—

wara li kkunsidra t-Trattati, u b’mod partikolari l-Artikoli 9, 10, 14 u 17(7) tat-Trattat dwar l-Unjoni Ewropea (TUE) u l-Artikoli 20, 22, 223(1) u 225 tat-Trattat dwar il-Funzjonament tal-Unjoni Ewropea (TFUE), u l-Artikolu 2 tal-Protokoll Nru 1 dwar ir-rwol tal-parlamenti nazzjonali tal-Unjoni Ewropea,

—

wara li kkunsidra l-Artikolu 106a(1) tat-Trattat li jistabbilixxi l-Komunità Ewropea tal-Enerġija Atomika,

—

wara li kkunsidra l-Att li jikkonċerna l-elezzjoni tal-membri tal-Parlament Ewropew b’vot universali dirett (“l-Att Elettorali”), anness mad-Deċiżjoni tal-Kunsill 76/787/KEFA, KEE, Euratom tal-20 ta’ Settembru 1976 u kif emendat, u b’mod partikolari l-Artikolu 6 tagħha,

—

wara li kkunsidra l-Artikolu 5 tad-Deċiżjoni tal-Parlament Ewropew tat-28 ta’ Settembru 2005 li tadotta l-istatut għall-membri tal-Parlament Ewropew (1),

—

wara li kkunsidra r-riżoluzzjonijiet preċedenti tiegħu dwar il-proċedura elettorali tal-Parlament Ewropew, u b’mod partikolari r-riżoluzzjoni tiegħu tal-15 ta’ Lulju 1998 dwar abbozz ta’ proċedura elettorali li jinkorpora prinċipji komuni għall-elezzjoni tal-Membri tal-Parlament Ewropew (2), ir-riżoluzzjoni tiegħu tat-22 ta’ Novembru 2012 dwar l-Elezzjonijiet tal-Parlament Ewropew fl-2014 (3), ir-riżoluzzjoni tiegħu tal-4 ta’ Lulju 2013 dwar it-titjib tal-modalitajiet prattiċi ta’ organizzazzjoni tal-elezzjonijiet Ewropej tal-2014 (4), ir-riżoluzzjoni tiegħu tal-11 ta’ Novembru 2015 dwar ir-riforma tal-liġi elettorali tal-Unjoni Ewropea (5) u r-riżoluzzjoni tiegħu tat-3 ta’ Mejju 2022 dwar il-proposta għal Regolament tal-Kunsill dwar l-elezzjoni tal-membri tal-Parlament Ewropew b'suffraġju universali dirett, li jħassar id-Deċiżjoni tal-Kunsill (76/787/KEFA, KEE, Euratom) u l-Att dwar l-elezzjoni tal-membri tal-Parlament Ewropew b'suffraġju universali dirett anness ma' dik id-Deċiżjoni (6),

—

wara li kkunsidra l-Ftehim Qafas tal-20 ta’ Ottubru 2010 dwar ir-relazzjonijiet bejn il-Parlament Ewropew u l-Kummissjoni Ewropea, kif modifikat fis-17 ta’ Frar 2018  (7),

—

wara li kkunsidra l-Karta tad-Drittijiet Fundamentali tal-Unjoni Ewropea, u b’mod partikolari l-Artikolu 33 tagħha,

—

wara li kkunsidra l-Artikoli 46 u 55 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Kostituzzjonali (A10-0214/2025),

A.

billi l-Parlament Ewropew għandu d-dritt li jibda r-riforma tal-proċedura elettorali proprja, u li jagħti l-approvazzjoni tiegħu għaliha;

B.

billi l-possibbiltà li tiġi żviluppata proċedura elettorali uniformi bbażata fuq vot universali dirett ilha minquxa fit-Trattati mill-1957;

C.

billi r-riforma tal-proċedura elettorali tal-Parlament Ewropew għandha timmira li ssaħħaħ id-dimensjoni demokratika tal-elezzjonijiet Ewropej, ittejjeb il-funzjonament tal-Parlament Ewropew u tal-governanza tal-Unjoni, tagħmel il-ħidma tal-Parlament Ewropew aktar leġittima u effiċjenti u tipprevedi ugwaljanza elettorali akbar għaċ-ċittadini tal-Unjoni;

D.

billi l-politiki relatati mal-bilanċ bejn ix-xogħol u l-ħajja privata għandhom jikkontribwixxu biex tinkiseb l-ugwaljanza bejn il-ġeneri permezz tal-promozzjoni tal-parteċipazzjoni tal-ommijiet fil-politika;

E.

billi r-riforma tal-proċedura elettorali trid tirrispetta l-prinċipji ta’ sussidjarjetà u proporzjonalità;

1.

Jiddeċiedi li jsaħħaħ ir-regoli dwar il-maternità għall-Membri tal-Parlament Ewropew li jixtiequ jkomplu jaqdu d-dmirijiet parlamentari tagħhom;

2.

Jipproponi reviżjoni mmirata tal-Att Elettorali Ewropew li tippermetti lill-Membri jiddelegaw, waqt it-tqala u wara li jwelldu, il-vot tagħhom fil-plenarja lil Membru ieħor tal-għażla tagħhom;

3.

Jemmen li din ir-riformi se tippermetti lill-Membri, fil-perjodi immedjatament qabel u wara li jsiru ommijiet, jeżerċitaw bis-sħiħ il-mandati tagħhom, u b’hekk titjieb l-ekwità istituzzjonali u l-inklużjoni fil-Parlament Ewropew;

4.

Jadotta l-proposta li tinsab fl-Anness u jippreżentaha lill-Kunsill;

5.

Jagħti istruzzjonijiet lill-President tiegħu biex tgħaddi din ir-riżoluzzjoni leġiżlattiva, kif ukoll il-proposta annessa magħha, lill-Kunsill Ewropew, lill-Kunsill u lill-Kummissjoni, kif ukoll lill-parlamenti u lill-gvernijiet tal-Istati Membri.