1)

Distributur li ma huwiex persuna responsabbli fis-sens tal-Artikolu 4(6) tar-Regolament (KE) Nru 1223/2009 (1) tal-Parlament Ewropew u tal-Kunsill tat-30 ta’ Novembru 2009 dwar il-prodotti kożmetiċi għandu, skont l-Artikolu 6(1) u l-ewwel subparagrafu tal-Artikolu 6(3) tal-imsemmi regolament, raġuni għalfejn jaħseb li r-reklamar magħmul minn manifattur ma jissodisfax ir-rekwiżiti tal-Artikolu 20(1) tal-istess regolament meta huwa juża r-reklamar imqiegħed għad-dispożizzjoni tiegħu mill-manifattur għal finijiet kummerċjali tiegħu stess, mingħajr ma jivverifika jekk il-funzjonijiet tal-prodott kożmetiku li huwa s-suġġett tar-reklamar humiex issostanzjati b’mod suffiċjenti? Jew id-distributur għandu biss taħt ċerti kundizzjonijiet – u fl-affermattiv, taħt liema – raġuni għalfejn jaħseb, skont l-Artikolu 6(1) u l-ewwel subparagrafu tal-Artikolu 6(3) tal-imsemmi regolament, li r-reklamar tal-manifattur li huwa juża ma jissodisfax ir-rekwiżiti tal-Artikolu 20(1) ta’ dan ir-regolament, u għandu jivverifika jekk il-funzjonijiet tal-prodott kożmetiku li huwa s-suġġett tar-reklamar humiex suffiċjentement issostanzjati?

2)

Id-dispożizzjonijiet tal-Artikolu 4(6) kif ukoll tal-Artikolu 6(1) u tal-ewwel subparagrafu tal-Artikolu 6(3) tar-Regolament Nru 1223/2009 jipprekludu li r-reklamar ta’ distributur li fih allegazzjoni qarrieqa magħmula mill-manifattur fir-rigward tal-funzjonijiet ta’ prodott kożmetiku jitqies bħala prattika kummerċjali żleali fis-sens tal-Artikolu 5(1) u (4)(a) kif ukoll tal-Artikolu 6(1)(b) tad-Direttiva 2005/29/KE (2) tal-Parlament Ewropew u tal-Kunsill tal-11 ta’ Mejju 2005 dwar prattiċi kummerċjali żleali fin-negozju mal-konsumatur fis-suq intern u li temenda d-Direttiva tal-Kunsill 84/450/KEE, id-Direttivi 97/7/KE, 98/27/KE u 2002/65/KE tal-Parlament Ewropew u tal-Kunsill, u r-Regolament (KE) Nru 2006/2004 tal-Parlament Ewropew u tal-Kunsill (Direttiva dwar Prattiċi Kummerċjali Żleali)?