KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA

21.5.2021

Il-Ġurnal Uffiċjali tal-Unjoni Ewropea

C 194/3

Opinjoni tal-Kumitat ta’ Konsulenza dwar il-fużjonijiet fil-laqgħa tiegħu tal-1 ta’ Diċembru 2020 dwar abbozz ta’ deċiżjoni preliminari b’rabta mal-Każ M.9660 – Google/Fitbit

Relatur: Il-Polonja

(Test b’rilevanza għaż-ŻEE)

(2021/C 194/03)

Konċentrazzjoni

Il-Kumitat ta’ Konsulenza (15-il Stat Membru) jaqbel mal-Kummissjoni li t-tranżazzjoni notifikata tikkostitwixxi konċentrazzjoni skont it-tifsira tal-Artikolu 3(1)(b) tar-Regolament tal-Kunsill (KE) Nru 139/2004 tal-20 ta’ Jannar 2004 dwar il-kontroll tal-konċentrazzjonijiet bejn l-impriżi (“ir-Regolament dwar l-Għaqdiet”) (1).

Il-Kumitat ta’ Konsulenza (15-il Stat Membru) jaqbel mal-Kummissjoni li t-tranżazzjoni notifikata taqa’ taħt dimensjoni tal-UE skont l-Artikolu 1(2) tar-Regolament dwar l-Għaqdiet.

Definizzjoni tas-suq

Definizzjoni tas-suq tal-prodott

Il-Kumitat ta’ Konsulenza jaqbel mal-konklużjonijiet li laħqet il-Kummissjoni fl-abbozz tad-Deċiżjoni fir-rigward tad-definizzjoni tas-swieq tal-prodotti rilevanti għal:

a)	Il-provvista ta’ apparat li jintlibes mal-polz (jaqblu 15-il Stat Membru);

b)	Il-provvista ta’ sistemi operattivi (OSs) liċenzjabbli għal apparati mobbli intelliġenti u l-provvista ta’ OSs liċenzjabbli għal apparat li jintlibsu mal-polz (jaqblu 15-il Stat Membru);

Il-provvista ta’ app stores għal xi pjattaforma partikolari ta’ OS ta’ apparati mobbli intelliġenti (b’mod partikolari l-app stores tal-Android) u l-provvista ta’ app stores għal xi pjattaforma partikolari ta’ OS ta’ apparati li jintlibes mal-polz (b’mod partikolari app stores għal apparat ta’ Wear OS u Fitbit) (jaqblu 15-il Stat Membru);

d)	Il-provvista ta’ servizzi ġenerali ta’ tiftix (15-il Stat Membru jaqblu);

e)	Il-provvista ta’ servizzi ta’ reklamar ta’ tiftix online u l-provvista ta’ servizzi ta’ reklamar li jidher online (jaqblu 15-il Stat Membru);

f)	Il-provvista ta’ networks ta’ reklamar ibbażat fuq tfittxija online (14-il Stat Membru jaqblu. Stat Membru wieħed (1) jastjeni);

g)	Il-provvista ta’ servizzi SSP ta’ wiri ta’ reklami (14-il Stat Membru jaqblu. Stat Membru wieħed (1) jastjeni);

h)	Il-provvista ta’ servizzi DSP ta’ wiri ta’ reklami (14-il Stat Membru jaqblu. Stat Membru wieħed (1) jastjeni);

i)	Il-provvista ta’ servizzi ta’ network ta’ wiri ta’ reklami (14-il Stat Membru jaqblu. Stat Membru wieħed (1) jastjeni);

j)	Il-provvista ta’ servizzi ta’ pubblikar u ta’ servers ta’ wiri ta’ reklami (14-il Stat Membru jaqblu. Stat Membru wieħed (1) jastjeni);

k)	Il-provvista ta’ servizzi ta’reklamaru u ta’ servers ta’ wiri ta’ reklami (14-il Stat Membru jaqblu. Stat Membru wieħed (1) jastjeni);

l)	Il-provvista ta’ servizzi tal-analitika (14-il Stat Membru jaqblu); Stat Membru wieħed (1) jastjeni);

m)	Il-provvista ta’ apps li jgħinu fis-saħħa fiżika (15-il Stat Membru jaqblu);

n)	Il-provvista bl-imnut ta’ servizzi ta’ pagament bil-mowbajl (jaqblu 15-il Stat Membru);

o)	Il-provvista ta’ apps tan-navigazzjoni li joffru navigazzjoni pass pass (jaqblu 15-il Stat Membru);

p)	Il-provvista ta’ assistenti virtwali (15-il Stat Membru jaqblu);

q)	Il-provvista ta’ servizzi ta’ distribuzzjoni ta’ mużika diġitali (15-il Stat Membru jaqblu);

r)	Il-provvista ta’ servizzi ta’ traduzzjoni diġitali (15-il Stat Membru jaqblu);

s)	Il-provvista tal-infrastruttura tal-cloud u l-analitika tad-data (jaqblu 15-il Stat Membru);

t)	Il-provvista ta’ monitoraġġ tal-pazjenti (15-il Stat Membru jaqblu);

u)	Il-provvista ta’ data għar-riċerka medika u l-evidenza mid-dinja reali (real world evidence - RWE) (jaqblu 15-il Stat Membru);

v)	Il-provvista ta’ servizzi ta’ benesseri korporattiva (15-il Stat Membru jaqblu).

Definizzjoni tas-suq ġeografiku

Il-Kumitat ta’ Konsulenza (15-il Stat Membru) jaqbel mal-konklużjonijiet li waslet għalihom il-Kummissjoni fl-abbozz tad-Deċiżjoni fir-rigward tad-definizzjoni tas-swieq ġeografiċi relevanti għas-swieq elenkati fil-mistoqsija nru 3.

Valutazzjoni kompetittiva

Il-Kumitat ta’ Konsulenza (15-il Stat Membu) jaqbel mal-valutazzjoni tal-Kummissjoni li t-tranżazzjoni notifikata tqajjem tħassib dwar it-tisħiħ tal-pożizzjoni tas-suq ta’ Google fil-forniment ta’ reklamar fit-tiftix online, ir-reklamar fuq il-wiri online u l-forniment ta’ “servizzi ad tech”.

Il-Kumitat ta’ Konsulenza (15-il Stat Membru) jaqbel mal-valutazzjoni tal-Kummissjoni li t-tranżazzjoni notifikata tqajjem tħassib dwar l-esklużjoni ta’ dħul ta’ fornituri ta’ servizzi tal-kura tas-saħħa diġitali kkawżata mir-restrizzjoni tal-aċċess tagħhom għal Fitbit Web API (u, għalhekk, l-aċċess tagħhom għad-data tal-utenti ta’ Fitbit).

Il-Kumitat ta’ Konsulenza (15-il Stat Membru) jaqbel mal-valutazzjoni tal-Kummissjoni li t-tranżazzjoni notifikata tqajjem tħassib dwar l-ingranaġġ minn Google tal-pożizzjoni dominanti tiegħu fil-provvista ta’ OSs liċenzjabbli għal apparati mobbli intelliġenti lis-suq għall-provvista ta’ apparati li jintlibes fuq il-polz (u segmenti possibbli tiegħu).

Il-Kumitat ta’ Konsulenza jaqbel mal-valutazzjoni tal-Kummissjoni li t-tranżazzjoni notifikata x’aktarx li ma xxekkilx b’mod sinifikanti l-kompetizzjoni effettiva, bħala riżultat ta’ effetti orizzontali li jirriżultaw mill-kombinazzjoni tal-bażijiet tad-data tal-utenti ta’ Google u Fitbit u l-kapaċitajiet tal-ġbir tad-data għall-użu:

a)	fil-qasam tas-servizzi ġenerali ta’ tiftix (14-il Stat Membru jaqblu. Stat Membru wieħed (1) ivvota kontra);

b)	fil-qasam tal-kura diġitali tas-saħħa (13-il Stat Membru jaqblu. żewġ (2) Stati Membri astjenew).

Il-Kumitat ta’ Konsulenza jaqbel mal-valutazzjoni tal-Kummissjoni li t-tranżazzjoni notifikata x’aktarx li ma xxekkilx b’mod sinifikanti l-kompetizzjoni effettiva:

a)	fis-suq għal apparat li jintlibes fuq il-polz u segmenti possibbli, bħala riżultat ta’ kwalunkwe strateġija ta’ esklużjoni ta’ dħul fir-rigward ta’ Wear OS ta’ Google (15-il Stat Membru qablu);

fis-suq tal-apparati li jintlibes fuq il-polz u segmenti possibbli, bħala riżultat ta’ kwalunkwe strateġija ta’ esklużjoni ta’ dħul fir-rigward tal-apps u s-servizzi ta’ Google (Google Search, Google Fit, Google Pay, Google Maps, Assistent Google, Google Play Music/YouTube Music u Google Translate) (14-il Stat Membru qablu. Stat Membru wieħed (1) astjena);

c)	fis-suq għal apparat li jintlibes fuq il-polz u segmenti possibbli, bħala riżultat ta’ kwalunkwe strateġija ta’ esklużjoni ta’ dħul fir-rigward ta’ Google Play (15-il Stat Membru qablu);

d)	fis-suq għal apparat li jintlibes fuq il-polz u segmenti possibbli, bħala riżultat ta’ kwalunkwe strateġija ta’ esklużjoni ta’ dħul fir-rigward ta’ Google Search (14-il Stat Membru qablu. Stat Membru wieħed (1) astjena);

fis-swieq għall-provvista ta’ (i) servizzi ġenerali ta’ tiftix, (ii) assistenti virtwali, (iii) apps tas-saħħa u tal-fitness, (iv) servizzi ta’ ħlas bil-mowbajl, (v) servizzi ta’ distribuzzjoni ta’ mużika diġitali, (vi) apps ta’ navigazzjoni li joffru navigazzjoni pass pass u (vii) servizzi ta’ traduzzjoni diġitali (u segmenti possibbli tagħhom), bħala riżultat ta’ kwalunkwe strateġija ta’ esklużjoni ta’ dħul fir-rigward ta’ App Gallery ta’ Fitbit (jew kwalunkwe app store suċċessur għal apparat Fitbit) (14-il Stat Membru qablu. Stat Membru wieħed (1) astjena);

fis-swieq għall-provvista ta’ (i) servizzi ġenerali ta’ tiftix, (ii) apps tas-saħħa u tal-fitness, (iii) servizzi ta’ ħlas bil-mowbajl, (iv) apps tan-navigazzjoni li joffru navigazzjoni bir-rotazzjoni; (v) assistenti virtwali; (vi) servizzi ta’ distribuzzjoni ta’ mużika diġitali u (vii) servizzi ta’ traduzzjoni diġitali (u segmenti possibbli tagħhom), bħala riżultat ta’ kwalunkwe aċċess mill-entità fuża għal informazzjoni kummerċjalment sensittiva (15-il Stat Membru qablu).

Impenji

10.

