1.

Jilqa’ l-fatt li, f’konformità mal-impenji vinkolanti tagħha, u wara t-talbiet ripetuti tal-Parlament, il-Kummissjoni żviluppat metodoloġija pilota biex issegwi u tkejjel in-nefqa relatata mal-ugwaljanza bejn il-ġeneri fil-livell tal-programm fil-QFP 2021–2027, bl-għan li ttejjeb l-integrazzjoni tal-perspettiva tal-ġeneri fil-proċess baġitarju tal-Kummissjoni u ttejjeb kif it-tfassil tal-politika u l-allokazzjoni tar-riżorsi javvanzaw l-objettivi tal-ugwaljanza bejn il-ġeneri;

2.

Jinnota li, skont il-metodoloġija attwali, il-Kummissjoni tassenja punteġġi differenti lill-programmi abbażi ta’ valutazzjoni tal-kontribut tagħhom għall-ugwaljanza bejn il-ġeneri fl-aktar livell granulari possibbli ta’ intervent, u tagħti punteġġ ta’:

3.

Jinnota li l-metodoloġija hija bbażata fuq l-indikatur tal-politika dwar l-ugwaljanza bejn il-ġeneri żviluppat mill-Organizzazzjoni għall-Kooperazzjoni u l-Iżvilupp Ekonomiċi, li hija għodda statistika kwalitattiva wżata biex jiġu mmonitorjati u rreġistrati l-attivitajiet ta’ żvilupp li jkollhom l-ugwaljanza bejn il-ġeneri bħala objettiv ta’ politika u hija applikata mill-Kummissjoni għall-programmi kollha ta’ nfiq tal-baġit tal-UE taħt ġestjoni kondiviża, diretta u indiretta;

4.

Jisħaq li l-metodoloġija tal-Kummissjoni hija differenti mill-indikatur tal-politika tal-ugwaljanza bejn il-ġeneri żviluppat mill-Organizzazzjoni għall-Kooperazzjoni u l-Iżvilupp Ekonomiċi peress li ma tinkludix punteġġ li jippermetti t-traċċar tal-effetti potenzjalment negattivi tal-infiq tal-UE fuq l-objettivi tal-integrazzjoni tal-perspettiva tal-ġeneri u tintroduċi l-kategorija ta’ 0* għal interventi b’impatt pożittiv probabbli iżda li għadu mhux ċar fuq l-ugwaljanza bejn il-ġeneri; jissottolinja li l-metodoloġija tal-Kummissjoni għandha fi kwalunkwe każ tevita li twassal għal konsegwenzi mhux intenzjonati, bħall-iskoraġġiment jew ir-rifjut ta’ investimenti f’setturi li huma strateġiċi iżda tradizzjonalment iddominati minn ġeneru wieħed, inkluż is-settur tad-difiża;

5.

Jinnota li l-metodoloġija ntużat għall-ewwel darba fil-proċess tal-abbozzar tal-estimi għall-baġit tal-UE għas-sena finanzjarja 2023, flimkien ma’ applikazzjoni retroattiva għall-baġits tas-snin finanzjarji 2021 u 2022;

6.

Jinnota li, għas-sena finanzjarja 2021, fiż-żmien tal-pubblikazzjoni tar-Rapport Annwali dwar il-Ġestjoni u l-Prestazzjoni relatat, minn EUR 352 biljun f’impenji, 1 % tal-impenji kienu rċevew punteġġ ta’ 2, 3 % kienu rċevew punteġġ ta’ 1, 1 % kienu rċevew punteġġ ta’ 0 u 95 % kienu rċevew punteġġ ta’ 0*;

7.

Jinnota li, għas-sena finanzjarja 2022, fiż-żmien tal-pubblikazzjoni tar-Rapport Annwali dwar il-Ġestjoni u l-Prestazzjoni relatat, minn EUR 321 biljun f’impenji, 2 % tal-impenji kienu rċevew punteġġ ta’ 2, 9 % kienu rċevew punteġġ ta’ 1, 16 % kienu rċevew punteġġ ta’ 0 u 73 % kienu rċevew punteġġ ta’ 0*;

8.

