1.   INTRODUZZJONI

(1)

Id-Deċiżjoni tirrigwarda ksur uniku u kontinwu skont l-Artikolu 101(1) tat-Trattat dwar il-Funzjonament tal-Unjoni Ewropea u l-Artikolu 53(1) tal-Ftehim ŻEE. Il-ksur kien jikkonsisti fit-tqassim tas-suq b’rabta mal-bejgħ ta’ granati tal-idejn militari (“granati tal-idejn”) fiż-Żona Ekonomika Ewropea (“ŻEE”).

(2)

Id-Deċiżjoni hija indirizzata lill-entitajiet legali li ġejjin (imsejħin kollettivament “destinatarji” jew individwalment “destinatarju”): SwissP Defence AG u RUAG International Holding AG (flimkien “RUAG”), u Diehl Defence GmbH & Co. KG u Diehl Stiftung & Co. KG (flimkien “Diehl”).

2.   DESKRIZZJONI TAL-KAŻ

2.1.   Proċedura

(3)

Wara applikazzjoni għal immunità minn RUAG fil-15 ta’ April 2021, il-Kummissjoni wettqet spezzjoni għal għarrieda fil-bini ta’ Diehl bejn it-23 ta’ Novembru u l-25 ta’ Novembru 2021.

(4)

Fl-24 ta’ Frar 2022, Diehl applikat għall-immunità jew, b’mod alternattiv, għat-tnaqqis tal-multi.

(5)

Fit-18 ta’ Jannar 2023, il-Kummissjoni nediet proċedimenti skont l-Artikolu 11(6) tar-Regolament (KE) Nru 1/2003 (2) kontra d-destinatarji tad-Deċiżjoni bil-għan li tiddiskuti magħhom riżolviment fil-qafas tal-Avviż ta’ Riżolviment (3). Id-diskussjonijiet dwar ir-riżoluzzjoni mad-destinatarji saru bejn Frar u Mejju 2023. Kull destinatarju mbagħad ppreżenta t-talba formali ta’ riżolviment skont l-Artikolu 10a(2) tar-Regolament (KE) Nru 773/2004 (4).

(6)

Fit-3 ta’ Lulju 2023, il-Kummissjoni adottat dikjarazzjoni ta’ oġġezzjonijiet indirizzata lid-destinatarji. Id-destinatarji wieġbu għad-dikjarazzjoni ta’ oġġezzjonijiet u kkonfermaw li kienet tikkorrispondi mal-kontenut tas-sottomissjonijiet tagħhom ta’ riżolviment u li huma baqgħu impenjati li jsegwu l-proċedura tar-riżolviment.

(7)

Il-Kumitat Konsultattiv fil-qasam tal-prattiċi restrittivi u pożizzjonijiet dominanti ħareġ opinjoni favorevoli fit-18 ta’ Settembru 2023.

(8)

Fit-18 ta’ Settembru 2023, l-Uffiċjal tas-Seduta ħareġ rapport finali f’dan il-każ.

(9)

Il-Kummissjoni adottat id-Deċiżjoni fil-21 ta’ Settembru 2023.

2.2.   Sommarju tal-ksur

(10)

Id-Deċiżjoni tirrigwarda ksur relatat mal-bejgħ ta’ granati tal-idejn.

(11)

L-aġir kien jikkonsisti fl-allokazzjoni tas-swieq nazzjonali bejn id-destinatarji tal-bejgħ ta’ granati tal-idejn. Dan kien jinkludi wkoll l-iskambju ta’ informazzjoni sensittiva mill-perspettiva tal-kompetizzjoni. Wara l-allokazzjoni tas-swieq nazzjonali, id-destinatarju ddeżinjat biss kien intitolat li jbigħ granati tal-idejn fis-suq nazzjonali kkonċernat. Jekk wieħed mid-destinatarji kellu l-intenzjoni li jbigħ il-granati tal-idejn tiegħu fis-suq nazzjonali allokat lid-destinatarju l-ieħor, huwa kellu jitlob il-kunsens ta’ dan tal-aħħar minn qabel.

(12)

L-allokazzjoni tas-suq kienet tikkonċerna kemm il-bejgħ permezz ta’ offerti kif ukoll ir-risposti għal talbiet diretti ta’ offerta mill-awtoritajiet nazzjonali.

(13)

Il-ksur kopert mid-Deċiżjoni kien mifrux fiż-ŻEE kollha u dam mis-7 ta’ Novembru 2007 sat-23 ta’ Novembru 2021.

2.3.   Destinatarji u durata

(14)

Id-destinatarji tad-Deċiżjoni jinżammu responsabbli għall-ksur għad-durati li ġejjin: Destinatarji Durata SwissP Defence AG (għall-parteċipazzjoni diretta tagħha) u RUAG International Holding AG (bħala l-kumpanija omm ta’ SwissP Defence AG, preċedentement RUAG Ammotec AG (5)) is-7 ta’ Novembru 2007 – il-15 ta’ April 2021 Diehl Defence GmbH & Co. KG (għall-parteċipazzjoni diretta tagħha) u Diehl Stiftung & Co. KG (bħala l-kumpanija omm ta’ Diehl Defence GmbH & Co. KG) is-7 ta’ Novembru 2007 – it-23 ta’ Novembru 2021

2.4.   Rimedji

(15)

Id-Deċiżjoni tapplika l-Linji Gwida dwar il-Multi tal-2006 (6).

