ANNESS 1: ABBOZZ TA’ REGOLAMENT TAL-KUNSILL LI JEMENDA R-REGOLAMENT (UE, Euratom) 2020/2093 LI JISTABBILIXXI L-QAFAS FINANZJARJU PLURIENNALI GĦAS-SNIN MILL-2021 SAL-2027

REGOLAMENT TAL-KUNSILL

ta’ ...

li jemenda r-Regolament (UE, Euratom) 2020/2093 li jistabbilixxi l-qafas finanzjarju pluriennali għas-snin mill-2021 sal-2027

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 312 tiegħu,

Wara li kkunsidra t-Trattat li jistabbilixxi l-Komunità Ewropea tal-Enerġija Atomika, u b’mod partikolari l-Artikolu 106a tiegħu,

Wara li kkunsidra l-proposta tal-Kummissjoni Ewropea,

Wara li kkunsidra l-approvazzjoni tal-Parlament Ewropew (1),

Wara li l-abbozz tal-att leġiżlattiv intbagħat lill-parlamenti nazzjonali,

Filwaqt li jaġixxi skont proċedura leġiżlattiva speċjali,

Billi:

(1)	Il-Kummissjoni ppreżentat rieżami tal-funzjonament tal-Qafas Finanzjarju Pluriennali (QFP) għas-snin mill-2021 sal-2027 stabbilit fir-Regolament tal-Kunsill (UE, Euratom) 2020/2093 (2) wara l-ewwel snin ta’ implimentazzjoni tiegħu, inkluż valutazzjoni tas-sostenibbiltà tal-limiti massimi tan-nefqa.

(2)

Minn Diċembru 2020 s’issa, l-Unjoni ffaċċjat sensiela ta’ sfidi mingħajr preċedent u li ma kinux mistennija. L-Unjoni aġixxiet malajr u użat il-mezzi kollha għad-dispożizzjoni tagħha, iżda l-flessibbiltà baġitarja limitata inkorporata fil-QFP għas-snin 2021-2027 hija kważi eżawrita, u dan inaqqas il-kapaċità tal-baġit tal-Unjoni li jindirizza anke l-aktar sfidi urġenti.

(3)

Fl-ewwel snin tal-implimentazzjoni tal-QFP intużaw b’mod estensiv strumenti speċjali biex jiġu indirizzati diversi sfidi. Tippersisti l-ħtieġa li tittieħed aktar azzjoni, filwaqt li l-bilanċi baġitarji biex jiġu kkonfrontati sitwazzjonijiet bħal dawn matul il-bqija tal-perjodu tal-QFP huma limitati.

(4)

Jenħtieġ li l-baġit tal-Unjoni jippermetti lill-Unjoni tipprovdi r-risponsi politiċi meħtieġa għall-isfidi emerġenti u tissodisfa l-obbligi legali li ma jistgħux jiġu akkomodati fil-limiti massimi eżistenti u lanqas b’flessibbiltà eżawrita. Il-limiti massimi tan-nefqa f’approprjazzjonijiet ta’ impenn għall-Intestaturi 1, 2, 3, 4, 5 u 6 jenħtieġ li jiġu modifikati għas-snin 2024, 2025, 2026 u 2027. B’riżultat ta’ dan, filwaqt li l-limiti massimi tan-nefqa fl-approprjazzjonijiet ta’ pagament jistgħu jinżammu fil-livelli attwali tagħhom, jenħtieġ li l-limitu massimu f’approprjazzjonijiet ta’ pagament għall-Istrument ta’ Marġni Uniku għall-2026 jiġi aġġustat biex jiġi evitat ir-riskju ta’ xogħol b’lura. Barra minn hekk, l-ammont totali ta’ allokazzjonijiet addizzjonali skont l-aġġustament speċifiku għall-programm previst fl-Artikolu 5 kif ukoll it-tabella relatata fl-Anness II tar-Regolament (UE, Euratom) 2020/2093 jenħtieġ li jiġu mmodifikati.

(5)	Jenħtieġ li jiġu mmodifikati wkoll l-ammonti għar-Riżerva ta’ Aġġustament għall-Brexit u l-Fond Ewropew ta’ Aġġustament għall-Globalizzazzjoni.

(6)

Il-gwerra illegali ta’ aggressjoni tar-Russja kontra l-Ukrajna ġabet il-gwerra lura fit-territorju Ewropew. L-Unjoni ser tkompli tappoġġa lill-Ukrajna sakemm ikun hemm bżonn u ser tgħinha bis-sħiħ fil-perkors Ewropew tagħha. Għal dak l-għan, il-Parlament Ewropew u l-Kunsill adottaw ir-Regolament (UE) 2024 /…. tal-Parlament Ewropew u tal-Kunsill (3) (*1) bħala r-rispons tal-Unjoni biex tappoġġa l-istabbiltà makrofinanzjarja, ir-rikostruzzjoni u l-modernizzazzjoni tal-Ukrajna, filwaqt li tappoġġa l-isforz tar-riforma tal-Ukrajna bħala parti mit-triq tal-adeżjoni tagħha mal-Unjoni (il-“Faċilità għall-Ukrajna”).

