Il-Ġurnal Uffiċjali |
MT Is-serje C |
C/2024/2973 |
24.4.2024 |
Notifika ta’ bidu ta’ investigazzjoni skont l-Istrument ta’ Akkwist Internazzjonali dwar miżuri u prattiki tar-Repubblika tal-Poplu taċ-Ċina fis-suq tal-akkwist pubbliku għal apparat mediku
(C/2024/2973)
Il-Kummissjoni Ewropea (“il-Kummissjoni”) iddeċidiet fuq inizjattiva tagħha stess li tibda, skont l-Artikolu 5(1) tar-Regolament (UE) 2022/1031 tal-Parlament Ewropew u tal-Kunsill tat-23 ta’ Ġunju 2022 dwar l-aċċess ta’ operaturi ekonomiċi, prodotti u servizzi ta’ pajjiżi terzi għas-swieq tal-akkwist pubbliku u tal-konċessjonijiet tal-Unjoni u l-proċeduri li jappoġġaw in-negozjati marbuta mal-aċċess tal-operaturi ekonomiċi, il-prodotti u s-servizzi tal-Unjoni għas-swieq tal-akkwist pubbliku u tal-konċessjoni ta’ pajjiżi terzi (Strument għal Akkwist Internazzjonali – IPI) (1) (“ir-Regolament IPI”), investigazzjoni dwar l-allegati miżuri u prattiki tar-Repubblika tal-Poplu taċ-Ċina (“RPĊ”) li jirriżultaw f’indeboliment serju u rikorrenti tal-aċċess tal-operaturi ekonomiċi, il-prodotti u s-servizzi tal-Unjoni għas-suq tal-akkwist pubbliku tar-RPĊ fejn jidħol apparat mediku (minn hawn ’il quddiem l-“allegati miżuri u prattiki”).
Lista indikattiva tal-kategoriji ta’ apparat mediku affettwat minn dawn il-miżuri u prattiki tinsab fl-anness ta’ dan l-avviż.
1. Deskrizzjoni tal-miżuri u l-prattiki tar-RPĊ
L-allegati miżuri u prattiki, implimentati mir-RPĊ kemm fil-livell ċentrali kif ukoll f’dak lokali, u li japplikaw għall-entitajiet kollha li jakkwistaw apparat mediku, inklużi intrapriżi tal-Istat bħal sptarijiet pubbliċi, jikkonsistu minn:
a) |
Jiġi ffavorit l-akkwist ta’ apparat u servizzi mediċi domestiċi, permezz ta’, fost oħrajn:
|
b) |
Ir-restrizzjoni tal-akkwist ta’ oġġetti importati, inkluż apparat mediku, b’mod partikolari permezz tal-“Miżuri Amministrattivi għall-Akkwist ta’ Oġġetti Importati” (3) li jistabbilixxu regoli aktar stretti għall-akkwist ta’ prodotti importati meta mqabbla mal-akkwist ta’ dawk domestiċi bħal (i) proċedura rigoruża ta’ applikazzjoni-evalwazzjoni-approvazzjoni għall-akkwist ta’ prodotti importati, bl-għan li jiġi vverifikat jekk ikunux jeżistu prodotti domestiċi disponibbli u jekk għandhomx jiġu akkwistati minflok dawk importati; (ii) klawżola obbligatorja dwar is-salvagwardja tal-interessi nazzjonali u l-interessi pubbliċi soċjali li għandha tiġi inkluża b’mod speċifiku fil-kuntratti li jikkonċernaw l-akkwist ta’ oġġetti importati bil-possibbiltà ta’ terminazzjoni tal-kuntratt għal din ir-raġuni u (iii) dispożizzjonijiet espliċiti dwar l-użu ta’ kumpensi fl-akkwist pubbliku ta’ prodotti importati, bħall-għoti ta’ prijorità lill-akkwist ta’ prodotti importati minn fornituri li jkunu ttrasferew it-teknoloġija lil intrapriżi Ċiniżi. |
c) |
L-impożizzjoni ta’ kundizzjonijiet fl-akkwist ċentralizzat tagħha ta’ apparat mediku li jwasslu għal offerti f’livell aktar baxx min-normal b’mod li ma jkunux jistgħu jiġu sostnuti minn kumpaniji orjentati lejn il-profitt. |
Il-Kummissjoni tirriżerva d-dritt li tinvestiga miżuri jew prattiki rilevanti oħra tar-RPĊ li jirriżultaw f’indeboliment serju u rikorrenti tal-aċċess tal-operaturi ekonomiċi, tal-prodotti u tas-servizzi tal-Unjoni għas-suq tal-akkwist pubbliku tar-RPĊ għal apparat mediku li hija ssir taf bihom matul l-investigazzjoni.
