RAKKOMANDAZZJONI TAL-BORD EWROPEW DWAR IR-RISKJU SISTEMIKU

tas-27 ta’ Mejju 2020

dwar il-monitoraġġ tal-implikazzjonijiet tal-istabbiltà finanzjarja ta’ moratorji tad-dejn, u skemi ta’ garanzija pubblika u miżuri oħra ta’ natura fiskali meħuda biex jipproteġu l-ekonomija reali b’reazzjoni għall-pandemija tal-COVID-19

(BERS/2020/8)

(2020/C 249/01)

IL-BORD ĠENERALI TAL-BORD EWROPEW DWAR IR-RISKJU SISTEMIKU,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament (UE) Nru 1092/2010 tal-Parlament Ewropew u tal-Kunsill tal-24 ta’ Novembru 2010 dwar is-sorveljanza makroprudenzjali fl-Unjoni Ewropea tas-sistema finanzjarja u li jistabbilixxi Bord Ewropew dwar ir-Riskju Sistemiku (1), u b’mod partikolari l-Artikolu 3(2)(b), (d) u (f) u l-Artikoli 16 sa 18 tiegħu,

Wara li kkunsidra d-Deċiżjoni BERS/2011/1 tal-Bord Ewropew dwar ir-Riskju Sistemiku tal-20 ta’ Jannar 2011 li tadotta r-Regoli tal-Proċedura tal-Bord Ewropew dwar ir-Riskju Sistemiku (2), u b’mod partikolari l-Artikolu 15(3)(e) u l-Artikoli 18 sa 20 tagħha,

Billi:

(1)

It-tifqigħa tal-pandemija tal-coronavirus (COVID-19) u l-infurzar sussegwenti ta’ miżuri ta’ konteniment jirrappreżentaw xokk qawwi għall-ekonomiji Ewropej. L-Istati Membri qed jistabbilixxu moratorji ta’ dejn, skemi ta’ garanzija pubblika u miżuri oħra ta’ natura fiskali biex jipproteġu lill-korporazzjonijiet mhux finanzjarji u l-unitajiet domestiċi mill-effetti tal-pandemija. Filwaqt li dawn il-miżuri huma mmirati lejn is-settur mhux finanzjarju, madankollu għandhom implikazzjonijiet għall-istabbiltà finanzjarja.

(2)

L-effettività ta’ dawn il-miżuri f’termini tal-preżervazzjoni tal-istabbiltà finanzjarja se tiddependi fuq id-daqs u l-karatteristiċi tad-disinn tagħhom. Jeħtieġ li dawn jiġu mmonitorjati bir-reqqa fuq livell nazzjonali sabiex ikunu jistgħu jsiru aġġustamenti fi żmien xieraq, bl-użu tal-flessibbiltà pprovduta mill-qafas temporanju tal-Unjoni għall-għajnuna mill-Istat biex jingħata sostenn lill-ekonomija fil-kuntest tat-tifqigħa tal-COVID-19 (3).

(3)

Minħabba l-livell għoli ta’ integrazzjoni tal-ekonomiji tal-Istati Membri, id-diversi miżuri implimentati minn Stat Membru wieħed se jkollhom impatt fuq Stati Membri oħrajn permezz ta’ riperkussjonijiet pożittivi jew negattivi. Dawn ir-riperkussjonijiet għandhom jitqiesu f’valutazzjoni komprensiva tal-implikazzjonijiet għall-istabbiltà finanzjarja fl-Unjoni kollha tal-miżuri meħuda mill-awtoritajiet nazzjonali biex jipproteġu l-ekonomija reali b’reazzjoni għall-pandemija tal-COVID-19.

(4)

Sabiex tiġi żgurata l-effettività tal-miżuri nazzjonali meħuda biex jassiguraw l-istabbiltà finanzjarja, jeħtieġ li jkun hemm monitoraġġ u kooperazzjoni mill-qrib bejn l-awtoritajiet makroprudenzjali nazzjonali u l-awtoritajiet fiskali u superviżorji nazzjonali, f’konformità mal-kompetenzi rispettivi tagħhom. Fl-14 ta’ Mejju 2020, il-Bord Ewropew dwar ir-Riskju Sistemiku (BERS) indirizza ittra lill-awtoritajiet fiskali nazzjonali tal-Unjoni li tinkoraġġixxi djalogu intensifikat minn stadju bikri bejn l-awtoritajiet rilevanti fil-livell nazzjonali (4).