(7)

Minħabba l-inċertezzi marbuta mal-gwerra ta’ aggressjoni tar-Russja, jenħtieġ li l-Faċilità għall-Ukrajna tkun strument flessibbli biex tipprovdi l-forma u l-livell adegwati ta’ appoġġ sal-2027. Jenħtieġ li l-appoġġ taħt il-Faċilità għall-Ukrajna jiġi pprovdut fil-forma ta’ self, appoġġ mhux ripagabbli u proviżjonament għal garanziji baġitarji.

(8)

Għall-parti tal-appoġġ tal-Faċilità għall-Ukrajna pprovdut fil-forma ta’ self, huwa xieraq li l-garanzija tal-baġit eżistenti tal-Unjoni tiġi estiża sal-2027 biex tkopri l-assistenza finanzjarja li ssir disponibbli għall-Ukrajna. B’konsegwenza ta’ dan, jenħtieġ li jkun possibbli li jiġu mobilizzati l-approprjazzjonijiet meħtieġa fil-baġit tal-Unjoni lil hinn mil-limiti massimi tal-QFP għall-assistenza finanzjarja lill-Ukrajna disponibbli sa tmiem l-2027. Minbarra li tkopri l-għajnuna finanzjarja fuq terminu qasir lill-Ukrajna kif diġà previst fir-Regolament (UE) 2022/2463, jenħtieġ li l-garanzija tal-baġit tal-Unjoni tkopri l-assistenza finanzjarja lill-Ukrajna għal ammont sa massimu ta’ EUR 33 biljun kif speċifikat fir-Regolament (UE) 2024/….. (*).

(9)

Għall-parti tal-appoġġ tal-Faċilità għall-Ukrajna pprovdut fil-forma ta’ appoġġ mhux ripagabbli u proviżjonament ta’ garanziji baġitarji, jenħtieġ li l-approprjazzjonijiet jiġu pprovduti permezz ta’ strument tematiku speċjali ġdid ir-“Riżerva għall-Ukrajna”. Jenħtieġ li l-approprjazzjonijiet ta’ impenn u l-approprjazzjonijiet ta’ pagament korrispondenti jiġu mobilizzati kull sena fil-qafas tal-proċedura baġitarja stabbilita fl-Artikolu 314 tat-Trattat dwar il-Funzjonament tal-Unjoni Ewropea (TFUE), lil hinn mil-limiti massimi tal-QFP. Għall-iżvilupp ordnat tan-nefqa li għandha tiġi pprogrammata skont id-dispożizzjonijiet rilevanti tar-Regolament (UE) 2024/… (*) u b’mod partikolari fid-dawl tal-ammonti li għandhom jiġu stabbiliti fil-Pjan għall-Ukrajna, huwa xieraq li jiġu stabbiliti l-ammonti massimi globali u annwali li jistgħu jkunu disponibbli għar-Riżerva għall-Ukrajna matul il-perjodu mill-2024 sal-2027. Sabiex jiġu żgurati l-implimentazzjoni sħiħa u flessibbiltà bejn is-snin, f’konformità mal-ammont globali, jenħtieġ li jkun possibbli li jintuża fis-snin ta’ wara sal-2027 il-porzjon mhux użat tal-ammont annwali f’sena partikolari, flimkien mal-ammont annwali massimu għas-sena rilevanti.

(10)

Mill-2022 ’il quddiem, l-Unjoni u l-biċċa l-kbira tal-ekonomiji ewlenin raw żieda qawwija fir-rati tal-imgħax għall-emittenti kollha tal-bonds, inkluża l-Unjoni. B’riżultat ta’ dan, il-kostijiet għall-finanzjament tas-self tal-Istrument tal-Unjoni Ewropea għall-Irkupru NextGenerationEU (“EURI”) li jridu jiġġarrbu mill-baġit tal-Unjoni skont l-Artikolu 5(2) tad-Deċiżjoni tal-Kunsill (UE, Euratom) 2020/2053 (4) huma mistennija jaqbżu l-istimi inizjalment ipprogrammati taħt il-limiti massimi tal-QFP fiż-żmien tal-adozzjoni tiegħu f’Diċembru 2020, li kienu ta’ EUR 2 332 miljun fl-2025 (fi prezzijiet tal-2018), EUR 3 196 miljun fl-2026 (fi prezzijiet tal-2018) u EUR 4 168 miljun fl-2027 (fi prezzijiet tal-2018) rispettivament.

