P9_TA(2023)0344

Dimensjonijiet standardizzati għall-bagalji tal-kabina

Riżoluzzjoni tal-Parlament Ewropew tal-4 ta' Ottubru 2023 dwar dimensjonijiet standardizzati għall-bagalji tal-kabina (2023/2774(RSP))

(C/2024/1182)

Il-Parlament Ewropew,

—	wara li kkunsidra l-Artikoli 24 u 227 tat-Trattat dwar il-Funzjonament tal-Unjoni Ewropea,

—	wara li kkunsidra l-Artikolu 91 u l-Artikolu 100(2) tat-Trattat dwar il-Funzjonament tal-Unjoni Ewropea,

—	wara li kkunsidra r-Regolament (KE) Nru 1008/2008 tal-Parlament Ewropew u tal-Kunsill tal-24 ta’ Settembru 2008 dwar regoli komuni għall-operat ta’ servizzi tal-ajru fil-Komunità (1),

—	wara li kkunsidra r-regoli dwar il-bagalji tal-passiġġieri tal-Assoċjazzjoni Internazzjonali tat-Trasport bl-Ajru (IATA),

—	wara li kkunsidra s-sentenza tal-Qorti tal-Ġustizzja tal-Unjoni Ewropea (QĠUE) tat-18 ta’ Settembru 2014 fil-Kawża C-487/12 (2) (minn hawn ’il quddiem, id-deċiżjoni tal-QĠUE fil-kawża C-487/12),

—	wara li kkunsidra l-Petizzjoni 0837/2019,

—	wara li kkunsidra l-Artikolu 227(2) tar-Regoli ta’ Proċedura tiegħu,

A.	billi l-linji tal-ajru jistabbilixxu b’mod individwali r-regoli għan-numru ta’ biċċiet u d-daqs tal-bagalji tal-kabina tal-vjaġġaturi u kwalunkwe tariffa applikabbli;

B.	billi r-rekwiżiti dwar id-daqs, il-piż u t-tip ta’ bagalji tal-kabina u dawk irreġistrati jvarjaw bejn il-linji tal-ajru; billi d-daqs tal-bagalji jiddependi wkoll mill-mudell tal-inġenju tal-ajru u l-konfigurazzjonijiet tiegħu;

C.	billi r-Regolament (KE) Nru 889/2002 (3), li jimplimenta l-Konvenzjoni ta’ Montreal tal-1999, jinkludi biss dispożizzjonijiet dwar il-ħsara jew it-telf tal-bagalji u kwistjonijiet ta’ responsabbiltà għad-dewmien u mhux dispożizzjonijiet dwar id-daqs tal-bagalji;

D.	billi l-linji tal-ajru kollha għandu jkollhom mill-inqas dimensjoni standard komuni minima għall-bagalji tal-kabina;

billi l-komunikazzjoni tal-Kummissjoni tad-9 ta’ Diċembru 2020 bit-titolu “Strateġija għal Mobbiltà Sostenibbli u Intelliġenti – inqiegħdu t-trasport Ewropew fit-triq it-tajba għall-futur” (COM(2020)0789) tinkludi azzjonijiet biex jiġi rieżaminat ir-Regolament (KE) Nru 1008/2008, kif ukoll biex jiġi rieżaminat il-qafas regolatorju tad-drittijiet tal-passiġġieri u l-Kodiċi ta’ Kondotta għal sistemi ta’ riżervazzjoni kompjuterizzata;

Itenni l-appoġġ tiegħu biex tiġi żgurata t-tlestija tal-leġiżlazzjoni tal-UE dwar id-drittijiet tal-passiġġieri tal-ajru bil-għan li jiżdiedu l-istandards ta’ protezzjoni u ta’ informazzjoni għall-passiġġieri, jissaħħu d-drittijiet tagħhom u jiġi żgurat li t-trasportaturi tal-ajru joperaw skont kundizzjonijiet armonizzati f’suq liberalizzat, u b’hekk tiġi ffaċilitata l-esperjenza tal-ivvjaġġar;

Ifakkar li, f’konformità mad-deċiżjoni tal-QĠUE (4) fil-Kawża C-487/12, il-bagalji tal-idejn (jiġifieri bagalji li ma jiġux irreġistrati) iridu jitqiesu li jikkostitwixxu “aspett meħtieġ” tat-trasport tal-passiġġieri bil-kundizzjoni li tali bagalji jissodisfaw “rekwiżiti raġonevoli” f’termini tal-piż u d-dimensjonijiet tagħhom, u li l-ġarr tagħhom ma jistax, għalhekk, ikun soġġett għal suppliment tal-prezz; iħeġġeġ lill-Istati Membri, għalhekk, jiżguraw li din id-deċiżjoni tiġi rispettata, u, sadanittant, jistinkaw għat-trasparenza fir-rigward tal-iżvelar ta’ kwalunkwe tariffa imposta għall-bagalji tal-kabina, kull meta tiġi pprovduta informazzjoni dwar il-prezz u l-iskeda ta’ titjira, sabiex tissaħħaħ il-protezzjoni tal-konsumatur;

Jirrimarka li l-linji tal-ajru madwar id-dinja għandhom politiki u restrizzjonijiet differenti fir-rigward tad-daqs u l-piż tal-bagalji tal-idejn li l-passiġġieri jistgħu jtellgħu abbord, u dan spiss iwassal għal konfużjoni, inkonvenjent, esperjenzi ta’ vvjaġġar inqas komdi, dewmien u xi drabi tilwim bejn il-passiġġieri u l-persunal tal-linji tal-ajru;

