1.   Għandu jkun hemm infrastruttura tar-riċerka distribwita Ewropea msejħa “Ċentru Internazzjonali għall-Istudji Avvanzati dwar is-Sistemi Fluvjomarittimi”, minn hawn ’il quddiem imsejjaħ “DANUBIUS”.

2.   Id-DANUBIUS għandu jkollu l-forma legali ta’ Konsorzju għal Infrastruttura Ewropea ta’ Riċerka (ERIC, European Research Infrastructure Consortium) skont ir-Regolament (KE) Nru 723/2009 u għandu jissejjaħ “DANUBIUS-ERIC”.

3.   Id-DANUBIUS-ERIC għandu jkun operazzjonali fil-pajjiżi membri tad-DANUBIUS-ERIC, kif ukoll f’pajjiżi oħra fejn ikun ikkonkluda ftehimiet rilevanti.

4.   Id-DANUBIUS-ERIC għandu jkollu s-sede statutorja tiegħu f’Murighiol, il-Kontea ta’ Tulcea (ir-Rumanija).

1.   L-objettiv u l-kompitu ewlenin tad-DANUBIUS-ERIC huma li jistabbilixxi u jopera infrastruttura tar-riċerka distribwita pan-Ewropea bil-għan li jiffaċilita x-xjenza eċċellenti dwar il-kontinwità minn sors tax-xmara għall-baħar u jikkontribwixxi għaliha; li joffri infrastruttura tar-riċerka tal-ogħla livell ta’ żvilupp tekniku; u li jipprovdi l-għarfien integrat meħtieġ għall-ġestjoni u l-protezzjoni sostenibbli tas-Sistemi Fluvjomarittimi. Id-DANUBIUS-ERIC għandu jkun appoġġjat mis-Sħab tad-DANUBIUS, li għandhom jipprovdu tagħmir xjentifiku ewlieni jew settijiet ta’ strumenti, faċilitajiet ta’ riċerka, riżorsi u servizzi relatati lill-Komponenti tad-DANUBIUS u permezz tagħhom lill-Utenti, li jippermettu t-twettiq ta’ riċerka tal-ogħla livell fl-oqsma rispettivi tagħhom.

2.   Għal dan l-għan, id-DANUBIUS-ERIC għandu jipprovdi qafas ta’ governanza effettiv, jikkoordina u jarmonizza l-attivitajiet imwettqa mill-Komponenti tad-DANUBIUS fir-rigward tas-sistemi fluvjomarittimi. B’mod partikolari, għandu jwettaq u jikkoordina l-attivitajiet li ġejjin:

a)	soġġett għall-politika ta’ aċċess, jipprovdi punt uniku ta’ aċċess għall-applikazzjonijiet għall-użu tal-Komponenti tad-DANUBIUS;

b)	jiffaċilita programmi u proġetti ta’ riċerka Ewropej u internazzjonali rilevanti;

c)	jimmobilizza l-għarfien rilevanti, il-bini tal-kapaċità tar-riċerka u l-inkoraġġiment tal-mobbiltà tar-riċerkaturi biex jiżdied il-potenzjal intellettwali Ewropew u titmexxa r-riċerka internazzjonali dwar is-sistemi fluvjomarittimi;

d)	jiżviluppa teknoloġija, standards u protokolli għall-avvanz tal-istudji fis-sistemi tal-ilma ħelu, ta’ taħt l-art u kostali, tal-baħar u tranżizzjonali;

e)	jibni kollaborazzjoni u sinerġiji ma’ infrastrutturi oħra tar-riċerka fl-Ewropa u madwar id-dinja;

f)	juża l-infrastruttura tar-riċerka u l-għarfien espert DANUBIUS b’appoġġ għar-riċerka dwar is-sistemi fluvjomarittimi madwar id-dinja;

g)	jidħol fi ftehimiet ma’ partijiet terzi sabiex jilħaq l-objettiv tiegħu u jwettaq il-kompiti tiegħu; u

h)	kwalunkwe attività relatata oħra li tippromwovi l-kisba tal-objettivi u l-kompitu ewlenin tad-DANUBIUS-ERIC.

3.   Id-DANUBIUS-ERIC, permezz tal-Komponenti tiegħu, għandu jipprovdi aċċess effettiv għall-faċilitajiet, is-servizzi, il-pariri u d-data biex jippromwovi u jixpruna r-riċerka u l-innovazzjoni interdixxiplinari fis-sistemi fluvjomarittimi. Għal dan il-fini, id-DANUBIUS-ERIC jista’ jidħol fi Ftehimiet dwar il-Livell ta’ Servizz li jistabbilixxu t-termini u l-kundizzjonijiet li bihom il-Komponenti tad-DANUBIUS għandhom jipprovdu riżorsi u servizzi lid-DANUBIUS-ERIC, lil Komponenti tad-DANUBIUS oħra u lill-Utenti.

4.   Id-DANUBIUS-ERIC għandu jwettaq il-kompitu ewlieni tiegħu fuq bażi mhux ekonomika, madankollu jista’ jwettaq attivitajiet ekonomiċi limitati, dment li dawn ikunu relatati mill-qrib mal-kompitu ewlieni tiegħu u ma jipperikolawx il-kisba tiegħu. Kwalunkwe introjtu ġġenerat minn dawn l-attivitajiet ekonomiċi limitati għandu jintuża mid-DANUBIUS-ERIC biex jippromwovi l-objettivi u l-kompitu ewlenin tiegħu.

1.   Id-DANUBIUS-ERIC għandu jeżisti għal perjodu ta’ żmien indefinit.

2.   L-istralċ tad-DANUBIUS-ERIC għandu jirrikjedi deċiżjoni mill-Assemblea Ġenerali f’konformità mal-Artikolu 17(6)(c).

3.   Mingħajr dewmien żejjed u fi kwalunkwe każ fi żmien 10 ijiem tax-xogħol mid-deċiżjoni tal-istralċ, id-DANUBIUS-ERIC għandu jinnotifika lill-Kummissjoni Ewropea bid-deċiżjoni tiegħu.