(11)

Minħabba l-inċertezza marbuta mal-evoluzzjoni futura tar-rati tal-imgħax f’ċirkostanzi tas-suq li dejjem qed jevolvu, kif ukoll il-ħtiġijiet ta’ self globali għall-finanzjament tal-programmi attwali tal-Unjoni li huma ffinanzjati mill-EURI, huwa xieraq li, bħala parti mid-dispożizzjonijiet meħtieġa biex il-proċedura baġitarja annwali taħdem mingħajr xkiel u biex jiġi żgurat li l-mezzi finanzjarji jkunu disponibbli sabiex l-Unjoni tkun tista’ tissodisfa l-obbligi legali tagħha, jiġi stabbilit strument eċċezzjonali u temporanju, limitat għad-durata tal-QFP attwali, biex jiġu koperti l-kostijiet tal-finanzjament għal self tal-EURI li jaqbżu l-ammonti inizjalment ipprogrammati. Jenħtieġ li jinħoloq strument speċjali tematiku ġdid - “Strument tal-EURI” - li jkollu l-għan uniku li jkopri l-qbiż tal-kostijiet li jkunu pendenti. Jenħtieġ li dan l-istrument ikun eċċezzjonali u ma jistax iservi bħala preċedent għal arranġamenti futuri għall-Oqfsa Finanzjarji Plurienali ta’ wara l-2027, b’mod partikolari biex jiġu koperti l-kostijiet tal-pagamenti tal-imgħax tal-fondi mislufa fuq is-swieq għall-finanzjament tal-EURI.

(12)

Jenħtieġ li l-Istrument tal-EURI jiġi mobilizzat mill-awtorità baġitarja matul il-proċedura baġitarja annwali, f’każ ta’ ħtieġa biss. Mingħajr preġudizzju għall-prerogattivi tal-awtorita’ baġitarja, jenħtieġ li jiġi mobilizzat wara li jkunu ġew ikkunsidrati possibbiltajiet oħra ta’ finanzjament, inkluż permezz ta’ spazju maħluq mill-implimentazzjoni baġitarja tal-programmi u l-prijoritizzazzjoni mill-ġdid kif ukoll strumenti speċjali mhux tematiċi, biex tiġi koperta parti sostanzjali tal-ammonti meħtieġa li jaqbżu l-ammonti inizjalment miktubin fil-linja baġitarja eżistenti tal-EURI tal-Intestatura 2b, sa fejn ikun possibbli, bil-ħsieb li jiġi mobilizzat ammont ekwivalenti għal madwar 50 % tal-kostijiet żejda marbuta mal-pagamenti tal-imgħax tal-EURI bħala parametru referenzjarju. Dan ser isir f’konformità mar-regoli settorjali applikabbli u ma’ obbligi legali oħra u b’kont meħud tal-prijoritajiet, l-ibbaġitjar prudenti u l-ġestjoni finanzjarja tajba, li b’mod partikolari jeħtieġu marġini ta’ sigurtà xierqa għal nefqa mhux prevista. Pakketti nazzjonali tal-Istati Membri li ġew impenjati legalment, b’mod partikolari dawk taħt il-Politika Agrikola Komuni u l-politika ta’ koeżjoni, mhux ser jiġu affettwati. Jenħtieġ li l-approprjazzjonijiet ta’ impenn u l-approprjazzjonijiet ta’ pagament korrispondenti tal-Istrument tal-EURI fil-baġit tal-Unjoni jkunu disponibbli lil hinn mil-limiti massimi tal-QFP. Skont l-Istrument tal-EURI, jenħtieġ li l-ewwel jintuża ammont ekwivalenti għad-diżimpenji ta’ approprjazzjonijiet, minbarra d-dħul assenjat estern, li jkunu saru mill-bidu tal-QFP. Jenħtieġ li l-ammonti tad-diżimpenji li jkunu reġgħu saru disponibbli f’konformità mad-dispożizzjonijiet rilevanti eżistenti ma jiġux ikkunsidrati. Jenħtieġ li l-ammont disponibbli ta’ diżimpenji għall-Istrument tal-EURI jiġi kkalkulat kull sena bħala parti mill-aġġustament tekniku għall-QFP, filwaqt li jiġu ppreżentati b’mod ċar id-disponibbiltajiet globali u l-ammonti li jkunu diġà ġew ikkunsidrati fil-mobilizzazzjonijiet preċedenti tal-Istrument tal-EURI. Fis-sitwazzjoni mhux mistennija fejn qbiż ikun għadu pendenti, l-ammont addizzjonali meħtieġ biex il-kostijiet jiġu ffinanzjati bis-sħiħ jenħtieġ li jiġi mobilizzat taħt l-Istrument EURI bħala garanzija ta’ kontinġenza bħala l-aħħar alternattiva. Jekk, b’mod eċċezzjonali, Stat Membru wieħed jew aktar iqisu li jkun hemm tħassib serju bil-mobilizzazzjoni ta’ din il-garanzija ta’ kontinġenza, huma jistgħu jitolbu lill-President tal-Kunsill Ewropew biex jirreferi l-kwistjoni lill-Kunsill Ewropew li jkun imiss. Bħala regola, jenħtieġ li dan il-proċess ma jdumx aktar minn xahar u jenħtieġ li jkun jirrispetta bis-sħiħ il-prerogattivi tal-istituzzjonijiet kif stabbiliti fit-Trattati.

