dwar il-konklużjoni ta’ Arranġament tal-Implimentazzjoni bejn il-Kummissjoni Ewropea u l-Gvern tal-Istati Uniti tal-Amerika għal attivitajiet ta’ kooperazzjoni fil-qasam tar-riċerka fis-sigurtà domestika u ċivili

Wara li kkunsidrat il-Ftehim għall-kooperazzjoni xjentifika u teknoloġika bejn il-Komunità Ewropea u l-Gvern tal-Istati Uniti tal-Amerika (1), u partikolarment it-tieni paragrafu tal-Artikolu 5(b) tiegħu,

L-Arranġament tal-Implimentazzjoni bejn il-Kummissjoni Ewropea u l-Gvern tal-Istati Uniti tal-Amerika għal attivitajiet ta’ kooperazzjoni fil-qasam tar-riċerka fis-sigurtà domestika u ċivili huwa approvat.

It-test tal-Arranġament tal-Implimentazzjoni huwa mehmuż ma’ din id-Deċiżjoni.

Il-Kummissarju responsabbli għad-DĠ Intrapriża u Industrija huwa awtorizzat li jiffirma l-Arranġament tal-Implimentazzjoni f’isem il-Kummissjoni.

Din id-Deċiżjoni għandha tidħol fis-seħħ fl-ewwel jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

(4) Permezz ta’ skambju ta’ Notes Verbales bejn il-Kunsill tal-UE, bid-data tal-15 ta’ Mejju 2009 (nru tar-referenza SGS9/06298) u l-Gvern tal-Istati Uniti, id-Dipartiment tal-Istat, bid-data tas-6 ta’ Lulju 2009.

ARRANĠAMENT TAL-IMPLIMENTAZZJONI

bejn Il-Kummissjoni Ewropea u l-Gvern tal-Istati Uniti tal-Amerika għal attivitajiet ta’ kooperazzjoni fil-qasam tar-riċerka fis-sigurtà domestika u ċivili

Skont il-Ftehim għall-Kooperazzjoni Xjentifika u Teknoloġika bejn il-Gvern tal-Istati Uniti tal-Amerika u l-Komunità Ewropea, iffirmat f’Washington fil-5 ta’ Diċembru 1997, kif estiż u emendat (permezz ta’ skambju ta’ Notes Verbales bejn il-Kunsill tal-UE, bid-data tal-15 ta’ Mejju 2009 u l-Gvern tal-Istati Uniti, id-Dipartiment tal-Istat, bid-data tas-6 ta’ Lulju 2009), minn hawn ‘il quddiem imsemmi “il-Ftehim”, b’dan qed jiġi stabbilit Arranġament tal-Implimentazzjoni biex ikopri l-attivitajiet ta’ kooperazzjoni bejn il-Kummissjoni Ewropea (KE) u l-Istati Uniti tal-Amerika (l-Istati Uniti), minn hawn ‘il quddiem imsemmija “il-Partijiet”. L-attivitajiet ta’ kooperazzjoni għandhom iseħħu skont it-termini tal-Ftehim. L-iskop ta’ dan l-Arranġement ta’ Implimentazzjoni huwa li jħeġġeġ, jiżviluppa u jiffaċilita dawn l-attivitajiet bejn il-Partijiet, imwettqa fuq il-bażi ta’ benefiċċju reċiproku miksub minn bilanċ ġenerali tal-vantaġġi, l-opportunitajiet reċiproċi għal sehem f’attivitatjiet ta’ kooperazzjoni, u trattament ġust u ndaqs. Dan l-Arranġament ta’ Implimentazzjoni mhuwiex maħsub biex joħloq obbligi li jorbtu fil-liġi.

1. L-Attivitajiet Kooperattivi

Il-Partijiet jistgħu jagħmlu u jiffaċilitaw attivitajiet ta’ kooperazzjoni fl-oqsma kollha tax-xjenza u t-teknoloġija marbuta mal-qasam tas-sigurtà domestika u ċivili, kif stipulat fis-Seba’ Programm ta’ Qafas tal-Komunità Ewropea għar-riċerka, l-iżvilupp teknoloġiku u l-attivitajiet ta’ dimostrazzjoni (2007-2013), it-Tema 10 “Sigurtà” (u programmi ta’ segwitu relevanti) minn naħa waħda, u l-prijoritajiet tad-Dipartiment tas-Sigurtà Domestika min-naħa l-oħra.

L-attivitajiet ta’ kooperazzjoni jistgħu jinkludu partikolarment l-oqsma li ġejjin ta’ riċerka fis-sigurtà domestika/ċivili:

1.1.	is-sigurtà taċ-ċittadini (eż. il-ħarsien minn theddidiet naturali u tal-bniedem, il-prevenzjoni tal-produzzjoni illeċita tad-droga), inkluż il-ġestjoni ta’ sitwazzjonijiet ta’ kriżi u emerġenza;

1.2.	is-sigurtà u l-kapaċità ta’ rkupru tal-infrastrutturi kritiċi, ir-riżorsi l-iktar importanti, l-agrikoltura, is-servizzi pubbliċi, il-komunikazzjoni u s-servizzi finanzarji;

1.3.	l-interazzjoni tas-sigurtà u s-soċjetà, inkluż il-punt ta’ kuntatt bejn il-bniedem u t-teknoloġija, ir-riċerka fl-imġiba, il-kwistjonijiet tal-privatezza, u l-bijometrika;

1.4.	is-sigurtà tal-kontrolli u l-punti tal-qsim fuq il-fruntieri, inkluż il-fruntieri tal-art u dawk kostali;

1.5.	l-ottimizzazzjoni tat-teknoloġiji eżistenti u l-interoperabilità tagħhom;

1.6.	l-iżvilupp ta’ teknoloġiji destinati għall-utent finali u tagħmir biex jimla l-lakuni eżistenti u jissodisfa l-ħtiġijiet, bħal dawk għall-protezzjoni ċivili u tal-ewwel għajnuna;

1.7.	l-iżvilupp u l-iskambju ta’ rekwiżiti, standards, valutazzjonijiet tal-vulnerabbiltà, analiżijiet ta’ interdipendenza, ċertifikazzjonijiet, l-aħjar prassi, linji ta’ gwida, programmi ta’ taħriġ, rapporti tat-test, dejta, softwer, tagħmir u staff relevanti.

2. In-natura ta’ attivitajiet ta’ kooperazzjoni

2.1.

Dawn l-attivitajiet jistgħu jinkludu, iżda mhumiex limitati għal:

2.1.1.

L-għoti ta’ opportunitajiet komparabbli għal entitajiet mill-Unjoni Ewropea u mill-Istati Uniti tal-Amerika biex jipparteċipaw fl-oqsma msemmija fil-punt 1;

2.1.2.

Skambju f’waqtu ta’ informazzjoni relevanti inkluż dwar sejħiet fil-ġejjieni għal għotjiet jew proposti, jew dwar tħabbiriet tal-opportunitajiet imsemmija fil-punt 2.1.1;

2.1.3.

L-attivitajiet għall-promozzjoni, fil-komunitajiet rispettivi tar-riċerka tal-Partijiet, tal-opportunitajiet mogħtija minn dan l-Arranġament tal-Implimentazzjoni, eż. permezz ta’ attendenza regolari fir-reviżjonijiet tal-programm tal-Partijiet, is-sejħiet għall-għotjiet u tħabbiriet ta’ riċerka ta’ interess pubbliku tal-Istati Uniti u s-sejħiet għall-proposti tal-Unjoni Ewropea;

2.1.4.

L-aċċess komparabbli għal faċilitajiet tal-laboratorji u Tagħmir u Materjal, għat-twettiq ta’ attivitajiet xjentifiċi u teknoloġiċi inkluż ir-riċerka, l-iżvilupp, l-ittestjar u l-valutazzjoni, l-istandardizzazzjoni u ċ-ċertifikazzjoni;

2.1.5.

L-appoġġ għal riċerka konġunta, proposti għall-iżvilupp tal-kontenut u l-aċċess, supplimenti għal għotjiet, kuntratti u ftehimiet eżistenti, u finanzjament ta’ attivitajiet tematiċi ta’ kooperazzjoni għal benefiċċju reċiproku u valur miżjud.

3. Koordinazzjoni

3.1.

L-Istati Uniti u l-KE biħsiebhom jikkooperaw mill-qrib biex jikkoordinaw l-attivitajiet konġunti. Għaldaqstant, kull Parti għandu jkollha żewġ rappreżentanti li jiġu maħtura biex jikkoordinaw l-attivitajiet (“il-Grupp tat-Tmexxija”). Ir-rappreżentanti jistgħu jiltaqgħu kull meta jkun hemm bżonn, ġeneralment darba fis-sena. Ġeneralment, il-laqgħat huma mistennija jalternaw bejn siti fl-Unjoni Ewropea u fl-Istati Uniti tal-Amerika, u l-Parti li tkun qed tospita għandha tipprovdi appoġġ organizzazzjonali u amministrattiv.

3.2.

Skont il-bżonn, kull Parti tista’ taħtar parteċipanti addizzjonali biex jattendu dawn il-laqgħat. Il-laqgħat għandhom ikunu kopresjeduti mis-Sotto Segretarju għax-Xjenza u t-Teknoloġija tad-Dipartiment tas-Sigurtà Domestika u d-Direttur responsabbli għar-Riċerka fis-Sigurtà fil-KE. Ma ġiex assenjat status formali lil dan il-Grupp tat-Tmexxija.

