Fil-5.9.2023, il-Kummissjoni adottat deċiżjoni skont l-Artikolu 3 tar-Regolament (UE) 2022/1925 tal-Parlament Ewropew u tal-Kunsill  (1) . F’konformità mad-dispożizzjonijiet tal-Artikolu 44 tar-Regolament (UE) 2022/1925, il-Kummissjoni qiegħda hawnhekk tippubblika l-ismijiet tal-partijiet u l-kontenut ewlieni tad-Deċiżjoni, wara li qieset l-interess leġittimu tal-impriżi fil-protezzjoni tas-sigrieti kummerċjali tagħhom.

1.   INTRODUZZJONI

(1)

L-għan tad-Deċiżjoni tad-Deżinjazzjoni (“id-Deċiżjoni”) huwa li taħtar lil Meta bħala gwardjan skont l-Artikolu 3 tar-Regolament (UE) 2022/1925 (“DMA”) u li telenka s-servizzi ewlenin ta’ pjattaforma rilevanti li huma pprovduti minn Meta u li individwalment huma gateway importanti għall-utenti kummerċjali biex jilħqu lill-utenti finali kif imsemmi fl-Artikolu 3(1)(b) tad-DMA.

(2)

Barra minn hekk, Meta ssottomettiet konfutazzjoni skont l-Artikolu 3(5) tad-DMA bin-notifika tagħha fir-rigward ta’ (i) is-servizz ta’ komunikazzjoni interpersonali indipendenti min-numri tagħha (“NIICS”) Messenger, u (ii) is-servizzi ta’ intermedjazzjoni online tagħha Marketplace. Fid-deċiżjoni, il-Kummissjoni tirrifjuta l-argumenti ta’ konfutazzjoni fiż-żewġ każijiet minħabba li ma humiex issostanzjati biżżejjed biex iqajmu dubju ċar dwar il-preżunzjonijiet fl-Artikolu 3(2) tad-DMA għar-raġunijiet miġbura fil-qosor fil-valutazzjoni tal-Kummissjoni hawn taħt.

2.   PROĊEDURA

(3)

Fit-3 ta’ Lulju 2023, Meta nnotifikat lill-Kummissjoni, skont l-Artikolu 3(3), l-ewwel subparagrafu tad-DMA, li hija tissodisfa l-limiti stabbiliti fl-Artikolu 3(2) ta’ dak ir-Regolament fir-rigward tas-servizzi ewlenin ta’ pjattaforma (“CPSs”) li ġejjin: (i) is-servizz uniku tagħha tan-networking soċjali online sostnut minn reklamar online li jinkludi, fil-fehma ta’ Meta, Facebook, Instagram, Meta Ads, Messenger, Marketplace, Facebook Dating u Facebook Gaming Play; u (ii) l-NIICS tagħha, WhatsApp.

(4)

Fis-6 ta’ Lulju 2023, il-Kummissjoni bagħtet lil Meta talba għal informazzjoni skont l-Artikolu 21(3) tad-DMA. L-informazzjoni mitluba kienet meħtieġa biex il-Kummissjoni tivvaluta jekk Marketplace u Messenger humiex CPSs distinti li jissodisfaw individwalment il-limiti fl-Artikolu 3(2) tad-DMA. Meta ssottomettiet it-tweġiba tagħha fit-11 ta’ Lulju 2023.

(5)

Fl-10 ta’ Lulju 2023, il-Kummissjoni bagħtet lil Meta talba għall-informazzjoni, datata s-7 ta’ Lulju, skont l-Artikolu 21(2) tad-DMA, dwar Messenger. Meta ssottomettiet it-tweġiba tagħha fit-12 ta’ Lulju 2023 u fis-16 ta’ Lulju 2023.

(6)

Fis-26 ta’ Lulju 2023, il-Kummissjoni bagħtet lil Meta ittra dwar in-notifika ta’ Meta (l-“Ittra”). F’din l-Ittra, il-Kummissjoni kienet tal-fehma preliminari li għandha taħtar, skont l-Artikolu 3(4) tad-DMA, lil Meta bħala gwardjan fir-rigward ta’: (i) is-servizz ta’ networking soċjali online tagħha Facebook; (ii) is-servizz ta’ networking soċjali online tagħha Instagram; (iii) is-servizz tar-reklamar online tagħha Meta Ads; (iv) l-NIICS tagħha WhatsApp; (v) l-NIICS tagħha Messenger u (vi) is-servizzi tal-intermedjazzjoni online tagħha Marketplace.

