FTEHIM

bejn il-Komunità Ewropea u l-Gvern tar-Repubblika Popolari taċ-Ċina dwar is-sustanzi prekursuri tad-drogi u s-sustanzi li spiss jintużaw fil-manifattura illeċita tad-drogi narkotiċi jew tas-sustanzi psikotropiċi

IL-KOMUNITÀ EWROPEA,

minn hawn ’il quddiem imsejħa “il-Komunità”,

min-naħa waħda, u

IL-GVERN TAR-REPUBBLIKA POPOLARI TAĊ-ĊINA,

minn hawn ’il quddiem imsejjaħ “Il-Gvern Ċiniż”,

minn naħa l-oħra,

minn hawn ’il quddiem imsejħa “Il-Partijiet”

FI ĦDAN IL-QAFAS tal-Konvenzjoni tan-Nazzjonijiet Uniti tal-1988 kontra t-Traffikar Illeċitu tad-Drogi Narkotiċi u s-Sustanzi Psikotropiċi, iffirmata fl-20 ta’ Diċembru 1988 fi Vjenna, minn hawn ’il quddiem imsejħa il-“Konvenzjoni tal-1988” u skont il-leġislazzjoni fis-seħħ fir-Repubblika Popolari taċ-Ċina u fl-Isati Membri tal-Komunità;

IDDETERMINATI li jevitaw u jiġġieldu l-manifattura illeċita tad-drogi narkotiċi u s-sustanzi psikotropiċi billi jevitaw l-iżvijar tas-sustanzi prekursuri tad-drogi u tas-sustanzi kimiċi użati ta’ spiss għal dawn l-għanijiet, (minn hawn ’il quddiem imsejħa “sustanzi prekursuri tad-drogi”);

B’RIKONOXXIMENT tal-Artikolu 12 tal-Konvenzjoni tal-1988,

KONVINTI li l-kummerċ internazzjonali jista’ jkun użat għall-iżvijar tas-sustanzi prekursuri tad-drogi, u li huwa neċessarju li jiġu konklużi u implimentati strumenti ta’ ftehim bejn ir-reġjuni kkonċernati, li jistabbilixxu koperazzjoni wiesgħa u, b’mod partikolari, jgħaqqdu l-kontrolli tal-esportazzjoni u l-importazzjoni;

JAGĦRFU li l-użu prinċipali u mifrux tas-sustanzi prekursuri tad-drogi huwa għal skopijiet leġittimi u li l-kummerċ internazzjonali m’għandux jiġi mfixxkel minn proċeduri eċċessivi ta’ monitoraġġ;

IDDEĊIDEW li jikkonkludu Ftehim dwar il-prevenzjoni tal-iżvijar tas-sustanzi prekursuri tad-drogi u s-sustanzi li spiss jintużaw fil-manifattura illeċita ta’ drogi narkotiċi jew sustanzi psikotropiċi;

FTIEHMU KIF ĠEJ:

Artikolu 1

L-ambitu tal-Ftehim

1.   Dan il-Ftehim jistabbilixxi miżuri biex tiġi msaħħa il-koperazzjoni amministrattiva bejn il-Partijiet biex jiġi prevenut l-iżvijar tas-sustanzi prekursuri tad-drogi li spiss jintużaw fil-manifattura illeċita ta’ drogi narkotiċi jew sustanzi psikotropiċi, mingħajr preġudizzju għall-attivitajiet normali tal-kummerċ u r-rikonoxximent dovut tal-interessi leġittimi tal-industrija.

2.   Għal dan il-għan, il-Partijiet għandhom jassistu lil xulxin, kif stabbilit f’dan il-Ftehim, b’mod partikolari billi:

—	jimmonitorjaw il-kummerċ ta’ bejniethom tas-sustanzi prekursuri tad-drogi msemmija fil-paragrafu 3, bil-għan li jiġi prevenut l-iżvijar tagħhom għal skopijiet illeċiti,

—	jipprovdu assistenza amministrattiva reċiproka biex jiżguraw li l-leġislazzjoni rispettiva tagħhom tal-kontroll tal-kummerċ tas-sustanzi prekursuri tad-drogi tiġi applikata b’mod korrett.

