1)

L-Artikolu 16 tar-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data)

għandu jiġi interpretat fis-sens li:

jobbliga fuq awtorità nazzjonali responsabbli miż-żamma ta’ reġistru pubbliku li tirrettifika d-data personali dwar l-identità tal-ġeneru ta’ persuna fiżika meta din id-data ma tkunx preċiża, fis-sens tal-Artikolu 5(1)(d) ta’ dan ir-regolament.

2)

L-Artikolu 16 tar-Regolament 2016/679

għandu jiġi interpretat fis-sens li:

għall-finijiet tal-eżerċizzju tad-dritt għar-rettifika tad-data personali dwar l-identità tal-ġeneru ta’ persuna fiżika, li tinsab f’reġistru pubbliku, din il-persuna tista’ tkun obbligata tipprovdi l-provi rilevanti u suffiċjenti li jistgħu raġonevolment jintalbu mill-imsemmija persuna sabiex tiġi stabbilita in-nuqqas ta’ preċiżjoni ta’ din id-data. Madankollu, Stat Membru fl-ebda każ ma jista’, permezz ta’ prassi amministrattiva, jissuġġetta l-eżerċizzju ta’ dan id-dritt għall-produzzjoni ta’ provi ta’ trattament kirurġiku ta’ assenjazzjoni mill-ġdid tal-ġeneru.