Il-Kumitat ta’ Konsulenza qabel mal-valutazzjoni tal-Kummissjoni li l-Impenji dwar ir-Reklami kif offruta mill-Parti Notifikanti fl-4 ta’ Novembru tneħħi t-tħassib dwar it-tisħiħ tal-pożizzjoni tas-suq ta’ Google fil-provvista ta’ reklamar fit-tiftix online, ir-reklamar fuq il-wiri online u l-forniment ta’ “servizzi ad tech”. 11-il Stat Membru vvutaw favur. Żewġ (2) Stati Membri astjenew. Żewġ (2) Stati Membri vvotaw kontra.

11.

Il-Kumitat ta’ Konsulenza jaqbel mal-konklużjoni tal-Kummissjoni li l-Impenn dwar Aċċess għall-Web API kif offrut mill-Parti Notifikanti fl-4 ta’ Novembru jneħħi t-tħassib dwar l-esklużjoni ta’ dħul ta’ fornituri ta’ servizzi tal-kura diġitali tas-saħħa kkawżati mir-restrizzjoni tal-aċċess tagħhom għal Fitbit Web API. 12-il Stat Membru vvutaw favur. Żewġ Stati Membri astjenew. Stat Membru wieħed (1) ivvota kontra.

12.

Il-Kumitat ta’ Konsulenza jaqbel mal-konklużjoni tal-Kummissjoni li l-Impenn tal-API ta’ Android kif offrut mill-Parti Notifikanti fl-4 ta’ Novembru jneħħi t-tħassib dwar l-ingranaġġ ta’ Google tal-pożizzjoni dominanti tiegħu fil-provvista ta’ OSs liċenzjabbli għal apparati mobbli intelliġenti lis-suq għall-provvista ta’ apparat li jintlibes fuq il-polz. 12-il Stat Membru vvutaw favur. Żewġ Stati Membri astjenew. Stat Membru wieħed (1) ivvota kontra.

13.

Il-Kumitat ta’ Konsulenza jaqbel mal-Kummissjoni li, soġġett għall-konformità sħiħa mal-impenjji finali offruti mill-Parti Notifikanti fl-4 ta’ Novembru 2020, it-tranżazzjoni notifikata mhux probabbli li tfixkel b’mod sinifikanti l-kompetizzjoni effettiva fis-suq intern jew f’xi parti sostanzjali minnu. 11-il Stat Membru vvutaw favur. Żewġ (2) Stati Membri astjenew. Żewġ (2) Stati Membri vvutaw kontra.

Il-kompatibbiltà mas-suq intern u l-Ftehim dwar iż-Żona Ekonomika Ewropea

14.

Il-Kumitat ta’ Konsulenza jaqbel mal-Kummissjoni li l-konċentrazzjoni notifikata trid għaldaqstant tiġi ddikjarata kompatibbli mas-suq intern u mal-Ftehim dwar iż-Żona Ekonomika Ewropea (2) f’konformità mal-Artikolu 2(2) u 8(2) tar-Regolament dwar l-Għaqdiet u l-Artikolu 57 tal-Ftehim dwar iż-Żona Ekonomika Ewropea. 11-il Stat Membru vvutaw favur. Żewġ (1) Stati Membri astjenew. Żewġ (3) Stati Membri vvutaw kontra.

(1) ĠU L 24, 29.1.2004, p. 1.

(2) ĠU L 1, 3.1.1994, p. 3.

21.5.2021

Il-Ġurnal Uffiċjali tal-Unjoni Ewropea

C 194/7

SOMMARJU TAD-DEĊIŻJONI TAL-KUMMISSJONI

tas-17 ta’ Diċembru 2020

li tiddikjara konċentrazzjoni kompatibbli mas-suq intern

u mal-funzjonament tal-Ftehim ŻEE

(Il-Każ M.9660 – Google/Fitbit) (notifikat bid-dokument numru C(2020) 9105)

(It-test bl-Ingliż biss huwa awtentiku)

(Test b’rilevanza għaż-ŻEE)

(2021/C 194/05)

Fis-17 ta’ Diċembru 2020, il-Kummissjoni adottat Deċiżjoni f’każ ta’ fużjoni skont ir-Regolament tal-Kunsill (KE) Nru 139/2004 tal-20 ta’ Jannar 2004 dwar il-kontroll ta’ konċentrazzjonijiet bejn impriżi (1) , u b’mod partikolari l-Artikolu 8(2) ta’ dak ir-Regolament. Verżjoni mhux kunfidenzjali tad-Deċiżjoni sħiħa, billi l-każ jista’ jkun fil-forma ta’ verżjoni provviżorja, tista’ tinstab fil-lingwa awtentika tal-każ fuq is-sit web tad-Direttorat Ġenerali għall-Kompetizzjoni, f’dan l-indirizz:

https://ec.europa.eu/competition/index_en.html

1. INTRODUZZJONI

(1)

Fl-1 ta’ Novembru 2019, Google ħabbret li se tikseb kontroll ta’ Fitbit. It-tranżazzjoni ġiet notifikata lill-Kummissjoni fil-15 ta’ Ġunju 2020.

(2)

Permezz ta’ Deċiżjoni tal-4 ta’ Awwissu 2020, il-Kummissjoni sabet li t-tranżazzjoni proposta qajmet dubji serji fir-rigward tal-kompatibbiltà tagħha mas-suq intern u bdiet proċeduri skont l-Artikolu 6(1)(c) tar-Regolament dwar l-Għaqdiet (“id-deċiżjoni li tiftaħ il-proċeduri”).

(3)

Saret konsultazzjoni mal-Istati Membri dwar id-Deċiżjoni waqt il-Kumitat ta’ Konsulenza dwar il-Konċentrazzjonijiet fl-1 ta’ Diċembru 2020, li ta opinjoni favorevoli. L-Uffiċjal tas-Smigħ ta l-opinjoni favorevoli tiegħu dwar il-proċeduri fir-rapport tiegħu li ġie sottomess fl-4 ta’ Diċembru 2020.

2. IS-SWIEQ RILEVANTI

(4)

Id-Deċiżjoni tidentifika s-swieq rilevanti li ġejjin:

(a)

Apparati li jintlibsu mal-polz, potenzjalment segmentati ulterjorment bejn (i) trackers u smartwatches tal-fitness, (ii) trackers u smartwatches tal-fitness b’konnettività GPS u mingħajrha, (iii) smartwatches bil-konnettività ċellulari u mingħajrha, u (iv) smartwatches bażiċi u kompluti. Il-kamp ta’ applikazzjoni ġeografiku huwa mill-anqas mifrux maż-ŻEE kollha jekk mhux mad-dinja kollha.

(b)

OSs: (i) il-provvista ta’ OSs liċenzjabbli għal apparati mobbli intelliġenti, u (ii) il-provvista ta’ OSs liċenzjabbli għal apparati li jintlibsu mal-polz, potenzjalment segmentati b’mod simili għas-segmenti potenzjali tas-suq għal apparati li jintlibsu mal-polz elenkati fil-paragrafu preċedenti. Il-kamp ta’ applikazzjoni ġeografiku tas-suq għall-OSs liċenzjabbli għal apparati mobbli intelliġenti huwa mifrux mad-dinja kollha minbarra ċ-Ċina, filwaqt li l-kamp ta’ applikazzjoni ġeografiku tas-suq għal OSs liċenzjabbli għal apparati li jintlibsu mal-polz huwa mill-anqas mifrux maż-ŻEE kollha jekk mhux mad-dinja kollha, minbarra ċ-Ċina.

(c)

Il-ħwienet tal-apps: (i) il-provvista ta’ ħwienet tal-apps għal pjattaforma partikolari tal-OS tal-apparati mobbli intelliġenti (b’mod partikolari ħwienet tal-apps tal-Android), u (ii) il-provvista ta’ ħwienet tal-apps għal pjattaforma tal-OS partikolari ta’ apparati li jintlibsu mal-polz (b’mod partikolari ħwienet tal-apps għal apparati ta’ Wear OS u ta’ Fitbit). Il-kamp ta’ applikazzjoni ġeografiku tas-swieq għall-ħwienet tal-apps għal pjattaforma tal-OS partikolari ta’ apparati mobbli intelliġenti (eż. ħwienet tal-apps tal-Android) u ta’ apparati li jintlibsu mal-polz (eż. ħwienet tal-apps ta’ Wear OS u ta’ Fitbit) huwa mifrux mad-dinja kollha minbarra ċ-Ċina.

(d)	Servizzi ta’ tiftix ġenerali. Il-kamp ta’ applikazzjoni ġeografiku tas-suq għall-provvista ta’ servizzi ta’ tiftix ġenerali huwa nazzjonali.

(e)

Ir-reklamar online: (i) il-provvista ta’ servizzi ta’ reklamar ibbażat fuq tfittxija online, potenzjalment segmentata fil-provvista ta’ servizzi ta’ reklamar ibbażat fuq tfittxija online fuq desktops jew fuq apps mobbli, u (ii) il-provvista ta’ servizzi ta’ reklamar tal-wiri online, potenzjalment segmentata fil-provvista ta’ servizzi ta’ reklamar tal-wiri online fuq desktops jew fuq apps mobbli, il-provvista ta’ servizzi ta’ reklamar tal-wiri online fuq networks soċjali u mhux soċjali, il-provvista ta’ servizzi ta’ reklamar fuq skrin jew mhux fuq skrin online. Il-kamp ta’ applikazzjoni ġeografiku tas-swieq identifikati huwa nazzjonali flimkien mal-fruntieri lingwistiċi fi ħdan iż-ŻEE.

(f)

Servizzi ta’ teknoloġija tar-reklami: (i) il-provvista ta’ servizzi ta’ SSP, (ii) il-provvista ta’ servizzi ta’ DSP, (iii) il-provvista ta’ servizzi ta’ networks ta’ reklamar ibbażat fuq tfittxija online u ta’ servizzi ta’ network ta’ wiri ta’ reklami, (iv) il-provvista ta’ servizzi ta’ servers ta’ reklami, u (v) il-provvista ta’ servizzi tal-analitika. Il-kamp ta’ applikazzjoni ġeografiku tas-swieq identifikati huwa mill-anqas maż-ŻEE kollha.

(g)	Apps tas-saħħa u tal-fitness, potenzjalment segmentati ulterjorment skont il-funzjonalità u l-pjattaforma (PC, apparat intelliġenti mobbli jew li jintlibes mal-polz). Il-kamp ta’ applikazzjoni ġeografiku tas-swieq identifikati huwa mill-anqas nazzjonali.

(h)

Servizzi ta’ pagamenti mobbli, potenzjalment segmentati ulterjorment bejn (i) pagamenti mobbli tal-prossimità/offline, u (ii) pagamenti mobbli mill-bogħod/online (inkluż servizzi ta’ intermedjazzjoni tal-pagamenti jew mhux) kif ukoll segmentati skont il-pjattaforma użata (apparat intelliġenti mobbli jew li jintlibes mal-polz). Il-kamp ta’ applikazzjoni ġeografiku tas-swieq identifikati huwa mill-anqas nazzjonali.

