ANNESS

il-valuri fissi ta' l-importazzjoni għad-determinazzjoni tal-prezz ta' dħul ta' ċertu frott u ħaxix

(EUR/100 kg)
Kodiċi NM	Kodiċi tal-pajjiż terz (1)	Valur fiss ta' l-importazzjoni
0702 00 00	MA	33,6
	MK	19,3
	TR	113,8
	ZZ	55,6
0707 00 05	MK	21,3
	TR	76,4
	ZZ	48,9
0709 90 70	TR	85,7
	ZZ	85,7
0805 50 10	AR	85,8
	US	89,1
	UY	75,0
	ZA	94,0
	ZZ	86,0
0808 10 80	AR	95,0
	BR	97,0
	CL	107,3
	CN	86,9
	NZ	115,1
	US	118,0
	UY	60,2
	ZA	96,2
	ZZ	97,0
0808 20 50	AR	99,2
	CL	104,9
	NZ	116,2
	ZA	122,3
	ZZ	110,7
0809 10 00	TR	177,5
	XS	125,7
	ZZ	151,6
0809 20 95	TR	373,8
	US	305,5
	ZZ	339,7
0809 30	TR	177,4
	ZZ	177,4
0809 40 05	IL	217,7
	ZZ	217,7

---

(1)  In-nomenklatura tal-pajjiżi ffissata mir-Regolament tal-Kummissjoni (KE) Nru 1833/2006 (ĠU L 354, 14.12.2006, p. 19). Il-kodiċi “ZZ” jirrappreżenta “oriġini oħra”.

IL-KOMUNITÀ EWROPEA, minn hawn 'il quddiem imsejħa “l-Komunità”,

minn naħa waħda,

u

L-KUNSILL TA' L-EWROPA,

min-naħa l-oħra,

minn hawn 'il quddiem flimkien imsejħa “il-Partijiet”,

BILLI l-Kunsill ta' l-Unjoni Ewropea adotta, fil-15 ta' Frar 2007, ir-Regolament (KE) Nru 168/2007 li jistabbilixxi Aġenzija ta' l-Unjoni Ewropea għad-Drittijiet Fundamentali (minn hawn 'il quddiem imsejħa l-“Aġenzija”);

BILLI l-għan ta' l-Aġenzija huwa li tipprovdi lill-istituzzjonijiet, korpi, uffiċċji u aġenziji rilevanti tal-Komunità u ta' l-Istati Membri tagħha meta jkunu qed jimplimentaw id-dritt Komunitarju, bl-assistenza u l-konsulenza relatati mad-drittijiet fundamentali sabiex tappoġġjahom meta jieħdu miżuri jew ifasslu strateġiji ta' azzjoni fl-oqsma ta' kompetenza rispettivi tagħhom sabiex jirrispettaw bis-sħiħ id-drittijiet fundamentali;

BILLI l-Aġenzija għandha tirriferi għad-drittijiet fundamentali meta tkun qed twettaq xogħolha skond it-tifsira ta' l-Artikolu 6 (2) tat-Trattat ta' l-Unjoni Ewropea, inklużi d-drittijiet u l-libertajiet garantiti mill-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali ta' l-4 ta' Novembru 1950;

BILLI l-Kunsill ta' l-Ewropa akkwista esperjenza estensiva u kompetenza fil-kooperazzjoni intergovernattiva u attivitajiet ta' assistenza fil-qasam tad-drittijiet umani, u stabbilixxa wkoll diversi mekkaniżmi ta' monitoraġġ u kontroll fuq id-drittijiet tal-bniedem, kif ukoll il-Kummissarju għad-Drittijiet tal-Bniedem fil-Kunsill ta' l-Ewropa;

BILLI fit-twettiq ta' l-attivitajiet tiegħu l-Aġenzija għandha tikkunsidra, fejn ikun xieraq, attivitajiet li diġà saru mill-Kunsill ta' l-Ewropa;

BILLI l-Aġenzija għandha tikkoordina l-attivitajiet tagħha ma' dawk tal- Kunsill ta' l-Ewropa, sabiex tevita xogħol doppju u sabiex tiżgura kumplimentarjetà u valur miżjud, partikolarment fir-rigward tal-Programm Annwali ta' Ħidma u ta' kooperazzjoni mas-soċjetà ċivili;

BILLI għandhom jiġu stabbiliti rabtiet mill-qrib bejn l-Aġenzija u l-Kunsill ta' l-Ewropa konformement ma' l-Artikolu 9 tar-Regolament tal-Kunsill (KE) Nru 168/2007;

BILLI r-Rappreżentanti ta' l-Istati Membri ta' l-Unjoni Ewropea, li ltaqgħu fi ħdan il-Kunsill Ewropew tas-16 u s-17 ta' Diċembru 2004 qablu li l-Aġenżija għandu jkollha rwol prinċipali sabiex ittejjeb il-koerenza u l-konsistenza tal-Politika ta' l-UE dwar id-Drittijiet tal-Bniedem;

BILLI l-Linji Gwida dwar ir-relazzjonijiet bejn il-Kunsill ta' l-Ewropa u l-Unjoni Ewropea, adottati waqt it-Tielet Summit tal-Kunsill ta' l-Ewropa għall-Kapijiet ta' l-Istat u l-Gvern (Varsavja, 16-17 ta' Mejju 2005) jirriferu għall-Aġenzija bħala opportunità għal aktar kooperazzjoni mal-Kunsill ta' l-Ewropa u sabiex tikkontribwixxi għal aktar koerenza u iżjed komplementarjetà;

BILLI l-Memorandum ta' Ftehim bejn il-Kunsill ta' l-Ewropa u l-Unjoni Ewropea konkluż fit-23 ta' Mejju 2007 fih qafas ġenerali għall-kooperazzjoni fil-qasam tad-drittijiet tal-bniedem u tisħaq fuq ir-rwol tal-Kunsill ta' l-Ewropa bħala l-istandard li miegħu jitkejlu d-drittijiet tal-bniedem, l-istat tad-dritt u d-demokrazija fl-Ewropa;

BILLI, konformement mal-Memorandun ta' Ftehim, l-Aġenzija tirrispetta l-unità, il-validità u l-effikaċja ta' l-istrumenti użati mill-Kunsill ta' l-Ewropa sabiex isir monitoraġġ tal-protezzjoni tad-drittjiet tal-bniedem fl-Istati Membri tagħha;

BILLI għandu jkun il-Kunsill ta' l-Ewropa li jaħtar persuna indipendenti sabiex isservi fuq il-Bord ta' Amministrazzjoni ta' l-Aġenzija u fuq il-Bord Eżekuttiv,

FTIEHMU KIF ĠEJ:

I.   Użu ta' termini

1.

Għall-finijiet ta' dan il-Ftehim: (a) it-terminu “il-kumitati intergovenattivi tal-Kunsill ta' l-Ewropa” għandu jfisser kull kumitat jew korp imwaqqaf mill-Kumitat tal-Ministri, jew bl-awtorizzazzjoni tiegħu, skond l-Artikolu 15 (a), 16 jew 17 ta' l-Istatut tal-Kunsill ta' l-Ewropa; (b) it-terminu “il-kumitati ta' monitoraġġ għad-drittijiet tal-bniedem tal-Kunsill ta' l-Ewropa” għandu jfisser il-Kumitat Ewropew għad-Drittijiet Soċjali, il-Kumitat Ewropew għall-Prevenzjoni tat-Tortura u ta' Trattament jew Kastig Inuman jew Degradanti, il-Kummissjoni Ewropea kontra r-Razziżmu u l-Intolleranza, il-Kumitat ta' l-Esperti dwar il-Karta Ewropea għal-Lingwi Reġjonali jew Minoritarji, il-Kumitat Konsultattiv għall-Konvenzjoni Kwadru għall-Protezzjoni ta' Minoritajiet Nazzjonali u kull korp indipendenti ieħor bħal dawn li l-Kunsill ta' l-Ewropa jista' jwaqqaf fil-futur. (ċ) it-terminu “Aġenzija” għandu jfisser il-korpi msemmija fl-Artikolu 11 tar-Regolament tal-Kunsill (KE) Nru 168/2007 fl-oqsma ta' kompetenza rispettivi tagħhom.

II.   Qafas ta' kooperazzjoni ġenerali

2.

Dan il-Ftehim jistabbilixxi qafas ta' kooperazzjoni bejn l-Aġenzija u l-Kunsill ta' l-Ewropa sabiex jiġi evitat xogħol doppju u biex jiżgura kumplimentarjetà u valur miżjud.

3.

Għandhom jiġu stabbiliti kuntatti regolari bejn l-Aġenzija u l-Kunsill ta' l-Ewropa fil-livell xieraq. Id-Direttur ta' l-Aġenzija u s-Segreterjat tal-Kunsill ta' l-Ewropa għandhom jaħtru persuna ta' kuntatt kull wieħed sabiex speċifikament tieħu ħsieb materji relatati mal-kooperazzjoni ta' bejniethom.

4.

Bħala regola ġenerali, ir-rappreżentanti tas-Segretarjat tal-Kunsill ta' l-Ewropa għandhom jiġu mistiedna mill-Bord Eżekuttiv ta' l-Aġenzija sabiex jattendu bħala osservaturi għal-laqgħat tal-Bord ta' Amministrazzjoni. Dan ma għandux ikun estiż għal punti partikolari fuq l-aġenda li għalihom, minħabba n-natura interna tagħhom, tali preżenza f'dawn il-laqgħat ma tkunx ġustifikata. Dawn ir-rappreżentanti jistgħu ikunu mistiedna għal laqgħat oħra organizzati mill-Bord ta' Amministrazzjoni ta' l-Aġenzija, inklużi dawk imsemmija fl-Artikolu 6(1) tar-Regolament tal-Kunsill (KE) Nru 168/2007.

5.

Ir-rappreżentanti ta' l-Aġenzija għandhom jiġu mistiedna sabiex jattendu bħala osservaturi f'laqgħat ta' dawk il-kumitati intergovernattivi tal-Kunsill ta' l-Ewropa li fihom tkun uriet interess l-Aġenzija. Fuq stedina mill-kumitat rilevanti, ir-rappreżentanti ta' l-Aġenzija jistgħu jattendu bħala osservaturi għal laqgħat jew skambji ta' ideat organizzati mill-kumitati ta' monitoraġġ dwar id-dritttijiet tal-bniedem tal-Kunsill ta' l-Ewropa jew minn kumitati mwaqqfa taħt ftehim parzjali. Ir-rappreżentanti ta' l-Aġenzija jistgħu jiġu wkoll mistiedna biex jieħdu sehem fi skambji ta' ideat organizzati mill-Kumitat tal-Ministri tal-Kunsill ta' l-Ewropa.

6.

Il-kooperazzjoni għandha tkopri wkoll il-firxa sħiħa ta' l-attivitajiet, kemm preżenti kif ukoll futuri, ta' l-Aġenzija.

III.   Skambju ta' informazzjoni u data

7.

Bla ħsara għar-regoli u l-protezzjoni tad-data li huma fis-seħħ għall-Aġenzija u l-Kunsill ta' l-Ewropa rispettivament, l-Aġenzija u l-Kunsill ta' l-Ewropa għandhom jipprovdu lil xulxin bl-informazzjoni u d-data miġbura waqt l-attivitajiet tagħhom, inkluż l-aċċess għall-informazzjoni online. Informazzjoni u data hekk ipprovduta lil xulxin tista' tintuża mill-Aġenzija u mill-Kunsill ta' l-Ewropa fl-attivitajiet rispettivi tagħhom. Dawn id-dispożizzjonijiet m'humiex estiżi għal data kunfidenzjali prodotta u għal attivitajiet li jsiru.

8.

L-Aġenzija għandha tieħu kont debitu ta' sentenzi u deċiżjonijiet rilevanti tal-Qorti Ewropea tad-Drittijiet tal-Bniedem u fejn ikun xieraq tas-sejbiet, rapporti u attivitajiet tal-kumitati intergovernattivi u ta' monitoraġġ tad-drittijiet tal-bniedem tal-Kunsill ta' l-Ewropa, kif ukoll ta' dawk tal-Kummissarju tal-Kunsill ta' l-Ewropa għad-Drittijiet tal-Bniedem.

9.

Kull meta l-Aġenzija tuża l-informazzjoni meħuda mis-sorsi tal-Kunsill ta' l-Ewropa, hi għandha tindika l-oriġini u referenza għalih. Il-Kunsill ta' l-Ewropa għandu jipproċedi bl-istess mod meta juża' l-informazzjoni meħuda mis-sorsi ta' l-Aġenzija.

10.

L-Aġenzija u l-Kunsill ta' l-Ewropa għandhom jassiguraw, permezz tan-networks tagħhom, l-iktar disseminazzjoni wiesgħa possibbli tar-riżultati ta' l-attivitajiet rispettivi tagħhom fuq bażi reċiproka.

11.

L-Aġenzija u l-Kunsill ta' l-Ewropa għandhom jiżguraw skambji regolari ta' informazzjoni dwar attivitajiet proposti, mibdija jew kompluti.

IV.   Metodi ta' kooperazzjoni

12.