2. L-evalwazzjoni preliminari tal-Kummissjoni tal-miżuri u l-prattiki tar-RPĊ
Il-miżuri u l-prattiki restrittivi fuq l-importazzjoni msemmija hawn fuq iqiegħdu fi żvantaġġ sinifikanti u sistemiku lill-operaturi ekonomiċi, il-prodotti u s-servizzi tal-Unjoni peress li dawn jiffavorixxu b’mod sistematiku l-akkwist ta’ prodotti domestiċi għad-dannu ta’ dawk importati jew jagħmlu l-parteċipazzjoni tal-operaturi ekonomiċi tal-Unjoni fl-akkwist soġġetta għal proċeduri diskriminatorji. Billi ma jħallux isir l-akkwist ta’ apparat mediku importat sakemm, fost l-oħrajn, l-apparat li għandu jiġi akkwistat “ ma jkunux disponibbli fit-territorju tar-Repubblika tal-Poplu taċ-Ċina ”, tali restrizzjonijiet u prattiki fuq l-importazzjoni jċaħħdu lill-produtturi tal-Unjoni ta’ apparat mediku mill-opportunitajiet kummerċjali kollha jew sinifikanti fis-suq tal-akkwist pubbliku tar-RPĊ. Dan l-impatt negattiv ikompli jikber meta jiġu stabbiliti miri għall-akkwist domestiku fuq l-awtoritajiet kontraenti. Barra minn hekk, anki meta jingħata aċċess għal tali suq, spiss ikun soġġett għal kundizzjonijiet li jċaħħdu lill-produtturi tal-Unjoni minn opportunità ġusta li jipparteċipaw, bħal fil-każ tal-obbligu li jagħtu aċċess għat-teknoloġiji tagħhom. Fl-aħħar nett, il-prattiki fil-qafas tal-akkwist ċentralizzat ta’ apparat mediku jwasslu lill-offerenti biex jissottomettu offerti f’livell baxx aktar min-normal li ma jkunux jistgħu jiġu sostnuti minn kumpaniji orjentati lejn il-profitt (4). Barra minn hekk, id-dokumenti disponibbli għall-pubbliku jindikaw li l-akkwist ċentralizzat jintuża biex jappoġġa lill-kumpaniji domestiċi (5). Din il-prattika toħloq kompetizzjoni inġusta fis-suq tal-akkwist għal apparat mediku fir-RPĊ u tirriżulta f’esklużjoni fil-prattika ta’ fornituri barranin.
Il-miżuri u l-prattiki ta’ hawn fuq huma jew stabbiliti f’atti leġiżlattivi, regolatorji jew amministrattivi ta’ applikazzjoni ġenerali jew jiġu applikati fil-prattika fuq bażi regolari, b’mod li jkollhom effett rikorrenti.
Għalhekk, il-valutazzjoni preliminari tal-Kummissjoni hija li l-miżuri u l-prattiki ta’ hawn fuq jirriżultaw f’indeboliment serju u rikorrenti kemm de jure kif ukoll de facto tal-aċċess għall-operaturi ekonomiċi, il-prodotti u s-servizzi tal-Unjoni għas-suq tal-akkwist pubbliku għall-apparat mediku fir-RPĊ.
