Avviż ta' pożizzjoni vakanti CONS/AD/166/20

(2020/C 380 A/01)

 

TAGĦRIF ĠENERALI

Dipartiment	ORG.3 — Bini u Loġistika
Post tax-xogħol	Brussell, Bini Justus Lipsius
Titlu tal-pożizzjoni	Direttur
Grupp tal-funzjoni u grad	AD 14
Approvazzjoni tas-sigurtà meħtieġa	EU SECRET
SKADENZA GĦALL-APPLIKAZZJONIJIET	L-1 ta’ Diċembru 2020 — 12.00 nofsinhar (ħin ta' Brussell)

Min aħna

Is-Segretarjat Ġenerali tal-Kunsill (SĠK) jassisti lill-Kunsill Ewropew u lill-Kunsill tal-UE u l-korpi preparatorji tagħhom fl-oqsma kollha tal-attivitajiet tagħhom. Jipprovdi pariri u sostenn lill-membri tal-Kunsill Ewropew u lill-Kunsill u lill-Presidenti tagħhom fl-oqsma kollha ta' attività, inkluż pariri ta' politika u legali, koordinazzjoni ma' istituzzjonijiet oħra, elaborazzjoni ta' kompromessi, superviżjoni kif ukoll jittratta l-aspetti prattiċi kollha li huma meħtieġa għat-tħejjija u t-tmexxija tajba tal-Kunsill Ewropew u l-Kunsill.

Id-Direttorat Ġenerali “Żvilupp Organizzattiv u Servizzi” (DG ORG), huwa responsabbli għall-iżvilupp organizzattiv tas-SĠK u l-forniment ta' servizzi ewlenin ta' appoġġ. Id-Direttorat Ġenerali bħalissa huwa magħmul minn ħames Direttorati (Riżorsi Umani, Protokoll u Laqgħat, Bini u Loġistika, Finanzi, u Sikurezza u Sigurtà).

Id-Direttorat “Bini u Loġistika” (ORG.3) huwa responsabbli biex jipprovdi l-infrastrutturi materjali (bini, stallazzjonijiet u tagħmir tekniku) u servizzi loġistiċi (armar, ġarr, trasport) li jippermettu lill-Kunsill Ewropew, lill-Kunsill, lill-korpi tiegħu u lis-SĠK biex iwettqu l-funzjonijiet tagħhom fis-sitwazzjonijiet u ċ-ċirkostanzi kollha, inkluż f'sitwazzjonijiet straordinarji ta' emerġenza u ta' kriżi. ORG.3 huwa responsabbli minn baġit annwali ta' madwar €42 miljun kif ukoll minn għadd imdaqqas ta' kuntratti ta' servizzi u jrid jiżgura li l-prodotti u s-servizzi jinxtraw skont il-proċeduri stabbiliti.

Attwalment, id-Direttorat huwa magħmul minn tliet Unitajiet li jittrattaw rispettivament il-Bini (il-politika tal-bini u l-ġestjoni ambjentali, il-ġestjoni teknika u l-inġinerija, u l-operazzjonijiet u l-manutenzjoni ġenerali), il-Loġistika (it-tagħmir u l-operazzjonijiet, is-servizzi tat-trasport) u l-Finanzi (l-implimentazzjoni tal-baġit u l-kuntratti tal-akkwist pubbliku).

Qed nipproponu

Il-kariga ta' Direttur ta' ORG.3 hija pożizzjoni li toffri sfida f'ambjent politikament interessanti u dinamiku, fejn inti tmexxi tim ta' aktar minn 150 membru tal-persunal mill-gruppi ta' funzjoni kollha li huma appoġġati minn għadd sostanzjali ta' kuntratturi esterni f'oqsma varjati ħafna (tindif, tekniki tal-HVAC, elettriku, liftijiet, kostruzzjoni). Ser tkun responsabbli għall-aspetti operazzjonali, strateġiċi u finanzjarji tal-ippjanar u l-implimentazzjoni tal-attivitajiet kollha tad-direttorat.