(7)

Fit-3 ta’ Awwissu 2023, Meta bagħtet tweġiba għall-Ittra tal-Kummissjoni li tikkontesta l-fehmiet preliminari tal-Kummissjoni u żammet il-pożizzjoni tagħha u fit-13 ta’ Awwissu 2023 bagħtet ittra addizzjonali.

3.   QAFAS LEGALI

(8)

Id-DMA jistabbilixxi sett ta’ kriterji oġġettivi ddefiniti b’mod strett biex pjattaforma online kbira tikkwalifika bħala gatekeeper. Id-deżinjazzjoni għandha ssir b’rabta ma’ CPS wieħed jew aktar ipprovduti mill-impriża li jkunu gateway importanti biex l-utenti kummerċjali jilħqu lill-utenti finali skont it-tifsira tal-Artikolu 3(1)(b) tad-DMA. Sabiex jiġi ddeterminat jekk servizz ipprovdut minn impriża jkunx CPS li jissodisfa r-rekwiżit stabbilit fl-Artikolu 3(1)(b) tad-DMA, huwa meħtieġ, bħala pass preliminari, li s-servizz rispettiv jiġi kkwalifikat u ddelinjat. Kriterju rilevanti għall-kwalifikazzjoni u d-delinjazzjoni tas-CPSs huwa l-iskop li għalih jintuża s-servizz mill-utenti finali jew mill-utenti kummerċjali jew mit-tnejn li huma.

(9)

Skont l-Artikolu 3(1) tad-DMA, il-Kummissjoni għandha taħtar impriża bħala gatekeeper jekk din tissodisfa tliet rekwiżiti kumulattivi, jiġifieri: (a) ikollha impatt sinifikanti fuq is-suq intern; (b) tipprovdi CPS li jkun gateway importanti għall-utenti kummerċjali biex jilħqu lill-utenti finali; u (c) tkun tgawdi minn pożizzjoni stabbilita u dejjiema, fl-operazzjonijiet tagħha, jew ikun prevedibbli li fil-futur qrib se tgawdi din il-pożizzjoni. L-Artikolu 3(2) tad-DMA jistabbilixxi preżunzjoni li dawk ir-rekwiżiti jiġu ssodisfati meta jiġu ssodisfati ċerti limiti kwantitattivi, jiġifieri l-fatturat tal-kumpanija jew il-kapitalizzazzjoni tas-suq kif ukoll l-għadd ta’ utenti finali u utenti kummerċjali ta’ CPS partikolari f’kull waħda mill-aħħar 3 snin finanzjarji.

(10)

Skont l-Artikolu 3(5), l-ewwel subparagrafu tad-DMA, impriża li tissodisfa l-limiti kollha stabbiliti fl-Artikolu 3(2) tad-DMA tista’ tippreżenta, man-notifika tagħha, argumenti biex turi li, għalkemm tissodisfa dawk il-limiti kollha, b’eċċezzjoni hija ma tkunx tissodisfa r-rekwiżiti stabbiliti fl-Artikolu 3(1) tad-DMA minħabba ċ-ċirkostanzi li fihom jopera s-CPS rilevanti. L-Artikolu 3(5), it-tieni subparagrafu tad-DMA jipprovdi li jekk l-argumenti ppreżentati ma jkunux issostanzjati biżżejjed minħabba li ma jikkontestawx b’mod ċar il-preżunzjonijiet stabbiliti fl-Artikolu 3(2) tad-DMA, il-Kummissjoni tista’ tiċħad l-argumenti. Min-naħa l-oħra, f’każ li l-Kummissjoni tqis li l-evidenza ppreżentata hija biżżejjed biex turi li r-rekwiżiti stabbiliti fl-Artikolu 3(1) tad-DMA ma humiex issodisfati, hija tista’ taċċetta l-prova kontrarja bil-ftuħ ta’ investigazzjoni tas-suq jew mingħajrha skont l-Artikolu 17(3) tad-DMA.

4.   VALUTAZZJONI TAL-KUMMISSJONI

(11)

Wara n-notifika minn Meta, il-Kummissjoni stabbiliet li s-servizzi notifikati li ġejjin jikkostitwixxu CPSs skont l-Artikolu 2 tad-DMA u huma individwalment gateway importanti għall-utenti kummerċjali biex jilħqu lill-utenti finali kif imsemmi fl-Artikolu 3(1)(b) tad-DMA: a. Is-servizz ta’ networking soċjali online ta’ Meta, Facebook; b. Is-servizz ta’ networking soċjali online ta’ Meta, Instagram; c. Is-servizz ta’ reklamar online ta’ Meta, Meta Ads; d. L-NIICS ta’ Meta, WhatsApp; e. Is-servizz ta’ NIICS ta’ Meta, Messenger; u f. Is-servizzi tal-intermedjazzjoni online ta’ Meta, Marketplace.