Għandhom jinżammu konsultazzjonijiet regolari bejn l-Aġenzija u s-Segretarjat tal-Kunsill ta' l-Ewropa, bil-għan li jiġu koordinati l-attivitajiet ta' l-Aġenzija, b'mod partikolari fit-twettiq ta' riċerka u stħarriġ xjentifiku kif ukoll fit-tfassil ta' konklużjonijiet, opinjonijiet u rapporti, ma' dawk tal-Kunsill ta' l-Ewropa sabiex tkun żgurata l-komplementarjetà u l-aħjar użu tar-riżorsi disponibbli.

13.

Dawn il-konsultazzjonijiet għandhom jikkonċernaw partikolarment: (a) il-preparazzjoni tal-Programm Annwali ta' Ħidma ta' l-Aġenzija; (b) il-preparazzjoni tar-Rapport Annwali ta' l-Aġenzija dwar kwistjonijiet ta' drittijiet fundamentali koperti mill-oqsma ta' attività ta' l-Aġenzija; (ċ) il-kooperazzjoni mas-soċjetà ċivili, b'mod partikolari l-assoċjazzjoni tal-Kunsill ta' l-Ewropa ma' l-istabbiliment u l-funzjonament tal-Pjattaforma għad-Drittijiet Fundamentali ta' l-Aġenzija.

14.

Abbażi ta' dawn il-konsultazzjonijiet, jista' jiġi miftiehem li l-Aġenzija u l-Kunsill ta' l-Ewropa għandhom jagħmlu attivitajiet konġunti u/jew kumplimentari dwar suġġetti ta' interess komuni, bħall-organizzazzjoni ta' konferenzi jew workshops, il-ġbir u l-analiżi tad-data, jew it-twaqqif ta' sorsi jew prodotti kondiviżi ta' informazzjoni.

15.

Il-kooperazzjoni bejn l-Aġenzija u l-Kunsill ta' l-Ewropa tista' tiġi promossa aktar permezz ta' għotjiet mogħtija mill-Aġenzija jew mill-Kunsill ta' l-Ewropa. Għandu jkun applikabbli l-Ftehim Qafas ta' l-2004 dwar l-Amministrazzjoni bejn il-Kummissjoni Ewropea u l-Kunsill ta' l-Ewropa dwar il-klawsola fuq spezzjonijiet finanzjarji ta' operazzjonijiet amministrati mill-Kunsill ta' l-Ewropa u/jew ko-finanzjati mill-Komunità Ewropea.

16.

Jistgħu jsiru skambji temporanji tal-persunal bejn l-Aġenzija u l-Kunsill ta' l-Ewropa bi ftehim bejn is-Segretarju Ġenerali tal-Kunsill ta' l-Ewropa u d-Direttur ta' l-Aġenzija sa fejn jippermettu r-regolamenti relevanti tal-persunal li jkunu applikabbli.

V.   Ħatra mill-Kunsill ta' l-Ewropa ta' persuna indipendenti sabiex isservi fuq il-Bordijiet ta' Amministrazzjoni u Eżekuttivi ta' l-Aġenzija

17.

Is-Segretarju Ġenerali tal-Kunsill ta' l-Ewropa għandu jaħtar persuna indipendenti sabiex isservi fuq bordijiet Eżekuttivi u ta' Amministrazzjoni ta' l-Aġenzija, flimkien ma' membru supplenti. Il-persuni maħtura mill-Kunsill ta' l-Ewropa għandu jkollhom l-esperjenza meħtieġa fl-amministrazzjoni ta' organizzazzjonijiet tas-settur pubbliku jew privat u konoxxenza tal-qasam tad-drittijiet fundamentali.

18.

Il-Kunsill ta' l-Ewropa għandu jinnotifika lill-Aġenzija u lill-Kummissjoni Ewropea bil-ħatriet li jsiru.

19.

Il-persuna maħtura mill-Kunsill ta' l-Ewropa fuq il-Bord ta' Amministrazzjoni għandha tiġi mistiedna sabiex tipparteċipa fil-laqgħat tal-Bord Eżekuttiv. L-opinjonijiet tiegħu għandhom ikunu kkunsidrati sew, speċjalment sabiex tkun żgurata l-komplementarjetà u l-valur miżjud bejn l-attivitajiet ta' l-Aġenzija u dawk tal-Kunsill ta' l-Ewropa. Huwa għandu jkollu dritt li jivvota fil-Bord Eżekuttiv fir-rigward tal-preparazzjonijiet tad-deċiżjonijiet tal-Bord ta' Amministrazzjoni li dwarhom huwa jkun jista' jivvota skond l-Artikolu 12(8) tar-Regolament tal-Kunsill (KE) Nru 168/2007.

VI.   Dispożizzjonijiet ġenerali u finali

20.

F'dan il-Ftehim xejn ma jista' jiġi interpretat li jżomm lill-Partijiet milli jwettqu l-attivitajiet rispettivi tagħhom.

21.

Dan il-Ftehim iħassar u jieħu post il-Ftehim ta' l-10 ta' Frar 1999 bejn il-Komunità Ewropea u l-Kunsill ta' l-Ewropa bil-għan li jistabbilixxi, skond l-Artikolu 7(3) tar-Regolament tal-Kunsill (KE) Nru 1035/97 tat-2 ta' Ġunju 1997 li jwaqqaf Ċentru Ewropew ta' Monitoraġġ tar-Razziżmu u l-Ksenofobija, kooperazzjoni mill-qrib bejn iċ-Ċentru u l-Kunsill ta' l-Ewropa.

22.

Dan il-Ftehim għandu jidħol fis-seħħ ma' l-iffirmar mir-rappreżentanti debitament awtorizzati tal-Partijiet.

23.

Dan il-Ftehim jista' jiġi emendat b'kunsens reċiproku bejn il-Partijiet. Il-Partijiet għandhom jivvalutaw l-implimentazzjoni ta' dan il-Ftehim sa mhux aktar tard mill-31 ta' Diċembru 2013 bil-ħsieb li jekk ikun meħtieġ dan jiġi rivedut.

TRADUZZJONI

FTEHIM INTERNAZZJONALI TAL-KAFÈ 2007

WERREJ

Artikolu

Preambolu

15

KAPITOLU 1 –   GĦANIJIET

1.

Għanijiet

15

KAPITOLU II –   DEFINIZZJONIJIET

2.

Definizzjonijiet

16

KAPITOLU III –   IMPENNI ĠENERALI MILL-MEMBRI

3.

Impenni ġenerali mill-Membri

17

KAPITOLU IV –   SĦUBIJA

4.

Sħubija fl-Organizzazzjoni

17

5.

Sħubija fi grupp

17

KAPITOLU V –   L-ORGANIZZAZZJONI INTERNAZZJONALI TAL-KAFÈ

6.

Sede u struttura ta’ l-Organizzazzjoni Internazzjonali tal-Kafè

17

7.

Privileġġi u immunitajiet

17

KAPITOLU VI –   IL-KUNSILL INTERNAZZJONALI TAL-KAFÈ

8.

Kompożizzjoni tal-Kunsill Internazzjonali tal-Kafè

18

9.

Poteri u funzjonijiet tal-Kunsill

18

10.

President u Viċi-President tal-Kunsill

18

11.

Sessjonijiet tal-Kunsill

18

12.

Voti

19

13.

Proċedura tal-votazzjoni tal-Kunsill

19

14.

Deċiżjonijiet tal-Kunsill

19

15.

Kooperazzjoni ma’ organizzazzjonijiet oħrajn

19

16.

Kooperazzjoni ma’ organizzazzjonijiet mhux governattivi

20

KAPITOLU VII –   ID-DIRETTUR EŻEKUTTIV U L-PERSUNAL

17.

Id-Direttur Eżekuttiv u l-persunal

20

KAPITOLU VIII –   FINANZI U AMMINISTRAZZJONI

18.

Kumitat tal-Finanzi u l-Amministrazzjoni

20

19.

Finanzi

20

20.

Determinazzjoni tal-Baġit Amministrattiv u valutazzjoni tal-kontribuzzjonijiet

20

21.

Ħlas tal-kontribuzzjonijiet

21

22.

Passiv

21

23.

Verifika u pubblikazzjoni tal-kotba

21

KAPITOLU IX –   PROMOZZJONI U ŻVILUPP TAS-SUQ

24.

Tneħħija ta’ l-ostakoli għall-kummerċ u l-konsum

21

25.

Promozzjoni u żvilupp tas-suq

22

26.

Miżuri relatati mal-kafè pproċessat

22

27.

Taħlitiet u sostituti

22

KAPITOLU X –   ATTIVITAJIET TA’ PROĠETTI TA’ L-ORGANIZZAZZJONI

28.

Żvilupp u ffinanzjar tal-proġetti

22

KAPITOLU XI –   IS-SETTUR PRIVAT TAL-KAFÈ

29.

Il-Bord Konsultattiv tas-Settur Privat

22

30.

Il-Konferenza Dinjija tal-Kafè

23

31.

Il-Forum Konsultattiv dwar il-Finanzjament tas-Settur tal-Kafè

23

KAPITOLU XII –   INFORMAZZJONI STATISTIKA, STUDJI U STĦARRIĠ

32.

Informazzjoni statistika

23

33.

Ċertifikati ta’ l-Oriġini

24

34.

Studji, stħarriġ u rapporti

24

KAPITOLU XIII –   DISPOŻIZZJONIJIET ĠENERALI

35.

Preparazzjonijiet għal Ftehim ġdid

24

36.

Settur sostenibbli tal-kafè

25

37.

Standard ta’ l-għajxien u kundizzjonijiet ta’ xogħol

25

KAPITOLU XIV –   KONSULTAZZJONIJIET, TILWIMIET U LMENTI

38.

Konsultazzjonijiet

25

39.

Tilwimiet u lmenti

25

KAPITOLU XV –   DISPOŻIZZJONIJIET FINALI

40.

Firma u ratifika, aċċettazzjoni jew approvazzjoni

25

41.

Applikazzjoni provviżorja

25

42.

Dħul fis-seħħ

25

43.

Adeżjoni

26

44.

Riżervi

26

45.

Rtirar volontarju

26

46.

Esklużjoni

26

47.

Ħlas tal-kontijiet mal-Membri li jirtiraw jew li huma esklużi

26

48.

Dewmien, estensjoni u terminazzjoni

26

49.

Emenda

27

50.

Dispożizzjoni supplementarja u tranżitorja

27

51.

Testijiet awtentiċi tal-Ftehim

27

ANNESS

Fatturi tal-konverżjoni għall-kafè inkaljat, dekafeinat, likwidu u solubbli kif definit fil-Ftehim Internazzjonali tal-Kafè 2001

28

FTEHIM INTERNAZZJONALI TAL-KAFÈ 2007

PREAMBOLU

IL-GVERNIJIET LI HUMA PARTI GĦAL DAN IL-FTEHIM,

Filwaqt li jagħrfu l-importanza eċċezzjonali tal-kafè għall-ekonomiji ta’ pajjiżi li huma għall-parti l-kbira dipendenti fuq dan il-prodott bażiku għall-qliegħ mill-esportazzjoni u għall-kisba ta’ l-għanijiet soċjali u ta’ żvilupp ekonomiku tagħhom;

Filwaqt li jagħrfu l-importanza tas-settur tal-kafè għall-għajxien ta’ miljuni ta’ nies, b’mod partikolari fil-pajjiżi li qed jiżviluppaw, u filwaqt li jiftakru li f’bosta minn dawn il-pajjiżi l-produzzjoni hija fuq irziezet tal-familji fuq skala żgħira;

Filwaqt li jagħrfu l-kontribuzzjoni ta’ settur sostenibbli tal-kafè għall-kisba ta’ għanijiet ta’ żvilupp miftiehma internazzjonalment, inklużi l-Għanijiet ta’ l-Iżvilupp tal-Millenju (MDGs), b’mod partikolari fir-rigward ta’ l-eradikazzjoni tal-faqar;

Filwaqt li jagħrfu l-ħtieġa li jiġi inkoraġġut l-iżvilupp sostenibbli tas-settur tal-kafè, li jwassal għal impjiegi u dħul aħjar, u għal standards ta’ l-għajxien u kundizzjonijiet tax-xogħol imtejba fil-pajjiżi Membri;

Filwaqt li jqisu li l-kooperazzjoni internazzjonali mill-qrib dwar kwistjonijiet tal-kafè, inkluż il-kummerċ internazzjonali, tista’ tinkoraġġixxi settur tal-kafè globali ekonomikament diversifikat, l-iżvilupp ekonomiku u soċjali tal-pajjiżi li jipproduċuh, l-iżvilupp tal-produzzjoni tal-kafè u l-konsum, u relazzjonijiet imtejba bejn il-pajjiżi li jesportaw il-kafè u dawk li jimportawh;

Filwaqt li jqisu li l-kollaborazzjoni bejn il-Membri, l-organizzazzjonijiet internazzjonali, is-settur privat u l-partijiet interessati l-oħrajn kollha tista’ tikkontribwixxi għall-iżvilupp tas-settur tal-kafè;

Filwaqt li jagħrfu li l-aċċess akbar għall-informazzjoni dwar il-kafè u strateġiji ta’ l-immaniġġjar tar-riskju bbażati fis-suq jistgħu jgħinu biex jiġu evitati l-iżbilanċi fil-produzzjoni u l-konsum tal-kafè li jistgħu jwasslu għal volatilità distinta tas-suq li tista’ tagħmel il-ħsara kemm lill-produtturi kif ukoll lill-konsumaturi; u

Filwaqt li jinnutaw il-vantaġġi derivati mill-kooperazzjoni internazzjonali li rriżultat mill-ħidma ta’ l-Istrumenti ta’ ftehim Internazzjonali tal-Kafè 1962, 1968, 1976, 1983, 1994 u 2001,