Taħt l-awtorità tad-Direttur Ġenerali, tkun qed timmaniġġja d-Direttorat tiegħek u r-riżorsi tiegħu b'mod professjonali, torganizza l-attivitajiet tiegħu u tappoġġa u timmotiva lill-membri tal-persunal fil-ħidma tagħhom. Ser tiżgura l-kwalità tas-servizzi u l-prodotti pprovduti mid-Direttorat, kif ukoll il-komunikazzjoni u l-kooperazzjoni effettivi kemm ġewwa d-Direttorat kif ukoll fid-Direttorat Ġenerali kollu, kif ukoll ma' servizzi oħra tas-SĠK.

Ser tipprovdi tmexxija strateġika u tiżviluppa politiki, kunċetti u soluzzjonijiet innovattivi b'rabta mal-kwistjonijiet kollha li jaqgħu taħt il-kompetenza tad-Direttorat. Ser tħaddem inizjattivi u politiki maħsuba biex itejbu s-sostenibbiltà ambjentali u l-aċċessibbiltà tas-SĠK. Ser tipprovdi pariri professjonali fl-ogħla livell dwar il-politika dwar il-bini u dik ambjentali tal-Kunsill u dwar l-għażliet tekniċi b'impatt finanzjarju għoli, u ser tiżgura ġestjoni tajba u rappurtar professjonali tal-baġit tad-Direttorat.

Ser tkun responsabbli minn diskussjonijiet ma' korpi esterni dwar kwistjonijiet ta' ppjanar urban u ambjentali. F'dan il-kuntest, ser ikun meħtieġ b'mod partikolari li tirrappreżenta lill-Kunsill Ewropew u lill-Kunsill f'diskussjonijiet u f'negozjati ma' istituzzjonijiet oħra tal-UE u mal-awtoritajiet tal-pajjiż ospitanti f'oqsma taħt il-kompetenza tad-Direttorat.

Ser tiddefinixxi l-objettivi li għandhom jintlaħqu u tikkontribwixxi biex dawn jintlaħqu billi tistabbilixxi l-programm ta' ħidma tad-Direttorat u tiżgura l-monitoraġġ xieraq tal-implimentazzjoni tiegħu.

Ikunu meħtieġa missjonijiet okkażjonali barra mill-pajjiż, normalment fl-UE (pereżempju fil-Lussemburgu jew fi Strasburgu).

Qed infittxu

Qed infittxu persuna għall-kariga ta' maniġer bil-kapaċità li tmexxi u timmotiva tim kbir b'diversi ħiliet u li għandha għarfien u esperjenza f'oqsma li jaqgħu taħt il-kompetenza tad-Direttorat u hija familjari mar-rwol u l-funzjonament tal-Kunsill Ewropew u tal-Kunsill.

L-għarfien u l-esperjenza fil-qasam tal-ġestjoni tal-bini u tal-uffiċċji jkunu ta' vantaġġ. Għalkemm mhuwiex essenzjali l-għarfien tar-regoli u l-proċeduri baġitarji u/jew finanzjarji fl-Istituzzjonijiet tal-UE kif ukoll tal-prinċipji li jirregolaw l-għoti u l-ġestjoni ta' kuntratti fis-settur pubbliku tal-UE, il-persuna f'din il-kariga tkun mistennija tiżviluppa l-għarfien f'dak il-qasam.

Għarfien tajjeb tal-isfidi ambjentali jkun ta' vantaġġ.

Il-maniġers kollha tas-SĠK huma mistennija jagħtu pariri lill-ġerarkija tagħhom u lill-partijiet ikkonċernati, imexxu l-persunal u r-riżorsi finanzjarji tagħhom u jirrappreżentaw lis-SĠK. Dawn l-aspettattivi jinsabu mfissra fil-profil orizzontali tal-maniġers tas-SĠK (ara l-Anness I).