(13)

Fid-dawl tad-diżastri naturali li seħħew fl-Istati Membri u f’pajjiżi involuti fin-negozjati għall-adeżjoni mal-Unjoni, u tad-diżastri naturali u l-kriżijiet umanitarji f’pajjiżi terzi u sabiex jiġi żgurat finanzjament adegwat għat-tnejn li huma, jenħtieġ li r-Riżerva ta’ Solidarjetà u Għajnuna ta’ Emerġenza tissaħħaħ u tinqasam f’żewġ strumenti separati: ir-“Riżerva ta’ Solidarjetà Ewropea” biex jingħata appoġġ lill-pajjiżi u lir-reġjuni milqutin taħt il-Fond ta’ Solidarjetà tal-Unjoni Ewropea stabbilit bir-Regolament tal-Kunsill (KE) Nru 2012/2002 (5) u r-“Riżerva ta’ Għajnuna f’Emerġenza” biex jingħataw rinforzi baġitarji lill-programmi rilevanti tal-Unjoni b’reazzjoni għall-kriżijiet u l-emerġenzi fl-Unjoni u lil hinn minnha.

(14)

Jenħtieġ li l-Istrument ta’ Flessibbiltà jissaħħaħ sabiex tinżamm biżżejjed kapaċità biex l-Unjoni tirreaġixxi għal ċirkostanzi mhux previsti sal-2027. L-ammonti li jkunu skadew mir-Riżerva ta’ Solidarjetà Ewropea u mir-Riżerva ta’ Għajnuna ta’ Emerġenza jenħtieġ li jkunu disponibbli għall-Istrument ta’ Flessibbiltà mill-2024.

(15)	Fid-dawl ta’ dawn l-avvenimenti mhux mistennija u l-isfidi l-ġodda, huwa meħtieġ li jiġi rivedut il-QFP u għalhekk jenħtieġ li r-Regolament (UE, Euratom) 2020/2093 jiġi emendat skont dan.

(16)	L-emendi għar-Regolament (UE, Euratom) 2020/2093 huma mingħajr preġudizzju għall-obbligu li jiġu rispettati l-limiti massimi tar-riżorsi proprji stabbiliti fl-Artikolu 3(1) u l-Artikolu 6 tad-Deċiżjoni (UE, Euratom) 2020/2053.

(17)	Fid-dawl tas-sitwazzjoni fl-Ukrajna, jenħtieġ li dan ir-Regolament jidħol fis-seħħ b’urġenza fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea u jenħtieġ li japplika, b’effett retroattiv, mill-1 ta’ Jannar 2024,

ADOTTA DAN IR-REGOLAMENT:

Artikolu 1

Ir-Regolament (UE, Euratom) 2020/2093 huwa emendat kif ġej:

(1)

L-Artikolu 2 huwa emendat kif ġej:

(a)

fil-paragrafu 2, l-ewwel subparagrafu huwa sostitwit b’dan li ġej:

“2. Fejn ikun meħtieġ li jintużaw ir-riżorsi mill-istrumenti speċjali previsti fl-Artikoli 8, 9, 10, 10a, 10b u 12, l-approprjazzjonijiet ta’ impenn u approprjazzjonijiet ta’ pagament li jikkorrispondu magħhom għandhom jiddaħħlu fil-baġit lil hinn mil-limiti massimi rilevanti tal-QFP.”

;

(b)

fil-paragrafu 3, jiżdied is-subparagrafu li jmiss:

“Fejn ikun meħtieġ li tiġi mobilizzata garanzija għall-assistenza finanzjarja lill-Ukrajna li tkun disponibbli għas-snin mill-2024 sal-2027 għal ammont globali ta’ self sa EUR 33 000 miljun fil-prezzijiet attwali kif speċifikat fir-Regolament (UE) 2024/…. tal-Parlament Ewropew u tal-Kunsill (*) (*)u tiġi awtorizzata f’konformità mal-Artikolu 220(1) tar-Regolament Finanzjarju, l-ammont meħtieġ għandu jiġi mobilizzat lil hinn mil-limiti massimi tal-QFP.

(*) Ir-Regolament (UE) 2024/…. tal-Parlament Ewropew u tal-Kunsill ta’....dwar l-istabbiliment tal-Faċilità għall-Ukrajna (ĠU L, ..., ELI: …).”;"

(2)

fl-Artikolu 4(1), jiżdiedu l-punti li ġejjin:

“(f)	kalkolu tal-ammont disponibbli għall-Istrument tal-EURI f’konformità mal-Artikolu 10a(3), il-punt (a);

(g)	kalkolu tal-ammonti li għandhom ikunu disponibbli għall-Istrument ta’ Flessibbiltà skont l-Artikolu 12(1), it-tieni subparagrafu.”

