Pubblikazzjoni ta’ emenda standard approvata għall-Ispeċifikazzjoni tal-Prodott għal Denominazzjoni ta’ Oriġini Protetta jew Indikazzjoni Ġeografika Protetta fis-settur tal-prodotti agrikoli u tal-oġġetti tal-ikel, kif imsemmi fl-Artikolu 6b(2) u (3) tar-Regolament Delegat tal-Kummissjoni (UE) Nru 664/2014

(C/2024/4992)

Din il-komunikazzjoni hija ppubblikata f’konformità mal-Artikolu 6b(5) tar-Regolament Delegat tal-Kummissjoni (UE) Nru 664/2014 (1).

KOMUNIKAZZJONI TAL-APPROVAZZJONI TA’ EMENDA STANDARD FL-ISPEĊIFIKAZZJONI TAL-PRODOTT TA’ DENOMINAZZJONI TA’ ORIĠINI PROTETTA JEW INDIKAZZJONI ĠEOGRAFIKA PROTETTA LI TORIĠINA FI STAT MEMBRU

[Ir-Regolament (UE) Nru 1151/2012]

“Mantecados de Estepa”

Nru tal-UE: PGI-ES-0761-AM02 - 28.5.2024

DOP ( ) IĠP (X)

1. Isem il-prodott

“Mantecados de Estepa”

2. Stat Membru li għalih tappartjeni ż-żona ġeografika

Spanja

3. Awtorità nazzjonali jew grupp applikant li jikkomunika l-emenda standard

Id-Direttorat Ġenerali għall-Industriji Agroalimentari, l-Innovazzjoni u l-Katina tal-Provvista tal-Ikel

4. Deskrizzjoni tal-emenda/i approvata/i

Spjegazzjoni dwar kif l-emenda/i taqa’/jaqgħu taħt id-definizzjoni ta’ emenda standard kif previst fl-Artikolu 53(2) tar-Regolament (UE) Nru 1151/2012

L-emenda approvata taqa’ taħt id-definizzjoni ta’ emenda standard peress li ma tinvolvix bidla fl-isem tad-Denominazzjoni ta’ Oriġini Protetta, u ma tħassarx ir-rabta stabbilita fl-Ispeċifikazzjoni tal-Prodott jew tinvolvi aktar restrizzjonijiet fuq il-kummerċjalizzazzjoni tal-prodott.

1. Il-piż massimu stabbilit għall-“Mantecados de Estepa” fl-Ispeċifikazzjoni tal-Prodott u fit-Taqsima 3.2 “Deskrizzjoni tal-prodott li għalih japplika l-isem f’(1)” tad-Dokument Uniku ġie emendat

Emenda tat-Taqsima B “Deskrizzjoni tal-prodott” tal-Ispeċifikazzjoni tal-Prodott

Il-formulazzjoni attwali tar-raba’ paragrafu:

“Kull wieħed mill-prodotti għandu forma tonda, b’piż massimu ta’ 50 g għal kull biċċa, kif spjegat fit-taqsima dwar il-varjetajiet.”

ġiet sostitwita b’dan li ġej:

“Kull wieħed mill-prodotti għandu forma tonda, b’piż massimu ta’ 55 g għal kull biċċa.”

L-ewwel paragrafu taħt is-subintestatura “Varjetajiet” tħassar:

“Il-prodotti koperti mill-Indikazzjoni Ġeografika Protetta jridu jkunu tondi, b’piż massimu ta’ 35 gramma, ħlief għall-varjetajiet magħmula d-dar jew artiġjanali u taż-żejt taż-żebbuġa, li jistgħu jiżnu sa 50 gramma.”

Raġunijiet

Ix-xejra attwali tas-suq hija li jiġu kkonsmati prodotti li huma itqal minn dawk definiti fl-Ispeċifikazzjoni tal-Prodott. Bħalissa, 50 % tal-mantecados ikkunsmati jiżnu aktar minn 35 gramma. Għalhekk huwa meqjus neċessarju li l-provvista tiġi adattata għad-domanda tas-suq u li jiżdied il-piż tal-mantecados, peress li dan ma jfixkilx il-kwalità tal-prodott finali.