FTIEHMU KIF ĠEJ:

KAPITOLU I

GĦANIJIET

Artikolu 1

Għanijiet

L-għan ta’ dan il-Ftehim huwa li jsaħħaħ is-settur globali tal-kafè u jippromwovi l-espansjoni sostenibbli f’ambjent ibbażat fuq is-suq għat-titjib tal-parteċipanti kollha fis-settur, billi:

(1)	tiġi promossa l-kooperazzjoni internazzjonali dwar kwistjonijiet tal-kafè;

(2)	jitwaqqaf forum għall-konsultazzjonijiet dwar kwistjonijiet tal-kafè fost il-gvernijiet, u mas-settur privat;

(3)	il-membri jiġu mħeġġa jiżviluppaw settur sostenibbli tal-kafè f’termini ekonomiċi, soċjali u ambjentali;

(4)

jiġi pprovdut forum għal konsultazzjonijiet li jfittxu fehim fir-rigward ta’ kundizzjonijiet strutturali fis-swieq internazzjonali u tendenzi fiż-żmien twil fil-produzzjoni u l-konsum li jibbilanċjaw il-provvista u d-domanda, u li jirriżultaw fi prezzijiet li huma ġusti kemm għall-konsumaturi kif ukoll għall-produtturi;

(5)	tiġi ffaċilitata l-espansjoni u t-trasparenza tal-kummerċ internazzjonali fit-tipi u l-forom kollha tal-kafè, u l-promozzjoni ta’ l-eliminazzjoni ta’ l-ostakoli għall-kummerċ;

(6)	tinġabar, tixxerred u tiġi ppubblikata informazzjoni ekonomika, teknika u xjentifika, statistika u studji kif ukoll ir-riżultati tar-riċerka u l-iżvilupp fi kwistjonijiet tal-kafè;

(7)	jiġi promoss l-iżvilupp tal-konsum u s-swieq għat-tipi u l-forom kollha tal-kafè, inkluż fil-pajjiżi li jipproduċu l-kafè;

(8)	jiġi żviluppat, jiġi vvalutat u jiġu mfittxija l-finanzi għal proġetti li jibbenefikaw lill-Membri u lill-ekonomija dinjija tal-kafè;

(9)	tkun promossa l-kwalità tal-kafè bl-għan li jitjieb is-sodisfazzjon tal-konsumatur u l-benefiċċji għall-produtturi;

(10)	il-Membri jiġu mħeġġa jiżviluppaw proċeduri xierqa dwar is-sigurtà ta’ l-ikel fis-settur tal-kafè;

(11)	ikunu promossi programmi ta’ taħriġ u informazzjoni mfassla biex jiġi assistit it-trasferiment lill-Membri tat-teknoloġija rilevanti għall-kafè;

(12)	il-membri jiġu mħeġġa jiżviluppaw u jimplimentaw strateġiji biex itejbu l-kapaċità tal-komunitajiet lokali u l-bdiewa fuq skala żgħira li jibbenefikaw mill-produzzjoni tal-kafè, li tista’ tikkontribwixxi għat-tnaqqis tal-faqar; u

(13)	tkun iffaċilitata d-disponibbiltà ta’ l-informazzjoni dwar għodda u servizzi finanzjarji li jistgħu jgħinu lill-produtturi tal-kafè, inkluż aċċess għall-kreditu u metodi ta’ l-immaniġġjar tar-riskju.

KAPITOLU II

DEFINIZZJONIJIET

Artikolu 2

Definizzjonijiet

Għall-iskopijiet ta’ dan il-Ftehim:

(1)

Kafè tfisser iż-żerriegħa u ċ-ċirasa tas-siġra tal-kafè, kemm jekk parċmina, ħodor jew inkaljata, u tinkludi kafè mitħun, dekafeinat, likwidu u solubbli. Il-Kunsill għandu, mill-aktar fis possibbli wara li jidħol fis-seħħ dan il-Ftehim, u mill-ġdid f’intervalli ta’ tliet snin, jirrevedi l-fatturi ta’ konverżjoni għat-tipi ta’ kafè elenkati fis-subparagrafi (d), (e), (f) u (g) hawn taħt. Wara dan l-istħarriġ il-Kunsill għandu jiddetermina u jippubblika fatturi xierqa tal-konverżjoni. Qabel l-istħarriġ inizjali, u jekk il-Kunsill ma jkunx jista’ jilħaq deċiżjoni dwar din il-kwistjoni, il-fatturi tal-konverżjoni għandhom ikunu dawk użati fil-Ftehim Internazzjonali tal-Kafè 2001, li huma elenkati fl-Anness ta’ dan il-Ftehim. Soġġett għal dawn id-dispożizzjonijiet, it-termini elenkati hawn taħt għandu jkollhom it-tifsira li ġejja: (a) kafè aħdar tfisser il-kafè kollu fil-forma taż-żerriegħa għerja qabel ma tinxtewa; (b) ċirasa tal-kafè mnixxfa tfisser il-frotta mnixxfa tas-siġra tal-kafè; biex issib l-ekwivalenti taċ-ċirasa tal-kafè mnixxfa għall-kafè aħdar, immultiplika l-piż nett taċ-ċirasa tal-kafè mnixxfa b’0.50; (ċ) kafè parċmina tfisser iż-żerriegħa ħadra li tinsab fil-ġilda tal-parċmina; biex issib l-ekwivalenti tal-kafè parċmina għall-kafè aħdar, immultiplika l-piż nett tal-kafè parċmina b’0.80; (d) kafè inkaljat tfisser kafè aħdar inkaljat għal kwalunkwe grad u jinkludi l-kafè mitħun; (e) kafè dekafeinat tfisser kafè aħdar, inkaljat jew solubbli li minnu tneħħiet il-kafeina; (f) kafè likwidu tfisser is-solidi solubbli fl-ilma dderivati mill-kafè mitħun u mqiegħda f’forma likwida; (ġ) kafè solubbli tfisser is-solidi mnixxfa solubbli fl-ilma dderivati mill-kafè inkaljat.

(2)	Borża tfisser 60 kilogramma jew 132,276 libbra ta’ kafè aħdar; tunnellata tfisser massa ta’ 1 000 kilogramma jew 2 204,6 libbra; u libbra tfisser 453,597 gramma.

(3)	Sena tal-kafè tfisser il-perjodu ta’ sena, mill-1 ta’ Ottubru sat-30 ta’ Settembru.

(4)	Organizzazzjoni u Kunsill ifissru, rispettivament, l-Organizzazzjoni Internazzjonali tal-Kafè u l-Kunsill Internazzjonali tal-Kafè.

(5)

Parti Kontraenti tfisser Gvern, il-Komunità Ewropea, jew kwalunkwe organizzazzjoni intergovernattivi msemmija fl-Artikolu 4(3) li ddepożita(t) strument ta’ ratifika, aċċettazzjoni, approvazzjoni jew notifika ta’ applikazzjoni provviżorja ta’ dan il-Ftehim skond id-dispożizzjonijiet ta’ l-Artikoli 40, 41 u 42 jew li aderixxa/iet għalih skond id-dispożizzjonijiet ta’ l-Artikolu 43.

(6)	Membru tfisser Parti Kontraenti.

(7)	Membru li jesporta jew pajjiż li jesporta tfisser Membru jew pajjiż, rispettivament, li huwa esportatur nett tal-kafè; jiġifieri Membru jew pajjiż li l-esportazzjoni tiegħu teċċedi l-importazzjoni.

(8)	Membru li jimporta jew pajjiż li jimporta tfisser Membru jew pajjiż, rispettivament, li huwa importatur nett tal-kafè; jiġifieri Membru jew pajjiż li l-importazzjoni tiegħu teċċedi l-esportazzjoni.

(9)	Vot tal-maġġoranza distribwit tfisser vot li jeħtieġ 70 % jew aktar mill-voti tal-Membri li jivvotaw, li huma preżenti u li qed jivvotaw u 70 % jew aktar tal-voti tal-Membri li jimportaw, li huma preżenti u li qed jivvotaw, magħduda separatament.

(10)

Depożżitarju tfisser l-organizzazzjoni intergovernattiva jew Parti Kontraenti għall-Ftehim Internazzjonali tal-Kafè 2001 indikat mid-deċiżżjoni tal-Kunsill taħt il-Ftehim Internazzjonali tal-Kafè 2001, li għandha tittieħed b’kunsens ġenerali qabel l-31 ta’ Jannar 2008. Din id-deċiżjoni għandha tifforma parti integrali minn dan il-Ftehim.

KAPITOLU III

IMPENNI ĠENERALI MILL-MEMBRI

Artikolu 3

Impenni ġenerali mill-Membri

1.   Il-Membri jintrabtu li jadottaw dawk il-miżuri meħtieġa biex ikunu jistgħu jwettqu l-obbligi tagħhom taħt dan il-Ftehim u jikkooperaw għal kollox ma’ xulxin biex jiżguraw il-kisba ta’ l-għanijiet ta’ dan il-Ftehim; b’mod partikolari, il-Membri jintrabtu li jipprovdu l-informazzjoni kollha meħtieġa biex jiffaċilitaw il-ħidma ta’ dan il-Ftehim.

2.   Il-Membri jagħrfu li ċ-Ċertifikati ta’ l-Oriġini huma għejun importanti ta’ informazzjoni dwar il-kummerċ tal-kafè. Il-Membri li Jesportaw, għalhekk, jassumu r-responsabblità biex jiżguraw il-ħruġ u l-użu xierqa taċ-Ċertifikati ta’ l-Oriġini skond ir-regoli stabbiliti mill-Kunsill.

3.   Il-Membri jagħrfu wkoll li l-informazzjoni dwar l-esportazzjonijiet mill-ġdid hija wkoll importanti għall-analiżi xierqa ta’ l-ekonomija dinjija tal-kafè. Għalhekk il-Membri li jimportaw jintrabtu li jipprovdu informazzjoni regolari u preċiża dwar l-esportazzjonijiet mill-ġdid, fil-forma u fil-mod iddeterminat mill-Kunsill.

KAPITOLU IV

SĦUBIJA

Artikolu 4

Sħubija fl-Organizzazzjoni

1.   Kull Parti Kontraenti għandha tikkostitwixxi Membru uniku ta’ l-Organizzazzjoni.

2.   Membru jista’ jibdel il-kategorija ta’ l-isħubija tiegħu f’dawk il-kundizzjonijiet li jista’ jiftiehem il-Kunsill.

3.   Kwalunkwe referenza f’dan il-Ftehim għal Gvern ghandha tinftiehem li tinkludi lill-Komunità Ewropea u lil kwalunkwe organizzazzjoni intergovernattiva li għandha l-kompetenza esklussiva fir-rigward tan-negozjar, il-konklużjoni u l-applikazzjoni ta’ dan il-Ftehim.

Artikolu 5

Sħubija fi grupp

Żewġ Partijiet Kontraenti jew aktar jistgħu, b’notifika xierqa lill-Kunsill u lid-Depożitarju, li tidħol fis-seħħ minn data li għandha tiġi speċifikata mill-Partijiet Kontraenti kkonċernati, u fuq kundizzjonijiet li jaqbel magħhom il-Kunsill, jiddikjaraw li qed jieħdu sehem fl-Organizzazzjoni bħala grupp ta’ Membri.

KAPITOLU V

L-ORGANIZZAZZJONI INTERNAZZJONALI TAL-KAFÈ

Artikolu 6

Sede u struttura ta’ l-Organizzazzjoni Internazzjonali tal-Kafè

1.   L-Organizzazzjoni Internazzjonali tal-Kafè stabbilita skond il-Ftehim Internazzjonali tal-Kafè 1962 għandha tkompli teżisti biex tamministra d-dispożizzjonijiet u tissorvelja l-operat ta’ dan il-Ftehim.

2.   Is-sede ta’ l-Organizzazzjoni għandu jkun f’Londra kemm-il darba l-Kunsill ma jiddeċidix mod ieħor.

3.   L-ogħla awtorità ta’ l-Organizzazzjoni għandha tkun il-Kunsill Internazzjonali tal-Kafè. Il-Kunsill għandu jkun assistit kif xieraq mill-Kumitat tal-Finanzi u l-Amministrazzjoni, il-Kumitat tal-Promozzjoni u l-Iżvilupp tas-Suq u l-Kumitat dwar il-Proġetti. Il-Kunsill għandu wkoll jingħata pariri mill-Bord Konsultattiv dwar is-Settur Privat, il-Konferenza Dinjija tal-Kafè u l-Forum Konsultattiv dwar il-Finanzjament tas-Settur tal-Kafè.

Artikolu 7

Privileġġi u immunitajiet

1.   L-Organizzazzjoni għandu jkollha personalità ġuridika. Din għandha b’mod partikolari jkollha l-kapaċità li tikkuntratta, takkwista u tiddisponi minn proprjetà mobbli u immobbli u li tressaq proċeduri legali.

2.   L-istat, il-privileġġi u l-immuntiajiet ta’ l-Organizzazzjoni, tad-Direttur Eżekuttiv tagħha, il-persunal u l-esperti tagħha, u tar-rappreżentanti tal-Membri meta jinsabu fit-territorju tal-pajjiż li jospita għall-iskopijiet ta’ l-eżerċizzju tal-funzjonijiet tagħhom, għandhom ikunu rregolati minn Ftehim tal-Kwartieri Ġenerali konkluż bejn il-Gvern li jospita u l-Organizzazzjoni.

