(1)

Fl-1991, il-Kunsill, bir-Regolament (KEE) Nru 3433/91 (2), impona dazju anti-dumping definittiv ta’ 16.9 % fuq importazzjonijiet ta’ lighters tal-but, tal-gass u ż-żnied, li ma jistgħux jerġgħu jimtlew, li joriġinaw, inter alia, fir-Repubblika Popolari taċ-Ċina (“RPĊ” jew “Ċina”)

(2)

Fl-1995, bir-Regolament tal-Kunsill (KE) Nru 1006/95 (3), id-dazju oriġinali ad valorem kien mibdul b’dazju speċifiku ta’ ECU 0 065 għal kull lighter.

(3)

Wara investigazzjoni skond l-Artikolu 13 tar-Regolament bażiku (4) il-miżuri fuq imsemmija ġew estiżi bir-Regolament tal-Kunsill (KE) Nru 192/1999 (5) għal (a) importazzjoni ta’ lighters tal-but, tal-gass u ż-żnied, li ma jistgħux jerġgħu jimtlew, kunsinnati minn jew li joriġinaw mit-Tajwan u (b) importazzjoni ta’ ċerti lighters, li jistgħu jerġgħu jimtlew, li joriġinaw miċ-Ċina u kunsinnati minn jew fit-Tajwan b’valur, dazju mhux imħallas u liberu fil-fruntiera Komunitarja, ta’ anqas minn EUR 0,15 kull biċċa.

(4)

Fl-2001 bir-Regolament tal-Kunsill (KE) Nru 1824/2001 (6), il-Kunsill ikkonferma d-dazji anti-dumping definittivi imposti bir-Regolament (KE) Nru 1006/95 kif estiż bir-Regolament (KE) Nru 192/1999 (“miżuri eżistenti”) skond l-Artikolu 11(2) tar-Regolament bażiku.

(5)

Wara l-pubblikazzjoni ta’ l-avviż ta’ skadenza imminenti tal-miżuri eżistenti (7), fis-16 ta’ Ġunju 2006, il-Kummissjoni rċeviet talba għal verifika tal-miżuri skond l-Artikolu 11(2) tar-Regolament bażiku.

(6)

Din it-talba saret minn BIC S.A, produttur Komunitarju li jirrappreżenta aktar minn 80 % tal-produzzjoni Komunitarja totali ta’ lighters tal-but, tal-gass u ż-żnied, li ma jerġgħux jimtlew. It-talba għal reviżjoni ta’ l-iskadenza kienet ibbażata fuq ir-raġuni li l-iskadenza tal-miżuri x’aktarx tirriżulta fi tkomplija jew rikorrenza ta’ dumping u ħsara lill-industrija Komunitarja.

(7)

Meta ddeterminat, wara konsultazzjoni mal-Kumitat Konsultattiv, li kienet teżisti biżżejjed evidenza sabiex jingħata bidu ta’ reviżjoni ta’ skadenza skond l-Artikolu 11(2) tar-Regolament bażiku, il-Kummissjoni permezz ta’ avviż ippubblikat fil-Ġurnal Uffiċjali ta’ l-Unjoni Ewropea bdiet din ir-reviżjoni fis-16 ta’ Settembru 2006 (8).

(8)

L-investigazzjoni dwar il-kontinwazzjoni u/jew ir-rikorrenza ta’ dumping u dannu kopriet il-perjodu mill-1 ta’ Lulju 2005 sat-30 ta’ Ġunju 2006 (il-“perjodu tar-reviżjoni ta’ l-investigazzjoni” jew “PRI”). L-eżaminazzjoni tat-tendenzi relevanti għall-istima tal-possibbiltà ta’ kontinwazzjoni u/jew rikorrenza tad-dannu kopriet il-perjodu mill-1 ta’ Jannar 2003 sat-tmiem tal-PRI (“il-perjodu kkunsidrat”).

(9)

Il-Kummissjoni uffiċjalment avżat lill-produttur Komunitarju applikant, liż-żewġ produtturi Komunitarji l-oħra, l-esportaturi/produtturi fir-RPĊ u l-importaturi magħrufa li huma ikkonċernati, kif ukoll l-awtoritajiet fir-RPĊ u t-Tajwan bil-bidu tar-reviżjoni ta’ skadenza. Il-partijiet interessati ngħataw l-opportunità li jikkomunikaw il-fehmiet tagħhom bil-miktub u li jitolbu seduta fil-limitu taż-żmien stipulat fl-avviż ta’ ftuħ.

(10)

Il-produttur Komunitarju applikant, żewġ produtturi Komunitarji oħra li opponew iż-żamma tal-miżuri anti-dumping u assoċjazzjoni ta’ l-importaturi ppreżentaw l-opinjonijiet tagħhom. Il-partijiet interessati kollha li gћamlu din it-talba u li wrew li kien hemm raġunijiet partikolari għaliex kellhom jinstemgħu, ingћataw seduta.

(11)

Fl-avviż tal-bidu, il-Kummissjoni indikat li f’dan l-istħarriġ l-esportaturi/produtturi fir-RPĊ setgћu jintużaw bћala kampjun. Madankollu, minħabba li ebda wieħed mill-produtturi/esportaturi fir-RPĊ ma identifika ruħu, ġie deċiż li t-teħid tal-kampjuni ma kienx meħtieġ.

(12)

Intbagħtu kwestjonarji lill-produttur Komunitarju applikant, liż-żewġ produtturi Komunitarji l-oħra, it-62 produttur/esportatur fir-RPĊ u 33 importatur u lill-Assoċjazzjoni Ewropea ta’ l-Importaturi ta’ Oġġetti Ħfief (“ELIAS”). B’żieda ma’ dan, il-produttur tal-pajjiż analogu propost, il-Brażil, kif ukoll 8 produtturi f’pajjiżi analogi oħra possibbli, ġew ikkuntattjati u ntbagħtilhom kwestjonarju. Waslu biss tweġibiet mill-produttur Komunitarju applikant u l-produttur fil-Brażil, kif ukoll kumpanija fil-Malasja, li ġiet ikkuntattjata bħala pajjiż analogu alternattiv. Ebda wieħed mill-produttur/esportaturi magħrufa fir-RPĊ ma wieġeb il-kwestjonarju. Aktar minn hekk, ebda wieħed mill-importaturi kkuntattjati ma wieġbu fil-kwestjonarju li ma jimportawx il-prodott ikkonċernat, imma biss lighters elettroniċi (piezo).

(13)

Il-Kummissjoni fittxet u vverifikat it-tagħrif kollu li tqies neċessarju għall-investigazzjoni tagħha, u wettqet żjarat ta’ verifika fl-istabbilimenti tal-kumpanniji li ġejjin:

(14)

Il-prodott ikkonċernat huwa l-istess bħal fl-investigazzjoni li wasslet għall-impożizzjoni tal-miżuri eżistenti, i.e. lighters tal-but, tal-gass u ż-żnied, li ma jistgħux jerġgħu jimtlew. Kif deskritt fil-premessa (3), l-iskop tal-prodott ġie estiż fl-1999 sabiex jinkludi lighters tal-but, taż-żnied, li jistgħu jerġgħu jimtlew, li jinkorporaw korp f’forma ta’ kontenitur tal-plastik (“lighters taż-żnied” jew “il-prodott ikkonċernat”). Il-prodott ikkonċernat bħalissa huwa klassifikat fi ħdan il-kodiċijiet NM ex 9613 10 00 u ex 9613 20 90 (kodiċijiet TARIC 9613 10 00 11, 9613 10 00 19, 9613 20 90 21 u 9613 20 90 29).

(15)

Wieħed mill-produtturi fil-Komunità li ma lmentawx qal li l-prodott magħmul u mibjugħ fil-pajjiż analogu, il-Brażil, ma kienx bħall-prodott magħmul u esportat miċ-Ċina lejn il-Komunità. B’mod partikolari argumenta li l-lighters li jsiru fil-Brażil kienu ta’ kwalità għolja u kellhom ħajja itwal minn dawk taċ-Ċina. Id-differenzi fil-kwalità madankollu, m’humiex deċiżivi għad-determinazzjoni ta’ jekk il-prodotti humiex simili fi ħdan it-tifsira ta’ l-Artikolu 1(4) tar-Regolament bażiku. L-investigazzjoni żvelat li l-lighters magħmula fiċ-Ċina u dawk magħmula fil-Brażil fil-fatt kellhom l-istess karatteristiċi bażiċi tekniċi, fiżiċi u kimiċi u l-istess użu aħħari. Dan l-argument ġie għalhekk irrifjutat.

(16)

Konsegwentement, kif jidher fl-investigazzjonijiet preċedenti msemmija fil-premessi (1) sa (4), u kif ikkonfermat bl-investigazzjoni kurrenti lighters tal-but, tal-gass u ż-żnied, li ma jistgħux jerġgħu jimtlew, manifatturati minn produtturi esportaturi Ċiniżi u mibjugħa fir-RPĊ u fis-suq Komunitarju u l-prodott manifatturat u mibjugħ mill-applikant li huwa produttur Komunitarju fis-suq Komunitarju huma l-istess fl-aspetti kollha u għandhom l-istess karatteristiċi fiżiċi u tekniċi u m’hemmx differenza fl-użu. L-istess jgħodd għal dawk prodotti u mibjugħa fil-Brażil. Dawn il-prodotti huma għalhekk simili fis-sens ta’ l-Artikolu 1(4) tar-Regolament bażiku.

(17)

Bħal fl-investigazzjonijiet preċedenti tar-reviżjoni, il-produtturi esportaturi Ċiniżi ma kkoperawx. Għalhekk, ma seta’ jinġabar l-ebda tagħrif disponibbli dwar l-importazzjonijiet tal-prodott ikkonċernat fil-Komunità matul il-PRI direttament mill-produtturi esportaturi. F’dawn iċ-ċirkostanzi, u skond l-Artikolu 18 tar-Regolament bażiku, il-Kummissjoni rrikkorriet għall-fatti disponibbli, i.e. l-Eurostat, it-talba għall-bidu ta’ reviżjoni u d-data ppubblikata mill-Uffiċċju Ewropew kontra l-Frodi (l-“OLAF”) fit-30 ta’ Jannar 2007 (OLAF/07/01) rigward skartar tad-dazju anti-dumping fis-seħħ.

(18)

Il-miżuri eżistenti jipprovdu għal dazju wieħed għal madwar il-pajjiż kollu fuq l-importazzjoni kollha fil-Komunità tal-prodott ikkonċernat li joriġina mir-RPĊ. Skond l-Artikolu 11(9) tar-Regolament bażiku, il-Kummissjoni użat l-istess metodoloġija bħalma ntużat fl-investigazzjoni oriġinali. Għalhekk, valur normali kien iddeterminat fuq il-bażi ta’ l-informazzjoni miksuba fl-ekonomija tas-suq ta’ pajjiż terz (“il-pajjiż analogu”).

(19)

It-Tajlandja serviet bħala pajjiż analogu fl-investigazzjoni oriġinali. Madankollu, fir-reviżjonijiet sussegwenti, il-Filippini ntuża bħala l-pajjiż analogu minħabba li l-produtturi tat-Tajlandja rrifjutaw li jikkoperaw u minħabba li l-Filippini nstab li huwa għażla adattata ta’ pajjiż analogu, fid-dawl, inter alia, tad-daqs u l-ftuħ tas-suq domestiku.

