Pubblikazzjoni tal-komunikazzjoni ta’ emenda standard approvata ta’ speċifikazzjoni tal-prodott ta’ indikazzjoni ġeografika f’konformità mal-Artikolu 5(4) tar-Regolament Delegat tal-Kummissjoni (UE) 2025/27 (1)

(C/2025/5639)

KOMUNIKAZZJONI TAL-APPROVAZZJONI TA’ EMENDA STANDARD

(Artikolu 24 tar-Regolament (UE) 2024/1143)

“Pineau des Charentes”

Numru ta’ referenza tal-UE: PDO-FR-A0489-AM03 — 28.7.2025

1. Isem il-prodott

“Pineau des Charentes”

2. Tip ta’ indikazzjoni ġeografika

☐

IĠP

☑

DOP

☐

IĠ

3. Settur

☐	Prodotti agrikoli

☑

Inbejjed

☐	Xarbiet spiritużi

4. Pajjiż li għalih tappartjeni ż-żona ġeografika

Franza

5. Awtorità tal-Istat Membru li tikkomunika l-emenda standard

Isem

Il-Ministeru għall-Agrikoltura u għas-Sovranità tal-Ikel, id-Direttorat Ġenerali għall-Prestazzjoni Ekonomika u Ambjentali tal-Intrapriżi

6. Kwalifika bħala emenda standard

L-awtoritajiet Franċiżi jikkunsidraw li l-applikazzjoni tissodisfa r-rekwiżiti tar-Regolamenti (UE) Nru 1308/2013 u (UE) 2024/1143.

L-emendi tal-ispeċifikazzjoni tal-prodott huma emendi standard skont id-definizzjoni stabbilita fl-Artikolu 24(4) tar-Regolament (UE) 2024/1143.

L-applikazzjoni għall-emenda tad-DOP Pineau des Charentes ma tinvolvi l-ebda waħda mit-tliet sitwazzjonijiet li jikkostitwixxu emenda tal-Unjoni; speċifikament:

(a)	ma tinkludix bidla fl-isem jew fl-użu tal-isem, jew fil-kategorija ta’ prodott jew prodotti deżinjati mill-indikazzjoni ġeografika;

(b)	ma tirriskjax li tħassar ir-rabta maż-żona ġeografika;

(c)	ma tinvolvix restrizzjonijiet ulterjuri fuq il-kummerċjalizzazzjoni tal-prodott.

Għalhekk, l-awtoritajiet Franċiżi jqisu li l-applikazzjoni hija għal emenda “standard”.

7. Deskrizzjoni tal-emenda/i standard approvata/i

Titolu

Żieda ta’ dispożizzjonijiet agroambjentali standard

Deskrizzjoni

Żdiedu dispożizzjonijiet agroambjentali mal-ispeċifikazzjoni tal-prodott tad-denominazzjoni. L-għan huwa li tissaħħaħ is-sostenibbiltà tad-denominazzjoni fid-dawl tat-tibdil fil-klima u l-aspettattivi għoljin tas-soċjetà. Dawn il-miżuri huma parti minn approċċ ġenerali ta’ sostenibbiltà meħud mill-produtturi tad-denominazzjoni.

☐	L-emenda taffettwa d-dokument uniku.

Titolu

Introduzzjoni ta’ żewġ ismijiet ġeografiċi supplimentari

Deskrizzjoni

Żewġ ismijiet ġeografiċi supplimentari (SGN, supplementary geographical names), “Île de Ré” u “Île d’Oléron”, ġew inkorporati fl-ispeċifikazzjoni tal-prodott.

L-inbejjed miksuba minn dawn l-SGNs għandhom karatteristiċi organolettiċi partikolari li jirriżultaw mill-produzzjoni bl-użu ta’ spirtu tal-“Cognac” u most ta’ karattru “oċeaniku”. Il-grupp ta’ produtturi tad-denominazzjoni japprezza l-karatteristiċi speċifiċi ta’ dawn iż-żoni, b’mod partikolari l-effetti ta’ klima oċeanika aktar qawwija: umdità għolja, irjieħ aktar b’saħħithom, xemx aktar intensa milli fuq il-kontinent, u ilma ta’ taħt l-art li ma huwiex daqshekk fond.