3.   Il-Ftehim tal-Kwartieri Ġenerali msemmi fil-paragrafu (2) ta’ dan l-Artikolu għandu jkun indipendenti minn dan il-Ftehim. Iżda dan għandu jintemm:

(a)	bi ftehim bejn il-Gvern li jospita u l-Organizzazzjoni;

(b)	fil-każ li l-kwartieri ta’ l-Organizzazzjoni jiċċaqalqu mit-territorju tal-Gvern li jospita; jew

(ċ)	fil-każ li l-Organizzazzjoni tieqaf teżisti.

4.   L-Organizzazzjoni tista’ tikkonkludi ma’ Membru wieħed jew aktar strumenti ta’ ftehim li għandhom jiġu approvati mill-Kunsill dwar dawk il-privileġġi u immunitajiet li jistgħu jkunu neċessarji għat-tħaddim tajjeb ta’ dan il-Ftehim.

5.   Il-Gvernijiet tal-pajjiżi Membri minbarra l-Gvern li jospita għandhom jagħtu lill-Organizzazzjoni l-istess faċilitajiet fir-rigward ta’ restrizzjonijiet dwar munita jew skambju, żamma tal-kontijiet fil-bank, u trasferiment ta’ flus, kif jingħataw lill-aġenziji speċjalizzati tan-Nazzjonijiet Uniti.

KAPITOLU VI

IL-KUNSILL INTERNAZZJONALI TAL-KAFÈ

Artikolu 8

Kompożizzjoni tal-Kunsill Internazzjonali tal-Kafè

1.   Il-Kunsill Internazzjonali tal-Kafè għandu jikkonsisti mill-Membri kollha ta’ l-Organizzazzjoni.

2.   Kull Membru għandu jaħtar rappreżentant wieħed fuq il-Kunsill u, jekk jixtieq, sostitut wieħed jew aktar. Membru jista’ wkoll jaħtar konsulent wieħed jew aktar għar-rappreżentant jew sostituti tiegħu.

Artikolu 9

Poteri u funzjonijiet tal-Kunsill

1.   Il-poteri kollha speċifikament mogħtija minn dan il-Ftehim għandhom ikunu vestiti fil-Kunsill, li għandu jwettaq il-funzjonijiet neċessarji biex iwettaq id-dispożizzjonijiet ta’ dan il-Ftehim.

2.   Il-Kunsill jista’ jistabbilixxi u jxolji Kumitati u korpi sussidjarji, kif xieraq, barra minn dawk provduti fl-Artikolu 6(3).

3.   Il-Kunsill għandu jistabbilixxi dawk ir-regoli u r-regolamenti, inklużi r-regoli tal-proċedura tiegħu stess u r-regolamenti finanzjarji u tal-persunal ta’ l-Organizzazzjoni, li huma meħtieġa biex jitwettqu d-dispożizzjonijiet ta’ dan il-Ftehim u li huma konsistenti miegħu. Il-Kunsill jista’, fir-regoli tal-proċedura tiegħu, jipprovdi l-mezzi li bihom jista’, mingħajr ma jiltaqa’, jiddeċiedi kwistjonijiet speċifiċi.

4.   Il-Kunsill għandu jistabbilixxi fuq bażi regolari pjan ta’ azzjoni strateġiku biex jiggwida xogħlu u jidentifika l-prijoritajiet, inklużi l-prijoritajiet għall-attivitajiet ta’ proġetti mibdija skond l-Artikolu 28 u studji, stħarriġ u rapporti mibdija skond l-Artikolu 34. Il-prijoritajiet identifikati fil-pjan ta’ azzjoni għandhom ikunu riflessi fil-programmi ta’ ħidma annwali approvati mill-Kunsill.

5.   Il-Kunsill għandu wkoll iżomm ir-rekords meħtieġa sabiex iwettaq il-funzjonijiet tiegħu skond dan il-Ftehim u rekords oħrajn li jqis li huma mixtieqa.

Artikolu 10

President u Viċi-President tal-Kunsill

1.   Il-Kunsill għandu jeleġġi, għal kull sena tal-kafè, President u Viċi-President li m’għandhomx jitħallsu mill-Organizzazzjoni.

2.   Il-President għandu jiġi elett jew minn fost ir-rappreżentanti tal-Membri li jesportaw jew minn fost ir-rappreżentanti tal-Membri li jimportaw, u l-Viċi-President għandu jiġi elett minn fost ir-rappreżentanti tal-kategorija l-oħra ta’ Membru. Dawn il-pożizzjonijiet għandhom jalternaw kull sena tal-kafè bejn iż-żewġ kategoriji ta’ Membru.

3.   La l-President u lanqas il-Viċi-President li jaġixxi bħala President m’għandu jkollhom id-dritt li jivvotaw. Is-sostitut tiegħu jew tagħha għandu f’dan il-każ jeżerċita d-dritt tal-votazzjoni tal-Membru.

Artikolu 11

Sessjonijiet tal-Kunsill

1.   Il-Kunsill għandu jagħmel żewġ sessjonijiet regolari fis-sena u, jekk jiddeċiedi, sessjonijiet speċjali. Jista’ jagħmel sessjonijiet speċjali fuq talba ta’ kwalunkwe għaxar Membri. L-avviż dwar is-sessjonijiet għandu jingħata mill-inqas 30 jum minn qabel ħlief fil-każijiet ta’ emerġenza meta dan l-avviż għandu jingħata mill-inqas għaxart ijiem minn qabel.

2.   Is-sessjonijiet għandhom isiru fis-sede ta’ l-Organizzazzjoni, kemm-il darba l-Kunsill ma jiddeċidix mod ieħor. Jekk Membru jistieden lill-Kunsill jiltaqa’ fit-territorju tiegħu, u l-Kunsill jaqbel, l-ispejjeż addizzjonali involuti għall-Organizzazzjoni li jkunu akbar minn dawk magħmula meta s-sessjoni ssir fis-sede jitħallsu minn dak il-Membru.

3.   Il-Kunsill jista’ jistieden lil kwalunkwe pajjiż mhux membru jew kwalunkwe mill-organizzazzjonijiet imsemmija fl-Artikoli 15 u 16 jattendu kwalunkwe mis-sessjonijiet tiegħu bħala osservatur. F’kull sessjoni, il-Kunsill jista’ jiddeċiedi dwar l-ammissjoni ta’ l-osservaturi.

4.   Il-kworum meħtieġ biex sessjoni tal-Kunsill tieħu d-deċiżjonijiet għandu jkun il-preżenza ta’ aktar min-nofs in-numru ta’ Membri li jesportaw u li jimportaw li jirrappreżentaw rispettivament mill-inqas żewġ terzi tal-voti għal kull kategorija. Jekk mal-ftuħ ta’ sessjoni tal-Kunsill jew ta’ kwalunkwe laqgħa plenarja ma jkun hemm ebda kworum, il-President għandu jipposponi l-ftuħ tas-sessjoni jew tal-laqgħa plenarja għal mill-inqas sagħtejn. Jekk xorta ma jkunx għad hemm kworum fil-ħin il-ġdid stabbilit, il-President jista’ jerġa’ jipposponi l-ftuħ tas-sessjoni jew laqgħa plenarja għal mill-inqas sagħtejn oħra. Jekk fl-aħħar ta’ dan il-posponiment il-ġdid ma jkunx għad hemm kworum, il-kwistjoni li dwarha huma meħtieġa d-deċiżjonijiet għandha tkun differita għas-sessjoni li jmiss tal-Kunsill.

Artikolu 12

Voti

1.   Il-Membri li jesportaw għandhom flimkien ikollhom 1 000 vot u l-Membri li jimportaw għandhom flimkien ikollhom 1 000 vot, imqassma f’kull kategorija ta’ Membru – jiġifieri l-Membri li jesportaw u dawk li jimportaw, rispettivament – kif provdut fil-paragrafi li ġejjin ta’ dan l-Artikolu.

2.   Kull Membru għandu jkollu ħames voti bażiċi.

3.   Il-bqija tal-voti tal-Membri li jesportaw għandhom jitqassmu fost dawk il-Membri bi proporzjon tal-medja tal-volum ta’ l-esportazzjonijiet rispettivi tagħhom tal-kafè lid-destinazzjonijiet kollha fl-erba’ snin tal-kalendarju ta’ qabel.

4.   Il-bqija tal-voti tal-Membri li jimportaw għandhom jitqassmu fost dawk il-Membri bi proporzjon tal-medja tal-volum ta’ l-importazzjonijiet rispettivi tagħhom tal-kafè kollha fl-erba’ snin tal-kalendarju ta’ qabel.

5.   Il-Komunità Ewropea jew kwalunkwe organizzazzjoni intergovernattiva kif definita fl-Artikolu 4(3) għandu jkollha voti daqs Membru wieħed; għandu jkollha ħames voti bażiċi u voti addizzjonali bi proporzjon għall-volum medju ta’ importazzjonijiet jew esportazzjonijiet tal-kafè tagħhom, fl-erba’ snin tal-kalendarju ta’ qabel.

6.   Id-distribuzzjoni tal-voti għandha tkun iddeterminata mill-Kunsill skond id-dispożizzjonijiet ta’ dan l-Artikolu fil-bidu ta’ kull sena tal-kafè u għandha tibqa’ fis-seħħ tul dik is-sena, ħlief kif provdut fil-paragrafu (7) ta’ dan l-Artikolu.

7.   Il-Kunsill għandu jipprovdi għad-distribuzzjoni mill-ġdid tal-voti skond id-dispożizzjonijiet ta’ dan l-Artikolu kull meta jkun hemm tibdil fl-isħubija ta’ l-Organizzazzjoni jew jekk id-drittijiet tal-votazzjoni ta’ Membru jkunu sospiżi jew miksuba mill-ġdid skond id-dispożizzjonijiet ta’ l-Artikolu 21.

8.   L-ebda Membru m’għandu jkollu żewġ terzi jew aktar mill-voti fil-kategorija tiegħu.

9.   M’għandu jkun hemm ebda voti frazzjonali.

Artikolu 13

Proċedura tal-votazzjoni tal-Kunsill

1.   Kull Membru għandu jkun intitolat li jitfa’ n-numru ta’ voti li għandu u m’għandux ikun intitolat jaqsam il-voti tiegħu. Iżda, Membru jista’ jitfa’ b’mod differenti kwalunkwe vot li għandu skond id-dispożizzjonijiet tal-paragrafu (2) ta’ dan l-Artikolu.

2.   Kwalunkwe Membru li jesporta jista’ jawtorizza bil-miktub lil kwalunkwe Membru ieħor li jesporta u kwalunkwe Membru li jimporta jista’ jawtorizza bil-miktub lil kwalunkwe Membru ieħor li jimporta, biex jirrappreżenta l-interessi tiegħu u jeżerċita d-dritt tiegħu li jivvota fi kwalunkwe laqgħa jew laqgħat tal-Kunsill.

Artikolu 14

Deċiżjonijiet tal-Kunsill

1.   Il-Kunsill għandu jipprova jieħu d-deċiżjonijiet kollha u jagħmel ir-rakkomandazzjonijiet kollha b’kunsens ġenerali. Jekk ma jistax jintlaħaq il-kunsens ġenerali, il-Kunsill għandu jieħu d-deċiżjonijiet u jagħmel ir-rakkomandazzjonijiet b’vot ta’ maġġoranza distribwita ta’ 70 % jew aktar tal-Membri li jesportaw, li huma preżenti u li jivvotaw, u 70 % jew aktar tal-Membri li jimportaw, li huma preżenti u li jivvotaw, magħduda separatament.

2.   Din il-proċedura għandha tgħodd fir-rigward ta’ kwalunkwe deċiżjoni mill-Kunsill meħuda b’vot ta’ maġġoranza distribwita:

(a)	jekk ma jinkisibx vot ta’ maġġoranza distribwita minħabba l-vot negattiv ta’ tliet pajjiżi li jesportaw jew inqas, jew tliet pajjiżi li jimportaw jew inqas, il-proposta għandha, jekk il-Kunsill jiddeċiedi b’maġġoranza tal-Membri preżenti, terġa’ titressaq għall-votazzjoni fi żmien 48 siegħa; u

(b)	jekk jerġa’ ma jinkisibx vot ta’ maġġoranza distribwita, il-proposta għandha titqies mhux approvata.

3.   Il-Membri jintrabtu li jaċċettaw bħala vinkolanti d-deċiżjonijiet kollha tal-Kunsill skond id-dispożizzjonijiet ta’ dan il-Ftehim.

Artikolu 15

Kooperazzjoni ma’ organizzazzjonijiet oħrajn

1.   Il-Kunsill jista’ jagħmel arranġamenti għall-konsultazzjoni u l-kooperazzjoni man-Nazzjonijiet Uniti u l-aġenziji speċjalizzati tagħha; ma’ organizzazzjiet intergovernattivi oħrajn xierqa; u ma’ organizzazzjonijiet internazzjonali u reġjonali rilevanti. Huwa għandu jieħu vantaġġ sħiħ mill-faċilitajiet tal-Fond Komuni għall-Prodotti Bażiċi u għejun oħrajn ta’ Finanzjament. Dawn l-arranġamenti jistgħu jinkludu arranġamenti finanzjarji li l-Kunsill iqis xierqa biex jikseb l-għanijiet tal-Ftehim. Madankollu, fir-rigward ta’ l-implimentazzjoni ta’ kwalunkwe proġett skond dawn l-arranġamenti, l-Organizzazzjoni m’għandhiex tidħol f’obbligi finanzjarji għall-garanziji mogħtija minn Membri individwali jew entitajiet oħrajn. Ebda Membru ma għandu jkun responsabbli minħabba l-isħubija tiegħu fl-Organizzazzjoni għal xi responsabblità li tirriżulta mit-teħid jew mill-għoti ta’ self minn Membru ieħor jew entità oħrajn b’konnessjoni ma’ dawn il-proġetti.

