(1)

Fil-5 ta’ Settembru 2007, il-Kummissjoni ħabbret, permezz ta’ avviż (“avviż ta’ inizjazzjoni”) li ġie ppubblikat fil-Ġurnal Uffiċjali ta’ l-Unjoni Ewropea (2), l-inizjazzjoni ta’ proċedura antidumping rigward l-importazzjonijiet fil-Komunità tal-monosodium glutamate (“MSG”) li joriġina fir-Repubblika tal-Poplu taċ-Ċina (ir-“RPĊ” jew il-“pajjiż ikkonċernat”).

(2)

Il-proċedura nbdiet minħabba lment ippreżentat fit-23 ta’ Lulju 2007 minn Ajinomoto Foods Europe S.A.S. li tirrappreżenta 100 % mill-produzzjoni Komunitarja totali ta’ l-MSG. L-ilment kien jinkludi evidenza prima facie ta’ dumping ta’ l-imsemmi prodott u tad-dannu materjali li bata l-uniku produttur Komunitarju li kien ir-riżultat tad-dumping, li tqies li kienet biżżejjed sabiex tkun iġġustifikata l-inizjazzjoni ta’ proċedura.

(3)

Il-Kummissjoni uffiċjalment informat lill-entità li għamlet l-ilment, lill-produtturi li jesportaw, lill-importaturi, lill-fornituri u lill-utenti li kien magħruf li huma kkonċernati, u lir-rappreżentanti tal-pajjiżi kkonċernati dwar l-inizjazzjoni tal-proċedura. Il-partijiet interessati ngħataw opportunità li juru fehmithom bil-miktub u li jitolbu smigħ fil-limitu ta’ żmien iffissat fl-avviż ta’ inizjazzjoni.

(4)

L-entità li għamlet l-ilment, il-produtturi li jesportaw, l-importaturi, l-assoċjazzjonijiet tal-fornituri u l-utenti wrew fehmiethom. Il-partijiet interessati kollha li talbu li jinstemgħu u li wrew li kien hemm raġunijiet partikolari għaliex għandu jsir dan, ingħataw smigħ.

(5)

Fl-avviż ta’ inizjazzjoni, il-Kummissjoni indikat li minħabba n-numru kbir apparenti ta’ produtturi li jesportaw fir-RPĊ u ta’ importaturi fil-Komunità, f’din l-investigazzjoni jista’ jiġi applikat it-teħid tal-kampjuni. Madankollu, minħabba n-numru akbar baxx milli mistenni ta’ produtturi li jesportaw fir-RPĊ u ta’ importaturi fil-Komunità li indikaw li kienu lesti li jikkooperaw, kien deċiż li t-teħid tal-kampjuni ma kienx meħtieġ.

(6)

Sabiex il-produtturi li jesportaw fir-RPĊ ikunu jistgħu jressqu talba għal trattament ta’ ekonomija tas-suq (“MET”) jew ta’ trattament individwali (“IT”), jekk xtaqu dan, il-Kummissjoni bagħtet formoli ta’ talbiet lill-produtturi li jesportaw li kien magħruf li huma kkonċernati u lill-awtoritajiet tar-RPĊ.

(7)

Il-Kummissjoni bagħtet kwestjonarji lill-partijiet kollha li kien magħruf li huma kkonċernati u lill-kumpaniji l-oħra kollha li ppreżentaw irwieħhom fl-iskadenzi stabbiliti fl-avviż ta’ inizjazzjoni, prinċipalment lill-uniku produttur Komunitarju, lil 22 importatur u lil 27 utent tal-prodott ikkonċernat kif ukoll lil żewġ fornituri tal-materja prima.

(8)

Kienu riċevuti risposti mingħand il-produttur Komunitarju li għamel l-ilment, tliet importaturi mhux relatati, erba’ utenti, u żewġ fornituri.

(9)

Rigward il-pajjiż ikkonċernat minn din l-investigazzjoni, il-Kummissjoni rċeviet risposti mingħand tliet produtturi li jesportaw fir-RPĊ.

(10)

Il-Kummissjoni fittxet u vverifikat l-informazzjon kollha li qieset meħtieġa għal determinazzjoni proviżorja tad-dumping, tad-dannu li rriżulta u ta’ l-interess Komunitarju. Saru żjarat ta’ verifika fl-uffiċċji tal-kumpaniji li ġejjin:

(11)

L-investigazzjoni tad-dumping u tad-dannu kopriet il-perjodu bejn l-1 ta’ Lulju 2006 sat-30 ta’ Ġunju 2007 (il-“PI”). L-eżami tat-tendenzi rilevanti għall-valutazzjoni tad-dannu kopra l-perjodu minn April 2004 sa tmiem il-PI (il-“perjodu meqjus”).

(12)

L-MSG esportat lejn il-Komunità u li joriġina fir-RPĊ (il-“prodott ikkonċernat”) huwa addittiv ta’ l-ikel u jintuża prinċipalment biex itejjeb it-togħma tas-sopop, tal-brodijiet, tal-platti bil-ħut u bil-laħam u ta’ ikel lest biex jittiekel. Jintuża wkoll fl-industrija tal-kożmetika għall-kura personali. Normalment jiġi ddikjarat fil-kodiċi NM ex 2922 42 00 .

(13)

L-MSG huwa disponibbli f’diversi daqsijiet ta’ ppakkjar, li jvarjaw minn pakketti għall-konsumaturi ta’ 0,5 gramma għal basktijiet għal kwantitajiet kbar li jiżnu 1 000 kilogramma. Daqsijiet iżgħar ta’ l-ippakkjar jinbiegħu permezz tal-bejjiegħ bl-imnut lill-konsumaturi privati, filwaqt li d-daqsijiet akbar ta’ 20 kg u aktar huma ddestinati għall-utenti industrijali. Barra minn hekk, jeżistu gradi differenti ta’ purità. Madankollu, mhemm l-ebda differenza fil-karatteristiċi tal-monosodium glutamate ippakkjat fid-diversi daqsijiet u lanqas għall-gradi differenti ta’ purità.

(14)

Ma nstabet l-ebda differenza bejn il-prodott ikkonċernat u l-MSG prodott mill-industrija Komunitarja u mibjugħ fis-suq Komunitarju. Ir-RPĊ hija ekonomija fi tranżizzjoni u kif jissemma fil-premessi (30) sa (34) il-valur normali kellu jiġi stabbilit fuq il-bażi ta’ l-informazzjoni miksuba f’pajjiż terz b’ekonomija tas-suq. Skond l-informazzjoni disponibbli, l-MSG prodott u mibjugħ fil-pajjiż terz b’ekonomija tas-suq għandu l-istess karatteristiċi fiżiċi u kimiċi bażiċi bħall-MSG prodott fir-RPĊ u esportat lejn il-Komunità. Għalhekk qed jiġi proviżorjament konkluż li għandu jitiqes li t-tipi kollha ta’ MSG huma simili fit-tifsira ta’ l-Artikolu 1(4) tar-Regolament bażiku.

(15)

Fil-każ ta’ produttur li jesporta wieħed instab li, waqt l-ewwel jum tal-verifika fuq il-post, dan kien ressaq informazzjoni ffalsifikata relatata mal-bejgħ mill-esportazzjoni tiegħu li tqieset bħala informazzjoni falza u qarrieqa fis-sens ta’ l-Artikolu 18(1) tar-Regolament bażiku.

(16)

Minħabba din is-sejba, il-verifika twaqqfet u l-kumpanija kienet informata li skond l-Artikolu 18 tar-Regolament bażiku, kien previst li s-sejbiet (proviżorji jew definittivi, pożittivi jew negattivi) jiġu bbażati fuq fatti disponibbli u ngħatat opportunità li tikkummenta.

(17)

Fir-risposta tagħha l-kumpanija ma kkontestatx is-sejbiet ta’ l-investigazzjoni rigward il-falsifikazzjoni tad-dokument u ma qajmet l-ebda oġġezzjoni rigward l-applikazzjoni ta’ l-Artikolu 18 tar-Regolament bażiku.

(18)

F’dawn iċ-ċirkostanzi, l-informazzjoni pprovduta minn dan il-produttur li jesporta ma tqisitx u ntużaw il-fatti li kienu disponibbli.

(19)

Skond l-Artikolu 2(7)(b) tar-Regolament bażiku, f’investigazzjonijiet antidumping rigward importazzjonijiet li joriġinaw fir-RPĊ, il-valur normali għandu jkun iddeterminat skond il-paragrafi 1 sa 6 ta’ l-imsemmi Artikolu għal dawk il-produtturi li jesportaw li nstab li jissodisfaw il-kriterji stabbiliti fl-Artikolu 2(7)(c) tar-Regolament bażiku, jiġifieri fejn jintwera li l-kundizzjonijiet ta’ ekonomija tas-suq jipprevalu rigward il-manifattura u l-bejgħ tal-prodott simili. Fil-qosor, u għal faċilità ta’ referenza biss, dawn il-kriterji ġew stabbiliti f’forma mqassra hawn taħt:

(20)

Tliet produtturi li jesportaw Ċiniżi talbu MET skond l-Artikolu 2(7)(b) tar-Regolament bażiku u mlew il-formola ta’ talba għal MET fl-iskadenzi mogħtija.

(21)

Għal produttur li jesporta Ċiniż wieħed, kellu jiġi applikat l-Artikolu 18 tar-Regolament bażiku (ara l-premessi (15) sa (18) ta’ aktar ’il fuq).

(22)

Il-verifika stabbiliet li ż-żewġ produtturi li jesportaw Ċiniżi li fadal ma kinux jissodisfaw il-ħames kriterji kollha ta’ l-MET.

(23)

Il-verifika stabbiliet li produttur li jesporta Ċiniż wieħed (il-grupp Meihua huwa magħmul minn ħames kumpaniji) ma setax juri li kien jissodisfa l-kriterji tnejn u tlieta msemmija aktar ’il fuq. L-ewwelnett, il-grupp Meihua naqas milli jippreżenta prospetti finanzjarji kkonsolidati u vverifikati, skond l-IAS 27, fil-formola ta’ MET tiegħu jew waqt iż-żjara ta’ verifika. L-investigazzjoni wriet li, peress li kien hemm bosta tranżazzjonijiet fil-grupp, il-prospetti finanzjarji kkonsolidati u vverifikati biss, fejn il-bilanċi, it-tranżazzjonijiet, id-dħul, u l-infiq fi ħdan il-grupp kollha kienu eliminati b’mod sħiħ, għandhom jippermettu li tinkiseb stampa ċara dwar il-grupp. Il-grupp Meihua pprovda biss prospetti finanzjarji kkonsolidati u vverifikati ferm wara ż-żjara ta’ verifika li ma ppermettiex li l-Kummissjoni twettaq kwalunkwe verifika ta’ l-informazzjoni inkluża f’din il-kontabbiltà u lanqas ma ppermetta li tikseb stampa ċara dwar is-sitwazzjoni finanzjarja tal-grupp. Barra minn hekk, instab li l-kontabbiltà tal-kumpaniji individwali ma kinitx konformi ma’ l-IAS 1 u ma’ l-IAS 18, peress li l-kumpanija parent kienet qed tpaċi d-dħul u l-infiq u din it-tpaċija kienet ta’ natura materjali. Minħabba dan il-ksur ta’ l-IAS u minħabba li ma kinux lanqas biss imsemmija fir-rapporti ta’ verifika, qed jitqies li l-Grupp Meihua ma weriex li r-rekords tiegħu kienu vverifikati skond l-imsemmija standards (kriterju tnejn).

(24)

It-tieninett, fuq il-bażi tal-kontabbiltà individwali tal-kumpaniji tal-grupp ivverifikata waqt iż-żjara ta’ verifika u fuq il-bażi ta’ l-informazzjoni mhux ivverifikata msemmija aktar ’il fuq, kien skopert tgħawwiġ sinifikanti fis-sitwazzjoni finanzjarja tal-kumpaniji u tal-grupp. Instab li kienu jeżistu ammonti sinifikanti ta’ self bla imgħax. Dan irriżulta f’ammont sinifikanti ta’ kapital ta’ ħidma negattiv u fi spejjeż finanzjarji potenzjali għoljin li mhumiex riflessi fir-rekords tal-kumpaniji individwali jew tal-Grupp (kriterju tlieta).

(25)

It-tieni kumpanija, Fujian Province Jianyang Wuyi MSG Co. Ltd., ma setgħetx turi li kienet tissodisfa l-kriterji wieħed sa tlieta. L-ewwelnett, id-deċiżjonijiet tagħha ma sarux b’reazzjoni għas-sinjali tas-swieq u mingħajr interferenza sinifikanti min-naħa ta’ l-Istat, prinċipalment minħabba li l-Istat kien sovrarrappreżentat fil-Bord tagħha u peress li l-kumpanija kellha ċerti tranżazzjonijiet dubjużi, imma sinifikanti fl-ammont ma’ intrapriżi proprjetà ta’ l-Istat (self ma’ l-Istat bl-interessi darbtejn aktar mir-rata tas-suq, avvanzi lil intrapriżi proprjetà ta’ l-Istat bla ebda ġustifikazzjoni) (kriterju wieħed). It-tieninett, ma ssostanzjatx li kellha sett wieħed ċar ta’ rekords kontabbli bażiċi li kienu ppreparati u vverifikati f’konformità ma’ l-IAS, għaliex instab li l-kontabbiltà ma kinitx konformi ma’ l-IAS 1 u ma’ l-IAS 18 peress li l-kumpanija kienet qed tpaċi i) il-kontabbiltà pagabbli mal-kontabbiltà riċevibbli u ii) id-dħul u l-infiq. Iż-żewġ tipi ta’ tpaċija, li kienu ta’ natura materjali, b’dan il-mod naqqsu l-ħila li wieħed jifhem it-tranżazzjonijiet, avvenimenti u kundizzjonijiet oħrajn li saru fl-attività tal-kumpanija. Peress li dan il-ksur ta’ l-IAS ma ssemmiex fir-rapport ta’ verifika, il-kumpanija ma wrietx li r-rekords tagħha kienu vverifikati skond l-imsemmija standards (kriterju tnejn). Fl-aħħarnett, kien osservat tgħawwiġ li nġarr mis-sistema mhux ta’ ekonomija tas-suq fil-forma ta’ evalwazzjonijiet mhux xierqa ta’ l-assi u tad-drittijiet għall-użu ta’ l-art (kriterju tlieta).

(26)

Konsegwentement, kien konkluż li l-ebda produttur li jesporta Ċiniż ma wera li kien jissodisfa l-kundizzjonijiet stabbiliti fl-Artikolu 2(7)(c) tar-Regolament bażiku.

(27)

Skond l-Artikolu 2(7)(a) tar-Regolament bażiku, jiġi stabbilit dazju għall-pajjiż kollu, jekk ikun hemm, għall-pajjiżi li jaqgħu taħt dak l-Artikolu, ħlief f’dawk il-każi fejn il-kumpaniji jkunu jistgħu juru li jissodisfaw il-kriterji kollha stabbiliti fl-Artikolu 9(5) tar-Regolament bażiku u għalhekk jingħataw trattament individwali.

(28)

Il-produtturi li jesportaw li ma ssodisfawx il-kriterji għal MET talbu wkoll IT fil-każ li ma jingħatawx MET.

(29)

Fuq il-bażi ta’ l-informazzjoni disponibbli, instab li żewġ produtturi li jesportaw Ċiniżi jissodisfaw ir-rekwiżiti kollha għal IT kif ġie stabbilit fl-Artikolu 9(5) tar-Regolament bażiku.

(30)

Skond l-Artikolu 2(7)(a) tar-Regolament bażiku, f’ekonomiji fi tranżizzjoni, il-valur normali għall-produtturi li jesportaw li ma ngħatawx MET għandu jiġi stabbilit fuq il-bażi tal-prezz jew tal-valur mibni f’pajjiż terz b’ekonomija tas-suq (il-‘pajjiż analogu’).

(31)

Fl-avviż tal-bidu, it-Tajlandja kienet proposta bħala pajjiż analogu xieraq sabiex jiġi stabbilit il-valur normali għar-RPĊ. Il-Kummissjoni stiednet lill-partijiet interessati kollha biex jikkumentaw dwar din il-proposta.

(32)

Parti interessata waħda biss ressqet kummenti li jipproponu bħala pajjiżi analogi alternattivi lill-Brażil jew lill-Indoneżja. Il-Kummissjoni kkuntattjat lil kumpaniji magħrufa fil-Brażil u fl-Indoneżja. Madankollu, ma kienet riċevuta l-ebda risposta għall-kwestjonarju jew l-ebda kumment ta’ siwi mingħand il-produtturi fil-Brażil jew fl-Indoneżja.

(33)

Barra minn hekk, fid-dinja kollha t-Tajlandja hija waħda mill-akbar produtturi ta’ l-MSG b’suq kompetittiv u l-produttur ewlieni ta’ l-MSG fit-Tajlandja kkoopera b’mod sħiħ. It-Tajlandja ssodisfat il-kriterji għal pajjiż analogu xieraq peress li hemm kompetizzjoni fis-suq Tajlandiż, il-kwantitajiet mibjugħa fis-suq Tajlandiz huma biżżejjed u kemm is-suq Ċiniż kif ukoll dak Tajlandiż huma paragunabbli f’termini ta’ firxa ta’ prodotti u ta’ proċessi ta’ produzzjoni.

(34)

Minħabba dak li ngħad aktar ’il fuq, kien proviżorjament konkluż li t-Tajlandja tikkostitwixxi pajjiż analogu xieraq skond l-Artikolu 2(7)(a) tar-Regolament bażiku.

(35)

Skond l-Artikolu 2(7)(a) tar-Regolament bażiku, il-valur normali għar-RPĊ kien stabbilit fuq il-bażi ta’ l-informazzjoni vverifikata riċevuta mingħand il-produttur li kkoopera fil-pajjiż analogu, jiġifieri fuq il-bażi tal-prezzijiet imħallsa jew li għandhom jitħallsu fis-suq domestiku tat-Tajlandja għal tipi ta’ prodotti paragunabbli, peress li nstab li dawn saru fl-andament ordinarju tal-kummerċ. Rigward it-tipi ta’ prodotti, qed jiġi nnotat li essenzjalment tip wieħed biss ta’ prodotti kien esportat mir-RPĊ matul il-PI, jiġifieri l-MSG b’purità ta’ aktar jew ta’ 99 % u dan kien direttament paragunabbli mal-prodott mibjugħ mill-produttur tal-pajjiż analogu fis-suq domestiku tiegħu. L-investigazzjoni wriet ċerti differenzi fil-proċess ta’ produzzjoni bejn il-manifatturi Tajlandiżi u dawk Ċiniżi, peress li ta’ l-aħħar jużaw tagħmir differenti li jeħtieġ inqas użu ta’ l-enerġija elettrika. Il-prezzijiet tal-bejgħ domestiku Tajlandiżi għalhekk kienu aġġustati ’l isfel b’ammont li jirrifletti dawn id-differenzi.

(36)

Il-produtturi li jesportaw Ċiniżi li kkooperaw kollha għamlu bejgħ mill-esportazzjoni lejn il-Komunità jew direttament lil klijenti indipendenti fil-Komunità jew permezz ta’ kumpaniji mhux relatati li jinsabu fir-RPĊ u fit-Tajwan. Għalhekk, il-prezzijiet ta’ l-esportazzjoni kienu stabbiliti fuq il-bażi tal-prezzijiet effettivament imħallsa jew li għandhom jitħallsu għall-prodott ikkonċernat skond l-Artikolu 2(8) tar-Regolament bażiku.

(37)

Rigward l-esportaturi Ċiniżi kollha l-oħra, il-Kummissjoni l-ewwel stabbiliet il-livell ta’ kooperazzjoni. Sar paragun bejn il-kwantitajiet totali ta’ l-esportazzjoni indikati fir-risposti għall-kwestjonarju taż-żewġ produtturi li jesportaw li kkooperaw u l-importazzjonijiet totali li kienu suġġetti għal dumping mir-RPĊ kif kienu dderivati mill-istatistiċi dwar l-importazzjoni ta’ l-Eurostat. Instab li l-perċentwali tal-kooperazzjoni kienet ta’ 74 %. Fuq din il-bażi, il-livell ta’ kooperazzjoni tqis li kien baxx. Konsegwentement, il-prezzijiet ta’ l-esportazzjoni kienu proviżorjament stabbiliti fuq il-bażi tat-tranżazzjonijiet bl-ogħla marġni tad-dumping minn wieħed miż-żewġ produtturi li jesportaw Ċiniżi li kkooperaw li ngħataw IT skond l-Artikolu 18(1) tar-Regolament bażiku.

(38)

Il-paragun bejn il-valur normali u l-prezz ta’ l-esportazzjoni sar fuq bażi barra l-fabbrika.