Jinnota li, għas-sena finanzjarja 2023, fiż-żmien tal-pubblikazzjoni tar-Rapport Annwali dwar il-Ġestjoni u l-Prestazzjoni relatat, minn EUR 427 biljun f’impenji, 2 % tal-impenji kienu rċevew punteġġ ta’ 2, 9 % kienu rċevew punteġġ ta’ 1, 69 % kienu rċevew punteġġ ta’ 0 u 20 % kienu rċevew punteġġ ta’ 0*;

9.

Jinnota li, għas-sena finanzjarja 2024, fiż-żmien tal-pubblikazzjoni tar-Rapport Annwali dwar il-Ġestjoni u l-Prestazzjoni relatat, minn EUR 195 biljun f’impenji, 3 % tal-impenji kienu rċevew punteġġ ta’ 2, 17 % kienu rċevew punteġġ ta’ 1, 65 % kienu rċevew punteġġ ta’ 0 u 16 % kienu rċevew punteġġ ta’ 0*, u dawn il-punteġġi ġew ittondjati ’l fuq;

10.

Jifhem li s-sehem dejjem jonqos tal-impenji b’punteġġ ta’ 0* matul is-snin huwa r-riżultat ta’ titjib fil-ġbir u d-disponibbiltà ta’ data, u l-kapaċità ta’ rapportar tal-Kummissjoni, li jippermetti lid-direttorati ġenerali tagħha jkejlu aħjar il-kontribut tal-programmi tagħhom għall-ugwaljanza bejn il-ġeneri f’livell aktar granulari;

11.

Jifhem ukoll li, minħabba d-disponibbiltà limitata ta’ data u kapaċità ta’ rapportar matul l-ewwel snin finanzjarji li għalihom ġiet applikata din il-metodoloġija, it-tqabbil taċ-ċifri bejn is-snin differenti abbażi tar-riżultati annwali jew l-użu ta’ informazzjoni minn dan it-tqabbil ftit li xejn għandu valur miżjud;

12.

Jinnota li, skont il-Kummissjoni, l-interventi b’punteġġ ta’ 2 jew 1 jistgħu jitqiesu li jippromwovu l-ugwaljanza bejn il-ġeneri u li meta jitqies dan, l-interventi b’valur ta’ EUR 37,99 biljun ippromwovew l-ugwaljanza bejn il-ġeneri fl-2024, filwaqt li din iċ-ċifra kienet ta’ EUR 10,76 biljun fl-2021, EUR 37,83 biljun fl-2022 u EUR 47,99 biljun fl-2023;

13.

Jinnota li t-tnaqqis fil-valur assolut bejn l-2023 u l-2024 ta’ interventi meqjusa li jippromwovu l-ugwaljanza bejn il-ġeneri huwa konsegwenza diretta tat-tnaqqis fl-ammont totali ta’ impenji bejn dawk is-sentejn finanzjarji, fil-biċċa l-kbira spjegata minn tneħħija gradwali tal-impenji fl-ambitu tal-Faċilità għall-Irkupru u r-Reżiljenza;

14.

Jinnota li minbarra r-riżultati pprovduti għal kull sena finanzjarja, fir-Rapport Annwali dwar il-Ġestjoni u l-Prestazzjoni għall-Baġit tal-UE tal-2024, il-Kummissjoni ppubblikat valutazzjoni mill-ġdid tar-riżultati preċedenti kollha bbażata fuq valutazzjonijiet aktar reċenti u komprensivi tal-programmi tagħha, li rriżultaw f’xejriet aggregati li jindikaw li għall-interventi matul il-perjodu bejn l-2021 u l-2024, 2 % ngħataw punteġġ ta’ 2, 10 % ingħataw punteġġ ta’ 1, 83 % ingħataw punteġġ ta’ 0 u 5 % ngħataw punteġġ ta’ 0*; jinnota wkoll li skont ir-rivalutazzjoni tal-Kummissjoni, b’kollox, fis-snin finanzjarji 2021–2024, 12 % tan-nefqa tal-baġit tal-UE kkontribwiet għall-promozzjoni tal-ġeneru (b’punteġġi ta’ 1 u 2), li jammontaw għal EUR 158,4 biljun;

15.

Jisħaq li mhux il-programmi baġitarji kollha tal-UE għandhom prestazzjoni ugwali f’termini tal-integrazzjoni tal-ġeneru bħala prijorità orizzontali, b’xi programmi jmorru ħafna aħjar minħabba t-tfassil tal-politika tagħhom, bħal programmi taħt l-Intestatura 6 “Il-Viċinat u d-Dinja” fejn il-ġeneru ġie stabbilit bħala prijorità trasversali b’miri u kriterji ċari, u programmi speċifiċi taħt intestaturi oħra bħal Orizzont Ewropa, li, bis-saħħa tar-rekwiżit tiegħu li jimplimenta l-ibbaġitjar skont il-ġeneru, mhux biss irawwem l-ugwaljanza bejn il-ġeneri iżda wkoll iħalli impatt pożittiv fuq il-prattiki tal-Istati Membri permezz ta’ kontaminazzjoni kroċjata matul l-istadju ta’ implimentazzjoni fil-livell nazzjonali;

16.

Jiddispjaċih li, peress li l-metodoloġija użata hija għodda ta’ traċċar imfassla speċifikament għall-baġits operattivi, ma tistax tivvaluta l-baġits amministrattivi tal-istituzzjonijiet u l-korpi tal-UE b’mod adegwat;

17.

Jinnota li l-kamp ta’ applikazzjoni tal-metodoloġija huwa limitat, peress li ma jinkludix b’mod adegwat l-effetti sekondarji jew indiretti tal-programmi fuq l-ugwaljanza bejn il-ġeneri, l-impatti negattivi potenzjali jew id-dimensjonijiet intersezzjonali meħtieġa għal valutazzjoni komprensiva tal-impatti tal-politika;

18.

Jinnota wkoll li l-impatti negattivi potenzjali tal-programmi dwar l-ugwaljanza bejn il-ġeneri mhumiex ikkunsidrati biżżejjed, b’mod partikolari f’setturi bħall-kompetittività, id-difiża u l-preparatezza; jissottolinja li l-promozzjoni tal-ugwaljanza bejn il-ġeneri ma għandhiex twassal għal restrizzjonijiet jew tnaqqis fl-investimenti f’setturi kritiċi; jistieden lill-Kummissjoni tipproponi miżuri konkreti biex ittejjeb l-ugwaljanza bejn il-ġeneri, filwaqt li tiżgura li d-deċiżjonijiet ta’ investiment ma jiġux affettwati b’mod negattiv;

19.

Jiddispjaċih għall-fatt li, minħabba n-natura ex post tagħha, din il-metodoloġija ma tippermettix impatt strutturali fuq it-tfassil tal-politiki fi stadju ex ante jew il-ġbir u l-allokazzjoni ta’ riżorsi finanzjarji, li huwa essenzjali għall-integrazzjoni xierqa tal-ugwaljanza bejn il-ġeneri fil-programmi tal-UE;

20.

Jinnota li lil hinn mill-metodoloġija tal-integrazzjoni tal-perspettiva tal-ġeneri applikata għall-baġit tal-UE, ċerti programmi tal-UE għandhom l-ugwaljanza bejn il-ġeneri integrata fil-bażijiet legali tagħhom filwaqt li oħrajn le;

21.

Jinnota li filwaqt li l-approċċ doppju tal-Kummissjoni għall-integrazzjoni tal-perspettiva tal-ġeneri, jiġifieri li ssegwi l-baġit tal-UE u tistabbilixxi l-objettivi stabbiliti fil-bażijiet legali tal-programmi, huwa qafas utli, dan l-approċċ huwa frammentat u ma jaffettwax il-programmi kollha bl-istess mod, u b’hekk idgħajjef il-koerenza tal-approċċ tal-UE għall-ugwaljanza bejn il-ġeneri;

22.

Jieħu nota tal-valutazzjoni tal-Kummissjoni tal-implimentazzjoni tal-integrazzjoni tal-perspettiva tal-ġeneri fil-baġit tal-UE (11) u jaqbel mal-fehma li, għas-snin li fadal tal-QFP 2021–2027, il-prijorità għandha tkun li l-programmi jkomplu jiġu evalwati sabiex jiġi vvalutat aħjar il-kontribut tagħhom għall-ugwaljanza bejn il-ġeneri u li wieħed jitgħallem mill-implimentazzjoni tagħhom, filwaqt li jsir użu tajjeb mir-rapportar imtejjeb tad-data diżaggregata skont il-ġeneru li ilu fis-seħħ mill-2023; jisħaq fuq il-ħtieġa ta’ kooperazzjoni msaħħa mal-Istati Membri kollha biex jiġu armonizzati l-metodoloġiji u tiġi evitata kwalunkwe frammentazzjoni fl-approċċi tagħhom, u biex jittejbu l-ġbir, l-aggregazzjoni u r-rapportar tad-data;

23.

Jirrikonoxxi li filwaqt li l-metodoloġija żviluppata mill-Kummissjoni hija għodda utli għall-valutazzjoni tal-kontribuzzjoni tal-baġit tal-UE għall-ugwaljanza bejn il-ġeneri, din tiffaċċja limitazzjonijiet li jillimitaw il-kapaċità tagħha għal effett trasformattiv; jisħaq fuq l-importanza li jiġu żgurati d-disponibbiltà tad-data u l-użu ta’ indikaturi tal-prestazzjoni speċifiċi, li jistgħu jitkejlu u jinkisbu, realistiċi u marbuta mal-ħin (SMART) f’dan ir-rigward;

24.

Jissottolinja li peress li l-baġit tal-UE qed jiġi affettwat minn diversi kriżijiet u bidliet fil-prijoritajiet politiċi, huwa essenzjali li l-ibbaġitjar skont il-ġeneru jiġi integrat b’mod proporzjonat fiċ-ċiklu baġitarju ewlieni tal-programmi, ex ante, inkluż f’oqsma prijoritarji ġodda bħall-kompetittività, id-difiża u l-preparatezza;

25.

Jistieden lill-Kummissjoni tiżviluppa approċċ sħiħ u komprensiv għall-ibbaġitjar skont il-ġeneru u metodoloġija speċifika u komprensiva għall-baġit tal-UE, li għandu jsir kompletament operattiv mill-bidu tal-perjodu ta’ programmazzjoni li jmiss u b’potenzjal trasformattiv, peress li se jkun jista’ jinfluwenza ċ-ċiklu baġitarju kollu u jindirizza l-kwistjonijiet identifikati f’din ir-riżoluzzjoni, sabiex tiġi żgurata ġestjoni finanzjarja tajba tal-fondi tal-UE;

26.

Jenfasizza, li minbarra l-QFP, kwalunkwe strument adottat skont l-Artikolu 122 tat-TFUE għandu japplika wkoll dispożizzjonijiet dwar l-integrazzjoni tal-perspettiva tal-ġeneri u l-ibbaġitjar kif xieraq, mingħajr ma jinbidlu l-objettivi tal-programm, il-kriterji ta’ eliġibbiltà jew tal-għoti diġà stabbiliti fil-leġiżlazzjoni speċifika għas-settur, bl-għan li jiġi traċċat il-kontribut tal-UE għall-promozzjoni tal-ugwaljanza bejn il-ġeneri fl-istrumenti ta’ finanzjament kollha b’mod komprensiv u konsistenti;

27.

Jistieden lill-Kummissjoni twettaq valutazzjonijiet tal-impatt ex ante sistematiċi li janalizzaw ukoll l-impatti speċifiċi tal-politiki u l-miżuri ta’ politika fiskali tal-UE – inklużi l-iskemi tat-taxxa u l-programmi ta’ għajnuna mill-Istat – fuq l-ugwaljanza bejn il-ġeneri, f’konformità mal-Linji Gwida għal Regolamentazzjoni Aħjar, bl-għan li jiġu identifikati u mmitigati d-disparitajiet bejn il-ġeneri; jisħaq li għandha tingħata wkoll kunsiderazzjoni bir-reqqa lill-impatti soċjali u ekonomiċi ta’ ugwaljanza mtejba bejn il-ġeneri filwaqt li jitqiesu l-ispejjeż amministrattivi għall-intrapriżi żgħar u ta’ daqs medju;

28.

Ifakkar li l-proposti leġiżlattivi kollha tal-UE jridu jikkonformaw mal-liġi primarja tal-UE, inkluż il-prinċipju tal-ugwaljanza bejn il-ġeneri; jistieden lill-Kummissjoni ssaħħaħ il-valutazzjonijiet tal-impatt ex ante tagħhom sabiex tikkunsidra bir-reqqa u timminimizza kwalunkwe effett negattiv potenzjali fuq l-ugwaljanza bejn il-ġeneri fl-UE meta tħejji proposti leġiżlattivi;

29.