3.3.

Il-Grupp tat-Tmexxija għandu jissorvelja u jistimola l-attivitajiet ta’ kooperazzjoni li jsiru skont dan l-Arranġament tal-Implimentazzjoni. Għandu jiskambja informazzjoni dwar prassi, liġijiet, regolamenti u programmi relevanti għall-kooperazzjoni skont dan l-Arranġament tal-Implimentazzjoni. Għandu jippjana u jidentifika għanijiet u opportunitajiet għal kull sena ġdida, jipproponi attivitajiet ad hoc, u jirrevedi attivitajiet u l-livelli ta’ parteċipazzjoni u sforzi simili fil-programmi ta’ kull Parti skont dan l-Arranġament ta’ Implimentazzjoni. Għandu joħroġ rapport perjodiku dwar il-progress fil-kooperazzjoni.

4. Il-finanzjament

4.1.

L-attivitajiet ta’ kooperazzjoni skont dan l-Arranġament tal-Implimentazzjoni għandhom ikunu soġġetti għad-disponibbiltà ta’ fondi approprjati u għal-liġijiet u r-regolamenti applikabbli, il-politiki u l-programmi ta’ kull Parti, u għat-termini tal-Ftehim u dan l-Arranġament tal-Implimentazzjoni. Dan l-Arranġament tal-Implimentazzjoni ma joħloqx obbligi finanzjari.

4.2.

Kull Parti għandha tħallas l-ispejjeż tal-parteċipazzjoni tagħha fil-laqgħat tal-Kumitat tat-Tmexxija. Madankollu, l-ispejjeż, għajr dawk għall-ivvjaġġar u l-akkomodazzjoni, li huma marbuta direttament ma’ laqgħat tal-Grupp tat-Tmexxija, jiġġarbu mill-Parti li tospita l-laqgħa, sakemm mhux miftiehem mod ieħor.

4.3.

Kull Parti hija responsabbli għal kull awditjar tal-azzjonijiet tagħha b’appoġġ tal-attivitajiet ta’ kooperazzjoni, inkluż l-attivitajiet ta’ kull parteċipant tagħha. Il-verifiki ta’ kull Parti għandhom ikunu skont il-prassi applikabbli tagħha stess.

5. Proprjetà intelletwali

L-allokazzjoni u l-protezzjoni tad-drittijiet tal-proprjetà intellettwali għandhom ikunu skont id-dispożizzjonijiet tal-Anness tal-Ftehim.

6. Informazzjoni kklassifikata u Tagħmir u Materjal

6.1.

L-informazzjoni kklassifikata skambjata bejn il-Partijiet jew iġġenerata minnhom għandha tiġi mmarkata, użata u protetta skont il-Ftehim bejn l-Unjoni Ewropea u l-Gvern tal-Istati Uniti tal-Amerika dwar is-Sigurtà tal-Informazzjoni Kklassifikata tat-30 ta’ April 2007 u l-arranġament tal-implimentazzjoni tiegħu, l-Arranġament tas-Sigurtà bejn l-Uffiċċju tas-Sigurtà tas-Segretarjat Ġenerali tal-Kunsill tal-UE (GSCSO) u d-Direttorat tas-Sigurtà tal-Kummissjoni Ewropea (ECSD) u d-Dipartiment tal-Istat tal-Istati Uniti għall-protezzjoni tal-informazzjoni kklassifikata bejn l-UE u l-Istati Uniti.

6.2.

Il-Partijiet għandhom it-tnejn jaħtru Awtorità tas-Sigurtà bħala l-uniku punt ta’ kuntatt u l-awtorità responsabbli għall-proċeduri tal-iżvilupp li jirregolaw is-sigurtà tal-informazzjoni kklassifikata koperta minn dan l-Arranġament tal-Implimentazzjoni.

6.3.

L-informazzjoni u t-Tagħmir u l-Materjal ipprovduti jew iġġenerati skont dan l-Arranġament tal-Implimentazzjoni huma limitati għal SECRET fl-Istati Uniti jew SECRET EU/EU SECRET fl-UE.

7. Kxif mhux awtorizzat tal-informazzjoni

7.1.

“Informazzjoni Mhux Ikklassifikata Kkontrollata” tal-Istati Uniti u informazzjoni sensittiva mhux ikklassifikata tal-UE hija informazzjoni jew dejta preliminari jew ta’ qabel id-deċiżjonijiet, skont il-każ, li ma titqiesx li tkun informazzjoni kklassifikata, iżda li għaliha jkunu ġew applikati limitazzjonijiet fuq l-aċċess jew id-distribuzzjoni u struzzjonijiet dwar l-użu skont il-liġijiet, ir-regolamenti, il-politiki jew il-linji gwida rispettivi tal-Partijiet.