(5)

Il-BERS huwa responsabbli għas-sorveljanza makroprudenzjali tas-sistema finanzjarja fi ħdan l-Unjoni u jikkontribwixxi għall-mitigazzjoni u l-prevenzjoni ta’ riskji sistemiċi. Għal dan il-għan, il-BERS beħsiebu jimmonitorja u jiddiskuti regolarment l-implikazzjonijiet fuq l-istabbiltà finanzjarja fl-Unjoni kollha tal-miżuri nazzjonali introdotti biex jipproteġu l-ekonomija reali b’reazzjoni għall-pandemija tal-COVID-19. Il-BERS beħsiebu jiffoka b’mod partikolari fuq l-implikazzjonijiet transkonfinali u transsettorjali. Dan il-monitoraġġ għandu jkompli biss sakemm ikun hemm impatt potenzjali ta’ dawn il-miżuri fuq l-istabbiltà finanzjarja fl-Unjoni.

(6)

Il-monitoraġġ tal-implikazzjonijiet ta’ dawn il-miżuri għall-istabbiltà finanzjarja fl-Unjoni kollha ser jeħtieġ ir-rapportar ta’ informazzjoni nazzjonali rilevanti mill-awtoritajiet makroprudenzjali nazzjonali. It-talbiet tal-BERS għal informazzjoni rilevanti minn dawk l-awtoritajiet għandhom iqisu l-prinċipju tal-proporzjonalità u jevitaw id-duplikazzjoni tar-rekwiżiti ta’ rappurtar billi jiffokaw fuq informazzjoni li mhijiex disponibbli minn sorsi oħra.

(7)

Il-BERS beħsiebu jikkumplimenta u jsaħħaħ il-monitoraġġ u l-valutazzjoni li qed isiru fil-livell nazzjonali. L-għan tal-BERS huwa li jrawwem skambju ta’ esperjenzi u identifikazzjoni bikrija ta’ kwistjonijiet transkonfinali u transsettorjali. Fi stadju aktar tard, ser jadotta wkoll perspettiva kkoordinata tal-approċċi għat-tneħħija gradwali tal-miżuri. Għal dawn il-finijiet, il-BERS għandu l-intenzjoni li jistabbilixxi kanal ta’ feedback biex jippermetti l-kondiviżjoni ta’ informazzjoni bejn l-awtoritajiet li jirrapportaw.

(8)

Din ir-Rakkomandazzjoni ma toħloqx rekwiżiti ġodda ta’ rappurtar għall-industrija tas-servizzi finanzjarji. Biex jikseb l-informazzjoni, il-BERS għandu joqgħod fuq ir-rappurtar mill-awtoritajiet makroprudenzjali nazzjonali ta’ informazzjoni li tkun inġabret għall-finijiet tal-monitoraġġ nazzjonali tagħhom, li mbagħad tiddependi fuq ir-rappurtar minn awtoritajiet fiskali nazzjonali u aġenziji tal-gvern involuti fit-twettiq tal-miżuri. Il-BERS għandu joqgħod ukoll fuq data miġbura mill-istituzzjonijiet membri tiegħu, b’mod partikolari l-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol, il-Bank Ċentrali Ewropew u l-Bord Uniku ta’ Riżoluzzjoni.

(9)	Din ir-Rakkomandazzjoni hija mingħajr preġudizzju għall-mandati tal-politika monetarja tal-banek ċentrali fl-Unjoni.

(10)	Ir-rakkomandazzjonijiet tal-BERS jiġu ppubblikati wara li jkunu ġew infurmati d-destinatarji, u wara li l-Bord Ġenerali jkun informa lill-Kunsill tal-Unjoni Ewropea dwar l-intenzjoni tiegħu li jagħmel dan u wara li jkun ta opportunità lill-Kunsill biex jirreaġixxi,

ADOTTA DIN IR-RAKKOMANDAZZJONI:

TAQSIMA 1

RAKKOMANDAZZJONIJIET

Rakkomandazzjoni A — Monitoraġġ nazzjonali tal-implikazzjonijiet tal-istabbiltà finanzjarja tal-miżuri meħuda għall-protezzjoni tal-ekonomija reali b’reazzjoni għall-pandemija tal-COVID-19