Iħeġġeġ lill-Kummissjoni tistabbilixxi “mekkaniżmu ta’ salvagwardja tal-ugwaljanza bejn il-ġeneri” bħala parti standard mill-proċeduri leġiżlattivi tal-UE, li jkun jirrikjedi r-reviżjoni ta’ kwalunkwe proposta li, permezz tal-analiżi tal-Qorti tal-Awdituri, tintwera li ddgħajjef l-istrateġija u l-objettivi tal-UE dwar l-ugwaljanza bejn il-ġeneri;

30.

Jiddispjaċih dwar l-iżbilanċ tar-rappreżentanza tal-ġeneri fost l-uffiċjali u r-rappreżentanti politiċi kemm fil-livell tal-UE kif ukoll f’dak tal-Istati Membri, li, min-naħa tiegħu, jimmina l-prinċipju tal-ugwaljanza bejn il-ġeneri fir-rappreżentanza;

31.

Jistieden lill-Kummissjoni tivvaluta l-fattibbiltà tal-introduzzjoni ta’ aktar miżuri ta’ parità fl-ugwaljanza bejn il-ġeneri fil-livell maniġerjali biex jiżguraw li l-ġeneri kollha jkunu involuti biżżejjed fit-tfassil tal-politika permezz ta’ skemi ta’ appoġġ immirati;

32.

Jistieden lill-Kummissjoni tiżgura li sehem minimu tal-baġit tal-UE jkun iddedikat biex l-ugwaljanza bejn il-ġeneri ssir objettiv ewlieni (li jikkorrispondi għal punteġġ ta’ 2 fil-metodoloġija attwali);

33.

Jistieden lill-Kummissjoni tesplora l-possibbiltà tal-istabbiliment ta’ mira kwantitattiva fil-perjodu ta’ programmazzjoni li jmiss sabiex sehem mill-baġit tal-UE jikkontribwixxi għall-promozzjoni tal-ugwaljanza bejn il-ġeneri (li jikkorrispondi għal punteġġ ta’ 2 jew 1 fil-metodoloġija attwali), u jinnota li tali miri wrew li huma utli fl-avvanz tal-miri tal-UE dwar il-klima u l-bijodiversità;

34.

Jistieden lill-Kummissjoni u lill-Kunsill jirrispettaw id-dispożizzjonijiet stabbiliti fir-Regolament Finanzjarju rivedut matul in-negozjati dwar il-ġenerazzjoni li jmiss ta’ programmi, jiġifieri li l-programmi u l-attivitajiet għandhom, fejn fattibbli u xieraq, jiġu implimentati f’konformità mar-regoli rilevanti speċifiċi għas-settur, jiġu implimentati b’kont meħud tal-prinċipju tal-ugwaljanza bejn il-ġeneri u f’konformità ma’ metodoloġija xierqa għall-integrazzjoni tal-perspettiva tal-ġeneri;

35.

Iqis li huwa kruċjali, f’konformità mar-Regolament Finanzjarju rivedut, li jiġi żgurat li l-ġenerazzjoni li jmiss ta’ programmi tinkludi objettivi li jippermettu, fejn xieraq, il-ġbir ta’ data diżaggregata skont il-ġeneru u l-aggregazzjoni ta’ tali data fil-programmi rilevanti kollha; jistieden lill-Kummissjoni tkompli tiżviluppa u ttejjeb il-metodoloġija tagħha biex issegwi l-kontribuzzjoni tal-baġit tal-UE għall-ugwaljanza bejn il-ġeneri, inkluż permezz tal-użu sistematiku ta’ għodod diġitali, bħall-intelliġenza artifiċjali, biex ittejjeb il-ġbir, l-aggregazzjoni u l-analiżi bejn il-programmi tad-data;

36.

Jistieden lill-atturi rilevanti kollha, inkluż il-Kunsill, il-Kummissjoni, l-organizzazzjonijiet tas-soċjetà ċivili u sħab rilevanti oħra, jistinkaw biex l-ibbaġitjar skont il-ġeneru jsir realtà fil-perjodu ta’ programmazzjoni li jmiss;

37.

