għandhom ikunu b’mod li tintilef l-enerġija kif stabbilit f’Anness IV ta’ dan ir-Regolament. Dawk il-partijiet fiż-żona ta’ riferenza li jissodisfaw iż-żewġ kundizzjonijiet li ġejjin ma għandhomx jiġu kkunsidrati jekk: (ara Anness X, noti ta’ spjegazzjoni, paragrafu 5.1.2.)

5.1.2.1.

matul test skond ir-rekwiżiti ta’ Anness IV ta’ dan ir-Regolament, il-pendlu jagħmel kuntatt mal-partijiet li qegħdin barra ż-żona ta’ riferenza; u

5.1.2.2.

u l-partijiet li se jiġi ttestjati huma mqiegħda anqas minn 10 ċm ’il bogħod mill-partijiet li jintmissu barra miż-żona ta’ riferenza. Din id-distanza għandha titkejjel fuq il-wiċċ taż-żona ta’ riferenza; l-ebda tagħmir ta’ sostenn tal-metall ma għandu jkollu truf li joħorġu ’l barra.

5.1.3.   It-tarf ta’ isfel tal-pannell ta’ l-istrumenti għandu, sakemm ma jissodisfax ir-rekwiżi ta’ paragrafu 5.1.2 ta’ hawn taħt, jiġi ttundjat għal radius ta’ kurvatura ta’ mhux inqas minn 19-il mm. (ara Anness X, noti ta’ spjegazzjoni, paragrafu 5.1.3.)

5.1.4.   Swiċċijiet, pumijiet ta’ ġbid u oġġetti simili, magħmulin minn materjal riġidu, li, jekk imkejla skond il-metodu stabbilit f’Anness VI, huma minn 3,2 mm sa 9,5 mm ’il barra mill-pannell, għandu jkollhom erja trasversali ta’ mhux anqas minn 2 ċm2, 2,5 mm imkejla mill-punt li joħroġ l-aktar ’il barra, u għandu jkollhom t-truf ittundjati b’radius ta’ kurvatura ta’ mhux anqas minn 2,5 mm. (ara Anness X, noti ta’ spjegazzjoni, paragrafu 5.1.4.)

5.1.5.   Jekk dawn il-komponenti joħorġu ’l barra b’aktar minn 9,5 mm mill-wiċċ tal-pannell ta’ l-istrumenti, għandhom ikunu ddisinjati u mibnija b’mod li jkunu kapaċi, taħt effett ta’ qawwa orizzontali lonġitudinali ta’ 37,8 daN imwassla b’pistun b’tarf ċatt ta’ dijametru ta’ mhux aktar minn 50 mm, jew biex jerġgħu jidħlu ġol-wiċċ tal-pannell sakemm ma joħorġux aktar ’il barra b’aktar minn 9,5 mm jew jinqalgħu; fil-każ ta’ dan ta’ l-aħħar, ma għandha tibqa’ l-ebda projezzjoni perikoluża ta’ aktar minn 9,5 mm; sezzjoni trasversali ta’ mhux aktar minn 6,5 mill-punt ta’ projezzjoni massima ma għandux ikollha erja ta’ inqas minn 6,5 ċm2. (ara Anness X, noti ta’mm spjegazzjoni, paragrafu 5.1.5.)

5.1.6.   Fil-każ ta’ projezzjoni li tinkludi komponent magħmul minn materjal li mhux riġidu b’ebusija ta’ anqas minn 50 shore A mmuntat fuq sostenn riġidu, ir-rekwiżiti ta’ paragrafi 5.1.4. u 5.1.5. għandhom japplikaw biss għas-sostenn riġidu jew għandu jintwera permezz ta’ testijiet biżżejjed skond il-proċedura deskritta f’Anness IV li l-materjal artab b’ebusija ta’ anqas minn 50 shore A ma jinqatax biex jibqa’ imiss mas-sostenn matul it-test ta’ impatt speċifikat. F’dak il-każ ir-rekwiżiti tar-radius ma japplikawx (ara Anness X, noti ta’ spjegazzjoni, paragrafi 5.1.6.)

5.1.7.   Il-paragrafi li ġejjin għandhom japplikaw:

5.1.7.1.

Jekk is-sistema ta’ protezzjoni tat-tip ta’ vettura ma timpedixxix il-kuntatti tar-ras ta’ l-okkupanti definiti f’paragrafu 1.2.1. ta’ Anness VIII mal-pannell ta’ l-istrumenti, u żona dinamika ta’ riferenza skond Anness VIII hija determinata, ir-rekwiżiti ta’ paragrafi 5.1.2. sa 5.1.6. huma applikabbli biss għall-partijiet li jinsabu f’dik iż-żona. Partijiet ta’ erjas oħra tad-daxxbord fuq il-livell tal-pannell ta’ l-istrumenti, jekk jintmissu bi sfera ta’ 165 mm, għallinqas għandhom ikunu b’tali mod li ma jaqtgħux.

5.1.7.2.

Jekk is-sistema ta’ protezzjoni tat-tip ta’ vettura hija kapaċi timpedixxi l-kuntatti tar-ras ta’ l-okkupanti definiti f’paragrafu 1.2.1. ta’ Anness VIII mal-pannell ta’ l-istrumenti, u għalhekk ma tistax tiġi determinata ebda żona ta’ riferenza, ir-rekwiżiti ta’ paragrafi 5.1.2. sa 5.1.6. mhumiex applikabbli għal dan it-tip ta’ vettura. Partijiet tad-daxxbord fuq il-livell tal-pannell ta’ l-istrumenti, jekk jintmissu bi sfera ta’ 165 mm, għallinqas għandhom ikunu b’tali mod li ma jaqtgħux.

5.2.   Il-partijiet ta’ ġewwa ta’ quddiem tal-kumpartiment tal-passiġġieri taħt il-livell tal-pannell ta’ l-istrumenti quddiem il-punti “H” tas-sit ta’ quddiem, li jeskludu l-bibien tal-ġnub u l-pedali

5.2.1.   Minbarra l-pedali u t-tagħmir tagħhom u dawk il-komponenti li ma jistgħux jintmissu bl-istrument deskritt f’Anness VII ta’ dan ir-Regolament u wżati skond il-proċedura deskritta hemmhekk, komponenti koperti b’paragrafu 5.2., bħal swiċċijiet, iċ-ċavetta ta’ startjar, eċċ għandhom jissodisfaw ir-rekwiżiti ta’ paragrafi 5.1.4 sa 5.1.6 ta’ hawn fuq.