3.   Mingħajr preġudizzju għal emendi possibbli li jistgħu jsiru skont l-Artikolu 10, dan il-Ftehim japplika għas-sustanzi elenkati fl-Annessi ta’ dan il-Ftehim.

Artikolu 2

Monitoraġġ tal-kummerċ

1.   Il-Partijiet għandhom jikkonsultaw u jinfurmaw lil xulxin fuq inizjattiva tagħhom kull meta jkollhom raġunijiet raġonevoli li jġegħluhom jaħsbu li s-sustanzi prekursuri tad-drogi jistgħu jiġu żvijati għall-manifattura illeċita ta’ drogi narkotiċi u sustanzi psikotropiċi, b’mod partikolari meta konsenji ta’ importazzjoni jew ta’ esportazzjoni jseħħu fi kwantitajiet mhux tas-soltu jew taħt ċirkostanzi mhux tas-soltu.

2.   Fir-rigward tas-sustanzi prekursuri tad-drogi elenkati fl-Anness A għal dan il-Ftehim, l-awtorità kompetenti tal-Parti li qiegħda tesporta għandha tibgħat notifika ta’ qabel l-esportazzjoni lill-awtorità kompetenti tal-Parti li qiegħda timporta. It-tweġiba bil-miktub tal-Parti li qiegħda timporta għandha tasal fi żmien ħmistax-il jum tax-xogħol wara li tkun irċeviet il-messaġġ mingħand il-Parti li qiegħda tesporta. In-nuqqas ta’ tweġiba fi żmien dan il-perjodu għandu jitqies daqs li kieku m’hemm l-ebda oġġezzjoni biex tintbagħat il-konsenja. L-oġġezzjoni għandha tiġi nnotifikata bil-miktub lill-Parti li qiegħda tesporta fi żmien dan il-perjodu u għandhom jingħataw ir-raġunijiet għall-oġġezzjoni.

3.   Fir-rigward tas-sustanzi prekursuri tad-drogi elenkati fl-Anness B għal dan il-Ftehim, l-awtorità kompetenti tal-Parti li qiegħda tesporta għandha tiddetermina jekk għandhiex teżegwixxi kontrolli internazzjonali skont il-leġislazzjoni domestika tagħha.

4.   Il-Partijiet jobbligaw irwieħhom li jwieġbu bil-miktub malajr kemm jista’ jkun, rigward kwalunkwe informazzjoni li tingħata jew miżura mitluba skont dan l-Artikolu.

Artikolu 3

Sospensjoni ta’ konsenja

1.   Mingħajr preġudizzju għal kwalunkwe implimentazzjoni ta’ miżuri tekniċi ta’ infurzar, konsenji għandhom jiġu sospiżi jekk, fl-opinjoni ta’ Parti waħda jew tal-oħra, hemm raġunijet raġjonevoli li jġegħluk taħseb li s-sustanzi prekursuri tad-drogi jistgħu jiġu żvijati għall-manifattura illeċita ta’ drogi narkotiċi jew sustanzi psikotropiċi, jew fejn, fil-każijiet deskritti fl-Artikolu 2(2), il-Parti li qiegħda timporta titlob bil-miktub is-sospensjoni, u fejn xieraq, tipprovdi dokumenti ta’ evidenza u miżuri ta’ ċertezza li għandhom jittieħdu fi żmien ħamest ijiem tax-xogħol.

2.   Il-Partijiet għandhom jikkoperaw billi jipprovdu lil xulxin bi kwalunkwe informazzjoni relatata mal-iżvijar ta’ operazzjonjiet suspetti jekk ikunu bbażati fuq talba għal assistenza amministrattiva reċiproka.

Artikolu 4

Assistenza amministrattiva reċiproka

1.   Il-Partijiet għandhom jipprovdu lil xulxin fuq talba għal assistenza amministrattiva reċiproka bi kwalunkwe informazzjoni biex jiġi prevenut l-iżvijar tas-sustanzi prekursuri tad-drogi għall-manifattura illeċita ta’ drogi narkotiċi jew sustanzi psikotropiċi u għandhom jinvestigaw każijiet gfejn jiġi suspettat l-iżvijar. Fejn neċessarju, għandhom jadottaw miżuri xierqa ta’ prekawzjoni biex jiġi prevenut l-iżvijar.

