Appell ippreżentat fl-20 ta’ Settembru 2024 minn Vladimir Rashevsky mis-sentenza mogħtija mill-Qorti Ġenerali (L-Ewwel Awla) fl-10 ta’ Lulju 2024 fil-Kawżi T-309/22 u T-739/22, Rashevsky vs Il-Kunsill

(Kawża C-612/24 P)

(C/2024/7156)

Lingwa tal-kawża: l-Ingliż

Partijiet

Appellant: Vladimir Rashevsky (rappreżentanti: G. Lansky, P. Goeth u A. Egger, Rechtsanwälte)

Parti oħra fil-proċedura: Il-Kunsill tal-Unjoni Ewropea

Talbiet

L-appellant jitlob li l-Qorti tal-Ġustizzja jogħġobha:

—	tannulla s-sentenza appellata;

—

tiddeċiedi b’mod definittiv il-kawża u tannulla d-Deċiżjoni tal-Kunsill (PESK) 2022/429 (1) tal-15 ta’ Marzu 2022 li temenda d-Deċiżjoni 2014/145/PESK dwar miżuri restrittivi fir-rigward ta’ azzjonijiet li jipperikolaw jew jheddu l-integrità territorjali, is-sovranità u l-indipendenza tal-Ukrajna kif ukoll ir-Regolament ta' Implimentazzjoni tal-Kunsill (UE) 2022/427 (2) tal-15 ta’ Marzu 2022 li jimplimenta r-Regolament (UE) Nru 269/2014 dwar miżuri restrittivi fir-rigward ta’ azzjonijiet li jdgħajfu jew jheddu l-integrità territorjali, is-sovranità u l-indipendenza tal-Ukrajna, sa fejn dawn l-atti jikkonċernaw l-appellant, u tikkundanna lill-Kunsill tal-Unjoni Ewropea għall-ispejjeż, inklużi l-ispejjeż tal-proċeduri quddiem il-Qorti Ġenerali; jew sussidjarjament;

—	tibgħat il-kawża lura quddiem il-Qorti Ġenerali sabiex tiddeċiedi konformement mad-deċiżjoni tal-Qorti tal-Ġustizzja dwar il-punti ta’ liġi, u tirriżerva l-ispejjeż.

Aggravji u argumenti prinċipali

Insostenn tal-appell, l-appellant jinvoka żewġ aggravji.

L-ewwel aggravju dwar il-konklużjonijiet tal-Qorti Ġenerali dwar il-motiv ta’ żball ta’ evalwazzjoni tal-appellanti: il-Qorti Ġenerali wettqet żball ta’ liġi meta ddeċidiet li l-Kunsill tal-Unjoni Ewropea ma wettaq l-ebda żball ta’ evalwazzjoni rigward l-atti kkontestati fil-Kawża T-309/22 meta:

—

ikkwalifika lill-appellant bħala “negozjanti ewlenin […] involuti f’setturi ekonomiċi li jipprovdu sors sostanzjali ta’ dħul lill-Gvern tal-Federazzjoni Russa […]” fis-sens tal-kriterju ta’ inklużjoni previst mill-Artikolu 2(1)(g) u, essenzjalment, l-Artikolu 1(1) tad-Deċiżjoni tal-Kunsill (PESK) 2014/145 kif emendata bid-Deċiżjoni tal-Kunsill (PESK) 2022/329 (3) tal-25 ta’ Frar 2022 kif ukoll tal-Artikolu 3(1)(g) tar-Regolament tal-Kunsill (UE) 269/2014 kif emendat bir-Regolament tal-Kunsill (UE) 2022/330 (4) tal-25 ta’ Frar 2022 (iktar ’il-quddiem il-“kriterju (g)”);

—	iddeċidiet li l-pożizzjoni ta’ CEO hija suffiċjenti sabiex tiġġustifika l-inklużjoni tal-appellant taħt il-kriterju (g);

—	ma ħaditx inkonsiderazzjoni d-dħul iġġenerat mill-EuroChem għall-baġit tal-Federazzjoni Russa.

It-tieni aggravju dwar ksur tad-drittijiet fundamentali, ta’ proporzjonalità, ta’ legalità u ta’ prevedibbiltà tal-miżuri kkontestati kontra l-appellant: Il-Qorti Ġenerali wettqet żball ta’ liġi meta b’mod żbaljat:

—	naqset milli tindirizza l-kwistjoni tal-ksur manifestament mhux xieraq u sproporzjonat ta’ diversi prinċipji tal-Karta tad-Drittijiet Fundamentali tal-Unjoni Ewropea;

—	naqset milli tevalwa l-kwistjoni ta’ proporzjonalità u l-kwistjoni tal-illegalità impliċita b’mod suffiċjenti tal-miżuri kkontestati.

(1) ĠU 2022, L 87I, p. 44, rettifika fil-ĠU 2022, L 105, p. 67.

(2) ĠU 2022, L 87I, p. 1, rettifika fil-ĠU 2022, L 105, p. 66.

(3) ĠU 2022, L 50, p. 1.

(4) ĠU 2022, L 51, p. 1.