3. Proċedura
Abbażi tal-valutazzjoni preliminari ta’ hawn fuq, il-Kummissjoni b’dan qed tagħti bidu għal investigazzjoni skont l-Artikolu 5(1) tar-Regolament IPI.
L-investigazzjoni se tiddetermina jekk l-allegati miżuri u prattiki fir-RPĊ jeżistux u jirriżultawx f’indeboliment serju u rikorrenti tal-aċċess tal-operaturi ekonomiċi, il-prodotti u s-servizzi tal-Unjoni għas-suq tal-akkwist pubbliku għall-apparati mediċi fir-RPĊ.
F’konformità mal-Artikolu 5(2) tar-Regolament IPI, il-Gvern taċ-Ċina (“GTĊ”) huwa mistieden jissottometti l-fehmiet tiegħu u jipprovdi informazzjoni rilevanti fir-rigward tal-allegati miżuri u prattiki. Il-GTĊ huwa mistieden ukoll jidħol f’konsultazzjonijiet mal-Kummissjoni sabiex jelimina jew jirrimedja l-allegati miżuri u prattiki.
L-Istati Membri u l-partijiet interessati skont it-tifsira tal-Artikolu 2(1)(h) tar-Regolament IPI huma mistiedna jipparteċipaw fl-investigazzjoni u jipprovdu informazzjoni rilevanti, fi żmien 30 jum kalendarju mid-data ta’ din in-Notifika, dwar l-eżistenza u l-effetti tal-miżuri u l-prattiki tar-RPĊ kif ukoll dwar l-interess tal-Unjoni fl-adozzjoni ta’ miżuri IPI. Għal dan l-għan, huma mistiedna jagħmlu użu mid-dokument ta’ gwida online għas-sottomissjoni tal-informazzjoni li wieħed isib fil-portal tal-Aċċess għas-Swieq disponibbli fuq:
https://trade.ec.europa.eu/access-to-markets/en/form-assets/IPI_interested_parties_guidance.pdf
4. Struzzjonijiet biex isiru preżentazzjonijiet bil-miktub u korrispondenza
Il-preżentazzjonijiet kollha bil-miktub, fosthom l-informazzjoni mitluba f’din in-Notifika, u l-korrispondenza pprovduta mir-RPĊ, l-Istat Membri u l-partijiet interessati li għalihom jintalab trattament kunfidenzjali għandhom jiġu mmarkati bħala “ Sensitive” ” (6). Il-partijiet li jippreżentaw informazzjoni matul din l-investigazzjoni huma mistiedna jipprovdu sommarju mhux kunfidenzjali ta’ tali informazzjoni li tista’ tintuża mill-Kummissjoni matul l-investigazzjoni.
L-informazzjoni ppreżentata lill-Kummissjoni għall-fini tal-investigazzjonijiet IPI għandha tkun ħielsa mid-drittijiet tal-awtur. Il-partijiet interessati, qabel ma jippreżentaw lill-Kummissjoni informazzjoni u/jew data li tkun soġġetta għad-drittijiet tal-awtur ta’ terzi persuni, iridu jitolbu permess speċifiku mid-detentur tad-drittijiet li jippermetti b’mod espliċitu li l-Kummissjoni tkun tista’ tuża’ l-informazzjoni u d-data għall-iskop ta’ din l-investigazzjoni IPI.
Is-sottomissjonijiet u t-talbiet kollha għandhom isiru bil-posta elettronika lil TRADE-EU-INTERNATIONAL-PROCUREMENT-INSTRUMENT@ec.europa.eu
L-indirizz tal-Kummissjoni għall-korrispondenza: |
Il-Kummissjoni Ewropea |
Id-Direttorat Ġenerali għall-Kummerċ |
Direttorat E/Unità E4 |
Uffiċċju: CHAR 05/052 |
1049 Bruxelles/Brussel |
BELGIQUE/BELGIË |
5. L-iskeda tal-investigazzjoni
Skont l-Artikolu 5(3) tar-Regolament IPI, l-investigazzjoni għandha tiġi konkluża fi żmien disa’ xhur mid-data tal-pubblikazzjoni ta’ din in-Notifika. F’każijiet ġustifikati, il-Kummissjoni tista’ testendi dan il-perjodu b’ħames xhur billi tippubblika avviż f’Il-Ġurnal Uffiċjali tal-Unjoni Ewropea.