5.2.2.   Il-kontroll tal-ħendbrejk, jekk immuntat fuq jew taħt il-pannell ta’ l-istrumenti, għandu jkun imqiegħed b’mod li meta jkun f’pożizzjoni ta’ waqfien ma jkunx hemm possibbiltà li l-okkupanti tal-vettura jaħbtu miegħu bħala riżultat ta’ impatt frontali. Jekk din il-kundizzjoni ma tiġix sodisfatta, l-erja tal-wiċċ tal-kontroll għandha tissodisfa r-rekwiżiti ta’ paragrafu 5.3.2.3 ta’ hawn taħt. (ara Anness X, noti ta’ spjegazzjoni, paragrafu 5.2.2.)

5.2.3.   Xkafef u oġġetti oħra bħalhom għandhom ikunu ddisinjati u mibnija b’mod li l-partijiet ta’ sostenn fl-ebda każ ma jkollhom truf li joħorġu ’l barra, u jissodisfaw waħda jew iktar mill-kundizzjonijiet li ġejjin: (ara Anness X, noti ta’ spjegazzjoni, paragrafu 5.2.3.)

5.2.3.1.

Il-parti tal-faċċata fil-vettura għandu jkollha wiċċ ta’ mhux anqas minn 25 mm għoli bi truf ittundjati għal radius ta’ kurvatura ta’ mhux anqas minn 3,2 mm. Dan il-wiċċ għandu jikkonsisti minn jew jiġi mgħotti b’materjal li jitlef l-enerġija kif definit f’Anness IV ta’ dan ir-Regolament, u għandu jiġi ttestjat skond l-istess, u l-impatt jiġi applikat f’direzzjoni lonġitudinali orizzontali. (ara Anness X, noti ta’ spjegazzjoni, paragrafu 5.2.3.1.)

5.2.3.2.

Xkafef u oġġetti oħra bħalhom għandhom, taħt l-effett ta’ qawwa lonġitudinali orizzontali li tiġbed ’il quddiem ta’ 37,8 daN li toħroġ minn ċilindru ta’ djametru ta’ 110 mm bl-assi tiegħu vertikali, jinqalgħu, jinkisru, jitgħawġu ħafna jew jerġgħu jidħlu mingħajr ma jipproduċu fatturi perikolużi fuq ir-rimm ta’ l-ixkaffa. Il-qawwa għandha ssir fuq l-aktar parti b’saħħitha ta’ l-ixkafef jew oġġetti oħra simili. (ara Anness X, noti ta’ spjegazzjoni, paragrafu 5.2.3.2.)

5.2.4.   Jekk l-oġġetti in kwistjoni jkun fihom parti magħmula minn materjal artab b’ebusija ta’ aktar minn 50 shore A meta ffittjat ma’ sostenn riġidu, ir-rekwiżiti ta’ hawn fuq, minbarra r-rekwiżiti li jaqgħu taħt Anness IV li għandhom x’jaqsmu ma’ l-assorbiment ta’ enerġija, għandhom japplikaw għas-sostenn riġidu biss jew jista’ jintwera permezz ta’ testijiet biżżejjed skond il-proċedura deskritta f’Anness IV li l-materjal artab b’ebusija ta’ anqas minn 50 shore A mhux se jinqata’ biex imiss is-sostenn matul it-test ta’ impatt speċifikat. F’dak il-każ ir-rekwiżiti tar-radius ma għandhomx japplikaw.

5.3.   Tagħmir ieħor ta’ ġewwa fil-kumpartiment tal-passiġġieri tal-pjan trasversali li jgħaddi minn ġol-linja ta’ riferenza tat-torso tal-manikin imqiegħed fis-sits ta’ wara nett (ara Anness X, noti ta’ spjegazzjoni, paragrafu 5.3.)

5.3.1.   Ambitu

Ir-rekwiżiti ta’ paragrafu 5.3.2 ta’ hawn taħt japplikaw għal manku ta’ kontroll, livers u pumijiet u għal kwalunkwe oġġett ieħor li joħroġ ’il barra li għalih ma ssirx riferenza f’paragrafi 5.1 u 5.2 ta’ hawn fuq. (Ara wkoll paragrafu 5.3.2.2.)

5.3.2.   Rekwiżiti

Jekk l-oġġetti li għalihom issir riferenza f’paragrafu 5.3.1. ta’ hawn fuq huma mqiegħda b’mod li l-okkupanti tal-vettura jistgħu jmissu magħhom, huma għandhom jissodisfaw ir-rekwiżiti ta’ paragrafi 5.3.2.1 sa 5.3.4. Jekk huma jistgħu jintmissu minn sfera ta’ dijametru ta’ 165 mm u huma ’l fuq mill-punt “H” l-aktar baxx (ara Anness V ta’ dan ir-Regolament) tas-sits ta’ quddiem u ’l quddiem mill-pjan trasversali tal-linja ta’ riferenza tat-torso tal-manikin fis-sit ta’ wara nett, u barra miż-żoni definiti f’paragrafi 2.3.1 u 2.3.2, dawn ir-rekwiżiti jitqiesu li ġew sodisfatti jekk: (ara Anness X, noti ta’ spjegazzjoni, paragrafu 5.3.2.)

5.3.2.1.

il-wiċċ tagħhom tispiċċa bi trufijiet ittundjati, ir-radii tal-kurvatura jkunu ta’ mhux anqas minn 3,2 mm (ara Anness X, noti ta’ spjegazzjoni, paragrafu 5.3.2.1)

5.3.2.2.

livers ta’ kontroll u pumijiet għandhom ikunu ddisinjati u mibnija b’mod li, taħt l-effett ta’ qawwa orizzontali lonġitudinali li taġixxi ’l quddiem ta’ 37,8 daN il-projezzjoni fil-pożizzjoni l-aktar sfavorevoli tagħha titnaqqas sa mhux aktar minn 25 mm mill-wiċċ tal-pannell jew l-istess tagħmir jinqalgħu jew jitgħawġu: fl-aħħar żewġ każijiet ma għandha tibqa’ l-ebda projezzjoni perikoluża. L-istrumenti li bihom ittella’ u tniżżel it-twieqi jistgħu, madankollu, joħorġu ’l barra 35 mm mill-wiċċ tal-pannell; (ara Anness X, noti ta’ spjegazzjoni, paragrafu 5.3.2.2)

5.3.2.3.

il-kontroll tal-ħendbrejk meta mniżżel u l-gerliver meta fil-pożizzjoni ta’ xi gêr ta’ mixi ’l quddiem, għandhom, minn barra meta mqiegħda fiż-żoni definiti f’paragrafi 2.3.1 u 2.3.2 u fiż-żoni taħt il-pjan orizzontali li jgħaddu minn ġol-punt “H” tas-sits ta’ quddiem, erja tal-wiċċ ta’ mhux anqas minn 6 ċm2 li titkejjel f’sezzjoni trasversali normali mad-direzzjoni orizzontali lonġitudinali sa distanza ta’ 6,5 mm mill-parti li l-aktar toħroġ ’il barra, u r-radius tal-kurvatura ma jkunx anqas minn 3,2 mm (ara Anness X, noti ta’ spjegazzjoni, paragrafu 5.3.2.3)