(12)

Fir-rigward tas-servizzi ta’ networking soċjali online ta’ Meta, Facebook u Instagram, b’differenza mill-fehma ta’ Meta, il-Kummissjoni tqis li Facebook jikkostitwixxi CPS ta’ networking soċjali online li huwa distint mis-servizz ta’ networking soċjali online Instagram minħabba li dawn is-servizzi (i) huma offruti bħala servizzi kompletament distinti; (ii) ma jiġux offruti lill-utenti b’mod integrat, u fi kwalunkwe każ, (iii) jintużaw għal skopijiet differenti mill-utenti finali tagħhom u mill-utenti kummerċjali tagħhom, peress li dawn l-utenti għandhom it-tendenza li jaqsmu u jinteraġixxu ma’ tipi differenti ta’ kontenut, funzjonalitajiet u bażijiet tal-utenti fuq iż-żewġ pjattaformi.

(13)

Barra minn hekk, il-Kummissjoni tqis li, b’differenza mill-fehma ta’ Meta, Facebook Dating u Facebook Gaming Play, li huma integrati fil-pjattaforma ta’ Facebook, jikkostitwixxu servizzi distinti mis-servizz ta’ networking soċjali online Facebook, irrispettivament minn jekk dawn is-servizzi jikkostitwixxux CPSs. Il-Kummissjoni tqis li dawn is-servizzi kollha għandhom skop li huwa distint minn dak tas-servizz tan-networking soċjali online Facebook u li jiġu offruti minn Meta bħala servizzi identifikabbli u distinti b’mod ċar minn dak tas-servizz tan-networking soċjali online Facebook.

(14)

Fir-rigward tas-servizz tar-reklamar online ta’ Meta, Meta Ads, il-Kummissjoni ma taqbilx man-notifika ta’ Meta. Skont Meta, is-servizz tan-networking soċjali online appoġġat b’mod ad hoc jinkludi l-karatteristiċi u l-funzjonalitajiet li jiffurmaw l-uċuħ ta’ Facebook u ta’ Instagram, li huma appoġġati mid-dħul iġġenerat permezz ta’ Meta Ads.

(15)

Il-Kummissjoni tqis li s-servizzi ta’ reklamar online u s-servizzi ta’ networking soċjali online ta’ Meta joffru karatteristiċi u funzjonalitajiet differenti ħafna u jservu skopijiet differenti ħafna mill-perspettiva kemm tal-utenti finali kif ukoll tal-utenti kummerċjali. Barra minn hekk, l-Anness għad-DMA jiċċara li s-CPSs offruti b’mod integrat għandhom jitqiesu distinti jekk ma jkunux jappartjenu għall-istess kategorija tas-CPS. Għalhekk, il-Kummissjoni tikkonkludi li Meta Ads tikkostitwixxi CPS tar-reklamar online distint skont it-tifsira tal-Artikolu 2(2)(j) tad-DMA u li Meta Ads tissodisfa l-limiti stabbiliti fl-Artikolu 3(2) tad-DMA.

(16)

Il-Kummissjoni taqbel mad-delinjazzjoni tal-NIICS ta’ Meta, WhatsApp. Abbażi tal-informazzjoni pprovduta minn Meta, il-Kummissjoni ssib li l-limitu tal-utenti kummerċjali huwa ssodisfat ukoll fir-rigward ta’ WhatsApp, meta jitqiesu d-diversi modi li Meta tipprovdi lin-negozji biex jikkomunikaw permezz ta’ WhatsApp.

(17)

Fir-rigward tal-NIICS ta’ Meta, Messenger, il-Kummissjoni tqis, b’differenza minn dak li ssostni Meta, li Messenger huwa servizz distint u awtonomu mis-servizz tan-networking soċjali online tagħha Facebook. Il-Kummissjoni tqis li Messenger jissodisfa d-definizzjoni ta’ NIICS stabbilita fl-Artikolu 2(7) tal-Kodiċi tal-Komunikazzjoni Elettronika li għaliha tirreferi d-definizzjoni ta’ NIICS stabbilita fl-Artikolu 2(9) tad-DMA.

(18)

Barra minn hekk, id-Deċiżjoni tqis li t-test legali propost minn Meta biex jiġi vvalutat jekk Messenger huwiex CPS indipendenti jew il-funzjoni ta’ chat tas-servizz tan-netwerking soċjali online tagħha Facebook huwa legalment żbaljat.