(20)

Fin-notifika tal-bidu ta’ l-investigazzjoni preżenti l-Kummissjoni indikat l-intenzjoni tagħha li tuża l-Brażil bħala pajjiż analogu adattat għall-iskop li tistabbilixxi valur normali għar-RPĊ. Il-Brażil kien ikkunsidrat għażla adattata ta’ pajjiż analogu, fid-dawl tad-daqs u l-ftuħ tas-suq domestiku tiegħu u l-fatt li produttur wieħed Brażiljan qabel li jikkopera b’mod sħiħ fl-investigazzjoni. Il-partijiet interessati kienu mistiedna jikkummentaw dwar dan.

(21)

Assoċjazzjoni waħda ta’ l-importaturi opponiet l-għażla tal-Brażil u argumentat li kien hemm biss produttur wieħed fil-Brażil u l-prezzijiet domestiċi kienu ferm għoljin. Wieħed mill-produtturi Komunitarji li ma lmentax qal li l-livell ta’ kompetizzjoni fil-Brażil kien aktar baxx minn dak fis-suq domestiku Ċiniż u għalhekk is-swieq ma kinux kumparabbli. Madankollu, filwaqt li n-numru ta’ produtturi fil-Brażil kien aktar baxx min-numru allegat ta’ produtturi fiċ-Ċina, l-investigazzjoni kkonfermat li kien hemm żewġ produtturi tal-prodott ikkonċernat fil-Brażil kif ukoll importazzjonijiet mill-UE u mir-RPĊ. Rigward lighters impurtati mir-RPĊ, l-invojsis miksuba matul l-investigazzjoni fil-post fil-Brażil urew li dawn daħlu fil-pajjiż bi prezz verament baxx, għalhekk kienu qed jagħmlu pressjoni ta’ tbaxxija tal-prezzijiet fuq is-suq Brażiljan. Aktar minn hekk, ebda wieħed mill-produtturi magħrufa kkuntattjati f’pajjiżi analogi oħra possibbli, inkluż il-Filippini, ma qablu li jikkoperaw. Kumpanija fil-Malasja wieġbet il-kwestjonarju għall-produtturi fil-pajjiż analogu, imma minħabba li deher li din il-kumpanija ma pproduċietx il-lighters hi nfisha, il-Malasja ma setgħetx titqies bħala pajjiż analogu.

(22)

Minћabba dan ta’ hawn fuq, ġie konkluż skond l-Artikolu 2(7) tar-Regolament bażiku li l-Brażil huwa l-iktar pajjiż analogu xieraq u raġonevoli.

(23)

Skond l-Artikolu 2(7)(a) tar-Regolament bażiku, il-valur normali ġie stabbilit fuq il-bażi ta’ l-informazzjoni vverifikata li ġiet ipprovduta mill-produttur fil-pajjiż analogu.

(24)

Il-Kummissjoni l-ewwel stabbiliet li l-bejgħ domestiku totali tal-produttur Brażiljan sar fi kwantitajiet suffiċjenti u għalhekk kien ikkunsidrat rappreżentattiv fis-sens ta’ l-Artikolu 2(2) tar-Regolament bażiku.

(25)

Wara eżaminat jekk kull tip tal-prodott ikkonċernat li nbiegћ fi kwantitajiet rappreżentattivi fis-suq domestiku tal-pajjiż analogu setax jitqies li kien qed jinbiegћ waqt l-andament ordinarju tal-kummerċ skond l-Artikolu 2(4) tar-Regolament bażiku. Il-volum tal-bejgħ mibjugħ bi prezz tal-bejgħ nett daqs jew ogħla mill-prezz ikkalkolat tal-produzzjoni rrappreżenta 80 % jew iżjed tal-volum tal-bejgħ totali u l-prezz medju bil-piż differenzjat ta’ dak it-tip kien ‘il fuq mill-ispiża tal-produzzzjoni. Dan il-prezz kien għalhekk ikkalkolat bħala l-medja bil-piż differenzjat tal-prezzijiet tal-bejgħ domestiku kollu ta’ dak it-tip li sar matul il-PRI, rrispettivament minn jekk dan il-bejgħ kienx profitabbli jew le.

(26)

Għalhekk il-valur normali kien determinat, skond l-Artikolu 2(1) tar-Regolament bażiku, fuq il-bażi tal-prezz imħallas jew pagabbli, fil-kors ordinarju tan-negozju, minn klijenti domestiċi indipendenti tal-pajjiż analogu.

(27)

Minħabba li ebda wieħed mill-produtturi Ċiniżi ma kkopera, il-prezz ta’ l-esportazzjoni tal-prodott ikkonċernat kien ikkalkolat fuq il-bażi tal-fatti disponibbli skond l-Artikolu 18(1) tar-Regolament bażiku, f’dan il-każ id-data ta’ l-Eurostat.

(28)

Sabiex jiġi żgurat paragun ġust bejn il-valur normali u l-prezz ta’ l-esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-komparabilità tal-prezzijiet skond l-Artikolu 2(10) tar-Regolament bażiku. Ingћataw aġġustamenti xierqa għat-trasport, l-assigurazzjoni, u l-ispejjeż tal-kreditu fil-każijiet kollha fejn instab li kienu raġonevoli, eżatti u appoġġati b’evidenza vverifikata.

(29)

Wieħed mill-produtturi Komunitarji li ma ilmentax qal li l-lighters fil-Brażil kienu magħmula bi spejjeż ogħla minħabba l-istandards ta’ kwalità ogħla, iżda ma ppreżenta ebda prova li tikkwantifika jew tappoġġa din l-istqarrija. Minħabba li l-produtturi esportaturi Ċiniżi ma kkoperawx, din l-investigazzjoni ma żvelat ebda indikazzjoni li tippermetti l-aġġustar tal-valuri normali fuq il-bażi tad-differenzi allegati tal-kwalità. Dan l-argument ġie għalhekk irrifjutat.

(30)

Skond l-Artikolu 2(11) tar-Regolament bażiku, il-valur medju normali mwieżen li kien stabbilit għall-pajjiż analogu kien ipparagunat mal-prezz medju bil-piż differenzjat ta’ l-esportazzjoni fuq il-bażi tal-prezz barra l-fabbrika. Dan il-paragun wera l-eżistenza ta’ dumping sinifikanti, il-marġini ta’ dumping ammonta għal aktar minn 150 %.

(31)

Ta’ min ifakkar li l-miżuri ilhom fis-seħħ mill-1991. Madankollu, hemm rekord twil ta’ evażjoni tal-miżuri. Fl-1999 instabu żewġ tipi ta’ evażjoni tal-miżuri: trasbordjar mit-Tajwan u l-iffittjar ta’ valvi foloz fil-lighters sabiex jidhru li jistgħu jimtlew u għalhekk jevitaw id-dazju anti-dumping. Konsegwentement, kif iddikjarat fil-premessa (2), il-miżuri ġew estiżi fl-1999 sabiex jikkumbattu dawn il-prattiċi. Fl-2001, reviżjoni ta’ skadenza tal-miżuri fis-seħħ uriet li l-miżuri għandhom jiġu estiżi għal perjodu ieħor ta’ ħames snin minħabba l-probabbiltà ta’ tkomplija jew rikorrenza ta’ dumping u ħsara.

(32)

Il-volumi ta’ importazzjoni tal-prodott ikkonċernat mir-RPĊ u t-Tajwan fil-PRI ammontaw għal 11.7 miljun biċċa skond l-Eurostat. Fir-realtà, madankollu, l-importazzjonijiet fil-Komunità huma ferm ogħla minħabba li, kif ikkonfermat mill-OLAF, hemm skartar massiv tal-lighters Ċiniżi permezz tal-Malasja u l-Indonesja. Skond id-data ppubblikata mill-OLAF f’Jannar 2007 aktar minn 300 miljun lighter taż-żnied li oriġinaw fiċ-Ċina ġew mibgħuta mill-Malasja matul l-aħħar erba’ snin. L-uniku skop ta’ dan it-trasbordjar kien sabiex jaħbi l-oriġini vera Ċiniża ta’ l-oġġetti u hekk jiġi evitat il-ħlas tad-dazji anti-dumping.

(33)

L-investigazzjoni OLAF sabet ukoll li ammont kbir ta’ lighters importati mill-Indoneżja, fil-fatt ma oriġinawx f’dak il-pajjiż. L-investigazzjoni fl-oriġini vera qed tkompli. L-applikant qed jippjana li jressaq każ ta’ evażjoni kontra sitt pajjiżi fil-Lvant Imbiegħed.

(34)

Barra l-evażjoni permezz tat-trasbord, kif ippruvat mill-OLAF, l-applikant, fit-talba tiegħu għal reviżjoni, ipprovda prova ta’ dikjarazzjoni skorretta tal-lighters taż-żnied (il-prodott ikkonċernat) bħala dak hekk imsejjaħ lighters elettroniċi (piezo) (mhux il-prodott ikkonċernat) sabiex jiġi evitat il-ħlas tad-dazju anti-dumping.

(35)

L-assoċjazzjoni ta’ l-importaturi ELIAS u importatur wieħed qalu li l-Kummissjoni qed tasal għal konklużjonijiet definittivi mill-investigazzjoni kurrenti ta’ l-OLAF u qalu li ma kinux f’pożizzjoni li jeżerċitaw b’mod validu d-dritt tagħhom tad-difiża u jikkummentaw dwar il-konklużjonijiet li għalihom waslet il-Kummissjoni minn dawn l-iskoperti kunfidenzjali.

(36)

F’dan ir-rigward, għandu jiġi nnutat li l-Kummissjoni użat biss informazzjoni ppubblikata li għandhom aċċess għaliha l-partijiet kollha, u li huma riżultati li jistgħu jiġu spjgeati u setgħu ġew injorati fil-kuntest ta’ dan il-proċediment.

(37)

Minħabba n-nuqqas ta’ koperazzjoni mill-produtturi esportaturi Ċiniżi fl-investigazzjonijiet ta’ reviżjoni preżenti u fil-passat, m’hemmx data vverifikata dwar il-kapaċità u l-użu tal-kapaċità. Skond l-estimi ta’ l-applikant il-kapaċità totali tal-produzzjoni fir-RPĊ tammonta għal madwar 3.9 biljun lighter fis-sena, il-maġġoranza tagħhom huma probabbilment lighters taż-żnied. Dawn l-estimi huwa skond id-data mogħtija mill-manifatturi ħfief Ċiniżi fil-websajts tagħhom. Per eżempju, produttur wieħed Ċiniż, Zhuoye Lighter Manufacturing Co Ltd, fil-websajt tiegħu jgħid li l-produzzjoni fit-tliet fabbriki tammonta għal 700 miljun lighter fis-sena. Il-produttur ikkonċernat madankollu, ma speċifikax it-tqassim bejn il-prodott ikkonċernat u tipi oħra ta’ lighters. Skond l-applikant, madankollu, l-produzzjoni tista’ tinqaleb faċilment bejn lighters taż-żnied u lighters elettroniċi (piezo).

