“4.1.   Allegazzjoni ta’ distorsjonijiet tal-materja prima

L-ilmentatur ipprovda provi biżżejjed li jista’ jkun hemm distorsjonijiet fil-materja prima fil-pajjiż ikkonċernat fir-rigward tal-prodott investigat. Skont l-evidenza pprovduta mill-ilmentatur, ma hemm l-ebda rifużjoni tat-taxxa fuq il-valur miżjud (‘VAT’) fuq l-esportazzjonijiet tal-minerali tal-manganiż fil-pajjiż ikkonċernat. It-tnaqqis jew it-tħassir tar-rifużjoni tal-VAT huma elenkati fl-Artikolu 7(2a), it-tieni subparagrafu tar-Regolament bażiku, bħala waħda mid-distorsjonijiet rilevanti tal-materja prima. L-evidenza pprovduta turi wkoll li l-mineral tal-manganiż jammonta għal ferm aktar mil-livell limitu ta’ 17 % tal-kost tal-produzzjoni tal-prodott investigat fil-pajjiż ikkonċernat kif meħtieġ mill-Artikolu 7(2a), il-ħames subparagrafu tar-Regolament bażiku. It-tqabbil tal-prezz tal-mineral tal-manganiż fir-RPĊ mal-prezz mingħajr distorsjoni tal-mineral tal-manganiż mibjugħ fi swieq internazzjonali rappreżentattivi juri li l-prezzijiet Ċiniżi huma inqas minn dawk tas-swieq internazzjonali rappreżentattivi skont l-Artikolu 7(2a), it-tieni subparagrafu tar-Regolament bażiku.

Għalhekk, f’konformità mal-Artikolu 7(2a) tar-Regolament bażiku, l-investigazzjoni se teżamina d-distorsjonijiet allegati biex tivvaluta, jekk rilevanti, jekk dazju inferjuri għall-marġni tad-dumping ikunx biżżejjed biex jelimina d-dannu. Jekk distorsjonijiet oħra koperti mill-Artikolu 7(2a) tar-Regolament bażiku jiġu identifikati matul l-investigazzjoni, l-investigazzjoni tista’ tkopri wkoll dawn id-distorsjonijiet.”

Jenħtieġ li jiżdied il-paragrafu li ġej wara t-tielet paragrafu tal-punt 5 tan-Notifika ta’ bidu tas-16 ta’ Frar 2023:

Għandu jiddaħħal il-punt ġdid 5.5.1. wara l-ewwel żewġ paragrafi tal-punt 5.5. tan-Notifika ta’ bidu tas-16 ta’ Frar 2023 u għandu jinqara kif ġej:

“5.5.1.   Proċedura għall-valutazzjoni tal-interess tal-Unjoni f’każ ta’ allegazzjonijiet ta’ distorsjonijiet tal-materja prima

F’każijiet ta’ distorsjoni li jirrigwardaw il-materja prima kif definit fl-Artikolu 7(2a) tar-Regolament bażiku, il-Kummissjoni twettaq test dwar l-interess tal-Unjoni kif stipulat fl-Artikolu 7(2b) ta’ dak ir-Regolament. Jekk il-Kummissjoni tiddeċiedi, meta tistabbilixxi l-livell ta’ dazji skont l-Artikolu 7 ta’ dak ir-Regolament, li tapplika l-Artikolu 7(2), twettaq it-test dwar l-interess tal-Unjoni f’konformità mal-Artikolu 21 abbażi tal-miżuri ddeterminati skont l-Artikolu 7(2).

Il-partijiet interessati huma mistiedna jipprovdu l-informazzjoni kollha pertinenti li tippermetti lill-Kummissjoni tiddetermina jekk huwiex fl-interess tal-Unjoni li jiġi stabbilit il-livell tal-miżuri f’konformità mal-Artikolu 7(2a) tar-Regolament bażiku. B’mod partikolari, il-partijiet interessati huma mistiedna jipprovdu kwalunkwe informazzjoni dwar il-kapaċitajiet ta’ riżerva fil-pajjiż ikkonċernat, il-kompetizzjoni għall-materja prima u l-effett fuq il-ktajjen ta’ provvista għall-kumpaniji fl-Unjoni. Fin-nuqqas ta’ kooperazzjoni, il-Kummissjoni tista’ tikkonkludi li huwa f’konformità mal-interess tal-Unjoni li tapplika l-Artikolu 7(2a) tar-Regolament bażiku.

Jekk il-Kummissjoni tiddeċiedi li tapplika l-Artikolu 7(2) tar-Regolament bażiku, tittieħed deċiżjoni, skont l-Artikolu 21, dwar jekk l-adozzjoni ta’ miżuri anti-dumping tmurx kontra l-interess tal-Unjoni. Il-produtturi tal-Unjoni, l-importaturi u l-assoċjazzjonijiet rappreżentattivi tagħhom, l-utenti u l-assoċjazzjonijiet rappreżentattivi tagħhom, it-trade unions u l-organizzazzjonijiet rappreżentattivi tal-konsumatur huma mistiedna jipprovdu informazzjoni dwar l-interess tal-Unjoni lill-Kummissjoni. Sabiex jipparteċipaw fl-investigazzjoni, l-organizzazzjonijiet rappreżentattivi tal-konsumatur iridu juru li hemm rabta oġġettiva bejn l-attivitajiet tagħhom u l-prodott investigat.

L-informazzjoni dwar il-valutazzjoni tal-interess tal-Unjoni trid tiġi pprovduta fi żmien 15-il jum mid-data tal-pubblikazzjoni ta’ din in-Notifika, sakemm ma jkunx speċifikat mod ieħor. Din l-informazzjoni tista’ tiġi pprovduta f’format ħieles jew inkella billi jimtlew il-partijiet rilevanti tal-kwestjonarji ppreparati mill-Kummissjoni rigward id-distorsjonijiet tal-materja prima. L-informazzjoni ppreżentata titqies biss jekk, fil-mument tal-preżentazzjoni tagħha, tkun sostnuta b’evidenza fattwali. Il-kwestjonarji huma disponibbli fil-fajl għall-ispezzjoni mill-partijiet interessati u fuq is-sit web tad-DĠ Kummerċ: