—

wara li kkunsidra l-Artikoli 168 u 169 tat-Trattat dwar il-Funzjonament tal-Unjoni Ewropea,

—

wara li kkunsidra r-Regolament (KE) Nru 1924/2006 tal-Parlament Ewropew u tal-Kunsill tal-20 ta’ Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (1),

—

wara li kkunsidra r-Regolament tal-Parlament Ewropew u tal-Kunsill (KE) Nru 178/2002 tat-28 ta’ Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabilixxi l-Awtorità Ewropea dwar is-Sigurtà fl-Ikel u jistabbilixxi l-proċeduri fi kwistjonijiet ta’ sigurtà tal-ikel (2),

—

wara li kkunsidra r-Regolament (UE) Nru 1169/2011 tal-Parlament Ewropew u tal-Kunsill tal-25 ta’ Ottubru 2011 dwar l-għoti ta’ informazzjoni dwar l-ikel lill-konsumaturi, li jemenda r-Regolamenti (KE) Nru 1924/2006 u (KE) Nru 1925/2006 tal-Parlament Ewropew u tal-Kunsill u li jħassar id-Direttiva tal-Kummissjoni 87/250/KEE, id-Direttiva tal-Kunsill 90/496/KEE, id-Direttiva tal-Kummissjoni 1999/10/KE, id-Direttiva 2000/13/KE tal-Parlament Ewropew u tal-Kunsill, id-Direttivi tal-Kummissjoni 2002/67/KE u 2008/5/KE u r-Regolament tal-Kummissjoni (KE) Nru 608/2004 (3),

—

wara li kkunsidra d-Direttiva 2002/46/KE tal-Parlament Ewropew u tal-Kunsill tal-10 ta’ Ġunju 2002 dwar l-approssimazzjoni tal-liġijiet tal-Istati Membri dwar is-supplimenti tal-ikel (4),

—

wara li kkunsidra r-Regolament (KE) Nru 1925/2006 tal-Parlament Ewropew u tal-Kunsill tal-20 ta’ Diċembru 2006 dwar iż-żieda ta’ vitamini u minerali u ta’ ċerti sustanzi oħra mal-ikel (5),

—

wara li kkunsidra r-Regolament (UE) Nru 609/2013 tal-Parlament Ewropew u tal-Kunsill tat-12 ta’ Ġunju 2013 dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż u li jħassar id-Direttiva tal-Kunsill 92/52/KEE, id-Direttivi tal-Kummissjoni 96/8/KE, 1999/21/KE, 2006/125/KE u 2006/141/KE, id-Direttiva 2009/39/KE tal-Parlament Ewropew u tal-Kunsill u r-Regolamenti tal-Kummissjoni (KE) Nru 41/2009 u (KE) Nru 953/2009 (6),

—

wara li kkunsidra r-Regolament (UE) 2022/2065 tal-Parlament Ewropew u tal-Kunsill tad-19 ta’ Ottubru 2022 dwar Suq Uniku għas-Servizzi Diġitali u li jemenda d-Direttiva 2000/31/KE (l-Att dwar is-Servizzi Diġitali) (7),

—

wara li kkunsidra r-Regolament (UE) 2021/522 tal-Parlament Ewropew u tal-Kunsill tal-24 ta’ Marzu 2021 li jistabbilixxi Programm għall-azzjoni tal-Unjoni fil-qasam tas-saħħa (il-programm l-UE għas-Saħħa) għall-perjodu 2021-2027, u li jħassar ir-Regolament (UE) Nru 282/2014 (8),

—

wara li kkunsidra r-riżoluzzjoni tiegħu tal-20 ta’ Ottubru 2021 dwar l-istrateġija Mill-Għalqa sal-Platt għal sistema tal-ikel ġusta, tajba għas-saħħa u favur l-ambjent (9),

—

wara li kkunsidra l-komunikazzjoni tal-Kummissjoni tal-20 ta’ Mejju 2020 intitolata “Strateġija ‘Mill-Għalqa sal-Platt’ – għal sistema tal-ikel ġusta, tajba għas-saħħa u favur l-ambjent” (COM(2020)0381),