Huwa rrakkomandat li l-awtoritajiet makroprudenzjali nazzjonali jimmonitorjaw u jivvalutaw l-implikazzjonijiet għall-istabbiltà finanzjarja tal-miżuri relatati mal-COVID-19 meħuda mill-Istati Membri tagħhom biex jipproteġu lill-ekonomija reali, bħal moratorji tad-dejn, u skemi ta’ garanzija pubblika u miżuri oħrajn ta’ natura fiskali. Għal dan il-għan, huwa rrakkomandat li l-awtoritajiet makroprudenzjali nazzjonali jimmonitorjaw il-karatteristiċi tad-disinn u l-użu ta’ dawn il-miżuri, kif ukoll l-implikazzjonijiet possibbli għall-istabbiltà finanzjarja bl-użu ta’ indikaturi ewlenin, bħal dawn li ġejjin.

(a)

Id-disinn u l-użu tal-miżuri: b’mod partikolari l-volum; it-tipi ta’ appoġġ finanzjarju (bħal moratorji ta’ dejn, garanziji ta’ self, self issussidjat, jew parteċipazzjonijiet azzjonarji); il-benefiċjarji u l-kundizzjonijiet tal-eliġibbiltà; id-durata; u informazzjoni dwar l-użu tal-miżura (eż. il-volum u n-numru ta’ applikazzjonijiet riċevuti u aċċettati).

(b)

Implikazzjonijiet għall-istabbiltà finanzjarja: b’mod partikolari l-fluss ta’ kreditu għall-ekonomija reali; il-likwidità, is-solvenza u l-livell ta’ dejn tas-settur mhux finanzjarju; u s-sodezza finanzjarja tal-istituzzjonijiet finanzjarji, inklużi tendenzi osservati u mistennija f’selfiet improduttivi u l-abbiltà li jissodisfaw rekwiżiti ta’ likwidità u kapitali.

Rakkomandazzjoni B — Rappurtar minn awtoritajiet makroprudenzjali nazzjonali lill-BERS

Huwa rrakkomandat li l-awtoritajiet makroprudenzjali nazzjonali jirrapportaw regolarment lill-BERS l-informazzjoni meħtieġa biex il-BERS jimmonitorja u jivvaluta l-implikazzjonijiet tal-miżuri nazzjonali msemmija fir-Rakkomandazzjoni A għall-istabbiltà finanzjarja fl-Unjoni. Dan għandu jinkludi l-informazzjoni meħtieġa biex jiġu mmonitorjati u vvalutati l-implikazzjonijiet transkonfinali u transettorjali, kif disponibbli għall-awtoritajiet makroprudenzjali nazzjonali permezz ta’ arranġamenti ta’ rapportar eżistenti ma’ istituzzjonijiet finanzjarji u kwalunkwe informazzjoni addizzjonali magħmula disponibbli mill-awtoritajiet fiskali u aġenziji governattivi oħra involuti fit-twettiq tal-miżuri.

TAQSIMA 2

IMPLIMENTAZZJONI

1.   Definizzjonijiet

Għall-finijiet ta’ din ir-Rakkomandazzjoni, tapplika d-definizzjoni li ġejja:

(a)

“awtorità makroprudenzjali nazzjonali” tfisser awtorità nazzjonali bl-objettivi, l-arranġamenti, il-kompiti, is-setgħat, l-istrumenti, ir-rekwiżiti ta’ akkontabilità u karatteristiċi oħra stabbiliti fir-Rakkomandazzjoni BERS/2011/3 tal-Bord Ewropew dwar ir-Riskju Sistemiku (5) jew, fejn tali awtorità ma tkunx ġiet stabbilita, awtorità maħtura skont il-Kapitolu 4 tat-Titolu VII tad-Direttiva 2013/36/UE (6) jew l-Artikolu 458(1) tar-Regolament (UE) Nru 575/2013 (7).

2.   Kriterji għall-implimentazzjoni

1.

Il-kriterju li ġej japplika għall-implimentazzjoni tar-Rakkomandazzjonijiet A u B. (a) Għandha tingħata l-kunsiderazzjoni dovuta lill-prinċipju tal-proporzjonalità, filwaqt li jitqiesu l-għan u l-kontenut ta’ kull rakkomandazzjoni.

2.