(39)

Sabiex ikun żgurat paragun ġust bejn il-valur normali u l-prezz ta’ l-esportazzjoni, saret konċessjoni xierqa fil-forma ta’ aġġustamenti għad-differenzi li jaffetwaw il-prezzijiet u l-paragunabbiltà tal-prezzijiet skond l-Artikolu 2(10) tar-Regolament bażiku. Għall-kumpaniji investigati kollha (il-produtturi li jesportaw li kkooperaw u l-produttur fil-pajjiż analogu), fejn kien applikabbli u ġġustifikat, ingħataw konċessjonijiet għad-differenzi fl-ispejjeż tat-trasport, fl-ispejjeż tal-ġarr tal-merkanzija fuq l-oċeani u fl-ispejjeż ta’ l-assikurazzjoni, fl-ispejjeż ta’ l-immaniġġjar, tat-tagħbija u fl-ispejjeż anċillari, fl-ispejjeż ta’ l-ippakkjar, fl-ispejjeż tal-kreditu u fil-kummissjonijiet.

(40)

Għal dawk il-kumpaniji li ngħataw IT, il-valur normali medju u mgħobbi (bil-komponenti ta’ medja ta’ fatturi) kien ipparagunat mal-prezz ta’ l-esportazzjoni medju u mgħobbi (bil-komponenti ta’ medja ta’ fatturi) kif inhu pprovdut fl-Artikolu 2(11) u (12) tar-Regolament bażiku.

(41)

Fuq din il-bażi, il-marġnijiet tad-dumping proviżorji medji u mgħobbija (bil-komponenti ta’ medja ta’ fatturi) espressi bħala perċentwali tal-prezz CIF fuq il-fruntiera Komunitarja, bid-dazju mhux imħallas, huma:

(42)

Il-marġni tad-dumping għall-pajjiż kollu kien ikkalkulat fuq il-bażi ta’ paragun bejn il-prezz ta’ l-esportazzjoni kif ġie stabbiliti fil-premessa (37) u l-valur normali kif ġie stabbilit fil-premessa (35).

(43)

Fuq din il-bażi, il-livell tad-dumping għall-pajjiż kollu kien proviżorjament stabbilit għal 39,7 % tal-prezz CIF fuq il-fruntiera Komunitarja, bid-dazju mhux imħallas.

(44)

L-uniku produttur Komunitarju li kkoopera kien responsabbli għal 100 % mill-produzzjoni Komunitarja ta’ l-MSG matul il-PI. Għalhekk qed jitqies li jikkostitwixxi l-industrija Komunitarja fit-tifsira ta’ l-Artikolu 4(1) u ta’ l-Artikolu 5(4) tar-Regolament bażiku.

(45)

Peress li l-industrija Komunitarja b’hekk hija magħmula minn produttur wieħed biss, il-figuri kollha relatati ma’ data sensittiva kellhom jiġu indiċjati jew jingħataw f’firxa għal raġunijiet ta’ kunfidenzjalità. Iċ-ċifri fil-parentesi huma relatati ma’ ċifri negattivi.

(46)

Billi l-produttur Komunitarju juża sena fiskali mill-1 ta’ April sat-30 ta’ Marzu tas-sena segwenti, id-data kollha ta’ aktar ’l isfel ġiet ippreżentata għas-snin fiskali (FY) aktar milli għas-snin kalendarji (eż. l-FY2005 tkopri l-perjodu mill-1 ta’ April 2004 sal-31 ta’ Marzu 2005). Id-data li tikkonċerna l-importazzjonijiet qed tiġi ppreżentata fuq l-istess bażi paragunabbli.

(47)

Il-konsum Komunitarju kien stabbilit fuq il-bażi tal-volumi tal-bejgħ ta’ l-industrija Komunitarju fis-suq Komunitarju flimkien ma’ l-importazzjonijiet mir-RPĊ u pajjiżi terzi oħra, ibbażati fuq l-Eurostat. Il-konsum Komunitarju ta’ l-MSG żdied bejn l-FY2005 u l-FY2006 qabel ma naqas kontinwament fl-FY2007 u fil-PI. B’kollox, tul il-perjodu meqjus il-konsum naqas b’4 %.

Tabella 1

(48)

Il-volumi ta’ l-importazzjoni mir-RPĊ żdiedu b’mod sinifikanti minn 4 701 tunnellata metrika fl-FY2005 għal 34 613 tunnellata metrika fil-PI, jiġifieri b’636 % tul il-perjodu meqjus.

(49)

Fl-FY2005, is-sehem mis-suq korrispondenti kien ta’ bejn 3 % u 7 % u tul il-perjodu meqjus żdied għal bejn 38 % u 43 %, minkejja t-tnaqqis fil-konsum.

Tabella 2

(50)

Tul il-perjodu meqjus il-prezzijiet medji għall-importazzjonijiet miċ-Ċina varjaw u b’mod globali wrew tnaqqis ċkejken ta’ 2 %.

Tabella 3

(51)

Sabiex ikun analizzat it-traħħis tal-prezzijiet taħt il-prezz normali, il-prezzijiet medji u mgħobbija tal-bejgħ skond it-tip ta’ prodott ta’ l-industrija Komunitarja lil klijenti mhux relatati fis-suq Komunitarju, aġġustati għal livell barra mill-fabbrika, kienu pparagunati mal-prezzijiet medji u mgħobbija korrispondenti ta’ l-importazzjonijiet ikkonċernati, stabbiliti fuq bażi CIF b’aġġustament xieraq għad-dazji doganali u għall-ispejjeż ta’ wara l-importazzjoni. Il-paragun sar wara t-tnaqqis tar-ribassi u ta’ l-iskonti.

(52)

Fuq il-bażi tal-metodoloġija t’aktar ’il fuq, id-differenza bejn il-prezzijiet, espressa bħala perċentwali tal-prezz medju u mgħobbi ta’ l-industrija Komunitarja (barra mill-fabbrika), jiġifieri l-marġni tat-traħħis tal-prezzijiet, kienet tvarja bejn 21 % u 24 %.

(53)

Kienu eżaminati t-tendenzi tal-fatturi ekonomiċi kollha li ssemmew fl-Artikolu 3(5) tar-Regolament bażiku biex tkun stabbilita s-sitwazzjoni ekonomika ta’ l-industrija Komunitarja tul il-perjodu meqjus.

(54)

Fl-FY2006 il-kapaċità tal-produzzjoni żdiedet b’5 % segwita minn żieda ulterjuri ta’ 3 punti perċentwali fl-FY2007 qabel ma baqgħet stabbli fil-PI. Iż-żidiet fil-kapaċità tal-produzzjoni rriżultaw minn investimenti ġodda kif ġie spjegat fil-premessa (60) t’aktar ’l isfel.

(55)

Il-produzzjoni ta’ l-MSG mill-industrija Komunitarja naqset kontinwament biex fil-perjodu meqjus wriet tnaqqis globali ta’ 6 %. Il-figuri tal-produzzjoni għall-FY2007 u għall-PI jirriflettu l-fatt li fl-2006 l-industrija Komunitarja kellha twaqqaf il-produzzjoni għal xahar.

(56)

Minħabba t-tnaqqis fil-volumi tal-produzzjoni, tul il-perjodu meqjus l-użu tal-kapaċità tnaqqas b’14 %.

Tabella 4

(57)

Il-bejgħ ta’ l-MSG mill-industrija Komunitarja lil klijenti indipendenti fis-suq Komunitarju żdied bi ftit fl-FY2006 qabel ma wera tnaqqis massiv fl-FY2007 ta’ 25 punt perċentwali. Tul il-perjodu meqjus, it-tnaqqis fil-bejgħ kien ta’ 24 %. Dan it-tnaqqis kbir fil-volumi tal-bejgħ wassal għal tnaqqis sinifikanti fis-sehem mis-suq b’total ta’ 12,45 punti perċentwali tul il-perjodu meqjus (minn sehem mis-suq ta’ 58,6 % fl-FY2005 għal 46,1 % fil-PI).

(58)

Tul il-perjodu meqjus, il-prezzijiet medji tal-bejgħ lil klijenti mhux relatati fis-suq Komunitarju żdiedu b’19 %. Iż-żieda saret saħansitra aktar f’daqqa fl-FY2007 (+23 %) imma mbagħad kien hemm tnaqqis ċkejken fil-prezzijiet fl-aħħar tliet xhur tal-PI. Iż-żieda fil-prezzijiet kienet meħtieġa sabiex tkun koperta ż-żieda fl-ispejjeż tal-materja prima u ta’ inputs oħrajn. Minkejja li l-industrija Komunitarja rnexxielha li effettivament iżżid l-effiċjenzi tagħha fil-produzzjoni ta’ l-MSG, il-prezzijiet tal-bejgħ ma setgħux ikopru l-ispiża tal-produzzjoni matul il-PI.

Tabella 5

(59)

Tul il-perjodu meqjus, il-ħażniet żdiedu bi 52 %. Dan it-tkabbir fl-inventarji seħħ fit-tieni nofs tal-perjodu meqjus u kkoinċida mat-tnaqqis kbir fil-bejgħ li beda mill-FY2007. Fi tmiem il-PI, il-livell tal-ħażniet baqa’ fuq livell għoli.

Tabella 6

(60)

Il-bejgħ ta’ l-industrija Komunitarja tal-prodott simili fis-suq Komunitarju tul il-perjodu meqjus ma kienx profittabbli. Fil-bidu ta’ dan il-perjodu din is-sitwazzjoni kellha titqies fl-isfond ta’ l-akkwist ta’ Orsan S.A. minn Ajinomoto Foods Europe (AFE), u tar-ristrutturazzjoni li seħħet f’dak iż-żmien. Tabilħaqq, Orsan S.A. kienet f’sitwazzjoni finanzjarja batuta sa l-2003 u AFE wettqet ristrutturazzjoni approfondita sabiex tnaqqas l-ispejjeż u ttejjeb l-effiċjenza b’investimenti speċifiċi fl-2004 u fl-2005. Dawn l-investimenti kellhom l-għan li jżidu l-kapaċità tal-produzzjoni, jiżviluppaw linja ġdida ta’ prodotti u jżidu l-effiċjenza fl-enerġija. Il-Grupp, li issa tappartjeni għalih l-industrija Komunitarja, ittrasferixxa wkoll għarfien, inklużi razez ta’ batterji ġodda u li jagħtu rendiment aħjar għall-proċess ta’ fermentazzjoni meħtieġ għall-produzzjoni ta’ l-MSG fil-Komunità.

(61)

Għalkemm fl-2006 u fl-2007 ukoll komplew l-investimenti, l-industrija Komunitarja rnexxielha tnaqqas it-telf tagħha, partikolarment matul il-PI, minħabba ż-żieda fil-prezzijiet tal-bejgħ imma anki minħabba effiċjenza aħjar fl-użu tal-materja prima u ta’ l-enerġija. Madankollu, moviment ulterjuri ’l fuq tal-prezzijiet ma kienx possibbli. L-esportaturi Ċiniżi kienu aktar u aktar preżenti u ppenetraw b’rata mgħaġġla s-suq Komunitarju. Għaldaqstant, matul il-PI l-industrija Komunitarja xorta esperjenzat telf sinifikanti fil-bejgħ tagħha fis-suq Komunitarju.

(62)

Il-qligħ fuq l-investiment mill-produzzjoni u mill-bejgħ tal-prodott simili kien negattiv tul il-perjodu meqjus kollu, li jirrifletti t-tendenza negattiva fil-profittabilità li ssemmiet aktar ’il fuq.

(63)

L-istess bħall-indikaturi finanzjarji l-oħra, il-likwidità ġġenerata mill-MSG prodott u mibjugħ fl-UE kienet negattiva tul il-perjodu meqjus kollu.

(64)

Minbarra t-telf finanzjarju, ma kien hemm l-ebda indikazzjoni li l-industrija Komunitarja, bħala parti mill-Grupp Ajinomoto, iltaqgħet ma’ problemi oħrajn sabiex tiġbor il-kapital għall-attivitajiet tagħha.

Tabella 7

(65)

Fil-perjodu meqjus l-impjiegi fl-industrija Komunitarja naqsu b’9 %. Għall-bidu, fl-FY2006, il-pagi żdiedu b’6 % meta pparagunati ma’ l-FY2005. Madankollu, fl-FY2007 u fil-PI, il-pagi niżlu lura għal-livell li kienu fl-FY2005.

(66)

Il-produttività żdiedet bi 3 % fl-FY2006, segwita minn tnaqqis ċkejken fl-FY2007. Fil-PI l-produttività żdiedet għal darb’oħra għall-istess livell li kienet fl-FY2006.

Tabella 8

(67)

Filwaqt li l-konsum Komunitarju tul il-perjodu meqjus naqas b’4 %, il-volum tal-bejgħ ta’ l-industrija Komunitarja naqas b’24 %. Dan wassal għat-telf tas-sehem mis-suq mill-industrija Komunitarja tul il-perjodu meqjus ta’ 12,5 punti perċentwali.

(68)

Il-marġnijiet tad-dumping għall-esportaturi fir-RPĊ ġew speċifikati aktar ’il fuq fit-taqsima dwar id-dumping u huma ferm aktar minn de minimis. Barra minn hekk, meta jitqiesu l-volumi u l-prezzijiet ta’ l-importazzjonijiet li kienu suġġetti għal dumping, l-impatt tal-marġni effettiv tad-dumping ma jistax jitqies bħala neliġibbli.

(69)

Mhemm l-ebda indikazzjoni li l-industrija Komunitarja qed tirkupra mill-effetti tad-dumping fl-imgħoddi. Qed jiġi nnotat li l-importazzjonijiet ta’ l-MSG ilhom ma jkunu suġġetti għal miżuri mill-2003.

(70)

Tul il-perjodu meqjus, il-parti l-kbira ta’ l-indikaturi tad-dannu li għandhom x’jaqsmu ma’ l-industrija Komunitarja żviluppaw negattivament. Il-produzzjoni u l-użu tal-kapaċità niżlu b’6 % u b’14 %, rispettivament. Filwaqt li l-konsum fis-suq Komunitarju naqas b’4 %, il-volumi tal-bejgħ ta’ l-industrija Komunitarja niżlu ferm aktar, jiġifieri b’24 %, li wassal għal telf fis-sehem mis-suq ta’ 12,5 punti perċentwali. Tul il-perjodu meqjus, indikaturi tad-dannu oħrajn bħall-ħażniet u l-impjiegi, ukoll żviluppaw negattivament.

(71)

L-investigazzjoni wriet li l-importazzjonijiet Ċiniżi bi prezzijiet baxxi kienu irħas mill-prezzijiet ta’ l-industrija Komunitarja b’mhux aktar minn 24 % matul il-PI. Tul il-perjodu meqjus, il-prezzijiet tal-bejgħ ta’ l-industrija Komunitarja żdiedu b’19 %, minħabba żidiet fl-ispejjeż, imma l-konsegwenza ta’ dan kien tnaqqis fil-volumi tal-bejgħ u tnaqqis fis-sehem mis-suq. B’hekk, tul il-perjodu meqjus, l-indikaturi finanzjarji tad-dannu l-oħra, inklużi l-qligħ fuq l-investimenti, il-likwidità u l-profittabilità, ukoll żviluppaw negattivament.

(72)

Fid-dawl ta’ dak li ngħad aktar ’il fuq, jista’ jiġi konkluż li l-industrija Komunitarja batiet minn dannu materjali fit-tifsira ta’ l-Artikolu 3(5) tar-Regolament bażiku.

(73)

Skond l-Artikolu 3(6) u 3(7) tar-Regolament bażiku, il-Kummissjoni eżaminat jekk l-importazzjonijiet li kienu suġġetti għal dumping ta’ l-MSG li joriġinaw fir-RPĊ ikkawżawx dannu lill-industrija Komunitarja sa grad li jkun jista’ jiġi kklassifikat bħala materjali. Fatturi magħrufa oħrajn għajr l-importazzjonijiet li kienu suġġetti għal dumping, li fl-istess ħin setgħu kienu qed jagħmlu dannu lill-industrija Komunitarja, kienu eżaminati wkoll sabiex ikun żgurat li d-dannu possibbli kkawżat minn dawn il-fatturi l-oħra ma jiġix attribwit lill-importazzjonijiet li kienu suġġetti għal dumping.

(74)

Tul il-perjodu meqjus, l-importazzjonijiet bi prezzijiet baxxi li kienu suġġetti għal dumping mir-RPĊ f’termini ta’ volum żdiedu b’aktar minn seba’ darbiet, li rriżulta f’żieda fis-sehem mis-suq Komunitarju mill-MSG Ċiniż minn firxa ta’ 3 % sa 7 % fl-FY2005 għal firxa ta’ 38 % sa 43 % fil-PI. Fl-istess ħin, l-esportaturi Ċiniżi kienu l-uniċi parteċipanti fis-suq li naqqsu l-prezzijiet tal-bejgħ tagħhom. L-informazzjoni disponibbli tindika li kemm il-produttur Komunitarju kif ukoll l-esportaturi minn pajjiżi terzi oħrajn żiedu l-prezzijiet tagħhom wara żieda fl-ispejjeż tal-produzzjoni (prinċipalment żidiet fil-prezzijiet tal-materja prima u ta’ l-enerġija).

(75)

Din iż-żieda fl-importazzjonijiet mir-RPĊ ikkoinċidiet mad-deterjorament tas-sitwazzjoni ta’ l-industrija Komunitarja. Fl-FY2006, il-volumi ta’ l-importazzjonijiet mir-RPĊ żdiedu b’142 % filwaqt li l-volum tal-bejgħ Komunitarju żdied b’1 %. Fl-FY2007, il-volum ta’ l-importazzjonijiet mir-RPĊ żdied b’201 % ulterjuri u l-prezzijiet tal-bejgħ naqsu b’4 % filwaqt li l-volum tal-bejgħ Komunitarju naqas b’25 punt perċentwali. Għaldaqstant, l-industrija Komunitarja batiet minn tnaqqis fil-volumi tal-bejgħ tagħha fis-suq Komunitarju u minn telf fis-sehem mis-suq konsegwenti ta’ 12,5 punti perċentwali matul il-PI. Is-soppressjoni tal-prezzijiet mill-importazzjonijiet Ċiniżi li kienu suġġetti għal dumping ma ppermettietx li l-industrija Komunitarja tgħolli l-prezzijiet tal-bejgħ tagħha għal-livell li kellu jelimina t-telf u jtejjeb aktar is-sitwazzjoni finanzjarja tagħha.

(76)

Fuq il-bażi ta’ dak li ngħad aktar ’il fuq, qed jiġi proviżorjament konkluż li l-importazzjonijiet bi prezzijiet baxxi li kienu suġġetti għal dumping mir-RPĊ li kienu ferm irħas mill-prezzijiet ta’ l-industrija Komunitarja matul il-PI, u li anki żdiedu b’mod sinifikanti fil-volum, kellhom rwol determinanti fid-dannu li batiet l-industrija Komunitarja, li huwa rifless fis-sitwazzjoni finanzjarja batuta tagħha u fid-deterjorament ta’ l-indikaturi tad-dannu l-oħra matul il-PI, kif ukoll fit-telf tas-sehem mis-suq.

(77)

L-importazzjonijiet minn pajjiżi terzi li mhumiex ikkonċernati minn din l-investigazzjoni naqsu bi 65 % fil-perjodu meqjus li rriżulta fi tnaqqis ta’ sehem mis-suq li jvarja bejn 35 % u 40 % fl-FY2005 għal bejn 10 % u 15 % fil-PI. Tul il-perjodu meqjus il-prezzijiet ta’ dawn l-importazzjonijiet żdiedu bi 20 % li jsegwi t-tendenza ta’ l-iżvilupp fil-prezzijiet ta’ l-industrija Komunitarja.

(78)

It-tendenzi fil-volumi u fil-prezzijiet ta’ l-importazzjoni minn pajjiżi terzi oħrajn bejn l-FY2005 u l-PI kienu kif ġej:

Tabella 9

(79)

Fuq il-bażi ta’ dak li ngħad aktar ’il fuq, kien proviżorjament konkluż li l-importazzjonijiet minn pajjiżi terzi oħrajn ma kisrux ir-rabta kawżali bejn id-dumping misjub u d-dannu materjali kkawżat mill-importazzjonijiet li kienu suġġetti għal dumping mir-RPĊ lejn l-industrija Komunitarja.

(80)

Rigward l-iżvilupp tad-domanda, bejn l-FY2005 u l-PI l-konsum Komunitarju ta’ l-MSG naqas. Dan it-tnaqqis, madankollu, ma kienx sinifikanti (–4 %) u ma jistax jispjega t-tnaqqis fil-volum tal-bejgħ ta’ l-industrija Komunitarja fis-suq Komunitarju li niżel b’24 %. Għandu jiġi enfasizzat li, tul il-perjodu meqjus, l-industrija Komunitarja tilfet 12,5 punti perċentwali tas-sehem mis-suq tagħha u dan il-bejgħ kien sostitwit minn importazzjonijiet li kienu suġġetti għal dumping li joriġinaw fir-RPĊ. Għalhekk, id-dannu materjali li batiet l-industrija Komunitarja ma jistax jiġi attribwit lil tnaqqis fid-domanda fis-suq Komunitarju.

(81)

Bil-kontra ta’ dak li sostnew uħud mill-partijiet interessati, jiġifieri li r-rendiment fqir ta’ l-esportazzjoni ta’ l-industrija Komunitarja jista’ jkun il-kawża tad-dannu li batiet, għandu jiġi nnotat li, tul il-perjodu meqjus, il-bejgħ mill-esportazzjoni żdied b’aktar minn 50 %. Din id-dikjarazzjoni għalhekk trid tiġi miċħuda.

(82)

Rigward il-fattur tal-produttività, għandu jkun innotat li, tul il-perjodu meqjus, l-industrija Komunitarja rnexxielha tnaqqas l-ispejjeż fissi u l-ispejjeż tax-xogħol tagħha u żiedet il-produttività għal kull impjegat.

(83)

Minħabba dak li ngħad aktar ’il fuq, la r-rendiment ta’ l-esportazzjoni u lanqas kwalunkwe tnaqqis allegat fil-produttività ta’ l-industrija Komunitarja ma kkontribwew għad-deterjorament tas-sitwazzjoni tagħha fil-PI.

(84)

Uħud mill-partijiet interessati sostnew li d-deprezzament ta’ l-USD fil-konfront ta’ l-Euro ffavorixxa l-importazzjonijiet ta’ l-MSG fil-Komunità Ewropea. Tabilħaqq instab li l-maġġoranza vasta tat-tranżazzjonijiet ta’ l-importazzjonijiet mir-RPĊ fil-Komunità Ewropea fil-fatturi tniżżlu bħala USD.

(85)

Għandu jitfakkar li l-investigazzjoni għandha tistabbilixxi jekk l-importazzjonijiet li kienu suġġetti għal dumping (f’termini ta’ prezzijiet u ta’ volumi) ikkawżawx dannu materjali lill-industrija Komunitarja jew jekk tali dannu materjali kienx minħabba fatturi oħrajn. F’dan ir-rigward, l-Artikolu 3(6) tar-Regolament bażiku jiddikjara li jeħtieġ li jintwera li l-livell tal-prezzijiet ta’ l-importazzjonijiet li kienu suġġetti għal dumping jikkawża dannu. Għalhekk sempliċement jirreferi għal differenza bejn il-livelli tal-prezzijiet, u b’hekk mhemm l-ebda rekwiżit li jiġu analizzati l-fatturi li jaffetwaw il-livell ta’ dawk il-prezzijiet.

(86)

Fil-prattika, l-effett ta’ l-importazzjonijiet li kienu suġġetti għal dumping fuq il-prezzijiet ta’ l-industrija Komunitarja essenzjalment ġie eżaminat billi ġie stabbilit it-traħħis tal-prezzijiet taħt il-prezz normali, id-depressjoni tal-prezzijiet u s-sopressjoni tal-prezzijiet. Għal dan l-għan, jiġu pparagunati l-prezzijiet ta’ l-esportazzjoni li kienu suġġetti għal dumping u l-prezzijiet tal-bejgħ ta’ l-industrija Komunitarja, u l-prezzijiet ta’ l-esportazzjoni li ntużaw għall-kalkoli tad-dannu f’ċerti każi jista’ jkun hemm il-ħtieġa li jiġu kkonvertiti f’munita oħra sabiex ikun hemm bażi paragunabbli. Konsegwentement, l-użu ta’ rati tal-kambju f’dan il-kuntest jiżgura biss li d-differenza fil-prezzijiet tiġi stabbilita fuq bażi paragunabbli. Minn dan, jidher ovvju li, fil-prinċipju, ir-rata tal-kambju ma tistax tkun fattur ieħor ta’ dannu.

(87)

Dak li ngħad aktar ’il fuq ġie kkonfermat ukoll mid-diċitura ta’ l-Artikolu 3(7) tar-Regolament bażiku, li jirreferi għal fatturi magħrufa għajr l-importazzjonijiet li kienu suġġetti għal dumping. Il-lista tal-fatturi l-oħra magħrufa f’dan l-Artikolu ma tagħmel referenza għall-ebda fattur li jaffettwa l-livell tal-prezzijiet ta’ l-importazzjonijiet li kienu suġġetti għal dumping. Fi ftit kliem, jekk l-importazzjonijiet ġew suġġetti għal dumping, u anki jekk ibbenefikaw minn żvilupp favorevoli fir-rati tal-kambju, ma jitqiesx li l-iżvilupp ta’ tali rata tal-kambju jista’ jkun fattur ieħor li jikkawża dannu.

(88)

B’hekk, l-analiżi tal-fatturi li jaffettwaw il-livell tal-prezzijiet ta’ l-importazzjonijiet li kienu suġġetti għal dumping, bħall-varjazzjonijiet fir-rata tal-kambju, ma tistax tkun konklużiva u tali analiżi tmur lilhinn mir-rekwiżiti tar-Regolament bażiku.

(89)

Ikun xi jkun il-każ, u mingħajr preġudizzju għal dak li ngħad aktar ’il fuq, anki fuq il-bażi tar-rata tal-kambju li kienet tipprevali fil-bidu ta’ l-FY2005, l-importazzjonijiet mir-RPĊ kienu ferm irħas mill-prezzijiet ta’ l-industrija Komunitarja. B’hekk, dan il-marġni ta’ traħħis sinifikanti ma jistax jiġi spjegat mill-bidla fir-rata tal-kambju bejn l-Euro kontra l-USD fil-perjodu meqjus.

(90)

Fid-dawl ta’ dak li ngħad aktar ’il fuq, kien proviżorjament konkluż li l-apprezzament ta’ l-Euro meta pparagunata ma’ l-USD mhux fattur biżżejjed biex jikser ir-rabta kawżali bejn l-importazzjonijiet li kienu suġġetti għal dumping u d-dannu materjali li batiet l-industrija Komunitarja.

(91)

Uħud mill-partijiet interessati sostnew li l-industrija Komunitarja importat l-MSG mill-fabbriki mhux Ċiniżi relatati tagħha li jinsabu barra mill-Komunità li kellu impatt fuq il-volumi tal-bejgħ tagħha ta’ l-MSG prodott fil-Komunità.

(92)

L-investigazzjoni wriet li wara l-akkwist ta’ Orsan, l-industrija Komunitarja organizzat mill-ġdid l-istruttura/il-kanali tal-bejgħ tagħha fil-Komunità. Kważi l-MSG kollu mibjugħ fis-suq Komunitarju mill-industrija Komunitarja fil-PI kien prodott mill-uniku produttur Komunitarju. Il-bejgħ ta’ l-MSG fis-suq Komunitarju li joriġina mill-esportaturi relatati ma’ l-industrija Komunitarja f’pajjiżi barra mill-Komunità tul il-perjodu meqjus tnaqqas b’mod konstanti u sinifikanti.

(93)

Uħud mill-partijiet interessati argumentaw ukoll li l-industrija Komunitarja stess jew kumpaniji oħrajn tal-Grupp Ajinomoto huma relatati mal-produtturi Ċiniżi ta’ l-MSG li jesportaw il-prodott ikkonċernat lejn il-Komunità. Ġie sostnut li l-esportazzjonijiet lejn il-Komunità minn dawn il-kumpaniji relatati kkawżaw id-dannu li batiet l-industrija Komunitarja. Ġie sostnut ukoll li huwa l-Grupp Ajinomoto stess li huwa responsabbli għall-politiki tal-prezzijiet ta’ dawn l-esportaturi Ċiniżi.

(94)

L-investigazzjoni wriet li fil-każ ta’ kumpanija Ċiniża waħda allegatament relatata mal-Grupp Ajinomoto, din ir-relazzjoni ma baqgħetx teżisti qabel il-PI. Barra minn hekk, instab li l-bejgħ mill-esportazzjoni ta’ din il-kumpanija lejn il-Komunità fis-snin ta’ qabel il-PI kien negliġibbli. Fil-każ ta’ żewġ produtturi Ċiniżi oħra ta’ l-MSG relatati ma’ l-uniku produttur Komunitarju, kien stabbilit li l-esportazzjonijiet tagħhom lejn il-Komunità fil-PI ma kinux sinifikanti. F’dan ir-rigward, il-fatt li l-Grupp Ajinomoto seta’ kien responsabbli għall-politiki tal-prezzijiet ta’ dawn il-kumpaniji ma tqiesx li kien rilevanti.

(95)

Għalhekk, qed jiġi proviżorjament konkluż li l-importazzjonijiet ta’ l-industrija Komunitarja minn partijiet relatati barra mill-Komunità ma kkontribwewx għad-dannu materjali li batiet.

(96)

L-allegazzjoni li saret minn ċerti partijiet interessati li tikkonċerna l-impatt negattiv tar-reġim il-ġdid taz-zokkor tal-Komunitajiet (u ż-żieda fil-prezzijiet taz-zokkor li rriżulta minn dan) fuq l-ispejjeż tal-produzzjoni ta’ l-industrija Komunitarja ma kinitx ikkonfermata. L-investigazzjoni wriet li l-industrija Komunitarja bbenefikat minn ftehimiet tul perjodu twil ta’ żmien li kienu ffirmati ferm qabel l-implimentazzjoni tar-reġim il-ġdid li żgura li l-prezz tax-xiri taz-zokkor tagħhom kien baxx matul il-parti l-kbira tal-perjodu meqjus. Fit-tieni parti tal-PI, wara l-implimentazzjoni tar-reġim il-ġdid taz-zokkor, il-prezz tax-xiri taz-zokkor żdied bi ftit imma dan l-impatt kien parzjalment ibbilanċjat mill-iżvilupp ta’ teknoloġija tal-fermentazzjoni aktar effiċjenti. Fil-PI, il-produzzjoni mill-fermentazzjoni żdiedet u hija għolja meta pparagunata ma’ dik li nkisbet medjament mill-produtturi Ċiniżi. Dan ifisser li għal kull tunnellata metrika ta’ MSG, il-produttur Komunitarju jeħtieġ sostanzjalment inqas zokkor meta pparagunat mal-ħtiġiet tal-produtturi Ċiniżi.

(97)

L-MSG fil-Komunità jiġi prodott minn ġulepp magħqud taz-zokkor (sugar molasses) filwaqt li fiċ-Ċina jiġi prodott mil-lamtu tal-qamħ jew tar-ross. Uħud mill-partijiet interessati sostnew li l-evoluzzjoni fil-prezzijiet ta’ din il-materja prima setgħet tat vantaġġ komparattiv lill-produtturi Ċiniżi. Madankollu, paragun ta’ l-ispejjeż tal-materja prima meħtieġa sabiex tkun prodotta l-istess kwantità ta’ MSG jindika li hemm vantaġġ komparattiv għall-produzzjoni ta’ l-MSG mill-ġulepp magħqud. Fuq il-bażi ta’ l-informazzjoni disponibbli, hemm indikazzjonijiet li dan il-vantaġġ komparattiv matul il-PI saħansitra ssaħħaħ biż-żieda kbira fil-prezzijiet tal-qamħ, kemm f’ambitu internazzjonali kif ukoll fis-suq Ċiniż. Madankollu, minħabba d-dumping tal-prodotti Ċiniżi, dan il-vantaġġ komparattiv naqas milli jiġġenera qligħ fis-sehem mis-suq għall-MSG prodott mill-ġulepp magħqud mill-industrija Komunitarja.

(98)

Għalhekk, kien proviżorjament konkluż li d-differenza fil-materja prima li ntużat mill-industrija Komunitarja meta pparagunata ma’ dik li ntużat mill-produtturi li jesportaw Ċiniżi ma kkontribwietx għad-dannu materjali li batiet l-industrija Komunitarja.

(99)

L-analiżi t’aktar ’il fuq wriet li kien hemm żieda sostanzjali fil-volum u fis-sehem mis-suq ta’ l-importazzjonijiet li kienu suġġetti għal dumping fir-RPĊ bejn l-FY2005 u l-PI, flimkien ma’ livell għoli ta’ traħħis tal-prezzijiet matul il-PI. Din iż-żieda fis-sehem mis-suq ta’ l-importazzjonijiet bi prezzijiet baxxi mir-RPĊ ikkoinċidiet ma’ tnaqqis sinifikanti fis-sehem mis-suq ta’ l-industrija Komunitarja li, flimkien mal-pressjoni ’l isfel fuq il-prezzijiet, irriżultat, fost l-oħrajn, f’telf sostanzjali ta’ l-industrija Komunitarja tul il-perjodu meqjus. Min-naħa l-oħra, l-eżami tal-fatturi l-oħra li setgħu għamlu dannu lill-industrija Komunitarja żvela li l-ebda wieħed minn dawn ma seta’ kellu impatt negattiv sinifikanti.

(100)

Fuq il-bażi ta’ l-analiżi t’aktar ’il fuq, li għamlet distinzjoni xierqa u sseparat l-effetti tal-fatturi magħrufa kollha fuq is-sitwazzjoni ta’ l-industrija Komunitarja mill-effetti dannużi ta’ l-importazzjonijiet li kienu suġġetti għal dumping, qed jiġi proviżorjament konkluż li l-importazzjonijiet mill-pajjiżi kkonċernati kkawżaw dannu materjali lill-industrija Komunitarja fit-tifsira ta’ l-Artikolu 3(6) tar-Regolament bażiku.

(101)

Skond l-Artikolu 21 tar-Regolament bażiku, il-Kummissjoni eżaminat jekk, minkejja l-konklużjoni dwar id-dumping dannuż, kienx hemm raġunijiet konvinċenti biex ikun konkluż li mhux fl-interess Komunitarju li jiġu adottati miżuri f’dan il-każ partikolari. Id-determinazzjoni ta’ l-interess Komunitarju kienet ibbażata fuq apprezzament ta’ l-interessi differenti kollha involuti, jiġifieri dawk ta’ l-industrija Komunitarja, tal-fornituri tal-materja prima, ta’ l-importaturi u ta’ l-utenti tal-prodott ikkonċernat.

(102)

L-industrija Komunitarja hija magħmula minn produttur uniku li jinsab fi Franza. Il-kumpanija hija proprjetà tal-Grupp Ajinomoto li huwa involut, fost attivitajiet oħrajn, fil-produzzjoni u fil-bejgħ ta’ l-MSG mad-dinja kollha. L-industrija Komunitarja xtrat il-materja prima tagħha mingħand il-fornituri Komunitarji, biex b’hekk kellha impatt fuq il-livelli ta’ l-impjiegi tal-fornituri tal-materja prima.

(103)

Sa mill-FY2005, l-industrija Komunitarja għamlet ħilitha biex tinvesti f’ristrutturazzjoni approfondita ħalli tnaqqas l-ispejjeż, u b’hekk, tkun tista’ titqies bħala vijabbli. Madankollu, minħabba l-importazzjonijiet li kienu suġġetti għal dumping, kien hemm dannu li ħa l-forma ta’ tnaqqis sinifikanti fil-volum tal-bejgħ u żieda mhux biżżejjed fil-prezz tal-bejgħ, li min-naħa tagħha rriżultat f’telf finanzjarju sinifikanti għall-industrija Komunitarja. Huwa mistenni, li wara l-impożizzjoni tad-dazji antidumping, il-volum ta’ l-MSG mibjugħ mill-industrija għandu jiżdied u, sa ċertu punt, il-prezzijiet tiegħu fis-suq Komunitarju għandhom jiżdiedu wkoll. Dan għandu jippermetti li l-industrija Komunitarja tilħaq livell aċċettabbli ta’ profittabilità.

(104)

Qed jitiqes li l-impożizzjoni tal-miżuri għandha trodd il-kompetizzjoni ġusta fis-suq. Għandu jiġi nnotat li telf ta’ l-industrija Komunitarja huwa r-riżultat tad-diffikultà li għandha biex tikkompeti ma’ l-importazzjonijiet bi prezzijiet baxxi li kienu suġġetti għal dumping li joriġinaw fir-RPĊ. L-impożizzjoni ta’ miżuri antidumping probabbilment tqiegħed lill-industrija Komunitarja fil-pożizzjoni li tikseb mill-ġdid għallinqas parti mis-sehem mis-suq mitluf tagħha b’impatt pożittiv konsegwenti fuq il-profittabilità.

(105)

Kif issemma aktar ’il fuq, l-industrija Komunitarja batiet minn dannu materjali kkawżat mill-importazzjonijiet li kienu suġġetti għal dumping li joriġinaw fir-RPĊ. Jekk ma jiġux imposti miżuri, huwa probabbli deterjorament ulterjuri fis-sitwazzjoni ta’ l-industrija Komunitarja, biex b’hekk jiddgħajfu l-effetti pożittivi ta’ l-investimenti li saru f’dawn l-aħħar snin. L-effett ta’ depressjoni tal-prezzijiet ta’ l-importazzjonijiet li kienu suġġetti għal dumping għandu jkompli jfixkel l-isforzi kollha li saru mill-industrija Komunitarja, partikolarment, biex tikseb mill-ġdid livell profittabbli. Jekk ma jittiħdux miżuri tkun qed titqiegħed f’riskju l-preżenza tul perjodu twil ta’ żmien ta’ l-industrija Komunitarja.

(106)

Fl-aħħarnett, huwa mistenni li l-miżuri jkunu effettivi biex jagħtu lill-industrija Komunitarja l-opportunità li tirkupra mid-dumping dannuż li nstab matul l-investigazzjoni.

(107)

Total ta’ tliet importaturi kkooperaw fl-investigazzjoni u lkoll kienu kontra l-impożizzjoni ta’ miżuri antidumping. Dawn l-importaturi kienu responsabbli għal madwar 46 % ta’ l-importazzjonijiet totali mir-RPĊ fil-Komunità u madwar 19 % tal-konsum Komunitarju ta’ l-MSG matul il-PI.

(108)

Fuq il-bażi tas-sejbiet proviżorji, ġie konkluż li l-impatt ta’ l-introduzzjoni tal-miżuri antidumping ikun negliġibbli għal tnejn mill-importaturi li kkooperaw. Għall-importatur li kkoopera li jifdal, l-indikazzjonijiet preliminari huma li l-MSG jammonta għal bejn 7 % u 12 % mill-fatturat tiegħu. Din il-kumpanija timpjega inqas minn ħames persuni direttament fil-parti ta’ l-MSG tan-negozju tagħha. Il-profitt tal-kumpanija fuq il-bejgħ ta’ l-MSG huwa wieħed baxx. Minħabba dan, l-impatt ta’ l-impożizzjoni ta’ kwalunkwe dazju antidumping ma’ għandux ikun negliġibbli. Madankollu, l-effett mistenni ta’ l-impożizzjoni tal-miżuri se jkun li jgħolli l-prezzijiet ta’ l-MSG (mis-sorsi kollha) fis-suq Komunitarju. Dan l-importatur għalhekk għandu jkun f’pożizzjoni li jgħaddi ż-żieda kollha jew kważi kollha li tirriżulta mill-impożizzjoni tal-miżuri antidumping, bl-ebda effett sinifikanti fuq il-profitt globali tiegħu.

(109)

F’dawn iċ-ċirkostanzi kien proviżorjament konkluż li, fuq il-bażi ta’ l-informazzjoni pprovduta, l-effett tal-miżuri antidumping, jekk hemm, probabbilment mhux se jkollu impatt materjali fuq l-importaturi.

(110)

Total ta’ erba’ kumpaniji utenti li huma responsabbli għal 18 % mill-importazzjonijiet ta’ l-MSG mir-RPĊ ikkooperaw fl-investigazzjoni. Dawn il-kumpaniji huma attivi fl-industrija ta’ l-ipproċessar ta’ l-ikel u fl-industrija tal-kożmetika għall-kura personali.

(111)

Tnejn mill-utenti li kkooperaw huma involuti fl-industrija ta’ l-ipproċessar ta’ l-ikel. B’kollox, dawn iż-żewġ kumpaniji kienu responsabbli għal madwar 17 % mill-importazzjonijiet ta’ l-MSG mir-RPĊ fil-PI. Għandu jiġi nnotat li ż-żewġ kumpaniji jġibu wkoll kwantitajiet sinifikanti mill-industrija Komunitarja kif ukoll minn sorsi oħrajn. Għandu jiġi nnotat ukoll li l-attivitajiet relatati ma’ l-MSG jammontaw biss għal parti żgħira min-negozju globali taż-żewġ kumpaniji. Għal waħda mill-kumpaniji li kellha kwantità ferm żgħira ta’ importazzjonijiet ta’ l-MSG mir-RPĊ fil-PI, l-impatt ta’ l-impożizzjoni ta’ kwalunkwe miżura se jkun negliġibbli. Għall-kumpanija l-oħra, l-impatt ta’ l-impożizzjoni possibbli tal-miżuri se jkun investigat ulterjorment.