4.   L-assi li jifdal wara l-ħlas tad-djun tad-DANUBIUS-ERIC għandhom jitqassmu fost il-membri b’mod proporzjonat għall-kontribuzzjoni annwali akkumulata tagħhom lid-DANUBIUS-ERIC matul l-aħħar 5 snin konsekuttivi qabel l-istralċ.

5.   Mingħajr preġudizzju għall-Artikolu 4, l-obbligazzjonijiet li jifdal wara l-istralċ, għandhom jitqassmu fost il-membri b’mod proporzjonat għall-kontribuzzjoni annwali akkumulata tagħhom lid-DANUBIUS-ERIC, kif stabbilit fl-Anness 2, li ma jaqbżux l-ammont ta’ kontribuzzjoni annwali medja waħda fl-aħħar 5 snin konsekuttivi qabel is-sena meta ttieħdet id-deċiżjoni għall-istralċ tad-DANUBIUS-ERIC.

6.   Fi żmien 10 ijiem wara l-għeluq tal-proċedura tal-istralċ, id-DANUBIUS-ERIC għandu jinnotifika lill-Kummissjoni Ewropea b’dan.

7.   Id-DANUBIUS-ERIC ma għandux jibqa’ jeżisti fil-jum li fih il-Kummissjoni Ewropea tippubblika n-notifika xierqa f’Il-Ġurnal Uffiċjali tal-Unjoni Ewropea.

1.   Id-DANUBIUS-ERIC għandu jkun responsabbli għad-djun tiegħu.

2.   Il-membri ma għandhomx ikunu responsabbli b’mod konġunt għad-djun tad-DANUBIUS-ERIC.

3.   L-obbligazzjoni finanzjarja tal-membri għad-djun tad-DANUBIUS-ERIC għandha tkun limitata għall-kontribuzzjoni annwali rispettiva tagħhom għad-DANUBIUS-ERIC.

4.   Id-DANUBIUS-ERIC għandu jkollu assigurazzjoni xierqa biex ikopri r-riskji speċifiċi għall-attivitajiet tiegħu.

1.   Soġġetti għal kwalunkwe kuntratt bejn id-DANUBIUS-ERIC u l-Utenti, id-drittijiet tal-proprjetà intellettwali li nħolqu, inkisbu jew ġew żviluppati mill-Utenti għandhom ikunu proprjetà ta’ dawk l-Utenti.

2.   Soġġetti għal kwalunkwe kuntratt bejn id-DANUBIUS-ERIC u s-Sieħeb tad-DANUBIUS, id-drittijiet tal-proprjetà intellettwali li nħolqu, inkisbu jew ġew żviluppati minn Sieħeb tad-DANUBIUS għandhom ikunu proprjetà tas-Sieħeb tad-DANUBIUS.

3.   Soġġetti għal kwalunkwe kuntratt bejn id-DANUBIUS-ERIC u l-Komponent tad-DANUBIUS, id-drittijiet tal-proprjetà intellettwali li nħolqu, inkisbu jew ġew żviluppati minn Komponent tad-DANUBIUS għandhom ikunu proprjetà tal-Komponent tad-DANUBIUS.

4.   Id-drittijiet tal-proprjetà intellettwali li nħolqu, inkisbu jew ġew żviluppati mid-DANUBIUS-ERIC għandhom ikunu proprjetà tad-DANUBIUS-ERIC.

5.   Id-DANUBIUS-ERIC għandu jadotta politika dwar id-drittijiet tal-proprjetà intellettwali, għall-approvazzjoni mill-Assemblea Ġenerali.

1.   Id-DANUBIUS-ERIC għandu jkun faċilitatur tar-riċerka u għandu, bħala regola ġenerali, japplika l-prinċipji tax-xjenza miftuħa u tal-aċċess miftuħ għad-data tar-riċerka kif żviluppati aktar fil-politiki tad-Dritt tal-Proprjetà Intellettwali (DPI) u tad-Data tad-DANUBIUS-ERIC.

2.   Bħala regola ġenerali, id-DANUBIUS-ERIC għandu jinkoraġġixxi lill-Utenti jagħmlu r-riżultati tar-riċerka tagħhom disponibbli għall-pubbliku jew jippubblikawhom f’letteratura xjentifika rieżaminata bejn il-pari, jippreżentawhom f’konferenzi xjentifiċi, kif ukoll f’mezzi oħra, soċjali jew mod ieħor, immirati lejn udjenzi akbar (inkluż mingħajr limitazzjoni l-pubbliku ġenerali, l-istampa, il-gruppi taċ-ċittadini u għal finijiet edukattivi).

3.   Id-DANUBIUS-ERIC għandu juża diversi mezzi biex jilħaq l-udjenzi fil-mira, inkluż portal tal-Internet, bullettini, workshops, preżenza fil-konferenzi, artikli fir-rivisti, gazzetti ta’ kuljum u kwalunkwe media rilevanti oħra.

1.   Id-DANUBIUS-ERIC għandu jżomm proċeduri siguri, ġusti u trasparenti biex jipprovdi aċċess għall-Komponenti tad-DANUBIUS u għas-servizzi lill-Utenti.

2.   Id-DANUBIUS-ERIC għandu jadotta politika ta’ aċċess, għall-approvazzjoni mill-Assemblea Ġenerali.

1.   L-attivitajiet tad-DANUBIUS-ERIC għandhom jiġu evalwati kull 5 snin minn bord indipendenti, magħmul minn esperti internazzjonali tal-ogħla kwalità, maħtura mill-Assemblea Ġenerali.

2.   Il-grupp ta’ esperti għandu jevalwa l-attivitajiet, u l-orjentazzjoni xjentifika u strateġika tad-DANUBIUS-ERIC kif ukoll l-operazzjoni tal-Komponenti tad-DANUBIUS. Għandha tingħata attenzjoni speċjali biex jiġu ssodisfati r-rekwiżiti tal-Utent.

