KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

7.7.2021

Il-Ġurnal Uffiċjali tal-Unjoni Ewropea

C 269/10

Pubblikazzjoni tad-dokument uniku emendat skont l-approvazzjoni ta’ emenda minuri f’konformità mal-Artikolu 53(2), it-tieni subparagrafu tar-Regolament (UE) Nru 1151/2012

(2021/C 269/08)

Il-Kummissjoni Ewropea approvat din l-emenda minuri f’konformità mal-Artikolu 6(2), it-tielet subparagrafu tar-Regolament Delegat tal-Kummissjoni (UE) Nru 664/2014 (1).

It-talba għall-approvazzjoni ta’ din l-emenda minuri tista’ tiġi kkonsultat fil-bażi tad-data eAmbrosia tal-Kummissjoni.

DOKUMENT UNIKU

“Salzwedeler Baumkuchen”

Nru tal-UE: PGI-DE-0733-AM01 — 27 ta’ Mejju 2020

DOP ( ) IĠP (X)

1. Isem/Ismijiet

“Salzwedeler Baumkuchen”

2. Stat Membru jew pajjiż terz

Il-Ġermanja

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott

Klassi 2.3. Ħobż, għaġina, kejkijiet, ħelu, gallettini u prodotti oħra tal-furnara

3.2. Deskrizzjoni tal-prodott li għalih japplika l-isem fil-punt 1

Kejk tond kollu saffi individwali forma ta’ ċrieki li mhumiex indaqs u li mhumiex impoġġija fuq xulxin b’mod pulit. Il-kejk tat-tip “Salzwedeler Baumkuchen” jingħaraf mill-massa ta’ saffi moħmija, li jagħtuh dehra ta’ zokk ta’ siġra meta jinqasam b’mod trasversali. Il-“Baumkuchen” jista’ jkun sa 90 cm għoli u b’dijametru ta’ 40 cm. Minn ġewwa, dan il-kejk huwa vojt għal tulu. Dan il-vojt jista’ jkollu dijametru sa 20 cm. Kull kejk jiżen bejn 2 u 5 kilogrammi.

Is-soltu, wara li jitlesta, il-kejk tat-tip “Salzwedeler Baumkuchen” ma jisserviex kollu f’daqqa, iżda jinqata’ fi ċrieki li s-soltu jkunu għoljin bejn 5 u 50 cm u jkunu jiżnu bejn 50g u 4 000 gramma. Tradizzjonalment, il-piż ivarja bejn 300 g u libbra. Barra minn hekk, hemm ukoll il-ponot tal-kejk (“Baumkuchenspitzen”) li huma biċċiet trapeżojdali lixxi, twal madwar 4 cm u ħoxnin madwar 1 cm, li huma ppreżentati wkoll f’diversi forom u daqsijiet, qatgħat twal 2 cm u 4,5 cm u ħoxnin 2 cm, meħuda minn ċirku. Jeżistu wkoll il-“Baumkuchenriegel” jew biċċiet twal bejn 8 sa 10 cm u ħoxnin 3 cm maqtugħa minn ċirku ta’ “Baumkuchen”.

Minħabba li l-kejk tat-tip “Baumkuchen” jista’ jinkesa b’diversi ingredjenti, insibu dawn it-tipi differenti:

—	kejk tat-tip “Baumkuchen” miksi bil-ġelu li jinħall fil-ħalq

—	kejk tat-tip “Baumkuchen” miksi biċ-ċikkulata skura

—	kejk tat-tip “Baumkuchen” miksi biċ-ċikkulata bajda

—	kejk tat-tip “Baumkuchen” miksi biċ-ċikkulata tal-ħalib

—	kejk tat-tip “Baumkuchen” miksi bil-ġelu li jinħall fil-ħalq u biċ-ċikkulata skura

—	kejk tat-tip “Baumkuchen” miksi bil-ġelu li jinħall fil-ħalq u biċ-ċikkulata tal-ħalib

—	kejk tat-tip “Baumkuchen” miksi biċ-ċikkulata skura u biċ-ċikkulata tal-ħalib

—	kejk tat-tip “Baumkuchen” miksi biċ-ċikkulata skura u biċ-ċikkulata bajda

—	kejk tat-tip “Baumkuchen” miksi biċ-ċikkulata tal-ħalib u biċ-ċikkulata bajda

—	kejk tat-tip “Baumkuchen” b’xejn (mingħajr kisi bil-ġelu)

—	Ponot tal-“Baumkuchen” miksijin kollha kemm huma biċ-ċikkulata (biċ-ċikkulata skura, tal-ħalib jew bajda)

—	Biċċiet sħaħ ta’ “Baumkuchen” miksija kompletament biċ-ċikkulata (ċikkulata skura, tal-ħalib jew bajda), miksija bil-ġelu li jinħall fil-ħalq jew imżejna bi ħjut fini taċ-ċikkulata skura, tal-ħalib jew bajda

Kompożizzjoni

Kilogramm butir jew butir imsaffi, kilogramm dqiq, trab tal-qamħ, lamtu tal-qamħ jew dqiq tal-qamħirrun skont il-bżonn,

0,8 kilogramm sa kilogramm isfar tal-bajd jew l-ammont ekwivalenti ta’ isfar tal-bajd minn bajd individwali,

0,8 kilogramm sa kilogramm abjad tal-bajd jew l-ammont ekwivalenti ta’ abjad tal-bajd minn bajd individwali,

0,8 kilogramm sa kilogramm zokkor,

aromi naturali li n-natura tagħhom tvarja skont stabbiliment jew ieħor,

eventwalment, ġamm tal-berquq,

kisja magħmula mill-ġelu (li jinħall fil-ħalq) jew miċ-ċikkulata,

l-ebda sustanzi preservattivi,

l-ebda trab tal-ħami jew sustanzi użati għall-ħami.

Abbażi tal-ammonti msemmijin hawn fuq, il-prodott aħħari jkun jiżen bejn 3,5 u 4,0 kilogrammi.

Kriterji ta’ kwalità

Dehra minn barra: sura li tattirak, kemm kemm imxattra (ħlief għall-ponot); b’kisja jew b’ġelu nadif, ileqq u mifrux b’mod indaqs ma’ kullimkien

Forma (“Baumkuchen” kollu): tul ta’ bejn 60 u 90 cm, dijametru ta’ barra ta’ bejn 12 u 40 cm, u dijametru ta’ ġewwa ta’ bejn 4 u 20 cm

Kisi: ġelu li jinħall fil-ħalq, ċikkulata skura, ċikkulata tal-ħalib jew ċikkulata bajda

Lewn: abjad f’lewn il-krema, kannella ċar jew kannella skur skont biex ikun inkesa l-kejk

Konsistenza: konsistenza ndaqs u frak ħafif u mhux xott

Dehra minn ġewwa: saffi ndaqs ta’ lewn dehbi, li kollha huma tal-istess daqs

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

—

3.4. Passi speċifiċi tal-produzzjoni li jridu jsiru fiż-żona ġeografika ddefinita

Il-kejk tat-tip “Salzwedeler Baumkuchen” irid jiġi prodott kollu kemm huwa fiż-żona ġeografika identifikata.

3.5. Regoli speċifiċi dwar it-tqattigħ, it-tħakkik, l-ippakkjar, eċċtal-prodott li għalih jirreferi l-isem

—

3.6. Regoli speċifiċi dwar it-tikkettar tal-prodott li għalih jirreferi l-isem

Fuq it-tikketta tal-bejgħ għandhom ikunu mniżżlin l-ingredjenti, il-piż, il-produttur tal-kejk, kif ukoll il-kodiċi postali, isem il-post u isem it-triq.

4. Deskrizzjoni fil-qosor tal-konfini taż-żona ġeografika

Iż-żona ġeografika tkopri l-belt ta’ Salzwedel, skont il-fruntieri tagħha tal-2006.

5. Rabta maż-żona ġeografika

5.1. Speċifiċità taż-żona ġeografika

Fl-1807, id-dulċier Johann Andreas Schernikow kiteb riċetta tal-kejk tat-tip “Baumkuchen”. It-teknika u l-formola li kien fiha din ir-riċetta għadhom jiffurmaw il-bażi tal-produzzjoni tal-kejkijiet tat-tip “Baumkuchen” mill-ewwel fabbrika tal-kejkijiet tat-tip “Baumkuchen” ta’ Salzwedel sal-ġurnata ta’ llum. Madwar l-1812, il-belt ta’ Salzwedel tatu d-drittijiet taċ-ċittadini.

Dokumenti sekondarji tal-ewwel nofs tas-seklu 19 juru li f’Salzwedel kien jiġi prodott ħelu f’forma ta’ kejk, vojt minn ġewwa, tawwali li kien qisu zokk ta’ siġra. Il-kejk tat-tip “Salzwedeler Baumkuchen” issemma għall-ewwel darba f’dokument tal-1843.

Minħabba l-industrijalizzazzjoni dejjem ikbar li kienet qed isseħħ fit-tieni nofs tas-seklu 19, inħolqot il-klassi soċjali tan-nofs li kienet għanja u li kellha wkoll flus biżżejjed biex tixtri speċjalitajiet tal-ikel minn reġjuni oħra. F’Salzwedel, grupp ta’ furnara u dulċiera kuraġġużi ħatfu l-okkażjoni u, abbażi tal-esperjenza li kienu kisbu qabel fil-produzzjoni tal-kejkijiet tat-tip “Baumkuchen”, bdew jipproduċu kejkijiet ta’ dan it-tip biex jintbagħtu f’żoni mbiegħda (lejn Berlin, Hannover, ir-reġjuni tal-Ġermanja ċentrali kif ukoll postijiet ’il barra mill-pajjiż bħal pereżempju Vjenna u San Pietruburgu). B’hekk bdiet produzzjoni sostanzjali tal-kejkijiet tat-tip “Baumkuchen”, li wasslet biex dan it-tip ta’ kejk ikun magħruf mal-Ġermanja kollha u saħansitra ’l barra minnha. Minkejja n-nuqqas ta’ data affidabbli, jista’ jiġi dikjarat biċ-ċert li l-ebda belt Ġermaniża ma setgħet tipproduċi, minn tmiem is-seklu 19 sal-ewwel gwerra dinjija u bejn iż-żewġ gwerer dinjin, l-ammont ta’ kejkijiet tat-tip “Baumkuchen” li pproduċiet il-belt ta’ Salzwedel. Il-maġġoranza ta’ dan l-ammont kien għall-bejgħ ’il barra mill-belt, u fil-fatt ammont ta’ bejn 80 % u 90 % tal-produzzjoni ntbagħat f’żoni mbiegħda.

Anke dak iż-żmien, il-konsumaturi kienu jqisu li l-kejk tat-tip “Salzwedeler Baumkuchen” kien prodott speċjali, li seta’ jiġi biss mill-belt ta’ Salzwedel, u li minħabba l-karatteristiċi tal-kwalità speċjali tiegħu, ibbażati fuq il-metodu tal-produzzjoni u r-riċetta tiegħu, kien differenti ferm mill-kejkijiet tat-tip “Baumkuchen” prodotti fir-reġjuni l-oħra.

Il-produzzjoni tal-kejkijiet tat-tip “Baumkuchen” waqfet matul il-gwerer, iżda wara t-tieni gwerra dinjija reġgħet bdiet tiżviluppa bil-mod il-mod. L-esperjenza tal-produtturi, u t-tradizzjoni f’Salzwedel tul snin twal wasslu sabiex il-kejk tat-tip “Salzwedeler Baumkuchen” jerġa’ jikseb il-fama speċjali li kellu, minkejja l-esproprjazzjoni tal-ikbar produttur tiegħu fl-1958. L-ingredjenti u l-metodu tal-produzzjoni tal-kejk ma nbidlu xejn ħlief għall-fatt li, minħabba l-iskarsezza tar-riżorsi, minflok il-butir bdiet tintuża l-marġerina. Bħal qabel, dan it-tip ta’ kejk reġa’ beda jinħema dejjem iktar għall-esportazzjoni, u għexieren ta’ eluf ta’ kejkijiet ta’ dan it-tip bdew jiġu esportati kull sena, l-iktar lejn il-pajjiżi tal-Punent, bl-isem ta’ “Salzwedeler Baumkuchen”.

5.2. Speċifiċità tal-prodott

Il-kejk tat-tip “Salzwedeler Baumkuchen” huwa speċjalità tal-ħelu reġjonali li għandu tradizzjoni twila, li huwa magħruf anke ’l barra mir-reġjun ta’ Salzwedel u li għandu fama tajba mal-konsumaturi.

Il-kejk tat-tip “Baumkuchen” ilu jiġi prodott f’Salzwedel għal kważi mitejn sena u ilu jinbiegħ mal-Ġermanja kollha kif ukoll f’pajjiżi oħra sa mit-tieni nofs tas-seklu 19 [ara l-paġna 46 tal-ktieb imsejjaħ “Deutschland Spezialitätenküche” (“L-ispeċjalitajiet tal-ikel tal-Ġermanja”) ippubblikat minn Christine Metzger fl-1999]. L-ingredjenti u l-metodu tal-produzzjoni ta’ dan it-tip ta’ kejk jiswew ħafna flus, u għalhekk dan il-prodott huwa wieħed bi prezz għoli ferm. Il-metodu tal-produzzjoni kien l-istess fil-kumpaniji kollha: il-kejk tat-tip “Baumkuchen” huwa kejk kollu saffi, li jinħema fuq forn miftuħ; il-kejk jinbena saff saff bl-użu ta’ kuċċarun għal fuq seffud li jdur fuq in-nar. L-ingredjenti prinċipali tar-riċetta wkoll kienu l-istess fil-kumpaniji kollha.

Dan il-kejk għadu jittiekel bħal qabel fl-okkażjonijiet speċjali kollha, bħal fil-Milied, fl-Għid u fiċ-ċelebrazzjonijiet meta xi ħadd jagħlaq sninu. Minħabba l-kwalità għolja tal-ingredjenti użati fil-kejk tat-tip “Baumkuchen”, fi żmien il-gwerra u fi żmien l-għaks qatt ma kien jibqa’ jiġi prodott, bħalma ġara mill-1914 sal-1918 u mill-1939 sal-1948.

Minn madwar 150 sena ilu ’l hawn, l-ingredjenti u l-metodu tal-produzzjoni ma nbidlux. Sal-ġurnata tal-lum, ma jintużaw l-ebda preservattivi, ma ssir l-ebda pasturizzazzjoni, u ma jkunx hemm iffriżar, biex b’hekk il-kejk tat-tip “Salzwedeler Baumkuchen” jirrappreżenta prodott moħmi frisk ferm.

Fl-1883, fil-ktieb ta’ Dietrichs u Parisius (Bilder aus der Altmark, Verlag J. F. Richter, Hamburg) diġà nsibu li: “dawk li jafu jieklu kienu jippreferu l-kejk tat-tip ‘Salzwedeler Baumkuchen’ mill-kejkijiet l-oħra tal-istess isem li kienu ġejjin minn postijiet oħra u li dan il-kejk kien fi triqtu biex jikseb fama mad-dinja kollha. Illum ukoll, qed imorru eluf ta’ kaxex mimlijin b’dan it-tip ta’ kejk ħelu u tajjeb mingħand il-furnara għal għand tal-posta sabiex jintbagħtu biex jitgawdew mhux biss fil-provinċji kollha tal-Ġermanja, iżda bosta drabi wkoll fir-Russja u fl-Amerka.”

Fl-Artiklu msejjaħ “Was weiß man vom Salzwedeler?” (“X’nafu dwar il-kejk tat-tip ‘Salzwedeler Baumkuchen’?”) li deher fil-paġna 113 tal-pubblikazzjoni speċjali msejħa “100 Jahre Salzwedeler Wochenblatt” li ħarġet fl-1932, insibu l-kwotazzjoni li ġejja:

“Jekk inti tgħid lil xi ħadd li inti minn Salzwedel, 99 % dak li jkun iwieġbek: “Eh, mela inti minn fejn ġej il-kejk tat-tip ‘Baumkuchen’!”.

It-tradizzjoni u l-fama tajba ta’ din l-ispeċjalità huma stabbiliti sew. Din toħroġ fost l-oħrajn minn stħarriġ dwar li twettaq matul il-Ġimgħa Internazzjonali favur l-ambjent li saret f’Berlin fl-2005: fih, minn 500 persuna li ġew mistħarrġa, 60,6 % kienu semgħu bl-isem “Salzwedeler Baumkuchen” jew kienu qraw dwaru. Minn dawn is-60,6 %, 92 % kienu tal-fehma li l-kejk tat-tip “Salzwedeler Baumkuchen” kien isir biss f’Salzwedel, filwaqt li 81 % jagħtu ħafna importanza lil din l-oriġini huma u jiddeċiedu x’se jixtru.

Il-kejk tat-tip “Salzwedeler Baumkuchen” ilu jagħmel parti mit-tradizzjonijiet u mid-drawwiet reġjonali għal madwar 100 sena. Hemm diversi kanzunetti u poeżiji dwar il-kejk tat-tip “Baumkuchen” u dan il-kejk għandu wkoll post ewlieni fil-purċissjonijiet tal-post. Illum, il-kejk tat-tip “Baumkuchen” huwa attrazzjoni turistika importanti u wieħed jista’ jarah qed jiġi prodott f’ċerti fran li jkunu miftuħin għall-wiri. Sa mill-2004, kull sena qed tiġi ċċelebrata festa tal-kejk tat-tip “Baumkuchen”, u fiha jlaħħqu wkoll reġina tal-kejk tat-tip “Baumkuchen”.

Fil-kotba tal-ivvjaġġar nazzjonali (ara pereżempju l-paġna 98 tal-ktieb tal-1998 imsejjaħ “Baedecker Deutschland”) kif ukoll fir-riklami, il-kejk tat-tip “Salzwedeler Baumkuchen” ukoll jissemma bħala speċjalità tradizzjonali tal-belt ta’ Salzwedel.

5.3. Rabta kawżali bejn iż-żona ġeografika u l-kwalità jew il-karatteristiki tal-prodott (għad-DOP) jew il-kwalità speċifika, ir-reputazzjoni jew il-karatteristiki l-oħra tal-prodott (għall-IĠP)

Il-fama tajba li għandu l-kejk tat-tip “Salzwedeler Baumkuchen” tissejjes b’mod ewlieni fuq it-tradizzjoni twila tal-produzzjoni ta’ dan il-prodott fil-belt ta’ Salzwedel, fuq is-snajja’ li żviluppaw minħabba fiha u fuq il-kwalità għolja tal-prodott, kif ukoll fuq il-post fiss li għandu fil-ħajja kulturali tal-belt, li tissejjaħ ukoll “il-belt tal-kejk tat-tip ‘Baumkuchen’” (ara l-ktieb imsejjaħ “Deutschland Spezialitätenküche” (“L-ispeċjalitajiet tal-ikel tal-Ġermanja”) imsemmi hawn fuq). Għalhekk, il-kejk tat-tip “Salzwedeler Baumkuchen” huwa speċjalità reġjonali, li l-fama tiegħu tissejjes b’mod sinifikanti fuq ir-rabta mill-qrib li għandu mal-post tal-oriġini tiegħu, Salzwedel.

Referenza għall-pubblikazzjoni tal-ispeċifikazzjoni

(it-tieni subparagrafu tal-Artikolu 6(1) ta’ dan ir-Regolament)

https://register.dpma.de/DPMAregister/geo/detail.pdfdownload/42039

(1) ĠU L 179, 19.6.2014, p. 17.

7.7.2021

Il-Ġurnal Uffiċjali tal-Unjoni Ewropea

C 269/14

Pubblikazzjoni ta’ applikazzjoni għal emenda tal-Unjoni għall-Ispeċifikazzjoni tal-Prodott għal isem fis-settur tal-inbid skont l-Artikolu 97(3) tar-Regolament (UE) Nru 1308/2013 tal-Parlament Ewropew u tal-Kunsill

(2021/C 269/09)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 98 tar-Regolament (UE) Nru 1308/2013 tal-Parlament Ewropew u tal-Kunsill (1) fi żmien xahrejn mid-data ta’ din il-pubblikazzjoni.

APPLIKAZZJONI GĦAL EMENDA TAL-UNJONI GĦALL-ISPEĊIFIKAZZJONI TAL-PRODOTT

MINIȘ

PDO-RO-A0029-AM01

Data tal-applikazzjoni: 2.4.2019

1. Applikant u interess leġittimu

Assoċjazzjoni professjonali PROVITIS

L-assoċjazzjoni professjonali ġiet stabbilita abbażi tad-Digriet tal-Gvern Nru 26/2000 dwar l-assoċjazzjonijiet u l-fondazzjonijiet, approvat b’emendi mil-Liġi Nru 246/2005. L-assoċjazzjoni hija magħmula minn produtturi li huma persuni fiżiċi u ġuridiċi u tkopri aktar minn 60 % taż-żona tad-Denominazzjoni ta’ Oriġini Protetta (DOP) Miniș. Hija rreġistrata fir-Reġistru Nazzjonali tal-Assoċjazzjonijiet bin-Nru 17165/A/2007.

2. Intestatura fl-Ispeċifikazzjoni tal-Prodott affettwata mill-emenda/i

☐	Isem il-prodott

☒	Kategorija tal-prodott tad-dwieli

☒

Rabta

☐	Restrizzjonijiet tal-kummerċjalizzazzjoni

3. Deskrizzjoni u raġunijiet għall-emenda

3.1. Inklużjoni ta’ varjetà tal-għeneb tal-inbid ġdida bħala varjetà ewlenija

Il-varjetà Cabernet Franc żdiedet mal-lista ta’ varjetajiet awtorizzati bħala varjetà ewlenija.

B’riżultat ta’ dan, il-Kapitolu IV tal-Ispeċifikazzjoni tal-Prodott u t-Taqsima 1.7 tad-Dokument Uniku ġew emendati.

L-introduzzjoni tal-varjetà tal-Cabernet Franc kienet xierqa meta wieħed iqis ir-rendiment sinifikanti li toffri din il-varjetà fis-suq tal-inbid aħmar. Jista’ tabilħaqq ikun li ċ-ċentru tagħha jinsab fix-Xlokk tal-Ungerija, iżda hija sabet it-tieni dar tagħha fiż-żona tad-DOP Miniș taħt l-għoljiet tal-muntanji Zarandul fir-Rumanija, fejn il-konsum tradizzjonali tal-varjetà jmur lura sa meta r-reġjun waqa’ taħt l-Imperu Awstro-Ungeriż.

Il-varjetà ilha titkabbar fir-Rumanija mill-2008 u l-ewwel ħsad fl-2011 intuża għall-ħolqien ta’ taħlita bil-varjetà Cabernet Sauvignon. It-traċċabilità tal-inbejjed b’varjetà waħda prodotti minn din il-varjetà ilha fis-seħħ mill-ħsad tal-2012, bil-ħsieb ikun li din tiġi introdotta għall-grupp tal-varjetajiet permessi li jġorru d-DOP Miniș.

Fl-2012, Cabernet Franc mill-vinji fil-villaġġ ta’ Covăsânț – fil-fruntiera tat-Tramuntanza taż-żona li tipproduċi l-aħjar inbejjed ħomor miż-żona tal-Miniș – inħasad separatament u ġie vvinifikat bħala varjetà waħda.

Data analitika u riżultati tal-analiżi sensorjali għall-aħħar erba’ snin konsekuttivi, ibbażati fuq l-iskeda informattiva tal-inbid (li tintuża biex tiġi żgurata t-traċċabilità u tiġi mmonitorjata l-konsistenza tal-parametri tal-kwalità tal-inbejjed), stabbilew il-valuri li jenfasizzaw il-qawwa alkoħolika potenzjali fil-ħsad, bi produzzjoni konsistenti ta’ nbejjed b’aktar minn 13,5 % alkoħol bil-volum (ABV), livell ta’ aċidità li jkun ġeneralment madwar 5,60 g/l, u estratt niexef ta’ aktar minn 25 g/l. Taħlita li kienet tinkludi proporzjon ta’ 16 % ta’ Fetească neagră għall-ħsad tal-2015 tat proprjetajiet addizzjonali lill-inbid, bħal ħjiel ta’ ħwawar u rustiċità, mingħajr ma affettwaw il-karatteristiċi l-oħrajn tal-inbid.

3.2. L-inklużjoni ta’ tipi ġodda ta’ nbid – inbid frizzanti ta’ kwalità u nbid semifrizzanti

Ġew inklużi kategoriji ġodda ta’ nbid (inbid frizzanti ta’ kwalità u inbid semifrizzanti) taħt id-DOP Miniș.

Il-Kapitolu I tal-Ispeċifikazzjoni tal-Prodott u t-Taqsima 1.3 tad-Dokument Uniku ġew emendati.

L-introduzzjoni ta’ tipi ġodda ta’ nbid kienet meħtieġa minħabba t-tħawwil mill-ġdid ta’ żoni kbar bi dwieli ta’ varjetajiet indiġeni (eż. Mustoasă de Măderat, Chardonnay). Uħud minn dawn il-varjetajiet jiżviluppaw potenzjal aromatiku ta’ frott u freskezza li huwa espress l-aħjar fit-tipi ta’ nbid frizzanti ta’ kwalità u semifrizzanti.

Dan jirrappreżenta wkoll ir-ritorn għal mod tradizzjonali ta’ pproċessar ta’ dawn il-varjetajiet u l-ħolqien ta’ togħma ġdida, ibbażata fuq teknoloġiji modernizzati, li meta jiġu applikati għal dawn il-varjetajiet jenfasizzaw il-freskezza speċifika tagħhom u l-aċidità moderata sa għolja ta’ wħud minnhom (ħażna f’temperatura kontrollata biex jinżammu l-freskezza u l-element ta’ frott tal-inbejjed, tqaddim fil-btieti tal-ballut fuq il-karfa tal-inbid b’taħwida ta’ kull xahar, tqaddim fil-bettija u wara fil-flixkun, vinifikazzjoni minn għeneb maħsud f’ċerti altitudnijiet fejn hemm ħamrija fertili speċifika b’sustrat ta’ shale, granit u blat metamorfiku, eċċ.).

Il-produzzjoni ta’ kategoriji ġodda ta’ nbid fid-DOP Miniş hija reazzjoni għad-diversifikazzjoni tal-gosti tal-konsumaturi, li qegħdin ixaqilbu dejjem aktar lejn tipi ġodda ta’ nbid.

Fil-kuntest tal-investiment u l-immodernizzar tal-infrastruttura u t-teknoloġiji tal-informazzjoni, u bl-appoġġ tat-tradizzjoni u tal-valuri tal-inbejjed mhux frizzanti tad-DOP Miniș u żieda sinifikanti fil-konsum ta’ nbejjed effervexxenti, jagħmel aktar u aktar sens li jiġu prodotti nbejjed frizzanti ta’ kwalità u nbejjed semifrizzanti tad-DOP.

3.3. L-inklużjoni tal-varjetajiet permessi għall-produzzjoni ta’ nbejjed frizzanti ta’ kwalità u nbejjed semifrizzanti

L-Ispeċifikazzjoni tal-Prodott ġiet issupplimentata bil-varjetajiet li huma permessi għat-tipi l-ġodda ta’ nbejjed, inbid frizzanti ta’ kwalità u nbid semifrizzanti, bi wħud minn dawn il-varjetajiet, bħal Cadarcă u Mustoasă de Măderat, li għandhom tradizzjoni stabbilita ta’ produzzjoni fiż-żona tal-Miniș, b’mod partikolari fil-konfini taż-żona Șiria-Mâsca, kif ukoll oħrajn, bħal Tămâioasă românească jew Pinot gris, li jirriżultaw f’aromi strutturati tajjeb, friski u ta’ frott meta prodotti fil-forma ta’ nbejjed frizzanti ta’ kwalità.

B’riżultat ta’ dan, il-Kapitolu IV tal-Ispeċifikazzjoni tal-Prodott u t-Taqsima 1.4 tad-Dokument Uniku ġew emendati.

Mill-varjetajiet tal-inbid abjad, il-Mustoasa de Măderat b’mod partikolari hija varjetà li ntużat biex jiġu prodotti nbejjed frizzanti sa mill-1974, meta l-għalla sħiħa tal-għeneb mir-reġjun tal-inbid ta’ Miniș-Măderat ittieħdet lejn il-Kontea ta’ Sălaj, fejn ġie prodott l-inbid frizzanti famuż Silvania f’Șimleu Silvaniei. Minħabba l-klima Mediterranja taż-żona ġeografika, il-varjetà tagħti riżultati tajbin fejn għandha x’taqsam iż-żamma tal-freskezza u tat-togħma ta’ frott tagħha meta tiġi prodotta bħala nbid frizzanti ta’ kwalità tad-DOP.

3.4. Il-preżentazzjoni tal-karatteristiċi analitiċi tat-tipi l-ġodda ta’ nbid – inbid frizzanti ta’ kwalità u nbid semifrizzanti

L-inklużjoni ta’ nbid frizzanti ta’ kwalità u nbejjed semifrizzanti tfisser li l-Ispeċifikazzjoni tal-Prodott trid tiġi ssupplimentata biex tinkludi l-karatteristiċi analitiċi speċifiċi għat-tipi ta’ nbid li ġew miżjuda.

B’riżultat ta’ dan, il-Kapitolu XI(a) tal-Ispeċifikazzjoni tal-Prodott u t-Taqsima 1.4 tad-Dokument Uniku ġew emendati.

Il-kategoriji l-ġodda jridu jirriflettu d-deskrizzjoni tal-parametri analitiċi speċifikati għalihom.

3.5. Il-preżentazzjoni tal-karatteristiċi organolettiċi tat-tipi l-ġodda ta’ nbid – inbid frizzanti ta’ kwalità u nbid semifrizzanti

L-inklużjoni ta’ nbid frizzanti ta’ kwalità u nbid semifrizzanti fid-DOP Miniș tfisser li l-karatteristiċi organolettiċi ta’ dawn it-tipi ta’ nbid iridu jiġu speċifikati, billi tingħata deskrizzjoni tad-dehra, l-aroma u t-togħma tagħhom, sabiex dawn il-kategoriji jiġu elenkati fid-dettall fl-Ispeċifikazzjoni tal-Prodott.

B’riżultat ta’ dan, il-Kapitolu XI(b) tal-Ispeċifikazzjoni tal-Prodott u t-Taqsima 1.4 tad-Dokument Uniku ġew emendati.

3.6. Emenda tar-rendiment tal-inbid biex dan jirrifletti ż-żieda tiegħu

Il-produzzjoni tal-inbid żdiedet, iżda sa massimu ta’ 15 000 kg/ha ta’ għeneb u sa massimu ta’ 112,5 hl/ha ta’ nbid.

B’riżultat ta’ dan, il-Kapitoli V u VI tal-Ispeċifikazzjoni tal-Prodott u t-Taqsima 1.5.2 tad-Dokument Uniku ġew emendati.

Mill-2007 sal-2017, iż-żoni mdaqqsa fiż-żona demarkata bid-DOP Miniș ġew imħawla mill-ġdid b’varjetajiet tad-dwieli Rumeni, li jinkludu kemm il-varjetajiet tradizzjonali kif ukoll il-kloni tagħhom. Fil-kundizzjonijiet pedoklimatiċi Mediterranji ta’ benefiċċju taż-żona, il-vinji l-ġodda li bdew il-produzzjoni fl-2011 irreġistraw tkabbir fir-rendiment tal-ħsad għall-varjetajiet bojod u ħomor, bil-monitoraġġ tal-ħsad jindika ħtieġa li jiġu emendati ċ-ċifri tal-produzzjoni tal-inbid, iżda dan it-tkabbir ma affettwax il-kwalità u l-karatteristiċi tal-inbid prodott taħt din id-denominazzjoni.

3.7. Indikazzjoni tat-teknoloġiji speċifiċi għall-produzzjoni ta’ nbejjed frizzanti ta’ kwalità u nbejjed semifrizzanti

L-introduzzjoni taż-żewġ tipi ta’ nbejjed – inbid frizzanti ta’ kwalità u nbejjed semifrizzanti – kienet teħtieġ li l-Ispeċifikazzjoni tal-Prodott tiġi ssupplimentata bi preżentazzjoni tat-teknoloġiji speċifiċi għall-produzzjoni ta’ nbejjed frizzanti ta’ kwalità u nbejjed semifrizzanti, inkluża deskrizzjoni tal-metodi ta’ produzzjoni użati fid-DOP Miniș.

Il-Kapitolu X tal-Ispeċifikazzjoni tal-Prodott ġie emendat, iżda d-Dokument Uniku ma ġiex emendat.

3.8. Indikazzjoni tar-rabta maż-żona ġeografika għat-tipi l-ġodda ta’ nbejjed – inbid frizzanti ta’ kwalità u nbid semifrizzanti

Id-deskrizzjoni tar-rabta maż-żona ġeografika ġiet issupplimentata biex tipprovdi deskrizzjoni aħjar tat-tipi kollha ta’ nbejjed, ladarba ġew introdotti tipi ġodda ta’ nbid fl-Ispeċifikazzjoni tal-Prodott, jiġifieri nbid frizzanti ta’ kwalità u nbid frizzanti, biex jiġi żgurat li kull kategorija prodotta tkun deskritta fid-dettall.

Il-Kapitolu II tal-Ispeċifikazzjoni tal-Prodott u t-Taqsima 1.8 tad-Dokument Uniku ġew emendati.

Il-pożizzjoni tal-vinji fuq l-għoljiet mhux biss tipprovdi esponiment eċċellenti, iżda tesponi wkoll lid-dwieli għar-radjazzjoni solari li jwassal għal akkumulazzjoni ta’ zokkor u polifenoli fl-għeneb maħsub għal inbejjed bojod mhux frizzanti u ta’ antoċjanini fl-għeneb maħsub għall-inbejjed ħomor mhux frizzanti.

Il-widien li fis-sajf iżommu n-nida ta’ filgħodu sa nofsinhar jippermettu li tinżamm l-aċidità ġusta fl-għeneb tal-varjetajiet bojod maħsub għall-produzzjoni tal-inbid bażi użat fl-inbejjed frizzanti ta’ kwalità u semifrizzanti.

Il-vinji li jinsabu fil-bażi tal-għoljiet tul il-firxa kollha tal-għoljiet biswit l-għoljiet tranżizzjonali raffi tal-katina ta’ muntanji Zarand spiss ikunu mgħottija biċ-ċpar, irrispettivament mill-istaġun, filwaqt li l-ħarifa xotta tgħin biex iz-zokkor jakkumula bil-mod fl-għeneb, li hija kundizzjoni essenzjali għall-produzzjoni ta’ nbejjed effervexxenti. Fir-reġjun tal-inbid Miniș-Măderat, l-ammont medju ta’ xemx huwa ta’ 1 955 siegħa fis-sena, bil-ħin minimu għad-dwieli jkun ta’ 1 300 siegħa, li jfisser li ż-żona demarkata għad-DOP Miniș tgawdi minn kundizzjonijiet ta’ dawl eċċellenti.

3.9. L-inklużjoni fit-tikketta ta’ indikazzjonijiet fakultattivi li jirreferu għat-teknoloġija speċifika użata fil-produzzjoni ta’ nbid frizzanti ta’ kwalità

Id-dispożizzjonijiet dwar l-ibbottiljar u t-tikkettar tal-inbid frizzanti ta’ kwalità ġew issupplimentati biex jinkludu indikazzjoni tal-kapaċitajiet li taħthom jista’ jiġi bbottiljat, u indikazzjoni tas-sena tal-ħsad fil-każ ta’ snin li fihom il-ħsad kien partikolarment favorevoli għar-rendiment tal-inbid bażi għall-produzzjoni ta’ nbid frizzanti. Barra minn hekk, l-Ispeċifikazzjoni tal-Prodott ġiet issupplimentata biex tinkludi indikazzjonijiet tal-metodi ta’ produzzjoni speċifiċi għall-inbejjed frizzanti ta’ kwalità, li jirriflettu t-teknoloġiji attwali użati biex dawn jiġu prodotti. Is-sena tal-ħsad tista’ tiġi miżjuda fuq it-tikketta jekk il-produzzjoni tal-inbid bażi użat biex jinkiseb inbid frizzanti ta’ kwalità tkun ġejja kollha mill-ħsad speċifiku ta’ sena waħda.

B’riżultat ta’ dan, il-Kapitolu XII tal-Ispeċifikazzjoni tal-Prodott u t-Taqsima 1.9 tad-Dokument Uniku ġew emendati.

DOKUMENT UNIKU

1. Isem/ismijiet għar-reġistrazzjoni

MINIȘ

2. Tip ta’ indikazzjoni ġeografika

DOP – Denominazzjoni ta’ Oriġini Protetta

3. Kategoriji tal-prodotti tad-dwieli

Inbid

5.	Inbid frizzanti ta’ kwalità

8.	Inbid semifrizzanti

4. Deskrizzjoni tal-inbid/inbejjed

Karatteristiċi analitiċi u organolettiċi – inbejjed bojod u rożè mhux frizzanti

L-inbejjed bojod mhux frizzanti jleqqu bi ħjiel ta’ kulur minn isfar lewn it-tiben għal isfar ċar jew isfar ħadrani u huma rikki u intensi, b’aromi speċifiċi għall-varjetà; għandhom qawwa medja, b’aċidità moderata sa għolja u togħma li ddum ħafna fil-ħalq, togħma ta’ frott b’impressjoni qawwija tal-kumpless tat-togħma ewlenija (frott eżotiku: lychees, grejpfrut, mangu jew starfruit, petali tal-ward, nwar tad-dwieli, ħuxlief li għadu kemm inħasad, għasel).

L-inbejjed rożè mhux frizzanti għandhom kulur intens li huwa speċifiku għaż-żona u li faċilment ipoġġihom u jassoċjahom maż-żona tal-Miniș. Dan il-kulur huwa lewn il-lampun jew lewn il-frawli, ileqq, b’togħma ta’ frott aħmar irqiq: tut, lampun, frawli selvaġġ, u togħma li ddum ħafna fil-ħalq li tikkaratterizza l-aqwa fost dawn l-inbejjed.

Karatteristiċi analitiċi
Qawwa alkoħolika totali massima (f’% tal-volum)	15,00
Qawwa alkoħolika proprja minima (f’% tal-volum)	11,00
Aċidità totali minima	5,5 fi grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	18
Total massimu ta’ diossidu tal-kubrit (f’milligrammi għal kull litru)	200

Karatteristiċi analitiċi u organolettiċi – inbejjed ħomor

L-inbejjed ħomor mhux frizzanti għandhom kulur intens, bi ħjiel ta’ aħmar jgħajjat sa aħmar skur, ileqqu u huma rikki fit-tannini u fl-antoċjanini, intensi u rikki u b’aċidità għolja, li tirrikjedi perjodu twil ta’ tqaddim kemm fil-bettija kif ukoll fil-flixkun.

Għandhom togħmiet oriġinali u kumplessi b’noti ta’ frott irqiq misjur bħal ribes aħmar, cranberry, tut u blueberry. Mat-tqaddim jiżviluppaw togħma distinta ta’ vanilla, kafè jew tabakk.

Karatteristiċi analitiċi
Qawwa alkoħolika totali massima (f’% tal-volum)	15,00
Qawwa alkoħolika proprja minima (f’% tal-volum)	11,00
Aċidità totali minima	4,5 fi grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	20
Total massimu ta’ diossidu tal-kubrit (f’milligrammi għal kull litru)	150

Karatteristiċi analitiċi u organolettiċi – inbejjed frizzanti ta’ kwalità

L-inbejjed frizzanti ta’ kwalità jintgħarfu mill-finezza, mill-freskezza u min-naturalezza tagħhom, b’aromi ta’ fermentazzjoni u ħjiel ta’ għasel, fjuri tas-sajf, ħuxlief kemxejn imnixxef, noti awtolizzati li jfakkruk fil-qoxra tqarmeċ u bnina tal-ħobż sħun.

Proprjetajiet:

—	tad-dehra: ċari, trasparenti, kulur isfar sa isfar lewn il-lumi għall-inbejjed bojod frizzanti ta’ kwalità u roża lewn is-salamun sa ftit jew wisq oranġjo intens għall-inbejjed rożè frizzanti ta’ kwalità.

—	tar-riħa: friski, minn sottili sa qawwija b’noti ta’ frott (frott eżotiku, tuffieħ niexef) jew ta’ fjuri (fjuri tas-sebuqa, ward).

—

tat-togħma: pjaċevolment aċidużi, b’aċidità medja sa għolja; b’kontenut baxx ta’ tannini għall-inbejjed rożè frizzanti ta’ kwalità u bi kważi ebda tannini għall-inbejjed bojod frizzanti ta’ kwalità; delikati u ta’ fjuri: fjuri bojod taċ-ċitronella, ġilji bojod jew ward abjad, ta’ frott: tuffieħ tas-sajf, lanġas ħelu misjur, ribes abjad, ħawħ abjad, ta’ ħxejjex: weraq tal-lumi mgħaffeġ, fjuri tas-sebuqa, fjur tal-akaċja, jew ta’ ħwawar: xibt, rabarbru, ħabaq, skont l-aromi speċifiċi tal-varjetà użata fil-produzzjoni.

Il-pressjoni żejda tal-inbid frizzanti ta’ kwalità hija ta’ mill-inqas 3,5 bar f’temperatura ta’ 20 °C.

Karatteristiċi analitiċi
Qawwa alkoħolika totali massima (f’% tal-volum)	15,00
Qawwa alkoħolika proprja minima (f’% tal-volum)	11,00
Aċidità totali minima	3,5 fi grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	10,5
Total massimu ta’ diossidu tal-kubrit (f’milligrammi għal kull litru)	150

Karatteristiċi analitiċi u organolettiċi – inbid semifrizzanti

Proprjetajiet:

—	tad-dehra: ċari, trasparenti, b’kulur isfar fl-aħdar, ileqq għall-inbid abjad u roża lewn is-salamun sa roża vibranti lewn il-lampun għar-rożè semifrizzanti, b’effervexxenza fina.

—	tar-riħa: friski, l-aromi ewlenin li jiġu mill-varjetajiet magħżula (fjuri bojod, frott tal-għadam abjad, tuffieħ jew lanġas tas-sajf), iridu jkunu preżenti u kkombinati b’mod armonjuż mal-aromi sekondarji, abbażi tal-proċess ta’ fermentazzjoni (ħmira, gallettini, għaġina friska).

—	tat-togħma: aċidużi, effervexxenti, bi bżieżaq fini u persistenti, b’togħma rikka ta’ aromi ewlenin tal-fjuri (fjuri bojod: fjuri tas-sebuqa, akaċja, ward), ta’ frott (tuffieħ aħdar, ħawħ abjad, grejpfrut, mangu, lychees), ibbilanċjati tajjeb u b’finitura medja-għolja jew evidenti ħafna.

Il-pressurizzazzjoni żejda tal-inbid semifrizzanti hija bejn 1 u 2,5 bar f’temperatura ta’ 20 °C.

Karatteristiċi analitiċi
Qawwa alkoħolika totali massima (f’% tal-volum)	11,00
Qawwa alkoħolika proprja minima (f’% tal-volum)	7,00
Aċidità totali minima	3,5 fi grammi għal kull litru espressi bħala aċidu tartariku
Aċidità volatili massima (f’milliekwivalenti għal kull litru)	10,5
Total massimu ta’ diossidu tal-kubrit (f’milligrammi għal kull litru)	185

5. Prattiki tal-produzzjoni tal-inbid

a. Prattiki enoloġiċi speċifiċi

Prattiki enoloġiċi

Prattika enoloġika speċifika

L-użu ta’ laqx tal-injam tal-ballut

Il-laqx tal-injam tal-ballut jintuża fil-produzzjoni tal-inbid u biex jgħaddi ċerti komponenti tal-injam tal-ballut lill-inbid. Il-laqx tal-injam użat irid ikun ġej esklużivament minn speċijiet tal-ġeneru Quercus.

Id-dimensjonijiet tal-biċċiet tal-injam tal-ballut iridu jkunu tali li mill-anqas 95 % minnu fil-piż jinżamm b’filtru malja ta’ 2 mm (jiġifieri 9 malji).