(i)

Apps u servizzi diġitali oħra: (i) applikazzjonijiet tan-navigazzjoni li joffru navigazzjoni pass pass, (ii) assistenti virtwali, (iii) servizzi ta’ distribuzzjoni ta’ mużika diġitali, u (iv) servizzi ta’ traduzzjoni diġitali, b’diversi segmenti possibbli. Il-kamp ta’ applikazzjoni ġeografiku tas-suq għal (i) apps tan-navigazzjoni huwa mill-anqas mifrux maż-ŻEE kollha jekk mhux mad-dinja kollha u għal (ii) assistenti virtwali, (iii) servizzi ta’ distribuzzjoni ta’ mużika diġitali u (iv) servizzi ta’ traduzzjoni diġitali mill-anqas nazzjonali.

(j)

Kura tas-saħħa diġitali: (i) il-provvista ta’ servizzi tal-cloud u tal-analitika tad-data, (ii) servizzi ta’ monitoraġġ tal-pazjenti, (iii) il-provvista ta’ data għar-riċerka medika u evidenza reali, u (iv) programmi ta’ benesseri korporattiv. Il-kamp ta’ applikazzjoni ġeografiku tas-suq għal (i) il-forniment ta’ servizzi tal-cloud u tal-analitika tad-data huwa mill-anqas maż-ŻEE kollha, (ii) is-servizzi ta’ monitoraġġ tal-pazjenti huma mill-anqas maż-ŻEE kollha jekk mhux globali, (iii) il-provvista ta’ data għar-riċerka medika u l-evidenza reali hija mill-anqas maż-ŻEE kollha, (iv) il-programmi tal-benesseri korporattiv huma mill-anqas maż-ŻEE kollha.

3. VALUTAZZJONI KOMPETITTIVA

(5)

Il-Kummissjoni vvalutat l-effetti orizzontali tat-Tranżazzjoni fuq il-bażijiet ta’ data (u l-kapaċitajiet tal-ġbir tad-data), jiġifieri Fitbit bħala sors ta’ data tal-utent għal użu possibbli f’(i) servizzi ta’ reklamar online, (ii) servizzi ta’ tiftix ġenerali, u (iii) servizzi tal-kura tas-saħħa diġitali. Apparti dan, ma hemm l-ebda suq affettwat b’mod orizzontali li jirriżulta mit-Tranżazzjoni.

(6)

Barra minn hekk, it-Tranżazzjoni toħloq relazzjonijiet vertikali bejn l-attivitajiet ta’ Google u ta’ Fitbit. Il-Kummissjoni vvalutat l-effetti vertikali tat-Tranżazzjoni fir-rigward tal-esklużjoni possibbli mill-aċċess għad-data tal-utent ta’ Fitbit għad-detriment tal-atturi tal-kura tas-saħħa diġitali, l-esklużjoni mill-aċċess għal Wear OS għad-detriment tal-fornituri ta’ apparati li jintlibsu mal-polz, l-esklużjoni mill-aċċess għall-apps/għas-servizzi ta’ Google għad-detriment ta’ fornituri ta’ apparati li jintlibsu mal-polz, l-esklużjoni mill-aċċess għal Google Play għad-detriment ta’ fornituri ta’ apparati li jintlibsu, u l-esklużjoni mill-aċċess għal Fitbit App Gallery għad-detriment ta’ fornituri ta’ apparati li jintlibsu mal-polz.

(7)

It-Tranżazzjoni toħloq ukoll relazzjonijiet konglomerati bejn l-attivitajiet ta’ Google u ta’ Fitbit. Il-Kummissjoni vvalutat l-effetti konglomerati tat-Tranżazzjoni fir-rigward tal-ingranaġġ tal-pożizzjoni ta’ Google f’Android OS fis-suq tal-apparati li jintlibsu mal-polz.

(8)

Fl-aħħar nett, il-Kummissjoni vvalutat it-tħassib possibbli li jirriżulta mill-aċċess ta’ Google għal informazzjoni kummerċjalment sensittiva.

3.1. Effetti orizzontali

(9)

Filwaqt li t-Tranżazzjoni ma tagħti lok għal ebda suq affettwat b’mod orizzontali f’sens tradizzjonali fir-rigward ta’ bażijiet ta’ data u kapaċitajiet ta’ ġbir tad-data, il-Kummissjoni tqis li t-Tranżazzjoni se tikkombina taħt is-sjieda ta’ Google il-bażijiet tad-data (u l-kapaċitajiet ta’ ġbir tad-data) tal-Partijiet.

(10)

Il-Kummissjoni eżaminat jekk, il-kombinazzjoni tad-data ta’ Fitbit u ta’ Google (u l-kapaċitajiet tal-ġbir tad-data) tistax twassal għal effetti orizzontali antikompetittivi mhux koordinati billi ssaħħaħ il-pożizzjoni tas-suq ta’ Google fil-provvista ta’ (i) servizzi ta’ reklamar ta’ tiftix u wiri online u servizzi ta’ teknoloġija tar-reklami, (ii) servizzi ta’ tiftix ġenerali, jew (iii) servizzi tal-kura tas-saħħa diġitali.

(11)

Abbażi tal-approċċ adottat f’Apple/Shazam (2), il-Kummissjoni tinnota li hemm ċerti limitazzjonijiet legali għall-kombinazzjoni ta’ settijiet tad-data bħar-regoli applikabbli tal-UE li jindirizzaw il-protezzjoni tad-data, u b’mod partikolari għar-Regolament Ġenerali dwar il-Protezzjoni tad-Data (“GDPR”) u r-regoli tal-Unjoni li jindirizzaw il-privatezza u l-protezzjoni tal-kunfidenzjalità tal-komunikazzjonijiet, b’mod partikolari d-Direttiva dwar il-Privatezza Elettronika.

(12)

Il-Kummissjoni tqis li, għalkemm qabel it-Tranżizzjoni, Fitbit mhijiex qed tikkompeti fl-istess swieq bħal Google, it-Tranżazzjoni tagħti lil Google kontroll fuq assi importanti, jiġifieri, id-data ta’ Fitbit, u dan ikompli jsaħħaħ id-dominanza ta’ Google fis-swieq għall-provvista ta’ servizzi ta’ reklamar ibbażat fuq tfittxija online. (3) Il-Kummissjoni ssostni t-tħassib tagħha, kif stabbilit fid-deċiżjoni tal-Artikolu 6(1)(c), fir-rigward tal-kompatibbiltà tat-Tranżazzjoni mas-suq intern relatata ma’ tisħiħ tal-pożizzjoni dominanti ta’ Google fil-provvista ta’ reklamar ibbażat fuq tfittxija online (u s-segmenti possibbli tiegħu), il-provvista ta’ swieq tar-reklamar tal-wiri online (u s-segmenti possibbli tiegħu), kif ukoll fis-suq għal servizzi tat-“teknoloġija tar-reklamar”.

(13)

Fil-fehma tal-Kummissjoni, tali tħassib ikun jeżisti fid-dawl ta’: (i) ir-rilevanza tad-data (u l-kapaċitajiet tal-ġbir tad-data) miksuba minn Google bħala riżultat tat-Tranżazzjoni għas-servizz u l-wiri ta’ reklami, (ii) il-pożizzjoni ta’ Google fis-swieq rilevanti relatati mal-provvista ta’ servizzi ta’ reklamar ibbażat fuq tfittxija online, u swieq sekondarji/segmenti tagħhom, (iii) it-tisħiħ tal-pożizzjoni tas-suq ta’ Google u l-indeboliment tal-espansjoni tar-rivali fis-swieq imsemmija bħala riżultat tal-kombinazzjoni tad-data, u (iv) in-nuqqas ta’ dħul kompensatorju jew setgħa tax-xerrej.

(14)

Fir-rigward tas-servizzi ta’ reklamar tal-wiri online u s-subsegmenti possibbli, kif ukoll “servizzi tat-teknoloġija tar-reklami”, il-Kummissjoni tqis li minkejja li għandha xi grad ta’ saħħa fis-suq, il-pożizzjoni ta’ Google f’dawn is-swieq hija ferm aktar dgħajfa minn dik fis-swieq għar-reklamar ibbażat fuq tfittxija online abbażi tal-ishma tas-suq ta’ Google u l-fatt li ma jistax jiġi eskluż li s-suq għar-reklamar tal-wiri online huwa kkaratterizzat mill-eżistenza ta’ ostakli għad-dħul u mill-espansjoni u min-nuqqas tas-setgħa kompensatorja tax-xerrej.

(15)

Il-Kummissjoni tqis li t-Tranżazzjoni x’aktarx mhux se twassal għal xi impediment sinifikanti tal-kompetizzjoni effettiva bħala konsegwenza tal-effetti orizzontali possibbli li jirriżultaw mill-kombinazzjoni tal-bażijiet ta’ data tal-utenti ta’ Google u ta’ Fitbit u l-kapaċitajiet tal-ġbir tad-data għall-użu fil-qasam tas-servizzi ta’ tiftix ġenerali. Google nstabet li ilha tokkupa pożizzjoni dominanti f’kull suq nazzjonali għall-provvista ta’ servizzi ta’ tiftix ġenerali mill-2008, minbarra fiċ-Ċekja, fejn Google ilha tokkupa pożizzjoni dominanti mill-2011. Madankollu, ir-riżultati tal-investigazzjoni tas-suq jissuġġerixxu li d-data ta’ Fitbit, minkejja li potenzjalment hija input siewi fis-swieq għas-servizzi ta’ tiftix ġenerali, hija anqas rilevanti għal tiftix ġenerali milli hija fil-każ ta’ mmirar ta’ reklamar ibbażat fuq tfittxija online.

(16)

Fir-rigward ta’ Fitbit bħala sors ta’ data għall-użu possibbli fis-servizzi tal-kura tas-saħħa diġitali, il-Kummissjoni tqis li t-Tranżazzjoni x’aktarx mhux se twassal għal xi impediment sinifikanti ta’ kompetizzjoni effettiva bħala konsegwenza ta’ effetti orizzontali li jirriżultaw mill-kombinazzjoni tal-bażijiet ta’ data tal-utenti ta’ Google u ta’ Fitbit u l-kapaċitajiet tal-ġbir tad-data. Dan għaliex il-Partijiet la huma kompetituri proprji u lanqas potenzjali fil-ġbir jew fil-kummerċjalizzazzjoni tad-data dwar is-saħħa u l-fitness tal-utent. Fir-rigward tal-kompetizzjoni proprja, attwalment l-ebda parti ma hija qiegħda tikkummerċjalizza d-data tal-utenti tagħha, iżda ċ-ċirkolazzjoni tad-data hija konsegwenza tad-deċiżjoni tal-utenti li jaqsmuha b’mod attiv ma’ partijiet terzi (apps u siti web) li joffru servizzi ta’ valur miżjud lilhom. Fir-rigward tal-kompetizzjoni potenzjali, il-Kummissjoni vvalutat l-impatt tat-Tranżazzjoni, billi investigat ir-raġunament wara t-Tranżazzjoni u qieset l-istatus attwali tas-suq għas-servizzi tal-kura tas-saħħa diġitali. F’dak ir-rigward, il-Kummissjoni stabbiliet li jidher biċ-ċar li s-saħħa diġitali ma kinitx ir-raġunament ewlieni tat-Tranżazzjoni u li hemm diversi atturi attivi fil-kura tas-saħħa diġitali (b’mod partikolari fil-cloud u fl-analitika tad-data, is-servizzi ta’ monitoraġġ tal-pazjenti, il-provvista ta’ data għar-riċerka medika u l-evidenza fid-dinja reali u programmi ta’ benessri korporattiv fejn waħda mill-Partijiet tkun attiva).