5.3.3.   Ir-rekwiżiti f’paragrafu 5.3.2.3 ma għandhomx japplikaw għal kontroll ta’ ħendbrejk immuntat fuq il-qiegħa; għal dawn il-kontrolli, jekk l-għoli ta’ xi parti meta dan ikun imniżżel hija ’l fuq minn pjan orizzontali li jgħaddi mill-punt “H” tas-sits ta’ quddiem (ara Anness V ta’ dan ir-Regolament) il-kontroll għandu jkollu erja ta’ sezzjoni trasversali ta’ mill-anqas 6,5 ċm2 imkejla fi pjan orizzontali ta’ mhux aktar minn 6,5 mm mill-parti li toħrog ’l barra l-aktar imbiegħda (imkejla f’direzzjoni vertikali). Ir-radius tal-kurvatura ma għandux ikun anqas minn 3,2 mm.

5.3.4.   L-elementi l-oħra tat-tagħmir tal-vettura li ma humiex koperti bil-paragrafu ta’ hawn fuq, bħall-binarji li fuqhom jista’ jiċċaqlaq is-sit, strumenti biex jirregolaw il-parti orizzontali jew vertikali tas-sit, strumenti għal tkebbib ta’ ċinturini ta’ sigurtà, eċċ. Mhumiex suġġetti għall-ebda regolamentazzjoni jekk dawn jinsabu taħt il-linja orizzontali li tgħaddi mill-punt “H” ta’ kull sit, anki jekk l-okkupant x’aktarx se jiġi f’kuntatt ma’ dawn l-oġġetti. (ara Anness X, noti ta’ spjegazzjoni, paragrafu 5.3.4.)

5.3.4.1.   Komponenti mmuntati fuq is-saqaf imma li mhumiex parti mill-istruttura tas-saqaf, bħal manki ma’ fejn tkun tista’ taqbad, lampi u lqugħ mix-xemx, eċċ għandu jkollhom radius ta’ kurvatura mhux anqas minn 3,2 mm. Barra minn hekk, il-wisa’ tal-partijiet li joħorġu ’l barra ma għandhiex tkun anqas mill-ammont tal-projezzjoni tagħhom li qegħda ’l isfel; inkella, dawn il-partijiet li joħorġu ’l barra għandhom jgħaddu mit-test tat-telf ta’ enerġija skond ir-rekwiżiti ta’ Anness IV. (ara Anness X, noti ta’ spjegazzjoni, paragrafu 5.3.4.1.)

5.3.5.   Jekk l-oġġetti kkunsidrati hawn fuq jinkludu komponent magħmul minn materjal b’ebusija ta’ anqas minn 50 shore A, immuntat fuq sostenn riġidu, ir-rekwiżiti ta’ hawn fuq għandhom japplikaw biss għas-sostenn riġidu jew jista’ jintwera permezz ta’ testijiet biżżejjed skond il-proċedura deskritta f’Anness IV li l-materjal artab b’ebusija ta’ anqas minn 50 shore A mhux se jinqata’ biex imiss is-sostenn matul it-test ta’ impatt speċifikat. F’dak il-każ ir-rekwiżiti tar-radius ma għandhomx japplikaw.

5.3.6.   Barra minn hekk, twieqi motorizzati u sistemi ta’ taqsim u l-kontrolli tagħhom għandhom jissodisfaw ir-rekwiżiti ta’ paragrafu 5.8 ta’ hawn taħt.

5.4.   Saqaf (ara Anness X, noti ta’ spjegazzjoni, paragrafu 5.4.)

5.4.1.   Ambitu

5.4.1.1.   Ir-rekwiżiti ta’ paragrafu 5.4.2 ta’ hawn taħt għandhom japplikaw għall-wiċċ ta’ ġewwa tas-saqaf.

5.4.1.2.   Madankollu huma ma għandhomx japplikaw għal dawk il-partijiet tas-saqaf li ma jistgħux jintmissu minn sfera ta’ dijametru ta’ 165 mm.

5.4.2.   Rekwiżiti

5.4.2.1.   Dik il-parti tal-wiċċ ta’ ġewwa tas-saqaf li qiegħda ’l fuq jew ’l quddiem mill-okkupanti ma għandhiex tippreżenta ħruxija perikoluża jew truf li jaqtgħu, diretti lura jew ’l isfel. Il-wisa’ tal-partijiet li joħorġu ’l barra ma għandhiex tkun anqas mill-ammont tal-projezzjoni tagħħom ’l isfel u t-trufijiet għandu jkollhom radius ta’ kurvatura ta’ mhux anqas minn 5 mm. B’mod partikolari, il-vireg jew il-qafas riġidi/u tas-saqaf, bl-eċċezzjoni tal-header rail ta’ l-uċuħ miksija bil-ħġieġ u l-qafas tal-bibien, ma għandhomx joħorġu ’l barra u ’l isfel aktar minn 19-il mm.(ara Anness X, noti ta’ spjegazzjoni, paragrafu 5.4.2.1.)

5.4.2.2.   Jekk il-vireg jew il-qafas tas-saqaf ma jissodisfawx ir-rekwiżiti ta’ paragrafu 5.4.2.1, huma għandhom jgħaddu mit-test tat-telf ta’ enerġija skond ir-rekwiżiti ta’ Anness IV ta’ dan ir-Regolament.

5.4.2.3.   Il-fili tal-metall li jġebbdu l-kisi tas-saqaf u l-qafas ta’ l-ilqugħ mix-xemx għandu jkollhom dijametru massimu ta’ 5 mm jew ikunu kapaċi li jassorbu l-enerġija, kif stabbilit f’Anness IV għal dan ir-Regolament. Elementi mhux riġidi ta’ twaħħil tal-qafas ta’ l-ilqugħ mix-xemx għandhom jissodisfaw ir-rekwiżiti ta’ paragrafu 5.3.4.1. ta’ hawn fuq.

5.5.   Vetturi b’saqaf li jinfetaħ (ara Anness X, noti ta’ spjegazzjoni, paragrafu 5.5.)

5.5.1.   Rekwiżiti

5.5.1.1.   Ir-rekwiżiti li ġejjin u dawk ta’ paragrafu 5.4 ta’ hawn fuq għandhom japplikaw għal vetturi b’saqaf li jinfetaħ meta s-saqaf huwa fil-pożizzjoni ta’ għeluq.

5.5.1.2.   Barra minn hekk, l-istrumenti ta’ ftuħ u tħaddim għandhom: (ara Anness X, noti ta’ spjegazzjoni, paragrafi 5.5.1.2., 5.5.1.2.1., u 5.5.1.2.2.):

5.5.1.2.1.

jiġu ddisinjati u mibnija b’mod li, sa fejn huwa possibbli, jeskludu tħaddim aċċidentali jew mhux f’ħinu (ara Anness X, noti ta’ spjegazzjoni, paragrafi 5.5.1.2., 5.5.1.2.1., u 5.5.1.2.2.):

5.5.1.2.2.

il-wiċċ tagħhom għandhu jispiċċa bi trufijiet ittundjati, ir-radii tal-kurvatura jkunu ta’ mhux anqas minn 5 mm (ara Anness X, noti ta’ spjegazzjoni, paragrafu 5.5.1.2., 5.5.1.2.1., u 5.5.1.2.2.):

5.5.1.2.3.

jiġu rranġati, meta f’pożizzjoni ta’ waqfien, f’erjas li ma jistgħux jintmissu minn sfera ta’ dijametru ta’ 165 mm. Jekk din il-kundizzjoni ma tistax tiġi sodisfatta, l-istrumenti ta’ ftuħ u tħaddim, għandhom, fil-pożizzjoni ta’ waqfien, jew jibqgħu lura jew ikunu ddisinjati u mibnija b’mod li, taħt l-effett ta’ forza ta’ 37,8 daN applikata fid-direzzjoni ta’ l-impatt imfisser f’Anness IV ta’ dan ir-Regolament bħala t-tanġent għal sonda tal-forma tar-ras, jew il-projezzjoni kif deskritta f’Anness VI ta’ dan ir-Regolament għandha titnaqqas ghal mhux aktar minn 25 mm ’l hemm mill-wiċċ li fuqu l-istrumenti huma mmuntati jew l-istrumenti għandhom jinqalgħu; fl-aħħar każ ma għandhomx jibqgħu projezzjonijiet perikolużi. (ara Anness X, noti ta’ spjegazzjoni, paragrafu 5.5.1.2.3.).

5.5.2.   Barra minn hekk, sistemi ta’ pannelli tas-saqaf motorizzati u l-kontrolli tagħhom għandhom jissodisfaw ir-rekwiżiti ta’ paragrafu 5.8. ta’ hawn taħt.

5.6.   Vetturi b’saqaf li jista’ jitneħħa (ara Anness X, noti ta’ spjegazzjoni, paragrafu 5.6.)

5.6.1.   Fil-każ ta’ vetturi b’saqaf li jista’ jitneħħa, il-parti ta’ taħt ta’ fuq tar-roll-bar u l-parti ta’ fuq tal-qafas tal-windskrin biss fil-pożizzjonijiet kollha normali ta’ użu għandhom jaqblu mar-rekwiżiti ta’ paragrafu 5.4. Is-sistema tal-vireg li jintwew jew irbit użati sabiex isostnu saqaf mhux riġidu ma għandhomx, meta jitqiegħdu fuq u quddiem l-okkupanti, juru ħruxija perikoluża jew truf li jaqtgħu, iħarsu ’l isfel jew lura. (ara Anness X, noti ta’ spjegazzjoni, paragrafu 5.6.1.)

5.7.   Il-partijiet ta’ wara tas-sits imwaħħla mal-vettura

5.7.1.   Rekwiżiti

5.7.1.1.   Il-wiċċ tal-partijiet ta’ wara tas-sit ma għandhom juru l-ebda ħruxija perikoluża u truf li jaqtgħu li aktarx iżidu r-riskju jew severità ta’ korriment lill-okkupanti. (ara Anness X, noti ta’ spjegazzjoni, paragrafu 5.7.1.1.).

5.7.1.2.   Minbarra kif provdut f’paragrafi 5.7.1.2.1, 5.7.1.2.2, u 5.7.1.2.3 ta’ hawn taħt, dik il-parti tad-dahar tas-sit ta’ quddiem li hija fiż-żona ta’ impatt tar-ras, deskritta f’Anness I ta’ dan ir-Regolament, għandha tkun b’mod li tintilef l-enerġija, kif stabbilit f’Anness IV ta’ dan ir-Regolament. Sabiex tiġi determinata ż-żona ta’ impatt tar-ras is-sits ta’ quddiem għandhom, jekk huma aġġustabbli, ikunu fl-aktar pożizzjoni lura ta’ sewqan bid-dhura tagħhom maqlubin ċirka 25 ° sakemm il-manifattur ma jindikax mod ieħor. (ara Anness X, noti spjegazzjoni, paragrafu 5.7.1.2.).

5.7.1.2.1.

Fil-każ ta’ sits ta’ quddiem separati, iż-żona ta’ impatt tar-ras tal-passiġġieri ta’ wara għandha testendi għal 10 ċm fuq kull naħa tal-linja taċ-ċentru tas-sit, fil-parti ta’ fuq ta’ wara tad-dahar tas-sit. 5.7.1.2.1.1 F’każ ta’ sits mgħammra b’sistemi ta’ trażżin tar-ras kull test għandu jitwettaq bis-sistema ta’ trażżin tar-ras bl-iktar pożizzjoni baxxa u f’punt li jinsab fuq il-linja vertikali li tgħaddi minn ġoċ-ċentru tas-sistema tat-trażżin tar-ras. 5.7.1.2.1.2 Fil-każ ta’ sit maħsub sabiex jitwaħħal f’diversi tipi ta’ vettura, iż-żona ta’ impatt għandha tkun determinata billi vettura li l-aktar pożizzjoni lura ta’ sewqan tagħhom hija, ta’ kull wieħed mit-tipi kkunsidrati, l-anqas favorevoli; iż-żona ta’ impatt li tirriżulta titqies adegwata għat-tipi l-oħra.

5.7.1.2.2.

Fil-każ ta’ sits tal-bank ta’ quddiem, iż-żona ta’ impatt għandha testendi bejn il-pjanijiet lonġitudinali vertikali 10 ċm ’il barra mil-linja ċentrali ta’ kull pożizzjoni ta’ bilqiegħda fuq barra. Il-linja ċentrali ta’ kull pożizzjoni ta’ bilqiegħda fuq barra tas-sit tal-bank għandha tkun speċifikata mill-manifattur.

5.7.1.2.3.

Fiż-żona ta’ impatt tar-ras ’il barra mil-limiti stabbiliti f’paragrafi 5.7.1.2.1 sa 5.7.1.2.2, inklużi, l-istruttura tal-qafas tas-sit għandha tkun ikkuttunata sabiex jiġi evitat kuntatt tar-ras magħha: u, dawn iż-żoni, għandu jkollhom radius ta’ kurvatura ta’ mill-inqas 5 mm. Dawn il-partijiet jistgħu jissodisfaw ir-rekwiżiti ta’ telf ta’ enerġija speċifikati f’Anness IV ta’ dan ir-Regolament. (ara Anness X, noti spjegazzjoni, paragrafu 5.7.1.2.3.).