Limiti stabbiliti għall-użu ta’ ċerti sustanzi:

—	id-diossidu tal-karbonju użat għall-inbid li jġorr id-DOP Miniș ma għandux jaqbeż iż-2 g/l fl-inbid ipproċessat b’dan il-mod

—	l-aċidu ċitriku użat għall-inbid li jġorr id-DOP Miniș ma għandux jaqbeż il-1 g/l fl-inbid ipproċessat b’dan il-mod

—	l-aċidu metatartariku użat għall-inbid li jġorr id-DOP Miniș ma għandux jaqbeż il-100 mg/l.

b. Rendimenti massimi għal kull ettaru

Chardonnay, Cabernet franc, Pinot gris, Pinot noir, Sauvignon, Riesling de Rhin, Novac, Traminer roz, Tămâioasă românească

10 000 kilogramma ta’ għeneb għal kull ettaru

Cabernet Sauvignon, Merlot, Furmint

11 000 kilogramma ta’ għeneb għal kull ettaru

Burgund mare, Fetească regală, Riesling italian, Muscat Ottonel, Fetească neagră, Mustoasă de Măderat, Cadarcă, Syrah

15 000 kilogramma ta’ għeneb għal kull ettaru

Chardonnay, Cabernet Franc, Novac, Pinot gris, Pinot noir, Riesling de Rhin, Sauvignon u Traminer roz, Tămâioasă românească

75,00 ettolitru għal kull ettaru

Cabernet Sauvignon, Furmint, Merlot

82,50 ettolitru għal kull ettaru

Burgund mare, Cadarcă, Fetească regală, Fetească neagră, Muscat Ottonel, Mustoasă de Măderat, Riesling Italian u Syrah

112,50 ettolitru għal kull ettaru

6. Definizzjoni taż-żona demarkata

Iż-żona demarkata għall-produzzjoni tal-inbejjed bid-DOP Miniș tinkludi dawn il-lokalitajiet li ġejjin fil-Kontea ta’ Arad:

—	il-belt ta’ Lipova: ir-raħal ta’ Radna;

—	il-muniċipalità ta’ Păuliș: l-irħula ta’ Barațca u Păuliș;

—	il-muniċipalità ta’ Ghioroc: l-irħula ta’ Miniș, Ghioroc u Cuvin;

—	il-muniċipalità ta’ Covăsânț: ir-raħal ta’ Covăsânț;

—	il-muniċipalità ta’ Șiria: l-irħula ta’ Șiria, Galșa u Mâsca;

—	il-muniċipalità ta’ Târnova: l-irħula ta’ Târnova u Drauț;

—	il-belt ta’ Ineu: ir-raħal ta’ Mocrea;

—	il-belt ta’ Pâncota: l-irħula ta’ Pâncota u Măderat;

—	il-muniċipalità ta’ Șilindia: l-irħula ta’ Șilindia, Satu Mic, u Luguzău.

7. Varjetà jew varjetajiet tad-dwieli li minnhom jinkiseb l-inbid / jinkisbu l-inbejjed

Burgund Mare N - Grosser burgunder, Grossburgunder, Blaufrankisch, Kekfrankos, Frankovka, Limberger

Cabernet Franc N

Cabernet Sauvignon N - Petit Vidure, Bourdeos tinto

Cadarcă N - Schwarzer Kadarka, Rubinroter Kadarka, Lugojană, Gâmză, Fekete budai

Chardonnay B - Gentil blanc, Pinot blanc Chardonnay

Fetească neagră N - Schwarze Mädchentraube, Poama fetei neagră, Păsărească neagră, Coada rândunicii

Fetească regală B - Konigliche Madchentraube, Konigsast, Ktralyleanka, Dănăşană, Galbenă de Ardeal

Furmint B - Furmin, Şom szalai, Szegszolo

Merlot N - Bigney rouge

Muscat Ottonel B - Muscat Ottonel blanc

Mustoasă de Măderat B - Lampau, Lampor, Mustafer, Mustos Feher, Straftraube

Novac N

Pinot Gris G - Affumé, Grau Burgunder, Grauburgunder, Grauer Mönch, Pinot cendré, Pinot Grigio, Ruländer

Pinot Noir N - Blauer Spätburgunder, Burgund mic, Burgunder roter, Klävner Morillon Noir

Pinot noir N - Spätburgunder, Pinot nero

Riesling de Rhin B - Weisser Riesling, White Riesling

Riesling italian B - Olasz Riesling, Olaszriesling, Welschriesling

Sauvignon B - Sauvignon verde

Syrah N - Shiraz, Petit Syrah

Traminer Roz Rs - Rosetraminer, Savagnin roz, Gewürztraminer

Tămâioasă românească B - Busuioacă de Moldova, Muscat blanc à petit grains

Tămâioasă românească B - Rumanische Weihrauchtraube, Tamianka.

8. Deskrizzjoni tar-rabta/rabtiet

Dettalji taż-żona ġeografika

L-għoljiet ta’ taħt il-muntanji Zarand jikkostitwixxu l-fattur naturali speċifiku tal-varjetà, ikkaratterizzati, kif inhu r-reġjun, minn ħamrija ġeblija rikka fil-ħadid u fil-mikroelementi.

Il-pjantaġġuni tad-dwieli huma esposti l-aktar fin-Nofsinhar, bl-eċċezzjoni ta’ xi esponimenti lejn il-Lbiċ u x-Xlokk. Minħabba f’hekk, il-vinji individwali differenti, li jinsabu fl-istess latitudni u lonġitudni, u li huma mħawla bl-istess varjetà ta’ għeneb, huma distinti bejniethom minħabba varjetà ta’ karatteristiċi topoklimatiċi. Il-mikroklima fiż-żona għandha influwenzi Mediterranji u ħarifa twila, sħuna u xotta. Data ekoklimatika: temperatura medja annwali: 11,2 °C, total ta’ preċipitazzjoni annwali: 644 mm, temperaturi attivi totali: 3 291°C, total ta’ sigħat ta’ xemx: 1 490, total ta’ preċipitazzjoni attiva: 365 mm. Il-medja ta’ umdità relattiva għal għaxar snin hija ta’ madwar 75 %.

Ir-reġjun tal-inbid ta’ Miniș-Măderat ġeneralment għandu klima kontinentali moderata b’influwenzi Mediterranji, affettwata mill-karatteristiċi klimatiċi tal-Ewropa ċentrali. Ċerti karatteristiċi ekoloġiċi taż-żona ġejjin mill-kenn naturali offrut mill-Munții Zărandului [il-Muntanji Zărand], l-esponiment fil-Lbiċ, l-inklinazzjonijiet ta’ 15 sa 35 % u l-ispeċifiċitajiet tal-ħamrija. Ix-xitwa ġeneralment tkun ħafifa, ir-rebbiegħa taqleb malajr għas-sajf, speċjalment f’dawn l-aħħar għaxar snin sa ħmistax-il sena. It-temperaturi medji ta’ kull xahar jaqgħu biss taħt iż-0 °C f’Jannar u fi Frar, u normalment qatt ma jkunu inqas minn -2 °C. Fil-perjodu ewlieni għall-iżvilupp tal-kwalità (Lulju sa Settembru), il-perjodu ta’ sajran tal-għeneb, it-temperatura medja ta’ kull xahar tibqa’ f’livell ideali ta’ aktar minn 21 °C f’Lulju u f’Awwissu, u ta’ 15,5 °C f’Settembru. Il-bilanċ termali ġenerali, is-somma ta’ temperaturi pożittivi, għandu medja pluriennali ta’ 4 125 °C. Il-bilanċ termali attiv huwa medja pluriennali ta’ 3 667 °C. Il-bilanċ termali utli (effettiv) huwa ta’ 1 558 °C, bl-aktar wieħed baxx, irreġistrat fl-1979, kien ta’ 1 102 °C filwaqt li l-ogħla kien 2 485 °C fl-1995. Il-limitu bijoloġiku għall-vinji huwa 1 000 °C. It-temperatura medja fl-istaġun tat-tkabbir hija 17,3 °C.

It-tipi ta’ ħamrija prevalenti fir-reġjun tal-inbid ta’ Miniș-Măderat huma: 40 % regosols ewtriċi, flimkien ma’ 40 % litosols ewtriċi u 20 % ħamrija ewtrika kemmxejn imġarrfa. Hawnhekk jinstabu wkoll: ħamrija kannella ewtrika, ħamrija pożolika kannella, psewdo-igglejżjata, u ħamrija sewda. Iż-żona ta’ Miniș-Ghioroc fiha ħamrija regosolika, litika u kannella. Rarament wieħed isib arġiliċi kannella, regosoliċi kannella u ħamrija kolluvjali. Dawn it-tipi ta’ ħamrija huma adattati sew biex id-dwieli jieħdu minnhom kwantitajiet żgħar mill-minerali li jeħtieġu, iżda li jagħtu lill-għeneb is-sensazzjoni u l-kwalità tagħhom. Il-kwantità żgħira u l-ispettru ta’ mikroelementi ta’ din iż-żona jistgħu jinstabu fil-valuri għoljin tal-estratt niexef li ma jnaqqasx u li rarament jinżel taħt il-25 g/l.

Fatturi umani

Il-fattur uman jinstab fit-tradizzjoni ta’ ħsad magħżul u ħsad f’diversi drabi, bi preferenza għall-varjetajiet li huma adattati sew għal ħsad tardiv jew għal ħsad meta l-għenba tkun misjura. L-influwenza tal-fattur uman fuq il-produzzjoni ta’ nbejjed frizzanti ta’ kwalità u nbejjed semifrizzanti tinstab fil-ġestjoni tal-irqajja’ tal-art, li f’kull waħda minnhom titkabbar varjetà speċifika.

Iż-żbir u t-tħarriġ tal-vinji għandu impatt fuq il-produzzjoni tal-għeneb maħsub għal inbejjed frizzanti ta’ kwalità u nbejjed semifrizzanti, bl-irqajja’ li jipprovdu r-rendimenti biex isiru dawn l-inbejjed jinkludu żbir taz-zkuk sekondarji (cordon), peress li s-sistema ta’ żbir maz-zokk prinċipali (Guyot) ma twassalx għall-iżvilupp ta’ livelli għoljin ta’ aċidità.

Il-preżenza tal-vitikultura fiż-żona ta’ Arad hija attestata mill-Isqof Gerard fix-xogħol tiegħu “Deliberatio”. Fl-1038, bil-kunsens tar-re, ir-Reġina Gisela tal-Ungerija għamlet donazzjoni ta’ tmien vinji li jinsabu fuq l-għolja ta’ Macra (illum magħrufa bħala Mocrea) u ta’ daqstant produtturi tad-dwieli. Fl-1562, id-dieċma kienet ta’ 141 000 litru, u ż-żoni kultivati kienu jaqbżu s-700 ettaru. Il-lokalità ta’ Miniș tfaċċat għall-ewwel darba fuq mappa tal-vitikultura fis-sena 1212.

Għall-kompetizzjoni internazzjonali tal-inbid tal-1864 f’Londra, intgħażlu nbejjed minn 11-il lokalità. L-inbejjed magħżula kienu primarjament minn Miniș u Măderat, bi wħud minnhom kienu jmorru lura għall-1785. Fil-Fiera Dinjija tal-1873 fi Vjenna, għadd ta’ kampjuni ta’ nbid ingħataw medalji onorarji. Fis-sena ta’ wara, inbid aromatiku minn Păuliș rebaħ l-ewwel premju f’Londra.

Il-varjetà Cadarcă ġiet ippreparata għall-ewwel darba fl-1744 f’Miniș, imbagħad fi Ghioroc, Păuliș u Cuvin.

Il-Mużew tad-Dwieli u l-Inbid, li jinsab fiċ-Ċentru tar-Riċerka u l-Iżvilupp ta’ Miniș fil-muniċipalità ta’ Ghioroc, fil-Kontea ta’ Arad, jifforma parti mill-Kumpless ta’ Mużewijiet ta’ Arad. Il-mużew ġie stabbilit fl-1988. Hawnhekk il-viżitaturi jistgħu jaraw għodod, tagħmir, dokumenti u ritratti relatati mal-istorja tal-vitikultura fir-reġjun tal-inbid ta’ Miniș-Măderat.