Din l-emenda taffettwa d-Dokument Uniku.

2. L-ingredjenti addizzjonali tal-varjetajiet tal-istil magħmul id-dar u taż-żejt taż-żebbuġa ekstra verġni ġew emendati

Emenda tat-Taqsima B “Deskrizzjoni tal-prodott” tal-Ispeċifikazzjoni tal-Prodott

L-ingredjenti addizzjonali tal-varjetajiet tal-istil magħmul id-dar u taż-żejt taż-żebbuġa ekstra verġni fl-Ispeċifikazzjoni tal-Prodott u fit-Taqsima 3.3 il-ġdida “Għalf (għall-prodotti li joriġinaw mill-annimali biss) u materja prima (għall-prodotti pproċessati biss)” tad-Dokument Uniku ġew emendati.

Il-lewż ġie inkluż bħala ingredjent addizzjonali tal-varjetajiet tal-istil magħmul id-dar u taż-żejt taż-żebbuġa ekstra verġni f’firxa ta’ 0–9 %.

Raġunijiet

Minħabba li l-mantecados protetti huma prodott ta’ kwalità distinta, huwa meqjus xieraq li l-lewż jiġi inkluż bħala ingredjent alternattiv tal-istil magħmul id-dar u tal-varjetajiet taż-żejt taż-żebbuġa ekstra verġni sabiex tittejjeb il-kwalità tagħhom u jiżdied il-valur nutrizzjonali għall-konsumatur.

Din l-emenda taffettwa d-Dokument Uniku.

3. Emenda tal-formulazzjoni fir-rigward tat-temperatura tat-tkessiħ

Emenda tat-Taqsima E “Metodu ta’ produzzjoni” tal-Ispeċifikazzjoni tal-Prodott. Il-formulazzjoni attwali:

“Meta jkunu lesti milli jinħmew, il-prodotti jitkessħu. Dawn għandhom jitkessħu għal mill-inqas temperatura ambjentali sabiex jiġi żgurat immaniġġjar aħjar u tiġi evitata kwalunkwe kondensazzjoni milli tifforma fit-tgeżwir.”

ġiet sostitwita b’dan li ġej:

“Meta jkunu lesti milli jinħmew, il-prodotti jitkessħu. Iridu jitkessħu sabiex jiġi żgurat immaniġġjar aħjar u jiġi evitat li tifforma xi kondensazzjoni fit-tgeżwir.”

Raġunijiet

Il-prodott irid jitkessaħ għal taħt it-temperatura ambjentali, ħlief f’nofs ix-xitwa, meta t-temperatura tista’ tkun baxxa ħafna, li jfisser li l-prodott huwa iebes biżżejjed biex jitgeżwer mingħajr ir-riskju li jinkiser. Għalhekk, dan il-kriterju tħassar.

Din l-emenda taffettwa d-Dokument Uniku.

4. Adattament tat-tgeżwir użat għaċ-ċirkostanzi attwali tas-suq

Emenda tat-Taqsima E “Metodu ta’ produzzjoni” tal-Ispeċifikazzjoni tal-Prodott.

L-10 paragrafu tal-Ispeċifikazzjoni tal-Prodott u t-Taqsima 3.5 il-ġdida “Regoli speċifiċi dwar it-tqattigħ, it-tħakkik, l-ippakkjar, eċċ.”, tad-Dokument Uniku ġew emendati.

Il-formulazzjoni attwali:

“Fl-aħħar nett, il-prodotti jitgeżwru fil-formati approvati mill-bord regolatorju, dejjem bħala parti mil-linja flow-pack, f’karta tas-selofejn għal prodotti mgeżwra b’mod mekkaniku u ssiġillati bis-sħana, u f’karta tixju mibruma fiż-żewġ truf għal prodotti mgeżwra kemm b’mod mekkaniku kif ukoll bl-idejn.”