5.7.2.   Dawn ir-rekwiżiti ma għandhomx japplikaw għas-sits ta’ wara nett, għal sits iħarsu lejn il-ġenb jew lura, għal sits dahar ma’ dahar jew għal sits li jintnew (tip-up). Jekk iż-żoni ta’ impatt tas-sits, sistemi tat-trażżin tar-ras u s-sistemi ta’ sostenn tagħhom jinkludu partijiet miksija b’materjal aktar artab minn ebusija ta’ 50 shore A, ir-rekwiżiti ta’ hawn fuq, bl-eċċezzjoni ta’ dawk relatati ma’ telf ta’ enerġija deskritti f’Anness IV ta’ dan ir-Regolament, għandhom japplikaw biss għall-partijiet riġidi.

5.7.3.   Ir-rekwiżiti ta’ paragrafu 5. 7. għandhom jiġu kkunsidrati li ġew sodisfatti fil-każ ta’ partijiet ta’ wara ta’ sits li huma parti minn ta’ vettura approvata skond ir-Regolament Nru 17 (03 serje ta’ emendi jew aktar tard).

5.8.   It-tħaddim motorizzat tat-twieqi, pannelli tas-saqaf u sistemi ta’ taqsim

5.8.1.   Ir-rekwiżiti ta’ hawn taħt japplikaw għat-tħaddim motorizzat ta’ twieqi/sistemi ta’ pannelli tas-saqaf/sistemi ta’ taqsim sabiex titnaqqas il-possibbiltà ta’ korrimenti kkawżati minn tħaddim aċċidentali jew mhux korrett.

5.8.2.   Rekwiżiti ta’ tħaddim normali

Minbarra kif ipprovdut f’paragrafu 5.8.3., twieqi bi tħaddim motorizzat/sistemi ta’ pannelli tas-saqaf/sistemi ta’ taqsim jistgħu jingħalqu f’waħda jew iktar mill-kundizzjonijiet li ġejjin:

5.8.2.1.

fejn iċ-ċavetta li tistartja magna tal-karozza hija mdaħħla fil-kontroll ta’ startjar f’kull pożizzjoni ta’ użu jew f’kundizzjoni ekwivalenti f’każ ta’ strument mhux mekkaniku;

5.8.2.2.

fejn iċ-ċavetta ta’ l-elettriku kienet intużat sabiex tattiva l-forniment ta’ l-elettriku lit-twieqi motorizzati, taqsim u sistemi ta’ pannelli tas-saqaf;

5.8.2.3.

b’qawwa muskolari li mhix megħjuna mill-forniment ta’ l-elettriku tal-vettura;

5.8.2.4.

meta jkun hemm attivazzjoni kontinwa ta’ sistema ta’ għeluq li tinsab fuq in-naħa ta’ barra tal-vettura;

5.8.2.5.

matul l-intervall ta’ żmien bejn il-mument li s-sistema ta’ startjar intfiet u ċ-ċavetta li tistartja l-karozza tneħħiet, jew seħħet kundizzjoni ekwivalenti f’każ ta’ strument mhux mekkaniku, u fil-mument li l-ebda waħda miż-żewġ bibien ta’ quddiem tinfetaħ biżejjed biex jippermetti l-ħruġ ta’ l-okkupanti;

5.8.2.6.

meta l-moviment ta’ għeluq ta’ tieqa motorizzata, pannell tas-saqaf jew sistema ta’ taqsim jibda fi ftuħ ta’ mhux iktar minn 4 mm;

5.8.2.7.

fejn tieqa motorizzata ta’ bieba ta’ vettura mingħajr qafas ta’ fuq tal-bieba tingħalaq awtomatikament kull meta l-bieba rilevanti hija magħluqa. F’dan il-każ il-ftuħ massimu, kif definit f’paragrafu 2.15, qabel ma tingħalaq it-tieqa, ma għandux jaqbeż it-12-il mm.

5.8.2.8.

Għeluq mill-bogħod għandu jkun permess permezz ta’ attivazzjoni kontinwa ta’ strument ta’ azzjonament mill-bogħod, sakemm waħda mill-kundizzjonijiet li ġejjin hija sodisfatta: 5.8.2.8.1. id-distanza ta’ tħaddim bejn l-istrument ta’ attivazzjoni u l-vettura ma għandhiex taqbeż 6 m; 5.8.2.8.2. id-distanza ta’ tħaddim bejn l-istrument ta’ attivazzjoni u l-vettura ma għandhiex taqbeż 11-il m, sakemm is-sistema tirrikjedi linja ta’ mira diretta bejn l-istrument ta’ attivazzjoni u l-vettura. Dan jista’ jiġi ttestjat billi tpoġġi wiċċ opak bejn l-istrument ta’ attivazzjoni u l-vettura.

5.8.2.9.

Għeluq one-touch għandu jiġi permess biss għat-tieqa motorizzata tal-bieba tax-xufier u tal-pannell tas-saqaf, u biss fil-waqt meta ċ-ċavetta ta’ startjar tal-karozza hija fil-pożizzjoni ta’ tħaddim tal-magna. Huwa permess ukoll meta l-magna ntfiet u ċ-ċavetta li tistartja l-karozza/ċavetta ta’ l-elettriku tneħħiet, jew seħħet kundizzjoni ekwivalenti f’każ ta’ strument mhux mekkaniku, sakemm l-ebda waħda miż-żewġ bibien ta’ quddiem tinfetaħ biżejjed biex tippermetti l-ħruġ ta’ okkupanti.

5.8.3.   Rekwiżiti ta’ treġġigħ awtomatiku

5.8.3.1.   L-ebda waħda mir-rekwiżi ta’ paragrafu 5.8.2. ma tapplika, jekk tieqa motorizzata/sistema ta’ pannelli tas-saqaf/sistema ta’ taqsim hija mgħammra bi strument ta’ treġġigħ awtomatiku.

5.8.3.1.1.   Dan l-istrument għandu jreġġa’ t-tieqa/pannell tas-saqaf/taqsima qabel ma toqros b’saħħa ta’ iktar minn 100 N fil-fetħa ta’ 200 mm sa 4 mm fuq it-tarf ta’ fuq ta’ tieqa motorizzata/taqsima jew quddiem it-tarf ta’ quddiem ta’ pannell tas-saqaf li jiżżerżaq u fit-tarf miġbud ta’ pannell tas-saqaf li jintena.