(38)

Fuq il-bażi ta’ dan t’hawn fuq jista’ jiġi konkluż li, fid-dawl tal-kapaċità kbira disponibbli fir-RPĊ u l-flessibbiltà apparenti fil-proċessi ta’ produzzjoni, li jagħmilha faċli li taqleb bejn tipi differenti ta’ lighters, hemm probabbiltà qawwija ta’ żieda fl-importazzjonijiet fil-Komunità jekk il-miżuri jitħallew jiskadu. Il-prattiċi ta’ evażjoni li hemm provi tagħhom juru wkoll li l-esportaturi Ċiniżi għandhom interess qawwi fis-suq Komunitarju.

(39)

Minħabba li ebda wieħed mill-produtturi esportaturi Ċiniżi ma kkopera, m’hemmx informazzjoni vverifikata rigward l-esportazzjonijiet ta’ lighters taż-żnied lil pajjiżi terzi. Aktar minn hekk minħabba li l-istatistiċi disponibbli tal-pajjiżi terzi ma jiddistingwux bejn lighters (piezo) elettroniċi u taż-żnied, m’hu possibbli li jsir ebda paragun bejn il-prezzijiet ta’ esportazzjoni lejn il-Komunità u prezzijiet ta’ esportazzjoni lil pajjiżi terzi oħra.

(40)

L-industrija Komunitarja wriet li qed tikkompeti b’suċċess ma’ l-importazzjonijiet Ċiniżi fis-suq ta’ l-Istati Uniti fejn iċ-Ċiniżi tilfu s-sehem mis-suq. Dan jissuġġerixxi li jkun hemm inċentiv ċar għall-produtturi Ċiniżi li jaqilbu l-esportazzjonijiet lis-suq Komunitarju jekk il-miżuri jitħallew jiskadu.

(41)

L-importaturi rrifjutaw il-konklużjonijiet t’hawn fuq għax qalu li l-imġiba ta’ l-industrija Komunitarja fis-suq ta’ l-Istati Uniti tista’ ma tkunx minħabba l-kompetittività tagħha imma minħabba deċiżjoni tan-negozju li tittrasferixxi l-profitti mill-Komunità lejn l-Istati Uniti ta’ l-Amerika. L-importaturi qalu wkoll li fuq il-bażi ta’ marġini ogħla ta’ profitt fl-Istati Uniti ta’ l-Amerika, il-produtturi esportaturi Ċiniżi ma jkollhomx inċentiv li jaqilbu l-esportazzjonijiet lejn is-suq Komunitarju.

(42)

L-importaturi ma ppreżentaw ebda prova jew raġunament ieħor la fir-rigward tat-trasferimenti allegati fil-profitti ta’ l-industrija Komunitarja lejn l-Istati Uniti ta’ l-Amerika, u lanqas l-allegat marġini ogħla ta’ profitt tal-produtturi esportaturi Ċiniżi fis-suq ta’ l-Istati Uniti. Dawn l-istqarrijiet lanqas ma kienu ikkonfermati mill-informazzjoni vverifikata disponibbli fil-fajl ta’ l-investigazzjoni. Kienu purament spekulattivi u għalhekk ġew irrifjutati.

(43)

Għandu jiġi nnutat li l-livell ta’ kompetizzjoni fis-suq ta’ l-Istati Uniti ma jistax jiġi meqjus bħala l-unika raġuni sabiex wieħed jikkonkludi li l-industrija Komunitarja għandha tkun qed tikseb anqas profitt. Elementi oħrajn, bħal aspettattivi tal-klijenti u l-livelli tal-prezzijiet għandu jittieħed kont tagħhom.

(44)

Addizzjonalment, l-importaturi qalu li s-swieq tal-Komunità u ta’ l-Istati Uniti huma simili fis-sens li jridu jiġu osservati l-istess kundizzjonijiet ta’ sigurtà fiż-żewġ swieq; instab li kundizzjonijiet aktar stretti instabu fis-seħħ fl-Istati Uniti mill-1994 fir-rigward tas-sigurtà tat-tfal; filwaqt li normi simili ġew introdotti biss fil-Komunità f’Marzu 2007.

(45)

L-investigazzjoni wriet li, filwaqt li l-volumi ta’ importazzjoni tal-prodott ikkonċernat fil-PRI kienu relattivament baxxi, il-livell tad-dumping misjub għal dawn l-importazzjonijiet kien sinifikanti.

(46)

Fid-dawl tal-kapaċità kbira disponibbli fir-RPĊ u l-attraenza apparenti tas-suq Komunitarju għall-produtturi esportaturi Ċiniżi, kif muri bil-prattiċi estensivi ta’ evażjoni, jista’ jiġi konkluż li hemm probabbiltà qawwija li l-volumi ta’ importazzjonijiet dumped fil-Komunità jilħqu livelli sostanzjali jekk il-miżuri eżistenti jitħallew jiskadu.

(47)

Fil-Komunità, il-prodott simili huwa manifatturat minn 3 produtturi li jikkostitwixxu l-produzzjoni Komunitarja totali skond it-tifsira ta’ l-Artikolu 4(1) tar-Regolament bażiku.

(48)

Għandu jiġi nnutat li kif kumparat ma’ l-investigazzjoni oriġinali kuntrarju għall-Match u Flamangas Żvediżi, il-produzzjoni ta’ min ressaq l-ilment xorta għadha bbażata fl-UE (Franza u Spanja).

(49)

Il-produttur Komunitarju applikant, BIC SA, jirrappreżenta madwar 80 % tal-produzzjoni Komunitarja ta’ lighters li ma jistgħux jerġgħu jimtlew u għalhekk jikkostitwixxi l-industrija Komunitarja fis-sens ta’ l-Artikolu 4(1) u l-Artikolu 5(4) tar-Regolament bażiku. Il-produtturi Komunitarji l-oħra ma kinux meqjusa li jifformaw parti mill-industrija Komunitarja minħabba li ma kkoperawx għal kollox iżda ppreżentaw biss ċertu informazzjoni relatata ma’ l-impatt tal-miżuri fuq l-attivitajiet tagħhom.

(50)

Għar-raġunijiet spjegati fil-premessa (16) hawn fuq, l-analiżi fir-rigward tas-sitwazzjoni fis-suq Komunitarju kienet bbażata fuq data kollettiva relatata ma’ lighters tal-gass, lighters tal-gass u ż-żnied li ma jistgħux jerġgħu jimtlew, lighters tal-gass li jimtlew (“lighters taż-żnied” jew “il-prodott ikkonċernat”).

(51)

Aktar minn hekk, kif imsemmi hawn fuq, ma kienx possibbli li tinkiseb data fir-rigward ta’ l-attivitajiet taż-żewġ produtturi Komunitarji li għandhom faċilitajiet ta’ manifattura fis-suq Komunitarju. Konsegwentement, il-Kummissjoni użat il-fatti disponibbli, skond l-Artikolu 18 tar-Regolament bażiku, fejn aktar informazzjoni preċiża ma kinitx disponibbli mill-partijiet interessati l-oħra.

(52)

Minħabba l-fatt li d-data rigward il-bejgħ u l-produzzjoni kienet disponibbli minn parti interessata, l-applikant, huwa meqjus xieraq li ma jinkixfux ċifri assoluti. Għalhekk inbidlu bis-simbolu “—” u ġew ipprovduti indiċijiet.

(53)

Il-konsum Komunitarju apparenti tal-lighters taż-żnied ġie evalwat fuq il-bażi tal-volum tal-bejgħ fil-Komunità kif ipprovdut mill-industrija Komunitarja, u importazzjonijiet minn pajjiżi mhux ta’ l-UE kif rapportat mill-Eurostat. Dawn il-figuri ma jinkludux il-bejgħ ta’ produtturi tal-KE li ma kkoperawx.

Tabella 1 –   Il-konsum Komunitarju tal-lighters taż-żnied (000)

(54)

Il-konsum Komunitarju apparenti żdied b’37 % bejn l-2003 u l-PRI.

(55)

Matul il-perjodu kkunsidrat, il-volum ta’ importazzjoni tal-lighters taż-żnied miċ-Ċina u t-Tajwan għalkemm baqa’ f’livelli baxxi żdied b’136 % bejn l-2003 u l-PRI u laħaq aktar minn 11-il miljun unità matul il-PI. Dan issarraf f’sehem mis-suq ta’ 1.6 %. Is-sehem tas-suq żdied minn 0,9 % fl-2003 għal 1,6 % matul il-PRI.

Tabella 2 –   Importazzjonijiet tal-lighters taż-żnied miċ-Ċina u t-Tajwan u sehem tas-suq (000)

(56)

L-importazzjonijiet minn pajjiżi oħra żdiedu minn madwar 276 miljun għal madwar 487 miljun biċċa. Għandu jiġi nnutat madankollu li hemm indikazzjoni li parti sostanzjali minn dawn l-importazzjonijiet, fil-fatt, joriġinaw mir-RPĊ u t-Tajwan.

Tabella 3 –   Importazzjonijiet tal-lighters taż-żnied minn pajjiżi oħra u sehem mis-suq (000)

(57)

Kif imsemmi hawn fuq fil-premessa (12), fin-nuqqas ta’ koperazzjoni mill-produtturi esportaturi Ċiniżi, ebda informazzjoni vverifikata ma kienet disponibbli fir-rigward tal-livelli tal-prezzijiet ta’ l-importazzjoni tal-lighters taż-żnied. Evidenza ta’ skartar permezz ta’ l-Indonesja u l-Malasja instabet riċentement mill-OLAF u hemm xi evidenza ta’ skartar minn għadd ta’ pajjiżi oħra Asjatiċi (Laos, it-Tajlandja, il-Vjetnam u l-Filippini). Jidher li l-fabbriki ta’ l-assemblaġġ li jippermettu l-miżuri ta’ skartar jistgħu jitwaqqfu fl-Asja tal-Lvant fi żmien ftit ġimgħat. L-iskartar b’suċċess tal-miżuri jista’ jispjega għaliex l-ebda wieħed mill-esportaturi Ċiniżi ma kkopera fil-proċedimenti preżenti.

(58)

Għalhekk ma seta’ jkun hemm l-ebda konklużjoni definittiva fir-rigward ta’ l-evoluzzjoni tal-prezz u l-aġir tal-prezz ta’ l-importazzjonijiet tal-prodott ikkonċernat.

(59)

Skond l-Artikolu 3(5) tar-Regolament bażiku, il-Kummissjoni eżaminat il-fatturi u l-indikaturi ekonomiċi kollha rilevanti li għandhom piż fuq l-istat ta’ l-industrija Komunitarja.

(60)

Il-produzzjoni totali tal-lighters taż-żnied mill-industrija Komunitarja żdied b’rata stabbli matul il-perjodu kkunsidrat, i.e. bi 22 %.

Tabella 4 –   Volum ta’ produzzjoni

(61)

Hekk kif żdiedet il-produzzjoni b’rata ogħla miż-żieda fil-kapaċità tal-produzzjoni, l-użu tal-kapaċità żdied ukoll matul il-perjodu kkunsidrat. Kollox ma’ kollox, ir-rata ta’ utilizzazzjoni tal-kapaċità segwiet xejriet simili għal dawk ta’ produzzjoni b’żidiet bejn l-2003 u l-PRI bi 3 punti perċentwali.