3.2. Effetti vertikali

3.2.1. Esklużjoni mill-aċċess għad-data ta’ Fitbit għad-detriment tal-atturi tal-kura tas-saħħa diġitali (esklużjoni tal-input)

(17)

Abbażi tar-riżultati tal-investigazzjoni tas-suq, il-Kummissjoni tqis li ma jistax jiġi eskluż li wara t-Tranżazzjoni, Google jista’ jkollha l-kapaċità teknika li tinvolvi ruħha f’esklużjoni tal-input billi tillimita l-aċċess għall-API tal-Web. Filwaqt li, f’termini ġenerali, id-data dwar is-saħħa tal-utent hija disponibbli minn għadd ta’ sorsi tad-data, id-data dwar l-utent tal-utenti ta’ Fitbit hija disponibbli biss permezz tal-API tal-Web u numru ta’ atturi fil-kura tas-saħħa diġitali jaċċessaw tali data permezz tal-API tal-Web, sabiex jipprovdu servizzi lill-utenti ta’ Fitbit u jiskbu d-data tagħhom bi tpattija għal dan.

(18)

Barra minn hekk, abbażi tar-riżultati tal-investigazzjoni tas-suq, il-Kummissjoni tqis li ma jistax jiġi eskluż li, wara t-Tranżazzjoni, Google se jkollha l-inċentiv li tillimita l-aċċess għall-API tal-Web ta’ Fitbit.

(19)

Ir-restrizzjoni tal-aċċess għal wara t-Tranżazzjoni tal-API tal-Web ta’ Fitbit jista’ jkollha impatt fuq is-suċċess ta’ negozji ġodda. Barra minn hekk, il-Kummissjoni tinnota li, jekk l-aċċess għall-API tal-Web jiġi ristrett jew jitwaqqaf, mill-anqas parti mill-utenti ta’ Fitbit se jitilfu l-aċċess għal mill-anqas app waħda li tista’ tkun mixtieqa ħafna minnhom.

(20)

Għalhekk, il-Kummissjoni żżomm it-tħassib tagħha, kif stabbilit fid-deċiżjoni tal-Artikolu 6(1)(c), fir-rigward tal-kompatibbiltà tat-Tranżazzjoni mas-suq intern bħala riżultat tal-esklużjoni tal-input tal-fornituri tas-servizzi tal-kura tas-saħħa diġitali kkawżata mill-entità fuża li tillimita l-aċċess ta’ dawk il-fornituri għall-API tal-Web u, għalhekk, l-aċċess tagħhom għad-data tal-utenti ta’ Fitbit.

3.2.2. Esklużjoni mill-aċċess għall-Wear OS għad-detriment tal-fornituri ta’ apparati li jintlibsu mal-polz (esklużjoni tal-input)

(21)

Il-Kummissjoni kkonkludiet li wara t-Tranżazzjoni, Google mhux se jkollha l-kapaċità li twaqqaf jew li tiddegrada l-aċċess għall-Wear OS għall-kompetituri downstream ta’ Fitbit. Il-Kummissjoni tqis li l-akbar fornituri ta’ smartwatches huma integrati vertikalment kompletament, jiġifieri l-ismartwatches tagħhom jaħdmu biss fuq l-OSs (proprjetarji) tagħhom stess. Barra minn hekk, is-sehem mis-suq tal-apparati ta’ Wear OS fis-suq downstream għall-provvista ta’ smartwatches naqas b’mod kostanti matul l-aħħar tliet snin, u laħaq livell ta’ anqas minn jew qrib il-5 %. Għaldaqstant, Wear OS hija responsabbli biss għal sehem żgħir ta’ apparati li jintlibsu mal-polz u li jinbiegħu lill-konsumaturi llum u jista’ jiġi eskluż li Wear OS hija komponent kritiku jew sors sinifikanti ta’ differenzzazzjoni tal-prodott.

(22)

Il-Kummissjoni tqis li Google ma jkollhiex l-inċentiv li tinvolvi ruħha fi strateġija ta’ esklużjoni tal-input fir-rigward ta’ Wear OS u t-Tranżazzjoni mhux se tbiddel b’mod sinifikanti l-inċentiv ta’ Google u Google se tkompli timmira għall-akbar distribuzzjoni possibbli ta’ Wear OS. Dan minħabba li Fitbit għandha biss sehem żgħir mis-suq fis-segment dejjem jikber tal-ismartwatches. Barra minn hekk, Google tibbenefika mill-użu tad-detenturi tal-liċenzja ta’ Wear OS billi żżomm lill-utenti fl-ekosistema tal-Android.

(23)

Irrispettivament minn jekk Google għandhiex il-kapaċità jew l-inċentiv li teskludi lil rivali downstream kompetituri fir-rigward tal-provvista ta’ Wear OS, tali strateġija aktarx li ma jkollha l-ebda impatt materjali fuq il-kompetizzjoni (madwar [bejn 5 u 10] % tal-ismartwatches dinjin integraw Wear OS fl-2019).

3.2.3. Esklużjoni mill-aċċess għal diversi apps ta’ Google għad-detriment ta’ fornituri ta’ apparati li jintlisbu mal-polz (esklużjoni tal-input)

(24)

Il-Kummissjoni tqis li Google ma jkollhiex il-kapaċità li tinvolvi ruħha fi strateġija ta’ esklużjoni tal-input. Il-Kummissjoni tinnota li jidher biċ-ċar li l-apps ta’ Google ma kinux input importanti għal apparati li jintlibsu mal-polz fil-passat. L-ebda waħda mill-apps ta’ Google (Google Search, Google Assistant, Google Fit, Google Play, Google Play Music u s-suċċessur tagħha YouTube Music, Google Maps, Google Translate) ma hija attwalment disponibbli fuq apparati għajr dawk li jaħdmu bil-Wear OS jew li saru disponibbli biss reċentement ħafna fuq l-Apple Watch.

(25)

Il-Kummissjoni tqis li Google ma jkollhiex l-inċentiv li tinvolvi ruħha fi strateġija ta’ esklużjoni tal-input fir-rigward tal-apps ta’ Google wara t-Tranżazzjoni. Dan minħabba li (i) Fitbit għandha biss sehem żgħir mis-suq fis-segment dejjem jikber tal-ismartwatches, (ii) Google tibbenefika mill-użu tad-detenturi tal-liċenzja tal-apps tagħha, (iii) il-punt sa fejn Google kienet tiżviluppa l-apps ta’ Google għal pjattaformi ta’ partijiet terzi fin-nuqqas tat-Tranżazzjoni jibqa’ mhux ċar, u (iv) abbażi tal-istrateġija osservata minn Google fil-qasam tal-apparati mobbli intelliġenti, il-Kummissjoni tistenna li Google se tagħti spinta lill-apps ta’ Google tagħha minflok ma teskludihom ladarba l-pjattaformi kompetituri li jintlibsu jkunu laħqu daqs suffiċjenti.

(26)

Irrispettivament minn jekk Google għandhiex il-kapaċità jew l-inċentiv li teskludi r-rivali downstream kompetituri fir-rigward tal-provvista tal-apps ta’ Google, tali strateġija aktarx li ma jkollha l-ebda impatt materjali fuq il-kompetizzjoni. L-aktar smartwatches popolari llum ma jaħdmux b’Wear OS u għaldaqstant bħalissa ma għandhomx aċċess għall-apps ta’ Google. Anke jekk l-apps ta’ Google jsiru relattivament aktar importanti fis-sentejn sat-tliet snin li ġejjin, huwa improbabbli li l-importanza tagħhom tiżdied b’tali mod li strateġija ta’ esklużjoni ipotetika teskludi apparati li jistgħu jintlibsu rivali.

3.2.4. L-esklużjoni mill-aċċess għal Google Play għad-detriment tal-fornituri ta’ apparati li jintlibsu mal-polz (esklużjoni tal-input)

(27)

Il-Kummissjoni tqis li l-entità fuża jkollha l-kapaċità parzjali li tinvolvi ruħha fi strateġija ta’ esklużjoni fir-rigward ta’ Google Play. (4) F’Google Android, Google instabet dominanti fil-provvista ta’ ħwienet tal-apps tal-Android f’suq dinji (minbarra ċ-Ċina) bejn l-2011 u l-2016 u ma hemm l-ebda indikazzjoni li jkun xieraq li tittieħed opinjoni differenti fil-każ inkwistjoni. Filwaqt li r-rispondenti għall-investigazzjoni tas-suq iqisu li l-OEMs ta’ apparati li jintlibsu ma għandhomx kontrostrateġiji effettivi, il-Kummissjoni tinnota li l-pjattaforma tal-Android toffri mezzi ta’ distribuzzjoni multipli. Dan minħabba li (i) l-OEMs ta’ Android jistgħu jinstallaw minn qabel apps ta’ akkumpanjament li jistgħu jintlibsu fuq apparati mobbli u b’hekk jiżguraw id-disponibbiltà ta’ dawk l-apps lill-utenti, (ii) apps ta’ akkumpanjament jistgħu jitqassmu wkoll permezz ta’ ħwienet tal-apps minbarra Play, inklużi ħwienet tal-apps tal-ewwel parti (jiġifieri, OEM) u ta’ partijiet terzi, u (iii) anke jekk ċerti OEMs ma jinstallawx minn qabel l-app ta’ akkumpanjament tagħhom jew ma joffrux ħanut alternattiv tal-apps illum, dawn jistgħu jibdew jużaw dawn l-istrateġiji f’każ li Google tkun bdiet timplimenta strateġija ta’ esklużjoni.

(28)

Fi kwalunkwe każ, il-Kummissjoni tinnota li r-regoli tal-kompetizzjoni, b’mod partikolari l-Artikolu 102 tat-TFUE u l-Artikolu 54 tal-Ftehim ŻEE se jkomplu japplikaw għall-entità fuża wara t-Tranżazzjoni, irrispettivament mill-eżitu tal-valutazzjoni preżenti skont ir-Regolament dwar l-Għaqdiet.

(29)

Fir-rigward tal-inċentivi, il-Kummissjoni tqis li huwa improbabbli li Google timplimenta strateġija ta’ esklużjoni permezz ta’ Play Store. Dan minħabba li (i) mill-anqas l-OEMs tal-ismartphones Android jistgħu jevitaw kwalunkwe tip ta’ strateġija ta’ esklużjoni billi jinstallaw minn qabel l-apps ta’ akkumpanjament tagħhom u/jew jużaw il-ħanut tal-apps tagħhom stess u għalhekk l-effett ikun limitat għal OEMs li jintlibsu u mhux integrati, u (ii) strateġiji ta’ esklużjoni aktar limitati (eż., id-deterjorazzjoni tal-klassifikazzjoni tal-apps ta’ akkumpanjament ta’ apparati li jintlibsu rivali fi Play Store jew id-dewmien tal-approvazzjoni tagħhom f’każ ta’ aġġornamenti jew ta’ rilaxxi ġodda) x’aktarx li ma jkollhomx effett sinifikanti fuq il-qlib mill-utent. Barra minn hekk, f’termini ta’ effetti fuq ir-reputazzjoni, l-aktar strateġija effettiva ta’ esklużjoni (jiġifieri, ir-rifjut ta’ aċċess għal Google Play) x’aktarx li tkun osservabbli mill-awtoritajiet, mill-iżviluppaturi u mill-utenti tal-apps.