5.8.3.1.2.   Wara treġġigħ awtomatiku bħal dak, it-tieqa jew pannell tas-saqaf jew taqsima għandha/u t/jinfetaħ f’waħda mill-pożizzjonijiet li ġejjin:

5.8.3.1.2.1.

pożizzjoni li tippermetti virga ċilindrika semi-riġida b’dijametru ta’ 200 mm li għandu jitqiegħed minn ġol-fetħa fl-istess punt (i) ta’ kuntatt użati sabiex tiġi determinata l-imġiba ta’ treġġigħ f’paragrafu 5.8.3.1.1.;

5.8.3.1.2.2.

pożizzjoni li tirrapreżenti mill-inqas il-pożizzjoni tal-bidu qabel ma beda l-għeluq;

5.8.3.1.2.3.

pożizzjoni ta’ mill-inqas 50 mm iktar miftuħa mill-pożizzjoni fil-waqt li nbeda t-treġġigħ;

5.8.3.1.2.4.

fil-każ ta’ moviment ta’ tmejjil ta’ pannell tas-saqaf, l-akbar fetħa angulari.

5.8.3.1.3.   Sabiex tiċċekkja twieqi motorizzati/sistemi ta’ pannelli tas-saqaf/sistemi ta’ taqsim bi strumenti ta’ treġġigħ skond paragrafu 5.8.3.1.1., strument ta’ kejl/virga ta’ test għandu/ha j/titqiegħed minn ġol-fetħa minn naħa ta’ ġewwa san-naħa ta’ barra tal-vettura jew, fil-każ ta’ sistema ta’ taqsim, mill-parti ta’ wara tal-kumpartiment tal-passiġġieri b’mod li l-wiċċ ċilindriku tal-virga jmiss xi parti ta’ l-istruttura tal-vettura li tifforma l-bordura tal-fetħa tat-tieqa/taqsima tal-pannell tas-saqaf. Il-proporzjon tal-qawwa ta’ liwja ta’ l-istrument ta’ kejl għandha tkun 10 ± 0,5 N/mm. Il-pożizzjonijiet ta’ virga tat-test (normalment pependikulari mat-tarf tat-tieqa/panel tas-saqaf/taqsima u perpendikulari mad-direzzjoni ta’ għeluq) huma spjegati f’Figura 1 ta’ Anness ta’ dan ir-Regolament. Il-pożizzjoni tal-virga ta’ test relatata mat-tarf u d-direzzjoni ta’ għeluq għandha tinżamm matul it-test.

5.8.4.   Pożizzjoni u tħaddim ta’ swiċċ

5.8.4.1.   Swiċċijiet ta’ twieqi motorizzati/pannelli tas-saqaf/taqsimiet għandhom jitqiegħdu u mħaddma b’mod li jnaqqsu kemm jista’ jkun ir-riskju ta’ għeluq bi żball. Is-swiċċijiet jirrikjedu attivazzjoni kontinwa għall-għeluq minbarra fil-każ ta’ paragrafi 5.8.2.7., 5.8.2.9. jew 5.8.3.

5.8.4.2.   Is-swiċċijiet kollha tat-twieqi ta’ wara, pannelli tas-saqaf u partizzjonijiet maħsuba għal użu mill-okkupanti fin-naħa ta’ wara tal-vettura għandhom ikunu jistgħu jintfew permezz ta’ swiċċ ikkontrollat mix-xufier li jkun imqiegħed ’il quddiem minn pjan vertikali trasversali li jgħaddi minn ġol-punti R tas-sits ta’ quddiem. L-iswiċċ kontrollat mix-xufier mhux meħtieġ jekk tieqa ta’ wara, pannell tas-saqaf u taqsima hija/huwa mgħammar/ra bi strument ta’ treġġigħ awtomatiku. Jekk, madankollu, hemm swiċċ ikkontrollat mix-xufier, ma għandux ikun kapaċi jwaqqaf b’mod awtomatiku l-istrument ta’ treġġigħ awtomatiku jew jimpedixxi s-sistema ta’ taqsim milli titniżżel.

Is-swiċċ ikkontrollat mix-xufier għandu jitqiegħed b’mod li jnaqqas kemm jista’ jkun il-possibbiltà li jintmiss bi żball. Għandu jiġi identifikat permezz tas-simbolu muri f’Figura 2 ta’ Anness IX ta’ dan ir-Regolament jew simbolu ekwivalenti, per eżempju skond ISO 2575:1998 riprodott f’figura 3 ta’ Anness IX ta’ dan ir-Regolament.

5.8.5.   Strumenti ta’ protezzjoni

L-istrumenti kollha ta’ protezzjoni li huma wżati biex jimpedixxu li ssir ħsara lis-sors ta’ elettriku f’każ ta’ tagħbija żejda jew waqfien għandhom jirrisettjaw lilhom innifishom wara t-tagħbija żejda jew il-waqfien awtomatiku. Wara li jiġu rrisettjati l-istrumenti ta’ protezzjoni, il-moviment fid-direzzjoni ta’ għeluq ma għandux ikompli mingħajr ma jkun hemm azzjoni apposta fuq l-istrument ta’ kontroll.

5.8.6.   Struzzjonijiet tal-manwal

5.8.6.1.   Il-manwal tas-sid tal-vettura għandu jinkludi struzzjonijiet ċari relatati mat-tieqa motorizzata/pannell tas-saqaf/taqsima, li jinkludu:

5.8.6.1.1.

spjegazzjoni ta’ konsegwenzi possibbli (qbid),

5.8.6.1.2.

użu ta’ l-iswiċċ kontrollat mix-xufier,

5.8.6.1.3.

messaġġ “WARNING” li jindika l-periklu, partikolarment lil tfal f’każ ta’ użu/attivazzjoni mhux korrett/a tas-sistemi ta’ twieqi motorizzati/sistemi ta’ pannelli tas-saqaf/taqsim Din l-informazzjoni għandha tindika d-dmirijiet tax-xufier, u tinkludi struzzjonijiet għal okkupanti oħra u r-rakkomandazzjoni li titlaq mill-vettura biss jekk iċ-ċavetta ta’ startjar ta’ l-elettriku tkun ġiet imneħħija, jew kundizzjoni ekwivalenti seħħet f’każ ta’ strument mhux mekkaniku,

5.8.6.1.4.

messaġġ “WARNING” li jindika li għandha tingħata attenzjoni speċjali meta tuża sistemi ta’ għeluq mill-bogħod (ara paragrafu 5.8.2.8), per eżempju biex tattivaha biss meta l-operatur ikollu veduta ċara tal-vettura sabiex ikun ċert li ħadd ma jista’ jinqabad minn tagħmir ta’ twieqi motorizzati/pannell tas-saqaf/taqsim.