Il-Pineau des Charentes Île de Ré u Île d’Oléron għandhom reputazzjoni twila li tmur lura għall-1925. Il-konsum tagħhom jibqa’ fil-biċċa l-kbira lokali, xprunat mill-bejgħ lit-turisti, u dan jagħti spinta lill-iżvilupp ta’ ktajjen qosra tal-provvista.

Għal dawn iż-żewġ SGNs fl-ispeċifikazzjoni tal-prodott huma stabbiliti kundizzjonijiet ta’ produzzjoni aktar stretti: it-tnejn għandhom iż-żona ġeografika speċifika tagħhom stess, bi kriterji ta’ identifikazzjoni tal-irqajja’ art, densità ogħla ta’ tħawwil, distanza mnaqqsa bejn il-flanni, u rendiment aktar baxx u tagħbija massima medja aktar baxxa għal kull roqgħa art.

Żdiedet ukoll dispożizzjoni biex tiżgura li l-benefiċċju li jiġi mill-użu ta’ dan l-isem jingħata biss lill-inbejjed likuri li l-most tagħhom ikun ġej minn irqajja’ art ta’ dwieli żgħar, mit-tielet sena wara dik li fiha jkun sar it-tħawwil, u fejn dan seħħ qabel il-31 ta’ Lulju tas-sena tat-tħawwil.

Dawn il-kundizzjonijiet jirriflettu l-użu u jiżguraw il-kwalità u l-awtentiċità tal-prodott.

It-taqsima tar-“rabta” tal-ispeċifikazzjoni tal-prodott ġiet imsaħħa wkoll biex tenfasizza s-singularità ta’ dawn iż-żewġ ismijiet ġeografiċi supplimentari.

☑	L-emenda taffettwa d-dokument uniku.

Titolu

Assenjazzjoni tar-roqgħa art

Deskrizzjoni

L-għan huwa li tingħata spinta lill-allokazzjoni taż-żoni għal perjodu ta’ 3 snin konsekuttivi, minflok sena waħda, sabiex tiġi kkontrollata aħjar il-kwalità tal-Pineau des Charentes.

Barra minn hekk, fid-dawl tas-sitwazzjoni ekonomika kurrenti fil-baċir tal-vitikultura ta’ Charentes-Cognac, il-grupp ta’ produtturi tad-denominazzjoni jixtieq jevita bidliet rapidi jew opportunistiċi fiż-żoni ddedikati għall-produzzjoni tal-Pineau des Charentes, minn naħa waħda, u tal-“Cognac” min-naħa l-oħra.

Għalhekk, l-għan ta’ din l-iskema huwa li tiżgura kontroll aħjar tal-kwalità, filwaqt li fl-istess ħin tiżgura l-potenzjal tal-produzzjoni.

☐	L-emenda taffettwa d-dokument uniku.

Titolu

Aġġornament tal-Kodiċi Ġeografiku

Deskrizzjoni

Il-muniċipalitajiet fiż-żona ġeografika ġew aġġornati f’konformità mal-Kodiċi Ġeografiku Uffiċjali tal-2025. Din l-emenda ma tbiddilx iż-żona ġeografika tad-denominazzjoni.

☑	L-emenda taffettwa d-dokument uniku.

Titolu

Referenzi

Deskrizzjoni

Id-dettalji ta’ kuntatt tal-Istitut Nazzjonali tal-Oriġini u l-Kwalità (Institut national de l'origine et de la qualité, INAO) ġew aġġornati.

☐	L-emenda taffettwa d-dokument uniku.

DOKUMENT UNIKU

Denominazzjonijiet ta’ oriġini u indikazzjonijiet ġeografiċi tal-inbejjed

“Pineau des Charentes”

Numru ta’ referenza tal-UE: PDO-FR-A0489-AM03 — 28.7.2025

1. Isem/Ismijiet

“Pineau des Charentes”

2. Tip ta’ indikazzjoni ġeografika

☑

DOP

☐

IĠP

☐

IĠ

3. Pajjiż li għalih tappartjeni ż-żona ġeografika definita

Franza

4. Klassifikazzjoni tal-prodott agrikolu f’konformità mal-intestatura u l-kodiċi tan-Nomenklatura Magħquda, kif imsemmi fl-Artikolu 6(1) tar-Regolament (UE) 2024/1143

2204 – Inbid tal-għeneb frisk, inkluż l-inbejjed imqawwija; most tal-għeneb għajr dak tal-intestatura 2009

5. Kategoriji ta’ prodotti tad-dwieli kif elenkati fil-Parti II tal-Anness VII tar-Regolament (UE) Nru 1308/2013

3. Inbid likur

6. Deskrizzjoni tal-inbid jew tal-inbejjed

Prodott tad-dwieli

Inbid likur

Karatteristiċi organolettiċi:

Apparenza viżiva:

Il-Pineau des Charentes huwa nbid likur magħmul billi mal-most tal-għeneb jiżdied spirtu mqaddem bid-denominazzjoni tal-oriġini “Cognac” (spirtu minn ċiklu ta’ distillazzjoni preċedenti). Huwa abjad, rożè jew aħmar; id-denominazzjoni tista’ tiġi ssupplimentata bit-termini vieux [“qadim”], très vieux [“qadim ħafna”] jew extra vieux [“qadim ekstra”], skont kemm idum jitqaddem f’kontenituri tal-ballut.

Il-Pineau des Charentes abjad għandu kulur li jvarja minn isfar lewn it-tiben għal isfar dehbi ċar.

Il-Pineau des Charentes aħmar għandu kulur qawwi.

Aroma:

Il-Pineau des Charentes abjad ta’ spiss jiżviluppa aromi qawwijin, li huma ta’ frott (frott frisk jew konfettura) u ta’ fjuri (fjuri bojod) kif ukoll noti ta’ għasel.

Il-Pineau des Charentes aħmar spiss jiżviluppa aromi qawwijin ta’ frott aħmar u frott iswed maqtugħ frisk, flimkien ma’ noti ta’ ħwawar mhux qawwijin. Il-Pineau des Charentes rożè huwa ta’ kulur ċar għal fuchsia. Spiss jiżviluppa aromi ta’ frott u noti ta’ frott aħmar u frott tal-foresta.

Togħma:

Il-Pineau des Charentes jiġi kkonsmat prinċipalment bħala aperitiv. Fil-ħalq, għandu t-togħma friska u tonda tal-most ta’ għeneb frisk. Il-“Cognac”, li jikkontribwixxi għall-korporatura u għall-bilanċ ġenerali tal-prodott, jitħallat miegħu, parzjalment permezz tat-tqaddim tiegħu f’kontenituri tal-ballut.

Informazzjoni addizzjonali dwar il-karatteristiċi organolettiċi:

Il-Pineau des Charentes Ile de Ré u l-Pineau des Charentes Ile d’Oléron huma magħmulin minn spirti mqaddma b’denominazzjoni ta’ oriġini “Cognac” u most xi kultant deskritti bħala “oċeaniċi”. Dawn l-ispirti mhux qawwijin, b’togħma ta’ frott, ħelwin u bi ftit jodju jġibu karatteristiċi speċifiċi lill-Pineau des Charentes f’dawn iż-żewġ gżejjer. Il-Pineau des Charentes Ile de Ré u l-Pineau des Charentes Ile d’Oléron spiss jiżviluppaw noti ta’ ward u frott taċ-ċitru.

Karatteristiċi analitiċi:

Qawwa alkoħolika totali massima (f’% tal-volum):	22
Qawwa alkoħolika effettiva minima (f’% tal-volum)	16
Aċidità totali minima	-
Unità ta’ aċidità totali minima:	-
Aċidità volatili massima (f’milliekwivalenti għal kull litru):	10
Total massimu ta’ diossidu tal-kubrit (f’milligrammi għal kull litru)	75

Informazzjoni addizzjonali dwar il-karatteristiċi analitiċi:

Il-valuri analitiċi mhux irrappurtati jikkonformaw mal-limiti stabbiliti mil-leġiżlazzjoni tal-UE.

☑	Kwalunkwe karatteristika analitika li mhijiex indikata f’din it-taqsima hija fil-limiti stipulati mil-leġiżlazzjoni applikabbli tal-UE.