(112)

Rigward iż-żewġ utenti l-oħra li kkooperaw, instab li kienu responsabbli biss għal madwar 1 % mill-importazzjonijiet miċ-Ċina fil-PI. F’dawn iċ-ċirkostanzi, tqies li l-impożizzjoni ta’ miżuri antidumping ma jkollhiex effett sinifikanti fuq is-sitwazzjoni finanzjarja ta’ dawn il-kumpaniji.

(113)

F’dawn iċ-ċirkostanzi, kien proviżorjament konkluż li, fuq il-bażi ta’ l-informazzjoni pprovduta, l-effett tal-miżuri antidumping, jekk kien hemm, probabbilment mhux se jkollu impatt materjali fuq l-utenti.

(114)

Żewġ fornituri mlew il-kwestjonarju u appoġġjaw l-impożizzjoni ta’ miżuri antidumping. Wieħed minnhom huwa fornitur ta’ materja prima, prinċipalment il-ġulepp magħqud taz-zokkor, lill-industrija Komunitarja. Il-ġulepp taz-zokkor li jiġi fornut minn din il-kumpanija lill-industrija Komunitarja jammonta għal madwar 5 % mill-fatturat tal-kumpanija. Jekk ma jiġux imposti miżuri antidumping, hemm riskju, kif ġie ddikjarat aktar ’il fuq, li l-preżenza tul perjodu twil ta’ żmien ta’ l-industrija Komunitarja se titqiegħed f’dubju. Jekk dan isseħħ, ikun hemm impatt negattiv ċar fuq is-sitwazzjoni tal-fornituri tal-materja prima lill-industrija Komunitarja.

(115)

Rigward it-tieni fornitur, dan se jkun ulterjroment investigat wara l-impożizzjoni ta’ kwalunkwe miżura proviżorja.

(116)

Jekk ma jiġux imposti miżuri, il-bejgħ ta’ l-industrija Komunitarja se jkompli jinżel li jwassal biex id-domanda tagħha għall-materja prima wkoll se tonqos. Bil-wisq probabbli dan se jaffettwa negattivament il-profittabilità tal-fornituri tal-materja prima.

(117)

Uħud mill-partijiet interessati jallegaw li l-Grupp Ajinomoto jista’ jkollu pożizzjoni dominanti mhux biss fis-suq Komunitarju imma wkoll fis-suq dinji. Dawn il-partijiet interessati sostnew li, minbarra l-kompetituri Ċiniżi, il-Grupp Ajinomoto jimmonopolizza l-produzzjoni dinjija ta’ l-MSG. Madankollu, għandu jkun enfasizzat li, fuq il-bażi ta’ l-informazzjoni pprovduta minn waħda mill-partijiet interessati li għamlet din id-dikjarazzjoni, il-produzzjoni ta’ l-MSG li mhix Ċiniża u mhix relatata ma’ Ajinomoto xorta tammonta għal aktar minn 500 000 tunnellata metrika (li huwa aktar mill-produzzjoni totali ta’ l-MSG mill-Grupp Ajinomoto).

(118)

Rigward is-suq Komunitarju, jekk jiġu imposti miżuri antidumping, il-produtturi li jesportaw Ċiniżi kkonċernati, meta jitqiesu l-pożizzjonijiet b’saħħithom fis-suq li għandhom, probabbilment se jkomplu jbiegħu l-prodotti tagħhom, għalkemm bi prezzijiet mhux suġġetti għal dumping. Huwa wkoll probabbli li xorta se jkun hemm numru biżżejjed ta’ kompetituri ewlenin fis-suq Komunitarju, inklużi l-produtturi fl-Indoneżja, fil-Korea t’Isfel, fil-Vjetnam, fil-Brażil u fit-Tajwan. Għandu jkun enfasizzat li, fil-bidu tal-perjodu meqjus, l-importazzjonijiet minn dawn is-sorsi kienu jammontaw għal 31.4 % mis-suq Komunitarju u dan is-sehem naqas sostanzjalment minħabba l-importazzjonijiet li kienu suġġetti għal dumping mir-RPĊ. Għalhekk huwa probabbli li l-utenti se jkomplu jkollhom l-għażla ta’ fornituri differenti ta’ l-MSG. Jekk, madankollu, ma tkun imposta l-ebda miżura, il-ġejjieni ta’ l-industrija Komunitarja jkun fil-periklu. L-għibien tagħha jnaqqas bil-kbir il-kompetizzjoni fis-suq Komunitarju.

(119)

Meta jitqies dak li ngħad aktar ’il fuq, qed jiġi proviżorjament konkluż li f’dan il-każ mhemm l-ebda raġuni konvinċenti kontra l-impożizzjoni ta’ dazji antidumping.

(120)

Minħabba l-konklużjonijiet li ntlaħqu rigward id-dumping, id-dannu, il-kawżalità u l-interess Komunitarju, għandhom jiġu imposti miżuri proviżorji antidumping sabiex ma jitħalliex li jkun ikkawżat aktar dannu lill-industrija Komunitarja mill-importazzjonijiet li kienu suġġetti għal dumping.

(121)

Sabiex ikun stabbilit il-livell tad-dazju, tqies il-livell tal-marġnijiet tad-dumping li nstabu u l-ammont tad-dazju meħtieġ sabiex ikun eliminat id-dannu li batiet l-industrija Komunitarja.

(122)

Billi l-industrija Komunitarja batiet minn telf finanzjarju matul il-perjodu meqjus kollu, il-profitt li jista’ jinkiseb fin-nuqqas ta’ importazzjonijiet suġġetti għal dumping kien ibbażat fuq marġnijiet ta’ profitt tal-prodott simili li nkisbu fil-perjodu meqjus mill-produturi ta’ l-MSG f’pajjiżi fejn l-importazzjonijiet Ċiniżi li kienu suġġetti għal dumping ma kinux preżenti (prinċipalment it-Tajwan u t-Tajlandja). Fuq din il-bażi, instab li marġni ta’ profitt ta’ 5 % mill-fatturat seta’ jitqies bħala ammont minimu xieraq li l-industrija Komunitarja setgħet kienet tistenna li tikseb fin-nuqqas ta’ dumping dannuż. Iż-żieda meħtieġa fil-prezzijiet imbagħad kienet iddeterminata fuq il-bażi ta’ paragun bejn il-prezz medju u mgħobbi ta’ l-importazzjonijiet, kif ġie stabbilit għall-kalkoli tat-traħħis tal-prezzijiet taħt il-prezz normali, u l-prezz mhux dannuż tal-prodotti mibjugħa mill-industrija Komunitarja fis-suq Komunitarju. Il-prezz mhux dannuż inkiseb billi l-prezz tal-bejgħ ta’ l-industrija Komunitarja ġie aġġustat bit-telf effettiv li sar matul il-PI u billi ġie miżjud il-marġni ta’ profitt li ssemma aktar ’il fuq. Kwalunkwe differenza li tirriżulta minn dan il-paragun imbagħad kienet espressa bħala perċentwali tal-valur CIF totali ta’ l-importazzjonijiet.

(123)

Fid-dawl ta’ dak li ngħad aktar ’il fuq, qed jitqies li, skond l-Artikolu 7(2) tar-Regolament bażiku, għandhom jiġu imposti dazji proviżorji antidumping fir-rigward ta’ l-importazzjonijiet li joriġinaw fir-RPĊ fuq il-livell tal-marġnijiet t’isfel tad-dumping u tad-dannu, skond ir-regola ta’ inqas dazju.

(124)

Ir-rati tad-dazju antidumping tal-kumpaniji individwali speċifikati f’dan ir-Regolament kienu stabbiliti fuq il-bażi tas-sejbiet ta’ din l-investigazzjoni. Għalhekk, jirriflettu s-sitwazzjoni li nstabet waqt l-investigazzjoni rigward dawn il-kumpaniji. Dawn ir-rati tad-dazju (bil-kontra tad-dazju għall-pajjiż kollu applikabbli għall-“kumpaniji l-oħra kollha”) b’hekk huma esklussivament applikabbli għall-importazzjonijiet tal-prodotti li joriġinaw fil-pajjiż ikkonċernat u ġew prodotti mill-kumpaniji u b’hekk mill-entitajiet legali speċifiċi msemmija. Il-prodotti importati magħmula minn kwalunkwe kumpanija oħra li ma ssemmietx speċifikatament fil-parti operattiva ta’ dan ir-Regolament bl-isem u bl-indirizz tagħha, inklużi l-entitajiet relatati ma’ dawk speċifikatament imsemmija, ma jistgħux jibbenefikaw minn dawn ir-rati u għandhom ikunu suġġetti għar-rata tad-dazju applikabbli għall-“kumpaniji l-oħra kollha”.

(125)

Id-dazji antidumping proposti huma dawn li ġejjin:

(126)

Is-sejbiet proviżorji t’aktar ’il fuq se jkunu żvelati lill-partijiet interessati kollha li se jkunu mistiedna juru fehmithom bil-miktub u jitolbu smigħ. Il-kummenti tagħhom se jkunu analizzati u se jitqiesu fejn ikun iġġustifikat qabel ma ssir kwalunke determinazzjoni definittiva. Is-sejbiet proviżorji jista’ jkollhom jitqiesu mill-ġdid għall-finijiet ta’ kwalunkwe sejba definittiva,

(1)

Fil-qafas ta' każ C 13/2006 (ex-N 587/2005) – Tariffa ta' l-Elettriku Preferenzjali f'Sardinja, il-Kummissjoni saret konxja dwar l-estensjoni ta' żewġ miżuri li jagħtu tariffa ta' l-elettriku preferenzjali. L-estensjoni ġiet mogħtija bis-saħħa ta' l-Artikolu 11, paragrafu 11 ta' decreto-legge Nru 35/2005, konvertit f'Liġi 80 ta' l-14 ta' Mejju 2005 (minn issa 'l quddiem imsejħa Liġi 80/2005) u kienet implimentata mingħajr notifika preċedenti lill-Kummissjoni. Il-benefiċjarji huma l-produttur ta' l-Aluminju Alcoa u t-tliet kumpaniji suċċessuri ta' Soċietà Terni: Terni Acciasi Speciali, Nuova Terni Industrie Chimiche u Cementir (minn issa 'l quddiem: “il-kumpaniji Terni”).

(2)

B'ittra ddatata t-23 ta' Diċembru 2005 il-Kummissjoni talbet informazzjoni mill-Italja, li wieġbet b'ittra ddatata l-24 ta' Frar 2006. B'ittri ddatati t-2 ta' Marzu 2006 u s-27 ta' April 2006, l-Italja provdiet informazzjoni addizzjonali.

(3)

B'ittra ddatata d-19 ta' Lulju 2006, il-Kummissjoni informat lill-Italja li kienet iddeċidiet li tibda proċedura stabbilita fl-Artikolu 88(2) tat-Trattat tal-KE fir-rigward taż-żewġ skemi (Każ C 36/2006).

(4)

Id-deċiżjoni tal-Kummissjoni li tibda proċedura ġiet pubblikata fil-Ġurnal Uffiċjali ta' l-Unjoni Ewropea (2). Il-Kummissjoni stiednet lill-partijiet interessati biex jissottomettu l-kummenti tagħhom fuq il-miżuri.

(5)

L-Italja ssottomettiet osservazzjonijiet b'ittra ddatata l-25 ta' Ottubru 2006. Aktar informazzjoni kienet sottomessa b'ittra ddatata d-9 ta' Novembru 2006 u s-7 ta' Diċembru 2006.

(6)

Il-Kummissjoni rċeviet kummenti mingħand il-partijiet interessati. Hija għaddiethom lill-Italja, li ngħatat l-opportunità li tirreaġixxi. Il-kummenti ta' l-Italja waslu f'ittra ddatata t-22 ta' Diċembru 2006.

(7)

B'ittra ddatata l-20 ta' Frar 2007, il-Kummissjoni talbet aktar informazzjoni li kienet provduta mill-Italja b'ittri ddatati s-16 ta' April 2007, l-10 ta' Mejju 2007 u l-14 ta' Mejju 2007.

(8)

Fit-18 ta' Settembru 2007 il-fajl inqasam f'parti A, li jitratta t-tliet kumpaniji li jirriżultaw mill-qasma ta' Società Terni (il-kumpaniji Terni) u parti B, li tikkonċerna l-Alcoa. Din id-deċiżjoni tikkonċerna esklussivament l-estensjoni tat-tariffa preferenzjali favur il-kumpaniji Terni.

(9)

L-iskambji ta' korrispondenza li tikkonċerna l-Alcoa m'humiex kwotati hawn.

(10)

L-Artikolu 11, paragrafu 11 tal-Liġi 80/2005 tipprevedi għall-estensjoni fil-ħin taż-żewġ miżuri li jagħtu tnaqqis fit-tariffi ġenerali ta' l-elettriku. Il-benefiċjarji ta' dawn iż-żewġ miżuri, li huma differenti fin-natura tagħhom u se jiġu trattati separatament, huma l-produttur ta' l-Aluminju Alcoa fuq naħa, u t-tliet kumpaniji li jirriżultaw mill-qasma tas-Società Terni, fuq in-naħa l-oħra.

(11)

L-Italja innazzjonalizzat is-settur ta' l-elettriku bil-liġi Nru 1643 tas-6 ta' Diċembru 1962 (minn issa 'l quddiem: il-liġi tan-nazzjonalizzazzjoni). Il-liġi prevediet għat-trasferiment ta' l-impjanti ta' l-elettriku eżistenti fl-Italja għall-kumpanija ta' l-Istat li nħolqot ENEL, li kien se jkollha monopolju fil-produzzjoni, d-distribuzzjoni u l-forniment ta' l-elettriku.

(12)

Fiż-żmien tan-nazzjonalizzazzjoni, Società Terni kienet kumpanija ta' l-Istat attiva fil-manifattura ta' l-azzar, is-siment u l-kimiċi. L-Istat eżerċita kontroll effettiv fuq il-kumpanija permezz ta' sehem maġġoritarju fil-kapital tagħha, mill-kumpanija IRI ta' l-Istat u l-grupp Finsider ta' l-Istat. Società Terni kellha wkoll u kienet topera impjant idroelettriku. Il-parti l-kbira ta' l-elettriku prodott kien użat biex iħaddem il-proċessi ta' manifatturar tal-kumpanija.

(13)

Il-liġi tan-nazzjonalizzazzjoni stabbiliet li, bħala regola ġenerali, il-kumpaniji li jipproduċu l-elettriku primarjament għall-awto-konsum (awto-produtturi) kienu esklużi min-nazzjonalizzazzjoni u setgħu jżommu l-assi tagħhom sabiex jiġġeneraw l-elettriku (3). L-assi ta' l-elettriku tas-soċjetà Terni kienu nazzjonalizzati minkejja l-istatus tal-kumpanija bħala awto-produttur minħabba li kienet lokalizzata strateġikament fit-territorju Taljan. It-trasferiment għall-ENEL kien stabbilit fl-Artikolu 4, paragrafu 5, ir-raba' inċiż tal-liġi tan-nazzjonalizzazzjoni.

(14)

Bid-Digriet Presidenzjali Nru 1165/63, l-Italja tat lill-kumpanija kumpens għat-trasferiment ta' l-assi tagħha ta' l-elettriku. Il-kumpens ħa l-forma ta' tariffa preferenzjali ta' l-elettriku li kellu japplika mill-1963 sa l-1992.

(15)

Fl-1964, Società Terni nqasmet fi tliet kumpaniji: il-produttur ta' l-azzar Terni Acciai Speciali, il-manifattur tal-kimiċi Nuova Terni Industrie Chimiche u l-manifattur tas-siment Cementir. Dawn il-kumpaniji kienu mbagħad privatizzati u akkwistati minn ThyssenKrupp, Norsk Hydro u Caltagirone rispettivament.

(16)

Kif indikat fil-punt 0 ta' din id-deċiżjoni, dawn il-kumpaniji suċċessuri se jkunu kollettivament imsejħa bħala “il-kumpaniji Terni” filwaqt li l-kumpanija oriġinali se tissejjaħ “Società Terni”. It-tariffa applikabbli l-ewwel għal Società Terni, u mbagħad għall-kumpaniji Terni, se jissejħu bħala “it-tariffa Terni”.

(17)

It-tariffa preferenzjali kompliet tapplika, taħt l-istess kundizzjonijiet, għat-tliet kumpaniji Terni. Il-benefiċjarju ewlieni (f'termini ta' kwantità ta' elettriku sussidjat, kemm f'termini assoluti kif ukoll bħala proporzjoni tal-konsum ta' l-elettriku totali tal-kumpanija) huwa ThyssenKrupp.

(18)

Id-dewmien tat-tariffa speċjali inzerta mal-perjodu ġenerali tal-konċessjonijiet (4) idroelettriċi fl-Italja, li kellhom jiskadu fl-1992. Il-konċessjoni ta' l-idroelettriku ta' Società Terni ġiet mogħtija għal perjodu eċċezzjonali ta' 60 sena (minflok in-normal ta' 30 sena) u kellha tiskadi fit-tmiem tat-tmeninijiet.

(19)

Fl-1991, l-Italja estendiet il-konċessjonijiet eżistenti idroelettriċi sa l-2001 bil-liġi Nru 9 tad-9 ta' Jannar 1991“Implimentazzjoni tad-dispożizzjonijiet għal Pjan ġdid ta' l-Enerġija Nazzjonali: aspetti istituzzjonali, impjanti ta' l-idroelettriku u netwerks, idrokarboni u enerġija ġeotermali, awto-produtturi u dispożizzjonijiet fiskali” (minn issa 'l quddiem: il-Liġi 9/1991). Bil-virtu' ta' l-Artikolu 20, paragrafu 4 tal-Liġi 9/1991, l-Italja tawwlet ukoll sa l-2001 it-tariffa preferenzjali għall-kumpaniji Terni. Matul is-6 snin sussegwenti (2002-2007) il-kwantitajiet ta' elettriku sussidjat fornut lill-kumpaniji Terni kien gradwalment imnaqqas sabiex il-vantaġġ fit-tariffi jintemm bil-mod sat-tmiem ta' l-2007.

(20)

Il-Liġi 9/1991 inkludiet numru kbir ta' dispożizzjonijiet, li uħud minnhom involvew l-għajnuna ta' l-Istat. Il-Liġi 9/1991 kienet ippreżentata lill-Kummissjoni flimkien mal-Liġi 10/1991 “Dispożizzjonijiet implimentattivi għall-Pjan Nazzjonali ta' l-Enerġija fir-rigward ta' l-effiċjenza fl-enerġija, frankar ta' l-enerġija u l-iżvilupp ta' sorsi rinnovabbli ta' l-enerġija”. Il-Kummissjoni ddikjarat kompatibbli l-għajnuna li kien hemm fiż-żewġ liġijiet taħt ir-regoli għall-għajnuna ta' l-Istat fl-1991 (5).

(21)

Il-kundizzjonijiet tat-tariffa preferenzjali ta' Società Terni kienu stabbiliti fl-Artikolu 6, 7 u 8 tad-Digriet Presidenzjali Nru 1165/63 Trasferiment lil Ente Nazionale per l'Energia Elettrica ta' l-assi użati għall-attivitajiet imsemmija fl-Artikolu 1(1) tal-Liġi Nru 1643 tas-6 ta' Diċembru 1962 imwettqa minn “Terni- società per l'Industria e l'Elettricità S.p.A.” (minn issa 'l quddiem: DPR 1165/1963). DPR 1165/1963 stabilixxa li l-ENEl se tforni lil Società Terni b'ammont fiss ta' elettriku (1 025 000 MWh fis-sena) li huma l-ekwivalenti tal-konsum ta' l-elettriku tal-kumpanija fl-1961, flimkien ma' ammont ekstra ta' (595 000 MWh fis-sena) li jikkorrispondi għall-konsum addizzjonali mistenni minħabba investimenti li saru imma li ma kinux għadhom twettqu fl-1962.

(22)

Il-prezz preferenzjali kien kalkulat billi jiġu kumparati żewġ metodi alternattivi u li jiġi applikat dak li kien l-aktar favorevoli għall-kumpanija.

(23)

Fil-prattika, l-ewwel metodu kien użat sa l-2000, meta t-tibdiliet fl-istruttura Taljana tat-Tariffi minħabba li l-liberalizzazzjoni tas-suq ta' l-elettriku għamluha neċessarju li wieħed jaqleb għat-tieni metodu.

(24)

Fl-1997 bdiet il-bidla fl-istruttura tat-tariffi, bl-introduzzjoni ta' tariffa strutturata li tikkonsisti f'żewġ partijiet: Parti A tirrappreżenta spejjeż fissi u ġenerali u Parti B li tirrifletti spejjeż varjabbli. Mill-1 ta' Jannar 2000, it-tariffa Terni ngħatat fil-forma ta' komponent kumpensatorju (componente compensativa) kalkulat bħala s-somma tal-komponenti kollha tat-tariffa li Terni, bħala awto-produttur (virtwali), ma kinitx meħtieġa tħallas (il-parti sħiħa ta' parti B u biċċa minn parti A). Dan il-metodu jikkorrispondi mat-tieni mill-metodi alternattivi deskritti fid-Digriet 1165/63.