5.8.7.   Jekk tieqa motorizzata, fetħa tas-saqaf u/ jew sistema ta’ taqsim hija stallata f’vettura li ma tistax tiġi ttestjata skond il-proċeduri tat-test imsemmija hawn fuq l-approvazzjoni tista’ tingħata jekk il-manifattur jista’ juri effett ta’ protezzjoni ugwali jew aħjar għall-okkupanti.

5.9.   Tagħmir ieħor mhux speċifikat

5.9.1.   Ir-rekwiżiti ta’ paragrafu 5, għandhom japplikaw għal dak it-tagħmir mhux imsemmi fil-paragrafi preċedenti li, fis-sens tar-rekwiżiti varji f’paragrafi 5.1. sa 5.7. u skond il-pożizzjoni tagħhom fil-vettura, jistgħu jintmissu mill-okkupanti. Jekk dawn il-partijiet huma magħmula minn materjal b’ebusija ta’ anqas minn 50 shore A, immuntati fuq sostenn riġidu, ir-rekwiżiti in kwistjoni għandhom japplikaw biss għas-sostenn riġidu, jew jista’ jintwera permezz ta’ testijiet suffiċjenti skond il-proċedura deskritta f’Anness IV li l-materjal artab b’ebusija ta’ anqas minn 50 shore A ma jinqatgħax matul it-test ta’ impatt speċifiku. F’dak il-każ, ir-radius rikjest għandu japplika għall-wiċċ l-artab biss.

5.9.2.   Għal partijiet bħal panil ta’ kontroll elettroniku ċentrali, per eżempju, jew komponenti oħra tal-vettura li jappartjenu għal 5.9.1., mhux neċessarju li twettaq test ta’ telf ta’ enerġija skond Anness IV fuq kull komponent li jista’ jintlaqat mill-istrument u proċedura speċifikata f’Anness I jekk:

fl-opinjoni tas-Servizz Tekniku r-ras ta’ l-okkupant aktarx ma tmissx mal-komponent mibħabba s-sistema(i) ta’ trażżin stallata fil-vettura, jew,

minħabba li l-manifattur jista’ jipprova n-nuqqas ta’ kuntatt bħal dak billi juża, per eżempju, il-metodu deskritt f’Anness VIII, jew metodu ekwivalenti.

6.   MODIFIKAZZJONIJIET U ESTENSJONI TA’ APPROVAZZJONI TAT-TIP TA’ VETTURA

6.1.   Kull modifikazzjoni tat-tip ta’ vettura għandha tkun mgħarrfa lid-dipartiment amministrattiv li approva t-tip ta’ vettura. Id-dipartiment jista’ imbagħad jew:

6.1.1.

jikkunsidra li mhuwiex probabbli li l-modifikazzjonijiet li saru jista’ jkollhom effett ħazin apprezzabbli, u li f’kull każ il-vettura għadha konformi mar-rekwiżiti; jew

6.1.2.

jirrikjedi rapport tat-test ulterjuri mis-servizz tekniku responsabbli mit-tmexxija tat-testijet.

6.2.   Konferma jew ċaħda ta’ approvazzjoni, li tispeċifika l-bidliet, għandha tiġi mgħarrfa permezz tal-proċedura speċifikata f’paragrafu 4.3. t’hawn fuq lill-Partijiet ta’ dan il-Ftehim li japplikaw dan ir-Regolament.

6.3.   L-awtorità kompetenti li toħroġ l-estensjoni ta’ l-approvazjoni għandha tagħti numru ta’ serje lil dik l-estensjoni u tinforma lill-Partijiet tal-Ftehim ta’ l-1958 l-oħra li japplikaw dan ir-Regolament permezz ta’ formula ta’ komunikazzjoni konformi mal-mudell f’Anness II għal dan ir-Regolament.

7.   KONFORMITÀ TA’ PRODUZZJONI

7.1.   Kull vettura li turi marka ta’ approvazzjoni kif stabbilit taħt dan ir-Regolament għandha tkun konformi mat-tip approvat ta’ vettura.

7.2.   Sabiex tkun ikkontrollata l-konformità stabbilita f’paragrafu 7.1. ta’ hawn fuq, vettura li turi l-marka ta’ approvazzjoni rikjesta minn dan ir-Regolament għandha tittieħed mis-serje.

7.3.   Produzzjoni tintqies bħala konformi mar-rekwiżiti ta’ dan ir-Regolament jekk ir-rekwiżiti ta’ paragrafu 5 ta’ hawn jiġu sodisfatti.

8.   PIENI GĦAL NUQQAS TA’ KONFORMITÀ FIL-PRODUZZJONI

8.1.   L-approvazzjoni mogħtija fir-rigward ta’ tip ta’ vettura skond dan ir-Regolament, tista’ tiġi rtirata jekk ir-rekwiżiti stabbilti f’paragrafu 7.1. ta’ hawn fuq ma jiġux sodisfatti, jew jekk il-vettura ma tgħaddix mill-kontrolli stabbiliti f’paragrafu 7. ta’ hawn fuq.

8.2.   Jekk Parti għall-Ftehim li tapplika dan ir-Regolament tirtira approvazzjoni li tkun tat qabel, hi għandha tavża lill-Partijiet Kontraenti l-oħra li japplikaw dan ir-Regolament permezz ta’ formula ta’ komunikazzjoni konformi mal-mudell f’Anness II ta’ dan ir-Regolament.

9.   PRODUZZJONI MWAQQFA DEFINITTAVAMENT

Jekk id-detentur ta’ l-approvazzjoni jieqaf kompletament milli jimmanifattura tip ta’ vettura skond dan ir-Regolament, hu għandu jinforma b’dan lill-awtorità li tat l-approvazzjoni. X’ħin tirċievi l-komunikazzjoni relevanti dik l-awtorità għandha tinforma b’dan lill-Partijiet l-oħrajn tal-Ftehim li jappikaw dan ir-Regolament permezz ta’ formula ta’ komunikazzjoni konformi mal-mudell f’Anness II għal dan ir-Regolament.

10.   ISMIJIET U INDIRIZZI TA’ SERVIZZI TEKNIĊI RESPONSABBLI GĦAT-TMEXXIJA TA’ TESTIJIET TA’ APPROVAZZJONI, U TA’ DIPARTIMENTI AMMINISTRATTIVI

Il-Partijiet għall-Ftehim li japplikaw dan ir-Regolament għandhom jgħarrfu lis-Segretarjat tan-Nazzjonijiet Uniti l-ismijiet u l-indirizzi tas-servizzi tekniċi responsabbli mit-tmexxija ta’ testijiet ta’ approvazzjoni u ta’ dipartiment amministrattivi li jagħtu approvazzjoni u li lilhom għandhom jintbagħtu formuli, li jinħarġu f’pajjiżi oħra, li jiċċertifikaw approvazzjoni jew ċaħda jew irtirar ta’ approvazzjoni.

