1)

L-Artikolu 17 tar-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (1) (iktar ’il quddiem il-“GDPR”), moqri flimkien mad-dritt għall-protezzjoni tad-data personali kif iggarantit fl-Artikolu 8 tal-Karta tad-Drittijiet Fundamentali tal-Unjoni Ewropea (iktar ’il quddiem il-“Karta”), flimkien mal-libertà ta’ ħsieb, ta’ kuxjenza u ta’ reliġjon kif iggarantita fl-Artikolu 10 tal-Karta u fl-Artikolu 9 tal-Konvenzjoni Ewropea tad-Drittijiet tal-Bniedem kif ukoll mal-prinċipju tas-separazzjoni bejn il-Knisja u l-Istat, kif stabbilit fl-Artikoli 19 u 21 tal-Kostituzzjoni Belġjana, għandu jiġi interpretat fis-sens li persuna li kienet ġiet mgħammda bħala minuri u li għandha l-intenzjoni li titbiegħed mill-Knisja Kattolika Rumana bħala persuna maġġorenni għandha dritt għat-tħassir tad-data personali tagħha fir-reġistru tal-magħmudiji jew fis-sens li ma għandhiex dan id-dritt?

2)

Għall-applikazzjoni tal-Artikolu 17(1)(c) tal-GDPR, il-fatt li l-iskrizzjoni fir-reġistru tal-magħmudiji taffettwa, skont il-kontrollur, id-drittijiet fundamentali msemmija iktar ’il fuq (libertà ta’ reliġjon) tal-kontrollur u tal-komunità ekkleżjastika Kattolika Rumana li huwa jirrappreżenta jwassal għal risposta differenti?

3)

Il-fatt li dan ir-reġistru tal-magħmudiji ma huwiex reġistru diġitali iżda mezz materjali uniku fil-forma ta’ ktieb, bil-paġni recto verso li fuq in-naħa ta’ wara tagħhom tidher ukoll data ta’ persuni kkonċernati oħra, iwassal għal risposta differenti?

4)

Il-fatt li l-ktieb innifsu jikkostitwixxi artefatt storiku u li r-reġistru tal-magħmudiji jikkostitwixxi rappreżentazzjoni unika ta’ fatti storiċi li ma huma rreġistrati mkien ieħor, l-ipproċessar ta’ data li għalhekk iseħħ ukoll għal finijiet ta’ arkivjar fl-interess pubbliku, għal finijiet ta’ riċerka xjentifika jew storika jew għal finijiet ta’ statistika fis-sens tal-Artikolu 17(3)(d) tal-GDPR, iwassal għal risposta differenti?

5)

Sa fejn jeżisti dritt għat-tħassir fis-sens tal-Artikolu 17(1) tal-GDPR u sa fejn ebda eċċezzjoni għal dan id-dritt ma tapplika fis-sens tal-Artikolu 17(3) tal-GDPR, l-annotazzjoni fil-marġni tar-reġistru tal-magħmudiji li tindika li persuna ħalliet il-Knisja tissodisfa, b’mod ekwivalenti, l-imsemmi dritt?