ARRANĠAMENT

bejn il-Komunità Ewropea u r-Repubblika ta’ l-Iżlanda u r-Renju tan-Norveġja dwar il-modalitajiet tal-parteċipazzjoni ta’ dawn l-Istati fl-Aġenzija Ewropea għall-Ġestjoni tal-Kooperazzjoni Operattiva fil-Fruntieri Esterni ta’ l-Istati Membri ta’ l-Unjoni Ewropea

IL-KOMUNITÀ EWROPEA,

rappreżentata mill-Kunsill ta’ l-Unjoni Ewropea,

min-naħa waħda, kif ukoll

IR-REPUBBLIKA TA’ L-IŻLANDA minn hawn ’il quddiem imsemmija bħala “l-Iżlanda”, kif ukoll

IR-RENJU TAN-NORVEĠJA minn hawn ’il quddiem imsemmi bħala “in-Norveġja”,

min-naħa l-ohra,

WARA LI KKUNSIDRAW il-Ftehim konkluż mill-Kunsill ta’ l-Unjoni Ewropea u r-Repubblika ta’ l-Iżlanda u r-Renju tan-Norveġja li jikkonċerna l-assoċjazzjoni ta’ dawn l-Istati ma’ l-implimentazzjoni, l-applikazzjoni u l-iżvilupp ta’ l-acquis ta’ Schengen (minn hawn ‘il quddiem imsemmi bħala “il-Ftehim”);

BILLI:

(1)

Permezz tar-Regolament tal-Kunsill (KE) Nru 2007/2004 tas-26 ta’ Ottubru 2004 (1) (minn hawn ‘il quddiem imsemmi bħala “ir-Regolament”) il-Komunità Ewropea stabbiliet l-Aġenzija Ewropea għall-Ġestjoni tal-Kooperazzjoni Operattiva fil-Fruntieri Esterni ta’ l-Istati Membri ta’ l-Unjoni Ewropea hawn giegħed ikun approvat f’isem il-Komunità Ewropea (minn hawn ‘il quddiem imsemmija bħala “l-Aġenzija”).

(2)	Ir-Regolament jikkostitwixxi żvilupp ta’ l-acquis ta’ Schengen fit-tifsira tal-Ftehim.

(3)	Ir-Regolament jikkonferma li pajjiżi assoċjati ma’ l-implimentazzjoni, l-applikazzjoni u l-iżvilupp ta’ l-acquis ta’ Schengen għandhom jipparteċipaw bis-sħiħ fl-attivitajiet ta’ l-Aġenzija, anke jekk bi drittijiet tal-vot limitati.

(4)

Il-Ftehm ma jindirizzax il-modalitajiet ta’ l-assoċjazzjoni ta’ l-Iżlanda u n-Norveġja ma’ l-attivitajiet ta’ l-organi ġodda mwaqqfin mill-Unjoni Ewropea fil-qafas ta’ aktar żvilupp ta’ l-acquis ta’ Schengen u ċerti aspetti ta’ dik l-assoċjazzjoni ma’ l-Aġenzija għandhom ikunu sodisfatti fi ftehim addizzjonali bejn il-Partijiet Kontraenti tal-Ftehim,

FTIEHMU KIF ĠEJ:

Artikolu 1

Il-Bord tat-Tmexxija

1.   L-Iżlanda u n-Norveġja għandhom ikunu rappreżentati fil-Bord tat-Tmexxija ta’ l-Aġenzija kif stabbilit fl-Artikolu 21 (3) tar-Regolament.

2.   Dawn għandhom ikollhom drittijiet tal-vot:

(a)	Fir-rigward ta’ deċiżjonijiet dwar attivitajiet speċifiċi li iridu jsiru fuq, jew fil-viċinanza tal-fruntieri esterni tagħhom; proposti ta’ dawn id-deċiżjonijiet għandhom jeżiġu vot favur l-adozzjoni tagħhom minn rappreżentant tagħhom fil-Bord tat-Tmexxija;

(b)

Fir-rigward ta’ deċiżjonijiet dwar attivitajiet speċifiċi skond l-Artikolu 3 (operazzjonijiet konġunti u proġetti pilota fuq il-fruntieri esterni), l-Artikolu 7 (ġestjoni ta’ apparat tekniku), l-Artikolu 8 (appoġġ lil Stati Membri f’ċirkostanzi li jeħtieġu assistenza teknika u operattiva akbar fuq il-fruntieri esterni) u l-Artikolu 9 (1), l-ewwel sentenza (operazzjonijiet konġunti ta’ ritorn) li jridu jitwettqu b’riżorsi umani u/jew tagħmir misluf mill-Iżlanda u/jew in-Norveġja;

(c)	Fir-rigward ta’ deċiżjonijiet dwar l-analiżi tar-riskju (l-iżvilupp ta’ l-analiżi tar-riskju integrata komuni, analiżi tar-riskju ġenerali u speċifika), li jaffettwa lilhom direttament, skond l-Artikolu 4;

(d)	Fir-rigward ta’ deċiżjonijiet dwar attivitajiet ta’ taħriġ skond l-Artikolu 5, bl-eċċezzjoni tat-twaqqif ta’ bażi ta’ kurrikulu komuni.

