—

wara li kkunsidra l-kontijiet annwali finali taċ-Ċentru Ewropew għall-Iżvilupp tat-Taħriġ Professjonali għas-sena finanzjarja 2004 (1),

—

wara li kkunsidra r-rapport tal-Qorti ta' l-Awdituri dwar il-kotba annwali taċ-Centru Ewropew għall-Iżvilupp tat-Taħriġ Professjonali għas-sena finanzjarja 2004, flimkien mat-tweġibiet taċ-Ċentru (2),

—

wara li kkunsidra r-rakkomandazzjoni tal-Kunsill ta' l-14 ta' Marzu 2006 (5972/2006 — C6- 0093/2006),

—

wara li kkunsidra t-Trattat tal-KE, b'mod partikulari l-Artikolu 276 tiegħu,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta' Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (3), u b'mod partikulari l-Artikolu 185 tiegħu,

—

wara li kkunsidra r-Regolament tal-Kunsill (KEE) Nru 337/75 ta' l-10 ta' Frar 1975 li jistabbilixxi Ċentru Ewropew għall-Iżvilupp tat-Taħriġ Professjonali (4), u b'mod partikulari l-Artikolu 12a tiegħu,

—

wara li kkunsidra r-Regolament tal-Kummissjoni (KE, Euratom) Nru 2343/2002 tad-19 ta' Novembru 2002 dwar ir-Regolament Finanzjarju qafas għall-korpi msemmija fl-Artikolu 185 tar-Regolament tal-Kunsill (KE, Euratom) Nru 1605/2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (5), u b'mod partikulari l-Artikolu 94 tiegħu,

—

wara li kkunsidra l-Artikolu 71 u l-Anness V tar-Regoli ta' Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit (A6-0094/2006),

A.

billi l-Qorti ta' l-Awdituri stqarret li kisbet assigurazzjoni raġonevoli li l-kontijiet annwali għas-sena finanzjarja li ntemmet fil-31 ta' Diċembru 2004 kienu ta' min joqgħod fuqhom u li t-transazzjonijiet sottostanti, meta meqjusa flimkien, kienu legali u regolari,

B.

billi l-Qorti ta' l-Awdituri ddikjarat li kisbet assigurazzjoni raġonevoli mill-aġenziji kollha, minbarra r-riżervi espliċiti għas-sena finanzjarja 2004 fir-rigward ta' l-Aġenzija Ewropea għar-Rikostruzzjoni, iċ-Ċentru Ewropew għall-Iżvilupp tat-Taħriġ Vokazzjonali, il-Fondazzjoni Ewropea għat-Taħriġ, iċ-Ċentru Ewropew tal-Monitoraġġ tar-Razziżmu u l-Ksenofobija u l-Awtorità Ewropea għas-Sigurtà ta' l-Ikel,

C.

billi fit-12 ta' April 2005 l-Parlament ta kwittanza lid-Direttur rigward l-implimentazzjoni tal-baġit taċ-Ċentru għas-sena finanzjarja 2003 (6) u billi fir-riżoluzzjoni tiegħu bil-kummenti li takkumpanja d-deċiżjoni tal-kwittanza (7) huwa ħeġġeġ inter alia liċ-Ċentru biex ilesti l-bidliet fl-organizzazzjoni finanzjarja tiegħu matul l-2005,

1.

ifakkar li, taħt l-Artikolu 185 tar-Regolament Finanzjarju, il-Parlament għandu jagħti kwittanza għall-implimentazzoni tal-baġits tal-korpi mwaqqfa mill-Komunitajiet u li jkollhom personalità ġuridika u li tabilħaqq jirċievu għotjiet li jitħallsu mill-baġit; madankollu, josserva li mhux dawn il-korpi kollha huma kompletament, jew ukoll parzjalment, iffinanzjati minn għotjiet li jitħallsu sussidji mill-baġit; jisħaq li għaldaqstant id-deċiżjoni li jagħti kwittanza tapplika kemm għall-finanzjament baġitarju u u kemm għall-finanazjament mhux baġitarju ta' dawn il-korpi; jikkunsidra inaċċettabbli l-fatt li wħud minn dawn il-korpi imwaqqfa mill-Unjoni jridu jagħtu rendikont ta' l-infiq tad-dħul minn sorsi oħra li ma jkunux mill-baġit, waqt li oħrajn li ma jirċevux sussidju mill-baġit, ma jagħmlux dan; jisħaq fuq il-prinċipju li l-agenziji kollha tal-Komunità, kemm jekk issussidjati u kemm jekk le, huma suġġetti għall-kwittanza mil-Parlament, ukoll meta awtorità oħra ta' kwittanza tintervjeni skond it-testi bażiċi tagħhom; hu tal-fehma hemm il-ħtieġa li jiġu riveduti t-testi kostituttivi kollha li jmorru kontra dan il-prinċipju;

2.

