1.   

Dan l-Avviż huwa indirizzat lil kull impriża li fl-2024 tixtieq tagħmel dikjarazzjoni sabiex tintroduċi fis-suq fl-Unjoni Ewropea l-idrofluworokarburi bl-ingrossa, f’konformità mal-Artikoli 16(2) u 16(4) tar-Regolament (UE) Nru 517/2014 (1) tal-Parlament Ewropew u tal-Kunsill dwar gassijiet fluworurati b’effett ta’ serra (minn hawn ’il quddiem imsejjaħ “ir-Regolament”). F’dan l-Avviż kull referenza għall-Unjoni tinftiehem li tinkludi l-Irlanda ta’ Fuq (2).

2.   

HFC-23, HFC-32, HFC-41, HFC-125, HFC-134, HFC-134a, HFC-143, HFC-143a, HFC-152, HFC-152a, HFC-161, HFC-227ea, HFC-236cb, HFC-236ea, HFC-236fa, HFC-245ca, HFC-245fa, HFC-365mfc, HFC-43-10mee.

3.   

Kull introduzzjoni fis-suq ta’ dawn is-sustanzi, ħlief għall-użi elenkati fil-punti minn (a) sa (f) tal-Artikolu 15(2) tar-Regolament jew għal kwantità totali annwali ta’ dawn is-sustanzi inqas mill-ekwivalenti ta’ 100 tunnellata ta’ CO2 kull sena, hija soġġetta għal-limiti kwantitattivi tas-sistema tal-kwoti stabbilita fl-Artikoli 15 u 16 kif ukoll fl-Annessi V u VI tar-Regolament.

4.   

Fil-ħin tar-rilaxx għaċ-ċirkolazzjoni libera tal-HFCs, l-importaturi għandu jkollhom reġistrazzjoni valida bħala importaturi ta’ HFCs fil-Portal F-Gas u s-Sistema ta’ Liċenzjar tal-HFC (3) f’konformità mar-“Regolament ta’ Implimentazzjoni tal-Kummissjoni (UE) 2019/661 li jiżgura l-funzjonament bla xkiel tar-reġistru elettroniku għal kwoti għat-tqegħid fis-suq ta’ idrofluworokarburi” (4). Din ir-reġistrazzjoni hija meqjusa bħala liċenzja obbligatorja għall-importazzjoni. Liċenzja simili hija meħtieġa għall-esportazzjoni ta’ HFCs (5).

5.   

Skont l-Anness VI tar-Regolament, is-somma tal-kwoti allokati abbażi tal-valuri ta’ referenza titnaqqas mill-kwantità massima disponibbli għall-2024 sabiex tiġi ddeterminata l-kwantità li għandha tiġi allokata minn din ir-riżerva.

6.   

Id-data kollha ppreżentata mill-impriżi, kif ukoll il-kwoti u l-valuri ta’ referenza huma maħżuna online fil-Portal F-Gas u s-Sistema ta’ Liċenzjar tal-HFC. Id-data kollha fil-“Portal F-Gas u s-Sistema ta’ Liċenzjar tal-HFC”, inkluż il-kwoti, il-valuri ta’ referenza u d-data kummerċjali u personali, tiġi trattata bħala kunfidenzjali mill-Kummissjoni Ewropea.

7.   

L-impriżi li jixtiequ jiksbu kwota minn din ir-riżerva jeħtieġ li jsegwu l-proċedura deskritta fil-punti 9 sa 12 ta’ dan l-Avviż.

8.   

Skont l-Artikoli 16(2) u 17(1) tar-Regolament, l-impriża li tiddikjara l-intenzjoni li tikseb kwota mir-riżerva jeħtieġ li jkollha profil tar-reġistrazzjoni validu, approvat mill-Kummissjoni f’konformità mar-Regolament ta’ Implimentazzjoni tal-Kummissjoni (UE) 2019/661, bħala produttur u/jew importatur tal-idrofluworokarburi fil-Portal F-Gas u s-Sistema ta’ Liċenzjar tal-HFC. Sabiex jiġi żgurat it-trattament xieraq tal-applikazzjoni għar-reġistrazzjoni, inkluża l-ħtieġa possibbli għal informazzjoni addizzjonali, l-applikazzjoni trid issir mhux aktar tard minn ġimagħtejn qabel il-bidu tal-perjodu ta’ dikjarazzjoni, jiġifieri qabel it-20 ta’ Frar 2023. Għal kull applikazzjoni li tasal wara din l-iskadenza, ma jistax jiġi żgurat li tkun tista’ tittieħed deċiżjoni finali rigward l-applikazzjoni għal reġistrazzjoni qabel tmiem il-perjodu ta’ dikjarazzjoni. Il-kumpaniji li għad mhumiex irreġistrati jistgħu jsibu gwida dwar kif għandhom jirreġistraw fuq is-sit web tad-DĠ CLIMA (6).

9.   

L-impriża trid tagħmel dikjarazzjoni dwar il-kwantitajiet previsti għall-2024 fil-Portal F-Gas u s-Sistema ta’ Liċenzjar tal-HFC fil-perjodu ta’ dikjarazzjoni mis-6 ta’ Marzu 2023 sal-5 ta’ April 2023, 13:00h CET. Gwida dwar kif għandha tiġi sosttomessa dikjarazzjoni tal-kwoti tinsab fuq is-sit web tad-DĠ CLIMA (7).

10.   

Huma dawk id-dikjarazzjonijiet mimlija kif suppost biss, li jkunu mingħajr żbalji u li jaslu qabel il-5 ta’ April 2023, 13:00h CET li se jitqiesu bħala validi mill-Kummissjoni.

11.   

Abbażi ta’ dawn id-dikjarazzjonijiet, il-Kummissjoni talloka kwoti lil dawn l-impriżi f’konformità mal-Artikolu 16(2), 16(4) u 16(5) kif ukoll mal-Annessi V u VI tar-Regolament.

12.   

L-Artikolu 7 tar-Regolament ta’ Implimentazzjoni tal-Kummissjoni (UE) 2019/661 jistipula li għall-fini tal-allokazzjoni tal-kwoti għall-introduzzjoni fis-suq ta’ HFCs skont l-Artikolu 16(5) tar-Regolament (UE) Nru 517/2014, l-impriżi kollha bl-istess sid benefiċjarju/sidien benefiċjarji għandhom jitqiesu bħala dikjarant wieħed f’konformità mal-Artikolu 16(2) u (4) tar-Regolament.

13.   

Il-Kummissjoni se tgħarraf lill-impriżi dwar it-total tal-kwoti allokati għall-2024 permezz tal-Portal F-Gas u s-Sistema ta’ Liċenzjar tal-HFC.

14.   

Ir-reġistrazzjoni fil-Portal F-Gas u s-Sistema ta’ Liċenzjar tal-HFC u/jew id-dikjarazzjoni dwar l-intenzjoni tal-introduzzjoni fis-suq tal-HFCs fl-2024 fiha nnifisha ma tagħti l-ebda dritt għall-introduzzjoni fis-suq tal-HFCs fl-2024.