10.1.2008

MT

Il-Ġurnal Uffiċjali ta’ l-Unjoni Ewropea

L 6/1

---

REGOLAMENT TAL-KUMMISSJONI (KE) Nru 12/2008

tad-9 ta’ Jannar 2008

li jistabbilixxi l-valuri fissi ta' l-importazzjoni għad-determinazzjoni tal-prezz ta' dħul ta' ċertu frott u ħaxix

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kummissjoni (KE) Nru 1580/2007 tal-21 ta' Diċembru 2007 dwar regoli dettaljati għall-applikazzjoni tar-Regolamenti tal-Kunsill (KE) Nru 2200/96, (KE) Nru 2001/96 u (KE) Nru 1182/2007 fis-settur tal-frott u ħxejjex (1), u b'mod partikolari l-Artikolu 138(1) tiegħu,

Billi:

(1)

Fl-applikazzjoni tal-konklużjonijiet tan-negozjati kummerċjali multilaterali tal-Laqgħa ta' l-Urugwaj, il-Regolament (KE) Nru 1580/2007 jistipula l-kriterji għall-istabbiliment mill-Kummissjoni tal-valuri fissi ta' l-importazzjoni minn pajjiżi terzi, għall-prodotti u għall-perjodi msemmijin fl-Anness tiegħu.

(2)	Fl-applikazzjoni tal-kriterji msemmija hawn fuq, il-valuri fissi ta' l-importazzjoni għandhom ikunu ffissati fil-livelli msemmija fl-Anness ta' dan ir-Regolament,

ADOTTAT DAN IR-REGOLAMENT:

Artikolu 1

Il-valuri fissi ta' l-importazzjoni msemmija fl-Artikolu 138 tar-Regolament (KE) Nru 1580/2007 huma stabbiliti kif inhu indikat fit-tabella ta' l-Anness.

Artikolu 2

Dan ir-Regolament għandu jidħol fis-seħħ fl-10 ta’ Jannar 2008.

---

(1)  ĠU L 350, 31.12.2007, p. 1.

---

---

10.1.2008

MT

Il-Ġurnal Uffiċjali ta’ l-Unjoni Ewropea

L 6/3

---

REGOLAMENT TAL-KUMMISSJONI (KE) Nru 13/2008

tad-9 ta' Jannar 2008

li jiffissa l-koeffiċjent ta' allokazzjoni li għandu jiġi applikat għall-applikazzjonijiet għal liċenzji ta' l-importazzjoni mressqa mit-2 sa l-4 ta' Jannar 2008 fil-kuntest tal-kwota tariffarja miftuħa bir-Regolament (KE) Nru 955/2005 għal ross li joriġina fl-Eġittu

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1785/2003 tad-29 ta' Settembru 2003 dwar l-organizzazzjoni komuni tas-suq tar-ross (1),

Wara li kkunsidrat ir-Regolament tal-Kummissjoni (KE) Nru 1301/2006 tal-31 ta' Awissu 2006 li jistabbilixxi regoli komuni għall-amministrazzjoni tal-kwoti tariffarji ta' l-importazzjoni għall-prodotti agrikoli ġestiti b'sistema ta' liċenzji ta' l-importazzjoni (2), u b'mod partikolari l-Artikolu 7(2) tiegħu,

Billi:

(1)	Ir-Regolament tal-Kummissjoni (KE) Nru 955/2005 (3) fetaħ kwota tariffarja annwali għall-importazzjoni ta' 5 605 tunnellata ross kopert bil-kodiċi tan-NM 1006 li joriġina mill-Eġittu (in-numru tas-serje 09.4097),

(2)

Mill-komunikazzjoni li saret f'konformità ma' l-Artikolu 5(a) tar-Regolament (KE) Nru 955/2005, jirriżulta li l-applikazzjonijiet imressqa 'l quddiem sa l-4 ta' Jannar 2008 fis-13:00 ħin ta' Brussell, skond l-Artikolu 4(1) tar-Regolament imsemmi, jinvolvu kwantitajiet akbar minn dawk disponibbli. Għaldaqstant, jeħtieġ li jiġi stabbilit sa fejn għandhom jinħarġu l-liċenzji ta' l-importazzjoni, billi jiġi ffissat il-koeffiċjent ta' l-allokazzjoni li għandu jiġi applikat għall-kwantitajiet mitluba.

(3)	Jeħtieġ ukoll li ma jinħarġux aktar liċenzji ta' l-importazzjoni skond ir-Regolament (KE) Nru 955/2005 għall-perjodu kurrenti tal-kwota,

ADOTTAT DAN IR-REGOLAMENT:

Artikolu 1

1.   L-applikazzjonijiet għal liċenzji ta' l-importazzjoni ta' ross li joriġina fl-Eġittu kopert bil-kwota msemmija fir-Regolament (KE) Nru 955/2005, imressqa 'l quddiem sa l-4 ta' Jannar 2008 fis-13:00 ħin ta' Brussell, jagħtu lok għall-ħruġ ta' liċenzji għall-kwantitajiet mitluba bl-applikazzjoni ta' koeffiċjent ta' l-allokazzjoni ta' 8,123188 %.

