—

wara li kkunsidra l-Artikolu 25(2) tar-Regoli ta’ Proċedura tal-Parlament Ewropew,

—

wara li kkunsidra l-Ftehim Interistituzzjonali tal-20 ta’ Mejju 2021 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar Reġistru Obbligatorju ta’ Trasparenza (1),

—

wara li kkonsulta lis-Servizz Legali tal-Parlament Ewropew, lill-Kumitat tal-Persunal tal-Parlament Ewropew, lill-Kumitat għall-Ugwaljanza tal-Opportunità bejn l-irġiel u n-nisa u għad-Diversità tal-Parlament Ewropew, u lill-Uffiċjal tal-Protezzjoni tad-Data tal-Parlament Ewropew,

(1)

L-Artikolu 11(1) tat-Trattat dwar l-Unjoni Ewropea (TUE) jeżiġi li l-istituzzjonijiet tal-Unjoni, permezz ta’ mezzi xierqa, jagħtu liċ-ċittadini u lill-assoċjazzjonijiet rappreżentattivi l-opportunità li jikkomunikaw u jiskambjaw pubblikament il-fehmiet tagħhom fl-oqsma ta’ azzjoni kollha tal-Unjoni. Barra minn hekk, l-Artikolu 11(2) TUE jeżiġi li l-istituzzjonijiet tal-Unjoni jżommu djalogu miftuħ, trasparenti u regolari mal-assoċjazzjonijiet rappreżentattivi u mas-soċjetà ċivili.

(2)

L-Artikolu 15(1) tat-Trattat dwar il-Funzjonament tal-Unjoni Ewropea (TFUE) jipprevedi li, sabiex tiġi promossa t-tmexxija tajba u sabiex tiġi żgurata l-parteċipazzjoni tas-soċjetà ċivili, l-istituzzjonijiet, il-korpi u l-organi tal-Unjoni għandhom iwettqu x-xogħol tagħhom b’mod kemm jista’ jkun miftuħ.

(3)

It-Titolu II tar-Regolamenti tal-Persunal għall-Uffiċjali tal-Unjoni Ewropea u l-Kondizzjonijiet ta’ Impjieg ta’ Uffiċjali Oħra tal-Komunitajiet Ewropej, stabbiliti fir-Regolament tal-Kunsill (KEE, Euratom, KEFA) Nru 259/68 (2) jistabbilixxi d-drittijiet u l-obbligi tal-uffiċjali, filwaqt li jiddeskrivi b’mod espliċitu l-imġiba u d-dmirijiet tagħhom.

(4)

Il-Parlament jimpenja ruħu li jiżgura l-integrità, l-indipendenza u l-obbligu ta’ rendikont tiegħu, li huma essenzjali biex tinżamm il-fiduċja taċ-ċittadini tal-Unjoni fil-leġittimità tal-proċessi politiċi, leġiżlattivi u amministrattivi tal-Unjoni. Jenħtieġ li dak l-impenn jissarraf f’rekwiżiti speċifiċi fir-rigward tal-laqgħat tal-maniġers tal-Parlament f’impjieg attiv fis-Segretarjat Ġenerali tiegħu.

(5)

L-istituzzjonijiet firmatarji tal-Ftehim Interistituzzjonali tal-20 ta’ Mejju 2021 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar Reġistru Obbligatorju ta’ Trasparenza (il-“FII dwar reġistru obbligatorju ta’ trasparenza”) impenjaw ruħhom għall-“kundizzjonalità”, il-prinċipju li permezz tiegħu r-reġistrazzjoni fir-reġistru tat-trasparenza tkun prekundizzjoni meħtieġa għar-rappreżentanti ta’ gruppi ta’ interess biex ikunu jistgħu jwettqu ċerti attivitajiet koperti. L-istituzzjonijiet firmatarji jimplimentaw dak il-prinċipju permezz ta’ deċiżjonijiet individwali abbażi tas-setgħat tagħhom ta’ organizzazzjoni interna.

(6)

Jenħtieġ li il-prinċipju tal-kundizzjonalità japplika għal-laqgħat skedati bejn ir-rappreżentanti ta’ gruppi ta’ interess u l-maniġers tal-amministrazzjoni tal-Parlament fir-rigward tal-ħidma parlamentari.

(7)

Il-laqgħat skedati tal-maniġers mar-rappreżentanti ta’ gruppi ta’ interess u mar-rappreżentanti tal-awtoritajiet pubbliċi ta’ pajjiżi terzi fir-rigward tal-ħidma parlamentari jenħtieġ li jkunu ddikjarati u ppubblikati b’mod li jiżgura li l-amministrazzjoni tal-Parlament tkun miftuħa, effiċjenti u indipendenti.