2.   Il-konformità ma’ kwalunkwe talba għal informazzjoni jew miżuri ta’ prekawzjoni għandha ssir fil-ħin.

3.   It-talbiet għal assistenza amministrattiva għandhom isiru skont id-dispożizzjonijiet legali jew regolatorji tal-Parti li qiegħda tagħmel it-talba.

4.   Uffiċjali akkreditati ta’ waħda mill-Partijiet jistgħu, bi ftehim mal-Parti l-oħra u skont il-kundizzjonijiet stipulati minn din tal-aħħar, ikunu preżenti għall-investigazzjonijiet li jitwettqu fit-territorju tal-Parti l-oħra.

5.   Il-Partijiet għandhom jassistu lil xulxin biex jiffaċilitaw il-provvediment ta’ evidenza jekk ikun ibbażat fuq talba ta’ assistenza amministrattiva reċiproka.

6.   L-assistenza amministrattiva prevista f’dan l-Artikolu m’għandhiex tippreġudika r-regoli li jirregolaw l-assistenza reċiproka f’materji kriminali, u lanqas m’għandha tapplika għal informazzjoni miksuba permezz ta’ setgħat eżerċitati fuq it-talba ta’ awtorità ġudizzjali, ħlief meta l-komunikazzjoni ta’ dan it-tip ta’ informazzjoni tkun awtorizzata minn dik l-awtorità.

7.   Parti waħda tista’, abbażi ta’ każ b’każ u permezz ta’ konsultazzjoni, tipprovdi, fuq talba tal-Parti l-oħra, informazzjoni dwar sustanzi li jintużaw spiss fil-manifattura illeċita ta’ drogi narkotiċi u sustanzi psikotropiċi iżda li m’humiex inklużi fl-ambitu ta’ dan il-Ftehim.

Artikolu 5

L-iskambju tal-informazzjoni u l-kunfidenzjalità

1.   Kull informazzjoni ikkomunikata fi kwalunkwe forma skont dan il-Ftehim għandha tkun ta’ natura kunfidenzjali jew ristretta, skont ir-regoli applikabbli f’kull Parti u għandha tkun koperta mill-obbligu tas-segretezza uffiċjali.

2.   L-iskambju ta’ data personali jista’ jsir biss meta l-Parti li tista’ tirċievi din id-data tobbliga ruħha li tipproteġi tali data talanqas b’mod ekwivalenti għal dak applikabbli għal dak il-każ partikolari fil-Parti li tista’ tforniha. Għal dan il-għan, il-Partijiet jikkomunikaw lil xulxin informazzjoni dwar ir-regoli applikabbli tagħhom, inkluż id-dispożizzjonijiet legali fis-seħħ fl-Istati Membri tal-Komunità.

3.   L-informazzjoni miksuba skont dan il-Ftehim għandha tintuża biss għall-iskopijiet ta’ dan il-Ftehim. Meta waħda mill-Partijiet tkun tixtieq tuża din l-informazzjoni għal għanijiet oħra, għandha tikseb minn qabel il-permess bil-miktub tal-awtorità li provdiet l-informazzjoni. Dan l-użu għandu mbagħad ikun suġġett għal kwalunkwe restrizzjoni stabbilita minn dik l-awtorità.

4.   L-użu fi proċeduri istitwiti minħabba nuqqas ta’ konformità mal-leġislazzjoni dwar is-sustanzi prekursuri tad-drogi msemmija fl-Artikolu 3, tal-informazzjoni miksuba skont dan il-Ftehim, huwa kkunsidrat biss għall-għanijiet ta’ dan il-Ftehim. Għalhekk, waqt proċeduri, il-Partijiet jistgħu jużaw bħala evidenza l-informazzjoni miksuba u d-dokumenti li jkunu ġew ikkonsultati skont id-dispożizzjonijiet ta’ dan il-Ftehim. L-użu ta’ evidenza huwa soġġett għall-permess mogħti minn qabel mingħand l-awtorità kompetenti li tkun forniet dik l-informazzjoni jew li tkun tat aċċess għal dawk id-dokumenti.