Il-kriterju li ġej japplika għall-implimentazzjoni tar-Rakkomandazzjoni B. (a) L-ewwel rapport għandu jiġi ppreżentat sal-31 ta’ Lulju 2020.

3.   Mudelli għar-rappurtar

Sabiex tiġi żgurata l-koordinazzjoni tar-rappurtar skont ir-Rakkomandazzjoni B, il-BERS se jippubblika mudelli rilevanti sat-30 ta’ Ġunju 2020.

4.   Skeda ta’ żmien għas-segwitu

Skont l-Artikolu 17(1) tar-Regolament (UE) Nru 1092/2010, id-destinatarji għandhom jikkomunikaw lill-Parlament Ewropew, lill-Kunsill, lill-Kummissjoni u lill-BERS, l-azzjonijiet li jkunu ħadu b’reazzjoni għal din ir-rakkomandazzjoni jew jissostanzjaw kull nuqqas ta’ azzjoni. Il-komunikazzjonijiet għandhom jintbagħtu b’mod konformi ma’ dawn l-iskedi ta’ żmien.

1.   Rakkomandazzjoni A

Sal-31 ta’ Lulju 2020, id-destinatarji huma mitluba li jibagħtu lill-Parlament Ewropew, lill-Kunsill, lill-Kummissjoni u lill-BERS il-formola fl-Anness dwar l-implimentazzjoni tar-Rakkomandazzjoni A.

2.   Rakkomandazzjoni B

Sal-31 ta’ Diċembru 2020, id-destinatarji huma mitluba li jibagħtu lill-Parlament Ewropew, lill-Kunsill, lill-Kummissjoni u lill-BERS il-formola fl-Anness dwar l-implimentazzjoni tar-Rakkomandazzjoni B.

5.   Emendi għar-Rakkomandazzjoni

Il-Bord Ġenerali għandu jiddeċiedi meta jeħtieġ li tiġi emendata din ir-Rakkomandazzjoni. Tali emendi jinkludu b’mod partikolari t-tul ta’ żmien tal-monitoraġġ u r-rappurtar fir-Rakkomandazzjonijiet A u B.

6.   Monitoraġġ u valutazzjoni

1.

Il-Bord Ġenerali għandu jivvaluta l-azzjonijiet u l-ġustifikazzjonijiet ikkomunikati mid-destinatarji u, fejn xieraq, jista’ jiddeċiedi li din ir-Rakkomandazzjoni ma ġietx segwita u li destinatarju naqas milli jipprovdi ġustifikazzjoni adegwata għan-nuqqas ta’ azzjoni tiegħu.

2.

Il-metodoloġija ppreżentata fil-Manwal dwar il-valutazzjoni tal-konformità mar-rakkomandazzjonijiet tal-BERS (8), li tiddeskrivi l-proċedura għall-valutazzjoni tal-konformità mar-rakkomandazzjonijiet tal-BERS, mhijiex applikabbli.

---

(1)  ĠU L 331, 15.12.2010, p. 1.

(2)  ĠU C 58, 24.2.2011, p. 4.

(3)  Komunikazzjoni mill-Kummissjoni, Qafas Temporanju għal miżuri ta’ għajnuna mill-Istat biex jingħata sostenn lill-ekonomija matul it-tifqigħa preżenti tal-COVID-19 (2020/C 91 I/01) (ĠU C 91 I, 20.3.2020, p. 1), u d-dokumenti relatati dwar ir-regoli tal-għajnuna mill-Istat u l-coronavirus disponibbli fuq https://ec.europa.eu/competition/state_aid/what_is_new/covid_19.html

(4)  Ara l-ittra tal-14 ta’ Mejju 2020 mill-President tal-BERS lill-President u lill-Membri tal-Kunsill għall-Affarijiet Ekonomiċi u Finanzjarji, disponibbli fuq:

https://www.esrb.europa.eu/pub/pdf/other/esrb.letter200514_ESRB_work_on_implications_to_protect_the_real_economy~e67a9f48ca.en.pdf

(5)  Rakkomandazzjoni BERS/2011/3 tal-Bord Ewropew dwar ir-Riskju Sistemiku tat-22 ta’ Diċembru 2011 dwar il-mandat makroprudenzjali tal-awtoritajiet nazzjonali (ĠU C 41, 14.2.2012, p. 1).

(6)  Id-Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176, 27.6.2013, p. 338).