Barra minn hekk, il-persuna f'din il-kariga ser ikun jeħtieġ ikollha:

—	kapaċità li taħseb u tippjana b'mod strateġiku, li tantiċipa u tidentifika problemi potenzjali u li tipproponi soluzzjonijiet u kompromessi fattibbli;

—	ħiliet ta' komunikazzjoni eċċellenti, inkluż ħiliet ta' komunikazzjoni interpersonali;

—	il-kapaċità li żżomm relazzjonijiet tax-xogħol tajbin ma' firxa ta' interlokuturi interni u esterni u l-kapaċità li taġixxi b'diplomazija;

—	ħiliet ta' tmexxija u l-kapaċità li tippromwovi spirtu b'saħħtu ta' tim u tiggwida, timmotiva u tawtonomizza lill-persunal f'ambjent ta' diversità u multikulturali, b'enfasi qawwija fuq l-iżvilupp tal-persunal;

—	il-kapaċità li tippjana u torganizza x-xogħol ġenerali tad-Direttorat sabiex jintlaħqu l-iskadenzi kritiċi u li tiżgura t-tqassim ġust tax-xogħol fost il-membri tat-tim u l-ippjanar tas-suċċessjoni, kif ukoll il-kapaċità li tmexxi bidliet u tappoġġa lill-persunal matul il-bidliet;

—	il-kapaċità li tilħaq qbil jew għanijiet komuni billi tipprovdi pariri speċifiċi lill-partijiet ikkonċernati u billi tiffaċilita d-diskussjoni b'mod effettiv u kostruttiv.

Peress li s-SĠK iħaddan politika ta' mobbiltà għall-maniġers tiegħu, li għandu jkollhom esperjenza estensiva, il-kandidati għandhom ikunu lesti u kapaċi jaħdmu f'oqsma ta' attività differenti matul il-karriera tagħhom fis-SĠK.

POLITIKA TA' REKLUTAĠĠ

L-applikanti għandhom jissodisfaw ir-rekwiżiti li ġejjin fil-mument tal-applikazzjoni:

(a)	Kondizzjonijiet ġenerali — ikunu ċittadini ta' wieħed mill-Istati Membri tal-Unjoni Ewropea; — igawdu mid-drittijiet kollha tagħhom bħala ċittadini; — ikunu wettqu kwalunkwe obbligu impost fuqhom mil-liġijiet dwar il-lieva.

(b)

Kondizzjonijiet speċifiċi — ikollhom lawrja universitarja (1); — ikollhom mill-inqas ħmistax-il sena esperjenza professjonali rilevanti li minnhom ikunu effettivament wettqu mill-inqas tliet snin f'responsabbiltajiet maniġerjali u organizzattivi. Tliet snin esperjenza f'kariga b'responsabbiltajiet sinifikanti ta' koordinazzjoni jkunu ekwivalenti għall-esperjenza maniġerjali meħtieġa; — peress li l-Ingliż u l-Franċiż jintużaw b'mod estensiv għall-komunikazzjoni fis-SĠK u ma' istituzzjonijiet oħra, huwa meħtieġ għarfien eċċellenti ta' waħda miż-żewġ lingwi u għarfien tajjeb tal-lingwa l-oħra. L-għarfien ta' lingwi uffiċjali oħra tal-UE jkun ta' vantaġġ.

Nota:

(1)

Din il-pożizzjoni teħtieġ awtorizzazzjoni tas-sigurtà li tippermetti aċċess għad-dokumenti klassifikati (livell EU SECRET). Il-kandidati li japplikaw għall-pożizzjoni jridu jkunu lesti jgħaddu minn investigazzjoni ta' sigurtà skont id-Deċiżjoni tal-Kunsill 2013/488/UE (2). Il-ħatra għal din il-pożizzjoni ssir effettiva biss bil-kondizzjoni li l-kandidat magħżul jew magħżula tkun kisbet ċertifikat validu ta' approvazzjoni tas-sigurtà. Kandidat mingħajr awtorizzazzjoni tas-sigurtà jiġi jew tiġi offrut(a) kuntratt temporanju sakemm jinkiseb ir-riżultat tal-proċedura tal-approvazzjoni tas-sigurtà.

(2)	Il-persuna li tintgħażel għandha tkun lesta li ssegwi l-programm ta' taħriġ tas-SĠK dwar il-ġestjoni.