7.2.

Fejn applikabbli, sew jekk l-informazzjoni tkun ipprovduta u sew jekk iġġenerata skont dan l-Arranġament tal-Implimentazzjoni, din għandha tkun immarkata biex il-karattru sensittiv tagħha jkun identifikat skont il-liġijiet, ir-regolamenti, il-politiki jew il-linji gwida rispettivi tal-Partijiet.

7.3.

Għall-Istati Uniti, “Controlled Unclassified Information” tinkludi, iżda mhux biss, informazzjoni mmarkata “Controlled Unclassified Information”“For Official Use Only,”“Law Enforcement Sensitive Information,”“Protected Critical Infrastructure Information,” Sensitive But Unclassified (SBU), u tista’ tinkludi Informazzjoni Kunfidenzjali tan-Negozju. Għall-Kummissjoni Ewropea, l-informazzjoni sensittiva mhux ikklassifikata hija informazzjoni li jkollha marka formalment approvata mid-Direttorat tas-Sigurtà tal-Kummissjoni Ewropea.

7.4.

“Controlled Unclassified Information” tal-Istati Uniti u l-informazzjoni sensittiva mhux ikklassifikata tal-UE prevista skont dan l-Arranġament tal-Implimentazzjoni għandha:

7.4.1.

tkun immarkata kif xieraq sabiex tiġi enfasizzata s-sensittività tagħha,

7.4.2.

ma tintużax għal skopijiet oħra għajr dawk deskritti f’dan l-Arranġament tal-Implimentazzjoni u

7.4.3.

ma għandhiex tiġi rilaxxata lil partijiet terzi mingħajr il-kunsens minn qabel tal-Parti li tibgħat l-informazzjoni jew l-oriġinatur.

7.5.

Il-Partijiet għandhom, skont il-liġijiet u r-regolamenti rispettivi tagħhom, jieħdu l-miżuri neċessarji kollha għad-dispożizzjoni tagħhom biex iħarsu l-informazzjoni mhux ikklassifikata li teħtieġ limitazzjonijiet fuq l-aċċess u d-distribuzzjoni minn kxif mhux awtorizzat.

7.6.

L-arranġamenti dettaljati tas-sigurtà għall-immarkar, il-ħżin, l-użu u l-protezzjoni tal-informazzjoni kkontrollata mhux ikklassifikata jistgħu jiġu stabbiliti mill-Partijiet.

8. Riżoluzzjoni tat-tilwim

8.1.

It-tilwim dwar il-Proprjetà Intellettwali għandu jiġi riżolt skont l-Anness tal-Ftehim.

8.2.

Ħlief għal tilwim li jikkonċerna l-Proprjetà Intellettwali, il-kwistjonijiet jew it-tilwim kollu li jinħoloq skont dan l-Arranġament tal-Implimentazzjoni jew li jkun marbut miegħu għandu jiġi riżolt bi ftehim reċiproku bejn il-Partijiet, b’mod konsistenti mat-termini tal-Ftehim, inkluż l-Artikolu 12.

9. Tul ta’ żmien

Dan l-Arranġament tal-Implimentazzjoni jista jibda malli jiffirmaw iż-żewġ Partijiet. Jibqa’ operattiv sakemm il-Ftehim jibqa’ fis-seħħ jew sakemm Parti ma tkomplix tieħu sehem f’dan l-Arranġament. Jekk Parti biħsiebha ma tkomplix tieħu sehem f’dan l-Arranġament, għandha tagħmel minn kollox biex tavża 90 jum bil-quddiem bl-intenzjoni tagħha lill-Parti l-oħra. Il-protezzjoni tal-informazzjoni kklassifikata u l-prevenzjoni ta’ kull kxif mhux awtorizzat tal-informazzjoni huma maħsuba li jkomplu skont it-termini tal-Ftehim u l-Ftehim tal-2007 dwar is-Sigurtà tal-Informazzjoni Kklassifikata, minkejja l-waqfien jew l-iskadenza ta’ dan l-Arranġament tal-Implimentazzjoni jew tal-Ftehim. Dan l-Arranġament tal-Implimentazzjoni jista’ jiġi mmodifikat jew estiż bil-qbil bil-miktub taż-żewġ Partijiet.

Iffirmat illum, … 2010.

GĦALL-GVERN TAL-ISTATI UNITI TAL-AMERIKA

GĦALL-KUMMISSJONI EWROPEA F’ISEM L-UNJONI EWROPEA