Isib ta' valur kbir it-tabella 1 tar-rapport tal-Qorti ta' l-Awdituri li ġiet introdotta għall-ewwel darba matul l-eżerċizzju tal-kwittanza ta' l-2003, li tagħti sommarju tal-poteri, ir-responsabbiltajiet, it-tmexxija, ir-riżorsi, l-attivitajiet u s-servizzi pprovduti tal-Eurojust; jinnnota li l-informazzjoni li hemm fit-tabella 1 hija pprovduta mill-Eurojust; jitlob lill-Qorti ta' l-Awdituri biex tivverifika l-kontenut tat-tabella 1;

3.

Jinsisti li l-aġenziji mhux biss għandhom jonfqu l-flus b'mod xieraq, iżda għandhom ukoll jagħmlu mill-aħjar biex jonfqu l-flus bl-iktar mod effiċjenti u effettiv possibbli; jistieden lill-Qorti ta' l-Awdituri biex tikkunsidra l-possibbiltà li jiġu estiżi r-rapporti annwali speċifiċi dwar l-aġenziji biex jinkludu eżami tal-prestazzjoni u tal-kisba ta' l-objettivi; f'dan il-kuntest u skond ir-riżoluzzjonijiet li jinsabu fil-kwittanza ta' l-2003, jinsisti li jitqisu l-aspetti li ġejjin: id-dublikazzjoni tax-xogħol fost l-aġenziji għandu jiġi evitat kemm jista' jkun, u l-miżuri maħsuba biex jititejbu t-trasparenza u l-komunikazzjoni mal-pubbliku għandhom jiġu ċċarati, flimkien ma' miżuri Komunitarji għal azzjoni pożittiva fil-livelli kollha tar-reklutaġġ, tat-taħriġ u ta' l-assenjazzjoni ta' responsabiltajiet;

4.

Jinnota li l-aġenziji Komunitarji mhux dejjem ikollhom reputazzjoni tajba jew rapporti tajbin fl-istampa u li ħafna minnhom ma jistħoqqilhomx din ir-reputazzjoni negattiva; josserva li ċ-ċittadini ta' l-UE għandhom jiġu mgħarrfa dwar dan bl-użu ta' mezzi xierqa biex jiġu spjegati għal kemm il-darba jkun meħtieġ ir-raġuni għall-eżistenza ta' l-aġenziji u l-kisbiet tagħhom; jitlob lill-Kummissjoni biex tieħu azzjoni skond dan, bl-użu ta' dawk il-mezzi li tħoss li huma meħtieġa;

5.

Jinnota li t-tkabbir ta' l-Unjoni Ewropea fl-2004 affettwa f'ħafna modi l-istrutturi u l-metodi ta' l-operat ta' l-aġenziji Komunitarji, u li bosta mill-aġenziji jiġbdu l-attenzjoni għal dan fir-rapporti ta' ħidma tagħhom u jiffokaw b'mod partikulari fuq iż-żieda fin-numru ta' amministratturi; jitlob lill-Kummissjoni biex tevalwa l-problemi reali jew maħsuba li tiltaqa' magħhom u biex tirrakkomanda l-bidliet regulatorji meħtieġa;

6.

Jinnota li l-Kummissjoni impenjat ruħha biex tarmonizza l-mod kif ir-rapporti ta' ħidma li jikkonċernaw id-direttorati ġenerali jiġu ppreżentati; isejjaħ għal approċ simili fir-rigward tar-rapporti ta' ħidma ta' l-aġenziji tal-Komunitajiet, li jvarjaw b'mod sinifikattiv f'termini ta' kontenut; jitlob lill-Kummissjoni biex tindika lill-aġenziji tal-Komunitajiet t-tagħrif u l-indikaturi ta' ħidma li jeħtiegu jippreżentaw;

7.