Tabella 5 –   Kapaċità ta’ produzzjoni u utilizzazzjoni tal-kapaċità

(62)

Il-ħażniet baqgħu stabbli matul il-perjodu kkunsidrat. Il-quċċata osservata fil-PRI hija dovuta għal ħażna intenzjonata fid-dawl tat-twaqqif tal-produzzjoni matul il-perjodu tas-sajf u għandha tiġi normalizzata wara dak il-perjodu. Dan il-fattur ma kienx għalhekk ikkunsidrat sinifikanti fid-determinazzjoni ta’ l-istampa tad-dannu.

Tabella 6 –   Volum ta’ ħażniet

(63)

Il-volumi tal-bejgħ mill-industrija Komunitarja fis-suq Komunitarju bejn l-2003 u l-PRI naqas b’5 %, mingħajr, madankollu, ma jlaħħaq ma’ l-espansjoni tal-konsum Komunitarju, li żdied sostanzjalment, jiġifieri b’37 % matul l-istess perjodu. Din iż-żieda fil-konsum tfisser li t-tnaqqis ġenerali tas-sehem tas-suq ta’ l-industrija Komunitarja hija aktar minn 14-il punt perċentwali (“pp”) matul il-perjodu kkunsidrat.

(64)

F’dak li għandu x’jaqsam mal-prezzijiet tal-bejgħ bl-unità, dawn naqsu ftit bejn l-2003 u l-PRI bi tnaqqis ta’ 2 % bejn l-2005 u l-PRI.

Tabella 7 –   Volum tal-bejgħ, prezzijiet u sehem mis-suq

(65)

Matul il-perjodu kkunsidrat, l-impjegar żdied b’5 %, i.e. b’pass anqas mill-produzzjoni fil-volum, li rriżultat b’żieda sinifikanti ta’ produttività (15 %). Għandu jiġi nnutat li ż-żieda fl-impjiegi kienet ir-riżultat ta’ personell ġdid li qed jiġi mħarreġ, sabiex jissostitwixxi personell li se jirtira.

(66)

Fil-fatt, matul il-perjodu kkunsidrat l-ispejjeż tax-xogħol ta’ l-industrija Komunitarja (+ 7 %) żdiedu bi ftit biss. B’konsegwenza ta’ dan, parti mill-ispejjeż tax-xogħol fl-ispiża totali tal-produzzjoni baqgħet stabbli.

Tabella 8 –   Impjiegi, produttività u pagi

(67)

Il-profitabbilità naqset b’4.6 punti perċentwali.

Tabella 9 –   Profittabilitá

(68)

L-investimenti żdiedu b’mod sinifikanti bejn l-2003 u l-PRI i.e. b’60 %, u imbagħad żdiedu fl-2005, b’madwar 65 %, li kien dovut minħabba l-iżvilupp ta’ unitajiet ġodda tal-produzzjoni mill-industrija Komunitarja. Dawn l-investimenti huma relatati prinċipalment mar-riorganizzazzjoni tal-produzzjoni mill-2005 sabiex jinbdew mill-ġdid il-kapaċitajiet tal-produzzjoni. Din iż-żieda, li saret b’żieda limitata fil-forza tax-xogħol, ippermettiet lill-kumpanija li żżid il-produttività tagħha f’termini ta’ produzzjoni għal kull impjegat.

Tabella 10 –   Investimenti

(69)

L-industrija Komunitarja ma nstabitx li kienet għaddejja minn diffikultajiet sabiex tgħaqqad il-kapital matul il-perjodu meqjus.

(70)

Il-likwidità naqset b’mod sinifikanti matul il-perjodu kkunsidrat (– 50 %). Din ix-xejra negattiva tindika li l-industrija qiegħda taħt pressjoni. Dan l-iżvilupp jimxi ma’ l-iżvilupp tal-profitabbiltà globali matul il-perjodu meqjus. Ta’ min jinnota li matul il-PRI, il-likwidità rrappreżentat biss madwar 1 % tal-bejgħ totali li sar fil-Komunità li ma jistax jitqies eċċessiv.

Tabella 11 –   Likwidità

(71)

Bejn l-2003 u l-PRI, il-konsum Komunitarju żdied b’37 %, filwaqt li l-volum tal-bejgħ ta’ l-industrija Komunitarja fis-suq Komunitarju naqas b’7 %. L-industrija Komunitarja tilfet madwar 14.7 punti perċentwali tas-sehem mis-suq, filwaqt li importazzjonijiet li joriġinaw fil-Lvant Imbiegħed żiedu tagħhom.

(72)

Fis-snin riċenti, għalkemm huwa veru li s-sehem mis-suq bejn il-lighters taż-żnied u elettroniċi (piezo) kien ikkaratterizzat minn bidla minn Żnied għal Elettronika, l-investigazzjoni wriet li s-suq għal-lighters taż-żnied qed jikber. L-investigazzjoni wriet li l-lighters taż-żnied għadhom jirrappreżentaw madwar 70 % tas-suq Komunitarju u qed ikompli jikber, minħabba ż-żieda ġenerali fil-konsum Komunitarju. Madankollu, l-industrija Komunitarja ma kinitx kapaċi tibbenefika mit-tkabbir fis-suq, kif ġie żvelat mit-telf tagħha ta’ sehem mis-suq.

(73)

L-analiżi fir-rigward tal-kobor tad-dumping trid tqis il-fatt li hemm miżuri fis-seħħ sabiex jiġi eliminat id-dumping li jagħmel ħsara. Kif ġie ddeterminat hawn fuq fil-premessa (32), it-tagħrif disponibbli jindika li l-produtturi esportaturi Ċiniżi jkomplu jbigħu lill-Komunità bi prezzijiet iddampjati. Skond l-Artikolu 2(11) tar-Regolament bażiku, il-valur medju normali mwieżen stabbilit għall-pajjiż analogu kien ipparagunat mal-prezz medju bil-piż differenzjat ta’ l-esportazzjoni. Dan il-paragun wera l-eżistenza ta’ dumping sinifikanti, il-marġini ta’ dumping ammonta għal aktar minn 150 %.

(74)

Fid-dawl ta’ dan t’hawn fuq, i.e. il-marġini għoli ta’ dumping, il-kapaċità kbira disponibbli fiċ-Ċina u l-prattiċi ta’ skartar, kif muri mill-OLAF u min ressaq l-ilment, jista’ jiġi konkluż li l-importazzjonijiet dumped miċ-Ċina x’aktarx li jiżdiedu b’mod konsiderevoli jekk il-miżuri jitħallew jiskadu.

(75)

Il-qagħda ta’ l-industrija Komunitarja ma tjibitx matul il-perjodu meqjus, minn mindu saret l-estensjoni tal-miżuri fl-2001 permezz tar-reviżjoni ta’ l-iskadenza preċedenti. Filwaqt li tinnota li l-Industrija Komunitarja kienet qed tagħmel profitt matul il-perjodu kkunsidrat, il-profitti komplew jonqsu matul il-perjodu. Bl-istess mod, filwaqt li l-industrija żammet livell aktarx għoli tas-sehem mis-suq, dan kien qed jonqos il-ħin kollu matul il-perjodu kkunsidrat. Madankollu, il-pressjoni mill-importazzjonijiet Ċiniżi baqgħet (minħabba l-iskartar) u l-indikaturi stabbiliti hawn fuq juru wkoll li l-industrija Komunitarja għadha fraġli u vulnerabbli.

(76)

L-investigazzjoni wriet illi l-attivitá ta’ l-esportazzjoni ta’ l-industrija Komunitarja żviluppat kif ġej:

Tabella 12 –   L-esportazzjoni ta’ l-industrija Komunitarja

(77)

Il-kwantitajiet esportati mill-industrija Komunitarja żdiedu b’mod sinifikanti mill-2003 sal-PRI. Din ix-xejra pożittiva ġenerali kienet konkomitanti ma’ żieda żgħira fil-prezzijiet medji, spjegati b’pożizzjoni kompetittiva aħjar fi swieq ta’ pajjiżi terzi bħall-Istati Uniti.

(78)

L-istess volumi naqsu b’5 % bejn l-2003 u l-PRI li ssarraf f’telf ta’ sehem mis-suq minn 47.7 % fl-2003 għal 33 % fil-PRI. Il-prezzijiet ta’ l-unità naqsu bi ftit mill-2003 sal-PRI, i.e. bi 3 %, għalkemm il-prezzijiet tal-materja prima żdiedu. Il-profitabbilità ta’ l-industrija Komunitarja naqset matul il-PRI. Il-produzzjoni, il-kapaċità tal-produzzjoni u r-rata ta’ l-użu tal-kapaċità żdiedu, li madankollu hija dovuta għal żieda fl-attivitajiet ta’ esportazzjoni ta’ l-industrija Komunitarja. Storikament, is-settur dejjem wera livell għoli ta’ profittabbiltà li huma meħtieġa għall-investiment neċessarju għall-addattar tal-produzzjoni għal kundizzjonijiet ġodda tas-sigurtà u għat-titjib tal-kompetittività ġenerali tal-kumpanija. Għandu jiġi nnutat li l-marġini tad-dannu kkalkolat għall-PRI kien aktar minn 60 %. L-importazzjonijiet mir-RPĊ u t-Tajwan kienu anqas mill-prezzijiet ta’ l-Industrija Komunitarja b’medja ta’ 39 %.

(79)

L-investimenti annwali fil-prodott simili żviluppaw b’mod pożittiv matul il-perjodu kkunsidrat i.e. żdiedu b’60 %. Dawn l-investimenti huma relatati prinċipalment ma’ l-organizzazzjoni mill-ġdid tal-produzzjoni mill-2005 sabiex jinbdew mill-ġdid il-kapaċitajiet tal-produzzjoni. L-impjiegi żdiedu b’5 %. Il-likwidità żdiedet bl-istess xejra bħall-profitt matul il-PRI u naqset b’50 %.

(80)

Il-premessi (69) u (70) hawn fuq juru li l-fatturi ewlenin tad-dannu (prezzijiet tal-bejgħ, volum tal-bejgħ, sehem mis-suq u profittabbiltà) naqsu matul il-perjodu kkunsidrat u li l-industrija Komunitarja xorta sofriet dannu minkejja l-miżuri fis-seħħ. Id-dannu prinċipalment jissarraf f’telf mis-sehem tas-suq minkejja żieda fil-konsum, imma wkoll fi tnaqqis fil-profittabbiltà minħabba l-pressjoni fuq il-prezz minħabba l-importazzjonijiet mir-RPĊ u t-Tajwan. Għalhekk, iż-żieda fl-ispejjeż tal-materja prima ma setgħetx twassal għal prezzijiet tal-bejgħ ogħla.

(81)

Storikament, is-settur dejjem wera livell għoli ta’ profittabbiltà. Fl-investigazzjoni orġinali, bil-għan li jkun stabbilit il-livell ta’ ħsara, kien ikkunsidrat li kull miżura għandha tippermetti lill-industrija Komunitarja li tkopri l-ispejjeż tal-produzzjoni u tikseb qligħ raġonevoli, jiġifieri ta’ 15 % tal-valur tal-bejgħ. Dan il-perċentwali huwa meħtieġ għall-investiment neċessarju għall-addattar tal-produzzjoni għal kundizzjonijiet ġodda tas-sigurtà u għat-titjib tal-kompetittività ġenerali tal-kumpanija.

(82)

Ix-xejra kemmxejn negattiva ta’ l-Industrija Komunitarja, minkejja l-miżuri fis-seħħ, tista’ tiġi spjegata minn grad għoli ta’ skartar li jikkaratterizza s-settur, kif instab mill-OLAF.

