Avviż ta’ pożizzjoni vakanti CONS/AD/157/20

(2020/C 35 A/01)

TAGĦRIF ĠENERALI

Dipartiment	JAI.2 JUSTICE
Post tax-xogħol	Brussell, Bini Justus Lipsius
Titlu tal-pożizzjoni	Direttur
Grupp tal-funzjoni u grad	AD 14
Approvazzjoni tas-sigurtà meħtieġa	EU SECRET
SKADENZA GĦALL-APPLIKAZZJONIJIET	il-21 ta’ Frar 2020 — 12:00 nofsinhar (ħin ta’ Brussell)

Min aħna

Is-Segretarjat Ġenerali tal-Kunsill (SĠK) jassisti lill-Kunsill Ewropew u lill-Kunsill tal-UE u l-korpi preparatorji tagħhom fl-oqsma kollha tal-attivitajiet tagħhom. Jipprovdi pariri u sostenn lill-membri tal-Kunsill Ewropew u lill-Kunsill u lill-Presidenti tagħhom fl-oqsma kollha ta’ attività, inkluż pariri ta’ politika u legali, koordinazzjoni ma’ istituzzjonijiet oħra, elaborazzjoni ta’ kompromessi, superviżjoni kif ukoll jittratta l-aspetti prattiċi kollha li huma meħtieġa għat-tħejjija u t-tmexxija tajba tal-Kunsill Ewropew u l-Kunsill.

Id-Direttorat Ġenerali “Ġustizzja u Affarijiet Interni” (DG JAI) bħalissa jikkonsisti f’żewġ Direttorati: “Affarijiet Interni” (JAI.1) u “Ġustizzja” (JAI.2). Żewġ unitajiet, “Drittijiet u valuri fundamentali, Stat tad-dritt u Protezzjoni tad-data” u “Evalwazzjonijiet fil-Politika tal-Ġustizzja u l-Affarijiet Interni u fil-Politika dwar id-Drogi”, jirrapportaw ukoll lid-Direttur Ġenerali.

Id-Direttorat JAI.2 għandu r-responsabbiltà ewlenija għall-Ġustizzja, li tkopri l-fajls tal-ġustizzja kriminali, il-kooperazzjoni fil-ġustizzja ċivili, il-ġustizzja elettronika kif ukoll għadd ta’ kwistjonijiet ta’ politika ċibernetika. Huwa jikkoordina l-organizzazzjoni tal-laqgħat tal-Kunsill Ġustizzja u Affarijiet Interni, li normalment jiltaqa’ mill-inqas erba’ darbiet fis-sena. Il-Kunsill jitħejja mill-Coreper u minn diversi gruppi ta’ ħidma, kumitati speċjali u fora oħra li jittrattaw fajls leġislattivi u mhux leġislattivi, kif ukoll relazzjonijiet internazzjonali li jikkonċernaw dawn il-fajls.

Id-Direttorat JAI.2 bħalissa għandu livell wieħed ta’ ġestjoni fil-livell ta’ Direttur, b’Viċi Direttur responsabbli għall-fajls speċifiċi attribwiti mid-Direttur.

Nipproponu

Il-pożizzjoni ta’ Direttur ta’ JAI.2 hija pożizzjoni esiġenti f’ambjent politikament interessanti u li jinbidel b’mod rapidu, li tmexxi tim ta’ ’l fuq minn għoxrin membru tal-persunal u li tittratta kemm l-aspetti operazzjonali kif ukoll dawk strateġiċi tal-fajls dwar il-ġustizzja li dawn il-membri tal-persunal jimmaniġġaw.

Taħt l-awtorità tad-Direttur Ġenerali, inti tkun qed tmexxi d-Direttorat tiegħek u r-riżorsi tiegħu b’mod professjonali, torganizza l-attivitajiet tiegħu u tappoġġa u timmotiva lill-persunal fil-ħidma tiegħu. Tkun qed tiżgura l-kwalità tas-servizzi u l-prodotti mogħtija mid-Direttorat, kif ukoll il-komunikazzjoni u l-kooperazzjoni effettivi kemm fi ħdan id-Direttorat u fid-Direttorat Ġenerali, kif ukoll ma’ servizzi oħra tas-SĠK.

Ser tipprovdi pariri ta’ livell għoli dwar il-linji politiċi u l-proċeduri, bil-fomm u bil-miktub, fuq l-inizjattiva tiegħek stess jew fuq talba, lill-Kunsill Ewropew, il-Kunsill, il-Coreper u l-Presidenzi tagħhom u lis-Segretarju Ġenerali dwar l-aspetti kollha tad-dossiers li jaqgħu taħt il-kompetenza tad-Direttorat. Ser tieħu sehem ukoll f’laqgħat u, fejn xieraq, f’laqgħat ta’ informazzjoni u/jew negozjati bil-ħsieb li jintlaħqu kompromessi u jinstabu soluzzjonijiet. F’dan il-kuntest, inti ser tassisti lill-Presidenza b’rotazzjoni fin-negozjati u tiżgura komunikazzjoni u kooperazzjoni effettivi ma’ istituzzjonijiet, aġenziji u korpi oħra tal-UE fl-oqsma ta’ kompetenza tad-Direttorat.

Inti ser tiddefinixxi l-objettivi li għandhom jintlaħqu u tikkontribwixxi biex jintlaħqu billi tistabbilixxi l-programm ta’ ħidma tad-Direttorat u tiżgura l-monitoraġġ xieraq tal-implimentazzjoni tiegħu.

Ser tkun responsabbli wkoll biex tibda u tissorvelja attivitajiet ta’ analiżi tal-politiki bil-għan li tagħti pariri għat-teħid ta’ deċiżjonijiet fl-oqsma ta’ kompetenza tad-Direttorat.