7. Prattiki tal-produzzjoni tal-inbid

7.1. Prattiki enoloġiċi speċifiċi użati biex isir l-inbid jew l-inbejjed u r-restrizzjonijiet rilevanti għall-produzzjoni tagħhom

Prattika tal-produzzjoni tal-inbid:

Tip ta’ prattika enoloġika:

Metodu ta’ kultivazzjoni

Deskrizzjoni:

Id-densità minima ta’ tħawwil tad-dwieli hija ta’ 2 200 dielja għal kull ettaru, u l-ispazju bejn il-flanni huwa ta’ 3 metri jew inqas. Id-dwieli jinżabru b’massimu ta’ 50 000 għajn għal kull ettaru bl-użu tat-tekniki li ġejjin: – il-metodu Guyot sempliċi jew doppju, bil-pjanta jkollha żarġuna waħda jew tnejn u rimja waħda jew tnejn; – iż-żbir bis-sistema tal-cordon, b’rimjiet maqtugħin b’massimu ta’ tliet għejun. L-irrigazzjoni hija pprojbita.

Id-dwieli fiż-żoni ġeografiċi supplimentari ta’ “Ile de Ré” u “Ile d’Oléron” għandhom densità minima ta’ tħawwil ta’ 2 800 dielja għal kull ettaru. Id-distanza bejn il-flanni ta’ dawn id-dwieli ma tistax taqbeż iż-2,70 metri.

7.2. Rendimenti massimi

L-inbejjed/kategoriji/varjetajiet/tipi kollha

Inbid likur

Rendiment massimu:

Rendiment massimu:	52
Unità ta’ rendiment massimu:	ettolitru għal kull ettaru

L-inbejjed/kategoriji/varjetajiet/tipi kollha

Most

Rendiment massimu:

Rendiment massimu:	85
Unità ta’ rendiment massimu:	ettolitru għal kull ettaru

L-inbejjed/kategoriji/varjetajiet/tipi kollha

Inbid likur b’ismijiet ġeografiċi supplimentari

Rendiment massimu:

Rendiment massimu:	49
Unità ta’ rendiment massimu:	ettolitru għal kull ettaru

L-inbejjed/kategoriji/varjetajiet/tipi kollha

Most b’isem ġeografiku supplimentari

Rendiment massimu:

Rendiment massimu:	76
Unità ta’ rendiment massimu:	ettolitru għal kull ettaru

8. Indikazzjoni tal-varjetà jew tal-varjetajiet ta’ għeneb tal-inbid li minnhom jiġi prodott l-inbid jew jiġu prodotti l-inbejjed

Franza – Folle Blanche B

Franza – Semillon B

Franza – Cabernet Franc N

Franza – Merlot N

Franza – Montils B

Franza – Colombard B

Franza – Cot N – Malbec

Franza – Jurançon Blanc B

Franza – Cabernet Sauvignon N

Franza – Meslier Saint-François B – Gros Meslier

Franza – Ugni Blanc B

Franza – Merlot Blanc B

Franza – Sauvignon B – Sauvignon Blanc

Franza – Trousseau Gris G – Chauché Gris

9. Definizzjoni qasira taż-żona ġeografika definita

(a)

Il-ħsad tal-għeneb, il-produzzjoni tal-most u l-produzzjoni, it-tqaddim u l-imballaġġ tal-inbejjed likuri jsiru fil-muniċipalitajiet inizjalment definiti bid-Digriet tal-1 ta’ Mejju 1909, kif emendat, dwar regolamenti amministrattivi li jistabbilixxu l-konfini tar-reġjun bid-dritt esklużiv għall-isem “Cognac” għall-ispirti tiegħu.

Iż-żona ġeografika tkopri t-territorju tas-738 muniċipalità jew partijiet minn muniċipalitajiet li ġejjin, abbażi tal-Kodiċi Ġeografiku Uffiċjali mill-1 ta’ Jannar 2024:

—	Għal Charente (16): Muniċipalitajiet sħaħ (265), partijiet minn muniċipalitajiet (2)

—	Għal Charente-Maritime (17): Muniċipalitajiet sħaħ (458)

—	Għal Dordogne (24): Muniċipalitajiet sħaħ (3)

—	Għal Deux-Sèvres (79): Muniċipalitajiet sħaħ (10)

Il-muniċipalitajiet huma elenkati fl-ispeċifikazzjoni tal-prodott tad-denominazzjoni.

