1)

Id-dritt tal-Unjoni Ewropea, b’mod partikolari l-Artikoli 36, 37 u 38 tad-Direttiva 2013/32/UE tal-Parlament Ewropew u tal-Kunsill tas-26 ta’ Ġunju 2013 dwar proċeduri komuni għall-għoti u l-irtirar tal-protezzjoni internazzjonali (riformulazzjoni) (2), moqrija wkoll flimkien mal-premessi 42, 46 u 48 tagħha, u interpretati fid-dawl tal-Artikolu 47 tal-Karta tad-Drittijiet Fundamentali tal-Unjoni Ewropea (u tal-Artikoli 6 u 13 tal-Konvenzjoni Ewropea tad-Drittijiet tal-Bniedem (iktar ’il quddiem il-“KEDB”)), jipprekludi leġiżlatur nazzjonali, li għandu s-setgħa li jippermetti l-ħolqien ta’ listi ta’ pajjiżi ta’ oriġini bla periklu u li jirregola l-kriterji li għandhom jiġu segwiti u s-sorsi li għandhom jintużaw għal dan il-għan, milli jipproċedi wkoll sabiex jindika direttament, permezz ta’ att leġiżlattiv primarju, Stat terz bħala pajjiż ta’ oriġini bla periklu?

2)

Fi kwalunkwe każ, id-dritt tal-Unjoni, b’mod partikolari l-Artikoli 36, 37 u 38 tal-istess direttiva, moqrija wkoll flimkien mal-premessi 42, 46 u 48 tagħha, u interpretati fid-dawl tal-Artikolu 47 tal-Karta tad-Drittijiet Fundamentali (u tal-Artikoli 6 u 13 tal-KEDB), jipprekludi lil-leġiżlatur milli jindika pajjiż terz bħala pajjiż ta’ oriġini bla periklu mingħajr ma jagħmel is-sorsi użati biex jiġġustifikaw tali indikazzjoni aċċessibbli u verifikabbli, u b’hekk jipprevjeni lil applikant għal ażil milli jikkontestaha, u lill-qorti milli teżamina l-oriġini, l-awtorità, l-affidabbiltà, ir-rilevanza, l-attwalità, il-kompletezza, u fi kwalunkwe każ b’mod ġenerali l-kontenut, u li tagħmel l-evalwazzjonijiet tagħha stess dwar l-eżistenza tal-kundizzjonijiet materjali għal tali indikazzjoni, stipulati fl-Anness I tad-Direttiva?

3)

Id-dritt tal-Unjoni, b’mod partikolari l-Artikoli 36, 37 u 38 tal-istess direttiva, moqrija wkoll flimkien mal-premessi 42, 46 u 48 tagħha, u interpretati fid-dawl tal-Artikolu 47 tal-Karta tad-Drittijiet Fundamentali (u tal-Artikoli 6 u 13 tal-KEDB), għandu jiġi interpretat fis-sens li, matul il-proċedura mħaffa mal-fruntiera [għall-persuni li ġejjin] minn pajjiż ta’ oriġini indikat bla periklu, il-qorti tista’ fi kwalunkwe każ tuża informazzjoni dwar il-pajjiż ta’ oriġini, billi tislitha b’mod indipendenti mis-sorsi msemmija fl-Artikolu 37(3) tad-Direttiva, li tkun utli sabiex tiġi aċċertata l-eżistenza tal-kundizzjonijiet materjali għal tali indikazzjoni, stipulati fl-Anness I tad-Direttiva?

4)

Id-dritt tal-Unjoni, b’mod partikolari l-Artikoli 36, 37 u 38 tal-istess direttiva, kif ukoll l-Anness I tagħha, moqrija wkoll flimkien mal-premessi 42, 46 u 48 tagħha, u interpretati fid-dawl tal-Artikolu 47 tal-Karta tad-Drittijiet Fundamentali (u tal-Artikoli 6 u 13 tal-KEDB), jipprekludi pajjiż terz milli jiġi ddefinit bħala “ta’ oriġini bla periklu” jekk ikun hemm, f’dak il-pajjiż, kategoriji ta’ persuni li għalihom huwa ma jissodisfax il-kundizzjonijiet materjali għal tali indikazzjoni, stipulati fl-Anness I tad-Direttiva?