2.   Il-ħruġ ta' ċertifikati għall-kwantitajiet mitluba mill-Ġimgħa 4 ta' Jannar 2008 mis-13:00 'l quddiem, ħin ta' Brussell, huwa sospiż għall-perjodu kurrenti tal-kwota.

Artikolu 2

Dan ir-Regolament għandu jidħol fis-seħħ dakinhar tal-pubblikazzjoni tiegħu fil-Ġurnal Uffiċjali ta' l-Unjoni Ewropea.

---

(1)  ĠU L 270, 21.10.2003, p. 96. Ir-Regolament kif emendat l-aħħar bir-Regolament tal-Kummissjoni (KE) Nru 797/2006 (ĠU L 144, 31.5.2006, p. 1). Ir-Regolament (KE) Nru 1758/2003 ser jinbidel bir-Regolament (KE) Nru 1234/2007 (ĠU L 299, 16.11.2007, p. 1) u jidħol fis-seħħ mill-1 ta' Settembru 2008.

(2)  ĠU L 238, 1.9.2006, p. 13. Ir-Regolament kif emendat bir-Regolament (KE) Nru 289/2007 (ĠU L 78, 17.3.2007, p. 17).

(3)  ĠU L 164, 24.6.2005, p. 5. Ir-Regolament kif emendat l-aħħar bir-Regolament (KE) Nru 1456/2007 (ĠU L 325, 11.12.2007, p. 76).

---

10.1.2008

MT

Il-Ġurnal Uffiċjali ta’ l-Unjoni Ewropea

L 6/4

---

DIRETTIVA TAL-KUMMISSJONI 2008/4/KE

tad-9 ta' Jannar 2008

li temenda d-Direttiva 94/39/KE fir-rigward ta' oġġetti ta' l-ikel għat-tnaqqis tar-riskju tad-deni mill-ħalib

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 93/74/KEE tat-13 ta' Settembru 1993 dwar l-oġġetti ta’ l-ikel maħsuba għal għanijiet nutrijenti partikolari (1) u b'mod partikolari l-Artikolu 6(ċ) tagħha,

Billi:

(1)	Permezz tad-Direttiva 94/39/KE (2) il-Kummissjoni stabbiliet lista ta' użi maħsuba għall-għalf ta' l-annimali għal għanijiet nutrittivi partikolari

(2)

Fl-opinjoni tagħha tat-8 ta' Diċembru 2004 l-Awtorità Ewropea għas-Sikurezza ta' l-Ikel (“l-Awtorità”) ikkonkludiet li ż-zeolite (synthetic sodium aluminium silicate) għandu l-potenzjal li jnaqqas ir-riskju ta' deni tal-ħalib fil-baqar li jipproduċu l-ħalib (3). Madankollu, ma setgħetx tivvaluta għal kollox ir-riskju għas-saħħa tal-bniedem u l-annimali minħabba li hemm xi data nieqsa. Wara li qieset it-tagħrif addizzjonali li waslilha, l-Awtorità kkonkludiet fl-opinjoni tagħha tal-11 ta' Lulju 2007 li ż-żieda ta' zeolite ma' l-għalf tal-baqar li jipproduċu l-ħalib għal perjodu ta' madwar ġimagħtejn wara li jwelldu ma joħloqx riskju fuq is-saħħa ta' l-annimali jew tal-bnedmin jew fuq l-ambjent (4). Iż-zeolite għandu għalhekk ikun inkluż fil-linja “tnaqqis tar-riskju ta' deni tal-ħalib” fil-lista ta' użi maħsuba fil-Parti B ta' l-Anness tad-Direttiva 94/39/KE.

(3)