(b)

Għall-ismijiet ġeografiċi supplimentari “Ile d’Oléron” u “Ile de Ré” tad-denominazzjoni Pineau des Charentes, l-operazzjonijiet jitwettqu f’konformità mal-kundizzjonijiet speċifiċi elenkati hawn taħt. L-istadji li ġejjin iridu jsiru fiż-żona ġeografika approvata mill-Istitut Nazzjonali tal-Oriġini u l-Kwalità fil-laqgħa tal-kumitat nazzjonali rilevanti fis-6 ta’ Frar 2025: il-most u l-ispirti jridu jkunu magħmulin minn għeneb maħsud u vinifikat fiż-żona ġeografika ta’ kull isem ġeografiku supplimentari definit hawn taħt. It-tqaddim għall-ismijiet ġeografiċi supplimentari “Ile de Ré” u “Ile d’Oléron” tad-denominazzjoni Pineau des Charentes irid isir fiż-żona ġeografika ta’ kull isem ġeografiku supplimentari definit hawn taħt.

Iż-żona ġeografika tal-isem ġeografiku supplimentari “Ile d’Oléron” tkopri t-territorju tal-muniċipalitajiet li ġejjin, abbażi tal-Kodiċi Ġeografiku Uffiċjali mill-1 ta’ Jannar 2024:

—	Għal Charente-Maritime: Muniċipalitajiet sħaħ (8)

La Brée-les-Bains, Le Château-d'Oléron, Dolus-d'Oléron, Le Grand-Village-Plage, Saint-Denis-d'Oléron, Saint-Georges-d'Oléron, Saint-Pierre-d'Oléron, Saint-Trojan-les-Bains.

Iż-żona ġeografika tal-isem ġeografiku supplimentari “Ile de Ré” tkopri t-territorju tal-muniċipalitajiet li ġejjin, abbażi tal-Kodiċi Ġeografiku Uffiċjali mill-1 ta’ Jannar 2024:

—	Għal Charente-Maritime: Muniċipalitajiet sħaħ (10)

Ars-en-Ré, Le Bois-Plage-en-Ré, La Couarde-sur-Mer, La Flotte, Loix, Les Portes-en-Ré, Rivedoux-Plage, Saint-Clément-des-Baleines, Sainte-Marie-de-Ré, Saint-Martin-de-Ré.

10. Rabta maż-żona ġeografika

Kategorija tal-prodott tad-dwieli

(3)	Inbid likur

Sommarju tar-rabta

Il-Pineau des Charentes huwa prodott li l-eżistenza u l-istorja tiegħu huma marbuta mal-produzzjoni tal-ispirtu “Cognac”. Tabilħaqq, l-ispeċifiċità ewlenija tal-Pineau des Charentes hija li huwa magħmul bl-użu tal-ispirtu “Cognac”, u r-rabta bejn iż-żewġ prodotti hija aktar u aktar qawwija peress li l-most u l-ispirtu “Cognac” użat fil-produzzjoni jridu jiġu mill-istess azjenda.

Bħala medja, il-produzzjoni tal-Pineau des Charentes teħtieġ l-użu tal-ekwivalenti ta’ żewġ irqajja’ art għall-produzzjoni tal-ispirtu “Cognac” u ta’ roqgħa art għall-produzzjoni tal-most tal-għeneb. Għalhekk, f’konformità mal-għarfien prattiku li nibet minn prattiki storiċi, kull produttur jagħżel dawk l-irqajja’ art fl-azjenda tiegħu li huma l-aktar adattati għall-produzzjoni tal-most bl-aktar kontenut għoli ta’ zokkor, filwaqt li jżomm il-bqija tal-erja tar-roqgħa art għall-produzzjoni tal-inbejjed aċidużi li għandhom kontenut ta’ alkoħol baxx u li huma adatti għall-produzzjoni tal-ispirtu “Cognac”. Is-sħana tas-sajf, flimkien mal-moderatezza u x-xemx qawwija fi tmiem l-istaġun, u l-umdità tal-arja jippromwovu l-maturazzjoni tal-ħsad u jgħinu wkoll biex jinkiseb most li għandu ammonti għoljin ta’ zokkor.

Għall-Pineau des Charentes Ile de Ré u għall-Pineau des Charentes Ile d’Oléron, il-klima aktar oċeanika, il-ħamrija aktar baxxa u aktar ramlija li tinfluwenza r-reġim tal-ilma, l-istrutturar madwar il-kooperattivi u l-prattiki storiċi tal-gżejjer ifissru li l-irqajja’ art huma ġestiti u magħżula għall-produzzjoni tal-most b’mod differenti mill-kontinent u speċifiku għall-gżejjer.

