1)

L-Artikolu 3 tar-Regolament (KE) Nru 883/2004 tal-Parlament Ewropew u tal-Kunsill tad-29 ta’ April 2004 dwar il-kordinazzjoni ta’ sistemi ta’ sigurtà soċjali (1) għandu jiġi interpretat fis-sens li l-għajnuna għall-integrazzjoni pprovduta fis-Sozialgesetzbuch Neuntes Buch – Rehabilitation und Teilhabe von Menschen mit Behinderungen (Ktieb IX tal-Kodiċi Soċjali – Riabilitazzjoni u parteċipazzjoni ta’ persuni b’diżabbiltà, iktar ’il quddiem is-“SGB IX”) fil-forma ta’ benefiċċji ta’ assistenza għall-iskola, tikkostitixxi benefiċċju fis-sens tal-Artikolu 3 u taqa’ għalhekk fil-kamp ta’ applikazzjoni materjali ta’ dan ir-regolament?

Fil-każ li tingħata risposta fin-negattiv għall-ewwel domanda:

2)

L-Artikolu 7(2) tar-Regolament (UE) Nru 492/2011 tal-Parlament Ewropew u tal-Kunsill tal-5 ta’ April 2011 dwar il-moviment liberu tal-ħaddiema fi ħdan l-Unjoni (2) għandu jiġi interpretat fis-sens li jipprekludi dispożizzjoni tad-dritt nazzjonali li tissuġġetta l-benefiċċji ta’ għajnuna għall-integrazzjoni pprovduti fis-SGB IX, fil-forma ta’ benefiċċji ta’ assistenza għall-iskola, għar-residenza abitwali fit-territorju nazzjonali?

3)

Ikun hemm restrizzjoni inġustifikata tad-drittijiet taċ-ċittadini tal-Unjoni skont l-Artikolu 20 u l-Artikolu 21(1) TFUE jekk l-għoti ta’ għajnuna għall-integrazzjoni skont is-SGB IX fil-forma ta’ benefiċċji ta’ assistenza għall-iskola għal ċittadini tal-Unjoni li jkollhom id-domiċilju tagħhom jew ir-residenza abitwali tagħhom fi Stat Membru ieħor (viċin il-fruntiera) jiġi rrifjutat, iżda l-benefiċċju in natura jiġi pprovdut fl-Istat ta’ residenza?