(30)

Irrispettivament minn jekk Google għandhiex il-kapaċità jew l-inċentiv li teskludi lil rivali downstream kompetituri fir-rigward tal-provvista ta’ Wear OS, il-Kummissjoni tqis li strateġija ta’ esklużjoni fir-rigward ta’ Google Play ma jkollhiex impatt sinifikanti fuq il-kompetizzjoni peress li ma tnaqqasx b’mod sinifikanti l-prospetti ta’ bejgħ tal-kompetituri tal-apparati li jintlibsu ta’ Fitbit.

3.2.5. Esklużjoni mill-aċċess għal Google Search għad-detriment tal-fornituri tal-apparati li jintlibsu mal-polz (esklużjoni tal-input)

(31)

Il-Kummissjoni tqis li, minkejja li Google hija dominanti fis-suq għas-servizzi ta’ tiftix ġenerali (5), wara t-Tranżazzjoni, l-entità fuża ma jkollhiex il-kapaċità li teskludi manifatturi ta’ apparati li jintlibsu kompetituri billi tiddiskrimina favur Fitbit fir-riżultati ta’ Tiftix ta’ Google. It-tliet mezzi ta’ distribuzzjoni ewlenin għal apparati li jintlibsu huma ħwienet tradizzjonali (ħwienet fiżiċi), bejgħ online permezz ta’ siti web tar-rivendituri, u bejgħ online permezz tas-siti web tal-OEM stess. Abbażi tar-riżultati tal-investigazzjoni tas-suq, il-bejgħ fi ħwienet tradizzjonali kien l-aktar mezz ta’ distribuzzjoni importanti, is-siti web tar-rivendituri kienu t-tieni l-aktar mezz ta’ distribuzzjoni importanti) u l-bejgħ online permezz tas-sit web proprju ta’ OEMs ta’ apparati li jintlibsu jammonta biss għal sehem ta’ bejgħ żgħir. Il-Kummissjoni tqis li anke għal dan il-mezz ta’ distribuzzjoni, it-traffiku ta’ Google Search mhuwiex importanti ħafna.

(32)

Il-Kummissjoni tqis li Google wara t-Tranżazzjoni ma jkollhiex l-inċentiv li tiddiskrimina favur Fitbit fir-riżultati ta’ Google Search. Filwaqt li, billi tiddiskrimina kontra l-kompetituri ta’ Fitbit fir-riżultati ta’ Google Search, Google fil-fatt x’aktarx li żżid il-bejgħ ta’ apparati li jintlibsu mal-polz ta’ Fitbit, l-espansjoni potenzjali tas-sehem mis-suq tagħha fl-apparati li jintlibsu mal-polz u l-kisbiet assoċjati x’aktarx li jkunu limitati ħafna minħabba r-rilevanza żgħira ta’ Google Search għall-bejgħ ta’ apparati li jintlibsu mal-polz. Diversi fatturi jindikaw li Google se ġġarrab telf sostanzjali mid-diskriminazzjoni tal-kompetituri ta’ Fitbit fir-riżultati ta’ Google Search. B’mod partikolari, tali strateġija tinterferixxi mal-algoritmu tat-tiftix ta’ Google.

(33)

Irrispettivament minn jekk l-entità fuża għandhiex il-kapaċità jew l-inċentiv li tiċħad l-aċċess għar-riżultati ta’ Google Search għall-OEMs kompetituri ta’ apparati li jintlibsu, il-Kummissjoni tqis li tali strateġija ma jkollha l-ebda impatt materjali fuq il-kompetizzjoni. Dan minħabba li l-bejgħ fi ħwienet fiżiċi u permezz ta’ rivendituri online huma l-aktar mezzi ta’ distribuzzjoni importanti u l-bejgħ permezz tas-siti web tal-OEMs ta’ apparati li jintlibsu stess jikkostitwixxi l-anqas mezz ta’ distribuzzjoni importanti.

3.2.6. Esklużjoni mill-aċċess għall-ħwienet tal-apps ta’ Fitbit għad-detriment tal-iżviluppaturi tal-apps (esklużjoni tal-input)

(34)

Fir-rigward tal-kapaċità, il-Kummissjoni tqis li peress li l-Fitbit App Gallery hija l-ħanut esklussiv tal-apps għall-apparati li jintlibsu ta’ Fitbit, Fitbit għandha sehem ta’ 100 % mill-ħwienet tal-apps tal-apparati li jintlibsu ta’ Fitbit. Madankollu, il-Kummissjoni tqis li, taħt kwalunkwe definizzjoni raġonevoli tas-suq għall-apps, il-Fitbit App Gallery mhijiex input importanti għall-iżviluppaturi tal-apps ta’ partijiet terzi. Għalhekk, wara t-Tranżazzjoni, l-entità fuża ma jkollhiex il-kapaċità li teskludi l-iżviluppaturi tal-apps kompetituri billi tiċħad l-aċċess għall-Fitbit Gallery.

(35)

Fir-rigward tal-inċentivi, billi jiġi limitat l-aċċess għal apps ta’ kompetizzjoni għal apparati ta’ Fitbit, Google fil-fatt x’aktarx li żżid l-użu tal-apps tagħha minn utenti ta’ Fitbit. Madankollu, l-espansjoni potenzjali tal-ishma tas-suq tagħha fl-apps ta’ Google u l-kisbiet assoċjati x’aktarx li jkunu limitati ħafna. Dan minħabba li (i) l-użu ta’ apps fuq apparati li jintlibsu huwa limitat, (ii) l-użu ta’ apps ta’ Google fuq apparati ta’ Fitbit ikun jammonta biss għal sehem żgħir tal-użu ġenerali ta’ apps fuq apparati li jintlibsu, u (iii) jekk apps kompetituri jiġu esklużi, mhuwiex ċar li dan se jwassal għal żieda ekwivalenti fl-użu ta’ apps ipprovduti minn Google. Diversi fatturi jindikaw li Google se ġġarrab telf sostanzjali miċ-ċaħda tal-aċċess għall-apparati li jintlibsu ta’ Fitbit għal apps kompetituri, l-aktar minħabba li l-limitazzjoni tal-aċċess għal apps kompetituri tagħmel lill-apparati li jintlibsu ta’ Fitbit relattivament anqas attraenti għall-konsumaturi.

(36)

Irrispettivament minn jekk l-entità fuża għandhiex jew il-kapaċità jew l-inċentiv li tiċħad l-aċċess għall-apparati li jintlibsu ta’ Fitbit lil żviluppaturi ta’ apps kompetituri, il-Kummissjoni tqis li tali strateġija ma jkollha l-ebda impatt materjali fuq il-kompetizzjoni. L-esklużjoni tal-iżviluppaturi tal-apps kompetituri mill-Fitbit App Gallery taffettwa biss frazzjoni żgħira tal-output tas-suq u għalhekk ma jkollha l-ebda impatt materjali fuq il-kompetizzjoni.

3.3. Effetti ta’ konglomerat

3.3.1. L-ingranaġġ tal-pożizzjoni ta’ Google f’Android OS fis-suq tal-apparati li jintlibsu mal-polz

(37)

Il-Kummissjoni tqis li l-entità fuża jkollha l-kapaċità li tinvolvi ruħha fi strateġija ta’ esklużjoni fir-rigward ta’ Android għar-raġunijiet li ġejjin: (i) hemm ġabra kbira ta’ klijenti komuni ta’ smartphones Android u ta’ apparati li jintlibsu kompatibbli ma’ Android (esklużi biss l-utenti ta’ prodotti tal-Apple, jiġifieri iPhone u Apple Watch jew iPhone akkoppjati ma’ apparat li jintlibes ta’ parti terza), (ii) Google tikkontrolla lil Android u għandha pożizzjoni dominanti fis-suq fil-provvista ta’ OS liċenzjabbli għal apparati mobbli intelliġenti, (iii) filwaqt li degradazzjoni ma tidhirx possibbli taħt il-mudell tan-negozju ta’ Android attwali, Google għandha kontroll fuq Android u tista’ tbiddel il-mudell tan-negozju tagħha, u (iv) Google tista’ tipprevjeni tentattivi ta’ OEMs ta’ smartphones Android biex taħrab degradazzjoni.

(38)

B’mod partikolari, il-Kummissjoni tqis li Google tista’ tiddegrada l-APIs ta’ Android offruti lil OEMs parti terza, billi tirriżerva ċerti funzjonalitajiet biss għall-apparati li jintlibsu mal-polz tagħha stess. Il-Kummissjoni tqis li Google tista’ ssib mezzi tekniċi jew kuntrattwali biex timplimenta degradazzjoni. Inkella, Google tista’ tkompli tinkludi funzjonalitajiet attwali fil-Proġett ta’ Sors Miftuħ ta’ Android (“AOSP”), madankollu, trażżan kwalunkwe żvilupp futur mill-AOSP u timplimenta tali titjib fis-saff proprjetarju għall-użu minn Fitbit.

(39)

Il-Kummissjoni tqis li l-OEMs tal-ismartphone ta’ Android għandhom kontrostrateġiji limitati ħafna disponibbli, li ma jipprevjenux il-kapaċità ta’ Google li ssegwi strateġija ta’ degradazzjoni. Dan għaliex anke kieku l-OEMs kienu teknikament kapaċi jreġġgħu lura d-degradazzjoni tal-API, Google fl-aħħar mill-aħħar tista’ tipprevjeni lill-OEMs milli jużaw il-verżjoni tal-Android “forked” peress li l-OEMs ikunu jistgħu jitilfu l-aċċess għall-GMS, inkluż is-suite ta’ apps tal-mobile ta’ Google.

(40)

Il-Kummissjoni tqis li Google turi l-inċentiv li tiddegrada l-interoperabbiltà fir-rigward ta’ Android minħabba li: (i) Google mhux bilfors iġġarrab ħsara reputazzjonali, (ii) il-kwantifikazzjoni sottomessa mill-Parti Notifikanti, ibbażata fuq qafas aritmetiku vertikali standard, ma turix b’mod konvinċenti li strateġija ta’ degradazzjoni ma tkunx profittabbli għal Google. Abbażi tar-riżultati tal-investigazzjoni tas-suq, il-Kummissjoni tqis li jista’ jkun hemm aktar elementi li jistgħu jżidu l-inċentiv ta’ Google. Pereżempju, Google tista’ tuża apparati ta’ Fitbit biex tqassam l-apps u s-servizzi tagħha, u b’hekk iżżid il-kisbiet minn bejgħ addizzjonali ta’ Fitbit.

(41)

Il-Kummissjoni tqis li strateġija ta’ degradazzjoni jista’ jkollha impatt sinifikanti fuq il-kompetizzjoni billi tnaqqas il-prospetti ta’ bejgħ tal-kompetituri tal-apparati li jintlibsu ta’ Fitbit.