(7)  Ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).

(8)  Handbook on the assessment of compliance with ESRB recommendations (Manwal dwar il-valutazzjoni tal-konformità mar-rakkomandazzjonijiet tal-BERS), April 2016, disponibbli fuq https://www.esrb.europa.eu/pub/pdf/recommendations/160502_handbook.en.pdf

Rata tal-kambju tal-euro (1)

It-28 ta' Lulju 2020

(2020/C 249/02)

1 euro =

	Munita	Rata tal-kambju
USD	Dollaru Amerikan	1,1717
JPY	Yen Ġappuniż	123,34
DKK	Krona Daniża	7,4429
GBP	Lira Sterlina	0,90968
SEK	Krona Żvediża	10,2820
CHF	Frank Żvizzeru	1,0758
ISK	Krona Iżlandiża	158,60
NOK	Krona Norveġiża	10,6940
BGN	Lev Bulgaru	1,9558
CZK	Krona Ċeka	26,251
HUF	Forint Ungeriż	346,98
PLN	Zloty Pollakk	4,4054
RON	Leu Rumen	4,8355
TRY	Lira Turka	8,1283
AUD	Dollaru Awstraljan	1,6412
CAD	Dollaru Kanadiż	1,5693
HKD	Dollaru ta' Hong Kong	9,0810
NZD	Dollaru tan-New Zealand	1,7630
SGD	Dollaru tas-Singapor	1,6168
KRW	Won tal-Korea t'Isfel	1 406,13
ZAR	Rand ta' l-Afrika t'Isfel	19,4315
CNY	Yuan ren-min-bi Ċiniż	8,2041
HRK	Kuna Kroata	7,5070
IDR	Rupiah Indoneżjan	17 030,66
MYR	Ringgit Malażjan	4,9827
PHP	Peso Filippin	57,664
RUB	Rouble Russu	84,8413
THB	Baht Tajlandiż	36,920
BRL	Real Brażiljan	6,0650
MXN	Peso Messikan	25,8438
INR	Rupi Indjan	87,7140

---

(1)  Sors: rata tal-kambju ta' referenza ppubblikata mill-Bank Ċentrali Ewropew.

Informazzjoni mill-Kummissjoni skont id-Deċiżjoni tal-Kunsill (UE) 2020/649

(2020/C 249/03)

Skont l-Artikolu 2 tad-Deċiżjoni tal-Kunsill (UE) 2020/649 tas-7 ta’ Mejju 2020 dwar il-pożizzjoni li għandha tittieħed f’isem l-Unjoni Ewropea matul is-56 sessjoni tal-Kumitat ta’ Esperti dwar it-Trasport ta’ Oġġetti Perikolużi tal-Organizzazzjoni Intergovernattiva għat-Trasport Internazzjonali bil-Ferrovija fir-rigward ta’ ċerti emendi tal-Appendiċi C tal-Konvenzjoni dwar it-Trasport Internazzjonali bil-Ferrovija (1), il-Kummissjoni tinforma li d-deċiżjonijiet meħuda fil-korp u applikabbli mill-1 ta’ Jannar 2021 huma disponibbli fuq:

http://otif.org/fileadmin/new/2-Activities/2D-Dangerous-Goods/2Df-Notifications/2021/NOT-RID-20016-e-amendments_2021_RID.pdf

---

(1)  ĠU L 153, 15.5.2020, p. 1.

Notifika minn qabel ta’ konċentrazzjoni

Każ M.9831 – OMV/Borealis

Każ li jista’ jiġi kkunsidrat għal proċedura ssimplifikata

(Test b’rilevanza għaż-ŻEE)

(2020/C 249/04)

---

(1)  ĠU L 24, 29.1.2004, p. 1 (ir- “Regolament dwar l-Għaqdiet”).

(2)  ĠU C 366, 14.12.2013, p. 5.

Rettifika għan-notifika minn qabel ta’ konċentrazzjoni (Il-Każ M.9884 — Thoma Bravo/Madison Dearborn Partners/Axiom) Każ li jista’ jiġi kkunsidrat għal proċedura ssimplifikata

( Il-Ġurnal Uffiċjali tal-Unjoni Ewropea C 219 tat-3 ta’ Lulju 2020 )

(2020/C 249/05)

Fil-paġna 17, il-punt 1, l-ewwel linja:

għal:

aqra: