OPINJONI TAL-KUMMISSJONI

tat-12 ta' Jannar 2023

dwar il-pjan għar-rimi tal-iskart radjuattiv li jirriżulta mid-dekummissjonar u ż-żarmar tal-impjant tal-enerġija nukleari ta’ Grohnde (KWG) fl-Istat Federali tas-Sassonja t’Isfel, il-Ġermanja

(It-test bil-Ġermaniż biss huwa awtentiku)

(2023/C 14/01)

Il-valutazzjoni t’hawn taħt saret skont id-dispożizzjonijiet tat-Trattat Euratom, mingħajr preġudizzju għal xi valutazzjoni addizzjonali li trid issir skont it-Trattat dwar il-Funzjonament tal-Unjoni Ewropea u l-obbligi li jirriżultaw minnu u mil-leġiżlazzjoni sekondarja (1).

Fil-24 ta' Frar 2022, f’konformità mal-Artikolu 37 tat-Trattat tal-Euratom, il-Kummissjoni Ewropea rċeviet mingħand il-Gvern tal-Ġermanja, id-Data Ġenerali dwar il-pjan għar-rimi tal-iskart radjuattiv (2) li jirriżulta mid-dekummissjonar u miż-żarmar tal-impjant tal-enerġija nukleari ta’ Grohnde (KWG).

Abbażi ta’ din id-data u tat-tagħrif addizzjonali mitlub mill-Kummissjoni fis-16 ta’ Ġunju 2022 u pprovdut mill-awtoritajiet Ġermaniżi fis-27 ta’ Lulju 2022, u wara konsultazzjoni mal-Grupp ta’ Esperti, il-Kummissjoni fasslet l-opinjoni li ġejja:

1.	Id-distanza mis-sit għall-eqreb fruntiera ta’ Stat Membru ieħor, f’dan il-każ in-Netherlands, hija ta’ 160 km.

2.

Waqt operazzjonijiet ta’ dekummissjonar u żarmar normali tal-impjant tal-enerġija nukleari ta’ Grohnde (KWG), ir-rilaxx ta’ effluwenti likwidi u gassużi radjuattivi ma għandhomx ikunu responsabbli li jirriżultaw f’esponiment li jkun sinifikanti mil-lat ta’ saħħa, għall-popolazzjoni fi Stat Membru ieħor fir-rigward tal-limiti tad-dożi stabbiliti fid-Direttivi tal-Istandards Bażiċi tas-Sikurezza (3).

3.

L-iskart radjuattiv solidu jinħażen temporanjament fuq is-sit (fis-sala l-ġdida tat-tħejjija tat-Trasport) qabel ma jiġi ttrasportat lejn faċilitajiet liċenzjati ta’ trattament jew rimi li jinsabu fil-Ġermanja. L-iskart solidu u l-fdalijiet materjali mhux radjuattivi li jkunu konformi mal-livelli ta’ approvazzjoni se jiġu skarikati mill-kontroll regolatorju għar-rimi bħala skart konvenzjonali, għall-użu mill-ġdid jew għar-riċiklaġġ. Dan se jsir f’konformità mal-kriterji stabbiliti fid-Direttiva tal-Istandards Bażiċi tas-Sikurezza.

4.

F’każ li jkun hemm skariki mhux ippjanati ta’ effluwenti radjuattivi, li jistgħu jseħħu wara xi aċċident tat-tip u d-daqs ikkunsidrati fid-Data Ġenerali, id-dożi li x’aktarx jilħqu lill-popolazzjoni ta’ Stat Membru ieħor mhux se jkunu sinifikanti mil-lat tas-saħħa, fir-rigward tal-livelli ta’ referenza stabbiliti fid-Direttiva tal-Istandards Bażiċi tas-Sikurezza.