(25)

It-tnaqqis gradwali tal-kwantitajiet ta' l-elettriku mwassla lill-kumpaniji Terni bil-prezz preferenzjali matul il-perjodu ta' tnaqqis (2002-2007) huwa muri hawn taħt:

(26)

Bl-Artikolu 11, paragrafu 11 tal-Liġi 80/2005, l-Italja ddeċidiet li tinterrompi t-tnaqqis u testendi mill-ġdid l-arranġament tat-tarrifi Terni sa l-2010. L-Artikolu 11, paragrafu 13 tal-Liġi għamel din il-miżura applikabbli mill-1 ta' Jannar 2005. Ftit żmien wara, il-konċessjonijiet idroelettriċi ordinarji ġew estiżi sa l-2020 (6).

(27)

It-tieni estensjoni tat-tariffa hija l-miżura li fuqha l-Kummissjoni fetħet il-proċedura ta' investigazzjoni formali skond l-Artikolu 88(2) tat-Trattat u li hija s-suġġett ta' din id-deċiżjoni.

(28)

Il-Liġi 80/2005 tistabbilixxi li, sa l-2010, il-kumpaniji Terni jibbenefikaw mill-istess trattament li gawdew sal-31 ta' Diċembru 2004 f'termini ta' kwantitajiet fornuti (926 GWh għat-tliet kumpaniji Terni) u prezzijiet ta' 1.32 eurocent/kWh). Il-kwantitajiet ta' elettriku fornut huma mqassma kif ġej: Thyssen-Krupp 86 %, Nuova Terni Industrie Chimiche 10 % u Cementir 4 %.

(29)

Il-Liġi 80/2005, kif interpretata u implimentata fl-AEEG, introduċiet ukoll mekkaniżmu ta' indiċjar fejn, mill-1 ta' Jannar 2006, it-tariffa prefenzjali tiżdied kull sena skond iż-żidiet fil-prezz irrekordjati fuq l-Iskambji Ewropej ta' l-Elettriku ta' Amsterdam u Frankfurt, soġġetti għal massimu ta' 4 %.

(30)

It-tariffa preferenzjali Terni kienet inizjalment ġestita u mħallsa mill-kumpanija ta' l-Istat ENEL, li kellha monopolju fil-ġenerazzjoni, trażmissjoni, importazzjoni, distribuzzjoni u provvista ta' l-elettriku fl-Italja.

(31)

Fl-2002, hekk kif is-suq ta' l-elettriku ġie gradwalment liberalizzat u l-ENEL ma kellhiex aktar pożizzjoni ta' monopolju, il-piż finanzjarju li ġej mis-sistemi ta' tariffi preferenzjali kien trasferit mill-ENEL għall-utenti kollha ta' l-elettriku (7). Il-komponenti kumpensatorji dovuti lill-kumpaniji Terni kienu avvanzati mid-distributuri ta' l-elettriku, li kienu mbagħad rimborsati mill-korp ta' l-Istat Cassa Conguaglio per il Settore Elettrico (Fond ta' Ugwalizzar għas-Settur ta' l-Elettriku, minn issa 'l quddiem imsejjaħ “Cassa Conguaglio”) permezz ta' taxxa parafiskali miġbura permezz tal-komponent A4 tat-tariffa ta' l-elettriku, li hija waħda mill-punti ta' spiża li jidhru fuq il-kont ta' l-elettriku.

(32)

Fl-2004 AEEG iddeċidiet li tgħaddi kompletament l-immaniġġjar amministrattiv ta' l-iskemi speċjali tat-tariffi lil Cassa Conguaglio (8). Minn Settembru 2004, il-kumpaniji Terni jħallsu prezz tas-suq għall-elettriku li jixtru (fis-suq liberalizzat) u jirċievi mill-Cassa Conguaglio rimborż li jikkorrispondi mad-differnza bejn il-prezz imħallas u l-prezz preferenzjali li għalih huma intitolati (il-komponent kumpensatorju) filwaqt li jitnaqqsu l-ħlas tat-trasport, il-kejl u l-bejgħ. L-ispejjeż jitħallsu mill-konsumaturi ta' l-elettriku fl-Italja permezz ta' taxxa parafiskali msemmija fil-paragrafu (30) hawn fuq.

(33)

Wara li l-Kummissjoni bdiet proċedura ta' investigazzjoni formali, l-AEEG, b'Delibera 190/06, għamlet ħlasijiet taħt il-Liġi 80/2005 b'kundizzjoni tad-dispożizzjoni, mill-kumpaniji Terni, ta' garanzija li tkopri r-riskju ta' rkupru ta' l-għajnuna.

(34)

Bl-istess Delibera, l-AEEG prevediet, bħala alternattiva, il-possibbiltà li tħallas fl-2006 bħala avvanza l-ammonti ta' għajnuna li jkunu saru dovuti sat-tmiem ta' l-arranġament preċedenti (2007) fuq il-bażi tal-Liġi 9/1991. Għal dawn l-ammonti, l-AEEG ma talbitx garanzija. Din l-għażla ttieħdet mill-kumpaniji Terni u kienet implimentata mill-AEEG.

(35)

Bl-eċċezzjoni ta' ħlasijiet avvanzati msemmija fil-paragrafu (33) hawn fuq, il-ħlasijiet l-oħra kollha li jsiru lill-kumpaniji minn Cassa Conguaglio taħt il-Liġi 80/2005 huma koperti b'garanzija.

(36)

Id-deċiżjoni tal-Kummissjoni li jingħata bidu għal investigazzjoni formali kienet bażata fuq ir-raġunijiet deskritti fil-punti (37) sa (41).

(37)

Il-Kummissjoni esprimiet dubji jekk it-tariffa setgħetx tiġi meqjusa miżura ta' kumpens minħabba li Soċietà Terni kienet impriża ta' l-Istat fiż-żmien tan-nazzjonalizzazzjoni. Minħabba li l-Istat ma jistax jesproprja lilu nnifsu, il-Kummissjoni kellha dubji jekk it-trasferiment ta' l-assi ta' Società Terni lil ENELs setax jitqies bħala esproprjazzjoni li tintitola lil Società Terni għal kumpens, u fformulat l-ipoteżi li trasferiment simili jista' jitqies bħala sempliċiment ristrutturar ta' l-assi ta' l-Istat innifsu.

(38)

Il-Kummissjoni kienet tal-punt li, anki kieku n-natura kumpensatorja tal-miżura kellha tiġi aċċettata, xorta kien ikun hemm dubji rigward il-proporzjonalità ta' dan il-kumpens fir-rigward tad-dannu finanzjarju soffrut minn Società Terni. Il-Kummissjoni b'mod partikolari esprimiet dubji li l-kumpens seta' xorta jiġi ġustifikat wara 44 sena.

(39)

Il-Kummissjoni nnutat li n-natura tat-tariffa jidher li nbidel wara li l-ENEL waqfet tamministra l-iskema u l-piż finanzjarju li jfiġġ minnha.

(40)

Id-deċiżjoni tal-Kummissjoni li tiftaħ proċedura kienet bażata wkoll fuq id-Deċiżjoni ECSC 83/396: Id-Deċiżjoni tal-Kummissjoni tad-29 ta' Ġunju 1983 rigward l-għajnuna li l-gvern Taljan għandu l-intenzjoni li jagħti lil ċerti produtturi ta' l-azzar (9), li eskluda għajnuna simili milli tingħata lil Società Terni, u s-sentenza tal-Qorti tal-Ġustizzja fil-każ C 99/92 (10), fejn il-Qorti aċċettat id-Deċiżjoni ECSC msemmija qabel, bħala evidenza li t-tariffa Terni kienet diġà misjuba li tikkostitwixxi għajnuna ta' l-Istat.

(41)

Id-deċiżjoni tal-ftuħ indikat ukoll li ThyssenKrupp kienet għadha ma ħallsetx għotja ta' għajnuna ta' l-Istat mill-Italja li kienet dikjarara inkompatibbli (11), u għalhekk skond il-ġurisprudenza Deggendorf (12), ma setgħetx tirċievi aktar għajnuna ta' l-Istat.

(42)

Il-parti l-kbira ta' l-osservazzjonijiet sottomessi mill-kumpaniji Terni dwar il-funzjonament ta' Società Terni bħala ente pubblico economico, in-natura ta' l-operazzjoni li wasslet għat-trasferiment ta' l-assi tal-kumpanija, in-natura kumpensatorja tat-tariffa, l-interpretazzjoni tad-Deċiżjoni ta' l-ECSC u s-sentenza ta' l-QEĠ kif ukoll ir-rwol tal-Cassa Conguaglio huma fil-parti l-kbira ekwivalenti għal dawk ta' l-Italja, li huma mqassra fil-punti (52) sa (69). Għalhekk, huma biss l-osservazzjonijiet ewlenin tal-kumpaniji Terni u l-elementi addizzjonali sottomessi li se jiġu rappurtati hawn fil-punti (43) sa (51).

(43)

Skond il-kumpaniji Terni, it-tariffa hija kumpens leġittimu li għaliha Società Terni kienet intitolata wara l-esproprjazzjoni ta' l-assi tagħha u għalhekk ma tistax tikkwalifika bħala għajnuna ta' l-Istat.

(44)

Rigward l-adegwatezza tal-kumpens, il-kumpaniji Terni irrittraċċaw il-passat tat-tariffa, u wrew li l-estensjonijiet kollha tat-tariffa Terni wara l-1991 kienu konkomitanti mat-tiġdid ġenerali tal-konċessjonijiet idroelettriċi għal ġeneraturi oħra, u għalhekk, konformi mal-prinċipju li ma għandux ikun hemm diskriminazzjoni bejn Terni u awto-produtturi oħra li ma kinux ġew esproprjati u li għalhekk setgħu jkomplu jipproduċu u jikkonsmaw l-elettriku bi prezz baxx ħafna.

(45)

Il-kumpaniji Terni qalu wkoll li l-ammonti finanzjarji li rċevew fil-forma ta' tariffi aktar baxxi ta' l-elettriku qatt ma qabżu d-differenza bejn il-prezz ta' l-akkwist ta' l-enerġija fis-suq u l-prezz ta' l-elettriku awto-prodott.

(46)

Il-kumpaniji Terni qalu li l-miżura ma kellhiex impatt fuq il-kummerċ bejn l-Istati Membri għar-raġunijiet li jidhru hawn taħt.

(47)

Il-kumpaniji Terni jsostnu aspettattivi leġittimi għal żewġ raġunijiet.

(48)

Il-Kumpaniji Terni ppreżentaw ukoll, f'dan il-kuntest, li meta l-Artikolu 11, paragrafu 12 tal-Liġi 80/2005 (li tistabbilixxi tariffa preferenzjali għal ċerti kumpaniji intensivi fl-enerġija f'Sardinja, każ C 13/06) ġie notifikat lill-Kummissjoni, l-awtoritajiet Taljani kienu ppreżentaw informazzjoni u kjarifiki wkoll dwar it-tariffa Terni, biex in-notifika tista' tiġi kunsidrata kompluta fi ħdan it-tifsira ta' l-Artikolu 4, paragrafu 5 tar-Regolament (KE) Nru 659/1999 tat-22 ta' Marzu 1999 li jistabbilixxi regoli dettaljati għall-applikazzjoni ta' l-Artikolu 93 tat-Trattat tal-KE (14). Il-Kummissjoni naqset milli tieħu deċiżjoni fi żmien xahrejn, u għalhekk, anki jekk it-tariffa kellha tiġi kunsidrata għajnuna ta' l-Istat, quod non, għandha tiġi meqjusa bħala awtorizzata fuq il-bażi ta' l-Artikolu 4, paragrafu 5 tar-Regolament (KE) Nru 659/1999 (15).

(49)

Il-kumpaniji Terni jissottolineaw li l-fiduċja tagħha hija sostanzjata mill-fatt li f'każijiet ta' dubji dwar il-kompatibbiltà tat-tariffa, ThyssenKrupp ċertament ma jkunux nedew investiment fuq skala kbira fiż-żona ta' Terni.

(50)

Il-kumpaniji terni jindikaw li, fin-nuqqas tal-Liġi 80/2005, huma jkunu bbenefikaw sal-31 ta' Diċembru 2007 mit-tariffa preferenzjali fuq il-bażi ta' l-Artikolu 20, paragrafu 4 tal-Liġi 9/1991 (approvata mill-Kummissjoni). L-AEEG awtorizza lil Cassa Conguaglio biex iħallas fl-2006 (ħlas bil-quddiem) biss is-somom li kienu jiġu dovuti fl-2007 (16). Għalhekk, l-ammonti li waslu sal-31 ta' Diċembru 2006 għandhom jiġu kunsidrati awtorizzati. Skond il-kumpaniji, id-dispożizzjonijiet tad-Decreto-legge Nru 80/2005 ma ġewx implimentati de facto fir-rigward ta' dawn l-ammonti.

(51)

Rigward il-ġurisprudenza Deggendorf, ThyssenKrupp tiddikjara d-disponibbiltà tagħha, fil-prinċipju, li tħallas lura l-għajnuna ta' l-istat, soġġetta li jintlaħaq ftehim dwar l-ammont li jrid jiġi rkuprat.

(52)

L-Italja ssottomettiet li l-assi ta' Terni kienu nazzjonalizzati bħala eċċezzjoni għar-regola ġenerali stabbilita fil-liġi tan-nazzjonalizzazzjoni, li skond liema awto-produtturi ma kinux se jkunu soġġetti għal esproprjazzjoni. Il-liġi tan-nazzjonalizzazzjoni ta' l-1962 kienet bażata fuq l-Artikolu 43 tal-Kostituzzjoni Taljana, li skond liema ċerti impriżi li jwettqu servizzi ta' interess pubbliku fundamentali jew fis-settur ta' l-enerġija setgħu jiġu trasferiti lill-Istat permezz ta' esproprjazzjoni, sakemm jingħata kumpens.

(53)

Rigward id-dubji tal-Kummissjoni rigward il-possibbiltà ta' assi esproprjati li kienu jappartjenu lill-kumpanija ta' l-Istat, l-Italja ssottomettiet li la fl-Artikolu 42, u lanqas fl-Artikolu 43 tal-Kostituzzjoni l-idea ta' esproprjazzjoni ma hi limitata għal proprjetà privata. L-esproprjazzjoni tal-fergħa ta' l-elettriku ta' Società Terni kienet meħtieġa legalment, skond l-Italja, minħabba li Terni kienet kontrollata minn “ente pubblico economico”, li bil-kontra ta' “ente pubblico” kienet obbligata li topera skond il-prinċipji tas-suq. Il-liġi tan-nazzjonalizzazzjoni ma prevediet ebda kumpens għall-impenji mmaniġġjati minn entitajiet pubbliċi strictu sensu, imma prevediet kumpens lil Terni fid-dawl ta' l-istatus differenti fil-mod ta' funzjonament.

(54)

Rigward l-istruttura ta' sjieda ta' Terni, l-Italja tissottolinea li Terni kienet kumpanija ta' l-istokk konġunta (società per azioni) fejn l-Istat kellu parti maġġoritarja, imma kien hemm ekwitajiet ta' numru kbir ta' investituri privati. L-Italja provdiet dokumentazzjoni li turi li l-kapital ta' Terni kien parti f'idejn il-privat u li l-kumpanija kienet kwotata fil-Borża.

(55)

Skond l-Italja, in-nuqqas ta' l-istess dritt ta' kumpens adegwat lil Terni li kumpanija privata kellha dritt għalih kien jikkostitwixxi ksur tal-prinċipju tan-newtralità tas-sjieda mnaqqax fl-Artikolu 295 tat-Trattat tal-KE.

(56)

L-Italja tikkwota numru ta' sentenzi tal-Corte di Cassazione u l-Consiglio di Stato fejn dawn il-Qrati kkonfermaw li l-loġika tat-tariffa għal Terni kienet li l-kumpanija titqiegħed fl-istess livell bħal awto-produtturi ta' l-elettriku minn sorsi rinnovabbli ta' l-enerġija, u għalhekk it-tariffa ma setgħetx tiżdied permezz ta' supplimenti li ma japplikawx għall-awto-produtturi.

(57)

Rigward il-produtturi l-oħra ta' l-elettriku li kienu wkoll esproprjati, l-Italja tissottometti li, bl-eċċezzjoni ta' Terni, il-produtturi kollha esproprjati kienu impriżi attivi primarjament jew esklussivament fil-produzzjoni, l-importazzjoni jew il-forniment ta' l-elettriku. Bħala regola ġenerali, il-kumpens imħallas mill-Istat jirrifletti l-valur tas-suq ta' l-assi, li kienu kalkolati b'mod differenti skond it-tip ta' kumpanija. Il-valur nett ta' l-assi ttieħed bħala valur ta' referenza, imma kien korrett fuq il-bażi ta' fatturi oħra li l-Italja ma identifikatx fid-dettall. Għall-produtturi ta' l-idroelettriku, l-osservazzjonijiet Taljani jissuġġerixxu li d-dewmien residwu tal-konċessjoni kellu rwol fil-kalkolazzjoni tal-kumpens.

(58)

L-Italja tissottometti li kemm fl-arranġament oriġinali tat-tariffa – li kkostitwixxa kumpens leġittimu lil Terni għall-esproprjazzjoni ta' l-assi tagħha - u l-estensjoni tiegħu fiż-żmien ma jikkostitwixxux għajnuna ta' l-Istat. Biex tissostanzja din l-istqarrija, l-Italja tikkwota numru ta' sentenzi tal-Qorti Ewropea tal-Ġustizzja, li jikkonċernaw in-natura ta' ċerti forom ta' kumpens li m'humiex għajnuna lil intrapriżi (17), notevolment kumpens għal danni u servizzi ta' interess ekonomiku ġenerali.

(59)

Rigward l-aċċettazzjoni ta' l-għajnuna ta' l-Istat tat-Tariffi Terni, l-Italja tissottolinea li l-Liġi 9/1991, li tistabbilixxi l-ewwel estensjoni tat-tariffa, kienet notifikata kif suppost lill-Kummissjoni u din approvatha. L-estensjonijiet sussegwenti tat-tariffa, li huma konkomitanti ma' l-estensjonijiet tal-konċessjonijiet idroelettriċi għall-produtturi ta' l-idroelettriku, isegwu l-istess loġika, u l-Kummissjoni qatt ma għamlet oġġezzjonijiet għalihom. Għalhekk, skond l-Italja, it-tariffa Terni għandha tiġi kunsidrata bħala miżura eżistenti li mhix għajnuna.

(60)

L-Italja ssottomettiet li dejjem aġixxiet b'intenzjoni tajba. Hija ma nnotifikatx taħt l-Artikolu 88 (3) l-estensjoni kontestata ta' l-arranġament tat-tariffa għal Terni minħabba, li fl-opinjoni tagħha, din ma kkostitwixxietx għajnuna ta' l-Istat. L-Italja tissottolinea li l-Kummissjoni kienet informata bl-eżistenza ta' din il-miżura (Rapport ta' Novembru 2005 u ittra ta' Frar 2006).

(61)

Rigward ir-raġunijiet ta' politika għat-tieni estensjoni, l-Italja tissottometti li t-tariffa hija meħtieġa biex tistabbilixxi livell ugwali bejn dawn il-kumpaniji intensivi fl-enerġija attivi fl-Italja u l-kompetituri tagħhom fl-UE (18), li wkoll jibbenefikaw minn prezzijiet imnaqqsa ta' l-enerġija (tariffi jew bażati fuq kuntratt). Jekk it-tariffa tiġi mneħħija, il-kumpaniji fil-kwistjoni jmexxu l-operazzjonijiet tagħhom barra l-UE. Inevitabbilment dan iwassal għal kriżi industrijali u jġib telf ta' impjiegi fir-reġjun. Għalhekk, skond l-Italja, id-dewmien tat-tariffa għandu jiġi meqjus bħala soluzzjoni tranżizzjonali. L-Italja tikkwota l-konklużjonijiet tal-Grupp ta' livell għoli dwar il-kompetittività, l-enerġija u l-ambjent (19) li jissuġġerixxi, soluzzjoni fit-tul, it-titjib ta' l-interkonnessjoni u l-infrastruttura, u bħala soluzzjoni fuq perjodu medju, kuntratti ta' forniment fit-tul u sħubiji bejn il-klijenti u l-fornituri/ġeneraturi ta' l-enerġija.

