Talba għal deċiżjoni preliminari mressqa mill-Corte d’appello di Roma (l-Italja) fis-6 ta’ Novembru 2025 – Questura di Roma vs SG

(Kawża C-706/25, Comeri (1) )

(C/2026/159)

Lingwa tal-kawża: it-Taljan

Qorti tar-rinviju

Corte d’appello di Roma

Partijiet fil-kawża prinċipali

Rikorrent: Questura di Roma

Konvenut: SG

Domandi preliminari

L-Artikolu 4(3) TUE, l-Artikolu 3(2) TFUE u l-Artikolu 216(1) TFUE, li jipprovdu li l-Unjoni għandha kompetenza esklużiva li tikkonkludi ftehimiet internazzjonali, meta din il-konklużjoni tkun prevista f’att leġiżlattiv tal-Unjoni jew tkun neċessarja sabiex l-Unjoni tkun tista’ teżerċita l-kompetenza interna tagħha, jew sa fejn il-konklużjoni tagħha tista’ tolqot regoli komuni jew tbiddel il-kamp tal-applikazzjoni tagħhom, b’tali mod li, skont il-prinċipju ta’ kooperazzjoni leali, is-setgħa li tikkonkludi ftehimiet ma’ Stati terzi, li jaffettwaw jew ibiddlu l-kamp ta’ applikazzjoni ta’ regoli komuni jew li jaffettwaw qasam kopert b’mod eżawrjenti mir-regoli [tal-Unjoni Ewropea] u li jaqa’ taħt il-kompetenza esklużiva tal-Unjoni, huma ċċentralizzati fl-Unjoni stess — jipprekludu l-konklużjoni minn Stat Membru ta’ ftehim internazzjonali ma’ pajjiż terz għall-ġestjoni tal-flussi migratorji bħall-Protokoll konkluż bejn l-Italja u l-Albanija?

fil-każ ta’ risposta negattiva għal din id-domanda, id-dritt tal-Unjoni, u b’mod partikolari:

—

l-Artikolu 26 tad-Direttiva 2013/32/UE (2) u [l-Artikolu] 8(1), (2) u (4) [u l-Artikolu] 9(2) u (3) tad-Direttiva 2013/33/UE (3), dawn tal-aħħar moqrija wkoll flimkien mal-premessa 15 tagħha, interpretati kollha fid-dawl tal-Artikolu 6 tal-Karta [tad-Drittijiet Fundamentali tal-Unjoni Ewropea], fil-qasam tad-detenzjoni;

—	l-Artikolu 46 tad-Direttiva 2013/32/UE u l-Artikolu 10(4) tad-Direttiva 2013/33, interpretati fid-dawl tal-Artikolu 47 tal-Karta, f’dak li jirrigwarda d-drittijiet tad-difiża u ż-żjara lid-detenut;

—	l-Artikoli 17(2) u (3) u 19 tad-Direttiva 2013/33 f’dak li jikkonċerna d-dritt għas-saħħa tal-applikant għall-ażil,

jipprekludu l-kondotta u l-permanenza taċ-ċittadin ta’ pajjiż terz, li jkun ukoll applikant għall-ażil, f’żoni li jinsabu barra mit-territorju tal-Unjoni Ewropea skont ftehim internazzjonali tat-tip tal-Protokoll konkluż bejn l-Italja u l-Albanija?.

(1) L-isem ta’ din il-kawża huwa fittizju. Dan l-isem ma jikkorrispondi għall-isem reali ta’ ebda waħda mill-partijiet fil-proċedura.

(2) Direttiva 2013/32/UE tal-Parlament Ewropew u tal-Kunsill, tas-26 ta’ Ġunju 2013, dwar proċeduri komuni għall-għoti u l-irtirar tal-protezzjoni internazzjonali (riformulazzjoni) (ĠU 2013, L 180, p. 60).

(3) Direttiva 2013/33/UE tal-Parlament Ewropew u tal-Kunsill tas-26 ta’ Ġunju 2013 li tistabbilixxi l-istandards dwar l-akkoljenza ta’ applikanti għall-protezzjoni internazzjonali (riformulazzjoni) (ĠU 2013, L 180, p. 96).