—

wara li kkunsidra d-Dokument ta’ Ħidma tal-Persunal tal-Kummissjoni tal-20 ta’ Mejju 2020 intitolat “Sommarju eżekuttiv tal-evalwazzjoni tar-Regolament (KE) Nru 1924/2006 dwar indikazzjonijiet dwar in-nutrizzjoni u s-saħħa mogħtija fuq l-ikel b’rabta mal-profili nutrizzjonali u indikazzjonijiet dwar is-saħħa mogħtija fuq il-pjanti u l-preparazzjonijiet tagħhom u tal-qafas regolatorju ġenerali għall-użu tagħhom fl-ikel” (SWD(2020)0096),

—

wara li kkunsidra l-opinjoni xjentifika tal-Awtorità Ewropea dwar is-Sigurtà fl-Ikel (EFSA) tal-15 ta’ Diċembru 2021 intitolata “Tolerable upper level for dietary sugars” (Livell massimu tollerabbli tal-konsum għaz-zokkor djetetiku) (10),

—

wara li kkunsidra l-pubblikazzjoni tad-WHO tal-2022 intitolata “Nutrition labelling: policy brief” (It-tikkettar tan-nutrizzjoni: sommarju tal-politika) (11),

—

wara li kkunsidra l-pubblikazzjoni tad-WHO tal-2019 intitolata “Guiding principles and framework manual for front-of-pack labelling for promoting healthy diets” (Il-prinċipji gwida u l-manwal qafas għat-tikkettar fuq quddiem tal-pakkett għall-promozzjoni ta’ dieti tajbin għas-saħħa) (12),

—

wara li kkunsidra t-tielet Għan ta’ Żvilupp Sostenibbli tan-NU, li huwa biex jiġu żgurati ħajjiet f’saħħithom u jiġi promoss il-benesseri għal kulħadd f’kull età,

—

wara li kkunsidra r-rapport tal-UNICEF ta’ Diċembru 2013 intitolat “Children’s Rights in Impact Assessments – A guide for integrating children’s rights into impact assessments and taking action for children” (Id-Drittijiet tat-Tfal fil-Valutazzjonijiet tal-Impatt – Gwida biex id-drittijiet tat-tfal jiġu integrati fil-valutazzjonijiet tal-impatt u biex tittieħed azzjoni għat-tfal) (13),

—

wara li kkunsidra l-Artikolu 54 tar-Regoli ta’ Proċedura tiegħu, kif ukoll l-Artikolu 1(1)(e), u l-Anness 3 tad-deċiżjoni tal-Konferenza tal-Presidenti tat-12 ta’ Diċembru 2002 dwar il-proċedura għall-għoti ta’ awtorizzazzjoni għat-tfassil ta’ rapporti b’inizjattiva proprja,

—

wara li kkunsidra r-rapport tal-Kumitat għall-Ambjent, is-Saħħa Pubblika u s-Sikurezza tal-Ikel (A9-0416/2023),

A.

billi r-Regolament (KE) Nru 1924/2006 (ir-Regolament dwar l-Indikazzjonijiet dwar in-Nutrizzjoni u s-Saħħa, jew l-NHCR) ġie introdott bl-għan li jiżgura l-ogħla livell possibbli ta’ protezzjoni tal-konsumatur u jiffaċilita l-għażliet tal-konsumaturi; billi l-NHCR japplika għall-indikazzjonijiet dwar in-nutrizzjoni u s-saħħa mogħtija fuq l-ikel fil-komunikazzjonijiet kummerċjali kollha, inklużi t-tikkettar u r-reklamar, kif ukoll il-komunikazzjonijiet indirizzati lill-professjonisti tas-saħħa (14); billi l-Kummissjoni tapprova l-indikazzjonijiet dwar is-saħħa bbażati fuq evidenza xjentifika u li jinftiehmu mill-konsumaturi wara valutazzjoni xjentifika tal-indikazzjonijiet pprovduta mill-EFSA;