Dettalji tal-prodotti

L-inbejjed bojod u rożè mhux frizzanti miksuba f’din iż-żona huma estrattivi ħafna, bil-medja taz-zokkor taqbeż il-25 g/l fil-varjetajiet kollha u b’aċidità ogħla minn f’reġjuni Rumeni oħrajn li jipproduċu l-inbid; huma għandhom aromi ta’ grejpfrut u mangu.

L-inbejjed ħomor mhux frizzanti għandhom kulur intens, bis-saħħa tas-substrat kalkarju ferruġinuż li fuqu jiġu kkultivati l-vinji, u huma rikki fit-tannini u fl-antoċjanini, b’aromi ta’ lampun, frawli selvaġġ u tut, rikki u intensi u b’aċidità għolja, li tirrikjedi perjodu twil ta’ tqaddim kemm fil-bettija kif ukoll fil-flixkun. L-inbejjed ħomor l-iktar aċidużi huma dawk miksuba mill-varjetajiet Cadarcă u Burgund Mare. Madankollu, l-aċidità totali hija bbilanċjata u ssir evidenti waqt il-fermentazzjoni malolattika. Huwa estremament rari li nbid aħmar mhux frizzanti jkun lest li jiġi kkunsmat mingħajr mill-inqas sitt xhur ta’ tqaddim fil-bettija tal-ballut, filwaqt li l-perjodu meħtieġ għat-tqaddim huwa ogħla milli f’reġjuni oħrajn li jipproduċu l-inbid.

L-inbejjed frizzanti ta’ kwalità (aroma ta’ frott bħal tuffieħ tas-sajf, lanġas misjur, ħawħ abjad, fjuri tas-sebuqa) u l-inbejjed semifrizzanti (aroma ta’ lanġas tas-sajf, tuffieħ aħdar, grejpfrut, ward) għandhom aċidità li tiżgura l-freskezza u l-kapaċità tagħhom għat-tqaddim.

L-inbejjed mhux imqaddma huma friski ħafna, b’noti ta’ fjuri, frott u ċitru, noti minerali u effervexxenza li tibqa’ kostanti u fit-tul; l-imbejjed imqaddma joffru sett ta’ aromi bilanċjati ħafna bħal tal-frott isfar u tal-ħwawar.

Interazzjoni kawżali

Il-potenzjal enoklimatiku tar-reġjun tal-inbid li fih tinsab iż-żona demarkata għad-denominazzjoni ta’ oriġini kontrollata Miniș għandu punteġġ ta’ 4 666 fuq l-indiċi idroeljotermali (li għandu medda ta’ bejn 4 600 u 5 100). Dan ifisser li r-reġjun huwa partikolarment adattat għall-produzzjoni ta’ nbejjed ħomor u bojod mhux frizzanti.

Il-pożizzjoni tal-vinji fuq l-għoljiet mhux biss tipprovdi esponiment eċċellenti, iżda tiftaħ ukoll lid-dwieli għar-radjazzjoni solari li jwassal għal akkumulazzjoni ta’ zokkor u antoċjanini fl-għeneb maħsub għall-produzzjoni ta’ nbejjed ħomor mhux frizzanti. Il-kwantità ta’ pigmenti tal-antoċjanini fil-varjetà Cadarcă hija 60 % ogħla fuq il-ġnub tal-għoljiet milli fil-bażi tagħhom.

L-inbejjed ħomor mhux frizzanti miksubin minn ħamrija skeletrika, ferruġinuża għandhom kulur aħmar brillanti b’laqtiet rubini profondi u huma rikki u b’togħmiet evidenti ħafna. Hemm varjazzjonijiet ukoll fl-aċidità totali, li hija iktar baxxa fuq il-ġnub tal-għoljiet minħabba proporzjon iktar baxx ta’ aċidu maliku fl-għeneb.

Il-fattur naturali speċifiku għall-vinji ta’ Păuliș, Covăsânț, Ghioroc u Cuvinunde, li jinsab f’ħafna mill-varjetajiet ta’ nbid aħmar, jagħti lill-inbejjed prodotti kulur qawwi, delikatezza, noti ta’ frott irqiq aħmar jew ta’ fjuri tal-akaċja. L-inbejjed mill-varjetajiet indiġeni bħal Fetească neagră jew Cadarcă jew varjetajiet bħal Pinot Noir, Merlot, Cabernet Sauvignon u Cabernet Franc huma prodotti mill-vitikulturi bl-użu ta’ teknoloġiji tal-vinifikazzjoni tradizzjonali u tal-kunċett ta’ intervent minimu, mingħajr ħmiri magħżula, iżda bl-użu tal-kontroll tat-temperaturi, bi tqaddim fi btieti kbar u mbagħad żgħar, li ħafna minnhom jintużaw għal darbtejn, tlieta.

B’dan il-mod, l-inbejjed frizzanti ta’ kwalità jippreservaw il-qawwa tal-aromi speċifiċi u l-aċidità, anki jekk jgħaddu mill-proċess ta’ fermentazzjoni sekondarja, fejn jiġu arrikkiti b’aromi sekondarji (pasti, ħobż moħmi jew ħmira).

Peress li l-aċidità hija ogħla milli f’vinji Rumeni oħrajn, l-inbejjed bojod mhux frizzanti għandhom potenzjal tajjeb ta’ ħażna, bi wħud minnhom ikunu tajbin ukoll għat-tqaddim (Furmint, Chardonnay, Mustoasă de Măderat).

In-naħa tan-Nofsinhar u tal-Lvant tar-reġjun tal-inbid, li fih tip ta’ ħamrija tal-franka speċifika, tagħti lill-inbejjed ħomor kulur qawwi u ammont kbir ta’ tannini u antoċjanini lil ħafna mill-inbejjed ħomor mhux frizzanti (eż. Cadarcă, Burgund mare), u b’hekk jinħoloq perkors medju ta’ tqaddim ta’ mill-inqas sitt xhur fil-bettija u mbagħad tqaddim ulterjuri fil-flixkun.

Fil-produzzjoni tal-inbejjed bojod jintużaw teknoloġiji moderni u l-kontroll tat-temperaturi biex jiġu ppreservati l-freskezza u l-element ta’ frott tal-inbejjed. Ix-Chardonnay jitqaddem fil-btieti tal-ballut fuq il-karfa tal-inbid b’taħwida kull xahar, filwaqt li l-Furmint jitqaddem fi btieti żgħar.

Din l-enoklima b’influwenzi Mediterranji toħloq tonalitajiet aromatiċi għall-inbejjed mhux frizzanti miksuba mill-varjetajiet bojod, timlihom bil-flavonojdi u t-terpeni, u ttejjeb l-akkumulazzjoni taz-zokkor. Il-konċentrazzjoni taz-zokkor fuq il-ġenb tal-għoljiet u l-plateau jew fuq l-art imtarrġa hija 11 % u 8 % ogħla, rispettivament, milli fl-art f’livelli iktar baxxi.

Il-klima taż-żona toffri lill-għeneb u lill-most l-aċidità naturali ideali għall-produzzjoni ta’ nbejjed frizzanti u semifrizzanti. Il-widien li jżommu n-nida ta’ filgħodu fis-sajf sa nofsinhar jippermettu li l-inbejjed frizzanti ta’ kwalità u l-inbejjed semifrizzanti jżommu l-aċidità ġusta. L-irqajja’ magħżula għall-produzzjoni tal-għeneb li jkun se jintuża għal inbejjed frizzanti ta’ kwalità u nbejjed semifrizzanti huma dawk li f’dawn l-aħħar snin tħawlu fihom kloni bil-karatteristiċi li ġejjin: aċidità għolja (iktar minn 6 g/l ta’ aċidu tartariku), u rendimenti sostanzjalment ogħla (meta mqabbla mal-vinji qabel il-konverżjoni/ir-ristrutturar) b’kontenut iktar baxx ta’ antoċjanini u tannini meta mqabbla mal-varjetajiet tradizzjonali li minnhom intgħażlu dawn il-kloni.

Fil-livell tal-irqajja’, il-vitikulturi ħolqu diviżjoni tal-varjetajiet għall-finijiet ta’ ġestjoni tajba tal-ħsad meta jinkiseb it-tqaddim meħtieġ mill-enologi għall-produzzjoni u għat-tip ta’ żbir u tħarriġ tad-dwieli li għandu impatt pożittiv fuq il-produzzjoni ta’ nbejjed frizzanti ta’ kwalità u nbejjed semifrizzanti; l-istil tal-iżbir ġie aġġornat, billi issa ma għadux isir żbir taz-zkuk sekondarji (cordon) jew tat-tip Guyot sempliċi jew doppju, iżda żbir tat-tip Guyot Poussard, li jiżgura li jifdal kwantità ikbar ta’ zokk matur li jipprovdi n-nutrijenti meħtieġa biex jikber il-blanzun tal-frotta. Iż-żbir tat-tip Guyot Poussard użat fil-vinji l-ġodda jevita t-tneħħija taz-zokk matur, peress li d-dwieli jiġu msaħħa b’mod kostanti bi żbir annwali u xogħol fuq il-weraq (tiwi tar-rimjiet ’il bogħod miz-zkuk, it-tneħħija ta’ rimjiet sterili).

9. Rekwiżiti oħra applikabbli

Rekwiżiti ta’ kummerċjalizzazzjoni għall-inbejjed frizzanti ta’ kwalità

Qafas legali:

Fil-leġiżlazzjoni nazzjonali

Tip ta’ rekwiżit ieħor:

Dispożizzjonijiet addizzjonali relatati mat-tikkettar

Deskrizzjoni tar-rekwiżit:

Is-sena tal-ħsad tista’ tintuża biss fit-tikkettar ta’ nbejjed frizzanti ta’ kwalità, jekk ir-rendiment tal-inbid bażi għall-produzzjoni ta’ nbid frizzanti ta’ kwalità għolja bid-DOP Miniș ikun ġej kollu minn għeneb maħsud f’dik is-sena fiż-żona demarkata għad-DOP Miniș, jekk tkun sena bi ħsad partikolarment notevoli li joffri nbejjed eċċezzjonali.

Waħda minn dawn id-denominazzjonijiet ta’ vinji singoli li ġejjin tista’ tiżdied mad-DOP Miniș, kif jixtiequ l-produtturi: BARAŢCA, PĂULIŞ, DEALU DAICONI, DEALU CURŢII, DEALU LUNG, DEALU SOARELUI, MINIŞ, GHIOROC, CUVIN, FAŢA CRUCII, COVĂSÂNŢ, ŞIRIA, GALŞA, DEALUL CIREŞILOR, DEALUL ZĂNOAGA, DEALUL DOMNESC, MÂSCA, MĂDERAT, PÂNCOTA, DEALUL BOCRITA, ŞILINDIA.