Ser tkun tista’ tippjana u torganizza l-ħidma b’mod flessibbli, skont il-ħinijiet tax-xogħol u l-iskeda tal-laqgħat fil-qasam ta’ attività tad-Direttorat. Int u l-persunal tiegħek ser tkunu tistgħu tibbenefikaw mill-arranġamenti tax-xogħol tas-SĠK, inkluż it-telexogħol. Ikunu meħtieġa missjonijiet okkażjonali barra mill-pajjiż (madwar għaxar darbiet fis-sena), normalment fi ħdan l-UE (eż. lejn il-Lussemburgu, Strasburgu u l-Istat Membru tal-Presidenza).

Qed infittxu

Qed infittxu maniġer b’esperjenza fit-tfassil tal-politika tal-UE u l-proċess leġislattiv tal-UE u b’għarfien estensiv tal-kwistjonijiet istituzzjonali tal-UE. Lawrja fil-liġi titqies bħala vantaġġ, filwaqt li esperjenza fil-qasam ġudizzjarju u/jew l-għarfien tal-kwistjonijiet legali tal-UE huma meħtieġa. Għarfien tal-oqsma koperti mid-Direttorat u fehim tajjeb tal-ispeċifiċitajiet tal-ġustizzja u l-affarijiet interni huma ta’ vantaġġ.

Il-maniġers kollha tas-SĠK huma mistennija jagħtu pariri lill-ġerarkija tagħhom u lill-partijiet ikkonċernati, imexxu l-persunal u r-riżorsi finanzjarji tagħhom u jirrappreżentaw lis-SĠK. Dawn l-aspettattivi jinsabu fil-profil orizzontali tal-maniġers tas-SĠK, fl-Anness I.

Barra minn hekk, il-persuna impjegata ser ikun jeħtieġ ikollha:

—	kapaċità li taħseb u tippjana b’mod strateġiku, li tantiċipa u tidentifika problemi potenzjali u li tipproponi soluzzjonijiet u kompromessi fattibbli;

—	ħiliet ta’ tmexxija u l-kapaċità li tiggwida, timmotiva u tawtonomizza lill-persunal f’ambjent ta’ diversità u multikulturali, b’enfasi qawwija fuq l-iżvilupp tal-persunal;

—	ħiliet ta’ komunikazzjoni eċċellenti, inkluż ħiliet ta’ komunikazzjoni interpersonali sodi; il-kapaċità li tippromwovi spirtu b’saħħtu ta’ tim u li żżomm relazzjonijiet tax-xogħol tajbin ma’ firxa ta’ interlokuturi interni u esterni u l-kapaċità li turi diplomazija;

—	il-kapaċità li tmexxi t-tibdil u tappoġġa lill-persunal waqt it-tibdil;

—	kapaċità qawwija li tippjana u torganizza x-xogħol ġenerali tad-direttorat sabiex jintlaħqu l-iskadenzi kritiċi u li tieħu ħsieb it-tqassim ġust tax-xogħol fost il-membri tat-tim u l-ippjanar tas-suċċessjoni;

—	il-kapaċità li tilħaq qbil jew għanijiet komuni billi tagħti pariri speċifiċi lill-partijiet ikkonċernati u billi tiffaċilita b’mod effettiv u kostruttiv diskussjoni li twassal għall-aħjar riżultati possibbli.

Peress li s-SĠK iħaddan politika ta’ mobbiltà għall-maniġers tiegħu, li għandu jkollhom esperjenza estensiva, il-kandidati għandhom ikunu lesti u kapaċi jaħdmu f’oqsma ta’ attività differenti matul il-karriera tagħhom fis-SĠK.

POLITIKA TA’ REKLUTAĠĠ

Fil-mument tal-applikazzjoni, l-applikanti jridu jissodisfaw ir-rekwiżiti li ġejjin:

(a)	Kondizzjonijiet ġenerali — ikunu ċittadini ta’ wieħed mill-Istati Membri tal-Unjoni Ewropea; — igawdu mid-drittijiet kollha tagħhom bħala ċittadini; — ikunu wettqu kwalunkwe obbligu impost fuqhom mil-liġijiet dwar il-lieva.

(b)

Kondizzjonijiet speċifiċi — ikollhom lawrja universitarja (1), lawrja fil-liġi tkun ta’ vantaġġ; — ikollhom mill-inqas 15-il sena esperjenza professjonali rilevanti li minnhom ikunu effettivament wettqu mill-inqas tliet snin f’responsabbiltajiet maniġerjali u organizzattivi. Tliet snin esperjenza f’kariga b’responsabbiltajiet sinifikanti ta’ koordinazzjoni jkunu ekwivalenti għall-esperjenza maniġerjali meħtieġa; — ikollhom esperjenza jaħdmu fil-qasam ġudizzjarju u/jew għarfien ta’ kwistjonijiet legali tal-UE; — peress li l-Ingliż u l-Franċiż jintużaw b’mod estensiv għall-komunikazzjoni fis-SĠK u ma’ istituzzjonijiet oħra, huwa meħtieġ għarfien eċċellenti ta’ waħda miż-żewġ lingwi u għarfien tajjeb tal-lingwa l-oħra. L-għarfien ta’ lingwi uffiċjali oħra tal-UE huwa ta’ vantaġġ.

Nota:

(1)

Din il-pożizzjoni teħtieġ awtorizzazzjoni tas-sigurtà li tippermetti aċċess għad-dokumenti klassifikati (livell EU SECRET). Il-kandidati li japplikaw għall-pożizzjoni jridu jkunu lesti jgħaddu minn investigazzjoni ta’ sigurtà skont id-Deċiżjoni tal-Kunsill 2013/488/UE (2). Il-ħatra għal din il-pożizzjoni ssir effettiva biss bil-kondizzjoni li l-kandidat magħżul jew magħżula tkun kisbet ċertifikat validu ta’ approvazzjoni tas-sigurtà. Il-kandidati mingħajr awtorizzazzjoni tas-sigurtà ser jiġu offruti kuntratt temporanju sakemm jinkiseb ir-riżultat tal-proċedura tal-approvazzjoni tas-sigurtà.