B.

billi l-indikazzjonijiet jistgħu jiġu kkategorizzati bħala “indikazzjonijiet ta’ saħħa”, “indikazzjonijiet dwar it-tnaqqis tar-riskju” jew “indikazzjonijiet li jirreferu għall-iżvilupp tat-tfal”; billi f’Lulju 2023, ġew awtorizzati 269 indikazzjoni dwar is-saħħa għall-użu fl-UE; billi indikazzjonijiet li jirreferu għall-iżvilupp u s-saħħa tat-tfal fit-tikkettar tal-ikel jistgħu jiġu awtorizzati f’konformità mal-proċeduri u r-rekwiżiti stabbiliti mill-NHCR;

C.

billi mill-inqas 18 % tal-prodotti l-ġodda li jidħlu fis-suq tal-ikel u tax-xorb tal-Unjoni Ewropea jkollhom indikazzjonijiet dwar in-nutrizzjoni u s-saħħa u hu stmat li kwart tal-ikel kollu disponibbli fis-suq tal-Unjoni Ewropea juri indikazzjonijiet bħal dawn (15); billi, kif ġie spjegat fil-premessa 10 tal-NHCR, ikel promoss bl-indikazzjonijiet jista’ jiġi perċepit mill-konsumaturi bħala tali li jkollu vantaġġi nutrittivi, fiżjoloġiċi jew vantaġġi oħra tas-saħħa meta mqabbel ma’ prodotti simili jew oħrajn fejn tali nutrijenti u sustanzi oħrajn mhumiex miżjuda, u dan jaf iħeġġeġ lill-konsumaturi biex jagħmlu għażliet li jinfluwenzaw direttament id-dħul totali ta’ nutrijenti individwali jew sustanzi oħrajn b’mod li jaf imur kontra l-parir xjentifiku;

D.

billi skont l-Artikolu 13(3) tal-NHCR, il-Kummissjoni kellha tadotta lista Komunitarja ta’ indikazzjonijiet permessi sa mhux aktar tard mill-31 ta’ Jannar 2010;

E.

billi l-preżenza ta’ indikazzjonijiet dwar in-nutrizzjoni jew is-saħħa jaffettwaw l-għażliet tal-konsumaturi dwar l-ikel, kif ukoll karatteristiċi oħra bħall-prezz, il-marka, il-kulur u l-forma tal-imballaġġ; billi l-indikazzjonijiet dwar is-saħħa, speċjalment l-indikazzjonijiet dwar it-tnaqqis tar-riskju, għandhom impatt ikbar fuq l-attitudnijiet tal-konsumaturi mill-indikazzjonijiet dwar in-nutrizzjoni (16); billi l-fehim tal-konsumaturi dwar l-indikazzjonijiet dwar in-nutrizzjoni u s-saħħa huwa influwenzat minn fatturi varji, inklużi l-livelli ta’ għarfien u ta’ edukazzjoni nutrizzjonali, u dan għandu jitqies sabiex tiġi ffaċilitata l-bidla għal dieti aktar tajbin għas-saħħa u tiġi stimulata r-riformulazzjoni tal-ikel; billi madankollu, l-għoti ta’ informazzjoni, l-edukazzjoni u l-kampanji ta’ sensibilizzazzjoni waħedhom mhumiex biżżejjed biex tinkiseb il-bidla meħtieġa għal għażliet tal-konsumatur aktar sostenibbli u tajbin għas-saħħa, peress li dawn jistgħu jiġu influwenzati minn elementi ewlenin oħra tal-ambjenti tal-ikel, bħall-aċċessibbiltà tal-prezzijiet, il-kummerċjalizzazzjoni u d-disponibbiltà;

F.