(83)

L-importaturi kkuntestaw il-konklużjonijiet tal-Kummissjoni rigward is-sitwazzjoni ekonomika ta’ l-industrija Komunitarja. Il-figuri ppreżentati sabiex jissostanzjaw l-istqarrija tagħhom madankollu ma kinux relatati mas-sitwazzjoni ta’ l-industrija Komunitarja fl-Ewropa fir-rigward ta’ lighters tal-but, taż-żnied, li jistgħu jerġgħu jimtlew, iżda ma’ attivitajiet dinjija tal-produtturi Komunitarji fir-rigward tal-qasam kollu tal-lighters. Dan it-tagħrif kien irrelevanti għad-determinazzjoni ta’ l-istat ta’ l-industrija Komunitarja u l-argument kellu għalhekk jiġi rrifjutat.

(84)

L-importaturi qalu li l-produttur Komunitarju kien qaleb parti sinifikanti tal-produzzjoni Komunitarja minn lighters taż-żnied għal dawk tal-piezo. B’konsegwenza ta’ dan, is-sehem mis-suq għal-lighters taż-żnied wera xejra ta’ tnaqqis. L-investigazzjoni żvelat li din id-dikjarazzjoni hija inkorretta. Fil-fatt, is-suq Komunitarju ġenerali tal-lighters kien qed jiżdied matul l-aħħar snin u s-sehem tal-lighters taż-żnied kien qed jonqos bi ftit imma baqa’ fil-livell ta’ 70 % fl-2006. Fid-dawl ta’ dan, għandu jiġi mfakkar li l-konsum tas-suq taż-żnied żdied matul il-perjodu kkunidrat u li s-sehem tal-lighters taż-żnied mibjugħa mill-industrija Komunitarja naqas matul il-perjodu kkunsidrat. L-argumenti mressqa ġew għalhekk irrifjutati.

(85)

L-importaturi argumentaw li l-produttur Komunitarju għandu monopolju fil-Komunità u l-miżuri anti-dumping jkomplu jsaħħu aktar il-pożizzjoni tiegħu. Din id-dikjarazzjoni mhix korretta minħabba li hemm volumi ta’ importazzjoni sinifikanti li qed jidħlu fis-suq Komunitarju minn pajjiżi terzi. Aktar minn hekk, il-produttur Komunitarju kien qed jikkompeti ma’ produtturi oħra fil-Komunità. Addizzjonalment, għandu jiġi nnutat li ma tressqu ebda provi li jindikaw li l-industrija Komunitarja abbużat l-allegata pożizzjoni dominanti.

(86)

Is-sitwazzjoni ekonomika pożittiva ġenerali ta’ min ressaq l-ilment hija spjegata parzjalment bil-kapaċità tagħhom li jbiegħu l-prodott ikkonċernat, prodott fl-Istati Uniti u fl-UE, bi prezz ta’ l-unità ogħla fis-suq ta’ l-Istati Uniti minħabba li l-istandard ogħla tas-sigurtà u l-preżenza tas-sigurtà għat-tfal fuq il-prodott ikkonċernat ippermetta lil min ressaq l-ilment li jbigħ il-prodott ikkonċernat bi prezz ogħla. Finalment, għandu jiġi nnutat li l-lighters taż-żnied huma rappreżentati b’mod massiv fis-suq ta’ l-Istati Uniti u t-tkabbir relattiv tas-suq tal-lighters, minkejja tnaqqis kostanti fin-numru ta’ dawk li jpejpu, juri li l-Industrija Komunitarja kienet kapaċi tiġġenera marġini ta’ tkabbir f’suq ferm kompetittiv.

(87)

Minkejja li t-tkomplija tad-dannu materjali, kawżat b’dikjarazzjoni qarrieqa tal-prodott ikkonċernat u bi skartar tal-prodott ikkonċernat li joriġina fir-RPĊ minn pajjiżi oħra Asjatiċi, huwa appoġġat mill-iskoperti ta’ l-OLAF (ara l-premessa (33)), l-analiżi ffokat fuq il-probabbiltà ta’ rikorrenza tad-dannu. F’dan ir-rigward ġew analizzati żewġ parametri ewlenin: (1) ixxiftjar possibbli tal-volumi ta’ l-esportazzjoni tal-prodott konċernat mill-Istati Uniti fis-suq Komunitarju, (2) l-effetti ta’ dawk il-volumi proġettati u l-prezzijiet mill-pajjiż ikkonċernat fuq l-industrija Komunitarja.

(88)

It-tnaqqis mis-sehem tas-suq tal-lighters Ċiniżi fl-Istati Uniti juri li l-volumi importati jistgħu jiġu trasferiti għas-suq Komunitarju bi prezz baxx ħafna. Aktar minn hekk, kif imsemmi hawn fuq fil-premessa (37) hemm kapaċitajiet kbar ta’ produzzjoni tal-prodott ikkonċernat disponibbli fir-RPĊ li jista’ jiġi spostat lejn l-UE. Huwa ferm probabbli li, jekk il-miżuri jiġu revokati, l-importazzjonijiet li joriġinaw mir-RPĊ probabbilment jiġu preferuti mill-perspettiva ta’ livelli ta’ prezzijiet ogħla minn tal-pajjiżi li qed jiżviluppaw.

(89)

Jekk il-miżuri jitħallew jiskadu, jidher ċar li, minħabba l-prezz aktar baxx u l-kapaċitajiet eżistenti tal-produtturi esportaturi Ċiniżi, il-maġġoranza ta’ l-indikaturi tad-dannu (prinċipalment il-volum tal-bejgħ, l-ispiża tal-produzzjoni u l-profitabbiltà) ta’ l-Industrija Komunitarja jonqsu b’mod sinifikanti.

(90)

Fid-dawl ta’ dan t’hawn fuq u minħabba li l-marġini tad-dannu għall-PRI kien aktar minn 60 % u li l-importazzjonijiet mir-RPĊ u t-Tajwan kienu taħt il-prezzijiet ta’ l-Industrija Komunitarja b’medja ta’ 39 % qed jiġi konkluż li r-revoka tal-miżuri wisq probabbli twassal għal rikorrenza tad-dannu materjali għall-industrija Komunitarja.

(91)

Wieħed mill-produtturi fil-Komunità li ma lmentax ikkuntesta l-konklużjonijiet t’hawn fuq billi allega li minħabba li l-lighters bi prezz baxx huma importati minn sorsi varji oħra, ir-revoka tal-miżuri kurrenti ma jkollhiex effett fuq is-sitwazzjoni proprja ta’ l-industrija Komunitarja. Sar l-argument li jekk kien hemm xi dannu, kien diġà jeżisti minħabba l-importazzjonijiet minn dawn is-sorsi l-oħra. Madankollu, dan il-produttur Komunitarju ma kkontestax id-disponibbiltà tal-kapaċitajiet żejda sinifikanti fiċ-Ċina u l-inċentiv għall-produtturi esportaturi Ċiniżi li jaqilbu l-esportazzjonijiet tagħhom lejn is-suq Komunitarju. Bl-istess mod, ma ppreżenta ebda informazzjoni jew evidenza li turi rabta bejn l-importazzjonijiet tal-lighters minn pajjiżi terzi oħra u l-impatt fuq is-sitwazzjoni finanzjarja ta’ l-industrija Komunitarja. Ebda wieħed minn dawn l-argumenti li nġiebu ma seta’ jiddevalwa l-konklużjonijiet kif spjegati hawn fuq fil-premessi (87) sa (90). Dan l-argument ġie għalhekk irrifjutat.

(92)

B’konformità ma’ l-Artikolu 21 tar-Regolament bażiku ġie eżaminat jekk il-prolongazzjoni tal-miżuri anti-dumping eżistenti tmurx kontra l-interess Komunitarju bħala entità sħiħa. Id-determinazzjoni ta’ interess Komunitarju ġiet ibbażata fuq il-kunsiderazzjoni ta’ l-interessi varji kollha involuti, jiġifieri dawk ta’ l-industrija Komunitarja u produtturi Komunitarji oħra, u l-importaturi tal-prodott meqjus.

(93)

Ta’ min ifakkar li, fl-investigazzjonijiet ta’ qabel, l-adozzjoni ta’ miżuri u l-estenjsoni sussegwenti tagħhom dejjem instabet li ma tmurx kontra l-interess Komunitarju.

(94)

Abbażi ta’ dan kien mistħarreġ jekk, minkejja l-konklużjoni li teżisti l-probabbiltà ta’ rikorrenza ta’ dumping u rikorrenza ta’ ħsara, kienx hemm raġunijiet b’saħħithom li se jwasslu għall-konklużjoni li mhijiex fl-interess Komunitarju li jibqgħu għaddejjin il-miżuri f’dan il-każ partikolari.

(95)

Jekk il-miżuri kontra x-xiri taħt il-prezz ikunu mħassra, l-importazzjoni ta’ prodotti mixtrija taħt il-prezz jew bi prezz baxx fis-suq Komunitarju tiżdied ħafna u taċċelera d-deterjorazzjoni tas-sitwazzjoni ta’ l-industrija Komunitarja.

(96)

L-Industrija Komunitarja hija strutturalment vijabbli, kif jidher bir-riżultat pożittiv fis-swieq li mhux ta’ l-UE, bħall-Istati Uniti. Għamlet investimenti kontinwi, li kienu possibbli minħabba l-profitti għoljin. Madankollu, jista’ jkun konkluż li, mingħajr il-kontinwazzjoni ta’ miżuri kontra x-xiri taħt il-prezz, is-sitwazzjoni tagħha x’aktarx li teħżien.

(97)

Wieħed mill-produtturi Komunitarji li ma ppreżentax tweġibiet għall-kwestjonarju qal li l-miżuri anti-dumping fis-seħħ bħalissa huma ta’ detriment għall-konsumatur Ewropew. B’mod partikolari, dan il-produttur qal li l-livelli tal-prezz fil-Komunità huma ogħla meta mqabbla ma’ swieq terzi minħabba l-miżuri eżistenti. Aktar minn hekk, dan il-produttur, li mexxa parti mill-produzzjoni fir-RPĊ, qal li minħabba li miżuri eżistenti huma wkoll applikabbli għall-esportazzjonijiet tiegħu tal-prodott ikkonċernat manifatturat fiċ-Ċina lejn il-Komunità, dawn il-miżuri jkunu qed jagħmlu ħsara lill-kumpanija u għalhekk ikunu kontra l-interessi Komunitarji.

(98)

Dan il-produttur argumenta wkoll li, minħabba li l-industrija Komunitarja ma rkupratx, il-miżuri eżistenti kienu ineffiċjenti u m’għandhomx jiġġeddu. Finalment, intqal li kull dannu kien dovut għall-fatt li l-industrija Komunitarja ma adattatx għas-suq dinji ġdid.

(99)

Rigward l-impatt negattiv allegat tal-miżuri fuq il-konsumaturi, il-produttur Komunitarju konċernat ma ppreżenta ebda prova li tappoġġa din l-istqarrija.