3.   Ir-riżultati tal-evalwazzjonijiet għandhom jiġu rrappurtati lill-Assemblea Ġenerali.

1.   Il-politika tal-impjiegi tad-DANUBIUS-ERIC għandha tkun irregolata mil-liġijiet tal-pajjiż li fih il-persunal ikun impjegat jew li fih normalment iwettaq l-attivitajiet tiegħu.

2.   Il-pożizzjonijiet vakanti fid-DANUBIUS-ERIC għandhom isegwu proċedura trasparenti u nondiskriminatorja u jħarsu l-prinċipji ta’ opportunitajiet indaqs, soġġetti għal-liġijiet tax-xogħol applikabbli.

1.   Id-DANUBIUS-ERIC għandu jadotta r-regoli dwar l-akkwist tiegħu stess, li għandhom jiġu approvati mill-Assemblea Ġenerali.

2.   Ir-regoli dwar l-akkwist għandhom iħarsu l-prinċipji tat-trasparenza, tan-nondiskriminazzjoni u tal-kompetizzjoni.

3.   Ix-xiri li jsir mis-Sħab tad-DANUBIUS, maħsub esklużivament għall-użu mill-Komponenti tad-DANUBIUS għall-fini li jintlaħqu l-objettiv u l-kompiti tad-DANUBIUS-ERIC, għandu jingħata u jiġi organizzat f’konformità mar-regoli dwar l-akkwist tad-DANUBIUS-ERIC.

1.   L-entitajiet li ġejjin jistgħu jsiru membri tad-DANUBIUS-ERIC jew jistgħu jsiru osservaturi tad-DANUBIUS-ERIC mingħajr id-drittijiet tal-vot:

a)	l-Istati Membri tal-Unjoni Ewropea;

b)	il-Pajjiżi Assoċjati (skont it-tifsira tar-Regolament (KE) Nru 723/2009);

c)	il-pajjiżi terzi għajr il-pajjiżi assoċjati;

d)	l-organizzazzjonijiet intergovernattivi.

2.   L-Istati Membri u l-pajjiżi assoċjati għandu jkollhom il-maġġoranza tad-drittijiet tal-vot b’mod konġunt fl-Assemblea Ġenerali. L-Assemblea Ġenerali għandha tiddetermina kwalunkwe modifika tad-drittijiet tal-vot li tkun meħtieġa biex tiżgura li d-DANUBIUS-ERIC jikkonforma f’kull ħin ma’ dan ir-rekwiżit.

3.   Kwalunkwe membru jew osservatur imsemmi fil-paragrafu (1)(a)-(c) jista’ jkun rappreżentat minn entità pubblika waħda jew aktar, inklużi reġjuni jew entità privata b’missjoni ta’ servizz pubbliku, tal-għażla tiegħu stess u maħtura skont ir-regoli u l-proċeduri tiegħu. Kull membru jew osservatur għandu jinforma lill-Assemblea Ġenerali bi kwalunkwe bidla fl-entità rappreżentanti tiegħu, bid-drittijiet u l-obbligi speċifiċi li jkunu ġew delegati lilu jew bi kwalunkwe bidla rilevanti oħra.

4.   Il-membri u l-osservaturi kif ukoll l-entitajiet rappreżentanti tagħhom huma elenkati fl-Anness 1. L-Anness 1 għandu jinżamm aġġornat mid-Direttur Ġenerali jew minn kwalunkwe persuna oħra maħtura mid-Direttur Ġenerali.

1.   L-entitajiet imsemmija fl-Artikolu 11(1), li jixtiequ jsiru membri tad-DANUBIUS-ERIC għandhom jippreżentaw applikazzjoni bil-miktub lill-President tal-Assemblea Ġenerali. Tali applikazzjoni għandha tiddeskrivi kif l-entità se tikkontribwixxi għall-objettivi u l-kompitu tad-DANUBIUS-ERIC deskritti fl-Artikolu 2 u kif se tissodisfa l-obbligi msemmija fl-Artikolu 14(2) u 14(3).

2.   L-entitajiet imsemmija fl-Artikolu 11(1) li jixtiequ jikkontribwixxu għad-DANUBIUS-ERIC iżda li għadhom mhumiex f’pożizzjoni li jissieħbu bħala membri jistgħu japplikaw għal status ta’ osservatur. L-applikanti għandhom jippreżentaw applikazzjoni bil-miktub lill-President tal-Assemblea Ġenerali, li għandha tiddeskrivi kif l-applikant se jikkontribwixxi għall-objettivi u l-kompiti tad-DANUBIUS-ERIC deskritti fl-Artikolu 2 u kif se jissodisfa l-obbligi msemmija fl-Artikolu 15(2) u 15(3).

3.   Meta l-Assemblea Ġenerali tivvota favur l-ammissjoni ta’ applikant bħala osservatur, dan għandu jiġi ammess bħala osservatur għal perjodu ta’ 3 snin. L-osservaturi jistgħu japplikaw darba għal estensjoni ta’ sentejn tal-istatus ta’ osservatur tagħhom. F’każijiet eċċezzjonali, l-Assemblea Ġenerali tista’ taċċetta u tapprova estensjonijiet ulterjuri ta’ status ta’ osservatur, f’liema każ, l-Assemblea Ġenerali tista’ tistabbilixxi wkoll kontribuzzjonijiet annwali ogħla għal dak l-osservatur speċifiku.

1.   Membru jista’ jirtira s-sħubija tiegħu fi kwalunkwe ħin b’mill-inqas 12-il xahar qabel in-notifika bil-miktub lill-President tal-Assemblea Ġenerali. L-irtirar se jidħol fis-seħħ wara perjodu minimu ta’ 5 snin ta’ sħubija u fi tmiem is-sena finanzjarja li jmiss li fiha jkun ingħata notifika ta’ rtirar, jiġifieri l-31 ta’ Diċembru tas-sena ta’ wara.