Bħala konklużjoni, il-Kummissjoni hija tal-opinjoni li l-implimentazzjoni tal-pjan għar-rimi ta' skart radjuattiv fi kwalunkwe għamla, li jirriżulta mid-dekummissjonar u miż-żarmar ta’ Grohnde (KWG), li jinsab fl-Istat Federali tas-Sassonja t’Isfel, fil-Ġermanja, kemm waqt it-tħaddim normali kif ukoll fil-każ ta' aċċident tat-tip u d-daqs ikkunsidrati fid-Data Ġenerali, x'aktarx li ma tirriżultax f'kontaminazzjoni radjuattiva, li tkun sinifikanti mil-lati tas-saħħa, tal-ilma, tal-ħamrija jew tal-ispazju tal-ajru ta' Stat Membru ieħor skont id-dispożizzjonijiet stabbiliti fid-Direttiva tal-Istandards Bażiċi ta' Sikurezza.

---

(1)  Pereżempju, skont it-Trattat dwar il-Funzjonament tal-Unjoni Ewropea, l-aspetti ambjentali jenħtieġ li jiġu vvalutati b’mod ulterjuri. B’mod indikattiv, il-Kummissjoni tixtieq tiġbed l-attenzjoni għad-dispożizzjonijiet tad-Direttiva 2011/92/UE dwar l-istima tal-effetti ta’ ċerti proġetti pubbliċi u privati fuq l-ambjent, kif emendata bid-Direttiva 2014/52/UE; għad-Direttiva 2001/42/KE dwar l-istima tal-effetti ta’ ċerti pjanijiet u programmi fuq l-ambjent, kif ukoll għad-Direttiva 92/43/KEE dwar il-konservazzjoni tal-ħabitat naturali u tal-fawna u l-flora selvaġġa, u għad-Direttiva 2000/60/KE li tistabbilixxi qafas għal azzjoni Komunitarja fil-qasam tal-politika tal-ilma.

(2)  Ir-rimi tal-iskart radjuattiv skont it-tifsira tal-punt 1 tar-Rakkomandazzjoni tal-Kummissjoni 2010/635/Euratom tal-11 ta’ Ottubru 2010 dwar l-applikazzjoni tal-Artikolu 37 tat-Trattat Euratom (ĠU L 279, 23.10.2010, p. 36).

(3)  id-Direttiva tal-Kunsill 2013/59/Euratom tal-5 ta' Diċembru 2013 li tistabbilixxi standards bażiċi ta' sikurezza għal protezzjoni kontra l-perikli li jirriżultaw minn esponiment għal radjazzjoni jonizzanti, u li tħassar id-Direttivi 89/618/Euratom, 90/641/Euratom, 96/29/Euratom, 97/43/Euratom u 2003/122/Euratom (ĠU L 13, 17.1.2014, p. 1).

Ebda oppożizzjoni għal konċentrazzjoni notifikata

(Il-Każ M.10892 — APOLLO / HINES / VI-BA / AEDES)

(Test b'rilevanza għaż-ŻEE)

(2023/C 14/02)

Fis-16 ta’ Novembru 2022, il-Kummissjoni ddeċidiet li ma topponix il-konċentrazzjoni notifikata msemmija hawn fuq u li tiddikjaraha kompatibbli mas-suq intern. Din id-deċiżjoni hi bbażata fuq l-Artikolu 6(1)(b) tar-Regolament tal-Kunsill (KE) Nru 139/2004 (1). It-test sħiħ tad-deċiżjoni hu disponibbli biss bl-Ingliż u ser isir pubbliku wara li jitneħħa kwalunkwe sigriet tan-negozju li jista’ jkun fih. Dan it-test jinstab:

—

fit-taqsima tal-amalgamazzjoni tas-sit web tal-Kummissjoni dwar il-Kompetizzjoni (http://ec.europa.eu/competition/mergers/cases/). Dan is-sit web jipprovdi diversi faċilitajiet li jgħinu sabiex jinstabu d-deċiżjonijiet individwali ta’ amalgamazzjoni, inklużi l-kumpanija, in-numru tal-każ, id-data u l-indiċi settorjali,

—	f’forma elettronika fis-sit web EUR-Lex (http://eur-lex.europa.eu/homepage.html?locale=mt) fid-dokument li jġib in-numru 32022M10892. Il-EUR-Lex hu l-aċċess fuq l-internet għal-liġi tal-Unjoni Ewropea.

---

(1)  ĠU L 24, 29.1.2004, p. 1.

Rata tal-kambju tal-euro (1)

It-13 ta' Jannar 2023

(2023/C 14/03)

1 euro =

	Munita	Rata tal-kambju
USD	Dollaru Amerikan	1,0814
JPY	Yen Ġappuniż	139,02
DKK	Krona Daniża	7,4387
GBP	Lira Sterlina	0,88800
SEK	Krona Żvediża	11,2528
CHF	Frank Żvizzeru	1,0051
ISK	Krona Iżlandiża	154,30
NOK	Krona Norveġiża	10,6945
BGN	Lev Bulgaru	1,9558
CZK	Krona Ċeka	24,011
HUF	Forint Ungeriż	396,96
PLN	Zloty Pollakk	4,6888
RON	Leu Rumen	4,9423
TRY	Lira Turka	20,3196
AUD	Dollaru Awstraljan	1,5586
CAD	Dollaru Kanadiż	1,4494
HKD	Dollaru ta’ Hong Kong	8,4471
NZD	Dollaru tan-New Zealand	1,7014
SGD	Dollaru tas-Singapor	1,4311
KRW	Won tal-Korea t’Isfel	1 343,41
ZAR	Rand ta’ l-Afrika t’Isfel	18,2482
CNY	Yuan ren-min-bi Ċiniż	7,2729
IDR	Rupiah Indoneżjan	16 412,00
MYR	Ringgit Malażjan	4,6890
PHP	Peso Filippin	59,440
RUB	Rouble Russu
THB	Baht Tajlandiż	35,751
BRL	Real Brażiljan	5,5512
MXN	Peso Messikan	20,4391
INR	Rupi Indjan	88,0960

---

(1)  Sors: rata tal-kambju ta' referenza ppubblikata mill-Bank Ċentrali Ewropew.

Wiċċ nazzjonali ġdid ta’ muniti tal-euro maħsuba għaċ-ċirkolazzjoni

(2023/C 14/04)

Wiċċ nazzjonali għall-munita kommemorattiva l-ġdida taż-2 euro maħsuba għaċ-ċirkolazzjoni u maħruġa minn Franza

Il-muniti tal-euro maħsuba għaċ-ċirkolazzjoni għandhom status ta’ valuta legali fiż-żona tal-euro. Biex tinforma lill-pubbliku u lill-partijiet kollha li jużaw il-muniti, il-Kummissjoni tippubblika deskrizzjoni tad-disinji tal-muniti l-ġodda kollha (1). F’konformità mal-Konklużjonijiet tal-Kunsill tal-10 ta’ Frar 2009 (2), l-Istati Membri taż-żona tal-euro u l-pajjiżi li kkonkludew ftehim monetarju mal-Unjoni Ewropea li jipprevedi l-ħruġ ta’ muniti tal-euro, huma awtorizzati joħorġu muniti kommemorattivi tal-euro maħsuba għaċ-ċirkolazzjoni kemm-il darba jiġu ssodisfati ċerti kundizzjonijiet, b’mod partikolari li jintużaw muniti taż-2 euro biss. Dawn il-muniti għandhom l-istess karatteristiċi tekniċi bħall-muniti l-oħra taż-2 euro, iżda n-naħa nazzjonali tagħhom fiha disinn kommemorattiv li jkun simboliku ħafna f’termini nazzjonali jew Ewropej.

Il-pajjiż emittenti: Franza

Is-suġġett tal-kommemorazzjoni: Il-Logħob Olimpiku 2024

Deskrizzjoni tad-disinn: Mitt sena wara l-Logħob Olimpiku tal-1924, Franza qed terġa’ tospita l-Logħob tas-Sajf, li se jsir f’Pariġi fl-2024, avveniment b’eku internazzjonali li l-intensità tiegħu gradwalment tinbena fis-snin li jwasslu għall-avveniment.