(100)

Dan il-produttur qal li l-miżuri anti-dumping jikkostitwixxu ostakolu għall-iżvilupp ta’ l-attivitajiet tiegħu fiċ-Ċina u għandhom impatt negattiv fuq l-espansjoni tiegħu fil-Lvant Imbiegħed, kif ukoll effett sekondarju fuq is-siti ta’ produzzjoni tiegħu fl-Ewropa. Dan il-produttur argumenta li l-miżuri eżistenti kellhom impatt negattiv fuq il-profitabbiltà ġenerali tiegħu. Madankollu, il-kumpanija indikat li riċentament żiedet il-produzzjoni tagħha fil-faċilitajiet ta’ l-UE u kompliet tfittex sinerġiji mal-faċilitajiet ta’ produzzjoni fil-Lvant Imbiegħed sabiex twessa’ l-iskop tal-prodott. Għalhekk, l-allegat impatt negattiv tal-miżuri fuq il-faċilitajiet ta’ produzzjoni fl-UE ma setax jiġi vverifikat.

(101)

Il-produttur Komunitarju in kwestjoni ċaħad li irriloka l-produzzjoni tiegħu u qal minflok li sempliċiment bena linji ta’ produzzjoni addizzjonali fiċ-Ċina li jipproduċu tipi differenti ta’ prodott milli fil-Komunità, u għalhekk kabbar il-linja tal-prodott. Dan allegatament iffavorixxa l-produzzjoni fil-Komunità li żdiedet. Kif imsemmi qabel dan il-produttur ma weġibx il-kwestjonarju u għalhekk ma kkoperax biżżejjed fil-proċedimenti preżenti. L-informazzjoni ppreżentata, parti minnha wara li skada ż-żmien, ma setgħetx tiġi vverifikata. Aktar minn hekk, il-produttur ma spjegax u lanqas ma wera xi rabta bejn iż-żieda fil-produzzjoni fiċ-Ċina u t-tnaqqis tal-produzzjoni fil-Komunità. Ebda rabta ma kienet apparenti fuq il-bażi ta’ l-informazzjoni inkluża fil-fajl. Lanqas ma spjega kif dawn il-fatti setgħu kellhom impatt fuq il-konklużjonijiet enfasizzati fil-premessa (99) hawn fuq jew jiddevalwaw dawn il-konklużjonijiet. Dan l-argument kellu għalhekk jiġi rrifjutat.

(102)

Bl-istess mod, l-importazzjonijiet tal-kumpanija m’għandhomx jitħallew jibbenefikaw mid-dumping b’detriment għall-industrija Komunitarja. F’kwalunkwe każ, għandu jiġi nnutat li s-sit tal-produzzjoni li fadal ta’ dan il-produttur fil-Komunità jipproduċi biss il-prodott ikkonċernat. Huma prodotti fiċ-Ċina u fl-Indja lighters ġodda taż-żnied, li huma iżgħar, li huma suġġetti wkoll għall-miżuri eżistenti.

(103)

Fir-rigward ta’ l-interessi tal-produtturi Komunitarji l-oħra, it-tnejn oġġezzjonaw għall-miżuri eżistenti u għat-tkomplija tagħhom. Madankollu, ma setgħux jissostanzjaw l-oġġezzjonijiet tagħhom b’xi evidenza ta’ effetti negattivi fuqhom minħabba l-miżuri.

(104)

Fuq il-bażi ta’ dan t’hawn fuq, ġie konkluż li l-miżuri fis-seħħ ma jkollhomx impatt sinifikanti negattiv fuq il-produtturi Komunitarji l-oħra u ma jaffettwawx b’mod negattiv l-interessi finanzjarji tagħhom.

(105)

F’isem il-membri tagħhom, assoċjazzjoni ta’ l-importaturi, l-Assoċjazzjoni Ewropea ta’ l-Importaturi tal-Lighters (“ELIAS”) u Polyconcept, importatur ieħor opponew il-preservazzjoni tal-miżuri eżistenti.

(106)

Għandu jiġi nnutat li ebda wieħed mill-importaturi individwali ma wieġeb il-kwestjonarju fuq il-bażi li ma importawx il-prodott ikkonċernat. Għalhekk ma kienx hemm evidenza disponibbli għall-kalkolazzjoni ta’ l-impatt preċiż tal-miżuri fuq l-importaturi.

(107)

ELIAS u Polyconcept taw xi raġunijiet li għalihom għandhom jitħallew jiskadu l-miżuri eżistenti. Rigward il-kummenti tagħhom rigward in-nuqqas ta’ dannu u r-rendiment ekonomiku ta’ l-applikant, ġie konkluż li, mingħajr it-tkomplija tal-miżuri anti-dumping, is-sitwazzjoni x’aktarx li tkompli tmur għall-agħar.

(108)

ELIAS u Polyconcept argumentaw li d-domanda tas-suq ta’ l-UE mxiet miż-żnied għal-lighters elettroniċi (piezo) u se tkompli tagħmel dan fil-futur. Għalkemm hemm xejra ta’ tkabbir fost il-konsumaturi li jużaw il-lighters elettroniċi (piezo), il-lighters taż-żnied għadhom jirrappreżentaw 70 % tas-suq. Il-konsum tal-lighters taż-żnied fil-fatt kien qed jiżdied, kif imsemmi fil-premessa (53) hawn fuq, li juri t-tkabbir fis-suq, filwaqt li l-industrija Komunitarja ma setgħetx tibbenefika mit-tkabbir, minħabba li mhux biss tilfet il-bejgħ, imma wkoll is-sehem tas-suq tal-lighters taż-żnied.

(109)

ELIAS u Polyconcept qalu li wieħed mir-raġunijiet tar-rendiment dgħajjef allegat kien in-nuqqas mill-applikant li jagħraf il-bidliet fid-domanda tas-suq ta’ l-UE. Madankollu, l-industrija Komunitarja diġà qed tipproduċi lighters elettroniċi (piezo) u għalhekk qiegħda f’pożizzjoni li tlaħħaq ma’ kull domanda ġdida għal-lighters elettroniċi (piezo).

(110)

Bl-istess mod, it-tnaqqis fit-tipjip hija xejra wkoll fl-Istati Uniti, filwaqt li l-industrija Komunitarja rnexxielha żżid is-sehem tas-suq tagħha f’dak li huwa kkunsidrat bħala suq ferm kompetittiv minħabba l-preżenza ta’ ħafna produtturi oħra, kemm jekk joriġinaw fil-Lvant Imbiegħed kif ukoll fl-UE. Rigward l-ispejjeż tal-produzzjoni, l-eżempju ta’ l-Istati Uniti juri li l-industrija Komunitarja kapaċi tikkompeti ma’ produtturi oħra fil-Komunità li rrilokaw l-attivitajiet tagħhom f’pajjiżi Asjatiċi.

(111)

Il-konsumaturi u l-organizzazzjoni tal-konsumaturi ma pparteċipawx matul l-investigazzjoni preżenti.

(112)

Madankollu, kien ikkunsidrat li l-impatt tal-miżuri, għar-raġunijiet imsemmija hawn fuq, ma jkollux impatt sinifikanti fuq il-prezz tal-bejgħ lill-konsumatur finali.

(113)

Fuq il-bażi ta’ li ntqal hawn fuq, il-konklużjoni hi illi ma hemmx raġunijiet sodi biżżejjed fuq bażi ta’ interess Komunitarju kontra l-preservazzjoni tal-miżuri anti-dumping eżistenti.

(114)

Il-partijiet interessati kollha kienu informati bil-fatti u konsiderazzjonijiet essenzjali li fuq il-bażi tagħhom hemm l-intenzjoni li jiġi rrakkomandat illi l-miżuri eżistenti jinżammu għaddejjin. Huma ngħataw ukoll perjodu sabiex jagħmlu rappreżentazzjonijiet sussegwenti ta’ din l-espożizzjoni. Ma tressqet ebda evidenza li turi li l-estensjoni bir-Regolament (KE) Nru 192/1999 għandha titwaqqaf topera.

(115)

Isegwi minn dan ta’ hawn fuq li, kif previst fl-Artikolu 11(2) tar-Regolament bażiku, għandhom jibqgħu fis-seħħ, il-miżuri kontra x-xiri taħt il-prezz applikabbli għal importazzjoni ta’ lighters tal-but, tal-gass u ż-żnied, li ma jistgħux jerġgħu jimtlew, u għal ċerti lighters li jimtlew, li joriġinaw miċ-Ċina jew kunsinnati minn jew li joriġinaw mit-Tajwan, imposti bir-Regolament (KEE) Nru 3433/91 kif emendat bir-Regolament (KE) Nru 1006/95 u r-Regolament (KE) Nru 192/1999 kif estiż bir-Regolament (KE) Nru 1824/2001 għandu jinżamm,

(1)

F’Awwissu ta’ l-1999, il-Kunsill, permezz tar-Regolament (KE) Nru 1796/1999 (2), impona dazju definittiv antidumping fuq importazzjonijiet ta’ ħbula, u ċimi, ta’ l-azzar li joriġinaw, inter alia, mill-Afrika t’Isfel.

(2)

F’Novembru 2005, wara reviżjoni ta’ skadenza skond l-Artikolu 11(2) tar-Regolament bażiku, il-Kunsill, permezz tar-Regolament (KE) Nru 1858/2005 (3) iddeċieda li għandhom jinżammu l-miżuri antidumping applikabbli għall-importazzjonijiet tal-prodott konċernat li joriġina, inter alia, mill-Afrika t’Isfel.

(3)

Permezz tad-Deċiżjoni 1999/572/KE (4), il-Kummissjoni aċċettat impenn dwar prezzijiet minn kumpanija mill-Afrika t’Isfel, Scaw Metals Group Haggie Steel Wire Rope (“il-kumpanija”).

(4)

Bħala riżultat ta’ dan, l-importazzjonijiet fil-Komunità tal-prodott konċernat li joriġina mill-Afrika t’Isfel, immanifatturat mill-kumpanija u ta’ tip ta’ prodott kopert mill-impenn (“il-prodott kopert”) kienu eżentati mid-dazji definittivi antidumping.

(5)

F’dan ir-rigward għandu jiġi notat li ċerti tipi ta’ ħbula, u ċimi, ta’ l-azzar attwalment prodotti mill-kumpanija ġew esklużi mill-ambitu ta’ l-impenn. Għalhekk, ħbula, u ċimi, ta’ l-azzar bħal dawn kienu suġġetti għall-ħlas tad-dazju antidumping meta daħlu fiċ-ċirkolazzjoni libera fil-Komunità.

(6)

L-impenn offrut mill-kumpanija jobbligaha sabiex, inter alia, tesporta l-prodott kopert lejn il-Komunità Ewropea bi prezz ogħla minn ċerti prezzijiet minimi (MIPs) kif mistqarr fl-impenn.

(7)

Ġie rikonoxxut mill-kumpanija li, f’dak li għandu x’jaqsam ma’ l-eżenzjoni mid-dazji antidumping mogħtija mill-impenn, eżenzjoni bħal din għandha tingħata bil-kundizzjoni li titressaq “fattura ta’ l-impenn” lis-servizzi doganali tal-Komunità. Barra minn hekk, il-kumpanija ntrabtet li ma toħroġx fatturi ta’ impenn għall-bejgħ ta’ dawk it-tipi ta’ prodott konċernat li mhumiex koperti mill-impenn u li huma għalhekk obbligati li jħallsu d-dazju antidumping. Il-kumpanija tagħraf ukoll li l-fatturi ta’ l-impenn maħruġa kellhom jinkludu t-tagħrif stipulat fl-Anness tar-Regolament (KE) Nru 1858/2005.