2.   Osservatur jista’ jirtira fi kwalunkwe ħin wara 6 xhur qabel in-notifika bil-miktub lill-President tal-Assemblea Ġenerali. Jekk in-notifika ssir sat-30 ta’ Ġunju fi kwalunkwe sena, l-irtirar jidħol fis-seħħ fi tmiem l-istess sena finanzjarja li fiha jkun ingħata n-notifika, jiġifieri l-31 ta’ Diċembru. Jekk in-notifika ssir wara t-30 ta’ Ġunju fi kwalunkwe sena, l-irtirar jidħol fis-seħħ fi tmiem is-sena finanzjarja li jmiss li fiha jkun ingħata n-notifika, jiġifieri l-31 ta’ Diċembru tas-sena ta’ wara.

3.   L-Assemblea Ġenerali tista’ ttemm is-sħubija jew l-istatus ta’ osservatur jekk tiġi ssodisfata kwalunkwe waħda mill-kundizzjonijiet li ġejjin:

a)	il-membru jew l-osservatur ikun kiser b’mod serju wieħed jew aktar mill-obbligi tiegħu jew mill-kundizzjonijiet tas-sħubija jew tal-istatus ta’ osservatur skont dawn l-Istatuti; u,

b)	il-membru jew l-osservatur ikun naqas milli jirrettifika tali ksur fi żmien 6 xhur wara li jkun irċieva notifika tal-ksur; u,

c)	il-membru jew l-osservatur jkun ingħata l-opportunità li jippreżenta l-pożizzjoni tiegħu lill-Assemblea Ġenerali qabel ma tittieħed deċiżjoni.

4.   Il-membri u l-osservaturi għandhom ikomplu jħallsu t-tariffi tas-sħubija jew tal-osservaturi tagħhom u jissodisfaw l-obbligi l-oħra kollha għall-attivitajiet tad-DANUBIUS-ERIC sakemm jidħlu fis-seħħ l-irtirar jew it-terminazzjoni. La għandu jkollhom id-dritt għal restituzzjoni jew għal rimborż ta’ kwalunkwe kontribuzzjoni magħmula, u lanqas id-dritt li jagħmlu kwalunkwe talba għall-assi tad-DANUBIUS-ERIC.

5.   L-Assemblea Ġenerali tista’ tiddeċiedi li tissospendi d-drittijiet tal-vot ta’ membru jekk dak il-membru jkollu 12-il xahar jew aktar ta’ arretrati biex jissodisfa l-obbligi tiegħu skont l-Artikolu 21(1), sakemm il-kontribuzzjonijiet ikunu tħallsu kollha.

6.   Minkejja l-Artikolu 13(1) u l-Artikolu 13(2), il-membri u l-osservaturi msemmija fl-Artikolu 11(1)(b) u (c), jistgħu jirtiraw mid-DANUBIUS-ERIC wara bidliet fir-Regolament (KE) Nru 723/2009 li jaffettwaw b’mod materjali d-drittijiet u l-obbligi tagħhom fir-rigward tad-DANUBIUS-ERIC. Tali bidliet jitqiesu li jaffettwaw b’mod materjali d-drittijiet u l-obbligi tagħhom meta jimplikaw jew jimponu fuq dak il-membru jew osservatur speċifiku:

a)	żieda fit-tariffi (inklużi kontribuzzjonijiet annwali ogħla jew kostijiet tad-dekummissjonar);

b)	inqas drittijiet tal-vot meta mqabbla ma’ membri jew osservaturi oħra msemmija fl-Artikolu 11(1)(a);

c)	rekwiżiti li jmorru kontra l-liġi applikabbli msemmija fl-Artikolu 29 ta’ dawn l-Istatuti jew kontra l-liġi nazzjonali tal-membru jew tal-osservatur affettwat, dment li tali liġi nazzjonali tkun ġiet ippromulgata aktar minn perjodu ta’ 6 xhur qabel il-bidla tar-Regolament (KE) Nru 723/2009;

d)	ineħħu d-dritt li wieħed ikun rappreżentat fl-Assemblea Ġenerali jew f’kumitati oħra; jew ibiddlu d-drittijiet tagħhom relatati mar-rappreżentazzjoni jew mal-użu tal-faċilità.

Il-membru jew l-osservatur affettwat (li mhuwiex Stat Membru), jista’ jirtira mid-DANUBIUS-ERIC wara 6 xhur qabel in-notifika bil-miktub lill-President tal-Assemblea Ġenerali.

1.   Il-membri għandu jkollhom dritt:

a)	li jaħtru entitajiet rappreżentanti;

b)	li jattendu u jivvutaw fl-Assemblea Ġenerali, bl-eċċezzjoni tal-votazzjoni dwar deċiżjonijiet rigward it-terminazzjoni tas-sħubija ta’ dak il-membru jew is-sospensjoni tad-drittijiet tal-vot;

c)	għall-komunità tar-riċerka tagħhom biex jaċċessaw il-faċilitajiet, is-servizzi u l-attivitajiet offruti mill-Komponenti tad-DANUBIUS, soġġetti għall-Politika ta’ Aċċess tad-DANUBIUS-ERIC;

d)	li jeleġġu u jiġu eletti fil-korpi ta’ governanza tad-DANUBIUS-ERIC permezz tar-rappreżentanti tiegħu;

e)	li jospitaw Komponent tad-DANUBIUS;

f)	għal kwalunkwe benefiċċju jew dritt ieħor stabbilit fir-regoli ta’ implimentazzjoni.

2.   Membru għandu:

a)	jipprovdi l-kontribuzzjoni annwali tas-sħubija f’konformità mal-Anness 2;

b)	jaħtar mill-inqas rappreżentant uffiċjali wieħed, iżda mhux aktar minn tlieta, għall-Assemblea Ġenerali;

c)	jagħti s-setgħa lir-rappreżentanti tiegħu li jattendu l-Assemblea Ġenerali b’awtorità sħiħa.