ġiet sostitwita b’dan li ġej:

“Fl-aħħar nett, il-prodotti jitgeżwru fil-formati approvati mill-bord regolatorju, dejjem fi ħdan il-linja flow-pack issiġillata bis-sħana u doppja, peress li din it-tip ta’ karta tintuża kemm għat-tgeżwir b’mod mekkaniku kif ukoll għat-tgeżwir bl-idejn.”

Raġunijiet

Adattament tat-tgeżwir użat għaċ-ċirkostanzi attwali tas-suq

Din l-emenda taffettwa d-Dokument Uniku.

5. Tneħħija tar-rekwiżit tat-temperatura waqt it-tgeżwir

It-13-il paragrafu tal-Ispeċifikazzjoni tal-Prodott u t-Taqsima 3.4 il-ġdida “Passi speċifiċi tal-produzzjoni li jridu jsiru fiż-żona ġeografika ddefinita” tad-Dokument Uniku ġew emendati.

Il-formulazzjoni attwali:

“L-ippakkjar irid isir fiż-żona ġeografika ddefinita taħt l-Indikazzjoni Ġeografika Protetta sabiex tiġi salvagwardjata l-kwalità tal-prodott. Il-prodott irid jitgeżwer immedjatament wara li jsir u wara li jkun għadda minn perjodu ta’ tkessiħ biex it-temperatura tiegħu titnaqqas għal inqas minn 10 C. Dan jipprevjeni li l-prodott jinkiser minħabba l-fraġilità tiegħu u jippreżerva l-proprjetajiet fiżiċi u kimiċi u l-karatteristiċi organolettiċi deskritti fit-taqsima intitolata ‘Deskrizzjoni tal-prodott’.”

ġiet sostitwita b’dan li ġej:

“L-ippakkjar irid isir fiż-żona ġeografika definita taħt l-Indikazzjoni Ġeografika Protetta sabiex tiġi salvagwardjata l-kwalità tal-prodott. Il-prodott irid jitgeżwer immedjatament wara li jsir u wara li jkun għadda minn perjodu ta’ tkessiħ. Dan inaqqas it-temperatura tal-prodott, jipprevjeni li jinkiser minħabba l-fraġilità tiegħu u jippreżerva l-proprjetajiet fiżiċi u kimiċi u l-karatteristiċi organolettiċi deskritti fit-taqsima intitolata ‘Deskrizzjoni tal-prodott’.”

Raġunijiet

Ir-rekwiżit li t-temperatura titnaqqas għal inqas minn 10 °C tneħħa, peress li l-uniku rekwiżit huwa li l-prodott ikun kiesaħ meta jitgeżwer sabiex din l-operazzjoni tkun tista’ titwettaq mingħajr ma l-prodott jinkiser u l-prodott jasal għand il-konsumatur bil-karatteristiċi stabbiliti fl-Ispeċifikazzjoni tal-Prodott ippreżervati. Flimkien mal-emenda tal-paragrafu, il-formulazzjoni tiegħu tjiebet ukoll.

Din l-emenda taffettwa d-Dokument Uniku.

6. Żieda fil-piż massimu

Emenda tat-Taqsima F “Rabta maż-żona ġeografika” tal-Ispeċifikazzjoni tal-Prodott u tat-Taqsima 5.2 “Speċifiċità tal-prodott” tad-Dokument Uniku. Fil-25 paragrafu, “piż massimu ta’ 50 gramma” huwa sostitwit b’“piż massimu ta’ 55 gramma”.

Raġunijiet

Il-formulazzjoni ġiet emendata f’konformità mal-emenda approvata u r-raġunijiet mogħtija fit-Taqsima 3.1.2 ta’ dan id-dokument.

Din l-emenda taffettwa d-Dokument Uniku.

7. Aġġornament tad-dettalji ta’ kuntatt għall-awtorità kompetenti

Emenda tat-Taqsima G “Verifika tal-konformità mal-Ispeċifikazzjoni tal-Prodott”.

L-isem tal-awtorità kompetenti, l-indirizz tal-posta elettronika tagħha u l-link għas-sit web tagħha ġew aġġornati.

L-emenda ma taffettwax id-Dokument Uniku.

