1)

L-Artikolu 40 tad-Direttiva 2013/32/UE tal-Parlament Ewropew u tal-Kunsill tas-26 ta’ Ġunju 2013 dwar proċeduri komuni għall-għoti u l-irtirar tal-protezzjoni internazzjonali, moqri flimkien mat-tieni sentenza tal-Artikolu 12(1)(a) tad-Direttiva 2011/95/UE tal-Parlament Ewropew u tal-Kunsill tat-13 ta’ Diċembru 2011 dwar standards għall-kwalifika ta’ ċittadini nazzjonali ta’ pajjiżi terzi jew persuni mingħajr stat bħala benefiċjarji ta’ protezzjoni internazzjonali, għal stat uniformi għar-refuġjati jew għal persuni eliġibbli għal protezzjoni sussidjarja, u għall-kontenut tal-protezzjoni mogħtija,

għandu jiġi interpretat fis-sens li:

l-awtorità li tagħti deċiżjoni fuq il-fondatezza ta’ applikazzjoni sussegwenti għal protezzjoni internazzjonali hija meħtieġa teżamina l-elementi ta’ fatt ippreżentati insostenn ta’ din l-applikazzjoni, inkluż meta dawn il-fatti jkunu diġà ġew evalwati mill-awtorità li tkun ċaħdet b’mod definittiv l-ewwel applikazzjoni għal protezzjoni internazzjonali.

2)

It-tieni sentenza tal-Artikolu 12(1)(a) tad-Direttiva 2011/95

għandha tiġi interpretata fis-sens li:

il-protezzjoni jew l-għajnuna tal-Aġenzija ta’ Fondi u tax-Xogħol tan-Nazzjonijiet Uniti (għar-Refuġjati tal-Palestina fil-Lvant Qarib) (UNRWA), li minnha jibbenefika applikant għal protezzjoni internazzjonali, persuna mingħajr Stat ta’ oriġini Palestinjana, għandha titqies li tkun waqfet, fis-sens ta’ din id-dispożizzjoni, meta, minn naħa, dan l-organu jkun jinsab fl-impossibbiltà, għal kwalunkwe raġuni, inkluż minħabba s-sitwazzjoni ġenerali fis-settur taż-żona ta’ operat tal-imsemmi organu li fih din il-persuna mingħajr Stat kellha r-residenza abitwali tagħha, li jiżgura lill-imsemmija persuna mingħajr Stat, fid-dawl, jekk ikun il-każ, tal-istat ta’ vulnerabbiltà tagħha, kundizzjonijiet tal-għajxien dinjitużi, konformi mal-missjoni tiegħu, mingħajr ma din tkun obbligata turi li hija speċifikament affettwata minn din is-sitwazzjoni ġenerali minħabba elementi speċifiċi għas-sitwazzjoni personali tagħha, u, min-naħa l-oħra, din l-istess persuna mingħajr Stat tkun issib ruħha, fil-każ ta’ ritorn lejn dan is-settur, fi stat ta’ nuqqas serju ta’ sigurtà, b’teħid inkunsiderazzjoni, jekk ikun il-każ, tal-istat ta’ vulnerabbiltà tagħha, fejn l-awtoritajiet amministrattivi u ġudizzjarji huma meħtieġa jwettqu evalwazzjoni individwali ta’ kull applikazzjoni għal protezzjoni internazzjonali bbażata fuq din id-dispożizzjoni, li fil-kuntest tagħha l-età tal-persuna kkonċernata tista’ tkun rilevanti. L-għajnuna jew il-protezzjoni tal-UNRWA għandha, b’mod partikolari, titqies li waqfet fir-rigward tal-applikant meta, għal kwalunkwe raġuni, dan l-organu ma jkunx jista’ jiżgura iktar lil ebda persuna mingħajr Stat ta’ oriġini Palestinjana, li tirrisjedi fis-settur taż-żona ta’ operat ta’ dan l-organu fejn dan l-applikant kellu r-residenza abitwali tiegħu, kundizzjonijiet tal-għajxien dinjitużi jew kundizzjonijiet minimi ta’ sigurtà. Il-punt dwar jekk il-protezzjoni jew l-għajnuna tal-UNRWA għandhiex titqies li waqfet għandu jiġi evalwat fil-mument li fih l-imsemmija persuna mingħajr Stat tkun telqet is-settur taż-żona ta’ operat tal-UNRWA li fih hija kellha r-residenza abitwali tagħha, f’dak li fih l-awtoritajiet amministrattivi kompetenti jagħtu deċiżjoni fuq l-applikazzjoni għal protezzjoni internazzjonali tagħha jew f’dak li fih il-qorti kompetenti tagħti deċiżjoni fuq kull rikors ippreżentat kontra d-deċiżjoni li tiċħad din l-applikazzjoni.