(8)

Ċerti attivitajiet u korpi elenkati fl-Artikolu 4 tal-FII dwar reġistru obbligatorju ta’ trasparenza ma jaqgħux fil-kamp ta’ applikazzjoni ta’ dak l-FII u għaldaqstant jenħtieġ li ma jkunux koperti mid-definizzjoni ta’ “rappreżentant ta’ grupp ta’ interess” f’din id-Deċiżjoni.

(9)

Iċ-ċittadini tal-Unjoni li jżuru l-bini tal-Parlament, il-petizzjonanti u l-ġurnalisti li jipparteċipaw f’konferenzi stampa jew f’attivitajiet ta’ informazzjoni oħra organizzati għall-benefiċċju tagħhom jenħtieġ li majitqiesux bħala “rappreżentanti ta’ gruppi ta’ interess” kif definit f’din id-Deċiżjoni. Bl-istess mod, is-sessjonijiet ta’ informazzjoni ġenerali u l-attivitajiet ta’ komunikazzjoni tas-servizzi tal-Parlament li għandhom l-għan li jilħqu udjenzi li jikkonsistu minn multiplikaturi jenħtieġ li ma jitqiesux bħala laqgħat skedati ma’ rappreżentanti ta’ gruppi ta’ interess għal finijiet ta’ din id-Deċiżjoni.

(10)

Fid-dawl tal-impenn tal-Parlament biex jiżgura l-integrità, l-indipendenza u l-obbligu ta’ rendikont u f’konformità mar-Regolament (UE) 2018/1725 tal-Parlament Ewropew u tal-Kunsill (3), b’mod partikolari l-Artikolu 5(1)(a) tiegħu, jenħtieġ li jkun possibbli li jiġu ppublikati l-ismijiet tal-maniġers li jkunu ddikjaraw laqgħa skedata skont din id-Deċiżjoni,

(a)

“maniġer” tfisser is-Segretarju Ġenerali, Direttur Ġenerali, Direttur, Kap ta’ Unità, Kap ta’ Uffiċċju ta’ Kollegament jew Kap ta’ Tim, inkluż fil-kapaċità ta’ aġent;

(b)

“rappreżentant ta’ grupp ta’ interess” tfisser kwalunkwe persuna fiżika jew ġuridika, jew grupp, assoċjazzjoni jew network formali jew informali, li jaqgħu fil-kamp ta’ applikazzjoni tal-FII dwar reġistru obbligatorju ta’ trasparenza, li jinvolvu ruħhom f’attivitajiet koperti skont l-Artikolu 3 tal-FII dwar reġistru obbligatorju ta’ trasparenza, soġġetti għall-eżenzjonijiet għall-attivitajiet u l-korpi mhux koperti skont l-Artikolu 4 tal-FII dwar reġistru obbligatorju ta’ trasparenza;

(c)

“rappreżentanti tal-awtoritajiet pubbliċi ta’ pajjiżi terzi” tfisser ir-rappreżentanti kollha, fil-livell nazzjonali jew sottonazzjonali, ta’ pajjiżi terzi u l-missjonijiet diplomatiċi, l-ambaxxati, il-konsolati, il-mibgħuta kummerċjali, l-entitajiet kummerċjali u rappreżentanzi oħrajn tagħhom.

(d)

“laqgħa skedata” tfisser laqgħa ppjanata ma’ rappreżentanti ta’ gruppi ta’ interess jew ma’ rappreżentanti tal-awtoritajiet pubbliċi ta’ pajjiżi terzi bil-preżenza fiżika jew mill-bogħod, li ġiet organizzata bil-quddiem, u li teskludi fost l-oħrajn, l-inkontri spontanji jew soċjali u l-parteċipazzjoni f’dibattiti pubbliċi, u teskludi l-laqgħat li jsiru fl-ambitu ta’ proċedura amministrattiva stabbilita mit-TUE, mit-TFUE jew mill-atti tal-Unjoni li jaqgħu taħt ir-responsabbiltà tal-maniġer,, jew laqgħat li jiffurmaw parti mill-programm ta’ korp uffiċjali tal-Parlament;

(e)

“kundizzjonalità” tfisser il-prinċipju li permezz tiegħu r-reġistrazzjoni fir-reġistru tat-trasparenza tkun prekundizzjoni għar-rappreżentanti ta’ gruppi ta’ interess biex ikunu jistgħu jwettqu ċerti attivitajiet koperti.