3.   Membru huwa mistenni wkoll li:

a)	jippromwovi l-adozzjoni ta’ standards u għodod rilevanti fl-operazzjoni tad-DANUBIUS-ERIC;

b)	jipprovdi l-infrastruttura teknika u r-riżorsi meħtieġa għall-operazzjonijiet tad-DANUBIUS-ERIC u jappoġġja l-Komponenti tad-DANUBIUS li jospita;

c)	jippromwovi l-adozzjoni tad-data u tas-servizzi kkoordinati tad-DANUBIUS-ERIC fost ir-riċerkaturi f’pajjiżhom u jippromwovu l-feedback u r-rekwiżiti tal-utenti;

d)	jappoġġja lis-Sieħeb jew lis-Sħab nazzjonali tiegħu tad-DANUBIUS u lill-Komponenti tad-DANUBIUS li jospita biex jippermettilhom iwettqu l-obbligi tagħhom kif jista’ jiġi definit fi Ftehim dwar il-Livell ta’ Servizz jew ftehim simili mad-DANUBIUS-ERIC.

1.   L-osservaturi għandu jkollhom id-dritt:

a)	li jaħtru entitajiet rappreżentanti;

b)	li jattendu l-laqgħat tal-Assemblea Ġenerali, mingħajr id-dritt tal-vot;

c)	għall-komunità tar-riċerka tagħhom biex jaċċessaw il-faċilitajiet, is-servizzi u l-attivitajiet offruti mill-Komponenti tad-DANUBIUS, soġġetti għall-Politika ta’ Aċċess tad-DANUBIUS-ERIC;

d)	li jeleġġu u jiġu eletti fil-korpi ta’ governanza tad-DANUBIUS-ERIC permezz tar-rappreżentanti tagħhom, iżda mingħajr drittijiet tal-vot f’tali korpi ta’ governanza;

e)	għal kwalunkwe benefiċċju jew dritt ieħor stabbilit fir-regoli ta’ implimentazzjoni.

2.   Osservatur għandu:

a)	jipprovdi l-kontribuzzjoni annwali tal-osservatur f’konformità mal-Anness 2;

b)	jissodisfa kwalunkwe obbligu ieħor innegozjat bejn l-osservatur rispettiv u d-DANUBIUS-ERIC kif miftiehem mill-Assemblea Ġenerali.

3.   Osservatur huwa mistenni wkoll li:

a)	jippromwovi l-adozzjoni ta’ standards u għodod rilevanti fl-operazzjoni tad-DANUBIUS-ERIC;

b)	jippromwovi l-adozzjoni tad-data u tas-servizzi kkoordinati tad-DANUBIUS-ERIC fost ir-riċerkaturi f’pajjiżhom u jippromwovu l-feedback u r-rekwiżiti tal-utenti.

1.   Id-DANUBIUS-ERIC għandu jinkludi l-korpi li ġejjin:

a)	l-Assemblea Ġenerali;

b)	id-Direttur Ġenerali;

c)	il-Kumitat Konsultattiv Xjentifiku; u

d)	il-Kumitat għall-Infrastruttura tar-Riċerka.

1.   L-Assemblea Ġenerali għandha tkun il-korp governattiv tad-DANUBIUS-ERIC u għandha tkun magħmula minn rappreżentanti tal-membri u osservaturi tad-DANUBIUS-ERIC. Kull membru għandu jkollu vot wieħed u l-voti kollha għandhom ikunu tal-istess valur. Il-membri li jastjenu milli jivvutaw, jew li d-drittijiet tal-vot tagħhom ikunu ġew sospiżi, għandhom jitqiesu bħala assenti mingħajr ebda effett fuq il-kworum meħtieġ biex jikkostitwixxi l-laqgħa skont il-paragrafu 5.

2.   Ir-rappreżentanti għall-Assemblea Ġenerali jistgħu jkunu akkumpanjati minn massimu ta’ żewġ esperti għal kull delegazzjoni bil-fini uniku li jagħtu pariri lid-delegazzjoni.

3.   L-Assemblea Ġenerali għandha teleġġi President u Viċi President minn fost ir-rappreżentanti tal-membri għal terminu ta’ sentejn, li għall-istess perjodu jista’ jiġġedded darbtejn. Il-Viċi President għandu jissostitwixxi lill-President fl-assenza, ir-riżenja, l-inkapaċità tiegħu/tagħha li jaġixxi/taġixxi jew f’każijiet ta’ kunflitt ta’ interess li ma jkunux jistgħu jissolvew mod ieħor. Permezz tal-elezzjonijiet tagħhom, il-President u, meta jaġixxi bħala sostitut, il-Viċi President, isiru supra-parte u jħallu d-delegazzjonijiet tagħhom. Il-membru li minnu joriġina l-President jew il-Viċi President għandu jkollu d-dritt li minflok jinnomina rappreżentant ieħor.

4.   L-Assemblea Ġenerali għandha titlaqqa’ mill-President mill-inqas darba fis-sena kalendarja u għandha tkun responsabbli għad-direzzjoni u s-superviżjoni ġenerali tad-DANUBIUS-ERIC, inklużi l-orjentazzjoni u l-istruttura strateġiċi tal-Komponenti tad-DANUBIUS.

5.   Soġġetta għall-Artikolu 11(2), f’laqgħa għandu jitqies li jkun hemm kworum jekk mill-inqas żewġ terzi tal-membri jkunu rappreżentati fil-laqgħa. Jekk il-kworum meħtieġ ma jintlaħaqx, il-President għandu jsejjaħ laqgħa oħra, wara stedina ġdida bl-istess aġenda, u din ma tistax issir qabel 14-il jum kalendarju minn dik ta’ qabel. Soġġetta għall-Artikolu 11(2), fit-tieni laqgħa għandu jitqies li jkun hemm kworum jekk mill-inqas 50 % tal-membri jkunu rappreżentati fil-laqgħa.

6.   Il-kwistjonijiet li ġejjin għandhom jeħtieġu l-approvazzjoni tal-Assemblea Ġenerali b’vot unanimu tal-membri preżenti:

a)	emenda tal-Istatuti tad-DANUBIUS-ERIC;

b)	bidliet ta’ aktar minn 4 % fl-ammont jew fil-kalkolu tal-kontribuzzjonijiet minn membru jew osservatur.

c)	stralċ tad-DANUBIUS-ERIC f’konformità mal-Artikolu 3;

d)	terminazzjoni ta’ sħubija jew status ta’ osservatur.

7.   Il-kwistjonijiet li ġejjin għandhom jeħtieġu l-approvazzjoni tal-Assemblea Ġenerali b’maġġoranza ta’ żewġ terzi tal-voti tal-membri preżenti:

a)	l-istabbiliment tal-livell tas-sħubija annwali u tal-kontribuzzjoni tal-osservaturi;

b)	bidliet sa 4 % fl-ammont jew fil-kalkolu tal-kontribuzzjonijiet minn membru jew osservatur.

c)	l-approvazzjoni tal-baġit annwali u tal-kontijiet annwali;

d)	l-approvazzjoni tar-rapport annwali tal-attività;

e)	l-approvazzjoni tal-pjan ta’ ħidma annwali;

f)	l-approvazzjoni ta’ strateġija u pjanijiet finanzjarji ta’ 5 snin;

g)	l-adozzjoni jew l-emendar tar-regoli ta’ implimentazzjoni;

h)	l-elezzjoni ta’ President u Viċi President minn fost il-membri wara n-nomini;

i)	il-ħatra u t-tkeċċija tad-Direttur Ġenerali;

j)	il-ħatra u t-tkeċċija ta’ rappreżentanti tal-kumitati elenkati fl-Artikolu 16(1)

k)	l-aċċettazzjoni ta’ membri u osservaturi ġodda u t-tiġdid ta’ status ta’ osservatur;

l)	it-twaqqif u l-eliminazzjoni ta’ kumitati konsultattivi;

m)	l-approvazzjoni jew it-tneħħija ta’ Komponent tad-DANUBIUS;

n)	l-istabbiliment tal-livell ta’ kontribuzzjonijiet minn membru jew osservatur li huwa organizzazzjoni intergovernattiva.

8.   Id-deċiżjonijiet l-oħra kollha tal-Assemblea Ġenerali għandhom jeħtieġu maġġoranza sempliċi tal-voti tal-membri preżenti.

9.   L-Assemblea Ġenerali għandha tadotta r-regoli ta’ proċedura tagħha stess, li jistgħu jinkludu l-possibbiltà li jiġu adottati deċiżjonijiet permezz ta’ proċedura bil-miktub, soġġetti għal dawn l-Istatuti.

1.   Id-Direttur Ġenerali tad-DANUBIUS-ERIC għandu jinħatar mill-Assemblea Ġenerali. Id-Direttur Ġenerali għandu jiġi impjegat mid-DANUBIUS-ERIC u għandu jkun ir-rappreżentant legali tad-DANUBIUS-ERIC.

2.   Id-Direttur Ġenerali għandu jwettaq il-ġestjoni ta’ kuljum tad-DANUBIUS-ERIC u jkun responsabbli għall-implimentazzjoni tad-deċiżjonijiet mill-Assemblea Ġenerali, inkluż il-pjan ta’ ħidma annwali u l-baġit annwali kif ukoll l-istrateġija u l-pjan finanzjarju ta’ ħames snin. Id-Direttur Ġenerali għandu jikkontribwixxi b’mod attiv għall-bini tal-komunità u għat-trawwim ta’ relazzjonijiet esterni u sħubijiet strateġiċi.

3.   Il-mandat għall-ħatra tad-Direttur Ġenerali għandu jkun ta’ 5 snin. L-Assemblea Ġenerali tista’ ġġedded il-mandat darba għall-istess perjodu.

4.   Id-Direttur Ġenerali għandu jkun ibbażat fil-Kwartieri Ġenerali tad-DANUBIUS-ERIC. Għandu jwettaq l-attivitajiet tiegħu f’konformità mat-termini ta’ referenza għad-Direttur Ġenerali.

5.   It-termini ta’ referenza għad-Direttur Ġenerali għandhom jiġu approvati mill-Assemblea Ġenerali.

1.   L-Assemblea Ġenerali għandha tistabbilixxi Kumitat Konsultattiv Xjentifiku indipendenti, li r-rappreżentanti tiegħu għandhom jinħatru mill-Assemblea Ġenerali.

2.   Il-Kumitat Konsultattiv Xjentifiku għandu jirrapporta lill-Assemblea Ġenerali.

3.   Ir-regoli ta’ proċedura għall-Kumitat Konsultattiv Xjentifiku għandhom jiġu approvati mill-Assemblea Ġenerali.

4.   Il-Kumitat Konsultattiv Xjentifiku għandu:

a)	jimmonitorja l-kwalità xjentifika tal-attività tad-DANUBIUS-ERIC u tal-Komponenti tad-DANUBIUS;

b)	jipprovdi feedback u jagħmel rakkomandazzjonijiet dwar azzjonijiet biex tittejjeb l-effettività tal-eżiti tad-DANUBIUS-ERIC u tal-Komponenti tad-DANUBIUS fil-komunità xjentifika bil-ħsieb li jiġu żviluppati aktar l-attivitajiet xjentifiċi tad-DANUBIUS-ERIC;

c)	jipprovdi feedback b’rabta mal-output xjentifiku u mal-istrateġija xjentifika tad-DANUBIUS-ERIC, kif jista’ jintalab mill-Assemblea Ġenerali;

d)	jirrieżamina r-riċerka mwettqa skont id-DANUBIUS-ERIC u l-Komponenti tad-DANUBIUS fir-rigward tal-prinċipji tar-Riċerka u l-Innovazzjoni Responsabbli kif ukoll kwistjonijiet etiċi u jipprovdi rakkomandazzjoni kif xieraq.

1.   L-Assemblea Ġenerali għandha tistabbilixxi Kumitat għall-Infrastruttura tar-Riċerka, magħmul minn rappreżentanti mid-diversi Komponenti tad-DANUBIUS, li għandu jinkludi tliet rappreżentanti u tliet deputati mis-Supersiti, flimkien ma’ rappreżentant wieħed u deputat wieħed minn kull wieħed mill-Komponenti tad-DANUBIUS l-oħra.

2.   Il-Kumitat għall-Infrastruttura tar-Riċerka għandu jirrapporta lill-Assemblea Ġenerali.

3.   Ir-regoli ta’ proċedura għall-Kumitat għall-Infrastruttura tar-Riċerka għandhom jiġu approvati mill-Assemblea Ġenerali.

4.   Il-Kumitat għall-Infrastruttura tar-Riċerka għandu:

a)	jitlaqqa’ mid-Direttur Ġenerali u jiltaqa’ mill-inqas darba fis-sena;

b)

jiġi kkonsultat mid-Direttur Ġenerali għall-kwistjonijiet ġenerali kollha inkluż it-tfassil ta’ proposti għall-Assemblea Ġenerali fl-istabbiliment u l-modifika tal-pjanijiet ta’ ħidma annwali relatati mal-Komponenti tad-DANUBIUS biex jiġu żgurati l-konsistenza, il-kwalità, il-koerenza u l-istabbiltà tas-servizzi offruti, jiġu kkoordinati l-proċeduri, l-għodod u l-prattiki, l-akkwisti, u jsiru proposti lill-Assemblea Ġenerali biex jittejbu l-kwalità u l-effiċjenza tas-servizzi.

1.   Il-kontribuzzjonijiet annwali fi flus għandhom jitħallsu mill-membri u mill-osservaturi f’konformità mal-prinċipji stabbiliti fl-Anness 2.

2.   Ir-riżorsi tad-DANUBIUS-ERIC jistgħu jinkludu wkoll dan li ġej:

a)	riċerka u għotjiet oħra;

b)	assistenza in natura;

c)	soġġett għall-Artikolu 2(4), l-introjtu derivat minn attivitajiet ekonomiċi limitati, inkluż l-introjtu ġġenerat mill-ispinouts u mill-uffiċċju għat-trasferiment tat-teknoloġija;

d)	kontribuzzjonijiet għajr il-kontribuzzjonijiet annwali fi flus f’konformità mal-paragrafu 1.

e)	riżorsi oħra, inklużi donazzjonijiet u rigali, fil-limiti u skont it-termini u l-kundizzjonijiet approvati mill-Assemblea Ġenerali, f’konformità mal-liġi u mar-regolamenti applikabbli.

3.   Fid-diskrezzjoni tagħha, l-Assemblea Ġenerali tista’ taċċetta kontribuzzjonijiet in natura mingħand il-Membri u l-Osservaturi, flimkien ma’ kontribuzzjonijiet fi flus, kif ukoll, f’każijiet eċċezzjonali, minflokhom. Il-metodi, il-limiti u d-dispożizzjonijiet kontabilistiċi għall-kontribuzzjonijiet in natura u fi flus għandhom jiġu stabbiliti fir-regoli ta’ implimentazzjoni adottati mill-Assemblea Ġenerali.

4.   Il-kontribuzzjonijiet u r-riżorsi tad-DANUBIUS-ERIC għandhom jintużaw biex jintlaħqu l-objettiv, il-kompitu u l-attivitajiet stabbiliti fl-Artikolu 2 ta’ dawn l-Istatuti.

1.   Is-sena finanzjarja tad-DANUBIUS-ERIC għandha tkun Sena Kalendarja.

2.   Id-DANUBIUS-ERIC għandu jopera fi ħdan il-prinċipji ta’ trasparenza u ta’ ġestjoni finanzjarja tajba u għandu jkun soġġett għar-rekwiżiti tal-liġi applikabbli tal-pajjiż fejn għandu s-sede statutorja tiegħu fir-rigward tat-tħejjija, il-preżentazzjoni, l-awditjar u l-pubblikazzjoni tal-kontijiet. Regoli aktar dettaljati għandhom jiġu pprovduti fir-regoli ta’ implimentazzjoni tad-DANUBIUS-ERIC.

3.   Il-kontijiet tad-DANUBIUS-ERIC għandhom ikunu akkumpanjati minn rapport dwar il-ġestjoni baġitarja u finanzjarja tas-sena finanzjarja.

4.   Id-DANUBIUS-ERIC għandu jirreġistra l-kostijiet u d-dħul ta’ kwalunkwe attività ekonomika b’mod separat.

5.   Il-kontijiet tad-DANUBIUS-ERIC għandhom jiġu awditjati minn awditur estern u indipendenti f’konformità mal-liġijiet u mar-regolamenti applikabbli. Ir-rapporti tal-awditjar għandhom jiġu ppreżentati lill-Assemblea Ġenerali flimkien mar-rapport dwar il-ġestjoni baġitarja u finanzjarja tas-sena finanzjarja.

6.   Soġġett għal-liġijiet u r-regolamenti applikabbli, l-awditur għandu jinħatar mill-Assemblea Ġenerali għal perjodu ta’ mhux aktar minn 4 snin u jista’ jinħatar mill-ġdid. L-awditur estern għandu jwettaq funzjonijiet addizzjonali kif stabbilit fir-regoli ta’ implimentazzjoni.

7.   Id-Direttur Ġenerali għandu jipprovdi lill-awditur estern b’tali informazzjoni u assistenza, kif jista’ jkun meħtieġ, sabiex l-awditur estern iwettaq dmirijietu.

1.   L-eżenzjonijiet mit-Taxxa fuq il-Valur Miżjud (VAT, Value Added Tax) abbażi tal-Artikolu 143(1)(g) u l-Artikolu 151(1)(b) tad-Direttiva tal-Kunsill 2006/112/KE u f’konformità mal-Artikoli 50 u 51 tar-Regolament ta’ Implimentazzjoni tal-Kunsill (UE) Nru 282/2011 għandhom jiġu applikati għax-xiri mid-DANUBIUS-ERIC u mill-membri tad-DANUBIUS-ERIC (skont it-tifsira tal-Artikolu 11(1)) tal-Istatuti tad-DANUBIUS-ERIC, li huma għall-użu uffiċjali u esklużiv mid-DANUBIUS-ERIC, dment li tali xiri jsir biss għall-attivitajiet mhux ekonomiċi tad-DANUBIUS-ERIC f’konformità mal-attivitajiet tiegħu. L-eżenzjonijiet mill-VAT għandhom ikunu limitati għal xiri li jaqbeż il-valur ta’ EUR 300.

