Irtirar tan-notifika ta’ konċentrazzjoni

(Il-Każ M.10561 — CINTRA / ABERTIS / ITINERE / BIP & DRIVE)

(Test b'rilevanza għaż-ŻEE)

(2022/C 421/01)

Fi 7 ta’ Ottubru 2022, il-Kummissjoni rċeviet notifika (1) ta’ konċentrazzjoni proposta skont l-Artikolu 4 tar-Regolament tal-Kunsill (KE) Nru 139/2004 (2) (ir-“Regolament dwar l-Għaqdiet”).

Fi 26 ta’ Ottubru 2022, il-partijiet notifikanti infurmaw lill-Kummissjoni li huma rtiraw in-notifika tagħhom.

---

(1)  ĠU C 395, 14.10.2022, p. 12.

(2)  ĠU L 24, 29.1.2004, p. 1.

Informazzjoni pprovduta mill-Kummissjoni skont l-Artikolu 8, it-tieni subparagrafu, tad-Direttiva (UE) 2015/1535 tal-Parlament Ewropew u tal-Kunsill li tistabbilixxi proċedura għall-għoti ta’ informazzjoni fil-qasam tar-regolamenti tekniċi u tar-regoli dwar is-servizzi tas-Soċjetà tal-Informatika (1)

Statistiċi dwar ir-regolamenti tekniċi notifikati fl-2021 skont il-proċedura ta’ notifika 2015/1535

(Test b'rilevanza għaż-ŻEE)

(2022/C 421/02)

---

(1)  ĠU L 241, 17.9.2015, p. 1. Minn hawn ’il quddiem “id-Direttiva”.

(2)  Artikolu 5.2 tad-Direttiva.

(3)  Artikolu 6.2 tad-Direttiva.

(4)  Id-Deċiżjoni tal-Kumitat Konġunt taż-ŻEE Nru 75/2019 tad-29 ta’ Marzu 2019 li temenda l-Anness II (Regolamenti tekniċi, standards, ittestjar u ċertifikazzjoni) u l-Anness XI (Komunikazzjoni elettronika, servizzi awdjoviżivi u soċjetà tal-informatika) tinkorpora fil-Ftehim taż-ŻEE d-Direttiva (UE) 2015/1535 tal-Parlament Ewropew u tal-Kunsill tad-9 ta’ Settembru 2015 li tistabbilixxi proċedura għall-għoti ta’ informazzjoni fil-qasam tar-regolamenti tekniċi u tar-regoli dwar is-servizzi tas-Soċjetà tal-Informatika. Il-pajjiżi tal-EFTA li huma partijiet kontraenti għal dan il-Ftehim jistgħu, għalhekk, joħorġu kummenti dwar abbozzi nnotifikati mill-Istati Membri tal-Unjoni Ewropea. L-Iżvizzera tista’ tippreżenta wkoll dawn il-kummenti abbażi ta’ ftehim informali dwar l-iskambju ta’ informazzjoni fil-qasam tar-regolamenti tekniċi.

(5)  Il-proċedura ta’ notifika skont id-Direttiva ġiet estiża għat-Turkija skont il-Ftehim ta’ Assoċjazzjoni konkluż ma’ dak il-pajjiż (il-Ftehim ta’ Assoċjazzjoni bejn il-Komunità Ekonomika Ewropea u t-Turkija (ĠU P 217, 1964, p. 3687) u d-Deċiżjonijiet 1/95 u 2/97 tal-Kunsill ta’ Assoċjazzjoni KE-Turkija).

(6)  L-Artikolu 6.3 tad-Direttiva li jirrikjedi lill-Istati Membri jipposponu l-adozzjoni tal-abbozz notifikat (bl-eċċezzjoni tal-abbozz ta’ regolamenti tekniċi fir-rigward tas-servizzi tas-Soċjetà tal-Informatika) għal tnax-il xahar minn meta tirċevih il-Kummissjoni jekk din tal-aħħar tħabbar l-intenzjoni tagħha li tipproponi jew tadotta direttiva, regolament jew deċiżjoni dwar dan is-suġġett.

(7)  L-Artikolu 6.4 tad-Direttiva li jirrikjedi lill-Istati Membri jipposponu l-adozzjoni tal-abbozz notifikat għal tnax-il xahar minn meta tirċevih il-Kummissjoni jekk din tal-aħħar tħabbar il-konstatazzjoni tagħha li l-abbozz jikkonċerna kwistjoni li hija koperta minn proposta għal direttiva, regolament jew deċiżjoni ppreżentata lill-Parlament Ewropew u lill-Kunsill.

(8)  Il-Ftehim dwar iż-Żona Ekonomika Ewropea (ara n-nota 4 f’qiegħ il-paġna) jistabbilixxi l-obbligu tal-pajjiżi tal-EFTA li huma parti minn dan il-Ftehim sabiex jinnotifikaw l-abbozz ta’ regolamenti tekniċi lill-Kummissjoni.

(9)  Abbażi tal-ftehim informali dwar l-iskambju ta’ informazzjoni fil-qasam tar-regolamenti tekniċi (ara n-nota 4 f’qiegħ il-paġna), l-Iżvizzera tissottometti wkoll l-abbozz ta’ regolamenti tekniċi tagħha lill-Kummissjoni.

(10)  L-uniku tip ta’ reazzjoni prevista taħt il-Ftehim dwar iż-Żona Ekonomika Ewropea (ara n-noti 4 u 8 f’qiegħ il-paġna) hija l-possibbiltà li l-Unjoni Ewropea toħroġ il-kummenti. Reazzjoni tal-istess tip tista’ tiġi ppreżentata fir-rigward tan-notifiki mill-Iżvizzera abbażi tal-ftehim informali bejn l-UE u dan il-pajjiż (ara n-noti 4 u 9 f’qiegħ il-paġna).

AVVIŻ TAL-KUMMISSJONI

Sinerġiji bejn il-programmi tal-Orizzont Ewropa u tal-FEŻR

(2022/C 421/03)

Werrej

INTRODUZZJONI

8

TIPI TA’ SINERĠIJI

9

1.

Siġill ta’ Eċċellenza

9

2.

Trasferimenti mill-FEŻR għal Orizzont Ewropa

14

3.

Finanzjament kumulattiv

18

4.

Sħubijiet Ewropej

23

5.

Finanzjament kombinat (Ħolqien ta’ timijiet)

32

6.

Sinerġiji upstream u downstream

33

ANNESS 1

36

ANNESS 2

39

ANNESS 3

41

INTRODUZZJONI

Il-qafas regolatorju għall-2021-2027 li jirregola l-fondi tal-politika ta’ koeżjoni permezz ta’ ġestjoni kondiviża u l-fondi permezz ta’ fondi b’ġestjoni diretta jippermetti sinerġiji msaħħa bejn dawn iż-żewġ tipi ta’ finanzjament tal-UE (1).

Il-mekkaniżmi rilevanti jinkludu Siġilli ta’ Eċċellenza, trasferimenti, finanzjament kumulattiv (li jista’ jintuża wkoll sabiex jappoġġa s-Sħubijiet Kofinanzjati u Istituzzjonalizzati Ewropej ta’ Orizzont Ewropa (HE)), u appoġġ għall-ħolqien ta’ timijiet. Dan id-dokument ta’ gwida jkopri dawn il-mekkaniżmi u s-“sinerġiji upstream/downstream”.

L-għan ta’ dan id-dokument huwa li jiddeskrivi l-opportunitajiet il-ġodda disponibbli għall-awtoritajiet ta’ ġestjoni (MAs) tal-programmi tal-politika ta’ koeżjoni, il-punti ta’ kuntatt nazzjonali tal-HE u l-promoturi/proponenti ta’ proġetti. Id-dokument huwa maħsub ukoll sabiex jagħmilha aktar faċli li jintużaw il-mekkaniżmi rilevanti msemmijin fil-paragrafu preċedenti. Jiffoka fuq sinerġiji bejn l-programmi tal-HE u tal-Fond Ewropew għall-Iżvilupp Reġjonali (FEŻR) (2).

Id-dimensjoni operazzjonali tas-sinerġiji, fejn sar ħafna progress fil-leġiżlazzjoni għall-2021-2027, hija daqstant importanti u tikkomplementa d-dimensjoni strateġika. Skambju regolari ta’ fehmiet dwar is-sinerġiji bejn l-awtoritajiet tal-Istati Membri involuti fil-programmi tal-politika ta’ koeżjoni u l-implimentazzjoni tal-HE jgħinu sabiex titqajjem sensibilizzazzjoni dwar il-possibbiltajiet offruti mis-sinerġiji fl-Istati Membri.

Kuntest strateġiku fil-livell tal-UE

Hija prijorità għall-politika tal-UE li tippromwovi trasformazzjoni ekonomika innovattiva, intelliġenti u sostenibbli u li trawwem l-eċċellenza fir-riċerka u fl-innovazzjoni (R&I), filwaqt li ttaffi u tegħleb ukoll id-distakk persistenti fl-innovazzjoni (id-distakk bejn il-kapaċità ta’ innovazzjoni tas-setturi privati u pubbliċi tal-Istati Membri). L-HE u l-FEŻR huma strumenti importanti tal-UE għall-kisba ta’ riżultati f’dawn l-objettivi interkonnessi.

L-HE jiffoka fuq l-appoġġ tar-R&I eċċellenti, f’konformità mal-Artikolu 179 tat-Trattat dwar il-Funzjonament tal-Unjoni Ewropea (TFUE). Il-politika ta’ koeżjoni għandha l-għan li tippromwovi u tappoġġa l-iżvilupp armonjuż ġenerali tal-Istati Membri u tar-reġjuni tagħhom, f’konformità mal-Artikolu 174 tat-TFUE, b’mod partikolari billi tnaqqas id-disparitajiet reġjonali. L-illustrazzjoni ta’ hawn taħt turi l-elementi strutturali ewlenin tal-appoġġ mill-HE u mill-politika ta’ koeżjoni għar-R&I.

Għalhekk, it-tqarrib tal-politika ta’ koeżjoni u tal-HE kien prijorità importanti għall-Kummissjoni f’dawn l-aħħar snin, b’mod partikolari meta kienet qed tħejji għall-2021-2027. L-għan huwa li jissaħħaħ l-impatt taż-żewġ politiki billi jinħolqu komplementarjetajiet, speċjalment f’reġjuni anqas żviluppati u periferali. Il-promozzjoni ta’ approċċ integrat u t-tisħiħ tas-sinerġiji bejn dawn l-istrumenti ewlenin tal-UE (u l-pilastri u l-objettivi ta’ politika rispettivi tagħhom) jistgħu joffru sitwazzjonijiet ġodda li fihom kulħadd jibbenefika. Wieħed jista’, pereżempju, irawwem żvilupp ekonomiku reġjonali sostenibbli u intelliġenti, filwaqt li fl-istess ħin itejjeb l-ekosistema tal-innovazzjoni tal-UE b’mod ġenerali u jgħinha ttejjeb ir-rispons għall-isfidi ewlenin tas-soċjetà u tiżviluppa ktajjen tal-valur strateġiċi ewlenin.

Dan l-approċċ joħloq opportunitajiet ġodda sabiex jgħin fit-trawwim tal-innovazzjoni fir-reġjuni kollha u sabiex ir-reġjuni anqas żviluppati u periferali jiġu integrati aħjar fiż-Żona Ewropea tar-Riċerka (ŻER) u fl-Ekosistema Ewropea tal-Innovazzjoni (EIE).

Il-Komunikazzjoni tal-Kummissjoni dwar ŻER ġdida għar-R&I (3) kienet pass importanti fil-ħolqien taż-ŻER. L-għan taż-ŻER huwa li tibni l-eċċellenza, il-kooperazzjoni transfruntiera bejn ir-riċerkaturi, il-massa kritika f’oqsma strateġiċi ewlenin, u l-opportunitajiet għar-riċerkaturi sabiex jirrilokaw u fl-aħħar mill-aħħar joħolqu suq uniku miftuħ għar-R&I. Il-pjan il-ġdid li jħares ’il quddiem stabbilit fil-Komunikazzjoni għandu sett ambizzjuż ta’ erba’ objettivi ta’ politika – il-prijoritizzazzjoni tal-investiment u tar-riforma; it-titjib tal-aċċess għall-eċċellenza u t-tisħiħ tas-sistemi tar-R&I madwar l-UE kollha; it-titjib tat-trasferiment ta’ R&I ġodda għan-negozji; u l-approfondiment tal-integrazzjoni tal-politiki nazzjonali.

Barra minn hekk, il-Kummissjoni adottat proposta fis-16 ta’ Lulju 2021 għal Rakkomandazzjoni tal-Kunsill dwar Patt għar-Riċerka u l-Innovazzjoni fl-Ewropa (4). Ir-Rakkomandazzjoni tistabbilixxi għadd ta’ oqsma ta’ prijorità għal azzjoni konġunta b’appoġġ taż-ŻER. Din tinkludi l-ħidma flimkien għall-indirizzar tal-isfidi tat-tranżizzjoni diġitali u ekoloġika (pereżempju, fl-implimentazzjoni ta’ missjonijiet u ta’ Sħubijiet Ewropej permezz tal-HE).

Is-sinerġiji huma bbażati fuq il-fatt li l-MAs tal-programmi rilevanti għar-R&I jkunu jafu lil xulxin u l-programmi tagħhom. Huma bbażati wkoll fuq il-fatt li r-rappreżentanti nazzjonali tar-R&I jkunu jafu l-prijoritajiet u l-azzjonijiet tal-HE (bħal missjonijiet u sħubijiet ġodda) u l-prijoritajiet reġjonali ta’ speċjalizzazzjoni intelliġenti. Dawn il-prijoritajiet u l-azzjonijiet huma punt ta’ referenza eċċellenti għall-iżvilupp tal-komplementarjetajiet. Is-sinerġiji bejn il-qafas tar-R&I u l-programmi ta’ koeżjoni jistgħu jimmassimizzaw l-ammont, il-kwalità u l-impatt tal-investiment fir-R&I, billi jitfasslu pjanijiet strateġiċi li jikkomplementaw lil xulxin u jintużaw flussi ta’ finanzjament differenti (f’konformità mal-objettivi speċifiċi ta’ kull programm/fond).

L-istrateġiji ta’ speċjalizzazzjoni intelliġenti (S3) huma kruċjali għal sinerġiji ma’ strumenti intelliġenti relatati mat-tkabbir fil-livell tal-UE (speċjalment mal-HE). L-istabbiliment tal-prijoritajiet tal-S3 minn isfel għal fuq għandu jagħmilha aktar faċli sabiex jinstabu sħab fi Stati Membri oħrajn bil-ħsieb li jkun hemm kooperazzjoni f’suġġetti u fi ktajjen tal-valur relatati.

Fir-rigward tal-FEŻR, l-Artikolu 11(1)(b)(iii) tar-Regolament dwar Dispożizzjonijiet Komuni (RDK) (5) jirrikjedi li l-Istati Membri jispeċifikaw fil-ftehimiet ta’ sħubija strateġika tagħhom: “komplementarjetajiet u sinerġiji bejn il-fondi koperti mill-Ftehim ta’ Sħubija […] u strumenti oħra tal-Unjoni […] u, meta jkun xieraq, proġetti ffinanzjati taħt Orizzont Ewropa”. Bl-istess mod, għal kull programm tal-politika ta’ koeżjoni, l-Artikolu 22(3)(a)(iii) tar-RDK jeħtieġ sommarju tal-isfidi ewlenin, filwaqt li jitqiesu “[l-]ħtiġijiet ta’ investiment u l-komplementarjetà u s-sinerġiji ma’ forom oħra ta’ appoġġ”.

Fil-każijiet kollha, huwa f’idejn l-MAs li jiddeċiedu jekk jużawx mekkaniżmi ta’ sinerġija jew le.

TIPI TA’ SINERĠIJI

1.   Siġill ta’ Eċċellenza

Is-Siġill ta’ Eċċellenza huwa tikketta ta’ kwalità mogħtija mill-Kummissjoni għal proposta li tkun ġiet sottomessa għal sejħa kompetittiva għal proposti taħt strument tal-UE u ġġudikata li tikkonforma mar-rekwiżiti minimi ta’ kwalità ta’ dak l-istrument tal-UE, iżda li ma setgħetx tiġi ffinanzjata minħabba restrizzjonijiet baġitarji. Is-Siġill ta’ Eċċellenza jindika li proġett jista’ jkun kandidat tajjeb sabiex jirċievi appoġġ minn sorsi oħrajn ta’ finanzjament tal-UE jew nazzjonali.

Siġill ta’ Eċċellenza taħt l-HE jirrikonoxxi l-valur tal-proposta u jgħin lil korpi oħrajn ta’ finanzjament jieħdu vantaġġ mill-proċess ta’ evalwazzjoni tal-HE. Jista’, pereżempju, jingħata lil proposti sottomessi permezz tal-Aċċelleratur tal-Kunsill Ewropew tal-Innovazzjoni (EIC) tal-HE (eks Strument għall-SMEs), it-Tranżizzjoni tal-EIC, l-azzjonijiet Marie Skłodowska-Curie (MSCA), il-Ħolqien ta’ timijiet u Prova tal-Kunċett tal-Kunsill Ewropew tar-Riċerka (ERC).

L-MAs għall-politika ta’ koeżjoni fl-Istati Membri jistgħu jsegwu proċedura ta’ għażla simplifikata meta jittieħdu deċiżjonijiet dwar l-operazzjonijiet ta’ finanzjament b’Siġill ta’ Eċċellenza (6) mill-programmi tal-FEŻR. Dawn l-operazzjonijiet iridu jissodisfaw tliet kriterji:

—	L-ewwel nett, iridu jkunu konsistenti mal-programm (u mal-istrateġiji rilevanti li fuqhom huwa bbażat il-programm) u jipprovdu kontribut effettiv għall-kisba tal-objettivi speċifiċi tal-programm.

—	It-tieni, meta jaqgħu fl-ambitu ta’ kundizzjoni abilitanti, iridu jkunu konsistenti mal-istrateġiji u mad-dokumenti ta’ ppjanar korrispondenti għall-issodisfar ta’ dik il-kundizzjoni abilitanti.

—

It-tielet, iridu jaqgħu fl-ambitu tal-fond rilevanti u jkunu attribwiti għal tip ta’ intervent (7). Leġiżlazzjoni rilevanti RDK L-Artikoli 2(45) u 73(4) u l-premessa (61) HE L-Artikoli 2(23), 15(2), 24(4) u 48(7) Leġiżlazzjoni relatata Ir-Regolament għall-Eżenzjoni Ġenerali Sħiħa (GBER) L-Artikoli 25a u 25b (għajnuna mill-Istat)

Kunsiderazzjonijiet ta’ politika

Is-Siġill ta’ Eċċellenza huwa tikketta ta’ kwalità mogħtija għall-proposti ta’ proġetti ppreżentati lill-HE (il-programm ta’ finanzjament tar-R&I tal-UE sal-2027) u lill-programm predeċessur tiegħu, Orizzont 2020. Is-Siġill ta’ Eċċellenza jiċċertifika li dawn il-proposti huma eċċellenti u jgħolli l-profil tagħhom f’għajnejn il-korpi ta’ finanzjament possibbli (privati jew pubbliċi; nazzjonali jew reġjonali; inklużi l-MAs tal-fondi tal-politika ta’ koeżjoni) interessati li jinvestu fi proġetti promettenti tar-R&I. B’hekk, is-Siġill ta’ Eċċellenza jgħin lil dawn il-proposti jsibu finanzjament alternattiv.

Il-korpi ta’ finanzjament jistgħu wkoll jieħdu vantaġġ mill-proċess ta’ evalwazzjoni tal-HE ferm stabbilit u ta’ kwalità għolja sabiex jippromwovu l-iżvilupp territorjali. Dan jippermetti lill-Istati Membri u lir-reġjuni jidentifikaw u jibbenefikaw minn sensiela ta’ proposti eċċellenti għal proġetti ta’ R&I fit-territorju tagħhom li jtejbu l-prestazzjoni u l-kapaċità tagħhom fir-R&I.

L-applikanti għal proġetti li jirċievu evalwazzjoni pożittiva f’sejħa tal-HE u Siġill ta’ Eċċellenza jistgħu japplikaw għal finanzjament possibbli mill-FEŻR jekk il-proġett ikun allinjat mal-prijoritajiet tal-programmi tal-politika ta’ koeżjoni tal-Istat Membru jew tar-reġjun tal-promoturi tal-proġetti.

Iċ-ċertifikat tas-Siġill ta’ Eċċellenza fih l-informazzjoni bażika kollha dwar il-proposta li hija meħtieġa minn korp ta’ finanzjament li jkun irid jidentifika l-proposta u jifhem il-karatteristiċi ewlenin u l-valur tagħha (it-titolu tal-proposta, ir-referenza għas-sejħa/għas-suġġett, u l-isem u l-indirizz tal-entità legali tal-proponent). Huwa ssiġillat b’mod diġitali kontra l-frodi, kif huma wkoll il-proposta għal proġett u r-rapport fil-qosor ta’ evalwazzjoni (dan huwa indikat fid-dokumenti). Fl-aħħar nett, il-firem tal-Kummissarju għall-Koeżjoni u r-Riformi u l-Kummissarju għall-Innovazzjoni, ir-Riċerka, il-Kultura, l-Edukazzjoni u ż-Żgħażagħ juru l-impenn politiku tagħhom li jimmobilizzaw finanzjament alternattiv għal dawn il-proġetti.

Is-Siġill ta’ Eċċellenza huwa partikolarment adattat għall-komponenti tal-HE b’benefiċjarju wieħed (bħall-Aċċelleratur tal-EIC u Tranżizzjoni tal-EIC, l-MSCA, il-Prova tal-Kunċett tal-ERC, il-Ħolqien ta’ timijiet). Filwaqt li fil-futur jistgħu jitqiesu wkoll Siġilli ta’ Eċċellenza b’diversi benefiċjarji, l-intenzjoni attwali hija li s-Siġill ta’ Eċċellenza jingħata biss lill-komponenti monobenefiċjarji matul l-ewwel fażi tal-HE. Din il-kundizzjoni jeħtieġ li tiġi speċifikata fis-sejħa rilevanti. Il-komponenti li jagħtu s-Siġill ta’ Eċċellenza jiġu indikati fil-programm ta’ ħidma rilevanti.

Il-Kummissjoni tista’ tagħti wkoll Siġilli ta’ Eċċellenza lil proposti ta’ proġetti minn barra l-UE (b’mod partikolari minn pajjiżi assoċjati mal-HE) li jistgħu jużaw sorsi oħrajn ta’ finanzjament li mhumiex marbutin mal-politika ta’ koeżjoni.

L-appoġġ għall-finanzjament tal-proġetti b’Siġill ta’ Eċċellenza minn programm tal-FEŻR huwa volontarju, skont id-deċiżjoni tal-MA u f’konformità mal-programm. Għalhekk, iċ-ċertifikat ma jagħtix dritt awtomatiku li jinkiseb finanzjament alternattiv. Hija possibbiltà li l-Istat Membru jew ir-reġjun jista’ jiddeċiedi li jesplora, iżda d-deċiżjoni finali hija tal-MA rilevanti.

Saru s-simplifikazzjonijiet li ġejjin sabiex jiġi evitat xogħol doppju mingħajr bżonn mill-benefiċjarji u mill-MAs meta jissottomettu, jevalwaw u jagħżlu l-operazzjonijiet għall-appoġġ mill-FEŻR.

—	L-Istati Membri, ir-reġjuni u l-benefiċjarji jistgħu japplikaw il-kategoriji tal-HE, l-ammonti massimi u l-metodi ta’ kalkolu tal-kostijiet eliġibbli li jibbenefikaw minn simplifikazzjonijiet tar-regoli applikabbli tal-UE dwar l-għajnuna mill-Istat (il-GBER).

—

L-evalwazzjoni teknika/tal-kontenut tal-HE titqies valida. Dan ifisser li l-MA ta’ programm tal-FEŻR ma għandhiex għalfejn tagħmel oħra. Madankollu, qabel ma jiġi ffirmat id-dokument li jistabbilixxi l-kundizzjonijiet għall-appoġġ mal-benefiċjarji, l-MAs iridu jivverifikaw li dawk il-proġetti jissodisfaw ir-rekwiżiti speċifiċi tar-RDK u tal-FEŻR li ma humiex koperti mill-evalwazzjoni tal-HE. Dan għaliex dawn il-proġetti jeħtieġ li jintgħażlu formalment f’konformità mar-RDK – jiġifieri eliġibbiltà speċjali (SMEs f’diffikultà), kontribut għal objettivi alternattivi tal-programm ta’ finanzjament, kundizzjonijiet abilitanti applikabbli, u l-ambitu tal-fond (ara l-punti (a), (b) u (g) tal-Artikolu 73(2) tar-RDK).

Passi ewlenin fil-proċess

Preparazzjoni / programmazzjoni	— Il-programmi ta’ ħidma annwali jew biannwali tal-HE jispeċifikaw is-sejħiet li għalihom jistgħu jingħataw is-Siġilli ta’ Eċċellenza. Dawn il-programmi ta’ ħidma tal-HE jistgħu jinqraw u jitniżżlu mill-Portal għall-Finanzjament u għall-Offerti. (https://ec.europa.eu/info/funding-tenders/opportunities/portal/screen/programmes/horizon) — L-Istati Membri u r-reġjuni għandhom jinformaw lill-Kummissjoni jekk ikunu jew ma jkunux lesti li jippermettu lill-programmi tal-FEŻR jipprovdu appoġġ lil proġetti b’Siġill ta’ Eċċellenza tal-HE. L-Istati Membri jew ir-reġjuni jistgħu jinkludu din l-informazzjoni fit-taqsima tal-ftehim ta’ sħubija dwar il-komplementarjetajiet u s-sinerġiji, u fid-deskrizzjoni tal-objettiv speċifiku fil-programm rilevanti tal-FEŻR. L-MA tista’ tiddeċiedi li tappoġġa l-proposti għal proġetti b’Siġill ta’ Eċċellenza anke jekk ma jkunux imsemmijin b’mod espliċitu fil-ftehim ta’ sħubija jew fil-programm. Fi kwalunkwe każ, l-MA trid tiżgura li l-proġetti magħżulin jikkonformaw mal-programm.
Għoti ta’ Siġilli ta’ Eċċellenza mill-Kummissjoni	— Iċ-ċertifikat tas-Siġill ta’ Eċċellenza jingħata lil proposti eliġibbli u jiġi trażmess flimkien ma’ ittra li tinforma lill-proponenti bir-riżultati tal-evalwazzjoni. Il-programmi ta’ ħidma tal-HE jipprovdu aktar dettalji dwar il-kundizzjonijiet u l-proċess sabiex wieħed jirċievi Siġill ta’ Eċċellenza.
Allokazzjoni tal-appoġġ	— Id-detentur ta’ Siġill ta’ Eċċellenza japplika direttament għall-programm tal-FEŻR partikolari. — Il-proġetti b’Siġill ta’ Eċċellenza ma għandhomx għalfejn jgħaddu minn proċess regolari tal-għażla tal-proġetti tal-FEŻR. Madankollu, iridu jgħaddu minn tal-anqas valutazzjoni simplifikata skont il-kriterji tal-għażla approvati mill-Kumitat ta’ Monitoraġġ (il-konformità mal-kundizzjonijiet abilitanti applikabbli, l-ambitu tal-fond, u l-objettivi tal-programm flimkien mar-regoli applikabbli tal-UE dwar l-għajnuna mill-Istat) sabiex jiġi żgurat li l-operazzjonijiet jissodisfaw ir-rekwiżiti stabbiliti fil-punti (a), (b) u (g) tal-Artikolu 73(2) tar-RDK, kif stabbilit mill-Artikolu 73(4) tar-RDK. — Il-valutazzjoni tal-proġetti b’Siġill ta’ Eċċellenza għall-finanzjament mill-FEŻR għandha tkun valutazzjoni simplifikata (verifika tal-konformità), iżda l-proċeduri nazzjonali jistgħu jvarjaw. L-MAs jistgħu jagħżlu x’jikkunsidraw bħala l-aħjar opzjoni (it-tnedija ta’ sejħa miftuħa; “min jiġi l-ewwel jinqeda l-ewwel” eċċ.; jew l-għażla diretta ta’ proġetti meta l-programm jipprovdi din l-opzjoni, diment li jiġu rrispettati l-prinċipji tat-trasparenza u tan-nondiskriminazzjoni). — Għall-appoġġ mill-politika ta’ koeżjoni, l-MAs jistgħu, billi jużaw il-kriterji tal-għażla, jistabbilixxu limiti li huma ogħla mill-punteġġi minimi meħtieġa għall-finanzjament mill-HE. — Is-sit web tas-Siġill ta’ Eċċellenza fih diversi eżempji. (https://research-and-innovation.ec.europa.eu/funding/funding-opportunities/seal-excellence_mt#how) — Il-programm tal-FEŻR huwa mħeġġeġ jinforma lid-DĠ REGIO (l-unità ġeografika rilevanti) u lill-komunità tal-prattika dedikata tas-Siġill ta’ Eċċellenza (RTD-SEAL-OF-EXCELLENCE@ec.europa.eu) dwar l-appoġġ tiegħu għal proġetti b’Siġill ta’ Eċċellenza.
Implimentazzjoni, monitoraġġ u kontroll	— Il-benefiċjarji jimplimentaw proġetti f’konformità mar-regoli u mal-proċeduri tal-politika ta’ koeżjoni. Il-proposti b’Siġill ta’ Eċċellenza huma kofinanzjati f’konformità mar-regoli tar-RDK u mar-regoli speċifiċi tal-FEŻR. Diment li tikkonforma mar-regoli tal-programm, huwa possibbli li l-MA tapplika ċerti kategoriji tar-regoli tal-HE (pereżempju, għall-kategoriji, għall-ammonti massimi u għall-metodi ta’ kalkolu tal-kostijiet eliġibbli). L-MA trid tiddikjara dawn l-elementi fid-dokument li jistabbilixxi l-kundizzjonijiet għall-appoġġ. — Ir-rata ta’ kofinanzjament applikata għall-finanzjament pubbliku ġenerali għall-proġett ma għandhiex taqbeż ir-rata ta’ finanzjament skont ir-regoli tal-programm tal-HE jekk l-appoġġ jingħata fil-forma ta’ għajnuna mill-Istat skont l-Artikoli 25a jew 25b tal-GBER (ara t-taqsima dwar l-għajnuna mill-Istat hawn taħt). — L-istess regoli japplikaw għall-monitoraġġ u għall-kontroll bħal fil-każ ta’ operazzjonijiet oħrajn taħt il-programm rilevanti tal-FEŻR. — Id-dashboard pubbliku tal-HE jipprovdi data aggregata dwar is-Siġill ta’ Eċċellenza, bil-viżwalizzazzjoni tas-Siġill skont il-pajjiż u r-reġjun.

Importanti li tkun taf

Xi ngħidu dwar ir-regoli tal-UE dwar l-għajnuna mill-Istat?

Il-finanzjament mill-programmi tal-FEŻR jista’ jaqa’ taħt ir-regoli tal-UE dwar l-għajnuna mill-Istat jekk il-benefiċjarji jkunu impriżi. F’każijiet bħal dawn, il-finanzjament irid ikun kompatibbli mas-suq intern, fuq il-bażi tar-regoli applikabbli tal-UE dwar l-għajnuna mill-Istat. Għal proġetti li rċevew is-Siġill ta’ Eċċellenza, l-Artikoli 25a u 25b tal-GBER (8) huma possibbiltà għall-Istati Membri sabiex jiżguraw il-kompatibbiltà mas-suq intern. Barra minn hekk, il-GBER jistabbilixxi għadd ta’ kundizzjonijiet ġenerali li jridu jissodisfaw il-miżuri kollha ta’ għajnuna implimentati skont il-GBER, irrispettivament mill-objettiv tagħhom. Il-kundizzjonijiet speċifiċi stabbiliti fl-Artikoli 25a u 25b tal-GBER jippermettu finanzjament mill-FEŻR għal proġetti li rċevew Siġill ta’ Eċċellenza – bl-istess rata ta’ finanzjament u bl-istess kostijiet eliġibbli tal-HE – mingħajr notifika formali minn qabel lill-Kummissjoni u mingħajr il-ħtieġa li ssir evalwazzjoni teknika oħra. L-awtorità li tagħti l-għajnuna hija obbligata tikkonforma mal-kundizzjonijiet ġenerali u speċifiċi applikabbli tal-GBER meta tagħti l-finanzjament. Minbarra l-applikazzjoni oriġinali tal-HE, id-detentur ta’ Siġill ta’ Eċċellenza jrid jissodisfa l-kriterji tal-għażla applikabbli għall-proġetti b’Siġill ta’ Eċċellenza stabbiliti mill-MA u jrid jiżgura wkoll li jikkonforma mar-regoli applikabbli dwar l-għajnuna mill-Istat.

Bħala MA/korp ta’ finanzjament ieħor, kif nistgħu nibqgħu informati dwar l-iżviluppi u l-aħjar prattiki fl-appoġġ għal proposti għal Siġill ta’ Eċċellenza?

Il-komunità tal-prattika dedikata għas-Siġill ta’ Eċċellenza se tkompli tippermetti lill-MAs interessati tal-FEŻR u lil korpi ta’ finanzjament oħrajn jiskambjaw l-aħjar prattiki dwar kif jappoġġaw il-proposti għal Siġill ta’ Eċċellenza, jibqgħu aġġornati dwar l-aħħar żviluppi, u jaċċessaw l-informazzjoni u d-data rilevanti kollha dwar il-proposti għal Siġill ta’ Eċċellenza fir-reġjuni tagħhom (numru, finanzjament mitlub, eċċ.). Dan għandu jagħmilha aktar faċli li jiġu ppjanati skemi ta’ finanzjament alternattivi.

Bħala MA/korp ta’ finanzjament ieħor, kif nistgħu nibqgħu informati dwar il-proposti fil-pajjiż/fir-reġjun tagħna li rċevew is-Siġill ta’ Eċċellenza?

Id-detenturi ta’ Siġill ta’ Eċċellenza huma mitluba jagħtu l-kunsens tagħhom għal sett limitat ta’ informazzjoni (jiġifieri dettalji ta’ kuntatt bħall-isem tal-kumpanija, l-indirizz tal-kumpanija u l-indirizz tal-posta elettronika tal-persuna ta’ kuntatt, astratt tal-proposta, l-ammont ta’ appoġġ finanzjarju mitlub, u l-kliem ewlieni li jintuża) li għandha tiġi kondiviża mal-MAs għall-politika ta’ koeżjoni u ma’ entitajiet pubbliċi jew privati oħrajn li jkunu potenzjalment interessati li jiffinanzjaw jew jappoġġaw il-kumpanija tagħhom. L-MAs se jkunu jistgħu jaċċessaw din l-informazzjoni u jikkuntattjaw lid-detentur ta’ Siġill ta’ Eċċellenza. Fuq is-sit web dedikat għas-Siġill ta’ Eċċellenza, hija pprovduta aktar informazzjoni dwar kif jintuża s-Siġill ta’ Eċċellenza u kif għandhom jinstabu d-dettalji ta’ kuntatt tal-MAs għal kull pajjiż.

B’liema kundizzjonijiet l-MAs jistgħu jiffinanzjaw proġetti li kienu japplikaw għall-HE iżda li ma ntgħażlux għall-finanzjament tal-HE u ma rċevewx Siġill ta’ Eċċellenza?

Sabiex il-politika ta’ koeżjoni tappoġġa proġett li ma jkollux Siġill ta’ Eċċellenza, il-proġett irid jgħaddi mill-valutazzjoni sħiħa standard meħtieġa skont programm tal-politika ta’ koeżjoni (il-valutazzjoni simplifikata tapplika biss għal proġetti b’Siġill ta’ Eċċellenza u għal operazzjonijiet magħżulin taħt programm kofinanzjat mill-HE).

Eżempju prattiku

Proġett b’Siġill ta’ Eċċellenza mill-Aċċelleratur tal-EIC tal-HE (il-programm ta’ ħidma tal-EIC 2022, p 74, inklużi n-noti 63 u 64 f’qiegħ il-paġna):

SME tapplika bi tweġiba għal sejħa tal-HE u tgħaddi l-passi ta’ evalwazzjoni ta’ qabel il-ġurija (“GO”) stabbiliti fil-programm ta’ ħidma annwali tal-EIC. Minkejja l-kwalità għolja tagħha, il-ġurija tal-EIC ssib li l-proposta għal proġett ma tistax tiġi ffinanzjata minħabba nuqqas ta’ fondi disponibbli suffiċjenti. L-SME normalment tirċievi Siġill ta’ Eċċellenza (ħlief f’każijiet speċifiċi stabbiliti fil-programm ta’ ħidma tal-EIC – pereżempju, meta l-SME ma tagħtix kunsens għall-kondiviżjoni ta’ informazzjoni dwar il-proposta tagħha).

Imbagħad, SME li jkollha Siġill ta’ Eċċellenza tkun tista’ tavviċina korpi ta’ finanzjament oħrajn – pereżempju, l-MAs tal-programmi tal-politika ta’ koeżjoni. Bl-awtorizzazzjoni minn qabel tal-applikant, il-Kummissjoni tista’ wkoll taqsam informazzjoni bażika, b’mod partikolari d-dettalji ta’ kuntatt, dwar l-applikazzjoni li tirnexxi. Fir-rigward tar-riżultati tal-evalwazzjoni u ta’ data sensittiva oħra, il-komunikazzjoni tagħhom lill-awtoritajiet ta’ finanzjament interessati hija soġġetta għall-konklużjoni ta’ ftehimiet speċifiċi ta’ kunfidenzjalità. Barra minn hekk, u bil-kunsens tal-applikant, il-Kummissjoni tista’ taqsam informazzjoni ma’ organizzazzjonijiet oħrajn li jistgħu jappoġġaw lill-SMEs – pereżempju, in-Network Enterprise Europe (EEN). L-EEN jista’ jipprovdi servizzi ta’ appoġġ individwali lill-SMEs li għandhom Siġill ta’ Eċċellenza sabiex jgħinhom jidentifikaw sorsi ta’ finanzjament alternattivi rilevanti (inklużi programmi ffinanzjati mill-FEŻR), u sabiex jgħinhom fi kwalunkwe proċess ta’ applikazzjoni (inkluż aġġustament possibbli tal-proposta għal proġett), fil-bini tal-kapaċitajiet għall-proċessi ta’ applikazzjoni u għall-ħiliet ta’ preżentazzjoni, u jagħtihom links ma’ servizzi ta’ appoġġ rilevanti oħrajn bħal dawk ta’ tlaqqigħ u ta’ identifikazzjoni ta’ sħab kummerċjali xierqa. Is-servizzi tal-EEN, imfasslin apposta għall-ħtiġijiet ta’ kull detentur individwali ta’ Siġill ta’ Eċċellenza, jieħdu l-forma ta’ pakketti ta’ servizzi ta’ bejn tlett ijiem u ħamest ijiem ipprovduti mingħajr ħlas lill-SME inkwistjoni.

Sabiex jappoġġaw il-proġetti b’Siġill ta’ Eċċellenza, l-MAs jistgħu jiddeċiedu li l-kategoriji, l-ammonti massimi u l-metodi ta’ kalkolu tal-kostijiet eliġibbli jsegwu r-regoli tal-HE diment li jiġu ssodisfati l-kundizzjonijiet ta’ kompatibbiltà tal-għajnuna mill-Istat stabbiliti skont l-Artikolu 25a u l-Kapitolu 1 tal-GBER. Jekk iva, ikunu jistgħu japplikaw ir-regoli għall-Aċċelleratur stabbiliti fil-Programm Qafas Orizzont (“il-komponent tal-għotja jew tal-avvanz rimborsabbli tal-appoġġ tal-Aċċelleratur ma għandux jeċċedi s-70 % tal-kostijiet eliġibbli totali tal-azzjoni magħżula ta’ innovazzjoni” – l-Artikolu 48(9) tar-Regolament dwar il-Programm Qafas Orizzont) (9). Barra minn hekk, kif spjegat fil-Programm Speċifiku Orizzont (il-punt 1.1.2), “[i]l-kombinazzjoni u l-volum tal-finanzjament” taħt l-Aċċelleratur “se jiġu adattati għall-ħtiġijiet tal-kumpanija, id-daqs tagħha u l-istadju, in-natura tat-teknoloġija jew tal-innovazzjoni u t-tul taċ-ċiklu tal-innovazzjoni” (10).

Jekk previst fil-programm ta’ ħidma, id-detenturi ta’ Siġill ta’ Eċċellenza tal-EIC tal-HE jistgħu jibbenefikaw minn avvenimenti ta’ tlaqqigħ organizzati mis-servizzi ta’ aċċellerazzjoni tan-negozju tal-EIC sabiex jgħaqqdu l-komunità tal-innovaturi tal-EIC – inklużi dawk li għandhom Siġill ta’ Eċċellenza – u investituri, sħab u xerrejja pubbliċi. Is-servizzi ta’ aċċellerazzjoni tan-negozju tal-EIC jipprovdu wkoll firxa ta’ servizzi ta’ kkowċjar u ta’ mentoraġġ, u jipprovdu lill-innovaturi b’aċċess għal networks internazzjonali ta’ sħab potenzjali, inklużi sħab industrijali potenzjali, sabiex jikkomplementaw katina tal-valur, jiżviluppaw opportunitajiet tas-suq u/jew isibu investituri jew sorsi oħrajn ta’ finanzjament privat jew korporattiv (11).

Il-proposti dwar Siġill ta’ Eċċellenza tal-Aċċelleratur tal-EIC jiġu promossi mhux biss fost l-MAs tal-FEŻR, iżda wkoll fost sorsi ta’ finanzjament privat (eż. permezz ta’ avvenimenti speċifiċi ta’ pitching elettroniku u ta’ tlaqqigħ organizzati minn networks u minn komunitajiet dedikati għas-Siġill ta’ Eċċellenza, u billi jiġi mmarkat is-Siġill ta’ Eċċellenza fil-portal InvestEU).

2.   Trasferimenti mill-FEŻR għal Orizzont Ewropa

Skont l-Artikolu 26(1) tar-RDK, l-Istati Membri jistgħu jitolbu t-trasferiment ta’ massimu ta’ 5 % tar-riżorsi tagħhom permezz ta’ ġestjoni kondiviża għal kwalunkwe fond jew strument ieħor tal-UE permezz ta’ ġestjoni diretta jew indiretta. Il-limitu ta’ 5 % japplika għall-allokazzjoni nazzjonali inizjali ta’ fond partikolari u mhux għal programm jew (kategorija ta’) reġjun speċifiku. Ir-riżorsi ttrasferiti jistgħu jintużaw biss għal impenji baġitarji futuri (jiġifieri għas-snin ta’ wara). Ir-riżorsi jridu jintużaw għall-benefiċċju tal-Istat Membru kkonċernat (12).

Dawn l-ammonti ttrasferiti ma jgħoddux għall-konċentrazzjoni tematika għall-FEŻR.

L-HE jippermetti lill-partijiet kollha tiegħu jirċievu trasferimenti ta’ riżorsi minn programmi ta’ ġestjoni kondiviża.

Leġiżlazzjoni rilevanti	RDK	L-Artikolu 26 tar-RDK Trasferiment ta’ riżorsi u l-premessa (19)
	Orizzont Ewropa	L-Artikolu 15(5), (6)
Leġiżlazzjoni relatata	RDK	L-Artikolu 24 (Emendar ta’ programmi)

Kunsiderazzjonijiet ta’ politika

L-MAs jistgħu jużaw trasferimenti sabiex jippermettu li l-proposti eċċellenti tal-HE mill-Istat Membru/mir-reġjun tagħhom jipparteċipaw fl-HE meta r-restrizzjonijiet baġitarji kieku ma jħalluhomx jintgħażlu għall-appoġġ mill-HE.

It-trasferimenti jistgħu jżidu l-valur meta jkunu diretti lejn żoni tar-R&I li jkunu ġew identifikati bħala prijoritajiet fl-S3 nazzjonali u/jew reġjonali u li tipikament ikunu sottoskritti wisq fis-sejħiet tal-HE. Madankollu, ma huwiex rekwiżit legali li l-investimenti koperti mill-fondi ttrasferiti jkunu jaqblu mal-prijoritajiet ta’ speċjalizzazzjoni intelliġenti.

It-trasferimenti jipprovdu opportunitajiet għal, fost l-oħrajn:

—	it-tisħiħ tal-parteċipazzjoni fl-HE minn benefiċjarji minn reġjuni/Stati Membri li tradizzjonalment kellhom rata baxxa ta’ parteċipazzjoni u ta’ suċċess fl-HE;

—	l-għoti ta’ spinta lil proġetti f’oqsma identifikati bħala prijoritajiet permezz ta’ speċjalizzazzjoni intelliġenti;

—

il-preżervazzjoni tal-kapaċità amministrattiva fil-livell nazzjonali/reġjonali fl-għażla u fis-segwitu tal-proġetti tar-R&I, minħabba li dawn ma jsirux mill-MA skont ir-regoli tar-RDK, iżda mill-aġenzija rispettiva skont ir-regoli tal-HE (speċjalment meta ma jkunx hemm biżżejjed proġetti eċċellenti sabiex jiġġustifikaw sejħa sħiħa fil-livell nazzjonali/reġjonali skont il-programm tar-RDK; meta jkun hemm għadd kbir ta’ dawn il-proposti eċċellenti taħt l-HE; jew meta l-MA tal-programm tar-RDK tkun trid tiddiversifika t-tip ta’ appoġġ tagħha).

It-trasferimenti huma partikolarment adattati għall-komponenti b’benefiċjarju wieħed. L-ewwel fażi tal-HE tippermetti t-trasferiment biss għal dawn il-komponenti.

Ir-riżorsi ttrasferiti jridu jintużaw għall-benefiċċju tal-Istat Membru kkonċernat. Stat Membru jista’ jillimita l-ambitu territorjali tat-trasferiment għal reġjun speċifiku (jiġifieri r-reġjun kopert minn programm tal-politika ta’ koeżjoni li minnu jiġu ttrasferiti r-riżorsi).

It-trasferimenti jistgħu jippermettu lill-Istati Membri jew lir-reġjuni b’rati baxxi ta’ parteċipazzjoni fl-HE jibnu l-kapaċitajiet tagħhom tar-R&I billi jżidu l-parteċipazzjoni tal-entitajiet legali tagħhom stess fl-HE. Dan għaliex trasferiment jista’ jibbenefika biss lill-benefiċjarji minn dak l-Istat Membru/ir-reġjun partikolari.

Trasferiment għall-HE jista’ jipprovdi wkoll opportunitajiet ta’ apprendiment għall-promoturi ta’ proġetti bħall-SMEs jew l-universitajiet, minħabba li jkunu jistgħu jidħlu fil-proċess tal-HE bis-saħħa tar-riżorsi żejda magħmula disponibbli għall-HE bit-trasferiment mill-Istat Membru jew mir-reġjun tagħhom. Il-proġett jidħol fil-proċess tal-preparazzjoni tal-għotjiet, u jkun kompletament soġġett għar-regoli tal-HE, inklużi r-rati ta’ finanzjament. L-aġenzija rilevanti tal-Kummissjoni timmonitorja l-proġett matul id-durata tiegħu.

Passi ewlenin fil-proċess

Preparazzjoni	— It-trasferimenti jridu jiġu speċifikati b’mod espliċitu fil-ftehim ta’ sħubija (jew f’talba għal emenda għal programm jekk ikun hemm qbil dwarha mill-Kumitat ta’ Monitoraġġ (MC)) (13). Jekk it-trasferimenti inizjalment ma jkunux indikati fil-ftehim ta’ sħubija, xorta jistgħu jintalbu fi kwalunkwe ħin aktar tard permezz ta’ talba għal emenda għall-programm ta’ ġestjoni kondiviża inkwistjoni (inkluż il-pjan ta’ finanzjament tiegħu). — Trasferimenti permezz ta’ emenda tal-programm jeħtieġu l-approvazzjoni minn qabel tal-MC. Barra minn hekk, “[m]eta t-talba għal trasferiment tikkonċerna emenda ta’ programm, jistgħu jiġu trasferiti biss riżorsi ta’ snin kalendarji futuri.” Ara l-Artikoli 24 u 26 tar-RDK għal aktar dettalji dwar ir-rekwiżiti. — Meta jintalab trasferiment, l-Istat Membru/MA jrid/trid jispjega/tispjega kif it-trasferiment ikun ta’ benefiċċju għall-Istat Membru li jittrasferixxi jew għar-reġjuni speċifiċi (fil-każ ta’ programm reġjonali), u kif dan jgħin sabiex jintlaħqu l-objettivi tal-istrument li jirċievi. Sabiex tiffaċilita l-implimentazzjoni, it-talba tista’ tispeċifika l-komponent tal-HE (eż. l-Aċċelleratur tal-EIC) fil-mira tat-trasferiment. — Sabiex jiddefinixxu l-komponent u l-ammont li għandu jiġi ttrasferit, is-servizzi tal-Kummissjoni jistgħu jipprovdu stima tal-ammont li x’aktarx jiġi assorbit fil-perjodu inkwistjoni, fuq il-bażi tar-rekord ta’ dak l-Istat Membru/ir-reġjun fil-komponent magħżul.
Valutazzjoni tat-talbiet mill-Kummissjoni	— Il-Kummissjoni trid toġġezzjona għal talba għal trasferiment jekk dan jimmina l-ilħuq tal-objettivi tal-programm li minnu jiġu ttrasferiti r-riżorsi. — Jekk il-Kummissjoni tapprova t-trasferiment, dan jiġi kkonfermat uffiċjalment fid-deċiżjoni li tapprova l-ftehim ta’ sħubija jew l-emenda tal-programm. — L-iskeda ta’ żmien għall-approvazzjoni tat-talba għal trasferiment hija ppreżentata hawn taħt din it-tabella.
Allokazzjoni tal-appoġġ	— Ladarba t-trasferiment jiġi approvat, isir disponibbli għall-HE fis-sena kalendarja ta’ wara għal sejħiet ta’ dik is-sena. Minn dak iż-żmien, imbagħad it-trasferiment ikun jista’ jintuża għall-benefiċċju tal-Istat Membru/tar-reġjun ikkonċernat. Jista’ jappoġġa proposti li jinsabu fir-reġjuni/fil-pajjiż ta’ trasferiment u li ġew evalwati b’mod pożittiv minn esperti indipendenti, iżda ma setgħux jiġu aċċettati minħabba restrizzjonijiet baġitarji. It-trasferiment jissupplimenta – aktar milli jissostitwixxi – l-appoġġ mill-baġit oriġinali tal-HE. — Il-proġetti jintgħażlu fuq il-bażi tal-lista ta’ klassifikazzjoni li tirriżulta mill-evalwazzjoni tal-HE jew minn regoli speċifiċi (filwaqt li tiġi rrispettata d-delimitazzjoni nazzjonali/reġjonali tal-ammont ittrasferit). Fil-każ tal-Aċċelleratur tal-EIC, il-baġit ittrasferit jiġi allokat fuq bażi ta’ “min jiġi l-ewwel jinqeda l-ewwel” f’konformità mal-ippjanar tal-limitu (il-proċessi tal-għażla jitnedew kull 3 xhur) sakemm jintuża kollu. — Ir-regoli tal-HE japplikaw għall-ammonti ttrasferiti, li huma soġġetti għall-istess kundizzjonijiet ta’ implimentazzjoni tal-proġett bħal kwalunkwe proġett ieħor tal-HE. — Il-livell tal-kodiċi tan-NUTS 2 jintuża sabiex jiġi ddefinit ir-reġjun. Id-data dwar il-proġetti ffinanzjati (analizzati skont ir-reġjun) hija disponibbli għall-pubbliku fuq id-dashboard tal-HE. Id-dashboard tindika li l-proġett kien appoġġat bi flus ittrasferiti.
Implimentazzjoni, monitoraġġ u kontroll	— Wara t-trasferiment, l-implimentazzjoni (li tinkludi l-monitoraġġ) titwettaq esklussivament mill-Kummissjoni skont ir-regoli tal-HE, mhux aktar mill-MAs tal-programmi permezz ta’ ġestjoni kondiviża. Madankollu, l-MAs għandhom rwol x’jaqdu fil-każ ta’ trasferimenti lura għall-politika ta’ koeżjoni u tas-sottomissjoni ta’ emenda għall-programm. — It-trasferiment ma jkollu l-ebda konsegwenza diretta għall-promoturi jew għall-benefiċjarji tal-proġetti, li jsegwu r-regoli u l-proċeduri tal-HE.

Skeda ta’ żmien għat-talbiet ta’ trasferiment

Fażi Nru 1: Talba ta’ trasferiment ta’ fondi minn strument tal-politika ta’ koeżjoni

1.1   Talba ta’ trasferiment permezz ta’ ftehim ta’ sħubija

1.2   Talba ta’ trasferiment inkluża fl-emenda tal-programm.

Fażi Nru 2: Implimentazzjoni tal-fondi ttrasferiti permezz tal-HE

Importanti li tkun taf

Ir-riżorsi ttrasferiti jistgħu jiġu ttrasferiti lura għall-fond oriġinali tagħhom?

Jekk il-Kummissjoni ma tkunx impenjat legalment il-flus ittrasferiti skont HE sal-31 ta’ Awwissu tas-sena n+1, ir-riżorsi mhux impenjati korrispondenti jistgħu jiġu ttrasferiti lura għall-fond li minnu jkunu ġew inizjalment ittrasferiti. Imbagħad jistgħu jiġu rriallokati għal programm wieħed jew aktar (l-Artikolu 26(7) tar-RDK, l-Artikolu 15(6) tal-HE) fuq talba tal-Istat Membru.

Tapplika l-istess proċedura għat-talba ta’ emenda ta’ programm (l-Artikolu 24 tar-RDK) u t-talba trid tiġi ppreżentata lill-Kummissjoni tal-anqas 4 xhur qabel l-iskadenza għall-impenji (finanzjarji) (jiġifieri sal-31 ta’ Awwissu tas-sena n+1).

Ir-riżorsi li jiġu ttrasferiti lura mbagħad jiġu allokati mill-ġdid lill-programm(i) riċeventi u jkunu soġġetti għar-regoli tar-RDK.

Jekk il-Kummissjoni jkollha bżonn tirkupra fondi mill-benefiċjarji tal-HE li jkunu rċevew trasferiment mill-FEŻR, dawn il-fondi jiġu rritornati lill-programm tal-FEŻR?

Le. L-approprjazzjonijiet ma jirritornawx għal-linja baġitarja oriġinali (FEŻR), iżda jibqgħu mal-programm rilevanti. F’dan il-każ speċifiku, jibqgħu mal-programm tal-HE (li lilu jkunu ġew ittrasferiti mill-FEŻR).

Eżempju prattiku:

Stat Membru jiddeċiedi li jittrasferixxi parti mir-riżorsi ta’ programm partikolari tal-FEŻR għas-snin kalendarji futuri lil HE (14) billi jemenda l-programm f’konformità mal-Artikolu 24 tar-RDK.

Il-Kummissjoni taqbel li t-trasferiment kien ġustifikat kif xieraq u huwa allinjat mal-objettivi tal-programm li minnu jiġu ttrasferiti r-riżorsi. Il-Kummissjoni tapprova l-emenda tal-programm, wara li l-MC ikun esprima l-qbil tiegħu. L-Istati Membri u l-Kummissjoni jiddiskutu wkoll l-ambitu ġeografiku (iddeterminat mit-territorju tal-programm li jittrasferixxi), l-użu maħsub tar-riżorsi ttrasferiti permezz tal-HE (fil-livell tal-komponent tal-HE) u l-ammont li għandu jiġi ttrasferit fuq il-bażi tal-“kapaċità ta’ assorbiment” stmata (pereżempju, bl-użu ta’ statistika storika dwar il-parteċipazzjoni għal sejħiet simili ta’ dak il-pajjiż/ir-reġjun).

L-Istat Membru għandu l-ħsieb li juża r-riżorsi ttrasferiti sabiex jiffinanzja l-proposti ta’ SMEs taħt is-sejħa tal-HE tal-Aċċelleratur tal-EIC. Għandu l-ħsieb li jagħmel dan permezz ta’ ftehimiet ta’ għotja li għandhom jiġu konklużi sa mhux aktar tard mill-aħħar tas-sena n+1 (jiġifieri s-sena ta’ wara s-sena li fiha r-riżorsi jiġu ttrasferiti għall-HE).

Ir-riżorsi jintużaw sabiex jiffinanzjaw il-proposti ta’ SMEs sottomessi taħt l-Aċċelleratur tal-EIC li ġew evalwati wara d-deċiżjoni tal-Istat Membru li jittrasferixxi l-flus.

L-HE (fil-preżent) ikopri kwalunkwe kost amministrattiv addizzjonali għall-eżekuzzjoni tat-trasferiment. Valutazzjoni ta’ jekk dan l-approċċ jistax jinżamm issir bħala parti mir-rieżami ta’ nofs it-terminu tal-programm.

L-Istat Membru jista’ jitlob li r-riżorsi mhux impenjati jiġu ttrasferiti lura lill-FEŻR sa 4 xhur qabel tmiem is-sena n+1 (jiġifieri sal-31 ta’ Awwissu). Jagħmel dan billi titlob emenda għall-programm(i) li fih(om) jiġu inklużi dawn ir-riżorsi. It-talba hija soġġetta għall-approvazzjoni tal-Kummissjoni. Ir-regola tad-diżimpenn tibda tapplika mis-sena li fiha jsiru l-impenji baġitarji korrispondenti.

3.   Finanzjament kumulattiv

Finanzjament kumulattiv ifisser li operazzjoni/proġett jirċievi appoġġ minn aktar minn fond, minn programm jew minn strument wieħed (inklużi kemm fondi kondiviżi kif ukoll ġestiti direttament) għall-istess partita ta’ kost/tan-nefqa. Kif inhu l-każ għall-mekkaniżmi l-oħrajn ta’ sinerġija, il-finanzjament kumulattiv ma huwiex awtomatiku. Minflok, huwa opzjoni li tista’ tiġi esplorata mill-MAs għall-politika ta’ koeżjoni u mill-awtorità tal-għoti għal programmi tal-UE ġestiti direttament. Il-finanzjament kumulattiv jista’ jiġi applikat biss bil-qbil tal-partijiet kollha involuti (jiġifieri l-MAs u l-awtorità tal-għoti għal programmi tal-UE ġestiti direttament).

Leġiżlazzjoni rilevanti	RDK	L-Artikolu 63(9)
	HE	L-Artikolu 15(4)
Leġiżlazzjoni relatata	Programm Ewropa Diġitali	L-Artikolu 23(1) (15)

Kunsiderazzjonijiet ta’ politika/benefiċċji potenzjali

Il-finanzjament kumulattiv jagħmilha possibbli li l-piż finanzjarju ta’ operazzjoni jinfirex u li jiġu indirizzati r-restrizzjonijiet baġitarji possibbli (eż. dawk li jirriżultaw mir-rati ta’ finanzjament aktar baxxi ta’ strument) minħabba li jista’ jippermetti li sa 100 % ta’ proġett ta’ sinerġija jiġi ffinanzjat mill-baġit tal-UE, diment li tinżamm il-konformità mar-regoli rilevanti dwar l-għajnuna mill-Istat. Jagħmilha wkoll possibbli li jiġu appoġġati l-kontribuzzjonijiet nazzjonali, b’mod partikolari fl-Istati Membri u fir-reġjuni anqas żviluppati.

Il-finanzjament kumulattiv jista’ wkoll jiġbor flimkien ir-riżorsi minn strumenti differenti tal-UE kemm permezz ta’ ġestjoni diretta kif ukoll kondiviża, u jagħmel possibbli finanzjament ta’ 100 % mir-riżorsi tal-UE. Għalhekk, il-finanzjament kumulattiv jipprovdi opportunità sabiex jissaħħu r-rabtiet bejn il-prijoritajiet komplementari tar-R&I tas-sejħiet tal-HE u l-programmi tal-FEŻR (u l-S3 relatati).

Passi ewlenin fil-proċess

Preparazzjoni / programmazzjoni	— Il-finanzjament kumulattiv bejn il-ġestjoni diretta u kondiviża huwa possibbli għall-istess nefqa ta’ operazzjoni, diment li jsiru arranġamenti speċifiċi sabiex tiġi żgurata l-konformità mal-Artikoli 63(9) tar-RDK u 191(3) tar-Regolament Finanzjarju. L-awtoritajiet tal-programmi għandhom jagħtu attenzjoni partikolari għall-interpretazzjoni li ġejja tal-Artikolu 63(9) tar-RDK u l-Artikolu 191(3) tar-RF u jimplimentaw finanzjament kumulattiv skont il-passi prattiċi ta’ hawn taħt. — L-ewwel subparagrafu tal-Artikolu 63(9) tar-RDK jipprovdi projbizzjoni ta’ dikjarazzjoni doppja tan-nefqa skont ir-RDK, billi jiddikjara li l-istess partita tan-nefqa tista’ tiġi rrimborżata biss permezz ta’ strument ta’ finanzjament uniku tal-Unjoni u li ma jista’ jkun hemm l-ebda finanzjament doppju tal-Unjoni marbut mal-istess partita tan-nefqa. Din il-projbizzjoni ta’ dikjarazzjoni doppja tapplika fir-rigward tan-nefqa ddikjarata f’applikazzjoni ta’ pagament minn awtorità ta’ ġestjoni lill-Kummissjoni u mhux fir-rigward ta’ talba għall-pagament sottomessa lill-awtoritajiet nazzjonali minn benefiċjarju għal operazzjoni speċifika. — Din id-dispożizzjoni tikkorrispondi għall-Artikolu 191(3) tar-RF. Madankollu, ir-Regolament Finanzjarju jippermetti l-għoti kumulattiv ta’ għotjiet mill-baġit tal-UE, jekk ikun awtorizzat mill-atti bażiċi. Għall-QFP 2021-2027, il-biċċa l-kbira tal-atti bażiċi, inkluż Orizzont Ewropa, jippermettu l-akkumulazzjoni ta’ għotjiet, diment li dawn ma jħallsux lura aktar minn 100 % tal-kostijiet eliġibbli. — L-MA tista’ tiddikjara fil-programm tal-politika ta’ koeżjoni l-intenzjoni tagħha li tippermetti finanzjament kumulattiv u l-oqsma li fihom tali finanzjament joffri benefiċċji. Anke jekk il-programm ma jirreferix għal dan il-mekkaniżmu, il-finanzjament kumulattiv xorta jista’ jiġi applikat jekk l-operazzjonijiet ikunu konformi mal-prijoritajiet tal-programm. — Imbagħad, l-MAs u s-servizzi tal-Kummissjoni/l-awtorità tal-għoti (għall-programm tal-UE ġestit direttament inkwistjoni) jistgħu jaqblu li jniedu sejħiet koordinati. Dawn is-sejħiet għandhom: — ikunu koordinati bejn l-MAs u s-servizzi tal-Kummissjoni/l-awtorità tal-għoti u idealment jitnedew fl-istess ħin; — isemmu li jekk l-applikant jagħżel li japplika għas-sejħiet taż-żewġ strumenti u jekk iż-żewġ applikazzjonijiet jiġu aċċettati, il-proġett jista’ jirċievi finanzjament kumulattiv (jiġifieri appoġġ miż-żewġ strumenti); — jispjegaw li, għal kull għotja, għandhom jiġu rrispettati l-proċeduri u r-regoli ta’ eliġibbiltà applikabbli. — jiddefinixxu r-rati u l-kundizzjonijiet ta’ finanzjament li japplikaw fit-tliet xenarji li ġejjin: (i) jekk l-applikant jagħżel li japplika għas-sejħiet taż-żewġ strumenti u ż-żewġ applikazzjonijiet jiġu aċċettati; (ii) jekk l-applikant jagħżel li japplika għas-sejħiet taż-żewġ strumenti, iżda waħda biss mill-applikazzjonijiet tiġi aċċettata; (iii) jekk l-applikant jagħżel li japplika għal waħda biss mis-sejħiet taż-żewġ strumenti. Barra minn hekk, is-sejħiet għandhom jindikaw: — ir-regoli ta’ eliġibbiltà (skont is-sors tal-finanzjament, jista’ jkun hemm żewġ settijiet separati ta’ regoli tal-eliġibbiltà), il-perjodu ta’ eliġibbiltà tal-kostijiet, id-durata tal-proġett, il-perjodi ta’ rapportar, l-iskadenzi għall-approvazzjoni taż-żewġ għotjiet (l-MAs rilevanti u l-awtorità tal-għoti għall-programm tal-UE ġestit direttament għandhom jikkoordinaw l-iskadenzi minn qabel) — ir-rati ta’ finanzjament li jiġu applikati permezz taż-żewġ strumenti (skont ir-regoli legali rispettivi). Ir-rati ta’ finanzjament kombinati ma jistgħux jaqbżu l-100 % tal-kostijiet eliġibbli u jridu jikkonformaw mar-regoli dwar l-għajnuna mill-Istat. — il-kontenut li l-applikanti għandhom jippreżentaw fil-proposti tagħhom (aktar informazzjoni hija pprovduta hawn taħt “allokazzjoni għall-appoġġ”).
Allokazzjoni tal-appoġġ	— Il-proposti għandhom jinkludu l-elementi kollha li l-MA u l-awtorità tal-għoti għall-programm tal-UE ġestit direttament jevalwaw fil-proċessi tal-għażla rispettivi tagħhom. — L-għażla u l-evalwazzjoni tal-proposti jitwettqu separatament għal kull sejħa, skont il-mekkaniżmi u r-regoli ta’ kull strument. — L-għażla permezz ta’ sejħa waħda ma hijiex garanzija tal-għażla permezz ta’ sejħa oħra. — Il-proposti jridu jindikaw jekk l-applikant ikunx se japplika jew le bi tweġiba għas-sejħa tal-istrument l-ieħor. Jekk it-tweġiba tkun “iva”, il-ħtieġa għal koordinazzjoni effiċjenti tal-istrumenti ta’ finanzjament tfisser li l-applikazzjoni trid tindika wkoll jekk l-applikant ikollux l-intenzjoni li jipproċedi bil-proġett potenzjalment kofinanzjat jekk il-proġett (i) jintgħażel biss mill-MA jew (ii) jintgħażel biss mill-awtorità tal-għoti permezz tal-programm tal-UE ġestit direttament. — Jekk tirnexxi waħda biss mill-applikazzjonijiet, l-awtorità responsabbli (l-MA jew l-awtorità tal-għoti ta’ ġestjoni diretta) tikkonkludi ftehim ta’ għotja mal-benefiċjarju f’konformità mar-regoli tal-fond/tal-istrument rispettiv. Pereżempju, jekk il-ftehim ikun mal-MA (għall-appoġġ taħt programm tal-politika ta’ koeżjoni), japplikaw ir-RDK u r-regoli tal-UE dwar l-għajnuna mill-Istat u jinħareġ id-dokument li jistabbilixxi l-kundizzjonijiet għall-appoġġ. — Fil-każ ta’ applikazzjoni u ta’ għażla permezz taż-żewġ sejħiet, il-benefiċjarju għandu jikkonkludi żewġ ftehimiet ta’ għotja separati – wieħed mal-MA, l-hekk imsejjaħ dokument li jistabbilixxi l-kundizzjonijiet għall-appoġġ, u ieħor mal-awtorità tal-għoti għall-programm tal-UE ġestit direttament. Kull ftehim ta’ għotja għandu (i) jiddikjara r-regoli applikabbli tal-fond/tal-istrument rispettiv u (ii) jindika r-rabta mal-għotja l-oħra. Ftehim ta’ għotja permezz ta’ programm tal-UE ġestit direttament huwa mmarkat bħala “azzjoni ta’ sinerġija” fl-Iskeda tad-Data (jew matul il-preparazzjoni tal-għotja jew matul emenda tal-għotja) u jiġu attivati d-dispożizzjonijiet fakultattivi korrispondenti. — L-awtoritajiet rispettivi (l-MAs u l-awtoritajiet tal-għoti għal programmi ġestiti direttament) iridu jiżguraw li r-rati ta’ finanzjament kombinati applikati fil-livell ta’ operazzjoni ma jaqbżux il-100 % tal-kostijiet eliġibbli. — Taħt ġestjoni kondiviża, ir-rata ta’ finanzjament applikata fil-livell ta’ operazzjoni u r-rata ta’ kofinanzjament fil-livell tal-prijorità rilevanti jistgħu jvarjaw. Fl-azzjonijiet ta’ sinerġija, għandha titqies ir-rata ta’ kofinanzjament fil-livell ta’ prijorità, iżda fl-aħħar mill-aħħar tkun ir-rata ta’ finanzjament fil-livell tal-operazzjoni kif stabbilita fid-dokument li jistabbilixxi l-kundizzjonijiet għall-appoġġ li tintuża għall-finijiet ta’ rikonċiljazzjoni mar-rata ta’ finanzjament fil-programm ġestit direttament u jiġi żgurat li l-kopertura mill-baġit tal-Unjoni ma taqbiżx il-100 %.
Implimentazzjoni, monitoraġġ u kontroll	Implimentazzjoni — Sabiex ikun jista’ jsir finanzjament ta’ 100 % mill-baġit tal-Unjoni f’konformità mal-intenzjoni għal azzjonijiet ta’ sinerġija, għandha ssir dikjarazzjoni unika tan-nefqa magħmula lill-Kummissjoni għall-proġett ta’ sinerġija partikolari. Din id-dikjarazzjoni unika għandha ssir mill-awtoritajiet ta’ ġestjoni kondiviżi lill-Kummissjoni f’applikazzjoni ta’ pagament (u tkopri l-kostijiet eliġibbli ddikjarati mill-benefiċjarju lill-MA li jiżdiedu bħala informazzjoni addizzjonali mill-MA f’din l-applikazzjoni ta’ pagament lill-Kummissjoni). B’dan il-mod, il-projbizzjoni ta’ dikjarazzjoni doppja tan-nefqa lill-Kummissjoni skont l-Artikolu 63(9) tar-RDK ma tinkisirx għall-finijiet tal-pagamenti permezz ta’ ġestjoni kondiviża. — Għalhekk, il-benefiċjarju l-ewwel irid jiddikjara n-nefqa eliġibbli kollha lill-MA f’konformità mat-termini tal-għotja. — L-MA tinforma lill-benefiċjarju meta n-nefqa tkun inkluża f’applikazzjoni ta’ pagament lill-Kummissjoni permezz ta’ ġestjoni kondiviża. Dan japplika għal kwalunkwe applikazzjoni ta’ pagament sottomessa f’konformità mal-Artikolu 91 tar-RDK: għall-programmi tal-FEŻR, l-Istat Membru għandu jissottometti massimu ta’ sitt applikazzjonijiet ta’ pagament għal kull programm, għal kull Fond u għal kull sena kontabilistika. Kull sena tkun tista’ tiġi sottomessa applikazzjoni waħda ta’ pagament fi kwalunkwe ħin f’kull perjodu ta’ żmien bejn id-dati li ġejjin: it-28 ta’ Frar, il-31 ta’ Mejju, il-31 ta’ Lulju, il-31 ta’ Ottubru, it-30 ta’ Novembru u l-31 ta’ Diċembru. — Imbagħad, kopja ta’ dikjarazzjoni mill-benefiċjarju lill-MA (flimkien ma’ kopja tal-informazzjoni tal-MA lill-benefiċjarju li tikkonferma li n-nefqa kienet inkluża f’applikazzjoni ta’ pagament lill-Kummissjoni) tiġi mehmuża bħala dokument ta’ sostenn mal-applikazzjoni ta’ pagament introdotta fuq eGrants mill-benefiċjarju. — Taħt l-ebda ċirkostanza l-kostijiet ma għandhom l-ewwel jiġu inklużi f’applikazzjoni ta’ pagament taħt l-għotja ġestita direttament peress li din tagħmilhom ineliġibbli għal ġestjoni kondiviża. — Fir-rigward tal-applikazzjoni ta’ pagament sottomessa mill-MA lill-Kummissjoni, il-kontribuzzjoni mill-FEŻR issegwi r-regoli dwar ir-rata ta’ kofinanzjament u l-appoġġ massimu mill-fondi għal kull waħda mill-prijoritajiet stabbiliti fl-Artikolu 112 tar-RDK (kofinanzjament fil-livell ta’ prijorità). Il-kontribuzzjoni mill-programm ġestit direttament ma tgħoddx għal din ir-rata ta’ kofinanzjament u għandha tiġi ppreżentata bħala kontribuzzjoni (pubblika) nazzjonali. — Ta’ min jinnota li l-applikazzjonijiet ta’ pagament permezz ta’ ġestjoni kondiviża jsiru fil-livell tal-prijoritajiet u mhux għal kull operazzjoni. Għal kull applikazzjoni ta’ pagament, l-MA għandha tispeċifika l-ammonti relatati mal-proġetti ta’ sinerġija f’kull prijorità. — Ladarba n-nefqa tiġi inkluża f’applikazzjoni ta’ pagament lill-Kummissjoni mill-MA, il-benefiċjarju/il-koordinatur itella’ fuq eGrants kopja tad-dikjarazzjoni sottomessa lill-MA (flimkien ma’ kopja tal-informazzjoni tal-MA lill-benefiċjarju li tikkonferma li n-nefqa kienet inkluża f’applikazzjoni ta’ pagament lill-Kummissjoni) u jipprovdi informazzjoni dwar ir-rata ta’ kofinanzjament applikata/li għandha tiġi applikata fil-livell ta’ operazzjoni u fil-livell tal-assi prijoritarju mill-MA u fl-istess ħin idaħħal l-informazzjoni kollha dwar l-implimentazzjoni tal-azzjoni kif meħtieġ mir-regoli tal-programm ġestit direttament (bl-użu tal-Portal għall-Finanzjament u għall-Offerti għall-ġestjoni elettronika tal-għotjiet tal-UE). — Dan ifisser li l-benefiċjarju ma jkunx jista’ jitħallas mill-ġestjoni diretta qabel ma tiġi ppreżentata din il-kopja tad-dikjarazzjoni lill-MA, li jfisser stennija għal massimu ta’ xahrejn. — Iż-żewġ awtoritajiet tal-għoti għandu jkollhom biżżejjed informazzjoni u evidenza dwar il-finanzjament eżistenti jew ippjanat l-ieħor tal-UE sabiex jevitaw finanzjament doppju matul iċ-ċiklu tal-ħajja ta’ azzjoni ta’ sinerġija. Sakemm il-kontribuzzjonijiet ikunu limitati għal ċertu ammont fuq il-bażi ta’ perċentwal koordinat tal-kostijiet eliġibbli, l-appoġġ totali kombinat tal-UE ma jaqbiżx il-kostijiet totali. — Tiġi vverifikata r-responsabbiltà għall-iżgurar tal-konformità mar-regoli dwar l-għajnuna mill-Istat. — L-implimentazzjoni ta’ dan l-approċċ ma tirrikjedix li jittieħdu miżuri addizzjonali mill-awtoritajiet tal-programm permezz ta’ ġestjoni kondiviża għajr li l-benefiċjarju jiġi informat bid-data meta n-nefqa rilevanti tiġi ddikjarata lill-Kummissjoni. Monitoraġġ — Ma ssir l-ebda eċċezzjoni għar-regoli għall-finanzjament kumulattiv għall-finijiet tar-rapportar tal-FEŻR. Għandu jimtela l-Anness VII tar-RDK u għandhom jitqiesu l-kontribuzzjonijiet tal-FEŻR. — Għall-finijiet tal-applikazzjonijiet ta’ pagament f’konformità mal-Anness XXIII tar-RDK, il-kontribuzzjonijiet tal-FEŻR għandhom jiġu kklassifikati bħala finanzjament tal-UE. B’kuntrast ma’ dan, il-kontribuzzjonijiet mill-istrumenti ġestiti direttament għandhom jiġu ppreżentati taħt it-tab pubblika (nazzjonali). — L-MA u l-awtorità tal-għoti ta’ ġestjoni diretta jistabbilixxu l-iskadenzi għar-rapportar u għall-pagament skont ir-regoli applikabbli sabiex jippermettu l-approċċ sekwenzjali deskritt hawn fuq (jiġifieri l-ewwel dikjarazzjoni lill-MA (u mill-MA lill-Kummissjoni) u mbagħad kopja lill-istrument ġestit direttament). — Il-benefiċjarji jridu jsegwu r-regoli għall-implimentazzjoni, għall-monitoraġġ u għall-kontroll tal-istrumenti/tal-fondi kollha involuti. Jekk l-awtorità tal-għoti tal-programm/tal-fond ġestit direttament tkun teħtieġ ċertifikat dwar ir-rapporti finanzjarji (CFS) fl-għotja ġestita direttament, l-awditur tas-CFS jista’ jiddependi wkoll fuq ċertifikati tal-awditjar fuq in-nefqa ta’ ġestjoni kondiviża (sa fejn ikopru l-istess kostijiet u kundizzjonijiet ta’ eliġibbiltà identiċi). — Il-proġetti jistgħu jirċievu prefinanzjament jew pagamenti antiċipati f’konformità mar-regoli legali applikabbli u mar-rata ta’ finanzjament miftiehma minn qabel.

Importanti li tkun taf

Xi ngħidu dwar ir-regoli tal-UE dwar l-għajnuna mill-Istat?

Ir-regoli tal-UE dwar l-għajnuna mill-Istat japplikaw għall-parti tal-proġett iffinanzjata mill-FEŻR. Ir-regoli dwar il-kumulazzjoni tal-finanzjament pubbliku stabbiliti fir-regoli tal-UE dwar l-għajnuna mill-Istat li jistabbilixxu l-finanzjament pubbliku totali possibbli għall-proġett/għall-attività jeħtieġ li jiġu vverifikati u applikati b’mod korrett ukoll.

Fil-każ ta’ finanzjament kumulattiv, il-korp nazzjonali ta’ finanzjament jew il-benefiċjarji jibqgħu meħtieġa jikkontribwixxu parti mill-finanzjament?

Dak jiddependi mir-rati ta’ finanzjament stabbiliti fil-livell tal-proġett għaż-żewġ sorsi ta’ finanzjament. Fil-każ tal-FEŻR, japplikaw ir-regoli dwar l-għajnuna mill-Istat u jiddeterminaw ir-rata massima permissibbli ta’ finanzjament fil-livell operazzjonali. Sabiex tiġi vverifikata l-konformità mar-rata massima permissibbli ta’ finanzjament, irid jitqies il-finanzjament pubbliku kollu fil-livell tal-proġett, inkluż l-appoġġ riċevut, pereżempju, mill-FEŻR u mill-HE u fi kwalunkwe forma.

4.   Sħubijiet Ewropej

L-użu tal-FEŻR bħala kontribuzzjoni nazzjonali għal Sħubijiet Ewropej Kofinanzjati u Istituzzjonalizzati

“Sħubija Ewropea” tfisser inizjattiva li fiha l-UE u s-sħab privati u/jew pubbliċi (bħall-industrija, il-korpi pubbliċi jew il-fondazzjonijiet) jimpenjaw ruħhom li jappoġġaw b’mod konġunt l-iżvilupp u l-implimentazzjoni ta’ programm ta’ attivitajiet ta’ R&I. Aġenda Strateġika ta’ Riċerka u Innovazzjoni – li s-sħab kollha jaqsmu u jimpenjaw ruħhom għaliha – hija l-bażi ta’ kull Sħubija Ewropea. Din il-viżjoni fit-tul tissarraf f’attivitajiet konkreti permezz ta’ programmi ta’ ħidma annwali. Is-Sħubijiet Ewropej iridu jiddikjaraw l-objettivi u l-miri konkreti tagħhom, flimkien ma’ sett ta’ indikaturi ewlenin korrispondenti tal-prestazzjoni.

F’konformità mal-Artikolu 73(4) tar-RDK, l-MAs jistgħu jiddeċiedu li jipprovdu appoġġ direttament mill-FEŻR għal operazzjonijiet magħżula permezz ta’ programm kofinanzjat mill-HE (bħal Sħubija Ewropea Kofinanzjata jew Istituzzjonalizzata).

L-Artikolu 15(3) tar-Regolament dwar l-HE jiddikjara li l-kontribuzzjonijiet finanzjarji mill-programmi tal-FEŻR (16) jistgħu jitqiesu bħala kontribuzzjoni mill-Istat Membru parteċipanti għal Sħubija Ewropea Kofinanzjata jew Istituzzjonalizzata, diment li dan ikun konformi mar-regoli tar-RDK. Il-korpi li jimplimentaw il-programmi kofinanzjati mill-HE jridu jiġu identifikati bħala korpi intermedji tal-programm rilevanti tal-FEŻR (l-Artikolu 71(5) tar-RDK). Dan jagħmilha aktar faċli li jiġu kkoordinati u sinkronizzati l-HE, il-programm tal-FEŻR rilevanti u l-appoġġ nazzjonali. Il-programmi tal-FEŻR jistgħu jkopru l-kontribuzzjoni nazzjonali (jew parti minnha) għall-parteċipazzjoni f’dawn is-Sħubijiet Ewropej. Deċiżjoni ta’ kontribuzzjoni għal sħubija trid tirriżulta minn proċess tal-għażla li jkun ikkonforma mar-regoli tal-politika ta’ koeżjoni.

Barra minn hekk u b’mod simili għas-Siġill ta’ Eċċellenza, l-MAs jistgħu jipprovdu tali kontribuzzjoni direttament (mingħajr il-ħtieġa ta’ sejħa kompetittiva u ta’ proċedura ta’ għażla separata) għal operazzjonijiet li ntgħażlu taħt programm kofinanzjat mill-HE f’konformità mal-Artikolu 73(4) tar-RDK. Madankollu, kif inhu wkoll il-każ għas-Siġill ta’ Eċċellenza, l-MAs xorta għandhom iwettqu valutazzjoni simplifikata, filwaqt li jivverifikaw li dawn il-proġetti jikkonformaw mal-punti (a), (b) u (g) tal-Artikolu 73(2) tar-RDK. Dawn l-operazzjonijiet għandhom (i) ikunu konsistenti mal-programm, inkluż mal-istrateġiji rilevanti li fuqhom huwa bbażat il-programm, u jipprovdu kontribuzzjoni effettiva għall-kisba tal-objettivi speċifiċi tal-programm, (ii) jaqgħu fl-ambitu ta’ kundizzjoni abilitanti u jkunu konsistenti mal-istrateġiji u mad-dokumenti ta’ ppjanar korrispondenti stabbiliti għall-issodisfar ta’ dik il-kundizzjoni abilitanti, u (iii) jaqgħu fi ħdan l-ambitu tal-fond rilevanti u jkunu attribwiti għal tip ta’ intervent.

L-MAs jistgħu japplikaw b’mod simili l-kategoriji, l-ammonti massimi u l-metodi ta’ kalkolu tal-kostijiet eliġibbli stabbiliti permezz tal-HE għal dawn l-operazzjonijiet.

Il-konformità mar-regoli dwar l-għajnuna mill-Istat tista’ tiġi żgurata billi jiġu rrispettati l-kundizzjonijiet ta’ kompatibbiltà tal-Artikolu 25c tal-GBER li joffri possibbiltajiet sabiex jiġu applikati l-kostijiet eliġibbli u r-rati ta’ finanzjament ta’ Orizzont Ewropa għall-proġetti ta’ riċerka u ta’ żvilupp magħżulin permezz ta’ programm kofinanzjat minn Orizzont li jissodisfa l-kundizzjonijiet stabbiliti f’dan l-Artikolu.

Il-kontribuzzjonijiet tal-programmi tal-FEŻR għas-Sħubijiet Ewropej iridu jikkonformaw mar-regoli dwar il-projbizzjoni tad-dikjarazzjoni doppja tan-nefqa stabbiliti fl-Artikolu 63(9) tar-RDK. L-istess kostijiet ma jistgħux jiġu ddikjarati darbtejn lill-Kummissjoni. Żewġ tipi ta’ Sħubijiet Ewropej huma rilevanti għall-implimentazzjoni tal-Artikolu 15(3) tar-Regolament dwar l-HE.

—

Is-Sħubijiet Ewropej kofinanzjati (appoġġati permezz ta’ “azzjoni kofinanzjata minn programm”) huma bbażati fuq ftehim ta’ għotja bejn il-Kummissjoni u konsorzju ta’ sħab (tipikament ministeri nazzjonali jew aġenziji ta’ finanzjament tar-R&I). Is-sħab jimpenjaw ruħhom għal kontribuzzjonijiet finanzjarji u in natura. Dawn huma sħubijiet li jinvolvu pajjiżi tal-UE ma’ finanzjaturi tar-riċerka nazzjonali/reġjonali u ma’ awtoritajiet pubbliċi oħrajn fil-qalba tal-konsorzju. L-UE tipprovdi kofinanzjament għal programm implimentat minn entitajiet li jimmaniġġjaw u jiffinanzjaw attivitajiet ta’ R&I. L-attivitajiet ewlenin żviluppati minn Sħubijiet Ewropej Kofinanzjati jinkludu sejħiet konġunti li permezz tagħhom jiġu ffinanzjati proġetti tranżnazzjonali tar-R&I, u li fihom kull sieħeb jipprovdi l-baġit għall-entitajiet tiegħu li jipparteċipaw fil-proġetti u l-UE tipprovdi finanzjament supplimentari.

—

Is-Sħubijiet Ewropej Istituzzjonalizzati huma programmi tar-R&I. Jistgħu jitwettqu minn (i) diversi Stati Membri (fuq il-bażi ta’ deċiżjoni mill-Kunsill u mill-Parlament Ewropew f’konformità mal-Artikolu 185 tat-TFUE), (ii) korpi stabbiliti b’deċiżjoni tal-Kunsill skont l-Artikolu 187 tat-TFUE (pereżempju, impriżi konġunti), jew (iii) Komunitajiet Ewropej ta’ Konoxxenza u Innovazzjoni tal-Istitut Ewropew tal-Innovazzjoni u t-Teknoloġija (EIT) f’konformità mar-Regolament dwar l-EIT u l-Aġenda Strateġika ta’ Innovazzjoni tal-EIT. Huma mistennija jkollhom perspettiva fit-tul u jinvolvu xi integrazzjoni.

L-Illustrazzjoni 1 ta’ hawn taħt tagħti ħarsa ġenerali lejn is-Sħubijiet Ewropej Kofinanzjati, Koprogrammati u Istituzzjonalizzati kollha skont l-ewwel Pjan Strateġiku 2019-2024 tal-HE. L-għoxrin Sħubija Ewropea Kofinanzjata u Istituzzjonalizzata bil-parteċipazzjoni tal-Istati Membri huma rilevanti għall-applikazzjoni tal-Artikolu 15(3) tar-Regolament dwar l-HE.

Illustrazzjoni 1.

Ħarsa ġenerali lejn l-erba’ raggruppamenti ta’ Sħubijiet Ewropej

Tajjeb li tkun taf Is-Sħubijiet Ewropej Kofinanzjati huma bbażati fuq memorandum ta’ qbil iffirmat bejn il-Kummissjoni u s-sħab minbarra l-UE. Dawn is-sħubijiet ma humiex eliġibbli sabiex jużaw l-FEŻR bħala kontribuzzjoni nazzjonali minħabba li ma hemm l-ebda opzjoni li jikkombinaw il-finanzjament (huwa possibbli biss finanzjament parallel jew sekwenzjali). Għal dawn it-tipi ta’ sħubijiet, huwa possibbli li l-FEŻR jintuża bħala kontribuzzjoni nazzjonali għall-attivitajiet addizzjonali tas-sħubijiet jekk dawn jiġu identifikati fil-pjan ta’ attivitajiet addizzjonali. Il-Cloud Ewropew tax-Xjenza Miftuħa bħalissa huwa l-unika Sħubija Ewropea Koprogrammata bil-parteċipazzjoni tal-Istati Membri.

Leġiżlazzjoni rilevanti	RDK	L-Artikoli 63(9), 71(5) u 73(4) u l-premessa (61)
	Orizzont Ewropa	L-Artikolu 15(3)
Leġiżlazzjoni relatata	GBER	L-Artikoli 25c u 25d (għajnuna mill-Istat)

Kunsiderazzjonijiet ta’ politika/benefiċċji potenzjali

Is-Sħubijiet Ewropej huma stabbiliti sabiex iwettqu l-prijoritajiet tal-UE. Billi jingħaqdu flimkien kemm mas-settur pubbliku kif ukoll ma’ dak privat, jagħmluha possibbli li jiġu indirizzati l-isfidi globali li jeħtieġu massa kritika u viżjoni fit-tul li s-sħab jaqblu dwarhom u jimpenjaw ruħhom għalihom. Is-sħubijiet mhux biss iniedu sejħiet konġunti, iżda jwettqu wkoll varjetà ta’ attivitajiet addizzjonali sabiex jappoġġaw l-adozzjoni soċjetali, tas-suq u regolatorja tar-riżultati tar-R&I.

Is-Sħubijiet Ewropej huma mutur ewlieni għas-sinerġiji minħabba li jagħmluha possibbli li jiġi kondiviż u kkoordinat l-użu tar-riżorsi disponibbli minn strumenti, minn programmi u minn fondi tal-UE u nazzjonali differenti. Jgħinu wkoll sabiex tissaħħaħ iż-ŻER billi jistimolaw il-kooperazzjoni transfruntiera, jallinjaw il-pjanijiet tar-R&I, itejbu l-ħiliet u jżidu l-kapaċità ta’ assorbiment tan-negozji Ewropej. L-għan partikolari ta’ Sħubija Ewropea bil-parteċipazzjoni tal-Istati Membri huwa li tinkiseb integrazzjoni xjentifika, maniġerjali u finanzjarja tal-programmi nazzjonali ta’ riċerka fil-qasam partikolari tagħha. Il-parteċipazzjoni tal-Istati Membri tat-“Twessigħ tal-Parteċipazzjoni” fis-sħubijiet tar-R&I tal-UE kienet limitata fil-passat minħabba nuqqas ta’ esperjenza jew ta’ finanzjament disponibbli għall-kollaborazzjoni tranżnazzjonali. Is-Sħubijiet Ewropej huma maħsubin sabiex jindirizzaw il-prijoritajiet tal-UE, u għalhekk huwa importanti li tissaħħaħ il-parteċipazzjoni ta’ pajjiżi sottorappreżentati, li jittejbu l-komplementarjetajiet madwar l-UE u li jinqasmu l-benefiċċji li jirriżultaw. Dan huwa partikolarment rilevanti minħabba li xi prijoritajiet tal-HE huma indirizzati biss minn Sħubijiet Ewropej. Dan ifisser li l-Istati Membri jridu jipparteċipaw sabiex l-entitajiet tagħhom ikunu jistgħu jieħdu sehem fis-sejħiet u f’attivitajiet oħrajn imnedijin mis-sħubijiet.

Il-possibbiltà li l-kontribuzzjonijiet mill-programmi tal-FEŻR jiġu rrikonoxxuti bħala kontribuzzjonijiet nazzjonali fis-sħubijiet tal-HE tipprovdi inċentiv kbir għall-kollaborazzjoni tranżnazzjonali. Iżżid ukoll l-impatt tal-investimenti fir-R&I minn fondi differenti tal-UE billi l-investiment jiġi allinjat mal-prijoritajiet komuni tal-UE.

Ir-regoli l-ġodda jagħmluha aktar faċli li l-FEŻR u l-fondi tal-HE jiġu rraggruppati fi Sħubijiet kofinanzjati ta’ Orizzont, u b’hekk jinħolqu opportunitajiet għar-reġjuni sabiex jingħaqdu ma’ pajjiżi u ma’ reġjuni oħrajn tal-UE sabiex jindirizzaw il-prijoritajiet ta’ speċjalizzazzjoni intelliġenti relatati. Il-gwadann ewlieni huwa l-opportunità li tiżdied il-parteċipazzjoni ta’ reġjuni u ta’ Stati Membri anqas żviluppati f’kollaborazzjoni tranżnazzjonali fi ħdan il-qafas ta’ sħubijiet.

Għalhekk, il-kofinanzjament ipprovdut mill-UE permezz ta’ sħubijiet jista’ joħloq valur miżjud partikolari meta l-prijoritajiet identifikati taħt l-HE u permezz tal-S3 jikkorrispondu jew jikkomplementaw lil xulxin.

Passi ewlenin fil-proċess – Sħubijiet Ewropej Kofinanzjati

Preparazzjoni / programmazzjoni

— L-awtoritajiet nazzjonali/il-partijiet ikkonċernati għandhom jidħlu fi djalogu mal-MA tagħhom ferm qabel in-negozjar formali tal-programm mal-Kummissjoni. — L-MA u l-partijiet ikkonċernati nazzjonali/reġjonali għandhom jidentifikaw il-prijoritajiet tar-R&I fil-programmi f’konformità mal-prijoritajiet tal-S3, jippjanaw miżuri xierqa ta’ finanzjament tal-politika ta’ koeżjoni u jiftħu djalogu mal-koordinaturi/mal-punti ta’ kuntatt tas-Sħubijiet Ewropej Kofinanzjati sabiex jifhmu t-tipi ta’ attivitajiet u r-riżorsi li jeħtieġ li jiġu ppjanati. — Għas-Sħubijiet Ewropej Kofinanzjati, jintlaħaq qbil dwar kollox fil-kuntest ta’ ftehim ta’ għotja – inkluża r-rata ta’ rimborż tal-UE tal-kostijiet eliġibbli u l-baġit ġenerali għad-durata kollha tas-sħubija. Il-pjan ta’ ħidma annwali, li jrid jiġi approvat mill-Kummissjoni, jiddeskrivi l-attivitajiet tas-sħubija. Il-konsorzju nnifsu jiddeċiedi kif għandu jalloka l-finanzjament tal-UE filwaqt li jirrispetta r-regoli stabbiliti fid-dokument li jistabbilixxi l-kundizzjonijiet tal-appoġġ. — Il-kontribuzzjoni totali tal-UE tiġi kkalkolata bħala perċentwal tal-kostijiet eliġibbli totali. Ir-rata ta’ finanzjament taħt l-HE għal Sħubijiet Ewropej Kofinanzjati normalment tkun ta’ 30 % (50 % f’każijiet eċċezzjonali). Konsorzju għandu diskrezzjoni sħiħa meta jiddeċiedi kif jalloka l-kontribuzzjoni tal-UE għas-sħubija ppjanata bejn il-benefiċjarji li jkunu parti għall-ftehim ta’ għotja tal-HE – u dan jista’ jirriżulta f’rati ta’ finanzjament ogħla jew aktar baxxi għal attivitajiet u/jew għal benefiċjarji speċifiċi. Jekk programm tal-FEŻR jipprovdi, f’konformità mal-objettivi tiegħu, appoġġ mill-FEŻR għal programm kofinanzjat mill-HE, il-korpi li jimplimentaw l-attivitajiet li jirriżultaw mill-programm kofinanzjat mill-HE (eż. korpi ta’ finanzjament nazzjonali) għandhom jiġu ddeżinjati bħala korpi intermedji taħt il-programmi rilevanti. F’konformità mal-Artikolu 71(3) tar-RDK, l-arranġamenti bejn l-MA u l-korp(i) intermedju/i għandhom jiġu rreġistrati bil-miktub. — Il-kontribuzzjoni minn programm tal-FEŻR tkun għal proġett speċifiku ffinanzjat fil-livell nazzjonali jew reġjonali, u r-riċevitur ta’ din il-kontribuzzjoni jkun il-benefiċjarju ta’ dan il-proġett (it-terminu “operazzjoni” jintuża fil-kuntest tal-politika ta’ koeżjoni). — Il-pjanijiet għall-kontribuzzjoni għall-proġetti magħżulin fi ħdan is-Sħubijiet Ewropej ma’ xi kontribuzzjoni nazzjonali għandhom jiġu stabbiliti bi spjegazzjoni fil-programm tal-FEŻR. — Il-kontribuzzjoni ta’ programm tal-FEŻR għal Sħubija Ewropea trid taqa’ fi ħdan l-ambitu tal-kundizzjoni abilitanti applikabbli (jiġifieri l-S3) u trid tkun konsistenti mal-objettivi u mal-ambitu korrispondenti speċifiċi għall-programm. Il-kontribuzzjoni għal Sħubija Ewropea tista’ tiġi identifikata wkoll kmieni, fl-S3 rilevanti, bħala miżura sabiex tissaħħaħ il-kooperazzjoni f’oqsma ta’ prijorità ma’ sħab minn barra Stat Membru partikolari.

Allokazzjoni tal-appoġġ

— Għall-operazzjonijiet magħżulin skont programm ta’ attivitajiet kofinanzjati mill-HE, l-MA tista’ tiddeċiedi li tagħti appoġġ direttament mill-programm tal-FEŻR, diment li tikkonforma mar-rekwiżiti stabbiliti fl-Artikolu 73(4) tar-RDK (relatati mal-konformità mal-objettivi tal-programm, mal-ambitu tal-fond u mal-kundizzjonijiet abilitanti applikabbli). L-MAs jistgħu japplikaw ukoll il-kategoriji, l-ammonti massimi u l-metodi ta’ kalkolu tal-kostijiet eliġibbli stabbiliti permezz tal-HE (dawn għandhom jiġu stabbiliti fid-dokument li jistabbilixxi l-kundizzjonijiet għall-appoġġ). — Il-ġestjoni finanzjarja ta’ Sħubija Ewropea Kofinanzjata hija l-istess bħal kwalunkwe proġett ieħor tal-HE (jiġifieri l-benefiċjarji mill-ftehim ta’ għotja jwettqu attivitajiet u jirrapportaw l-kostijiet tagħhom lill-Kummissjoni). — Il-kostijiet irrapportati jridu jikkonformaw mar-regoli ta’ eliġibbiltà tal-kostijiet tal-HE u mar-regoli speċifiċi għall-azzjonijiet kofinanzjati tal-programm kif definiti fil-Mudell tal-Ftehim ta’ Għotja (eż. jeħtieġ li jiġu segwiti r-regoli għall-għażla ta’ proġetti tranżnazzjonali). Kemm kontribuzzjonijiet in natura kif ukoll dawk finanzjarji huma possibbli, diment li jkunu eliġibbli skont il-fondi tal-politika ta’ koeżjoni u Orizzont Ewropa. — Għall-HE, il-kostijiet eliġibbli jiġu rrimborżati f’konformità mar-rata ta’ finanzjament applikabbli (din normalment tkun ta’ 30 % tal-ammont globali ġġenerat mill-konsorzju, li jista’ jinkludi “kontribuzzjonijiet finanzjarji taħt programmi kofinanzjati mill-FEŻR” f’konformità mal-Artikolu 15(3) tar-Regolament dwar l-HE). — Il-kontribuzzjoni mill-HE tiġi ttrasferita permezz tal-koordinatur lill-korp ta’ finanzjament nazzjonali u tintuża bħala finanzjament addizzjonali għall-programm ta’ attivitajiet. — Il-konsorzju li jimplimenta l-azzjonijiet kofinanzjati tal-programm jiġġestixxi l-kontribuzzjoni tal-UE b’mod awtonomu u jiddeċiedi (pereżempju, fil-ftehim ta’ konsorzju tiegħu) kif jalloka u jqassam il-fondi għall-attivitajiet u għall-benefiċjarji. Il-benefiċjarji tal-azzjoni kofinanzjata tal-programm (il-korpi ta’ finanzjament nazzjonali) jirrapportaw il-kostijiet eliġibbli tagħhom lill-MA. Kopja tad-dikjarazzjoni tiġi kondiviża mal-awtorità tal-għoti tal-HE. — L-istess proċess bħal dak għall-finanzjament kumulattiv japplika meta jagħti kontribuzzjoni programm tal-FEŻR (ara aktar ’il fuq).

Eżempju prattiku

—	Stat Membru jew reġjun jipparteċipa f’konsorzju ta’ korpi ta’ finanzjament nazzjonali fi Sħubija Ewropea Kofinanzjata.

—	L-Istat Membru jew ir-reġjun għandu l-ħsieb li juża programm tal-FEŻR sabiex ikopri parti mill-kontribuzzjoni nazzjonali għas-Sħubija Ewropea Kofinanzjata.

—	Il-korp nazzjonali ta’ finanzjament (jiġifieri l-korp intermedju tal-programm tal-FEŻR) jirrapporta lill-HE li qiegħed jipprovdi EUR 100 miljun f’appoġġ finanzjarju/f’finanzjament lill-benefiċjarji tiegħu. Il-korp nazzjonali ta’ finanzjament jirċievi rimborż ta’ 30 % mill-HE (EUR 30 miljun).

—	Is-EUR 70 miljun li jifdal jistgħu jiġu kofinanzjati mill-programm tal-FEŻR (eż. b’rata ta’ kofinanzjament ta’ 50 %; ir-rata ta’ kofinanzjament tal-prijorità tal-programm trid tiġi rrispettata – l-Artikolu 112 tar-RDK).

—	Għalhekk, il-kost totali ta’ EUR 100 miljun ikun kopert kif ġej: EUR 30 miljun mill-HE, EUR 35 miljun mill-FEŻR u EUR 35 miljun mill-baġit nazzjonali.

—	In-nefqa u l-kostijiet għandhom jiġu ddikjarati u rrapportati f’konformità mar-regoli għall-finanzjament kumulattiv stabbiliti hawn fuq.

Illustrazzjoni 2.

Kif taħdem Sħubija Ewropea Kofinanzjata?

Eżempji prattiċi ta’ sejħa konġunta tranżnazzjonali - benefiċjarju magħżul fil-livell nazzjonali minn aġenzija nazzjonali ta’ finanzjament. L-eżempji li ġejjin huma ipotetiċi. Id-deċiżjoni finali hija tal-Istat Membru rilevanti. Kull Stat Membru involut fi Sħubija Ewropea Kofinanzjata tipikament jiffinanzja lill-parteċipanti tiegħu fil-livell nazzjonali permezz tal-proċeduri nazzjonali tiegħu stess u billi jsegwi r-regoli nazzjonali tiegħu stess. Minn perspettiva tal-Mudell tal-Ftehim ta’ Għotja ta’ sħubija kofinanzjata ta’ Orizzont Ewropa, jitqies bħala riċevitur ta’ “appoġġ finanzjarju lil parti terza”. Minn perspettiva nazzjonali, dan il-benefiċjarju nazzjonali jista’ jkun wieħed jew ieħor minn dawn li ġejjin: 1. Iffinanzjat bis-sħiħ minn programm kofinanzjat mill-FEŻR. — Il-benefiċjarju nazzjonali jiffirma ftehim ta’ għotja nazzjonali wieħed biss mal-aġenzija nazzjonali ta’ finanzjament. Dan jistabbilixxi t-termini u l-kundizzjonijiet li skont dawn l-aġenzija nazzjonali ta’ finanzjament tħallas il-flus tal-FEŻR. — L-aġenzija nazzjonali ta’ finanzjament titqies bħala korp intermedju (minn perspettiva tar-RDK) u tirrapporta l-kostijiet tagħha (jiġifieri l-finanzjament mill-FEŻR li pprovdiet lill-benefiċjarju nazzjonali) kemm lill-awtorità tal-għoti tal-HE[1] kif ukoll lill-MA tagħha. Imbagħad, dawn it-tnejn jirrapportaw lura lill-Kummissjoni. 2. Ikkofinanzjat mill-FEŻR u minn sors(i) nazzjonali ieħor/oħrajn ġestit(i) mill-istess aġenzija nazzjonali ta’ finanzjament. — Il-benefiċjarju nazzjonali jiffirma ftehim ta’ għotja nazzjonali wieħed li jistabbilixxi t-termini u l-kundizzjonijiet li skont dawn l-aġenzija nazzjonali ta’ finanzjament tħallas il-flus tal-FEŻR. Imbagħad, il-benefiċjarju nazzjonali jiffirma ftehim ta’ għotja nazzjonali ieħor li jistabbilixxi t-termini u l-kundizzjonijiet li skont dawn l-aġenzija nazzjonali ta’ finanzjament tħallas l-ammont l-ieħor ta’ flus miksubin fil-livell nazzjonali. — L-aġenzija nazzjonali ta’ finanzjament titqies bħala korp intermedju (minn perspettiva tar-RDK) u tirrapporta dawn it-tnejn: — il-kost tal-għoti tal-finanzjament tal-FEŻR lill-benefiċjarju nazzjonali (tirrapporta dan lill-MA kompetenti); — il-kost aggregat[2] tal-għoti kemm tal-finanzjament tal-FEŻR kif ukoll tal-finanzjament nazzjonali l-ieħor li l-aġenzija nazzjonali ta’ finanzjament ipprovdiet lill-benefiċjarju nazzjonali (tirrapporta dan lill-awtorità tal-għoti tal-HE[3]). Għaż-żewġ każijiet ta’ hawn fuq, l-aġenzija nazzjonali ta’ finanzjament trid issegwi l-proċedura għall-finanzjament kumulattiv (ara t-Taqsima 3 hawn fuq dwar il-finanzjament kumulattiv), u ttella’ fuq eGrants kopja ta’ dikjarazzjoni mill-benefiċjarju lill-MA (flimkien ma’ kopja tal-informazzjoni tal-MA lill-benefiċjarju li tikkonferma li n-nefqa ġiet inkluża f’applikazzjoni ta’ pagament lill-Kummissjoni) bħala dokument ta’ sostenn għall-applikazzjoni ta’ pagament introdotta. [1] Taħt il-kategorija tal-kost “appoġġ finanzjarju lil parti terza” fil-Mudell tal-Ftehim ta’ Għotja tas-Sħubija Ewropea Kofinanzjata mill-HE [2] Taħt il-kategorija tal-kost “appoġġ finanzjarju lil parti terza” fil-Mudell tal-Ftehim ta’ Għotja tas-Sħubija Ewropea Kofinanzjata mill-HE [3] Taħt il-kategorija tal-kost “appoġġ finanzjarju lil parti terza” fil-Mudell tal-Ftehim ta’ Għotja tas-Sħubija Ewropea Kofinanzjata mill-HE

Importanti li tkun taf

Kif isiru l-kontribuzzjonijiet u l-impenji mill-HE?

L-impenji u l-kontribuzzjonijiet għas-Sħubijiet Ewropej Kofinanzjati jsiru f’ħames stadji:

1.	impenn preliminari indikattiv

2.	impenn ġenerali meta jiġi ffirmat il-ftehim ta’ għotja

3.	impenn annwali meta jiġi ddefinit il-programm ta’ ħidma annwali (eż. id-definizzjoni tal-kontribuzzjoni baġitarja għas-sejħa)

4.	impenn finali meta jintlaħaq qbil dwar il-lista ta’ klassifikazzjoni/għażla u meta jiġu ffirmati l-ftehimiet ta’ għotja

5.	kontribuzzjoni (jiġifieri ħlas tal-finanzjament).

Jekk is-sħubija ssir il-korp intermedju fil-programm tal-FEŻR f’konformità mal-Artikolu 71(5) tar-RDK, l-arranġament bil-miktub (is-sħubija) bejn l-MA u dan il-korp intermedju jrid jiddikjara b’mod ċar ir-responsabbiltajiet ta’ kull parti fir-rigward tal-eżekuzzjoni tal-kompiti li l-MA tkun iddelegat lil dan il-korp intermedjarju.

Passi ewlenin fil-proċess – Sħubijiet Ewropej Istituzzjonalizzati (l-Artikoli 185 u 187 tat-TFUE)

Preparazzjoni / programmazzjoni

— Il-kontribuzzjonijiet u l-attivitajiet huma definiti f’deċiżjoni tal-Parlament Ewropew u tal-Kunsill (l-Artikolu 185 tat-TFUE) jew f’regolament tal-Kunsill (l-Artikolu 187 tat-TFUE). Il-kontribuzzjoni tal-UE trid tkun tal-anqas daqs il-kontribuzzjoni tas-sieħeb mhux tal-UE. — Meta programm tal-FEŻR jipprovdi, f’konformità mal-objettivi tiegħu, appoġġ għal sħubija li tkun kofinanzjata mill-HE wkoll, l-MA tal-programm rilevanti tiddeżinja l-impriża konġunta (l-Artikolu 187 tat-TFUE) jew l-istruttura ta’ implimentazzjoni deċentralizzata (l-Artikolu 185 tat-TFUE) (17) bħala korp intermedju f’konformità mal-Artikolu 71(5) tar-RDK. L-Artikolu 71(3) tar-RDK jirrikjedi li l-arranġamenti bejn l-MA u l-korp(i) intermedju/i jiġu rreġistrati bil-miktub. — Il-kontribuzzjoni minn programm tal-FEŻR issir għal proġett speċifiku. Ir-riċevitur ta’ tali kontribuzzjoni tal-FEŻR ikun il-benefiċjarju tal-proġett (il-proġett ikun magħruf bħala operazzjoni fil-kuntest tal-politika ta’ koeżjoni). — Għandha tiġi stabbilita kontribuzzjoni għal Sħubija Ewropea Istituzzjonalizzata b’ġustifikazzjoni fit-taqsima dwar is-sinerġiji u l-komplementarjetajiet tal-programm. — Kontribuzzjoni għal Sħubija Ewropea Istituzzjonalizzata trid tissodisfa l-kriterji tal-kundizzjoni abilitanti applikabbli (jiġifieri l-S3) u tkun konsistenti mal-objettiv u mal-ambitu korrispondenti tal-programm, f’konformità mal-Artikolu 73(4) tar-RDK. Il-kontribuzzjoni għal Sħubija Ewropea Istituzzjonalizzata tista’ tiġi identifikata wkoll kmieni, fl-S3 rilevanti, bħala miżura sabiex tissaħħaħ il-kooperazzjoni f’oqsma ta’ prijorità ma’ sħab minn barra Stat Membru partikolari. Arranġament bil-miktub bejn MA u korp intermedju (is-sħubija) għandu jistabbilixxi b’mod ċar ir-responsabbiltajiet għat-twettiq ta’ dawn il-kompiti.

Allokazzjoni tal-appoġġ

— L-MA tista’ tiddeċiedi li tagħti appoġġ direttament mill-programm tal-FEŻR, diment li dan jikkonforma mar-rekwiżiti stabbiliti fl-Artikolu 73(4) tar-RDK. L-MAs jistgħu japplikaw ukoll il-kategoriji, l-ammonti massimi u l-metodi ta’ kalkolu tal-kostijiet eliġibbli stabbiliti permezz tal-HE (li għandhom jiġu stabbiliti fid-dokument li jistabbilixxi l-kundizzjonijiet għall-appoġġ). — Il-finanzjament li l-istati parteċipanti jipprovdu lill-entitajiet nazzjonali tagħhom fi proġetti ta’ impriża konġunta jingħadd bħala kontribuzzjoni finanzjarja għall-impriża konġunta. F’konformità mar-regoli rilevanti dwar il-ġestjoni tal-kontribuzzjonijiet mill-istati parteċipanti (18), l-istati parteċipanti jridu jirrapportaw lill-bord ta’ tmexxija sal-31 ta’ Jannar ta’ kull sena dwar il-kontribuzzjonijiet finanzjarji indikattivi li għandhom isiru f’dik is-sena finanzjarja. Meta jagħmlu dan, l-istati parteċipanti għandhom jispeċifikaw liema proporzjon minn dawn il-kontribuzzjonijiet ikun ġej mill-fondi tal-politika ta’ koeżjoni. — Fil-każ ta’ ġestjoni ċentrali tal-kontribuzzjonijiet finanzjarji (meta l-benefiċjarju jiffirma ftehim ta’ għotja wieħed mal-impriża konġunta li timplimenta l-kontribuzzjonijiet tal-UE u dawk nazzjonali), ir-riżorsi tal-programm tal-FEŻR jitħallsu lill-istruttura ta’ implimentazzjoni wara li jkunu ntgħażlu l-proposti u jkunu ġew identifikati l-kontribuzzjonijiet nazzjonali/reġjonali. Ir-regoli tal-HE japplikaw esklussivament f’dan il-każ – fl-istadji kemm tal-evalwazzjoni tas-sejħa u tal-għażla, kif ukoll tal-pagament. — Fil-każ tal-koordinazzjoni tal-pagamenti, l-awtorità nazzjonali ma tittrasferixxix fondi lill-istruttura ta’ implimentazzjoni, iżda tirrimborża lill-benefiċjarji direttament fuq il-bażi ta’ ftehim ta’ għotja nazzjonali. Ir-regoli nazzjonali jew tal-FEŻR dwar il-finanzjament japplikaw għall-kontribuzzjoni nazzjonali kollha. Madankollu, is-sejħa, l-evalwazzjoni u l-għażla huma soġġetti esklussivament għar-regoli tal-HE. Irrispettivament mit-tip ta’ implimentazzjoni tal-kontribuzzjoni, fl-istess sejħa jista’ jkun hemm azzjonijiet iffinanzjati mill-fondi tal-FEŻR flimkien mal-fondi tal-HE jew tal-Programm Ewropa Diġitali.

Passi ewlenin fil-proċess – applikabbli għas-Sħubijiet Ewropej kemm Kofinanzjati kif ukoll għal dawk Istituzzjonalizzati (l-Artikolu 185 jew 187 tat-TFUE)

Preparazzjoni / programmazzjoni

— Sħubijiet Ewropej ġodda huma identifikati bħala parti mill-ippjanar strateġiku tal-HE u l-proċess ta’ koordinazzjoni strateġika relatat. L-Istati Membri huma involuti bis-sħiħ f’konformità mal-Artikolu 6(5) tal-Programm Speċifiku ta’ Orizzont Ewropa.

Implimentazzjoni, monitoraġġ u kontroll

— Is-sħubijiet jeħtieġ li jistabbilixxu sistema ta’ monitoraġġ f’konformità mar-rekwiżiti stabbiliti fl-Artikolu 45, fl-Anness III u fl-Anness V tar-Regolament dwar l-HE. Dan għandu jikkontribwixxi għall-istess bażi tad-data bħall-komponenti l-oħrajn kollha tal-HE. Għalhekk, id-data aggregata relatata mal-proposti u mal-proġetti ffinanzjati taħt is-Sħubijiet Ewropej issir disponibbli permezz ta’ eCORDA u d-Dashboard ta’ Orizzont. Minbarra l-perkorsi tal-impatt ewlenin tal-HE, ġie żviluppat sett ta’ indikaturi komuni għas-Sħubijiet Ewropej sabiex tiġi mmonitorjata l-prestazzjoni tagħhom skont il-kriterji stabbiliti fil-bażi legali, bħall-addizzjonalità, l-aċċess miftuħ u s-sinerġiji. Il-monitoraġġ għandu jippermetti valutazzjoni maż-żmien tal-kisbiet u tal-progress fl-impatti, u l-identifikazzjoni tal-ħtiġijiet potenzjali għal miżuri korrettivi. Ir-riżultati ta’ dan il-monitoraġġ jikkontribwixxu għall-monitoraġġ biennali tas-Sħubijiet Ewropej kollha u taċ-ċikli ta’ evalwazzjoni tal-HE. — F’konformità mal-Artikolu 72(1) tar-RDK, l-MA tiġbor data dwar l-operazzjonijiet, inklużi l-proġetti ta’ appoġġ magħżulin mis-sħubijiet.

Importanti li tkun taf

Kemm mill-kontribuzzjonijiet nazzjonali jista’ jkopri l-programm tal-FEŻR?

Il-kontribuzzjoni minn programm tal-FEŻR tista’ tkopri l-kontribuzzjonijiet nazzjonali f’konformità mar-regoli dwar il-kofinanzjament u mal-ammont massimu ta’ appoġġ mill-fondi għal kull prijorità stabbilita fl-Artikolu 112 tar-RDK u fl-Artikolu 190 tar-RF, diment li jiġu ssodisfati r-rekwiżiti tal-Artikolu 63(9) tar-RDK.

L-Artikolu 25c tal-GBER jipprovdi kundizzjonijiet ta’ kompatibbiltà tal-għajnuna mill-Istat sabiex jiġu applikati l-kostijiet eliġibbli u r-rati ta’ finanzjament tal-HE għal proġetti ta’ riċerka u ta’ żvilupp appoġġati permezz ta’ Sħubija Ewropea.

Programm tal-FEŻR jista’ jkopri l-kontribuzzjonijiet nazzjonali kollha għall-proġett – minħabba li aħna nipprogrammaw il-kofinanzjament nazzjonali skont il-prijorità aktar milli l-proġett?

Iva. Il-kontribuzzjoni tiġi mill-programm rilevanti, li huwa stess huwa soġġett għar-regoli ta’ kofinanzjament. Madankollu, peress li l-kofinanzjament huwa stabbilit fil-livell ta’ prijorità u mhux fil-livell operazzjonali, il-baġit tal-UE jista’ jkopri l-kontribuzzjonijiet nazzjonali kollha għal operazzjoni speċifika.

Huwa possibbli li jintużaw programmi tal-FEŻR mhux għall-finanzjament ta’ proġetti iżda pjuttost għal kontribuzzjoni “in natura”?

Il-programmi tal-FEŻR jistgħu jintużaw sabiex ikopru l-kontribuzzjonijiet nazzjonali tal-Istati Membri li jipparteċipaw fi Sħubijiet Ewropej. Ma jimpurtax jekk tali kontribuzzjonijiet ikunux finanzjarji jew in natura. Ma hemm l-ebda kontribuzzjoni in natura mill-Istati Membri parteċipanti għal Sħubijiet Ewropej Istituzzjonalizzati.

Kif tista’ l-MA għal programm tal-FEŻR tiżgura li operazzjoni kofinanzjata tikkontribwixxi għall-indikaturi stabbiliti fil-programm?

Il-proġetti magħżulin mis-Sħubijiet Ewropej jistgħu jiġu appoġġati jekk jissodisfaw ir-rekwiżiti stabbiliti fil-punti (a), (b) u (g) tal-paragrafu 2 tal-Artikolu 73 tar-RDK. Għalhekk, iridu jikkontribwixxu għall-kisba tal-indikaturi tal-programm.

Huwa possibbli li l-fondi jintużaw għal skopijiet oħrajn jekk ma jintefqux fuq il-finanzjament ta’ proġetti ta’ sħubija?

Dawn il-kontribuzzjonijiet imorru għal proġetti identifikati wara li jkunu ġew evalwati u magħżula mill-bord ta’ tmexxija tas-Sħubija Ewropea. Għalhekk, ma jkunx possibbli li jiġu rritornati.

Xi ngħidu dwar ir-regoli tal-UE dwar l-għajnuna mill-Istat?

Ir-regoli dwar l-għajnuna mill-Istat japplikaw jekk il-benefiċjarju ta’ finanzjament pubbliku mogħti minn riżorsi tal-Istat Membru, inkluż l-FEŻR, ikun impriża (u jekk jiġu ssodisfati l-kundizzjonijiet kumulattivi l-oħrajn kollha għall-preżenza ta’ għajnuna mill-Istat, spjegati fl-Artikolu 107(1) tat-TFUE). Skont il-kundizzjonijiet speċifikati fl-Artikoli 25c tal-GBER, il-proġetti kofinanzjati ta’ riċerka u ta’ żvilupp jistgħu jibbenefikaw mill-kostijiet eliġibbli u mir-rati ta’ finanzjament tal-HE. Dan japplika wkoll għal sejħiet imnedija minn Sħubijiet ibbażati fuq l-Artikolu 185 jew fuq l-Artikolu 187 tat-TFUE jew f’sejħiet imnedija taħt azzjonijiet ta’ kofinanzjament tal-programmi. Il-proġetti jridu jkunu proġetti tranżnazzjonali (implimentati minn tal-anqas tliet Stati Membri, jew inkella żewġ Stati Membri u tal-anqas pajjiż assoċjat wieħed), u jridu jirriżultaw minn sejħiet għal proposti organizzati ċentralment li għalihom japplikaw ir-regoli ta’ finanzjament tal-HE (l-Artikolu 25c(3) tal-GBER dwar il-kategoriji, l-ammonti massimi u l-metodi tal-kalkolu tal-kostijiet eliġibbli). Jekk jiġu ssodisfati l-kundizzjonijiet applikabbli kollha stabbiliti fil-GBER, l-awtorità li tagħti l-għajnuna ma għandhiex għalfejn twettaq valutazzjoni separata tal-għajnuna mill-Istat u lanqas ma jkollha tinnotifika l-għajnuna lill-Kummissjoni. Meta l-finanzjament ikun soġġett għal regoli dwar l-għajnuna mill-Istat u ma jkunx allinjat mal-kundizzjonijiet kollha stabbiliti fl-Artikolu 25c tal-GBER, ma japplikax it-trattament simplifikat ta’ dawn il-proġetti skont ir-regoli dwar l-għajnuna mill-Istat.

X’inhu d-dritt ta’ veto fi Sħubijiet Ewropej Istituzzjonalizzati?

F’konformità mal-Artikolu 10(1)(c) tar-Regolament dwar l-HE, il-kontribuzzjonijiet minn Stat Membru parteċipanti wieħed iridu jintużaw sabiex jiffinanzjaw il-parteċipazzjoni ta’ entitajiet stabbiliti f’dak l-Istat Membru parteċipanti. Għalhekk, l-Istati Membri parteċipanti jibqgħu fil-kontroll tal-kontribuzzjonijiet nazzjonali tagħhom minħabba li jistgħu jużaw il-veto fuq l-allokazzjoni tal-fondi nazzjonali lil benefiċjarju speċifiku (għal raġunijiet eċċezzjonali u għal raġunijiet debitament ġustifikati) mingħajr ebda impatt fuq l-eliġibbiltà tal-proposta għall-finanzjament tal-UE.

Il-programmi tal-FEŻR jistgħu jappoġġaw it-tariffi tas-sħubija/tal-parteċipazzjoni għal korpi jew għal networks oħrajn tal-UE (eż. sħubijiet tal-EIT)?

Operazzjoni kofinanzjata mill-FEŻR trid taqa’ fil-kamp ta’ applikazzjoni tar-Regolament dwar l-FEŻR. L-Artikolu 5(1)(f) tar-Regolament dwar l-FEŻR jippermetti lill-FEŻR jappoġġa n-networking, il-kooperazzjoni u l-iskambju ta’ esperjenza u ta’ attivitajiet li jinvolvu raggruppamenti tal-innovazzjoni (inklużi dawk li jlaqqgħu flimkien in-negozji, l-organizzazzjonijiet ta’ riċerka u l-awtoritajiet pubbliċi). Tali kooperazzjoni tista’ tiġi promossa permezz ta’ organizzazzjoni internazzjonali.

Skont l-Artikolu 63(4) tar-RDK, operazzjoni kollha jew parti minnha tista’ tiġi implimentata barra minn Stat Membru, inkluż barra mill-UE, diment li l-operazzjoni tikkontribwixxi għall-objettivi tal-programm.

Għalhekk, it-tariffi tas-sħubija tal-organizzazzjonijiet internazzjonali ma jissodisfawx il-kundizzjonijiet imsemmija hawn fuq u ma humiex eliġibbli għall-appoġġ mill-FEŻR minħabba li l-objettivi segwiti mill-organizzazzjonijiet internazzjonali jkunu ġeneralment wesgħin wisq sabiex jikkorrispondu għal operazzjoni speċifika li ssegwi l-objettivi tal-programm ta’ finanzjament.

B’kuntrast ma’ dan, normalment it-tariffi ta’ parteċipazzjoni jikkorrispondu għal attivitajiet aktar speċifiċi u konkreti u għalhekk jistgħu jkunu eliġibbli għall-appoġġ mill-FEŻR – jekk jikkorrispondu għal azzjoni konkreta mwettqa minn organizzazzjoni internazzjonali li taqa’ fil-kamp ta’ applikazzjoni tar-Regolament dwar l-FEŻR u tikkontribwixxi għall-objettiv(i) tal-programm ta’ finanzjament.

5.   Finanzjament kombinat (Ħolqien ta’ timijiet)

Huwa importanti li jiġu ottimizzati u mmassimizzati l-benefiċċji li r-R&I jistgħu jipprovdu lis-soċjetà, lill-ambjent u lill-ekonomija usa’, flimkien mal-kontribut tagħhom għall-kisba tal-għanijiet tal-UE. Għalhekk, il-finanzjament tal-UE jrid ikun koerenti u jisfrutta s-sinerġiji potenzjali. Dan huwa partikolarment il-każ għal azzjoni għall-Ħolqien ta’ timijiet li tappoġġa l-ħolqien jew il-modernizzazzjoni ta’ ċentru ta’ eċċellenza f’pajjiż tat-twessigħ tal-parteċipazzjoni billi jingħaqad ma’ istituzzjoni ewlenija ta’ riċerka (sieħeb avvanzat) f’pajjiż differenti. Dan jeħtieġ finanzjament komplementari minn sors nazzjonali, reġjonali, tal-UE jew privat. Għalhekk, azzjoni bħal din tiġi ddeżinjata bħala azzjoni ta’ “enerġija” fil-programm ta’ ħidma tal-HE. L-azzjonijiet ta’ kombinament huma mistennijin li jsiru pont influwenti u sinifikattivi b’mod partikolari bejn l-S3 u l-eċċellenza fir-R&I, u b’hekk isaħħu ż-ŻER.

Leġiżlazzjoni relatata

L-Artikolu 25d tal-GBER (għajnuna mill-Istat)

Passi ewlenin fil-proċess

Preparazzjoni/programmazzjoni	Il-programm ta’ ħidma tal-HE jiddeżinja azzjonijiet għall-Ħolqien ta’ timijiet bħala azzjonijiet ta’ “sinerġija”. Il-programmi tal-politika ta’ koeżjoni jistgħu jipprovdu finanzjament komplementari għal proġett ta’ Ħolqien ta’ timijiet għal sett ta’ kostijiet eliġibbli li huma separati mill-kostijiet koperti mill-HE, diment li jiġu ssodisfati r-rekwiżiti tal-Artikolu 73(4) tar-RDK.
Allokazzjoni tal-appoġġ	Jinfetħu żewġ sejħiet separati (l-FEŻR u HE). Il-proposta tal-HE trid tinkludi deskrizzjoni ċara tal-proġett komplementari appoġġat mill-FEŻR jew minn sorsi oħrajn ta’ finanzjament. Jekk rilevanti, id-deskrizzjoni għandha tinkludi l-kategoriji tal-kostijiet, l-ispeċifikazzjonijiet tekniċi tal-infrastruttura, l-ippjanar preliminari għall-bini u għall-installazzjonijiet, l-analiżi tal-ispejjeż u l-benefiċċji, eċċ. Din id-deskrizzjoni tkun soġġetta wkoll għall-evalwazzjoni mwettqa minn esperti indipendenti skont ir-regoli u l-kriterji tal-għażla tal-HE.
Implimentazzjoni	Il-programm tal-FEŻR jappoġġa proġetti tar-R&Ż li jikkomplementaw l-HE, għalkemm b’sett differenti ta’ kostijiet eliġibbli. L-Artikolu 25d emendat tal-GBER jistabbilixxi kundizzjonijiet ta’ kompatibbiltà sabiex tingħata għajnuna mill-Istat (inkluż mir-riżorsi tal-FEŻR) lil proġetti kofinanzjati tar-R&Ż li jikkomplementaw l-azzjonijiet għall-Ħolqien ta’ timijiet (f’każijiet bħal dawn japplikaw il-kostijiet eliġibbli u r-rati ta’ finanzjament tal-HE). Barra minn hekk, l-Artikolu 25d tal-GBER emendat jippermetti li l-għajnuna għall-investiment pubbliku tkopri sa 70 % tal-investiment fl-infrastruttura li jsir taħt azzjoni għall-Ħolqien ta’ timijiet (soġġetta wkoll għal ċerti kundizzjonijiet). Il-proposta tal-proġett tgħaddi minn evalwazzjoni waħda li tkopri kemm il-partijiet tal-proġett (jiġifieri l-parti tal-HE kif ukoll il-parti relatata ma’ sors ta’ finanzjament komplementari magħżul bħal programm tal-politika ta’ koeżjoni). Dan huwa meħtieġ sabiex ikun jista’ japplika l-Artikolu 25d tal-GBER emendat, li jippermetti lill-maniġers tas-sors ta’ finanzjament komplementari japplikaw il-kategoriji, l-ammonti massimi u l-metodi ta’ kalkolu tal-kostijiet eliġibbli stabbiliti permezz tal-HE għall-operazzjoni inkwistjoni.

6.   Sinerġiji upstream u downstream

Is-sinerġiji upstream/downstream joħorġu meta l-appoġġ tal-UE jipprovdi (primarjament permezz tal-programmi tal-HE u tal-FEŻR) qafas koordinat u mingħajr xkiel għall-passi kollha tal-proċess ta’ innovazzjoni tar-R&I (mill-bini tal-kapaċitajiet u r-riċerka bażika sal-kummerċjalizzazzjoni u l-adozzjoni ta’ soluzzjonijiet innovattivi minn intrapriżi privati). Tali sinerġiji jipprovdu valur miżjud partikolari meta joħorġu f’oqsma li huma marbutin ma’ għanijiet ewlenin tal-politika tal-UE u joffru l-prospett li jsir titjib sostanzjali fl-ekonomija usa’.

L-iżvilupp ta’ sinerġiji bħal dawn jeħtieġ kooperazzjoni mill-qrib bejn l-atturi rilevanti – b’mod partikolari l-UE u l-awtoritajiet nazzjonali involuti fil-programmazzjoni u fl-implimentazzjoni tal-appoġġ mill-HE u mill-FEŻR.

Pereżempju, il-missjonijiet tal-HE (19) jipprovdu modi ġodda sabiex jiġu indirizzati l-isfidi identifikati fil-missjonijiet tagħhom, u soluzzjonijiet trasformattivi li jistgħu jgħinu sabiex titħaffef l-adozzjoni tal-aħjar teknoloġiji disponibbli. Eżempji prattiċi ta’ sinerġiji possibbli tal-ħames missjonijiet tal-UE mal-FEŻR huma deskritti fl-Anness ta’ din in-nota.

Sabiex tingħata spinta lil din l-adozzjoni, l-istrateġija l-ġdida dwar id-Disseminazzjoni u l-Isfruttament ta’ Orizzont tippromwovi approċċ integrat billi toħloq u żżomm portafolli tar-riżultati tal-missjoni, u billi tikkombinahom ma’ ekosistema integrata ta’ servizzi (eż. Horizon Results Platform u Horizon Results Booster) u ta’ inizjattivi (eż. avvenimenti u workshops). Dan se jġib settijiet ċari ta’ riżultati tar-R&I għall-attenzjoni tal-investituri u ta’ dawk li jfasslu l-politika fil-livelli nazzjonali u reġjonali. L-istrateġija l-ġdida ta’ Disseminazzjoni u ta’ Sfruttament ta’ Orizzont tenfasizza wkoll is-suġġetti tal-programm ta’ ħidma tal-HE, sabiex l-applikanti għas-sejħiet jikkunsidraw jekk jistgħux jisfruttaw is-sinerġiji potenzjali ma’ programmi oħrajn tal-UE.

It-tagħlimiet meħuda mir-raba’ sejħa ta’ Interreg Central Europe għall-isfruttament tar-riżultati tal-proġetti eżistenti taħt Orizzont 2020 (u programmi oħrajn tal-UE) jitqiesu meta jiġi deċiż kif għandhom jiġu sfruttati r-riżultati tar-R&I tal-HE bl-użu tal-programmi Interreg (bħala mod addizzjonali ta’ kif jiżdied l-aċċess tar-reġjuni għal riżultati tar-R&I ta’ kwalità għolja). L-isforzi futuri f’din id-direzzjoni se jibbenefikaw mill-għarfien u mill-esperjenza miksubin minn inizjattivi ta’ tlaqqigħ (pereżempju, l-għodda l-ġdida għall-immappjar tas-sinerġiji ta’ Orizzont-Interreg li tgħaqqad l-informazzjoni tematika u reġjonali sabiex jiġu identifikati s-sinerġiji potenzjali bejn dawn iż-żewġ flussi ta’ finanzjament).

Dawn l-approċċi u s-soluzzjonijiet jistgħu jgħinu wkoll lill-amministrazzjonijiet pubbliċi jiżviluppaw kapaċitajiet ġodda u jipprovdu servizzi ġodda. Dan huwa partikolarment importanti għal reġjuni anqas żviluppati u periferali, li huma anqas kapaċi jassorbu teknoloġiji ġodda u jimmaniġġjaw it-trasformazzjoni sistemika.

Għalhekk, ħafna minn dawn ir-reġjuni jistgħu jespandu d-dimostraturi, l-innovazzjoni u l-miżuri ta’ trasferiment tat-teknoloġija billi jużaw riżorsi tal-politika ta’ koeżjoni sabiex jgħinu fl-ilħuq tal-objettivi tal-programm. Ir-reġjuni li identifikaw il-prijoritajiet fl-istrateġiji relatati ma’ qasam ta’ missjoni partikolari jistgħu jiżviluppaw sinerġiji ma’ dik il-missjoni (20) sabiex jappoġġaw l-iżvilupp u/jew il-varar downstream ta’ approċċi ġodda għall-iżvilupp ta’ perkorsi trasformattivi. Pereżempju, il-missjonijiet tal-HE jistgħu jipprovdu direzzjonalità; jagħtu spinta lill-iżvilupp reġjonali; jippromwovu governanza transdixxiplinari u f’diversi livelli; jinvolvu lill-pubbliku ġenerali u lill-partijiet ikkonċernati lokali/reġjonali; u jirreklamaw l-investiment tal-politika ta’ koeżjoni u l-aċċess għal networks ġodda, għal pjattaformi ta’ apprendiment tal-politika u għal strumenti ta’ finanzjament.

Ir-reġjuni għandhom rwol importanti fil-varar tal-ekonomija tal-idroġenu, b’mod partikolari permezz tal-Widien tal-Idroġenu (21). Jiżguraw il-produzzjoni, it-trasport, il-ħżin u l-użu tal-idroġenu fil-livell reġjonali jew lokali, u huma kruċjali sabiex jintlaħqu l-objettivi ta’ REPowerEU (22). L-Impriża Konġunta Idroġenu Nadif għandha esperjenza twila fl-appoġġ tal-istabbiliment tal-Widien tal-Idroġenu fl-UE. Il-varar ulterjuri ta’ dan il-kunċett ta’ suċċess madwar l-Istati Membri kollha jeħtieġ l-akkumulament sostanzjali tar-riżorsi.

Pereżempju, l-idroġenu rinnovabbli se jkun kruċjali sabiex jissostitwixxi l-gass naturali, il-faħam u ż-żejt fl-industriji u fit-trasport li diffiċli jiġu ddekarbonizzati. REPowerEU tistabbilixxi mira ta’ 10 miljun tunnellata ta’ produzzjoni domestika tal-idroġenu rinnovabbli u 10 miljun tunnellata ta’ importazzjonijiet tal-idroġenu rinnovabbli sal-2030. Ir-reġjuni għandhom rwol importanti fil-varar tal-ekonomija tal-idroġenu fl-UE, b’mod partikolari permezz tal-Widien tal-Idroġenu. Il-Widien tal-Idroġenu jiżguraw il-produzzjoni, it-trasport, il-ħżin u l-użu tal-idroġenu fil-livell reġjonali jew lokali, u huma kruċjali sabiex jintlaħqu l-objettivi ta’ REPowerEU. L-Impriża Konġunta Idroġenu Nadif, u l-predeċessuri tagħha, għandhom esperjenza twila ħafna ta’ appoġġ tal-istabbiliment tal-Widien tal-Idroġenu fl-UE. Bħalissa, hemm 23 Wied tal-Idroġenu fl-UE f’għaxar Stati Membri. Il-varar ulterjuri ta’ dan il-kunċett ta’ suċċess madwar l-Istati Membri kollha jeħtieġ l-akkumulament sostanzjali tar-riżorsi.

Eżempju: Sinerġiji fil-kuntest tal-Aġenda Ewropea għall-Innovazzjoni l-ġdida

Is-sinerġiji jistgħu jappoġġaw l-implimentazzjoni tal-aġenda Ewropea għall-Innovazzjoni l-ġdida u b’mod partikolari l-inizjattiva emblematika 3, li għandha l-għan li ssaħħaħ u tgħaqqad l-ekosistemi tal-innovazzjoni reġjonali u li tnaqqas id-distakk fl-innovazzjoni.

---

(1)  Dan jista’ japplika wkoll għal fondi tal-UE ġestiti indirettament.

(2)  Fid-dawl tal-allinjament tad-dispożizzjonijiet tal-programmi tal-Unjoni ġestiti direttament, eż. l-HE, id-DEP, l-FNE dwar sinerġiji ma’ programmi permezz ta’ ġestjoni kondiviża, l-elementi ta’ dan id-dokument jistgħu jitqiesu bħala gwida għall-operazzjonalizzazzjoni tas-sinerġiji bejn it-tali programmi tal-Unjoni ġestiti direttament u l-programmi tal-FEŻR – filwaqt li jitqiesu bir-reqqa l-ispeċifiċitajiet ta’ kull bażi legali applikabbli u l-kunsiderazzjonijiet ta’ politika speċifiċi għal kull programm bħal dan.

(3)  COM(2020) 628 final, 30 ta’ Settembru 2020.

(4)  COM(2021) 407 final.

(5)  Ir-Regolament (UE) 2021/1060 tal-Parlament Ewropew u tal-Kunsill tal-24 ta’ Ġunju 2021 li jistipula dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew Plus, il-Fond ta’ Koeżjoni, il-Fond għal Tranżizzjoni Ġusta u l-Fond Ewropew għall-Affarijiet Marittimi, is-Sajd u l-Akkwakultura u r-regoli finanzjarji għalihom u għall-Fond għall-Ażil, il-Migrazzjoni u l-Integrazzjoni, il-Fond għas-Sigurtà Interna u l-Istrument għall-Appoġġ Finanzjarju għall-Ġestjoni tal-Fruntieri u l-Politika dwar il-Viżi (ĠU L 231, 30.6.2021, p 159).

(6)  Filwaqt li dan id-dokument jiffoka fuq is-Siġilli ta’ Eċċellenza previsti taħt Orizzont Ewropa, il-possibbiltà li jingħataw Siġilli ta’ Eċċellenza hija stabbilita wkoll fl-atti bażiċi ta’ 14-il programm ieħor fi ħdan il-qafas finanzjarju pluriennali tal-UE (l-Ewropa Diġitali, il-Programm tas-Suq Uniku, il-LIFE, l-Ewropa Kreattiva, l-Erasmus+, il-Programm Spazjali, il-Korp Ewropew ta’ Solidarjetà, il-Faċilità Nikkollegaw l-Ewropa, il-Programm dwar il-Ġustizzja, il-Programm dwar iċ-Ċittadini, l-Ugwaljanza, id-Drittijiet u l-Valuri, il-Euratom, il-Fond għall-Ażil, il-Migrazzjoni u l-Integrazzjoni, il-Fond għall-Ġestjoni Integrata tal-Fruntieri u l-Fond għas-Sigurtà Interna).

(7)  Ara l-punti (a), (b), (g) tal-Artikolu 73(2) u l-Artikolu 73(4) tar-RDK.

(8)  Ir-Regolament tal-Kummissjoni (UE) Nru 651/2014 tas-17 ta' Ġunju 2014 li jiddikjara li ċerti kategoriji ta’ għajnuna huma kompatibbli mas-suq intern skont l-Artikoli 107 u 108 tat-Trattat (ĠU L 187 tas-26.6.2014, p 1, kif emendat). Verżjoni konsolidata tar-Regolament emendat hija disponibbli fuq is-sit web tal-Kummissjoni Ewropea, għal finijiet ta’ informazzjoni biss: https://ec.europa.eu/competition-policy/state-aid/legislation/regulations_mt

(9)  Ir-Regolament (UE) 2021/695 tal-Parlament Ewropew u tal-Kunsill tat-28 ta’ April 2021 li jistabbilixxi l-Orizzont Ewropa — il-Programm Qafas għar-Riċerka u l-Innovazzjoni, li jistabbilixxi r-regoli tiegħu għall-parteċipazzjoni u d-disseminazzjoni, u li jħassar ir-Regolamenti (UE) Nru 1290/2013 u (UE) Nru 1291/2013.

(10)  Id-Deċiżjoni tal-Kunsill (UE) 2021/764 tal-10 ta’ Mejju 2021 li tistabbilixxi l-Programm Speċifiku li jimplimenta l-Orizzont Ewropa — il-Programm Qafas għar-Riċerka u l-Innovazzjoni, u li tħassar id-Deċiżjoni 2013/743/UE.

(11)  Il-Programm ta’ Ħidma tal-EIC għall-2022.

(12)  It-trasferimenti huma possibbli wkoll għal programmi oħrajn ġestiti direttament, ara pereżempju l-Artikolu 4(14) tar-Regolament dwar l-FNE, applikabbli għas-settur diġitali, u l-Artikolu 9(5) tar-Regolament dwar id-DEP.

(13)  It-Tabella 4.2. tal-mudell tal-PA (l-Anness II tar-RDK) dwar “Trasferimenti għal strumenti permezz ta’ ġestjoni diretta jew indiretta” tipprevedi l-identifikazzjoni tal-istrument speċifiku li għalih jiġu ttrasferiti l-ammonti tal-FEŻR.

(14)  Fi ħdan il-limiti tal-Artikolu 26(1) tar-RDK.

(15)  Għandu jiġi nnotat li l-Artikolu 23(1) tar-Regolament dwar id-DEP, kif ukoll, pereżempju, l-Artikolu 19(1) tar-Regolament dwar l-FNE.2, fihom dispożizzjonijiet identiċi għall-Artikolu 15(4) tar-Regolament dwar l-HE. Min-naħa tiegħu, dan jippermetti l-allinjament tal-arranġamenti ta’ implimentazzjoni dwar il-finanzjament kumulattiv bejn dawn il-programmi.

(16)  Dan id-dokument ta’ gwida jiffoka fuq is-sinerġiji bejn il-programmi tal-HE u tal-FEŻR, iżda tapplika loġika simili għall-programmi l-oħrajn elenkati fl-Artikolu 15(3).

(17)  Fl-HE, hemm biss inizjattiva waħda tal-Artikolu 185 tat-TFUE: is-Sħubija Ewropea dwar il-Metroloġija mmexxija mill-EURAMET.

(18)  L-Artikolu 12 tar-Regolament tal-Kunsill 2021/2085 li jistabbilixxi l-Impriżi Konġunti fil-qafas ta’ Orizzont Ewropa.

(19)  Għal aktar dettall dwar il-Missjonijiet tal-UE f’Orizzont Ewropa: https://research-and-innovation.ec.europa.eu/funding/funding-opportunities/funding-programmes-and-open-calls/horizon-europe/eu-missions-horizon-europe_mt

(20)  Il-missjonijiet tal-UE huma novità tal-programm ta’ riċerka u ta’ innovazzjoni Orizzont Ewropa għas-snin bejn l-2021 u l-2027. Il-missjonijiet tal-UE huma sforz koordinat mill-Kummissjoni sabiex tiġbor flimkien ir-riżorsi meħtieġa f’termini ta’ programmi ta’ finanzjament, politiki u regolamenti, kif ukoll ta’ attivitajiet oħrajn. Għandhom ukoll l-għan li jimmobilizzaw u jattivaw l-atturi pubbliċi u privati, bħall-Istati Membri tal-UE, l-awtoritajiet lokali u reġjonali, l-istituzzjonijiet ta’ riċerka, il-bdiewa u l-maniġers tal-art, l-imprendituri u l-investituri sabiex joħolqu impatt reali u dejjiemi. Il-missjonijiet jinvolvu lill-pubbliku ġenerali sabiex jagħtu spinta lill-użu soċjetali ta’ soluzzjonijiet u ta’ approċċi ġodda. Hemm ħames Missjonijiet tal-UE (L-Adattament għat-Tibdil fil-Klima; Il-Kanċer; Ir-Restawr tal-Oċeani u tal-Ilmijiet tagħna sal-2030; 100 Belt Newtrali għall-Klima u Intelliġenti sal-2030; Patt dwar il-Ħamrija għall-Ewropa).

(21)  Is-sħubija għall-Ispeċjalizzazzjoni Intelliġenti Widien tal-Idroġenu u l-pilota għall-idroġenu (Widien tal-idroġenu - Pjattaforma għall-Ispeċjalizzazzjoni Intelliġenti (europa.eu)

(22)  REPowerEU (COM(2022) 230 final) tistabbilixxi mira ta’ 10 miljun tunnellata ta’ produzzjoni domestika tal-idroġenu rinnovabbli u 10 miljun tunnellata ta’ importazzjonijiet tal-idroġenu rinnovabbli sal-2030.

Ir-rata tal-interessi applikata mill-Bank Ċentrali Ewropew għall-operazzjonijiet prinċipali ta' rifinanzjament (1):

2,00 % fl-1 ta' Novembru 2022

Rata tal-kambju tal-euro (2)

It-3 ta' Novembru 2022

(2022/C 421/04)

1 euro =

	Munita	Rata tal-kambju
USD	Dollaru Amerikan	0,9753
JPY	Yen Ġappuniż	144,58
DKK	Krona Daniża	7,4433
GBP	Lira Sterlina	0,87228
SEK	Krona Żvediża	10,9320
CHF	Frank Żvizzeru	0,9889
ISK	Krona Iżlandiża	144,90
NOK	Krona Norveġiża	10,3543
BGN	Lev Bulgaru	1,9558
CZK	Krona Ċeka	24,539
HUF	Forint Ungeriż	407,87
PLN	Zloty Pollakk	4,7090
RON	Leu Rumen	4,9013
TRY	Lira Turka	18,1602
AUD	Dollaru Awstraljan	1,5517
CAD	Dollaru Kanadiż	1,3452
HKD	Dollaru ta’ Hong Kong	7,6560
NZD	Dollaru tan-New Zealand	1,6957
SGD	Dollaru tas-Singapor	1,3878
KRW	Won tal-Korea t’Isfel	1 391,75
ZAR	Rand ta’ l-Afrika t’Isfel	18,0173
CNY	Yuan ren-min-bi Ċiniż	7,1367
HRK	Kuna Kroata	7,5375
IDR	Rupiah Indoneżjan	15 400,20
MYR	Ringgit Malażjan	4,6271
PHP	Peso Filippin	57,463
RUB	Rouble Russu
THB	Baht Tajlandiż	37,091
BRL	Real Brażiljan	5,0262
MXN	Peso Messikan	19,2363
INR	Rupi Indjan	80,8845

---

(1)  Rata applikata għall-operazzjoni l-iktar reċenti mwettqa qabel il-jum indikat. Fil-każ ta' sejħa għall-offerti b'rata varjabbli, ir-rata tal-interessi hija r-rata marġinali.

(2)  Sors: rata tal-kambju ta' referenza ppubblikata mill-Bank Ċentrali Ewropew.

Informazzjoni li taw l-Istati Membri dwar l-għeluq tas-sajd

(2022/C 421/05)

F’konformità mal-Artikolu 35(3) tar-Regolament tal-Kunsill (KE) Nru 1224/2009 tal-20 ta’ Novembru 2009 li jistabbilixxi sistema tal-Unjoni ta’ kontroll għall-iżgurar tal-konformità mar-regoli tal-Politika Komuni tas-Sajd (1), ittieħdet deċiżjoni li s-sajd jingħalaq kif stabbilit fit-tabella ta’ hawn taħt:

Data u ħin tal-għeluq	28.9.2022
Durata	28.9.2022 - 31.12.2022
Stat Membru	L-Italja
Stokk jew Grupp ta’ stokkijiet	ARS/GF8-11
Speċi	Gamblu aħmar kbir (Aristaeomorpha foliacea)
Żona	GSA 8-9-10-11
Tip(i) ta’ bastimenti tas-sajd	—
Numru ta’ referenza	09/TQ110

---

(1)  ĠU L 343, 22.12.2009, p. 1.

Notifika ta’ bidu dwar ir-rieżamital-miżuri anti-dumping applikabbli għall-importazzjonijiet ta' drappijiet b’malja miftuħa tal-fibri tal-ħġieġ li joriġinaw mir-Repubblika tal-Poplu taċ-Ċina

(2022/C 421/06)

Wara l-pubblikazzjoni ta’ Notifika ta’ skadenza imminenti (1) tal-miżuri anti-dumping fis-seħħ fuq l-importazzjonijiet ta’ ċerta karta fina miksija li joriġinaw mir-Repubblika tal-Poplu taċ-Ċina (“ir-RPĊ” jew “il-pajjiż ikkonċernat”), il-Kummissjoni Ewropea (“il-Kummissjoni”) irċeviet talba għal rieżami skont l-Artikolu 11(2) tar-Regolament (UE) Nru 2016/1036 tal-Parlament Ewropew u tal-Kunsill tat-8 ta' Ġunju 2016 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Unjoni Ewropea (2) (“ir-Regolament bażiku”).

1.   Talba għal rieżami

It-talba ġiet ippreżentata fit-2 ta’ Awwissu 2022 minn Tech-Fab Europe (’l-applikant’) f’isem l-industrija tal-Unjoni ta’ ċerti drappijiet b’malja miftuħa tal-fibri tal-ħġieġ fis-sens tal-Artikolu 5(4) tar-Regolament bażiku.

Verżjoni pubblika tat-talba u l-analiżi tal-grad ta’ sostenn għat-talba mill-produtturi tal-Unjoni huma disponibbli fil-fajl li jistgħu jikkonsultawh il-partijiet interessati. It-Taqsima 5.6 ta’ din in-Notifika tipprovdi informazzjoni dwar l-aċċess għall-fajl mill-partijiet interessati.

2.   Prodott taħt rieżami

Il-prodott taħt rieżami huwa drappijiet b’malja miftuħa tal-fibri tal-ħġieġ, b’daqs taċ-ċellula ta’ aktar minn 1,8 mm kemm fit-tul kif ukoll fil-wisa’ u li jiżnu aktar minn 35 g/m2, esklużi d-diski tal-fibra tal-ħġieġ, (“il-prodott taħt rieżami”) li bħalissa jaqa taħt il-kodiċijiet NM ex 7019 63 00, ex 7019 64 00, ex 7019 65 00, ex 7019 66 00 u ex 7019 69 90 (kodiċijiet TARIC 7019630019, 7019640019, 7019650018, 7019660018 u 7019699019). Il-kodiċijiet NM u TARIC qed jingħataw biss għall-informazzjoni.

3.   Miżuri eżistenti

Il-miżuri fis-seħħ bħalissa huma dazji anti-dumping definittivi imposti bis-saħħa tar-Regolament ta’ Implimentazzjoni tal-Kummissjoni (UE) Nru 2017/1993 (3), kif emendat l-aħħar bir-Regolament ta’ Implimentazzjoni tal-Kummissjoni (UE) 2018/788 (4).

4.   Raġunijiet għar-rieżami

It-talba hija msejsa fuq ir-raġunijiet li l-iskadenza tal-miżuri x’aktarx tirriżulta fil-kontinwazzjoni jew fir-rikorrenza tad-dumping u fil-kontinwazzjoni jew ir-rikorrenza tad-dannu għall-industrija tal-Unjoni.

4.1.    Allegazzjoni dwar il-probabbiltà ta’ kontinwazzjoni jew rikorrenza tad-dumping

4.1.1.   Allegazzjoni tal-probabbiltà ta’ kontinwazzjoni tad-dumping mir-RPĊ

L-applikant sostna li mhux xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti fis-sens tal-punt (b) tal-Artikolu 2(6a) tar-Regolament bażiku.

Biex jissostanzja l-allegazzjonijiet ta’ distorsjonijiet sinifikanti, l-applikant qagħad fuq l-informazzjoni fir-rapport tal-pajjiż prodott mis-servizzi tal-Kummissjoni fl-20 ta’ Diċembru 2017 li jiddeskrivi ċ-ċirkustanzi speċifiċi tas-suq fir-RPĊ (5). B’mod partikolari, l-applikanti rreferew għal distorsjonijiet bħala preżenza tal-istat b’mod ġenerali u aktar speċifiku li jaffettwaw is-settur kimiku u għall-kapitoli dwar il-materja prima u dwar l-enerġija. Barra minn hekk, l-applikanti ddependew fuq informazzjoni pubblika, partikolarment l-14-il Pjan ta’ Ħames Snin għall-Iżvilupp Ekonomiku u Soċjali Nazzjonali tar-Repubblika tal-Poplu taċ-Ċina u l-Punti Ewlenin tal-Għanijiet fit-Tul għall-2035. Fl-aħħar nett, ir-rikorrenti bbażaw ruħhom ukoll fuq il-konstatazzjonijiet tal-Kummissjoni f’investigazzjonijiet riċenti fuq antidumping u antisussidji (6).

B’hekk, fir-rigward tal-Artikolu 2(6a)(a) tar-Regolament bażiku, l-allegazzjoni ta’ rikorrenza ta’ dumping hija bbażata fuq tqabbil ta’ valur normali maħdum fuq il-bażi tal-ispejjeż tal-produzzjoni u tal-bejgħ li jirriflettu prezzijiet jew punti ta’ riferiment mingħajr distorsjoni f’pajjiż rappreżentattiv xieraq, mal-prezz tal-esportazzjoni (fil-livell ta’ kif joħroġ mill-fabbrika) tal-prodott taħt rieżami mir-RPĊ meta mibjugħ għall-esportazzjoni lejn numru ta’ pajjiżi terzi, b’ħarsa lejn in-nuqqas preżenti ta’ volumi ta’ importazzjonijiet sinifikanti mir-RPĊ lejn l-Unjoni.

Abbażi tat-tqabbil ta’ hawn fuq, li juri li hemm id-dumping, l-applikant jallega li x’aktarx hemm rikorrenza ta’ dumping mill-RPĊ.

L-applikant jallega wkoll li n-nuqqas ta’ volumi sinifikanti ta’ importazzjoni fil-livell tal-kodiċijiet TARIC mir-RPĊ lejn l-Unjoni ma jikkorrispondix mal-informazzjoni għad-dispożizzjoni tiegħu dwar il-preżenza tal-importazzjonijiet Ċiniżi fis-suq tal-Unjoni. F’dan il-kuntest, l-applikant jallega wkoll il-kontinwazzjoni tad-dumping. L-allegazzjoni hija bbażata fuq tqabbil ta’ valur normali maħdum fuq il-bażi tal-kostijiet tal-produzzjoni u tal-bejgħ li jirriflettu prezzijiet jew punti ta’ riferiment mingħajr distorsjoni f’pajjiż rappreżentattiv xieraq, mal-prezz tal-esportazzjoni (fil-livell ta’ kif joħroġ mill-fabbrika) tal-prodott taħt rieżami mir-RPĊ meta jinbiegħ għall-esportazzjoni lejn l-Unjoni.

Abbażi ta’ dan, il-marġnijiet tad-dumping ikkalkulati huma sinifikanti għar-RPĊ.

Fid-dawl tal-informazzjoni disponibbli, il-Kummissjoni tqis li hemm biżżejjed provi skont l-Artikolu 5(9) tar-Regolament bażiku, li jissuġġerixxu li, minħabba li hemm distorsjonijiet sinifikanti li jaffettwaw il-prezzijiet u l-kostijiet, l-użu ta’ prezzijiet u kostijiet domestiċi fil-pajjiż ikkonċernat mhuwiex xieraq, u dan jirrikjedi li jingħata bidu għal investigazzjoni fuq il-bażi tal-Artikolu 2(6a) tar-Regolament bażiku.

Ir-rapport tal-pajjiż huwa disponibbli fil-fajl tal-konsultazzjoni mill-partijiet interessati u fis-sit web tad-DĠ Kummerċ (7).

4.2.    Allegazzjoni dwar il-probabbiltà ta’ kontinwazzjoni jew ta’ rikorrenza tad-dannu

L-applikant jallega probabbiltà ta’ kontinwazzjoni jew rikorrenza ta’ dannu mill-pajjiż ikkonċernat.

L-applikant ippreżenta provi biżżejjed li, f'każ li l-miżuri jitħallew jiskadu, il-livell attwali tal-importazzjoni tal-prodott li qed jiġi rieżaminat mill-pajjiż ikkonċernat għall-Unjoni, aktarx jiżdied. Dan huwa minħabba l-eżistenza ta’ kapaċitajiet sostanzjali mhux użati fil-pajjiżi kkonċernati u minħabba l-attrattività tas-suq tal-Unjoni Ewropea f’termini ta’ daqs u f’termini.

L-applikant jallega li kull żieda sostanzjali ta’ importazzjonijiet bi prezzijiet li huma l-oġġett ta’ dumping mill-pajjiż ikkonċernat aktarx li jwasslu għal kontinwazzjoni u rikorrenzi ta’ ħsara lill-industrija tal-Unjoni, jekk dawn il-miżuri jitħallew jiskadu.

5.   Proċedura

Wara li ġie kkonsultat il-Kumitat stabbilit skont l-Artikolu 15(1) tar-Regolament bażiku, ġie determinat li teżisti biżżejjed evidenza ta’ probabbiltà ta’ dumping u dannu biex jiġi ġġustifikat il-bidu ta’ rieżami ta’ skadenza, il-Kummissjoni b’dan tagħti bidu għal rieżami skont l-Artikolu 11(2) tar-Regolament bażiku.

Ir-rieżami ta’ skadenza jiddetermina jekk huwiex probabbli li l-iskadenza tal-miżuri twassal għall-kontinwazzjoni jew għar-rikorrenza tad-dumping tal-prodott soġġett għal rieżami li joriġina mir-RPĊ u għall-kontinwazzjoni jew għar-rikorrenza ta’ dannu għall-industrija tal-Unjoni.

Il-Kummissjoni tiġbed ukoll l-attenzjoni tal-partijiet għan-Notifika (8) ppubblikata, dwar il-konsegwenzi tat-tifqigħa tal-COVID-19 fuq l-investigazzjonijiet anti-dumping u kontra s-sussidji li jistgħu jkunu applikabbli għal dan il-proċediment.

5.1.    Il-perjodu ta’ investigazzjoni tar-rieżami u l-perjodu taħt kunsiderazzjoni

L-investigazzjoni ta’ kontinwazzjoni jew rikorrenza ta’ dumping se tkopri l-perjodu mill-1 ta’ Lulju 2021 sat-30 ta’ Ġunju 2022 (“il-perjodu ta’ investigazzjoni tar-rieżami”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew rikorrenza tad-dannu se jkopri l-perjodu mill-1 ta’ Jannar 2019 sa tmiem il-perjodu ta’ investigazzjoni tar-rieżami (“il-perjodu kkunsidrat”).

5.2.    Kummenti dwar it-talba u l-bidu tal-investigazzjoni

Il-partijiet interessati kollha li jixtiequ jikkummentaw dwar it-talba (inklużi l-kwistjonijiet li għandhom x’jaqsmu mad-dannu u mal-kawżalità) jew dwar kwalunkwe aspett li jirrigwarda l-bidu tal-investigazzjoni (inkluż il-livell ta’ sostenn għat-talba) iridu jagħmlu dan fi żmien 37 jum mid-data tal-pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea (9).

Kwalunkwe talba għal seduta ta’ smigħ fir-rigward tal-bidu tal-investigazzjoni trid tiġi ppreżentata fi żmien 15-il jum mid-data tal-pubblikazzjoni ta’ din in-Notifika.

5.3.    Proċedura għad-determinazzjoni tal-probabbiltà ta’ kontinwazzjoni jew ta’ rikorrenza ta’ dumping

F’rieżami ta’ skadenza, il-Kummissjoni teżamina l-esportazzjonijiet li saru lejn l-Unjoni matul il-perjodu ta’ investigazzjoni tar-rieżami u, irrispettivament mill-esportazzjonijiet lejn l-Unjoni, tqis jekk is-sitwazzjoni tal-kumpaniji li jipproduċu u li jbigħu l-prodott soġġett għal rieżami fil-pajjiżi kkonċernati hijiex tali li l-esportazzjonijiet bi prezzijiet li huma oġġett ta’ dumping lejn l-Unjoni x’aktarx li jkomplu jew jirrikorru jekk il-miżuri jiskadu.

Għalhekk, il-produtturi kollha (10) tal-prodott taħt rieżami mill-pajjiż ikkonċernat, inklużi dawk li ma kkooperawx fl-investigazzjoni(jiet) li wasslet/wasslu għall-miżuri fis-seħħ, huma mistiedna jipparteċipaw fl-investigazzjoni tal-Kummissjoni.

5.3.1.   Investigazzjoni tal-produtturi fil-pajjiż ikkonċernat

Minħabba li jidher li hemm għadd kbir ta’ produtturi fil-pajjiżi kkonċernati li huma involuti f’dan ir-rieżami ta’ skadenza, u biex tlesti l-investigazzjoni fl-iskadenzi statutorji, il-Kummissjoni tista’ tillimita l-produtturi li jridu jiġu investigati għal għadd raġonevoli billi tagħżel kampjun (dan il-proċess jissejjaħ ukoll “kampjunar”). Il-kampjunar isir f’konformità mal-Artikolu 17 tar-Regolament bażiku.

Sabiex il-Kummissjoni tkun tista’ tiddeċiedi jekk ikunx meħtieġ kampjunar, u jekk ikun il-każ, biex tagħżel kampjun, il-produtturi kollha, jew ir-rappreżentanti li jaġixxu għan-nom tagħhom, inklużi dawk li ma kkooperawx fl-investigazzjoni li wasslet għall-miżuri soġġetti għar-rieżami preżenti, huma b’dan mitluba jipprovdu lill-Kummissjoni b’informazzjoni dwar il-kumpaniji tagħhom fi żmien 7 ijiem mid-data tal-pubblikazzjoni ta’ din in-Notifika. Din l-informazzjoni trid tingħata permezz ta’ TRON.tdi fl-indirizz li ġej: https://tron.trade.ec.europa.eu/tron/tdi/form/R781_SAMPLING_FORM_FOR_EXPORTING_PRODUCER. L-informazzjoni dwar l-aċċess għal TRON tinsab fit-Taqsimiet 5.6 u 5.9 ta’ hawn taħt.

Sabiex tikseb l-informazzjoni li tqis li tkun meħtieġa għall-għażla tal-kampjun tal-produtturi, il-Kummissjoni se tikkuntattja wkoll lill-awtoritajiet tal-pajjiż ikkonċernat u tista’ tikkuntattja lil kwalunkwe assoċjazzjoni magħrufa ta’ produtturi fil-pajjiż ikkonċernat.

Jekk ikun meħtieġ kampjun, il-produtturi jintgħażlu fuq il-bażi tal-akbar volum rappreżentattiv ta’ produzzjoni, bejgħ jew esportazzjonijiet li jista’ raġonevolment jiġi investigat fiż-żmien disponibbli. Il-produtturi kollha magħrufa fil-pajjiż ikkonċernat, l-awtoritajiet tal-pajjiż ikkonċernat u l-assoċjazzjonijiet tal-produtturi se jiġu nnotifikati mill-Kummissjoni, permezz tal-awtoritajiet tal-pajjiż ikkonċernat jekk ikun xieraq, dwar il-kumpaniji li jintgħażlu għall-kampjun.

Ladarba l-Kummissjoni tkun irċeviet l-informazzjoni meħtieġa biex tagħżel kampjun ta’ produtturi, hija tinforma lill-partijiet ikkonċernati bid-deċiżjoni tagħha dwar jekk dawn humiex inklużi fil-kampjun. Il-produtturi fil-kampjun ikollhom jippreżentaw kwestjonarju komplut fi żmien 30 jum mid-data tan-notifika tad-deċiżjoni tal-inklużjoni tagħhom fil-kampjun, sakemm ma jkunx speċifikat mod ieħor.

Il-Kummissjoni żżid nota fil-fajl li jistgħu jikkonsultawh il-partijiet interessati li tirrifletti l-għażla tal-kampjun. Kull kumment dwar l-għażla tal-kampjun irid jasal fi żmien 3 ijiem mid-data tan-notifika tad-deċiżjoni dwar il-kampjun.

Kopja ta’ dan il-kwestjonarju għall-produtturi fil-pajjiż ikkonċernat hija disponibbli fil-fajl għall-ispezzjoni mill-partijiet interessati u fuq is-sit web tad-DĠ Kummerċ: https://tron.trade.ec.europa.eu/investigations/case-view?caseId=2633

Mingħajr preġudizzju għall-applikazzjoni possibbli tal-Artikolu 18 tar-Regolament bażiku, il-kumpaniji li jkunu qablu mal-inklużjoni possibbli tagħhom fil-kampjun iżda li ma jintgħażlux biex ikunu fil-kampjun se jitqiesu li jkunu kkooperaw.

5.3.2.   Proċedura addizzjonali fir-rigward tar-RPĊ li hija soġġetta għal distorsjonijiet sinifikanti

Soġġett għad-dispożizzjonijiet ta’ din in-Notifika, il-partijiet interessati kollha huma b’dan mistiedna jesprimu l-opinjonijiet tagħhom, jippreżentaw l-informazzjoni u jipprovdu evidenza ta’ sostenn dwar l-applikazzjoni tal-Artikolu 2(6a) tar-Regolament bażiku. Sakemm ma jkunx speċifikat mod ieħor, tali informazzjoni u l-evidenza ta’ sostenn iridu jaslu għand il-Kummissjoni fi żmien 37 jum mid-data tal-pubblikazzjoni ta’ din in-Notifika.

B’mod partikolari, il-Kummissjoni tistieden lill-partijiet interessati kollha biex jesprimu l-opinjonijiet tagħhom dwar l-inputs u l-kodiċijiet tas-Sistema Armonizzata (SA) ipprovduti fit-talba, jipproponu pajjiż(i) rappreżentattiv(i) xieraq/xierqa u jipprovdu l-identità tal-produtturi tal-prodott taħt rieżami f’dawk il-pajjiżi. Din l-informazzjoni u l-evidenza ta’ sostenn iridu jaslu għand il-Kummissjoni fi żmien 15-il jum mid-data tal-pubblikazzjoni ta’ din in-Notifika.

Skont il-punt (e) tal-Artikolu 2(6a) tar-Regolament bażiku, il-Kummissjoni, ftit wara l-bidu tal-investigazzjoni, permezz ta’ nota fil-fajl għall-ispezzjoni mill-partijiet interessati, tinforma lill-partijiet fl-investigazzjoni dwar is-sorsi rilevanti li beħsiebha tuża għad-determinazzjoni tal-valur normali fil-PRC skont l-Artikolu 2(6a) tar-Regolament bażiku. Dan ikun ikopri s-sorsi kollha, inkluża l-għażla ta’ pajjiż terz rappreżentattiv adegwat fejn ikun xieraq. Il-partijiet fl-investigazzjoni għandhom jingħataw 10 ijiem mid-data li fiha din in-nota tiżdied fil-file, sabiex iressqu l-kummenti.

Skont l-informazzjoni disponibbli għall-Kummissjoni, pajjiżi terzi rappreżentattivi possibbli għar-RPĊ f’dan il-każ issuġġeriti mill-applikant huma r-Russja u l-Indja. Bil-għan li finalment tagħżel pajjiż terz rappreżentattiv adegwat, il-Kummissjoni teżamina jekk hemmx pajjiżi b’livell simili ta’ żvilupp ekonomiku bħar-RPĊ, li fihom isiru l-produzzjoni u l-bejgħ tal-prodott taħt rieżami u li għandhom data rilevanti disponibbli minnufih. F’każ li jkun hemm aktar minn pajjiż wieħed bħal dan, se tingħata preferenza, meta jkun il-każ, lill-pajjiżi b’livell adegwat ta’ protezzjoni soċjali u ambjentali.

Fir-rigward tas-sorsi rilevanti, il-Kummissjoni tistieden lill-produtturi kollha fir-RPĊ biex jipprovdu informazzjoni dwar il-materji (primi u dawk ipproċessati) u l-enerġija użati fil-produzzjoni tal-prodott soġġett għal rieżami fi żmien 15-il jum mid-data tal-pubblikazzjoni ta’ din in-Notifika. Din l-informazzjoni trid tingħata permezz ta’ TRON.tdi fl-indirizz li ġej: https://tron.trade.ec.europa.eu/tron/tdi/form/R781_INFO_ON_INPUTS_FOR _EXPORTING_PRODUCER_FORM. L-informazzjoni dwar l-aċċess għal TRON tinsab fit-Taqsimiet 5.6 u 5.9 ta’ hawn taħt.

Barra minn hekk, kwalunkwe preżentazzjoni ta’ informazzjoni fattwali biex jiġu vvalutati l-kostijiet u l-prezzijiet skont il-punt (a) tal-Artikolu 2(6a) tar-Regolament bażiku trid tiġi ppreżentata fi żmien 65 jum mid-data tal-pubblikazzjoni ta’ din in-Notifika. Din l-informazzjoni fattwali jenħtieġ li tittieħed esklużivament minn sorsi disponibbli għall-pubbliku.

Sabiex tikseb l-informazzjoni li tqis li għandha bżonn għall-investigazzjoni fir-rigward tal-allegati distorsjonijiet sinifikanti fis-sens tal-punt (b) tal-Artikolu 2(6a) tar-Regolament bażiku, il-Kummissjoni se tagħmel disponibbli wkoll kwestjonarju għall-Gvern tar-RPĊ.

5.3.3.   L-importaturi mhux relatati suġġetti għall-investigazzjoni (11) (12)

Importaturi mhux relatati tal-prodott taħt rieżami mill-pajjiżi kkonċernati lejn l-Unjoni, inklużi dawk li ma kkooperawx fl-investigazzjoni li wasslet għall-miżuri fis-seħħ, huma mistiedna jipparteċipaw f’din l-investigazzjoni.

Minħabba l-għadd kbir potenzjali ta’ importaturi li mhumiex relatati involuti f’dan ir-rieżami ta’ skadenza, u sabiex l-investigazzjoni titlesta fil-limiti ta’ żmien statutorji, il-Kummissjoni tista’ tillimita l-għadd ta’ importaturi li mhumiex relatati u li se jiġu investigati għal għadd raġonevoli billi tagħżel kampjun (dan il-proċess jissejjaħ ukoll “kampjunar”). Il-kampjunar isir f’konformità mal-Artikolu 17 tar-Regolament bażiku.

Sabiex il-Kummissjoni tkun tista’ tiddeċiedi jekk huwiex meħtieġ il-kampjunar, u jekk dan ikun il-każ, biex tagħżel kampjun, l-importaturi mhux relatati kollha, jew ir-rappreżentanti li jaġixxu għan-nom tagħhom, inklużi dawk li ma kkoperawx fl-investigazzjoni li wasslet għall-miżuri soġġetti għal dan ir-rieżami, qegħdin b’dan jintalbu jippreżentaw ruħhom lill-Kummissjoni. Dawn il-partijiet iridu jagħmlu dan fi żmien sebat (7) ijiem mid-data tal-pubblikazzjoni ta’ din in-Notifika billi jipprovdu lill-Kummissjoni b’informazzjoni dwar il-kumpanija/i tagħhom, kif mitlub fl-Anness ta’ din in-Notifika.

Sabiex tikseb l-informazzjoni li jidhrilha li tkun meħtieġa għall-għażla tal-kampjun ta’ importaturi mhux relatati, il-Kummissjoni tista’ tikkuntattja wkoll lil kwalunkwe assoċjazzjoni magħrufa ta’ importaturi.

Jekk ikun meħtieġ kampjun, l-importaturi jistgħu jintgħażlu fuq il-bażi tal-akbar volum rappreżentattiv ta’ bejgħ tal-prodott taħt rieżami mill-pajjiż ikkonċernat fl-Unjoni li jista’ raġonevolment jiġi investigat fiż-żmien disponibbli. Il-Kummissjoni se tgħarraf lill-importaturi mhux relatati magħrufa kollha u lill-assoċjazzjonijiet magħrufa ta’ importaturi kollha dwar il-kumpaniji li jkunu ntgħażlu bħala parti mill-kampjun.

Il-Kummissjoni se żżid ukoll nota fil-fajl li jistgħu jikkonsultawh il-partijiet interessati li tirrifletti l-għażla tal-kampjun. Kull kumment dwar l-għażla tal-kampjun irid jasal fi żmien 3 ijiem mid-data tan-notifika tad-deċiżjoni dwar il-kampjun.

Sabiex tikseb informazzjoni li tqis bħala meħtieġa għall-investigazzjoni tagħha, il-Kummissjoni se tqiegħed kwestjonarji għad-dispożizzjoni tal-importaturi mhux relatati fil-kampjun. Dawn il-partijiet iridu jibagħtu l-kwestjonarju mimli fi żmien 30 jum mid-data tan-notifika tal-għażla tal-kampjun, sakemm ma jkunx speċifikat mod ieħor.

Kopja tal-kwestjonarju għall-importaturi mhux relatati hija disponibbli fil-fajl li jistgħu jikkonsultawh il-partijiet interessati u fuq is-sit web tad-DĠ Kummerċ: https://tron.trade.ec.europa.eu/investigations/case-view?caseId=2633

5.4.    Il-proċedura għad-determinazzjoni tal-probabbiltà li jissokta jew jerġa’ jseħħ id-dannu u għall-investigazzjoni tal-produtturi tal-Unjoni

Sabiex jiġi stabbilit jekk hemmx probabbiltà ta’ kontinwazzjoni jew ta’ rikorrenza tad-dannu għall-industrija tal-Unjoni, il-Kummissjoni tistieden lill-produtturi tal-Unjoni tal-prodott taħt rieżami biex jipparteċipaw fl-investigazzjoni.

Minħabba li hemm għadd kbir ta’ produtturi tal-Unjoni involuti f’dan ir-rieżami ta’ skadenza, u sabiex ittemm l-investigazzjoni fil-limitu tal-iskadenzi statutorji, il-Kummissjoni ddeċidiet li tillimita għal għadd raġonevoli l-produtturi tal-Unjoni li se jiġu investigati billi tagħżel kampjun (dan il-proċess jissejjaħ ukoll “kampjunar”). It-teħid ta’ kampjun isir f’konformità mal-Artikolu 17 tar-Regolament bażiku.

Il-Kummissjoni għażlet kampjun proviżorju ta’ produtturi tal-Unjoni. Id-dettalji jinsabu fil-fajl li jistgħu jikkonsultawh il-partijiet interessati.

Il-partijiet interessati huma b’dan mistednin jikkummentaw dwar il-kampjun proviżorju. Barra minn hekk, produtturi oħrajn tal-Unjoni, jew rappreżentanti li jaġixxu f’isimhom, inklużi l-produtturi tal-Unjoni li ma jkunux ikkooperaw fl-investigazzjoni(jiet) li tkun wasslet/jkunu wasslu għall-miżuri fis-seħħ, li jqisu li hemm raġunijiet għaliex jenħtieġ li jkunu inklużi fil-kampjun iridu jikkuntattjaw lill-Kummissjoni fi żmien 7 ijiem mid-data tal-pubblikazzjoni ta’ din in-Notifika. Il-kummenti kollha dwar il-kampjun proviżorju jridu jaslu fi żmien 7 ijiem mid-data tal-pubblikazzjoni ta’ din in-Notifika, sakemm ma jkunx speċifikat mod ieħor.

Il-Kummissjoni se tinnotifika lill-produtturi u/jew lill-assoċjazzjonijiet ta’ produtturi tal-Unjoni magħrufin kollha bil-kumpaniji li finalment ikunu ntgħażlu biex ikunu parti mill-kampjun.

Il-produtturi tal-Unjoni li jkunu parti mill-kampjun ikollhom jippreżentaw kwestjonarju komplut fi żmien 30 jum mid-data tan-notifika tad-deċiżjoni tal-inklużjoni tagħhom fil-kampjun, sakemm ma jkunx speċifikat mod ieħor.

Kopja tal-kwestjonarju għall-produtturi tal-Unjoni hija disponibbli fil-fajl għall-ispezzjoni mill-partijiet interessati u fuq is-sit web tad-DĠ Kummerċ: https://tron.trade.ec.europa.eu/investigations/case-view?caseId=2633

5.5.    Proċedura għall-valutazzjoni tal-interess tal-Unjoni

Jekk tiġi kkonfermata l-probabbiltà ta’ kontinwazzjoni jew ta’ rikorrenza ta’ dumping u dannu, se tittieħed deċiżjoni, skont l-Artikolu 21 tar-Regolament bażiku, dwar jekk iż-żamma tal-miżuri anti-dumping tmurx kontra l-interessi tal-Unjoni.

Il-produtturi tal-Unjoni, l-importaturi u l-assoċjazzjonijiet rappreżentattivi tagħhom, l-utenti u l-assoċjazzjonijiet rappreżentattivi tagħhom, it-trade unions u l-organizzazzjonijiet tal-konsumatur rappreżentattivi huma mistiedna jipprovdu lill-Kummissjoni b’informazzjoni dwar l-interess tal-Unjoni.

L-informazzjoni dwar il-valutazzjoni tal-interess tal-Unjoni trid tiġi pprovduta fi żmien 37 jum mid-data tal-pubblikazzjoni ta’ din in-Notifika, sakemm ma jkunx speċifikat mod ieħor. Din l-informazzjoni tista’ tiġi pprovduta jew f’format ħieles jew inkella billi jiġi komplut il-kwestjonarju mħejji mill-Kummissjoni.

Kopja tal-kwestjonarji, inkluż il-kwestjonarju għall-utenti tal-prodott taħt rieżami, hija disponibbli fil-fajl għall-ispezzjoni mill-partijiet interessati u fuq is-sit web tad-DĠ Kummerċ: https://tron.trade.ec.europa.eu/investigations/case-view?caseId=2633. Fi kwalunkwe każ, l-informazzjoni ppreżentata skont l-Artikolu 21 tar-Regolament bażiku titqies biss jekk, meta tiġi ppreżentata, tkun sostnuta b’evidenza fattwali li tissostanzja l-validità tagħha.

5.6.    Partijiet interessati

Sabiex jieħdu sehem fl-investigazzjoni, il-partijiet interessati, bħall-produtturi fil-pajjiżi kkonċernati, il-produtturi tal-Unjoni, l-importaturi u l-assoċjazzjonijiet rappreżentattivi tagħhom, l-utenti u l-assoċjazzjonijiet rappreżentattivi tagħhom, it-trade unions u l-organizzazzjonijiet tal-konsumatur rappreżentattivi, l-ewwel iridu juru li hemm rabta oġġettiva bejn l-attivitajiet tagħhom u l-prodott soġġett għal rieżami.

Il-produtturi fil-pajjiż ikkonċernat, il-produtturi tal-Unjoni, l-importaturi u l-assoċjazzjonijiet rappreżentattivi li rendew disponibbli informazzjoni f’konformità mal-proċeduri deskritti fit-Taqsimiet 5.3.1, 5.3.3 u 5.4 jiġu kkunsidrati bħala partijiet interessati jekk ikun hemm rabta oġġettiva bejn l-attivitajiet tagħhom u l-prodott taħt rieżami.

Partijiet oħra jkunu jistgħu jipparteċipaw biss fl-investigazzjoni bħala parti interessata mill-mument meta jippreżentaw lilhom infushom, u dment li jkun hemm rabta oġġettiva bejn l-attivitajiet tagħhom u l-prodott taħt rieżami. Il-fatt li wieħed jiġi kkunsidrat bħala parti interessata huwa mingħajr preġudizzju għall-applikazzjoni tal-Artikolu 18 tar-Regolament bażiku.

L-aċċess għall-fajl li jistgħu jikkonsultawh il-partijiet interessati jsir permezz ta’ Tron.tdi f’dan l-indirizz: https://tron.trade.ec.europa.eu/tron/TDI. Jekk jogħġbok segwi l-istruzzjonijiet fuq dik il-paġna sabiex ikollok aċċess (13).

5.7.    Preżentazzjonijiet oħrajn bil-miktub

Soġġett għad-dispożizzjonijiet ta’ din in-Notifika, il-partijiet interessati kollha huma b’dan mistiedna jesprimu l-opinjonijiet tagħhom, jippreżentaw l-informazzjoni u jipprovdu evidenza ta’ sostenn. Sakemm ma jkunx speċifikat mod ieħor, tali informazzjoni u l-evidenza ta’ sostenn iridu jaslu għand il-Kummissjoni fi żmien 37 jum mid-data tal-pubblikazzjoni ta’ din in-Notifika.

5.8.    Possibbiltà ta’ seduta ta’ smigħ mis-servizzi ta’ investigazzjoni tal-Kummissjoni

Il-partijiet kollha interessati jistgħu jitolbu li jinstemgħu mis-servizzi ta’ investigazzjoni tal-Kummissjoni. Kwalunkwe talba għal seduta ta’ smigħ trid issir bil-miktub u trid tispeċifika r-raġunijiet għat-talba kif ukoll sommarju ta’ dak li l-parti interessata tixtieq tiddiskuti matul is-seduta ta’ smigħ. Is-seduta ta’ smigħ tkun limitata għall-kwistjonijiet stabbiliti minn qabel mill-partijiet interessati bil-miktub.

Fil-prinċipju, is-seduti ta’ smigħ ma jintużawx biex tiġi ppreżentata informazzjoni fattwali li tkun għadha mhijiex fil-fajl. Madankollu, fl-interess ta’ amministrazzjoni tajba u sabiex is-servizzi tal-Kummissjoni jkunu jistgħu jimxu ’l quddiem bl-investigazzjoni, il-partijiet interessati jistgħu jiġu mitluba jipprovdu informazzjoni fattwali ġdida wara seduta ta’ smigħ.

5.9.    Struzzjonijiet għat-tfassil ta’ preżentazzjonijiet bil-miktub u biex jintbagħtu l-kwestjonarji kompluti u l-korrispondenza

L-informazzjoni ppreżentata lill-Kummissjoni għall-fini ta’ investigazzjonijiet għad-difiża tal-kummerċ għandha tkun ħielsa mid-drittijiet tal-awtur. Il-partijiet interessati, qabel ma jippreżentaw lill-Kummissjoni informazzjoni u / jew data li jkunu soġġetti għad-drittijiet tal-awtur ta’ parti terza, iridu jitolbu permess speċifiku lid-detentur tad-drittijiet tal-awtur li jippermetti b’mod espliċitu li l-Kummissjoni a) tuża l-informazzjoni u d-data għall-finijiet ta’ dan il-proċediment tad-difiża tal-kummerċ u b) tipprovdi l-informazzjoni u/jew id-data lill-partijiet interessati f’din l-investigazzjoni f’għamla li tippermettilhom jeżerċitaw id-drittijiet tad-difiża tagħhom.

Il-preżentazzjonijiet kollha bil-miktub, fosthom l-informazzjoni mitluba f’din in-Notifika, il-kwestjonarji mimlija u l-korrispondenza pprovduta mill-partijiet interessati li għalihom jintalab trattament kunfidenzjali għandhom jiġu mmarkati bħala “Sensitive” (14) (Sensittiva). Il-partijiet li jippreżentaw informazzjoni matul din l-investigazzjoni huma mistiedna jagħtu raġunijiet għat-talba tagħhom għal trattament kunfidenzjali.

Il-partijiet li jipprovdu informazzjoni “Sensitive” huma mitluba jipprovdu sommarji mhux kunfidenzjali tagħha skont l-Artikolu 19(2) tar-Regolament bażiku, li jiġu mmarkati “For inspection by interested parties”. Dawn is-sommarji jridu jkunu ddettaljati biżżejjed biex jippermettu li s-sustanza tal-informazzjoni ppreżentata b’mod kunfidenzjali tinftiehem b’mod raġonevoli. Jekk parti li tipprovdi informazzjoni kunfidenzjali tonqos milli tagħti raġunijiet ġusti għal talba ta’ trattament kunfidenzjali jew ma tfassalx sommarju mhux kunfidenzjali tagħha fil-format u bil-kwalità mitluba, il-Kummissjoni tista’ tinjora tali informazzjoni sakemm ma jkunx jista’ jintwera b’mod sodisfaċenti minn sorsi xierqa li l-informazzjoni hija korretta.

Il-partijiet interessati huma mistiedna jressqu s-sottomissjonijiet u t-talbiet kollha permezz ta’ TRON.tdi (https://tron.trade.ec.europa.eu/tron/TDI) inklużi talbiet biex jiġu rreġistrati bħala partijiet interessati, dokumenti skenjati ta’ prokuri u ta’ ċertifikazzjoni. Meta jużaw TRON.tdi jew il-posta elettronika, il-partijiet interessati jkunu qed jesprimu l-qbil tagħhom mar-regoli applikabbli għall-preżentazzjonijiet elettroniċi li jinsabu fid-dokument “CORRESPONDENCE WITH THE EUROPEAN COMMISSION IN TRADE DEFENCE CASES” ippubblikat fis-sit web tad-Direttorat Ġenerali għall-Kummerċ: https://circabc.europa.eu/ui/group/2e3865ad-3886-4131-92bb-a71754fffec6/library/c8672a13-8b83-4129-b94c-bfd1bf27eaac/details. Il-partijiet interessati jridu jindikaw isimhom, l-indirizz, in-numru tat-telefon u indirizz validu tal-posta elettronika u jenħtieġ li jiżguraw li l-indirizz tal-posta elettronika pprovdut ikun indirizz kummerċjali uffiċjali tal-posta elettronika li jiffunzjona u li jiġi vverifikat kuljum. Ladarba jiġu pprovduti d-dettalji ta’ kuntatt, il-Kummissjoni tikkomunika mal-partijiet interessati permezz ta’ TRON.tdi jew tal-posta elettronika biss, dment li ma jitolbux li jirċievu d-dokumenti kollha mingħand il-Kummissjoni b’mezz ieħor ta’ komunikazzjoni jew dment li n-natura tad-dokument li jrid jintbagħat ma tkunx teħtieġ l-użu tal-posta rreġistrata. Għal regoli u għal informazzjoni oħra dwar il-korrispondenza mal-Kummissjoni, inklużi l-prinċipji li japplikaw għas-sottomissjonijiet bi TRON.tdi u bil-posta elettronika, jenħtieġ li l-partijiet interessati jikkonsultaw l-istruzzjonijiet ta’ komunikazzjoni mal-partijiet interessati msemmija hawn fuq.

L-indirizz tal-Kummissjoni għall-korrispondenza:

European Commission

Directorate-General for Trade

Directorate G

Uffiċċju: CHAR 04/039

1049 Bruxelles/Brussel

BELGIQUE/BELGIË

TRON.tdi: https://tron.trade.ec.europa.eu/tron/tdi

Email:

—	Għal kwistjonijiet b’rabta mad-dumping: TRADE-OPEN-MESH-R781-DUMPING@ec.europa.eu

—	Għal kwistjonijiet ta’ dannu u interess tal-Unjoni, u biex jintbagħat l-Anness għal din in-Notifika mimli: TRADE-OPEN-MESH-R781-INJURY@ec.europa.eu

6.   Skeda tal-investigazzjoni

L-investigazzjoni għandha normalment tiġi konkluża fi żmien 12-il xahar, u fi kwalunkwe każ mhux aktar tard minn 15-il xahar mid-data tal-pubblikazzjoni ta’ din in-Notifika, skont l-Artikolu 11(5) tar-Regolament bażiku.

7.   Preżentazzjoni tal-informazzjoni

Bħala regola, il-partijiet interessati jistgħu jippreżentaw biss l-informazzjoni fil-perjodi ta’ żmien speċifikati fit-Taqsima 5 ta’ din in-Notifika.

Sabiex l-investigazzjoni titlesta fl-iskadenzi mandatorji, il-Kummissjoni mhix se taċċetta iktar preżentazzjonijiet mingħand il-partijiet interessati wara l-iskadenza għal kummenti dwar l-iżvelar finali jew, jekk ikun applikabbli, wara l-iskadenza għal kummenti dwar l-iżvelar finali addizzjonali.

8.   Possibbiltà għal kummenti dwar il-preżentazzjonijiet ta’ partijiet oħra

Sabiex jiġu ggarantiti d-drittijiet tad-difiża, jenħtieġ li l-partijiet interessati jkollhom il-possibbiltà li jikkummentaw dwar l-informazzjoni ppreżentata minn partijiet interessati oħra. Meta jagħmlu dan, il-partijiet interessati jistgħu biss jindirizzaw kwistjonijiet imqajma fil-preżentazzjonijiet ta’ partijiet interessati oħra u ma jistgħux iqajmu kwistjonijiet ġodda.

Jenħtieġ li l-kummenti dwar l-informazzjoni pprovduta minn partijiet interessati oħrajn b’reazzjoni għall-iżvelar tal-konstatazzjonijiet definittivi, jiġu ppreżentati fi żmien 5 ijiem mill-iskadenza għal kummenti dwar il-konstatazzjonijiet definittivi, sakemm ma jkunx speċifikat mod ieħor. Jekk ikun hemm żvelar finali addizzjonali, jenħtieġ li l-kummenti dwar l-informazzjoni pprovduti minn partijiet interessati oħra b’reazzjoni għal dan l-iżvelar ulterjuri jsiru fi żmien ġurnata (1) mill-iskadenza għal kummenti dwar dan l-iżvelar ulterjuri, sakemm ma jkunx speċifikat mod ieħor.

Il-qafas ta’ żmien deskritt huwa mingħajr preġudizzju għad-dritt tal-Kummissjoni li titlob għal informazzjoni addizzjonali mingħand il-partijiet interessati f’każijiet debitament ġustifikati.

9.   Estensjoni tal-limiti ta’ żmien speċifikati f’din in-Notifika

Jenħtieġ li kull estensjoni għal-limiti ta’ żmien previsti f’din in-Notifika jiġu rikjesti f’ċirkostanzi ta’ eċċezzjoni u jingħataw biss jekk ikunu debitament ġustifikati. Fi kwalunkwe każ, kull estensjoni għall-iskadenza tat-tweġiba għall-kwestjonarji tkun limitata għal 3 ijiem, u bħala regola ma taqbiżx is-7 ijiem. Fir-rigward tal-limiti ta’ żmien għall-preżentazzjoni ta’ informazzjoni oħra speċifikata fin-Notifika ta’ Bidu, l-estensjonijiet ikunu limitati għal 3 ijiem sakemm ma jintweriex li hemm ċirkostanzi eċċezzjonali.

10.   Nuqqas ta’ kooperazzjoni

F’każijiet fejn xi parti interessata tirrifjuta l-aċċess għall-informazzjoni meħtieġa jew ma tipprovdihiex fil-limiti ta’ żmien, jew tfixkel b’mod sinifikanti l-investigazzjoni, jistgħu jiġu stabbiliti konklużjonijiet, sew jekk pożittivi kif ukoll jekk negattivi, abbażi tal-fatti disponibbli, skont l-Artikolu 18 tar-Regolament bażiku.

Fejn jinstab li xi parti interessata tkun ipprovdiet informazzjoni falza jew qarrieqa, l-informazzjoni tista’ tiġi injorata u jistgħu jintużaw il-fatti disponibbli.

Jekk parti interessata ma tikkooperax jew tikkoopera parzjalment biss u għalhekk is-sejbiet ikunu bbażati fuq il-fatti disponibbli f’konformità mal-Artikolu 18 tar-Regolament bażiku, ir-riżultat jista’ jkun inqas favorevoli għal dik il-parti milli kieku tkun ikkooperat.

In-nuqqas ta’ tweġiba kompjuterizzata ma għandhiex tiġi kkunsidrata bħala nuqqas ta’ kooperazzjoni, dment li l-parti interessata turi li l-preżentazzjoni tat-tweġiba kif mitlub tkun tirriżulta f’piż żejjed mhux raġonevoli jew f’kost addizzjonali mhux raġonevoli. Jenħtieġ li l-parti interessata tikkuntattja immedjatament lill-Kummissjoni.

11.   L-Uffiċjal tas-Seduta

Il-partijiet interessati jistgħu jitolbu l-intervent tal-Uffiċjal tas-Seduta fi proċedimenti kummerċjali. L-Uffiċjal tas-Seduta jirrieżamina t-talbiet għall-aċċess għall-fajl, it-tilwim fir-rigward tal-kunfidenzjalità tad-dokumenti, it-talbiet għal estensjoni tal-limiti ta’ żmien u kwalunkwe talba oħra dwar id-drittijiet tad-difiża tal-partijiet interessati u tal-partijiet terzi li jistgħu jfeġġu matul il-proċediment.

L-Uffiċjal tas-Seduta jista’ jorganizza seduti ta’ smigħ u jagħmilha ta’ medjatur bejn il-parti/-jiet interessata/i u s-servizzi tal-Kummissjoni sabiex jiżgura li d-drittijiet tad-difiża tal-partijiet interessati jkunu qed jiġu eżerċitati bis-sħiħ. Jenħtieġ li t-talba għal seduta ta’ smigħ mal-Uffiċjal tas-Seduta ssir bil-miktub u jenħtieġ li tispeċifika r-raġunijiet għat-talba. L-Uffiċjal tas-Seduta jeżamina r-raġunijiet għat-talbiet. Jenħtieġ li dawn is-seduti ta’ smigħ isiru biss jekk il-kwistjonijiet ma jkunux ġew solvuti mas-servizzi tal-Kummissjoni fi żmien debitu.

Kwalunkwe talba trid tiġi ppreżentata fi żmien raġonevoli u f’qasir żmien sabiex ma xxekkilx l-andament tajjeb tal-proċedimenti. Għal dan l-għan, jenħtieġ li l-partijiet interessati jitolbu l-intervent tal-Uffiċjal tas-Seduta minn kmieni kemm jista’ jkun wara li jseħħ l-avveniment li jiġġustifika tali intervent. Meta t-talbiet għal seduti ta’ smigħ jiġu ppreżentati lil hinn mill-oqfsa ta’ żmien rilevanti, l-Uffiċjal tas-Seduta jeżamina wkoll ir-raġunijiet għalfejn tali talbiet saru daqshekk tard, in-natura tal-kwistjonijiet imqajma u l-impatt ta’ dawk il-kwistjonijiet fuq id-drittijiet tad-difiża, filwaqt li jqis kif dovut l-interessi ta’ amministrazzjoni tajba u t-tlestija tal-investigazzjoni fil-ħin.

Għal iktar informazzjoni u għad-dettalji ta’ kuntatt, il-partijiet interessati jistgħu jikkonsultaw il-paġni web tal-Uffiċjal tas-Seduta fuq is-sit web tad-DĠ Kummerċ:

https://policy.trade.ec.europa.eu/contacts/hearing-officer_en

12.   Possibbiltà li jintalab rieżami skont l-Artikolu 11(3) tar-Regolament bażiku

Billi dan ir-rieżami ta’ skadenza qed jinbeda f’konformità mad-dispożizzjonijiet tal-Artikolu 11(2) tar-Regolament bażiku, is-sejbiet tiegħu mhux se jwasslu biex il-miżuri eżistenti jiġu emendati iżda biex dawk il-miżuri jitħassru jew jinżammu skont l-Artikolu 11(6) tar-Regolament bażiku.

Jekk xi parti interessata tqis li jkun ġustifikat li jsir rieżami tal-miżuri, sabiex ikun possibbli li l-miżuri jiġu emendati, din il-parti tista’ titlob li jsir rieżami skont l-Artikolu 11(3) tar-Regolament bażiku.

Il-partijiet li jixtiequ jitolbu għal rieżami ta’ dan it-tip, li jsir indipendentement mir-rieżami ta’ skadenza msemmi f’din in-Notifika, jistgħu jikkuntattjaw lill-Kummissjoni fl-indirizz mogħti hawn fuq.

13.   Proċessar ta’ data personali

Kwalunkwe data personali li tinġabar f’din l-investigazzjoni se tiġi trattata f’konformità mar-Regolament (UE) 2018/1725 tal-Parlament Ewropew u tal-Kunsill (15).

Avviż dwar il-protezzjoni tad-data li jinforma lill-individwi kollha dwar l-ipproċessar tad-data personali fil-qafas tal-attivitajiet tad-difiża tal-kummerċ tal-Kummissjoni huwa disponibbli fis-sit web tad-DĠ Kummerċ:

https://policy.trade.ec.europa.eu/enforcement-and-protection/trade-defence_en

---

(1)  ĠU C 63, 7.2.2022, p. 11.

(2)  ĠU L 176, 30.6.2016, p. 21.

(3)  Ir-Regolament ta’ Implimentazzjoni tal-Kummissjoni (UE) 2017/1993 tas-6 ta’ Novembru 2017 li jimponi dazju antidumping definittiv fuq importazzjonijiet ta’ ċerti drappijiet b’malja miftuħa tal-fibri tal-ħġieġ li joriġinaw mir-Repubblika tal-Poplu taċ-Ċina, għal importazzjonijiet ta’ ċerti drappijiet b’malja miftuħa tal-fibri tal-ħġieġ, ikkonsenjati mill-Indja, l-Indoneżja, il-Malażja, it-Tajwan u t-Tajlandja, kemm jekk iddikjarati bħala li joriġinaw f’dawn il-pajjiżi u kemm jekk le, wara rieżami tal-iskadenza skont l-Artikolu 11(2) tar-Regolament (UE) 2016/1036 tal-Parlament Ewropew u tal-Kunsill (ĠU L 288, 7.11.2017, p. 4).

(4)  Ir-Regolament ta’ Implimentazzjoni tal-Kummissjoni (UE) 2018/788 tat-30 ta’ Mejju 2018 li jemenda r-Regolament ta’ Implimentazzjoni (UE) 2017/1993 li jimponi dazju antidumping definittiv fuq importazzjonijiet ta’ ċerti drappijiet b’malja miftuħa tal-fibri tal-ħġieġ li joriġinaw mir-Repubblika tal-Poplu taċ-Ċina kif estiż għal importazzjonijiet ta’ ċerti drappijiet b’malja miftuħa tal-fibri tal-ħġieġ ikkunsinjati mill-Indja, l-Indoneżja, il-Malażja, it-Tajwan u t-Tajlandja, kemm jekk iddikjarati li joriġinaw minn dawn il-pajjiżi kif ukoll jekk le wara rieżami tal-iskadenza skont l-Artikolu 11(2) tar-Regolament (UE) 2016/1036 tal-Parlament Ewropew u tal-Kunsill (ĠU L 134, 31.5.2018, p. 5).

(5)  Id-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet tal-Investigazzjonijiet għad-Difiża tal-Kummerċ, 20 ta’ Diċembru 2017, SWD(2017) 483 final/2, disponibbli hawnhekk: https://trade.ec.europa.eu/doclib/docs/2017/december/tradoc_156474.pdf

(6)  Ir-Regolament ta’ Implimentazzjoni tal-Kummissjoni (UE) 2020/492 tal-1 ta’ April 2020 li jimponi dazji anti-dumping definittivi fuq l-importazzjonijiet ta’ ċerti materjali tal-fibra tal-ħġieġ minsuġa u/jew meħjuta li joriġinaw mir-Repubblika tal-Poplu taċ-Ċina u mill-Eġittu (ĠU L 108, 6.4.2020, p.1); Ir-Regolament ta’ Implimentazzjoni Tal-Kummissjoni (UE) 2020/776 tat-12 ta’ Ġunju 2020 li jimponi dazji kumpensatorji definittivi fuq l-importazzjonijiet ta’ ċerti materjali tal-fibra tal-ħġieġ minsuġa u/jew meħjuta li joriġinaw mir-Repubblika tal-Poplu taċ-Ċina u mill-Eġittu u li jemenda r-Regolament ta’ Implimentazzjoni tal-Kummissjoni (UE) 2020/492 li jimponi dazji anti-dumping definittivi fuq l-importazzjonijiet ta’ ċerti materjali tal-fibra tal-ħġieġ minsuġa u/jew meħjuta li joriġinaw mir-Repubblika tal-Poplu taċ-Ċina u mill-Eġittu (ĠU L 189, 15.6.2020, p.1); Regolament ta’ Implimentazzjoni tal-Kummissjoni (UE) 2020/870 tal-24 ta’ Ġunju 2020 li jimponi dazju kumpensatorju definittiv u jiġbor b’mod definittiv id-dazju kumpensatorju provviżorju impost fuq l-importazzjonijiet ta’ prodotti tal-fibra tal-ħġieġ bil-filament kontinwu li joriġinaw mill-Eġittu, u li jimponi dazju kumpensatorju definittiv fuq l-importazzjonijiet irreġistrati ta’ prodotti tal-fibra tal-ħġieġ bil-filament kontinwu li joriġinaw mill-Eġittu (ĠU L 201, 25.6.2020, p.10); Ir-Regolament ta’ Implimentazzjoni tal-Kummissjoni (UE) 2021/328 tal-24 ta’ Frar 2021 li jimponi dazju kumpensatorju definittiv fuq l-importazzjonijiet ta’ prodotti tal-fibra tal-ħġieġ bil-filament kontinwu li joriġinaw mir-Repubblika tal-Poplu taċ-Ċina wara rieżami skont l-Artikolu 18 tar-Regolament (UE) 2016/1037 tal-Parlament Ewropew u tal-Kunsill (ĠU L 65, 25.2.2021, p.1); Regolament ta’ Implimentazzjoni tal-Kummissjoni (UE) 2021/2287 tas-17 ta’ Diċembru 2021 li jimponi dazji kompensatorji definittivi fuq l-importazzjonijiet ta’ fojl tal-aluminju għall-modifikazzjoni li joriġinaw mir-Repubblika tal-Poplu taċ-Ċina u li jemenda r-Regolament ta’ Implimentazzjoni tal-Kummissjoni (UE) 2021/2170 li jimponi dazji anti-dumping definittivi fuq l-importazzjonijiet ta’ fojl tal-aluminju għall-modifikazzjoni li joriġinaw mir-Repubblika tal-Poplu taċ-Ċina (ĠU L 458, 22.12.2021, p. 344); u r-Regolament ta’ Implimentazzjoni tal-Kummissjoni (UE) 2022/72 tat-18 ta’ Jannar 2022 li jimponi dazji kompensatorji definittivi fuq l-importazzjonijiet ta’ kejbils fibrottiċi li joriġinaw mir-Repubblika tal-Poplu taċ-Ċina u li jemenda r-Regolament ta’ Implimentazzjoni tal-Kummissjoni (UE) 2021/2011 li jimponi dazji anti-dumping definittivi fuq l-importazzjonijiet ta’ kejbils fibrottiċi li joriġinaw mir-Repubblika tal-Poplu taċ-Ċina (ĠU L 12, 19.1.2022, p.34).

(7)  Id-dokumenti msemmija fir-rapport tal-pajjiż jistgħu jinkisbu wkoll wara talba motivata kif xieraq.

(8)  https://eur-lex.europa.eu/legal-content/EN/TXT/?uri=CELEX%3A52020XC0316%2802%29

(9)  Ir-referenzi kollha għall-pubblikazzjoni ta’ din in-Notifika se jkunu referenzi għall-pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea, dment li ma jkunx speċifikat mod ieħor.

(10)  Produttur huwa kwalunkwe kumpanija fil-pajjiżi kkonċernati li tipproduċi l-prodott taħt rieżami, inkluża kwalunkwe kumpanija relatata magħha involuta fil-produzzjoni, fil-bejgħ domestiku jew fl-esportazzjonijiet tal-prodott taħt rieżami.

(11)  Huma biss l-importaturi li mhumiex relatati ma’ produtturi fil-pajjiż ikkonċernat li jistgħu jiddaħħlu fil-kampjun. L-importaturi li huma relatati mal-produtturi jridu jimlew l-Anness I tal-kwestjonarju għal dawn il-produtturi. F’konformità mal-Artikolu 127 tar-Regolament ta’ Implimentazzjoni tal-Kummissjoni (UE) 2015/2447 tal-24 ta’ Novembru 2015 li jistabbilixxi regoli dettaljati għall-implimentazzjoni ta’ ċerti dispożizzjonijiet tar-Regolament (UE) Nru 952/2013 tal-Parlament Ewropew u tal-Kunsill li jistabbilixxi l-Kodiċi Doganali tal-Unjoni, żewġ persuni għandhom jitqiesu li jkunu relalati jekk: (a) ikunu uffiċjali jew diretturi tan-negozju tal-persuna l-oħra; (b) ikunu msieħba rikonoxxuti legalment fin-negozju; (c) ikunu l-impjegatur u l-impjegat; (d) parti terza tippossjedi jew tikkontrolla jew iżżomm direttament jew indirettament 5 % jew aktar tal-azzjoni bid-dritt tal-vot jew l-ishma pendenti tat-tnejn li huma; (e) waħda minnhom tikkontrolla direttament jew indirettament lill-persuna l-oħra; (f) it-tnejn li huma jkunu direttament jew indirettament ikkontrollati minn persuna terza; (g) flimkien jikkontrollaw persuna terza direttament jew indirettament; jew (h) ikunu membri tal-istess familja (ĠU L 343, 29.12.2015, p. 558). Il-persuni għandhom jitqiesu li jkunu membri tal-istess familja jekk ikollhom kwalunkwe waħda mir-relazzjonijiet segwenti ma’ xulxin biss: (i) konjuġi, (ii) ġenitur u wild, (iii) aħwa (sew jekk mill-istess ġenituri jew aħwa minn ġenitur wieħed), (iv) nannu jew nanna u neputi jew neputija, (v) ziju jew zija u neputi jew neputija, (vi) ġenitur tar-rispett u wild tar-rispett, (vii) aħwa tar-rispett. Skont l-Artikolu 5(4) tar-Regolament (UE) Nru 952/2013 tal-Parlament Ewropew u tal-Kunsill tad-9 ta’ Ottubru 2013 li jistabbilixxi l-Kodiċi Doganali tal-Unjoni, “persuna” tfisser persuna fiżika, persuna ġuridika u kwalunkwe assoċjazzjoni ta’ persuni li mhijiex persuna ġuridika iżda li hija rikonoxxuta taħt il-liġi tal-Unjoni jew nazzjonali bħala li jkollha l-kapaċità biex tagħmel atti legali (ĠU L 269, 10.10.2013, p. 1).

(12)  Id-data pprovduta minn importaturi mhux relatati tista’ tintuża wkoll b’rabta ma’ aspetti oħra ta’ din l-investigazzjoni, għajr biex jiġi stabbilit id-dumping.

(13)  F’każ ta’ problemi tekniċi kkuntattja lit-Trade Service Desk permezz ta’ email lil trade-service-desk@ec.europa.eu jew ċempel +32 22979797.

(14)  Dokument “Sensitive” huwa dokument li jitqies li jkun kunfidenzjali skont l-Artikolu 19 tar-Regolament bażiku u l-Artikolu 6 tal-Ftehim tad-WTO dwar l-Implimentazzjoni tal-Artikolu VI tal-GATT 1994 (il-Ftehim dwar l-Anti-dumping). Huwa wkoll dokument protett skont l-Artikolu 4 tar-Regolament (KE) Nru 1049/2001 tal-Parlament Ewropew u tal-Kunsill (ĠU L 145, 31.5.2001, p. 43).

(15)  Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).