Jirrikonoxxi li t-tħassib primarju għall-passiġġieri huwa l-politiki inkonsistenti fir-rigward tal-allowances tal-bagalji tal-idejn bejn linji tal-ajru differenti, li jistgħu jitqiesu bħala prattika abbużiva jew inġusta u li hija ta’ sfida għall-vjaġġaturi li ta’ spiss itiru ma’ linji tal-ajru differenti jew jieħdu titjiriet ta’ konnessjoni ma’ trasportaturi differenti, kif ukoll il-fatt li mhux it-trasportaturi kollha jikkonformaw mad-deċiżjoni tal-QĠUE fil-kawża C-487/12;

Jinnota li d-differenzi fir-regoli tal-linji tal-ajru dwar id-daqs tal-bagalji tal-kabina u dawk irreġistrati u t-tariffi imposti fuq il-passiġġieri joħolqu kostijiet moħbija meta passiġġier juża s-servizzi ta’ linji tal-ajru differenti jew ikollu jibdel il-linji tal-ajru għal raġunijiet mhux previsti jew prattiċi;

Ifakkar li l-“libertà tal-ipprezzar” tat-trasportaturi tal-ajru fir-rigward tan-nollijiet tal-ajru u r-rati tal-ajru, rikonoxxuta fl-Artikolu 22 tar-Regolament (KE) Nru 1008/2008, ma tinkludix l-ipprezzar tal-bagalji tal-idejn;

Iqis li l-kostijiet moħbija u addizzjonali jillimitaw il-possibbiltà li jitqabblu l-offerti li jsiru minn linji tal-ajru differenti, li konsegwentement jillimita l-kapaċità tal-passiġġier li jagħmel għażla infurmata dwar l-aħjar offerta;

Jinnota li l-verifiki fuq il-post tad-dimensjonijiet tal-bagalji tal-kabina mwettqa mill-impjegati tal-linji tal-ajru, li xi drabi japplikaw ir-regoli b’mod diskrezzjonali u arbitrarju, juru li hemm fluss eċċessiv ta’ allowances ta’ daqs differenti;

Jemmen li l-armonizzazzjoni madwar l-UE kollha tar-rekwiżiti dwar id-daqs, il-piż u t-tip ta’ bagalji tal-kabina u dawk irreġistrati għal-linji tal-ajru kollha li joperaw fl-Unjoni Ewropea ttejjeb it-trasparenza u l-protezzjoni tal-konsumatur għall-vjaġġaturi bl-ajru kollha;

10.

Jinnota li anki meta jivvjaġġaw b’annimali domestiċi żgħar fil-kabina bħala bagalji tal-kabina, id-dimensjonijiet permessi tal-basktijiet tal-ivvjaġġar jew tat-trasportaturi jvarjaw xi ftit bejn linji tal-ajru differenti, u dan jikkawża inkonvenjenzi simili;

11.

Jieħu nota tal-proċess ta’ rieżami tar-Regolament (KE) Nru 1008/2008;

12.

Iħeġġeġ lill-Kummissjoni tippreżenta miżuri ta’ politika konkreti biex tintegra d-deċiżjoni tal-QĠUE fil-kawża C-487/12, fejn il-bagalji tal-kabina ma jridux ikunu soġġetti għal suppliment tal-prezz, u jisħaq fuq il-ħtieġa li jiġu deskritti l-kamp ta’ applikazzjoni u r-rekwiżiti speċifiċi tal-piż u d-dimensjonijiet “raġonevoli” tal-bagalji tal-kabina, u li tiġi indirizzata l-kumplessità tal-istandards tal-linji tal-ajru għall-bagalji fil-kuntest tar-reviżjoni tar-Regolament (KE) Nru 1008/2008;

13.

Jistieden lill-Kummissjoni tinkludi fir-rieżami tagħha tar-Regolament (KE) Nru 1008/2008 proposti biex jiġu indirizzati kwistjonijiet li jwasslu għal kostijiet moħbija, bħall-allokazzjoni ta’ postijiet jew il-kumplessità tal-offerti tal-linji tal-ajru fir-rigward tal-politika dwar il-bagalji tagħhom, bil-għan li tiġi rregolata l-kompożizzjoni tal-prezz finali;

14.

Jagħti istruzzjonijiet lill-President tiegħu biex tgħaddi din ir-riżoluzzjoni lill-Kummissjoni, lill-Kunsill u lill-gvernijiet u lill-parlamenti tal-Istati Membri.

(1) ĠU L 293, 31.10.2008, p. 3.

(2) Sentenza tal-Qorti tal-Ġustizzja (Il-Ħames Awla) tat-18 ta’ Settembru 2014, Vueling Airlines SA vs Instituto Galego de Consumo de la Xunta de Galicia, C-487/12, ECLI:EU:C:2014:2232.

(3) Ir-Regolament (KE) Nru 889/2002 tal-Parlament Ewropew u tal-Kunsill tat-13 ta’ Mejju 2002 li jemenda r-Regolament tal-Kunsill (KE) Nru 2027/97 dwar ir-responsabbiltà ta’ trasportaturi bl-ajru fl-eventwalità ta’ inċidenti (ĠU L 140, 30.5.2002, p. 2).

(4) https://eur-lex.europa.eu/legal-content/MT/TXT/?uri=CELEX%3A62012CJ0487.