Rekwiżiti ta’ kummerċjalizzazzjoni għall-inbejjed frizzanti ta’ kwalità

Qafas legali:

Fil-leġiżlazzjoni nazzjonali

Tip ta’ rekwiżit ieħor:

Dispożizzjonijiet addizzjonali relatati mat-tikkettar

Deskrizzjoni tar-rekwiżit:

Il-kliem “iffermentat fil-flixkun” jista’ jintuża biss jekk:

—	il-prodott ikun sar frizzanti permezz tat-tieni fementazzjoni alkoħolika fil-flixkun

—	it-tul tal-proċess tal-produzzjoni, inkluż il-proċess ta’ tqaddim fl-impriża fejn ikun sar il-prodott, mill-bidu tal-proċess tal-fermentazzjoni biex il-cuvée jsir inbid frizzanti ta’ kwalità, kien tal-inqas disa’ xhur

—	il-proċess ta’ fermentazzjoni biex il-cuvée jsir inbid frizzanti ta’ kwalità u l-preżenza tal-cuvée fuq il-karfa tal-inbid ikunu damu mill-inqas 90 jum.

Rekwiżiti ta’ kummerċjalizzazzjoni għall-inbejjed frizzanti ta’ kwalità

Qafas legali:

Fil-leġiżlazzjoni nazzjonali

Tip ta’ rekwiżit ieħor:

Dispożizzjonijiet addizzjonali relatati mat-tikkettar

Deskrizzjoni tar-rekwiżit:

Il-kliem “iffermentat fil-flixkun bil-metodu tradizzjonali” jew “metodu tradizzjonali” jew “metodu klassiku” jew “metodu tradizzjonali klassiku” jista’ jintuża biss jekk il-prodott:

—	ikun sar frizzanti permezz tat-tieni fermentazzjoni alkoħolika fil-flixkun.

—	ikun qagħad f’kuntatt mal-karfa għal mill-inqas disa’ xhur kontinwi fl-istess impriża mill-mument li l-cuvée ġie kkostitwit

—	ġie sseparat mill-karfa permezz tat-tiswib.

Il-kliem “iffermentat fit-tank” jew “iffermentat f’kontenitur/awtoklava” jista’ jintuża, dment li l-prodott:

—

ikun għadda minn fermentazzjoni sekondarja f’tank “acrotofor”/awtoklava/tank tal-fermentazzjoni/ċisterna tal-fermentazzjoni/kontenitur tal-metall reżistenti għall-pressa, u mbagħad ġie ttrasferit f’kontenituri oħrajn permezz tal-filtrazzjoni, segwit mill-ibbottiljar (metodu mhux kontinwu jew metodu Marinotti/Charmat).

—

ikun għadda minn proċedura ta’ fermentazzjoni għal ġo sistema b’għadd ta’ kontenituri konnessi iżda ssiġillati ermetikament. L-inbid bażi maħsub għall-inbid frizzanti ta’ kwalità, deossiġinat bijoloġikament u mħallat tajjeb mal-likur zokkri u l-karfa tal-ħmira, jiġi miżjud fis-sistema kontinwament (fluss kontinwu jew metodu Asti).

Link għall-ispeċifikazzjoni tal-prodott

http://onvpv.ro/sites/default/files/caiet_de_sarcini_doc_minis_modif_cf_notif_908_11.05.2020_la_cererea_nr._1391_21.06.2017_no_track_changes.pdf

(1) ĠU L 347, 20.12.2013, p. 671.

7.7.2021

Il-Ġurnal Uffiċjali tal-Unjoni Ewropea

C 269/25

Pubblikazzjoni tad-Dokument Uniku emendat wara l-approvazzjoni ta’ emenda minuri skont it-tieni subparagrafu tal-Artikolu 53(2) tar-Regolament (UE) Nru 1151/2012

(2021/C 269/10)

Il-Kummissjoni Ewropea approvat din l-emenda minuri f’konformità mat-tielet subparagrafu tal-Artikolu 6(2) tar-Regolament Delegat tal-Kummissjoni (UE) Nru 664/2014 (1).

L-applikazzjoni għall-approvazzjoni ta’ din l-emenda minuri tista’ tiġi kkonsultata fil-bażi tad-data tal-Kummissjoni eAmbrosia.

DOKUMENT UNIKU

“FARRO DI MONTELEONE DI SPOLETO”

Nru tal-UE: PDO-IT-0603-AM01 – 26 ta’ Frar 2021

DOP (X) IĠP ( )

1. Isem

“Farro di Monteleone di Spoleto”

2. Stat Membru jew pajjiż terz

L-Italja

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott

1.6.	Frott, ħaxix u ċereali, friski jew ipproċessati

3.2. Deskrizzjoni tal-prodott li għalih japplika l-isem f’(1)

Il-“Farro di Monteleone di Spoleto” qamħ emmer huwa ekotip lokali tal-ispeċi Triticum dicoccum. Huwa tipiku taż-żona ta’ produzzjoni li, bis-saħħa tal-addattament għall-klima u għall-ħamrija li seħħ maż-żmien, żviluppa l-karatteristiċi morfoloġiċi/fiżjoloġiċi li ġejjin u li jiddistingwuh minn tipi ta’ qamħ emmer li jinkiseb minn żoni ġeografiċi oħrajn: habitus rebbiegħi; l-għoli tal-pjanta huwa inqas minn 120 cm; livell moderat ta’ kemm joħorġu rimjiet; meta jkunu ħarġu r-rimjiet kollha jkun laħaq kiber nofs l-għoli tiegħu; pjanti bil-bonti rqaq u weraq bi glawkexxenza li tvarja bejn dgħajfa u medja; weraq żgħar, li għandhom tendenza jkunu ċatti u li meta jkunu immaturaw għal kollox, ikollhom lewn abjad jagħti fil-griż; il-ħliefa tkun imqabbda sew mal-kariosside; il-kariosside titfarrak malajr u għandha ħafna pil apikali u hi ttondjata sew; il-kulur huwa kannella ċar fl-ambra, karatteristika li tagħti karattru partikolari li tiddistingwi l-prodott, u li tinsab fil-prodotti kollha anke wara li jintaħnu. Il-“Farro di Monteleone di Spoleto” jiġi kkummerċjalizzat fil-forom li ġejjin: FARRO INTEGRALE [qamħ emmer integrali]: ħbub tawwalin, mdawrin u ta’ kulur kannella ċar fl-ambra, li jirriżultaw f’palat konsistenti u xott; FARRO SEMIPERLATO: [qamħ emmer “semiperlato”]: huwa differenti mill-emmer integrali għax il-wiċċ tal-kariosside huwa kemm kemm raff u jibqa’ sħiħ, huwa iktar ċar mill-emmer integrali u fil-palat joħroġ iktar artab, u għalhekk huwa rrakkomandat għas-sopop u l-insalati; FARRO SPEZZATO: [qamħ emmer imfarrak]: dan jinkiseb minn ħbub mingħajr ħliefa tad-dqiq emmer integrali, imfarrak f’biċċiet u mbagħad magħżul skont id-daqs permezz ta’ magna li tgħarblu, ta’ lewn kannella ċar fl-ambra b’uċuħ li jitfarrku malajr; SEMOLINO DI FARRO [qamħ emmer tad-dqiq durum]: jinkiseb mit-tħin tal-qamħ emmer integrali; iktar fin mill-qamħ emmer imfarrak iżda ma jkunx isu trab minħabba l-karatteristika ta’ xebh mal-ħġieġ; fil-palat jinħall u jsir donnu għaġina; ta’ lewn kannella ċar ħafna.

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

—

3.4. Passi speċifiċi tal-produzzjoni li jridu jsiru fiż-żona ġeografika ddefinita

Ix-xogħol tat-tkabbir, is-separazzjoni, it-tqaxxir, it-tħin u t-tifrik tal-“Farro di Monteleone di Spoleto” DOP, imsemmija fl-erba’ tipoloġiji tradizzjonali: ħbub integrali, “semiperlato”, imfarrak u d-dqiq durum, iridu jsiru bilfors fiż-żona tal-produzzjoni biex ma tinbidilx il-kwalità u jiġu żgurati l-karatteristiċi tipiċi tal-prodott.

3.5. Regoli speċifiċi dwar it-tqattigħ, it-taħkik, l-ippakkjar, eċċ.

Il-“Farro di Monteleone di Spoleto” huwa rilaxxat għall-konsum f’pakketti li jiżnu minn 100 g sa 25 kg bl-użu, għat-tipi kollha ta’ prodotti, jiġifieri għal ħbub integrali, “semiperlato” u mfarrak u għad-dqiq durum, kwalunkwe materjali u teknoloġiji li huma konformi mal-leġiżlazzjoni fis-seħħ. Il-pakketti kollha tal-“Farro di Monteleone di Spoleto” DPO jridu jkunu ssiġillati, u l-pakketti jridu jkunu ġodda, nodfa, mingħajr effetti tossiċi u f’konformità mal-leġiżlazzjoni nazzjonali u tal-UE fis-seħħ. L-istess jgħodd għal stampi jew karti li jkunu jmissu mal-prodott.

3.6. Regoli speċifiċi dwar it-tikkettar

Huwa mandatorju li l-pakketti jkollhom il-logo tad-denominazzjoni, is-simbolu grafiku tal-UE u l-informazzjoni u r-referenzi li jikkorrispondu mar-rekwiżiti tal-liġi fuq it-tikketta f’tipa ċara u li tinqara. Il-logo huwa ffurmat minn rettangolu, li fuq naħa tiegħu tidher ix-xbieha ta’ profil ta’ ljun wieqaf fuq saqajh ta’ wara b’żewġ sbula ta’ qamħ emmer f’sieq waħda, u fil-parti l-oħra, sitt sbula ta’ qamħ emmer.

Fil-każ li jintuża l-logo fuq it-tikketta, huwa mandatorju li jiġu osservati b’mod strett il-proporzjonijiet tat-tipa, f’konformità mar-rappreżentazzjoni grafika li tidher kif ġej.

Madankollu, il-logo jista’ tintuża fi skala ta’ kulur griż jew b’ kulur wieħed.

Il-prodotti magħmula bl-użu tal-“Farro di Monteleone di Spoleto” DOP, anki wara l-ipproċessar, jistgħu jiġu kkummerċjalizzati f’pakketti li juru dak l-isem iżda mingħajr il-logo tal-UE. Din ir-referenza għall-isem għandha tinqara kif ġej: “prodott magħmul bil-“Farro di Monteleone di Spoleto”. Dawn id-dispożizzjonijiet jistrieħu fuq il-kundizzjoni li d-denominazzjoni ta’ oriġini protetta, ċertifikata bħala tali, tkun marbuta biss mal-uniku ingredjent li ntuża li jagħmel parti mill-ispeċi tat-Triticum dicoccum (Schübler) u li r-referenza ssir b’tali mod li jiġi żgurat li ma jkunx hemm dubju fost il-konsumaturi li l-protezzjoni tad-DOP tikkonċerna biss l-ingredjent u mhux il-prodott ipproċessat.

4. Definizzjoni fil-qosor taż-żona ġeografika

Iż-żona ta’ produzzjoni tal-“Farro di Monteleone di Spoleto” DOP tinsab fiż-żona tal-muntanji fix-Xlokk tal-Provinċja ta’ Perugia u tinkludi ż-żona amministrattiva kollha tal-muniċipalitajiet ta’ Monteleone di Spoleto u ta’ Poggiodomo u parti mit-territorji amministrattivi tal-muniċipilitajiet ta’ Cascia, Sant’Anatolia di Narco, Vallo di Nera u Scheggino, f’altitudnijiet ta’ 700 m fuq il-livell tal-baħar jew aktar.