2.4.1.   Ammont bażiku tal-multa

(16)

Fl-iffissar tal-multi, il-Kummissjoni ħadet inkunsiderazzjoni l-medja annwali tal-bejgħ ta’ granati tal-idejn minn kull destinatarju fi ħdan iż-ŻEE matul il-perjodu kollu tal-ksur, il-fatt li l-akkordji huma, min-natura tagħhom stess, fost ir-restrizzjonijiet tal-kompetizzjoni l-iktar dannużi, it-tul tal-ksur, il-fatt li l-ksur kien ikopri ż-ŻEE u ammont addizzjonali li jiskoraġġixxi lill-impriżi milli jidħlu f’tali prattiki.

2.4.2.   Aġġustamenti għall-ammont bażiku

(17)

Il-Kummissjoni ma applikat l-ebda ċirkostanza aggravanti jew mitiganti.

2.4.3.   Punt 37 fil-Linji Gwida tal-2006 dwar il-Multi

(18)

Sabiex tikseb effett dissważiv suffiċjenti, il-Kummissjoni applikat, skont il-punt 37 tal-Linji Gwida tal-2006 dwar il-Multi, żieda fl-ammont tal-multa b’fattur ta’ multiplikazzjoni ta’ 3,75 għaż-żewġ destinatarji. Dan wassal għal multa li hija dissważiva u proporzjonata biżżejjed, meta wieħed iqis kemm is-saħħa ekonomika tal-partijiet u l-ispeċifiċitajiet tal-ksur kif ukoll ir-rwol ta’ kull wieħed mid-destinatarji fil-ksur.

2.4.4.   Applikazzjoni tal-limitu tal-fatturat ta’ 10 %

(19)

Il-multi imposti (qabel l-applikazzjoni tat-tnaqqis b’rabta mal-klemenza u r-riżolviment) ma kinux jaqbżu l-10 % tal-fatturat dinji totali tagħhom fis-sena kummerċjali ta’ qabel id-data tad-Deċiżjoni.

2.4.5.   Applikazzjoni tal-Avviż ta’ Klemenza tal-2006

(20)

Il-Kummissjoni tat lil RUAG immunità sħiħa mill-multi. Il-Kummissjoni tat lil Diehl tnaqqis ta’ 50 % tal-multa tagħha.

2.4.6.   Applikazzjoni tal-Avviż ta’ Riżolviment

(21)

B’riżultat tal-applikazzjoni tan-Notifika ta’ Riżolviment, l-ammont tal-multi tnaqqas b’10 % oħra.

3.   KONKLUŻJONI

(22)

Il-multi li ġejjin ġew imposti skont l-Artikolu 23(2) tar-Regolament (KE) Nru 1/2003: (a) SwissP Defence AG (li qabel kienet RUAG Ammotec AG) u RUAG International Holding AG, b’mod konġunt u in solidum: EUR 0 (b) Diehl Defence GmbH & Co. KG (li qabel kienet Diehl BGT Defence GmbH & Co. KG) u Diehl Stiftung & Co. KG, b’mod konġunt u in solidum: EUR 1 200 000.

---

(1)   ĠU L 1, 4.1.2003, p. 1.

(2)  Ir-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (ĠU L 1, 4.1.2003, p. 1).

(3)  L-Avviż tal-Kummissjoni dwar il-mod ta’ proċedimenti ta’ riżolviment ta’ tilwim bil-għan li jiġu adottati Deċiżjonijiet skont l-Artikolu 7 u l-Artikolu 23 tar-Regolament tal-Kunsill (KE) Nru 1/2003 fil-każijiet tal-kartelli (ĠU C 167, 2.7.2008, p. 1).

(4)  Ir-Regolament tal-Kummissjoni (KE) numru 773/2004 tas-7 ta’ April 2004 dwar it-tmexxija ta’ proċeduri mill-Kummissjoni skont l-Artikolu 81 sa 82 tat-Trattat tal-KE (ĠU L 123, 27.4.2004, p. 18). Ir-Regolament kif emendat bir-Regolament tal-Kummissjoni (KE) Nru 622/2008 (ĠU L 171, 1.7.2008, p. 3) u r-Regolament tal-Kummissjoni (UE) 2015/1348 (ĠU L 208, 5.8.2015, p. 3).

(5)  F’Lulju 2022, RUAG Ammotec AG ġiet akkwistata minn kumpanija oħra u ngħatat l-isem ġdid ta’ SwissP Defence AG.

(6)  Il-Linji Gwida dwar il-metodu ta’ kif jiġu stabbiliti l-multi imposti skont l-Artikolu 23(2)(a) tar-Regolament (KE) Nru 1/2003 (ĠU C 210, 1.9.2006, p. 2).