Artikolu 2

Kontribuzzjoni finanzjarja

L-Iżlanda u n-Norveġja għandhom jikkontribwixxu għall-baġit ta’ l-Aġenzija skond il-persentaġġ stabbilit fl-Artikolu 12 (1) tal-Ftehim.

Artikolu 3

Protezzjoni u kunfidenzjalità tad-data

1.   Id-Direttiva 95/46/KE tal-Parlament Ewropew u tal-Kunsill ta’ l-24 ta’ Ottubru 1995 dwar il-protezzjoni ta’ individwi fir-rigward ta’ l-ipproċessar ta’ data personali u dwar il-moviment liberu ta’ dik id-data  (2) għandhom japplikaw meta data personali tingħadda mill-Aġenzija lill-Awtoritajiet ta’ l-Iżlanda u n-Norveġja.

2.   Ir-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċcembru 2000 dwar il-protezzjoni ta’ individwi fir-rigward ta’ l-ipproċessar ta’ data personali mill-istituzzjonijiet u korpi Komunitarji u dwar il-moviment liberu ta’ din id-data  (3) japplika għall-għoti ta’ data mill-awtoritajiet ta’ l-Iżlanda u n-Norveġja lill-Aġenzija.

3.   L-Iżlanda u n-Norveġja għandhom jirrispettaw ir-regoli dwar il-kunfidenzjalità tad-dokumenti miżmumin mill-Aġenzija, kif stabbiliti fir-Regoli ta’ Proċedura tal-Bord tat-Tmexxija.

Artikolu 4

L-istatus legali

L-Aġenzija għandha personalità legali skond il-liġi ta’ l-Iżlanda u n-Norveġja u għandha tgawdi fl-Iżlanda u n-Norveġja il-kapaċità legali l-aktar estensiva mogħtija lil persuni legali skond il-liġi ta’ l-Iżlanda u n-Norveġja. Tista’, b’mod partikolari, takkwista jew teħles minn proprjetà mobbli u immobbli u tkun parti fi proċeduri legali.

Artikolu 5

Ir-Responsabbiltà

Ir-responsabbiltà ta’ l-Aġenzija għandha tkun regolata, kif previst fl-Artikolu 19 (1), (3) u (5) tar-Regolament.

Artikolu 6

Qorti tal-Ġustizzja

L-Iżlanda u n-Norveġja għandhom jirrikonoxxu l-ġurisdizzjoni tal-Qorti tal-Ġustizzja tal-Komunitajiet Ewropej fuq l-Aġenzija, kif provdut fl-Artikolu 19 (2) u (4) tar-Regolament.

Artikolu 7

Privileġġi u Immunitajiet

L-Iżlanda u n-Norveġja għandhom japplikaw lill-Aġenzija u lill-impjegati tagħha l-Protokoll dwar il-privileġġi u l-Immunitajiet tal-Komunitajiet Ewropej u regoli applikabbli adottati skond dak il-Protokoll.

Artikolu 8

Impjegati

1.   B’deroga mill-Artikolu 12 (2) (a) tal-Kondizzjonijiet ta’ impjieg ta’ funzjonarji oħra tal-Komunitajiet Ewropej, iċ-ċittadini ta’ l-Iżlanda u n-Norveġja li jgawdu mid-drittijiet sħaħ bħala ċittadini jistgħu jkunu impjegati skond kuntratt mid-Direttur Eżekuttiv ta’ l-Aġenzija.

2.   Ċittadini ta’ l-Iżlanda u n-Norveġja ma jistgħux, madankollu, jinħatru fil-postijiet ta’ Direttur Eżekuttiv jew Deputat Direttur Eżekuttiv ta’ l-Aġenzija.

3.   Ċittadini ta’ l-Iżlanda u n-Nroveġja ma jistgħux ikunu eletti bħala Presidenti jew Deputati Presidenti tal-Bord tat-Tmexxija.

Artikolu 9

Id-dħul fis-seħħ

1.   Dan l-Arranġament għandu jidħol fis-seħħ xahar wara il-jum li fih is-Segretarju Ġenerali tal-Kunsill, li għandu jaġixxi bħala d-depożitarju tiegħu, ikun stabbilixxa li l-ħtiġijiet formali kollha li jikkonċernaw l-espressjoni tal-kunsens minn jew f’isem il-Partijiet ta’ dan il-Ftehim jorbtu bih kienu sodisfatti.

2.   Dan l-Arranġament għandu japplika b’mod proviżorju mid-data wara dik tal-firma tiegħu.

Artikolu 10

Validità u tmiem

1.   Dan l-Arranġament għandu jiġi konkluż għal perjodu mhux limitat.

2.   Dan l-Arranġament għandu jieqaf milli jkun fis-seħħ 6 xhur wara li l-Ftehim ikun dikjarat mill-Iżlanda jew min-Norveġja jew b’deċiżjoni tal-Kunsill ta’ l-Unjoni Ewropea jew mod ieħor terminat skond il-proċeduri deskritti fl-Artikoli 11 u 16 tal-Ftehim.

Il-ftehim imsemmi fl-Artikolu 17 tal-Ftehim għandu jkopri wkoll l-konsegwenzi tat-tmiem ta’ dan l-Arranġament.

---

(1)  ĠU L 349, 25.11.2004, p. 1.

(2)  ĠU L 281, 23.11.1995, p. 31.

(3)  ĠU L 8, 12.1.2001, p. 1.