Rikors ippreżentat fis-17 ta’ Settembru 2024 – Le Pen vs Il-Parlament

(Kawża T-480/24)

(C/2024/6446)

Lingwa tal-kawża: il-Franċiż

Partijiet

Rikorrent: Jean-Marie Le Pen (Rueil Malmaison, Franza) (rappreżentant: F. Wagner, avukat)

Konvenut: Il-Parlament Ewropew

Talbiet

Ir-rikorrent jitlob li l-Qorti Ġenerali jogħġobha:

—	tiddeċiedi li d-deċiżjoni tas-Segretarju Ġenerali tal-Parlament Ewropew tat-8 ta’ Lulju 2024 ittieħdet bi ksur tal-prinċipji ta’ ċertezza legali u ta’ protezzjoni tal-aspettattivi leġittimi;

—	tiddeċiedi li d-deċiżjoni tas-Segretarju Ġenerali tal-Parlament Ewropew tat-8 ta’ Lulju 2024 ittieħdet bi ksur tal-Artikolu 6 tal-Konvenzjoni Ewropea tad-Drittijiet tal-Bniedem;

—

tannulla d-deċiżjoni tas-Segretarju Ġenerali tal-Parlament Ewropew tat-8 ta’ Lulju 2024, innotifikata fit-18 ta’ Lulju 2024 lill-mandatarji tiegħu, li tikkonstata kreditu kontra r-rikorrent fl-ammont ta’ EUR 303 200,99 abbażi ta’ ammonti mħallsa indebitament fl-ambitu tal-linja tal-baġit 400 u li timmotiva l-irkupru ta’ dan l-ammont;

—	tannulla n-nota ta’ debitu Nru 7040001694 tad-9 ta’ Lulju 2024;

—	tikkundanna lill-Parlament Ewropew għall-ispejjeż kollha.

Motivi u argumenti prinċipali

Insostenn tar-rikors tiegħu, ir-rikorrent jinvoka żewġ motivi.

L-ewwel motiv huwa bbażat fuq ksur tal-prinċipji ta’ ċertezza legali u ta’ protezzjoni tal-aspettattivi leġittimi. Ir-rikorrent jikkritika d-deċiżjoni kkontestata sa fejn din ma ħaditx inkunsiderazzjoni d-deċiżjoni ta’ separazzjoni tal-proċeduri mogħtija fit-3 ta’ Lulju 2024 mit-tribunal correctionnel de Paris (il-Qorti Kriminali ta’ Pariġi) fid-dawl tal-istat ta’ saħħa tiegħu. Id-deċiżjoni kkontestata hija kkritikata sa fejn ma tiħux inkunsiderazzjoni l-fatt li r-rikorrent ma għandu ebda għarfien tal-għan, tas-sens jew tal-portata tal-proċedura mibdija quddiem il-Qorti Ġenerali u ma jistax jipprepara għaliha u jsegwiha b’mod utli.

2.	It-tieni motiv huwa bbażat fuq ksur tad-dritt għal smigħ xieraq.