Artikolu 6

Eċċezzjonijiet għall-obbligu li tkun ipprovduta l-assistenza

1.   L-assistenza tista’ tiġi rifjutata jew tista’ tkun soġġetta għas-sodisfazzjon ta’ ċerti kundizzjonijiet jew rekwiżiti, f’każijiet fejn Parti tkun tal-opinjoni li l-assistenza skont dan il-Ftehim:

(a)	x’aktarx li tippreġudika s-sovranità tar-Repubblika Popolari taċ-Ċina jew dik ta’ Stat Membru tal-Komunità li kien mitlub jipprovdi l-assistenza skont dan il-Ftehim; jew

(b)	x’aktarx li tippreġudika l-ordni pubbliku, is-sigurtà jew l-interessi l-essenzjali l-oħra, b’mod partikolari fil-każijiet imsemmija fl-Artikolu 5(2); jew

(ċ)	tikser sigriet industrijali, kummerċjali jew professjonali.

2.   L-assistenza tista’ tiġi posposta mill-awtorità li tkun irċeviet tali talba fuq il-bażi li tista’ tfixkel investigazzjoni, prosekuzzjoni jew proċediment pendenti. F’tali każ, l-awtorità li tkun irċeviet tali talba għandha tikkonsulta mal-awtorità applikanti biex tiddetermina jekk l-assistenza tistax tingħata soġġetta għal dawk it-termini u l-kundizzjonijiet kif jistgħu jkunu meħtieġa mill-awtorità li tkun irċeviet tali talba.

3.   Meta l-awtorità applikanti tfittex assistenza li jekk mitluba ma tkunx tista’ tipprovdiha hija stess, għandha tiġbed l-attenzjoni għal dak il-fatt fit-talba tagħha. Imbagħad l-awtorità li tkun irċeviet tali talba għandha tiddeċiedi hi kif twieġeb għal din it-talba.

4.   Għall-każijiet imsemmija f’dan l-Artikolu, id-deċiżjoni tal-awtorità li tkun irċeviet tali talba u r-raġunijiet għaliha għandhom jiġu kkomunikati lill-awtorità applikanti fl-iqsar żmien possibbli.

Artikolu 7

Koperazzjoni teknika u xjentifika

Il-Partijiet għandhom jikkoperaw fl-identifikazzjoni ta’ metodi ġodda ta’ żvijar kif ukoll dwar kontromiżuri xierqa, li jinkludu koperazzjoni teknika u b’mod partikolari, taħriġ u programmi ta’ skambju għall-uffiċjali konċernati, biex isaħħu l-istrutturi amministrattivi u ta’ infurzar f’dan il-qasam u jippromwovu l-koperazzjoni man-negozji u l-industrija.

Artikolu 8

Miżuri ta’ implimentazzjoni

1.   Għandha tinħatar awtorità kompetenti min-naħa taċ-Ċina, mill-Kummissjoni Ewropea u minn kull Stat Membru rispettivament sabiex tikkoordina l-implimentazzjoni ta’ dan il-Ftehim. Dawn l-awtoritajiet għandhom jikkommunikaw direttament ma’ xulxin għall-għanijiet ta’ dan il-Ftehim.

2.   Il-Partijiet għandhom jikkonsultaw lil xulxin u sussegwentement iżommu lil xulxin infurmati dwar ir-regoli dettaljati ta’ implimentazzjoni li jiġu adottati skont id-dispożizzjonijiet ta’ dan il-Ftehim.

Artikolu 9

Grupp Konġunt ta’ Segwitu

1.   Grupp Konġunt ta’ Segwitu, minn hawn ’il quddiem “il-Grupp Konġunt ta’ Segwitu”, li fih se jkunu rappreżentati l-Partijiet, huwa b’dan stabbilit.

2.   Il-Grupp Konġunt ta’ Segwitu għandu jaġixxi bi qbil reċiproku.

3.   Jekk ikun neċessarju, il-Grupp Konġunt ta’ Segwitu għandu jiltaqa’, b’data, post u programm iffissati bi qbil reċiproku.

Laqgħat straordinarji tal-Grupp Konġunt ta’ Segwitu jistgħu jissejħu bi qbil reċiproku bejn il-Partijiet.