Iħeġġeġ liċ-Ċentru biex jadatta l-baġits tal-ġejjieni b'mod li jiżgura li l-approprjazzjonijiet differenzjati ikunu ppreżentati kif xieraq;

8.

Għandu l-pjaċir jinnota t-tnaqqis sinifikanti fil-fondi ttrasferiti għall-baġit ta' wara miksuba miċ-Ċentru fl-2004 meta mqabbla ma' dawk tas-snin ta' qabel, b'mod li ppermetta li l-baġit implimentat miċ-Ċentru jirrifletti iktar mill-viċin il-baġit approvat mill-Awtorità tal-Baġit;

9.

Jenfasizza li ċ-Ċentru għandu jiżgura li l-kotba jkunu kompluti u li l-attivitajiet kollha, inklużi x-xiri u l-bejgħ min-naħa tal-kantin tal-persunal, jiġu kkontrollati kif xieraq;

10.

Huwa mħasseb dwar l-irregolaritajiet innutati mill-Qorti ta' l-Awdituri fil-proċedura ta' l-għoti tal-kuntratti; jinnota l-passi meħuda miċ-Ċentru biex jiżgura li irregolaritajiet bħal dawn ma jiġux irripetuti; jitlob liċ-Ċentru biex jiżgura li l-ispeċifikazzjonijiet tas-sejħiet għall-offerti u r-regoli tal-kompetizzjonijiet jiġu applikati b'mod strett;

11.

Jinnota l-kummenti tal-Qorti ta' l-Awdituri dwar l-inkonsistenzi fil-proċedura tar-reklutaġġ; jisħaq fuq il-bżonn għal sens ta' ġustizzja, onestà u trasparenza fir-reklutaġġ; jilqa' l-intenzjoni taċ-Ċentru li jipprepara gwida dwar il-proċeduri għar-reklutaġġ fl-2005;

12.

Jinnota l-osservazzjoni taċ-Ċentru fil-kummenti li jakkumpanjaw il-kotba annwali ta' l-2004 li “mhux il-fażijiet kollha tal-proċess ta' modernizzazzjoni ġew kompluti”; jistenna li mal-kontijiet ta' l-2005 jitressaq rapport aktar iddettaljat li jikkonferma jekk il-bidliet fl-organizzazzjoni finanzjarja tiegħu jkunux tlestew u, jekk dan ma jkunx il-każ, li jispjega għaliex ikun ġara dan u xi jkun jonqos isir, u li jindika l-iskeda maħsuba għat-tlestija;

13.

Jilqa' l-informazzjoni pprovduta dwar verifiki interni; jinnota r-rakkomandazzjoni tal-bord tat-Tmexxija fl-opinjoni tiegħu dwar il-kontijiet ta' l-2004, li ċ-Ċentru jiżgura l-implimentazzjoni sħiħa ta' l-istandards tal-kontroll intern; jitlob liċ-Centru biex jirrapporta dwar il-progress f'dan ir-rigward fir-rapport tiegħu dwar il-kontijiet ta' l-2005, u dwar il-progress fir-rigward tal-ħolqien ta' funzjoni speċifika ta' verifika interna u fir-rigward tar-reklutaġġ ta' l-awditur intern tiegħu stess;

14.

Jitlob lill-Kummissjoni biex tgħin lill-aġenziji jimxu kemm jista' jkun mal-pjan ta' ħidma li sar qbil dwaru għas-sena li jmiss, b'mod li jippermetti li l-attivitajiet ikunu ppjanati u implimentati kif inhu xieraq, u b'mod partikulari biex ikunu evitati bidliet kbar u ta' l-aħħar minuta fil-volum tax-xogħol;

15.

Jitlob lill-Kummissjoni sabiex ittejjeb is-sinerġiji bejn l-aġenziji billi tara li l-koperazzjoni tkun iżjed effettiva, billi tevita x-xogħol doppju u billi tindirizza n-nuqqasijiet, b'mod partikulari fir-rigward ta' oqsma komuni bħat-taħriġ, l-implimentazzjoni tal-politiki Komunitarji kollha, l-użu ta' l-aktar sistemi riċenti ta' mmaniġġjar u s-soluzzjoni ta' problemi relatati mat-tħaddim tajjeb tal-baġit.