F’konformità mal-Artikolu 5(2) tar-Regolament IPI, il-Kummissjoni għandha tinforma b’mod regolari lill-Istati Membri dwar il-progress tal-investigazzjoni u tal-konsultazzjonijiet fi ħdan il-Kumitat dwar l-Ostakli għall-Kummerċ stabbilit bl-Artikolu 7 tar-Regolament (UE) 2015/1843 (7).
F’konformità mal-Artikolu 5(4) tar-Regolament IPI, mal-konklużjoni tal-investigazzjoni u l-konsultazzjonijiet, il-Kummissjoni għandha tagħmel disponibbli għall-pubbliku rapport li jfiehem is-sejbiet ewlenin tal-investigazzjoni u l-pjan ta’ azzjoni propost. Il-Kummissjoni għandha tippreżenta dak ir-rapport lill-Parlament Ewropew u lill-Kunsill.
6. Estensjoni tal-iskadenzi speċifikati f’din in-Notifika
L-estensjonijiet għal-limiti ta’ żmien previsti f’din in-Notifika jenħtieġ li jiġu rikjesti biss f’ċirkostanzi ta’ eċċezzjoni, u jingħataw biss jekk ikunu debitament ġustifikati meta tingħata ġustifikazzjoni tajba.
7. L-ipproċessar ta’ data personali
Kwalunkwe data personali li tinġabar f’din l-investigazzjoni se tiġi ttrattata f’konformità mar-Regolament (UE) 2018/1725 tal-Parlament Ewropew u tal-Kunsill (8).
(1) ĠU L 173, 30.6.2022, p. 9.
(2) “ Avviż tal-Uffiċċju Ġenerali tal-Kunsill tal-Istat dwar l-Istampar u d-Distribuzzjoni tas-Sommarju tax-Xogħol fl-2014 u l-Kompiti tax-Xogħol Ewlenin fl-2015 dwar l-Approfondiment tar-Riforma tas-Sistema Medika u tas-Saħħa ” Guo Ban Fa [2015] Nru 34
(3) Iċ-Ċirkolari tal-Ministeru tal-Finanzi dwar il-Ħruġ tal-Miżuri għall-Amministrazzjoni tal-Akkwist Pubbliku ta’ Prodotti Importati Caiku [2007] Nru 119
(4) Bħala eżempju, fil-każ ta’ stents koronarji u ġogi artifiċjali tal-irkoppa, l-akkwist ċentralizzat wassal għal tnaqqis medju fil-prezz ta’ 93 % u 82 % rispettivament.
(5) Ittra ta’ Assikurazzjoni Medika [2022] Nru 136, ir-risposta tal-Amministrazzjoni Nazzjonali ta’ Sigurtà Medika għar-risposta tal-Ħames Sessjoni tat-13-il Kungress Nazzjonali tal-Poplu għar-rakkomandazzjoni Nru 8427 http://www.nhsa.gov.cn/art/2022/9/1/art_110_8940.html (aċċessata fit-18 ta’ Marzu 2024), il-Punt 2 “ Iż-żieda fis-sostenn għal apparat mediku domestiku ” issemmi b’mod ċar li l-akkwist ċentralizzat ibbażat fuq il-volumi hija mod ta’ “ sostenn oġġettiv għall-impriżi domestiċi ta’ kwalità għolja li jipproduċu bl-istess kwalità imma b’kost anqas biex jirbħu l-kompetizzjoni ”. Il-punt 3 tad-dokument jistabbilixxi bħala objettiv li “ ssir provvista għall-iżvilupp ta’ intrapriżi domestiċi ta’ kwalità għolja”. Skont dan id-dokument, fl-akkwist ċentralizzat tal-istent koronarju, 6 mit-8 kumpaniji magħżula kienu kumpaniji ffinanzjati domestikament, u fl-akkwist ċentralizzat tal-ġogi artifiċjali tal-irkoppa, 30 minn 44 kienu ffinanzjati domestikament.