(2)

Il-kandidat li jintgħażel għandu jkun lest li jsegwi l-programm ta’ taħriġ ta’ ġestjoni tas-SĠK.

PROĊEDURA TAL-GĦAŻLA

L-Awtorità tal-Ħatra ser tiġi megħjuna minn bord konsultattiv tal-għażla sabiex tagħżel il-kandidat. Il-bord konsultattiv tal-għażla ser ikollu l-appoġġ ta’ ċentru ta’ evalwazzjoni, immexxi minn konsulenti tar-reklutaġġ esterni. Ir-rapporti stabbiliti miċ-ċentru ta’ evalwazzjoni għall-istess tip ta’ pożizzjoni ma jibqgħux validi wara sentejn mid-data li fiha saru l-eżerċizzji rilevanti jew mat-tmiem tal-kuntratt qafas bejn is-SĠK u ċ-ċentru ta’ evalwazzjoni inkwistjoni - skont liema data tiġi l-ewwel.

Il-bord konsultattiv tal-għażla l-ewwel ser jevalwa u jqabbel il-kwalifiki, l-esperjenza u l-motivazzjoni tal-applikanti kollha, abbażi tal-applikazzjonijiet tagħhom. Abbażi ta’ dik l-evalwazzjoni komparattiva, il-bord konsultattiv tal-għażla ser jagħmel lista ristretta tal-aktar kandidati adatti li, fl-opinjoni tiegħu, għandhom jiġu mistiedna għall-ewwel intervista. Peress li din l-ewwel għażla hija bbażata fuq evalwazzjoni komparattiva tal-applikazzjonijiet, l-ilħuq tar-rekwiżiti ta’ din il-pożizzjoni vakanti ma jiggarantix stedina għall-ewwel intervista. Fost il-kandidati intervistati, il-bord konsultattiv tal-għażla ser jagħmel preselezzjoni tal-kandidati biex jattendu iċ-ċentru ta’ evalwazzjoni, kif ukoll għat-tieni intervista mal-bord konsultattiv tal-għażla.

L-ippjanar proviżorju tal-għażla huwa kif ġej:

—	huwa mistenni li l-kandidati magħżula għall-intervisti ser jiġu infurmati sa nofs Marzu 2020;

—	l-ewwel intervisti huma previsti għat-tieni nofs ta’ Marzu 2020;

—	iċ-ċentru ta’ evalwazzjoni huwa mistenni li jsir sa tmiem Marzu/il-bidu ta’ April 2020;

—	it-tieni ċiklu ta’ intervisti huwa previst għat-tieni nofs ta’ April 2020.

BAŻI LEGALI

Din il-pożizzjoni qed tiġi ppubblikata f’konformità mal-Artikolu 29(2) tar-Regolamenti tal-Persunal għall-Uffiċjali tal-Unjoni Ewropea (3) (pożizzjoni maniġerjali superjuri).

Din il-pożizzjoni ġiet ippubblikata lill-istituzzjonijiet kollha tal-Unjoni Ewropea u barra mill-istituzzjonijiet.

KIF TAPPLIKA

Id-data tal-għeluq għall-applikazzjonijiet hija l-21 ta’ Frar 2020 fi 12:00 nofsinhar (ħin ta’ Brussell).

L-applikazzjonijiet jintlaqgħu biss bil-posta elettronika u jridu jintbagħtu lil:applications.management@consilium.europa.eu (4) mhux aktar tard mid-data tal-għeluq. Mhumiex ser jitqiesu l-applikazzjonijiet li jaslu tard.

Għandu jintuża l-indirizz elettroniku indikat hawn fuq għal kwalunkwe korrispondenza marbuta mal-proċedura tal-għażla (fis-suġġett tal-email għandu jkun hemm it-titlu li ġej: CONS/AD/157/20 JAI.2).

Qabel ma jippreżentaw l-applikazzjoni tagħhom, il-kandidati għandhom jivverifikaw sew jekk jissodisfawx il-kriterji kollha ta’ eliġibbiltà biex b’hekk jevitaw l-esklużjoni awtomatika mill-proċedura tal-għażla.

Biex ikunu validi, l-applikazzjonijiet iridu jinkludu:

(a)	il-formola tal-applikazzjoni (Anness V) mimlija u datata kif meħtieġ; il-formola tal-applikazzjoni elettronika tinsab fuq is-sit web tal-Kunsill minn dan il-link: http://www.consilium.europa.eu/en/general-secretariat/jobs/job-opportunities/

(b)

curriculum vitae dettaljat (5), flimkien ma’ ittra ta’ motivazzjoni, bl-Ingliż jew bil-Franċiż, preferibbilment fil-format Europass (http://europass.cedefop.europa.eu), li jkopri l-karriera kollha tal-persuna li tapplika u jelenka, fost oħrajn, il-kwalifiki, l-għarfien lingwistiku, l-esperjenza u d-dmirijiet attwali tal-persuna li tapplika; u

(c)	kopji tad-diplomi li jiċċertifikaw l-edukazzjoni u kopji tad-dokumenti u ċ-ċertifikati relatati mal-esperjenza professjonali. Id-dokumenti ta’ prova jridu jinħarġu minn parti terza u mhux biżżejjed li sempliċiment tintbagħat is-CV msemmija f’b).

Id-dokumenti kollha ta’ prova mehmuża mal-applikazzjoni jridu jkunu f’format MS word text, pdf jew jpg, jingħataw isem (bl-Ingliż jew bil-Franċiż) u jkunu nnumerati f’sekwenza (Anness 1, 2, eċċ.). Trid tiġi mehmuża wkoll lista tal-annessi kollha. Applikazzjonijiet li jaslu bil-posta, jew permezz ta’ soluzzjonijiet ta’ ħżin ta’ data bbażati fuq cloud jew pjattaformi għall-kondiviżjoni tal-fajls mhumiex ser jiġu kkunsidrati.