(42)

Għalhekk, il-Kummissjoni ssostni t-tħassib tagħha, kif stabbilit fid-deċiżjoni tal-Artikolu 6(1)(c), fir-rigward tal-kompatibbiltà tat-Tranżazzjoni mas-suq intern relatata mal-ingranaġġ ta’ Google tal-pożizzjoni dominanti tagħha fil-provvista ta’ OSs liċenzjabbli għal apparati mobbli intelliġenti għas-suq għall-provvista ta’ apparati li jintlibsu mal-polz (u subsegmenti possibbli tagħhom).

3.4. Aċċess għal informazzjoni kummerċjalment sensittiva

(43)

Il-Kummissjoni vvalutat ukoll l-effetti tat-Tranżazzjoni fuq l-aċċess għal informazzjoni kummerċjalment sensittiva (peress li Fitbit tippermetti lill-utenti tagħha jqabbdu l-kontijiet ta’ Fitbit tagħhom ma’ għadd ta’ apps ta’ partijiet terzi, Fitbit tkun tista’ tikseb aċċess għal informazzjoni addizzjonali dwar l-apps rispettivi ta’ partijiet terzi) u jekk dan jistax iwassal għal kwalunkwe effett antikompetittiv mhux orizzontali u mhux koordinat.

(44)

Il-Kummissjoni kkonkludiet li wara t-Tranżazzjoni, l-entità fuża x’aktarx li la jkollha l-kapaċità u lanqas l-inċentiv li xxekkel b’mod sinifikanti l-kompetizzjoni effettiva ma’ apps ta’ partijiet terzi kompetituri bħala riżultat ta’ kwalunkwe aċċess għal informazzjoni kummerċjalment sensittiva u li, fi kwalunkwe każ, l-effetti ta’ strateġija bħal din ma jkunux sinifikanti.

4. IMPENJI PPREŻENTATI MILL-PARTIJIET

(45)

Sabiex jitneħħa t-tħassib dwar il-kompetizzjoni li jirriżulta mit-Tranżazzjoni, il-Parti Notifikanti ssottomettiet impenji kemm fil-Fażi I kif ukoll fil-Fażi II.

(46)

L-Impenji jinkludu tliet elementi:

a)	Impenn li ma tintuża l-ebda data mkejla dwar il-ġisem jew data dwar is-saħħa u data dwar il-post tal-attività tal-fitness għall-finijiet ta’ reklamar u li tinżamm is-separazzjoni tad-data (l-“Impenn tar-reklami”);

b)	Impenn li jinżamm l-aċċess għal partijiet terzi, soġġett għall-kunsens tal-utent u mingħajr ħlas għall-aċċess, għal serje ta’ data mkejla dwar il-ġisem (l-“Impenn ta’ Aċċess tal-API tal-Web”);

Impenn biex jibqgħu jiġu liċenzjati, APIs pubbliċi mingħajr ħlas li jippermettu l-interoperabbiltà bejn apparat li jintlibes ta’ partijiet terzi u s-sistema operattiva tal-Android fuq smartphones, li mill-anqas joffru l-funzjonalitajiet ewlenin tal-APIs li jeżistu mid-data effettiva fis-sistema operattiva tal-Android (l-“impenn tal-APIs tal-Android”).

4.1. Impenji Inizjali

4.1.1. Impenn tar-reklami

(47)

Permezz tal-Impenn tar-Reklami, Google timpenja ruħha, għal għaxar snin wara l-approvazzjoni tal-Kummissjoni tal-Konċentrazzjoni (i) li ma tuża ebda Data Mkejla dwar il-Ġisem jew Data dwar il-Post tal-Attività tas-Saħħa u tal-Fitness għal Google Ads, u (ii) li żżomm l-azjenda li tista’ tiġi awditjata separata mid-Data Mkejla dwar il-Ġisem u d-Data dwar is-Saħħa u l-Post ta’ Attività tal-Fitness minn kwalunkwe sett ta’ data fi ħdan Google aċċessibbli għall-użu minn Google Ads.

(48)

L-Impenn tar-Reklami kien oriġinarjament sottomess fil-Fażi I. Il-Kummissjoni kkonkludiet li anke jekk, kunċettwalment, impenn li jipprevedi l-ħolqien ta’ silo għall-ħżin ta’ data soġġetta għal regoli stretti ta’ aċċess jista’ jkun xieraq biex isolvi t-tħassib dwar il-kompetizzjoni, identifikat mill-Kummissjoni, għadu mhux ċar jekk fil-prattika l-impenn tal-Fażi I jkunx effettiv fit-tneħħija tad-dubji serji identifikati fid-deċiżjoni tal-ftuħ, għar-raġunijiet ewlenin li ġejjin: (i) ma kienx ċar jekk il-kamp ta’ applikazzjoni tad-data protetta mill-Impenn ta’ Silo tad-Data kienx biżżejjed; (ii) id-definizzjoni ta’ “Google Ads” kienet dejqa wisq; (iii) id-dettalji tas-sistema tal-protezzjoni tad-data ma kinux biżżejjed biex il-Kummissjoni tkun tista’ tivvaluta l-effettività tal-Impenn ta’ Silo tad-Data; u (iv) it-tul ta’ żmien ma kienx biżżejjed. L-Impenn tar-Reklami sottomess fil-Fażi II fih titjib fl-erba’ aspetti kollha.

4.1.2. Impenn ta’ Aċċess tal-API tal-Web

(49)

Permezz tal-Impenn ta’ Aċċess tal-API tal-Web, Google timpenja ruħha, għal ħames snin wara l-approvazzjoni tal-Konċentrazzjoni, li żżomm aċċess għall-Utenti tal-API, soġġett għall-kunsens tal-utent u mingħajr ħlas għall-aċċess, għal Data Mkejla dwar il-Ġisem Appoġġata, soġġett għal:

(1)

Il-konformità kontinwata tal-Utenti tal-API mat-Termini tas-Servizz tal-Pjattaforma ta’ Fitbit (fejn l-aċċess isir disponibbli permezz tal-API Web ta’ Fitbit) jew it-Termini tas-Servizz u l-Politika tad-Data tal-Utenti tas-Servizzi (fejn l-aċċess isir disponibbli permezz ta’ API ta’ Google Rilevanti). Google tista’ ttemm l-aċċess għall-ksur ta’ dawn it-termini; u

(2)	Il-konformità kontinwata tal-Utenti tal-API mar-Rekwiżiti tal-Privatezza u s-Sigurtà. Google tista’ ttemm l-aċċess għall-ksur ta’ dawn ir-rekwiżiti jew tista’ tissospendi temporanjament l-aċċess fejn Google ikollha twemmin raġonevoli ta’ ksur ta’ tali rekwiżiti.

4.1.3. Impenn tal-APIs tal-Android

(50)

Permezz tal-Impenn tal-API tal-Android, Google timpenja ruħha, għal għaxar snin wara l-approvazzjoni tal-konċentrazzjoni mill-Kummissjoni, li:

(1)	Tkompli tilliċenzja APIs pubbliċi bla ħlas lil OEMs ta’ Android li joffru funzjonalitajiet ewlenin li Apparati li Jintlibsu mal-Polz jistgħu jużaw biex jinteroperaw ma’ Smartphone Android;

(2)

Tagħmel dawk l-APIs disponibbli mingħajr ma tagħmel distinzjoni bejn id-disponibbiltà jew il-funzjonalità tagħhom skont jekk ikunux aċċessati minn Apparat li Jintlibes mal-Polz jew minn App ta’ Akkumpanjament tal-Ewwel Parti jew minn Apparat li Jintlibes mal-Polz jew App ta’ Akkumpanjament ta’ Parti Terza;

(3)	Ma tiddegradax dawk l-APIs sabiex tnaqqas il-funzjonalità tagħhom ma’ Apparati li Jintlibsu mal-Polz ta’ Parti Terza b’mod relattiv ma’ Apparati li Jintlibsu mal-Polz tal-Ewwel Parti; u

(4)	Tkompli tqiegħed għad-dispożizzjoni tal-pubbliku, mingħajr ħlas, Dokumentazzjoni tal-Iżviluppatur relatata ma’ dawk l-APIs.

4.2. Impenji riveduti tal-Fażi II

(51)

L-Impenji Riveduti tal-Fażi II jinkludu l-istess tliet elementi bħall-Impenji inizjali tal-Fażi II bit-titjib li ġej.

4.2.1. Impenn tar-reklami

(52)

Definizzjonijiet: ġew emendati u rfinuti serje ta’ definizzjonijiet prinċipalment biex tiġi evitata ċ-ċirkomvenzjoni u biex tiġi żgurata l-validità fil-futur tal-Impenn tar-Reklami;

(53)

Monitoraġġ: ir-rwol tal-Fiduċjarju tal-Monitoraġġ fil-verifika tal-miżuri tekniċi stabbiliti għall-konformità mas-Separazzjoni tad-Data ġie ċċarat u mtejjeb;

(54)

Inklużjoni fakultattiva: L-Utenti taż-ŻEE se jiġu ppreżentati bl-għażla li jagħtu jew li jiċħdu l-użu minn Google Services għajr Google Ads ta’ kwalunkwe Data Mkejla dwar il-Ġisem;

(55)

Tul ta’ żmien: il-Kummissjoni tista’ tiddeċiedi li testendi t-tul ta’ żmien sa għaxar snin addizzjonali wara li tkun iġġustifikat il-ħtieġa għal tali estensjoni matul l-aħħar sena tal-perjodu inizjali ta’ għaxar snin.

4.2.2. Impenn ta’ Aċċess tal-API tal-Web

(56)

Definizzjonijiet: ġew emendati u rfinuti serje ta’ definizzjonijiet prinċipalment biex tiġi evitata ċ-ċirkomvenzjoni u biex tiġi żgurata l-validità fil-futur tal-Impenn ta’ Aċċess tal-API tal-Web;

(57)

Validità fil-futur: l-impenn jinkludi Mekkaniżmu ta’ Aġġornament biex jirreplika x’kienet tagħmel Fitbit fuq bażi awtonoma. Abbażi tal-Mekkaniżmu ta’ Aġġornament, tipi ta’ data ġodda se jiġu kondiviżi permezz tal-API tal-Web fi żmien sena sa sentejn jekk jikkwalifikaw bħala Data Mkejla dwar il-Ġisem Appoġġata u mill-anqas 3 mill-akbar 5 OEMs ta’ apparati li jintlibsu jagħmlu disponibbli tip ta’ data ekwivalenti;

(58)

Rieżami ex-ante tat-termini u tal-kundizzjonijiet ta’ Google u ta’ Fitbit mill-Fiduċjarju tal-Monitoraġġ: Google trid tinnotifika l-emendi proposti għaxart ijiem qabel ma jsiru effettivi jew, f’każ li dawn il-bidliet ikunu urġenti, malajr kemm jista’ jkun u mhux aktar tard minn ħamest ijiem minn dik id-data;

(59)

Il-kamp ta’ applikazzjoni tad-data: l-aċċess tal-API tal-Web ikopri wkoll data ta’ utenti mhux fiż-ŻEE għal kwalunkwe Utent tal-API li għandu applikazzjoni jew sit web disponibbli għall-Utenti taż-ŻEE;

(60)

Tul ta’ żmien: estiż minn 5 għal 10 snin.

4.2.3. Impenn tal-APIs tal-Android

(61)

Definizzjonijiet: ġew emendati u rfinuti serje ta’ definizzjonijiet prinċipalment biex tiġi evitata ċ-ċirkomvenzjoni u biex tiġi żgurata l-validità fil-futur tal-impenn tal-APIs tal-Android;

(62)

Kamp ta’ applikazzjoni: il-lista ta’ funzjonalitajiet ewlenin ġiet estiża skont ir-rispons tal-parteċipanti fis-suq u ġie ċċarat li l-Impenn jinkludi wkoll titjib, inkluż bħala riżultat ta’ aġġornamenti u ta’ korrezzjonijiet ta’ bugs;

(63)

Validità fil-futur: l-ebda diskriminazzjoni kontra OEMs ta’ apparati li jintlibsu mal-polz (i) billi jinżamm, jiġi miċħud, jew jiġi ttardjat l-aċċess għall-funzjonalitajiet tal-APIs tal-Android (AOSP jew Servizzi Mobbli ta’ Google) li Google tagħmel disponibbli b’mod ġenerali, mingħajr ħlas għall-aċċess, għal żviluppaturi ta’ apps ta’ smartphones Android oħra kif ukoll l-ebda diskriminazzjoni fir-rigward ta’ (ii) bidla, sostituzzjoni, jew irtirar ta’ dawn l-APIs ta’ Android, (iii) aċċess għal Previżjonijiet tal-Iżviluppatur, u (iv) aċċess għal Dokumentazzjoni tal-Iżviluppatur;

(64)

Ċirkomvenzjoni: l-ebda ċirkomvenzjoni permezz ta’ (i) Google Play Store, jew (ii) messaġġi ta’ żball/twissija.

4.3. Il-valutazzjoni tal-impenji sottomessi

(65)

Sabiex ikunu aċċettabbli, il-Kummissjoni tqis li l-impenji proposti jridu jkunu kapaċi li jrendu konċentrazzjoni kompatibbli mas-suq intern billi jipprevjenu tfixkil sinifikanti għall-kompetizzjoni effettiva fis-swieq rilevanti kollha fejn ġie identifikat tħassib dwar il-kompetizzjoni. F’dan il-każ, l-impenji meħtieġa biex jiġi eliminat it-tħassib dwar il-kompetizzjoni identifikat mill-Kummissjoni, jiġifieri fir-rigward ta’: (i) il-provvista ta’ servizzi ta’ reklamar ta’ tiftix online f’pajjiżi differenti taż-ŻEE u fir-Renju Unit, (ii) is-swieq tal-kura tas-saħħa diġitali fil-pajjiżi taż-ŻEE u fir-Renju Unit, u (iii) l-interoperabbiltà ma’ OS Android.

(66)

Id-Deċiżjoni tikkonkludi li l-Impenji Finali jindirizzaw il-kwistjonijiet dwar il-kompetizzjoni mqajma mit-Tranżazzjoni fl-intier tagħhom. Il-Kummissjoni tikkonkludi wkoll li l-Impenji Finali jistgħu jiġu implimentati b’mod effettiv fi żmien qasir.

KONKLUZJONI

Għar-raġunijiet imsemmija hawn fuq, fid-Deċiżjoni, il-Kummissjoni kkonkludiet li, skont il-konformità mal-impenji mogħtija mill-Parti Notifikanti, it-Tranżazzjoni ma tfixkilx b’mod sinifikanti l-kompetizzjoni effettiva fis-suq intern jew f’parti sostanzjali minnu. Għaldaqstant, id-Deċiżjoni tiddikjara l-konċentrazzjoni kompatibbli mas-suq intern, skont l-Artikolu 2(2) u l-Artikolu 8(2) tar-Regolament dwar l-Għaqdiet u l-Artikolu 57 tal-Ftehim ŻEE.

(1) ĠU L 24, 29.1.2004, p. 1.

(2) Id-Deċiżjoni tal-Kummissjoni tas-6 ta’ Settembru 2018 fil-każ M.8788 – Apple/Senazam, il-premessi 225 u 235.

(3) Skont il-paragrafu 36 fil-Linji Gwida dwar Fużjonijiet Orizzontali, fużjoni tista’ xxekkel b’mod sinifikanti l-kompetizzjoni effettiva jekk l-entità fuża tikseb tali grad ta’ kontroll fuq assi li l-espansjoni jew id-dħul minn ditti rivali jistgħu jkunu aktar diffiċli. Fil-każ inkwistjoni, tali assi huwa d-data ta’ Fitbit.

(4) Google Play huwa l-ħanut tal-apps ta’ Android offrut minn Google, li Google ilha toffri mill-2008. Il-Play Store huwa parti mis-Servizzi Mobbli ta’ Google (“GMS”), il-grupp ta’ apps u servizzi ta’ Google li Google tilliċenzja flimkien.

(5) B’sehem mis-suq ta’ aktar minn 90 % fi kważi l-pajjiżi kollha taż-ŻEE fl-2019, ħlief għaċ-Ċekja (84.4 %), Google hija dominanti fis-suq għas-servizzi ta’ tiftix ġenerali.

21.5.2021

Il-Ġurnal Uffiċjali tal-Unjoni Ewropea

C 194/17

Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel

(2021/C 194/06)

Din il-pubblikazzjoni tikkonferixxi d-dritt ta’ oppożizzjoni għall-applikazzjoni skont l-Artikolu 51 tar-Regolament (UE) Nru 1151/2012 (1) tal-Parlament Ewropew u tal-Kunsill fi żmien tliet xhur mid-data ta’ din il-pubblikazzjoni.

DOKUMENT UNIKU

“SZEGEDI TÜKÖRPONTY”

Nru tal-UE: PGI-HU-02491 – 6 ta’ Marzu 2019

DOP ( ) IĠP (X)

1. Isem/Ismijiet

“Szegedi tükörponty”

2. Stat membru jew Pajjiż Terz

L-Ungerija

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott

Klassi 1.7: Ħut frisk, molluski, krustaċji u prodotti derivati minnhom

3.2. Deskrizzjoni tal-prodott li għalih japplika l-isem f’(1)

L-Indikazzjoni Ġeografika “Szegedi tükörponty” tirreferi għall-ħut ħaj imrobbi tal-ispeċi tal-karpjun rikonoxxuta mill-Istat, il-karpjun komuni Szeged u l-laħam imnaddaf u ffilettjat tiegħu.

Il-ħuta għandha kulur kannella fl-aħdar, b’żaqq safra u qxur ċiklojdi li jleqqu. Il-linja laterali tagħha hija regolari, b’dahar għoli. Il-proporzjon bejn it-tul tal-ġisem u l-għoli (l-indiċi tal-profil) huwa 2.3-2.4. Il-ħuta tinbiegħ meta tasal fit-tielet sajf wara li tkun faqqset, u tkun tiżen bejn 1 800 u 2 400 g.

3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)

Is-sors ewlieni tal-għalf tal-ħut huwa l-organiżmi naturali li jinsabu fl-għadajjar (plankton, dud u larva tal-insetti). Jintuża għalf ieħor (għalf, qamħirrum, qamħ) b’kontenut ta’ lamtu ta’ 2,5-3,0 għal kull kg ta’ piż tal-ġisem biex jissupplimenta l-provvista naturali tal-ikel skont l-età tal-ħut. L-għalf irid ikun ħieles mill-OĠM.

Il-ħut jintgħalef skont l-aptit tiegħu sal-aħħar ta’ Ġunju. Minn hemm ’il quddiem, l-użu tal-għalf għal kull għadira jiġi deċiż abbażi ta’ valutazzjoni tas-sajd bi prova.

L-għalf supplimentari użat (l-għalf taċ-ċereali, il-konċentrat kummerċjali, l-għalf kompost u l-għalf) mhumiex disponibbli fiż-żona ġeografika ddefinita u għalhekk jinkisbu minn barra ż-żona.

Minbarra s-sorsi naturali tal-ikel tiegħu, il-ħut fi klassijiet ta’ età differenti jintgħalef matul is-sena kollha kif ġej:

—	ħut riproduttur: qamħ komuni u qamħirrum matul is-sena kollha, għalf tal-ħut rikk fil-proteini qabel il-propagazzjoni;

—	qixx: qixx bikri;

—	ħut immatur: għalf għall-ħut immatur, u wara qamħ jew qamħirrum imfarrak;

—	ħut li jkun għex żewġt isjuf: qamħ imfarrak, qamħirrum imfarrak u qamħ sħiħ u ħbub tal-qamħirrum;

—	ħut lest għas-suq (li jkun għex tlett isjuf): qamħ ta’ kwalità tajba u ħbub tal-qamħirrum.

Skont it-temp, il-ħut riproduttur fl-għadajjar tax-xitwa jew fl-għadajjar għall-ħżin (prinċipalment il-frieħ tal-ħut) jingħata kwantitajiet żgħar ta’ qamħirrum jew ħbub tal-qamħ fix-xitwa.

3.4. Passi speċifiċi tal-produzzjoni li jridu jsiru fiż-żona ġeografika ddefinita

L-istadji kollha tal-produzzjoni tas-“Szegedi tükörponty” (it-tnissil, ir-riproduzzjoni u t-trobbija) iridu jsiru fiż-żona ġeografika ddefinita fil-punt 4.

3.5. Regoli speċifiċi dwar it-tqattigħ, it-taħkik, l-ippakkjar, eċċ.

—

3.6. Regoli speċifiċi dwar it-tikkettar

—

4. Definizzjoni fil-qosor taż-żona ġeografika

Iż-żona amministrattiva ta’ Szeged fit-Tramuntana tal-M43, bejn l-awtostrada M5 u t-triq “Irma majori út” f’Sándorfalva, kif ukoll iż-żona periferali ta’ Sándorfalva; sistema ta’ għadajjar b’imbankmenti ċirkolari li jikkonsistu f’141 għadira individwali li jinsabu fuq l-art tul ix-xtut tal-lemin u tax-xellug tas-sezzjonijiet 1+120 u 11+120 tal-kanal prinċipali ta’ Algyő.

5. Rabta maż-żona ġeografika

Ir-rabta tal-prodott maż-żona ġeografika hija bbażata fuq il-kwalità tal-prodott.

Il-Lag Fehér, li jinsab fit-Tramuntana ta’ Szeged, qrib il-fruntiera tan-Nofsinhar tal-Ungerija, ġie ffurmat matul is-sekli, bħala l-baċir tal-iskular naturali tal-Pjanura l-Kbira tan-Nofsinhar bil-ħamrija salina tiegħu li timtela bl-ilma matul żminijiet ta’ għargħar.

Il-minerali mħallta u akkumulati matul is-sekli ta’ għargħar affettwaw il-ħamrija oriġinali taħt il-lag tant li ż-żoni li tnixxfu matul is-sajf bjadu bil-melħ li baqa’ fil-qiegħ. Fuq il-ħamrija oriġinali, inbniet sistema ta’ għadajjar tal-ħut li tikkonsisti f’total ta’ 141 għadira li jkopru aktar minn 2 000 ettaru fuq art impermeabbli b’kontenut għoli ta’ karbonat tas-sodju, bl-użu ta’ imbankmenti. L-ilma tal-lag għandu pH ta’ aktar minn 8.