PROĊEDURA TAL-GĦAŻLA

L-Awtorità tal-Ħatra ser tiġi megħjuna minn bord konsultattiv tal-għażla sabiex tagħżel il-kandidat. Il-bord konsultattiv tal-għażla ser ikollu l-appoġġ ta' ċentru ta' evalwazzjoni, immexxi minn konsulenti tar-reklutaġġ esterni. Ir-rapporti stabbiliti miċ-ċentru ta' evalwazzjoni għall-istess tip ta' pożizzjoni ma jibqgħux validi wara sentejn mid-data li fiha saru l-eżerċizzji rilevanti jew mat-tmiem tal-kuntratt qafas bejn is-SĠK u ċ-ċentru ta' evalwazzjoni inkwistjoni – skont liema data tiġi l-ewwel.

Il-bord konsultattiv tal-għażla l-ewwel ser jevalwa u jqabbel il-kwalifiki, l-esperjenza u l-motivazzjoni tal-applikanti kollha, abbażi tal-applikazzjonijiet tagħhom. Abbażi ta' dik l-evalwazzjoni komparattiva, il-bord konsultattiv tal-għażla ser jagħmel lista ristretta tal-aktar kandidati adatti li, fl-opinjoni tiegħu, għandhom jiġu mistiedna għall-ewwel intervista. Peress li din l-ewwel għażla hija bbażata fuq evalwazzjoni komparattiva tal-applikazzjonijiet, l-ilħuq tar-rekwiżiti ta' din il-pożizzjoni vakanti ma jiggarantix stedina għall-ewwel intervista. Fost il-kandidati intervistati, il-bord konsultattiv tal-għażla ser jagħmel preselezzjoni tal-kandidati biex jattendu ċ-ċentru ta' evalwazzjoni, kif ukoll għat-tieni intervista mal-bord konsultattiv tal-għażla.

L-ippjanar proviżorju tal-għażla huwa kif ġej:

—	huwa mistenni li l-kandidati magħżula għall-intervisti jiġu infurmati fl-ewwel nofs ta' Diċembru 2020;

—	l-ewwel intervisti huma previsti għat-tieni nofs ta' Diċembru 2020;

—	iċ-ċentru ta' evalwazzjoni mistenni jsir fl-ewwel nofs ta' Jannar 2021;

—	it-tieni ċiklu ta' intervisti huwa previst għat-tieni nofs ta' Jannar 2021.

Nota: L-iskeda ta' hawn fuq hija purament indikattiva u, b'mod partikolari, soġġetta għall-implikazzjonijiet tal-miżuri restrittivi stabbiliti minħabba l-pandemija tal-COVID-19.

BAŻI LEGALI

Din il-pożizzjoni qed tiġi ppubblikata f'konformità mal-Artikolu 29(2) tar-Regolamenti tal-Persunal għall-Uffiċjali tal-Unjoni Ewropea (3) (pożizzjoni maniġerjali superjuri).

Din il-pożizzjoni ġiet ippubblikata lill-istituzzjonijiet kollha tal-Unjoni Ewropea u barra mill-istituzzjonijiet.

KIF TAPPLIKA

Id-data tal-għeluq għall-applikazzjonijiet hija l-1 ta’ Diċembru 2020 f'12.00 nofsinhar (ħin ta' Brussell).

L-applikazzjonijiet jintlaqgħu biss bil-posta elettronika u jridu jintbagħtu lil: applications.management@consilium.europa.eu (4) mhux aktar tard mid-data tal-għeluq. Applikazzjonijiet li jaslu tard mhumiex ser jitqiesu.

Għandu jintuża l-indirizz elettroniku indikat hawn fuq għal kwalunkwe korrispondenza marbuta mal-proċedura tal-għażla (fis-suġġett tal-email għandu jkun hemm it-titlu li ġej: CONS/AD/166/20 ORG.3).

Qabel ma jippreżentaw l-applikazzjoni tagħhom, il-kandidati għandhom jivverifikaw sew jekk jissodisfawx ir-rekwiżiti msemmijin taħt “Politika ta' Reklutaġġ” hawn fuq, biex b'hekk jevitaw l-esklużjoni awtomatika mill-proċedura tal-għażla.

Biex ikun validu, il-fajl tal-applikazzjoni jrid jinkludi d-dokumenti li ġejjin f'format pdf (Nota: dokumenti maqfula, protetti bil-password jew b'firma elettronika mhumiex aċċettati):

(a)

il-formola tal-applikazzjoni (Anness V) mimlija u datata kif meħtieġ; il-formola tal-applikazzjoni elettronika tinsab fuq is-sit web tal-Kunsill minn dan il-link: http://www.consilium.europa.eu/en/general-secretariat/jobs/job-opportunities/ (il-fajl ikun imsemmi “XXX (KUNJOMOK) – Application form.pdf”);

(b)

curriculum vitae dettaljat (5), bl-Ingliż jew bil-Franċiż, preferibbilment fil-format Europass (http://europass.cedefop.europa.eu), li jkopri l-karriera kollha tal-persuna li tapplika u jelenka, fost oħrajn, il-kwalifiki, l-għarfien lingwistiku, l-esperjenza u d-dmirijiet attwali tal-persuna li tapplika (il-fajl ikun imsemmi “XXX (KUNJOMOK) — CV.pdf”);

(c)	ittra ta' motivazzjoni, bl-Ingliż jew bil-Franċiż (fajl ikun imsemmi “XXX (KUNJOMOK) – Motivation letter.pdf”);

(d)

miġburin f'dokument pdf wieħed, kopji tad-diplomi li jiċċertifikaw l-edukazzjoni u kopji tad-dokumenti u ċ-ċertifikati relatati mal-esperjenza professjonali. Mhuwiex biżżejjed li sempliċiment jintbagħat il-curriculum vitae msemmi f'(b). Id-dokumenti ta' sostenn iridu jkunu nħarġu minn parti terza (il-fajl ikun imsemmi “XXX (KUNJOMOK) — Supporting documents.pdf”).

Jekk ma jiġux inklużi dawn id-dokumenti l-applikazzjoni tkun invalida.

Id-dokumenti kollha ta' sostenn mehmuża mal-applikazzjoni għandhom jiġu nnumerati f'sekwenza (Anness 1, 2, eċċ.), imsemmija (bl-Ingliż jew bil-Franċiż) u miġbura kif imsemmi hawn fuq. Applikazzjonijiet li jaslu bil-posta, jew permezz ta' soluzzjonijiet ta' ħżin ta' data bbażati fuq cloud jew pjattaformi għall-kondiviżjoni tal-fajls mhumiex ser jiġu kkunsidrati.

Fil-każ li tintgħażel minn fost il-kandidati nitolbuk tipprovdi d-dokumenti oriġinali msemmija hawn fuq.

Ser tintbagħatlek email li tikkonferma l-wasla tal-applikazzjoni tiegħek. Tajjeb li tkun taf li qatt ma jistgħu jiġu eliminati għalkollox diffikultajiet tekniċi marbuta mat-trażmissjoni ta' emails. Għalhekk, jekk ma tirċevix email li tikkonferma l-wasla tal-applikazzjoni tiegħek, jekk jogħġbok ivverifika li s-SĠK ikun irċevieha billi tikkuntattja lil applications.management@consilium.europa.eu. Peress li l-bord konsultattiv tal-għażla ser jibda l-ħidma tiegħu ftit wara d-data tal-għeluq għall-applikazzjonijiet, inħeġġuk tagħmel kull verifika meħtieġa fil-ġimgħa ta' wara dik id-data.

OPPORTUNITAJIET INDAQS

Is-SĠK huwa impenjat favur opportunitajiet indaqs (ara l-Anness II).

Is-SĠK jagħraf li bilanċ tajjeb bejn ix-xogħol u l-ħajja privata huwa fattur motivazzjonali importanti għal ħafna nies u li x-xogħol flessibbli huwa dejjem aktar mistenni li jkun parti minn ambjent tax-xogħol modern. Għalhekk, huwa joffri pakkett tajjeb ħafna ta' arranġamenti u faċilitajiet statutorji flessibbli tax-xogħol bħall-indukrar ta' wara l-iskola u l-crèche.

Bħala impjegatur, is-SĠK huwa impenjat biex jiżgura l-ugwaljanza bejn il-ġeneri u biex jipprevjeni d-diskriminazzjoni fuq kwalunkwe bażi. Jilqa' b'mod attiv l-applikazzjonijiet mill-kandidati kwalifikati kollha minn ambjenti diversi, fost il-ħiliet kollha u mill-bażi ġeografika l-aktar wiesgħa possibbli fost l-Istati Membri tal-UE. Biex jippromwovi l-ugwaljanza bejn il-ġeneri, is-SĠK jħeġġeġ għal applikazzjonijiet mingħand nisa.

Matul il-proċedura ta' reklutaġġ tista' tiġi pprovduta assistenza lil persuni b'diżabilità. Għal aktar informazzjoni, jekk jogħġbok ibgħat email indirizzata lil equal.opportunities@consilium.europa.eu.

RIEŻAMI TAL-APPLIKAZZJONIJIET

Il-proċeduri marbuta ma' lmenti, appelli u riferimenti lill-Ombudsman Ewropew jinsabu fl-Anness III ta' dan l-avviż ta' pożizzjoni vakanti.

PROTEZZJONI TAD-DATA

Ir-regoli għall-ipproċessar ta' data personali b'rabta ma' din il-proċedura tal-għażla jinsabu fl-Anness IV ta' dan l-avviż ta' pożizzjoni vakanti.

---

(1)  L-Artikolu 5(3)(c) tar-Regolamenti tal-Persunal għall-Uffiċjali tal-Unjoni Ewropea (ir-Regolamenti tal-Persunal) jesiġi li l-applikanti jkollhom mill-inqas:

(i)	livell ta' edukazzjoni li jikkorrispondi ma' studji universitarji kompluti, iċċertifikati b'diploma meta t-tul ta' żmien normali tal-edukazzjoni universitarja jkun ta' erba' snin jew aktar, jew

(ii)	livell ta' edukazzjoni li jikkorrispondi ma' studji universitarji kompluti, iċċertifikati b'diploma u esperjenza professjonali adegwata ta' mill-inqas sena meta t-tul ta' żmien normali tal-edukazzjoni universitarja jkun ta' mill-inqas tliet snin.

(2)  Id-Deċiżjoni tal-Kunsill 2013/488/UE tat-23 ta’ Settembru 2013 dwar ir-regoli tas-sigurtà għall-protezzjoni ta’ informazzjoni klassifikata tal-UE (ĠU L 274, 15.10.2013, p. 1).

(3)  Ir-Regolamenti tal-Persunal għall-Uffiċjali u l-Kondizzjonijiet tal-Impjieg Applikabbli għall-Aġenti l-Oħra tal-Unjoni Ewropea, stabbiliti permezz tar-Regolament tal-Kunsill (KEE, Euratom, KEFA) Nru 259/68 (ĠU L 56, 4.3.1968, p. 1) u emendati l-aħħar permezz tar-Regolament tal-Parlament u tal-Kunsill (UE, Euratom) Nru 1023/2013 (ĠU L 287, 29.10.2013, p. 15).

(4)  Dan l-indirizz elettroniku huwa kkollegat ma' indirizz elettroniku funzjonali u jista' jittratta biss messaġġi b'Livell ta' Kunfidenzjalità “Normali”; emails mibgħuta b'livell ieħor ta' kunfidenzjalità (eż. “Personali”, “Privat”, “Kunfidenzjali”) ma jistgħux jiġu pproċessati. Għaldaqstant agħżel il-livell ta' kunfidenzjalità “Normali”. Id-daqs massimu tal-email tiegħek għandu jkun 25MB. Jekk id-daqs tal-email tiegħek bl-hemżiet magħha jaqbeż dan id-daqs massimu, jekk jogħġbok qassam l-hemżiet tiegħek fuq għadd ta' emails.

(5)  Il-kandidati huma mitluba ma jinkludux ritratti fis-CV tagħhom.