Fil-każ li tintgħażel minn fost il-kandidati nitolbuk tipprovdi d-dokumenti oriġinali msemmija hawn fuq.

Ser tintbagħatlek email li tikkonferma l-wasla tal-applikazzjoni tiegħek. Tajjeb li tkun taf li qatt ma jistgħu jiġu eliminati għalkollox diffikultajiet tekniċi marbuta mat-trasmissjoni ta’ emails. Għalhekk, jekk ma tirċevix email li tirrikonoxxi l-wasla tal-applikazzjoni tiegħek, jekk jogħġbok ivverifika li s-SĠK ikun irċevieha billi tikkuntattja lil applications.management@consilium.europa.eu. Peress li l-bord konsultattiv tal-għażla ser jibda l-ħidma tiegħu ftit wara d-data tal-għeluq għall-applikazzjonijiet, inħeġġuk tagħmel kull verifika meħtieġa fil-ġimgħa ta’ wara dik id-data.

OPPORTUNITAJIET INDAQS

Is-SĠK huwa impenjat li jipprovdi opportunitajiet indaqs għall-impjegati kollha tiegħu u l-applikanti għal impjieg (ara l-Anness II). Bħala impjegatur, is-SĠK huwa impenjat biex jiżgura l-ugwaljanza bejn is-sessi u biex jipprevjeni d-diskriminazzjoni fuq kwalunkwe bażi. Jilqa’ b’mod attiv l-applikazzjonijiet mill-kandidati kwalifikati kollha minn ambjenti diversi, fost il-ħiliet kollha u mill-bażi ġeografika l-aktar wiesgħa possibbli fost l-Istati Membri tal-UE. Biex tiġi promossa l-ugwaljanza bejn is-sessi, is-SĠK jinkoraġġixxi applikazzjonijiet min-nisa.

Tista’ tiġi pprovduta assistenza lil persuni b’diżabilità matul il-proċedura ta’ reklutaġġ. Għal aktar informazzjoni, jekk jogħġbok ibgħat email indirizzata lil equal.opportunities@consilium.europa.eu

RIEŻAMI TAL-APPLIKAZZJONIJIET

Il-proċeduri marbuta ma’ lmenti, appelli u riferimenti għall-Ombudsman Ewropew jinsabu fl-Anness III ta’ dan l-avviż ta’ pożizzjoni vakanti.

PROTEZZJONI TAD-DATA

Ir-regoli għall-ipproċessar ta’ data personali b’rabta ma’ din il-proċedura tal-għażla jinsabu fl-Anness IV ta’ dan l-avviż ta’ pożizzjoni vakanti.

---

(1)  L-Artikolu 5(3)(c) tar-Regolamenti tal-Persunal għall-Uffiċjali tal-Unjoni Ewropea (ir-Regolamenti tal-Persunal) jesiġi li l-applikanti jkollhom mill-inqas:

(i)	livell ta’ edukazzjoni li jikkorrispondi ma’ studji universitarji kompluti, iċċertifikati b’diploma meta t-tul ta’ żmien normali tal-edukazzjoni universitarja jkun ta’ erba’ snin jew aktar, jew

(ii)	livell ta’ edukazzjoni li jikkorrispondi ma’ studji universitarji kompluti, iċċertifikati b’diploma u esperjenza professjonali adegwata ta’ mill-inqas sena meta t-tul ta’ żmien normali tal-edukazzjoni universitarja jkun ta’ mill-inqas tliet snin.

(2)  Id-Deċiżjoni tal-Kunsill 2013/488/UE tat-23 ta’ Settembru 2013 dwar ir-regoli tas-sigurtà għall-protezzjoni ta’ informazzjoni klassifikata tal-UE (ĠU L 274, 15.10.2013, p. 1).

(3)  Ir-Regolament (KEE, Euratom, KEFA) Nru 259/68 tad-29 ta' Frar 1968 li jistabbilixxi r-Regolamenti tal-Persunal tal-uffiċjali u l-kondizzjonijiet ta' impjieg ta' uffiċjali oħra tal-Komunitajiet Ewropej u li jistabbilixxi miżuri temporanji applikabbli għall-Uffiċjali tal-Kummissjoni (ĠU L 56, 4.3.1968) (Edizzjoni Speċjali bil-Malti, Kapitolu 01, Volum 002 p. 5) u emendati l-aħħar permezz tar-Regolament tal-Parlament u tal-Kunsill (ĠU L 287, 29.10.2013, p. 15).

(4)  Dan l-indirizz elettroniku huwa kkollegat ma’ indirizz elettroniku funzjonali u jista’ jittratta biss messaġġi b’Livell ta’ Kunfidenzjalità “Normali”; emails mibgħuta b’livell ieħor ta’ kunfidenzjalità (eż. “Personali”, “Privat”, “Kunfidenzjali”) ma jistgħux jiġu pproċessati. Għaldaqstant agħżel il-livell ta’ kunfidenzjalità “Normali”. Id-daqs tal-email tiegħek m’għandux ikun iżjed minn 25MB. Jekk l-email tiegħek, flimkien mal-hemżiet tiegħu, tkun ta’ daqs ikbar minn dan, jekk jogħġbok qassam l-hemżiet tiegħek fuq għadd ta’ emails.

(5)  Il-kandidati huma mitluba ma jinkludux ritratti fis-CV tagħhom.

Avviż ta’ pożizzjoni vakanti CONS/AD/158/20

(2020/C 35 A/02)

TAGĦRIF ĠENERALI

Dipartiment	ORG.5 SIKUREZZA U SIGURTÀ
Post tax-xogħol	Brussell, Bini Justus Lipsius
Titlu tal-pożizzjoni	Direttur
Grupp tal-funzjoni u grad	AD 14
Approvazzjoni tas-sigurtà meħtieġa	EU TOP SECRET
SKADENZA GĦALL-APPLIKAZZJONIJIET il	-21 ta’ Frar 2020 — 12:00 nofsinhar (ħin ta’ Brussell)

Min aħna

Is-Segretarjat Ġenerali tal-Kunsill (SĠK) jassisti lill-Kunsill Ewropew u lill-Kunsill tal-UE u l-korpi preparatorji tagħhom fl-oqsma kollha tal-attivitajiet tagħhom. Jipprovdi pariri u sostenn lill-membri tal-Kunsill Ewropew u lill-Kunsill u lill-Presidenti tagħhom fl-oqsma kollha ta’ attività, inkluż pariri ta’ politika u legali, koordinazzjoni ma’ istituzzjonijiet oħra, elaborazzjoni ta’ kompromessi, superviżjoni kif ukoll jittratta l-aspetti prattiċi kollha li huma meħtieġa għat-tħejjija u t-tmexxija tajba tal-Kunsill Ewropew u l-Kunsill.

Id-Direttorat Ġenerali “Żvilupp Organizzattiv u Servizzi” (DG ORG), huwa responsabbli għall-iżvilupp organizzattiv tas-SĠK u l-forniment ta’ servizzi ewlenin ta’ appoġġ. Id-Direttorat Ġenerali bħalissa huwa magħmul minn ħames Direttorati (Riżorsi Umani, Protokoll u Laqgħat, Bini u Loġistika, Finanzi, u Sikurezza u Sigurtà).

Id-Direttorat “Sikurezza u Sigurtà” (ORG.5) għandu mandat mis-Segretarju Ġenerali biex jiżgura s-sikurezza u s-sigurtà tas-SĠK. Għal dak il-għan huwa jiżgura li jkun hemm fis-seħħ miżuri ta’ sigurtà u sikurezza biex jindirizzaw kwalunkwe theddida għall-assi tas-SĠK (persuni, informazzjoni, bini, infrastruttura u reputazzjoni). Huwa jagħti pariri lis-Segretarju Ġenerali, kif ukoll lill-Kunsill Ewropew u lill-Kunsill, dwar it-tisħiħ tal-kultura ta’ sigurtà tas-SĠK.

Id-Direttorat bħalissa huwa magħmul minn erba’ Unitajiet li jittrattaw rispettivament l-Istrateġija tas-Sigurtà u l-Kontinwità tal-Ħidma, is-Sigurtà Operazzjonali, is-Sigurtà tal-Informazzjoni, u s-Sikurezza.

Qed nipproponu

Il-kariga ta’ Direttur fid-Direttorat ORG.5 hija pożizzjoni li toffri sfida f’ambjent politikament interessanti u dinamiku. Inti ser tkun qed tmexxi tim ta’ madwar 180 membru tal-persunal mill-gruppi funzjonali kollha li huma appoġġati minn għadd sostanzjali ta’ kuntratturi esterni. Ser tkun responsabbli għall-aspetti operazzjonali, strateġiċi u finanzjarji tal-ippjanar u l-implimentazzjoni tal-attivitajiet kollha ta’ sikurezza u sigurtà. Ser tiżgura li s-SĠK ikun ippreparat għal żminijiet ta’ kriżi u jkollu stabbiliti pjanijiet ta’ kontinwità tal-ħidma.

Taħt l-awtorità tad-Direttur Ġenerali, inti tkun qed tmexxi d-Direttorat tiegħek u r-riżorsi tiegħu b’mod professjonali, torganizza l-attivitajiet tiegħu u tappoġġa u timmotiva lill-persunal fil-ħidma tiegħu. Ser tiżgura l-kwalità tas-servizz mogħti mid-Direttorat u li t-tim tiegħek iżomm il-pass mal-bidliet fit-theddidiet u japplika prinċipji ta’ titjib kontinwu. Ser tiżgura l-komunikazzjoni u l-kooperazzjoni effettivi kemm fi ħdan id-Direttorat kif ukoll mas-servizzi l-oħra tas-SĠK.

Inti ser issaħħaħ il-kultura tas-sigurtà fil-Kunsill Ewropew u fil-Kunsill fil-livelli kollha. Ser tippresiedi l-Kumitat tas-Sigurtà tal-Kunsill, li jiżgura l-protezzjoni xierqa tal-informazzjoni klassifikata tal-UE, u tipprovdi pariri dwar kwistjonijiet ta’ sigurtà kif meħtieġ lil korpi oħra tal-Kunsill. Ser taħdem mad-dipartiment tas-SĠK responsabbli għas-servizzi diġitali biex tiżgura protezzjoni xierqa tal-informazzjoni kollha tas-SĠK.

Ser tkun responsabbli għall-involviment ma’ korpi esterni dwar kwistjonijiet ta’ sikurezza u sigurtà. F’dan il-kuntest, ser ikun meħtieġ b’mod partikolari li tirrappreżenta lill-Kunsill Ewropew u lill-Kunsill f’diskussjonijiet u f’negozjati ma’ istituzzjonijiet oħra tal-UE, l-awtoritajiet tal-pajjiż ospitanti u dawk ta’ Stati Membri oħra tal-UE f’oqsma taħt il-kompetenza tad-Direttorat.

Inti ser tiddefinixxi l-objettivi li għandhom jintlaħqu u tikkontribwixxi biex jintlaħqu billi tistabbilixxi l-programm ta’ ħidma tad-Direttorat u tiżgura l-monitoraġġ xieraq tal-implimentazzjoni tiegħu.