8. Adattament tar-rekwiżiti tat-tikkettar għal-leġiżlazzjoni fis-seħħ

3.5. Emenda tat-Taqsima H “Tikkettar” tal-Ispeċifikazzjoni tal-Prodott u t-Taqsima 3.6 il-ġdida “Regoli speċifiċi dwar it-tikkettar” tad-Dokument Uniku.

Fit-tielet paragrafu, il-formulazzjoni attwali:

“Fil-każ ta’ kaxxi b’varjetà ta’ prodotti oħra li mhumiex inklużi fl-Identifikazzjoni Ġeografika Protetta, il-‘Mantecados de Estepa’ inklużi jistgħu jiġu identifikati bħala ‘Mantecados de Estepa’ fil-pakketti individwali u jista' jintuża il-logo tal-IĠP. Madankollu, fuq barra tal-ippakkjar tal-varjetà, dawn jissemmew biss fil-parti dwar il-kontenut tal-kaxxa bħala ‘Mantecados de Estepa IĠP’, mingħajr ma jintuża l-logo tal-IĠP.”

ġiet sostitwita b’dan li ġej:

“Meta l-‘Mantecados de Estepa’ jiġu inklużi f’assortimenti bi prodotti mhux koperti mill-IĠP, it-tgeżwir individwali tal-‘Mantecados de Estepa’ u l-imballaġġ ta’ barra tal-assortiment irid ikollhom l-isem protett ‘Mantecados de Estepa’ u s-simbolu tal-Indikazzjoni Ġeografika Protetta (IĠP) tal-UE.

L-imballaġġ ta’ barra tal-assortiment irid ikollu wkoll il-logo tal-bord regolatorju u s-simbolu tal-UE, flimkien mat-test li ġej: “Il-prodotti li jinsabu f’din il-kaxxa u identifikati bil-logo tal-bord regolatorju u s-simbolu tal-UE saru f’konformità mal-kriterji tal-kwalità tal-Ispeċifikazzjoni tal-Prodott għall-IĠP tal-‘Mantecados de Estepa’.”

Raġunijiet

L-Artikolu 12(3) tar-Regolament (UE) Nru 1151/2012 tal-Parlament Ewropew u tal-Kunsill tal-21 ta’ Novembru 2012 dwar skemi tal-kwalità għal prodotti agrikoli u oġġetti tal-ikel jiddikjara li l-isem protett irid ikun akkumpanjat mis-simbolu tal-Unjoni assoċjat miegħu. Fid-dawl ta’ dan, u minħabba li din id-dispożizzjoni bħalissa ma hijiex qed tiġi segwita, dan il-paragrafu ġie aġġornat biex jinġieb f’konformità mar-regoli legali fis-seħħ. Il-logo tal-bord regolatorju ġie inkluż biex tiġi konsolidata l-informazzjoni pprovduta lill-konsumatur, filwaqt li jiġi identifikat liema mill-kontenut ta’ prodott huwa ta’ kwalità distinta.

Din l-emenda taffettwa d-Dokument Uniku.

DOKUMENT UNIKU

“Mantecados de Estepa”

Nru tal-UE: PGI-ES-0761-AM02 - 28.5.2024

DOP ( ) IĠP (X)

1. Isem/Ismijiet [tad-DOP jew tal-IĠP]

“Mantecados de Estepa”

2. Stat Membru jew pajjiż terz

Spanja

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott [elenkat fl-Anness XI]

Klassi 2.3. Ħobż, għaġina, kejkijiet, ħelu, gallettini u prodotti oħra tal-furnara

3.2. Kodiċi tan-Nomenklatura Magħquda

19 – PREPARAZZJONIJIET TA’ ĊEREALI, DQIQ, LAMTU JEW ĦALIB; PRODOTTI TAL-PASTIĊĊIERA

1905 – Ħobż, għaġina, kejkijiet, gallettini u prodotti oħra tal-furnara, kemm jekk fihom il-kawkaw jew le; ostji tat-tqarbin, reċipjenti zgħar vojta ta’ kwalità li huma tajbin għal użu farmaċewtiku, sealing wafers, karta ostja u prodotti simili

3.3. Deskrizzjoni tal-prodott li għalih japplika l-isem f’(1)

L-isem “Mantecados de Estepa” tradizzjonalment jintuża biex jindika tip ta’ ħelu tal-Milied, magħmul f’Estepa. Dawn il-“Mantecados de Estepa” ilhom isiru skont l-istess riċetta għal aktar minn mitt sena. Dawn jiġu ppakkjati waħedhom jew flimkien ma’ ħelu tal-Milied ieħor bħall-polvorones, l-alfajores u r-roscos de vino. Il-“Mantecados de Estepa” huma biċċiet żgħar magħmula minn għaġina moħmija. L-ingredjenti bażiċi huma d-dqiq tal-qamħ, il-lardu tal-majjal u z-zokkor fin tal-ġelu. L-ingredjenti addizzjonali (ara t-Taqsima 3.3) jiddependu mill-varjetà tal-“Mantecado de Estepa”: il-kannella, l-istil magħmul id-dar, iż-żejt taż-żebbuġa, il-lewż, il-kawkaw, il-ġewż tal-Indi, il-lumi, il-ġellewż u l-vanilla. Bħala eċċezzjoni, fil-“Mantecados de Estepa” magħmula biż-żejt taż-żebbuġa, il-lardu jiġi sostitwit biż-żejt taż-żebbuġa ekstra verġni. Huma kulur il-qastan mixwi, sod fuq barra u artab minn ġewwa, b’konsistenza li tinħass kemxejn imxaqqa u lixxa fuq il-palat.

Il-“Mantecados de Estepa” għandhom forma tonda u jiżnu sa 55 gramma. Il-prodotti bl-isem “Mantecados de Estepa” jridu jissodisfaw ukoll il-parametri fiżiċi u kimiċi li ġejjin:

—	indewwa: inqas minn 5 %,

—	attività tal-ilma: inqas minn 0,650,

—	pH: inqas minn 6,5.

3.4. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Il-proċess jibda b’għażla bir-reqqa tal-materja prima. Il-materja prima bażika użata hija d-dqiq tal-qamħ, il-lardu tal-majjal u z-zokkor fin tal-ġelu. L-ingredjenti addizzjonali huma: il-kannella, il-ġulġlien, il-lewż, il-ġellewż, il-ġewż tal-Indi, il-kawkaw, l-aromatizzanti naturali (iż-żjut essenzjali) fil-proporzjonijiet mogħtija fit-tabella ta’ hawn taħt. Bħala eċċezzjoni, fil-“Mantecados de Estepa” magħmula biż-żejt taż-żebbuġa, il-lardu jiġi sostitwit biż-żejt taż-żebbuġa ekstra verġni.

Ingredjenti bażiċi
Dqiq tal-qamħ	45–55 %	45–55 %	45–55 %	40–50 %	45–50 %	45–55 %	45–55 %	45–55 %	45–55 %
Lardu tal-majjal	20–27 %	20–27 %	0 %	20–25 %	20–26 %	20–26 %	20–27 %	20–25 %	20–25 %
Zokkor	22–26 %	22–26 %	22–26 %	22–25 %	22–25 %	22–26 %	22–26 %	22–25 %	22–25 %
Ingredjenti addizzjonali
Kannella	0,7–1 %	0.7–1 %	0.7–1 %	0,7–1 %	0–0.5 %	0–0.5 %	0–0.5 %	0–0.5 %	0–0.5 %
Ġunġlien	0,7–1 %	0,7–2 %	0,7–1 %	0–0.5 %	0 %	0 %	0 %	0 %	0 %
Lewż	0 %	0–9 %	0–9 %	≥ 8 %	0 %	0 %	0 %	0 %	0 %
Ġellewż	0 %	0 %	0 %	0 %	0 %	0 %	0 %	8–9 %	0 %
Ġewż tal-Indi	0 %	0 %	0 %	0 %	5–10 %	0 %	0 %	0 %	0 %
Kawkaw	0 %	0 %	0 %	0 %	0 %	2–6 %	0 %	0 %	0 %
Żejt taż-żebbuġa ekstra verġni	0 %	0 %	20–26 %	0 %	0 %	0 %	0 %	0 %	0 %
Żjut essenzjali	0–0,03 %	0–0,03 %	0–0,03 %	0–0,03 %	0–0,03 %	0–0,03 %	0,05–1 %	0–0,03 %	0,05–1 %
	Kannella	Stil magħmula d-dar	Żejt taż-żebbuġa ekstra verġni	Lewż	Ġewż tal-Indi	Kawkaw	Lumi	Ġellewż	Vanilla

Id-dqiq, il-lardu tal-majjal, iz-zokkor u l-lewż iridu jissodisfaw ir-rekwiżiti li ġejjin, fir-rigward tal-karatteristiċi fiżiċi u kimiċi u tal-karatteristiċi organolettiċi:

—	dqiq: abjad; aroma: l-ebda; togħma: newtrali; dehra: mingħajr impuritajiet u infestazzjonijiet; kontenut ta’ ndewwa: < 11,5 %; forza (W) 80 × 10 000 J; proporzjon P/L ta’ 0,3 għal 0,5,

—	lardu tal-majjal raffinat: kulur: abjad; aroma: newtrali; togħma: newtrali; dehra: solida u mingħajr impuritajiet; aċidità: < 0,15 % aċidu olejku; valur tal-perossidu: < 2 meq O2/kg xaħam; punt ta’ fużjoni: 32–36 °C (metodu kapillari miftuħ); stabbiltà: > 30 siegħa,

—	lardu tal-majjal mhux raffinat: kulur: abjad; aroma: newtrali; togħma: newtrali; dehra: solida u mingħajr impuritajiet; aċidità: < 0,5 % aċidu olejku; valur tal-perossidu: < 3 meq O2/kg xaħam; punt ta’ fużjoni: 32–36 °C (metodu kapillari miftuħ); stabbiltà: > 30 siegħa,

—	zokkor: kulur: abjad; aroma: mingħajr riħa; togħma: ħelwa; dehra: mingħajr biċċiet,

—	lewż: kulur: avorju; aroma: friska; togħma: ħelwa; dehra: ħabb il-qamħirrum ovali mingħajr impuritajiet u infestazzjonijiet; kontenut ta’ ndewwa: < 6,5 %, Addittivi: jistgħu jintużaw addittivi li huma permessi mil-leġiżlazzjoni fis-seħħ.

3.5. Passi speċifiċi tal-produzzjoni li jridu jsiru fiż-żona ġeografika ddefinita

Il-produzzjoni u l-imballaġġ iridu jsiru fiż-żona ġeografika ddefinita sabiex tiġi salvagwardjata l-kwalità tal-prodott. Il-ħelu jrid jiġi mballat individwalment eżatt wara li jiġi prodott, wara li jitkessaħ biex titbaxxa t-temperatura tiegħu. Dan ma jħallihomx jinkisru minħabba li huma fraġli wisq, u jżommu l-proprjetajiet fiżiċi u kimiċi u l-karatteristiċi organolettiċi deskritti fil-punt 3.2.

3.6. Regoli speċifiċi dwar it-tqattigħ, it-taħkik, l-ippakkjar, eċċ.

Il-prodott jiġi mballat individwalment, fi ħdan il-linja flow-pack issiġillata bis-sħana u doppja, mekkanikament jew bl-idejn. Dan għandu jsir meta l-prodott ikun tkessaħ, sabiex il-ħelu jkun jista’ jiġi mmaniġġjat b’mod aktar faċli u biex jiġi evitat li l-fwar jiġi kkondensat ġewwa t-tgeżwir. Il-Mantecados imballati individwalment jistgħu jiġu kkummerċjalizzati individwalment jew f’kaxxi li jkunu ttikkettati kif xieraq u li jiżnu minimu ta’ 100 gramma u massimu ta’ 5 kg.