Fl-okkażjoni tal-countdown għal-Logħob Olimpiku, Monnaie de Paris tixtieq tiċċelebra l-mixja sal-Logħob. Għalhekk qed tippjana li kull sena, fl-2022, fl-2023 u fl-2024 toħroġ munita kommemorattiva ta’ żewġ euro b’wiċċ oriġinali li jiċċelebra l-Logħob, permezz tal-wirt ta’ Franza u ta’ Pariġi.

Id-disinn jirrappreżenta l-ġenju, figura u ikona nazzjonali tan-numismatika Franċiża. Huwa qed jiġi ppreżentat jipprattika t-tfigħ tad-diskus b’mod “antik” b’referenza għal-Logħob Olimpiku tal-era Antika. Is-siluwett tiegħu jitħallat ma’ dak tal-Arc de Triomphe, element ewlieni tal-wirt Pariġin. Huwa jifforma assi komuni ma’ dan il-monument emblematiku tar-rebħ. Fl-isfond, hija rrappreżentata korsa tal-atletika li fih tiddaħħal l-emblema ta’ Pariġi 2024 fuq in-naħa tal-lemin. Id-data tas-sena, l-ittri RF u l-marki taz-zekka jiddaħħlu taħt l-arkata u madwar is-sieq tal-Arc.

Iċ-ċirku ta’ barra tal-munita juri t-12-il stilla tal-bandiera Ewropea.

L-għadd ta’ muniti li huwa stmat li se jinħarġu: 260 000

Data tal-ħruġ: Settembru 2022

---

(1)  Ara l-ĠU C 373, 28.12.2001, p. 1 għall-uċuħ nazzjonali tal-muniti kollha li nħarġu fl-2002.

(2)  Ara l-konklużjonijiet tal-Kunsill Affarijiet Ekonomiċi u Finanzjarji tal-10 ta’ Frar 2009 u r-Rakkomandazzjoni tal-Kummissjoni tad-19 ta’ Diċembru 2008 dwar linji gwida komuni għall-uċuħ nazzjonali u l-ħruġ ta’ muniti tal-euro maħsuba għaċ-ċirkolazzjoni (ĠU L 9, 14.1.2009, p. 52).

Sejħa għall-Proposti

TIS 2023 - Ideat li jbiddlu d-dinja: it-Turnew għall-Innovazzjoni Soċjali tal-Istitut tal-BEI tal-2023

(2023/C 14/05)

L-Istitut tal-BEI jorganizza t-tnax-il Turnew għall-Innovazzjoni Soċjali tiegħu.

It-TIS jippromwovi ideat innovattivi u jippremja l-inizjattivi li joħolqu impatt soċjali u ambjentali, li jkopru proġetti f’firxa wiesgħa ta’ oqsma — mill-edukazzjoni, il-kura tas-saħħa u l-ħolqien ta’ impjiegi, għal teknoloġiji, sistemi u proċessi ġodda. Il-proġetti kollha jikkompetu għal żewġ premji f’Kategorija Ġenerali u l-proġetti li jindirizzaw it-tema ta’ din is-sena ta’ bliet u komunitajiet sostenibbli se jikkompetu wkoll għal żewġ premji fil-Kategorija Speċjali. Il-proġetti rebbieħa fiż-żewġ kategoriji se jingħataw l-ewwel jew it-tieni premju ta’ EUR 100 000 jew EUR 40 000, u Premju tal-Għażla tal-Udjenza ta’ EUR 10 000.

Segwina fuq Facebook: www.facebook.com/EibInstitute

Għal aktar informazzjoni dwar dan it-turnew u kif tissottometti proposta innovattiva, żur: http://institute.eib.org/programmes/social/social-innovation-tournament/

Avviż minn qabel ta’ konċentrazzjoni

(Il-Każ M.10807 – VIASAT / INMARSAT)

(Test b'rilevanza għaż-ŻEE)

(2023/C 14/06)

---

(1)  ĠU L 24, 29.1.2004, p. 1 (ir-“Regolament dwar l-Għaqdiet”).