(6) Dokument “ Sensitive ” huwa dokument protett skont l-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (ĠU L 145, 31.5.2001, p. 43).
(7) Ir-Regolament (UE) 2015/1843 tal-Parlament Ewropew u tal-Kunsill tas-6 ta’ Ottubru 2015 li jistabbilixxi l-proċeduri tal-Unjoni fil-qasam tal-politika kummerċjali komuni sabiex jiżgura l-eżerċizzju tad-drittijiet tal-Unjoni skont ir-regoli internazzjonali tal-kummerċ, b’mod partikolari dawk stabbiliti taħt l-awspiċji tal-Organizzazzjoni Dinjija tal-Kummerċ (ĠU L 272, 16.10.2015, p. 1).
(8) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).
ANNESS
Kategorija tal-prodott |
Kodiċi SA (1) |
Strumenti u tagħmir użat fis-servizzi mediċi, kirurġiċi, dentali jew veterinarji, |
901811 , 901812 , 901813 , 901814 , 901819 , 901820 , 901831 , 901832 , 901839 , 901841 , 901849 , 901850 and 901890 |
Apparat ta’ terapija mekkanika; apparat għal massaġġi; apparat għat-testijiet tal-kapaċità psikoloġika; terapija bl-ożonu, terapija bl-ossiġnu, terapija bl-ajrusol, apparat ta’ respirazzjoni artifiċjali jew ta’ respirazzjoni terapewtika oħra |
901910 u 901920 |
Apparat ortopediku, inklużi krozzi, ċinturini u rfid kirurġiċi; qassab u apparat ieħor għall-ksur; partijiet artifiċjali tal-ġisem; hearing aids u apparat ieħor li jintlibes jew jinġarr, jew li jiġi impjantat fil-ġisem, biex jagħmel tajjeb għal difett jew diżabbiltà |
902110 , 902121 , 902129 , 902131 , 902139 , 902140 , 902150 u 902190 |
Apparat ibbażat fuq l-użu tar-raġġi-X jew fuq ir-radjazzjonijiet alfa, beta gamma jew jonizzanti oħrajn, kemm jekk għall-użi mediċi, kirurġiċi, dentali jew veterinarji u kemm jekk le, inkluż l-apparat għar-radjografija jew għar-radjoterapija, it-tubi tar-raġġi-X u ġeneraturi oħrajn tar-raġġi-X, il-ġeneraturi ta’ tensjoni għolja, il-panels u d-desks ta’ kontroll, l-iskrins, l-imwejjed, is-siġġijiet u affarijiet simili |
902212 , 902213 , 902214 , 902219 , 902221 , 902229 , 902230 u 902290 |
Għamara għall-mediċina, il-kirurġija, id-dentistrija jew skopijiet veterinarji |
940210 u 940290 |
Sterelizzaturi mediċi, kirurġiċi jew ta’ laboratorju |
841920 |
Vetturi għall-ġarr ta’ persuni b’diżabilita’, immotorizzati jew le jew immexxijin b’mod ieħor mekkaniku |
871310 u 871390 |
Tajjar, garża, faxex u oġġetti simili (pereżempju, infaxxar, stikk li jeħel, ġbajjar), mimlijin jew miksijin b’sustanzi farmaċewtiċi jew ippreżentati f’forom jew f’pakki għal bejgħ bl-imnut għal għanijiet mediċi, kirurġiċi, dentali jew veterinarji. |
300510 u 300590 |
Oġġetti tal-konsum u materjali għall-użu mediku |
300630 , 300640 , 300650 , 300691 , 370110 , 370210 u 401512 |
(1) Edizzjoni tan-Nomenklatura tas-SA 2022.
ELI: http://data.europa.eu/eli/C/2024/2973/oj
ISSN 1977-0987 (electronic edition)