billi l-NHCR ta mandat lill-Kummissjoni sabiex tistabbilixxi profili nutrizzjonali għal ikel jew għal kategoriji speċifiċi tal-ikel sad-19 ta’ Jannar 2009; billi l-profili nutrizzjonali għadhom iridu jiġu stabbiliti fil-prattika; billi, fl-2020 ir-rapport ta’ evalwazzjoni tal-Kummissjoni dwar l-NHCR afferma mill-ġdid il-ħtieġa li jiġu żviluppati profili nutrizzjonali li jservu ta’ għodda għall-protezzjoni tal-konsumaturi kontra l-esponiment għall-ikel li juri indikazzjonijiet dwar is-saħħa b’kompożizzjoni nutrittiva fqira; billi l-istrateġija Mill-Għalqa sal-Platt affermat mill-ġdid li l-profili nutrizzjonali jenħtieġu jiġu stabbiliti sabiex ikunu ristretti l-kummerċjalizzazzjoni u l-promozzjoni ta’ ikel mhux tajjeb għas-saħħa permezz ta’ indikazzjonijiet dwar in-nutrizzjoni u s-saħħa;

G.

billi, fir-riżoluzzjoni tal-Parlament Ewropew tal-2021 dwar l-istrateġija Mill-Għalqa sal-Platt, il-Parlament espliċitament laqa’ l-aħbar ta’ proposta leġiżlattiva li tistabbilixxi profili nutrizzjonali sabiex tipprojbixxi l-użu ta’ indikazzjonijiet dwar in-nutrizzjoni u s-saħħa mogħtija fuq ikel b’livell għoli ta’ xaħam, zokkor u/jew melħ u ikel ġeneralment mhux tajjeb għas-saħħa u talab li tingħata attenzjoni partikolari lill-ikel għat-tfal u ikel ieħor bi skop speċjali;

H.

billi l-konsumaturi għadhom jiġu esposti għall-indikazzjonijiet pożittivi dwar in-nutrizzjoni u s-saħħa mogħtija fuq ikel b’livell għoli ta’ xaħam, melħ jew zokkor, li hu inkompatibbli mal-objettiv ta’ protezzjoni tal-konsumaturi ta’ livell għoli;

I.

billi problemi ta’ piż żejjed u tal-obeżità qed jiżdiedu b’mod mgħaġġel fil-parti l-kbira tal-Istati Membri fejn aktar minn nofs l-adulti Ewropej u terz tat-tfal għandhom piż żejjed jew ibatu mill-obeżità (17); billi l-piż żejjed u l-obeżità fit-tfulija qed iżidu l-isfidi globali tas-saħħa pubblika; billi hemm biżżejjed evidenza li l-obeżità fit-tfal hija influwenzata mill-kummerċjalizzazzjoni ta’ ikel b’kontenut għoli ta’ xaħam, melħ u zokkor, iżda t-tfal għadhom esposti għal livelli għoljin ta’ tali kummerċjalizzazzjoni, li tuża tekniki qawwija u persważivi, fosthom l-użu dejjem akbar ta’ mezzi diġitali;

J.

billi dieti mhux tajbin għas-saħħa li fihom ħafna melħ, zokkor u xaħam, inklużi xaħmijiet saturati u aċidu xaħmi trans, huma fattur ta’ riskju ewlieni għall-mard u l-mortalità fl-Ewropa u, skont id-WHO, jikkawżaw 8 miljun mewta prematura kull sena; billi mewta minn kull ħamsa fl-2017 kienu attribwibbli għal dieti mhux tajbin għas-saħħa, prinċipalment minħabba mard kardjovaskulari u kanċer; billi hija meħtieġa enfasi aktar b’saħħitha fuq il-prevenzjoni tal-mard;

K.

billi fir-riżoluzzjoni tiegħu tas-16 ta’ Frar 2022 dwar it-tisħiħ tal-Ewropa fil-ġlieda kontra l-kanċer – lejn strateġija komprensiva u koordinata (18), il-Parlament saħaq fuq ir-rwol ta’ dieti tajbin għas-saħħa fil-prevenzjoni u fil-limitazzjoni tal-inċidenza tal-kanċer;

L.

billi l-EFSA ma setax jistabbilixxi livell sikur ta’ konsum ta’ zokkor ħieles u miżjud minħabba li “r-riskju ta’ effetti negattivi fuq is-saħħa (rispons) żdied fil-firxa kollha tal-livelli ta’ konsum (dożi) osservati b’mod kostanti (lineari), jiġifieri aktar ma jkun kbir il-konsum, akbar ikun ir-riskju ta’ effetti negattivi” (19); billi l-Aġenzija għar-Riċerka dwar il-Kanċer tad-WHO kklassifikat id-dolċifikant aspartame bħala possibbilment karċinoġeniku għall-bnedmin; billi rieżami sistematiku mid-WHO jissuġġerixxi li d-dolċifikanti mhux taz-zokkor jistgħu jkunu marbuta ma’ riskju akbar ta’ dijabete tat-tip 2, mard kardjovaskulari, mortalità għal kull kawża u żieda fil-piż tal-ġisem; billi dieti aktar tajbin għas-saħħa li jinkludu żieda fil-konsum ta’ ikel ibbażat fuq il-pjanti, bħal frott u ħxejjex friski, qmuħ sħaħ u legumi, u jevitaw il-konsum żejjed ta’ laħam u prodotti ultraproċessati jikkontribwixxu għal saħħa aħjar, inaqqsu l-mortalità minn mard li ma jitteħidx relatat mad-dieta u jġibu benefiċċji ambjentali;

M.

billi għodod tal-informazzjoni effettivi, bħat-tikkettar nutrizzjonali fuq il-parti ta’ quddiem tal-pakkett, jappoġġjaw liċ-ċittadini biex jagħmlu għażliet tal-ikel aktar tajbin għas-saħħa u jevitaw il-konsum mhux tajjeb għas-saħħa ta’ ikel b’livell għoli ta’ melħ, xaħam u zokkor; billi l-Parlament appoġġja l-adozzjoni ta’ tali tikketta fir-riżoluzzjoni fuq inizjattiva proprja tiegħu tal-20 ta’ Ottubru 2021 dwar l-istrateġija Mill-Għalqa sal-Platt, li fiha stieden lill-Kummissjoni tiżgura tikkettar nutrizzjonali obbligatorju u armonizzat tal-UE fuq il-parti ta’ quddiem tal-pakkett ibbażat fuq evidenza xjentifika u wera fehim tal-konsumatur biex jappoġġja informazzjoni preċiża dwar l-ikel u alternattivi aktar tajbin għas-saħħa;

N.

billi, fl-2012, il-Kummissjoni stabbiliet lista “pendenti” ta’ 2 078 indikazzjoni dwar is-saħħa fir-rigward tas-sustanzi tal-pjanti, prinċipalment minħabba n-nuqqas ta’ studji ta’ intervent uman, li wassal għas-sospensjoni tal-proċedura ta’ evalwazzjoni u ta’ awtorizzazzjoni tal-EFSA fl-2010; billi l-indikazzjonijiet “pendenti” dwar is-saħħa – kemm dawk evalwati b’mod negattiv kif ukoll dawk li għadhom ma ġewx riveduti – jistgħu jibqgħu jintużaw fis-suq tal-UE skont il-miżuri tranżizzjonali stabbiliti fl-NHCR, sakemm tittieħed deċiżjoni dwar il-lista “pendenti”;

O.

billi fl-2020, il-Kummissjoni kkonkludiet fir-rapport ta’ evalwazzjoni tagħha dwar l-NHCR li l-konsumaturi għadhom esposti għal indikazzjonijiet dwar is-saħħa fuq is-sustanzi erbali b’livelli differenti ta’ valutazzjoni xjentifika, inklużi indikazzjonijiet dwar is-saħħa mhux sostanzjati li għalihom jistgħu jemmnu li l-effetti ta’ benefiċċju ddikjarati ġew evalwati xjentifikament meta dan ma jkunx il-każ;