2.   Fejn possibbli, l-Organizzazzjoni tista’ wkoll tiġbor mill-Membri, non-Membri u minn aġenziji donaturi u oħrajn, informazzjoni dwar il-proġetti u l-programmi ta’ l-iżvilupp li jiffokaw fuq is-settur tal-kafè. Fejn xieraq, u bi ftehim mal-partijiet ikkonċernati, l-Organizzazzjoni tista’ tagħmel din l-informazzjoni disponibbli għal dawn l-organizzazjonijiet l-oħrajn kif ukoll għall-Membri.

Artikolu 16

Kooperazzjoni ma’ organizzazzjonijiet mhux governattivi

Fit-twettiq ta’ l-għanijiet ta’ dan il-Ftehim, l-Organizzazzjoni tista’, bla ħsara għad-dispożizzjonijiet ta’ l-Artikoli 15, 29, 30 u 31, tistabbilixxi u ssaħħaħ attivitajiet kooperattivi ma’ organizzazzjonijiet mhux governattivi xierqa li għandhom għarfien espert f’aspetti rilevanti tas-settur tal-kafè u ma’ esperti oħrajn fi kwistjonijiet tal-kafè.

KAPITOLU VII

ID-DIRETTUR EŻEKUTTIV U L-PERSUNAL

Artikolu 17

Id-Direttur Eżekuttiv u l-persunal

1.   Il-Kunsill għandu jaħtar id-Direttur Eżekuttiv. It-termini tal-ħatra tad-Direttur Eżekuttiv għandhom jiġu stabbiliti mill-Kunsill u għandhom ikunu paragunabbli ma’ dawk li jgħoddu għall-uffiċjali korrispondenti ta’ organizzazzjonijiet simili intergovernattivi.

2.   Id-Direttur Eżekuttiv għandu jkun l-uffiċjal amministrattiv ewlieni ta’ l-Organizzazzjoni u għandu jkun responsabbli għat-twettiq ta’ kwalunkwe dmir li jaqa’ fuqu fl-amministrazzjoni ta’ dan il-Ftehim.

3.   Id-Direttur Eżekuttiv għandu jaħtar lill-persunal ta’ l-Organizzazzjoni skond ir-regolamenti stabbiliti mill-Kunsill.

4.   La d-Direttur Eżekuttiv u lanqas xi membru tal-persunal ma għandu jkollu xi interess finanzjarju fl-industrija tal-kafè, fil-kummerċ tal-kafè jew fit-trasport tal-kafè.

5.   Fit-twettiq ta’ dmirijiethom, id-Direttur Eżekuttiv u l-persunal m’għandhomx jitolbu jew jirċievu istruzzjonijiet minn xi Membru jew minn xi awtorità oħra li hija esterna għall-Organizzazzjoni. Għandhom jiddeżistu minn kwalunkwe azzjoni li tista’ tirrifletti fuq il-pożizzjoni tagħhom bħala uffiċjali responsabbli biss lejn l-Organizzazzjoni. Kull Membru jintrabat li jirrispetta l-karattru internazzjonali esklussiv tar-responsabbiltajiet tad-Direttur Eżekuttiv u tal-persunal u mhux li jinfluwenzahom fit-twettiq tar-responsabbiltajiet tagħhom.

KAPITOLU VIII

FINANZI U AMMINISTRAZZJONI

Artikolu 18

Kumitat tal-Finanzi u l-Amministrazzjoni

Għandu jiġi stabbilit Kumitat tal-Finanzi u l-Amministrazzjoni. Il-Kunsill għandu jiddetermina l-kompożizzjoni u l-mandat tiegħu. Dan il-Kumitat għandu jkun responsabbli li jissorvelja l-Baġit Amministrattiv li għandu jiġi ppreżentat lill-Kunsill għall-approvazzjoni, u li jwettaq kwalunkwe kompitu ieħor li l-Kunsill jassenjalu li għandha tinkludi l-monitoraġġ tad-dħul u ta’ l-infiq u kwistjonijiet dwar l-amministrazzjoni ta’ l-Organizzazzjoni. Il-Kumitat tal-Finanzi u l-Amministrazzjoni għandu jirrapporta dwar il-proċedimenti tiegħu lill-Kunsill.

Artikolu 19

Finanzi

1.   L-ispejjeż tad-delegazzjonijiet lill-Kunsill u r-rappreżentanti ta’ kwalunkwe mill-kumitati tal-Kunsill għandhom jitħallsu mill-Gvernijiet rispettivi tagħhom.

2.   L-ispejjeż l-oħrajn meħtieġa ghall-amministrazzjoni ta’ dan il-Ftehim għandhom jitħallsu minn kontribuzzjonijiet annwali mill-Membri vvalutati skond id-dispożizzjonijiet ta’ l-Artikolu 20, flimkien ma’ dħul minn bejgħ ta’ servizzi speċifiċi lill-Membri u l-bejgħ ta’ informazzjoni u studji ġenerati skond id-dispożizzjonijiet ta’ l-Artikoli 32 u 34.

3.   Is-sena finanzjarja ta’ l-Organizzazzjoni għandha tkun l-istess bħas-sena tal-kafè.

Artikolu 20

Determinazzjoni tal-Baġit Amministrattiv u valutazzjoni tal-kontribuzzjonijiet

1.   Matul it-tieni nofs ta’ kull sena finanzjarja, il-Kunsill għandu japprova l-Baġit Amministrattiv ta’ l-Organizzazzjoni għas-sena finanzjarja ta’ wara u għandu jivvaluta l-kontribuzzjoni ta’ kull Membru għal dak il-Baġit. Għandu jiġi ppreparat abbozz ta’ Baġit Amministrattiv mid-Direttur Eżekuttiv taħt is-superviżjoni tal-Kumitat tal-Finanzi u l-Amministrazzjoni skond id-dispożizzjonijiet ta’ l-Artikolu 18.

2.   Il-kontribuzzjoni ta’ kull Membru għall-Baġit Amministrattiv għal kull sena finanzjarja għandha tkun skond il-proporzjon li jkollu l-għadd tal-voti tiegħu meta l-Baġit Amministrattiv għal dik is-sena finanzjarja jkun approvat mill-voti totali tal-Membri. Madankollu, jekk ikun hemm xi tibdil fid-distribuzzjoni tal-voti fost il-Membri skond id-dispożizzjonijiet ta’ l-Artikolu 12(6) fil-bidu tas-sena finanzjarja li għaliha huma vvalutati l-kontribuzzjonijiet, dawn il-kontribuzzjonijiet għandhom jiġu aġġustati b’mod korrispondenti għal dik is-sena. Fid-determinazzjoni tal-kontribuzzjonijiet, il-voti ta’ kull Membru għandhom jiġu kkalkolati mingħajr konsiderazzjoni għas-sospensjoni tad-drittijiet tal-votazzjoni ta’ kwalunkwe Membru jew għal kwalunkwe distribuzzjoni mill-ġdid tal-voti li tirriżulta minn dan.

3.   Il-kontribuzzjoni inizjali ta’ kwalunkwe Membru li jissieħeb fl-Organizzazzjoni wara d-dħul fis-seħħ ta’ dan il-Ftehim kif provdut fl-Artikolu 42 għandha tiġi vvalutata mill-Kunsill fuq bażi ta’ l-għadd ta’ voti li għandu jkollu u l-perjodu li fadal mis-sena finanzjarja kurrenti, iżda l-valutazzjonijiet magħmula fuq Membri oħrajn għas-sena finanzjarja kurrenti m’għandhomx jinbidlu.

Artikolu 21

Ħlas tal-kontribuzzjonijiet

1.   Il-kontribuzzjonijiet għall-Baġit Amministrattiv għal kull sena finanzjarja għandhom ikunu pagabbli f’munita liberament konvertibbli u għandhom isiru dovuti fl-ewwel jum ta’ dik is-sena finanzjarja.

2.   Jekk xi Membru jonqos li jħallas il-kontribuzzjoni sħiħa tiegħu lill-Baġit Amministrattiv fi żmien sitt xhur mid-data li fiha tkun dovuta l-kontribuzzjoni, id-drittijiet tal-votazzjoni tiegħu u d-dritt li jipparteċipa fil-laqgħat tal-kumitati speċjalizzati għandhom ikunu sospiżi sakemm il-kontribuzzjoni tkun tħallset kollha. Iżda, kemm-il darba l-Kunsill ma jiddeċidix mod ieħor, dan il-Membru m’għandux ikun imċaħħad mid-drittijiet l-oħrajn tiegħu u lanqas ma jinħeles mill-obbligi tiegħu skond dan il-Ftehim.

3.   Kwalunkwe Membru li d-drittijiet tal-votazzjoni tiegħu jkunu ġew sospiżi skond id-dispożizzjonijiet tal-paragrafu (2) ta’ dan l-Artikolu xorta għandu jibqa’ responsabbli għall-ħlas tal-kontribuzzjoni tiegħu.

Artikolu 22

Passiv

1.   L-Organizzazzjoni, fil-funzjoni tagħha kif speċifikata fl-Artikolu 6(3), m’għandux ikollha l-poter li tidħol f’xi obbligu barra mill-kamp ta’ applikazzjoni ta’ dan il-Ftehim, u m’għandhiex titqies li ġiet awtorizzata mill-Membri li tagħmel dan; b’mod partikolari m’għandux ikollha l-kapaċità li tissellef il-flus. Fl-eżerċizzju tal-kapaċità tagħha li tikkuntratta, l-Organizzazzjoni għandha tinkorpora fil-kuntratti tagħha t-termini ta’ dan l-Artikolu b’tali mod li ġġibhom għall-attenzjoni tal-partijiet l-oħrajn li deħlin f’kuntratti ma’ l-Organizzazzjoni, iżda kwalunkwe nuqqas li tinkorpora dawn it-termini m’għandux jinvalida dan il-kuntratt jew jagħmlu ultra vires.

2.   Ir-responsabbiltà ta’ Membru hija limitata sa l-obbligi tiegħu fir-rigward tal-kontribuzzjonijiet speċifikament provduti f’dan il-Ftehim. Il-partijiet terzi li jaħdmu ma’ l-Organizzazzjoni għandhom jitqiesu li huma avżati dwar id-dispożizzjonijiet ta’ dan il-Ftehim fir-rigward tar-responsabbiltajiet tal-Membri.

Artikolu 23

Verifika u pubblikazzjoni tal-kotba

Malli jkun possibbli u mhux aktar tard minn sitt xhur wara l-għeluq ta’ kull sena finanzjarja, għandha tiġi ppreparata dikjarazzjoni vverifikata b’mod indipendenti ta’ l-attiv, tal-passiv, tad-dħul u ta’ l-infiq ta’ l-Organizzazzjoni matul dik is-sena finanzjarja. Din id-dikjarazzjoni għandha tiġi ppreżentata lill-Kunsill għall-approvazzjoni fl-ewwel sessjoni li tkun tmiss.

KAPITOLU IX

PROMOZZJONI U ŻVILUPP TAS-SUQ

Artikolu 24

Tneħħija ta’ l-ostakoli għall-kummerċ u l-konsum

1.   Il-Membri jagħrfu l-importanza ta’ l-iżvilupp sostenibbli tas-settur tal-kafè u tat-tneħħija ta’ ostakoli preżenti u l-evitar ta’ ostakoli ġodda li jistgħu jfixklu l-kummerċ u l-konsum, filwaqt li jirrikonoxxu fl-istess ħin id-dritt tal-Membri li jirregolaw, u li jintroduċu regolamenti ġodda, sabiex jilħqu l-għanijiet nazzjonali ta’ politika tas-saħħa u ta’ l-ambjent, skond l-impenni u l-obbligi tagħhom skond strumenti ta’ ftehim internazzjonali, inklużi dawk relatati mal-kummerċ internazzjonali.

2.   Il-Membri jagħrfu li bħalissa hemm miżuri fis-seħħ li jistgħu sa livell akbar jew inqas ifixklu ż-żieda fil-konsum tal-kafè, b’mod partikolari:

(a)	l-arranġamenti ta’ l-importazzjoni li jgħoddu għall-kafè, inklużi tariffi preferenzjali u oħrajn, kwoti, operazzjonijiet tal-monopolji tal-gvern u aġenziji uffiċjali tax-xiri, u regoli amministrattivi u prattiki kummerċjali oħrajn;

(b)	l-arranġamenti ta’ l-esportazzjoni fir-rigward ta’ sussidji diretti jew indiretti u regoli amministrattivi u prattiċi kummerċjali oħrajn; u

(ċ)	il-kundizzjonijiet interni tal-kummerċ u d-dispożizzjonijiet legali u amministrattivi domestiċi u reġjonali li jistgħu jaffettwaw il-konsum.