(8)

It-termini ta’ l-impenn jobbligaw ukoll lill-kumpanija sabiex tipprovdi lill-Kummissjoni b’tagħrif regolari u ddettaljat, fil-forma ta’ rapport kull tlett xhur tal-bejgħ tagħha tal-prodott konċernat lill-Komunità Ewropea. Rapporti bħal dawn kellhom jinkludu l-prodotti koperti mill-impenn li bbenefikaw mill-eżenzjoni mill-ħlas tad-dazju antidumping, kif ukoll dawk it-tipi ta’ ħbula, u ċimi, ta’ l-azzar li mhumiex koperti mill-impenn u li għalhekk huma suġġetti għad-dazju antidumping.

(9)

Jidher ċar li r-rapporti tal-bejgħ imsemmija hawnhekk għandhom ikunu, kif ġie mressaq, kompleti, eżawrjenti u korretti fid-dettalji kollha u li t-tranżazzjonijiet jikkonformaw bis-sħiħ mat-termini ta’ l-impenn.

(10)

Bl-għan li tiżgura konformità ma’ l-impenn, il-Kumpanija ntrabtet ukoll li tippermetti żjarat ta’ verifika fuq il-post fl-istabbiliment tagħha sabiex tiġi vverifikata l-eżattezza u l-veraċità tad-data ppreżentata fir-rapporti msemmija ta’ kull tlett xhur u sabiex tipprovdi t-tagħrif kollu meqjus bħala meħtieġ mill-Kummissjoni.

(11)

Għandu jiġi notat li l-kumpanija kienet diġà rċeviet ittra ta’ twissija mis-servizzi tal-Kummissjoni fit-28 ta’ Ottubru 2003 minħabba li kisret l-impenn billi ħarġet fatturi ta’ l-impenn għal prodotti li mhumiex koperti mill-impenn iżda minflok huma suġġetti għall-miżuri antidumping. L-ittra ta’ twissija stqarret li fid-dawl taċ-ċirkustanzi partikolari li fihom sar dan il-ksur ma kienx hemm il-ħsieb li tkun irtirata l-aċċettazzjoni ta’ l-impenn, iżda ġie enfasizzat li kull ksur sussegwenti ta’ l-impenn, anki ta’ natura żgħira, jagħmilha diffiċli għall-Kummissjoni li żżomm l-aċċettazzjoni ta’ l-impenn mill-kumpanija.

(12)

Saret żjara ta’ verifika fil-5-6 ta’ Frar 2007 fl-istabbiliment tal-kumpanija fl-Afrika t’Isfel.

(13)

Iż-żjara ta’ verifika lill-kumpanija stabbilixxiet li l-kumpanija ħarġet fatturi ta’ l-impenn għal ħbula, u ċimi, ta’ l-azzar li mhumiex koperti mill-impenn iżda minflok huma suġġetti għall-miżuri antidumping. Stabbilixxiet ukoll li l-kumpanija naqset milli tissodisfa l-obbligu tagħha li tirrispetta l-MIP f’okkażjoni waħda. Barra minn hekk, il-kumpanija ħarġet fatturi ta’ l-impenn li mhumiex konformi ma’ l-Anness tar-Regolament (KE) Nru 1858/2005. Barra dan, matul iż-żjara ta’ verifika, ġie stabbilit li r-rapporti ta’ bejgħ ta’ l-impenn ta’ kull tliet xhur kif imressqa mill-kumpanija ma kinux kompleti, eżawrjenti u korretti fid-dettalji kollha.

(14)

Id-Deċiżjoni tal-Kummissjoni 2007/1459/KE (5) tistipula f’aktar dettall in-natura tal-ksur li nstab,

(1)

F’Awwissu ta’ l-1999, bir-Regolament (KE) Nru 1796/1999 (2), il-Kunsill impona dazju definittiv anti-dumping fuq importazzjonijiet ta’ wajer ta’ l-azzar u kejbils li joriġinaw, inter alia, mill-Afrika t’Isfel.

(2)

F’Novembru 2005, wara reviżjoni ta’ skadenza skond l-Artikolu 11(2) tar-Regolament bażiku, il-Kunsill, bir-Regolament (KE) Nru 1858/2005 (3) iddeċieda li l-miżuri anti-dumping applikabbli għall-importazzjonijiet tal-prodott ikkonċernat li joriġina, inter alia, mill-Afrika t’Isfel għandhom jinżammu.

(3)

Il-Kummissjoni, bid-Deċiżjoni 1999/572/KE tat-13 ta’ Awwissu 1999 (4), aċċettat impenn ta’ prezz minn kumpanija ta’ l-Afrika t’Isfel, Scaw Metals Group Haggie Steel Wire Rope (“Haggie” jew “il-kumpanija”).

(4)

Bid-Deċiżjoni 1999/572/KE il-Kummissjoni aċċettat ukoll impenji ta’ prezz mill-kumpaniji li ġejjin: Usha Martin Industries & Usha Beltron Ltd, Indja; Aceros Camesa SA de CV, Messiku; u Joint Stock Company Silur, Ukraina. Il-Kummissjoni rrevokat l-aċċettazzjoni ta’ l-impenn offrut minn Joint Stock Company Silur, Ukraina bir-Regolament tal-Kummissjoni (KE) Nru 1678/2003 (5). Il-miżuri anti-dumping fuq ħbula u kejbils tal-wajer ta’ l-azzar li joriġinaw mill-Messiku skadew fit-12 ta’ Awwissu 2004 (6). Il-Kummissjoni rrevokat l-aċċettazzjoni ta’ l-impenn offrut minn Usha Martin Industries & Usha Beltron Ltd bid-Deċiżjoni tal-Kummissjoni 2006/38/KE tat-22 ta’ Diċembru 2005.

(5)

Bħala riżultat ta’ dan l-importazzjonijiet fil-Komunità tal-prodott ikkonċernat li joriġina mill-Afrika t’Isfel, immanifatturat mill-kumpanija u ta’ tip ta’ prodott kopert mill-impenn (‘il-prodott kopert’) ġew eżentati mid-dazji anti-dumping definittivi.

(6)

F’dan ir-rigward ta’ min jinnota li ċerti tipi ta’ ħbula u kejbils tal-wajer ta’ l-azzar li huma prodotti minn Haggie tħallew barra mill-ambitu ta’ l-impenn. Għalhekk, dawn il-ħbula u kejbils tal-wajer ta’ l-azzar kienu suġġetti għall-ħlas tad-dazju anti-dumping meta daħlu fiċ-ċirkolazzjoni ħielsa fil-Komunità.

(7)

L-impenn offrut mill-kumpanija jobbligaha, fost l-oħrajn, tesporta l-prodott kopert lill-Komunità Ewropea ‘l fuq minn ċerti prezzijiet minimi (MIPs) kif mistqarr fl-impenn.

(8)

Il-kumpanija fl-impenn tagħha għarfet ukoll li f’dak li għandu x’jaqsam ma’ l-eżenzjoni mid-dazju anti-dumping mogħtija mill-impenn, eżenzjoni bħal din tingħata bil-kundizzjoni li titressaq “fattura ta’ l-impenn” lis-servizzi doganali tal-Komunità. Barra minn hekk, il-kumpanija ntrabtet li ma toħroġx dawn il-fatturi ta’ impenn għall-bejgħ ta’ dawk it-tipi tal-prodott ikkonċernat li mhumiex koperti mill-impenn u li huma għalhekk suġġetti għad-dazju anti-dumping. Il-kumpanija għarfet ukoll li l-fatturi ta’ impenn maħruġa kellu jkun fihom it-tagħrif l-ewwel stabbilit fl-Anness tar-Regolament (KE) Nru 1796/1999 u aktar tard fl-Anness tar-Regolament (KE) Nru 1858/2005.

(9)

It-termini ta’ l-impenn jobbligaw ukoll lill-kumpanija tipprovdi lill-Kummissjoni b’tagħrif regolari u ddettaljat f’forma ta’ rapport kull tliet xhur tal-bejgħ tagħha tal-prodott ikkonċernat lill-Komunità Ewropea. Dawn ir-rapporti għandhom jinkludu wkoll il-prodotti koperti mill-impenn li jkunu bbenefikaw mill-eżenzjoni tal-ħlas tad-dazju anti-dumping, kif ukoll dawk it-tipi ta’ ħbula u kejbils ta’ l-azzar li mhumiex koperti mill-impenn u li għalhekk huma soġġetti għall-ħlas tad-dazju anti-dumping fil-mument ta’ l-importazzjoni fil-Komunità Ewropea.

(10)

Huwa ċar li r-rapporti tal-bejgħ hawn fuq imsemmija għandhom ikunu, meta jintbagħtu, kompluti, eżawrjenti u korretti fid-dettalji kollha u t-tranżazzjonijiet ikunu konformi fis-sħiħ mal-kondizzjonijiet ta’ l-impenn.

(11)

Bil-għan li tiżgura konformità ma’ l-impenn, il-Kumpanija ntrabtet ukoll li tippermetti żjajjar ta’ verifika fuq il-post fil-proprjetà tagħha biex tiġi vverifikata l-eżattezza u l-veraċità tad-data ppreżentata fir-rapporti msemmija ta’ kull tliet xhur u biex tipprovdi t-tagħrif kollu meqjus bħala meħtieġ mill-Kummissjoni.

(12)

Ta’ min jinnota li l-kumpanija diġà waslitilha ittra ta’ twissija mis-Servizzi tal-Kummissjoni fit-28 ta’ Ottubru 2003 minħabba ksur ta’ impenn bil-ħruġ ta’ fatturi ta’ impenn għal prodotti mhux koperti mill-impenn iżda xorta waħda suġġetti għall-miżuri anti-dumping. L-ittra ta’ twissija kienet tgħid li minħabba ċ-ċirkustanzi partikolari li fihom sar dan il-ksur ma kienx hemm il-ħsieb li tiġi rrevokata l-aċċettazzjoni ta’ l-impenn, iżda nġibdet l-attenzjoni li kull ksur sussegwenti ta’ l-impenn, anki ta’ natura żgħira, jagħmilha diffiċli għall-Kummissjoni li żżomm l-aċċettazzjoni ta’ l-impenn mill-kumpanija.

(13)

F’dan ir-rigward, saret żjara ta’ verifika fil-post tal-Kumpanija fl-Afrika t’Isfel mill-5 ta’ Frar 2007 sas-6 ta’ Frar 2007. Iż-żjara ta’ investigazzjoni kopriet il-perjodu mill-1 ta’ Jannar 2004 sal-31 ta’ Diċembru 2006.

(14)

Iż-żjara ta’ verifika kkonfermat li l-kumpanija, f’żewġ okkażjonijiet, ħarġet fatturi ta’ impenn (numri tal-fatturi ta’ impenn: 935515 u 935516) għall-prodotti soġġetti għall-miżura anti-dumping iżda mhux koperti mill-impenn. Għalhekk, dawn it-tranżazzjonijiet ibbenefikaw b’mod illegali mill-eżenzjoni ta’ ħlas tad-dazju anti-dumping fil-mument ta’ importazzjoni.