Artikolu 10

Ir-rwol tal-Grupp Konġunt ta’ Segwitu

1.   Il-Grupp Konġunt ta’ Segwitu għandu jamministra dan il-Ftehim u jiżgura li jiġi implimentat kif xieraq. Għal dan il-għan:

—	Għandu jkun infurmat regolarment mill-Partijiet dwar l-esperjenzi tagħhom fl-applikazzjoni ta’ dan il-ftehim,

—	Fil-każijiet stipulati fil-Paragrafu 2, għandu jieħu d-deċiżjonijiet,

—	Għandu jistudja u jiżviluppa miżuri tekniċi ta’ koperazzjoni,

—	Għandu jistudja u jiżviluppa forom oħra possibbli ta’ koperazzjoni.

2.   Il-Grupp Konġunt ta’ Segwitu jista’ jadotta b’kunsens reċiproku li jemenda l-Annessi A u B. Dan it-tip ta’ deċiżjonijiet għandhom jiġu implimentati mill-Partijiet skont il-leġislazzjoni tagħhom stess.

3.   Il-Grupp Konġunt ta’ Segwitu jista’ jagħmel rakkomandazzjonijiet lill-Partijiet:

(a)	Emendi oħra għal dan il-Ftehim;

(b)	Miżuri meħtieġa għall-applikazzjoni ta’ dan il-Ftehim.

Artikolu 11

Obbligi oħra imposti minn strumenti ta’ ftehim oħra

1.   B’kont meħud tal-kompetenzi rispettivi tal-Komunità u tal-Istati Membri tagħha, id-dispożizzjonijiet ta’ dan il-Ftehim:

—	M’għandhomx jaffettwaw l-obbligi tal-Partijiet stabbiliti f’xi ftehim ieħor jew konvenzjoni oħra internazzjonali;

—	M’għandhomx jaffettwaw il-komunikazzjoni bejn is-servizzi kompetenti tal-Kummissjoni Ewropea u s-servizzi rilevanti tal-Istati Membri tal-Komunità dwar kwalunkwe informazzjoni miksuba skont dan il-Ftehim li tista’ tkun ta’ interess għall-Komunità.

2.   Minkejja d-dispożizzjonijiet tal-Paragrafu 1, id-dispożizzjonijiet ta’ dan il-Ftehim għandu jkollhom preċedenza fuq id-dispożizzjonijiet ta’ kwalunkwe ftehim bilaterali dwar sustanzi prekursuri tad-drogi u sustanzi oħra li jintużaw spiss fil-manifattura illeċita ta’ drogi narkotiċi u sustanzi psikotropiċi li ġew jew jistgħu jiġu konklużi bejn l-Istati Membri individwali u r-Repubblika Popolari taċ-Ċina sa fejn id-dispożizzjonijiet ta’ dawn tal-aħħar ma jkunux kompatibbli ma’ dawk ta’ dan il-Ftehim.

3.   Fir-rigward tal-mistoqsijiet relatati mal-applikabbilità ta’ dan il-Ftehim, il-Partijiet għandhom jikkonsultaw lil xulxin biex jirriżolvu s-sitwazzjoni fil-qafas tal-Grupp Konġunt ta’ Segwitu.

4.   Il-Partijiet għandhom ukoll jinnotifikaw lil xulxin dwar kwalunkwe miżura dwar is-sustanzi kontrollati li tittieħed ma’ pajjiżi oħra.

Artikolu 12

Dħul fis-seħħ

Kull Parti għandha tagħti notifika bil-miktub li lestiet il-proċeduri legali interni tagħha għad-dħul fis-seħħ ta’ dan il-Ftehim lill-Parti l-oħra. Dan il-Ftehim għandu jidħol fis-seħħ 60 jum wara d-data li fiha tasal l-aħħar notifika bil-miktub.

Artikolu 13

Limiti ta’ żmien u denunzja tal-ftehim

1.   Dan il-Ftehim għandu jiġi konkluż għal ħames snin u, sakemm Parti ma tinnotifikax lill-Parti l-oħra bil-miktub dwar l-intenzjoni tagħha li ttemm il-Ftehim talanqas sitt xhur qabel il-perjodu ta’ skadenza, dan għandu jiġġedded b’mod taċitu għal perjodi suċċessivi ta’ ħames snin.

2.   Dan il-Ftehim jista’ jiġi emendat bil-kunsens reċiproku tal-Partijiet.