3.   Fid-dawl ta’ l-għanijiet dikjarati hawn fuq u d-dispożizzjonijiet tal-paragrafu (4) ta’ dan l-Artikolu, il-Membri għandhom jagħmlu sforz li jfittxu tnaqqis tat-tariffi fuq il-kafè jew li jieħdu azzjonijiet oħrajn biex ineħħu l-ostakoli għal konsum akbar.

4.   Filwaqt li tqies l-interess reċiproku tagħhom, il-Membri jintrabtu li jfittxu modi u mezzi kif l-ostakoli għall-kummerċ u l-konsum akbar imsemmija fil-paragrafu (2) ta’ dan l-Artikolu jistgħu progressivament jitnaqqsu u eventwalment, kull fejn ikun possibbli, jiġu eliminati, jew li bihom l-effetti ta’ dawn l-ostakoli jistgħu jiġu mnaqqsa b’mod sostanzjali.

5.   Fid-dawl ta’ kwalunkwe impenn meħud skond id-dispożizzjonijiet tal-paragrafu (4) ta’ dan l-Artikolu, il-Membri għandhom jgħarrfu lill-Kunsill kull sena dwar il-miżuri kollha adottati bl-għan li jimplimentaw id-dispożizzjonijiet ta’ dan l-Artikolu.

6.   Id-Direttur Eżekuttiv għandu jipprepara perjodikament stħarriġ ta’ l-ostakoli għall-konsum li għandu jiġi rivedut mill-Kunsill.

7.   Il-Kunsill jista’, sabiex jagħti spinta lill-għanijiet ta’ dan l-Artikolu, jagħmel rakkomandazzjonijiet lill-Membri, li għandhom jirrapportaw mill-aktar fis possibbli lill-Kunsill dwar il-miżuri adottati bl-għan li jiġu implimentati dawn ir-rakkomandazzjonijiet.

Artikolu 25

Promozzjoni u żvilupp tas-suq

1.   Il-Membri jagħrfu l-benefiċċji, kemm għall-Membri li jimportaw kif ukoll għal dawk li jesportaw, li jirriżultaw mill-isforzi li jiġi promoss il-konsum, tittejjeb il-kwalità tal-prodott, u li jiġu żviluppati swieq għall-kafè, inklużi dawk tal-Membri li jesportaw.

2.   L-attivitajiet tal-promozzjoni u ta’ l-iżvilupp tas-suq jistgħu jinkludu kampanji ta’ l-informazzjoni, riċerka, bini tal-kapaċitajiet u studji relatati mal-produzzjoni u l-konsum tal-kafè.

3.   Dawn l-attivitajiet jistgħu jiġu inklużi fil-programm annwali ta’ ħidma tal-Kunsill jew fost l-attivitajiet tal-proġett ta’ l-Organizzazzjoni msemmija fl-Artikolu 28 u jistgħu jiġu ffinanzjati minn kontribuzzjonijiet volontarji mill-Membri, non-Membri, organizzazzjonijiet oħrajn u s-settur privat.

4.   Għandu jiġi stabbilit Kumitat dwar il-Promozzjoni u l-Iżvilupp tas-Suq. Il-Kunsill għandu jiddetermina l-kompożizzjoni u l-mandat tiegħu.

Artikolu 26

Miżuri relatati mal-kafè pproċessat

Il-Membri jagħrfu l-ħtieġa li l-pajjiżi li qed jiżviluppaw iwessgħu l-bażi ta’ l-ekonomiji tagħhom permezz ta’, inter alia, l-industrijalizzazzjoni u l-esportazzjoni tal-prodotti manifatturati, inkluż l-ipproċessar tal-kafè u l-esportazzjoni tal-kafè pproċessat, kif imsemmi fis-sub-paragrafi (d), (e), (f) u (ġ) tal-paragrafu (1) ta’ l-Artikolu 2. F’dan ir-rigward, il-Membri għandhom jevitaw l-adozzjoni ta’ miżuri tal-gvern li jistgħu jikkawżaw tfixkil fis-settur tal-kafè ta’ Membri oħrajn.

Artikolu 27

Taħlitiet u sostituti

1.   Il-Membri m’għandhom iżommu ebda regolament li jeħtieġ it-taħlit, l-ipproċessar jew l-użu ta’ prodotti oħrajn mal-kafè għall-bejgħ kummerċjali mill-ġdid bħala kafè. Il-Membri għandhom jagħmlu sforzi biex jipprojbixxu l-bejgħ u r-reklamar tal-prodotti taħt l-isem tal-kafè jekk dawn il-prodotti fihom inqas mill-ekwivalenti ta’ 95 % kafè aħdar bħala l-materjal bażżiku mhux ipproċessat.

2.   Id-Direttur Eżekuttiv għandu jissottometti lill-Kunsill rapport perjodiku dwar il-konformità mad-dispożizzjonijiet dan l-Artikolu.

KAPITOLU X

ATTIVITAJIET TA’ PROĠETTI TA’ L-ORGANIZZAZZJONI

Artikolu 28

Żvilupp u ffinanzjar tal-proġetti

1.   Il-Membri u d-Direttur Eżekuttiv jistgħu jissottomettu proposti dwar proġetti li jikkontribwixxu għall-kisba ta’ l-għanijiet ta’ dan il-Ftehim u wieħed jew aktar mill-oqsma prijoritarji għall-ħidma identifikati fil-pjan ta’ azzjoni strateġiku approvat mill-Kunsill skond l-Artikolu 9.

2.   Il-Kunsill għandu jistabbilixxi proċeduri u mekkaniżmi biex jiġu sottomessi, evalwati, approvati, prijoritarizzati u ffinanzjati l-proġetti, kif ukoll għall-implimentazzjoni, il-monitoraġġ u l-evalwazzjoni tagħhom, u d-disseminazzjoni ġenerali tar-riżultati.

3.   F’kull sessjoni tal-Kunsill id-Direttur Eżekuttiv għandu jirrapporta dwar l-istat tal-proġetti kollha approvati mill-Kunsill, inklużi dawk li qed jistennew il-finanzjament, li qed jiġu implimentati jew li tlestew minn żmien l-aħħar sessjoni tal-Kunsill.

4.   Għandu jiġi stabbilit Kumitat dwar il-Proġetti. Il-Kunsill għandu jiddetermina l-kompożizzjoni u l-mandat tiegħu.

KAPITOLU XI

IS-SETTUR PRIVAT TAL-KAFÈ

Artikolu 29

Il-Bord Konsultattiv tas-Settur Privat

1.   Il-Bord Konsultattiv tas-Settur Privat (minn hawn ‘il quddiem imsejjaħ il-BKSP) għandu jkun korp konsultattiv li jista’ jagħmel rakkomandazzjonijiet dwar kwalunkwe konsultazzjoni magħmula mill-Kunsill u jista’ jistieden lill-Kunsill jikkunsidra kwistjonijiet relatati ma’ dan il-Ftehim.

2.   Il-BKSP għandu jkun iffurmat minn tmien rappreżentanti tas-settur privat fil-pajjiżi li jesportaw, u tmien rappreżentanti tas-settur privat fil-pajjiżi li jimportaw.

3.   Il-membri tal-BKSP għandhom ikunu rappreżentanti ta’ l-assoċjazzjonijiet jew korpijiet maħtura mill-Kunsill kull sentejn tal-kafè, u jistgħu jinħatru mill-ġdid. Meta jagħmel dan il-Kunsill għandu jagħmel sforz li jaħtar:

(a)

żewġ assoċjazzjonijiet jew korpijiet tal-kafè fis-settur privat mill-pajjiżi jew reġjuni li jesportaw li jirrappreżentaw kull wieħed mill-erba’ gruppi tal-kafè, preferibbilment li jirrappreżentaw kemm dawk li jkabbru l-kafè u dawk li jesportawh, flimkien ma’ sostitut wieħed jew aktar għal kull rappreżentant; u

(b)	tmien assoċjazzjonijiet jew korpijiet tal-kafè fis-settur privat mill-pajjiżi li jimportaw, kemm jekk Membri jew le, preferibbilment li jirrappreżentaw kemm l-importaturi kif ukoll dawk li jixwu l-kafè, flimkien ma’ sostitut wieħed jew aktar għal kull rappreżentant.

4.   Kull membru tal-BKSP jista’ jaħtar konsulent wieħed jew aktar.

5.   Il-BKSP għandu jkollu President u Viċi-President eletti minn fost il-Membri tiegħu, għal żmien ta’ sena. Dawn l-uffiċjali jistgħu jiġu eletti mill-ġdid. Il-President u l-Viċi-President m’għandhomx jitħallsu mill-Organizzazzjoni. Il-President għandu jkun mistieden jipparteċipa fil-laqgħat tal-Kunsill bħala osservatur.

6.   Il-BKSP għandu normalment jiltaqa’ fis-sede ta’ l-Organizzazzjoni, matul is-sessjonijiet regolari tal-Kunsill. Fil-każ li l-Kunsill jaċċetta stedina minn Membru li jagħmel laqgħa fit-territorju tiegħu, il-BKSP għandu wkoll jiltaqa’ f’dak it-territorju, f’liema każ l-ispejjeż addizzjonali għall-Organizzazzjoni involuti li jkun aktar minn dawk magħmula meta l-laqgħa ssir fis-sede jitħallsu minn dak il-pajjiż jew organizzazzjoni tas-settur privat li jospita/tospita l-laqgħa.

7.   Il-BKSP jista’ jagħmel laqgħat speċali soġġett għall-approvazzjoni mill-Kunsill.

8.   Il-BKSP għandu jissottometti rapporti regolari lill-Kunsill.

9.   Il-BKSP għandu jistabbilixxi r-regoli tal-proċedura tiegħu stess, konsistenti mad-dispożizzjonijiet ta’ dan il-Ftehim.

Artikolu 30

Il-Konferenza Dinjija tal-Kafè

1.   Il-Kunsill għandu jagħmel arranġamenti biex jagħmel, f’intervalli xierqa, Konferenza Dinjija tal-Kafè (minn hawn ‘il quddiem imsejħa l-Konferenza), li għandha tkun komposta minn Membri li jesportaw u li jimportaw, minn rappreżentanti tas-settur privat, u parteċipanti interessati oħrajn, inklużi parteċipanti minn pajjiżi mhux membri. Il-Kunsill, b’koordinazzjoni mal-President tal-Konferenza, għandu jiżgura li l-Konferenza tikkontribwixxi għall-promozzjoni ta’ l-għanijiet ta’ dan il-Ftehim.

2.   Il-Konferenza għandu jkollha President li m’għandux jitħallas mill-Organizzazzjoni. Il-President għandu jinħatar mill-Kunsill għal perjodu xieraq, u għandu jkun mistieden jieħu sehem f’laqgħat tal-Kunsill bħala osservatur.

3.   Il-Kunsill għandu jiddeċiedi dwar il-forma, it-titlu, is-suġġett u l-ħin tal-Konferenza, b’konsultazzjoni mal-Bord Konsultattiv tas-Settur Privat. Il-Konferenza normalment għandha ssir fis-sede ta’ l-Organizzazzjoni, matul is-sessjonijiet regolari tal-Kunsill. Fil-każ li l-Kunsill jaċċetta stedina minn Membru li jagħmel sessjoni fit-territorju tiegħu, il-Konferenza tista’ wkoll issir f’dak it-territorju, f’liema każ l-ispejjeż addizzjonali għall-Organizzazzjoni involuti li jkunu aktar minn dawk magħmula meta l-laqgħa ssir fis-sede jitħallsu minn dak il-pajjiż li jospita l-laqgħa.

4.   Kemm-il darba l-Kunsill ma jiddeċidix mod ieħor, il-Konferenza għandha tiffinanzja lilha nfisha.

5.   Il-President għandu jirraporta lill-Kunsill dwar il-konklużjonijiet tal-Konferenza.

Artikolu 31

Il-Forum Konsultattiv dwar il-Finanzjament tas-Settur tal-Kafè

1.   Il-Kunsill għandu jlaqqa’, f’intervalli xierqa u b’kooperazzjoni ma’ organizzazzjonijiet oħrajn rilevanti, Forum Konsultattiv dwar il-Finanzjament tas-Settur tal-Kafè (minn hawn ‘il quddiem imsejjaħ il-Forum) biex jiffaċilita l-konsultazzjonijiet dwar suġġetti relatati mal-finanzi u l-immaniġġjar tar-riskju fis-settur tal-kafè, b’enfasi partikolari fuq il-bżonnijiet ta’ produtturi ta’ skala żgħira u medja, u komunitajiet lokali fiż-żoni li jipproduċu l-kafè.

2.   Il-Forum għandu jinkludi rappreżentanti tal-Membri, organizzazzjonijiet intergovernattivi, istituzzjonijiet finanzjarji, is-settur privat, organizzazzjonijiet mhux governattivi, pajjiżi mhux membri interessati u oħrajn b’għarfien espert rilevanti. Kemm-il darba l-Kunsill ma jiddeċidix mod ieħor, il-Forum għandu jiffinanzja lilu nnifsu.

3.   Il-Kunsill għandu jistabbilixxi r-regoli tal-proċedura għall-ħidma tal-Forum, għall-ħatra tal-President u d-disseminazzjoni ġenerali tar-riżultati tagħha, bl-użu fejn xieraq ta’ mekkaniżmi stabbiliti skond id-dispożizzjonijiet ta’ l-Artikolu 34. Il-President għandu jirrapporta lill-Kunsill dwar ir-riżultati tal-Forum.

