INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

16.12.2021

Il-Ġurnal Uffiċjali tal-Unjoni Ewropea

C 508/1

KOMUNIKAZZJONI TAL-KUMMISSJONI —

Linji Gwida dwar l-għajnuna mill-Istat biex tippromwovi investimenti ta’ finanzjament ta’ riskju

(2021/C 508/01)

WERREJ

INTRODUZZJONI

KAMP TA’ APPLIKAZZJONI TAL-LINJI GWIDA U D-DEFINIZZJONIJIET

2.1.

Kamp ta’ applikazzjoni ta’ dawn il-Linji Gwida

2.2.

Għajnuna għall-finanzjament ta’ riskju notifikabbli

2.3.

Definizzjonijiet

VALUTAZZJONI TAL-KOMPATIBBILTÀ TAL-GĦAJNUNA GĦALL-FINANZJAMENT TA’ RISKJU

3.1.

L-ewwel kundizzjoni: l-għajnuna tiffaċilita l-iżvilupp ta’ attività ekonomika

3.1.1.

Identifikazzjoni tal-attività ekonomika appoġġata

3.1.2.

L-effett ta’ inċentiv

3.2.

It-tieni kundizzjoni: L-evitar ta’ effetti avversi fuq il-kundizzjonijiet tan-negozjar sa punt li jmur kontra l-interess komuni

3.2.1.

Elementi bażiċi tal-valutazzjoni ex ante li għandhom jiġu sottomessi mill-Istat Membru kkonċernat lill-Kummissjoni

3.2.2.

Il-ħtieġa ta’ intervent mill-Istat

3.2.2.1.

Miżuri mmirati lejn kategoriji ta’ impriżi barra mill-kamp ta’ applikazzjoni tar-Regolament għall-Eżenzjoni Ġenerali Sħiħa

(a)

Impriżi żgħar b’kapitalizzazzjoni medja

(b)

Impriżi innovattivi b’kapitalizzazzjoni medja

(c)

SMEs li jirċievu l-investiment ta’ finanzjament ta’ riskju inizjali meta jkunu ilhom joperaw fi kwalunkwe suq għal aktar mill-perjodu ta’ eliġibbiltà stabbilit fir-Regolament għall-Eżenzjoni Ġenerali Sħiħa

(d)

Negozji ġodda u SMEs li jeħtieġu investiment ta’ finanzjament ta’ riskju ta’ ammont li jaqbeż il-limitu massimu stabbilit fir-Regolament għall-Eżenzjoni Ġenerali Sħiħa

(e)

Pjattaformi ta’ negozjar alternattivi li ma jissodisfawx il-kundizzjonijiet tar-Regolament għall-Eżenzjoni Ġenerali Sħiħa

3.2.2.2.

Miżuri b’parametri ta’ tfassil mhux konformi mar-Regolament għall-Eżenzjoni Ġenerali Sħiħa

(a)

Istrumenti finanzjarji b’parteċipazzjoni ta’ investitur privat taħt il-proporzjonijiet previsti fir-Regolament għall-Eżenzjoni Ġenerali Sħiħa

(b)

Istrumenti finanzjarji b’parametri ta’ tfassil ’il fuq mil-limiti massimi previsti fir-Regolament għall-Eżenzjoni Ġenerali Sħiħa

(c)

Strumenti finanzjarji minbarra garanziji fejn l-investituri, l-intermedjarji finanzjarji u l-maniġers tagħhom jintgħażlu billi tingħata preferenza lill-protezzjoni minn ċaqliq 'l isfelmilli lill-kondiviżjoni asimmetrika tal-profitti

(d)

Inċentivi fiskali għall-investituri korporattivi, inkluż l-intermedjarji finanzjarji jew il-maniġers tagħhom li jaġixxu bħala koinvestituri

3.2.3.

Adegwatezza tal-miżura ta’ għajnuna

3.2.3.1.

L-adegwatezza meta mqabbla ma’ strumenti ta’ politika oħra u ma’ strumenti ta’ għajnuna oħra

3.2.3.2.

Kundizzjonijiet għad-determinazzjoni tal-adegwatezza tal-istrumenti finanzjarji

(a)

L-investimenti ta’ ekwità

(b)

Strumenti ta’ dejn iffinanzjati: dejn

(c)

Strumenti ta’ dejn iffinanzjati: garanziji

3.2.3.3.

Il-kundizzjonijiet għad-determinazzjoni tal-adegwatezza tal-inċentivi fiskali

3.2.3.4.

Il-kundizzjonijiet għal miżuri li jappoġġaw il-pjattaformi ta’ negozjar alternattivi

3.2.4.

Proporzjonalità tal-għajnuna

3.2.4.1.

Il-kundizzjonijiet għall-istrumenti finanzjarji

3.2.4.2.

Il-kundizzjonijiet għall-inċentivi fiskali

3.2.4.3.

Il-kundizzjonijiet għall-pjattaformi ta’ negozjar alternattivi

3.2.4.4.

Kumulazzjoni

3.2.5.

L-evitar ta’ effetti negattivi mhux dovuti tal-għajnuna għall-finanzjament ta’ riskju fuq il-kompetizzjoni u l-kummerċ

3.2.5.1.

L-effetti pożittivi li għandhom jitqiesu

3.2.5.2.

L-effetti negattivi li jridu jitqiesu

3.2.5.3.

L-ibbilanċjar tal-effetti pożittivi kontra l-effetti negattivi tal-għajnuna

3.2.6.

Trasparenza

EVALWAZZJONI

DISPOŻIZZJONIJIET FINALI

5.1.

Applikabbiltà

5.2.

Miżuri xierqa

5.3.

Rapportar u monitoraġġ

5.4.

Reviżjoni

1. INTRODUZZJONI

Abbażi tal-Artikolu 107(3) (c) tat-Trattat dwar il-Funzjonament tal-Unjoni Ewropea, l-għajnuna mill-Istat maħsuba biex tiffaċilita l-iżvilupp ta’ ċerti attivitajiet ekonomiċi tista’ titqies bħala kompatibbli mas-suq intern, fejn tali għajnuna ma taffettwax b’mod negattiv il-kundizzjonijiet tal-kummerċ sa grad li jkun kuntrarju għall-interess komuni. Il-Kummissjoni, storikament irrikonoxxiet l-importanza għall-ekonomiji tal-Istati Membri tas-suq tal-finanzjament ta’ riskju u l-ħtieġa li jittejjeb l-aċċess għall-finanzjament ta’ riskju għall-intrapriżi żgħar u ta’ daqs medju (“SMEs”), għad-ditti żgħar b’kapitalizzazzjoni medja (“impriżi b’kapitalizzazzjoni medja”) u għal impriżi innovattivi b’kapitalizzazzjoni medja (1), u l-ħtieġa sussegwenti li jkun hemm sett ta’ linji gwida biex jiġi żgurat approċċ konsistenti fil-valutazzjoni tal-miżuri ta’ għajnuna għall-finanzjament ta’ riskju. B’dan f’moħħha, il-Kummissjoni adottat il-Linji Gwida dwar il-Kapital ta’ Riskju tal-2006 (2) li sussegwentement ġew sostitwiti mil-Linji Gwida dwar il-Finanzjament ta’ Riskju tal-2014 (3) bħala parti mill-pakkett dwar il-Modernizzazzjoni tal-Għajnuna mill-Istat (4). Il-Linji Gwida tal-2014 dwar il-Finanzjament ta’ Riskju se jiskadu fi tmiem l-2021. Madankollu, l-Istati Membri jistgħu jkomplu jaraw il-ħtieġa li jipprovdu għajnuna għall-finanzjament ta’ riskju, u gwida dwar kif jiġi appoġġat il-finanzjament ta’ riskju f’konformità sħiħa mar-regoli dwar l-għajnuna mill-Istat tibqa’ meħtieġa.

F’dan ir-rigward, l-SMEs huma l-pedament tal-ekonomiji tal-Istati Membri, kemm f’termini ta’ impjieg kif ukoll f’termini ta’ dinamiżmu u tkabbir ekonomiku, u għalhekk huma wkoll ċentrali għall-iżvilupp ekonomiku r-reżiljenza tal-Unjoni kollha kemm hi. Kif rikonoxxut fl-Istrateġija għall-SMEs għal Ewropa sostenibbli u diġitali (5), il-25 miljun SME tal-Unjoni jimpjegaw madwar 100 miljun persuna, li jammontaw għal aktar minn nofs il-prodott domestiku gross (PDG) tal-Unjoni u għandhom rwol ewlieni fiż-żieda tal-valur f’kull settur tal-ekonomija. Huma jipprovdu soluzzjonijiet innovattivi biex jiġu indirizzati sfidi bħat-tibdil fil-klima, l-użu ineffiċjenti tar-riżorsi u t-telfien tal-koeżjoni soċjali, u jgħinu biex ixerrdu din l-innovazzjoni li tappoġġja t-tranżizzjoni ekoloġika u diġitali u li ssaħħaħ ir-reżiljenza jew is-sovranità teknoloġika tal-Unjoni. Iżda, biex ikunu jistgħu ikbru u jisfruttaw il-potenzjal sħiħ tagħhom, l-SMEs għandhom bżonn il-finanzjament. Dan huwa partikolarment minnu fis-setturi ta’ riskju għoli tat-teknoloġija avvanzata, li huma orjentati lejn l-innovazzjoni. Għalhekk, suq ta’ finanzjament ta’ riskju effiċjenti għall-SMEs huwa kruċjali biex il-kumpaniji intraprenditorjali jkun jista’ jkollhom aċċess għall-finanzjament meħtieġ f’kull stadju tal-iżvilupp tagħhom.

Minkejja l-prospetti ta’ tkabbir tagħhom, in-negozji ġodda u l-SMEs spiss isibu diffikultajiet biex jiksbu aċċess għal finanzjament, b’mod partikolari fl-istadji bikrija tal-iżvilupp tagħhom (6) u meta jkunu jeħtieġu finanzjament addizzjonali biex jespandu. Fil-qalba ta’ dawn id-diffikultajiet hemm problema ta’ informazzjoni asimmetrika: in-negozji ġodda u l-SMEs, speċjalment meta jkunu għadhom jibdew jew ikunu f’setturi ġodda jew tat-teknoloġija avvanzata, spiss ma jkunux jistgħu juru lill-investituri u lill-banek l-affidabbiltà kreditizja tagħhom jew li l-pjanijiet kummerċjali tagħhom huma sodi. F’tali ċirkostanzi, it-tip ta’ skrinjar attiv u r-riċerka li jsiru mill-investituri sabiex jipprovdu finanzjament lil kumpaniji akbar jew aktar stabbiliti jistgħu ma jkunux siewja fil-każ ta’ tranżazzjonijiet li jinvolvu l-SMEs u n-negozji ġodda għax il-kostijiet tal-iskrinjar huma għaljin wisq meta mqabbla mal-valur tal-investiment. Għalhekk, irrispettivament mill-kwalità tal-proġett tagħhom, l-innovazzjoni tat-teknoloġija tagħhom u l-potenzjal tat-tkabbir tagħhom, in-negozji ġodda u l-SMEs x’aktarx li ma jkunux jistgħu jaċċessaw il-finanzjament meħtieġ sakemm ma jkollhomx rekord ippruvat u biżżejjed kollateral. Dik il-problema tista’ tkun partikolarment qawwija fir-rigward tal-investimenti f’teknoloġiji ekoloġiċi, ta’ teknoloġija avvanzata, diġitali jew ibbażati fuq l-ajruspazju li huma innovattivi jew f’innovazzjonijiet soċjali xprunati minn intraprendituri soċjali (7). Bħala riżultat ta’ din l-informazzjoni asimmetrika, is-swieq ta’ finanzjament għan-negozju jistgħu jonqsu milli jipprovdu l-ekwità jew il-finanzjament b’dejn meħtieġ għan-negozji ġodda u l-SMEs li jkunu għadhom kif ġew stabbiliti u dawk b’potenzjal ta’ innovazzjoni u tkabbir għoli u dan jirriżulta f’falliment persistenti tas-suq kapitali li jipprevjeni l-provvista milli tissodisfa d-domanda bi prezz aċċettabbli għaż-żewġ naħat, li jaffettwa b’mod negattiv il-prospetti ta’ tkabbir tal-SMEs u jdgħajjef it-tkabbir fil-produttività tas-Suq Uniku u r-reżiljenza kumplessiva tal-ekonomija tal-Unjoni. F’ċerti ċirkostanzi, impriżi żgħar b’kapitalizzazzjoni medja u impriżi innovattivi b’kapitalizzazzjoni medja jiffaċċjaw l-istess falliment tas-suq.

Il-konsegwenzi ta’ kumpanija li ma tirċevix finanzjament jistgħu jmorru lil hinn minn dik l-entità individwali, b’mod partikolari minħabba l-esternalitajiet tat-tkabbir. Ħafna setturi ta’ suċċess jixhdu tkabbir tal-produttività mhux minħabba li l-kumpaniji preżenti fis-suq iżidu fil-produttività, iżda minħabba li l-kumpaniji aktar effiċjenti u teknoloġikament avvanzati jikbru għad-detriment ta’ dawk inqas effiċjenti (jew dawk bi prodotti obsoleti). Barra minn hekk, is-setturi ekonomiċi involuti u l-ekonomija ġenerali jibbenefikaw minn esternalitajiet tat-tkabbir pożittivi marbuta mal-akkumulazzjoni tal-għarfien li għandhom id-ditti (kapital organizzazzjonali) jew il-ħaddiema (kapital uman), kif ukoll mill-introduzzjoni ta’ oġġetti ġodda, fil-forma ta’surplus għall-konsumaturi u/jew għad-ditti. Sal-punt li dawn il-proċessi jiġu mfixkla mill-fatt li kumpaniji li potenzjalment jistgħu jirnexxu ma jkunux jistgħu jiksbu finanzjament, il-konsegwenzi usa’ għat-tkabbir tal-produttività x’aktarx ikunu negattivi. Jekk bażi usa’ ta’ kumpaniji jitħallew jidħlu fis-suq u jespandu billi jitneħħew l-ostakli bla bżonn għall-finanzjament, dan jista’ mbagħad jixpruna t-tkabbir.

Għalhekk, l-eżistenza ta’ diskrepanza fil-finanzjament li taffettwa lin-negozji ġodda, l-SMEs, l-impriżi żgħar b’kapitalizzazzjoni medja u l-impriżi innovattivi b’kapitalizzazzjoni medja tista’ tiġġustifika l-użu ta’ miżuri ta’ appoġġ pubbliku mill-Istati Membri sabiex jiġi ffaċilitat l-iżvilupp ta’ finanzjament ta’ riskju fis-swieq domestiċi tagħhom. Jekk tiġi mmirata kif suppost, l-għajnuna mill-Istat biex issostni l-provvista ta’ finanzjament ta’ riskju tista’ tkun mezz effettiv biex ittaffi l-falliment tas-suq identifikat jew ostaklu rilevanti ieħor fl-aċċess għal finanzjament u biex tingrana l-kapital privat. Fil-kuntest attwali, l-Istati Membri jistgħu wkoll jagħmlu użu minnha biex irawmu l-irkupru mill-kriżi ekonomika kkawżata mit-tifqigħa tal-COVID-19.

Minbarra li huwa indispensabbli għall-ekonomiji domestiċi tal-Istati Membri, aċċess imtejjeb għall-finanzjament jista’ jikkontribwixxi b’mod pożittiv għal xi wħud mill-objettivi ta’ politika ċentrali tal-Unjoni. L-aċċess għall-finanzjament jikkostitwixxi għodda b’saħħitha biex tappoġġja l-Patt Ekoloġiku (8) u tagħmel l-Ewropa lesta għall-era diġitali (9), kif ukoll biex tiżgura l-irkupru mill-kriżi ekonomika kkawżata mill-pandemija tal-COVID-19 u tinbena Unjoni aktar reżiljenti anki għal kriżijiet futuri.

It-tranżizzjoni ekoloġika hija objettiv ewlieni tal-Unjoni. Skont l-aktar projezzjonijiet reċenti (10), l-ilħuq tal-miri attwali dwar il-klima u l-enerġija għall-2030 jista’ jirrikjedi sa EUR 417-il biljun ta’ investiment annwali addizzjonali, sfida li għaliha l-ingranaġġ ta’ investiment privat sinifikanti se jkun kruċjali. Il-promozzjoni ta’ finanzjament sostenibbli tirrikjedi li jiġu pprovduti s-sinjali x-xierqa biex il-flussi finanzjarji u kapitali jiġu diretti lejn l-investiment ekoloġiku. Għal dak il-għan, fl-2018 il-Kummissjoni nediet il-Pjan ta’ Finanzjament Sostenibbli (11), li ġie segwit reċentement minn Pakkett ta’ Finanzjament Sostenibbli ġdid (12). Element wieħed għall-promozzjoni tal-finanzjament ekoloġiku huwa t-titjib tad-divulgazzjoni dwar id-data klimatika u ambjentali sabiex l-investituri jkunu infurmati bis-sħiħ dwar is-sostenibbiltà tal-investimenti tagħhom. F’dak il-kuntest, pass ewlieni kien l-adozzjoni tar-Regolament (UE) 2020/852 tal-Parlament Ewropew u tal-Kunsill (13), li jikklassifika l-attivitajiet ambjentalment sostenibbli (komunement imsejħa t-"Tassonomija tal-UE").

Fir-rigward tat-tranżizzjoni diġitali, il-Komunikazzjoni tal-2030 dwar il-Kumpass Diġitali (14) tenfasizza l-ħtieġa li jiġi appoġġat l-iżvilupp tal-Unjoni ta’ teknoloġiji diġitali kritiċi b’mod li jrawwem it-tkabbir tal-produttività u l-iżvilupp ekonomiku tagħha b’koerenza sħiħa mal-valuri u mal-objettivi tas-soċjetà tagħha. L-infiq nazzjonali mill-Istati Membri huwa kruċjali biex jippermetti żieda enormi fl-investimenti, flimkien ma’ fondi rilevanti tal-Unjoni u investimenti privati, sabiex jintlaħaq dan l-objettiv.

Fir-rigward tal-kriżi kkawżata mill-pandemija tal-COVID-19, l-irkupru huwa prijorità urġenti u l-momentum għandu jintuża biex jsir progress fit-tranżizzjoni diġitali u ekoloġika u jagħmel l-ekonomija aktar reżiljenti u aktar kompetittiva. Il-Faċilità għall-Irkupru u r-Reżiljenza (“RRF”) (15) hija l-ewwel u l-aktar parti importanti tal-Pakkett ta’ Rkupru tal-UE adottat b’reazzjoni għall-kriżi, li tqiegħed EUR 672,5 biljun għad-dispożizzjoni tal-Istati Membri fil-forma ta’ self u għotjiet bħala appoġġ finanzjarju għall-ewwel snin kruċjali tal-irkupru, wara l-approvazzjoni tal-abbozz tal-pjanijiet għall-irkupru u r-reżiljenza tagħhom. F’dan il-kuntest, il-Kummissjoni identifikat oqsma ewlenin (16), li hija tħeġġeġ lill-Istati Membri biex jinkludu fil-pjanijiet tagħhom għall-irkupru u r-reżiljenza, minħabba r-rilevanza tagħhom madwar l-Istati Membri, l-investimenti kbar ħafna meħtieġa, u l-potenzjal tagħhom li joħolqu l-impjiegi u t-tkabbir u li jgawdu l-benefiċċji mit-tranżizzjonijiet ekoloġiċi u diġitali.

10.

Barra minn hekk, kif ġie ssottolinjat fl-Istrateġija Industrijali aġġornata (17), l-Unjoni jeħtieġ li titgħallem mill-pandemija tal-COVID-19 u mill-impatt tagħha fuq il-ktajjen tal-valur globali; it-titjib tar-reżiljenza tas-suq uniku tiegħu u l-indirizzar tad-dipendenzi strateġiċi filwaqt li tiġi ssalvagwardjata ekonomija tal-UE miftuħa, kompetittiva, u bbażata fuq il-kummerċ huma l-qofol ta’ dawn l-isforzi.

11.

Minħabba l-importanza ta’ aċċess effettiv għall-finanzjament għall-objettivi ewlenin tal-Unjoni, hemm ħtieġa li jkomplu jiżdiedu l-isforzi li jibnu fuq il-politiki tal-Unjoni mmirati lejn it-titjib ta’ dan l-aċċess, bħall-Unjoni tas-Swieq Kapitali (“CMU”) u l-użu tal-baġit tal-Unjoni.

12.

F’dan ir-rigward, il-Kummissjoni adottat l-ewwel pjan ta’ azzjoni tas-CMU (18) fl-2015 sabiex timmobilizza l-kapital fl-Unjoni u twasslu lill-kumpaniji kollha. Wieħed mill-objettivi ewlenin tiegħu kien li jittejjeb l-aċċess tal-SMEs għall-finanzjament, b’mod partikolari għall-finanzjament mhux bankarju. Minn dak iż-żmien, l-Unjoni għamlet progress sinifikanti, billi wettqet il-biċċa l-kbira tal-azzjonijiet individwali mħabbra fil-pjan ta’ azzjoni tas-CMU tal-2015 u fir-rieżami ta’ nofs it-terminu tagħha tal-2017. Ħafna minn dawk l-azzjonijiet kellhom l-għan li jtejbu l-aċċess għall-finanzjament għall-impriżi kollha irrispettivament mid-daqs jew mill-età, iżda xi wħud minnhom kellhom l-għan fil-biċċa l-kbira li jiffaċilitaw l-aċċess għas-swieq kapitali speċifikament għall-SMEs u l-impriżi żgħar b’kapitalizzazzjoni medja (19). Fl-2020 tnieda pjan ta’ azzjoni tas-CMU ġdid (20) biex titkompla s-CMU tal-Unjoni fis-snin li ġejjin sabiex ikomplu jiġu żviluppati s-swieq kapitali u biex jiġi żgurat l-aċċess għall-finanzjament mis-suq, b’mod partikolari għan-negozji żgħar u ta’ daqs medju. F’dan il-kuntest, f’konformità mal-Artikolu 33(9) tad-Direttiva 2014/65/UE (21), il-Kummissjoni stabbilixxiet ukoll Grupp tal-Partijiet Interessati tal-Esperti Tekniċi dwar l-SMEs li ngħata l-mandat li jivvaluta l-ostakli li jsibu l-SMEs biex jagħmlu użu mis-swieq pubbliċi.

13.

Fid-dawl tal-importanza li jittejjeb l-aċċess għall-finanzjament għall-SMEs, il-Kummissjoni tikkomplementa l-leġiżlazzjoni u l-azzjonijiet ta’ politika tal-Unjoni bil-baġit tal-Unjoni, sabiex tindirizza l-fallimenti strutturali tas-suq li jillimitaw it-tkabbir tan-negozji ġodda u tal-SMEs. Għal dan il-għan, l-użu ta’ strumenti finanzjarji (22) ttejjeb taħt il-Qafas Finanzjarju Pluriennali (“QFP”) tal-2014–2020. B’mod partikolari, il-programmi ta’ finanzjament tal-Unjoni stabbiliti bir-Regolament (UE) Nru 1287/2013 tal-Parlament Ewropew u tal-Kunsill (23) (“Kompetittività tal-intrapriżi u l-intrapriżi ż-żgħar u ta’ daqs medju” (“COSME”)) u r-Regolament (UE) Nru 1291/2013 tal-Parlament Ewropew u tal-Kunsill (24) (“Orizzont 2020”) ikkontribwew għat-titjib tal-użu tar-riżorsi pubbliċi permezz ta’ mekkaniżmi ta’ finanzjament tal-kondiviżjoni tar-riskji għall-benefiċċju tal-SMEs fil-fażijiet tal-bidu, tat-tkabbir u tat-trasferiment tagħhom, kif ukoll ta’ impriżi żgħar b’kapitalizzazzjoni medja u ta’ impriżi innovattivi b’kapitalizzazzjoni medja, b’enfasi partikolari fuq azzjonijiet imfassla biex jipprovdu appoġġ mingħajr xkiel mill-innovazzjoni sas-suq, inkluż l-implimentazzjoni kummerċjali tar-riżultati tar-riċerka u l-iżvilupp (“R&Ż”) (25). Barra minn hekk, il-Kunsill Ewropew tal-Innovazzjoni (“EIC”) ilu jappoġġja n-negozji ġodda u l-SMEs mill-2018, taħt il-programm Orizzont 2020, u se jkompli jagħmel dan, kif ukoll jappoġġja l-impriżi żgħar b’kapitalizzazzjoni medja, taħt il-programm ta’ finanzjament għar-riċerka u l-innovazzjoni tal-Unjoni Orizzont Ewropea (26), bil-għan li tittejjeb il-prestazzjoni tas-suq tal-kapital ta’ riskju tal-Unjoni. It-tnedija tal-Azzjoni ta’ Espansjoni Ewropea għall-Kapital ta’ Riskju (“ESCALAR”) (27), bħala programm pilota mill-Kummissjoni u mill-Fond Ewropew tal-Investiment (“FEI”), kif ukoll il-ħidma fuq il-ħolqien ta’ fond privat-pubbliku (28) biex jgħin fil-finanzjament ta’ offerti pubbliċi inizjali tal-SMEs, tiżvela l-importanza mogħtija lill-iffaċilitar tat-tkabbir tan-negozji ġodda u tal-SMEs kif ukoll il-ħtieġa li tkompli titlesta l-firxa ta’ miżuri ta’ appoġġ pubbliku eżistenti fl-istadji kollha ta’ finanzjament. Il-FEI fl-2020 attiva wkoll “fond ta’ fondi”, bl-inizjattiva ISEP (InnovFin Space Equity Pilot), bl-involviment ta’ erba’ investituri ta’ Kapital ta’ Riskju privat biex jiżdied l-investiment fl-ekwità f’kumpaniji Ewropej tal-ajruspazju u tad-difiża. Dan il-mudell qiegħed jiġi esplorat ulterjorment mill-inizjattiva CASSINI u b’mod partikolari mill-Fond għat-Tkabbir ippjanat tagħha (29). Barra minn hekk, il-politika ta’ koeżjoni tal-Unjoni ilha tikkontribwixxi dejjem aktar għall-finanzjament tal-SMEs, inkluż permezz tal-għoti ta’ kapital ta’ riskju, sa mill-bidu tal-2000, u laħqet EUR 10 biljun ta’ appoġġ fi tmiem l-2013 u EUR 15-il biljun addizzjonali ta’ impenji minn 23 Stat Membru sa tmiem l-2020. L-istrumenti finanzjarji taħt il-politika ta’ koeżjoni appoġġaw madwar 365 000 SME madwar l-Ewropa matul l-2020 biss. Finalment, il-Programm il-ġdid InvestEU (30), li se jiġbor flimkien 14-il strument finanzjarju differenti attwalment disponibbli biex jappoġġaw l-investiment fl-UE, kif ukoll fondi kkontribwiti minn ġestjoni kondiviża għall-kompartiment tal-Istati Membri, għandu tieqa speċifika ddedikata għall-finanzjament tan-negozji ż-żgħar filwaqt li t-tliet twieqi l-oħra ta’ InvestEU jistgħu jiffinanzjaw ukoll lill-SMEs fi ħdan il-kamp ta’ applikazzjoni tagħhom.

14.

Kemm l-esperjenza tal-Kummissjoni fil-qasam tal-għajnuna għall-finanzjament ta’ riskju (skont il-Linji Gwida dwar il-Finanzjament ta’ Riskju tal-2014 kif ukoll ir-Regolament għall-Eżenzjoni Ġenerali Sħiħa (31)), u l-inizjattivi msemmija hawn fuq (ara l-paragrafi 12 u 13) fil-livell tal-Unjoni mmirati lejn it-titjib tal-aċċess għall-finanzjament, juru li l-aċċess għall-finanzjament għadu prijorità kemm għall-Unjoni kif ukoll għall-Istati Membri tagħha. F’dan l-isfond, huwa għalhekk kruċjali li l-Kummissjoni tkompli tipprovdi gwida lill-Istati Membri dwar kif se tivvaluta l-kompatibbiltà tal-miżuri ta’ finanzjament ta’ riskju mas-suq intern. Dan huwa muri wkoll mill-evalwazzjoni li saret tal-Linji Gwida dwar il-Finanzjament ta’ Riskju tal-2014 fl-2019 u fl-2020: l-hekk imsejjaħ Kontroll tal-Idoneità (32). Ir-riżultati tal-Kontroll tal-Idoneità juru li bħala regola, il-Linji Gwida dwar il-Finanzjament ta’ Riskju għadhom rilevanti u xierqa għall-iskop tagħhom. Madankollu, hemm bżonn ta’ aktar kjarifika u ta’ simplifikazzjoni ulterjuri tar-regoli. Dawn il-Linji Gwida riveduti dwar il-Finanzjament ta’ Riskju se jiffaċilitaw l-użu ta’ għajnuna mill-Istat għall-finanzjament ta’ riskju mmirata b’mod adegwat mill-Istati Membri, filwaqt li titqies il-kontribuzzjoni pożittiva ta’ tali għajnuna għall-prijoritajiet tal-Kummissjoni deskritti hawn fuq (ara l-paragrafi 6 sa 9), flimkien mal-effetti pożittivi tal-għajnuna fl-iżgurar tal-aċċess għall-finanzjament.

15.

Wara l-adozzjoni fl-2016 tal-Avviż dwar il-kunċett ta’ għajnuna (33) u wara li ġiet ikkunsidrata, b’mod partikolari, it-Taqsima 4.2 tiegħu (34), dawn il-Linji Gwida ma għadhomx jindirizzaw jekk miżura ta’ appoġġ pubbliku tikkostitwixxix għajnuna mill-Istat jew le, iżda jiffokaw fuq il-kundizzjonijiet li skonthom miżura ta’ għajnuna mill-Istat tista’ tinstab li hi kompatibbli mas-suq intern.

16.

Għal dawn ir-raġunijiet, il-Kummissjoni ddeċidiet li tagħmel ċerti bidliet fil-Linji Gwida dwar il-Finanzjament ta’ Riskju 2014, biex tiċċara r-regoli u twassal simplifikazzjoni amministrattiva sabiex jiġi ffaċilitat l-użu ta’ għajnuna mill-Istat b’appoġġ għall-finanzjament ta’ riskju.

2. KAMP TA’ APPLIKAZZJONI TAL-LINJI GWIDA U D-DEFINIZZJONIJIET

2.1. Kamp ta’ applikazzjoni ta’ dawn il-Linji Gwida

17.

Il-Kummissjoni se tapplika l-prinċipji stabbiliti f’dawn il-Linji Gwida għal miżuri ta’ finanzjament ta’ riskju li ma jissodisfawx il-kundizzjonijiet kollha stabbiliti fit-Taqsima 3 tar-Regolament għall-Eżenzjoni Ġenerali Sħiħa (“Għajnuna għall-aċċess għall-finanzjament għall-SMEs”). L-Istat Membru kkonċernat irid jinnotifika dawk il-miżuri (ara t-Taqsima 2.2) f’konformità mal-Artikolu 108(3) tat-Trattat u l-Kummissjoni se twettaq valutazzjoni sostantiva tal-kompatibbiltà kif stabbilit fit-Taqsima 3 ta’ dawn il-Linji Gwida.

18.

Madankollu, l-Istati Membri jistgħu jagħżlu wkoll li jfasslu miżuri ta’ finanzjament ta’ riskju b’tali mod li l-miżuri ma jinvolvux għajnuna mill-Istat skont l-Artikolu 107(1) tat-Trattat, pereżempju għax jikkonformaw mat-test tal-operatur tal-ekonomija tas-suq (35) jew għax jissodisfaw il-kundizzjonijiet tar-Regolament de minimis applikabbli (36). Tali każijiet ma għandhomx għalfejn jiġu nnotifikati lill-Kummissjoni.

19.

Dawn il-Linji Gwida ma jindirizzawx il-kompatibbiltà mas-suq intern tal-miżuri ta’ għajnuna mill-Istat li jissodisfaw il-kriterji stabbiliti f’linji gwida, f’oqfsa jew f’regolamenti oħrajn dwar l-għajnuna mill-Istat. Il-Kummissjoni se tagħti attenzjoni partikolari għall-ħtieġa li jiġi pprevenut l-użu ta’ dawn il-Linji Gwida biex jiġu segwiti objettivi ta’ politika li huma prinċipalment indirizzati minn oqfsa, linji gwida u regolamenti oħrajn dwar l-għajnuna mill-Istat.

20.

Dawn il-Linji Gwida huma mingħajr preġudizzju għall-valutazzjoni skont ir-regoli dwar l-għajnuna mill-Istat ta’ tipi oħra ta’ strumenti finanzjarji minbarra dawk koperti hawnhekk, bħal strumenti li jipprovdu għat-titolizzazzjoni ta’ self eżistenti.

21.

Il-Kummissjoni se tapplika l-prinċipji stabbiliti f’dawn il-Linji Gwida għall-iskemi ta’ finanzjament ta’ riskju biss. Dawn ma humiex se jiġu applikati fir-rigward ta’ miżuri ad hoc li jipprovdu għajnuna għall-finanzjament ta’ riskju lill-impriżi individwali, ħlief fil-każ ta’ miżuri li għandhom l-għan li jappoġġaw pjattaforma ta’ negozjar alternattiva speċifika.

22.

Huwa importanti li jiġi mfakkar li l-miżuri ta’ għajnuna għall-finanzjament ta’ riskju għandhom jintużaw pemezz ta’ intermedjarji finanzjarji jew permezz ta’ pjattaformi ta’ negozjar alternattivi, għajr għall-inċentivi fiskali fuq investimenti diretti fl-impriżi eliġibbli. Għalhekk, miżura li biha l-Istat Membru jew entità pubblika tagħmel investimenti diretti f’kumpaniji mingħajr l-involviment ta’ tali mezzi intermedjarji ma taqax fil-kamp ta’ applikazzjoni tar-regoli tal-għajnuna mill-Istat għall-finanzjament ta’ riskju tar-Regolament għall-Eżenzjoni Ġenerali Sħiħa u ta’ dawn il-Linji Gwida.

23.

Fid-dawl tar-rekord aktar stabbilit u tal-kollateralizzazzjoni ogħla tagħhom, il-Kummissjoni tqis li bħala regola, l-intrapriżi kbar ma jiffaċċjawx l-istess diffikultajiet biex jaċċessaw il-finanzjament bħan-negozji ġodda u l-SMEs, u għalhekk l-għajnuna lil dawn l-intrapriżi jenħtieġ li ma tkunx koperta minn dawn il-Linji Gwida. B’mod eċċezzjonali, miżura ta’ finanzjament ta’ riskju favur impriżi kbar tista’ tiġi ddikjarata kompatibbli skont dawn il-Linji Gwida meta tkun immirata lejn impriżi żgħar b’kapitalizzazzjoni medja, f’konformità mat-Taqsima 3.2.2.1, il-punt (a), jew impriżi innovattivi b’kapitalizzazzjoni medja li jwettqu proġetti ta’ riċerka u żvilupp (R&Ż) u ta’ innovazzjoni f’konformità mat-Taqsima 3.2.2.1, il-punt (b).

24.

Il-Kummissjoni ma hijiex se tapplika l-prinċipji f’dawn il-Linji Gwida għall-għajnuna għall-finanzjament ta’ riskju lil kumpaniji elenkati fil-lista uffiċjali ta’ suq regolat, peress li l-fatt li huma elenkati f’suq regolat juri l-kapaċità tagħhom li jattiraw finanzjament privat.

25.

Il-miżuri ta’ għajnuna għall-finanzjament ta’ riskju mingħajr ebda parteċipazzjoni minn investituri privati indipendenti, ma humiex se jitqiesu kompatibbli skont dawn il-Linji Gwida. F’tali każijiet, l-Istat Membru jenħtieġ li jikkunsidra għażliet ta’ politika alternattivi li jistgħu jkunu aktar xierqa biex jintlaħqu l-istess objettivi u riżultati, bħal għajnuna għall-investiment reġjonali jew għajnuna tal-bidu permessa taħt ir-Regolament għall-Eżenzjoni Ġenerali Sħiħa.

26.

Miżuri ta’ għajnuna għall-finanzjament ta’ riskju fejn ma jittieħed l-ebda riskju apprezzabbli mill-investituri privati indipendenti, jew fejn il-benefiċċji jgħaddu kompletament għal għand l-investituri privati, ma humiex se jitqiesu kompatibbli fuq il-bażi ta’ dawn il-Linji Gwida. Il-kondiviżjoni tar-riskji u l-gwadanji hija kundizzjoni meħtieġa skont dawn il-Linji Gwida biex tiġi limitata l-iskopertura finanzjarja, u biex jiġi żgurat redditu ġust, lill-Istat.

27.

Bl-eċċezzjoni tal-għajnuna għall-finanzjament ta’ riskju fil-forma ta’ kapital ta’ sostituzzjoni, soġġetta għall-kundizzjonijiet stabbiliti fl-Artikolu 21 tar-Regolament għall-Eżenzjoni Ġenerali Sħiħa, l-għajnuna għall-finanzjament ta’ riskju koperta minn dawn il-Linji Gwida ma tistax tintuża biex tappoġġa akkwiżizzjonijiet maġġoritarji.

28.

L-għajnuna għall-finanzjament ta’ riskju mhijiex se tiġi kkunsidrata bħala kompatibbli mas-suq intern skont dawn il-Linji Gwida jekk tingħata lil:

impriżi f’diffikultà, kif definiti mil-Linji Gwida dwar l-għajnuna mill-Istat għas-salvataġġ u r-ristrutturar ta’ impriżi mhux finanzjarji f’diffikultà; (37) madankollu, għall-finijiet ta’ dawn il-Linji Gwida, l-SMEs li ilhom joperaw fi kwalunkwe suq għal mhux aktar mill-perjodu ta’ eliġibbiltà stabbilit fl-Artikolu 21 tar-Regolament għall-Eżenzjoni Ġenerali Sħiħa li jikkwalifikaw għal investimenti ta’ finanzjament ta’ riskju wara diliġenza dovuta mill-intermedjarju finanzjarju magħżul, ma jitqisux bħala impriżi f’diffikultà, sakemm ma jkunux soġġetti għal proċedimenti ta’ insolvenza jew jissodisfaw il-kriterji skont il-liġi domestika tagħhom biex jitqiegħdu fi proċedimenti kollettivi ta’ insolvenza fuq talba tal-kredituri tagħhom

b)	impriżi li huma soġġetti għal ordni ta’ rkupru pendenti wara deċiżjoni preċedenti tal-Kummissjoni, li tiddikjara għajnuna mogħtija mill-istess Stat Membru bħala illegali u inkompatibbli mas-suq intern.

29.

Il-Kummissjoni ma hijiex se tapplika l-prinċipji f’dawn il-Linji Gwida għal għajnuna għal attivitajiet relatati mal-esportazzjoni lejn pajjiżi terzi jew Stati Membri, jiġifieri għajnuna marbuta direttament mal-kwantitajiet esportati, mal-istabbiliment u mal-operazzjoni ta’ network ta’ distribuzzjoni jew ma’ kostijiet kurrenti oħra attwali marbuta mal-attività tal-esportazzjoni, kif ukoll għajnuna kontinġenti mal-użu ta’ prodotti domestiċi bi preferenza għal dawk importati.

30.

Il-miżuri ta’ finanzjament ta’ riskju ta’ spiss jinvolvu kostruzzjonijiet kumplessi li joħolqu inċentivi għal sett wieħed ta’ operaturi ekonomiċi (investituri) sabiex jipprovdu finanzjament ta’ riskju lil sett ieħor ta’ operaturi (impriżi eliġibbli). Skont it-tfassil tal-miżuri, kif ukoll jekk l-intenzjoni tal-awtoritajiet pubbliċi tista’ tkun li jipprovdu benefiċċji lit-tieni grupp biss, l-impriżi f’wieħed mil-livelli jew fit-tnejn li huma jistgħu jibbenifikaw minn għajnuna mill-Istat. Barra minn hekk, il-miżuri ta’ finanzjament ta’ riskju normalment jinvolvu intermedjarju finanzjarju wieħed jew aktar li jista’ jkollhom status li jkun separat minn dak tal-investituri u tal-benefiċjarji finali fejn isiru l-investimenti. F’każijiet bħal dawn huwa meħtieġ ukoll li ssir riflessjoni dwar jekk l-intermedjarju finanzjarju jistax jitqies li jibbenefika minn għajnuna mill-Istat. Kwalunkwe għajnuna lill-intermedjarju finanzjarju jenħtieġ li tkun limitata permezz tat-trasferiment tal-vantaġġ lill-benefiċjarji finali kif stabbilit f’dawn il-Linji Gwida. Il-fatt li l-intermedjarji finanzjarji jistgħu jżidu l-assi tagħhom u l-maniġers tagħhom jistgħu jiksbu fatturat akbar permezz tal-kummissjonijiet tagħhom huwa meqjus li jikkostitwixxi biss effett ekonomiku sekondarju tal-miżura ta’ għajnuna u mhux vantaġġ akkwistat mill-għajnuna lill-intermedjarji finanzjarji jew lill-maniġers. Madankollu, jekk il-miżura ta’ finanzjament ta’ riskju hija mfassla b’tali mod li tidderieġi l-effetti sekondarji tagħha lejn intermedjarji finanzjarji identifikabbli jew lejn gruppi ta’ intermedjarji finanzjarji, dawk l-intermedjarji finanzjarji se jitqiesu bħala li jibbenifikaw minn vantaġġ indirett.

2.2. Għajnuna għall-finanzjament ta’ riskju notifikabbli

31.

L-Istati Membri jridu jinnotifikaw, skont l-Artikolu 108(3) tat-Trattat, miżuri ta’ finanzjament ta’ riskju li: (i) jikkostitwixxu għajnuna mill-Istat skont it-tifsira tal-Artikolu 107(1) tat-Trattat (b’mod partikolari l-miżuri li ma jikkonformawx mat-test ta’ operatur f’ekonomija tas-suq (38) u li jaqgħu barra mill-kamp ta’ applikazzjoni tar-Regolamenti de minimis (39)), u (ii) ma jissodisfawx il-kundizzjonijiet kollha stabbiliti fit-Taqsima 3 tar-Regolament għall-Eżenzjoni Ġenerali Sħiħa (“Għajnuna biex l-SMEs ikollhom aċċess għall-finanzjament”). Il-Kummissjoni se tivvaluta l-kompatibbiltà ta’ dawk il-miżuri mas-suq intern skont l-Artikolu 107(3)(c) tat-Trattat. Dawn il-Linji Gwida jiffokaw fuq dawk il-miżuri ta’ finanzjament ta’ riskju li x’aktarx jinstabu li huma kompatibbli mal-Artikolu 107(3)(c) tat-Trattat, soġġetti għal għadd ta’ kundizzjonijiet li se jkunu spjegati f’aktar dettall fit-Taqsima 3 ta’ dawn il-Linji Gwida. Miżuri bħal dawn jaqgħu f’waħda minn żewġ kategoriji.

32.

L-ewwel kategorija tkopri miżuri ta’ finanzjament ta’ riskju li jimmiraw lejn l-impriżi li ma jissodisfawx ir-rekwiżiti kollha ta’ eliġibbiltà għall-għajnuna għall-finanzjament ta’ riskju kif stabbilit fit-Taqsima 3 tar-Regolament għall-Eżenzjoni Ġenerali Sħiħa. Din il-kategorija tinkludi, b’mod partikolari, miżuri mmirati lejn l-impriżi li ġejjin:

a)	impriżi żgħar b’kapitalizzazzjoni medja;

b)	impriżi innovattivi b’kapitalizzazzjoni medja;

c)	SMEs li jirċievu l-investiment ta’ finanzjament ta’ riskju inizjali waqt li jkunu ilhom joperaw fi kwalunkwe suq għal aktar mill-perjodu ta’ eliġibbiltà stabbilit fl-Artikolu 21 tar-Regolament għall-Eżenzjoni Ġenerali Sħiħa;

d)	in-negozji ġodda u l-SMEs li jeħtieġu investiment ta’ finanzjament ta’ riskju globali ta’ ammont li jaqbeż il-limitu massimu stabbilit fir-Regolament għall-Eżenzjoni Ġenerali Sħiħa;

e)	il-pjattaformi ta’ negozjar alternattivi li ma jissodisfawx il-kundizzjonijiet tar-Regolament għall-Eżenzjoni Ġenerali Sħiħa.

33.

It-tieni kategorija tikkonsisti f’miżuri li l-parametri tad-disinn tagħhom huma differenti minn dawk stabbiliti fit-Taqsima 3 tar-Regolament għall-Eżenzjoni Ġenerali Sħiħa. Din il-kategorija tinkludi, b’mod partikolari, il-każijiet li ġejjin:

a)	l-istrumenti finanzjarji b’parteċipazzjoni ta’ investitur privat taħt il-proporzjonijiet previsti fir-Regolament għall-Eżenzjoni Ġenerali Sħiħa;

b)	l-istrumenti finanzjarji b’parametri ta’ tfassil ’il fuq mil-limiti massimi previsti fir-Regolament għall-Eżenzjoni Ġenerali Sħiħa;

c)	l-istrumenti finanzjarji għajr il-garanziji fejn l-intermedjarji finanzjarji, l-investituri jew il-maniġers ta’ fondi jintgħażlu billi tingħata preferenza għal protezzjoni kontra telf potenzjali (protezzjoni minn telf possibbli) u mhux lil redditi prijoritizzati mill-profitti (inċentivi pożittivi);

d)	l-inċentivi fiskali għall-investituri korporattivi, inkluż l-intermedjarji finanzjarji jew il-maniġers tagħhom li jaġixxu bħala koinvestituri.

34.

Sakemm ma jkunx speċifikat mod ieħor f’dawn il-Linji Gwida, il-kundizzjonijiet kollha ta’ kompatibbiltà applikabbli għall-għajnuna għall-finanzjament ta’ riskju skont it-Taqsima 3 tar-Regolament għall-Eżenzjoni Ġenerali Sħiħa se jiggwidaw il-valutazzjoni tal-Kummissjoni tal-kategoriji ta’ miżuri notifikabbli.

2.3. Definizzjonijiet

35.

Għall-finijiet ta’ dawn il-Linji Gwida:

(1)	“pjattaforma ta’ negozjar alternattiva” tfisser faċilità multilaterali tan-negozjar kif definita fl-Artikolu 4(1), il-punt 22, tad-Direttiva 2014/65/UE, fejn mill-inqas 50 % tal-istrumenti finanzjarji ammessi għan-negozjar jinħarġu mill-SMEs;

(2)	“akkwiżizzjoni” tfisser ix-xiri ta’ mill-inqas perċentwal ta’ kontroll ta’ ekwità ta’ kumpanija mill-azzjonisti attwali sabiex jieħdu f’idejhom l-assi u l-operazzjonijiet tagħha;

(3)	“protezzjoni minn telf possibbli” tfisser skopertura mnaqqsa għal telf fil-każ ta’ prestazzjoni insuffiċjenti tat-tranżazzjoni sottostanti meta mqabbla mal-investituri pubbliċi;

(4)	“impriżi eliġibbli” tfisser negozji ġodda, SMEs, impriżi żgħar b’kapitalizzazzjoni medja u impriżi innovattivi b’kapitalizzazzjoni medja;

(5)

“entità fdata” tfisser il-Bank Ewropew tal-Investiment, il-Fond Ewropew tal-Investiment, istituzzjoni finanzjarja internazzjonali li fiha Stat Membru huwa azzjonist, istituzzjoni finanzjarja stabbilita fi Stat Membru li għandha l-għan li tilħaq l-interess pubbliku taħt il-kontroll ta’ awtorità pubblika, korp tal-liġi pubblika, jew korp tal-liġi privata b’missjoni ta’ servizz pubbliku; l-entità fdata tista’ tintgħażel jew tinħatar direttament f’konformità mad-Direttiva 2014/24/UE tal-Parlament Ewropew u tal-Kunsill (40) jew f’konformità mal-Artikolu 38(4)(b)(iii) tar-Regolament (UE) Nru 1303/2013 tal-Parlament Ewropew u tal-Kunsill (41) jew f’konformità mal-Artikolu 59(3)(c) tar-Regolament (UE) 2021/1060 tal-Parlament Ewropew u tal-Kunsill (42);

(6)	“investiment fl-ekwità” tfisser l-għoti ta’ kapital lil impriża, investit direttament jew indirettament, għall-pussess ta’ sehem korrispondenti ta’ dik l-impriża;

(7)

“pjan ta’ evalwazzjoni” tfisser dokument li jkopri skema ta’ għajnuna waħda jew aktar u li jkun fih mill-inqas l-elementi minimi li ġejjin:

a)	l-objettivi li jridu jiġu evalwati;

b)	il-mistoqsijiet tal-evalwazzjoni;

c)	l-indikaturi tar-riżultati;

d)	il-metodoloġija li se tintuża biex titwettaq l-evalwazzjoni;

e)	ir-rekwiżiti tal-ġbir tad-data;

f)	it-twaqqit propost tal-evalwazzjoni inkluż id-data tas-sottomissjoni tar-rapporti ta’ evalwazzjoni interim u finali;

g)	id-deskrizzjoni tal-korp indipendenti li se jwettaq l-evalwazzjoni jew il-kriterji li se jintużaw għall-għażla tiegħu;

h)	l-arranġamenti biex l-evalwazzjoni ssir disponibbli għall-pubbliku;

(8)

“ċessjoni” tfisser il-likwidazzjoni tal-ishma minn intermedjarju finanzjarju jew investitur, inkluż bejgħ ta’ negozju, tħassir, rimborż ta’ ishma/self, bejgħ lil intermedjarju finanzjarju ieħor jew lil investitur ieħor, bejgħ lil istituzzjoni finanzjarja u bejgħ b’offerta pubblika, inkluż offerta pubblika inizjali (IPO);

(9)	“rata ta’ redditu ġust” tfisser ir-rata ta’ redditu interna mistennija ekwivalenti għal rata ta’ skont aġġustata għar-riskju li tirrifletti l-livell ta’ riskju tal-investiment u n-natura u l-volum tal-kapital li għandu jiġi investit mill-investituri privati;

(10)	“benefiċjarju finali” tfisser impriża eliġibbli li tkun irċeviet investiment taħt miżura ta’ għajnuna mill-Istat għall-finanzjament ta’ riskju;

(11)	“intermedjarju finanzjarju” tfisser kull istituzzjoni finanzjarja, irrispettivament mill-forma u mis-sjieda tagħha, inkluż fond ta’ fondi, fondi ta’ investiment privat, fondi ta’ investiment pubbliku, banek, istituzzjonijiet ta’ mikrofinanzjament u soċjetajiet ta’ garanzija;

(12)	“l-ewwel bejgħ kummerċjali” tfisser l-ewwel bejgħ minn impriża f’suq ta’ prodotti jew servizzi, minbarra l-bejgħ limitat sabiex jiġi ttestjat is-suq;

(13)	“biċċa mill-ewwel telf” tfisser l-aktar segment subordinat tar-riskju li jġorr l-ogħla riskju ta’ telf, li jinkludi t-telf mistenni tal-portafoll fil-mira;

(14)	“investiment ta’ segwitu” tfisser investiment addizzjonali f’kumpanija wara rawnd ta’ investiment għall-finanzjament ta’ riskju preċedenti wieħed jew aktar;

(15)	“fond ta’ fondi” tfisser fond li jinvesti fi jew li jikkontribwixxi riżorsi għal fondi oħra milli jinvesti direttament f’kumpaniji jew f’assi finanzjarji bħal ishma jew bonds;

(16)	“garanzija” tfisser impenn bil-miktub ta’ assunzjoni tar-responsabbiltà għat-tranżazzjonijiet ta’ self ta’ finanzjament ta’ riskju kollha, jew parti minnhom, oriġinati ġodda, ta’ parti terza, bħal strumenti ta’ debitu jew lokazzjoni, kif ukoll bħala strumenti ta’ kważi-ekwità;

(17)	“limitu massimu tal-garanzija” tfisser l-iskopertura massima ta’ investitur pubbliku espressa bħala perċentwal tal-investimenti totali magħmula f’portafoll garantit;

(18)	“rata ta’ garanzija” tfisser il-perċentwal ta’ kopertura tat-telf minn investitur pubbliku ta’ kull tranżazzjoni eliġibbli taħt il-miżura ta’ għajnuna mill-Istat tal-finanzjament ta’ riskju;

(19)	“investitur privat indipendenti” tfisser investitur privat indipendenti skont it-tifsira tal-Artikolu 2 tar-Regolament għall-Eżenzjoni Ġenerali Sħiħa;

(20)

“innovattiva b’kapitalizzazzjoni medja” tfisser kumpanija b’kapitalizzazzjoni medja li tissodisfa waħda mill-kundizzjonijiet li ġejjin: tissodisfa l-kriterji biex titqies bħala “intrapriża innovattiva” skont it-tifsira tal-Artikolu 2 tar-Regolament għal Eżenzjoni Ġenerali Sħiħa; riċentement ingħatat tikketta tal-kwalità tas-Siġill ta’ Eċċellenza mill-Kunsill Ewropew tal-Innovazzjoni f’konformita mal-programm ta’ ħidma ta’ Orizzont 2020 għall-2018-2020 (43) jew mal-Artikolu 2(23) u l-Artikolu 15(2) tar-Regolament (UE) 2021/695; jew dan l-aħħar irċeviet investiment mill-Fond tal-Kunsill Ewropew għall-Innovazzjoni, bħal investiment fil-kuntest tal-Programm Aċċelleratur kif imsemmi fl-Artikolu 48 tar-Regolament (UE) 2021/695; u jew ipparteċipat fi kwalunkwe azzjoni ta’ CASSINI (44) (l-Aċċeleratur tan-Negozju jew is-Servizz ta’ Tqabbil ta’ CASSINI), jew irċeviet investiment mill-Faċilità ta’ Finanzjament għall-Avvjament u t-Tkabbir ta’ CASSINI, jew ingħatat Premju ta’ CASSINI, filwaqt li ssodisfat il-limiti ta’ evalwazzjoni stabbiliti fih, jew ġiet appoġġjata minn proġetti relatati mal-ispazju ffinanzjati minn Orizzont Ewropa li rriżultaw fil-ħolqien ta’ negozju ġdid;

(21)	“ingranaġġ ta’ riżorsi privati” tfisser il-grad sa fejn l-investiment pubbliku jattira investiment addizzjonali minn sorsi privati;

(22)

“strument ta’ self” tfisser ftehim li jobbliga lis-sellief li jqiegħed ammont ta’ flus maqbul disponibbli għall-mutwatarju għal perjodu ta’ żmien maqbul u li skontu, il-mutwatarju huwa obbligat iħallas l-ammont lura fil-perjodu maqbul; dan jista’ jieħu l-forma ta’ self, jew strument ieħor ta’ finanzjament, inkluż lokazzjoni, li jipprovdi lis-sellief b’komponent pridominanti ta’ rendiment minimu;

(23)

“impriża b’kapitalizzazzjoni medja” tfisser impriża li ma hijiex SME u li l-għadd ta’ impjegati tagħha ma jaqbiżx l-1 500, ikkalkulata f’konformità mal-Artikoli 3 sa 6 tal-Anness I tar-Regolament għall-Eżenzjoni Ġenerali Sħiħa. Għall-finijiet tal-applikazzjoni ta’ din id-definizzjoni, diversi entitajiet se jitqiesu bħala impriża waħda jekk tiġi ssodisfata xi waħda mill-kundizzjonijiet elenkati fl-Artikolu 3(3) tal-Anness I tar-Regolament għall-Eżenzjoni Ġenerali Sħiħa;

(24)	“persuna fiżika” tfisser persuna għajr entità ġuridika li ma hijiex impriża fis-sens tal-Artikolu 107(1) tat-Trattat;

(25)	“self ġdid” tfisser strument ta’ self mibdi ġdid imfassal biex jiffinanzja investimenti ġodda jew kapital operatorju, bl-esklużjoni ta’ rifinanzjament ta’: (i) self eżistenti jew (ii) forom oħra ta’ finanzjament;

(26)

“investiment ta’ kważi ekwità” tfisser tip ta’ finanzjament li jikkwalifika bejn ekwità u dejn, li jkollu riskju ogħla minn dejn superjuri u riskju aktar baxx minn ekwità komuni u li r-redditu tiegħu lid-detentur ikun ibbażat fil-biċċa l-kbira fuq il-profitti jew fuq it-telf tal-impriża fil-mira sottostanti u li tipikament ma jkunx garantit f’każ ta’ inadempjenza; l-investimenti ta’ kważi ekwità jistgħu jkunu strutturati bħala dejn, mhux garantit u subordinat, inkluż dejn intermedjarju, u f’xi każijiet jistgħu jiġu kkonvertiti f’ekwità jew bħala ekwità ppreferuta;

(27)	“kapital ta’ sostituzzjoni” tfisser ix-xiri ta’ ishma eżistenti f’kumpanija minn investitur jew minn azzjonist preċedenti;

(28)

“investiment ta’ finanzjament ta’ riskju” tfisser investimenti ta’ ekwità u kważi ekwità, self (inklużi lokazzjonijiet) u garanziji, jew taħlita tagħhom, lil impriżi eliġibbli sabiex jagħmlu investimenti ġodda, minbarra investimenti kompletament privati pprovduti fuq termini tas-suq u barra mill-kamp ta’ applikazzjoni tal-miżura rilevanti ta’ għajnuna mill-Istat;

(29)	“intrapriża żgħira u medja” (SME) tfisser impriża li tissodisfa l-kriterji stabbiliti fl-Anness I tar-Regolament għall-Eżenzjoni Ġenerali Sħiħa;

(30)

“impriża b’kapitalizzazzjoni medja” tfisser impriża li ma hijiex SME u li l-għadd ta’ impjegati tagħha ma jaqbiżx l-499, ikkalkulat f’konformità mal-Artikoli 3 sa 6 tal-Anness I tar-Regolament għall-Eżenzjoni Ġenerali Sħiħa, u li l-fatturat annwali tagħha ma jaqbiżx EUR 100 miljun jew li l-karta tal-bilanċ annwali tagħha ma taqbiżx EUR 86 miljun. Għall-finijiet tal-applikazzjoni ta’ din id-definizzjoni, bosta entitajiet għandhom jitqiesu bħala impriża waħda jekk tiġi ssodisfata kwalunwke waħda mill-kundizzjonijiet elenkati fl-Artikolu 3(3) tal-Anness I tar-Regolament għall-Eżenzjoni Ġenerali Sħiħa;

(31)

“negozju ġdid” tfisser kwalunkwe intrapriża żgħira li ma tkunx elenkata sa ħames snin wara r-reġistrazzjoni tagħha, li tissodisfa il-kundizzjonijiet li ġejjin: (a) ma tkunx wirtet l-attività ta’ intrapriża oħra; (b) ma tkunx għadha iddistribwiet il-profitti; (c) ma tkunx ġiet iffurmata permezz ta’ fużjoni (45). Għal impriżi eliġibbli li ma humiex soġġetti għal reġistrazzjoni, il-perjodu ta’ eliġibbiltà ta’ ħames snin huwa meqjus li jibda jew mill-mument meta l-intrapriża tibda l-attività ekonomika tagħha jew mill-mument li ssir soġġetta għat-taxxa fir-rigward tal-attività ekonomika tagħha, skont liema minnhom tkun l-ewwel;

(32)

“finanzjament totali” tfisser l-ammont ta’ investiment globali li jsir f’impriża eliġibbli permezz ta’ investiment wieħed jew aktar ta’ finanzjament ta’ riskju, inkluż investimenti ta’ segwitu, taħt kwalunkwe miżura ta’ għajnuna mill-Istat tal-finanzjament ta’ riskju, bl-esklużjoni ta’ investimenti kompletament privati pprovduti fuq termini tas-suq u barra mill-kamp ta’ applikazzjoni tal-miżura ta’ għajnuna mill-Istat tal-finanzjament ta’ riskju;

(33)	‘upside-incentive’ means preferential or prioritised returns from profits compared to the public investors.

3. VALUTAZZJONI TAL-KOMPATIBBILTÀ TAL-GĦAJNUNA GĦALL-FINANZJAMENT TA’ RISKJU

36.

Abbażi tal-Artikolu 107(3)(c) tat-Trattat, l-għajnuna mill-Istat biex tiffaċilita l-iżvilupp ta’ ċerti attivitajiet ekonomiċi fl-Unjoni tista’ titqies bħala kompatibbli mas-suq intern, fejn tali għajnuna ma taffettwax b’mod negattiv il-kundizzjonijiet tal-kummerċ sa punt li jkun kuntrarju għall-interess komuni.

37.

F’din it-Taqsima, il-Kummissjoni tiċċara kif se tivvaluta l-kompatibbiltà tal-miżuri ta’ għajnuna għall-finanzjament ta’ riskju li huma soġġetti għall-obbligu ta’ notifika skont l-Artikolu 108(3) tat-Trattat. B’mod aktar speċifiku, biex tivvaluta jekk miżura ta’ għajnuna għall-finanzjament ta’ riskju tistax titqies bħala kompatibbli mas-suq intern, il-Kummissjoni se tiddetermina jekk il-miżura ta’ għajnuna:

a)	tiffaċilitax l-iżvilupp ta’ ċerta attività ekonomika (l-ewwel kundizzjoni); u

b)	ma taffettwax b’mod avvers il-kundizzjonijiet tal-kummerċ sa ċertu punt li jmur kontra l-interess komuni (it-tieni kundizzjoni).

38.

Meta tiddetermina jekk l-ewwel kundizzjoni hijiex issodisfata, jiġifieri li l-għajnuna tiffaċilita l-iżvilupp ta’ attività ekonomika, il-Kummissjoni se tqis l-aspetti li ġejjin:

a)	l-identifikazzjoni tal-attività ekonomika appoġġata (ara t-Taqsima 3.1.1),

b)	effett ta’ inċentiv: l-għajnuna trid tibdel l-imġiba tal-impriżi kkonċernati b’tali mod li dawn l-impriżi jinvolvu ruħhom f’attivitajiet addizzjonali li kieku ma kinux iwettqu mingħajr l-għajnuna jew li kienu jwettqu b’mod jew b’post aktar restrittiv jew differenti (ara t-Taqsima 3.1.2).

39.

Meta tikkunsidra jekk it-tieni kundizzjoni hijiex issodisfata, jiġifieri li l-għajnuna ma taffettwax b’mod avvers il-kundizzjonijiet tal-kummerċ sa punt li jmur kontra l-interess komuni, il-Kummissjoni se tqis l-aspetti li ġejjin:

Il-ħtieġa ta’ intervent mill-Istat: il-miżura ta’ għajnuna trid twassal għal titjib materjali li s-suq innifsu ma jistax jikseb, pereżempju billi jsir rimedju għal falliment tas-suq jew ostaklu rilevanti ieħor għall-għoti ta’ finanzjament ta’ riskju inkluż pereżempju l-inugwaljanzi reġjonali fl-aċċess għall-finanzjament (ara t-Taqsima 3.2.2),

b)	l-adegwatezza tal-miżura ta’ għajnuna: il-miżura ta’ għajnuna proposta trid tkun strument ta’ politika xieraq biex jintlaħaq l-objettiv tagħha (ara t-Taqsima 3.2.3),

c)	il-proporzjonalità tal-għajnuna (l-għajnuna limitata għall-minimu): l-ammont u l-intensità tal-għajnuna jridu jkunu limitati għall-minimu meħtieġ biex jiġi indott l-investiment jew biex tiġi indotta l-attività addizzjonali mill-impriża/i ikkonċernata/i (it-Taqsima 3.2.4),

d)	l-evitar ta’ effetti negattivi mhux dovuti tal-għajnuna fuq il-kompetizzjoni u l-kummerċ: kwalunkwe effett negattiv irid ikun limitat u ma jisboqx l-effetti pożittivi tal-għajnuna (ara t-Taqsima 3.2.5),

e)	it-trasparenza tal-għajnuna: L-Istati Membri, il-Kummissjoni, l-operaturi ekonomiċi u l-pubbliku jrid ikollhom aċċess faċli għall-atti rilevanti u għall-informazzjoni pertinenti kollha dwar l-għajnuna li tingħata fil-qafas tagħhom (it-Taqsima 3.2.6).

40.

Il-bilanċ globali (ara t-Taqsima 3.2.5.3) ta’ ċerti kategoriji ta’ skemi ta’ għajnuna jista’ jkun soġġett ukoll għal rekwiżit ta’ evalwazzjoni ex post kif deskritt fit-Taqsima 4. F’każijiet bħal dawn, il-Kummissjoni tista’ tillimita t-tul tal-iskemi, bil-possibbiltà li tinnotifika mill-ġdid l-estensjoni sussegwenti tagħhom.

41.

Jekk miżura ta’ għajnuna mill-Istat, il-kundizzjonijiet mehmużin magħha (inkluż il-metodu ta’ finanzjament tagħha fejn il-metodu ta’ finanzjament jifforma parti integrali mill-miżura ta’ għajnuna mill-Istat), jew l-attività li tiffinanzja tkun tinvolvi ksur ta’ dispożizzjoni rilevanti tad-dritt tal-Unjoni, l-għajnuna ma tistax titqies kompatibbli mas-suq intern (46). Tali ksur jinkludi iżda mhuwiex limitat għal:

a)	l-għajnuna ssir soġġetta għall-obbligu li jintużaw prodotti li jsiru fuq livell nazzjonali jew servizzi nazzjonali;

l-għajnuna ssir soġġetta għall-obbligu tal-intermedjarji finanzjarji, tal-maniġers tagħhom jew tal-benefiċjarji finali li jkollhom il-kwartieri ġenerali tagħhom fit-territorju tal-Istat Membru kkonċernat, jew li jċaqilquh lejn it-territorju ta’ dak l-Istat Membru, bi ksur tal-Artikolu 49 tat-Trattat dwar il-libertà ta’ stabbiliment (47);

c)	l-impożizzjoni ta’ miżuri li jiksru l-Artikolu 63 tat-Trattat dwar il-moviment liberu tal-kapital.

3.1. L-ewwel kundizzjoni: l-għajnuna tiffaċilita l-iżvilupp ta’ attività ekonomika

3.1.1. Identifikazzjoni tal-attività ekonomika appoġġata

42.

Fil-biċċa l-kbira tal-każijiet, il-miżuri ta’ għajnuna għall-finanzjament ta’ riskju jkopru kumpaniji minn firxa wiesgħa ta’ setturi ekonomiċi. Dawk il-miżuri jgħinu biex jiġi żgurat li ċerti SMEs u impriżi b’kapitalizzazzjoni medja jkollhom aċċess għall-ammont u l-forma meħtieġa ta’ finanzjament biex iwettqu jew jiżviluppaw aktar l-attivitajiet ekonomiċi rispettivi tagħhom. Għalhekk, il-Kummissjoni se tidentifika t-tip ta’ kumpaniji (SMEs, impriżi żgħar b’kapitalizzazzjoni medja, impriżi innovattivi b’kapitalizzazzjoni medja) u s-setturi koperti mill-miżura ta’ għajnuna għall-finanzjament ta’ riskju.

3.1.2. L-effett ta’ inċentiv

43.

L-għajnuna għall-finanzjament ta’ riskju tista’ tinstab kompatibbli mas-suq intern biss jekk ikollha effett ta’ inċentiv. Il-Kummissjoni tqis li għajnuna mingħajr effett ta’ inċentiv ma tiffaċilitax l-iżvilupp tal-attività ekonomika kkonċernata.

44.

L-effett ta’ inċentiv iseħħ meta l-għajnuna twassal lill-benefiċjarju tal-għajnuna biex ibiddel l-imġiba tiegħu billi jwettaq attivitajiet li kieku ma kienx iwettaq mingħajr l-għajnuna jew li kien iwettaq b’mod aktar ristrettiv minħabba l-eżistenza ta’ falliment tas-suq. Fil-livell tal-impriżi eliġibbli, effett ta’ inċentiv huwa preżenti fejn l-għajnuna tippermetti lill-benefiċjarju finali jiġbor finanzjament li altrimenti ma jkunx disponibbli f’termini ta’ forma, ammont jew żmien.

45.

Il-miżuri ta’ finanzjament ta’ riskju jridu jinċentivaw lill-investituri tas-suq biex jipprovdu finanzjament lil impriżi eliġibbli potenzjalment vijabbli ’l fuq mil-livelli ta’ finanzjament ipprovduti fin-nuqqas ta’ tali inċentivi jew biex jassumu riskju addizzjonali, jew it-tnejn li huma. Il-miżura ta’ finanzjament ta’ riskju titqies li għandha effett ta’ inċentiv jekk timmobilizza investimenti mis-sorsi tas-suq sabiex b’hekk il-finanzjament totali pprovdut lill-impriżi eliġibbli jaqbeż il-baġit tal-miżura. Għalhekk, element ewlieni fl-għażla tal-intermedjarji finanzjarji u tal-maniġers ta’ fondi jenħtieġ li jkun il-kapaċità tagħhom li jimmobilizzaw investiment privat addizzjonali.

46.

Jekk l-istrumenti ta’ dejn iffinanzjati jintużaw għall-finanzjament mill-ġdid tas-self eżistenti, dawn ma jitqisux bħala li għandhom effett ta’ inċentiv u kwalunkwe element ta’ għajnuna fi strumenti bħal dawn ma jistax jitqies bħala kompatibbli ma’ dawn il-Linji Gwida.

47.

Il-valutazzjoni tal-effett ta’ inċentiv hija marbuta mill-qrib mal-valutazzjoni tal-ħtieġa għal intervent mill-Istat diskussa fit-Taqsima 3.2.2. Barra minn hekk, l-adegwatezza ta’ miżura għall-ingranaġġ ta’ riżorsi privati fl-aħħar mill-aħħar tiddependi fuq it-tfassil ta’ dik il-miżura fir-rigward tal-bilanċ tar-riskji u l-benefiċċji bejn il-fornituri ta’ finanzjament pubbliċi u privati, li hija wkoll relatata mill-qrib mal-kwistjoni dwar jekk it-tfassil tal-miżura ta’ għajnuna mill-Istat għall-finanzjament ta’ riskju huwiex xieraq (ara t-Taqsima 3.2.3). Għalhekk, ladarba tkun ġiet identifikata kif xieraq il-ħtieġa għal intervent mill-Istat u l-miżura jkollha tfassil xieraq, ikun jista’ jiġi preżunt li hemm effett ta’ inċentiv preżenti.

3.2. It-tieni kundizzjoni: L-evitar ta’ effetti avversi fuq il-kundizzjonijiet tan-negozjar sa punt li jmur kontra l-interess komuni

48.

L-Artikolu 107(3)(c) tat-Trattat jippermetti lill-Kummissjoni tikkunsidra għajnuna biex tiffaċilita l-iżvilupp ta’ ċerti attivitajiet ekonomiċi jew ta’ ċerti oqsma ekonomiċi kompatibbli, iżda biss “fejn tali għajnuna ma tfixkilx il-kundizzjonijiet tal-kummerċ sa grad li jkun kuntrarju għall-interess komuni”.

49.

Il-valutazzjoni tal-effetti negattivi fuq is-suq intern tinvolvi valutazzjonijiet ekonomiċi u soċjali kumplessi. Il-Kummissjoni se tispjega f’din it-Taqsima kif biħsiebha teżerċita d-diskrezzjoni tagħha f’dak ir-rigward.

50.

Min-natura tagħha stess, kwalunkwe miżura ta’ għajnuna mill-Istat tirriżulta f’distorsjonijiet fil-kompetizzjoni u għandha effett fuq il-kummerċ bejn l-Istati Membri. Madankollu, sabiex jiġi stabbilit jekk l-effetti ta’ distorsjoni tal-għajnuna jkunux limitati għall-minimu, il-Kummissjoni se tivverifika jekk l-għajnuna tkunx meħtieġa (ara t-Taqsima 3.2.2), xierqa (ara t-Taqsima 3.2.3), u proporzjonata (ara t-Taqsima 3.2.4). Sabiex tkun tista’ twettaq dik il-verifika, il-Kummissjoni teħtieġ li l-Istati Membri jippreżentaw evidenza fil-forma ta’ valutazzjoni ex ante kif deskritt fit-Taqsima 3.2.1.

51.

Il-Kummissjoni mbagħad tivvaluta l-effetti negattivi tal-għajnuna għall-finanzjament ta’ riskju inkwistjoni fuq il-kompetizzjoni u l-kundizzjonijiet kummerċjali. B’mod aktar speċifiku, l-għajnuna fil-qasam tal-finanzjament ta’ riskju tista’ twassal għall-eliminazzjoni tal-investituri privati, ikollha effetti ta’ distorsjoni fil-livell ta’ intermedjarji finanzjarji, tikkawża distorsjonijiet speċifiċi fis-suq tal-prodotti u jkollha effetti ta’ delokalizzazzjoni. Il-Kummissjoni se teżamina dawn l-effetti negattivi tal-għajnuna fuq il-kompetizzjoni u l-kummerċ u se twieżinhom kontra l-effetti pożittivi tal-għajnuna (ara t-Taqsima 3.2.5). Jekk l-effetti pożittivi jegħlbu l-effetti negattivi, il-Kummissjoni se tikkunsidra l-għajnuna bħala kompatibbli.

52.

Fl-aħħar nett, il-Kummissjoni se tiżgura li l-għajnuna tikkonforma mar-rekwiżiti ta’ trasparenza tagħha (ara t-Taqsima 3.2.6).

3.2.1. Elementi bażiċi tal-valutazzjoni ex ante li għandhom jiġu sottomessi mill-Istat Membru kkonċernat lill-Kummissjoni

53.

L-għajnuna mill-Istat tista’ tiġi ġġustifikata biss jekk tkun tista’ ġġib żvilupp materjali li s-suq ma jistax jipprovdi waħdu, pereżempju billi tirrimedja falliment tas-suq jew ostaklu rilevanti ieħor għall-għoti ta’ finanzjament ta’ riskju jew investiment.

54.

L-għajnuna mill-Istat tista’ tkun meħtieġa biex jiżdied l-għoti ta’ finanzjament ta’ riskju f’sitwazzjoni fejn is-suq waħdu jonqos milli jagħti riżultati effiċjenti jew ma jagħtihomx fil-ħin. Il-Kummissjoni tqis li ma hemm l-ebda falliment tas-suq ġenerali fir-rigward tal-aċċess għall-finanzni għan-negozji ġodda, għall-SMEs jew għall-impriżi b’kapitalizzazzjoni medja, iżda biss falliment relatat ma’ ċerti gruppi ta’ negozji ġodda, SMEs, u xi tipi ta’ impriżi b’kapitalizzazzjoni medja, b’mod partikolari skont il-kuntest ekonomiku speċifiku tal-Istat Membru kkonċernat, kif ukoll il-qasam tal-attività tagħhom (eż. l-istimi tar-riskji jistgħu jkunu esaġerati f’xi setturi).

55.

It-Taqsima 3 tar-Regolament għall-Eżenzjoni Ġenerali Sħiħa tistabbilixxi l-kundizzjonijiet li taħthom il-miżuri ta’ finanzjament ta’ riskju huma preżunti li jindirizzaw falliment tas-suq permezz ta’ mezzi xierqa u proporzjonati, filwaqt li jkollhom effett ta’ inċentiv u jimminimizzaw kwalunkwe distorsjoni tal-kompetizzjoni. Il-miżuri li jikkonformaw ma’ dawk il-kundizzjonijiet ma għandhomx għalfejn jiġu nnotifikati u jitqiesu kompatibbli mas-suq intern.

56.

Miżuri ta’ finanzjament ta’ riskju li ma jissodisfawx il-kundizzjonijiet stabbiliti fit-Taqsima 3 tar-Regolament għall-Eżenzjoni Ġenerali Sħiħa jeħtieġ li jiġu nnotifikati sabiex il-Kummissjoni tkun tista’, fost affarijiet oħra, tivvaluta jekk jeżistix falliment tas-suq jew ostaklu rilevanti ieħor għall-għoti ta’ finanzjament ta’ riskju. Għalhekk, l-Istati Membri huma meħtieġa jagħtu prova li jeżisti falliment tas-suq speċifiku jew ostaklu rilevanti ieħor lil hinn mill-preżunzjoni legali li fuqha huwa bbażat ir-Regolament għall-Eżenzjoni Ġenerali Sħiħa. Barra minn hekk, il-miżura ta’ finanzjament ta’ riskju proposta trid tissodisfa l-kriterji ta’ kompatibbiltà stabbiliti f’dawn il-Linji Gwida. Għal dawn il-finijiet, l-Istat Membru jenħtieġ li jissottometti lill-Kummissjoni valutazzjoni ex ante fil-fond jew, fejn xieraq, sensiela ta’ valutazzjonijiet.

57.

Il-valutazzjoni ex ante fil-fond trid tkun ibbażata fuq evidenza oġġettiva u aġġornata u fuq l-aħjar prattiki u metodoloġiji disponibbli (bħal riċerka bbażata biss fuq id-dokumentazzjoni, intervisti, stħarriġ online, metodi kwantitattivi xierqa). Sal-limitu possibbli, l-evidenza mbagħad trid tiġi triangolata u użata b’mod li jsaħħaħ b’mod reċiproku biex tappoġġa l-konklużjonijiet mill-valutazzjoni ex ante. Il-valutazzjoni ex ante trid tkun ilha li saret inqas minn tliet snin qabel in-notifika tal-miżura ta’ finanzjament ta’ riskju u preferibbilment jenħtieġ li ssir minn espert indipendenti. Il-valutazzjoni ex ante jenħtieġ li tqis ukoll it-tagħlimiet meħuda minn strumenti simili u l-valutazzjonijiet ex ante preċedenti mwettqa mill-Istat Membru. Fl-abbozzar tal-valutazzjoni ex ante, l-Istati Membri jistgħu jużaw il-korp eżistenti ta’ evidenza, sa fejn ikun rilevanti, biex jagħtu prova tal-falliment tas-suq meta jwettqu l-valutazzjoni ex ante. Il-valutazzjoni ex ante jenħtieġ li tiffoka fuq it-tip speċifiku ta’ finanzjament ta’ riskju (pereżempju, ekwità jew dejn subordinat) li għalih qed tiġi proposta miżura ta’ għajnuna.

58.

Il-miżura ta’ għajnuna għall-finanzjament ta’ riskju proposta jenħtieġ li tkun xierqa biex jintlaħaq l-objettiv maħsub tal-għajnuna. Għalhekk, il-valutazzjoni ex ante trid tanalizza l-azzjonijiet eżistenti u, jekk possibbli, dawk previsti li jimmiraw l-istess falliment tas-suq identifikat jew ostaklu rilevanti ieħor għall-għoti ta’ finanzjament ta’ riskju, billi tqis l-effikaċja u l-effiċjenza ta’ għodod oħrajn ta’ politika. L-Istat Membru jrid juri li l-falliment identifikat tas-suq jew ostaklu rilevanti ieħor ma jistax jiġi indirizzat b’mod adegwat b’għodod ta’ politika oħrajn li ma jinvolvux għajnuna mill-Istat jew minn miżuri li jaqgħu fil-kamp ta’ applikazzjoni tar-Regolament għall-Eżenzjoni Ġenerali Sħiħa.

59.

L-għajnuna mill-Istat trid tkun proporzjonata meta mqabbla mal-falliment tas-suq jew mal-ostaklu rilevanti l-ieħor, li hija tkun maħsuba li tindirizza sabiex jintlaħqu l-objettivi rilevanti tal-politika. Għalhekk, l-għajnuna biex jiżdied l-għoti ta’ finanzjament ta’ riskju jenħtieġ li tkun limitata għall-minimu strett meħtieġ biex jiġi indirizzat il-falliment tas-suq jew l-ostaklu rilevanti l-ieħor identifikat fil-valutazzjoni ex ante, mingħajr ma jiġu ġġenerati vantaġġi mhux dovuti għall-benefiċjarju tiegħu. Għal investimenti ta’ finanzjament ta’ riskju li jaqbżu l-limitu massimu stabbilit għal kull impriża eliġibbli fl-Artikolu 21 tar-Regolament għall-Eżenzjoni Ġenerali Sħiħa, il-valutazzjoni ex ante jeħtieġ li turi l-proporzjonalità tal-miżura ta’ għajnuna f’aktar dettall kif stabbilit fil-paragrafi 64 u 65 ta’ dawn il-Linji Gwida.

60.

Meta l-miżura ta’ finanzjament ta’ riskju tkun iffinanzjata parzjalment mill-Fond Ewropew għall-Iżvilupp Reġjonali, il-Fond Soċjali Ewropew jew il-Fond ta’ Koeżjoni, l-Istat Membru jista’ jiddeċiedi li juża mill-ġdid il-valutazzjoni ex ante (jew partijiet minnha) mħejjija f’konformità mal-Artikolu 37(2) tar-Regolament (UE) Nru 1303/2013 jew mal-Artikolu 58(3) tar-Regolament (UE) 2021/1060. Imbagħad, il-Kummissjoni se tivvaluta jekk l-evidenza sottomessa tissodisfax ir-rekwiżiti stabbiliti f’dawn il-Linji Gwida. Fejn il-miżura ta’ finanzjament ta’ riskju tintuża, parzjalment jew kompletament, biex tappoġġja impriżi li riċentement ikunu ngħataw tikketta ta’ kwalità tas-Siġill ta’ Eċċellenza mill-EIC (48), għall-investiment konġunt mal-Fond tal-EIC, jew biex tipprovdi investiment ta’ segwitu fir-rigward tal-Programm tal-Aċċeleratur (49), jew għal impriżi li jew ipparteċipaw fi kwalunkwe azzjoni ta’ CASSINI (l-Aċċeleratur tan-Negozju jew is-Servizz ta’ Tqabbil ta’ CASSINI) u li ssodisfaw il-limiti ta’ evalwazzjoni stabbiliti fiha jew li rċevew investiment mill-Faċilità ta’ Finanzjament għall-Avvjament u t-Tkabbir ta’ CASSINI, jew li ngħataw Premju ta’ CASSINI, jew ġew appoġġjati minn proġetti relatati mal-ispazju ffinanzjati minn Orizzont Ewropa li rriżultaw fil-ħolqien ta’ negozju ġdid, il-Kummissjoni taċċetta li t-tikketta ta’ kwalità u evidenza oħra mill-proċedura ta’ diliġenza dovuta mwettqa mill-EIC rispettivament mill-proċessi ta’ għażla kompetittivi inkorporati fl-azzjonijiet ta’ CASSINI jintużaw bħala parti mill-valutazzjoni ex ante.

61.

Għal miżuri ta’ finanzjament ta’ riskju li jaqgħu barra mill-kamp ta’ applikazzjoni tar-Regolament għall-Eżenzjoni Ġenerali Sħiħa, il-valutazzjoni ex ante trid tiddeskrivi n-natura tal-falliment tas-suq jew l-ostakolu rilevanti l-ieħor u turi l-preżenza tiegħu sa fejn jaffettwa waħda jew aktar milli ġejjin:

a)	il-kategoriji speċifiċi ta’ impriżi fil-mira li ma jissodisfawx ir-rekwiżiti kollha tal-eliġibbiltà skont ir-Regolament għall-Eżenzjoni Ġenerali Sħiħa (ara l-paragrafu 32, il-punti (a) sa (d));

b)	il-pjattaformi ta’ negozjar alternattivi li ma jissodisfawx il-kundizzjonijiet tar-Regolament għall-Eżenzjoni Ġenerali Sħiħa (ara l-paragrafu 32, il-punt (e));

c)	l-istrumenti finanzjarji b’parametri ta’ tfassil li jiddevjaw minn dawk deskritti fir-Regolament għall-Eżenzjoni Ġenerali Sħiħa (ara l-paragrafu 33, il-punti (a), (b) u (c));

d)	l-inċentivi fiskali għall-investituri korporattivi, inkluż intermedjarji finanzjarji jew il-maniġers tagħhom li jaġixxu bħala koinvestituri (ara l-paragrafu 33, il-punt (d)).

62.

Il-valutazzjoni ex ante jenħtieġ li tidentifika t-tip ta’ impriżi affettwati, b’mod partikolari, f’termini tal-età jew tal-istadju tal-iżvilupp, is-settur ekonomiku, u ż-żona ġeografika tal-attività u turi li tali impriżi huma affettwati mill-preżenza ta’ falliment tas-suq speċifiku jew ostaklu rilevanti ieħor.

63.

Għal miżuri ta’ finanzjament ta’ riskju li jikkonċernaw strumenti finanzjarji bil-parteċipazzjoni ta’ investituri privati indipendenti taħt il-proporzjonijiet previsti fl-Artikolu 21 tar-Regolament għall-Eżenzjoni Ġenerali Sħiħa (ara l-paragrafu 33, il-punt (a) ta’ dawn il-Linji Gwida), barra minn hekk, il-valutazzjoni ex ante jenħtieġ li tipprovdi valutazzjoni dettaljata biżżejjed tal-livell u tal-istruttura tal-provvista ta’ finanzjament privat għat-tip ta’ impriża eliġibbli fiż-żona ġeografika rilevanti u turi li l-falliment tas-suq identifikat jew l-ostakolu rilevanti l-ieħor ma jistax jiġi indirizzat b’miżuri li jissodisfaw ir-rekwiżiti stabbiliti fir-Regolament għall-Eżenzjoni Ġenerali Sħiħa dwar il-parteċipazzjoni privata.

64.

Barra minn hekk, għal investimenti ta’ finanzjament ta’ riskju ta’ ammont li jaqbeż il-limitu massimu stabbilit għal kull impriża eliġibbli fl-Artikolu 21 tar-Regolament għall-Eżenzjoni Ġenerali Sħiħa (ara l-paragrafu 32, il-punt (e) ta’ dawn il-Linji Gwida) il-valutazzjoni ex ante jenħtieġ li tikkwantifika wkoll id-diskrepanza fil-finanzjament (jiġifieri, il-livell ta’ domanda għal finanzjament li bħalissa ma hijiex issodisfata minn impriżi eliġibbli) minħabba l-falliment tas-suq identifikat jew ostaklu rilevanti ieħor. Il-valutazzjoni trid turi li d-diskrepanza fil-finanzjament fil-livell tal-impriżi eliġibbli taqbeż il-limitu massimu stabbilit fir-Regolament għall-Eżenzjoni Ġenerali Sħiħa. Tali kwantifikazzjoni jenħtieġ li tkun ibbażata fuq l-aħjar prattiki u metodoloġiji disponibbli li jippermettu l-istima tal-punt sa fejn ikun hemm domanda mhux issodisfata għall-finanzi, mill-impriżi fil-mira.

65.

Għall-kwantifikazzjoni tal-laguna fil-finanzjament, iridu jiġu analizzati kemm il-problemi strutturali kif ukoll dawk ċikliċi (jiġifieri dawk relatati mal-kriżi) li jwasslu għal livelli subottimali ta’ finanzjament privat. B’mod partikolari, il-valutazzjoni ex ante trid tipprovdi analiżi komprensiva tan-naħa tal-provvista billi tivvaluta s-sorsi ta’ finanzjament disponibbli għall-impriżi eliġibbli, filwaqt li tqis l-għadd ta’ intermedjarji finanzjarji eżistenti li joperaw fiż-żona ġeografika fil-mira irrispettivament mill-Istat Membru fejn ikun inkorporat l-intermedjarju, in-natura pubblika jew privata tagħhom, u l-volumi ta’ investiment immirati għas-segment rilevanti tas-suq. Il-valutazzjoni tan-naħa tad-domanda jenħtieġ li tqis l-għadd ta’ impriżi potenzjalment eliġibbli u l-valuri medji ta’ finanzjament meħtieġ. Din l-analiżi jenħtieġ li tkun ibbażata fuq data li tkopri l-ħames snin ta’ qabel, in-notifika tal-miżura ta’ finanzjament ta’ riskju u fejn possibbli s-sejbiet triangolati billi jitqabblu sorsi ta’ data alternattivi.

66.

Għal skemi mmirati esklussivament lejn negozji ġodda u SMEs qabel l-ewwel bejgħ kummerċjali, il-Kummissjoni se tapplika r-rekwiżiti rigward il-valutazzjoni ex ante b’mod proporzjonat, b’mod partikolari f’termini tal-evidenza mitluba.

3.2.2. Il-ħtieġa ta’ intervent mill-Istat

67.

L-għajnuna mill-Istat jenħtieġ li tkun immirata lejn sitwazzjonijiet fejn l-għajnuna tkun tista’ ġġib żvilupp materjali li s-suq waħdu ma jistax iġib. Sabiex jiġi vvalutat jekk l-għajnuna mill-Istat hijiex effettiva biex jintlaħaq ir-riżultat maħsub, l-ewwel huwa meħtieġ li tiġi identifikata l-problema li trid tiġi indirizzata. L-Istati Membri jenħtieġ li jispjegaw kif il-miżura ta’ għajnuna tista’ timmitiga b’mod effettiv l-ostaklu identifikat, u b’mod partikolari, kwalunkwe falliment tas-suq li jfixkel l-għoti ta’ finanzjament ta’ riskju suffiċjent mis-suq waħdu.

68.

Il-miżura ta’ finanzjament ta’ riskju tista’ tiġi ġġustifikata biss jekk tkun immirata lejn il-falliment speċifiku tas-suq jew ostakolu rilevanti ieħor muri fil-valutazzjoni ex ante. Il-Kummissjoni tqis li tali fallimenti tas-suq jew ostakli jistgħu jeżistu b’mod partikolari, iżda mhux esklussivament, għall-SMEs fl-istadji bikrija tagħhom li, minkejja l-prospetti ta’ tkabbir tagħhom, ma jistgħux juru l-affidabbiltà kreditizja tagħhom jew is-solidità tal-pjanijiet ta’ direzzjoni tan-negozju tagħhom lill-investituri. Il-kamp ta’ applikazzjoni ta’ tali falliment tas-suq jew ostaklu, kemm f’termini tal-kumpaniji affettwati u r-rekwiżit kapitali tagħhom, jista’ jvarja skont is-settur li joperaw fih. Is-setturi li jistgħu jiġu affettwati b’mod partikolari minn tali fallimenti tas-suq u ostakli huma t-teknoloġiji ekoloġiċi jew diġitali innovattivi ta’ teknoloġija avvanzata. Minħabba asimmetriji fl-informazzjoni, is-suq isibha diffiċli li jivvaluta l-profil tar-riskju/redditu ta’ tali negozji ġodda u SMEs u l-kapaċità tagħhom li jiġġeneraw redditi aġġustati għar-riskju. Id-diffikultajiet li dawk l-SMEs jesperjenzaw fil-kondiviżjoni tal-informazzjoni dwar il-kwalità tal-proġett tagħhom, il-grad ta’ riskju perċepit tagħhom u l-affidabbiltà kreditizja dgħajfa tagħhom iwasslu għal kostijiet għoljin ta’ tranżazzjoni u tal-aġenzija u jistgħu jaggravaw l-averżjoni għar-riskju tal-investitur. L-impriżi żgħar b’kapitalizzazzjoni medja u l-impriżi innovattivi b’kapitalizzazzjoni medja jistgħu jiffaċċaw diffikultajiet simili u għalhekk ikunu affettwati mill-istess falliment tas-suq jew ostaklu.

69.

Għalhekk, il-miżura ta’ finanzjament ta’ riskju trid tiġi mfassla b’mod li tindirizza l-falliment speċifiku tas-suq jew ostaklu rilevanti ieħor identifikat fil-valutazzjoni ex ante, b’mod partikolari fir-rigward tal-impriżi eliġibbli fl-istadju ta’ żvilupp immirat, fiż-żona ġeografika, u, jekk applikabbli, fis-settur ekonomiku.

70.

Biex jiġi żgurat li l-intermedjarji finanzjarji involuti fil-miżura jimmiraw il-fallimenti identifikati tas-suq, irid isir proċess ta’ diliġenza dovuta biex tiġi żgurata strateġija tal-investiment kummerċjalment soda li tiffoka fuq l-objettiv ta’ politika identifikat u li tirrispetta r-rekwiżiti tal-eliġibbiltà u r-restrizzjonijiet ta’ finanzjament definiti. B’mod partikolari, l-Istati Membri jridu jagħżlu l-intermedjarji finanzjarji li jkunu jistgħu juru li l-istrateġija ta’ investiment proposta tagħhom hija kummerċjalment soda u tinkludi politika xierqa għad-diversifikazzjoni tar-riskji mmirata lejn il-kisba tal-vijabbiltà ekonomika u skala effiċjenti f’termini ta’ daqs u ta’ ambitu territorjali tal-investimenti.

3.2.2.1. Miżuri mmirati lejn kategoriji ta’ impriżi barra mill-kamp ta’ applikazzjoni tar-Regolament għall-Eżenzjoni Ġenerali Sħiħa

71.

Fir-rigward tal-għajnuna għall-aċċess għall-finanzjament, il-kamp ta’ applikazzjoni tar-Regolament għall-Eżenzjoni Ġenerali Sħiħa huwa ristrett għall-SMEs. Madankollu, ċerti impriżi li ma humiex koperti mid-definizzjoni ta’ SME, f’termini ta’ għadd ta’ ħaddiema, jew limiti finanzjarji, jew it-tnejn, jistgħu jiffaċċjaw restrizzjonijiet ta’ finanzjament simili.

(a) Impriżi żgħar b’kapitalizzazzjoni medja

72.

L-estensjoni tal-ambitu tal-impriżi eliġibbli taħt miżura ta’ finanzjament ta’ riskju biex jiġu inklużi impriżi żgħar b’kapitalizzazzjoni medja flimkien mal-SMEs tista’ tiġi ġġustifikata sakemm din tipprovdi inċentiv lill-investituri privati biex jinvestu f’portafoll aktar diversifikat b’possibbiltajiet aħjar ta’ dħul u ta’ ħruġ. L-inklużjoni ta’ impriżi żgħar b’kapitalizzazzjoni medja fil-portafoll x’aktarx li tnaqqas il-grad ta’ riskju fil-livell ta’ portafoll u għalhekk iżżid ir-redditu fuq l-investimenti. Għalhekk, dan jista’ jkun mod partikolarment effettiv biex jiġu attirati investituri istituzzjonali għall-kumpaniji aktar riskjużi li jinsabu fl-istadju bikri.

73.

Għal dawk ir-raġunijiet, u sakemm il-valutazzjoni ex ante jkun fiha evidenza ekonomika adegwata għal dak il-għan, l-appoġġ għal impriżi żgħar b’kapitalizzazzjoni medja jista’ jkun iġġustifikat. Fil-valutazzjoni tagħha, il-Kummissjoni se tikkunsidra l-intensità tax-xogħol u tal-kapital tal-impriżi fil-mira, kif ukoll kriterji oħrajn li jirriflettu l-limitazzjonijiet speċifiċi fuq il-finanzjament li jaffettwaw impriżi żgħar b’kapitalizzazzjoni medja (pereżempju, kollateral suffiċjenti għal self kbir jew il-ħtieġa ta’ kapital estern sinifikanti għall-iżvilupp u l-użu).

(b) Impriżi innovattivi b’kapitalizzazzjoni medja

74.

F’ċerti ċirkostanzi, l-impriżi b’kapitalizzazzjoni medja jistgħu jiffaċċjaw ukoll diffikultajiet ta' finanzjament komparabbli għal dawk li jaffettwaw lill-SMEs. Dan jista’ jkun il-każ, pereżempju, għall-impriżi b’kapitalizzazzjoni medja li jwettqu attivitajiet ta’ R&Ż u innovazzjoni flimkien mal-investiment inizjali fil-faċilitajiet tal-produzzjoni, inkluża replikazzjoni tas-suq, u li r-rekord tagħhom ma jippermettix lill-investituri potenzjali jagħmlu s-suppożizzjonijiet rilevanti fir-rigward tal-prospetti futuri tas-suq tar-riżultati ta’ tali attivitajiet, peress li dawn is-swieq għadhom qed jiġu żviluppati jew fihom element teknoloġiku avvanzat li r-riskju tiegħu huwa diffiċli li jiġi vvalutat (eż. l-ajruspazju u d-difiża). F’tali każijiet, l-għajnuna mill-Istat għall-finanzjament ta’ riskju tista’ tkun meħtieġa għall-impriżi innovattivi b’kapitalizzazzjoni medja biex iżidu l-kapaċitajiet tal-produzzjoni tagħhom għal skala sostenibbli minn fejn ikunu jistgħu jattiraw finanzjament privat waħidhom. Barra minn hekk, l-osservazzjoni fit-Taqsima 3.2.2.1., punt (a), hija valida wkoll għal impriżi innovattivi b’kapitalizzazzjoni medja: l-inklużjoni tagħhom f’portafoll ta’ investiment tista’ tkun mezz effettiv biex intermedjarju finanzjarju joffri sett aktar diversifikat ta’ opportunitajiet għall-investiment li jappellaw għal firxa usa’ ta’ investituri potenzjali.

(c) SMEs li jirċievu l-investiment ta’ finanzjament ta’ riskju inizjali meta jkunu ilhom joperaw fi kwalunkwe suq għal aktar mill-perjodu ta’ eliġibbiltà stabbilit fir-Regolament għall-Eżenzjoni Ġenerali Sħiħa

75.

Ċerti tipi ta’ impriżi jistgħu jitqiesu li jkunu għadhom fl-istadji ta’ espansjoni/tkabbir bikri tagħhom jekk, anki jekk ikunu ilhom jeżistu għal ammont konsiderevoli ta’ żmien, dawn ikunu għadhom ma wrewx biżżejjed il-potenzjal tagħhom li jiġġeneraw redditi u/jew ma għandhomx rekord u kollateral robust biżżejjed. Dan jista’ jkun il-każ f’setturi b’riskju għoli, bħall-industrija tal-bijoteknoloġija, tal-ajruspazju, tad-difiża, l-industriji kulturali u kreattivi, u potenzjalment b’mod aktar ġenerali għall-SMEs innovattivi, inkluż dawk li jiffukaw fuq it-teknoloġiji ekoloġiċi jew diġitali jew SMEs li jsegwu l-innovazzjoni soċjali (50). Barra minn hekk, l-impriżi li għandhom ekwità interna suffiċjenti biex jiffinanzjaw l-attivitajiet inizjali tagħhom jistgħu jkunu jeħtieġu finanzjament estern biss fi stadju aktar tard, pereżempju biex iżidu l-kapaċitajiet tagħhom minn negozju fuq skala żgħira għal wieħed fuq skala akbar. Dan jista’ jirrikjedi ammont ogħla ta’ investiment minn dak li jkunu jistgħu jilħqu huma bir-riżorsi proprji tagħhom.

76.

Għalhekk, jista’ jkun possibbli li jiġu permessi miżuri li bihom l-investiment inizjali jitwettaq wara l-perjodu ta’ eliġibbiltà stabbilit fl-Artikolu 21 tar-Regolament għall-Eżenzjoni Ġenerali Sħiħa. F’tali ċirkostanzi, il-Kummissjoni tista’ titlob li l-miżura tiddefinixxi b’mod ċar il-kategoriji ta’ impriżi eliġibbli, fid-dawl tal-evidenza pprovduta fil-valutazzjoni ex ante dwar l-eżistenza ta’ falliment speċifiku tas-suq li jaffettwa lil tali impriżi.

(d) Negozji ġodda u SMEs li jeħtieġu investiment ta’ finanzjament ta’ riskju ta’ ammont li jaqbeż il-limitu massimu stabbilit fir-Regolament għall-Eżenzjoni Ġenerali Sħiħa

77.

L-Artikolu 21 tar-Regolament għall-Eżenzjoni Ġenerali Sħiħa jistabbilixxi ammont totali massimu ta’ finanzjament ta’ riskju għal kull impriża eliġibbli, inklużi investimenti ta’ segwitu. Madankollu, f’ċerti industriji fejn il-kostijiet tar-riċerka jew tal-investiment bil-quddiem ikunu relattivament għoljin, pereżempju fl-ajruspazju, fid-difiża, fix-xjenzi tal-ħajja jew fit-teknoloġija ekoloġika jew fl-enerġija, dak l-ammont jista’ ma jkunx biżżejjed biex jinkisbu ċ-ċikli tal-investiment kollha meħtieġa u biex in-negozju ġdid jew l-SME jistabbilixxu ruħhom fuq mogħdija ta’ tkabbir sostenibbli. Għalhekk, jista’ jiġi ġġustifikat, f’ċerti kundizzjonijiet, li jkun permess ammont ogħla ta’ investiment kumplessiv għall-impriżi eliġibbli.

78.

B’mod aktar speċifiku, il-miżuri ta’ finanzjament ta’ riskju jistgħu jipprovdu appoġġ ogħla mill-ammont totali massimu speċifikat fir-Regolament għall-Eżenzjoni Ġenerali Sħiħa dment li l-ammont previst ta’ finanzjament jirrifletti d-daqs u n-natura tad-diskrepanza fil-finanzjament identifikata u kkwantifikata fil-valutazzjoni ex ante fir-rigward tas-setturi jew tat-territorji fil-mira. F’tali każijiet, il-Kummissjoni se tikkunsidra n-natura intensiva fil-kapital tas-setturi fil-mira u/jew il-kostijiet ogħla tal-investimenti f’ċerti żoni ġeografiċi.

(e) Pjattaformi ta’ negozjar alternattivi li ma jissodisfawx il-kundizzjonijiet tar-Regolament għall-Eżenzjoni Ġenerali Sħiħa

79.

Il-Kummissjoni tirrikonoxxi li l-pjattaformi ta’ negozjar alternattivi huma parti importanti mis-suq tal-finanzjament tal-SMEs minħabba li jattiraw kapital ġdid fl-SMEs kif ukoll jiffaċilitaw il-ħruġ tal-investituri preċedenti (51). Ir-Regolament għall-Eżenzjoni Ġenerali Sħiħa jirrikonoxxi l-importanza tagħhom billi jiffaċilita l-attività tagħhom jew permezz ta’ inċentivi fiskali mmirati lejn persuni fiżiċi li jinvestu fil-kumpaniji elenkati fuq dawk il-pjattaformi, jew billi jippermetti għajnuna tal-bidu lill-operatur tal-pjattaforma, soġġett għall-kundizzjoni li l-operatur tal-pjattaforma jikkwalifika bħala intrapriża żgħira u sa ċerti limiti minimi.

80.

Madankollu, l-operaturi tal-pjattaformi ta’ negozjar alternattivi mhux bilfors ikunu intrapriżi żgħar meta jiġu stabbiliti. Bl-istess mod, l-ammont massimu ta’ għajnuna permessibbli bħala għajnuna tal-bidu skont ir-Regolament għall-Eżenzjoni Ġenerali Sħiħa jista’ ma jkunx biżżejjed sabiex jappoġġa l-istabbiliment tal-pjattaforma. Barra minn hekk, sabiex jiġu attirati riżorsi suffiċjenti għall-istabbiliment u t-tnedija ta’ pjattaformi ġodda, jista’ jkun meħtieġ li jiġu pprovduti inċentivi fiskali lill-investituri korporattivi. Finalment, il-pjattaforma mhux biss tista’ telenka l-SMEs, iżda wkoll lill-impriżi li jaqbżu l-limiti minimi stabbiliti fid-definizzjoni ta’ SME.

81.

Għalhekk, skont ċerti kundizzjonijiet, jista’ jiġi ġġustifikat, li jkunu permessi inċentivi fiskali għall-investituri korporattivi, biex jappoġġaw l-operaturi tal-pjattaforma li ma humiex intrapriżi żgħar, jew li jiġu permessi investimenti għall-istabbiliment ta’ pjattaformi ta’ negozjar alternattivi li l-ammont tagħhom jaqbeż il-limiti previsti għall-għajnuna tal-bidu skont ir-Regolament għall-Eżenzjoni Ġenerali Sħiħa, jew li tiġi permessa għajnuna lill-pjattaformi ta’ negozjar alternattivi fejn il-maġġoranza tal-istrumenti finanzjarji ammessi għan-negozjar jinħarġu mill-SMEs. F’tali każijiet, il-valutazzjoni ex ante trid turi l-eżistenza ta’ falliment speċifiku tas-suq jew ostaklu rilevanti ieħor li jaffettwa tali pjattaformi fis-suq ġeografiku rilevanti.

3.2.2.2. Miżuri b’parametri ta’ tfassil mhux konformi mar-Regolament għall-Eżenzjoni Ġenerali Sħiħa

(a) Istrumenti finanzjarji b’parteċipazzjoni ta’ investitur privat taħt il-proporzjonijiet previsti fir-Regolament għall-Eżenzjoni Ġenerali Sħiħa

82.

Il-fallimenti tas-suq jew ostakli rilevanti oħra li jaffettwaw lill-intrapriżi f’reġjuni jew fi Stati Membri partikolari jistgħu jkunu aktar qawwija minħabba n-nuqqas ta’ żvilupp relattiv tas-suq tal-finanzi tal-SMEs fi ħdan tali żoni meta mqabbel ma’ reġjuni oħra fl-istess Stat Membru, fi Stati Membri oħra jew madwar id-dinja. Dan jista’ jkun il-każ b’mod partikolari fl-Istati Membri mingħajr il-preżenza stabbilita sew ta’ investituri formali fil-kapital ta’ riskju, fondi ta’ ekwità privata u investituri informali. Fil-każ ta’ miżuri li għandhom l-għan li jegħlbu dawn l-ostakli strutturali, il-Kummissjoni tista’ taċċetta l-parteċipazzjoni ta’ investitur privat indipendenti taħt il-proporzjonijiet previsti fl-Artikolu 21 tar-Regolament għall-Eżenzjoni Ġenerali Sħiħa diment li tiġi osservata l-kundizzjoni fil-paragrafu 25 ta’ dawn il-Linji Gwida.

83.

Barra minn hekk, il-Kummissjoni tista’ taċċetta wkoll miżuri ta’ finanzjament ta’ riskju bil-parteċipazzjoni ta’ investituri privati taħt il-proporzjonijiet stabbiliti fl-Artikolu 21 tar-Regolament għall-Eżenzjoni Ġenerali Sħiħa f’każ ta’ falliment tas-suq aktar evidenti jew ostaklu rilevanti ieħor kif muri mill-Istat Membru, b’mod partikolari, meta tali miżuri jkunu mmirati speċifikament lejn l-SMEs qabel l-ewwel bejgħ kummerċjali tagħhom jew fl-istadju tal-prova tal-kunċett, dment li parti sinifikanti mir-riskji tal-investiment ikunu effettivament imġarrba mill-investituri privati parteċipanti.

(b) Istrumenti finanzjarji b’parametri ta’ tfassil ’il fuq mil-limiti massimi previsti fir-Regolament għall-Eżenzjoni Ġenerali Sħiħa

84.

Il-benefiċċju tar-Regolament għall-Eżenzjoni Ġenerali Sħiħa huwa riservat għal miżuri li bihom kondiviżjoni tat-telf mhux pari passu bejn l-investituri pubbliċi u dawk privati tkun imfassla b’tali mod li tillimita l-ewwel telf imġarrab mill-investitur pubbliku. B’mod simili, fil-każ tal-garanziji, l-eżenzjoni ta’ kategorija tistabbilixxi limiti fuq ir-rata ta’ garanzija u fuq it-telf totali mġarrab mill-investitur pubbliku.

85.

Madankollu, f’ċerti ċirkostanzi, billi tittieħed pożizzjoni ta’ finanzjament aktar riskjuża, il-finanzjament pubbliku jista’ jippermetti lill-investituri jew lis-selliefa privati jipprovdu finanzjament addizzjonali. Fil-valutazzjoni tal-miżuri b’parametri ta’ tfassil finanzjarju li jaqbżu l-limiti massimi fir-Regolament għall-Eżenzjoni Ġenerali Sħiħa, il-Kummissjoni se tqis għadd ta’ fatturi kif deskritt fit-Taqsima 3.2.3.2 ta’ dawn il-Linji Gwida.

(c) Strumenti finanzjarji minbarra garanziji fejn l-investituri, l-intermedjarji finanzjarji u l-maniġers tagħhom jintgħażlu billi tingħata preferenza lill-protezzjoni minn ċaqliq 'l isfelmilli lill-kondiviżjoni asimmetrika tal-profitti

86.

F’konformità mal-Artikolu 21 tar-Regolament għall-Eżenzjoni Ġenerali Sħiħa, l-għażla tal-intermedjarji finanzjarji, kif ukoll tal-investituri jew tal-maniġers ta’ fondi, trid tkun ibbażata fuq proċess miftuħ, trasparenti u mhux diskriminatorju li jistabbilixxi b’mod ċar l-objettivi tal-politika li jridu jintlaħqu permezz tal-miżura u t-tip ta’ parametri finanzjarji mfassla biex jintlaħqu tali objettivi. Dan ifisser li l-intermedjarji finanzjarji jew il-maniġers tagħhom iridu jintgħażlu permezz ta’ proċedura konformi mad-Direttiva 2014/24/UE. Jekk dik id-Direttiva ma hijiex applikabbli, il-proċedura tal-għażla trid tkun b’tali mod li tiżgura l-aktar għażla wiesgħa possibbli fost l-intermedjarji finanzjarji jew il-maniġers ta’ fondi kkwalifikati. B’mod partikolari, tali proċedura trid tippermetti lill-Istat Membru kkonċernat li jqabbel it-termini u l-kundizzjonijiet innegozjati bejn l-intermedjarji finanzjarji jew il-maniġers ta’ fondi u l-investituri privati potenzjali sabiex jiġi żgurat li l-miżura ta’ finanzjament ta’ riskju tattira investituri privati bl-inqas għajnuna mill-Istat possibbli, jew bid-diverġenza minima mill-kundizzjonijiet pari passu, fid-dawl ta’ strateġija tal-investiment realistika.

87.

F’konformità mal-Artikolu 21 tar-Regolament għall-Eżenzjoni Ġenerali Sħiħa, il-kriterji applikabbli għall-għażla tal-maniġers iridu jinkludu rekwiżit li bih, għal strumenti oħra għajr il-garanziji, “il-kondiviżjoni tal-profitti tingħata preferenza fuq il-protezzjoni minn telf possibbli” sabiex jiġi limitat preġudizzju lejn teħid ta’ riskju eċċessiv mill-maniġer li jagħżel l-impriżi fejn isir l-investiment. Dan huwa maħsub biex jiżgura li, tkun xi tkun il-forma tal-istrument finanzjarju previst mill-miżura, kwalunkwe trattament preferenzjali mogħti lill-investituri jew lis-selliefa privati jrid jiġi ppeżat kontra l-interess pubbliku li jikkonsisti fl-iżgurar tan-natura rotatorja tal-kapital pubbliku impenjat u s-sostenibbiltà finanzjarja fit-tul tal-miżura.

88.

F’ċerti każi, madankollu, jista’ jkun meħtieġ li tingħata preferenza lil protezzjoni minn telf possibbli, prinċipalment fejn il-miżura timmira lejn negozji ġodda jew ċerti setturi li fihom ir-rata ta’ inadempjenza tal-SMEs hija għolja. Dan jista’ jkun il-każ għal miżuri li jimmiraw lejn setturi li jkunu qed jiffaċċaw ostakli teknoloġiċi importanti, jew setturi li fihom il-kumpaniji għandhom dipendenza għolja fuq proġetti uniċi li jeħtieġu investiment kbir bil-quddiem u li jinvolvu espożizzjoni għolja għar-riskju, bħalma huma l-ekosistema tal-ajruspazju u tad-difiża, u l-industriji kulturali u dawk kreattivi. Preferenza għal mekkaniżmi ta’ protezzjoni minn telf possibbli tista’ tkun iġġustifikata wkoll għal miżuri li joperaw permezz ta’ fond ta’ fondi u mmirati biex jattiraw investituri privati f’dak il-livell jew għal miżuri mmirati lejn l-SMEs qabel l-ewwel bejgħ kummerċjali tagħhom jew fl-istadju ta’ prova tal-kunċett.

(d) Inċentivi fiskali għall-investituri korporattivi, inkluż l-intermedjarji finanzjarji jew il-maniġers tagħhom li jaġixxu bħala koinvestituri

89.

Filwaqt li r-Regolament għall-Eżenzjoni Ġenerali Sħiħa jkopri inċentivi fiskali mogħtija lil investituri privati indipendenti li huma persuni fiżiċi skont it-tifsira tal-Artikolu 2 tiegħu li jipprovdu finanzjament ta’ riskju direttament jew indirettament lin-negozji ġodda u lill-SMEs eliġibbli, l-Istati Membri jistgħu jqisu li huwa xieraq li jistabbilixxu miżuri li japplikaw inċentivi simili għal investituri privati indipendenti li huma investituri korporattivi. Id-differenza qiegħda fil-fatt li l-investituri korporattivi huma impriżi fis-sens tal-Artikolu 107 tat-Trattat. Il-miżura trid għalhekk tkun soġġetta għal restrizzjonijiet speċifiċi (kif stabbilit fit-Taqsimiet 3.2.3.3 u 3.2.4.2) sabiex jiġi żgurat li l-għajnuna fil-livell tal-investituri korporattivi tibqa’ proporzjonata u jkollha effett ta’ inċentiv reali.

90.

L-intermedjarji finanzjarji u l-maniġers tagħhom jistgħu jibbenefikaw minn inċentiv fiskali biss sakemm jagixxu bħala koinvestituri jew koselliefa. Ma jista’ jingħata ebda inċentiv fiskali fir-rigward tas-servizzi mogħtija mill-intermedjarju finanzjarju jew mill-maniġers tiegħu għall-implimentazzjoni tal-miżura.

3.2.3. Adegwatezza tal-miżura ta’ għajnuna

91.

Il-miżura ta’ għajnuna proposta trid tkun strument ta’ politika xieraq biex jintlaħaq l-objettiv maħsub tal-għajnuna, jiġifieri ma jridx ikun hemm strument ta’ politika jew strument ta’ għajnuna f’pożizzjoni aħjar u li joħloq inqas distorsjoni li kapaċi jikseb l-istess eżitu.

3.2.3.1. L-adegwatezza meta mqabbla ma’ strumenti ta’ politika oħra u ma’ strumenti ta’ għajnuna oħra

92.

Sabiex tindirizza l-falliment tas-suq identifikat jew ostaklu rilevanti ieħor u biex tikkontribwixxi għall-ilħuq tal-objettivi ta’ politika segwiti mill-miżura, il-miżura ta’ finanzjament ta’ riskju proposta trid tkun strument xieraq. L-għażla tal-forma speċifika tal-miżura ta’ finanzjament ta’ riskju trid tkun debitament iġġustifikata abbażi tal-evidenza pprovduta mill-Istat Membru fil-valutazzjoni ex ante.

93.

Bħala l-ewwel pass, il-Kummissjoni se tikkunsidra jekk u sa liema punt il-miżura ta’ finanzjament ta’ riskju tista’ titqies bħala strument xieraq meta mqabbel ma’ strumenti ta’ politika oħrajn immirati biex jinkoraġġixxu l-għoti ta’ finanzjament ta’ riskju lill-impriżi eliġibbli. L-għajnuna mill-Istat mhijiex l-uniku strument ta’ politika disponibbli għall-Istati Membri biex jiffaċilitaw il-forniment tal-finanzjament ta’ riskju lill-impriżi eliġibbli. L-Istati Membri jistgħu jużaw għodod ta’ politika komplimentari oħrajn kemm fuq in-naħa tal-provvista kif ukoll fuq in-naħa tad-domanda, bħal miżuri regolatorji biex jiffaċilitaw il-funzjonament tas-swieq finanzjarji, miżuri biex jitjieb l-ambjent tan-negozju, servizzi ta’ konsulenza għall-prontezza tal-investiment jew l-investimenti pubbliċi li jikkonformaw mat-test tal-operatur tal-ekonomija tas-suq.

94.

Bħala t-tieni pass, il-Kummissjoni se tikkunsidra jekk il-miżura proposta hijiex aktar xierqa minn strumenti alternattivi ta’ għajnuna mill-Istat li jindirizzaw l-istess falliment tas-suq jew ostakli rilevanti oħrajn. F’dak ir-rigward, l-istrumenti finanzjarji ġeneralment jitqiesu li joħolqu inqas distorsjoni minn għotjiet diretti u għalhekk jikkostitwixxu strument aktar xieraq. Madankollu, l-għajnuna mill-Istat biex tiffaċilita l-għoti ta’ finanzjament ta’ riskju tista’ tingħata f’diversi forom, bħal strumenti fiskali selettivi jew strumenti finanzjarji subkummerċjali, inkluż firxa ta’ strumenti ta’ ekwità, dejn jew garanzija b’karatteristiċi differenti ta’ riskji u gwadanji, kif ukoll diversi modi ta’ għoti u strutturi ta’ finanzjament, li l-adegwatezza tagħhom tiddependi fuq in-natura tal-impriżi fil-mira u d-diskrepanza fil-finanzjament. Għalhekk, il-Kummissjoni se tivvaluta jekk it-tfassil tal-miżura jipprevedix struttura ta’ finanzjament effiċjenti, filwaqt li tqis l-istrateġija tal-investiment tal-fond, sabiex tiżgura operazzjonijiet sostenibbli.

95.

F’dan ir-rigward, il-Kummissjoni se tħares b’mod pożittiv lejn miżuri li jinvolvu fondi kbar biżżejjed f’termini ta’ daqs tal-portafoll, il-kopertura ġeografika, b’mod partikolari jekk joperaw f’diversi Stati Membri, u d-diversifikazzjoni tal-portafoll, minħabba li tali fondi jistgħu jkunu aktar effiċjenti u għalhekk aktar attraenti għall-investituri privati, meta mqabbla ma’ fondi iżgħar. Ċerti strutturi tal-fond ta’ fondi jistgħu jissodisfaw dawk il-kundizzjonijiet sakemm il-kostijiet globali tal-ġestjoni li jirriżultaw mil-livelli differenti ta’ intermedjazzjoni jiġu paċuti minn gwadanji sostanzjali fl-effiċjenza.

3.2.3.2. Kundizzjonijiet għad-determinazzjoni tal-adegwatezza tal-istrumenti finanzjarji

96.

Sabiex tiġi ddeterminata l-adegwatezza tal-istrumenti finanzjarji li l-parametri ta’ tfassil tagħhom jaqgħu barra mill-kamp ta’ applikazzjoni tar-Regolament għall-Eżenzjoni Ġenerali Sħiħa, il-Kummissjoni se tikkunsidra l-kundizzjonijiet stabbiliti fil-paragrafi 97 sa 121 ta’ dawn il-Linji Gwida.

97.

L-ewwel, il-miżura trid timmobilizza l-finanzjament addizzjonali mill-parteċipanti fis-suq. Proporzjonijiet minimi indipendenti ta’ investiment privat inqas minn dawk stabbiliti fl-Artikolu 21 tar-Regolament għall-Eżenzjoni Ġenerali Sħiħa jistgħu jiġu ġġustifikati biss fid-dawl ta’ falliment tas-suq aktar qawwi jew ta’ ostaklu rilevanti ieħor stabbilit fil-valutazzjoni ex ante (ara t-Taqsima 3.2.1). F’dan ir-rigward, il-valutazzjoni ex ante jenħtieġ li, barra minn hekk, tipprovdi valutazzjoni dettaljata biżżejjed tal-livell u tal-istruttura tal-provvista ta’ finanzjament privat għat-tip ta’ impriża eliġibbli fiż-żona ġeografika rilevanti (ara l-paragrafu 63). Barra minn hekk, irid jintwera li l-miżura tingrana riżorsi privati addizzjonali li kieku ma kinux jiġu pprovduti jew li kienu jiġu pprovduti f’forom jew f’ammonti differenti jew b’termini differenti.

98.

Fil-każ ta’ miżuri ta’ finanzjament ta’ riskju mmirati speċifikament għan-negozji ġodda u l-SMEs li ma kienu qed joperaw f’ebda suq (52), il-Kummissjoni tista’ taċċetta li l-livell meħtieġ ta’ parteċipazzjoni privata indipendenti jkun aktar baxx mill-proporzjonijiet meħtieġa. Alternattivament, għal tali miri tal-investiment, il-Kummissjoni tista’ taċċetta li l-parteċipazzjoni privata ma tkunx independenti fin-natura tagħha, jiġifieri, pereżempju tkun ipprovduta mis-sid tal-impriża benefiċjarja. F’każijiet debitament ġustifikati, il-Kummissjoni tista’ taċċetta wkoll livelli ta’ parteċipazzjoni privata aktar baxxi minn dawk stabbiliti fir-Regolament għall-Eżenzjoni Ġenerali Sħiħa fir-rigward ta’ impriżi eliġibbli li ilhom joperaw f’suq għal mhux aktar mill-perjodu ta’ eliġibbiltà stabbilit fl-Artikolu 21 tar-Regolament għall-Eżenzjoni Ġenerali Sħiħa, fid-dawl tal-evidenza ekonomika pprovduta fil-valutazzjoni ex ante rigward il-falliment tas-suq rilevanti jew ostaklu rilevanti ieħor.

99.

Miżura ta’ finanzjament ta’ riskju mmirata lejn impriżi eliġibbli li jkunu ilhom joperaw fi kwalunkwe suq għal aktar mill-perjodu ta’ eliġibbiltà stabbilit fl-Artikolu 21 tar-Regolament għall-Eżenzjoni Ġenerali Sħiħa fiż-żmien tal-ewwel investiment ta’ finanzjament ta’ riskju jrid ikun fiha restrizzjonijiet adegwati, kemm f’termini ta’ limiti ta’ żmien jew ta’ kriterji oġġettivi oħrajn ta’ natura kwalitattiva, relatati mal-istadju ta’ żvilupp tal-impriżi fil-mira. Għal tali miri ta’ investiment, il-Kummissjoni normalment tkun tirrikjedi proporzjon minimu ta’ parteċipazzjoni privata ta’ 60 %.

100.

It-tieni, flimkien mal-livell propost ta’ parteċipazzjoni privata, il-Kummissjoni se tqis ukoll il-bilanċ tar-riskji u l-gwadanji bejn l-investituri pubbliċi u dawk privati. F’dan ir-rigward, il-Kummissjoni se tqis b’mod pożittiv il-miżuri li bihom it-telf jiġi kondiviż pari passu bejn l-investituri, u fejn l-investituri privati jirċievu biss inċentivi pożittivi. Madankollu, il-Kummissjoni se tqis kif xieraq li l-kondiviżjoni tat-telf fuq bażi mhux pari passu tista’ tkun meħtieġa fid-dawl ta’ fallimenti tas-suq aktar severi. Fil-prinċipju, aktar ma l-kondiviżjoni tar-riskji u tal-gwadanji tkun qrib tal-prattiki kummerċjali reali, aktar ikun probabbli li l-Kummissjoni taċċetta livell aktar baxx ta’ parteċipazzjoni privata.

101.

It-tielet, il-Kummissjoni se tikkunsidra l-livell tal-istruttura tal-finanzjament li fih il-miżura għandha l-għan li tingrana l-investiment privat. Fil-livell tal-fond ta’ fondi, il-kapaċità li jiġi attirat finanzjament privat tista’ tiddependi fuq użu aktar estensiv ta’ mekkaniżmi ta’ protezzjoni minn telf possibbli. Għall-kuntrarju ta’ dan, dipendenza eċċessiva fuq tali mekkaniżmi tista’ toħloq distorsjoni fl-għażla ta’ impriżi eliġibbli u twassal għal eżiti ineffiċjenti fejn l-investituri privati jintervjenu fil-livell tal-investiment fl-impriżi u fuq bażi ta’ tranżazzjoni, tranżazzjoni.

102.

Fil-valutazzjoni tal-adegwatezza tat-tfassil speċifiku tal-miżura, il-Kummissjoni tista’ tqis l-importanza tar-riskju residwu miżmum mill-investituri privati magħżula meta mqabbel mat-telf mistenni u dak mhux mistenni preżunt mill-investitur pubbliku, kif ukoll il-bilanċ tar-redditi mistennija bejn l-investitur pubbliku u l-investituri privati. Għalhekk, profil differenti tar-riskji u tal-gwadanji jista’ jkun aċċettat jekk dan jimmassimizza l-ammont ta’ investiment privat, mingħajr ma jfixkel il-karattru ġenwin tad-deċiżjonijiet tal-investiment immotivati mill-profitti.

103.

Ir-raba’, in-natura eżatta tal-inċentivi trid tiġi ddeterminata permezz ta’ proċess miftuħ, trasparenti u mhux diskriminatorju għall-għażla tal-intermedjarji finanzjarji, kif ukoll għall-maniġers ta’ fondi jew għall-investituri. Bl-istess mod, il-maniġers tal-fond ta’ fondi jenħtieġ li jkunu meħtieġa li bħala parti mill-mandat ta’ investiment tagħhom, legalment jimpenjaw ruħhom li jiddeterminaw il-kundizzjonijiet preferenzjali li jistgħu japplikaw fil-livell tas-subfondi, permezz ta’ proċess kompetittiv għall-għażla tal-intermedjarji finanzjarji, tal-maniġers ta’ fondi jew tal-investituri eliġibbli.

104.

Sabiex tingħata prova tal-ħtieġa tal-kundizzjonijiet speċifiċi li huma l-bażi tat-tfassil tal-miżura, l-Istati Membri jistgħu jkunu meħtieġa jipproduċu evidenza li turi li, fil-proċess tal-għażla tal-investituri privati, il-parteċipanti kollha fil-proċess kienu qegħdin jitolbu kundizzjonijiet li ma jkunux koperti mir-Regolament għall-Eżenzjoni Ġenerali Sħiħa, jew li s-sejħa għall-offerti ma kinitx konklużiva.

105.

Il-ħames, l-intermedjarju finanzjarju jew il-maniġer tal-fond jistgħu jikkoinvestu flimkien mal-Istat Membru, sakemm it-termini u l-kundizzjonijiet ta’ tali koinvestiment ikunu tali li jeskludu kwalunkwe kunflitt ta’ interess potenzjali. L-intermedjarju finanzjarju jrid jieħu mill-inqas 10 % tal-biċċa mill-ewwel telf. Tali koinvestiment jista’ jikkontribwixxi biex jiżgura li d-deċiżjonijiet ta’ investiment ikunu allinjati mal-miri ta’ politika rilevanti. Il-kapaċità tal-maniġer li jipprovdi investiment mir-riżorsi proprji tiegħu tista’ tkun wieħed mill-kriterji tal-għażla.

106.

Is-sitt punt, miżuri ta’ finanzjament ta’ riskju li jagħmlu użu minn strumenti ta’ dejn iridu jipprevedu mekkaniżmu li jiżgura li l-intermedjarju finanzjarju jgħaddi l-vantaġġ li jirċievi mill-Istat lill-impriżi benefiċjarji finali, pereżempju fil-forma ta’ rati tal-imgħax aktar baxxi, rekwiżiti tal-kollateral imnaqqsa jew kombinazzjoni tat-tnejn. L-intermedjarju finanzjarju jista’ wkoll jgħaddi l-vantaġġ billi jinvesti f’impriżi li għalkemm huma potenzjalment vijabbli, f’konformità mal-kriterji interni ta’ klassifikazzjoni tal-intermedjarju finanzjarju, ikunu fi klassi ta’ riskju fejn l-intermedjarju ma jinvestix fin-nuqqas ta’ miżura ta’ finanzjament ta’ riskju. Il-mekkaniżmu ta’ trasferiment irid jinkludi arranġamenti ta’ monitoraġġ adegwati, kif ukoll mekkaniżmu ta’ rkupru (53) jew mekkaniżmu kuntrattwali ekwivalenti.

107.

Fl-aħħar nett, sabiex jiġi żgurat li l-intermedjarji finanzjarji involuti fil-miżura ta’ finanzjament tar-riskju jwettqu l-objettivi rilevanti, l-istrateġija ta’ investiment tal-intermedjarju finanzjarju trid tiġi allinjata mal-objettivi tal-miżura. Bħala parti mill-proċess tal-għażla, l-intermedjarji finanzjarji jridu juru kif l-istrateġija tal-investiment proposta tagħhom tista’ tikkontribwixxi għall-ilħuq tal-objettivi u l-miri. Barra minn hekk, l-Istat Membru jrid jiżgura li l-istrateġija tal-investiment tal-intermedjarji tibqa’ dejjem allinjata mal-miri maqbula, pereżempju permezz ta’ mekkaniżmi ta’ monitoraġġ u ta’ rapportar xierqa u tal-parteċipazzjoni tar-rappreżentanti tal-investituri pubbliċi fil-korpi ta’ rappreżentanza tal-intermedjarju finanzjarju, bħall-bord superviżorju jew il-bord konsultattiv. L-istruttura ta’ governanza xierqa trid tiżgura li l-bidliet materjali fl-istrateġija tal-investiment ikunu jeħtieġu l-kunsens minn qabel tal-Istat Membru. Biex jiġi evitat kwalunkwe dubju, l-Istat Membru ma jistax jipparteċipa direttament f’deċiżjonijiet individwali dwar l-investiment u l-iżvestiment.

108.

L-Istati Membri jistgħu jużaw firxa ta’ strumenti finanzjarji bħala parti mill-miżura ta’ finanzjament ta’ riskju, bħal strumenti ta’ investiment ta’ ekwità u ta’ kważi ekwità, strumenti ta’ self jew garanziji fuq bażi mhux pari passu. Il-paragrafi 109 sa 121 jistabbilixxu l-elementi li l-Kummissjoni se tqis fil-valutazzjoni tagħha ta’ tali strumenti finanzjarji speċifiċi.

a) L-investimenti ta’ ekwità

109.

L-istrumenti ta’ investiment ta’ ekwità jistgħu jieħdu l-forma ta’ investimenti ta’ ekwità jew kważi ekwità f’impriża, li permezz tagħhom l-investitur jixtri s-sjieda (parti minnha) ta’ dik l-impriża (54).

110.

L-istrumenti ta’ ekwità jista’ jkollhom diversi karatteristiċi asimmetriċi, li jipprovdu trattament divrenzjat tal-investituri minħabba li xi wħud jistgħu jipparteċipaw aktar fir-riskji u fil-gwadanji minn oħrajn. Biex ittaffi r-riskji tal-investituri privati, il-miżura tista’ toffri protezzjoni pożittiva (l-investitur pubbliku jċedi parti mir-redditu) jew il-protezzjoni kontra parti mit-telf (limitazzjoni tat-telf għall-investitur privat) jew kombinazzjoni tat-tnejn.

111.

Il-Kummissjoni tqis li inċentivi pożittivi joħolqu allinjament aħjar tal-interessi bejn l-investituri pubbliċi u dawk privati. Min-naħa l-oħra, il-protezzjoni minn telf possibbli fejn l-investitur pubbliku jista’ jiġi espost għar-riskju ta’ prestazzjoni ħażina, tista’ twassal għal allinjament ħażin tal-interessi u għażla avversa mill-intermedjarji finanzjarji jew l-investituri.

112.

Il-Kummissjoni tqis li l-istrumenti ta’ ekwità b’redditu limitat (55), opzjoni eżerċitabbli (56) u qsim tal-flus minħabba introjtu asimmetriku (57) joffru inċentivi tajba, speċjalment f’sitwazzjonijiet karatterizzati minn falliment tas-suq inqas sever.

113.

L-istrumenti ta’ ekwità b’karatteristiċi ta’ kondiviżjoni tat-telf mhux pari passu li jmorru lil hinn mil-limiti stabbiliti fir-Regolament għall-Eżenzjoni Ġenerali Sħiħa jistgħu jiġu ġġustifikati biss għal miżuri li jindirizzaw fallimenti tas-suq severi, pereżempju fis-setturi ta’ teknoloġija avvanzata, jew ostakli rilevanti oħrajn identifikati fil-valutazzjoni ex ante, bħal miżuri mmirati l-aktar għan-negozji ġodda u għall-SMEs qabel l-ewwel bejgħ kummerċjali tagħhom jew fl-istadju ta’ prova tal-kunċett. Biex tiġi evitata protezzjoni estensiva mir-riskju ta’ telf possibbli, l-ewwel parti tat-telf imġarrba mill-investitur pubbliku trid tkun limitata.

b) Strumenti ta’ dejn iffinanzjati: dejn

114.

Il-miżura ta’ finanzjament ta’ riskju tista’ tkopri l-għoti ta’ self fil-livell tal-intermedjarji finanzjarji jew tal-benefiċjarji finali.

115.

L-istrumenti ta’ dejn iffinanzjati jistgħu jieħdu forom differenti, inkluż self subordinat u self b’kondiviżjoni tar-riskju tal-portafoll. Is-self subordinat jista’ jingħata lill-intermedjarji finanzjarji biex isaħħu l-istruttura kapitali tagħhom, bil-għan li jkunu jistgħu jipprovdu finanzjament addizzjonali lill-impriżi eliġibbli. Is-self b’kondiviżjoni tar-riskju tal-portafoll huwa mfassal biex jipprovdi self lill-intermedjarji finanzjarji li jimpenjaw ruħhom li jikkofinanzjaw portafoll ta’ self ġdid jew lokazzjonijiet lil impriżi eliġibbli sa ċerta rata ta’ kofinanzjament flimkien ma’ kondiviżjoni tar-riskju tal-kreditu tal-portafoll skont is-selfa (jew lokazzjoni). Fiż-żewġ każijiet, l-intermedjarju finanzjarju jaġixxi bħala koinvestitur fl-impriżi eliġibbli iżda jgawdi minn trattament preferenzjali meta mqabbel mal-investitur jew mas-sellief pubbliku minħabba li l-istrument jimmitiga l-iskopertura tiegħu stess għar-riskji ta’ kreditu li tirriżulta mill-portafoll tas-self sottostanti.

116.

B’mod ġenerali, fejn il-karatteristiċi tal-istrument ta’ mitigazzjoni tar-riskju jwasslu lill-investitur/ sellief pubbliku biex jassumi, fir-rigward tal-portafoll tas-self sottostanti, pożizzjoni tal-ewwel telf li taqbeż il-limitu stabbilit mir-Regolament għall-Eżenzjoni Ġenerali Sħiħa, il-miżura tista’ tiġi ġġustifikata biss f’każ ta’ miżuri mmirati esklussivament lejn negozju ġodda u SMEs qabel l-ewwel bejgħ kummerċjali tagħhom jew fl-istadju tal-prova tal-kunċett jew fil-każ ta’ falliment sever tas-suq jew ostaklu rilevanti ieħor li jrid jiġi identifikat b’mod ċar fil-valutazzjoni ex ante. Il-Kummissjoni se tikkunsidra b’mod pożittiv il-miżuri li jipprovdu limitu massimu espliċitu fuq l-ewwel telf preżunt mill-investitur pubbliku, b’mod partikolari meta tali limitu massimu ma jaqbiżx il-35 %.

117.

L-istrumenti ta’ self b’kondiviżjoni tar-riskju tal-portafoll tas-self jenħtieġ li jiżguraw rata ta’ koinvestiment sostanzjali mill-intermedjarju finanzjarju magħżul. Dan huwa preżunt li huwa l-każ jekk tali rata ma tkunx aktar baxxa minn 30 % tal-valur tal-portafoll tas-self sottostanti.

c) Strumenti ta’ dejn iffinanzjati: garanziji

118.

Miżura ta’ finanzjament ta’ riskju tista’ tkopri l-għoti ta’ garanziji jew ta’ kontrogaranziji lill-intermedjarji finanzjarji, jew garanziji lill-benefiċjarji finali, jew kombinazzjoni tat-tnejn. It-tranżazzjonijiet eliġibbli koperti mill-garanzija jridu jkunu tranżazzjonijiet ta’ self ta’ finanzjament ta’ riskju eliġibbli oriġinati reċentement, inklużi strumenti ta’ lokazzjoni, kif ukoll strumenti ta’ investiment ta’ kważi ekwità, iżda mhux strumenti ta’ ekwità.

119.

Il-garanziji jenħtieġ li jiġu pprovduti fuq bażi tal-portafoll. L-intermedjarji finanzjarji jistgħu jagħżlu t-tranżazzjonijiet li jixtiequ jinkludu fil-portafoll kopert mill-garanzija, sakemm it-tranżazzjonijiet inklużi jissodisfaw il-kriterji tal-eliġibbiltà kif definiti mill-miżura ta’ finanzjament ta’ riskju. Il-garanziji jenħtieġ li jiġu offruti b’rata li tiżgura livell xieraq ta’ kondiviżjoni tar-riskji u tal-gwadanji mal-intermedjarji finanzjarji. B’mod partikolari, f’każijiet debitament ġustifikati u soġġetta għar-riżultati tal-valutazzjoni ex ante, ir-rata tal-garanzija tista’ tkun ogħla mir-rata massima prevista fl-Artikolu 21 tar-Regolament għall-Eżenzjoni Ġenerali Sħiħa, iżda ma tridx taqbeż id-90 %. Dan jista’ jkun il-każ għall-garanziji fuq is-self jew l-investimenti ta’ kważi ekwità fin-negozji ġodda jew fl-SMEs qabel l-ewwel bejgħ kummerċjali tagħhom jew fl-istadju tal-prova tal-kunċett.

120.

Fil-każ ta’ garanziji limitati, ir-rata massima jenħtieġ li, fil-prinċipju, tkopri biss it-telf mistenni. Jekk din tkopri wkoll it-telf mhux mistenni, dan tal-aħħar jenħtieġ li jkun ipprezzat f’livell li jirrifletti l-kopertura addizzjonali tar-riskju. B’mod ġenerali, jenħtieġ li r-rata massima ma taqbiżx il-35 %. Garanziji mhux limitati (garanziji b’rata ta’ garanzija, iżda mingħajr rata massima) jistgħu jiġu pprovduti f’każijiet debitament ġustifikati u jiġu pprezzati b’tali mod li jkunu jirriflettu l-kopertura tar-riskju addizzjonali pprovduta mill-garanzija.

121.

Id-durata tal-garanzija jenħtieġ li tkun limitata fiż-żmien, normalment sa massimu ta’ għaxar snin, mingħajr preġudizzju għall-maturità tal-istrumenti ta’ dejn individwali koperti mill-garanzija, li tista’ tkun itwal. Il-garanzija trid titnaqqas jekk l-intermedjarju finanzjarju ma jinkludix ammont minimu ta’ investiment fil-portafoll matul perjodu speċifiku. Iridu jkunu meħtieġa tariffi ta’ impenn għall-ammonti li ma jintużawx. Jistgħu jintużaw metodi bħal tariffi ta’ impenn, avvenimenti ta’ skattar jew avvenimenti importanti sabiex jinċentivaw lill-intermedjarji sabiex jilħqu l-volumi maqbula.

3.2.3.3. Il-kundizzjonijiet għad-determinazzjoni tal-adegwatezza tal-inċentivi fiskali

122.

Kif indikat fit-Taqsima 3.2.2.2, il-punt (d), it-Taqsima 3 tar-Regolament għall-Eżenzjoni Ġenerali Sħiħa hija limitata għal inċentivi fiskali mmirati lejn investituri li huma persuni fiżiċi. Għalhekk, il-miżuri li jużaw inċentivi fiskali sabiex iħeġġu lill-investituri korporattivi jipprovdu finanzjament lill-impriżi eliġibbli, direttament jew indirettament permezz tal-akkwist ta’ ishma f’fond iddedikat jew f’tipi oħrajn ta’ mezzi ta’ investiment li jinvestu f’tali impriżi, huma soġġetti għal notifika lill-Kummissjoni.

123.

Bħala regola ġenerali, l-Istati Membri għandhom jibbażaw il-miżuri ta’ għajnuna fiskali tagħhom fuq is-sejbiet ta’ falliment tas-suq jew ostaklu rilevanti ieħor fil-valutazzjoni ex ante, u għalhekk jimmiraw l-istrument tagħhom lejn kategorija definita sew ta’ impriżi eliġibbli.

124.

L-inċentivi fiskali biex jiġu inkorprati l-investituri jistgħu jieħdu l-forma ta’ ħelsien mit-taxxa fuq l-introjtu u/jew ħelsien mit-taxxa fuq il-qligħ kapitali u d-dividendi, inklużi l-krediti tat-taxxa u d-diferimenti. Fil-prattika tal-każijiet tagħha, il-Kummissjoni ġeneralment ikkunsidrat bħala xieraq, ħelsien mit-taxxa fuq l-introjtu li fih limiti speċifiċi fuq il-perċentwal tal-ammont investit li l-investitur jista’ jitlob għall-finijiet tal-ħelsien mit-taxxa, kif ukoll fuq l-ammont ta’ ħelsien mit-taxxa li jista’ jitnaqqas mill-obbligazzjonijiet tat-taxxa tal-investitur. Barra minn hekk, l-obbligazzjoni tat-taxxa fuq il-qligħ kapitali maċ-ċessjoni ta’ ishma tista’ tkun diferita jekk tiġi investita mill-ġdid f’investimenti eliġibbli f’ċertu perjodu, filwaqt li t-telf li jirriżulta mat-trasferiment ta’ tali ishma jista’ jitnaqqas mill-profitti akkumulati minn ishma oħra soġġetti għall-istess taxxa.

125.

B’mod ġenerali, il-Kummissjoni tqis li l-inċentivi fiskali għall-investituri korporattivi huma xierqa jekk l-Istat Membru jista’ jipproduċi evidenza li turi li l-għażla tal-impriżi eleġibbli hija bbażata fuq sett strutturat tajjeb ta’ rekwiżiti ta’ investiment, li jsir pubbliku permezz ta’ pubbliċità xierqa, u li jistabbilixxi l-karatteristiċi tal-impriżi eleġibbli li huma soġġetti għal falliment tas-suq jew għal ostaklu rilevanti ieħor.

126.

Mingħajr preġudizzju għall-possibilità li l-miżura tittawwal, l-iskemi fiskali jrid ikollhom durata massima ta’ għaxar snin. Jekk, l-Istat Membru jipproponi li jestendi miżura għal durata totali ta’ aktar minn għaxar snin (inkluż skemi predeċessuri, jekk ikun hemm), dan irid iwettaq valutazzjoni ex ante ġdida, flimkien ma’ evalwazzjoni tal-effettività tal-iskema matul il-perjodu kollu tal-implimentazzjoni tagħha.

127.

Fl-analiżi tagħha, il-Kummissjoni se tqis il-karatteristiċi speċifiċi tas-sistema fiskali nazzjonali rilevanti u l-inċentivi fiskali li diġà jeżistu fl-Istat Membru, kif ukoll l-interazzjoni bejn dawk l-inċentivi.

128.

Il-vantaġġ fiskali jrid ikun miftuħ għall-investituri kollha li jissodisfaw il-kriterji applikabbli, mingħajr diskriminazzjoni fir-rigward tal-post ta’ stabbiliment tagħhom. Għalhekk, l-Istati Membri jenħtieġ li jiżguraw pubbliċità adegwata fir-rigward tal-kamp ta’ applikazzjoni u tal-parametri tekniċi tal-miżura. Dawn jenħtieġ li jinkludu l-livelli u l-limiti massimi rilevanti li jiddeterminaw il-vantaġġ massimu li jista’ jieħu kull investitur individwali mill-miżura, kif ukoll l-ammont ta’ investiment massimu li jista’ jsir f’impriżi eliġibbli individwali.

3.2.3.4. Il-kundizzjonijiet għal miżuri li jappoġġaw il-pjattaformi ta’ negozjar alternattivi

129.

Fir-rigward ta’ miżuri ta’ għajnuna li jappoġġaw pjattaformi ta’ negozjar alternattivi lil hinn mil-limiti stabbiliti fir-Regolament għall-Eżenzjoni Ġenerali Sħiħa, l-operatur tal-pjattaforma jrid jipprovdi pjan ta’ direzzjoni tan-negozju li juri li l-pjattaforma megħjuna tista’ issir awtosostenibbli f’inqas minn għaxar snin. Barra minn hekk, ix-xenarji kontrofattwali plawżibbli jridu jiġu pprovduti fin-notifika, li tqabbel is-sitwazzjonijiet li fihom jiġu kkonfrontati l-impriżi kummerċjabbli li kieku l-pjattaforma ma kinitx teżisti, f’termini tal-aċċess għall-finanzjament meħtieġ.

130.

Il-Kummissjoni se tħares b’mod favorevoli lejn pjattaformi ta’ negozjar alternattivi stabbiliti minn diversi Stati Membri u li joperaw f’diversi Stati Membri, minħabba li dawn jistgħu jkunu partikolarment effiċjenti u attraenti għall-investituri privati, b’mod partikolari għall-investituri istituzzjonali.

131.

Għall-pjattaformi eżistenti, l-istrateġija ta’ negozju proposta tal-pjattaforma trid turi li, minħabba nuqqas persistenti ta’ elenkar, u għalhekk nuqqas ta’ likwidità, il-pjattaforma kkonċernata jeħtieġ li tiġi appoġġata għal perjodu ta’ żmien qasir, minkejja l-vijabbiltà fit-tul tagħha. Il-Kummissjoni se tqis b’mod pożittiv għajnuna għall-istabbiliment ta’ pjattaforma ta’ negozjar alternattiva fl-Istati Membri fejn ma teżisti l-ebda tali pjattaforma. Fil-każ li l-pjattaforma ta’ negozjar alternattiva li għandha tiġi appoġġata tkun sottopjattaforma jew sussidjarja ta’ Borża eżistenti, il-Kummissjoni se tagħti attenzjoni partikolari għall-valutazzjoni dwar in-nuqqas ta’ finanzjament li kieku tiffaċċa tali sottopjattaforma.

3.2.4. Proporzjonalità tal-għajnuna

132.

L-għajnuna mill-Istat trid tkun proporzjonata meta mqabbla mal-falliment tas-suq jew ma’ ostakli rilevanti oħrajn, li hija tkun maħsuba li tindirizza sabiex jintlaħqu l-objettivi rilevanti tal-politika. Din trid tkun imfassla b’mod kosteffiċjenti, f’konformità mal-prinċipji ta’ ġestjoni finanzjarja soda. Għalhekk, sabiex kwalunkwe miżura ta’ għajnuna għall-finanzjament ta’ riskju tkun tista’ titqies bħala proporzjonata, l-għajnuna trid tkun limitata għall-minimu strett meħtieġ sabiex jiġi attirat il-finanzjament mis-suq biex jingħeleb il-falliment tas-suq jew l-ostaklu rilevanti l-ieħor, mingħajr ma jiġu ġġenerati vantaġġi mhux dovuti.

133.

Bħala regola ġenerali, fil-livell tal-benefiċjarji finali, l-għajnuna għall-finanzjament ta’ riskju titqies bħala proporzjonata jekk l-investiment għall-finanzjament ta’ riskju għal kull benefiċjarju eliġibbli ma jaqbiżx il-limitu stabbilit fl-Artikolu 21 tar-Regolament għall-Eżenzjoni Ġenerali Sħiħa u jkun jikkonforma mal-kundizzjonijiet stabbiliti f’din it-Taqsima. Għal miżuri ta’ finanzjament ta’ riskju fejn l-investiment ta’ finanzjament ta’ riskju għal kull benefiċjarju eliġibbli jaqbeż il-limitu massimu stabbilit fir-Regolament għall-Eżenzjoni Ġenerali Sħiħa, l-investiment ta’ finanzjament ta’ riskju ogħla għal kull benefiċjarju jrid ikun ukoll proporzjonat għad-daqs tad-diskrepanza fil-finanzjament ikkwantifikata fil-valutazzjoni ex ante (ara l-paragrafu 64).

134.

Fil-livell tal-investituri, l-għajnuna trid tkun limitata għall-minimu meħtieġ sabiex jiġi attirat il-kapital privat bil-għan li jinkiseb l-effett ta’ ingranaġġ minimu tar-riżorsi privati u jiġi indirizzat il-falliment tas-suq jew ostaklu rilevanti ieħor.

3.2.4.1. Il-kundizzjonijiet għall-istrumenti finanzjarji

135.

L-intermedjarji finanzjarji għandhom jagħżlu l-benefiċjarji finali eliġibbli abbażi ta’ strateġija tal-investiment kummerċjalment soda (ara l-paragrafu 70) u pjan ta’ direzzjoni tan-negozju vijabbli li jiġġustifika l-ammont ta’ finanzjament ta’ riskju li għandu jiġi pprovdut. Dawn il-kundizzjonijiet huma salvagwardja ulterjuri biex jiġi żgurat li l-għajnuna hija meħtieġa u proporzjonata.

136.

Il-miżura trid tiżgura li jkun hemm bilanċ bejn il-kundizzjonijiet preferenzjali offruti minn strument finanzjarju sabiex jiġi massimizzat l-effett ta’ ingranaġġ tar-riżorsi privati waqt li tindirizza l-falliment tas-suq identifikat jew ta’ ostaklu rilevanti ieħor u l-ħtieġa għall-istrument li jiġġenera redditi finanzjarji suffiċjenti biex jibqa’ operazzjonalment vijabbli.

137.

In-natura eżatta u l-valur tal-inċentivi jridu jiġu determinati permezz ta’ proċess tal-għażla miftuħ, trasparenti u mhux diskriminatorju, li fil-kuntest tiegħu, l-intermedjarji finanzjarji, kif ukoll il-maniġers ta’ fondi jew l-investituri jintalbu jippreżentaw offerti li jikkompetu.

Rata ġusta ta’ redditu

138.

Il-Kummissjoni tqis li fejn ikunu stabbiliti xi redditi asimmetriċi aġġustati għar-riskju jew kondiviżjoni tat-telf permezz ta’ tali proċess, l-istrument finanzjarju għandu jitqies bħala proporzjonat u li jirrifletti rata ġusta ta’ redditu. Fejn il-maniġers ta’ fondi jintgħażlu permezz ta’ proċess miftuħ, trasparenti u mhux diskriminatorju li jeħtieġ li l-applikanti jippreżentaw il-bażi tal-investituri tagħhom bħala parti mill-proċess tal-għażla, l-investituri privati jitqiesu li huma magħżula b’mod dovut.

139.

Fil-każ ta’ koinvestiment minn fond pubbliku ma’ investituri privati li jipparteċipaw skont it-tranżazzjoni, dawn tal-aħħar jenħtieġ li jintgħażlu permezz ta’ proċess kompetittiv xieraq fir-rigward ta’ kull tranżazzjoni, li huwa l-mod preferut biex tkun stabbilita r-rata ta’ redditu ġusta.

140.

Meta l-investituri privati ma jintgħażlux permezz ta’ proċess tal-għażla xieraq (pereżempju għaliex il-proċedura tal-għażla wriet li ma hijiex effettiva jew ma hijiex konklużiva), ir-rata ġusta ta’ redditu trid tkun stabbilita minn espert indipendenti fuq il-bażi ta’ analiżi ta’ punti referenzjarji tas-suq u r-riskju tas-suq abbażi ta’ metodoloġija standard u aċċettata b’mod ġenerali bħall-metodoloġija ta’ valwazzjoni tal-fluss tal-flus skontata sabiex jiġi evitat kumpens żejjed tal-investituri. Fuq dik il-bażi, l-espert indipendenti jrid jikkalkula livell minimu ta’ redditu ġust u jżid miegħu marġni xieraq biex jirrifletti r-riskji.

141.

Fis-sitwazzjonijiet deskritti fil-paragrafu 140, irid ikun hemm fis-seħħ regoli xierqa biex jinħatar l-espert indipendenti. Bħala minimu, l-espert irid ikun liċenzjat biex jipprovdi tali parir, ikun reġistrat mal-assoċjazzjonijiet professjonali rilevanti, jikkonforma mar-regoli deontoloġiċi u professjonali maħruġa minn dawk l-assoċjazzjonijiet, ikun indipendenti u jkun responsabbli għall-preċiżjoni tal-għarfien espert tiegħu. Fil-prinċipju, l-esperti indipendenti għandhom jintgħażlu permezz ta’ proċess tal-għażla miftuħ, trasparenti u mhux diskriminatorju. Is-servizzi tal-istess espert indipendenti ma jistgħux jintużaw darbtejn mill-istess awtorità li tagħti l-għajnuna fi żmien tliet snin għad-determinazzjoni tar-rata ġusta ta’ redditu fil-kuntest tal-miżuri ta’ għajnuna għall-finanzjament ta’ riskju.

142.

Fid-dawl ta’ dak li ntqal hawn fuq, it-tfassil tal-miżura jista’ jinkludi diversi investimenti pubbliċi u privati b’kondiviżjoni tal-profitti assimetrika jew bi twaqqit assimetriku, diment li r-redditi aġġustati għar-riskju mistennija għall-investituri privati jkunu limitati għal rata ġusta ta’ redditu.

L-għażla u r-remunerazzjoni tal-intermedjarji finanzjarji jew tal-maniġers tagħhom

143.

Bħala prinċipju ġenerali, il-Kummissjoni tqis li l-allinjament ekonomiku tal-interessi bejn l-Istat Membru u tal-intermedjarji finanzjarji jew tal-maniġers tagħhom, kif xieraq, jista’ jimminimizza l-għajnuna. L-interessi jridu jkunu allinjati kemm fir-rigward tal-ilħuq tal-miri ta’ politika speċifiċi kif ukoll tal-prestazzjoni finanzjarja tal-investiment pubbliku fl-istrument.

144.

L-intermedjarju finanzjarju jew il-maniġer ta’ fond jista’ jikkoinvesti flimkien mal-Istat Membru, sakemm it-termini u l-kundizzjonijiet ta’ tali koinvestiment ikunu tali li jeskludu kull possibbiltà ta’ kunflitt ta’ interessi. Tali koinvestiment jista’ jinċentiva lill-maniġer biex jallinja d-deċiżjonijiet ta’ investiment tiegħu mal-miri ta’ politika stabbiliti. Il-kapaċità tal-maniġer tal-fond li jipprovdi investiment mir-riżorsi proprji tiegħu tista’ tkun wieħed mill-kriterji tal-għażla.

145.

Ir-remunerazzjoni tal-intermedjarji finanzjarji jew tal-maniġers tal-fondi, skont it-tip ta’ miżura ta’ finanzjament ta’ riskju, trid tinkludi tariffa maniġerjali annwali, kif ukoll inċentivi bbażati fuq il-prestazzjoni, bħall-kumpens għal prestazzjoni.

146.

Il-komponent tar-remunerazzjoni bbażat fuq il-prestazzjoni jrid ikun sinifikanti u maħsub biex jippremja l-prestazzjoni finanzjarja, kif ukoll l-ilħuq ta’ miri ta’ politika speċifiċi stabbiliti minn qabel. L-inċentivi relatati mal-politika jridu jkunu bbilanċjati mal-inċentivi bbażati fuq il-prestazzjoni finanzjarja li huma meħtieġa biex jiżguraw għażla effiċjenti ta’ impriżi eliġibbli li fihom isiru l-investimenti. Barra minn hekk, il-Kummissjoni se tqis il-penali possibbli previsti fil-ftehim ta’ finanzjament bejn l-Istat Membru u l-intermedjarju finanzjarju, li japplikaw f’każ li l-miri ta’ politika definiti ma jintlaħqux.

147.

Il-livell ta’ remunerazzjoni bbażata fuq il-prestazzjoni jenħtieġ li jkun iġġustifikat fuq il-bażi tal-prattika tas-suq relevanti. Il-manigers iridu jiġu remunerati mhux biss għall-iżborż b’suċċess u l-ammont ta’ kapital privat miġbur, iżda wkoll għar-redditi fuq l-investiment b’suċċess, bħal irċevuti ta’ introjtu u rċevuti kapitali li jaqbżu ċerta rata minima ta’ redditu jew rata ta’ ostaklu.

148.

It-total tat-tariffi ta’ ġestjoni ma jridx jaqbeż il-kostijiet operazzjonali u dawk ta’ ġestjoni meħtieġa għall-eżekuzzjoni tal-istrument finanzjarju kkonċernat, flimkien ma’ profitt raġonevoli, f’konformità mal-prattika tas-suq. It-tariffi ma jridux jinkludu l-kostijiet tal-investiment.

149.

Minħabba li l-intermedjarji finanzjarji jew il-maniġers tagħhom, kif xieraq, iridu jintgħażlu permezz ta’ proċess miftuħ, trasparenti u mhux diskriminatorju, l-istruttura globali tat-tariffi tista’ tkun evalwata bħala parti mill-punteġġ ta’ dak il-proċess tal-għażla u r-remunerazzjoni massima tista’ tiġi stabbilita bħala riżultat ta’ tali għażla.

150.

Fil-każ ta’ ħatra diretta lil entità fdata, il-Kummissjoni tqis li t-tariffa annwali għall-ġestjoni jenħtieġ li dejjem tirrifletti l-prattika tas-suq komparabbli u fil-prinċipju ma għandhiex taqbeż it-3 % tal-kapital li għandu jiġi kkontribwit għall-entità, bl-esklużjoni tal-inċentivi bbażati fuq prestazzjoni.

3.2.4.2. Il-kundizzjonijiet għall-inċentivi fiskali

151.

L-investiment totali għal kull impriża benefiċjarja ma jridx jaqbeż l-ammont massimu ffissat mill-Artikolu 21 tar-Regolament għall-Eżenzjoni Ġenerali Sħiħa sakemm ammont ogħla ma jkunx jista’ jiġi ġġustifikat fuq il-bażi tal-falliment tas-suq identifikat fil-valutazzjoni ex ante u strument fiskali jkun l-aktar għodda xierqa (ara t-Taqsima 3.2.3.3).

152.

Irrispettivament mit-tip ta’ ħelsien mit-taxxa, l-ishma eliġibbli jridu jkunu ishma b’riskju sħiħ, ordinarji, maħruġin ġodda minn impriża eliġibbli kif definit fil-valutazzjoni ex ante, u jridu jinżammu għal mill-inqas tliet snin. Il-ħelsien jista’ jkun disponibbli biss għall-investituri li huma indipendenti mill-kumpanija li jkun sar l-investiment fiha.

153.

F’każ ta’ ħelsien mit-taxxa fuq l-introjtu, l-investituri li jipprovdu finanzi lil impriżi eliġibbli jistgħu jirċievu ħelsien sa perċentwal raġonevoli tal-ammont investit fl-impriżi eliġibbli, sakemm l-obbligazzjoni massima ta’ taxxa fuq l-introjtu tal-investitur, kif stabbilita qabel il-miżura fiskali, ma tinqabiżx. Il-Kummissjoni tqis li huwa raġonevoli li tillimita l-ħelsien mit-taxxa għal 30 % tal-ammont investit. It-telf li jirriżulta mat-trasferiment tal-ishma jista’ jiġi paċut kontra taxxa fuq l-introjtu.

154.

Fil-każ ta’ ħelsien mit-taxxa fuq id-dividendi, kwalunkwe dividend irċevut fir-rigward tal-ishma kwalifikanti jista’ jkun eżentat kompletament mit-taxxa fuq l-introjtu.

155.

Bl-istess mod, fil-każ ta’ ħelsien mit-taxxa fuq qligħ kapitali, kwalunkwe profitt fuq il-bejgħ ta’ ishma kwalifikanti jista’ jkun kompletament eżenti mit-taxxa fuq il-qligħ kapitali. Barra minn hekk, l-obbligazzjoni ta’ taxxa fuq il-qligħ kapitali fir-rigward tat-trasferiment tal-ishma kwalifikanti tista’ tiġi differita jekk tiġi investita mill-ġdid f’ishma kwalifikanti ġodda fi żmien sena.

3.2.4.3. Il-kundizzjonijiet għall-pjattaformi ta’ negozjar alternattivi

156.

Sabiex tippermetti analiżi xierqa tal-proporzjonalità tal-għajnuna lill-operatur ta’ pjattaforma ta’ negozjar alternattiva, l-għajnuna mill-Istat tista’ tingħata biex tkopri sa 50 % tal-kostijiet ta’ investiment imġarrba għall-istabbiliment ta’ tali pjattaforma.

157.

Fil-każ ta’ inċentivi fiskali lill-investituri korporattivi, il-Kummissjoni se tivvaluta l-proporzjonalità tal-miżura fl-isfond tal-kundizzjonijiet stabbiliti għall-inċentivi fiskali fit-Taqsima 3.2.4.2.

3.2.4.4. Kumulazzjoni

158.

L-għajnuna għall-finanzjament ta’ riskju tista’ tiġi kkumulata ma’ kwalunkwe miżura oħra ta’ għajnuna mill-Istat b’kostijiet eliġibbli li jistgħu jiġu identifikati.

159.

L-għajnuna għall-finanzjament ta’ riskju tista’ tiġi kumulata ma’ miżuri oħrajn ta’ għajnuna mill-Istat mingħajr kostijiet eliġibbli li jistgħu jiġu identifikati, jew ma’ għajnuna de minimis, sal-ogħla limitu massimu tal-finanzjament totali rilevanti stabbilit fiċ-ċirkostanzi speċifiċi ta’ kull każ permezz ta’ regolament ta’ eżenzjoni ta’ kategorija jew deċiżjoni adottata mill-Kummissjoni.

160.

Finanzjament mill-Unjoni, immaniġġat ċentralment mill-istituzzjonijiet, mill-aġenziji, mill-impriżi konġunti jew minn korpi oħra tal-Unjoni, li mhuwiex direttament jew indirettament taħt il-kontroll tal-Istati Membri, ma jikkostitwixxix għajnuna mill-Istat. Fejn tali finanzjament mill-Unjoni jiġi kkombinat ma’ għajnuna mill-Istat, l-ammont totali ta’ finanzjament pubbliku mogħti fir-rigward tal-istess investiment ma għandux jaqbeż ir-rata ta’ finanzjament l-aktar favorevoli stabbilita fir-regoli applikabbli tad-dritt tal-Unjoni.

3.2.5. L-evitar ta’ effetti negattivi mhux dovuti tal-għajnuna għall-finanzjament ta’ riskju fuq il-kompetizzjoni u l-kummerċ

161.

Sabiex l-għajnuna tkun kompatibbli, l-effetti negattivi tal-miżura ta’ għajnuna f’termini ta’ distorsjonijiet tal-kompetizzjoni u l-impatt fuq il-kummerċ bejn l-Istati Membri jridu jkunu limitati u ma jridux jisbqu l-effetti pożittivi tal-għajnuna sa livell li jmur kontra l-interess komuni.

3.2.5.1. L-effetti pożittivi li għandhom jitqiesu

162.

Kif spjegat fit-Taqsima 1, in-negozji ġodda u l-SMEs għadhom jaqdu rwol kruċjali fl-ekonomiji tal-Istati Membri, kemm f’termini ta’ ħolqien ta’ impjiegi kif ukoll ta’ stimolu tad-dinamika ekonomika u tat-tkabbir. L-SMEs jimpjegaw madwar 100 miljun persuna fl-Unjoni u jammontaw għal aktar minn nofs il-PDG tal-Unjoni. Dawn huma essenzjali wkoll għall-kompetittività u għall-prosperità tal-Ewropa, għas-sovranità ekonomika u teknoloġika, u għar-reżiljenza għal xokkijiet esterni. Madankollu, biex ikunu jistgħu jaqdu r-rwol tagħhom, u biex iwasslu dawk l-effetti pożittivi, l-SMEs jeħtieġu l-finanzjament. Għalhekk, suq ta’ finanzjament ta’ riskju effiċjenti għall-SMEs huwa kruċjali biex il-kumpaniji intraprenditorjali jkun jista’ jkollhom aċċess għall-finanzjament meħtieġ f’kull stadju tal-iżvilupp tagħhom. Fejn ikun hemm falliment tas-suq jew ostaklu rilevanti ieħor għall-operat effiċjenti ta’ tali finanzjament, tista’ tkun meħtieġa għajnuna għall-finanzjament ta’ riskju biex jittejjeb l-għoti ta’ finanzjament ta’ riskju lil SMEs vijabbli mill-iżvilupp bikri tagħhom sal-istadji ta’ tkabbir tagħhom (u, f’ċerti ċirkostanzi, għal impriżi żgħar b’kapitalizzazzjoni medja u impriżi innovattivi b’kapitalizzazzjoni medja) sabiex jiġi żviluppat suq ta’ finanzjament ta’ riskju kompetittiv fuq medda itwal ta’ żmien. F’dan l-isfond, l-effett pożittiv ewlieni li l-għajnuna għall-finanzjament ta’ riskju għandha l-għan li ġġib, huwa li ttejjeb l-aċċess għall-finanzjament għall-impriżi kkonċernati.

163.

Barra minn hekk, meta tivvaluta l-effetti pożittivi tal-għajnuna għall-finanzjament ta’ riskju li għandha titwieżen kontra l-effetti negattivi tagħha fuq il-kompetizzjoni u l-kummerċ, il-Kummissjoni tista’ tqis, fejn rilevanti, iċ-ċirkostanza li l-għajnuna tipproduċi effetti pożittivi oħrajn, minbarra l-kontribuzzjoni tagħha għall-għoti ta’ finanzjament ta’ riskju. Dan jista’ jkun il-każ meta jiġi stabbilit li, minbarra li jippermetti lill-kumpaniji jikbru jew jiżviluppaw attivitajiet ġodda, u jiġġeneraw tkabbar ekonomiku, l-investiment ta’ finanzjament ta’ riskju jikkontribwixxi sostanzjalment b’mod partikolari għat-tranżizzjoni diġitali jew għat-tranżizzjoni lejn attivitajiet ambjentalment sostenibbli, inkluż attivitajiet b’livell baxx ta’ emissjonijiet ta’ karbonju, b’newtralità klimatika jew reżiljenti għall-klima, għal ktajjen ta’ valur reżiljenti, jew għal żvilupp ta’ żoni assistiti. Fil-valutazzjoni tal-effetti pożittivi li għandhom jitqiesu, fejn applikabbli, il-Kummissjoni se tagħti attenzjoni partikolari lill-kriterji għal attivitajiet ekonomiċi ambjentalment sostenibbli stipulati fl-Artikolu 3 tar-Regolament (UE) 2020/852, inkluż il-prinċipju “La tagħmilx ħsara sinifikanti”, jew metodoloġiji komparabbli oħra (58).

164.

Sabiex il-Kummissjoni tkun tista’ tivvaluta kif xieraq l-effetti pożittivi mistennija tal-għajnuna f’termini ta’ żvilupp tal-attivitajiet ikkonċernati, l-Istat Membru jenħtieġ li jistabbilixxi objettiv ċar u speċifiku (jew sensiela ta’ objettivi) li jindirizza l-falliment tas-suq jew ostaklu rilevanti ieħor identifikat mill-valutazzjoni ex ante. Id-daqs u d-durata tal-miżura jenħtieġ li jkunu adegwati għal dawk l-objettivi. Barra minn hekk, l-Istat Membru jrid jiddefinixxi wkoll l-indikaturi tal-prestazzjoni rilevanti, abbażi tar-riżultati tal-valutazzjoni ex ante biex il-Kummissjoni tkun tista’ tkejjel l-effetti mistennija tal-għajnuna fir-rigward tal-objettivi segwiti. L-indikaturi tal-prestazzjoni jistgħu jinkludu:

a)	l-investiment meħtieġ jew previst fis-settur privat;

b)	l-għadd mistenni ta’ benefiċjarji finali li jsir investiment fihom, inkluż l-għadd ta’ negozji ġodda u SMEs ġodda;

c)	l-għadd stmat ta’ impriżi ġodda maħluqa matul l-implimentazzjoni tal-miżura ta’ finanzjament ta’ riskju u b’riżultat tal-investimenti ta’ finanzjament ta’ riskju;

d)	l-għadd ta’ impjiegi maħluqa fl-impriżi tal-benefiċjarji finali bejn id-data tal-ewwel investiment ta’ finanzjament ta’ riskju taħt il-miżura ta’ finanzjament ta’ riskju u l-ħruġ;

e)	fejn xieraq, il-proporzjon ta’ investimenti magħmula f’konformità mat-test tal-operatur tal-ekonomija tas-suq;

f)	l-istadji importanti u l-iskadenzi li fihom ċerti ammonti jew perċentwali predefiniti tal-baġit għandhom jiġu investiti;

g)	ir-redditi jew ir-rendimenti li mistennija jiġu ġġenerati mill-investimenti;

h)	fejn ikun xieraq, l-applikazzjonijiet għal privattivi li għandhom isiru mill-benefiċjarji finali, matul l-implimentazzjoni tal-miżura ta’ finanzjament ta’ riskju;

i)	fejn ikun xieraq, it-tisħiħ tar-reżiljenza tal-ktajjen tal-provvista kritiċi (eż. is-setturi tas-saħħa, tal-elettronika, tal-ajruspazju, tal-użu doppju u tad-difiża), u t-tisħiħ tal-iżvilupp teknoloġiku.

165.

L-indikaturi msemmija fil-paragrafu 164 huma rilevanti biex juru li l-għajnuna għall-finanzjament ta’ riskju hija mistennija li tagħti l-effetti pożittivi f’konformità mal-objettivi li ġew stabbiliti. B’mod partikolari, l-indikaturi jippermettu l-valutazzjoni tal-effettività tal-miżura u l-valutazzjoni tal-validità tal-istrateġiji tal-investiment imfassla mill-intermedjarju finanzjarju fil-kuntest tal-proċess tal-għażla.

166.

Fejn tintuża miżura ta’ finanzjament ta’ riskju, parzjalment jew kompletament, biex tappoġġa impriżi li reċentement ġew rikonoxxuti/mogħtija premju għall-innovazzjoni f’konformità mal-kriterji stabbiliti fl-attivitajiet ta’ CASSANI jew ingħataw tikketta tal-kwalità tas-Siġill ta’ Eċċellenza mill-EIC, jew biex tikkoinvesti mal-Fond tal-EIC jew biex tipprovdi investiment ta’ segwitu fir-rigward tal-Aċċeleraturi għall-Bidu ta’ Negozju (59), il-Kummissjoni tista’ taċċetta li l-Istat Membru juża l-istess Indikaturi ta’ Prestazzjoni Ewlenin kif jagħmlu CASSINI jew l-EIC, rispettivament.

3.2.5.2. L-effetti negattivi li jridu jitqiesu

167.

Il-miżura ta’ għajnuna mill-Istat trid titfassal b’tali mod li tillimita d-distorsjonijiet tal-kompetizzjoni u tal-kummerċ fis-suq intern. Fil-każ ta’ miżuri ta’ finanzjament ta’ riskju, l-effetti negattivi potenzjali għandhom jiġu vvalutati f’kull livell fejn l-għajnuna tista’ tkun preżenti: l-investituri, l-intermedjarji finanzjarji u l-maniġers tagħhom, u l-benefiċjarji finali.

168.

Sabiex il-Kummissjoni tkun tista’ tivvaluta l-effetti x’aktarx negattivi tal-miżura fuq il-kompetizzjoni u l-kummerċ, l-Istat Membru jista’ jippreżenta kwalunkwe studju jew evidenza rilevanti oħra għad-dispożizzjoni tiegħu, bħal evalwazzjonijiet ex post imwettqa għal skemi simili, f’termini tal-impriżi eliġibbli, l-istrutturi ta’ finanzjament, il-parametri ta’ tfassil u ż-żona ġeografika.

169.

Fil-livell tas-suq għall-għoti tal-finanzjament tar-riskji, l-għajnuna mill-Istat tista’ twassal għall-esklużjoni tal-investituri privati. Dan jista’ jnaqqas l-inċentivi għall-investituri privati biex jipprovdu finanzjament lill-impriżi eliġibbli u jinkoraġġihom jistennew li l-Istat jipprovdi għajnuna għal tali investimenti. Dan ir-riskju jsir aktar rilevanti aktar ma jkun għoli l-ammont tal-finanzjament totali lill-benefiċjarji finali, aktar ma jkun kbir id-daqs ta’ dawk l-impriżi benefiċjarji u aktar ma jkun avvanzat l-istadju ta’ żvilupp tagħhom, hekk kif il-finanzjament privat isir progressivament disponibbli f’dawk iċ-ċirkostanzi. Barra minn hekk, jenħtieġ li l-għajnuna mill-Istat ma tiħux post ir-riskju kummerċjali normali tal-investimenti li kieku jagħmlu l-investituri anki fin-nuqqas tal-għajnuna mill-Istat. Madankollu, sakemm il-falliment tas-suq jew l-ostaklu rilevanti l-ieħor ikun ġie definit kif suppost, huwa inqas probabbli li l-miżura ta’ finanzjament ta’ riskju tirriżulta f’tali esklużjoni.

170.

Fil-livell tal-intermedjarji finanzjarji, l-għajnuna jista’ jkollha effetti ta’ distorsjoni f’termini taż-żieda jew taż-żamma tas-saħħa tal-intermedjarju fis-suq, pereżempju fis-suq ta’ reġjun partikolari. Anki meta l-għajnuna ma ssaħħaħx is-saħħa tal-intermedjarju finanzjarju fis-suq direttament, din tista’ tagħmel dan indirettament, billi tiskoraġġixxi l-espansjoni tal-kompetituri eżistenti, twassal għall-ħruġ tagħhom jew tiskoraġġixxi d-dħul ta’ kompetituri ġodda.

171.

Il-miżuri ta’ finanzjament ta’ riskju jridu jkunu mmirati lejn impriżi orjentati lejn it-tkabbir li ma jistgħux jattiraw livell xieraq ta’ finanzjament minn riżorsi privati iżda li jistgħu jsiru vijabbli b’għajnuna mill-Istat għall-finanzjament ta’ riskju. Madankollu, fejn miżura tipprevedi l-istabbiliment ta’ fond pubbliku, iżda l-istrateġija ta’ investiment ta’ dak il-fond ma turix biżżejjed il-vijabbiltà potenzjali tal-impriżi eliġibbli, il-miżura x’aktarx li ma tissodisfax it-test tal-ibbilanċjar (ara t-Taqsima 3.2.5.3), peress li f’każ bħal dan, l-investiment ta’ finanzjament ta’ riskju jista’ jammonta għal għotja.

172.

Il-kundizzjonijiet relatati mal-ġestjoni kummerċjali u t-teħid ta’ deċiżjonijiet orjentati lejn il-profitt stabbiliti fl-Artikolu 21 tar-Regolament għall-Eżenzjoni Ġenerali Sħiħa huma essenzjali biex jiġi żgurat li l-għażla tal-impriżi benefiċjarji finali tkun ibbażata fuq loġika kummerċjali. Għalhekk, il-Kummissjoni se tqis dawk il-kundizzjonijiet meta tivvaluta miżuri ta’ finanzjament ta’ riskju skont dawn il-Linji Gwida, inkluż fejn il-miżura tinvolvi intermedjarji finanzjarji pubbliċi.

173.

Il-fondi ta’ investiment ta’ skala żgħira, b’fokus reġjonali limitat u mingħajr arranġamenti adegwati ta’ governanza se jiġu analizzati bl-għan li jiġi evitat ir-riskju li jinżammu strutturi tas-suq ineffiċjenti. L-iskemi reġjonali ta’ finanzjament ta’ riskju mhux dejjem jista’ jkollhom skala u ambitu suffiċjenti minħabba nuqqas ta’ diversifikazzjoni marbuta mal-għadd possibbilment baxx ta’ impriżi eliġibbli bħala miri ta’ investiment, li jistgħu jnaqqsu l-effiċjenza ta’ tali fondi u jirriżultaw fl-għoti ta’ għajnuna lil kumpaniji inqas vijabbli. F’każijiet bħal dawn, l-investimenti jistgħu potenzjalment ifixklu l-kompetizzjoni u jipprovdu vantaġġi mhux dovuti lil ċerti impriżi.

174.

Fil-livell tal-benefiċjarji finali l-miżura jista’ jkollha effetti distorsivi fuq is-swieq tal-prodotti fejn dawk l-impriżi jikkompetu. Pereżempju, il-miżura tista’ tfixkel il-kompetizzjoni jekk hija timmira lejn kumpaniji f’setturi b’sottoprestazzjoni. L-espansjoni sostanzjali fil-kapaċità kkawżata mill-għajnuna mill-Istat f’suq li ma jkunx qed jagħti r-riżultati mistennija, tista’ b’mod partikolari toħloq distorsjoni mhux dovuta fuq il-kompetizzjoni, peress li l-ħolqien jew iż-żamma ta’ kapaċità żejda tista’ twassal għal tidjiq tal-marġnijiet tal-profitt, tnaqqis tal-investimenti tal-kompetituri jew saħansitra l-ħruġ tagħhom mis-suq. Dan jista’ wkoll jimpedixxi lil kumpaniji milli jidħlu fis-suq. Dan kollu jwassal għal strutturi ineffiċjenti tas-suq li, fit-tul, jaffettwaw ħażin lill-konsumaturi wkoll. Meta s-suq fis-setturi mmirati jkun qiegħed jikber, normalment ikun hemm inqas raġuni sabiex wieħed jinkwieta li l-għajnuna se taffettwa b’mod negattiv l-inċentivi dinamiċi jew li se timpedixxi l-ħruġ jew id-dħul b’mod mhux dovut. Il-Kummissjoni tqis li r-riskju ta’ tali distorsjonijiet huwa sostanzjali meta l-miżura ta’ finanzjament ta’ riskju tkun speċifika għas-settur, jew tagħti preferenza lil ċerti setturi fuq oħrajn. F’tali każijiet, il-Kummissjoni se tanalizza l-livell ta’ kapaċitajiet tal-produzzjoni fis-settur partikolari, fid-dawl tad-domanda potenzjali. Sabiex il-Kummissjoni tkun tista’ twettaq tali valutazzjoni, l-Istat Membru jrid jindika fin-notifika tiegħu jekk il-miżura ta’ finanzjament ta’ riskju hijiex speċifika għas-settur, jew jekk tagħtix preferenza lil ċerti setturi fuq oħrajn.

175.

Il-Kummissjoni se tivvaluta wkoll kwalunkwe effett negattiv potenzjali ta’ delokalizzazzjoni peress li dawn jistgħu jaffettwaw il-kompetizzjoni u l-kummerċ bejn l-Istati Membri. F’dan ir-rigward, il-Kummissjoni se tanalizza jekk il-fondi reġjonali għandhomx il-probabbiltà li jinċentivaw id-delokalizzazzjoni fi ħdan is-suq intern. Meta l-attivitajiet tal-intermedjarju finanzjarju jkunu ffukati fuq reġjun mhux assistit li jmiss ma’ reġjuni assistiti, jew reġjun b’intensità ta’ għajnuna reġjonali ogħla mir-reġjun fil-mira, ir-riskju ta’ tali distorsjoni huwa aktar qawwi. Miżura ta’ finanzjament ta’ riskju reġjonali li tiffoka biss fuq ċerti setturi jista’ jkollha wkoll effetti negattivi ta’ delokalizzazzjoni.

176.

Finalment, bħala parti mill-valutazzjoni tal-effetti negattivi fuq il-kompetizzjoni u l-kummerċ, il-Kummissjoni tista’ tqis, fejn rilevanti, esternalitajiet negattivi tal-attività megħjuna fejn tali esternalitajiet jaffettwaw b’mod negattiv il-kompetizzjoni u l-kummerċ bejn l-Istati Membri sa punt li jmur kontra l-interess komuni billi joħolqu jew jaggravaw l-ineffiċjenzi tas-suq (60).

3.2.5.3. L-ibbilanċjar tal-effetti pożittivi kontra l-effetti negattivi tal-għajnuna

177.

Bħala l-aħħar pass tal-analiżi tagħha, il-Kummissjoni se tibbilanċja l-effetti negattivi identifikati tal-miżura ta’ għajnuna f’termini ta’ distorsjonijiet tal-kompetizzjoni u l-impatt fuq il-kummerċ bejn l-Istati Membri kontra l-effetti pożittivi tal-għajnuna, u se tikkonkludi li l-miżura ta’ għajnuna hija kompatibbli mas-suq intern biss jekk l-effetti pożittivi jegħlbu dawk negattivi.

178.

Il-bilanċ kumplessiv ta’ ċerti kategoriji ta’ skemi ta’ għajnuna jista’ jiġi soġġett ukoll għal rekwiżit ta’ evalwazzjoni ex post kif deskritt fit-Taqsima 4. F’tali każijiet, il-Kummissjoni tista’ tillimita d-durata ta’ dawk l-iskemi, bil-possibbiltà li terġa’ tinnotifika l-estensjoni tagħhom wara.

3.2.6. Trasparenza

179.

Bħala salvagwardja ulterjuri kontra distorsjonijiet mhux dovuti, l-Istati Membri, il-Kummissjoni, l-operaturi ekonomiċi u l-pubbliku jrid ikollhom aċċess faċli għall-atti u għall-informazzjoni kollha rilevanti dwar l-għajnuna li tingħata fil-qafas tagħhom.

180.

L-Istati Membri jridu jippubblikaw l-informazzjoni li ġejja fil-modulu tal-għoti tat-trasparenza (61) tal-Kummissjoni jew fuq sit web komprensiv dwar l-għajnuna mill-Istat, fuq livell nazzjonali jew reġjonali:

a)	it-test sħiħ tad-deċiżjoni dwar l-għoti tal-għajnuna individwali jew tal-iskema ta’ għajnuna approvata u d-dispożizzjonijiet ta’ implimentazzjoni tagħha, jew ħolqa għalih;

b)	informazzjoni dwar kull għotja ta’ għajnuna individwali li taqbeż il-EUR 100 000, kif stabbilit fl-Anness ta’ dawn il-Linji Gwida.

181.

L-Istati Membri jridu jorganizzaw is-siti web komprensivi tagħhom dwar l-għajnuna mill-Istat, kif imsemmi fil-paragrafu 180, b’tali mod li l-informazzjoni tkun tista’ tiġi aċċessata faċilment. L-informazzjoni trid tiġi ppubblikata f’format ta’ data ta’ spreadsheet nonproprjetarju, li jippermetti li d-data tiġi mfittxija, estratta u mniżżla b’mod effettiv u ppubblikata faċilment fuq l-Internet, pereżempju f’format CSV jew XML. Il-pubbliku ġenerali jrid jitħalla jaċċessa s-sit web mingħajr ebda restrizzjoni, inkluż reġistrazzjoni tal-utent minn qabel.

182.

Għall-iskemi fil-forma ta’ inċentivi fiskali, il-kundizzjonijiet stabbiliti fil-paragrafu 180, il-punt (b) se jitqiesu ssodisfati jekk l-Istati Membri jippubblikaw l-informazzjoni meħtieġa dwar l-ammonti tal-għajnuna individwali fil-meded li ġejjin (f’miljuni ta’ EUR):

0,1–0,5;

0,5–1;

1–2;

2–5;

5–10;

10–30;

30–60;

60–100;

100–250;

250 u aktar.

183.

L-informazzjoni msemmija fil-paragrafu 180, il-punt (b), trid tiġi ppubblikata fi żmien sitt xhur mid-data li fiha tkun ingħatat l-għajnuna jew, għall-għajnuna fil-forma ta’ inċentivi fiskali, fi żmien sena mid-data meta hija dovuta d-dikjarazzjoni tat-taxxa (62). Għal għajnuna li hija illegali iżda li sussegwentement tinstab kompatibbli, l-Istati Membri jridu jippubblikaw l-informazzjoni fi żmien sitt xhur mid-data tad-deċiżjoni tal-Kummissjoni li tiddikjara l-għajnuna bħala kompatibbli. Sabiex tippermetti l-eżekuzzjoni tar-regoli dwar l-għajnuna mill-Istat skont it-Trattat, l-informazzjoni trid tibqa’ disponibbli għal mill-inqas 10 snin mid-data li fiha tkun ingħatat l-għajnuna.

184.

Il-Kummissjoni se tippubblika fuq is-sit web tagħha l-link għas-siti web dwar l-għajnuna mill-Istat li hemm referenza għalihom fil-paragrafu 180.

4. EVALWAZZJONI

185.

Biex tkompli tiżgura li d-distorsjoni tal-kompetizzjoni u l-kummerċ tkun limitata, il-Kummissjoni tista’ titlob li ċerti skemi ta’ għajnuna jkunu soġġetti għal evalwazzjoni ex post. L-evalwazzjonijiet ikunu meħtieġa għal skemi fejn id-distorsjoni potenzjali tal-kompetizzjoni u tal-kummerċ tkun partikolarment għolja, jiġifieri, li hemm riskju ta’ restrizzjoni jew ta’ distorsjoni sinifikanti tal-kompetizzjoni jekk l-implimentazzjoni tagħhom ma tiġix riveduta fi żmien debitu.

186.

Tista’ tkun meħtieġa evalwazzjoni ex post għall-iskemi ta’ għajnuna li ġejjin:

a)	skemi b’baġits ta’ għajnuna kbar;

b)	skemi b’enfasi reġjonali;

c)	skemi b’enfasi settorjali stretta;

d)	skemi li huma mmodifikati, fejn il-modifika taffettwa l-kriterji tal-eliġibbiltà, l-ammont ta’ investiment jew il-parametri ta’ tfassil finanzjarju;

e)	skemi li fihom karatteristiċi ġodda;

f)	skemi li fir-rigward tagħhom il-Kummissjoni titlob dan, fid-dawl tal-effetti negattivi potenzjali tal-iskema fuq il-kompetizzjoni u l-kummerċ.

187.

Fi kwalunkwe każ, se tkun meħtieġa evalwazzjoni ex post għal skemi b’baġit tal-għajnuna mill-Istat jew nefqa kontabbilizzata ta’ aktar minn EUR 150 miljun fi kwalunkwe sena partikolari jew ta’ aktar minn EUR 750 miljun matul id-durata totali tagħhom, jiġifieri d-durata kkombinata tal-iskema u ta’ kwalunkwe skema ta’ qabel li tkopri objettiv u żona ġeografika simili, sa mill-1 ta’ Jannar 2022. Minħabba l-objettivi tal-evalwazzjoni, u biex jiġi evitat li jitqiegħed piż sproporzjonat fuq l-Istati Membri, evalwazzjonijiet ex post se jkunu meħtieġa biss għal skemi ta’ għajnuna li d-durata totali tagħhom taqbeż it-tliet snin, li tibda mill-1 ta’ Jannar 2022.

188.

Ir-rekwiżit tal-evalwazzjoni ex post jista’ jiġi eżentat fil-każ ta’ skemi ta’ għajnuna li huma suċċessur immedjat ta’ skema li tkopri objettiv u żona ġeografika simili li kienet soġġetta għal evalwazzjoni, li r-rapport ta’ evalwazzjoni finali tagħha kien f’konformità mal-pjan ta’ evalwazzjoni approvat mill-Kummissjoni u ma ġġenerat l-ebda sejba negattiva. Fejn ir-rapport ta’ evalwazzjoni finali ta’ skema ma jkunx konformi mal-pjan ta’ evalwazzjoni approvat, dik l-iskema trid tiġi sospiża b’effett immedjat.

189.

L-għan tal-evalwazzjoni jenħtieġ li jkun li jiġi verifikat jekk is-suppożizzjonijiet u l-kundizzjonijiet sottostanti għall-kompatibbiltà tal-iskema ntlaħqux, b’mod partikolari l-ħtieġa u l-effikaċja tal-miżura ta’ għajnuna fid-dawl tal-objettivi tagħha. Din jenħtieġ li tivvaluta wkoll l-impatt tal-miżura ta’ finanzjament ta’ riskju fuq il-kompetizzjoni u l-kummerċ.

190.

Għal skemi ta’ għajnuna li fir-rigward tagħhom trid titwettaq evalwazzjoni (ara l-paragrafi 187 u 186) li d-durata totali tagħhom taqbeż it-tliet snin, mill-1 ta’ Jannar 2022, l-Istati Membri jridu jinnotifikaw abbozz ta’ pjan ta’ evalwazzjoni, li se jifforma parti integrali mill-valutazzjoni tal-Kummissjoni tal-iskema, kif ġej:

a)	flimkien mal-iskema ta’ għajnuna, jekk il-baġit tiegħu għall-għajnuna mill-Istat jaqbeż il-EUR 150 miljun f’xi sena partikolari jew is-EUR 750 miljun tul id-durata kollha tiegħu;

b)	fi żmien 30 jum ta’ xogħol wara bidla sinifikanti li permezz tagħha l-baġit tal-iskema jiżdied għal aktar minn EUR 150 miljun f’xi sena partikolari jew EUR 750 miljun tul id-durata kollha tal-iskema;

c)	fi żmien 30 jum ta’ xogħol wara r-reġistrazzjoni tan-nefqa fil-kontijiet uffiċjali li taqbeż il-EUR 150 miljun fi kwalunkwe sena;

d)	wara talba mill-Kummissjoni, u fi kwalunkwe każ qabel l-approvazzjoni tal-iskema, jekk l-iskema taqa’ taħt waħda mill-kategoriji elenkati fil-paragrafu 186, irrispettivament mill-baġit tal-għajnuna mill-Istat tal-iskema.

191.

L-abbozz tal-pjan ta’ valutazzjoni jrid ikun f’konformità mal-prinċipji metodoloġiċi komuni pprovduti mill-Kummissjoni (63). L-Istati Membri jridu jippubblikaw il-pjan ta’ evalwazzjoni approvat mill-Kummissjoni.

192.

L-evalwazzjoni ex post trid issir minn espert li jkun indipendenti mill-awtorità awtorizzanti tal-għajnuna fuq il-bażi tal-pjan ta’ evalwazzjoni. Kull evalwazzjoni trid tinkludi mill-inqas rapport ta’ evalwazzjoni interim wieħed u wieħed finali. L-Istati Membri jridu jippubblikaw iż-żewġ rapporti.

193.

Ir-rapport ta’ evalwazzjoni finali jrid jiġi ppreżentat lill-Kummissjoni fi żmien xieraq, biex tkun tista’ tiġi vvalutata kwalunkwe estensjoni tal-iskema ta’ għajnuna u mhux aktar tard minn disa’ xhur qabel tiskadi. Dak il-perjodu jista’ jitnaqqas għal skemi li jiskattaw ir-rekwiżit ta’ evalwazzjoni fl-aħħar sentejn ta’ implimentazzjoni tagħhom. L-ambitu u l-arranġamenti preċiżi ta’ kull evalwazzjoni jiġu definiti fid-deċiżjoni ta’ approvazzjoni tal-iskema ta’ għajnuna. In-notifika ta’ kwalunkwe miżura ta’ għajnuna sussegwenti b’objettiv simili trid tiddeskrivi b’liema mod ġew meqjusin ir-riżultati tal-evalwazzjoni.

5. DISPOŻIZZJONIJIET FINALI

5.1. Applikabbiltà

194.

Il-Kummissjoni se tapplika l-prinċipji stabbiliti f’dawn il-Linji Gwida għall-valutazzjoni tal-kompatibbiltà tal-għajnuna għall-finanzjament ta’ riskju kollha notifikabbli mogħtija jew li hija maħsuba biex tingħata mill-1 ta’ Jannar 2022.

195.

Għajnuna għall-finanzjament ta’ riskju mogħtija illegalment qabel l-1 ta’ Jannar 2022 se tiġi vvalutata f’konformità mar-regoli fis-seħħ fid-data li fiha tkun ingħatat l-għajnuna.

196.

Sabiex jiġu ppreservati l-aspettattivi leġittimi tal-investituri privati, fil-każ ta’ skemi ta’ finanzjament ta’ riskju li jipprevedu l-finanzjament pubbliku għall-appoġġ għall-finanzjament ta’ riskju, id-data tal-impenn tal-finanzjament pubbliku lill-intermedjarji finanzjarji, li hija d-data tal-firma tal-ftehim ta’ finanzjament, tiddetermina l-applikabbiltà tar-regoli għall-miżura ta’ finanzjament ta’ riskju.

5.2. Miżuri xierqa

197.

Il-Kummissjoni tqis li l-implimentazzjoni ta’ dawn il-Linji Gwida se twassal għal ċerti bidliet fil-prinċipji ta’ valutazzjoni għall-għajnuna ta’ finanzjament ta’ riskju fl-Unjoni. Għal dawn ir-raġunijiet, il-Kummissjoni tipproponi lill-Istati Membri dawn il-miżuri xierqa li ġejjin skont l-Artikolu 108(1) tat-Trattat:

a)	L-Istati Membri jenħtieġ li jemendaw, fejn meħtieġ, l-iskemi eżistenti tagħhom tal-għajnuna għall-finanzjament ta’ riskju, sabiex jinġiebu f’konformità ma’ dawn il-Linji Gwida, fi żmien sitt xhur wara d-data tal-pubblikazzjoni tal-Linji Gwida;

b)	L-Istati Membri huma mistiedna jagħtu l-qbil espliċitu u mingħajr kundizzjoni tagħhom għall-miżuri proposti fi żmien xahrejn mid-data tal-pubblikazzjoni ta’ dawn il-Linji Gwida. Fin-nuqqas ta’ tweġiba, il-Kummissjoni se tassumi li l-Istat Membru inkwistjoni ma jaqbilx mal-miżuri proposti.

198.

Sabiex jiġu ppreservati l-aspettattivi leġittimi tal-investituri privati, l-Istati Membri ma għandhomx għalfejn jieħdu miżuri xierqa fir-rigward ta’ skemi ta’ għajnuna għall-finanzjament ta’ riskju favur l-SMEs meta l-impenn tal-finanzjament pubbliku għall-intermedjarji finanzjarji, li hija d-data tal-iffirmar tal-ftehim ta’ finanzjament, ikun sar qabel id-data tal-pubblikazzjoni ta’ dawn il-Linji Gwida u l-ebda kundizzjoni prevista fil-ftehim ta’ finanzjament ma tinbidel. Dawk l-intermedjarji finanzjarji jistgħu jkomplu joperaw u jinvestu f’konformità mal-istrateġija ta’ investiment oriġinali tagħhom sa tmiem id-durata stabbilita fil-ftehim ta’ finanzjament.

5.3. Rapportar u monitoraġġ

199.

F’konformità mar-Regolament tal-Kunsill (UE) Nru 2015/1589 (64), u r-Regolament tal-Kummissjoni (KE) Nru 794/2004 (65), l-Istati Membri jridu jissottomettu rapporti annwali lill-Kummissjoni.

200.

L-Istati Membri jridu jżommu rekords dettaljati rigward il-miżuri ta’ għajnuna kollha. Tali rekords iridu jinkludu l-informazzjoni kollha meħtieġa biex jiġi stabbilit li l-kundizzjonijiet li jirrigwardaw l-eliġibbiltà u l-ammonti massimi ta’ investiment ġew issodisfati. Dawn ir-reġistri jridu jinżammu għal għaxar snin mid-data tal-għoti tal-għajnuna u meta jintalbu jridu jiġu pprovduti lill-Kummissjoni. Fil-każ ta’ miżuri ta’ għajnuna li jipprovdu inċentivi fiskali, li skonthom l-għajnuna fiskali tingħata awtomatikament, bħal dawk ibbażati fuq dikjarazzjonijiet tat-taxxa tal-benefiċjarji, u fejn ma jkun hemm l-ebda verifika ex ante li l-kundizzjonijiet kollha ta’ kompatibbiltà jiġu ssodisfati għal kull benefiċjarju, l-Istati Membri jridu jivverifikaw regolarment, tal-anqas ex post u fuq bażi ta’ kampjun, li l-kundizzjonijiet kollha ta’ kompatibbiltà jiġu ssodisfati, u jisiltu l-konklużjonijiet meħtieġa. L-Istati Membri jridu jżommu rekords dettaljati tal-verifiki għal mill-inqas għaxar snin mid-data tal-kontrolli.

5.4. Reviżjoni

201.

Il-Kummissjoni tista’ tiddeċiedi li tirrieżamina jew li tibdel dawn il-Linji Gwida fi kwalunkwe waqt jekk dan ikun meħtieġ għal raġunijiet marbuta mal-politika tal-kompetizzjoni tal-Unjoni jew sabiex jitqiesu politiki tal-Unjoni oħrajn u impenji internazzjonali, żviluppi fis-swieq, jew għal kwalunkwe raġuni oħra ġġustifikata.

(1) Id-definizzjonijiet eżatti tal-SMEs, il-kumpaniji żgħar b’kapitalizzazzjoni medja u l-kumpaniji innovattivi b’kapitalizzazzjoni medja għall-finijiet ta’ dawn il-Linji Gwida huma stabbiliti fit-Taqsima 2.3, fil-paragrafu 35.

(2) Linji gwida Komunitarji dwar l-għajnuna mill-Istat għall-promozzjoni ta’ investimenti tal-kapital ta’ riskju f’intrapriżi żgħar u ta’ daqs medju (ĠU C 194, 18.8.2006, p. 2).

(3) Il-Komunikazzjoni tal-Kummissjoni — Linji Gwida dwar l-għajnuna mill-Istat biex tippromwovi investimenti ta’ finanzjament ta’ riskju (ĠU C 19, 22.1.2014, p. 4).

(4) Bejn l-2012 u l-2014, il-Kummissjoni wettqet programm ambizzjuż ta’ modernizzazzjoni tal-għajnuna mill-Istat ibbażat fuq tliet objettivi ewlenin, għal aktar dettalji ara l-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar il-Modernizzazzjoni tal-Għajnuna mill-Istat tal-UE (SAM) (COM(2012) 209 final tat-8.5.2012):

(a)	it-trawwim ta’ tkabbir sostenibbli, intelliġenti u inklużiv f’suq intern kompetittiv;

(b)	l-iffukar tal-iskrutinju ex ante tal-Kummissjoni fuq il-każijiet bl-akbar impatt fuq is-suq intern, filwaqt li tissaħħaħ il-kooperazzjoni mal-Istati Membri fl-eżekuzzjoni tal-għajnuna mill-Istat;

(c)	is-simplifikazzjoni tar-regoli biex jiġi żgurat proċess ta’ teħid tad-deċiżjonijiet aktar rapidu.

(5) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, “Strateġija għall-SMEs għal Ewropa sostenibbli u diġitali” (COM(2020) 103 final tal-10.3.2020).

(6) Ara ‘Evaluation support study on the EU rules on State aid for access to finance for SMEs’, Unjoni Ewropea (2020), disponibbli: https://ec.europa.eu/competition/state_aid/modernisation/risk_finance_study.zip

(7) Tali innovazzjonijiet jinkludu pereżempju t-tibdil tal-prattiki soċjali b’appoġġ għat-tranżizzjonijiet ekoloġiċi jew diġitali, jew li l-karrieri fl-ICT isiru aktar aċċessibbli għan-nisa.

(8) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Il-Patt Ekoloġiku Ewropew” (COM(2019) 640 final tal-11.12.2019).

(9) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Insawru l-futur diġitali tal-Ewropa” (COM(2020) 67 final tad-19.2.2020).

(10) Il-Proposta għal Direttiva tal-Parlament Ewropew u tal-Kunsill li temenda d-Direttiva (UE) 2018/2001 tal-Parlament Ewropew u tal-Kunsill, ir-Regolament (UE) 2018/1999 tal-Parlament Ewropew u tal-Kunsill u d-Direttiva 98/70/KE tal-Parlament Ewropew u tal-Kunsill fir-rigward tal-promozzjoni tal-enerġija minn sorsi rinnovabbli, u li tħassar id-Direttiva tal-Kunsill (UE) 2015/652 (COM(2021) 557 final tal-14.7.2021).

(11) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Bank Ċentrali Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni “Pjan ta’ Azzjoni: Il-finanzjament tat-Tkabbir Sostenibbli” (COM(2018) 97 final tat-8.3.2018).

(12) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “It-Tassonomija tal-UE, ir-Rappurtar dwar is-Sostenibbiltà Korporattiva, il-Preferenzi dwar is-Sostenibbiltà u d-Dazji Fiduċjarji: Nidderieġu l-Finanzi lejn il-Patt Ekoloġiku Ewropew” (COM(2021) 188 final tal-21.4.2021).

(13) Ir-Regolament (UE) 2020/852 tal-Parlament Ewropew u tal-Kunsill tat-18 ta’ Ġunju 2020 dwar l-istabbiliment ta’ qafas biex jiġi ffaċilitat l-investiment sostenibbli, u li jemenda r-Regolament (UE) 2019/2088 (ĠU L 198, 22.6.2020, p. 13).

(14) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Il-Kumpass Diġitali tal-2030: l-approċċ Ewropew għad-Deċennju Diġitali (COM(2021) 118 final tad-9.3.2021).

(15) Ir-Regolament (UE) 2021/241 tal-Parlament Ewropew u tal-Kunsill tat-12 ta’ Frar 2021 li jistabbilixxi l-Faċilità għall-Irkupru u r-Reżiljenza (ĠU L 57, 18.2.2021, p. 17).

(16) Il-Komunikazzjoni tal-Kummissjoni lill-Parlament Ewropew, lill-Kunsill, lill-Bank Ċentrali Ewropew, lill-Kumitat Ekonomiku u Soċjali Ewropew, lill-Kumitat tar-Reġjuni u lill-Bank Ewropew tal-Investiment “L-Istrateġija Annwali għat-Tkabbir Sostenibbli tal-2021”, COM/2020/575 final tas-17.9.2020, jidentifika seba’ oqsma ewlenin: l-enerġizzazzjoni — Il-forniment minn qabel ta’ teknoloġiji nodfa u validi għall-futur u l-aċċellerazzjoni tal-iżvilupp u l-użu ta’ sorsi ta’ enerġija rinnovabbli; ir-rinnovazzjoni –It-titjib tal-effiċjenza enerġetika ta’ bini pubbliku u privat– riċċarġjar u rifjuwilling — Il-promozzjoni ta’ teknoloġiji nodfa u validi għall-futur biex jiġi aċċellerat l-użu ta’ stazzjonijiet tat-trasport, tal-iċċarġjar u tar-riforniment sostenibbli, aċċessibbli u intelliġenti u l-estensjoni tat-trasport pubbliku; il-konnessjoni — l-iskjerament rapidu tas-servizzi tal-broadband rapidu għar-reġjuni u għall-unitajiet domestiċi kollha, inklużi n-networks tal-fibra u tal-5G; il-modernizzazzjoni — id-diġitalizzazzjoni tal-amministrazzjoni pubblika u tas-servizzi pubbliċi, inklużi s-sistemi ġudizzjarji u tal-kura tas-saħħa; l-espansjoni — iż-żieda fil-kapaċitajiet tal-cloud tad-data industrijali Ewropea u l-iżvilupp tal-aktar proċessuri b’saħħithom, avvanzati u sostenibbli; it-tiġdid u t-titjib tal-ħiliet — l-adattament tas-sistemi edukattivi biex jappoġġaw il-ħiliet diġitali u t-taħriġ edukattiv u vokazzjonali għall-etajiet kollha.

(17) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Aġġornament tal-Istrateġija Industrijali l-Ġdida tal-2020: Nibnu Suq Uniku aktar b’saħħtu għall-irkupru tal-Ewropa” (COM(2021) 350 final tal-5.5.2021).

(18) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Pjan ta’ Azzjoni għall-Bini ta’ Unjoni tas-Swieq Kapitali” (COM(2015) 468 final tat-30.9.2015).

(19) Ir-Regolament (UE) Nru 345/2013 tal-Parlament Ewropew u tal-Kunsill tas-17 ta’ April 2013 dwar fondi Ewropej ta’ kapital ta’ riskju (ĠU L 115, 25.4.2013, p. 1); Ir-Regolament (UE) 2017/1129 tal-Parlament Ewropew u tal-Kunsill tal-14 ta’ Ġunju 2017 dwar il-prospett li għandu jiġi ppubblikat meta titoli jiġu offruti lill-pubbliku jew jiġu ammessi għall-kummerċ f’suq regolat, u li jħassar id-Direttiva 2003/71/KE (ĠU L 168, 30.6.2017, p. 12); Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349) fir-rigward tal-iżvilupp tas-Swieq tat-Tkabbir tal-SMEs; Id-Direttiva 2011/61/UE tal-Parlament Ewropew u tal-Kunsill tat-8 ta’ Ġunju 2011 dwar Maniġers ta’ Fondi ta’ Investiment Alternattivi u li temenda d-Direttivi 2003/41/KE u 2009/65/KE u r-Regolamenti (KE) Nru 1060/2009 u (UE) Nru 1095/2010 (ĠU L 174, 1.7.2011, p. 1).

(20) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni “Unjoni tas-Swieq Kapitali għall-persuni u n-negozji — pjan ta’ azzjoni ġdid” (COM(2020) 590 final tal-24.9.2020).

(21) ĠU L 173, 12.6.2014, p. 349.

(22) L-istrumenti finanzjarji jkopru strumenti finanzjarji oħrajn li ma jinvolvux għotja, li jistgħu jieħdu l-forma ta’ strumenti ta’ dejn (self, garanziji) jew strumenti ta’ ekwità (ekwità pura, investimenti ta’ kważi-ekwità jew strumenti oħrajn tal-kondiviżjoni tar-riskju).

(23) Ir-Regolament (UE) Nru 1287/2013 tal-Parlament Ewropew u tal-Kunsill tal-11 ta’ Diċembru 2013 li jistabbilixxi Programm għall-Kompetittività tal-Intrapriżi u l-intrapriżi ż-żgħar u ta’ daqs medju (COSME) (2014 — 2020) u jħassar id-Deċiżjoni Nru 1639/2006/KE (ĠU L 347, 20.12.2013, p. 33).

(24) Ir-Regolament (UE) Nru 1291/2013 tal-Parlament Ewropew u tal-Kunsill tal-11 ta’ Diċembru 2013 li jistabbilixxi Orizzont 2020 — il-Programm Qafas għar-Riċerka u l-Innovazzjoni (2014–2020) u li jħassar id-Deċiżjoni Nru 1982/2006/KE (ĠU L 347, 20.12.2013, p. 104).

(25) Barra minn hekk, sabiex jiġi pprovdut aċċess aħjar għall-finanzjament tas-self, inħoloq Strument speċifiku għall-Kondiviżjoni tar-Riskji (RSI) b’mod konġunt mill-Kummissjoni, il-Fond Ewropew tal-Investiment u l-Bank Ewropew tal-Investiment, taħt is-Seba’ Programm Kwadru għall-Attivitajiet ta’ Riċerka (FP7), ara http://www.eif.org/what_we_do/guarantees/RSI/index.htm. L-RSI jipprovdi garanziji parzjali lill-intermedjarji finanzjarji permezz ta’ mekkaniżmu ta’ kondiviżjoni tar-riskji, b’hekk inaqqas ir-riskji finanzjarji tagħhom u jħeġġiġhom jipprovdu self lill-SMEs li jwettqu attivitajiet ta’ riċerka u żvilupp jew ta’ innovazzjoni.

(26) Ir-Regolament (UE) 2021/695 tal-Parlament Ewropew u tal-Kunsill tat-28 ta’ April 2021 li jistabbilixxi l-Orizzont Ewropa — il-Programm Qafas għar-Riċerka u l-Innovazzjoni, li jistabbilixxi r-regoli tiegħu għall-parteċipazzjoni u d-disseminazzjoni, u li jħassar ir-Regolamenti (UE) Nru 1290/2013 u (UE) Nru 1291/2013 (ĠU L 170, 12.5.2021, p. 1).

(27) L-Azzjoni ta’ Espansjoni Ewropea għall-Kapital ta’ Riskju (ESCALAR) hija programm pilota mnedija mill-Kummissjoni Ewropea u ġestita mill-FEI, bl-użu tar-riżorsi tal-Pjan ta’ Investiment għall-Ewropa biex jiġi indirizzat id-distakk fil-finanzjament esperjenzat minn kumpaniji Ewropej ta’ tkabbir għoli (negozji li qed jespandu). ESCALAR tnediet fl-4 ta’ April 2020 u hija maħsuba biex iżżid b’mod sostanzjali r-riżorsi tal-fondi, u b’hekk tippermetti tickets ta’ investiment akbar u toħloq kapaċità akbar għall-investimenti fin-negozji li qed jespandu.

(28) Fil-Linji Gwida Politiċi tagħha għall-Kummissjoni Ewropea li jmiss tal-2019–2024, il-Kandidata Presidenzjali Von der Leyen ħabbret il-ħolqien ta’ fond pubbliku-privat li jispeċjalizza fl-IPOs tal-SMEs bil-għan li jipprovdi appoġġ pubbliku fil-forma ta’ finanzjament biex jiġi ffaċilitat l-aċċess tal-SMEs b’potenzjal għoli għas-swieq pubbliċi.

(29) L-inizjattiva CASSINI, imħabbra għall-ewwel darba fl-“Istrateġija għall-SMEs għal Ewropa sostenibbli u diġitali” (COM(2020) 103 final tal-10.3.2020), hija ġabra ta’ azzjonijiet konkreti li l-għanijiet tagħhom jinkludu t-tnaqqis tal-aċċess għall-kapital ta’ riskju għall-SMEs ibbażati fuq l-ispazju biex jiffinanzjaw l-espansjoni tagħhom. Il-Fond għat-Tkabbir CASSINI se jiffunzjona bħala fond ta’ fondi b’mod simili għall-ISEP, billi jinvesti f’fondi ta’ kapital ta’ riskju li jimpenjaw ruħhom li jaġixxu bħala “fondi tematiċi”, jiġifieri li jinvestu fis-settur spazjali filwaqt li xorta jiddeċiedi b’mod awtonomu f’liema ditti speċifiċi jridu jinvestu. Il-Fond għat-Tkabbir CASSINI se jindirizza n-nuqqas ta’ kapital fl-istadju tal-espansjoni, li huwa magħruf sew li jaffettwa b’mod negattiv lill-SMEs spazjali ġodda fl-Unjoni.

(30) Ir-Regolament (UE) 2021/523 tal-Parlament Ewropew u tal-Kunsill tal-24 ta’ Marzu 2021 li jistabbilixxi l-Programm InvestEU u li jemenda r-Regolament (UE) 2015/1017 (ĠU L 107, 26.3.2021, p. 30). L-għan tal-Programm InvestEU huwa li jħeġġeġ il-parteċipazzjoni tal-investitur pubbliku u privat f’operazzjonijiet ta’ finanzjament u ta’ investiment billi jipprovdi garanziji mill-baġit tal-Unjoni biex jiġu indirizzati l-fallimenti u s-sitwazzjonijiet ta’ investiment subottimali. Dan jibni fuq is-suċċess tal-Fond Ewropew għall-Investimenti Strateġiċi (FEIS) li tnieda fl-2015 biex inaqqas id-diskrepanza fl-investiment fl-Unjoni wara l-kriżi finanzjarja u ekonomika.

(31) Ir-Regolament tal-Kummissjoni (UE) Nru 651/2014 tas-17 ta’ Ġunju 2014 li jiddikjara li ċerti kategoriji ta’ għajnuna huma kompatibbli mas-suq intern skont l-Artikoli 107 u 108 tat-Trattat (ĠU L 187, 26.6.2014, p. 1).

(32) Online disponibbli fuq: https://ec.europa.eu/competition/state_aid/modernisation/fitness_check_en.html

(33) Avviż tal-Kummissjoni dwar il-kunċett ta’ għajnuna mill-Istat kif imsemmi fl-Artikolu 107(1) tat-Trattat dwar il-Funzjonament tal-Unjoni Ewropea (ĠU C 262, 19.7.2016, p. 1).

(34) F’dak l-avviż, il-Kummissjoni tiċċara l-fehim tagħha ta’ kif jenħtieġ li jiġi interpretat il-kunċett ta’ għajnuna mill-Istat stabbilit fl-Artikolu 107(1) tat-Trattat. It-Taqsima 4.2 (“It-test tal-operatur tal-ekonomija tas-suq (OES)”) ta’ dak l-avviż tipprovdi gwida fir-rigward ta’ meta miżura ta’ appoġġ pubbliku ma tikkostitwixxix għajnuna mill-Istat minħabba l-fatt li titwettaq f’kundizzjonijiet normali tas-suq.

(35) Ara n-nota f’qiegħ il-paġna 34.

(36) Ir-Regolament tal-Kummissjoni (UE) Nru 1407/2013 tat-18 ta’ Diċembru 2013 dwar l-applikazzjoni tal-Artikoli 107 u 108 tat-Trattat dwar il-Funzjonament tal-Unjoni Ewropea għall-għajnuna de minimis (ĠU L 352, 24.12.2013, p. 1); Ir-Regolament tal-Kummissjoni (UE) Nru 1408/2013 tat-18 ta’ Dċiembru 2013 dwar l-applikazzjoni tal-Artikoli 107 u 108 tat-Trattat dwar il-Funzjonament tal-Unjoni Ewropea għall-għajnuna de minimis fis-settur tal-agrikoltura (ĠU L 352, 24.12.2013, p. 9); Ir-Regolament tal-Kummissjoni (UE) Nru 717/2014 tas-27 ta’ Ġunju 2014 dwar l-applikazzjoni tal-Artikoli 107 u 108 tat-Trattat dwar il-Funzjonament tal-Unjoni Ewropea għall-għajnuna de minimis fis-settur tas-sajd u tal-akkwakultura (ĠU L 190, 28.6.2014, p. 45).

(37) Il-Komunikazzjoni tal-Kummissjoni — Il-linji gwida dwar l-għajnuna mill-Istat għas-salvataġġ u r-ristrutturar ta’ impriżi mhux finanzjarji f’diffikultà (ĠU C 249, 31.7.2014, p. 1).

(38) Ara n-nota f’qiegħ il-paġna 34.

(39) Ara n-nota f’qiegħ il-paġna 36.

(40) Id-Direttiva 2014/24/UE tal-Parlament Ewropew u tal-Kunsill tas-26 ta’ Frar 2014 dwar l-akkwist pubbliku u li tħassar id-Direttiva 2004/18/KE (ĠU L 94, 28.3.2014, p. 65).

(41) Ir-Regolament (UE) Nru 1303/2013 tal-Parlament Ewropew u tal-Kunsill li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347, 20.12.2013, p. 320).

(42) Ir-Regolament (UE) 2021/1060 tal-Parlament Ewropew u tal-Kunsill tal-24 ta’ Ġunju 2021 li jistipula dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew Plus, il-Fond ta’ Koeżjoni, il-Fond għal Tranżizzjoni Ġusta u l-Fond Ewropew għall-Affarijiet Marittimi, is-Sajd u l-Akkwakultura u r-regoli finanzjarji għalihom u għall-Fond għall-Ażil, il-Migrazzjoni u l-Integrazzjoni, il-Fond għas-Sigurtà Interna u l-Istrument għall-Appoġġ Finanzjarju għall-Ġestjoni tal-Fruntieri u l-Politika dwar il-Viżi (ĠU L 231, 30.6.2021, p. 159).

(43) Id-Deċiżjoni ta’ Implimentazzjoni tal-Kummissjoni C(2017)7124 tas-27 ta’ Ottubru 2017 dwar l-adozzjoni tal-programm ta’ ħidma għall-2018-2020 fil-qafas tal-Programm Speċifiku li jimplimenta Orizzont 2020 — il-Programm Qafas għar-Riċerka u l-Innovazzjoni (2014-2020) u dwar il-finanzjament tal-programm ta’ ħidma għall-2018.

(44) L-objettivi tal-inizjattiva CASSINI jinkludu: 1) li jiżdied l-għadd ta’ negozji ġodda bbażati fuq l-ispazju li jiżviluppaw soluzzjonijiet innovattivi bl-użu tat-teknoloġiji spazjali tal-Unjoni, 2) ir-rata ta’ suċċess tagħhom fl-istabbiliment ta’ kumpaniji, u 3) l-iffaċilitar tal-aċċess għall-SMEs ibbażati fuq l-ispazju għall-kapital ta’ riskju. L-azzjonijiet ta’ CASSINI ikopru ċ-ċiklu intraprenditorjali kollu u huma mmirati, mit-tfassil, lejn l-għażla tal-ideat kummerċjali l-aktar innovattivi u kompetittivi (jiġifieri l-kuntratturi esterni japplikaw kriterji ggwidati mis-suq biex jipprovdu mentoraġġ u aċċellerazzjoni, u l-investituri ta’ kapital ta’ riskju li jiġġestixxu l-fondi tematiċi spazjali jiddeċiedu b’mod awtonomu biex jagħżlu l-proġetti li jixtiequ jinvestu fihom). Ara wkoll in-nota f’qiegħ il-paġna 29.

(45) B’deroga mill-punt (c), l-intrapriżi ffurmati permezz ta’ fużjoni bejn impriżi eliġibbli għall-għajnuna skont dawn il-Linji Gwida għandhom ukoll jitqiesu bħala impriżi eliġibbli sa ħames snin mid-data tar-reġistrazzjoni tal-eqdem intrapriża li tipparteċipa fil-fużjoni.

(46) Ara s-sentenzi tal-Qorti tad-19 ta’ Settembru 2000, Il-Ġermanja v Il-Kummissjoni, Kawża C-156/98, ECLI:EU:C:2000:467, il-punt 78; tat-22 ta’ Diċembru 2008, Régie Networks vs Rhone Alpes Bourgogne, Kawża C-333/07, ECLI:EU:C:2008:764, il-punti 94 sa 116; tal-15 ta’ April 2008, Nuova Agricast, Kawża C-390/06 ECLI:EU:C:2008:224, il-punti 50 u 51; u tat-22 ta’ Settembru 2020, Austria v Commission, Kawża C-594/18 P, ECLI:EU:C:2020:742, il-punt 44.

(47) Dan huwa mingħajr preġudizzju għar-rekwiżit għall-intermedjarji finanzjarji jew għall-maniġers tagħhom li jkollhom il-liċenzja meħtieġa biex iwettqu investiment u attivitajiet ta’ ġestjoni fl-Istat Membru kkonċernat jew għall-benefiċjarji finali li jkollhom stabbiliment u li jwettqu attivitajiet ekonomiċi fit-territorju tagħhom.

(48) F’konformità mal-programm ta’ ħidma ta’ Orizzont 2020 għall-2018-2020 (ara n-nota 24 f’qiegħ il-paġna) jew mal-Artikoli 2(23) u 15(2) tar-Regolament (UE) 2021/695 (ara n-nota 26 f’qiegħ il-paġna).

(49) F’konformità mal-Artikolu 48 tar-Regolament (UE) 2021/695 (ara n-nota 26 f’qiegħ il-paġna).

(50) Ara n-nota 7 f’qiegħ il-paġna għal eżempji ta’ innovazzjoni soċjali. Il-karattru innovattiv ta’ SME għandu jiġi evalwat fid-dawl tad-definizzjoni stabbilita fl-Artikolu 2 tar-Regolament għall-Eżenzjoni Ġenerali Sħiħa.

(51) Il-Kummissjoni tirrikonoxxi l-importanza dejjem akbar tal-pjattaformi ta’ finanzjament kollettiv sabiex jiġi attirat il-finanzjament għall-kumpaniji ġodda. Għalhekk, jekk ikun hemm falliment stabbilit tas-suq u fil-każijiet fejn pjattaforma ta’ finanzjament kollettiv ikollha operatur li jkun entità ġuridika separata, il-Kummissjoni tista’ tapplika, permezz ta’ analoġija, ir-regoli applikabbli għall-pjattaformi ta’ negozjar alternattivi. Dan japplika bl-istess mod għall-inċentivi fiskali biex isir investiment permezz ta’ tali pjattaformi ta’ finanzjament kollettiv. Fl-10 ta’ Novembru 2020, daħal fis-seħħ ir-Regolament (UE) 2020/1503 tal-Parlament Ewropew u tal-Kunsill tas-7 ta’ Ottubru 2020 dwar fornituri Ewropej ta’ servizzi ta’ finanzjament kollettiv għan-negozji, u li jemenda r-Regolament (UE) 2017/1129 u d-Direttiva (UE) 2019/1937 (ĠU L 347, 20.10.2020, p. 1). Huwa mistenni li dan se jżid id-disponibbiltà tal-finanzjament kollettiv bħala forma innovattiva ta’ finanzjament.

(52) Dan jinkludi n-negozji ġodda u l-SMEs kollha li għadhom ma għamlux l-ewwel bejgħ kummerċjali tagħhom (kif definit fil-punt 12 tal-paragrafu 35 ta’ dawn il-Linji Gwida).

(53) Mekkaniżmu ta’ rkupru jew mekkaniżmu kuntrattwali ekwivalenti jfisser arranġament li skontu, intermedjarju jrid jirritorna vantaġġ miksub mill-Istat li jkun naqas milli jgħaddi lill-benefiċjarju finali kif meħtieġ.

(54) Biex jiġi evitat id-dubju u f’konformità mal-Artikolu 21 tar-Regolament għall-Eżenzjoni Ġenerali Sħiħa, għall-investimenti ta’ ekwità u kważi ekwità, mhux aktar minn 30 % tal-kontribuzzjonijiet kapitali aggregati tal-intermedjarju finanzjarju u l-kapital impenjat mhux imħallas jistgħu jintużaw għal skopijiet ta’ ġestjoni tal-likwidità.

(55) Redditu massimu għall-investitur pubbliku b’ċerta rata minima definita minn qabel: jekk ir-rata ta’ redditu definita minn qabel tinqabeż, ir-redditi kollha ’l fuq mir-rata jitqassmu lill-investituri privati biss.

(56) Opzjonijiet eżerċitabbli fuq l-ishma pubbliċi: l-investituri privati jingħataw id-dritt li jeżerċitaw opzjoni eżerċitabbli biex jakkwistaw is-sehem tal-investiment pubbliku bi prezz tal-eżerċitar li jsir qbil dwaru minn qabel.

(57) Qsim tal-flus minħabba introjtu asimmetriku: il-flus jittieħdu kemm mill-investituri pubbliċi kif ukoll privati fuq bażi ta’ pari passu, iżda r-redditi jiġu kondiviżi, kull meta jirriżultaw, b’mod asimmetriku. L-investituri privati jirċievu sehem akbar tar-rikavat tad-distribuzzjoni minn dak li jenħtieġ li jirċievu skont il-parteċipazzjonii rispettiva tagħhom, sar-rata minima definita minn qabel.

(58) Għall-miżuri li huma identiċi għal miżuri fi ħdan il-Pjanijiet għall-Irkupru u r-Reżiljenza kif approvati mill-Kunsill, din il-kundizzjoni titqies bħala ssodisfata, peress li l-konformità tagħhom mal-prinċipju “La tagħmilx ħsara sinifikanti” diġà ġiet ivverifikata.

(59) F’konformità mal-Artikolu 48 tar-Regolament (UE) 2021/695 (ara n-nota 26 f’qiegħ il-paġna).

(60) Dan jista’ jkun ukoll il-każ fejn l-għajnuna tfixkel it-tħaddim ta’ strumenti ekonomiċi stabbiliti biex jinternalizzaw tali esternalitajiet negattivi (eż. billi taffettwa s-sinjali tal-prezzijiet mogħtija mill-Iskema tal-Unjoni għall-Iskambju ta’ Kwoti tal-Emissjonijiet jew strument simili).

(61) “Tiftix Pubbliku dwar it-Trasparenza tal-Għajnuna mill-Istat”, disponibbli fuq is-sit web li ġej: https://webgate.ec.europa.eu/competition/transparency/public?lang=mt

(62) F’każ li ma jkunx jeżisti rekwiżit formali għal dikjarazzjoni annwali, għal finijiet ta’ kkowdjar, id-data tal-għoti għandha titqies bħala l-31 ta’ Diċembru tas-sena li fiha tkun ingħatat l-għajnuna.

(63) Id-dokument ta’ ħidma tal-persunal tal-Kummissjoni, Common methodology for State aid evaluation (Metodoloġija komuni għall-evalwazzjoni tal-għajnuna mill-Istat) (SWD(2014) 179 final tat-28.5.2014).

(64) Ir-Regolament tal-Kunsill (UE) 2015/1589 tat-13 ta’ Lulju 2015 li jistabblixxi regoli dettaljati għall-applikazzjoni tal-Artikolu 108 tat-Trattat dwar il-Funzjonament tal-Unjoni Ewropea (ĠU L 248, 24.9.2015, p. 9).

(65) Ir-Regolament tal-Kummissjoni (KE) Nru 794/2004 tal-21 ta’ April 2004 li jimplimenta r-Regolament tal-Kunsill (UE) 2015/1589 li jistabblixxi regoli dettaljati għall-applikazzjoni tal-Artikolu 108 tat-Trattat dwar il-Funzjonament tal-Unjoni Ewropea (ĠU L 140, 30.4.2004, p. 1).

ANNESS

Informazzjoni dwar it-trasparenza

L-informazzjoni dwar l-għotjiet individwali msemmija fil-paragrafu 180, il-punt (b) hija din li ġejja:

—

L-identità tal-benefiċjarju tal-għajnuna individwali (1):

—

Isem

—	L-identifikatur tal-benefiċjarju tal-għajnuna

—

It-tip ta’ impriża benefiċjarja tal-għajnuna fiż-żmien tal-applikazzjoni:

—

SME

—	Intrapriża kbira

—	Ir-reġjun li fih jinsab il-benefiċjarju tal-għajnuna, fil-livell II tan-NUTS jew inqas

—	Is-settur jew l-attività prinċipali tal-benefiċjarju tal-għajnuna għall-għajnuna partikolari, identifikata mill-grupp NACE (kodiċi numeriku bi tliet ċifri) (2)

—	Element ta’ għajnuna espress bis-sħiħ fil-munita nazzjonali

—	Meta jkun differenti mill-element ta’ għajnuna, l-ammont nominali tal-għajnuna, espress bis-sħiħ fil-munita nazzjonali (3)

—

L-istrument għall-għajnuna (4):

—	Għotja/sussidju fuq ir-rata tal-imgħax/tħassir tad-dejn

—	Self/self bil-quddiem li jitħallas lura/għotja rimborżabbli

—

Garanzija

—	Benefiċċju fuq it-taxxa jew eżenzjoni mit-taxxa

—	Finanzjament ta’ riskju

—	Oħrajn (jekk jogħġbok speċifika)

—	Id-data tal-għoti u d-data tal-pubblikazzjoni

—	Objettiv tal-għajnuna

—	L-identità tal-awtorità jew tal-awtoritajiet awtorizzanti

—	Fejn applikabbli, l-isem tal-entità fdata, u l-ismijiet tal-intermedjarji finanzjarji magħżula

—	Referenza tal-miżura ta’ għajnuna (5)

(1) Bl-eċċezzjoni ta’ sigrieti kummerċjali u informazzjoni kunfidenzjali oħra f’każijiet debitament ġustifikati u soġġett għall-qbil tal-Kummissjoni (Komunikazzjoni tal-Kummissjoni C(2003) 4582 tal-1 ta’ Diċembru 2003 dwar is-segretezza professjonali f’deċiżjonijiet dwar l-għajnuna mill-Istat (ĠU C 297, 9.12.2003, p. 6).

(2) Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi l-klassifikazzjoni ta’ l-istatistika ta’ attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi ta’ l-istatistika (ĠU L 393, 30.12.2006, p. 1).

(3) Ekwivalenti ta’ għotja gross, jew fejn applikabbli, l-ammont tal-investiment. Fil-każ ta’ għajnuna operatorja, jista’ jingħata l-ammont annwali ta’ għajnuna għal kull benefiċjarju. Fil-każ ta’ skemi fiskali dan l-ammont jista’ jingħata skont il-meded stabbiliti fil-paragrafu 182. L-ammont li għandu jiġi ppubblikat huwa l-ogħla benefiċċju tat-taxxa permess u mhux l-ammont imnaqqas ta’ kull sena (eż. fil-kuntest ta’ kreditu ta’ taxxa għandu jiġi ppubblikat l-ogħla kreditu ta’ taxxa permess u mhux l-ammont effettiv li jista’ jiddependi fuq id-dħul taxxabbli u li jista’ jvarja kull sena).

(4) Jekk l-għajnuna tingħata permezz ta’ diversi strumenti ta’ għajnuna, għandu jingħata l-ammont tal-għajnuna għal kull strument.

(5) Kif previst mill-Kummissjoni skont il-proċedura ta’ notifika msemmija fit-Taqsima 2.2.

		ISSN 1977-0987
Il-Ġurnal Uffiċjali tal-Unjoni Ewropea		C 508

Edizzjoni bil-Malti	Informazzjoni u Avviżi	Volum 64 16 ta' Diċembru 2021

Werrej		Paġna
	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2021/C 508/01	Komunikazzjoni tal-Kummissjoni — Linji Gwida dwar l-għajnuna mill-Istat biex tippromwovi investimenti ta’ finanzjament ta’ riskju	1