(3)

fl-Artikolu 5(1), it-tieni subparagrafu huwa sostitwit b’dan li ġej:

“L-ammont totali ta’ allokazzjonijiet addizzjonali għall-perijodu 2022 sa 2027 għal approprjazzjonijiet ta’ impenn u ta’ pagament rispettivament għandu jkun EUR 10 155 miljun (fi prezzijiet tal-2018). Għal kull sena mill-2022 sal-2026, l-ammont annwali ta’ allokazzjonijiet addizzjonali għal approprjazzjonijiet ta’ impenn u ta’ pagament rispettivament għandu jkun mill-inqas EUR 1 500 miljun (fi prezzijiet tal-2018) u m’għandux jaqbeż l-EUR 2 000 miljun (fi prezzijiet tal-2018).”;

(4)

l-Artikoli 8 u 9 huma sostitwiti b’dan li ġej:

“ Artikolu 8

Fond Ewropew ta’ Aġġustament għall-Globalizzazzjoni

1. Il-Fond Ewropew ta’ Aġġustament għall-Globalizzazzjoni, li l-objettivi u l-kamp ta’ applikazzjoni tiegħu huma stabbiliti fir-Regolament (UE) 2021/691 tal-Parlament Ewropew u tal-Kunsill (*2), ma għandux jaqbeż ammont annwali massimu ta’ EUR 30 miljun (fi prezzijiet tal-2018).

2. L-approprjazzjonijiet għall-Fond Ewropew ta’ Aġġustament għall-Globalizzazzjoni għandhom jiddaħħlu fil-baġit ġenerali tal-Unjoni bħala dispożizzjoni.

Artikolu 9

Riżerva ta’ Solidarjetà u Għajnuna ta’ Emerġenza

1. Ir-Riżerva ta’ Solidarjetà u Għajnuna ta’ Emerġenza għandha tkun magħmula minn żewġ strumenti li jistgħu jintużaw biex jiffinanzjaw, rispettivament:

(a)

assistenza biex jingħata rispons għal sitwazzjonijiet ta’ emerġenza li jirriżultaw minn diżastri kbar li huma koperti mill-Fond ta’ Solidarjetà tal-Unjoni Ewropea, li l-objettivi u l-kamp ta’ applikazzjoni tiegħu huma stabbiliti fir-Regolament tal-Kunsill (KE) Nru 2012/2002 (*3) (‘ir-Riżerva ta’ Solidarjetà Ewropea’); u

(b)

risponsi rapidi għal ħtiġijiet speċifiċi ta’ emerġenza fl-Unjoni jew f’pajjiżi terzi wara avvenimenti li ma setgħux ikunu previsti meta ġie stabbilit il-baġit, b’mod partikolari għal risponsi ta’ emerġenza u operazzjonijiet ta’ appoġġ wara diżastri naturali mhux koperti mill-punt (a), diżastri kkawżati mill-bniedem, kriżijiet umanitarji f’każijiet ta’ theddid għas-saħħa pubblika, theddid veterinarju jew theddid fitosanitarju fuq skala kbira, kif ukoll f’sitwazzjonijiet ta’ pressjoni partikolari fil-fruntieri esterni tal-Unjoni li tirriżulta mill-flussi migratorji, fejn iċ-ċirkostanzi jkunu jitolbu dan (ir-‘Riżerva ta’ Għajnuna ta’ Emerġenza’).

2. Ir-Riżerva ta’ Solidarjetà Ewropea ma għandhiex taqbeż ammont annwali massimu ta’ EUR 1 016 miljun (fi prezzijiet tal-2018). Kwalunkwe porzjon tal-ammont annwali mhux użat fis-sena n jista’ jintuża sas-sena n+1. Il-porzjon tal-ammont annwali li jirriżulta mis-sena preċedenti għandu jintuża l-ewwel. Kwalunkwe porzjon tal-ammont annwali mis-sena n li ma jintużax fis-sena n+1 għandu jiskadi.

Fl-1 ta’ Ottubru ta’ kull sena, mill-inqas kwart tal-ammont annwali tar-Riżerva ta’ Solidarjetà Ewropea għandu jibqa’ disponibbli biex jiġu koperti l-ħtiġijiet li jinqalgħu sal-aħħar tas-sena.

F’każijiet eċċezzjonali u jekk ir-riżorsi finanzjarji li jifdal disponibbli ma jkunux biżżejjed biex jiġu koperti l-ammonti meqjusa bħala meħtieġa fis-sena meta jkun seħħ diżastru kif imsemmi fil-paragrafu 1, il-punt (a), il-Kummissjoni tista’ tipproponi li d-differenza tiġi ffinanzjata permezz tal-ammonti annwali msemmi fl-ewwel subparagrafu ta’ dan il-paragrafu disponibbli fis-sena ta’ wara, sa ammont massimu ta’ EUR 400 miljun (fi prezzijiet tal-2018).

3. Ir-Riżerva ta’ Għajnuna ta’ Emerġenza ma għandhiex taqbeż ammont annwali massimu ta’ EUR 508 miljun (fi prezzijiet tal-2018). Kwalunkwe porzjon tal-ammont annwali mhux użat fis-sena n jista’ jintuża sas-sena n+1. Il-porzjon tal-ammont annwali li jirriżulta mis-sena preċedenti għandu jintuża l-ewwel. Kwalunkwe porzjon tal-ammont annwali mis-sena n li ma jintużax fis-sena n+1 għandu jiskadi.