KAPITOLU XII

INFORMAZZJONI STATISTIKA, STUDJI U STĦARRIĠ

Artikolu 32

Informazzjoni statistika

1.   L-Organizzazzjoni għandha taġixxi bħala ċentru għall-ġbir, l-iskambju u l-pubblikazzjoni ta’:

(a)

informazzjoni statistika dwar il-produzzjoni dinjija, il-prezzijiet, l-esportazzjonijiet, l-importazzjonijiet u l-esportazzjonijiet mill-ġdid, it-tqassim u l-konsum tal-kafè, inkluża informazzjoni dwar il-produzzjoni, il-konsum, il-kummerċ u l-prezzijiet għall-kafejiet f’kategoriji differenti tas-suq u prodotti differenti li fihom il-kafè; u

(b)	safejn jitqies xieraq, informazzjoni teknika dwar il-kultivazzjoni, l-ipproċessar u l-użu tal-kafè.

2.   Il-Kunsill jista’ jitlob lill-Membri jipprovdu dik l-informazzjoni li jqis meħtieġa għall-operat tiegħu, inklużi rapporti statistiċi regolari dwar il-produzzjoni tal-kafè, it-tendenzi tal-produzzjoni, l-esportazzjonijiet, l-importazzjonijiet u l-esportazzjonijiet mill-ġdid, it-tqassim, il-konsum, il-ħażniet, il-prezzijiet u t-tassazzjoni, iżda ma għandha tiġi ppubblikata ebda informazzjoni li tista’ tintuża biex jiġi identifikat l-operat ta’ persuni jew kumpanniji li jipproduċu, jipproċessaw jew jikkummerċjlizzaw il-kafè. Safejn ikun possibbli, il-Membri għandhom jipprovdu l-informazzjoni mitluba bl-aktar mod dettaljat, f’waqtu u preċiż li jista’ jkun prattikabbli.

3.   Il-Kunsill għandu jistabbilixxi sistema ta’ prezzijiet indikaturi u għandu jipprovdi għall-pubblikazzjoni prezz indikattiv ta’ kuljum kompost li għandu jirrifletti l-kundizzjonijiet attwali tas-suq.

4.   Jekk Membru jonqos milli jipprovdi jew isib diffikultà biex jipprovdi fi żmien raġonevoli informazzjoni statistika u oħra meħtieġa mill-Kunsill għall-ħidma t-tajba ta’ l-Organizzazzjoni, il-Kunsill jista’ jitlob lill-Membru kkonċernat jispjega r-raġunijiet għan-nuqqas ta’ konformità. Il-Membru jista’ wkoll jgħarraf lill-Kunsill dwar id-diffikultà tiegħu u jitlob l-assistenza teknika.

5.   Jekk jinsab li l-assistenza teknika hija meħtieġa fil-kwistjoni, jew jekk Membru ma pprovdiex, għal sentejn konsekuttivi, l-informazzjoni statistika mitluba skond il-paragrafu (2) ta’ dan l-Artikolu u ma talabx l-assistenza tal-Kunsill jew ma spjegax ir-raġunijiet għan-nuqqas ta’ konformità, il-Kunsill jista’ jieħu dawk l-inizjattivi li x’aktarx iwasslu lil dan il-Membru jipprovdi l-informazzjoni meħtieġa.

Artikolu 33

Ċertifikati ta’ l-Oriġini

1.   Sabiex jiġi ffaċilitat il-ġbir ta’ l-istatistika dwar il-kummerċ internazzjonali tal-kafè u biex jiġu aċċertati l-kwantitajiet tal-kafè li ġew esportati minn kull Membru li jesporta, l-Organizzazzjoni għandha tistabbilixxi sistema ta’ Ċertifikati ta’ l-Oriġini, irregolata minn regoli approvati mill-Kunsill.

2.   Kull esportazzjoni tal-kafè minn Membru li jesporta għandha tkun koperta minn Ċertifikat ta’ l-Oriġini validu. Iċ-Ċertifikati ta’ l-Oriġini għandhom jinħarġu, skond ir-regoli stabbiliti mill-Kunsill, minn aġenzija kkwalifikata magħżula mill-Membru u approvata mill-Organizzazzjoni.

3.   Kull Membru li jesporta għandu jgħarraf lill-Organizzazzjoni dwar l-aġenzija governattiva jew mhux governattiva li għandha twettaq il-funzjonijiet speċifikati fil-paragrafu (2) ta’ dan l-Artikolu. L-Organizzazzjoni għandha speċifikament tapprova aġenzija mhux governattiva skond ir-regoli approvati mill-Kunsill.

4.   Membru li jesporta, fuq bażi eċċezzjonali u b’ġustifikazzjoni tajba, jista’ jissottometti, għall-approvazzjoni tal-Kunsill, talba biex jippermetti d-data mogħtija fiċ-Ċertifikati ta’ l-Oriġini dwar l-esportazzjonijiet tiegħu tal-kafè tiġi trażmessa lill-Organizzazzjoni bl-użu ta’ metodu alternattiv.

Artikolu 34

Studji, stħarriġ u rapporti

1.   Sabiex tassisti lill-Membri, l-Organizzazzjoni għandha tippromwovi l-preparazzjoni ta’ l-istudji, stħarriġ, rapporti tekniċi u dokumenti oħrajn dwar aspetti rilevanti tas-settur tal-kafè.

2.   Dan jista’ jinkludi xogħol dwar l-ekonomija tal-produzzjoni u d-distribuzzjoni tal-kafè, l-analiżi tal-katina tal-valur tal-kafè, metodi biex jiġu mmaniġġjati r-riskji finanzjarji u oħrajn, l-impatt ta’ miżuri governattivi fuq il-produzzjoni u l-konsum tal-kafè, aspetti ta’ sostenibbiltà tas-settur tal-kafè, rabtiet bejn il-kafè u s-saħħa u opportunitajiet għall-espansjoni tas-swieq tal-kafè għal użi tradizzjonali u użi possibbli ġodda.

3.   L-informazzjoni miġura, kkumpilata, analizzata u mqassma tista’ wkoll tinkludi, fejn ikun teknikament possibbli:

(a)	kwantitajiet u prezzijiet ta’ kafejiet relatati ma’ fatturi bħal żoni ġeografiċi differenti u kundizzjonijiet tal-produzzjoni relatati mal-kwalità; u

(b)	informazzjoni dwar l-istrutturi tas-suq, swieq speċjalizzati u tendenzi li qed jiżviluppaw fil-produzzjoni u l-konsum.

4.   Sabiex iwettaq id-dispożizzjonijiet tal-paragrafu (1) ta’ dan l-Artikolu, il-Kunsill għandu jadotta programm ta’ ħidma annwali ta’ studji, stħarriġ u rapporti, b’rekwiżiti stmati tar-riżorsi. Dawn l-attivitajiet għandhom ikunu ffinanzjati jew minn dispożizzjonijiet fil-Baġit Amministrattiv jew minn għejun baġitarji żejda.

5.   L-Organizzazzjoni għandha tagħmel enfasi partikolari fuq il-faċilitazzjoni ta’ l-aċċess għall-informazzjoni mill-produtturi żgħar tal-kafè u tgħinhom itejbu l-ħidma finanzjarja tagħhom, inkluż il-ġestjoni tal-kreditu u r-riskju.

KAPITOLU XIII

DISPOŻIZZJONIJIET ĠENERALI

Artikolu 35

Preparazzjonijiet għal Ftehim ġdid

1.   Il-Kunsill jista’ jeżamina l-possibbiltà li jiġi negozjat Ftehim Internazzjonali tal-Kafè ġdid.

2.   Sabiex iwettaq din id-dispożizzjoni, il-Kunsill għandu jeżamina l-progress li għamlet l-Organizzazzjoni fil-kisba ta’ l-għanijiet ta’ dan il-Ftehim kif speċifikat fl-Artikolu 1.

Artikolu 36

Settur sostenibbli tal-kafè

Il-Membri għandhom iqisu debitament l-immaniġġjar sostenibbli tar-riżorsi u ta’ l-ipproċessar tal-kafè, filwaqt li jqisu l-prinċipji u l-għanijiet dwar l-iżvilupp sostenibbli li jinsabu fl-Aġenda 21 adottata mill-Konferenza tan-Nazzjonijiet Uniti dwar l-Ambjent u l-Iżvilupp li nżammet f’Rio de Janeiro fl-1992 u dawk adottati fis-Summit Dinji dwar l-Iżvilupp Sostenibbli li nżamm f’Johannesburg fl-2002.

Artikolu 37

Standard ta’ l-għajxien u kundizzjonijiet ta’ xogħol

Il-Membri għandhom iqisu t-titjib ta’ l-istandard ta’ l-għajxien u l-kundizzjonijiet ta’ xogħol tal-popolazzjonijiet involuti fis-settur tal-kafè, skond l-istadju tagħhom ta’ l-iżvilupp, fid-dawl ta’ prinċipji rikonoxxuti internazzjonalment u standards applikabbli dwar dawn il-kwistjonijiet. Barra minn dan, il-Membri jaqblu li l-istandards tax-xogħol m’għandhomx jintużaw għal skopijiet ta’ kummerċ protezzjonist.

KAPITOLU XIV

ONSULTAZZJONIJIET, TILWIMIET U LMENTI

Artikolu 38

Konsultazzjonijiet

Kull Membru għandu jagħti konsiderazzjoni pożittiva għal-konsultazzjoni u jagħti opportunità xierqa għal konsultazzjoni dwar dawk ir-rappreżentazzjonijiet li Membru ieħor jista’ jagħmel fir-rigward ta’ kwalunkwe kwistjoni li għandha x’taqsam ma’ dan il-Ftehim. Matul din il-konsultazzjoni, fuq talba minn kwalunkwe parti u bil-kunsens tal-parti l-oħra, id-Direttur Eżekuttiv għandu jistabbilixxi bord indipendenti li għandu jagħmel mill-aħjar biex jikkonċilja l-partijiet. L-ispejjeż tal-bord m’għandhomx jitħallsu mill-Organizzazzjoni. Jekk parti ma taqbilx li jiġi stabbilit bord mid-Direttur Eżekuttiv, jew jekk il-konsultazzjoni ma twassalx għal soluzzjoni, il-kwistjoni tista’ tiġi riferita lill-Kunsill skond id-dispożizzjonijiet ta’ l-Artikolu 39. Jekk il-konsultazzjoni twassal għal soluzzjoni, din għandha tiġi rrapportata lid-Direttur Eżekuttiv, li għandu jqassam ir-rapport lill-Membri kollha.

Artikolu 39

Tilwimiet u lmenti

1.   Kwalunkwe tilwima dwar l-interpretazzjoni jew l-applikazzjoni ta’ dan il-Ftehim li ma tiġix solvuta permezz tan-negozjati għandha, fuq talba ta’ kwalunkwe Membru li jkun parti mit-tilwima, tiġi riferita lill-Kunsill għal deċiżjoni.

2.   Il-Kunsill għandu jistabblixxi proċedura għas-soluzzjoni tat-tilwimiet u l-ilmenti.

KAPITOLU XV

DISPOŻIZZJONIJIET FINALI

Artikolu 40

Firma u ratifika, aċċettazzjoni jew approvazzjoni

1.   Ħlief kif provdut mod ieħor, dan il-Ftehim għandu jkun miftuħ għall-firma fil-kwartieri ġenerali tad-Depożitarju sa mill-1 ta’ Frar 2008 sa u inkluż il-31 ta’ Awwissu 2008 minn Partijiet Kontraenti għall-Ftehim Internazzjonali tal-Kafè 2001 u mill-Gvernijiet mistiedna għas-sessjoni tal-Kunsill fejn ġie adottat dan il-Ftehim.

2.   Dan il-Ftehim huwa soġġett għar-ratifika, l-aċċettazzjoni jew l-approvazzjoni mill-Gvernijiet firmatarji skond il-proċeduri legali rispettivi tagħhom.

3.   Ħlief kif provdut fl-Artikolu 42, l-istrumenti tar-ratifika, l-aċċettazzjoni jew l-approvazzjoni għandhom jiġu ddepożitati mad-Depożitarju mhux aktar tard mit-30 ta’ Settembru 2008. Madankollu, il-Kunsill jista’ jiddeċiedi li jagħti estensjonijiet ta’ żmien lill-Gvernijiet firmatarji li ma jistgħux jiddepożitaw l-istrumenti tagħhom sa dik id-data. Il-Kunsill għandu jittrażmetti dawn id-deċiżjonijiet lid-Depożitarju.

4.   Mal-firma u r-ratifika, l-aċċettazzjoni jew l-approvazzjoni, jew notifika ta’ applikazzjoni provviżorja, il-Komunità Ewropea għandha tiddepożita dikjarazzjoni mad-Depożitarju li tikkonferma l-kompetenza esklussiva tagħħa dwar kwistjonijiet irregolati minn dan il-Ftehim. L-Istati Membri tal-Komunità Ewropea m’għandhomx ikunu eliġibbli li jsiru Partijiet Kontraenti għall-Ftehim.

Artikolu 41

Applikazzjoni provviżorja

Gvern firmatarju li bi ħsiebu jirratifika, jaċċetta jew japprova dan il-Ftehim jista’, fi kwalunkwe ħin, jinnotifika d-Depożitarju li japplika dan il-Ftehim provviżorjament skond il-proċeduri legali tiegħu.