(62)

Rigward in-nuqqas ta' kumpens żejjed, l-Italja qed tagħmel dawn l-osservazzjonijiet. Kieku Terni żammet l-assi tagħha, kienet tkun tista' tbigħ parti mill-enerġija tagħha lil partijiet terzi, u hekk tikseb profitt addizzjonali. Id-dannu li sofriet Terni sar agħar minn żieda qawwija, matul is-snin, fil-prezzijiet ta' l-elettriku. Il-proċess ta' liberalizzazzjoni li għadu mhux komplut tas-swieq ta' l-enerġija għadu ma ġabx ir-riżultati mistennija f'termini ta' prezzijiet kompetittivi ta' l-elettriku, u għalhekk il-bżonn li Terni tiġi kumpensata għadu jeżisti. Il-kumpaniji Terni bħalissa qed iħallsu prezz (bejn € 40 u € 72/MWh) li prinċipalment huwa konformi mal-prezzijiet ta' l-elettriku mħallsa mill-kumpanija bi profil ekwivalenti tal-konsum fl-UE. Kieku Terni żammet l-assi tagħha, kienet tkun qed tħallas bejn € 5 u € 7 għal kull MWh ta' elettriku awto-prodott. L-Italja għalhekk ikkonkludiet li t-tariffa ma tinvolvix kumpens żejjed.

(63)

L-Italja ppreżentat “studju” li sar mill-konsulent privat Energy Advisor S.r.l. f'isem il-kumpaniji Terni. L-istudju, li forsi huwa deskritt aħjar bħala sempliċi “kalkolazzjoni” minħabba li jikkonsisti f'tabella waħda bi ftit paġni ta' spjegazzjonijiet metodoloġiċi, għandu l-għan li jevalwa l-valur ta' l-assi ta' l-elettriku u jqabbel din iċ-ċifra mal-vantaġġ tat-tariffa kumulattiva li tgawdi Terni. L-istudju jqis il-valur ta' l-assi ta' l-elettriku skond il-kotba u jattwalizzah għall-2006 skond l-inflazzjoni. L-istudju imbagħad jikkalkula l-vantaġġ nett tat-tariffa għal Terni. Għall-perjodu 1963-1999, l-istudju jikkunsidra d-differenza bejn l-ispejjeż annwali ta' l-elettriku ta' klijent kumparabbli (Alternattiva 2) u l-ispejjeż annwali proprja li kellha Terni fuq “l-ispejjeż tal-produzzjoni tagħha” (Alternattiva 1). Għall-iskop ta' dan il-kalkolu, klijent kumparabbli huwa awto-produttur ta' l-elettriku (eżentat, inter alia, mill-ħlas ta' sovrapprezzo termico). Għall-perjodu 2000-2006, il-vantaġġ tat-tariffa huwa kalkolat bħala d-differenza bejn l-ispiża annwali li Terni tkun ħallset kieku t-tariffa kienet kalkolata fuq il-bażi ta' l-ispejjeż tal-produzzjoni tagħha (Alternattiva 1 – mhux possibbli wara r-riforma fit-tariffa) u l-ispiża proprja sostnuta minn Terni fuq il-bażi tal-metodu tal-“klijent kumparabbli” (Alternattiva 2). Ir-riżultati ta' l-istudju huma elenkati hawn taħt:

(64)

L-istudju għalhekk jikkonkludi li ma kienx hemm kumpens żejjed għat-telf ta' Terni. Kalkolu prospettiv tat-tariffa vantaġġjuża lil Terni sa l-2010 juri wkoll in-nuqqas ta' kumpens żejjed.

(65)

Rigward id-Deċiżjoni ta' l-ECSC 83/396 u s-sentenza tal-QEĠ C-99/92, l-Italja għamlet il-kjarifiki fattwali li ġejjin. Id-Deċiżjoni ECSC ma tikkonċernax la lil Cementir u lanqas lil Nuova Terni, li qatt ma kienu attivi fis-settur ta' l-azzar. Id-Deċiżjoni ECSC irreferiet għall-kompatibbiltà ta' l-għajnuna ta' l-Istat mogħtija fil-forma ta' rimborż bħala komponent tat-tariffa, is-sovrapprezzo termico lill-impjant li jappartjeni lil fergħa ta' Terni li tipproduċi l-azzar, li qiegħed f'Lovere, fil-Lombardija, mhux fiż-żona ta' Terni. Din l-għajnuna setgħet tingħata biss lil produtturi ta' l-azzar privati. Id-Deċiżjoni ta' l-ECSC kienet li minħabba li Terni ma kinitx proprjetà ta' l-Istat, l-impjant ta' Lovere ma setax jibbenefika mill-għajnuna. Is-sentenza preliminari tal-Qorti tal-Ġustizzja rrigwardat il-kwistjoni ta' diskriminazzjoni possibbli bejn il-produtturi privati u dawk ta' l-Istat. Hija kkonfermat id-Deċiżjoni ECSC fil-fatt li ddikjarat li ma jkunx meqjus diskriminatorju li jiġu previsti miżuri differenti ta' għajnuna għal produtturi privati kontra dawk ta' l-Istat.

(66)

Għalhekk, il-grupp Terni jissottometti li kemm id-Deċiżjoni ECSC kif ukoll is-sentenza huma irrelevanti fil-każ preżenti, fil-fatt li jikkonċernaw is-sovrapprezzo termico imħallas mill-impjant ta' Lovere, mhux it-tariffa globali speċjali mogħtija lit-tliet impjanti fiż-żona Terni.

(67)

L-Italja tissottolinea wkoll li l-estensjoni kontestata tat-tariffa stabbilita fl-Artikolu 11, paragrafu 11 tal-Liġi 80/2005 hija marbuta ma' programm ta' investimenti mifrux li ThyssenKrupp qed iwettaq fiż-żona industrijali Terni-Narni. Taħt dan il-pjan ta' azzjoni, kapaċità ġdida ta' ġenerazzjoni se tiġi żviluppata f'din iż-żona. It-tariffa hija għalhekk intenzjonata bħala soluzzjoni temporanja sakemm kapaċità ġenerattiva simili tidħol fis-seħħ, minħabba li l-abolizzjoni tagħha jipperikola l-investimenti li hemm bħalissa.

(68)

Ir-rwol tal-Cassa Conguaglio u l-involviment tar-Riżorsi ta' l-Istat (20) u (b) il-bidliet li saru għall-amministrazzjoni tat-tariffi speċjali bl-intervent tal-Cassa Conguaglio fl-2004 ma għandhomx impatt fuq in-natura kumpensatorja tat-tariffa.

(69)

Dwar il-ġurisprudenza Deggendorf, l-Italja infurmat lill-Kummissjoni li qed twettaq l-ordni ta' rkupru pendenti fir-rigward ta' ThyssenKrupp, u li l-kumpanija warrbet € 865 538 f'kont blukkat fid-dawl ta' l-irkupru finali, soġġett għal li jintlaħaq ftehim dwar l-ammont.

(70)

Il-kumpens mogħti mill-Istat għal esproprjazzjoni ta' l-assi normalment ma jikkwalifikax bħala għajnuna ta' l-Istat. Fil-valutazzjoni ta' din il-miżura, huwa għalhekk meħtieġ li l-ewwel jiġi aċċertat jekk it-trasferiment ta' l-assi ta' l-idroelettriku ta' Società Terni lil ENEL jagħtux lok għal obbligu li jiġi provdut kumpens, jew għandux jitqies bħala riorganizzazzjoni ta' l-assi pubbliċi. Jekk it-tweġiba hija li l-kumpens huwa ġustifikat, il-Kummissjoni mbagħad trid tiddetermina sa liema data u/jekk liema ammont it-tariffa preferenzjali Terni tista' tiġi kkunsidrata bħala miżura kumpensatorja ġusta.

(71)

Fl-1962, meta l-assi ta' l-idroelettriku kienu trasferiti lil ENEL, Società Terni kienet kumpanija ta' l-istat, kontrollata minn ente pubblico economico. Skond l-awtoritajiet Taljani, entitajiet simili kellhom jiġu mmaniġġjati skond il-prinċipji tas-suq. L-Istat kien l-akbar azzjonist f'Società Terni, imma parti tal-kapital kien ukoll ta' investituri privati u l-kumpanija kienet kwotata fil-Borża. Il-liġi tan-nazzjonalizzazzjoni ma prevedietx kumpens għal enti pubblici“strictu sensu”, imma għal enti pubblici economici bħal Società Terni. Dan jirrifletti l-prinċipji differenti li jiggvernaw il-funzjonament ta' dawn l-entitajiet. Aktar minn hekk, produtturi oħra “puri” ta' l-elettriku ġew esproprjati matul l-istess perjodu u wkoll irċivew kumpens (għalkemm fuq il-bażi ta' kriterji differenti).

(72)

Il-Kummissjoni tinnota li t-tneħħija ta' l-assi ta' Società Terni mingħajr kumpens kienet tagħmel ħsara lill-interessi tal-kumpanija, u b'mod partikolari ta' l-azzjonisti privati tagħha. Fid-dawl tal-prinċipju ta' l-ugwaljanza tat-trattament bejn l-impriżi privati u pubbliċi, u wkoll fid-dawl tal-bżonn li jiġu protetti d-drittijiet kostituzzjonali ta' l-azzjonijiet privati ta' Società Terni biex jirċievu kumpens, il-Kummissjoni tikkunsidra li d-deċiżjoni ta' l-Italja li tittratta lil Terni bl-istess mod bħal kumpanija privata fl-istess pożizzjoni, u li tagħtiha kumpens għat-tneħħija ta' l-assi tagħha, tista' tiġi kunsidrata ġustifikata.

(73)

Fl-1962, l-Italja ddeċidiet li ma tikkumpensax lis-Società Terni sa ammont fiss ibbażat fuq il-valur tas-suq ta' l-assi esproprjati (bil-kuntrarju ta li sar fil-każ ta' produtturi ta' l-elettriku “puri”). Minflok, il-kumpens ħa l-forma tal-provvediment ta' ammont fiss ta' elettriku bil-prezz li l-kumpanija tkun ħallset kieku żammet l-assi ta' ġenerazzjoni tagħha. Għandu jiġi nnutat li dan il-metodu kien jagħmel sens ekonomikament: it-trattament tas-Società Terni bħala “awto-produttur virtwali” ta' l-elettriku kellu l-vantaġġ li jinnewtralizza r-riskju ta' dannu addizzjonali li seta' sar lil Terni matul is-snin, fil-każ ta' żieda fil-prezzijiet ta' l-enerġija, per eżempju.

(74)

Il-Kummissjoni tista' taċċetta l-prinċipju ta' dan il-metodu. Madankollu, il-kumpens għal esproprjazzjoni ma jistax jikkonsisti f'arranġament miftuħ, imma jrid ikun stabbilit b'mod ċar fil-ħin ta' l-esproprazzjoni, soġġett għall-kumpanija esproprjata li tikkontesta l-ammont propost. Ladarba aċċettat, il-pakkett kumpensatorju ma jistax jinfetaħ fi stadju aktar tard.

(75)

Fil-każ preżenti, l-ammont ġenerali tal-kumpens iddependa fuq id-dewmien tat-tariffa. Il-pakkett kumpensatorju oriġinali offrut mill-awtoritajiet Taljani preveda li t-tariffa ddum tletin sena u għalhekk tintemm fl-1992. Soċietà Terni setgħet ikkuntestat dan il-mekkaniżmu taħt il-liġi ta' nazzjonalizzazzjoni kieku kkunsidratu inadegwat (21), imma għażlet li ma tagħmilx dan.

(76)

Il-Kummissjoni evalwat jekk, fid-dawl tal-mekkaniżmu u d-dewmien, l-arranġament kumpensatorju oriġinali setax jiġi kunsidrat adegwat.

(77)

Fl-Italja, l-operar ta' impjant ta' l-idroelettriku huwa soġġett għal konċessjoni, li d-dewmien huwa tali biex kumpanija tkun tista' tamortizza l-investiment. Meta l-konċessjoni tiskadi, fil-prinċipju, il-kumpanija titlef id-dritt li tisfrutta l-assi tagħha. Meta wieħed jikkunsidra l-metodu kumpensatorju ta' Terni, kien jagħmel sens li l-provvediment ta' l-elettriku bil-prezz tal-produzzjoni ma għandux idum aktar mid-dewmien residwali tal-konċessjoni tal-kumpanija. U dan jidher li kien ir-razzjonal tad-dispożizzjoni oriġinali tal-liġi Taljana li tillimita d-dewmien tat-tariffa preferenzjali għall-1992. Filwaqt li l-konċessjonijiet ta' Terni stess kienu jiskadu diġà ftit snin qabel, huwa inkonċepibbli li l-awtoritajiet Taljani kellhom l-intenzjoni li jallinjaw l-iskadenza tat-tariffa ta' Terni ma' l-iskadenza ġenerali tal-konċessjonijiet idroelettriċi fl-Italja fl-1992. Aktar minn hekk, Soċietà Terni ingħatat konċessjoni partikolarment twila (60 sena flok 30), u għalhekk, fiż-żmien ta' l-esproprjazzjoni, il-kumpanija diġà kellha 30 sena biex tamortizza l-investiment tagħha.

(78)

B'konklużjoni, il-Kummissjoni tikkunsidra li l-pakkett kumpensatorju oriġinali kien adegwat u b'ebda mod ma ppenalizza l-kumpanija.

(79)

Il-kwistjoni kruċjali hija jekk l-estensjonijiet ripetuti ta’ din l-arranġament tat-tariffa għadhomx jistgħu jiġu meqjusa bħala parti mill-kumpens. Il-Kummissjoni hi ta’ l-opinjoni li dan mhux il-każ. Meta l-Istat jagħmel esproprjazzjoni, huwa jistabbilixxi ex-ante ammont assolut ta’ kumpens, jew, bħal f’dan il-każ, mekkaniżmu ta’ kumpens. Kull reviżjoni ex-post ta’ l-ammonti jew tal-mekkaniżmu neċċasarjament ibiddel in-natura tal-miżura, li ma tibqax tiġi kunsidrata kumpensatorja meta titbiegħed mill-arranġament oriġinali. Li wieħed jammetti l-kuntrarju jirriżulta fl-esklużjoni ta' din it-tip ta' miżura mill-iskop tal-kontroll ta' l-għajnuna ta' l-Istat.

(80)

Stat Membru jista' madankollu, jinnotifika lill-Kummissjoni bl-intenzjoni tiegħu li jagħti aktar vantaġġi lil kumpanija esproprjata. Notifika simili tiġi eżaminata mill-Kummissjoni fuq il-meriti tagħha fid-dawl tar-regoli ta’ l-għajnuna ta’ l-Istat u billi jittieħed kont taċ-ċirkostanzi speċifiċi invokati.

(81)

L-istudju msemmi fil-paragrafu (62) jipprova juri li l-kumpens mogħti lis-Soċietà Terni u lill-kumpaniji suċċessuri tagħha matul is-snin ma kopriex b'mod sħiħ il-valur tas-suq ta' l-assi esproprjati, u li għalhekk ma kienx hemm kumpens żejjed u li l-benefiċjarji de facto qatt ma gawdew vantaġġ.

(82)

Bħala kumment preliminari, il-Kummissjoni tixtieq tissottolinea li analiżi ta’ l-adegwatezza ta’ ftehim kumpensatorju jista’ jitwettaq biss ex ante, jiġifieri, fil-ħin ta’ l-esproprjazzjoni. F’dak il-kuntest, irid jiġi nnutat li l-mekkaniżmu magħżul mill-awtoritajiet Taljani kien immirat biex iqiegħed lis-Soċietà Terni fl-istess pożizzjoni bħallikieku l-impjant ta’ l-elettriku ma ġiex esproprjat, billi jagħtiha aċċess għall-elettriku bil-prezz tal-produzzjoni matul id-dewmien tal-konċessjoni. Għalhekk, l-argument, li taħt dan l-arranġament, il-kumpaniji Terni kisbu anqas milli għalih kienu leġittimament intitolati huwa diffiċli li jiġi segwit. Barra dan, il-Kummissjoni taċċetta, li anki jekk is-sejbiet ta’ l-istudju kellhom jiġu sostanzjati (li m’huwiex il-każ, kif jidher fil-punti (87) sa (91), iċ-ċirkostanzi jkunu irrelevanti għall-iskop biex jiġi stabbilit jekk it-tariffa tatx xi vantaġġi lill-benefiċjarji.

(83)

Irid jiġi mfakkar li fil-ħin ta’ l-esproprazzjoni, l-Italja setgħet għażlet li tikkumpensa lil Terni billi ħallset ammont finanzjarju fiss bażat fuq il-valur ta’ l-assi esproprjati. Madankollu, l-Italja għażlet metodu differenti, li kkonsista filli Soċietà Terni tiġi trattata bħala awto-produttur virtwali. Dan il-metodi kien jagħmel sens ekonomiku perfettament, u huwa fi ħdan dan il-qafas ta’ referenza li l-preżenza ta’ vantaġġ ekonomiku għandha tiġi evalwata. Meta wieħed isegwi dan il-metodu, wieħed irid jikkonkludi li, sa l-iskadenza ta’ l-arranġament tat-tariffa kumpensatorja (u biss sa dik id-data) il-benefiċjarji ma rċevew ebda vantaġġ. Il-konklużjoni ma tistax tiġi ddubitata bħala riżultat tal-kalkolazzjonijiet tal-benefiċċju u t-telf, speċjalment fejn dawn jitwettqu rispettivament.

(84)

Jekk jiġi wżat metodu differenti rispettivament (ex-post) dan iwassal għal riżultati illoġiċi u kunfliġġenti, kif juri l-eżempju li ġej. Per eżempju li kieku, minħabba splużjoni fil-prezzijiet ta' l-enerġija, l-ammonti finanzjarji li rċevew il-benefiċjarji kienu diġà qabżu l-valur tas-suq ta' l-impjant ta' Terni fl-ewwel 10 snin ta’ l-arranġament tat-tariffa, bil-metodoloġija ta’ l-istudju, għandu jiġi konkluż li kien hemm kumpens żejjed, anki jekk il-pakkett ta’ l-esproprjazzjoni preveda li t-tariffa ddum 30 sena. Ovvjament dan ikun falz, minħabba li ma jkunx ittieħed kont tal-proporzjon ta’ l-arranġament oriġinali. L-istess konklużjoni trid tapplika a contrario, bl-ipoteżi li l-ammonti proprja li ngħataw kienu anqas mill-valur ta' l-assi.

(85)

Apparti dan, fil-kuntest ta’ esproprjazzjoni, kalkolu mill-ġdid ex-post tal-benefiċċji u t-telf hi barra minn lokha. Ir-riżultat ekonomiku fit-tul ta’ kumpanija esproprjata, li ma jistax jiġi mbassar fiż-żmien ta’ l-esproprjazzjoni, ma jistax jiġi rivedut, snin wara, biex jiġu ġustifikati kumpensi oħrajn.

(86)

Għalhekk, dan l-istudju għandu jitwarrab bħala irrelevanti.

(87)

Minkejja dan il-Kummissjoni eżaminat id-data u s-sejbiet ta’ l-istudju. Dan l-analiżi wera li l-istudju fih żbalji fil-metodoloġija. Kif jidher hawn taħt, huwa sistematikament jissottovaluta l-vantaġġ tat-tariffi għall-kumpaniji Terni, u probabbilment jevalwa għoli żżejjed il-valur ta' l-assi esproprjati.

(88)

Sabiex jiġi kalkulat il-vantaġġ tat-tariffa għall-perjodu 1963-1999, l-istudju jqabbel il-prezz imħallas minn Terni (Alternattiva 1 – il-prezz ta’ l-elettriku awto-prodott) mal-prezz ordinarju mħallas minn klijent kumparabbli, li jfisser awto-produttur li kien eżentat minn ċerti komponenti tat-tariffa (Alternattiva 2). Il-vantaġġ huwa għalhekk kalkulat bħala d-differenza bejn iż-żewġ trattamenti preferenzjali alternattivi previsiti bħala kumpens għal Terni. Il-Kummissjoni tinnota li, biex jiġi kalkulat il-vantaġġ tat-tariffa, it-tariffa proprja ta’ Terni kellha titqabbel ma' tariffa ordinarja mħallsa minn produttur li ma jipproduċix l-elettriku bi profil ta’ konsum bħal Terni. L-istudju għalhekk jissottovalwa l-vantaġġ tat-tariffa ta' Terni.

(89)

Għall-perjodu 2000-2006, il-vantaġġ huwa għal darba oħra meqjus bħala d-differenza bejn iż-żewġ trattamenti preferenzjali, bl-unika differenza hija li l-prezz proprja mħallas minn Terni jikkorrispondi għal Alternattiva 2 (u mhux aktar Alternattiva 1, li ma kinitx aktar possibbli wara r-riforma tat-tariffa). B’dan il-metodu, għal xi snin il-vantaġġ jirriżulta li huwa negattiv, li juri l-iżbalji fil-metodoloġija, meta wieħed jikkunsidra li l-kumpaniji Terni dejjem ħallsu tariffa taħt il-prezz tas-suq. Fil-prinċipju, għal dan il-perjodu, il-vantaġġ tat-tariffa kellu sempliċiment ikun ekwivalenti għal komponent kumpensatorju mħallas minn Cassa Conguaglio. Għalhekk, għal darba oħra, il-vantaġġ huwa ferm sottovalutat.

(90)

Żball ieħor huwa li l-istudju jikkonċerna l-valur ta' l-assi. L-istudju sempliċiment iqis bħala l-valur ta' l-assi d-differenzi bejn il-punt “impjant u makkinarju” fil-baġit ta' Terni ta' l-1962 (is-sena qabel il-nazzjonalizzazzjoni) u l-istess punt is-sena ta’ wara. L-ewwelnett, għandu jiġi nnutat li m’hemmx prova konkreta li d-differenza hija attribwibbli esklussivament għat-telf ta’ l-impjant idroelettriku. Madankollu, anki jekk, arguendo, il-valur għandu jiġi aċċettat, il-metodu użat fl-istudju xorta jkun żbaljat. Kif ikkonfermat mill-Italja, il-valur reali ta’ l-impjant ta’ l-idroelettriku fil-mument ta’ esproprjazzjoni huwa marbut mad-dewmien residwali tal-konċessjoni (22). Għalhekk, il-valur ta’ l-impjant kellu jiġi korrett biex jieħu kont ta’ dan. Fl-istudju, il-valur huwa sempliċiment attwalizzat għall-2006 skond l-inflazzjoni. Għalhekk, hemm evidenza li tissuġġerixxi li l-istudju jissopravaluta l-valur ta' l-assi

(91)

Bħala konklużjoni, l-istudju jista’ jiġi mwarrab kompletament.

(92)

Rigward l-estensjonijiet maż-żmien tat-tariffa Terni, il-Kummissjoni tapprezza li r-raġunament kien li jinżamm paralleliżmu fit-trattament ma’ dawn il-produtturi ta’ l-idroelettriku li raw il-konċessjonijiet tagħhom imġedda. Madankollu, paralleliżmu simili, li huwa fil-qalba tal-mekkaniżmu kumpensatorju, kien previst fl-arranġament ta' l-esproprjazzjoni biss għal tletin sena, mhux indefinittivament. Għalhekk, għar-raġunijiet diġà spjegati fil-paragrafi 0 sa (77) hawn fuq, dawn l-estensjonijiet ma kellhomx natura kumpensatorja.

(93)

Din il-konklużjoni hija aktar ovvja għat-tieni estensjoni tat-tariffa. Din l-estensjoni interrompiet mekkaniżmu ta' temma gradwali intenzjonat li jissimplifika t-tranżizzjoni tal-kumpaniji għat-tariffa sħiħa, li uriet il-konvinzjoni ta' l-awtoritajiet Taljani li l-kumpaniji diġà kienu ġew kumpensati b’mod sħiħ. L-Italja diġà spjegat ir-raġunijiet li wasslu għat-tieni estensjoni, li huma relatati biss mal-politika industrijali (ara l-kummenti ta’ l-Italja fil-paragrafu (60) hawn fuq).

(94)

Fid-dawl ta’ dan ta' hawn fuq, il-Kummissjoni tikkunsidra li t-tariffa Terni tista' titqies bħala kumpensatorja sa l-1992. Sa dik id-data, il-miżura ma tikkwalifikax bħala għajnuna ta' l-Istat. L-estensjonijiet kollha ta’ wara tat-tariffa, madankollu, jridu jiġu eżaminati fid-dawl tar-regoli ta’ l-għajnuna ta’ l-Istat.

(95)

Il-Kummissjoni għalhekk diġà evalwat jekk it-tariffa preferenzjali mogħtija lill-grupp Terni wara l-1992, u b’mod partikolari mill-1 ta’ Jannar 2005, id-data tad-dħul fis-seħħ ta’ l-Artikolu 11, il-paragrafu 11 tal-Liġi 80/2005, li huwa l-oġġett ta’ dawn il-proċedimenti, jikkostitwixxix għajnuna ta’ l-Istat fi ħdan it-tifsira ta’ l-Artikolu 87(1) tat-Trattat tal-KE.

(96)

F’dan il-kuntest, il-Kummissjoni tieħu nota tal-kjarifikazzjonijiet Taljani fir-rigward ta’ irrelevanza tad-Deċiżjoni ECSC 83/396 u s-sentenza tal-Qorti C99/92 u tista’ taqbel li deċiżjonijiet simili ma għandhomx effett fuq il-valutazzjoni tan-natura tat-tariffa ta’ l-għajnuna ta’ l-istat mogħtija lit-tliet impjanti fiż-żona Terni.

(97)

Miżura tikkostitwixxi għajnuna ta’ l-Istat fi ħdan it-tifsira ta’ l-Artikolu 87(1) tat-Tratta tal-KE jekk il-kundizzjonijiet li ġejjin jiġu sodisfatti b’mod kumulattiv: il-miżura (a) tikkonferixxi vantaġġ ekonomiku lill-benefiċjarju; (b) hija mogħtija mill-Istat jew permezz ta’ riżorsi ta' l-Istat u hija imputabbli lill-Istat; (ċ) hija selettiva; (d) għandha impatt fuq il-kummerċ intra-komunitarju u tista' tfixkel il-kompetizzjoni fl-UE.

(98)

Fid-dawl tar-raġunament żviluppat fil-punti (74) sa (95), il-Kummissjoni laħqet il-konklużjoni li t-tariffa preferenzjali għal Terni ma provdietx vantaġġ lill-benefiċjarji tul id-dewiem tal-pakkett kumpensatorju oriġinali, jiġifieri sa l-1992. Għalhekk, huma biss l-estensjonijiet tat-tariffa li jridu jiġu evalwati biex tiġi żgurata l-preżenza ta’ vantaġġ.

(99)

Ma hemm l-ebda dubju li l-provvediment ta’ l-elettriku bi prezzijiet aktar baxxi kumparat ma' tariffa ordinarja ta’ l-elettriku jikkostitwixxi vantaġġ ekonomiku ċar għall-benefiċjarji, li jaraw l-ispejjeż tal-produzzjoni tagħhom imnaqqsa u l-pożizzjoni kompetittiva tagħhom imsaħħha.

(100)

Minħabba li dan l-arranġament partikolari tat-Tarrifa japplika biss għall-grupp Terni, il-miżura hija selettiva.

(101)

Rigward l-iffinanzjar permezz tar-riżorsi ta’ l-Istat, għandu jiġi nnutat, li mill-2002, il-fiż finanzjarju li ġej mit-tariffa jġorruh il-konsumaturi kollha ta’ l-elettriku ta’ l-Italja permezz ta’ taxxa parafiskali miġbura minn Cassa Conguaglio permezz tal-komponent A4 tat-tariffa ta’ l-elettriku. Taxxa simili hija obbligatorja minħabba li hija imposta permezz ta’ Delibere ta’ l-AEEG li jimplimenta l-leġiżlazzjoni nazzjonali. Cassa Conguaglio hija korp pubbliku stabbilit bil-liġi, li jwettaq il-funzjonijiet tiegħu fuq il-bażi ta’ struzzjonijiet preċiżi stabbiliti fid-Delibere ta’ l-AEEG u d-dispożizzjonijiet leġiżlattivi rilevanti u regolatorji.

(102)

Hija ġurisprudenza stabbilita li, id-dħul tat-taxxa li hija obbligatorja taħt il-liġi nazzjonali u hija mħallsa lil korp pubbliku stabbilit bil-liġi jikkostitwixxi riżorsi ta’ l-Istat fi ħdan it-tifsira ta’ l-Artikolu 87 (1) tat-Trattat meta hija mmarkata għall-iffinanzjar ta’ miżura li tissodisfa l-kriterji l-oħra ta’ dak l-Artikolu (23).

(103)

Fil-paragrafu 68 hawn fuq, l-Italja tikkwota lil Pearle (24) biex tissostanzja l-istqarrija tagħha li r-riżorsi li jgħaddu mingħand Cassa Conguaglio ma jikkostitwixxux għajnuna ta' l-Istat. F’Pearle, il-Qorti sabet li taħt ċerti ċirkostanzi, definit preċiżament, ir-riżorsi tat-taxxa li għaddiet mingħand korp pubbliku ma setgħux jiġu kkunsidrati riżorsi ta' l-Istat. F’Pearle, il-miżuri kienu ffinanzjati kompletament mis-settur ekonomiku, bl-inizjattiva ta’ dak is-settur, permezz ta’ taxxa li sempliċiment għaddiet mingħand korp pubbliku u s-suġġetti li ħallsu t-taxxa kienu identiċi għal dawk li rċevew il-benefiċċji tal-miżura ta’ għajnuna. Il-Kummissjoni tagħraf li l-każ preżenti huwa ferm differenti. It-tariffa Terni kienet stabbilita fuq inizjattiva ta’ l-Istat, (mhux mis-settur ekonomiku), il-benefiċjarji tat-tariffa ma jġorrux il-piż finanzjarju tat-taxxa, li huwa fuq il-konsumaturi ta’ l-elettriku, u l-Istat jista’ f’kull ħin, jagħti struzzjonijiet lil Cassa Conguaglio permezz ta’ Delibera ta’ l-AEEG jew dispożizzjoni leġiżlattiva jew regolatorja oħra, dwar kif jistgħu jiġu amministrati l-fondi miġbura mit-taxxa. Għalhekk, Pearle hija irrelevanti għal dan il-każ.

(104)

Fil-każ Preussen-Elektra, ukoll ikkwotat mill-Italja fil-paragrafu 68 hawn fuq, il-Qorti ddeċidiet li obbligu ta’ xiri impost fuq impriżi privati tal-forniment ta’ l-elettriku biex jixtru sorsi rinnovabbli bi prezzijiet minimi ogħla mill-valur ekonomiku reali ta' dak it-tip ta' elettriku ma kkostitwixxiex għajnuna ta’ l-Istat minħabba li l-miżura ma nvolvietx trasferiment dirett jew indirett tar-riżorsi ta’ l-Istat.

(105)

Għal darba oħra, is-sostanza tal-każijiet hija b’mod ċar differenti. Fi Preussen Elektra, ir-riżorsi meħtieġa li jiffinanzjar il-miżura kienu provudti direttament mill-fornituri ta’ l-elettriku mingħajr ma jkun involut korp pubbliku, lanqas bħala vettur passiv għat-tranżitu tal-flus. F’dak il-każ, ma seta jiġi identifikat ebda trasferiment tar-riżorsi ta' l-Istat. Fil-każ preżenti, madankollu l-flus ġejjin mingħand il-pubbliku ġenerali permezz ta’ ħlas parafiskali li jgħaddi mingħand korp pubbliku qabel ma jingħata lill-benefiċjarji finali. Dan huwa għalhekk każ klassiku ta’ involvement tar-riżorsi ta’ l-Istat.

(106)

Fid-dawl ta’ dan t’hawn fuq, għalhekk, it-taxxa parafiskali użata biex tiffinanzja t-tariffa Terni tikkostitwixxi r-riżorsi ta’ l-Istat.

(107)

Il-kriterju ta’ l-imputabbiltà lill-Istat (25) huwa sodisfatt ukoll, minħabba li l-bażi legali għat-Tariffa terni huwa stabbilit fil-leġiżlazzjoni nazzjonali, flimkien mad-Delibere ta’ l-AEEG li hija korp pubbliku.

(108)

Rigward l-aħħar kriterji ta’ l-Artikolu 87(1) – l-impatt fuq il-kummerċ bejn l-Istati Membri u t-tfixkil tal-kompetizzjoni – il-Kummissjoni tista’ twarrab l-argumenti tal-kumpaniji Terni fil-paragrafu 0 fuq il-bażi tal-kunsiderazzjonijiet żviluppat fil-punti (109) sa (116).

(109)

L-argument sostantiv ewlieni tal-benefiċjarji huwa li l-impjanti li jibbenefikaw mit-tariffa ma humiex attivi fil-kummerċ intra-komunitarju minħabba li jbiegħu l-parti l-kbira tal-prodotti tagħhom fis-suq domestiku.

(110)

Għandu jiġi nnutat li f’dan ir-rigward, l-analiżi ma jistax ikun limitat għall-impjanti lokalizzati fiż-żona Terni. Il-benefiċjarji huma parti minn gruppi internazzjonali attivi f’setturi varji ta’ l-ekonomija (26), u għajnuna operattiva mogħtija lil fergħa jew impjant wieħed tista’ tiġi użata biex tissusidja fergħat oħra tal-grupp f’setturi miftuħa għall-kummerċ intra-komunitarju, u din iċ-ċirkostanza biss tista’ twassal għall-konklużjoni li t-tariffa għandha impatt fuq il-kummerċ bejn l-Istati Membri.

(111)

Apparti dan, anki jekk jintwera li l-parti l-kbira tal-produzzjoni tal-kumpaniji kienet mibjugħa fis-suq domestiku Taljan, quad non, dan ikun irrelevanti għall-iskop li jiġi sabbilit l-impatt tal-kummerċ intra-komunitarju tal-miżura. Il-Qorti ddikjarat “għajnuna lil impriża tista' tkun tali li taffettwa l-kummerċ bejn l-Istati Membri u tfixkel il-kompetizzjoni fejn l-impriża tikkompeti mal-prodotti li ġejjn minn Stati Membri oħra anki jekk hija nfisha ma tesportax il-prodotti tagħha (…). Fejn Stat Membri jagħti għajnuna lil impriża, il-produzzjoni domestika tista’ għal dik ir-raġuni tinżamm jew tiżdied bir-riżultat li impriżi stabbiliti fi Stati Membri oħra għandhom anqas ċans li jesportaw il-prodotti tagħhom lejn is-suq ta' dak l-Istat Membru” (27).

(112)

Għalhekk, il-Kummissjoni eżaminat jekk, f'termini ġenerali, hemmx kummerċ intra-komunitarju fis-setturi konċernati.

(113)

Rigward il-produttur tas-siment Cementir, il-Kummissjoni analizzat b’mod estensiv is-suq tas-siment u l-partijiet varji tiegħu, notevolment fid-Deċiżjoni tas-Siment ta' l-1994 tagħha (28). Is-siment huwa prodott tqil li għandu valur baxx f’relazzjoni mal-piż tiegħu, u allura l-ispiża tat-trasport ma tagħmlux ekonomiku li jiġi trasportat distanzi twal. Il-Kummissjoni sabet, madankollu, li dan il-limitu ma jżommx lura l-kummerċ intrakomunitarju. Il-prodotti tas-siment huma de facto nnegozjati bejn l-Istati Membri, u l-konklużjoni fil-passat ta’ ftehimiet illegali u prattiċi konċertati bejn il-produtturi tas-siment (sanzjonati fid-Deċiżjoni hawn fuq) biex iħarsu s-swieq domestiċi tagħhom hija prova li hemm kompetizzjoni effettiva fuq livell ta’ UE.

(114)

Rigward Nuova Terni Industrie Chimiche, huwa biżżejjed li wieħed jgħid, fid-deċiżjoni ta' għaqda fejn il-Kummissjoni awtorizzat it-teħid minn Norsk Hydro ta' Nuova Terni Industrie Chimiche (29), il-Kummissjoni sabet li, għall-prodotti manifatturati mill-fergħa kimika ta' Terni, kien hemm kummerċ intra-konumitajru u s-suq ġeografiku kien għall-anqas madwar iż-ŻEE.

(115)

Rigward ThyssenKrupp, il-Kummissjoni tinnota li s-suq ta' l-azzar huwa suq globali ferm kompetittiv. Fid-deċiżjonijiet preċedenti, il-Kummissjoni kienet diġà sabet li l-partijiet tas-suq li fihom ThyssenKrupp hija attiva kien għall-anqas madwar l-UE (30).

(116)

Għalhekk, il-konklużjoni hija li t-tariffa preferenzjali ta' l-elettriku mogħtija lit-tliet kumpaniji Terni hija soġġetta li ttejjeb il-pożizzjoni kompetittiva tagħhom rigward impriżi kompetenti fis-suq intra-komunitarju. Hija ġurisprudenza stabbilita (31) li f'ċirkostanzi simili l-kummerċ intra-komunitarju għandu jiġi kunsidrat affettwat u l-kompetizzjoni mfixkla.

(117)

Fid-dawl ta' dan t'hawn fuq, il-Kummissjoni waslet għall-konklużjoni li t-tariffa preferenzjali mogħtija lill-kumpaniji Terni mill-1 ta' Jannar 2005 tikkostitwixxi għajnuna ta' l-Istat fi ħdan it-tifsira ta' l-Artikolu 87(1) tat-Trattat tal-KE u tista' tiġi awtorizzata biss jekk tibbenefika minn waħda mid-derogi stabbiliti fit-Trattat.

(118)

Il-miżura ma tistax tiġi kunsidrata għajnuna eżistenti għar-raġunijiet spjegati fil-punti (119) sa (132).

(119)

Id-dispożizzjoni oriġinali tal-Liġi 9/1991 li hija kunsidrata koperta b'awtorizzazzjoni ta' għajnuna ta' l-Istat kienet modifikata fl-2005 bl-Artikolu 11(11) tal-Liġi 80/2005.

(120)

Għandu jiġi nnutat li s-sustanza tat-tariffa approvata u t-tariffa introdotta bil-Liġi 80/2005 huma simili biss fl-apparenza.

(121)

Il-Liġi 80/2005 stabbiliet li Terni għandha tkompli tibbeneifka minn tariffa preferenzjali sa l-2010. Anki jekk it-tieni estensjoni kienet biss prolongazzjoni fiż-żmien tal-miżura preċedenti, kienet xorta tikkostitwixxi għajnuna ta' l-istat. Hija ġurisprudenza stabbilita li emenda għad-dewmien ta' l-għajnuna eżistenti għandha tiġi meqjusa bħala għajnuna ġdida (32).

(122)

Analiżi aktar dettaljata turi, madankollu, li d-differenzi bejn iż-żewġ miżuri huma ferm aktar sostantivi.

(123)

Qabel id-dħul fis-seħħ tal-Liġi 80/2005, il-prezz Terni (u l-aġġornament annwali tiegħu) kien għadu bbażat fuq il-paralleliżmu oriġinali fit-trattament ma' awto-produtturi. Il-Liġi 80/2005 tintervjeni billi tneħħi din ir-rabta u effettivament tneħħi t-trattament ta' Terni bħala awto-produttur. Il-prezz stabbilit għall-2005 jidher li jikkoinċidi mal-prezz ta' l-2004, imma l-mekkaniżmu għall-formazzjoni tal-prezz huma fundamentalment mibdul, minħabba li l-prezz il-ġdid huwa aġġornat skond iż-żidiet medji fil-prezzijiet ta' l-enerġija, bil-garanzija li, minkejja kemm jogħla l-prezz, it-tariffa ma tiżdiedx b'aktar minn 4 % fis-sena.

(124)

Il-livell ta' għajnuna hija miżjuda wkoll minħabba żidiet fil-kwantitajiet fornuti bil-prezz preferenzjali. L-element ta' digressività huwa eliminat kompletament.

(125)

Għandu jiġi ssottolineat, li f'dan il-kuntest, anki jekk il-livell ta' għajnuna baqa' ma nbidilx, wieħed kien ikollu jasal għall-istess konklużjoni, jekk l-opinjoni ta' l-Avukat Ġenerali Fennelly fil-Każ Italja u Sardegna Lines v il-Kummissjoni (33) kellu jiġi segwit. Fil-valutazzjoni ta' x'jikkostitwixxi bidla sostantiva fi skema, l-Avukat Ġenerali Fennelly ddikjara li “l-introduzzjoni ta' metodu kompletament ġdid biex jipprovdi effettivament l-istess livell ta' għajnuna kkostitwixxa emenda sinifikanti lir-reġim oriġinali”.

(126)

Il-Kummissjoni nnutat ukoll li, fid-dawl tal-mekkaniżmi differenti li jiggvernaw it-tariffa, ikun impossibbli li wieħed jiddistingwi bejn, il-miżura l-ġdida implimentata fl-2005, li parti minnha, sa l-2007, tkompli tkun għajnuna eżistenti, u alterazzjoni li tista' tiġi klassifikata bħala għajnuna ġdida (34).

(127)

Għalhekk, il-Kummissjoni tikkunsidra li l-miżura msemmija bħala “t-tieni estensjoni” hija skema ta' għajnuna kompletament ġdida fil-fatt li hi sostanzjalment alternata meta mqabbla ma' dik koperta bid-Deċiżjoni ta' l-1991.

(128)

Fid-dawl ta' dan t'hawn fuq il-miżura ma tistax tiġi meqjusa bħala għajnuna ġdida mill-1 ta' Jannar 2005, li hija d-data meta l-Liġi 80/2005 għamlet l-estensjoni tat-tariffa applikabbli (35).

(129)

L-allegazzjoni, li saret f'paragrafi (48) u (60), li l-miżura għandha titqies awtorizzata skond l-Artikolu 4, il-paragrafu 5 tar-Regolament Nru 659/1999 minħabba li l-Kummissjoni kienet infurmata biha u naqset milli tieħu deċiżjoni fi ħdan il-limiti proċedurali, mhix bla bażi. Hemm differenza sostanzjali bejn l-innotifikar tal-miżura skond l-Artikolu 88(3), fuq naħa, u sempliċiment infurmar lill-Kummissjoni bl-eżistenza tal-miżura, fuq in-naħa l-oħra. F'Breda Fucine Meridionali (36), il-Qorti tal-Prim Istanza notevolment iddeċidiet li t-trażmissjoni tad-dokumenti li ma humiex indirizzati lis-Segretarjat Ġenerali u ma fihomx referenza espliċita għall-Artikolu 93, paragrafu 3 tat-Trattat tal-KE ma jistgħux jiġu kunsidrati bħala notifika valida.

(130)

Huma biss miżuri li huma notifikati skond l-Artikolu 88(3) li ma humiex implimentati qabel deċiżjoni tal-Kummissjoni li jistgħu jibbenefikaw minn limiti taż-żmien proċedurali stabbiliti fir-Regolament 659/99. Fil-każ in kwistjoni, huwa fatt li ma jistax jiġi miċħud li l-Artikolu 11(11) tal-Liġi 80/2005 ma ġiex notifikat.

(131)

Apparti dan, skond l-Artikolu 4, il-paragrafu 6 tar-Regolament 659/99, fejn il-Kummissjoni naqset milli tieħu deċiżjoni fi żmien il-limitu ta' xahrejn tal-perjodu proċedurali, l-għajnuna hija meqjusa li kienet awtorizzata sakemm l-Istat Membri jagħti notifika minn qabel ta' l-intenzjoni tiegħu biex jimplimenta l-miżura, u sakemm il-Kummissjoni tieħu deċiżjoni fi ħdan il-perjodu ta' 15-il ġurnata ta' xogħol wara li tasal in-notifika. Fil-każ preżenti, ebda notifika minn qabel ma ngħatat mill-Italja. Għalhekk, anki jekk l-allegazzjoni tal-kumpaniji Terni kienet sostanzjata, li m'huwiex il-każ, kif spjegat fil-paragrafi (129) u (130) hawn fuq, l-Artikolu 4, paragrafu 6 tar-Regolament 659/99 ma jkunx applikabbli.

(132)

Minħabba li l-Italja naqset milli tinnotifika l-Artikolu 11(11) tal-Liġi 80/2005, l-għajnuna hija illegali.

(133)

Anki jekk din il-proċedura tirrigward biss it-tieni estensjoni tat-tariffa, il-Kummissjoni tqis adatt li tagħmel numru ta' kunsiderazzjonijiet dwar l-ewwel estensjoni u l-ewwel approvazzjoni tagħha taħt ir-regoli ta' l-għajnuna ta' l-Istat.

(134)

Din l-ewwel estensjoni tat-tariffa Terni kienet prevista fl-Artikolu 20(4) tal-Liġi 9/1991. Din il-liġi kienet dikjarata kompatibbli taħt ir-regoli ta' l-għajnuna ta' l-Istat fil-każ NN 52/1991 (37). Id-deċiżjoni tal-Kummissjoni kif notifikata lill-Italja ma tispeċifikax liema artikoli tal-liġi nstabu kompatibbli. Madankollu, id-dokumenti interni li wasslu għal deċiżjoni tal-Kummissjoni provdew deskrizzjoni fil-qosor u valutazzjoni ta' l-artikoli relevanti għall-għajnuna ta' l-Istat. L-Artikolu 20(4) tal-liġi, li tipprovdi estensjoni għat-tariffa Terni, ma kienx imsemmi.

(135)

Minħabba informazzjoni skarsa, sfortunatament huwa impossibbli li jiġi rintraċċat ir-raġunament segwit f'dak il-każ, u b'mod partikolari li jsir magħruf jekk il-Kummissjoni eżaminatx u intenzjonatx li tapprova t-tariffa Terni.

(136)

Madankollu, minħabba li l-Italja nnotifikat il-liġi sħiħa u d-deċiżjoni ta' approvazzjoni wkoll tirreferi għal-liġi sħiħa, l-estensjoni tat-tariffa Terni għandha tiġi kunsidrata koperta bid-deċiżjoni tal-Kummissjoni 1991.

(137)

B'deroga mill-projbizzjoni ġenerali ta' l-għajnuna ta' l-Istat stabbilita fl-Artikolu 87(1) tat-Trattat tal-KE, l-għajnuna tista' tiġi dikjarata kumpatibbli jekk tista' tibbenefika minn waħda mid-derogi enumerati fit-Trattat.

(138)

L-għajnuna ta' l-Istat mogħtija lill-kumpaniji Terni skond l-Artikolu 11(11) tal-Liġi 80/2005 tista' tiġi klassifikata bħala għajnuna fl-operat.

(139)

Hija ġurisprudenza stabbilita li għajnuna għall-operat, jiġifieri, għajnuna intenzjonata biex tgħin impriża fl-ispejjeż li normalment ikollha tħallas għall-immaniġġjar jew l-attivitajiet normali tagħha, fil-prinċipju, tfixkel il-kompetizzjoni sa grad kuntrarju għall-interess komuni fis-setturi li fihom hija mogħtija (38). Il-Kummissjoni tinnota li l-għajnuna għall-operat mogħtija fil-forma ta' prezz ta' l-elettriku preferenzjali li impriża intensiva fl-enerġija, jiġifieri, impriża li għandha l-elettriku bħala fattur ewlieni ta' l-ispejjeż, hija forma ta' tfixkil ta' l-appoġġ minħabba li l-għajnuna għandha impatt sostanzjali u dirett fuq pożizzjoni kompetittiva.

(140)

L-għajnuna għall-operat tista' tingħata, taħt kundizzjonijiet speċifiċi, taħt il-Linjigwida għall-għajnuna ta' l-Istat għall-ħarsien ta' l-ambjent (39). It-tariffa kkunsidrata, madankollu, ma għandhiex għanijiet ambjentali.

(141)

Eċċezzjonalment, l-għajnuna ta' l-operar tista' tingħata f'żoni eliġibbli għall-għajnuna taħt deroga mill-Artikolu 87(3)(a) tat-Trattat tal-KE. Matul il-perjodu kkunsidrat, ir-Reġjun Umbria ma kienx eliġibbli għall-għajnuna taħt l-Artikolu 87(3)(a) tat-Trattat.

(142)

Anki jekk, għar-raġunijiet spjegati hawn fuq fil-paragrafi (123) sa (127), iż-żewġ estensjonijiet jikkostitwixxu miżuri differenti, il-Kummissjoni tqis utli li tfakkar li, meta l-ewwel estensjoni kienet notifikata, ir-Reġjun Umbria kienet għaddejja minn kriżi ekonomiku serju, li affettwa b'mod partikolari s-setturi ta' l-azzar u l-kimika fiż-żona Terni. Dan il-kriżi li laħaq il-quċċata tiegħu fil-bidu tad-disgħinijiet, kien rikonoxxut mill-Kummissjoni meta, fl-1997, approvat mappa Taljana ta' żoni eliġibbli għall-għajnuna taħt l-Artikolu 87.3 (ċ) (40). Iż-żoni Terni u Perugia kienu dikjarati eliġibbli għall-għajnuna taħt l-Objettiv 2 tal-Fondi Strutturali.

(143)

Fl-2005, madankollu, fiż-żmien li ġiet adottata l-Liġi 80/2005, il-proċess għall-aġġustament strutturali fl-Umbria kien diġà seħħ. Fil-mappa proposta għall-għajnuna reġjonali 2007-2013, l-Umbria se titlef l-istatus ta' reġjun assistit. Għalhekk, filwaqt li huwa diffiċli li wieħed ikun jaf jekk il-kunsiderazzjonijiet għall-iżvilupp Reġjonali kellhomx rwol fid-deċiżjoni oriġinali approvata, huwa xorta ċert li l-Kummissjoni ma tistax toqgħod fuq kunsiderazzjonijiet simili biex tevalwa t-tieni estensjoni tat-tariffa.

(144)

L-Italja spjegat b'mod estensiv ir-raġunijiet tal-politika industrija għat-tieni prolongazzjoni tat-tariffa Terni (ara l-paragrafu (60). L-argument ewlieni ta' l-Italja favur it-tariffa huwa li kumpaniji intensivi fl-enerġija fi Stati Membri oħra jistgħu wkoll jibbenefikaw minn prezzijiet imnaqqsa ta' l-enerġija u t-tariffa hija meħtieġa bħala miżura tranżizzjonali biex tiġi evitata d-delokalizzazzjoni bara l-UE wara l-liberalizzazzjoni sħiħa tas-suq ta' l-enerġija u infrastruttura mtejba. Inċidentalment, dawn l-ispjegazzjonijiet jikkontradixxu l-istqarrija Taljana li t-tariffa Terni xorta tkun kumpensatorja u ċertament ma toffri ebda ġustifikazzjoni għal reviżjoni tal-pakkett ta' l-esproprjazzjoni.

(145)

Il-Kummissjoni tinnota li l-Qorti ddeċidiet li “il-fatt li Stat Membru jfittex li jqarreb, b'miżuri unilaterali, il-kundizzjonijiet tal-kompetizzjoni f'settur partikolari ta' l-ekonomija għal dawk prevalenti fi Stati Membri oħra ma jnaqqasx il-kwistjoni tal-karattur tagħhom bħala għajnuna ta' l-Istat” (41). Aktar minn hekk, l-argument Taljan li għajnuna ta' l-Istat simili tkun ġustifikata bl-eżistenza ta' għajnuni ta' l-Istat oħrajna (li jfixklu ugwalment) fl-UE għandha tiġi mwarrba. Strateġija simili twassal għal sensieli ta' sussidji li jmorru kontra l-għan tal-kontroll ta' l-għajnuna ta' l-Istat. Rigward ir-riskju allegat ta' delokalizzazzjoni barra l-UE, il-Kummissjoni tinnota li ma hemmx preċedent fil-prattika deċiżjonali tagħha jew fil-ġurisprudenza tal-qrati tal-Komunità, fejn argument simili ġie aċċettat bħala ġustifikazzjoni għar-raġuni ta' l-għajnuna ta' l-Istat. Fil-każ in kwistjoni, ma hemmx bżonn għall-Kummissjoni li tikkunsidra din il-kwistjoni minħabba li l-awtoritajiet Taljani ma ssustanzjawx allegazzjoni simili. Notevolement, ma ġiex muri li t-tariffa kienet meħtieġa u proporzjonata biex tipprevjeni r-riskju.

(146)

Rigward il-konklużjonijiet tal-grupp ta' Livell Għoli msemmija fil-punt (60), huma irrelevanti minħabba li ma jirriflettux ir-riżultat tad-dibattitu ġenerali ta' politika u ma jikkostitwixxux dispożizzjonijiet li jorbtu legalment. Għandu jiġi nnutat inċidentalment, li s-soluzzjonijiet proposti mill-grupp u kwotati mill-Italja ma jinvolvux l-għoti ta' l-għajnuna ta' l-Istat.

(147)

Minħabba li l-għajnuna ma tistax tkun ta' benefiċċju għad-derogi stabbiliti fl-Artikolu 87 tat-Trattat tal-KE, it-tieni estensjoni tat-tariffa preferenzjali favur il-kumpaniji Terni għandha tiġi dikjarata inkompatibbli mas-suq komuni.

(148)

Skond ir-Regolament tal-Kunsill (KE) Nru 659/1999 (42) li jistabbilixxi regoli dettaljati għall-applikazzjoni ta' l-Artikolu 93 tat-Trattat, f'każijiet ta' għajnuna illehali li mhix kompatibbli mas-suq komuni, il-kompetizzjoni effettiva għandha tiġi restawrata u l-għajnuna, inkluż l-interessi, għandhom jiġu rkuprati mingħajr dewmien.

(149)

Hija ġurisprudenza stabbilita li, meta l-għajnuna tingħata mingħajr notifika minn qabel skond l-Artikolu 88(3) tat-Trattat, ir-reċipjent ta' l-għajnuna f'dak iż-żmien ma jistax ikollu aspettattivi leġittimi li l-għotja hija legali (43). Negozjant diliġenti normalment għandu jkun kapaċi jiddetermina jekk il-proċedura ta' notifika ġietx segwita u jekk l-għajnuna hijiex legali.

(150)

Madankollu, reċipjent ta' għajnuna mogħtija illegalment m'huwiex prekluż milli joqgħod fuq ċirkostanzi eċċezzjonali li fuq il-bażi tagħhom kien leġittimament assuma li l-għajnuna hija legali u għalhekk jonqos milli jirrifondi dik l-għajnuna (44). Il-Kummissjoni eżaminat jekk iċ-ċirkostanzi eċċezzjonali allegati mill-kumpaniji Terni fil-paragrafu 0 setgħux wassluhom biex ikollhom aspettattivi leġittimi simili.

(151)

Fis-sostanza, il-benefiċjarji talbu li l-Italja kienet assigurathom dwar il-karattru tal-miżura li ma jaqax taħt għajnuna, u li l-Kummisjoni ma ddubitatx il-miżura in kwestjoni, la meta kienet estiża l-ewwel darba, u lanqas meta l-informazzjoni dwar it-tieni estensjoni ġiet estiża.

(152)

Rigward l-ewwel stqarrija, huwa biżżejjed li wieħed ifakkar li, skond il-ġurisprudenza stabbilita, l-eżistenza ta' aspettattivi leġittimi ma tistax tiddependi fuq il-komportament ta' l-Istat Membru li jagħti l-għajnuna. Il-Qorti tal-Prim'Istanza ddeċieda, b'mod partikolari, li “informazzjoni inkorretta mogħtija minn Stat Membru dwar il-legalità ta' miżura fl-ebda ċirkostanza ma tista' tiġi meqjusa li tati lok għal aspettattivi leġittimi, speċjalment fejn il-Kummissjoni ma tkunx ġiet infurmata b'dik l-informazzjoni” (45).

(153)

Huwa biss il-komportament ta' l-amministrazzjoni tal-Komunità li jista' jagħti lok għal aspettattivi leġittimi. B'mod partikolari l-Qorti ddikjarat li “persuna ma tistax titlob ksur tal-prinċipju sakemm ma tkun ingħatat assigurazzjonijiet preċiżi (emfażi miżjud) mill-amministrazzjoni tal-Komunità” (46).

(154)

Il-kumpaniji Terni jsostni li l-miżura ma ġietx iddubitata fl-1991, meta l-Kummissjoni approvat il-Liġi 9/1991. Għandu jiġi nnutat li d-deċiżjoni tal-Kummissjoni ta' l-1991 tkopri biss il-miżura stabbilita fil-Liġi 9/1991, biex l-approvazzjoni ta' dik il-miżura ma jistax jagħti lok għal aspettattivi leġittimi rigward il-legalità jew il-kompatibbiltà tal-miżura l-ġdida ta' għajnuna introdotta bil-Liġi 80/2005. Anki jekk il-Kummissjoni kienet iddikjarat espliċitament li l-miżura ta' l-1991 ma kkostitwietx għajnuna, quad non, il-benefiċjarja ma għandhomx jassumu li l-miżura ta' l-2005 għandha tikkwalifika wkoll bħala non-għajnuna, minħabba li hemm bosta ċirkostanzi li jistgħu jittrasformaw miżura li ma humiex għajnuna f'għajnuna ta' l-Istat.

(155)

Aktar minn hekk, il-kliem tad-deċiżjoni tal-Kummissjoni kif notifikati lill-Italja, li tiddikjara kompatibbli l-miżuri ta' għajnuna li hemm fil-Liġi 9/1991 u 10/1991 jekk xejn, jissuġġerixxu l-oppost, li l-miżura Terni ma kkostitwietx għajnuna.

(156)

Għalhekk, id-deċiżjoni tal-Kummissjoni ma setgħetx possibbilment tati lill-benefiċjarji assigurazzjonijiet preċiżi dwar il-karattru li t-tariffa ma kinitx ta' għajnuna, imma l-aktar, aspettattiva leġittima li l-estensjoni ta' l-1991 tat-tariffa kienet kompatibbli. Ebda aspettattivi ma setgħu jinżammu, madankollu, fir-rigward ta' l-estensjoni ta' l-2005. Għalhekk, dan l-argument kellu jitwarrab ukoll.

(157)

Rigward l-allegat nuqqas tal-Kummissjoni li taġixxi sewwa meta rċeviet l-informazzjoni dwar it-tieni estensjoni tat-tariffa, dan l-argument huma ċertament bla bażi. L-Italja allegatament semmiet it-tariffa Terni fir-Rapport ta' l-għajnuna ta' l-Istat ta' l-2005. Informazzjoni dettaljata dwar il-miżura prevista fl-Artikolu 11(11) tal-Liġi 80/2005 ġiet provduta, madankollu, biss fi Frar 2006, fuq talba tal-Kummissjoni, fil-kuntest ta' l-investigazzjoni ta' l-għajnuna ta' l-Istat dwar l-Artikolu 11(12) ta' l-istess Liġi (għajnuna ta' l-Istat C 13/2006). Il-proċedura ta' investigazzjoni formali nfetħet mill-Kummissjoni f'Lulju 2006.

(158)

Meta wieħed jikkunsidra ż-żmien qasir li għadda bejn is-sottomissjoni ta' l-informazzjoni u l-azzjoni mill-Kummissjoni, jidher ċar li l-Kummissjoni aġixxiet b'mod tajjeb.

(159)

Fid-dawl tal-konsiderazzjonijiet ta' hawn fuq, il-Kummissjoni kkonkludiet li ma hemmx ċirkostanzi ekstraordinarji li setgħu wasslu għall-kumpaniji Terni biex ikollhom asspettattivi leġittimi dwar il-legalità tal-miżura kontestata.

(160)

L-ammonti kollha ta' għajnuna inkompatibbli li rċevew ThyssenKrupp, Cementir and Nuova Terni Industrie Chimiche skond l-Artikolu 11(11) tal-Liġi 80/2005 u li jkopru l-perjodu mill-1 ta' Jannar 2005 (ara l-paragrafu 0) għandhom jiġu rkuprati, bl-interessi, skond il-Kapitolu V tar-Regolament tal-Kummissjoni (KE) Nru 794/2004 tal-21 ta' April 2004 li jimplimenta r-Regolament tal-Kunsill (KE) Nru 659/1999 li jistabbilixxi regoli dettaljati għall-applikazzjoni ta' l-Artikolu 93 tat-Trattat tal-KE (47).

(161)

F'dan il-kuntest għandu jiġi mfakkar li, l-iskop ta' l-irkupru huwa r-restawr tas-sitwazzjoni kompetittiva tal-benefiċarju prevalenti qabel l-għoti ta' l-għajnuna inkompatibbli. Fl-istabbiliment ta' x'kienet is-sitwazzjoni kompetittiva tal-kumpanija Terni qabel l-introduzzjoni tal-Liġi 80/2005, għandu jittieħed kont ta' l-eżistenza tal-miżura ta' għajnuna eżistenti stabbilita fil-Liġi 9/1991, li kienet aċċettata taħt ir-regoli ta' l-għajnuna ta' l-Istat sa l-2007.

(162)

Għalhekk, il-Kummissjoni tikkunsidra li l-ammonti residwali ta' għajnuna li għaliha kienu intitolati l-benefiċjarji taħt il-Liġi 9/1991 fl-2005, l-2006 u l-2007 jekk il-Liġi 80/2005 ma kinitx tiġi implimentata tista' titnaqqas mis-somom li jridu jiġu irkuprati, jekk l-Italja tikkunsidra li l-benefiċjarji huma intitolati għalihom taħt il-Liġi nazzjonali.

(163)

Il-Kummissjoni ssib li l-Italja implimentat illegalment, bi jsur ta' l-Artikolu 88(3) tat-Trattat tal-KE, id-dispożizzjoni ta' l-Artikolu 11, paragrafu 11 tad-Decreto-legge 80/05, maqlub f'Liġi 80/2005, li tipprovdi għall-modifikazzjoni u l-estensjoni fiż-żmien sa l-2010 tat-tariffa preferenzjali ta' l-elettriku applikabbli għat-tliet kumpaniji Terni. Il-Kummissjoni tikkunsidra li miżura simili, li tikkostitwixxi għajnuna pura ta' l-operar, m'hija eliġibbli għall-ebda deroga taħt it-trattat tal-KE, u għalhekk hija inkompatibbli mas-suq komuni. Għalhekk, il-partijiet tal-miżura t'hawn fuq li għadhom ma ġewx mogħtija imħallsa ma jridux jiġu implimentati. L-għajnuna li diġà tħallset trid tiġi rkuprata. L-ammonti li l-benefiċjarji kienu jkunu intitolati għalihom fl-2005, l-2006 u l-2007 taħt il-Liġi 9/1991 jistgħu jitnaqqsu mill-ammont totali li jrid jiġi rkuprat.