(15)

Iż-żjara ta’ verifika kkonfermat li, f’okkażjoni waħda, il-kumpanija naqset milli taġġusta l-prezz unitarju tal-bejgħ skond il-kondizzjonijiet ta’ ħlas. In-nuqqas ta’ twettiq ta’ dan l-aġġustament għall-ispiża finanzjarja marbuta maż-żmien attwali tal-ħlas ikkawża prezz unitarju ta’ bejgħ taħt l-MIP applikabbli.

(16)

Barra minn hekk, iż-żjara ta’ verifika kkonfermat li, f’diversi okkażjonijiet, il-kumpanija ħarġet fatturi ta’ impenn mhux b’konformità ma’ l-Anness tar-Regolament (KE) Nru 1858/2005 billi inkludiet is-sentenza “Għall-bejgħ barra mill-pajjiż, mhux biex jinbiegħ fl-Unjoni Ewropea”.

(17)

Il-kontroll tal-fatturi ta’ impenn maħruġa għall-perjodu ta’ żmien ikkonċernat miż-żjara ta’ verifika wera li tranżazzjoni waħda ma ġietx inkluża fir-rapport tal-bejgħ ta’ l-impenn ta’ kull tliet xhur li jintbagħat lill-Kummissjoni. Barra minn hekk, ġie kkonfermat ukoll li l-kumpanija rrappurtat tranżazzjonijiet mhux intiżi għar-rilaxx fiċ-ċirkolazzjoni ħielsa fil-Komunità bħalikieku kienu intiżi għar-rilaxx fiċ-ċirkolazzjoni ħielsa fil-Komunità. Iż-żjara ta’ verifika identifikat ukoll bosta tranżazzjonijiet li ġew irrappurtati bħala bejgħ ta’ tranżitu, iżda, fir-realtà, il-prodotti ġew rilaxxati fiċ-ċirkolazzjoni ħilesa fil-Komunità. Barra minn hekk instabu diskrepanzi bejn ir-rapporti tal-bejgħ ta’ l-impenn ta’ kull tliet xhur u l-fatturi korrispondenti.

(18)

Il-fatt li l-kumpanija ħarġet fatturi ta’ impenn għall-prodott ikkonċernat li ma kinux koperti mill-impenn u li dawn it-tranżazzjonijiet ibbenefikaw mill-eżenzjoni mill-ħlas tad-dazju anti-dumping mogħti biss għall-prodotti koperti mill-impenn jikkostitwixxi ksur ta’ l-impenn.

(19)

L-obbligu tal-kumpanija li tirrispetta l-MIP għall-bejgħ kollu tal-prodott kopert ma tħarisx.

(20)

Il-ħruġ ta’ fatturi ta’ impenn mhux b’konformità ma’ l-Anness tar-Regolament (KE) Nru 1858/2005 għall-bejgħ tal-prodott kopert jista’ jkun ta’ diżgwid għall-awtoritajiet tad-dwana u ma jippermettix aktar lill-awtoritajiet tad-dwana li jissorveljaw b’mod effettiv l-impenn u, għaldaqstant, jirrendi l-impenn mhux fattibbli.

(21)

Il-fatti stabbiliti fil-premessa (17) wasslu għall-konklużjoni li r-rapporti tal-bejgħ ta’ impenn ta’ kull tliet xhur kif mibgħuta mill-kumpanija ma kienux kompluti, eżawrjenti u korretti fid-dettalji kollha u għalhekk dawn ir-rapporti ma kinux biżżejjed affidabbli biex jintużaw għas-sorveljanza ta’ l-impenn. In-nuqqas ta’ konformità mar-rekwiżiti ta’ rrappurtar jikkostitwixxi ksur ta’ l-impenn.

(22)

Il-kumpanija għarfet permezz tas-sottomissjonijiet tagħha bil-miktub li saru xi żbalji fil-ħruġ tal-fatturi ta’ impenn u t-tħejjija tar-rapporti ta’ l-impenn minħabba nuqqas ta’ ftehim dwar l-impenn dwar id-dispożizzjonijiet tekniċi ta’ l-impenn, minħabba li t-test inqara ħażin u/jew minħabba n-nuqqas tal-kumpanija li tikkonsultah. Fis-sottomissjoni tagħha bil-miktub u matul is-seduta fis-26 ta’ April 2007 kien ukoll mistqarr li t-tibdil fit-treġija għolja u l-istrutturar mill-ġdid ta’ l-organizzazzjoni kkontribwixxa għan-nuqqas ta’ ftehim dwar ir-rekwiżiti komplessi ta’ l-impenn.

(23)

Il-kumpanija wkoll ammettiet li rċeviet l-ittra ta’ twissija mis-Servizzi tal-Kummissjoni fit-28 ta’ Ottubru 2003. Iżda, il-kumpanija rribattiet li qatt ma waslilha rapport ta’ verifika u li assumiet li kieku kien jiddeskrivi l-iżball li fil-fatt sar. Il-kumpanija saħqet li l-fatt li ma waslilha xejn dwar l-iżbalji li fil-fatt saru kkontribwixxa wkoll għan-nuqqas tagħha li tibdel il-prassi tagħha dwar it-tħejjija tar-rapporti ta’ l-impenn jew li ttejjeb l-għarfien tagħha.

(24)

Fi tweġiba għal dawn l-argumenti wieħed irid jinnota li l-kumpanija fit-18 ta’ Settembru 2003 waslitilha ittra mill-Kummissjoni li ddeskriviet fid-dettall il-ksur identifikat. L-ittra ta’ twissija tat-28 ta’ Ottubru 2003 ma tennitx aktar il-ksur fid-dettall iżda rriferiet għall-korrispondenza ta’ qabel bejn il-Kummissjoni u l-kumpanija.

(25)

Ta’ min jinnota wkoll li l-kumpanija setgħet tfixklet meta rriferiet għal rapport ta’ verifika. Il-Kummissjoni ma wettqitx żjara ta’ verifika qabel ma ħarġet ittra ta’ twissija fit-28 ta’ Ottubru 2003 billi l-ksur li wassal għall-ħruġ ta’ l-ittra ta’ twissija ġie stabbilit fuq il-bażi ta’ analiżi mill-uffiċċju tar-rapporti ta’ l-impenn. Il-Kummissjoni għamlet verifika f’Mejju 2004 iżda billi dik il-verifika ma wasslitx għal aktar azzjoni ma kien jinħtieġ li tintbagħat ebda ittra lill-kumpanija marbuta magħha.

(26)

Barra minn hekk, il-kumpanija ssottomettiet matul is-seduta li, wara ż-żjara ta’ verifika, il-kumpanija rrevediet is-sistema kompluta tagħha, fuq il-bażi tal-kummenti magħmula fil-post, biex twettaq it-tibdil meħtieġ biex tissodisfa r-rekwiżiti ta’ l-impenn.

(27)

L-argumenti ppreżentati mill-kumpanija fid-difiża tagħha nnifisha f’dak li għandu x’jaqsam man-nuqqas ta’ ftehim dwar l-impenn ma jbiddlux il-fehma tal-Kummissjoni li l-kumpanija naqset milli tkun konformi ma’ l-obbligi ta’ l-impenn. Irid jiġi nnutat ukoll li l-kumpanija diġà waslitilha ittra ta’ twissija minħabba ksur ta’ impenn fl-imgħoddi u naqset milli tadotta l-miżuri meħtieġa biex twaqqaf milli jseħħ aktar ksur ta’ l-impenn. In-nuqqas ta’ ftehim dwar ir-rekwiżiti ta’ l-impenn jikkostitwixxi riskju għoli għas-suffiċjenza u l-affidabilità tas-sorveljanza ta’ l-impenn.

(28)

F’dak li għandu x’jaqsam mal-vjolazzjoni tal-prezz, il-kumpanija ammettiet li sar ksur tal-prezz f’okkażjoni waħda għax naqset milli twettaq it-tibdil meħtieġ fil-prezzijiet tal-bejgħ fir-rigward ta’ ħlas wara ż-żmien. Madankollu, tressaq l-argument li l-prezzijiet tal-bejgħ tat-tranżazzjonijiet l-oħra kollha kienu strettament konformi ma’ l-MIP. Barra minn hekk, ġie sottomess li l-ħlas wara ż-żmien seħħ minħabba ċirkustanzi mhux previsti billi l-klijent ikkonċernat normalment iħallas bil-quddiem għall-prodotti qabel ma ssir il-kunsinna.

(29)

B’reazzjoni għal dawn l-argumenti għandu jiġi nnutat li b’konformità ma’ l-impenn, il-kumpanija ntrabtet li tiżgura li l-Prezz Nett tal-Bejgħ għall-bejgħ kollu kopert permezz ta’ l-impenn għandu jkun fl-MIP stipulat fl-impenn jew ogħla minnu.

(30)

Barra minn hekk, għal dak li għandu x’jaqsam mal-kwistjoni tal-proporzjonalità, ir-Regolament bażiku ma fih l-ebda rekwiżit dirett jew indirett li ksur ta’ impenn għandu jirrelata ma’ perċentwali minimu ta’ bejgħ jew għandu jirrelata ma’ perċentwali minimu ta’ MIP.

(31)

Din l-istrateġija kienet ikkonfermata wkoll permezz tal-ġurisprudenza tal-Qorti tal-Prim’Istanza li qatgħetha li kull ksur ta’ impenn huwa biżżejjed biex jiġġustifika l-irtirar ta’ aċċettazzjoni ta’ impenn (7).

(32)

Skond dan, l-argumenti ppreżentati mill-kumpanija fir-rigward tal-proporzjonalità ma jbiddlux il-fehma tal-Kummissjoni li seħħ ksur ta’ l-impenn u li għandha tiġi rtirata l-aċċettazzjoni l-impenn.

(33)

Il-kumpanija ressqet l-argument li fiż-żmien ta’ sottomissjoni tar-rapporti regolari tagħha lill-Kummissjoni, il-kumpanija ħasset li r-rapporti kienu kompluti, eżawrjenti u korretti fid-dettalji kollha.

(34)

Fl-ebda mument ma ppruvat tirrapporta informazzjoni mhux korretta jew ma ppruvat żżomm lura l-informazzjoni meħtieġa.

(35)

Il-kumpanija enfasizzat ukoll kemm fis-sottomissjoni tagħha bil-miktub kif ukoll matul is-seduta, li ma kisbet ebda benefiċċju mill-ksur ta’ l-impenn, f’xi każ minnhom għajr għal tnejn, u li l-iżbalji ma twettqux fi ħdan l-għan ta’ skema ta’ qerq.

(36)

B’referenza għall-premessi hawn fuq ta’ min jinnota li l-kumpanija ħadd ma raha bħala li kienet qed tipprova tibbenefika bi skop billi ma tirrispettax ir-rekwiżiti ta’ l-impenn jew li tfixkel is-sorveljanza. Iżda, li l-iżbalji jseħħu b’mod ripetut iwassal biex is-sorveljanza xierqa ta’ l-impenn ma tibqax fattibbli.;

(37)

Fid-dawl ta’ dan ta’ hawn fuq, l-aċċettazzjoni ta’ l-impenn għandha tiġi rtirata u d-Deċiżjoni tal-Kummissjoni 1999/572/KE għandha tiġi rrevokata. Skond dan, id-dazju definittiv ta’ anti-dumping impost bl-Artikolu 1(2) tar-Regolament (KE) Nru 1858/2005 għandu japplika.