---

(1)  1 għall-Ġermanja, 2 għal Franza, 3 għall-Italja, 4 għall-Olanda, 5 għall-Iżvezja, 6 għall-Belġju, 7 għall-Ungerija, 8 għar-Repubblika Ċeka, 9 għal Spanja, 10 għall-Jugożlavja, 11 għar-Renju Unit, 12 għall-Awstrija, 13 għal-Lussemburgu, 14 għall-Iżvizzera, 15 (vojt), 16 għan-Norveġja, 17 għall-Finlandja, 18 għad-Danimarka, 19 għar-Rumanija, 20 għall-Polonja, 21 għall-Portugall, 22 għall-Federazzjoni Russa, 23 għall-Greċja, 24 għall-Irlanda, 25 għall-Kroazja, 26 għas-Slovenja u 27 għas-Slovakkja, 28 għall-Belarus, 29 għall-Estonja, 30 (vojt), 31 għall-Bożnja u Ħerżegovina, 32 għal-Latvja, 33 (vojt), 34 għall-Bulgarija, 35-36 (vojta), 37 għat-Turkija, 38-39 (vojta), 40 għal dik li kienet ir-Repubblika Jugożlava tal-Maċedonja, 41 (vojt), 42 għall-Komunità Ewropea (Approvazzjonijiet jingħataw lill-Istati Membri bl-użu tas-simbolu ECE rispettiv), 43 għall-Ġappun, 44 (vojt), 45 għall-Awstralja u 46 għall-Ukraina. Numri sussegwenti għandhom assenjati lill-pajjiżi l-oħra fl-ordni kronoloġiku li fih jirratifikaw jew jaċċedu għal Ftehim Dwar l-Addozjoni ta’ Regoli Tekniċi Uniformi Għal Vetturi bir-Roti, Tagħmir u Partijiet li jistgħu Jitwaħħlu u/jew Użati ma’ Vetturi bir-Roti u l-Kundizzjonijiet għal Gharfien Reċiproku ta’ Approvazzjonijiet Mogħtija fuq il-Bażi ta’ dawn ir-Regoli, u n-numri hekk assenjati għandhom jiġu mgħarrfa mis-Segretarju Ġenerali tan-Nazzjonijiet Uniti lill-Partijiet Kontraenti ta’ dan il-Ftehim.

---

---

---

---

---

---

---

---

---

---

---

16.7.2008

MT

Il-Ġurnal Uffiċjali ta’ l-Unjoni Ewropea

L 188/71

---

POŻIZZJONI KOMUNI TAL-KUNSILL 2008/586 /PESK

tal-15 ta' Lulju 2008

li taġġorna l-Pożizzjoni Komuni 2001/931/PESK dwar l-applikazzjoni ta' miżuri speċifiċi fil-ġlieda kontra t-terroriżmu u li tħassar il-Pożizzjoni Komuni 2007/871/PESK

IL-KUNSILL TA' L-UNJONI EWROPEA,

Wara li kkunsidra t-Trattat dwar l-Unjoni Ewropea, u b'mod partikolari l-Artikoli 15 u 34 tiegħu,

Billi:

(1)	Fis-27 ta’ Diċembru 2001, il-Kunsill adotta l-Pożizzjoni Komuni 2001/931/PESK dwar l-applikazzjoni ta’ miżuri speċifiċi fil-ġlieda kontra t-terroriżmu (1).

(2)	Fl-20 ta’ Diċembru 2007, il-Kunsill adotta l-Pożizzjoni Komuni 2007/871/PESK li taġġorna l-Pożizzjoni Komuni 2001/931/PESK (2).

(3)	Bi qbil mal-Pożizzjoni Komuni 2001/931/PESK, il-Kunsill wettaq reviżjoni sħiħa tal-lista tal-persuni, gruppi u entitajiet li għalihom tapplika l-Pożizzjoni Komuni 2007/871/PESK.

(4)	Fil-każ ta' grupp il-Kunsill ħa kont tal-fatt li hu kien mgħarraf b'elementi ġodda, li jiġġustifikaw l-inklużjoni ta' dan il-grupp fil-lista.

(5)	Il-Kunsill iddetermina li persuna kellha titneħħa mil-lista ta' persuni, gruppi u entitajiet li għalihom tapplika l-Pożizzjoni Komuni 2001/931/KE.

(6)

Wara dik ir-reviżjoni, il-Kunsill ikkonkluda li, bl-eċċezzjoni tal-persuna msemmija fil-ħames premessa, l-persuni, gruppi u entitajiet l-oħrajn elenkati fl-Anness għall-Pożizzjoni Komuni 2007/871/PESK (3) kienu involuti f'atti terroristiċi fit-tifsira ta' l-Artikoli 1(2) u (3) tal-Pożizzjoni Komuni tal-Kunsill 2001/931/PESK, li ttieħdet deċiżjoni fir-rigward tagħhom minn awtorità kompetenti fit-tifsira ta' l-Artikolu 1(4) ta' dik il-Pożizzjoni Komuni, u li huma għandhom ikomplu jkunu s-suġġett tal-miżuri restrittivi speċifiċi previsti fiha.

(7)	Il-lista tal-persuni, il-gruppi u l-entitajiet li għalihom tapplika l-Pożizzjoni Komuni 2001/931/PESK għandha għalhekk tkun aġġornata,

ADOTTA DIN IL-POŻIZZJONI KOMUNI:

Artikolu 1

Il-lista tal-persuni, il-gruppi u l-entitajiet li għalihom tapplika l-Pożizzjoni Komuni 2001/931/PESK għandhom jitniżżlu fl-Anness għal din il-Pożizzjoni Komuni.

Artikolu 2

Il-Pożizzjoni Komuni 2007/871/PESK hija b'dan imħassra.

Artikolu 3

Din il-Pożizzjoni Komuni għandha jkollha effett fid-data ta' l-adozzjoni tagħha.

Artikolu 4

Din il-Pożizzjoni Komuni għandha tiġi ppubblikata fil-Ġurnal Uffiċjali ta' l-Unjoni Ewropea.

---

(1)  ĠU L 344, 28.12.2001, p. 93.

(2)  ĠU L 340, 22.12.2007, p. 109. Il-Pożizzjoni komuni kif emendata l-aħħar bil-Pożizzjonijiet Komuni 2008/347/PESK (ĠU L 116, 30.4.2008, p. 55).

(3)  Kif emendata bil-Pożizzjoni Komuni tal-Kunsill 2008/346/PESK tad-29 ta' April 2008 (ĠU L 116, 30.4.2008, p. 53).

---

---