(19)

Barra minn hekk, il-Kummissjoni tqis li Messenger jissodisfa l-limiti li jinsabu fl-Artikolu 3(2) tad-DMA. B’mod aktar speċifiku, fir-rigward tal-utenti kummerċjali, abbażi tal-informazzjoni pprovduta minn Meta u minkejja n-nuqqasijiet fil-metodoloġija tagħha, il-Kummissjoni tinnota li ċ-ċifra pprovduta minn Meta għal Settembru 2020 biss turi li l-ammont ta’ utenti kummerċjali huwa ogħla mil-limitu ta’ 10 000. Abbażi tal-estrapolazzjoni ta’ dik iċ-ċifra għall-2020, l-2021 u l-2022, il-Kummissjoni ssib għalhekk li l-limitu huwa ssodisfat.

(20)

Fl-aħħar nett, il-Kummissjoni ssib li l-argumenti sottomessi minn Meta fir-rigward ta’ Messenger ma humiex sostanzjati biżżejjed biex iqajmu dubji ċari dwar il-preżunzjonijiet fl-Artikolu 3(2) tad-DMA. B’mod partikolari, il-Kummissjoni tqis li l-għadd ta’ utenti kummerċjali attivi fis-sena ta’ Messenger jaqbeż b’mod sinifikanti l-limitu ta’ 10 000 utent kummerċjali, u Meta naqset milli tipproduċi evidenza konvinċenti li anke b’tali marġni, is-CPS inkwistjoni ma huwiex gateway għall-utenti kummerċjali biex jilħqu lill-utenti finali. Barra minn hekk, il-Kummissjoni ma taqbilx ma’ Meta li Messenger ma huwiex gateway importanti peress li d-data pprovduta minn Meta dwar kemm l-utenti kummerċjali kif ukoll dwar l-utenti finali tistabbilixxi b’mod ċar l-iskala importanti ta’ Messenger fir-rigward kemm tal-utenti finali kif ukoll tal-utenti kummerċjali, u bħala gateway importanti bejniethom it-tnejn.

(21)

Fir-rigward tas- servizzi ta’ intermedjazzjoni online ta’ Meta, Marketplace, il-Kummissjoni tqis li, b’differenza minn dak li ssostni Meta, Marketplace, minkejja li huwa integrat f’Facebook, huwa servizz distint mis-servizz tan-networking soċjali online Facebook. Fil-fatt, Facebook jippermetti lill-utenti finali tiegħu jikkonnettjaw u jikkomunikaw ma’ xulxin, jaqsmu l-kontenut u jsibu utenti u kontenut oħrajn, filwaqt li Marketplace jippermetti lill-utenti, inklużi l-utenti kummerċjali, jelenkaw oġġetti jew servizzi għal utenti oħra, bil-għan li jiffaċilitaw il-bidu ta’ tranżazzjonijiet diretti bejn dawk l-utenti.

(22)

Barra minn hekk, b’nuqqas ta’ qbil mal-fehmiet ta’ Meta, il-Kummissjoni tqis li Marketplace jissodisfa d-definizzjoni tas-servizzi ta’ intermedjazzjoni online msemmija fl-Artikolu 2(5) tad-DMA. Marketplace ma huwiex esklussivament pjattaforma mill-konsumatur għall-konsumatur (C2C), iżda għandu wkoll utenti kummerċjali, u tali konklużjoni ma hijiex affettwata mill-fatt li Marketplace jippermetti wkoll tranżazzjonijiet C2C. Matul il-perjodu mill-2020 sal-2022, l-utenti kummerċjali setgħu, b’mod leġittimu, jelenkaw il-prodott jew is-servizzi tagħhom f’Marketplace permezz tal-Paġna tan-negozju tagħhom fuq Facebook. Barra minn hekk, matul dak l-istess perjodu 2020–2022, l-utenti kummerċjali setgħu jaġixxu wkoll f’kapaċità kummerċjali jew professjonali billi jelenkaw prodotti u servizzi għall-utenti finali f’Marketplace permezz tal-profil personali tagħhom fuq Facebook. Minkejja li, mit-30 ta’ Jannar 2023 ’il quddiem, l-utenti kummerċjali ma għadhomx jistgħu jelenkaw oġġetti għall-bejgħ permezz tal-Paġna tan-negozju tagħhom fuq Facebook, l-utenti kummerċjali xorta jistgħu jelenkaw oġġetti permezz tal-profil personali tagħhom kif irreklamat ukoll minn Meta stess.

