RAKKOMANDAZZJONI TAL-BANK ĊENTRALI EWROPEW

tad-29 ta’ Settembru 2021

lill-Kunsill tal-Unjoni Ewropea dwar l-awdituri esterni ta’ Central Bank of Ireland

(BĊE/2021/44)

(2021/C 403/01)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra l-Istatut tas-Sistema Ewropea ta’ Banek Ċentrali u tal-Bank Ċentrali Ewropew, u b’mod partikolari l-Artikolu 27.1 tiegħu,

Billi:

(1)	Il-kontijiet tal-Bank Ċentrali Ewropew (BĊE) u tal-banek ċentrali nazzjonali tal-Istati Membri li l-munita tagħhom hija l-euro huma awditjati minn awdituri esterni indipendenti rrakkomandati mill-Kunsill Governattiv tal-BĊE u approvati mill-Kunsill tal-Unjoni Ewropea.

(2)	Fl-2016, Central Bank of Ireland għażel lil Mazars bħala l-awdituri esterni tiegħu għas-snin finanzjarji 2016 sa 2020.

(3)	Il-mandat tal-awdituri esterni kurrenti ta’ Central Bank of Ireland, Mazars, intemm wara l-awditu għas-sena finanzjarja 2020. Għalhekk jenħtieġ li jinħatru awdituri esterni għas-snin finanzjarji 2021 u 2022.

(4)	Central Bank of Ireland biħsiebu jestendi l-mandat ta’ Mazars għas-snin finanzjarji 2021 u 2022,

ADOTTA DIN IR-RAKKOMANDAZZJONI:

Huwa rrakkomandat illi Mazars għandhom jinħatru bħala l-awdituri esterni ta’ Central Bank of Ireland għas-snin finanzjarji 2021 sa 2022.

Ebda oppożizzjoni għal konċentrazzjoni notifikata

(Il-Każ M.10419 — Brookfield/Telia Company/Telia Towers)

(Test b’rilevanza għaż-ŻEE)

(2021/C 403/02)

Fit 28 ta’ Settembru 2021, il-Kummissjoni ddeċidiet li ma topponix il-konċentrazzjoni notifikata msemmija hawn fuq u li tiddikjaraha kompatibbli mas-suq intern. Din id-deċiżjoni hi bbażata fuq l-Artikolu 6(1)(b) tar-Regolament tal-Kunsill (KE) Nru 139/2004 (1). It-test sħiħ tad-deċiżjoni hu disponibbli biss fl-Ingliż u ser isir pubbliku wara li jitneħħa kwalunkwe sigriet tan-negozju li jista’ jkun fih. Dan it-test jinstab:

—

fit-taqsima tal-amalgamazzjoni tal-websajt tal-Kummissjoni dwar il-Kompetizzjoni (http://ec.europa.eu/competition/mergers/cases/). Din il-websajt tipprovdi diversi faċilitajiet li jgħinu sabiex jinstabu d-deċiżjonijiet individwali ta’ amalgamazzjoni, inklużi l-kumpanija, in-numru tal-każ, id-data u l-indiċi settorjali,

—	f’forma elettronika fil-websajt EUR-Lex (http://eur-lex.europa.eu/homepage.html?locale=mt) fid-dokument li jġib in-numru 32021M10419. Il-EUR-Lex hu l-aċċess fuq l-internet għal-liġi Ewropea.

---

(1)  ĠU L 24, 29.1.2004, p. 1.

Ebda oppożizzjoni għal konċentrazzjoni notifikata

(Il-Każ M.10414 — Apollo Management/AS Graanul)

(Test b’rilevanza għaż-ŻEE)

(2021/C 403/03)

Fit 16 ta’ Settembru 2021, il-Kummissjoni ddeċidiet li ma topponix il-konċentrazzjoni notifikata msemmija hawn fuq u li tiddikjaraha kompatibbli mas-suq intern. Din id-deċiżjoni hi bbażata fuq l-Artikolu 6(1)(b) tar-Regolament tal-Kunsill (KE) Nru 139/2004 (1). It-test sħiħ tad-deċiżjoni hu disponibbli biss fl-Ingliż u ser isir pubbliku wara li jitneħħa kwalunkwe sigriet tan-negozju li jista’ jkun fih. Dan it-test jinstab:

—

fit-taqsima tal-amalgamazzjoni tal-websajt tal-Kummissjoni dwar il-Kompetizzjoni (http://ec.europa.eu/competition/mergers/cases/). Din il-websajt tipprovdi diversi faċilitajiet li jgħinu sabiex jinstabu d-deċiżjonijiet individwali ta’ amalgamazzjoni, inklużi l-kumpanija, in-numru tal-każ, id-data u l-indiċi settorjali,

—	f’forma elettronika fil-websajt EUR-Lex (http://eur-lex.europa.eu/homepage.html?locale=mt) fid-dokument li jġib in-numru 32021M10414. Il-EUR-Lex hu l-aċċess fuq l-internet għal-liġi Ewropea.

---

(1)  ĠU L 24, 29.1.2004, p. 1.

Rata tal-kambju tal-euro (1)

Il-5 ta’ Ottubru 2021

(2021/C 403/04)

1 euro =

	Munita	Rata tal-kambju
USD	Dollaru Amerikan	1,1602
JPY	Yen Ġappuniż	128,99
DKK	Krona Daniża	7,4379
GBP	Lira Sterlina	0,85173
SEK	Krona Żvediża	10,1310
CHF	Frank Żvizzeru	1,0752
ISK	Krona Iżlandiża	148,00
NOK	Krona Norveġiża	9,9155
BGN	Lev Bulgaru	1,9558
CZK	Krona Ċeka	25,308
HUF	Forint Ungeriż	356,90
PLN	Zloty Pollakk	4,5998
RON	Leu Rumen	4,9477
TRY	Lira Turka	10,2707
AUD	Dollaru Awstraljan	1,5937
CAD	Dollaru Kanadiż	1,4612
HKD	Dollaru ta’ Hong Kong	9,0324
NZD	Dollaru tan-New Zealand	1,6650
SGD	Dollaru tas-Singapor	1,5743
KRW	Won tal-Korea t’Isfel	1 376,12
ZAR	Rand ta’ l-Afrika t’Isfel	17,3792
CNY	Yuan ren-min-bi Ċiniż	7,4805
HRK	Kuna Kroata	7,5050
IDR	Rupiah Indoneżjan	16 506,62
MYR	Ringgit Malażjan	4,8482
PHP	Peso Filippin	58,893
RUB	Rouble Russu	84,1541
THB	Baht Tajlandiż	39,203
BRL	Real Brażiljan	6,3106
MXN	Peso Messikan	23,7904
INR	Rupi Indjan	86,4880

---

(1)  Sors: rata tal-kambju ta’ referenza ppubblikata mill-Bank Ċentrali Ewropew.

Sommarju tal-Opinjoni tal-Kontrollur Ewropew għall-Protezzjoni tad-Data dwar il-Proposta għal Direttiva dwar il-krediti għall-konsumatur

(It-test sħiħ ta’ din l-Opinjoni jinsab bl-Ingliż, bil-Franċiż u bil-Ġermaniz fuq is-sit web tal-EDPS www.edps.europa.eu)

(2021/C 403/05)

Il-Kummissjoni Ewropea adottat fit-30 ta’ Ġunju 2021 Proposta għal Direttiva dwar il-krediti għall-konsumatur. Il-Proposta għandha l-għan li tissostitwixxi d-Direttiva 2008/48/KE dwar ftehim ta’ kreditu għall-konsumatur u li tadatta r-regoli attwali għad-diġitalizzazzjoni kontinwa tas-suq u tendenzi oħra (l-operaturi ġodda, bħal pjattaformi ta’ self bejn il-pari u forom ġodda ta’ kreditu għall-konsumatur, bħal self għal żmien qasir bi prezz għoli).

L-EDPS jilqa’ l-għan li tissaħħaħ il-protezzjoni tal-konsumatur u jfakkar fir-relazzjoni ta’ komplementarjetà bejn il-konsumatur u l-protezzjoni tad-data. Il-Proposta għandha impatt ċar fuq il-protezzjoni tad-drittijiet u l-libertajiet tal-individwi fir-rigward tal-ipproċessar tad-data personali, b’mod partikolari fid-dawl tad-dispożizzjonijiet dwar il-valutazzjoni tal-affidabbiltà kreditizja, l-offerti personalizzati abbażi tal-ipproċessar awtomatizzat u l-użu tad-data personali fil-kuntest ta’ attivitajiet ta’ konsulenza u attivitajiet oħra.

Biex jippromwovi l-aċċess ġust għall-kreditu u l-protezzjoni tad-data, l-EDPS jirrakkomanda li jiġu delineati b’mod ċar il-kategoriji u s-sorsi tad-data personali li jistgħu jintużaw għall-iskop ta’ valutazzjoni tal-affidabbiltà kreditizja. B’mod partikolari, l-EDPS jistieden lil-leġiżlatur biex jistinka għal aktar protezzjoni u armonizzazzjoni tal-konsumatur billi jispeċifika b’mod ċar il-kategoriji ta’ data li għandhom u ma għandhomx jiġu pproċessati. L-EDPS jirrakkomanda wkoll li jiġi pprojbit b’mod espliċitu l-użu ta’ kwalunkwe kategorija speċjali ta’ data personali skont l-Artikolu 9 tal-GDPR.

B’kont meħud tal-konsegwenzi avversi possibbli għall-persuni kkonċernati, l-EDPS jikkunsidra li r-rekwiżiti, ir-rwol u r-responsabbiltajiet tal-bażijiet tad-data tal-kreditu jew partijiet terzi li jipprovdu “sistema ta’ evalwazzjoni ta’ kreditu” għandhom jiġu indirizzati. Aktar kjarifiki għandhom jiġu pprovduti wkoll rigward is-sitwazzjonijiet fejn il-konsultazzjoni ta’ sorsi esterni hija meħtieġa u proporzjonata.

Il-konsumaturi għandhom dejjem jirċievu informazzjoni sinifikanti minn qabel kull meta l-valutazzjoni tal-affidabbiltà kreditizja tagħhom tkun ibbażata fuq ipproċessar awtomatizzat. Fejn il-valutazzjoni tal-affidabbiltà kreditizja tinvolvi l-użu ta’ tfassil ta’ profil jew ipproċessar awtomatizzat ieħor ta’ data personali, il-konsumaturi għandhom ikunu jistgħu jitolbu u jiksbu valutazzjoni umana.

Fir-rigward ta’ offerti personalizzati abbażi tal-ipproċessar awtomatizzat, l-EDPS jirrakkomanda li jiġi introdott l-obbligu għall-kreditur li jipprovdi informazzjoni ċara, sinifikanti u uniformi dwar il-parametri użati biex jiġi ddeterminat il-prezz. Barra minn hekk, l-EDPS jinkoraġġixxi lil-leġiżlatur biex jiddelinea b’mod ċar il-kategoriji tad-data personali li jistgħu jintużaw bħala parametri biex titfassal offerta personalizzata.

L-EDPS jirrakkomanda li tiġi kkonfermata b’mod espliċitu l-applikabbiltà sħiħa tar-Regolament 2016/679 (il-“GDPR”) għal kwalunkwe proċessar ta’ data personali li jaqa’ fil-kamp ta’ applikazzjoni tal-Proposta. Wara li kkunsidra l-Proposta għal Att dwar l-Intelliġenza Artifiċjali, l-EDPS jirrakkomanda li jiġi żgurat li r-regoli rilevanti tal-kreditu għall-konsumatur u tal-protezzjoni tad-data jkunu integrati bħala parti mill-proċess ta’ valutazzjoni tal-konformità (ta’ parti terza) qabel il-markatura CE.

1.   Sfond

1.

Il-Kummissjoni Ewropea adottat fit-30 ta’ Ġunju 2021 Proposta għal Direttiva dwar il-krediti għall-konsumatur (il-“Proposta”) (1). Il-Proposta għandha l-għan li timmodernizza r-regoli tal-kreditu għall-konsumatur sabiex tindirizza l-bidliet ikkawżati mid-diġitalizzazzjoni (2) u tħassar id-Direttiva 2008/48/KE dwar ftehim ta’ kreditu għall-konsumatur. (3)

2.

Il-Proposta ssegwi evalwazzjoni REFIT, li sabet li l-objettivi tad-Direttiva 2008/48/KE, jiġifieri l-iżgurar ta’ standards għoljin ta’ protezzjoni tal-konsumatur u t-trawwim tal-iżvilupp ta’ suq intern għall-kreditu, għadhom rilevanti. Fl-istess ħin, sabet li x-xenarju regolatorju jibqa’ frammentat b’mod sinifikanti madwar l-UE u li l-kliem mhux preċiż ta’ xi dispożizzjonijiet tad-Direttiva jwassal għal inċertezza legali, li jfixkel il-funzjonament tajjeb tas-suq intern għall-kreditu għall-konsumatur kif ukoll ma jiggarantixxix livell konsistentement għoli ta’ protezzjoni tal-konsumatur (4).

3.

F’dan l-isfond, il-Proposta għandha l-għan li ssaħħaħ il-protezzjoni tal-konsumatur billi tindirizza n-nuqqasijiet rigward il-kamp ta’ applikazzjoni tad-Direttiva 2008/48/KE, ittejjeb u tarmonizza l-obbligu li tipprovdi informazzjoni u spjegazzjonijiet adegwati lill-konsumaturi, billi tistabbilixxi salvagwardji relatati, fost oħrajn, mar-rata tal-imgħax u l-kost tal-kreditu, u tippromwovi l-edukazzjoni finanzjarja.

4.

L-EDPS jirrimarka li l-Proposta se jkollha impatt ċar fuq il-protezzjoni tad-data, b’mod partikolari fid-dawl tad-dispożizzjonijiet tagħha dwar: ir-reklamar u l-kummerċjalizzazzjoni ta’ ftehim ta’ kreditu (l-Artikolu 7); l-offerti personalizzati abbażi tal-ipproċessar awtomatizzat (l-Artikolu 13); l-obbligu li tiġi vvalutata l-affidabbiltà kreditizja tal-konsumatur (l-Artikolu 18), li jista’ jeħtieġ il-konsultazzjoni tal-bażijiet tad-data rilevanti (l-Artikolu 18(9)), ospitati wkoll fi Stat Membru għajr dak tal-kreditur f’każ ta’ servizzi ta’ kreditu transfruntiera (l-Artikolu 19); is-servizzi ta’ konsulenza (l-Artikolu 16); l-attivitajiet elenkati taħt ittri minn (a) sa (e) tal-Artikolu 32(1).

5.

Fl-1 ta’ Lulju 2021, il-Kummissjoni Ewropea talbet lill-EDPS biex joħroġ opinjoni dwar il-Proposta, f’konformità mal-Artikolu 42(1) tar-Regolament (UE) 2018/1725. Dawn il-kummenti huma limitati għad-dispożizzjonijiet tal-Proposta li huma rilevanti mill-perspettiva tal-protezzjoni tad-data.

4.   Konklużjonijiet

Fid-dawl ta’ dan ta’ hawn fuq, l-EDPS:

—	jilqa’ l-għan segwit mill-Proposta li tissaħħaħ il-protezzjoni tal-konsumatur biex jiġu indirizzati r-riskji maħluqa mid-diġitalizzazzjoni tal-kreditu għall-konsumatur;

—	ifakkar fir-relazzjoni ta’ komplementarjetà bejn il-konsumatur u l-protezzjoni tad-data, u r-rwol importanti li jista’ jkollha din tal-aħħar ukoll f’termini ta’ awtonomizzazzjoni tal-konsumatur;

—

jirrakkomanda li jiġu delineati aktar il-kategoriji tad-data li jistgħu jintużaw jew ma jistgħux jintużaw għall-iskop ta’ valutazzjoni tal-affidabbiltà kreditizja u biex jiġi projbit b’mod espliċitu l-użu ta’ kwalunkwe kategorija speċjali ta’ data personali skont l-Artikolu 9 tal-GDPR fil-parti operattiva tal-Proposta;

—	jirrakkomanda li tingħata indikazzjoni aktar ċara ta’ liema sorsi esterni jistgħu jitqiesu bħala “rilevanti” fil-kuntest tal-valutazzjoni tal-affidabbiltà kreditizja;

—

jirrakkomanda li jiġu indirizzati r-rekwiżiti, ir-rwol u r-responsabbiltajiet tal-bażijiet tad-data tal-kreditu jew partijiet terzi li jipprovdu “sistema ta’ evalwazzjoni ta’ kreditu”, flimkien ma’ aktar kjarifiki rigward is-sitwazzjonijiet fejn il-konsultazzjoni ta’ tali sorsi esterni hija meħtieġa u proporzjonata;

—	jirrakkomanda li jiġi miżjud skont l-Artikolu 18(3) tal-Proposta li l-proċeduri għall-valutazzjoni tal-affidabbiltà kreditizja għandhom jinkludu proċedura ta’ kontroll tal-kwalità tad-data;

—

jirrakkomanda li jiġi sostitwit it-terminu “intervent” [uman] b’ “valutazzjoni” fl-Artikolu 18(6) u l-premessa 48 tal-Proposta. Barra minn hekk, l-EDPS jirrakkomanda li jiġi żgurat li l-konsumatur ikun infurmat fejn il-valutazzjoni tal-affidabbiltà kreditizja tkun ibbażata fuq ipproċessar awtomatizzat fil-każijiet kollha (jiġifieri, mhux biss fil-każ ta’ rifjut tal-applikazzjoni għas-self);

—

jilqa’ l-obbligu li l-konsumaturi jiġu infurmati li huma ppreżentati b’offerta personalizzata. Madankollu, l-EDPS jirrakkomanda li jiżdied obbligu li tiġi pprovduta informazzjoni ċara, sinifikanti u uniformi dwar il-parametri użati biex jiġi ddeterminat il-prezz u biex jiġu delineati b’mod ċar il-kategoriji ta’ data personali li jistgħu jintużaw bħala parametri biex titfassal offerta personalizzata;

—

jilqa’ d-dritt tal-konsumatur li jkun infurmat bir-riżultat ta’ konsultazzjoni tal-bażi tad-data mwettqa bl-iskop li tiġi vvalutata l-affidabbiltà kreditizja tiegħu jew tagħha. Madankollu, l-EDPS jirrakkomanda li jkun ipprovdut l-obbligu li l-applikant jiġi infurmat bil-quddiem dwar tali konsultazzjoni. L-EDPS jirrakkomanda wkoll l-armonizzazzjoni tal-kategoriji ta’ informazzjoni li jistgħu jkunu fil-bażijiet tad-data għall-valutazzjoni tal-affidabbiltà kreditizja;

—	jirrakkomanda li fil-Proposta jiġi speċifikat li l-użu ta’ data miġbura u pproċessata fil-kuntest tal-valutazzjoni tal-affidabbiltà kreditizja għal skopijiet ta’ reklamar u kummerċjalizzazzjoni ma għandux ikun permess;

—

jirrakkomanda li jiġi delineat aktar fil-Proposta liema informazzjoni rigward is-sitwazzjoni finanzjarja tal-konsumatur, il-preferenzi u l-objettivi relatati mal-ftehim ta’ kreditu jew is-servizzi ta’ finanzjament kollettiv jistgħu jiġu kkunsidrati bħala “strettament meħtieġa” għall-iskop li jiġu pprovduti servizzi ta’ konsulenza u l-attivitajiet elenkati skont l-Artikolu 32(1) tal-Proposta;

—	jirrakkomanda li jiġu inklużi dispożizzjoni u premessa korrispondenti dwar l-applikabbiltà tal-GDPR fil-kuntest tal-Proposta, u notevolment għall-ipproċessar tad-data personali mill-kredituri u l-fornituri tas-servizzi ta’ finanzjament kollettiv;

—

ifakkar fil-ħtieġa għall-integrazzjoni tar-rekwiżiti skont il-liġi dwar il-protezzjoni tad-data u l-leġiżlazzjoni dwar il-kreditu għall-konsumatur fir-rekwiżiti skont l-Att dwar l-Intelliġenza Artifiċjali propost, b’mod partikolari fil-kuntest taċ-ċertifikazzjoni tas-sistemi tal-IA użati għall-valutazzjoni tal-affidabbiltà kreditizja, notevolment bħala parti mill- proċess ta’ valutazzjoni tal-konformità (ta’ parti terza) qabel il-markatura CE.

---

(1)  Proposta għal Direttiva tal-Parlament Ewropew u tal-Kunsill dwar il-krediti għall-konsumatur, 30 ta’ Ġunju 2021, 2021/0171 (COD).

(2)  Ara l-paġna 3 tal-Memorandum ta’ Spjegazzjoni.

(3)  Direttiva 2008/48/KE tal-Parlament Ewropew u tal-Kunsill tat-23 ta’ April 2008 dwar ftehim ta’ kreditu għall-konsumatur u li tħassar id-Direttiva tal-Kunsill 87/102/KEE (ĠU L 133, 22.5.2008, p. 66).

(4)  Ara l-paġna 1 tal-Memorandum ta’ Spjegazzjoni.