SKAMBJU TA' ITTRI

dwar l-estensjoni tal-Ftehim fil-forma ta' skambju ta' ittri bejn l-Unjoni Ewropea u l-Gvern ta' l-Indoneżja dwar il-kompiti, l-istatus, il-privileġġi u l-immunitajiet tal-Missjoni ta' Monitoraġġ ta' l-Unjoni Ewropea f'Aceh (l-Indoneżja) (Missjoni ta' Monitoraġġ f'Aceh – AMM) u tal-persunal tagħha

A.   Ittra mill-Gvern tar-Repubblika ta' l-Indoneżja

Ġakarta, 5 ta' Mejju 2006

Eċċellenza,

F'isem il-Gvern tar-Repubblika ta' l-Indoneżja, nixtieq nesprimi l-apprezzament tiegħi lill-Unjoni Ewropea għall-parteċipazzjoni tagħha fil-Missjoni ta' Monitoraġġ f'Aceh (AMM) u għall-ħidmiet eċċezzjonali tagħha li twettqu minn meta seħħ l-insedjament tagħha fil-Provinċja ta' Nanggroe Aceh Darussalam (NAD).

F'dan il-punt, għandi l-unur nirreferi għall-ittra u l-Annessi tagħha tal-Ministru ta' l-Affarijiet Barranin tar-Repubblika ta' l-Indoneżja ad interim datata l-14 ta' Settembru 2005 u l-ittra tiegħek u l-Annessi tagħha datata t-3 ta' Ottubru 2005 dwar il-kompiti, l-istatus, il-privileġġi u l-immunitajiet tal-Missjoni ta' Monitoraġġ f'Aceh (AMM) u għall-ittra tal-Ministru ta' l-Affarijiet Barranin tar-Repubblika ta' l-Indoneżja datata t-13 ta' Frar 2006 u t-tweġiba tiegħek datata t-28 ta' Frar 2006 dwar l-estensjoni tal-preżenza ta' l-Unjoni Ewropea f'NAD sal-15 ta' Ġunju 2006.

F'dak ir-rigward, għandi l-unur ngħaddilek id-deċiżjoni tal-Gvern tar-Repubblika ta' l-Indoneżja li jistieden għal darb'oħra lill-Unjoni Ewropea sabiex testendi l-preżenza tagħha f'NAD għal perjodu mis-16 ta' Ġunju 2006 sal-15 ta' Settembru 2006.

L-istatus, il-privileġġi u l-immunitajiet ta' l-AMM ikunu identiċi għal dawk stipulati fl-iskambju ta' l-ittri tagħna rispettivament datati l-14 ta' Settembru 2005 u t-3 ta' Ottubru 2005 li jikkostitwixxu strument li jorbot legalment bejn il-Gvern tar-Repubblika ta' l-Indoneżja u l-Unjoni Ewropea.

Il-ħidmiet ta' l-AMM matul dan il-perjodu sejrin jinkludu l-kompiti ta' l-AMM kif stabbiliti fl-Artikolu 5.2 tal-Memorandum ta' Ftehim Bejn il-Gvern tar-Repubblika ta' l-Indoneżja u l-Moviment Aceh Ħieles tal-15 ta' Awissu 2005, minbarra l-kompiti (a) u (b) li diġà twettqu.

Jekk il-proposta hawn fuq imsemmija hija aċċettabbli għall-Unjoni Ewropea, għandi l-unur ukoll nipproponi li din l-ittra kif ukoll l-ittra affermattiva tiegħek bħala tweġiba flimkien jikkostitwixxu strument li jorbot legalment bejn il-Gvern tar-Repubblika ta' l-Indoneżja u l-Unjoni Ewropea. Dan l-istrument għandu jidħol fis-seħħ fis-16 ta' Ġunju 2006 u jiġi terminat fil-15 ta' Settembru 2006. Għall-Gvern tar-Repubblika ta' l-Indoneżja dan il-qafas legali huwa bbażat fuq il-Liġi Indoneżjana Nru 2 ta' l-1982 datata 25 ta' Jannar 1982 dwar ir-Ratifika tal-Konvenzjoni dwar Missjoni Speċjali, 1969.

Nemmen li l-koperazzjoni kostruttiva li ġiet stabbilita, bil-ħsieb li tkun provduta soluzzjoni paċifika, komprensiva u sostenibbli għall-isfidi tas-sitwazzjoni f'Aceh, fi ħdan il-qafas ta' l-Istat Unitarju tar-Repubblika ta' l-Indoneżja, tista' tkun aktar sostnuta u msaħħa.

Nistenna bil-ħerqa l-konsiderazzjoni pożittiva tiegħek.

Nassigurak, Sinjur, mill-ikbar stima li għandi lejk.

B.   Ittra mill-Unjoni Ewropea

Brussel,

Eċċellenza,

Għandi l-unur nirreferi għall-ittra tiegħek tal-5 ta' Mejju 2006 li fiha inti wassaltilna d-deċiżjoni tal-Gvern tar-Repubblika ta' l-Indoneżja li jistieden lill-Unjoni Ewropea testendi l-preżenza tagħha fil-Provinċja ta' Nanggroe Aceh Darussalam (NAD) għal perjodu ta' tliet xhur mis-16 ta' Ġunju 2006 sal-15 ta' Settembru 2006.

Għandi l-pjaċir nikkonfermalek li l-Unjoni Ewropea qablet li tirrispondi b'mod pożittiv għal din l-istedina.

Nikkonferma li, skond it-termini ta' l-Iskambju ta' l-Ittri tagħna rispettivament datati l-14 ta' Settembru 2005 u t-3 ta' Ottubru 2005 li jikkostitwixxu strument li jorbot legalment bejn il-Gvern tar-Repubblika ta' l-Indoneżja u l-Unjoni Ewropea, dan l-istrument sejjer jiġi estiż sal-15 ta' Settembru 2006.

Il-ħidmiet ta' l-AMM matul dan il-perjodu sejrin jinkludi l-kompitu ta' l-AMM kif stabbiliti fl-Artikolu 5.2 tal-Memorandum ta' Ftehim Bejn il-Gvern tar-Repubblika ta' l-Indoneżja u l-Moviment Aceh Ħieles tal-15 ta' Awissu 2005, minbarra l-kompiti (a) u (b) li diġà twettqu.

Għandi l-unur ukoll nikkonferma li l-ittra tiegħek u din l-ittra ta' tweġiba jikkostitwixxu strument li jorbot legalment bejn il-Gvern tar-Repubblika ta' l-Indoneżja u l-Unjoni Ewropea. Dan l-istrument għandu jidħol fis-seħħ fis-16 ta' Ġunju 2006 u jiġi terminat fil-15 ta' Settembru 2006.

Ippermettili għal darb'oħra nieħu din l-opportunità sabiex nuri l-apprezzament ta' l-UE għall-progress li sar fil-proċess ta' paċi ta' Aceh u sabiex nafferma mill-ġdid l-impenn kontinwu ta' l-Unjoni Ewropea fl-appoġġ tagħha għall-iżvilupp ta' soluzzjoni paċifika, komprensiva u sostenibbli għall-isfidi li għandu quddiemu Aceh.

Nassigurak, Sinjur, mill-ikbar stima li għandi lejk.

Dejjem tiegħek,