(23)

Barra minn hekk, f’nuqqas ta’ qbil mal-fehmiet ta’ Meta, il-Kummissjoni tqis li l-utenti kummerċjali f’Marketplace jistgħu jiġu identifikati permezz tal-użu tal-aħjar approssimazzjoni disponibbli, fid-dawl tad-data pprovduta minn Meta, kif stabbilit fit-Taqsima A(1) tal-Anness għad-DMA. Abbażi ta’ dan, huwa xieraq li jitqiesu bħala utenti kummerċjali ta’ Meta l-utenti kollha li huma stabbiliti jew li jinsabu fl-Unjoni, li ħolqu 28 elenku jew aktar f’mill-inqas xahar tas-sena finanzjarja, bi 80 % jew aktar tal-elenki jkunu fl-istess kategorija. Fuq talba tal-Kummissjoni, Meta indikat li abbażi ta’ dawn il-kriterji, il-limitu tal-utenti kummerċjali ġie ssodisfat b’marġni kbir ta’ aktar minn għaxar darbiet aktar fis-snin finanzjarji 2020, 2021 u 2022.

(24)

Fl-aħħar nett, huwa kkunsidrat li l-argumenti sottomessi minn Meta fir-rigward ta’ Marketplace ma humiex sostanzjati biżżejjed biex iqajmu dubji ċari dwar il-preżunzjonijiet fl-Artikolu 3(2) tad-DMA. L-ewwel nett, b’differenza mill-fehma ta’ Meta u kif spjegat fid-dettall fil-paragrafi preċedenti, Marketplace għandu utenti kummerċjali fis-sens tal-Artikolu 3(2)(b) tad-DMA u huwa gateway bejn dawn l-utenti kummerċjali u l-utenti finali. It-tieni, possibbilment b’aktar minn 100 000 utent kummerċjali u aktar minn 100 miljun utent finali, Marketplace huwa wkoll gateway importanti. It-tielet, Marketplace huwa wkoll gateway individwalment importanti; Id-dikjarazzjoni ta’ Meta dwar il-kuntrarju minħabba d-dipendenza ta’ Marketplace fuq Facebook hija bbażata fuq applikazzjoni żbaljata tar-regoli ta’ delinjazzjoni fl-Anness, il-punt D.2.c. tad-DMA. Għalhekk, f’nuqqas ta’ qbil mal-fehma ta’ Meta, l-istandard korrett għall-valutazzjoni tal-konfutazzjoni skont l-Artikolu 3(5) tad-DMA huwa “li b’mod ċar jixħ[et] dubju fuq il-preżunzjonijiet” stabbiliti fl-Artikolu 3(2) tad-DMA.

(25)

Is-sejbiet fid-Deċiżjoni huma bbażati fuq l-informazzjoni disponibbli għall-Kummissjoni fiż-żmien tad-Deċiżjoni. F’każ li jkun hemm xi bidla sostanzjali fi kwalunkwe wieħed mill-fatti li fuqhom hija bbażata din id-Deċiżjoni, jew jekk din id-Deċiżjoni tkun ibbażata fuq informazzjoni mhux kompluta, skorretta jew qarrieqa, il-Kummissjoni tista’ tikkunsidra mill-ġdid jew temenda d-Deċiżjoni skont l-Artikolu 4(1) tad-DMA.

5.   KONKLUŻJONI

(26)

Għar-raġunijiet stabbiliti hawn fuq, id-Deċiżjoni taħtar lil Meta bħala gwardjan fir-rigward ta’ (i) is-servizz ta’ networking soċjali online ta’ Meta, Facebook; (ii) is-servizz ta’ networking soċjali online ta’ Meta, Instagram; (iii) is-servizz tar-reklamar online ta’ Meta, Meta Ads; (iv) l-NIICS ta’ Meta, WhatsApp; (v) l-NIICS ta’ Meta, Messenger u (vi) is-servizzi tal-intermedjazzjoni online tagħha Marketplace.

(27)

Id-Deċiżjoni tirrifjuta l-argumenti ta’ konfutazzjoni mqajma minn Meta fir-rigward ta’ (i) l-NIICS Messenger u (ii) is-servizzi tal-intermedjazzjoni online Marketplace.

---

(1)  Ir-Regolament (UE) 2022/1925 tal-Parlament Ewropew u tal-Kunsill tal-14 ta’ Settembru 2022 dwar swieq kontestabbli u ġusti fis-settur diġitali u li jemenda d-Direttivi (UE) 2019/1937 u (UE) 2020/1828 (l-Att dwar is-Swieq Diġitali) (ĠU L 265, 12.10.2022, p. 1).