—

wara li kkunsidra t-talba għat-tneħħija tal-immunità ta’ Maciej Wąsik, imressqa mill-Prosekutur Ġenerali tar-Repubblika tal-Polonja, fid-29 ta’ Lulju 2024, li twassal talba mressqa mill-Uffiċċju tal-Prosekutur Reġjonali f’Varsavja, b’rabta mal-proċedimenti kriminali miġjuba kontra Maciej Wąsik, u mħabbra fis-seduta plenarja fis-16 ta’ Settembru 2024,

—

wara li sema’ lil Maciej Wąsik fit-18 ta’ Frar 2025, skont l-Artikolu 9(6) tar-Regoli ta’ Proċedura tiegħu, u wara li kkunsidra d-dokumenti mressqa minnu,

—

wara li kkunsidra l-Artikoli 8 u 9 tal-Protokoll Nru 7 dwar il-Privileġġi u l-Immunitajiet tal-Unjoni Ewropea kif ukoll l-Artikolu 6(2) tal-Att tal-20 ta’ Settembru 1976 dwar l-elezzjoni tal-Membri tal-Parlament Ewropew b’vot dirett universali,

—

wara li kkunsidra s-sentenzi mogħtija mill-Qorti tal-Ġustizzja tal-Unjoni Ewropea fil-21 ta’ Ottubru 2008, fid-19 ta’ Marzu 2010, fis-6 ta’ Settembru 2011, fis-17 ta’ Jannar 2013, fid-19 ta’ Diċembru 2019 u fil-5 ta’ Lulju 2023  (1),

—

wara li kkunsidra l-Artikolu 105(2) u (5) tal-Kostituzzjoni tar-Repubblika tal-Polonja,

—

wara li kkunsidra l-Artikolu 5(2), l-Artikolu 6(1) u l-Artikolu 9 tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Affarijiet Legali (A10-0031/2025),

A.

billi, permezz ta’ ittra tad-29 ta’ Lulju 2024, il-Prosekutur Ġenerali tal-Polonja bagħat talba għat-tneħħija tal-immunità ta’ Maciej Wąsik, maħruġa mill-Uffiċċju tal-Prosekutur Reġjonali f’Varsavja, b’rabta ma’ allegati reati skont l-Artikolu 244 tal-Kodiċi Kriminali Pollakk flimkien mal-Artikolu 12 ta’ dak il-Kodiċi;

B.

billi t-talba tindika li l-azzjonijiet li huwa allegat li wettaq Maciej Wąsik fil-21 u fit-28 ta’ Diċembru 2023 f’Varsavja, b’intenzjoni premeditata u f’intervalli qosra, kisru l-projbizzjoni ta’ ħames snin tiegħu milli jokkupa pożizzjoni pubblika liema projbizzjoni kienet ġiet imposta fuqu minn sentenza finali u vinkolanti li ngħatat fl-20 ta’ Diċembru 2023 mill-Qorti Reġjonali f’Varsavja, sa fejn Maciej Wąsik wettaq id-dmirijiet ta’ Membru tas-Sejm (il-kamra inferjuri tal-Parlament Pollakk) tar-Repubblika tal-Polonja billi pparteċipa fis-sessjoni tas-Sejm li saret fil-21 ta’ Diċembru 2023 inkluż ħa sehem fil-votazzjoni u billi pparteċipa f’laqgħa organizzata mill-Kumitat għall-Amministrazzjoni u l-Affarijiet Interni tas-Sejm fit-28 ta’ Diċembru 2023; billi l-allegati azzjonijiet jikkostitwixxu reat skont l-Artikolu 244 tal-Kodiċi Kriminali Pollakk flimkien mal-Artikolu 12 ta’ dak il-Kodiċi;

C.

billi l-akkużi msemmija hawn fuq tressqu kontra Maciej Wąsik fit-18 ta’ April 2024; billi Maciej Wąsik ġie elett għall-Parlament Ewropew fl-elezzjonijiet Ewropej f’Ġunju 2024; billi Maciej Wąsik ma kienx Membru tal-Parlament Ewropew fi żmien l-allegat reat;

D.

billi l-allegat reat u t-talba sussegwenti għat-tneħħija tal-immunità tiegħu mhumiex relatati ma’ opinjoni espressa jew vot mitfugħ minn Maciej Wąsik fil-qadi ta’ dmirijietu fis-sens tal-Artikolu 8 tal-Protokoll Nru 7 dwar il-Privileġġi u l-Immunitajiet tal-Unjoni Ewropea;

E.

billi l-Artikolu 9, l-ewwel paragrafu, il-punt (a), tal-Protokoll Nru 7 dwar il-Privileġġi u l-Immunitajiet tal-Unjoni Ewropea jiddisponi li l-Membri tal-Parlament Ewropew għandhom igawdu, fit-territorju tal-Istat tagħhom stess, l-immunitajiet mogħtija lil membri tal-parlament tagħhom;

F.

billi, skont l-Artikolu 105(2) u (5) tal-Kostituzzjoni Pollakka, mill-jum li fih jitħabbru r-riżultati tal-elezzjonijiet sal-jum tal-iskadenza tal-mandat tiegħu jew tagħha, Deputat ma għandux ikun soġġett għal responsabbiltà kriminali mingħajr l-approvazzjoni tas-Sejm tar-Repubblika tal-Polonja u lanqas ma għandu jiġi detenut jew arrestat mingħajr l-approvazzjoni tas-Sejm, għajr f’każijiet meta jkun inqabad in flagrante delicto u fejn id-detenzjoni tiegħu tkun meħtieġa biex jiġi żgurat l-andament xieraq tal-proċedimenti;

G.

billi l-għan tal-immunità parlamentari huwa li tipproteġi lill-Parlament u lill-Membri tiegħu minn proċedimenti ġudizzjarji relatati ma’ attivitajiet imwettqa fil-qadi tad-dmirijiet parlamentari u li huma inseparabbli minn dawn id-dmirijiet;

H.

billi, skont l-Artikolu 5(2) tar-Regoli ta’ Proċedura tiegħu, l-immunità parlamentari mhix privileġġ personali ta’ Membru imma garanzija tal-indipendenza tal-Parlament kollu kemm hu u tal-Membri tiegħu;

I.

billi, f’dan il-każ, il-Parlament ma sab l-ebda evidenza ta’ fumus persecutionis, jiġifieri elementi fattwali li jindikaw li l-proċedimenti ġudizzjarji inkwistjoni kellhom l-intenzjoni li jimminaw l-attività politika tal-Membru bħala Membru tal-Parlament Ewropew;

J.

billi, minn naħa, il-Parlament ma jistax jitqies bħala qorti u, min-naħa l-oħra, il-Membru ma jistax, fil-kuntest ta’ proċedura għat-tneħħija tal-immunità, jitqies bħala “akkużat” (2);

1.

Jiddeċiedi li jneħħi l-immunità ta’ Maciej Wąsik;

2.

Jagħti istruzzjonijiet lill-President tiegħu biex tgħaddi minnufih din id-deċiżjoni u r-rapport tal-kumitat responsabbli tiegħu lill-awtoritajiet kompetenti tar-Repubblika tal-Polonja u lil Maciej Wąsik.