(1)

L-Att ta’ Ġinevra tal-Ftehim ta’ Liżbona dwar id-Denominazzjonijiet ta’ Oriġini u l-Indikazzjonijiet Ġeografiċi (2) (“l-Att ta’ Ġinevra”) huwa ftehim internazzjonali li skontu l-Partijiet Kontraenti jimplimentaw sistema ta’ protezzjoni reċiproka tad-denominazzjonijiet ta’ oriġini u tal-indikazzjonijiet ġeografiċi.

(2)

Wara d-Deċiżjoni tal-Kunsill (UE) 2019/1754 (3) dwar l-adeżjoni tal-Unjoni mal-Att ta’ Ġinevra, l-Unjoni ddepożitat l-istrument tal-adeżjoni mal-Att ta’ Ġinevra fis-26 ta’ Novembru 2019. L-adeżjoni tal-Unjoni mal-Att ta’ Ġinevra daħlet fis-seħħ fis-26 ta’ Frar 2020. Peress li l-Unjoni kienet il-ħames Parti Kontraenti li aderiet mal-Att ta’ Ġinevra, l-Att ta’ Ġinevra daħal fis-seħħ fl-istess data, f’konformità mal-Artikolu 29(2) tal-Att ta’ Ġinevra.

(3)

F’konformità mal-Artikolu 5(1) u (2) tal-Att ta’ Ġinevra, l-Awtoritajiet Kompetenti ta’ kull Parti Kontraenti għall-Att ta’ Ġinevra jistgħu jippreżentaw l-applikazzjonijiet għar-reġistrazzjoni internazzjonali ta’ denominazzjoni ta’ oriġini jew ta’ indikazzjoni ġeografika mal-Bureau Internazzjonali tal-Organizzazzjoni Dinjija tal-Proprjetà Intellettwali, li jirreġistraha fir-Reġistru Internazzjonali. F’konformità mal-Artikolu 9 tal-Att ta’ Ġinevra, il-Partijiet Kontraenti l-oħra jistgħu jiddeċiedu jekk jipproteġux dik id-denominazzjoni ta’ oriġini jew l-indikazzjoni ġeografika fit-territorji tagħhom.

(4)

F’konformità mal-Artikolu 1(2) tar-Regolament (UE) 2019/1753, għall-finijiet ta’ dak ir-Regolament u tal-atti adottati skontu, it-terminu “indikazzjonijiet ġeografiċi” jkopri d-denominazzjonijiet ta’ oriġini protetti u l-indikazzjonijiet ġeografiċi protetti skont it-tifsira tar-Regolament (UE) Nru 1308/2013 tal-Parlament Ewropew u tal-Kunsill (4).

(5)

F’konformità mal-Artikolu 2(1) tar-Regolament (UE) 2019/1753, bħala l-Awtorità Kompetenti tal-Unjoni, il-Kummissjoni għandha s-setgħa li, mal-adeżjoni tal-Unjoni mal-Att ta’ Ġinevra u minn hemm ’il quddiem fuq bażi regolari, tirreġistra l-applikazzjonijiet għar-reġistrazzjoni internazzjonali tad-denominazzjonijiet ta’ oriġini u tal-indikazzjonijiet ġeografiċi tal-Unjoni mal-Bureau Internazzjonali.

(6)

F’Ottubru 2023, f’konformità mal-Artikolu 2(2) tar-Regolament (UE) 2019/1753, l-Italja bagħtet talba lill-Kummissjoni biex fir-Reġistru Internazzjonali tirreġistra d-denominazzjoni ta’ oriġini protetta li toriġina mit-territorju tagħha u li hija protetta f’konformità mar-Regolament (UE) Nru 1308/2013.

(7)

Jenħtieġ li l-ismijiet protetti f’konformità mar-Regolament (UE) Nru 1308/2013 bħala denominazzjonijiet ta’ oriġini protetti (DOP) u indikazzjonijiet ġeografiċi protetti (IĠP) jiġu ppreżentati bħala applikazzjonijiet għar-reġistrazzjoni fir-Reġistru Internazzjonali bħala denominazzjonijiet ta’ oriġini u indikazzjonijiet ġeografiċi rispettivament.

(8)

Għalhekk, jenħtieġ li tiġi stabbilita lista li fiha d-denominazzjoni ta’ oriġini protetta (DOP), ibbażata fuq dik it-talba tal-Italja lill-Kummissjoni biex tiġi ppreżentata l-applikazzjoni għar-reġistrazzjoni internazzjonali ta’ indikazzjoni ġeografika li toriġina mit-territorju tagħha u li hija protetta fl-Unjoni f’konformità mar-Regolament (UE) Nru 1308/2013.

(9)

Il-miżuri previsti f’din id-Deċiżjoni huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli (Inbid),