Fl-opinjoni tagħha tat-12 ta' Ġunju 2007 l-Awtorità kkonkludiet li l-għalf b'kontenut għoli ta' kalċju amministrat fi żmien il-ħlas jista' jkun effettiv ħafna fit-trattament ta' każijiet ta' deni ħafif tal-ħalib u biex il-baqar li jipproduċu l-ħalib ma jitħallewx jirkadu u għalhekk għandha tiżdied daħla ġdida mal-lista li tikkonċerna l-prevenzjoni tar-riskju tad-deni tal-ħalib (5). Barra minn hekk l-Awtorità kkonkludiet li riskju marġinali għas-saħħa ta' l-annimali ma jistax ikun eskluż kompletament li jfisser li hu neċessarju li r-riskju individwali jiġi bbilanċjat mal-benefiċċji ġenerali ta' l-amministrazzjoni. Biex din il-valutazzjoni titħalla ssir mill-maniġer tal-baqar li jipproduċu l-ħalib is-sorsi differenti tal-kalċju għandhom jiġu indikati fuq it-tikketta flimkien mal-kwantità tagħhom. Barra minn hekk, it-tikketta għandha tinkludi rakkomandazzjoni għat-tfittxija ta' parir minn espert nutrizzjonali. L-Awtorità la tistenna riskju għall-konsumatur u lanqas riskju addizzjonali għall-ambjent. Għalf b'kontenut għoli ta' kalċju għandu għalhekk ikun inkluż fil-linja “tnaqqis tar-riskju ta' deni tal-ħalib” fil-lista ta' użi maħsuba fil-Parti B ta' l-Anness tad-Direttiva 94/39/KE.

(4)	Id-Direttiva 94/39/KE għalhekk għandha tiġi emendata skond dan.

(5)	Il-miżuri stipulati f'din id-Direttiva huma skond l-opinjoni tal-Kumitat Permanenti dwar il-Katina Alimentari u s-Saħħa ta' l-Annimali,

ADOTTAT DIN ID-DIRETTIVA:

Article 1

L-Anness tad-Direttiva 94/39/KE qed jiġi emendat skond l-Anness ta' din id-Direttiva.

Article 2

L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa biex ikunu konformi ma' din id-Direttiva sa mhux iktar tard mill-24 ta' Ġunju 2008. Huma għandhom jgħarrfu lill-Kummissjoni b'dan minnufih.

Meta l-Istati Membri jadottaw dawn id-dispożizzjonijiet, dawn għandu jkun fihom referenza għal din id-Direttiva jew ikunu akkumpanjati b’din ir-referenza meta jiġu ppubblikati uffiċjalment. L-Istati Membri għandhom jistabbilixxu kif għandha ssir referenza ta' din ix-xorta.

Article 3

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha fil-Ġurnal Uffiċjali ta' l-Unjoni Ewropea.

Article 4

Din id-Direttiva hija indirizzata lill-Istati Membri.

---

(1)  ĠU L 237, 22.9.1993, p. 23. Id-Direttiva kif emendata l-aħħar mir-Regolament (KE) Nru 806/2003 (ĠU L 122, 16.5.2003, p. 1).

(2)  ĠU L 207, 10.8.1994, p. 20. Id-Direttiva kif emendata l-aħħar mid-Direttiva 2002/1/KE (ĠU L 5, 9.1.2002, p. 8).

(3)  Opinjoni tal-Bord Xjentifiku dwar l-Addittivi u l-Prodotti jew Sustanzi użati fl-Għalf ta' l-Annimali fuq talba mill-Kummissjoni dwar l-użu ta' synthetic sodium aluminium silicate (zeolite) għat-tnaqqis tar-riskju tad-deni tal-ħalib f'baqar li jipproduċu l-ħalib. Adottata fit-8 ta' Diċembru 2004. Il-Ġurnal EFSA (2004) 160, 1-11.

(4)  Opinjoni tal-Bord Xjentifiku dwar l-Addittivi u l-Prodotti jew Sustanzi użati fl-Għalf ta' l-Annimali dwar is-sikurezza taż-zeolite (sodium aluminosilicate, synthetic) għat-tnaqqis tar-riskju tad-deni tal-ħalib f'baqar li jipproduċu l-ħalib. Adottata fit-11 ta' Lulju 2007. Il-Ġurnal EFSA (2007) 523, 1-11.

(5)  Opinjoni tal-Bord Xjentifiku dwar l-Addittivi u l-Prodotti jew Sustanzi użati fl-Għalf ta' l-Annimali dwar is-sikurezza ta' l-għalf b'kontenut għoli ta' kalċju għat-tnaqqis tad-deni tal-ħalib f'baqar li jipproduċu l-ħalib. Adottata fit-12 ta' Ġunju 2007. Il-Ġurnal EFSA (2007) 504, 1-10.

---

---

10.1.2008

MT

Il-Ġurnal Uffiċjali ta’ l-Unjoni Ewropea

L 6/7

---

DEĊIŻJONI TAL-PARLAMENT EWROPEW U TAL-KUNSILL

tat-18 ta’ Diċembru 2007

li temenda l-Ftehima Interistituzzjonali tas-17 ta’ Mejju 2006 dwar id-dixxiplina baġitarja u l-amministrazzjoni finanzjarja fis-sod fir-rigward tal-qafas finanzjarju multiannwali

(2008/29/KE)

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw il-Ftehima Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja fis-sod (1), u b'mod partikolari l-Punti 21, 22, l-ewwel u t-tieni subparagrafi, u 23 tiegħu,

Wara li kkunsidraw il-proposta tal-Kummissjoni,

Billi:

(1)

Fil-laqgħa ta' konċiljazzjoni tat-23 ta’ Novembru 2007, iż-żewġ naħat ta' l-awtorità baġitarja qablu li jipprovdu parti mill-finanzi meħtieġa għas-Sistema Globali Ewropea ta' Navigazzjoni Satellitari (EGNOS – GALILEO) permezz ta' reviżjoni tal-qafas finanzjarju multiannwali 2007–2013 skond il-Punti 21, 22 u 23 tal-Ftehima Interistituzzjonali, biex jiżdiedu l-limiti massimi ta' l-approprjazzjonijiet għall-impenji taħt is-sottointestatura 1a għas-snin 2008 sa 2013 bl-ammont ta' EUR 1 600 miljun fil-prezzijiet attwali. Din iż-żieda tkun ibbilanċjata bit-tnaqqis tal-limitu għall-approprjazzjonijiet għall-impenji taħt l-Intestatura 2 għas-sena 2007 bl-istess ammont.

(2)	Sabiex tinżamm relazzjoni xierqa bejn l-impenji u l-ħlas, il-limiti annwali għall-ħlas ta' l-approprjazzjonijiet se jiġu aġġustati. L-aġġustament se jkun newtrali.

(3)	L-Anness I tal-Ftehima Interistituzzjonali dwar id-dixxiplina baġitarja u l-amministrazzjoni finanzjarja fis-sod għandha għalhekk tiġi emendata kif xieraq (2),

IDDEĊIDEW KIF ĠEJ:

Artikolu Uniku

L-Anness I tal-Ftehim Interistituzzjonali dwar id-dixxiplina baġitarja u l-amministrazzjoni finanzjarja fis-sod huwa sostitwit mill-Anness ta’ din id-Deċiżjoni.

---

(1)  ĠU C 139, 14.6.2006, p. 1.

(2)  Għal dan il-għan, iċ-ċifri li jirriżultaw mill-ftehima msemmija hawn fuq huma maqluba għall-prezzijiet ta' l-2004.

---

---

10.1.2008

MT

Il-Ġurnal Uffiċjali ta’ l-Unjoni Ewropea

L 6/9

---

DEĊIŻJONI TAL-PARLAMENT EWROPEW U TAL-KUNSILL

tat-18 ta' Diċembru 2007

dwar il-mobilizzazzjoni tal-Fond Ewropew ta' Aġġustament għall-Globalizzazzjoni

(2008/30/KE)

Il-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw il-Ftehima Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina tal-baġit u l-amministrazzjoni finanzjarja tajba (1), u b'mod partikolari l-punt 28 tagħha,

Wara li kkunsidra r-Regolament (KE) Nru 1927/2006 tal-Parlament Ewropew u tal-Kunsill ta' l-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni, (2),

Wara li kkunsidra l-proposta tal-Kummissjoni.,

Wara li kkunsidra l-Konċiljazzjoni Baġitarja tat-13 ta' Lulju 2007,

Billi:

(1)	L-Unjoni Ewropea ħolqot Fond Ewropew ta' Aġġustament għall-Globalizzazzjoni (il-“Fond”) biex jipprovdi appoġġ addizzjonali għall-ħaddiema li jsofru mill-konsegwenzi ta' bidliet strutturali kbar fil-kummerċ globali u biex jgħinuhom jerġgħu jintegraw fis-suq tax-xogħol.

(2)	Il-Ftehima Interistituzzjonali tas-17 ta' Mejju 2006 tippermetti l-mobilizzazzjoni tal-Fond fil-limitu massimu annwali ta' EUR 500 miljun.

(3)	Ir-Regolament (KE) Nru 1927/2006 jinkludi d-dispożizzjonijiet li permezz tagħhom il-Fond jista' jiġi mmobilizzat.

(4)	Il-Ġermanja u l-Finlandja ppreżentaw l-applikazzjonijiet għall-mobilizzazzjoni tal-Fond, minħabba żewġ każijiet ta' tkeċċijiet ta' ħaddiema fis-settur tat-telefonija ċellulari: BenQ fil-Ġermanja u Perlos Oyj fil-Finlandja,

IDDEĊIDEW KIF ĠEJ:

Artikolu 1

Għall-baġit ġenerali ta' l-Unjoni Ewropea għas-sena finanzjarja 2007, il-Fond Ewropew ta' Aġġustament għall-Globalizzazzjoni għandu jkun immobilizzat għal ammont totali ta' EUR 14 794 688.

Artikolu 2

Din id-Deċiżjoni għandha tiġi pubblikata fil-Ġurnal Uffiċjali ta' l-Unjoni Ewropea.

---

(1)  ĠU C 139, 14.6.2006, p. 1.

(2)  ĠU L 406, 30.12.2006, p. 1.

---