4. L-approprjazzjonijiet għar-Riżerva ta’ Solidarjetà Ewropea u għar-Riżerva ta’ Għajnuna ta’ Emerġenza għandhom jiddaħħlu fil-baġit ġenerali tal-Unjoni bħala dispożizzjonijiet.

(*2) Ir-Regolament (UE) 2021/691 tal-Parlament Ewropew u tal-Kunsill tat-28 ta’ April 2021 dwar il-Fond Ewropew ta’ Aġġustament għall-Globalizzazzjoni għall-Ħaddiema Ssensjati (FEG) u li jħassar ir-Regolament (UE) Nru 1309/2013 (ĠU L 153, 3.5.2021, p. 48)."

(*3) Ir-Regolament tal-Kunsill (KE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà tal-Unjoni Ewropea (ĠU L 311, 14.11.2002, p. 3).”;"

(5)	fl-Artikolu 10, il-paragrafu 2 huwa sostitwit b’dan li ġej: “2. Ir-Riżerva ta’ Aġġustament għall-Brexit ma għandhiex taqbeż ammont ta’ EUR 4 491 miljun (fi prezzijiet tal-2018).” ;

(6)

jiddaħħlu l-Artikoli li ġejjin:

“ Artikolu 10a

Strument tal-EURI

1. Mill-2025, l-Istrument tal-EURI jista’ jintuża biex tiġi ffinanzjata, għal sena partikolari, parti mill-kostijiet tal-imgħax u l-pagamenti tal-kupuni dovuti fir-rigward tal-fondi mislufa fuq is-swieq kapitali f’konformità mal-Artikolu 5(2) tad-Deċiżjoni tal-Kunsill (UE, Euratom) 2020/2053 (*4). L-Istrument tal-EURI jista’ jiġi mobilizzat biss f’sena partikolari, sal-punt speċifikat fil-paragrafi li ġejjin, l-ammont ta’ dawn il-kostijiet li jaqbeż l-ammonti li ġejjin (fi prezzijiet tal-2018):

—	2025 – EUR 2 332 miljun,

—	2026 – EUR 3 196 miljun,

—	2027 – EUR 4 168 miljun.

2. L-Istrument tal-EURI jista’ jiġi mobilizzat mill-Parlament Ewropew u mill-Kunsill fil-qafas tal-proċedura baġitarja prevista fl-Artikolu 314 tat-TFUE, biss wara li jkunu fittxew mezzi oħra ta’ finanzjament, bil-ħsieb li jkopru parti sostanzjali tal-ammonti li jaqbżu l-ammonti msemmija fil-paragrafu 1 ta’ dan l-Artikolu, f’konformità mar-regoli settorjali applikabbli u obbligi legali oħra, filwaqt li jitqiesu l-prijoritajiet, l-ibbaġitjar prudenti u l-ġestjoni finanzjarja tajba.

L-approprjazzjonijiet għall-Istrument tal-EURI għandhom ikunu disponibbli lil hinn mil-limiti massimi tal-QFP.

3. L-Istrument tal-EURI għandu jkun magħmul minn dan li ġej:

(a)

ammont ekwivalenti għad-diżimpenji tal-approprjazzjonijiet, minbarra d-dħul assenjat estern, li jkunu saru b’mod kumulattiv mill-2021, li ma jkunux ġew mobilizzati taħt dan l-Istrument fis-snin preċedenti, bl-esklużjoni tal-ammonti ta’ diżimpenji li jkunu reġgħu saru disponibbli f’konformità mad-dispożizzjonijiet tal-Artikolu 15 tar-Regolament Finanzjarju u regoli speċifiċi dwar id-disponibbiltà mill-ġdid tal-approprjazzjonijiet kif imsemmi fl-atti bażiċi rilevanti. Dan l-ammont għandu jintuża l-ewwel;

(b)

f’każ biss jekk l-ammont taħt il-punt (a) ta’ dan il-paragrafu ma jkunx biżżejjed, ammont addizzjonali meħtieġ biex jiġu ffinanzjati kompletament il-kostijiet imsemmija fil-paragrafu 1 fis-sena kkonċernata.

Kull sena, bħala parti mill-aġġustamenti tekniċi msemmija fl-Artikolu 4, il-Kummissjoni għandha tikkalkula l-ammont disponibbli abbażi tal-ewwel subparagrafu, il-punt (a), ta’ dan il-paragrafu filwaqt li tqis l-ammonti kkunsidrati għal dak l-għan fis-snin preċedenti.

Artikolu 10b

Riżerva għall-Ukrajna

1. Ir-Riżerva għall-Ukrajna tista’ tiġi mobilizzata għall-iskop uniku li tiġi ffinanzjata n-nefqa taħt ir-Regolament (UE) 2024/.... (*).

