L-AWTORITÀ TA’ SORVELJANZA TAL-EFTA

Komunikazzjoni mill-Awtorità ta’ Sorveljanza tal-EFTA ppubblikata skont l-Artikolu 27(4) tal-Kapitolu II tal-Protokoll 4 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u Qorti tal-Ġustizzja

(Każ Nru 84445 — Elkjøp)

(C/2025/6068)

1 INTRODUZZJONI

Skont l-Artikolu 9 tal-Kapitolu II tal-Protokoll 4 tal-Ftehim bejn l-Istati tal-EFTA dwar it-Twaqqif ta’ Awtorità ta’ Sorveljanza u Qorti tal-Ġustizzja (“SCA”), l-Awtorità ta’ Sorveljanza tal-EFTA (“ESA”) – f’każ li jkun beħsiebha tadotta deċiżjoni li tobbliga li ksur jinġieb fi tmiemu u l-partijiet ikkonċernati joffru li jidħlu għal impenji li jkunu jissodisfaw it-tħassib indikat lilhom mill-ESA fil-valutazzjoni preliminari tagħha – tista’ tiddeċiedi li dawk l-impenji tagħmilhom vinkolanti fuq l-impriżi. Deċiżjoni ta’ dan it-tip tista’ tiġi adottata għal perjodu speċifiku u għandha tikkonkludi li ma għadx hemm raġunijiet għal azzjoni mill-ESA. Deċiżjoni ta’ dan it-tip ma tasalx għal konklużjoni dwar jekk kienx hemm jew għadx hemm ksur.

Skont l-Artikolu 27(4) tal-Kapitolu II tal-Protokoll 4 tal-SCA, l-ESA għandha tippubblika sommarju konċiż tal-każ u l-kontenut prinċipali tal-impenji. Il-partijiet interessati jistgħu jippreżentaw il-kummenti tagħhom sal-limitu taż-żmien stabbilit mill-ESA.

2 SOMMARJU TAL-KAŻ

Fit-23 ta’ Mejju 2023, l-ESA bdiet proċedimenti skont l-Artikolu 2(1) tal-Kapitolu III tal-Protokoll 4 tal-SCA kontra Dixons Stores Group Retail Norway AS, Elkjøp Nordic AS u Elkjøp Norge AS (b’mod konġunt “Elkjøp”).

Fis-27 ta’ Ġunju 2025, l-ESA adottat valutazzjoni preliminari skont it-tifsira tal-Artikolu 9(1) tal-Kapitolu II tal-Protokoll 4 tal-SCA dwar allegat ksur tal-Artikolu 54 tal-Ftehim dwar iż-Żona Ekonomika Ewropea (“il-Ftehim ŻEE”) minn Elkjøp fin-Norveġja.

Skont il-valutazzjoni preliminari, l-ESA għandha indikazzjonijiet li Elkjøp seta’ kellha pożizzjoni dominanti f’suq wieħed jew aktar għall-bejgħ bl-imnut ta’ prodotti elettroniċi fin-Norveġja.

L-ESA hija mħassba li Elkjøp setgħet abbużat mill-pożizzjoni dominanti tagħha skont l-Artikolu 54 tal-Ftehim ŻEE billi ġiegħlet, inċentivat u/jew daħlet f’arranġamenti mal-fornituri tagħha biex tillimita l-provvisti ta’ prodotti elettroniċi lil kompetituri speċifiċi ta’ Elkjøp. Dan l-allegat aġir seta’ potenzjalment kellu l-effett li jirrestrinġi l-kompetizzjoni f’suq wieħed jew aktar għall-bejgħ bl-imnut ta’ prodotti elettroniċi fin-Norveġja, billi jnaqqas il-kompetizzjoni diretta u jillimita l-effettività tal-kompetituri fil-mira tal-aġir allegat ta’ Elkjøp.

3. IL-KONTENUT PRINĊIPALI TAL-IMPENJI OFFRUTI

Elkjøp ma taqbilx mad-deskrizzjoni tal-aġir tagħha mill-ESA jew mal-analiżi legali fil-valutazzjoni preliminari. Madankollu, Elkjøp offriet impenji skont l-Artikolu 9(1) tal-Kapitolu II tal-Protokoll 4 tal-SCA, biex tissodisfa t-tħassib preliminari tal-ESA dwar il-kompetizzjoni.