5. Rabta maż-żona ġeografika

Iż-żona li tikkonċerna l-kultivazzjoni ta’ dan il-prodott hija kkaratterizzata minn artijiet pendili, kalkarużi, b’ġebel tal-ġir li jinsabu ‘l fuq minn 700 metru fuq il-livell tal-baħar li ma jħallux li joqgħod l-ilma fl-istaġuni umdi. Il-ħamrija għandha sustanza organika medja, b’livelli għoljin ta’ fosfru u livelli baxxi ta’ potassju. Il-forma tal-livell kostanti hija l-oriġini tal-karatteristiċi partikolari tal-klima tat-territorju bi xtiewi twal u kesħin ħafna u ta’ sikwit bis-silġ li jibqgħu sejrin sa Mejju, u bi ftit ġimgħat ta’ sajf b’temperaturi għoljin ħafna matul il-ġurnata. Dawn huma l-kundizzjonijiet klimatiċi li għalihom jirreżisti tajjeb l-ekotip tal-varjetà “Farro di Monteleone di Spoleto” u li għalihom adatta ruħu matul iż-żmien.

Il-karatteristika li trendi lill-“Farro di Monteleone di Spoleto” DOP uniku hija l-kariosside ta’ lewn kannella ċar fl-ambra bħala speċi ta’ frak tal-ħġieġ u iebsa bi fdalijiet li għandhom mid-dqiq. Is-sbul ċatti, qosra, kemxejn għat-tond, b’sifa li ma tkunx twila żżejjed u kemm kemm mifruxa, jagħtu d-deskrizzjoni karatteristika ta’ dan il-prodott.

Il-karatteristiċi fiżiċi u organolettiċi partikolari tal-“Farro di Monteleone di Spoleto” u fuq kollox il-kariosside tipikament ta’ kulur minn lewn l-ambra u li għandha konsistenza li meta tinqasam tkun tixbah il-frak tal-ħġieġ, huma dovuti għat-taħlita ta’ kundizzjonijet pedoklimatiċi taż-żona tal-produzzjoni u b’mod partikolari għall-artijiet bil-ġebel tal-ġir li jinsabu ’l fuq minn 700 metru fuq il-livell tal-baħar li, propju minħabba l-pożizzjoni tagħhom, ma jħallux li joqgħod ilma fihom matul l-istaġuni umdi. It-testijiet u l-istudji xjentifiċi urew li l-użu taż-żrieragħ tal-“Farro di Monteleone di Spoleto” f’partijiet oħra tal-wied ta’ Valnerina jagħti prodott li maż-żmien jitlef il-karatteristiċi speċifiċi tiegħu. Dan jagħti xhieda li jeżisti proċess b’saħħtu ta’ ħolqien ta’ ekotip li huwa marbut maż-żona tal-produzzjoni u li hu kkawżat, fost affarijiet oħra, mill-iżolament ġeografiku, tant li joħloq varjetà lokali speċifika. Fil-fatt, ikun jeħtieġ biss li wieħed jersaq lejn żoni fil-qrib għal-ħabba biex tinbidel minn waħda li tixbah lill-ħġieġ għal waħda li għandha mit-dqiq. Din il-pjanta għandha habitus rebbiegħi u hija addatta biex tinżera’ fl-aħħar tax-xitwa fiż-żoni tal-muntanji fejn l-artijiet li huma pendili, kalkarużi, b’ġebel tal-ġir b’ħafna fosfru u bi ftit potassju, li ma jħallux li joqgħod l-ilma fl-istaġuni umdi. Il-klima hija waħda muntanjuża bi xtiewi kesħin ħafna u ta’ spiss bis-silġ, li jdumu sejrin sa Mejju u bi ftit ġimgħat ta’ sajf meta t-temperatura matul il-ġurnata tkun għolja ħafna. Il-“Farro di Montleleone di Spoleto” adatta ruħu matul iż-żmien għal dawn il-kundizzjonijiet klimatiċi u rreżistihom b’mod tajjeb ħafna. Sejbiet storiċi antiki huma xhieda oħra tar-rabta li teżisti bejn il-prodott u ż-żona ta’ fejn jiġi kkultivat. Instabu fdalijiet ta’ ċereali fit-“tomba della biga” [“tomb of the chariot”], qabar ta’ żmien l-etruski li jmur lura għas-seklu VI Q.K, fosthom anki kariossidi tal-qamħ emmer li probabbilment huma tal-ispeċi li tradizzjonalment tiġi kkultivata llum f’Monteleone di Spoleto, jiġifieri t-Triticum dicoccum. Dan juri d-disseminazzjoni u l-użu wiesa tiegħu fil-kultivazzjoni taċ-ċereali ta’ dak iż-żmien. Riċerka fl-arkivji li twettqet fiż-żona ta’ Monteleone di Spoleto ippermettiet l-irkupru u l-konservazzjoni ta’ provi dokumentati li juru li sa mis-Seklu XVI, il-kultivazzjoni tal-qamħ emmer kienet ipprattikata sew, imbagħad l-użu tiegħu daħal fid-drawwiet agrikoli taż-żona fis-sekli ta’ wara sal-ġurnata tal-lum. Għaldaqstant, jidher ċar kemm il-kapaċità umana maż-żmien kienet importanti ħafna fir-rigward tat-tekniki għax-xogħol fir-raba’ u biex jintgħażlu ż-żminijiet tajbin għaż-żrigħ u l-ħsad. Din il-kapaċità għaddiet minn ġenerazzjoni għall-oħra, u ppermettiet it-titjib kostanti u l-produzzjoni miżjuda ta’ dan iċ-ċereali eċċellenti bi kwalitajiet enerġetiċi u rifreskanti għoljin ħafna u li ċertament mhumiex inqas minn oħrajn. Fl-aħħar, ir-riċetti tradizzjonali tas-sopop u l-brodijiet għall-okkażjonijiet festivi u speċjali għenu biex dan il-prodott jiġi apprezzat fuq skala akbar.

Referenza għall-pubblikazzjoni tal-Ispeċifikazzjoni tal-Prodott

(it-tieni subparagrafu tal-Artikolu 6(1) ta’ dan ir-Regolament)

It-test sħiħ tal-Ispeċifikazzjoni tal-Prodott disponibbli hawn: http://www.politicheagricole.it/flex/cm/pages/ServeBLOB.php/L/IT/IDPagina/3335

jew inkella:

billi żżur direttament il-paġna ewlenija tal-Ministeru tal-Politika Agrikola, tal-Ikel u tal-Forestrija (www.politicheagricole.it) u tikklikkja fuq “Qualità” (fin-naħa ta’ fuq tal-lemin tal-iskrin), u mbagħad fuq “Prodotti DOP IGP STG” (fuq in-naħa tax-xellug tal-iskrin) u fl-aħħar tagħfas fuq “Disciplinari di Produzione all’esame dell’UE”.

(1) ĠU L 179, 19.6.2014, p. 17.

		ISSN 1977-0987
Il-Ġurnal Uffiċjali tal-Unjoni Ewropea		C 269

Edizzjoni bil-Malti	Informazzjoni u Avviżi	Volum 64 7 ta' Lulju 2021

Werrej		Paġna
	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2021/C 269/01	Irtirar ta’ avviz ta’ konċentrazzjoni (Il-Każ M.10285 — UIR/Hines/Assets) ( 1 )	1
2021/C 269/02	Ebda oppożizzjoni għal konċentrazzjoni notifikata (Il-Każ M.10327 — Elexent/GP JOULE Connect/Elexent DACH JV) ( 1 )	2

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2021/C 269/03	Rata tal-kambju tal-euro — Is-6 ta’ Lulju 2021	3
	INFORMAZZJONI MILL-ISTATI MEMBRI
2021/C 269/04	Avviż ta’ informazzjoni tal-Kummissjoni skont l-Artikolu 17(5) tar-Regolament 1008/2008 tal-Parlament Ewropew u tal-Kunsill dwar regoli komuni għall-operat ta’ servizzi tal-ajru fil-Komunità — Stedina għall-preżentazzjoni tal-offerti fir-rigward tal-operat ta’ servizzi tal-ajru skedati f’konformità mal-obbligi tas-servizz pubbliku ( 1 )	4

	Munita	Rata tal-kambju
USD	Dollaru Amerikan	1,1838
JPY	Yen Ġappuniż	130,99
DKK	Krona Daniża	7,4361
GBP	Lira Sterlina	0,85450
SEK	Krona Żvediża	10,1490
CHF	Frank Żvizzeru	1,0930
ISK	Krona Iżlandiża	147,10
NOK	Krona Norveġiża	10,2150
BGN	Lev Bulgaru	1,9558
CZK	Krona Ċeka	25,610
HUF	Forint Ungeriż	353,40
PLN	Zloty Pollakk	4,4941
RON	Leu Rumen	4,9264
TRY	Lira Turka	10,2514
AUD	Dollaru Awstraljan	1,5633
CAD	Dollaru Kanadiż	1,4640
HKD	Dollaru ta’ Hong Kong	9,1942
NZD	Dollaru tan-New Zealand	1,6703
SGD	Dollaru tas-Singapor	1,5920
KRW	Won tal-Korea t’Isfel	1 341,67
ZAR	Rand ta’ l-Afrika t’Isfel	16,8278
CNY	Yuan ren-min-bi Ċiniż	7,6545
HRK	Kuna Kroata	7,4855
IDR	Rupiah Indoneżjan	17 151,39
MYR	Ringgit Malażjan	4,9193
PHP	Peso Filippin	58,753
RUB	Rouble Russu	86,9726
THB	Baht Tajlandiż	38,130
BRL	Real Brażiljan	6,0292
MXN	Peso Messikan	23,4590
INR	Rupi Indjan	88,2126

	V Avviżi
	PROĊEDURI DWAR L-IMPLIMENTAZZJONI TAL-POLITIKA TAL-KOMPETIZZJONI
	Il-Kummissjoni Ewropea
2021/C 269/05	Avviż minn qabel ta’ konċentrazzjoni (Il-Każ M.10348 — Pagamenti Globali/Erste Group/Payone Businesses) — Każ li jista’ jiġi kkunsidrat għal proċedura ssimplifikata ( 1 )	5
2021/C 269/06	Avviż minn qabel ta’ konċentrazzjoni (Il-Każ M.10268 — SYNNEX/Tech Data) — Każ li jista’ jiġi kkunsidrat għal proċedura ssimplifikata ( 1 )	7
2021/C 269/07	Avviż minn qabel ta’ konċentrazzjoni (Il-Każ M.10286 — BNPPF/bpost bank) — Każ li jista’ jiġi kkunsidrat għal proċedura ssimplifikata ( 1 )	9
	ATTI OĦRAJN
	Il-Kummissjoni Ewropea
2021/C 269/08	Pubblikazzjoni tad-dokument uniku emendat skont l-approvazzjoni ta’ emenda minuri f’konformità mal-Artikolu 53(2), it-tieni subparagrafu tar-Regolament (UE) Nru 1151/2012	10
2021/C 269/09	Pubblikazzjoni ta’ applikazzjoni għal emenda tal-Unjoni għall-Ispeċifikazzjoni tal-Prodott għal isem fis-settur tal-inbid skont l-Artikolu 97(3) tar-Regolament (UE) Nru 1308/2013 tal-Parlament Ewropew u tal-Kunsill	14
2021/C 269/10	Pubblikazzjoni tad-Dokument Uniku emendat wara l-approvazzjoni ta’ emenda minuri skont it-tieni subparagrafu tal-Artikolu 53(2) tar-Regolament (UE) Nru 1151/2012	25


	(1) Test b'rilevanza għaż-ŻEE.