2. Ir-Riżerva għall-Ukrajna ma għandhiex taqbeż l-ammont ta’ EUR 17 000 miljun fi prezzijiet attwali għall-perjodu mill-2024 sal-2027.

3. L-ammont annwali mobilizzat taħt ir-Riżerva għall-Ukrajna f’sena partikolari ma għandux jaqbeż EUR 5 000 miljun fi prezzijiet attwali. Mingħajr preġudizzju għall-ammont globali stabbilit fil-paragrafu 2, il-porzjon mhux użat tal-ammont annwali f’sena partikolari jista’ jintuża fis-snin ta’ wara, sal-2027.

4. Ir-Riżerva għall-Ukrajna tista’ tiġi mobilizzata mill-Parlament Ewropew u mill-Kunsill fil-qafas tal-proċedura baġitarja prevista fl-Artikolu 314 TFUE.

(*4) Id-Deċiżjoni tal-Kunsill (UE, Euratom) 2020/2053 tal-14 ta’ Diċembru 2020 dwar is-sistema tar-riżorsi proprji tal-Unjoni Ewropea u li tħassar id-Deċiżjoni 2014/335/UE, Euratom (ĠU L 424, 15.12.2020, p. 1).”;"

(7)

fl-Artikolu 11, jiddaħħal il-paragrafu li ġej:

“3a. L-ammont massimu għall-aġġustament annwali msemmi fil-paragrafu 3 ta’ dan l-Artikolu għas-sena 2026, miżjud bl-ammont imsemmi, fl-Artikolu 5(2), it-tieni subparagrafu, għandu jiġi aġġustat bl-ammont ekwivalenti għall-porzjon mhux użat tal-ammont massimu għas-sena 2025.”

;

(8)

L-Artikolu 12 huwa sostitwit b’dan li ġej:

“ Artikolu 12

Strument ta’ Flessibbiltà

1. L-Istrument ta’ Flessibbiltà jista’ jintuża biex tiġi ffinanzjata, għal sena finanzjarja partikolari, nefqa speċifika mhux prevista f’approprjazzjonijiet ta’ impenn u approprjazzjonijiet ta’ pagament li jikkorrispondu magħhom li ma jistgħux jiġu ffinanzjati fil-limiti massimi disponibbli għal intestatura waħda oħra jew aktar. Il-limitu massimu għall-ammont annwali disponibbli għall-Istrument ta’ Flessibbiltà fis-snin 2021 sa 2023 għandu jkun ta’ EUR 915 miljun (fi prezzijiet tal-2018). Il-limitu massimu għall-ammont annwali disponibbli għall-Istrument ta’ Flessibbiltà fis-snin 2024 sa 2027 għandu jkun ta’ EUR 1 346 miljun (fi prezzijiet tal-2018).

Kull sena, l-ammont annwali disponibbli għall-Istrument ta’ Flessibbiltà għandu jiżdied b’ammont ekwivalenti għall-porzjonijiet tal-ammonti annwali għar-Riżerva ta’ Solidarjetà Ewropea u r-Riżerva ta’ Għajnuna ta’ Emerġenza li jkunu skadew fis-sena preċedenti f’konformità mal-Artikolu 9.

2. Il-porzjon mhux użat tal-ammont annwali tal-Istrument ta’ Flessibbiltà jista’ jintuża sas-sena n+2. Kwalunkwe porzjon tal-ammont annwali li jirriżulta mis-snin preċedenti għandu jintuża l-ewwel, f’ordni kronoloġika. Kwalunkwe porzjon tal-ammont annwali mis-sena n li ma jintużax sas-sena n+2 għandu jiskadi.”

;

(9)	L-Annessi I u II huma sostitwiti bit-test stabbilit fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fil-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2024.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi…,

Għall-Kunsill

Il-President

(*) Ir-Regolament (UE) 2024/…. tal-Parlament Ewropew u tal-Kunsill ta’....dwar l-istabbiliment tal-Faċilità għall-Ukrajna (ĠU L, ..., ELI: …).”;

(*3) Ir-Regolament tal-Kunsill (KE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà tal-Unjoni Ewropea (ĠU L 311, 14.11.2002, p. 3).”;

(1) Approvazzjoni tas-27 ta’ Frar 2024 (għadha mhux ippubblikata fil-Ġurnal Uffiċjali).

(2) Ir-Regolament tal-Kunsill (UE, Euratom) 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin mill-2021 sa 2027 (ĠU L 433 I, 22.12.2020, p. 11).

(3) Ir-Regolament (UE) 2024/…. tal-Parlament Ewropew u tal-Kunsill ta’.dwar l-istabbiliment tal-Faċilita’ għall-Ukrajna (ĠU L, ..., ELI: …).

(*1) ĠU: Jekk jogħġbok daħħal fit-test in-numru tar-Regolament li jinsab fid-dokument PE-CONS 10/24 (2023/0200(COD)) u daħħal in-numru, id-data u r-referenza tal-ĠU ta’ dak ir-Regolament fin-nota f’qiegħ il-paġna.