Jistieden lill-Kummissjoni talloka sehem akbar tal-baġit tal-azzjonijiet esterni tal-UE għal interventi li jikkontribwixxu għall-ugwaljanza bejn il-ġeneri u t-tisħiħ tal-pożizzjoni tan-nisa u tiddedika wkoll 25 % tal-istrumenti ta’ finanzjament estern tal-UE fil-QFP li jmiss għall-promozzjoni tal-ugwaljanza bejn il-ġeneri bħala objettiv prinċipali; jistieden ukoll lill-Kummissjoni tistabbilixxi fond iddedikat biex tippromwovi l-ugwaljanza bejn il-ġeneri globalment u li tiżgura li l-azzjonijiet li tappoġġja jiffukaw fuq l-aċċess għas-saħħa u d-drittijiet sesswali u riproduttivi, iżżid il-parteċipazzjoni tan-nisa fit-teħid tad-deċiżjonijiet, tappoġġja organizzazzjonijiet mhux governattivi lokali mmexxija min-nisa, u tassisti lid-difensuri lokali tad-drittijiet tal-bniedem tan-nisa;

38.

Jistieden lill-Kummissjoni tistabbilixxi objettivi ċari għall-QFP li jmiss sabiex tikkontribwixxi għat-tnaqqis tad-differenza bejn il-ġeneri fil-pagi u fil-pensjonijiet u tindirizza l-kwistjoni tal-faqar fost in-nisa, inkluż permezz tat-titjib tas-servizzi tal-indukrar tat-tfal;

39.

Jistieden lill-Kummissjoni tiżgura li l-programmi ffinanzjati mill-UE jipproteġu u jippromwovu d-drittijiet tan-nisa, b’attenzjoni partikolari għall-aċċess għall-kura tas-saħħa pubblika, l-indukrar tat-tfal u s-saħħa u d-drittijiet sesswali u riproduttivi;

40.

Jistieden lill-istituzzjonijiet tal-UE, f’konformità mal-prinċipji tad-Direttiva dwar it-Trasparenza fil-Pagi (12), janalizzaw u jirrapportaw dwar id-differenzi possibbli tagħhom fil-pagi bejn il-ġeneri u jieħdu miżuri xierqa fejn meħtieġ; itenni t-talba tiegħu lill-istituzzjonijiet, il-korpi, l-uffiċċji u l-aġenziji tal-UE biex itejbu l-bilanċ bejn il-ġeneri, speċjalment fil-livell tal-maniġment superjuri; jistieden lill-istituzzjonijiet, il-korpi, l-uffiċċji u l-aġenziji tal-UE jwettqu analiżi biex jidentifikaw oqsma fi ħdan iċ-ċiklu tar-riżorsi umani – mir-reklutaġġ sal-aċċess għall-promozzjonijiet – fejn tali titjib huwa l-aktar meħtieġ, u jesploraw il-possibbiltà li jimplimentaw aktar miżuri biex jinkiseb bilanċ bejn il-ġeneri mill-aktar fis possibbli;

41.

Jirrikonoxxi d-disparitajiet persistenti bejn il-ġeneri f’diversi setturi li tradizzjonalment huma ddominati minn ġeneru wieħed; jistieden lill-Kummissjoni tapplika bbaġitjar skont il-ġeneru biex tiżgura u timmonitorja kundizzjonijiet nondiskriminatorji biex jiġu aċċessati l-ħiliet meħtieġa u l-programmi edukattivi għall-ġeneri kollha, u ttejjeb l-ugwaljanza bejn il-ġeneri f’dawn is-setturi speċifiċi bl-għan li tissaħħaħ il-kompetittività tal-industrija; jitlob li tingħata attenzjoni partikolari lill-intraprendituri nisa, speċjalment f’intrapriżi żgħar u ta’ daqs medju u start-ups, inkluż permezz ta’ monitoraġġ speċifiku fi ħdan programmi, bħal InvestEU u Orizzont Ewropa; jappella għal mekkaniżmi ta’ monitoraġġ u rapportar aktar b’saħħithom biex jiġi żgurat li l-fondi jkunu ta’ benefiċċju ġenwin għan-nisa u għall-gruppi emarġinati;

°

° °

42.

Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill u lill-Kummissjoni.