Il-kostruzzjoni tas-sistema tal-għadajjar tal-ħut magħluqa ta’ Fehértó nbdiet fl-1932 u tlestiet fl-1960. Il-faċilità “Új halastó” (għadira ġdida għall-ħut) bdiet topera fl-1982. Dan wassal għall-ħolqien tas-sistema tal-farm tal-ħut b’141 għadira tal-ħut kontigwi li jkopru aktar minn 2 000 ettaru u li jiffurmaw parti minn korp ta’ ilma u sistema tal-provvista tal-ilma uniċi.

Iż-żona għandha l-mikroklima tagħha stess. Il-korp kbir ta’ ilma jirreżisti avvenimenti minuri tat-temp. L-arja kiesħa li tidħol ma’ fronti ta’ temp kbar u l-mewġ qawwi jistgħu jkessħu l-ilmijiet tal-għadajjar b’4-5 °C f’jum wieħed. Bħala medja hemm 32 jum fis-sena meta t-temperaturi jogħlew aktar minn 30 °C, u 89 jum tas-sajf meta t-temperaturi jilħqu 25 °C, filwaqt li hemm aktar minn 2 100 siegħa ta’ xemx. Wieħed mill-benefiċċji tal-klima huwa li l-ħut jista’ jitqiegħed barra sa minn nofs Marzu u jista’ jiġi mitmugħ kmieni, il-ħarifa hija twila u s-silġ fuq l-għadajjar tal-ħut spiss idub fix-xitwa.

Il-kwalità tal-ilma tal-għadajjar tal-ħut hija żgurata mill-fatt li l-ilma jiġi fornut permezz ta’ sistema ta’ ppumpjar doppju mill-kanal ewlieni ta’ Algyő, fejn l-ilma jasal parzjalment mill-ilma ta’ taħt l-art u parzjalment mix-xmara Tisza.

Għexieren ta’ snin ta’ riċerka li jqisu l-kundizzjonijiet ambjentali u l-metodi tat-trobbija tal-ħut irriżultaw fil-kultivazzjoni ta’ varjetà ta’ ħut reżistenti ġenetikament li għandu livell baxx ta’ xaħam, adattat sew għall-kundizzjonijiet lokali u li ngħata rikonoxximent mill-Istat. Il-ħut jitrabba bl-użu ta’ teknoloġija mfassla apposta għal gruppi ta’ etajiet differenti.

It-teknoloġija tal-produzzjoni użata għall-ħut immatur, għall-ħut riproduttur li jkun għex żewġt isjuf u għall-ħut lest għas-suq li jkun għex tlett isjuf ġiet żviluppata u applikata b’mod konsistenti b’kont meħud tal-ambjent tal-produzzjoni salin.

Il-fatt li l-għadajjar tal-ħut huma mibnija fuq ħamrija salina jiżgura provvista eċċellenti ta’ ossiġnu, għalhekk ma tinħoloq ebda opportunità biex sustanzi li huma ta’ ħsara għat-togħma jakkumulaw fil-ġisem tal-ħut. L-ilma alkalin tal-għadajjar jagħti lill-ħut vitalità u reżiljenza partikolari. Il-laħam li jitfarrak, ħamrani u b’togħma tajba tal-ħut imrobbi f’dawn l-għadajjar, u l-aroma friska tiegħu mingħajr togħmiet sekondarji, jistgħu jiġu attribwiti direttament għal dawn il-karatteristiċi.

Il-larvi huma prodotti mill-fertilizzazzjoni artifiċjali f’tubi tat-testijiet b’bajd meħud mill-popolazzjoni tal-istokk femminili. Matul l-ewwel sena, il-ħut immatur jitrabba f’għadajjar żgħar ta’ ftit ettari, u l-ikel disponibbli b’mod naturali jrid jiġi ssupplimentat b’għalf għall-ħut immatur. It-tmigħ tal-ħut immatur jinqasam f’diversi stadji, u f’kull wieħed l-għalf jiġi aġġustat għall-ħtiġijiet tal-enerġija tal-grupp tal-età matul l-istadji bikrin u tardivi tat-trobbija. Matul l-istadju bikri tat-trobbija, il-ħut immatur għandu jingħata għalf b’kontenut għoli ta’ proteini (25-30 %). Huma u jikbru, dan jinbidel għal għalf b’ 20-25 % proteina, qabel ma jasal l-istadju tardiv tat-trobbija fejn l-għalf ikollu kontenut ta’ proteina ta’ 20 %.

Is-sors ewlieni tal-ikel għall-ħut li jkunu għexu żewġt isjuf u dak li jkun għex tlett isjuf huwa l-ikel li jinsab b’mod naturali fl-ilma (plankton, larva tal-insetti u dud). L-użu ta’ fertilizzant organiku jgħin biex tiġi żgurata l-kwantità ta’ ikel naturali fl-għadajjar. Id-disponibbiltà fil-pront ta’ sorsi naturali ta’ nutrizzjoni tippromwovi l-iżvilupp tal-istruttura tal-muskoli u l-kontenut għoli ta’ proteini tal-ħut. Il-ħut immatur jingħata għalf, filwaqt li l-ħut li jkun għex żewġt isjuf u dak li jkun għex tlett isjuf jintgħalef qamħ sħiħ jew imfarrak u ħbub tal-qamħirrum biex il-ħtiġijiet tal-enerġija tagħhom jiġu ssodisfati.

Il-ħut jintgħalef skont l-aptit tiegħu sal-aħħar ta’ Ġunju, u minn dak iż-żmien ’il quddiem il-kwantità ta’ għalf li għandu jintuża tiġi ddeterminata abbażi ta’ analiżi tas-sajd bi prova. Dan il-metodu jagħmilha possibbli li jitrabba l-ħut b’kontenut baxx ta’ xaħam.

Il-kwalità u t-togħma tal-ħut imrobbi huma influwenzati direttament mill-provvista tajba ta’ ossiġnu fil-qiegħ tal-lag fl-għadajjar tal-ħut maħluqa fil-ħamrija salina, u għalhekk ma hemm l-ebda opportunità biex sustanzi li huma ta’ ħsara għat-togħma jakkumulaw fil-ġisem tal-ħut.

Is-“Szegedi tükörponty” għandu laħmu jitfarrak, ħamrani, togħmtu bnina, b’aroma friska u mingħajr togħmiet sekondarji. Għandu livell għoli ta’ proteina (iktar minn 19 %) u kontenut baxx ta’ xaħam (inqas minn 10 %). Dawn il-kwalitajiet speċjali huma attribwibbli għall-varjetà mrobbija individwalment u għall-kundizzjonijiet ambjentali u l-metodi tat-trobbija (il-post tal-għadajjar tal-ħut fuq l-art salina u l-għalf użat).

Il-laħam tas-“Szegedi tükörponty” għandu livell għoli ta’ proteina, ftit xaħam u togħma preżenti ħafna. Dawn il-kwalitajiet jgħinu biex jinkoraġġixxu l-konsum tal-ħut.

Is-“Szegedi tükörponty” iffillettjat huwa popolari ħafna mas-settur tal-ospitalità u l-konsumaturi.

Referenza għall-pubblikazzjoni tal-Ispeċifikazzjoni tal-Prodott

(it-tieni subparagrafu tal-Artikolu 6(1) ta’ dan ir-Regolament)

http://gi.kormany.hu/foldrajzi-arujelzok

(1) ĠU L 343, 14.12.2012, p. 1.

		ISSN 1977-0987
Il-Ġurnal Uffiċjali tal-Unjoni Ewropea		C 194

Edizzjoni bil-Malti	Informazzjoni u Avviżi	Volum 64 21 ta' Mejju 2021

Werrej		Paġna
	II Komunikazzjonijiet
	KOMUNIKAZZJONIJIET MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2021/C 194/01	Ebda oppożizzjoni għal konċentrazzjoni notifikata (Il-Każ M.10173 — Luminus/Essent Belgium) ( 1 )	1

	IV Informazzjoni
	INFORMAZZJONI MINN ISTITUZZJONIJIET, KORPI, UFFIĊĊJI U AĠENZIJI TAL-UNJONI EWROPEA
	Il-Kummissjoni Ewropea
2021/C 194/02	Rata tal-kambju tal-euro — L-20 ta' Mejju 2021	2
2021/C 194/03	Opinjoni tal-Kumitat ta’ Konsulenza dwar il-fużjonijiet fil-laqgħa tiegħu tal-1 ta’ Diċembru 2020 dwar abbozz ta’ deċiżjoni preliminari b’rabta mal-Każ M.9660 – Google/Fitbit — Relatur: Il-Polonja ( 1 )	3
2021/C 194/04	Rapport Finali tal-Uffiċjal tas-Seduta — Il-Każ M.9660 – Google/Fitbit ( 1 )	6
2021/C 194/05	Sommarju tad-Deċiżjoni tal-Kummissjoni tas-17 ta’ Diċembru 2020 li tiddikjara konċentrazzjoni kompatibbli mas-suq intern u mal-funzjonament tal-Ftehim ŻEE (Il-Każ M.9660 – Google/Fitbit) (notifikat bid-dokument numru C(2020) 9105) ( 1 )	7

	Munita	Rata tal-kambju
USD	Dollaru Amerikan	1,2203
JPY	Yen Ġappuniż	132,95
DKK	Krona Daniża	7,4364
GBP	Lira Sterlina	0,86400
SEK	Krona Żvediża	10,1813
CHF	Frank Żvizzeru	1,0991
ISK	Krona Iżlandiża	149,30
NOK	Krona Norveġiża	10,1775
BGN	Lev Bulgaru	1,9558
CZK	Krona Ċeka	25,519
HUF	Forint Ungeriż	350,60
PLN	Zloty Pollakk	4,5153
RON	Leu Rumen	4,9278
TRY	Lira Turka	10,2114
AUD	Dollaru Awstraljan	1,5736
CAD	Dollaru Kanadiż	1,4778
HKD	Dollaru ta' Hong Kong	9,4726
NZD	Dollaru tan-New Zealand	1,6986
SGD	Dollaru tas-Singapor	1,6261
KRW	Won tal-Korea t'Isfel	1 379,90
ZAR	Rand ta' l-Afrika t'Isfel	17,1639
CNY	Yuan ren-min-bi Ċiniż	7,8563
HRK	Kuna Kroata	7,5095
IDR	Rupiah Indoneżjan	17 589,83
MYR	Ringgit Malażjan	5,0594
PHP	Peso Filippin	58,410
RUB	Rouble Russu	89,8263
THB	Baht Tajlandiż	38,305
BRL	Real Brażiljan	6,4567
MXN	Peso Messikan	24,2825
INR	Rupi Indjan	89,1630

	V Avviżi
	ATTI OĦRAJN
	Il-Kummissjoni Ewropea
2021/C 194/06	Pubblikazzjoni ta’ applikazzjoni għar-reġistrazzjoni ta’ isem skont l-Artikolu 50(2)(a) tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel	17


	(1) Test b'rilevanza għaż-ŻEE.