—

tannulla s-sentenza tal-Qorti Ġenerali tal-Unjoni Ewropea tas-17 ta’ Lulju 2024, Makhlouf vs Il-Kunsill (T-206/22, iktar ’il quddiem is-“sentenza appellata”, EU:T:2024:495) inkluż inkwantu din ikkundannat lill-appellanti tbati l-ispejjeż tagħha stess kif ukoll dawk tal-Kunsill;

—

tiddeċiedi r-rikors fuq il-mertu u tannulla d-deċiżjonijiet ikkontestati sa fejn dawn jinkludu u jżommu lill-appellanti fuq il-listi annessi mal-imsemmija atti:

—

tordna l-kumpens għad-dannu li hija ġarrbet u tikkundanna lill-Kunsill iħallasha s-somma ta’ EUR 10 000 bħala danni;

—

tordna lill-Kunsill ibati l-ispejjeż kollha sostnuti mill-appellanti kemm quddiem il-Qorti Ġenerali kif ukoll quddiem il-Qorti tal-Ġustizzja.

1.

L-ewwel aggravju bbażat fuq ksur tal-garanziji proċedurali li minnhom kellha tibbenefika l-appellanti, minħabba li hija ma nstemgħetx qabel l-adozzjoni tal-atti inizjali adottati mill-Kunsill. Skont l-appellanti, il-Qorti Ġenerali qieset b’mod żbaljat in-neċessità tal-effett ta’ sorpriża tal-miżuri restrittivi inkwistjoni, b’mod partikolari għaliex is-sehem li l-assi tal-appellanti jirrappreżentaw meta mqabbel mal-patrimonju li hija kienet ser tiret kien żgħir u l-miżuri kienu ġew adottati ħdax-il sena wara l-adozzjoni tal-miżuri restrittivi relatati ma’ missierha.

2.

Fit-tieni aggravju tagħha, l-appellanti tqis li l-Qorti Ġenerali wettqet żball ta’ liġi billi vvalidat l-evalwazzjoni mwettqa mill-Kunsill f’dak li jirrigwarda r-rabta tal-appellanti mar-reġim Sirjan u l-influwenza tagħha fuq id-deċiżjonijiet ta’ dan tal-aħħar. Billi rreferiet għall-kriterju tal-appartenenza tal-familja, il-Qorti Ġenerali qalbet l-oneru tal-prova u kisret l-Artikoli 26, 29 u 40 TUE, l-Artikoli 240 u 275 TFUE u l-Artikoli 41 u 47 tal-Karta tad-Drittijiet Fundamentali tal-Unjoni Ewropea, u dan f’sitwazzjoni fejn il-Kunsill kien qies lill-appellanti bħala esterna għall-kwistjonijiet politiċi u ekonomiċi Sirjani matul perijodu ta’ iktar minn 10 snin, fejn dan tal-aħħar kien biddel f’daqqa l-evalwazzjoni tiegħu sentejn wara l-mewt ta’ missierha.

3.

Fit-tielet aggravju tagħha, l-appellanti tqajjem ksur tal-prinċipju ta’ proporzjonalità u tallega żnaturament tal-fatti kif ukoll motivazzjoni insuffiċjenti fis-sentenza appellata f’dak li jirrigwarda l-iffriżar tal-fondi tagħha stess, minbarra l-assi li jifformaw parti mill-patrimonju ta’ Mohammed Makhlouf li kienu ffriżati.