Artikolu 42

Dħul fis-seħħ

1.   Dan il-Ftehim għandu jidħol fis-seħħ definittivament meta l-Gvernijiet firmatarji li għandhom mill-inqas żewġ terzi tal-voti tal-Membri li jesportaw u l-Gvernijiet firmatarji li għandhom mill-inqas żewġ terzi tal-voti tal-Membri li jimportaw, ikkalkolati fit-28 ta’ Settembru 2007, mingħajr referenza għas-sospensjoni possibbli skond l-Artikolu 21, ikunu ddepożitaw strumenti ta’ ratifika, aċċettazzjoni jew approvazzjoni. Alternattivament, huwa għandu jidħol fis-seħħ definittivament fi kwalunkwe ħin jekk ikun fis-seħħ provviżorjament skond id-dispożizzjonijiet tal-paragrafu (2) ta’ dan l-Artikolu u dawn ir-rekwiżiti ta’ perċentwal jiġu sodisfatti bid-depożitu ta’ strumenti ta’ ratifika, aċċettazzjoni jew approvazzjoni.

2.   Jekk dan il-Ftehim ma jkunx daħal fis-seħħ definittivament sal-25 ta’ Settembru 2008, huwa għandu jidħol fis-seħħ provviżorjament f’dik id-data, jew fi kwalunkwe data oħra fi żmien tnax-il xahar wara, jekk il-Gvernijiet firmatarji li jkollhom il-voti deskritti fil-paragrafu (1) ta’ dan l-Artikolu, jkunu ddepożitaw l-istrumenti ta’ ratifika, aċċettazzjoni jew approvazzjoni, jew ikunu nnotifikaw lid-Depożitarju skond id-dispożizzjonijiet ta’ l-Artikolu 41.

3.   Jekk dan il-Ftehim ikun daħal fis-seħħ provviżorjament iżda ma jkunx daħal fis-seħħ definittivament sal-25 ta’ Settembru 2009, huwa għandu jieqaf milli jkun fis-seħħ provviżorjament kemm-il darba dawk il-Gvernijiet firmatarji li jkunu ddepożitaw l-istrumenti ta’ ratifika, aċċettazzjoni jew approvazzjoni, jew li jkunu nnotifikaw lid-Depożitarju skond id-dispożizzjonijiet ta’ l-Artikolu 41, jiddeċiedu, b’kunsens komuni, li għandu jkompli fis-seħħ provviżorjament għal perjodu speċifiku ta’ żmien. Dawn il-Gvernijiet firmatarji jistgħu wkoll jiddeċiedu, b’kunsens komuni, li dan il-Ftehim għandu jidħol fis-seħħ definittivament fosthom.

4.   Jekk dan il-Ftehim ma jkunx daħal fis-seħħ definittivament sal-25 ta’ Settembru 2009 skond id-dispożizzjonijiet tal-paragrafu (1) jew (2) ta’ dan l-Artikolu, dawk il-Gvernijiet firmatarji li ddepożitaw strumenti ta’ ratifika, aċċettazzjoni jew approvazzjoni, skond il-liġijiet u r-regolamenti tagħhom, jistgħu jiddeċiedu, b’kunsens komuni, li dan il-Ftehim għandu jidħol fis-seħħ definittivament fosthom.

Artikolu 43

Adeżjoni

1.   Ħlief kif provdut mod ieħor f’dan il-Ftehim, il-Gvern ta’ kwalunkwe Stat membru tan-Nazzjonijiet Uniti jew ta’ kwalunkwe mill-aġenziji speċjalizzati tagħha jew kwalunkwe organizzazzjoni intergovernattiva deskritta fil-paragrafu (3) ta’ l-Artikolu 4 jistgħu jaderixxu għal dan il-Ftehim skond il-proċeduri li għandhom jiġu stabbiliti mill-Kunsill.

2.   L-istrumenti ta’ l-adeżjoni għandhom jiġu ddepożitati mad-Depożitarju. L-adeżjoni għandha tidħol fis-seħħ mad-depożitu ta’ l-istrument.

3.   Malli jiġi depożitat strument ta’ l-adeżjoni, kwalunkwe organizzazzjoni intergovernattiva msemmija fil-paragrafu (3) ta’ l-Artikolu 4 għandha tiddepożita dikjarazzjoni li tikkonferma l-kompetenza esklussiva tagħha dwar kwistjonijiet irregolati minn dan il-Ftehim. L-Istati membri ta’ din l-organizzazzjoni m’għandhomx ikunu eliġibbli li jsiru Partijiet Kontraenti għal dan il-Ftehim.

Artikolu 44

Riżervi

Ma jistgħu jsiru ebda riżervi fir-rigward ta’ xi dispożizzjoni ta’ dan il-Ftehim.

Artikolu 45

Rtirar volontarju

Kwalunkwe Parti Kontraenti tista’ tirtira minn dan il-Ftehim fi kwalunkwe ħin billi tagħti avviż ta’ l-irtirar bil-miktub lid-Depożitarju. L-irtirar għandu jsir effettiv 90 jum wara li jiġi rċevut l-avviż.

Artikolu 46

Esklużjoni

Jekk il-Kunsill jiddeċiedi li xi Membru jkun kiser l-obbligi tiegħu skond dan il-Ftehim u jiddeċiedi wkoll li dan il-ksur ifixkel b’mod sinjifikanti l-operat ta’ dan il-Ftehim, jista’ jeskludi lil dan il-Membru mill-Organizzazzjoni. Il-Kunsill għandu minnufih jgħarraf lid-Depożitarju b’din id-deċiżjoni. Disgħin jum wara d-data tad-deċiżjoni tal-Kunsill, dan il-Membru għandu jieqaf milli jkun Membru ta’ l-Organizzazzjoni u Parti f’dan il-Ftehim.

Artikolu 47

Ħlas tal-kontijiet mal-Membri li jirtiraw jew li huma esklużi

1.   Il-Kunsill għandu jiddetermina kwalunkwe ħlas tal-kontijiet ma’ Membru li qed jirtira jew Membru eskluż. L-Organizzazzjoni għandha żżomm kwalunkwe ammont diġà mħallas minn Membru li qed jirtira jew li ġie eskluż u dan il-Membru għandu jibqa’ obbligat iħallas kwalunkwe ammont dovut minnu lill-Organizzazzjoni fil-ħin li l-irtirar jew l-esklużjoni ssir effettiva; sakemm, iżda, li fil-każ ta’ Parti Kontraenti li ma tistax taċċetta emenda u għalhekk tieqaf milli tipparteċipa f’dan il-Ftehim skond id-dispożizzjonijiet ta’ l-Artikolu 49(2), il-Kunsill jista’ jiddetermina kwalunkwe ħlas tal-kontijiet li jqis ekwu.

2.   Membru li jkun waqaf jipparteċipa f’dan il-Ftehim m’għandux ikun intitolat għal xi sehem tad-dħul ta’ likwidazzjoni jew l-assi l-oħrajn ta’ l-Organizzazzjoni; lanqas ma jkun responsabbli għall-ħlas ta’ xi parti mid-defiċit, jekk ikun hemm, ta’ l-Organizazzjoni meta jiġi tterminat dan il-Ftehim.

Artikolu 48

Dewmien, estensjoni u terminazzjoni

1.   Dan il-Ftehim għandu jibqa’ fis-seħħ għal żmien ta’ għaxar snin wara li jidħol fis-seħħ provviżorjament jew definittivament kemm-il darba ma jiġix estiż skond id-dispożizzjonijiet tal-paragrafu (3) ta’ dan l-Artikolu jew itterminat skond id-dispożizzjonijiet tal-paragrafu (4) ta’ dan l-Artikolu.

2.   Il-Kunsill għandu jirrevedi dan il-Ftehim ħames snin wara li jidħol fis-seħħ u jieħu deċiżjonijiet kif xieraq.

3.   Il-Kunsill jista’ jiddeċiedi li jestendi dan il-Ftehim lil hinn mid-data meta jiskadi għal perjodu suċċessiv wieħed jew aktar iżda mhux aktar minn total ta’ tmien snin. Kwalunkwe Membru li ma jaċċettax din l-estensjoni ta’ dan il-Ftehim għandu jgħarraf lill-Kunsill u lid-Depożitarju bil-miktub qabel ma jibda l-perjodu ta’ l-estensjoni u għandu jieqaf milli jkun Parti għal dan il-Ftehim mill-bidu tal-perjodu ta’ estensjoni.

4.   Il-Kunsill jista’ jiddeċiedi fi kwalunkwe ħin li jittermina dan il-Ftehim. It-terminazzjoni għandha tieħu effett f’data li jiddeċiedi l-Kunsill.

5.   Minkejja t-terminazzjoni ta’ dan il-Ftehim, il-Kunsill għandu jibqa’ jeżisti kemm ikun meħtieġ biex jittieħdu d-deċiżjonijiet meħtieġa matul iż-żmien meħtieġ għal-likwidazzjoni ta’ l-Organizzazzjoni, il-ħlas tal-kontijiet tagħha u d-dispożizzjoni ta’ l-assi tagħha.

6.   Kwalunkwe deċiżjoni meħuda fir-rigward tad-dewmien u/jew terminazzjoni ta’ dan il-Ftehim u kwalunkwe notifika rċevuta mill-Kunsill skond dan l-Artikolu għandha tkun trażmessa mill-Kunsill lid-Depożitarju.

Artikolu 49

Emenda

1.   Il-Kunsill jista’ jipproponi emenda tal-Ftehim u għandu jikkomunika din il-proposta lill-Partijiet Kontraenti kollha. L-emenda għandha tidħol fis-seħħ għall-Membri kollha ta’ l-Organizzazzjoni 100 jum wara li d-Depożitarju jkun irċieva notifiki ta’ aċċettazzjoni minn Partijiet Kontraenti li għandhom mill-inqas żewġ terzi tal-voti tal-Membri li jesportaw, u minn Partijiet Kontraenti li jkollhom mill-inqas żewġ terzi tal-voti tal-Membri li jimportaw. Il-perċentwal ta’ żewġ terzi msemmi hawn għandu jiġi kkalkolat fuq il-bażi ta’ l-għadd ta’ Partijiet Kontraenti għall-Ftehim fil-ħin li l-proposta ta’ l-emenda ġiet iċċirkolata lill-Partijiet Kontraenti kkonċernati għall-aċċettazzjoni. Il-Kunsill għandu jiffissa żmien li fih il-Partijiet Kontraenti għandhom jinnotifikaw lid-Depożitarju dwar l-aċċettazzjoni minnhom ta’ l-emenda, li għandha tkun ikkomunikata mill-Kunsill lill-Partijiet Kontraenti kollha u lid-Depożitarju. Jekk, malli jiskadi dan it-terminu, ir-rekwiżiti ta’ perċentwal għad-dħul fis-seħħ ta’ l-emenda ma jkunux intlaħqu, l-emenda għandha titqies irtirata.

2.   Kemm-il darba l-Kunsill ma jiddeċidix mod ieħor, kwalunkwe Parti Kontraenti li ma tkunx innotifikat l-aċċettazzjoni ta’ emenda fil-perjodu ffissat mill-Kunsill għandha tieqaf milli tkun Parti Kontraenti għal dan il-Ftehim mid-data meta din l-emenda ssir effettiva.

3.   Il-Kunsill għandu jinnotifika lid-Depożitarju b’kwalunkwe emenda mqassma lill-Partijiet Kontraenti skond dan l-Artikolu.

Artikolu 50

Dispożizzjoni supplementarja u tranżitorja

L-atti kollha minn jew f’isem l-Organizzazzjoni jew kwalunkwe mill-organi tagħha taħt il-Ftehim Internazzjonali tal-Kafè 2001 għandhom jibqgħu fis-seħħ sa meta jidħol fis-seħħ dan il-Ftehim.

Artikolu 51

Testijiet awtentiċi tal-Ftehim

It-testijiet ta’ dan il-Ftehim fil-lingwa Ingliża, Franċiża, Portugiża u Spanjola għandhom ikunu lkoll ugwalment awtentiċi. L-oriġinali għandhom jiġu ddepożitati mad-Depożitarju.

ANNESS I

Deċiżjoni mħassra flimkien ma’ l-emendamenti suċċessivi tagħha

Deċiżjoni tal-Kunsill 2000/24/KE	(ĠU L 9, 13.1.2000, p. 24)
Deċiżjoni tal-Kunsill 2000/688/KE	(ĠU L 285, 10.11.2000, p. 20)
Deċiżjoni tal-Kunsill 2000/788/KE	(ĠU L 314, 14.12.2000, p. 27)
Deċiżjoni tal-Kunsill 2001/778/KE	(ĠU L 292, 9.11.2001, p. 43)
Deċiżjoni tal-Kunsill 2005/47/KE	(ĠU L 21, 25.1.2005, p. 9)
Deċiżjoni tal-Kunsill 2006/174/KE	(ĠU L 62, 3.3.2006, p. 26)

ANNESS II

Tabella ta’ korrelazzjoni

Deċiżjoni 2000/24/KE	Din id-Deċiżjoni
Artikolu 1	Artikolu 1
Artikolu 2, l-ewwel u t-tieni paragrafu	Artikolu 2, l-ewwel u t-tieni paragrafu
Artikolu 2, it-tielet paragrafu	—
Artikolu 3	Artikolu 3
—	Artikolu 4
Artikolu 4	Artikolu 5
—	Anness I
—	Anness II

ANNESS

(L-anness mhux għall-pubblikazzjoni)