L-elementi prinċipali tal-impenji huma kif ġej:

(a)

Elkjøp timpenja ruħha li ma tidħolx fi ftehimiet ma’ fornituri li jkollhom il-kundizzjoni ta’ termini li ma jkun hemm l-ebda distribuzzjoni, li jkun hemm tnaqqis fid-distribuzzjoni jew li jkun hemm distribuzzjoni inqas favorevoli għal kompetituri speċifiċi ta’ Elkjøp fin-Norveġja. Elkjøp la għandha ġġiegħel, tinċentiva u lanqas titlob li d-distribuzzjoni lil Elkjøp tkun soġġetta għal termini li ma jkun hemm l-ebda distribuzzjoni, li jkun hemm tnaqqis fid-distribuzzjoni jew li jkun hemm distribuzzjoni inqas favorevoli għal kompetituri speċifiċi ta’ Elkjøp fin-Norveġja.

(b)	Elkjøp timpenja ruħha li tibgħat ittra annwali standard lill-fornituri attwali u futuri kollha tagħha li tinfurmahom bl-impenji ta’ Elkjøp.

(c)	Elkjøp timpenja ruħha li tipprovdi taħriġ annwali dwar il-konformità mal-kompetizzjoni lill-impjegati rilevanti, jiġifieri impjegati li jaħdmu fid-dipartiment kummerċjali tagħha u impjegati li jinnegozjaw u/jew jixtru mingħand il-fornituri.

(d)	Elkjøp timpenja ruħha li timplimenta l-obbligi ta’ monitoraġġ u rapportar.

L-impenji se jkunu applikabbli għal perjodu ta’ ħames snin mid-dħul fis-seħħ tagħhom. Dawn jistgħu jiġu estiżi għal perjodu ta’ sa ħames snin addizzjonali, jekk ikun meħtieġ u proporzjonat.

10.

L-impenji huma ppubblikati bis-sħiħ bl-Ingliż fis-sit tal-ESA fl-indirizz: https://www.eftasurv.int/competition/competition-cases/elkjop

4. STEDINA GĦALL-KUMMENTI

11.

Wara li jsir l-ittestjar tas-suq, L-ESA beħsiebha tadotta deċiżjoni skont l-Artikolu 9(1) tal-Kapitolu II tal-Protokoll 4 tal-SCA li tagħmel l-impenji miġbura fil-qosor hawn fuq u ppubblikati fis-sit web tal-ESA vinkolanti.

12.

F’konformità mal-Artikolu 27(4) tal-Kapitolu II tal-Protokoll 4 tal-SCA, l-ESA tistieden lil terzi interessati biex jissottomettu l-kummenti tagħhom dwar l-impenji proposti. Dawn l-osservazzjonijiet iridu jaslu għand l-ESA mhux aktar tard minn xahar wara d-data ta’ din il-pubblikazzjoni f’Il-Ġurnal Uffiċjali tal-Unjoni Ewropea u fis-Suppliment taż-ŻEE tiegħu. It-terzi interessati huma wkoll mistiedna jippreżentaw verżjoni mhux kunfidenzjali tal-kummenti tagħhom, li fiha kull informazzjoni li jiddikjaraw li hija sigriet kummerċjali u informazzjoni kunfidenzjali oħra għandha titħassar u tiġi ssostitwita kif meħtieġ b'sommarju mhux kunfidenzjali jew bil-kliem “sigrieti kummerċjali” jew “kunfidenzjali”.

13.

It-tweġibiet u l-kummenti għandhom preferibbilment ikunu motivati u għandhom jippreżentaw il-fatti rilevanti. Jekk tidentifika problema fi kwalunkwe parti tal-Impenji proposti, l-ESA tistiednek ukoll biex tissuġġerixxi soluzzjoni possibbli.

14.

Il-kummenti jistgħu jintbagħtu lill-ESA bin-numru ta’ referenza Każ Nru 84445 — Elkjøp jew bil-posta elettronika lil registry@eftasurv.int, jew bil-posta lil:

EFTA Surveillance Authority

Competition and State Aid Directorate

Avenue des Arts 19H

1000 Brussels

BELGIQUE/BELGIË