Ser tkun tista’ tippjana u torganizza x-xogħol b’mod flessibbli, soġġett għall-ħinijiet tax-xogħol fil-qasam tal-attività tad-Direttorat u l-iskeda tal-laqgħat tal-Kunsill Ewropew u tal-Kunsill. Int u l-persunal tiegħek tkunu tistgħu tibbenefikaw mill-arranġamenti tax-xogħol flessibbli tas-SĠK, inkluż it-telexogħol. Ikunu meħtieġa missjonijiet okkażjonali barra mill-pajjiż (madwar tmienja kull sena), normalment ġewwa l-UE.

Qed infittxu

Qed infittxu maniġer bil-kapaċità li jmexxi u jimmotiva tim kbir li jkollu għarfien dwar is-sigurtà u esperjenza ta’ ħidma f’ambjent ta’ sigurtà u għarfien tar-rwol u l-funzjonament tal-Kunsill Ewropew u tal-Kunsill. L-għarfien u l-esperjenza fil-ġestjoni tas-sigurtà fiżika, il-kontinwità tal-ħidma u/jew attivitajiet dwar is-sigurtà tal-informazzjoni jkunu ta’ vantaġġ. L-esperjenza fis-sikurezza fuq il-post tax-xogħol mhijiex essenzjali, iżda l-persuna f’din il-pożizzjoni trid tkun lesta biex tassumi rwol ewlieni fil-promozzjoni ta’ standards għoljin f’dan il-qasam fis-SĠK kollu. Esperjenza fil-baġit, l-akkwist u l-kuntratti tkun ta’ vantaġġ.

Il-maniġers kollha tas-SĠK huma mistennija jagħtu pariri lill-ġerarkija tagħhom u lill-partijiet ikkonċernati, imexxu l-persunal u r-riżorsi finanzjarji tagħhom u jirrappreżentaw lis-SĠK. Dawn l-aspettattivi jinsabu fil-profil orizzontali tal-maniġers tas-SĠK, fl-Anness I.

Barra minn hekk, il-persuna impjegata ser ikun jeħtieġ ikollha:

—	kapaċità li taħseb u tippjana b’mod strateġiku, li tantiċipa u tidentifika problemi potenzjali u li tipproponi soluzzjonijiet u kompromessi fattibbli;

—	ħiliet ta’ tmexxija u l-kapaċità li tiggwida, timmotiva u tawtonomizza lill-persunal f’ambjent ta’ diversità u multikulturali, b’enfasi qawwija fuq l-iżvilupp tal-persunal;

—	ħiliet ta’ komunikazzjoni eċċellenti, inkluż ħiliet ta’ komunikazzjoni interpersonali; il-kapaċità li tippromwovi spirtu b’saħħtu ta’ tim u li żżomm relazzjonijiet tax-xogħol tajbin ma’ firxa ta’ interlokuturi interni u esterni u l-kapaċità li turi diplomazija;

—	il-kapaċità li tmexxi t-tibdil u tappoġġa lill-persunal waqt it-tibdil;

—	kapaċità qawwija li tippjana u torganizza x-xogħol ġenerali tad-direttorat sabiex jintlaħqu l-iskadenzi kritiċi u li tieħu ħsieb it-tqassim ġust tax-xogħol fost il-membri tat-tim u l-ippjanar tas-suċċessjoni;

—	il-kapaċità li tilħaq qbil jew għanijiet komuni billi tagħti pariri speċifiċi lill-partijiet ikkonċernati u billi tiffaċilita b’mod effettiv u kostruttiv diskussjoni li twassal għal riżultati li jgawdi minnhom kulħadd.

Peress li s-SĠK iħaddan politika ta’ mobbiltà għall-maniġers tiegħu, li għandu jkollhom esperjenza estensiva, il-kandidati għandhom ikunu lesti u kapaċi jaħdmu f’oqsma ta’ attività differenti matul il-karriera tagħhom fis-SĠK.

POLITIKA TA’ REKLUTAĠĠ

Fil-mument tal-applikazzjoni, l-applikanti jridu jissodisfaw ir-rekwiżiti li ġejjin:

(a)	Kondizzjonijiet ġenerali — ikunu ċittadini ta’ wieħed mill-Istati Membri tal-Unjoni Ewropea; — igawdu mid-drittijiet kollha tagħhom bħala ċittadini; — ikunu wettqu kwalunkwe obbligu impost fuqhom mil-liġijiet dwar il-lieva.

(b)

Kondizzjonijiet speċifiċi — ikollhom lawrja universitarja (1); — ikollhom mill-inqas 15-il sena esperjenza professjonali rilevanti li minnhom ikunu effettivament wettqu mill-inqas tliet snin f’responsabbiltajiet maniġerjali u organizzattivi. Tliet snin esperjenza f’kariga b’responsabbiltajiet sinifikanti ta’ koordinazzjoni jkunu ekwivalenti għall-esperjenza maniġerjali meħtieġa; — peress li l-Ingliż u l-Franċiż jintużaw b’mod estensiv għall-komunikazzjoni fis-SĠK u ma’ istituzzjonijiet oħra, huwa meħtieġ għarfien eċċellenti ta’ waħda miż-żewġ lingwi u għarfien tajjeb tal-lingwa l-oħra. L-għarfien ta’ lingwi uffiċjali oħra tal-UE huwa ta’ vantaġġ.

Nota:

(1)

Din il-pożizzjoni teħtieġ awtorizzazzjoni tas-sigurtà li tippermetti aċċess għad-dokumenti klassifikati (livell EU TOP SECRET). Il-kandidati li japplikaw għall-pożizzjoni jridu jkunu lesti jgħaddu minn investigazzjoni ta’ sigurtà skont id-Deċiżjoni tal-Kunsill 2013/488/UE (2). Il-ħatra għal din il-pożizzjoni ssir effettiva biss bil-kondizzjoni li l-kandidat magħżul jew magħżula tkun kisbet ċertifikat validu ta’ approvazzjoni tas-sigurtà. Il-kandidati mingħajr awtorizzazzjoni tas-sigurtà ser jiġu offruti kuntratt temporanju sakemm jinkiseb ir-riżultat tal-proċedura tal-approvazzjoni tas-sigurtà.

(2)

Il-persuna magħżula għandha tkun lesta ssegwi t-taħriġ tas-SĠK fil-maniġment.

RIMARKA

Peress li din il-pożizzjoni hija indikata bħala sensittiva, il-membru tal-persunal li jokkupaha jista’, wara perijodu ta’ ħames snin fil-kariga, ikun obbligat jibdel il-pożizzjoni.

PROĊEDURA TAL-GĦAŻLA

L-Awtorità tal-Ħatra ser tiġi megħjuna minn bord konsultattiv tal-għażla sabiex tagħżel il-kandidat. Il-bord konsultattiv tal-għażla ser ikollu l-appoġġ ta’ ċentru ta’ evalwazzjoni, immexxi minn konsulenti tar-reklutaġġ esterni. Ir-rapporti stabbiliti miċ-ċentru ta’ evalwazzjoni għall-istess tip ta’ pożizzjoni ma jibqgħux validi wara sentejn mid-data li fiha saru l-eżerċizzji rilevanti jew mat-tmiem tal-kuntratt qafas bejn is-SĠK u ċ-ċentru ta’ evalwazzjoni inkwistjoni - skont liema data tiġi l-ewwel.

Il-bord konsultattiv tal-għażla l-ewwel ser jevalwa u jqabbel il-kwalifiki, l-esperjenza u l-motivazzjoni tal-applikanti kollha, abbażi tal-applikazzjonijiet tagħhom. Abbażi ta’ dik l-evalwazzjoni komparattiva, il-bord konsultattiv tal-għażla ser jagħmel lista ristretta tal-aktar kandidati adatti li, fl-opinjoni tiegħu, għandhom jiġu mistiedna għall-ewwel intervista. Peress li din l-ewwel għażla hija bbażata fuq evalwazzjoni komparattiva tal-applikazzjonijiet, l-ilħuq tar-rekwiżiti ta’ din il-pożizzjoni vakanti ma jiggarantix stedina għall-ewwel intervista. Minn fost il-kandidati intervistati, il-bord konsultattiv tal-għażla ser jagħmel preselezzjoni tal-kandidati biex jattendu ċ-ċentru ta’ evalwazzjoni, kif ukoll għat-tieni intervista mal-bord konsultattiv tal-għażla.

L-ippjanar proviżorju tal-għażla huwa kif ġej:

—	huwa mistenni li l-kandidati magħżula għall-intervisti jiġu infurmati sa nofs Marzu 2020;

—	l-ewwel intervisti huma previsti għat-tieni nofs ta’ Marzu 2020;

—	iċ-ċentru ta’ evalwazzjoni huwa previst li jsir sa tmiem Marzu/il-bidu ta’ April 2020;

—	it-tieni ċiklu ta’ intervisti huwa previst għat-tieni nofs ta’ April 2020.

BAŻI LEGALI

Din il-pożizzjoni qed tiġi ppubblikata f’konformità mal-Artikolu 29(2) tar-Regolamenti tal-Persunal għall-Uffiċjali tal-Unjoni Ewropea (3) (pożizzjoni maniġerjali superjuri).

Din il-pożizzjoni ġiet ippubblikata lill-istituzzjonijiet kollha tal-Unjoni Ewropea u barra mill-istituzzjonijiet.

KIF TAPPLIKA

Id-data tal-għeluq għall-applikazzjonijiet hija l-21 ta’ Frar 2020 f’12:00 nofsinhar (ħin ta’ Brussell).

L-applikazzjonijiet jintlaqgħu biss bil-posta elettronika u jridu jintbagħtu lil:applications.management@consilium.europa.eu (4) mhux aktar tard mid-data tal-għeluq. Mhumiex ser jitqiesu l-applikazzjonijiet li jaslu tard.

Għandu jintuża l-indirizz elettroniku indikat hawn fuq għal kwalunkwe korrispondenza marbuta mal-proċedura tal-għażla (fis-suġġett tal-email għandu jkun hemm it-titlu li ġej: CONS/AD/158/20 ORG.5).

Qabel ma jippreżentaw l-applikazzjoni tagħhom, il-kandidati għandhom jivverifikaw sew jekk jissodisfawx il-kriterji kollha ta’ eliġibbiltà biex b’hekk jevitaw l-esklużjoni awtomatika mill-proċedura tal-għażla.

Biex ikunu validi, l-applikazzjonijiet iridu jinkludu:

(a)	il-formola tal-applikazzjoni (Anness V) mimlija u datata kif meħtieġ; il-formola tal-applikazzjoni elettronika tinsab fuq is-sit web tal-Kunsill minn dan il-link: http://www.consilium.europa.eu/en/general-secretariat/jobs/job-opportunities/

(b)

curriculum vitae dettaljat (5), flimkien ma’ ittra ta’ motivazzjoni, bl-Ingliż jew bil-Franċiż, preferibbilment fil-format Europass (http://europass.cedefop.europa.eu), li jkopri l-karriera kollha tal-persuna li tapplika u jelenka, fost oħrajn, il-kwalifiki, l-għarfien lingwistiku, l-esperjenza u d-dmirijiet attwali tal-persuna li tapplika; u

(c)	kopji tad-diplomi li jiċċertifikaw l-edukazzjoni u kopji tad-dokumenti u ċ-ċertifikati relatati mal-esperjenza professjonali. Id-dokumenti ta’ prova jridu jinħarġu minn parti terza u mhux biżżejjed li sempliċiment tintbagħat is-CV msemmija f’b).

Id-dokumenti kollha ta’ prova mehmuża mal-applikazzjoni jridu jkunu f’format MS word text, pdf jew jpg, jingħataw isem (bl-Ingliż jew bil-Franċiż) u jkunu nnumerati f’sekwenza (Anness 1, 2, eċċ.). Trid tiġi mehmuża wkoll lista tal-annessi kollha. Applikazzjonijiet li jaslu bil-posta, jew permezz ta’ soluzzjonijiet ta’ ħżin ta’ data bbażati fuq cloud jew pjattaformi għall-kondiviżjoni tal-fajls mhumiex ser jiġu kkunsidrati.

Fil-każ li tintgħażel minn fost il-kandidati nitolbuk tipprovdi d-dokumenti oriġinali msemmija hawn fuq.

Ser tintbagħatlek email li tikkonferma l-wasla tal-applikazzjoni tiegħek. Tajjeb li tkun taf li qatt ma jistgħu jiġu eliminati għalkollox diffikultajiet tekniċi marbuta mat-trasmissjoni ta’ emails. Għalhekk, jekk ma tirċevix email li tirrikonoxxi l-wasla tal-applikazzjoni tiegħek, jekk jogħġbok ivverifika li s-SĠK ikun irċevieha billi tikkuntattja lil applications.management@consilium.europa.eu. Peress li l-bord konsultattiv tal-għażla ser jibda l-ħidma tiegħu ftit wara d-data tal-għeluq għall-applikazzjonijiet, inħeġġuk tagħmel kull verifika meħtieġa fil-ġimgħa ta’ wara dik id-data.

OPPORTUNITAJIET INDAQS

Is-SĠK huwa impenjat li jipprovdi opportunitajiet indaqs għall-impjegati kollha tiegħu u l-applikanti għal impjieg (ara l-Anness II). Bħala impjegatur, is-SĠK huwa impenjat biex jiżgura l-ugwaljanza bejn is-sessi u biex jipprevjeni d-diskriminazzjoni fuq kwalunkwe bażi. Jilqa’ b’mod attiv l-applikazzjonijiet mill-kandidati kwalifikati kollha minn ambjenti diversi, fost il-ħiliet kollha u mill-bażi ġeografika l-aktar wiesgħa possibbli fost l-Istati Membri tal-UE. Biex tiġi promossa l-ugwaljanza bejn is-sessi, is-SĠK jinkoraġġixxi applikazzjonijiet min-nisa.

Tista’ tiġi pprovduta assistenza lil persuni b’diżabilità matul il-proċedura ta’ reklutaġġ. Għal aktar informazzjoni, jekk jogħġbok ibgħat email indirizzata lil equal.opportunities@consilium.europa.eu

RIEŻAMI TAL-APPLIKAZZJONIJIET

Il-proċeduri marbuta ma’ lmenti, appelli u riferimenti għall-Ombudsman Ewropew jinsabu fl-Anness III ta’ dan l-avviż ta’ pożizzjoni vakanti.

PROTEZZJONI TAD-DATA

Ir-regoli għall-ipproċessar ta’ data personali b’rabta ma’ din il-proċedura tal-għażla jinsabu fl-Anness IV ta’ dan l-avviż ta’ pożizzjoni vakanti.

---

(1)  L-Artikolu 5(3)(c) tar-Regolamenti tal-Persunal għall-Uffiċjali tal-Unjoni Ewropea (ir-Regolamenti tal-Persunal) jesiġi li l-applikanti jkollhom mill-inqas:

(i)	livell ta’ edukazzjoni li jikkorrispondi ma’ studji universitarji kompluti, iċċertifikati b’diploma meta t-tul ta’ żmien normali tal-edukazzjoni universitarja jkun ta’ erba’ snin jew aktar, jew

(ii)	livell ta’ edukazzjoni li jikkorrispondi ma’ studji universitarji kompluti, iċċertifikati b’diploma u esperjenza professjonali adegwata ta’ mill-inqas sena meta t-tul ta’ żmien normali tal-edukazzjoni universitarja jkun ta’ mill-inqas tliet snin.

(2)  Id-Deċiżjoni tal-Kunsill 2013/488/UE tat-23 ta’ Settembru 2013 dwar ir-regoli tas-sigurtà għall-protezzjoni ta’ informazzjoni klassifikata tal-UE (ĠU L 274, 15.10.2013, p. 1).

(3)  Ir-Regolament (KEE, Euratom, KEFA) Nru 259/68 tad-29 ta’ Frar 1968 li jistabbilixxi r-Regolamenti tal-Persunal tal-uffiċjali u l-kondizzjonijiet ta’ impjieg ta’ uffiċjali oħra tal-Komunitajiet Ewropej u li jistabbilixxi miżuri temporanji applikabbli għall-Uffiċjali tal-Kummissjoni (ĠU L 56, 4.3.1968, p. 1) (Ħarġa Speċjali bil-Malti, Kapitolu 01, Volum 02, p. 5), emendat l-aħħar permezz tar-Regolament tal-Parlament u tal-Kunsill (UE, Euratom) Nru 1023/2013 (ĠU L 287, 29.10.2013, p. 15).

(4)  Dan l-indirizz elettroniku huwa kkollegat ma’ indirizz elettroniku funzjonali u jista’ jittratta biss messaġġi b’Livell ta’ Kunfidenzjalità “Normali”; emails mibgħuta b’livell ieħor ta’ kunfidenzjalità (eż. “Personali”, “Privat”, “Kunfidenzjali”) ma jistgħux jiġu pproċessati. Għaldaqstant agħżel il-livell ta’ kunfidenzjalità “Normali”. Id-daqs tal-email tiegħek m’għandux ikun iżjed minn 25MB. Jekk l-email tiegħek, flimkien mal-hemżiet tiegħu, tkun ta’ daqs ikbar minn dan, jekk jogħġbok qassam l-hemżiet tiegħek fuq għadd ta’ emails.

(5)  Il-kandidati huma mitluba ma jinkludux ritratti fis-CV tagħhom.