(*) ĠU: Jekk jogħġbok daħħal fit-test in-numru tar-Regolament li jinsab fid-dokument PE-CONS 10/24 (2023/0200(COD)).

(4) Id-Deċiżjoni tal-Kunsill (UE, Euratom) 2020/2053 tal-14 ta’ Diċembru 2020 dwar is-sistema tar-riżorsi proprji tal-Unjoni Ewropea u li tħassar id-Deċiżjoni 2014/335/UE, Euratom (ĠU L 424, 15.12.2020, p. 1).

(5) Ir-Regolament tal-Kunsill (KE) Nru 2012/2002 tal-11 ta’ Novembru 2002 li jistabbilixxi l-Fond ta’ Solidarjetà tal-Unjoni Ewropea (ĠU L 311, 14.11.2002, p. 3).

(*) ĠU: Jekk jogħġbok daħħal fit-test in-numru tar-Regolament li jinsab fid-dokument PE-CONS 10/24 (2023/0200(COD)) u daħħal in-numru, id-data u r-referenza tal-ĠU ta’ dak ir-Regolament fin-nota f’qiegħ il-paġna.

(*) ĠU: Jekk jogħġbok daħħal fit-test in-numru tar-Regolament li jinsab fid-dokument PE-CONS 10/24 (2023/0200(COD)).

ANNESS

“ANNESS I

QAFAS FINANZJARJU PLURIENNALI (EU-27)

(EUR miljun – prezzijiet tal-2018)

APPROPRJAZZJONIJIET TA’ IMPENN

2021

2022

2023

2024

2025

2026

2027

Total 2021-2027

1.	Suq Uniku, Innovazzjoni u Diġitali

19 712

20 211

19 678

19 178

18 173

18 120

17 565

132 637

2.	Koeżjoni, Reżiljenza u Valuri

5 996

62 642

63 525

65 079

65 184

56 675

58 680

377 781

2a.	Koeżjoni ekonomika, soċjali u territorjali

1 666

56 673

57 005

57 436

57 772

48 302

48 937

327 791

2b.	Reżiljenza u Valuri

4 330

5 969

6 520

7 643

7 412

8 373

9 743

49 990

3.	Riżorsi Naturali u Ambjent

53 562

52 626

51 893

51 013

49 914

48 734

47 960

355 702

li minnhom: Nefqa relatata mas-suq u pagamenti diretti

38 040

37 544

36 857

36 054

35 283

34 602

33 886

252 266

4.	Migrazzjoni u Ġestjoni tal-Fruntieri

1 687

3 104

3 454

3 569

4 083

4 145

4 701

24 743

5.	Sigurtà u Difiża

1 598

1 750

1 762

2 112

2 277

2 398

2 576

14 473

6.	Il-Viċinat u d-Dinja

15 309

15 522

14 789

14 500

14 192

13 326

13 447

101 085

7.	L-Amministrazzjoni Pubblika Ewropea

10 021

10 215

10 342

10 454

10 554

10 673

10 843

73 102

li minnhom: Nefqa amministrattiva tal-istituzzjonijiet

7 742

7 878

7 945

7 997

8 025

8 077

8 188

55 852

TOTAL TAL-APPROPRJAZZJONIJIET TA’ IMPENN

107 885

166 070

165 443

165 905

164 377

154 071

155 772

1 079 523

TOTAL TAL-APPROPRJAZZJONIJIET TA’ PAGAMENT

154 065

153 850

152 682

151 436

151 175

1 065 558

ANNESS II

AĠĠUSTAMENT SPEĊIFIKU GĦALL-PROGRAMM – LISTA TA’ PROGRAMMI, KOEFFIĊJENT TAD-DISTRIBUZZJONI U ALLOKAZZJONI ADDIZZJONALI TOTALI TA’ APPROPRJAZZJONIJIET TA’ IMPENN

(EUR miljun – prezzijiet tal-2018)

Koeffiċjent tad-distribuzzjoni

Allokazzjoni addizzjonali totali ta’ approprjazzjonijiet ta’ impenn skont l-Artikolu 5

2022-2024

2025-2027

1.	Suq Uniku, Innovazzjoni u Diġitali

36,36 %

41,79 %

4 000

Orizzont Ewropa

27,27 %

31,34 %

3 000

Fond InvestEU

9,09 %

10,45 %

1 000

2b.	Reżiljenza u Valuri

54,55 %

47,76 %

5 155

Programm l-UE għas-Saħħa

26,37 %

15,37 %

2 055

Erasmus+

15,46 %

17,77 %

1 700

Ewropa Kreattiva

5,45 %

6,26 %

600

Drittijiet u Valuri

7,27 %

8,36 %

800

4.	Migrazzjoni u Ġestjoni tal-Fruntieri

9,09 %

10,45 %

1 000

Fond għall-Ġestjoni Integrata tal-Fruntieri

9,09 %

10,45 %

1 000

TOTAL

100,00 %

10 155 ”.