P.

billi aktar koordinazzjoni dwar il-qafas ta’ sikurezza għas-sustanzi erbali tista’ tikkontribwixxi għat-titjib tal-protezzjoni tal-konsumatur;

Q.

billi l-leġiżlazzjoni fuq is-sustanzi erbali fl-ikel u s-supplimenti tal-ikel mhijiex armonizzata fil-livell tal-UE; billi l-Istati Membri jew għandhom listi pożittivi jew listi negattivi jew l-ebda lista ta’ sustanzi erbali permessi fl-ikel; billi l-klassifikazzjoni tas-sustanzi erbali bħala ikel jew mediċina taqa’ fl-ambitu tal-kompetenza ta’ kull Stat Membru individwali; billi l-għan ta’ prodott mediċinali huwa li jikkura jew jipprevjeni mard fil-bnedmin u s-supplimenti tal-ikel huma maħsuba għal konsumaturi li ma għandhomx bżonnijiet mediċi immedjati; billi għalhekk huwa importanti li tinżamm distinzjoni ċara bejn l-ikel u l-mediċina;

R.

billi l-mediċini erbali jridu jgħaddu minn proċeduri ta’ awtorizzazzjoni qabel ma jkunu introdotti fis-suq tal-UE, li jeħtieġ it-turija tas-sikurezza u tal-effikaċja tal-prodott u jridu jissodisfaw rekwiżiti legali addizzjonali f’oqsma bħall-valutazzjonijiet tal-kwalità, il-farmakoviġilanza u l-konformità tal-prattika tajba tal-manifattura; billi l-mediċini erbali li ilhom 30 sena jintużaw b’mod sikur, inkluż 15-il sena fl-UE, jistgħu jużaw proċedura ta’ reġistrazzjoni simplifikata għall-prodotti mediċinali u erbali tradizzjonali, fejn data “tradizzjonali” hija aċċettata biex tissostanzja s-sikurezza u l-effikaċja tal-prodott;

S.

billi l-infurzar tal-NHCR fir-rigward tal-indikazzjonijiet fuq is-sustanzi erbali ddewwem b’mod sostanzjali; billi l-objettiv tal-NHCR li jiżgura livell għoli ta’ protezzjoni tal-konsumatur jirrikjedi azzjoni rapida mill-Kummissjoni biex jew tinforza bis-sħiħ jew tirrevedi l-NHCR, peress li mhuwiex adattat għall-iskop tiegħu f’ċerti aspetti;

T.

billi l-Istati Membri huma responsabbli biex jinfurzaw l-NHCR fi ħdan il-ġurisdizzjonijiet tagħhom; billi l-Istati Membri huma obbligati li japplikaw il-prinċipju tar-rikonoxximent reċiproku; billi minħabba differenzi fl-interpretazzjoni u diskrepanzi fl-infurzar bejn l-Istati Membri, l-azzjonijiet ta’ infurzar wara l-użu mhux korrett tal-indikazzjonijiet ivarjaw minn parir dwar kif jiġu aġġustati l-indikazzjonijiet għal multi għall-użu mhux korrett tagħhom;

U.

billi l-media soċjali tikkontribwixxi b’mod sinifikanti għar-reklamar u l-bejgħ tal-ikel u tas-supplimenti tal-ikel, filwaqt li l-punt sa fejn l-NHCR jirregola l-komunikazzjonijiet online relatati mas-saħħa dwar l-ikel għadu mhux ċar; billi l-komunikazzjonijiet ta’ influwenzaturi jew ċelebritajiet fuq il-media soċjali mhumiex dejjem kummerċjali jew mhux kummerċjali b’mod ċar (20) u jistgħu jwasslu għal indikazzjonijiet dwar prodotti tal-ikel li mhumiex ivverifikati, foloz u qarrieqa, pereżempju fir-rigward tar-reklamar tal-proteina u supplimenti oħra biex il-muskoli jikbru aħjar;