Il-Pineau des Charentes jitqaddem f’kontenituri tal-ballut b’ħila kbira, u jirrifletti l-prattiki u l-għarfien prattiku użati għall-produzzjoni tal-ispirtu “Cognac”, u dan jippermetti li l-inbid jitjieb u jakkwista l-karatteristiċi speċifiċi aromatiċi u tat-togħma tiegħu.

Ir-rekwiżit li l-prodott jiġi imballat fiż-żona ġeografika huwa marbut mal-prattiki tal-produzzjoni u mat-tradizzjoni li l-Pineau des Charentes jiġi kkunsmat id-dar. Għandu l-għan li jippreserva l-karatteristiċi u l-ispeċifiċità tal-prodott, li huwa ppreparat skont metodu speċjali u bi tqaddim twil, filwaqt li jħalli lok għal traċċabilità aħjar u spezzjoni aktar effiċjenti tal-prodott. Din id-dispożizzjoni hija akkumpanjata mill-obbligu li titwaħħal, fuq kull flixkun, kapsula ta’ garanzija jew timbru ta’ garanzija maħruġ mill-korp ta’ protezzjoni u ġestjoni. Din issegwi r-regola stabbilita sa mill-1946 fid-Digriet dwar ir-rikonoxximent tad-denominazzjoni ta’ oriġini protetta, li kienet tagħmel it-tqegħid tal-inbejjed fiċ-ċirkolazzjoni soġġett għall-ħruġ ta’ ċertifikat ta’ dewqan minn esperti lokali.

Għalhekk, il-Pineau des Charentes ħa identità li ħafna drabi hija kkaratterizzata minn aromi terzjarji, tipiċi tat-tqaddim f’kontenitur tal-ballut. Filwaqt li l-Pineau des Charentes baqa’ prodott ikkonsmat fid-dar, jiġifieri strettament lokali, għal kważi tliet sekli, kiseb reputazzjoni reali lil hinn miż-żona tal-produzzjoni tiegħu meta kiber kummerċjalment fil-bidu tas-seklu 20. Illum, madwar kwart tal-produzzjoni hija kkummerċjalizzata barra minn Franza, f’diversi kontinenti, fejn ir-reputazzjoni tal-Pineau des Charentes ġiet akkumpanjata minn żieda fil-bejgħ (l-Ewropa tal-Punent u tat-Tramuntana, il-Kanada, eċċ.).

11. Rekwiżiti oħra applikabbli

Titolu tar-rekwiżit/tad-deroga:

Tqaddim u imballaġġ

Qafas legali:

Leġiżlazzjoni nazzjonali

Tip ta’ rekwiżit/deroga ulterjuri:

Imballaġġ fiż-żona ġeografika definita

Deskrizzjoni tar-rekwiżit/tad-deroga:

L-inbejjed likuri rożè jridu jitqaddmu mill-inqas sal-1 ta’ Marzu tas-sena ta’ wara dik tal-ħsad. L-inbejjed likuri ħomor jitqaddmu għal mill-inqas 12-il xahar, inkluż tal-anqas għal 8 xhur f’kontenituri tal-ballut. L-inbejjed likuri bojod jitqaddmu għal mill-inqas 18-il xahar, inkluż tal-anqas għal 12-il xahar f’kontenituri tal-ballut. L-inbejjed likuri eliġibbli għat-terminu vieux [“qadim”] jitqaddmu għal aktar minn 7 snin f’kontenituri tal-ballut. Taħlita ta’ diversi nbejjed likuri tista’ tiġi ttikkettata bħala vieux, sakemm l-inbejjed likuri kollha jkunu tqaddmu għal aktar minn 7 snin f’kontenituri tal-ballut. L-inbejjed likuri eliġibbli għat-terminu très vieux [“qadim ħafna”] jew l-ekwivalenti tiegħu extra vieux [“qadim ekstra”] jitqaddmu għal aktar minn 12-il sena f’kontenituri tal-ballut. Taħlita ta’ bosta nbejjed likuri tista’ tiġi ttikkettata bħala très vieux, jew l-ekwivalenti tagħha extra vieux, sakemm l-inbejjed likuri kollha jkunu tqaddmu għal aktar minn 12-il sena f’kontenituri tal-ballut. Ir-rekwiżit li l-prodott jiġi imballat fiż-żona ġeografika tirriżulta mill-prattiki tal-produzzjoni u mit-tradizzjoni li l-Pineau des Charentes inizjalment kien jiġi kkunsmat id-dar, u għandu l-għan li jippreserva l-karatteristiċi u l-ispeċifiċità tal-inbid. Il-prodott irid jitħejja bl-użu tal-għarfien prattiku speċifiku kemm fir-rigward tat-taħlit tal-inbid kif ukoll tat-tqaddim tiegħu fl-injam f’ambjent ossidattiv. Għal din ir-raġuni, il-prodott bl-ebda mod ma jista’ jiġi ttrasportat, u kwalunkwe maniġġ wara t-tqaddim irid ikun limitat, sabiex ma jiġux kompromessi l-kwalitajiet miksuba permezz ta’ metodu ta’ produzzjoni li ġie pperfezzjonat teknikament. Barra minn hekk, il-limitazzjoni tal-imballaġġ għaż-żona ġeografika ttejjeb it-traċċabbiltà u tiffaċilita l-ispezzjoni tal-prodott. L-inbejjed jiġu introdotti fis-suq għall-konsumatur fi fliexken tal-ħġieġ mgħammra b’kapsula jew timbru ta’ garanzija.

Titolu tar-rekwiżit/tad-deroga:

Tikkettar

Qafas legali:

Leġiżlazzjoni nazzjonali

Tip ta’ rekwiżit/deroga ulterjuri:

Dispożizzjonijiet addizzjonali relatati mat-tikkettar

Deskrizzjoni tar-rekwiżit/tad-deroga:

—

Il-vendemmja tista’ tiġi indikata għall-inbid likur jekk 100 % tal-inbid ikun mill-istess sena ta’ produzzjoni tal-Pineau des Charentes. — L-isem tad-denominazzjoni jista’ jiġi ssupplimentat bit-termini vieux [“qadim”] jew très vieux [“qadim ħafna”] (jew l-ekwivalenti tiegħu extra vieux [“qadim ekstra”]) fil-każ ta’ nbejjed likuri li jissodisfaw il-kundizzjonijiet ta’ produzzjoni stabbiliti għal dawk it-termini f’din l-ispeċifikazzjoni tal-prodott. — Referenza għall-età hija awtorizzata għall-Pineau des Charentes meta jkun hemm perjodu ta’ tqaddim ta’ 3 snin f’kontenitur tal-ballut. L-età indikata ma tistax taqbeż il-perjodu ta’ żmien li l-prodott ikun tqaddem f’kontenitur tal-ballut. Fil-każ ta’ nbid imħallat, l-età indikata hija dik tal-lott bl-aktar perjodu qasir ta’ tqaddim f’kontenitur tal-ballut.

Id-denominazzjoni tal-oriġini kkontrollata Pineau des Charentes tista’ tkun segwita mill-ismijiet ġeografiċi supplimentari “Ile de Ré” jew “Ile d’Oléron” għall-inbejjed likuri li jissodisfaw il-kundizzjonijiet tal-produzzjoni stabbiliti għal dawn l-SGNs.

Referenza elettronika (URL) għall-pubblikazzjoni tal-ispeċifikazzjoni tal-prodott

https://info.agriculture.gouv.fr/boagri/document_administratif-3c085508-571d-4fbd-85a7-cdf450cc1abd

(1) Ir-Regolament Delegat tal-Kummissjoni (UE) 2025/27 tat-30 ta’ Ottubru 2024 li jissupplimenta r-Regolament (UE) 2024/1143 tal-Parlament Ewropew u tal-Kunsill b’regoli dwar ir-reġistrazzjoni u l-protezzjoni ta’ indikazzjonijiet ġeografiċi, speċjalitajiet tradizzjonali garantiti u termini tal-kwalità mhux obbligatorji u li jħassar ir-Regolament Delegat (UE) Nru 664/2014 (ĠU L, 2025/27, 15.1.2025, ELI: http://data.europa.eu/eli/reg_del/2025/27/oj).