2.   L-eżenzjonijiet mid-dazju tas-sisa abbażi tal-Artikolu 11 tad-Direttiva tal-Kunsill 2020/262, għandhom ikunu limitati għal xiri mid-DANUBIUS-ERIC li jkun għall-użu uffiċjali u esklużiv mid-DANUBIUS-ERIC, dment li tali xiri jsir biss għall-attivitajiet mhux ekonomiċi tad-DANUBIUS-ERIC f’konformità mal-attivitajiet tiegħu u li kull xiri jaqbeż il-valur ta’ EUR 300.

1.   Id-DANUBIUS-ERIC għandu jippromwovi l-prinċipji ta’ sors miftuħ u ta’ aċċess miftuħ.

2.   L-aċċess għad-data prodotta mid-DANUBIUS-ERIC għandu, kull fejn ikun possibbli (filwaqt li jitqiesu l-liċenzji ta’ partijiet terzi u kwalunkwe arranġament preeżistenti), ikun disponibbli mingħajr ħlas għall-istituzzjonijiet xjentifiċi kollha u għall-partijiet ikkonċernati l-oħra u għandu jkun aċċessibbli b’mod miftuħ għal kwalunkwe persuna xjentifika jew aġenzija. L-użu u l-ġbir tad-data għandhom ikunu soġġetti għal-liġijiet u għar-regolamenti applikabbli dwar il-privatezza tad-data.

3.   Id-DANUBIUS-ERIC għandu jipprovdi gwida (inkluż permezz ta’ sit web) lill-Utenti biex jiżgura li r-riċerka mwettqa bl-użu ta’ materjal li jsir aċċessibbli permezz tad-DANUBIUS-ERIC għandha titwettaq f’qafas li jirrikonoxxi d-drittijiet tas-sidien tad-data u l-privatezza tal-individwi.

4.   Id-DANUBIUS-ERIC għandu jiżgura li l-Utenti jaqblu mat-termini u l-kundizzjonijiet li jirregolaw l-aċċess u li jkun hemm fis-seħħ arranġament tas-sigurtà xieraq fir-rigward tal-implimentazzjoni tal-ħżin u tat-trattament.

5.   Id-DANUBIUS-ERIC għandu jiddefinixxi l-arranġamenti għall-investigazzjoni ta’ allegazzjonijiet ta’ ksur tas-sigurtà u ta’ żvelar tal-kunfidenzjalità fir-rigward tad-data tar-riċerka.

6.   Id-DANUBIUS-ERIC għandu jadotta politika dwar id-data, għall-approvazzjoni mill-Assemblea Ġenerali.

1.   Id-DANUBIUS-ERIC għandu jipproduċi rapport annwali tal-attività, li jkun fih b’mod partikolari l-aspetti xjentifiċi, operazzjonali u finanzjarji tal-attivitajiet tiegħu. Ir-rapport għandu jiġi abbozzat mid-Direttur Ġenerali u approvat mill-Assemblea Ġenerali u ppreżentat lill-Kummissjoni u lill-awtoritajiet pubbliċi rilevanti fi żmien 6 xhur mit-tmiem tas-sena finanzjarja korrispondenti. Wara l-approvazzjoni mill-Assemblea Ġenerali, ir-rapport għandu jkun disponibbli għall-pubbliku permezz tas-sit web tad-DANUBIUS-ERIC.

2.   Id-DANUBIUS-ERIC għandu jinforma lill-Kummissjoni bi kwalunkwe ċirkostanza li thedded li tipperikola serjament il-kisba tal-kompiti tad-DANUBIUS-ERIC jew li tfixkel lid-DANUBIUS-ERIC milli jissodisfa r-rekwiżiti stabbiliti fir-Regolament (KE) Nru 723/2009.

1.   Il-membri għandhom, sa fejn ikun possibbli, jippruvaw isolvu b’mezzi bonarji kwalunkwe tilwim li jista’ jinqala’ mill-interpretazzjoni jew mill-applikazzjoni ta’ dawn l-istatuti.

2.   Il-Qorti tal-Ġustizzja tal-Unjoni Ewropea għandu jkollha ġuriżdizzjoni fuq il-litigazzjoni fost il-membri fir-rigward tad-DANUBIUS-ERIC, bejn il-membri u d-DANUBIUS-ERIC u fuq kwalunkwe litigazzjoni li l-Unjoni tkun parti minnha.

3.   Il-leġiżlazzjoni tal-Unjoni dwar il-ġuriżdizzjoni għandha tapplika għal tilwim bejn id-DANUBIUS-ERIC u l-partijiet terzi. F’każijiet mhux koperti mil-leġiżlazzjoni tal-Unjoni, il-liġi tar-Rumanija għandha tiddetermina l-ġuriżdizzjoni kompetenti għar-riżoluzzjoni ta’ tali tilwim.

1.   Ir-Rumanija għandha ssejjaħ laqgħa kostituzzjonali tal-Assemblea Ġenerali mill-aktar fis possibbli, u mhux aktar tard minn 45 jum wara li tidħol fis-seħħ id-Deċiżjoni tal-Kummissjoni li tistabbilixxi d-DANUBIUS-ERIC.

2.   Qabel ma ssir il-laqgħa kostituzzjonali tal-Assemblea Ġenerali, ir-Rumanija għandha tinnotifika lill-membri u lill-osservaturi bi kwalunkwe azzjoni legali urġenti speċifika li jeħtieġ li tittieħed f’isem id-DANUBIUS-ERIC. Sakemm membru ma joġġezzjonax fi żmien 5 ijiem tax-xogħol wara li jiġi nnotifikat, l-azzjoni legali għandha titwettaq minn persuna awtorizzata kif xieraq mir-Rumanija.