3.7. Regoli speċifiċi dwar it-tikkettar

Kemm it-tgeżwir individwali kif ukoll il-kaxxi jrid ikollhom tikketti li jridu jinkludu l-kliem “Indicación Geográfica Protegida”, l-isem “Mantecados de Estepa” u l-logo. Meta l-“Mantecados de Estepa” jiġu inklużi f’assortimenti bi prodotti mhux koperti mill-IĠP, it-tgeżwir individwali tal-“Mantecados de Estepa” u l-imballaġġ ta’ barra tal-assortiment irid ikollhom l-isem protett “Mantecados de Estepa” u s-simbolu tal-Indikazzjoni Ġeografika Protetta (IĠP) tal-UE. L-imballaġġ ta’ barra tal-assortiment irid ikollu wkoll il-logo tal-bord regolatorju u s-simbolu tal-UE, flimkien mat-test li ġej: “Il-prodotti li jinsabu f’din il-kaxxa u identifikati bil-logo tal-bord regolatorju u s-simbolu tal-UE saru f’konformità mal-kriterji tal-kwalità tal-Ispeċifikazzjoni tal-Prodott għall-IĠP tal-‘Mantecados de Estepa’.”

4. Definizzjoni fil-qosor taż-żona ġeografika

Il-muniċipalità ta’ Estepa, fil-provinċja ta’ Sevilla.

5. Rabta maż-żona ġeografika

Speċifiċità taż-żona ġeografika

Il-fatt li l-“Mantecados de Estepa” ilhom isiru f’Estepa għal aktar minn mitt sena u kiseb reputazzjoni tant eċċellenti bħala speċjalità tal-Milied mhuwiex koinċidenza, iżda huwa r-riżultat tal-isforzi u d-dedikazzjoni tal-ġenerazzjonijiet li fittxew li jżommu u jtejbu l-kwalità ta’ dan il-prodott lokali. Matul l-istaġun tal-Mantecado, minn Settembru sa Diċembru, ħafna mill-popolazzjoni ta’ Estepa issa hija impjegata, direttament jew indirettament, fil-produzzjoni tal-Mantecado. Matul l-istaġun, Estepa tgħix mill-“Mantecados de Estepa” u għaliha. Hemm ftit familji li tradizzjonalment ma humiex impjegati f’waħda mill-fabbriki li jipproduċu l-“Mantecados de Estepa” – u issa hemm aktar minn 20 minnhom. Dan jagħti lin-negozji karattru familjari b’saħħtu; dawn jgħaddu minn ġenerazzjoni għall-oħra u xi wħud issa qed jitmexxew mit-tielet ġenerazzjoni. Hekk kif il-produzzjoni tal-Mantecado saret industrijalizzata biex tissodisfa d-domanda tas-suq, ħafna industriji satellitari li ġew żviluppati f’Estepa, kienu meħtieġa għall-produzzjoni u l-kummerċjalizzazzjoni tal-Mantecado. Dawn ivarjaw mill-iffurmar tal-plastik permezz ta’ sistema termali, l-istampar u l-ħażna tal-materja prima għall-awtomatizzazzjoni tal-linja tal-produzzjoni.

Speċifiċità tal-prodott

Il-“Mantecados de Estepa” huwa ħelu magħmul minn materja prima magħżula bir-reqqa. Dawn huma biċċiet tal-għaġina moħmija, magħmula minn taħlita bażika ta’ dqiq tal-qamħ, lardu tal-majjal u zokkor fin tal-ġelu, b’ingredjenti addizzjonali bħall-kannella u l-lewż fost l-oħrajn. Għandhom forma tonda u jiżnu massimu ta’ 55 gramma. Il-kwalità speċifika tal-“Mantecados de Estepa” hija li huma sodi fuq barra u rotob minn ġewwa, kemxejn imxaqqa fil-wiċċ u lixxi fuq il-palat, u huma speċjalità staġjonali, li jittieklu fi żmien il-Milied. Huma popolari ħafna matul l-istaġun tal-Milied u ilhom isiru bl-istess riċetta għal aktar minn 100 sena.

Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DOP), jew kwalità partikolari, ir-reputazzjoni jew karatteristiċi oħrajn tal-prodott (għall-IĠP)

Il-bażi tal-Indikazzjoni Ġeografika Protetta tal-“Mantecados de Estepa” hija r-reputazzjoni li l-prodott kiseb matul il-100 sena u aktar li sar bir-riċetta tradizzjonali. Sena wara sena, il-belt ta’ Estepa tieħu rwol importanti fit-tħejjijiet għall-mejda tal-Milied Spanjola. Il-vjaġġatur li jasal f’Estepa fl-aħħar ta’ Settembru jintlaqa’ bl-aroma ħelwa u li tpaxxik tal-kannella, iz-zokkor mixwi u l-ġulġlien. F’dan iż-żmien tas-sena l-biċċa l-kbira tal-abitanti tal-belt ikunu okkupati jagħmlu l-Mantecados. Il-“Mantecados de Estepa” jmorru lura għas-seklu 16. Id-dokumenti fl-arkivji tal-Kunvent ta’ Santa Clara f’Estepa juru li huma ħaddmu d-dulċiera biex jissodisfaw id-domanda minn Sevilja u Madrid, fejn bagħtu l-prodotti tagħhom. Hemm ukoll riċetti antiki għall-“Mantecados de Estepa”. Dawn kienu magħmulin minn taħlita ta’ ċereali u l-lardu tal-majjal żejjed li jkun fadal mill-qatla f’Diċembru, li jispjega għaliex dan il-ħelu minn dejjem kien jittiekel fi żmien il-Milied. Dawn il-“kejkijiet tal-lardu” ġew prodotti f’kull dar ta’ Estepa, u kien hemm kontenituri speċjali biex isiru fihom. Micaela Ruiz Téllez (La Colchona), li twieldet f’Estepa fl-1824 u mietet fl-1901, ivvintat il-forma attwali tal-Mantecado. Hija kellha l-idea brillanti li biddlet il-“Mantecados de Estepa” u għamlithom famużi. Biex ittejjeb it-togħma u tevita li l-prodott isofri kwalunkwe ħsara jekk jiġi trasportat fuq distanzi twal, Micaela biddlet ir-riċetta, fost l-oħrajn it-teknika għat-tnixxif tal-Mantecados fuq barra, sabiex jibqgħu rotob. B’hekk, twieldu l-“Mantecados de Estepa” l-ġodda: ta’ kwalità għolja, rotob u li jitfarrku, delizzjużi, peress li d-dqiq kien irfinat u mixwi u dan għamel Mantecados aktar lixxi mir-riċetta oriġinali. Il-bidliet li introduċiet ħolqu prodott li kiseb reputazzjoni eċċellenti fil-kummerċ tal-ħelu. Il-“Mantecados de Estepa” saru wieħed mill-prodotti tradizzjonalment offruti lill-konsumaturi fil-Milied u ilhom marbuta ma’ Estepa għal żmien twil ħafna. Dan għaliex in-nies ta’ Estepa ilhom jagħmluhom mit-tieni nofs tas-seklu 19. Għalhekk, il-fama tagħhom ivvjaġġat ħafna u b’mod wiesa’, barra mill-Andalusija, u saru magħrufa bħala “Mantecados de Estepa”.

Ġurnalist magħruf sew, Antonio Burgos, li kien qed jaħdem bħala osservatur għall-gazzetta ABC, fakkar il-karattru tradizzjonali ta’ dan il-ħelu: “... jistħoqq li nfaħħar stabbiliment f’Estepa, li ismu mhux importanti li jiġi msemmi, iżda li rriproduċa kaxxa tal-Milied kif kien isir fil-jiem ta’ żgħożiti. Il-kaxxa tal-kartun innifisha hija opra tal-arti, bl-ittri intaljati, ..., u fuq ġewwa, l-oġġetti bħal ma nafhom dejjem: il-mantecados, il-polvorones, l-alfajores, ir-roscos de vino, eċċ. L-assortiment klassiku.”, qalet l-ABC fl-edizzjoni tagħha tas-27 ta’ Diċembru 1986.

Referenza għall-pubblikazzjoni tal-Ispeċifikazzjoni tal-Prodott

https://lajunta.es/4qbgt

(1) ĠU L 179, 19.6.2014, p. 17.